You are currently viewing LALTHLAMUANPUIA

LALTHLAMUANPUIA

Spread the love

LALTHLAMUANPUIA

BY : Vanlalpeki Fanai

‘’ Thlamuanpui, hei ka thiani bungrua ho hi ilo thiarfel pui zung zung dawn nia aw. Kan luhsan dawn che a nia’’ thiannu Maremi’n sumo atanga ka chhuk rual rual chuan an nau niawm tak, rawlthar chhuak hlim tih hriat taka hmel hmai la nau em em leh mitmeng lian lam, hmaifang tha tak,, pian inkhaithli zet mai bawk si hnenah chuan lo ti zui nghal bawrh bawrhin kei chu ka lo inthlahrung deuh lek lek. Ka bungrua te chu khaipui va tuma chet ka lak rual rual chuan amah Thlamuanpuia lah khan ka kut chu rang zeta min rawn vai sawn sak pah hian

‘’ Lo ti duh suh. Ka rawn khai lut vek mai ang’’ tih pahin hlim hmel hi min la hmuh deuh sang leh ta nghal a, uluk zet hian kei chuan ka lo melh ve reng ringawt.

‘’ Eli, lo luhsan rawh. Tlangval an awm lai hi chuan hahdam taka awm ve tur’’ in chhung atanga Maremi a rawn au leh tak lauh lauh ah chuan keipawh chu khawmuang duh ta bik lo in Thlamuana pawh ka pui buai duh ta bik lova, ani lah khan fiah em em mai hian min lo la en kar reng leh ta nghal a, mak tak maiin kei nula senior hi ka zam chhe thei lek lek mai nia! Mipa hmaa lai chhe taka ka awm lohna chin pawh hi ka hre tawh lo hial zawk e a. A awihawm loh zawk.

Thlamuanpuia’n ka bungraw neih ang ang te min thiarfelsak hnu chuan amah lah chu hmuh zui tur pawh awm lo in a bi bo zui leh ta daih  bawk a, lawmthu takngial pawh ka hrilh hman ta lo a nih ber chu.

‘’ Eli, I chau viau anga, I rawn kalna te a hla tham ve angreng si a’’  Maremi pa pu Zira chuan lo ti ve leh luamin kei chu ka han khi deuh sak phawt a. ka chauh loh thu leh ka that thu chu lo hrilh ve maiin, inbual tur chuan ka bathroom ka pan zui nghal daih.

Elizabeth Lalmuankimi niin tunah hian kan khua, aizawl atang ka thiannu Maremi te khua thingtlang khaw lian ve tak pakhatah zirtirtu hna ka hmuh ve hlauh avangin tihian a thawk turin ka kal ve ta rawih a ni a, ka rin ai takin an khua chu alo nuam a, a lian fu bawk. Maremi nen hian tunhma, college kan kal lai atang tawh a inhmelhriat inkawm chho tawh niin, ani chuan tihian an khaw middle schoolah zirtirtu hna a ruah thu hi min rawn hrilh ve vang vang a, keipawhin interview te hmachhawn ve rap rapin tihian Pathian zarah leh ka thiannu Maremi te chhungkaw zar liau liau in ka thawk ve thei dawn a ni a, an chungah hian lawmthu sawisen loh ka ba a ni ber e.

‘’ Thlamuanpuia hi khawiah nge maw alo kalbo leh hman tak chu aw. A ngal te hi a chak leh lutuk a in chhungah hian hmuh tur a awm hman ngailo reng reng’’ Maremi nu, pi Lawmi’n a tih bawrh lai chuan pawn atang hian Thlamuanpuia ngei mai kha meng phawk hra chungin a rawn tei lut ve nawlh bawk a, ka lo nuih ve sak ringawt. Mahse, ani thung chu ka hmel a rawn hmuh rual rual khan lai chhia tih hriat zet hian hnuailam melhin a hmui a liak zui zauh a, a kalsawn daih.

‘’ Pi, min ko emni?’’ ti lang langin choka lama awm mek a pi pawh khan vin angreng fe hian alo chhang let zui zat mai a. 

‘’ ko ang chu. Khawiah nge ilo petek kual leh hman  tawh a. kha, inhnuaiah zu chhuk thla la kan arpui tui lai kha talh turin zu man tawh. Tlai lama hmeh hma turin I han buatsaih nghal dawn a nia’’ lo ti zung zungin, kei chu choka lamah ka tlan lut ve nghal zat a, mi buai em em laia lo awm mai mai nuam ka ti thin lo. Chu erawh ka taimak fal vang a ni bik hauh lo thung. 

‘’ ka lo pui dawn che emni?’’ ka han tih  chuan phawk fe hian an pi tu khan min rawn en let nghal haw mai a, ka lai leh lek lek  mai. Chutah, Thlamuana chuan chiang fea min rawn melh deuh kawk chung hian,

‘’ Nang khan arpui khu I man ang maw!? Lo thu mai mai zawk la ka lawm ngawt ang’’ ti lung lungin ka chhan letna pawh nghak tawh lo chuan inhnuai lamah min chhuksan ta daih lehnghal. Diktak chuan aizawla piang leh seilian nimah ila han inlak no kual  vel hi ka nei ve ngai lem lova, ka mizia pawh a ni lo hrim hrim bawk. Ka thiam ve lo.

Tichuan zan riah tuihnai takte chu kil ho in kei chu min lawm thiam em em a, min duat bawk si nen inthlahrun a na duh zawk khawp mai. Tin, hetianga zanriah kan kil chhung zawng pawh hian Thlamuana kha chuan melh khat pawhin min melh tha ngam miahlo tih ka hriaa, ka nuih a tiza lek lek thei hial. A che naupangchhia thei lutuk hi a lawm awm ru angreng tlat thin.

‘’ Thlamuanpui, lo sengfel mai rawh aw. Eli-I bungrua hi ka’n tihfelpui lawk a nge’’ Maremi’n a tih chuan Thlamuana pawhin lo hnial lem lo mahse keimah zawk hian hrehawm ka ti thin a, tlangval alo ni ve tawh bawk nen chutia tirh kual phar reng te chu hrehawm alo ti ve ang tih ka hlau a, ka vengthawng a ni ber. Dawhkan bula tawi hrat hrat chung hian kei chuan

‘’ Aih! Kei chu a hmanhmawh thlak hleinem. Ka lo sengfelpui phawt zawk ang che’’ ka han tih ve ngial pawh chuan amah Thlamuanpuia zawk khan a lo phal leh ta tlat lo. Ka plate ken lai chu min rawn chhuhin Maremi room lamah min nawr lut ta rawk rawk zawk a, ka lo nui ve uarh uarh ringawt. A chet duhdan hi ka lawm thin em a tin ni.

‘’ In puih tih vel hi chu Thlamuanpuia bung leh changah a awm ve lo a nia. Thil reng reng a kuta a tlak tawh chinah chuan tu puihna mah hi a duh reng reng lo. Hahdam deuh khan awm la inthlahrung reng reng suh tlangval fel alawm a nih a’’ tih pahin Thlamuana chu ava siai pah zeuh a, room kawngkhar kalhin khum chungah chuan a thu thla zui nghal zat bawk. 

Aizawl atanga ka chhoh hnu reivakloah ka kal chhan ber leh hna pawh chu zawm ve nghalin, rinai tak hian an khaw middle school pawh chu alo changtlung ve reuh a, school thar veng vawng leh fai tak niin naupangho nise an hmel hmuh a nuam a, an tha tlang viau mai bawk. Duh aiin ka tlangnel mah mah anga ka che over palh ang tih erawh chu ka hlau ru ve tho mai.

Naupang thuawih leh fai tak tak te zirtirna han pek chu a nuamin boruak hi an tizangkhai vah ka ti mai. An bula awm a nuam hlawm em em a, naupang mai ni lo, chu khaw mihringte hrim hrim pawh chu an zavai mai chuan an changkang ru em em vek a, an tlawmngaiin biangbiak nise an nuam bawk si. Khawpui mihring tamtak ai hian heng thingtlang mi tia kan sawi te bulah hian khawsak alo nuam zawk fe niin ka hria. 

