You are currently viewing CHHANTLUANGA KHA!

CHHANTLUANGA KHA!

Spread the love

                 CHHANTLUANGA KHA!

                By : Vanlalpeki Fanai

Kan zanriah eikham insengfel zo chiah tih hian kan kawtkai mai a mi ṭhahnem tak rawn tlan ri leh khut khut ṭhin chu hria in, a ṭhen te phei chu rawl chhuah meuh hian an au lung lung lehnghal a.

“Lalchhantluang, lo ding rawh. Iva han chak dawn lo rua em!” Tiin patling rual niawm tak thawm chu a ri zui khup khup. Chutihlaiin keini chhungkua erawh chu phawk fe hian kan lo in enkual hrek hrek a. Rang zet in ka pa nen kan tlanchhuak ve nghal bawk. Ka pa chuan zawi sup hian

“Kawmthlang tlangval Chhantluanga bawk em maw ni le?” Ati deuh sup a. Kei chu ka tha alo khur ve deuh bawk nen han chhan let dan tur mai pawh chu ka hrelo hial ani. Pawnah chhuak in kan han hawi deuh vual vual phawt a, chutihlai tho chuan kawngchhak lam aṭang hian kan kohhran tual upa Pu Zahnuna chu thaw hluam hluam hian a rawn chhuak ve hlawl mai. Kei phei chu kalo phu leh zawk tawh. Ka pa chuan Pu Zahnuna chu rang taka lo be sawk sawk in

“E, Pu Hnunte, eng thil nge maw thleng ta hi le. In va han buai hmel hlawm ve aw” atih chuan Pu Zahnuna pawh kan kiangah rawn ding ve thuaiin ala thaw halh halh reng mai. 

“Niang chu mawle, kan Lalchhantluanga bawk hian min tibuai lehpek anih hi. A hahthlak ṭhin khawp mai hei”

“Chu,eng buaina nge alo siam leh tak chu aw.  A zialo ṭhin ngawt tak mai a”

“Aa han sawi pawh hi a hneawm zawk. Englo ania, khitah, Pi Darchhingi te dawr pawisa tlem azawng kha alo ṭham sak pek alawm mawle. Keini pavalai ho lah khan zanin chu Pi Dari te ṭhenawm hnai lawkah committee kan lo nei ve kher bawk si a, chutia thawm an neih tak hlut ah chuan tiin kan tlanchhuak a, hetiang thil hi alo thleng zui ta mai ani ber e”

Kei chu a thusawi vang khan kalo ip zawk thei a, ka tiril pawh ala khur der der tho. 

A chanchin an sawi mek Chhantluanga hi kan khaw tlangval la naupang tak niin, ka chhang chiah ai pawh hian ala naupang daih zawk lehnghal a. Kum a tlin hma daih aṭang tawh khan damdawi jection chi hi a ti ve ṭan tawh a, zu pawh a khat mawi tawk chuan a lem ve leh mai thei bawk. Amah hrim hrim hi chu mipa hmelchhe lemlo tak leh pawisawi lo hmel zet niin, a ngo fai veng reuh a, a thutak ngel ngawl viau zel. A rawlthar chhuak hlim hlawl te kha, kan khaw tleirawl ho duh rawn leh sawi zui ber ni ve ṭhin in a luck phian bawk. Keini tan erawh naupang ang mai kha anih tlat avangin ngaihzawn en ah pawh kan en ngai lemlo a, chubakah amah hi mi zakzum chi leh inkiltawih thei tak, ṭawngtlem em em alo ni lehzel bawk nen kei ngat phei hi chu min zah zual ni hian ka hre ṭhin hial. Chutiang khawp a nungchang ṭha leh hmelhmai pawh chhe miah silo in a ruk a damdawi alo ti ve ṭhin ta chu ka ui em em mai a, ka ui ngawih ngawih ani zawk mah awm e. Tin, a chanchin hi han sawikai ta zel ila. Hetianga damdawi a khawih chhan ah hian amah chu thiamlo leh diklo hulhual ni tho mahse, kei chuan a chhungte zawk hi ani ka dem hmasak daih chu. Tunah hian nuhrawn hrawn in amah hringtu nu erawh hi chu a boral tawh thung. A nu leh a pa te hian amah tihloh hi chu fa an nei hauhlo a, mahse, a nuhrawn nen erawh fa pathum nei leh tawhin, unau pali lai an lo ni ta tihna anih chu. 

Hmanlai nuhrawn sual an sawi ang maiin a nu lah hian a chungah sual a chhuah ṭhin emaw tih mai tur hi ani a, mipa naupang mai a nih lai ata enkawl seiliantu nimahse, a hmangaih ngai lo niin kan hre ve tlat. Chhantluanga hi naupang sual leh tihmawh a nih ngailoh tehlul nen khati em em  a a han tiduhdah ṭhin kha chu mak kan tiin kan nat pui ve thei hial. In kawmchhak kawmthlang mai niin kan inhlat lo hle a, chil chhak phak taktak kan ni awm e. Thawm in hriat pawh hi a harsa lo khawp mai lehnghal. Zingtin hian a nu chuan a hrawk a, a tir phar kual reng a, school pawh kha a chawlhsan hma phah reng asin. Hetiang a thlen lai hian pa ber erawh chu a ngawi tlat a, emaw a nupui sual leh koham zet chu ṭan in a fapa thiamlohna neilo zawk kha an beihrawn ta ṭhin ka ti mai. 