Thla hnih chuang ka thawh hnuah phei chuan nuam lo ka tih hlau in ka thiannu Maremite chhung chuan an inhnuai chu ka khawsak theihna tur tawk vel hian min khawrpum sak ta nge nge a, luah man nise min laksak duh miah lo lehnghal. Mahse, keimah zawk hian nuam lo ka tih vang leh ka tihbuai thin em avang hian a khat mawi tawk chuan hum haw tir chin ka nei ve thin tho. Nia, mite hi kan chunga an that zawh pauh leh nuam lo tihna alo lian ve thin a, thatna chu thatna veka rulh tur a nih ang ngeiin kei pwh hian rulh let ve zel ka tum bawk. 

‘’ U El, kan lo leng dawn aw I phal em?’’ Thlamuanpuia ve tehmial chu! A zakzum thin viau emaw tih laiin ava inhmeh lo tak. A lu chauh chu kawngkaah chuan rawn dak lutin chiang fe mai hian min rawn melh kiau leh ta nghal a. ka lo melh ve kar ringawt.

‘’ Lo lut tha hle hle rawh’’ fiam pah titih a ka lo biak chuan kawngka chu rawn hawng zau in a rawn pen lut ta zan zan mai a. mahse, a hnung lawkah chuan a thianpa niawm tak amah aia palian zawk mah hi rawn tel ve in an rawn inzui lut ta mai a nih chu. Kei chuan pangngai taka lo dawngsawngin thutna awm ang ang te pawh ka lo kawhhmuh ve zung zung thung a, an thut fel hnuah amah Thlamuanpuia bawk chuan ni danga min biak thin loh dan deuh hian in la mi tak zet leh inti puitling ru em em in min rawn be leh ta vel a. ka awih lo lek lek zawk nia. Nidang zawng zawngah kha chuan ka mita min melh chu sawi loh, min be ve ngam țawk thin kha a ni a, mak chu ka ti ve reng. A thianpa awm ve vang te chuan a inla pa ve hlek te pawh a ni mahna le. 

‘’ U El, hei ka thianpa hian alo hre ve thin che a, a sawi ngun tawh bawk che sia tiin ka rawn len luhpui deuh tawp’’ a sawi zawh rual chuan amah lah chu ala au chhuak thut leh ta nghal a, a thianpa khan a malpuiah alo chumsak zawt chu niin. An va han naupangchhia dun tak aw. A hlimawm angreng. 

‘’ A pawi reng reng lo, rawn leng ziah ru aw. Ka khua hi a har thin viau zawk a nia’’ lo ti ve zung zungin an ni pahnih chu an in melh ralh a, an khi dun leh suk thin. Min biaa, chhanna ka pek zawh rual apiangin an in mitmei zauh zel a, an nui leh suk thin bawk. Naupangchhia diktak hi an ni mai e. chumi zan chuan rei pawh leng lo in min hawsan ve leh mai a, keipawh chu ka mu zui nghal mai. Mahse, a tuk atang chuan ka rin lawk loh dan deuh in Thlamuanpuia thianpa Lalnunenga zawk chu a rawn leng lut ve ta fo mai a, a felin biak alo nuam ve chhap bawk nen, thu nise a awih phian zel bawk si a tiin keipawh chuan reiloah ka lo nel zui ve ta phian a. Tin, amah hi mi hawiharh chi leh thothang tha tak niin, tunah hian aizawl lamah college kal ve mekin chawlh hmanga a rawn haw ve lai tak a nih thu te chu min hrilh ve a. Diktaka sawi chuan Thlamuanpuia ai hian a palian zawk a, a hmelthat zawk bakah hmeichhe han biak vel dan a thiamin a kawm thiam riau zel a, a zei zawk bawk tihna nih chu.

Khami zan atang khan ka in chu rawn len luh nan tak a hmang chho ta a. A thianpa Thlamuana awm loh chang te pawh chuan amah chauhin a rawn kal hram hram thin. Sawi tawh ang khan keipawh hian ka lo ngaina ve tawh em em a, kan boruak hre thawi mi thenkhatte phei chuan ka bialpa emaw tiin min chhaih fiam leh zuk thin. Chutiang hunah chuan pawi tihna hranpa em em pawh neilo hian ka lo nui liam ve mai a, nia, Nunenga hi ka bialpa ni tur anga ka suangtuah ve chang pawhin ka iai hran lo tih ka inhria. Zep thu cheng lo, kum lamah pawh kei aia naupang daih mahnisela a nungchang leh pianphung te hian min hnar hranpa lo em a, ka hnial hauh lo a nih ber chu! Hmeichhiate chuan kum lampang hi kan care ber hran lova, min hmangaih a min enkawl thiam tu kha Kan duh a, ka thlakhlelh ber chu an ni mai. Mahse le, kan inang vek lova, sawi thui theih a ni Chuang lovang. 

‘’ E he! Zanin chu Lalnuna a rawn leng lo ve tlat elaw a? ‘’ dimtea ka kawngka rawn hawn pah chuan Thlamuana chu a rawn phul lut nghal hlut mai a. 

‘’ A nih hi. Ti nge maw ni le, lo thu rawh’’ tia lo chhawn zung zungin ka thlengsil lai te chu ka han rem tha leh te te phawt a, ani pawh chuan min chhang zui tawh lo in thutna tur lam chu a pan zui nghal zat. Chutah, muangchanga a bula ka han thut ve hnu reivakloah chuan mitmeng țim ve hlek chunga min rawn melh zak zak pah hian

‘’ U El, thil pawimawh deuh mai hrilh tur che ka nei a’’ thawp sata rawn tiin, kei chu ka thin alo phu ve zawk zawk tawh a. Ani tehlul hian eng thil pawimawh nge min hrilh tur a neih ang tih ka ngaihtuah. A pu te hian an rawn tir chu a ni em lo ang chu maw..

Chutah, 

‘’ Han sawi ta che’’ tih paha ka va melh ve nak chuan min lo melh ve reng chu niin. A mit lah chu rang zet hian a la sawn nghal vat a, nuam lo ka ti ve lek lek thei. Nia, hei leh chen kan lo inhrawn ve tawhna ah hian Thlamuanpuia kher hi chu ngaihzawn tinah ka la tin chhin ngai lova, chutiang zawng chuan ka en theilo. Nau ang taktakin ka ngai ve tawh a, tin, ani pawh hian nula dang angin min en kherlo ang tih chu hre mah ila min en lo se ka duh zawk bawk. A tu ve ve tan pawh hian a nuam dawn lo. 

‘’ Eng lo a nia, ka thianpa khan aa, a vei thin lutuk che a, mahse, a sawi tha ngam chiah bawk silo tihian min rawn tir ta ringawt a nih hi’’  ban deuh charh leh zam hmel angreng taka a rawn tih takah chuan lehlam zawng takin ka lo thaw deuh huai thei. 

‘’ In ho dun mai mai e a’’ tih pah chuan ka nui zui har har reng a, ani pawh chu awmdan tur ber hrelo tih hriat tak hian hnuailam te melhin a lo nui leh vur vur thin tih ka hmu reng a. 

‘’ Khatiang bak kha chuan sawipui dan tur ka hre tawh lo. E chuan taka, naktuk zanah hian I hman hlauh chuan khaw lanna tlangah lo kal ve se a ti bawk che a, I thei ang tiraw?’’ rawn ti lehin, kei chuan țawngka in ka chhang tawh lova, ka bu deuh nghat nghat ringawt. Ka kal dawn em tih pawh chu ka in hre chuang hauh lo na a ka hnial lem lo thung ni berin ka hria.

 Thlamuanpuia’n min hawsan hnu chuan mu ve nghalin mut hmunah te pawh Nunenga thu rawn chah ringawt kha ka ngaihtuah chhunzawm ta ren rawn phawt a, a rukin ka insik nawk nawk reng hi a nimai. A chhan ka hre biklo, ka phur thak riau nia. Lalnunenga hi ka lo duhin ka lo vei ve tak tak tawh tihna emni le ka ti. A tan ka tha a ngem tih leh, ka tan mi țha a ni dawn em tih lam ka ngaihtuah tawh lo. Ka duhna hi ka umzui leh ruak ruak zel chu a nih hi. 

‘’ Zanin chu khaw lanna tlang lamah thla eng kan han lawm ve mai mai dawn emni?’’ thiannu Maremi tukthuan eikham hlim chu rawn chhukthla in, kei chu hna kal turin ka lo insiam mek thung a. zanin hi full moon zan alo ni tawh a maw.. Chuvang chu emni ang remchang chuh a Lalnunenga pawhin inhmuhpui a tana min lo sawm ni. Ka hawi zau loh  lutukna hian zanin hi  full moon zan a ni tih pawh min hriattir ve reng reng hleinem mawle. Khaw lanna tlang lamah chuan han kal ve ngei tur a nih chu tiin mahni chauh chuan ka khi zui ta vur vur mai.

 Tichuan, Zan hun chu rawn thlengin, an sawi ang tak tak khan thla pawh chu a rawn bial lian tha kher lah tak a. khaw chhungah nise current a lo thim ve thuap mai bawk si nen a lunglenthlak duh angreng viau. Tichuan, zanriah te ei felin ka insiam ve ta nial nual a, chumi zawh hnuah Maremi chu han sawm chho lehin kan pahnih chuan khaw lanna tlang lam pan tur chuan kan inzui chhuak ta nghal bawk. Thla eng lawm ve tur thalai te pawh chu kawng lakah chuan tawk phei zeuh zeuhin ka kal chhan ve ber Nunenga hmel erawh kha chu hmuh tur ala awm hauh lo thung a. A hmunah khan min lo nghak tawh te pawh a ni mahna le.

Tlâng  chu han thleng chho in, rinai tak hian thla eng lawm tura kal khawm mihring pawh chu an lo thahnem ve tawh fu mai a, a then te phei chuan guiter te perhin zai an vawr a, an thu bial laih hlawm bawk nen, october thla full moon tihtakah zan lam boruak chu a vawt deuh sung tawh bawk si a, meipui chhepin an zai a, kut an beng rual dial dial a, an boruak chu a nawm hmel ngawih ngawih. Chutianga Maremi nen thla eng lam hawia thla te kan lo lak mawlh mawlh lai chuan thawklehkhatah kan hnunglam atanga min rawn ko thawm hi hria in Maremi nen chuan kan hawi rual țhawt nghe nghe. Hnung lamah chuan Nunenga leh Thlamuanpuia te thiandun kha lo dingin keini chu nui var var chung hian min rawn melh ve reng tawh hi alo ni a, ka va nuih ve ta sak ringawt.

Nunenga nena kan inkar hi chu Maremi pawh hian min hriatpui ve tawh tho avangin Thlamuana chu a han mitmei ru ta zauh phawt a, an ni pahnih chuan min kalsan zui ta nal nal. Chuveleh Nunenga pawh chuan a tihtur chu hai lovin ka kut awmtha hle hle lai chu dimtea rawn vuan Chung hian chiang zetin ka mitah tak min rawn melh nghal bawk a. ka lai chhe teuh kher. Tichuan, kan awmna hmun chu kalsan in tlema fianrial deuh leh hmun ualau ni tho si, midang kal pawh lutuk lohna lam pan chuan kan va thu dun ta ren rawn phawt a. sawi tur ber pawh hi ka hre lo. Mahni aia naupang nen kan inkawp ve dawn chu a nih hmel a, kum upa zawk mah ni ila sawi tur hi ka hre thlawt lo. Ka lai chhe hmasa zawk ziah ringawt  mai. Chuti chung Chung pawh chuan Nunenga hi a fel em a, tawng hun te hi a hre thin hlauh bawk nen ka mualpho lo mai mai ni ber hian ka inhria. 

‘’ Nuam I tih loh hmel e. kan thiante kha an rawn tel ve loh vang nge, an tel ve loh vang a nih chuan kan va ko ve mai dawn emni?’’ rawn tichhuakin a hmel chu uluk zet mai hian ka lo en ve veng veng reng a, min hmu fuh lo hlauh.

‘’ Ni love, chu lam a ni lo. Eng lo, diktaka sawi chuan kum lam hi tam ve tawh viau mahsela ngaihzawng erawh sawi tham ka la nei lo thung a, ka thiam lo a ni ber mai’’ lo ti let ve niah niahin , ani chu a nui mai a. zep miah loh chuan a hmel hi tha ka tiin, a hmelthat dan te pawh hi pa ngawih ngawih ka ti a, a khabe ruh kual fuh lutuk te leh a nuih zawnga a ha țo thuah mawi dangdai tak rawn lang thin te pawh hi, a,, keipawh hi ka lo en chik leh mah mah thin. Mi zawng zawng aia țha bik bialpa nei niawm tak hian ka lo en leh vang vang zel mai. Ka kut chu rawn hum lum vang vangin a han thaw khu leh hlat thin a, sawitur hi kan va han hrelo dun tak em aw. Chung lama thla bial eng em em mai a khat tawka han thlir chhoh leh, in melh zeuh chunga nuih var var tih mai loh chu sawitur dang reng hi kan hre lo a ni. Nge, kan hre lutuk a kan sawi ngam lo zawk tih pawh hi ka hrethiam tawh lo.

‘’ Zanin chu zan dang nen I inang lo. I tawng duh lo riau’’ ka han tih takah chuan min rawn melh ralh chung hian a khi deuh sak ringawt a, ka kut pawh chu a hum nghet leh ta sawt ni berin ka hria.

‘’ Hetiang khawpa hnai ah hian ka lo la hmu ngai miahlo che a’’ 

‘’ Chuan engtin ?’’ 

‘’ Ilo hmeltha takzet a ni tih hi ka hriatchian phah a’’

Ka kut pawh chu a rawn hum nghet leh ta sauh mai. Ka mur sung sung thei nia.

‘’ Min bawl suh aw’’ zawi sapa ka lo tih chuan za fahran lova rawn nuih leh sak pahin ka darah a rawn vuan a, ka țim sung sung thei. 

‘’ Chuan, hetiang khawpa inhnaih hian Kan la thu dun ang tih ka lo ngaihtuah ngai miahlo a, nuam ka ti takzet. Ka famkim ta huai nimai hian ka hria’’ a rawn tih leh te chuan chhungrilah hian ka lo lawm ru ve em em a, sawi tur ber pawh chu ka hre chuang lo. A hmuh loh turin ka nui var var reng a chu zawng chu nimai. Zawhna a Siam emaw, min bia a nih loh chuan sawi ve tur ka hrelo, a bo vek! 

Chu lai hmuna reivaklo kan thut leh hnu chuan haw mai tumin kan chhuak phei ve ta bawk a. mahse, rei pawh kan la kal hman lo tih ah hian thingbuk pakhat hnuaia Thlamuanpuia lo thu ngawi reng chu va hmu in ka pan nghal vat. A bul lawkah chuan ngawi renga va ding ve in amah chu uluk zet hian ka han melh leh vang vang phawt a, ka awm ve tih chu ala hre chuang lo niin a hriat. 

‘’ Muanpui, I mu thlu emni?’’ ka han tih chuan muangchanga rawn hawi chhuak ve in min rawn melh nghal kar bawk a, chutah, rang zeta a mit chu laksawn leh pah hian inthiamloh hmel em emin a inbeng kang zui vat a, a khuh kharh kharh reng bawk. 