Nuhrawn hrawn bawk, chhungte tihduhdah tuar reng bawk chu, school lamah pawh a tuitla lo chho zel a, chhaih nawmnah te tawkin a tun dinhmun hi alo thleng chho ta kati lo theilo. Tunah hian tlangval ve ek ek ṭan kum 22 niin kei thung hi chu nula senior tawh lam, kum 30 na hmang mek ka ni a, tin, ka hming pawh Joana Tluangpuii niin, mi tam zawk chuan Tluangpui ti hian min ko ṭhin ani.

Chhantluanga chu khawiah tak tlanchhia ang maw tia ngaihtuah zui neuh neuh pah hian inchhungah ka kalsan zui a, tv en ka ṭhut ve reng peih ṭhin loh avangin leh zandang ah pawh ka tih fo ṭhin ang chuan roomah ka lut a, room tifelfai in ka buai zui daih. Ka buai chho mawlh mawlh a, zan dar 9 leh a chanve a rik meuh chuan ka zo fel thei ve hram e. Hetia zan lama ka han singsak tak vak nachhan pawh engdang nilo in chhunah chuan keima pual a dawr chhete ka siam ve hi nghak turin ka buai a, hun ka neilo ṭhin bawk em atin ni. Chutia ka room tifel zo, mu tur a ka intintuah leh lai tak chuan ka room bang bul lawk, pawn lam ni si ah chuan thawm ri hret hret hi ka hre ta a, ka thiltih lai tawp chawtin thawm chu ka ngaithla zui. Ka room bangdep pawn lamah hian tuizem lian ṭha ve tak dah in zanrei ah phei chuan tuizem chhunga tui ri leh barh ṭhin te pawh ka hre thei hial, chutiang khawp a inhnaih chu ani e. Thawm ri sut sut chu a tawp mai loh avangin room aṭang ka chhuak thuai a, ka chhungte chu an lo mu bo vek tawh bawk. Pawnah chhuak leh in phone light ka on nghal a, zawite a ke pen in ka kal zui ta ṭhem ṭhem.

Tuizem hmalam chu chhun kual vel hmasa phawtin engmah ka hmuh tak siloh chuan hnunglam bih tur bawkin ka kal hnai leh ta hlek a, chuta ka phone light hmanga tuizem hnung thim lai ka han chhun leh chiah chu, ekhai! Chhantluanga ngei mai kha kan lungrem chhete ngheng chuan alo ṭhu ngawi reng niin. Chutia ka han chhun en tak pup ah chuan rawn meng zui ve in men chu harsa a tih hmel hle lehnghal a, ka light pawh ka dahsawn vat. Khawlai leh kan veng chhung hrim hrim chu thawm a reh ṭhap tawh avangin zawi ser sawr tak hian ka be zui a

“Chhantluang, eng nge hetah i tih a? Rawn chhuak la, zuk haw thla tawh rawh. Min ti hlau hman ṭep alawm le”

Chutia ka han tih takah chuan a hma aia rawn meng zau ta sawt in a khi deuh sak bawk a. A mitmeng ah chuan ruih nei pawh angin ka hre lemlo, ala rui hman lo zawk pawh ani mahna.

“U Jo, (mi min koh loh dan kher hian min ko ṭhin bik) ka haw ngam lo. Khaw var hunah ka haw zawk mai ang” zawite hian a rawn ti ve sap a. Ka mitah pawh min en ngam tawhlo in a kun zui leh daih. Kei chuan ṭhutchilh ve sauh sauh in zawi ser sawr tak bawk hian

“Engatinge? Tihsual inei emni?” 

Zantir lama a pawikhawihna an sawi kha chu ka hrelo der hmak tawh. He nau hian misual anih zia hi a hriat nawn fo pawh ṭul in ka hre ve lo ani ber ang chu.

A lu chu buk zeuh pahin

“Ihh,, zantirah khan Pi Dari te dawr pawisa ka ruksak pek alawm le. Pavalai ho khan ka chhungte an hrilh leh ngei dawn a, zanin ah chuan ka haw duh hrihlo. Hetah hian ka riah min phalsak mai rawh U Jo” ngenngawl taka a rawn tih leh chuan ka khawngaih reuh hle. Ka lu lo buk nghat nghat pahin

“Chutia i haw ngam hrih miau loh te chuan i haw lo mai dawn ania. Mahse, helai pawn khaw vawt leh thosi kara riah tawp ai zawngin ti rawh, inchhungah, sofa dup nuam deuh chungah i mu zawk dawn nia” 

Hetia ka han sawm ve ngam nachhan pawh hi keini chhungkua chuan he nau hi kan khawngaih a, an chhungkaw khawsak phung engkim kan hriatpui vang leh a humsual dai dan zawng zawngte a chip a chiar deuhthaw a kan lo hriat ve tawh vang niin, chhung inkhwm kan hman pawh hian kan ṭawngṭaisak ve fo ṭhin. Kan fel bik a, kan pianthar fal vang lam nilo in ani hi han en tleu a, han hnualsuat leh thinhrik tur reng reng kan nih bik loh zia kan hriat vang zawk te pawh aniang e.

Ka sawmna chu a pawm hreh tih hriat taka a lu thin deuh nawk nawk pah hian

“Ni love, hetah hian ka riak zawk ang. Nangpawh, va lut tawh rawh. I chhugten an hria ange” tih pah chuan min rawn melh zauh a, a kun zui leh daih thung. 

“Chhantluang, keini chhungkua hian eng kawngah mah han hmuh danglamna che hi kan nei ngai hleinem. I tan zantin kan ṭawngṭai ṭhin tih hi hria la, nangpawh i tan ngei hian ṭawngṭai ve zawk ta che”

“Aih! Ka ṭawngṭaina hi chhan in a awm pawh ka la hrelo e. Kum 15 ka nih laia ka duh ka dil tawh kha tun thleng hian pekin ka la awm hleinem. Engmah hi ka dil tawh dawn lo reng reng, a nei lo aniang, ka duhtawh lo”  keichu kalo nui suk.

“Pathian hi kan duhzawng dil nan chauh kan hmang tur ani lova, kan vui thu hla kan thlenna tur chauh lah ani heklo. Nitin a malsawmna leh zahngaihna hmanga min vur ṭhin te hi mihring chuan kan hrethiam lova, kan hmufiah ngai heklo. Tun thlenga nungdam ila nih theih nachhan hi engdang ni lovin Pathian vang zawk ani asin. A man tam zia hi lawmthu sawi mawlh mawlh tur kan ni e”

“Thih ka duh alawm. Dam ve reng hi eng nge ka tan sawtna awm. Nawmna awm silo, U Jo, thih hi ka duh ani. Ka châk hluah hluah mai. Mahni nunna han lak em lah chu ka ngam bik silo a” tiin a mit a nuai chat chat a. Keiin a bân chu lo chelhsak vat in

“Khai! Khai! Chutiang thil sawina hun leh hmun pawh anih loh hi. Inchhungah lut phawt ila, mu hahdam phawt teh. E taka, Pi Dari pawisa i laksak chu i hmang zo tawh em?” Ka tih leh takah chuan a lu lo thing in

“Cheng khat pawh ka la hmang lo. Min rawn um thut sia hetah hian ka la biru char char” kei chu kalo nui deuh hak.

“Awle awle, a ṭhat nasat chu. Tikhan, engmah hmang lo la, naktukah a kim thlap in i han pe let leh dawn nia aw” ka tih chuan phawk zet hian min rawn melh thuak a, keichuan lo nuih zui sen sen in

“Hlau suh. I tih tawhloh tur thu hrilh la, a ngaidam em em ang che. Keiin kalo ṭawngṭaipui bawk che anga” tih pahin inchhungah ka kai lut zui a. Tim dai hian sofa ah ṭhu in min leh zauh ṭhin bawk. A mak ania, ka mitah hian chiang takin min en ngamlo reng reng. A puansin  tur ka pek leh hnuin keipawh room ah ka lut zui a, ka mu ve ta chauh ani. 

Zing ka thawh ve meuh chuan Chhantluanga kha alo awm tawhlo a, a mutnaah puan kha inthlep fel thlap in alo dah thung. Chumi ka hmuh chuan engvang tak nge hrelo mahila ka hlim a, ka nui zui ver ver ringawt. Rawngbawl a kalo buai em em laiin ka nau neihchhun Rampuia exer la zo chu lo haw ve in, ani hi zing tho hma ṭhang ani a, ka thawhkhalh ngai meuhlo. Ka hmel a rawn hmuh rual rual chuan

“E, Mami, nizanah inriak kan nei emni? Sofa ah pawn saw inthlep diam in alo awm a, kawngka chhunglam ah alo inkalh tawhlo bawk” atih takah chuan ka hmarcha rawt tur then mawlh mawlh pah in keiin

“Aw,  Chhantluanga ka riah tir anih kha”

“Engtin a!? Kawmthlang tlangval Chhantluanga khu maw itih a!?” Ati zui ta lung lung.

“Aw ni e, kan tuizem phenah alo biru a, a haw ngam tawh silo nen. Khatia au vak vak kher kha a ngai lem emni?”

“I mawl emni? Thilbo te kan nei em en chian nghal angai anih chu” tih pahin a vir kual zui ta vut vut a. A khawsak dan vel chu ka ngei em avang leh mak kalo tih bawk em avangin ka thiltih lai chawl meuh hian ka en ta ngawt ngawt ringawt. Ka pa zing leng lo haw chiah leh ka nu inthiar zo lo lut ve chiah te hnenah chuan lo sawi nghal zung zung in keichu mawl min tih thu a sawi chamchi bawk. A ngaihdan ah chuan a awm ang ve viau tho awm e. Addict niin mi puanpho pawh seng ruk sak hrehlo chin ngat kha ani ve tawh tlat atin ni. Mahse, kei chuan ka ring tawk a, a mitmengte kha suahsualna leh mahni hmasialna in a khat lo tih ka chiang bawk. Ka khawngaih ngawih ngawih zawk tih hi ka sawifiah thiam kher lovang le. Tichuan, ka nu leh pa ten an khap tak fak ah chuan Rampuia pawh a dai ve ta deuh chauh ani.