‘’Aih muthlu lo ve. In haw thei tawh emni?’’ ti nghal zung zungin a han hawi kual leh ang thuak thuak a, kei chuan

‘’ Hman chu a nimai. Hetah hian mahni chauhin eng nge ilo tih a’’ lo ti let ve vatin,

 amah bawk khan inthiamloh hmel fe hian

‘’ Ka lo nghak deuh che mawle! Khawnge Lalnuna pwh chu’’ 

tih pah chuan a han hawi kual leh zung zung a, kei erawh chuan hmun danga min lo nghah thu chu lo hrilh ve in , kal mai tuma ka inher lai chuan amah bawk kha rawn tawng chhuak lehin,

‘’ Zanin thla eng zet chu duhber te nena thlir veng veng ava chakawm ve le’’ rawn ti zauhin kei pawh ka ding zui ve leh det a. Amah ka va en nak chuan uluk em em hian a kekawr ip zen chung chuan chunglam thlirin alo hawi chho veng veng tih ka va hmu a, a bulah bawk khan ka va ding tha ve leh ringawt.

‘’ Thlirpui tur te chu I nei tha ngawt ang ka lo tia. Hetah hian a awm ve lo zawk nge’’ nui sang chunga ka han tih ve chuan lo thaw chhuak deuh halhin a melh ngai melh reng chung chuan min rawn chhang ve leh mai bawk a.

‘’ Hetah pawh a awm lo, hmun dangah pawh a awm chuang lo. Ka thinglungah erawh hi chuan a awm reng thin. Mahse, Kei chuan ka duh leh ka hmangaih chu ka chan fel ta niin ka inhria! Beisei tur ka nei ve tawh rih lo!’’  rinai taka a tawngkam rawn puitling vel lutuk chuan ka nuih a ti za tlat pek a, mahse, amah ber chu a thutak em avangin ka nui chhuak tha ngam lo zawk mai mai.

‘’ Duh ruk deuh chu I nei ve tihna ava ang ve. Min hrilh la ka lo sawipui ang che aw’’  engthawl angreng taka ka han tih leh pawh chuan mood uih hmel zeta min rawn țhen khum nang nag chung hian 

‘’ Awmzia a awm tawh lo ka tih kha. Kal teh ang’’ tih pahin ka dar tawn tawnah a rawn vuan a, min kuai her zui sawkin hmalamah bawk chuan min nawr kal leh ta dawt dawt mai.

Lalnuna chuan kan in thlenga min thlah haw thlapin hetah hian Thlamuana leh Maremi te pawh khan min rawn zawm ve leh tawh a, khawlai dung reh leh eng tha em em si ah chuan fiamthu te thawhin kan kal nui uarh uarh hlawm a, zun ka cheh țhelh nghe nghe lehnghal, țhing ru thin khawp mai.

Hemi tuk atang hian thil reng reng chu a danglam țan a, a inthlak thawk ka ti dawn nge, nidanga nitin zantin rawn lawr thin Thlamuana kha areh zui hmak mai a, a hmel chu hmuh tur a vang thin sawt khawp mai. Tin, Lalnuna pawh zirlai mai ala nih angin calss an tan leh tawh a, aizawlah a liam thla vang vang tawh bawk si nen, ka khawhar lungleng lutuk chu engemaw chang chuan tah bawrh bawrh mai te ka chak rum rum thin hial a, aizawla haw ve daih mai te chu  chakin ka chhungte pawh ka ngai thar thei hle. 

‘’ Thlamuanpui, lo ding lawk teh’’  

ka school kal tur chuan vanneihthlak deuhin Thlamuanpuia hnathawk kal tur chu a hnunglam atang ka va hmu fuh hlauh mai a. chutia ka han koh takah chuan ani pawh chu lo ding ve nghal maiin, hnuailam melh ran chung hian min lo nghak ve mai bawk. Ka tlan phei zui vat.

‘’ Tunlai hi ti nge min do deuh tihna emni? I hmel hmuh tur a vang em a’’ ti zui duahin, ani chu alo kiai leh sak ringawt a.

‘’ Chutiang lam pawh a ni lo. Tunlai chu kan hnathawhna lamah kan bang har thin sia ka lo chau ve bawk thin alawm mawle’’ ka mitah pawh min melh tha ngam lo chung chuan a rawn ti ve a, kei chu ka ner zui sak sak ringawt.

‘’ I thianpa nise a kalbo leh daih tawh si a, a khawharthlak thei lutuk. Nang tal chu reh lo la ka duh , a nuam lo tehmai a nia’’  mitmeng dur khap khap chunga lo ti ve in, ani chu a nui leh mai a, min la melh ngam chuang miah lo.

‘’ Nia, ka lo reh tawh lo ang. Kan tih palh a ni e ka pi! A nih, ka kal phawt ang aw. Nangpawh kal tawh rawh I tlai a nge’’ rawn ti leh zung zungin min kalsan zui a. keipawh chu lawm tehchiam lo chung chuan ka kalna tur lamah ka peng zui ve vat. Nilengin Thlamuanpuia ringawt mai chu ka ngaihtuahna luah khattu niin, ka tum loh deuh deuh hian ka lo ngaihtuah leh veng veng thin a, inthin harh nawk nawk chang pawh ka ngah phah khawp mai. Hetianga ka ngaihtuah chhuah chiam chiam chhan hi amah ka duh a ka ngaih vang em em pawh niin ka hre hran lova, ka laka a khawsak dan danglam ta thut leh, in la hrang ta thut te khan kei hi tihsual neiah min in ngaih tir a, hrehawm ka tih vang ni berin ka hria. Chuti chung chung pawh chuan a hnena ka thilsawi te khan awmzia an nei lo ni berin ka hria a, rawn luh chu sawi loh, a hma zawng ai pawh khan a reh zual a, a thawm riva takngial pawh hi hriat zui tur a awm ta map lo nia. A chanchin chu Maremi bula ka han zawh lahin a that thu leh a kalbo loh thu hlirin min chhang mai thin si a, tihngaihna tak pawh ka hre tawh lo zawk. Chubakah, chutianga han ngaihven thar tehchiam mai te pawh chu nuam lo tiin, ka thiani te chhungkaw lakah ngei pawh chuan a inthlahrunawm ka ti a, ka insum ru ve hram hram zawk. Chutihlaiin Nunenga nen erawh kha chuan kan inkar chu ala tha em em a, biak hmasak pawh hi ka chang hman ngai meuh lo a tihtheih awm e. mipa mahnise a kum naupang zawk tihtakah hian engemaw chang phei chuan a lehkhazir thulh thaka min biak te a tum tawh thin a, min ngai viau tih chu hre mahila keini pahnih induhna leh inthlakhlelhna vang ngawta a hma hun tih chhiatsak kha tha lo ka tiin chintawk ka neih pui hram hram thin. Kei talin ramri kham chin ka neih loh chuan ani hi chu ka thuawih reng renga khawsa a ni thin a, chuvang chuan a tha zawnga kawihher hram ka tum nasa viau bawk.

Second term exam zawh hnu chuan hun reilote chawlh nei ve in aizawl lamah ka chhuk thla thei ta a. Ka chhungte pawhin min lo ngai ve tawh hlawm hle. Chutiang bawkin Lalnuna nen pawh inhmuhna hun kan nei thei a, min lo ngai lutuk chu a khawngaihthlak thei lehling hial zawk. Mahse, exam an la zawh fel miau loh avang khan  duh ang thalin hun kan neih loh phah a, inhmuh  kan duh chang chuan a hma ni atang  theihpatawp chhuahin alo in en lawk tawh thin a, tichuan kan inhmu ve thei chauh thin. Keimah vanga a hma hun chhe tur ka duh lo ka tih tawh kha. Engemaw chang chuan mahni aia kum naupang lutuk leh zirlai ni bawk si ngaihzawn chu keimah ngei pawh hian hrehawm tih a buaithlak tih chang ka nei ve fo thin a, ka duhna hian min uai thlu hneh hle lo phei se chuan mahni aia kum naupang zawk te ngaihzawn leh kawp tumna hi ka nei ngailo asin le. Chutihrualin Lalnuna thung hi chu mipa rilru puitling leh fel zet mai kha a ni miau a, ka inchhir em em pawhin ka la hrelo. Hma hun chu ka hre lo na a, tunah rih chuan ka la inchhir lo ka tihna a nih chu. 