Ka dawr hi eichawp wholesale anga ka kalpui ve avangin thingtlang khua mai mah ni ila, ka buai ve thei hle a, hlawhfa pawh rawlthar pakhat chu ka chhawr ve hial nghe nghe. Chhun thil ka ei zo, ka ṭhu fel leh chiah tih hian Chhantluanga kha dawr chhungah a rawn lut ve hlawl mai a, amah chu a fai vek vawk in ala nui var var zui lehnghal. Hmelṭha veng vawng tak ani e he nau hi chu.

“Ehe! Ve teh hlawl che chuan, lo leng rawh” 

lo ti nghal bawrh bawrh in ṭhutna tur chair ka pe zui vat. Ani pawh ṭhu zui ve maiin pawnlam hawi hian a aw te chu a han thian leh kharh phawt a. A awmdan vel chu zangkhai hmel ka tiin a harhfim viau bawk niin a lang. 

“Eng lo ania U jo, thil lawmawm deuh rawn hrilhtur che ka nei a, ve tlat maiin” tih pah chuan a nui var var a, min melh pah leh zauh ṭhin bawk . Keipawh chu lo nui ve sen sen in engtak niang maw tih chu kalo inzawt ru nasa hman hle. 

“Han sawichhin teh. Ka hrechak ania” ka tih ve takah chuan a hmel thutak zawk a rawn hawichhuak leh in chiang tak hian a vawikhatna atan ka mitah tak chuan a rawn en ta kar mai. Ka ṭim sawk thei ni hian ka hria.

“Pi Dari pawisa kha ka han pe let leh vek a, ka hlauhthawn ang aia lo lawm thiam in Pathian thu te min lo hrilh nual a, ka zak ve lek lek ani. Mahse, hlawhtling ka inti tho” tiin rei pawh min en lo chuan a kun zui leh daih. Ka thinlung takin keipawh hi kalo lawm ve nia.

“Ava han tihzia tak em. Chuan, i chhungte–” ka tih leh laiin ani chuan min rawn pawtchat zauh

“Umm, anni chu ngai ah ka nei tawh. Min hrawk hrep a, ka chhang let lo. An tih fo dan kha ania, ngaih khat ah ngaih an ngai tawh. Englo ania UJo, tun aṭang chuan ka nundan hi siamṭhat ve ka duhtawh a, nupui fanau neih te pawh hi ka chak ve ṭhin tho” ti leh in a lei a han chhuah zauh pek a, a thusawi vang chu nge, inthiamlo hmel hi a pu deuh reng lehnghal a. Mak kalo ṭhin viau. Mahse, a thu han sawi vel hmang ah chuan kei chu lawmna thuk tak hi neiin, a thusawi ngei chu bawhzui a, a nundan ṭhalo takte pawh chu thlah hlen vang vang turin kalo duhpui ngawih ngawih. 

“Ee, Chhantluang, chutiang tih tumna rilru i rawn nei hrim hrim pawh hi kei chu a ṭha ka ti lutuk asin. I thu hi chelh reng la, bawhzuiin ti hlawhchham miahlo thei la ka va han ti tak em. A tirah chuan a harsa in i beidawng rum rum maithei e, mahse maw, Pathian a awm a, nang i awm bawk a, a chelh reng ang che tih hi ka ring tlat ani. Chu chu theihnghilh miah suh aw. Chuan, ṭanpui i ngaihna apiangah kei hian ka pui thei dawn bawk che a” kalo tih ve tak duah ah chuan rawn nui chhuak leh var var in

“Nia, ka nundan ka thlauhthlak vek hunah chuan nang hi ka nupui ini leh bawk anga, tiraw!?” Rawn ti fiamthu hlut in kei lah chuan kalo chum zui awrh bawk a, a nui ri ve hak hak mai. Tichuan, reipawh ṭhu tawhlo in min hawsan leh a, kei erawh in a chhuak ta kha kalo ngaihtuah zui ve reng thung. A intiam ang khan awm hram se, ruihhlo tih leh mi thilruk te hi bansan in mipa pangngai tak khawsak dan tur diktak te hian khawsa ve tawh se tih leh , a hmel pawisawi lo leh ṭha tak mai te, a taksa mawina leh ṭhatna a chhiat hma ngei hian amah duh a hmangaih ngawih ngawih tu hmeichhiate tawng in nupui fanaute hial pawh nei ve thei se tih chu ka duhthusam pui ve niin, tihtheih tam phei chu nei dawn lo mahila, min mamawhna zawn apiangah erawh tlanchhiat ka tumlo bur.

Zanriah ei hma, chhung inkhawm kan neih naah kei chu ka ṭan hun anih angin Bible te chhiarin ka chhiar zawhah chhun lama ka thiltawn, Chhantluanga thusawi vel te kha sawi chhawng leh in, a duhdan ang ngei a a nun chu a siamṭhat theihnan te ṭawngṭai thupui ah ka han thawh zui ve bawk a. A ruk tak chuan ka chhungte chuan ka thusawi chu mak an tiin an awihlo hial emni aw tihtur hian an awm deuh a, a bik takin ka nau mawlh mai chu. Ngeiawm zet hian alo khi vei sawng nia mawle. Umm, ani hi chuan hetiang a nun khawlo leh dai sual palh ho hi a vei lem lova, a hmu mawh viau ṭhin tih pawh ka hria alawm. A rilru chhe lutuk thlak danglam sak tur pawh hian Pathian hnenah dil in ka ṭawngṭaisak ve fo mai. 

Hun a liam leh hret a, ka rin ang deuh leh rin ngam ni chiah silo hian Chhantluanga pawh a reh ve ta vang vang mai a, a rawn inkhawm veleh zuk ṭhin thung. Engvanga rawn inkhawm fo lo nge anih tih ka han zawh chuan a damloh ṭhin thu leh, a suffer fo thu te sawiin, ngawi reng a hrehawm tawrh tlang a duh zawk thu te pawh a sawi ve bawk. A ruk chuan lawm hle mahila, ka khawngaih tho bawk si. A reh vang vang ka tih pawh kha, a suffer ṭhin vang leh chu chuan a sawp zawi hneh hle ṭhin vang anih ka ring leh ta zawk a. Chhel takin tuar tlang thei se tih chu ka duhpui tak meuh meuh.

Chutianga a reh leh vang vang ṭhin avang chuan ngaihṭha lo in an Inah hial ka zu kalchilh ta ringawt a, hetah hian a eitur atan tiin Rasgulla leh Ors te, chhang tlem a zawngte pawh ka kensak nual mai. Inchhung ka han lut chu, nu ber Pi Dingngheti chu hmun hawl fai pah hian alo âng deuh bawrh bawrh mai a. Kilkhatah inthlahrun hmel takin Chhantluanga nau pakhat Ramtiama pawh a lo ṭhu ngawi ve kar.  Chutihlaiin Midang erawh ka hmu lemlo thung a. Nu berin ka hmel a han hmu chiah chu a ṭawng lai tawp chawt in phawk fe hian min han melh ta vang vang phawt. Ka ngaih a ṭhalo hman kher asin.

“E aw, Tluangpuii ni reng chuan. Lo lut rawh. Current thim nen i hmel ka han hmufiah thei lawk lo alawm le” 

A sawi ang takin khua a thim ruai tawh  bawk nen  an inchhung pawh chu a thim chhelh chhawlh tawh viau. Ka chhan let ve hmain Ramtiama chu a han ko deuh ṭhat a, mombati lei turin a tir zui nghal. Keipawh nuam ti lemlo a ṭhut zui ve paj hian an chanchin te ka han zawt zui ve luam a, a chhe lam zawng hlir a sawiin a sawi tui barh barh hle. Chhantluanga erawh a damsam loh avanga a la mut renh thu a sawi tel thung. Karlovah Ramtiama dawr kal pawh chu lo haw in, an han  chhi eng leh zung zung phawt a, kei chu Chhantluanga mutna pindan lamah min tir lut zui ta ani. Hetah hian room a ka luh hma in Pi Dingngheti chuan ka thil khai te chu eng nge annih min zawt leh lailawk a, Chhantluanga eitur annih thu ka hrilh hnu chuan eng thil mah sawizui tawh lo mahse, a hmel landan aṭang khan ṭul a tih loh hmel hle a, a ner deuh nâwng nâwng bawk anih kha. 

Kan tlangval hmelṭha Chhantluanga chu khumah chau tih hriat tak hian alo mu bêm a, alo meng ve reng bawk. Ka hmel a rawn hmuh chuan thei leh theilo a rawn nui ve var var in zawi sap hian

“Ilo kal ve duh a, i va fel em em ve aw” alo ti chuai raih. Kei chu ṭawngchhuak ve mai lo hian a bulah chuan ka han ṭhu thla ve te te phawt a, ka thil ken te pawh phawrh leh zung zung in

“I ril a ṭam em? Chaw te i eiṭha thei maw?” 

Ani chuan a lu chu lo thing zui leh maiin engmah a ei chak loh thu a rawn sawi ta daih. A ti taktaklo nia ka hriat tlat avangin rasgulla chu ka hawng rawk rawk a, ka ei luih tir ta anih kha. Umm, a thil ei dan aṭang pawhin a ril chu a ṭam lo taktak miahlo tih pawh ka hmu thei mai. Hetiang khawp a a nunna tura a bei ve tawh chung pawhin a chhungte hi chuan an la ngaihsak miahlo niin ka hria a, a chhungte rinna a hlawhchhuak theilo leh an support na a dawng lo lutuk hian ka lainatna a tizual in ka thinrimpui ve takzet zet bawk. An fapa hi ṭha chhuak leh se, mi pangngai ang diakin a nun chu rawn hmang ve se tih hi an duh taktak pawhin ka hre ta lo hial a. Chhantluanga chu keimah chauh in enkawl a, siamṭhat ngei ka duhna pawh a zual ta hle mai.

“Damdawi chu ila ti chak ngawih ngawih em?” Ka tih chuan hreh tak hian a lo bu zeuh zeuh a, a mittui a luang ngiai ngiai mai bawk. 