‘’ Thlamuanpuia nen in inhmu thin em?’’ chu zawhna chuan ka suangtuahna ram ata chu min kai harhin, amah Nunenga melh vang vang chung chuan helai ka chhuk thlak dawn țuma Thlamuanpuia hmel puthmang leh min melh dan engkim mai te kha ngaihtuah chhuak nghal zut zutin mitthlaah a rawn lang tha leh a, min be hauh lo tihte thleng pawhin ka hre chhuak hnuhnawh nghe nghe. A mak ka ti. Thlamuanpuia hian ka lakah eng rilru chiah nge a put ang tih ka ngaihtuah chhuah chang hi chuan mak tih fe fe thil tamtak hi ka nei ve ngei alawm. Ka ring ngam lova, ka nemnghet duh lo mai chauh a ni e.

‘’ Hmu thin em em lo. A rawn be ngai lo che emni?’’ tia ka han zawh let hnu chuan uluk taka a hmalam melh vang vang chung hian a han thaw chhuak deuh halh phawt a.

‘’ Be ngai lo. Um, a buaithlak a nih hi. Hmeichhe hmangaih leh vei em em mai ka nei a tia, tu nge tih ka zawh lahin min hrilh tha duh chuang bawk silo. Mahse, bem turin thu han rawn ila a ngawi zui tlat a, a beidawnthlak thu a sawi leh tawp a, ka hrethiam tawh bik lo. A tu hmeichhia pawh chu lo nise ka thiana nunphung leh nungchang hi chu a thlak danglam sak ve chiang alawm’’  a rawn tih chuan hrethiam em em lem lo mah ila ka lo bu ve nghat nghat reng tho a. keipawhin a khawsa zia mak ka tih thu bawk chu ka lo hrilh ve ringawt.

Hun te chu liam leh hretin keipawh ka hnathawhna khaw lamah bawk ka chho leh tawh a, Nunenga erawh chu exam te ala zawh fel loh deuh avangin ala haw hman ve lo thung.

Ka in chhung ka han lut leh chu boruak hi a reh zui tlawk tlawk nimai hian ka hria a, chhun pachan laia thleng chho ka lo ni chhap bawk nen a reh duh tlawk tlawk khawp mai. Ka thawmhnaw te chu dah felin in chung lamah ka tlanchho lehnghal vat a, aizawl atanga ka hawn chhohsak an thil tur theuh te chu pe in, Thlamuanpuia thil tur ka hawnsak phawrh chhuah rual chuan

‘’ Hei hi Thlamuanpuia ta ve tur a nia, alo haw hunah in lo pe mai dawn emni’’ tih paha Maremi ka va en chuan a nui hmel chu tawpin hnuailam a lo melh zui nghal daih mai a. min ti hrilhhai lek lek hial. Chutah,

‘’ Thlamuanpuia chu hetah a awm tawh hleinem!  A nu pianna pa, a pu te khaw lamah a kal ta a nih kha! ‘’ a rawn ti chuai ta raih mai nia! 

Engvang nge ka hrelo, kha thu a sawi rual khan kei chu ka lo nghilh dup nimai hian ka inhriaa, a kal tur thu takngial te pawh chu min rawn hrilh hre lo in a kalbo daih ang maw? Eng chiah hi nge maw a hriat le ka ti. A hma pawh a ka lo sawi tawh ang deuh khan he pa hian kei hi min do ta tak tak tihna a ni thei a ngem. Chutiang mi ta se, engvang ber nge ni ta ang? A ruk hian a pawi ka lo sawi reng emni ang. A hrehawm ru duh ve angreng khawp mai. Tichuan, th tam pawh sawilo in a thil tur ka hawnsak pawh chu amah ber a awm tak siloh ah chuan tiin ka hawn let leh ta ngawt a, thlep tha sauh sauhin ka suitcase mawng berah ka dah ta daih a nih kha. Nakinah inhmuh leh hun te pawh ala awm thei a, chung hunah chuan ka pe ve tawh mai ang chu. Kan inhmu nawn tawh lo a nih erawh chuan tihian amah hriatreng nan ka Kawl țha ve tawh mai a ni ang chu. 

Ka haw chhoh atang khan thla te pawh liamin Nunenga pawhin exam te chu tluang takin a rawn zo ve tawh a, a rawn haw chho ve ta bawk. A rawn haw hnu atang chuan nitin zantin kan inhmu leh thei tawh a, chhawn chhaih tur Thlamuanpuia awm tawh lo mahse Nunenga hian ka khawhar a hnem thiamin mal taka min dah hi a tum lo hrim hrim a, a tihzia tak tak. Tin, Thlamuanpuia pawh kha phone hmanga va be ve in, a  awmna thar chu nuam a tih zia thu te, an nula te ho an chhiat loh thu te nen lam chuan a rawn sawi luam a, nuam a tih hmel tak tak kher. A ngeiawm zawk. Amah erawh chu, Engvang nge ka hrelo, a hlim tih ka hriat khan nuam ka lo ti ve a, min do tawh lo tih ka hriat phei kha chuan hlim tak tein ka hlim . Ka thawl huai huai a ni zawk mah ang chu. 

Ni khat chu hna kalloh ni a nih avangin mahni chauh chuan inah ka lo awm ve rak rak reng a, chutia album te en a ngawi renga ka lo awm mial mial lai chuan ka hminga min ko thawm niawm tak hi hria in ka han eih vak mai a. chutah, thiannu Maremi chu rawn tlan thla hlawk hlawkin nui hawr hawr chung hian ka bulah chuan a rawn thu thla zui nghal chat bawk a. A phone chu rawn lek va va chung hian

‘’ Awi en teh hei, kan Lalthlamuanpuia hian nupui alo ru ve ringawt a nih hmel chu!! An thlalak min rawn thawn vang vang a’’  tih pahin a phone chu min han en tir nghal nawk nawk bawk a. Rang zet hian keipawhin a phone chu ka lo ban ve sawk sawk mai. Nia, kan Thlamuanpuia  hian nupui chu sawi loh, bialnu takngial pawh a nei ve thei lo ang tihtur khawpa mi zeihawi lo nia kan lo ngaih khan nupui hmeltha em em mai neiin an la inhmeh dun phian leh ta nghal a. ka lawmpui ve tawp. Ni e, Thlamuana hi mipa zei lo leh zakzum ru em em mahnisela a chhelo tlat a, a pian a nalhin a tawi chhe lem lo bawk a, inkhaithli pangngai tak a ni. Tin, a hmel hi hmeichhe tamtak duh tur chi ka ti mai. A chhe lova, a tha uchuak hran lo bawk a, a pa hrak thung. Chutihrualin a zei loh lulai em avang hian hmeichhia a bem hmasa ngai lova, a ngam hek lo. A thiam lo hrim hrim a ni zawk mah ang chu. Hmeltha a chhelo  viau e ti lo chuan bialnu a nei thei ngai lo, zei loh lutuk hi chu alo pawi a ni e. Fel viau lo phei se Chu a chhiatlohna hmang ringawt hi chuan hmeichhe pakhat pawh a chhai thlu thei lovang. A ngaihna a awmlo ve lehchhawng tlat. 