“Anih, vawiinah i che buai leh em?” Ka tih leh pawh chuan a lu lo buk zauh pahin

“Chuvang ania ka chauh zual em em” alo ti sup. Ka va han khawngaih reuh tak.

“Umm, chutiang anih chuan i theih dan dan in eitur ṭha leh hrisel te hi i ei tam a ṭul a, inthlahdah thei ini lo bawk a, i taksa hi tihchhiat thiang pawh ani lo aw. Chuti lo chu i do zo lo palh mai ang” tiin rasgulla bawj chu ka pe zui leh a. Ka hmel a han hmuh takah chuan a thlamuan ve hmel hle in ka hria a, keipawh ka lawm.

Zanriah kil laiin ka nu leh pa te chuan Chhantluanga chanchin vel chu min zawt pah ve reng a, keipawhin kimchang taka lo hrilh ve in kan sawitui ta phian. Chutianga ka hrilhchian ve takah chuan ka nu leh pa te pawh an lawm tih ka hria a, a hma zawng aia ṭawngṭaipui nasat pawh an tum hial nghe nghe. Chutihrualin ka nau Rampuia vr thung erawh alo ngawi kar reng a, kan thusawi vel chu han ngai pawimawh leh ngaihsak awm pawhin a lang der lo. Ka ngei ṭhin ania he nau hi chu. 

Tunah hian tlangval kum 26 mi ni ve tawh in kan khaw Sub Centre ah hian a thawk ve ṭhin a, a kum tam ve tawh ngaihtuah in ala mawl hle a, a mawlna hi a chawl thei der silo. A hahthlak chang a tam ṭhin khawp mai. Hetiang reng reng chuan mo fel tak neih leh vah hmelṭha taktak neih chu ala hla ve ang.

Chhantluanga te in a ka kal hnu aṭang chawlhkar khat a liam a, ani pawh a dam ve tawh hle niin ka hria. 

Tuk khat ka dawr kal tur, ka chhuak dawn chiah tih ah hian Chhantluanga ngei mai chu an in lam aṭangin hnathawh thawmhnaw nen a rawn chhuak chho hlawl mai a. Kan han inhmu thut chu kan ding tlawn ringawt a, kan in melh zui ta vang vang. Mahse, rei rial lovin amah zawk chu a insiamṭha ta zung zung a, a aw te thian leh in keipawh ka lo harh kawk thei. Lai deuh taka a lukhum khawih noh noh pah chuan

“Hei U Jo, hna ka thawk dawn a. Nang, dawrah i kal leh dawn emni?” Ati niah niah. Chu chu a sawi tum tak pawh ni a ka hriat loh avangin ka nuih alo za tlat thung. Mahse, nui chhuak duh lem lo thungin ka insum leh ta zawk a. Zangkhai fe mai hian

“Aw, kal dawn e. Iva han fel em em ve aw,, i damṭha tawh em?” Ka tha te a khur ru vel nia.

“Aw , ka ṭha chu ani ve zel e. Eng lo, ka kal hmaa rawn hmuh che ka chak mai mai ania, inhmuh a khat sia” ti leh nawk nawk in ka chhan letna pawh nghak ta lo chuan min kalpel ta daih a. A che lai vel lutuk leh naupangchhia lutuk ṭhin chuan min tihlim in kei nula senior hian ka thlir zui ta vang vang mai. Nundan ṭha a nung sa reng chu nise, keini ang nula senior mai mai te min han biamṭhat peih dawn loh tehlul nen. Hmm, senior tawh mahila, ka hmel erawh hi chu a ṭha ve thlawt. Ka hmuh zawhloh vang nilo in ka duhtui luat vang chauh a la nula reng pawh hi ka ni a, ka inchhir hran hauhlo e. Ho mai mai.

Zan alo ni a, inkhawm tura ka lo insiam mek laiin ṭhutkhawmna lamah Chhantluanga aw niawm tak ka hriat avangin ka va dakchhuak zuaih. Amah chu alo ni taktak e. Inkhawm thawmhnaw inbel thlap in a chhelo reuh em em lehnghal a. Ka mur sung sung thei nia mawle. Kei hi ka diklo ṭan riau ani. Chhantluanga hi ka ngaizawng in ka duh tur ani lo asin. A harsatna ah chuan ṭanpui tur ka ni a, ka hmangaih tur pawh ani e. Mahse, mipa a nihna leh nulat tlangval inhmangaihna ang kha nilo in, a nunkhua ka thlirpui vang chauh a hmangaih leh ngaihsam tur ka ni. A chhan ka hrebik lo, kha zan, kan tuizem phen a alo bihruk aṭang khan he pa hi ngaihtuah leh veng veng ka ching sawt riau mai a. Amah vang te hian kalo insit leh ngawih ngawih ringawt zel. Hetiang thil hi a thleng tur ani lo tawp. Aaa engtikawng zawng mahin a ni leh kei hi kan rem dawn lo ani mai. Lo in ngaizawng ta chiah ila, awi! Mite min en dan tur leh hmuh dan tur mawlh mai hi. Het! Tluangpui, chutiang mai mai ngaihtuah suh aw. I hmangaih anih phawt chuan i hmangaihna avang tak khan sawichhiatna leh elrelna te chu i pal phei bawrh bawrh mai tur ani, mi thusawi dan ah buai a ngailo. Mahse, chu vang ringawt in Chhantluanga chu ka bialpa ani dawn e ka tihna erawh anilo ania.