‘’ Awi an inhmeh reuh dawn lutuk e. lo zin dun thei se ka va han ti tak’’ phur em em a ka han tih chuan Maremi thung chuan hmel thutak deuh leh uang deuh tho si hian

‘’ Han duh ve la chu nangmah nen hian in inhmeh ka ti asin le’’ rawn tiin, ka nui lai chu ka tawp zui nghal chawt a. A hnungzanga chum awrh pah hian 

‘’ Thil ni lo pui pui hi sawi thin suh. Ani te chu ka nau ang chiahin alawm ka en ve’’ lo ti letin, Maremi thung chu a hmel kha a thutak tulh tulh.

‘’ Sawi tawp Mai Ila, Eng lo a nia, heta I rawn awm tirh atang daih tawh khan a lo duh tawh che a nih hmel a! Ani chu a mizia I hriat kha. A zei loh leh zahzum luatah hian a hmeichhe duh ve ngwih ngawih te pawh duh lo ang maia lang daih thin a ni a, a duhthu che pawh hi ka hnenah khan a sawi  ru ve fo thin. Min hrilhsak rawh te pawh ti fo mahse tikhan a thianpa nen ngei mai in inzui nghet ta chawt bawk si a, a beisei zui ngam ta lo che a ni e. Chubakah, I duh taktak pawh ka ring ngai Chuang lo. Diktak chuan kan hnen atanga a kalbo nachhan diktak pawh hi engdang ni lo in nangmah vang hi a nia! A rilru kha I hriatpuina awm hauh silo khan I ti kehchhe ve chiang em a ni. I hmel a hmuh fo kha chuan awm reng thei dawn in a inhre tawh lo te pawh a ni mahna, heta tang khan mittui nen a kal chhuak a, ka nu leh pa te khi chuan a chhan diktak  pawh hi an hre  ve lem chuang lo. A hriatpui tu ber kei hi min  ti mangang ru thin teh asin aw. A nungchang kha chu a hlauh ve chiang takzet asin thiani’’ a rawn tih chuan uluk em emin a thilsawi chu ka lo ngaithla a, ka țim uaih uaih thei nia. Chutiang chu thil awmdan diktak a ni thei ang maw.. Mak ka ti. 

‘’ Mahse hei a duh leh hmngaih em em nupui a nei tawh tho alawm. Kei chu min theihnghilh ve thei mai ang chu tiraw?’’ zawi sapa ka lo tih ve chuan chiang em em mai hian min rawn melh zui kawk ringawt a. A thaw leh hak thin  bawk. 

‘’ Ka hre lo le. A theihnghilh vang che chu a nih ka ring chiah lo. Nang ang em em a hmeichhe vei leh buaipui, a nungchang zawng zawng hloh phahna khawp hmeichhia hi ala nei ngai lo reng reng. Tette atanga kan lo enkawl chhoh tawh kha a ni bawk a, ka hrechiang ve khawp mai. Nia, nangmah theihnghilh nan che a a neih zawk pawh chu a ni mahna. Theihnghilh che in hmalam pan ve thei sela a tha khawp ang chu’’  a rawn tih leh chuan nuam lo ka lo ti tawh kher. 

Thlamuanpuia chuan kei ve mai mai min theihnghilh nan hian hmeichhe dang thinlung chu infiampui lo hram se ka va ti tak em. Engah nge hetiang thu te hi hman atang khan hrilh hriata ka lo awm tawh zawk loh le. A tlai hret a ni.

Khatiang chungchang Maremi’n min hrilh hnu atang phei kha chuan ngai hi ka awh hleithei tawh lo. Hun tha zawng zawng a liam tawh hnuah kei hian Thlamuanpuia hi ka duh tha ve leh dawn tihna emni ang. Ka ngaihtuah ngut ngut reng a, a hma ang chiah khan ka tum loh deuh deuhin mut hmunah te hian ka lo suangtuah leh veng veng zel. Nge, kei hian a hma atang daih tawh khan ka lo duh ru ve tawh anga ka inhrethiam lo zawk ni ang. Nau ang maia ka en thin khan min vei a, min duh thin hle tih ka han hriat tak chinah chuan  ka lo hnar phal bik awzawng lo tihna emni ang. Engpawh chu nise tun a tan chuan a tlai tawh. Ani chuan nupui neiin chhungkaw tha tak din a tum ve mek a ni a, keipawhin ngaihzawng nghet nise ka nei ve tho bawk. Tihbuai loh hi a țha zawk. Heiha! Thil khirh tak zawng ava ni chiang tehlul em.

Tlai khat chu in chung lampangah thawm ri deuh hluai ka hriat thut avangin a rang a rang hian ka tlan chho ve nghal thurh a. Ekhai! Rin loh lutuk in Thlamuanpuia leh a nupui niawm tak te chu ka han hmu ta nawlh mai a nih chu! Ni danga ka awm ngai loh dan deuhin a hmel ka hmuh rual khan ka țim zui sung sung thei a,ka lai ve ringawt bawk. 

Kei chu tha tak taka min lo bia in a nupui nen pawh chuan min in chibai tir bawk a, amah taka nen pawh chuan in chibai ve in a kut ka han deh rual ringawt te khan ka hrethiam lo ka mur chhuak vek tih chiah ka hria. Ka duh lo tak tak a ni. Ka mitah nise chiang em em hian min en reng zel bawk si a,  alo danglam ve ta lutuk chu a mak ka tiin min ti zam chhe thei mai dawn.

A nupui lah khan  a pasal rilru chu hre hauh lo in kei chu tha tak tak hian min be siam siam reng thei a, ka lo inthlahrung ru ve ngawih ngawih thei. Hetiang thil hi ka tawn ve ka beisei lo asin le. 

Chutiang zelin Zan lamah pawh Nunenga nen chuan in chung lamah bawk leng chho lehin, aizawl atanga a thil tur ka hawn sak ve te pawh kha rilru insual buai nuai chung chuan ka pe ve ta nge nge a.

‘’ Kha, ka rawn hawnsak ve che a ilo kalbo daih bawk si a, I hmu har ta bik a nih kha’’ tiin ka han pe a, ka rilru put hmang diktak chu lan chhuah tir loh hram ka duh a ni. ka kut atanga a lak ruala a mitmeng danglam zawk leh, min rawn melh dan te, engkim mai khan keimah ah hian nuam lo tihna min thlensak a, ka hriatpui ve hauh loa a rilru k lo hliamsak tawhna ah te khan hrehawm ka ti thar ngawih ngawih.

 Kan thut fel tawh hnu thlenga min rawn melh dan te leh a tawngkam hman duh dan te khan min tih hrehawm vang leh nuam lo ka tih tawh em avang chuan Nunsanga hmai ka zah zova, lehlamah a nupui pawh kha venthawn alo ngai ve reng bawk si nen thingpui te kan in zawh fel hnu chuan rei pawh thu duh tawh lo in Nunenga chu ka chhuahpui ta ringawt. Ka awmdan buai ru zet mai kha amah Thlamuana leh Maremi te kha chuan an hrethiam ve ngei ang chu.

Thudik engkim hriat tawh hnua a hmel ka han hmuh leh chiah phei kha chuan ni e, ka zep buai peih tawhlo. Keipawh hian ani kha ka lo duh ru ve reng tih hi ka inhre tawh a, mahse, khua a tlai zo tawh si. Ka vei thar zui em em a, ka bulhnai hmuh phak lawkah awm ve reng mahsela ka ngai viau zel a, amah hmu chak leh thlahlelin ka phi ruai reng tawh a ni ber a. Mahse, ka duhdan te chu umzui turin theihna ka nei ve tawh lova, tlinna reng ka neilo a, ka thiam lo hulhual bawk. Tin, ka ngaihtuahna thunun thei lo khawpa khawsak chang te chu neiin, Nunenga pawh ngaihsak thei lo leka awm chang te ka nei ta fo mai a, min biak mawlh mawlh pawh a lo hriat miah loh te leh, a call lak peih loh chang te, text message ringawt pawh a biak that peih loh chang te chu neiin Thlamuana hmel ka hmuh ngun deuh phei chuan keimah ah hian danglamna nasa tak a rawn thleng chawpchilh thin a, mahni pawh kan in theihnghilh titih ta fo mai a nih chu.