Inkhawm kan han bang chu ka rinloh dan deuh in kan KṬP Leader, tlangval upa ve tawh lam leh hna nghet pawh nei, fel em em mai Malsawmdawnga chuan kan in a lo len tum hian min rawn zui haw ve teh tlat a. Hetah hian Chhantluanga pawh kha awm ve in ani erawh nuam lo tih hmel tak hian alo ngawi kar reng thung.

Inchhung kan han lut chu ka nau Rampuia leh a ṭhiante lo awm in an ri dar dar mai a. Ka nau in Malsawmdawnga hmel a han hmuh rual chuan phur leh thatho taka lo be sawk sawk in alo chibai kual vel. Mahse, Chhantluanga lam hawi leh in a mengrum ta hle a. 

“I inkhawm ve ṭhin ani maw a!?” Ti kher in Chhantluanga chhan letna pawh ngaihsak tawh lem lo hian a zai rut rut a, a ṭhiante chu huikhawm leh in inchung zawl lamah an chho ta dial. Chhantluanga nuamti lo lutuk hmel chu ka hmuh in hrehawm kalo ti ve ngawih ngawih a, a nihna takah chuan a ruka min beisei em em tu, Malsawmdawnga ai khan biak pawh ka be tam zawk narawh. Ni e, ani Malsawmdawnga te chu kan khua angah te chuan tlangval fel leh hlawh nei, kṭp leader lai ni pha bawk ani ve a, mitin hian an tlawn in biak sen loh khawp a tam beṭha tu a nei alawm. Ani zawng, ngaihtuah a ṭul love ka ti ve tlat. Amah hrim hrim pawh hi ka duhzawng ani lo a, fel hle mahse min hip thei thlawt lo aniang.

Zankhua in mut hmunah Chhantluanga ringawt chu ka ngaihtuah chhunzawm leh a. A nihna takah chuan ka ngai veng veng hi ani mah awm e. Phone te nei ve se chuan tunah te pawh kan han inbe vel mai mai tur tih ringawt te ngaihtuah in ka thaw leh hawk ṭhin. Ka diklo vel vek tawh anih ber hi a. Nilo, ka diklo hulhual tawh zawk anih hi. A eng lam zawng a thil ka thlir ve thung erawh chuab tunah tihian a nundan te siamṭhat tumin a bei ve mek ani a, hetia a ṭhat chhoh zel chuan lo duh in inngaizawng ta hial pawh ni ila, mite pawhin min dem em em hran dawn emni tihte thlengin ka ngaihtuah thul. Engpawhnise, amah in a zir phawt chuan kum te chu number mai mai alawm tiin ka in let zui thak a, ka muhil ta daih.

“Lalchhantluang, rawn chhuak teh! Misualpa, hetah hian i awm em?” Tiin Pi Dingngheti chu kan zanriah kil lai takin a rawn ri lut hlut mai a. Keini chhung chuan kan lo melh ṭhap ringawt. A hmel aṭang chuan a thinrim in a lungawi lo hle tih a hriat a, engvang tak ni ang maw tih kalo ngaihtuah lai takin ka nu a rawn ṭawngchhuak ta hlauh mai 

“Dingte, eng nge thil awmzia ni ta bawrh bawrh a” tih pahin ani chu a tho zui ṭiah ṭiah. Chutah, Pi Dingngheti bawk chuan ring leh vin fahran hian

“Kan Lalchhantluanga bawk mawle. Tlaiah khan ka puanropui ru chhuak in a kalbo daih mai a, a pa nen kan la zawng ngat ngat anih hi. Hetah, Tluangpuii hian alo duat in an inkawm ve ṭhin si a, ka rawn zawng ta ngawt mai” ati leh chu kalo nghing dawt. Ava han pawi tak em! Chhantluang, harsa takin i bei a, i tuar chhuak ṭan chiah tih ah tinge hetianga i awm leh mai chu le. Ka na lutuk chu ka rum vawng vawng hi animai e. Ka mittui te chu a hnam sawk thei nia. 

Ka nu bawk in zaidam taka

“Alo lang hauhlo mai hetah chuan, khawiah emaw ṭhiante nen an leng zawk anilo maw aw. A zialo ṭhin teh e” atih leh takah chuan Pi Dingi pawh ang buan buan pahin a chhuak zui veleh mai a. Kei chu ka chaw ei pawh a tui thei tawh hlawllo. Hrehawm hi ka ti em ani. Chaw chu bar chhunzawm thei twhlo in ka tho vut a, ka pa leh ka nau chuan

“Chhantluanga chu a insiamṭha tawh dawn ni khan i sawi si a” an rawn tih lai te chuan kutsil pahin ka men ṭuau tawh hi ani ber e. Ka chhang theilo. Ka ṭawngchhuak anih vaih zwng in ka ṭap nghal ani mai. Ka kut chu hru hul leh thuak thuak in bathroom ah ka tlan lut thuai a, bathroom bang ngheng chuan ka va ṭap ta zawih zawih ringawt. Ṭap ri ngam silo, ka âwm tawt lutuk te chu ka chum pah dawt dawt bawk a, ka inpet fan fan thei. Ava han hrehawm tehlul em ve aw.