Tichuan, thla te pawh rawn liamin krismas alo hnai leh ta kuarh mai. Thlamuanpuia te nupa pawh kha hetah la awm ve rengin krismas te pawh hman nghal an tum bawk a. chutiang zelin keipawh ka thawhna school lamah chawlh te nei ve thei tawhin aizawla haw thlak mai tum chuan ka inpuahchah chho ve tawh a, ka peih lo ru angreng fu mai. Mahse, han haw loh ringawt kha thil theih ni bik hek lo le, Thlamuanpuia mawlh mai chu hmuh reng ka duh a, kan pahnih tan a thil tha ber ni lo mahse ka kal hlatsan  hreh takzet a, hun pui te hi han zo in he khua ka thlen chhoh leh hunah chuan ani hi hmuh tur alo awm tawh awm silo. Chung thil ringawt ngaihtuah chuan ka tha a zawi zova, ka eng tih mah hi a tui thei tak tak tawh lo a ni e.

‘’ Tunlai ka laka I khawsak dan hi ka hrethiam thei lo che. Min hne ta deuh tihna emni?’’ Nunenga chuan ka mita min melh kar chung hian a rawn ti ta sup mai a. chhan ngaihna tak pawh ka hre lo ve. Chutia chhang let lova ka han ngawih tak vang vangah chuan ka khabe ah rawn vuan thutin chiang em em mai hian kan inmelh dun ta kar mai a, min en uluk kher.

‘’ Ngawi renga min kalsan hi I rilruk deuh tihna emni? Chung ai chuan tawngka ngei hian sawi chiang la ka tan pawh a ngaihthat thlak zawk ang’’  rawn ti lehin a kut chu ka laksawn sak ta phawt a. Thaw zui leh halhin ka hawi sawn san daih.

‘’ Inthen ang. Inthen ka duh’’  ti hul hakin, kha thu sawi chhuah kha harsa ka va han ti tak em. A mitah pawh ka melh ngam lo hrim hrim. Mahse, ni e, ka thinlungah hian lal dangin ro an rel tlat tawh si  a, chutiang a nih chuan ani hi ka hmangaih lo tih pawh ka chiang viau. Chuvang chuan pawisawi hlei lo thinlung thianghlim infiampui nana hman reng mai chu nuam ka ti lo in kalsan vang vang kha ka duh tawh zawk a, nakin lawkah thil thalo zawk ala thlen tho tho dawn ai chuan tihian tunah ti tawp vek ila ka duh ta mai. Kei hi chu mal takin awm mai mai ila, ka nih nih ni ta vel mai mai bawk ila pawi pawh ka ti tawh lo e. ka phu tawk chiah niin ka hre ta ngawt.

Harsa ti tak chunga inthlahin mittui tla lo chauh hian min kalsan ve ta hram a. kei, a tana mi tling lo leh rilru dik lo pu hi min kalsan se, lo let pawh tum buai duh tawh lo se ka ti ngawih ngawih. A chhan chu maw, engtikahmah hmangaihna mitin ani kha ka melh thei tawh ngai dawn lo tlat a tin ni. Nia, tunhma atang tawh khan ka rilru puthmang hi lo inhrethiam tawh ni ila tunah te hian ka hmangaih kiangah awm ve in hlim takin Thlamuanpuia nen damlai par chu kan chen dun ni tawh mai tur. Chu erawh chu ngaihtuah chhunzawm ngam chi a nih tawh loh chu. 

Ni khat pawh chhun pachan reh lai tak hian ka in chhung tawm ning lutuk leh insiam tha peih tawh lo bawk si chu in chungah tlan chho in Maremi han biak ka tum rilru deuh a, mahse, in chhung ka luh rual chiah chuan bathroom atanga inbjual zo hlim tih hriat taka Thlamuanpuia rawn chhuak ve chiah nen chuan kan inmelh zui ta vang vang. Ka țek chhak. Chutihnakalaiin A kawng fek rât china a towel ven lai tih loh chu thildang reng reng inhliahkhuhna a neih loh avangin a taksa mam nalh leh fit tha tak, sek mawi em em mai te khan ka mit chu rawn la nghal chatin, melh loh hram tum hle chung chuan ka inveng seng lova reilote kha chu ka lo melh tlawk tlawk a nih tak kha. Ani pawh kha ka hmel a hmuh ruala danglam ve thin tho a nih angin chet sawn zai a rel hleithei bik lova, min rawn melh ve vang vang mai. Hetih lai hian Kan bulhnaiah chuan midang an awm ve lo hlauh a, chuti nilo se Kan mualpho chiang khawp ang. Chutah, ka awm dan diklo zet chu hrechhuak thutin ka inher zui nawk thei a, inhnuai lamah bawk chuan ngawi reng leh thlan fim bawl țek țek chungin ka tlan thla leh ta nal nal zawk a ni.

In chhungah chuan tlan lutin thutthlengsei chungah chuan rang zet hian ka va thu thla deuh hnawk mai a. ka thaw nghal hlawi hlawi thei bawk. Rei pawh ka thu hman lo ang tihturah hian ka kawngkapui chu rawn intheh hawngin ka duh loh dan deuh hian Thlamuanpuia bawk chu ka va hmu leh ta! Chiang em em a ka lo en kar laiin ani chu ka bulhnaiah a rawn pen phei zel a, sawi tur pawimawh tak a nei ang tih chu a țhial pawn rawn pawng leh zauh thin atang chuan a hriat  vek a, ka hmuh hmaih lo nasa. Chutah, ka rin ang ngeiin ram deuh hmarh hian

‘’ Nunenga I then ve ngawt nachhan kha ka hre duh. Keimah vang a ni lo ang tiraw? I then chhan zawng zawng kha a bul ber chu keimah tiraw?’’ aw khur ru dar dar chunga rawn tiin , amah thut hlatsan tum chuan ka tho zui deuh thut a, mahse, kut tha chak tak hian ka ban rekah chuan nghet zetin min rawn man hman tlat. Min pawt let dawrhin ka tum loh deuh hian a awm lian leh hlai tha tak maiah chuan ka va bei ta then mai a. ka khur ru dar dar thei tawh hial. 

‘’ Thlamuanpui, tuna I huaisenna ang hi engvangin nge hmanah khan ilo neih tawh loh a. Tunah chuan a tlai tawh. Ka ta tur ini ve lo’’  tiin thawhsan leh mai ka han tum a, min lo pawt bet ta sauh sauh mai nia.

‘’ Min thlah rawh. Midangin min rawn hmuh palh vaih chuan a pawi thui viau ang aw’’ tih pah te chuan ka theihtawp takmeuh meuhin han namsawn chu tum ve mah ila awmzia erawh  a nei tam lo kher.

‘’ min rawn hmu rawh se a pawi ka ti lo! Nang ka hnaih theihna tur che a nih phawt chuan mi zawng zawng do pawh hi ka huam asin’’ 

‘’ chutiang tur a ni lo. Pathian hriatpuina thlapa nupui nei tawh ini a, Pathian hi I hlau lo emni?’’  khur dar dar chunga ka lo tih leh chuan min la kuahbet ve tlat chung hian zaidam takin

‘’ Hlau e. Pathian hi ka hlau. Chutiang bawkin nang hlat che hi ka hlau bawk. Engtin nge ti se min tih. Ka nupui hi ka then leh mai dawn emni? Aw,, hmanah khan huaisenna chhete tal kha lo nei ve ila chuan ka thianpa dinhmun ang kha ka dinhmun ni ve thei mai tur. Ka dawihzep tiraw?’’  chu thu a sawi lai chuan a hmel chu ka han en chhin a, dawt a sawi mai mai lo tih hriat tak hian a mittui chu alo tling kuau thei. Ka khawngaih mai mai mange. Mahse, ani leh kei hi chu khuanu ruat kan ni ve lo tih hi kan pawm thiam a ngai a, in kalsan hi a tha zawk. Ka ta tur nise hman hmanah khan ka kiangah awm in min kalsan lo anga, Keipawh in ka rilru puthmang te ka hrethiam vat bawk ang. Tunah chuan a tlai tawh tih hi kan pawm ve ve a ngai. Tichuan, min kuahna pawh chu zawimuanga phelhsakin ka tawlh hlatsan ta riai riai a, min lo en uluk hle.

‘’ unau anga kan khawsak zui hi a tha zawk e. A nih loh pawhin thian tal pawh. Ih, tuna tan chuan min kalsan tawh la maw, min theihnghilh theih kha tum bawk la keipawhin ka lo tum ve ang. Ka thiamloh vek an ni e. hlim takin in nupa khan awm tum ula in nu kha hmangaih hle rawh aw. Chu chu ka tana I tihtheih tha berah ka lo ngai mai ang. Chho tawh rawh’’ ka mittui tla tur chu dang ve hram hramin ka insum nasa lutuk a ka in pet nawk nawk thei.

Ani pawh chuan thudang sawi tawh lo in min kalsan ve leh mai a, a chhuak chiah tih chuan ka thaw zui halh thei. Ka ruak huai nimai hian ka inhria. A hrehawm ngawih ngawih. Ni e, kan tana ruat ni ve lo, kan ta tur ni ve lo hi chu tawng buai tawh lo law law ila an lo tih thin kha a dik zia ka chiang tulh tulh. An hmel kan hmuh rual te hian kan thinlung khawngkhar hi inkalh thlap thin se, an lakah hian eng rilru mah hi pu ve thei lo ila tha tur. Pathan remruat hi hriatthiam a harsa thin teh e. 

Tichuan, a tuk khua chu rawn inherchhuak lehin, aizawl lama ka chhuk thlak hun tur pawh alo inherchhuak ve leh ta. A ruk tak chuan ka hreh ngawih ngawih  a, tihtheih nei ila ka va han ti tak em. 

Ka bungraw neih ang ang motor chunga an hlan chhoh lai te chuan Maremi khan min rawn be ve char char mahse ka rilru ngaihtuahna erawh chu in chhung lama tawm bo tlat Thlamuanpuia kiangah khan an awm vek thung si.  He khua ka thlen chhoh ni kha chuan helai hmunah hian amah ngei khan ka bungrua te pawh min chawithlak sakin engkim kha min tih felpui vek a ni a, tunah erawh chuan a them pawhin a rawn inlan duh lo a ni si a. Nia, heng zawng zawng hi min huat a min hmuh peih loh vang leh min do vang a ni reng reng lova, ka hria alawm, a hlata ka kal tur leh ka kalbo tur hi hmuh hrehawm min ti thin tih ka hria. Ka dem hran love. Chutihrual erawh in , a tawp nan taktak a hmel erawh kha chu hmuh nawn leh ka chak khawp mai. Ka ngen nawn ngam tawh map silova.

Aizawl ka thlen thlak hnuah pawh lunglenna chuan min la thlah theilo in ka chhungte mak tih khawpin ka danglam a, ka zia ka thlak phah vek hi a ni ringawt e. ka unaute phei chuan thinrim țun chungin ngaih man ka awm loh thu min hrilh reng ringawt. Engpawhnise hetiang reng ringawt chu a țha lo tih hria in ka harsatna chu pehhel taka ka pa hrilh ve in transfer min dilsak tur chuan ka ngen ta thlawt a. ka pa hi hna sang chelh ni hran lo mahse hetiang lama an hotute zingah hian hmelhriat a neih that ve avangin a harsat vak kha ka ring lo ve tawp. Ka duh ang ngei chuan transfer chu kan han dil ta rawih mai a, ka lo rin ang tak tak khan kan dilna pawh a chhanna kan hmu har lo hlauh. School kan țan leh atanga chawlhkar hnih hnuah kan dilna chu a hlawhtlina hmuin aizawlah ngei min sawn ta hlauh mai a. ka va han lawm tak. Tin, hetia school kan țan a, transfer dilna ka hmuh hma si pawh khan ka thawhna khua kha chu ka tlawh leh ta lo hrim hrim a, ka chawl ve tawp. Tin, Chu khua chu ka tlawh tawh lo hlen dawn a nih hmel e. \

Ka thei ang. A hmel ka hmuh ruala keimaha danglam thin thil tamtak te kha kalbo in tunah chuan buaina ka nei tawh lo anga, zalen takin ka awm ve thei tawh ang chu. Ani pawh khan kei hi min theihnghilh tum sela, a tan ka tha lo tih hi pawm tawp mai rawh se. Chutiang a nih vang chuan a phone number zawng zawngte pawh kha block vekin ka delete a, ka number nise ka thlak phah bawk. Ka hlim phah sawt em tih chu inhre lo mah ila mi nupa inkar tihbuai leh ka hmeichhiatpui rilru tihnatsak ka pumpelh hrim hrim avang hian ka hlim.

Mahse, tlai khat ka hna bang erawh chu ka nau te khan lehkha pakhat envelope hmanga la intuam tha thlap hi min rawn pek pah hian, 

‘’ Hei, apa lehkha pawimawh zingah I ta tur alo awm ve a’’  an rawn tih avangin lehkha chu ka lo laksak a, a rawn thawn tu address takngial pawh alo inziak lo reng reng nia mawle! 

‘’ Ka hmangaihna che hi dawngsawng tu neilo in a thamral dawn chu a ni si a, pawi ka ti. U El, hmanah khan tinge huaisen takin mipa diktak tihtur ang kha ka lo tih ve ngam loh le. Ka tlai ta a nih hi tiraw? Min ngai thiam rawh aw. Pian nawn lehna khawvel te hi awm se, chu tluka thlakhlelh chu ka nei lo ang. Alo awm ta lo a nih pawhin pialralah tal ti tawh mai ang aw. Chu hmunah chuan tu tan mah ti lo in kut inkai rialin kan leng dun thei awm si a. He khawvelah hi chuan ka ta tur ini ve thei ngai dawn silova, a na ka ti ngawih ngawih. Min ngaidam hram ang che. 

A tawp nan, I duh ang ngei khan ka nupui pawh hi hmangaihna dika hmangaih chu ka lo tum anga, chhungkaw hlim tak din pui pawh kalo tum ngei ang. Mahse, ka thei ta lo a nih pawhin min hrethiam a ni ang chu tiraw? Tuin nge a hmangaih tur mihring zingah hian duhthlang thei bik ang le, um, engpawhnise, kan ta tur ni lo chu kan chelh lui thei silova, nangpawh dam takin muttui mangtha ti chung hian ka thlah zantin mai ang che aw…kan intawh leh hma zawng chu, muttui mangtha le!’’ 

Ka chhiar zawh chuan kut khur dar dar chungin lehkha chu ka en tlawk tlawk thei a, ka na  a ni. Ka na ngawih ngawih. I tawngkam hi chelh a, I kianga awm ve a nangnena damlai par chen dun ka va han duh tehreng em. Mahse, tun a tan chuan thil engkim mai hi an khawlh zo tawh a, rem theilo rem tir tuma beih țalh pawhin awmzia a nei tawh hek lovang. Ka ta i ni ve thei ngai dawn Chuang lo. Tihian hlim taka i leng lai chu thlir in hun ka lo chhiar liam ve a nga, ka ta tur diktak chuan min la rawn pan ve em em ang.. Chu hun chu ka lo nghak mai a nge. 

Tichuan, thinlung rum vawng vawng chungin lehkha pawh chu ka lukham hnuaiah ka thawlh lut a, ka mu zui nghal hmak. 

Ni e,,, 

Pialralah chuan keini pahnih hi intawng leh tak ang maw…???

****************************************************************************

Leave a Reply