Zankhua in ka pangngai theilo zui a, chaw ei thleng takngial pawh seng fel peihlo zuiin ka mu ta daih. Lalpa, hei hi ka rawngbawlna tura min pek anih chuan harsa hi ka va han ti tehlul em. Min ṭanpui rawh, tiin ka rum chhuak hial ani.

Chutia rilru zawng zawng nen tihtak zet a kalo ṭawngṭai mawlh mawlh lai chuan ka bul mai a ka dah, ka phone chu rawn ri in ka han en chuan ka number hriat ngailoh aṭang alo ni tlat. Makti taka en deuh vang vang phawtin call chu ka chhang ta nge nge a.

“Hello. Tunge aw?”

Lehlam aṭang chuan aw thâm ṭiak in mipa aw hian

“U Jo, ka tihpalh!” Chu aw chu ka hai lo. Tin,  chutia min koh dan anga min ko ṭhin tu pawh amah chiah an awm bawk. A aw ka hriat rual leh, a harhfim lo ni a ka hriat rual ringawt pawh chuan ka na zui vek a, ka tla rawih rawih hi ni ber in ka hre tawh.

“Lalchhantluang, hei hi tu phone nge a? Khawiah nge i awm?” Ka aw te chu a lawi rût mai. Ka ṭawng zawh rual hian ani chu za lo zet in alo nui ri halh a. A beidawng ani. A nun hi a hlim hlawllo a, a beidawng hluah hluah tih ka hria asin. 

“Mi, mi phone ka ruksak ringawt. A pawi tiraw? Mah, mahse mmaw, ka be chak em che ani e U Jo”   a eng ber nge a ruih tak pawh ka hrelo e, a sehchilh nuaih mai bawk si. Ram hmak hian kei chuan

“Pe let lehnghal rawh Chhantluang. I tan a pawi thui thei tih i hria em?” Ka tih hrak hnu chuan a ṭap tih ka hre zui a, ka buai vek tawh.

“Ka tan a pawi dawn. Min man anga, jailah min dah ang. Ni leh lo, lock up ah aniang. Aaa, mahse, nang chu i ngaihtuahawm loh ve. Bialpa ṭha tak i neih tho kha”   Malsawmdawnga kha a thik tih ka hrethiam chiah. Ka thaw deuh hawk mai a, keimah hi ka tawt vek tawh bawk. 

“Chhantluang, ngaihzawng ka neilo a, hmangaih erawh chu ka nei e. Mahse, chu chu i buaina tur anilo asin. Nangma nun ngei kha buaipui zawk rawh. Engvangin nge i fight chhuak ṭep tihah hetianga i awm leh mai chu le” ka tih pawh chuan a insut ri leh hraih mai a, mahse, a rawn nui lui leh hram.

“Ka hrelo. Ka duh che anih ka ring!” Ati ta! 

Kalo rinlawk deuh mahnise, cbutianga a han sawichhuah takah chuan min ṭhawng ve det.

“Nang hian min duh tur ani lo asin. Kan kum nise a in tam hleih in nang chu ka nau te ai pawh a la naupang veleh chhawng kha inia. Ngaihtuah chet chet la maw, keini pahnih hi a rem ve theilo ani e”

“Chuvanv tak chuan alawm ka rilru hi a hrehawm zual em em. Engmah hi i hrethiam ve silo, i hrethiam ngai dawn lo. Ihmaw, UJo, ka hmangaih a ka duhna che hi a rei lutuk tawh. Rawlthar ka hriat tirh ata inṭan tawh ani dajh asin. I hrethiam lo emni?” A ṭawng pawh nilovin a au hi ani ber tawh a. A ṭah aw ṭuau mai bawk si nen kalo na ve em em ringawt. A thusawi te kha taktak anih chuan  tuna a damdawi tih leh chhan ah pawh kei hi a bulpui ber ka ni thei tihna emni? Avan hrehawm ve le. Hetiang anih chuan kei hian he nau hi ka ti beidawng zual ngawt thei dawn emni? Diktak chuan ka duh ve tawh em em a, ka ngaina in ka khawngaih a, ka ngaihtuah hle bawk. Chu chu ka hmangaih tjhna ani mai lo emni? Anih chuan engvangin nge ngawih bo reng bik lem ang ni. Hrilh ta vek ila, a tan hian a ṭhat phah zawk lo ang maw. Ka buai ani. Ka buai nuaih tawh. Ka mittui lo hnâm chu hruk zoh pahin

“Chhantluang, engpawhnise, i nundan hi sim taktak tum la, insiamṭha phawt la hun ala tam alawm tiraw?” Ka ti chhuak thei hram. Ani erawh lo thaw zui leh hawk in a beidawn hmel kher.

“Min chhan dan tur kha chu ka hriat sa vek anni e. A ṭha alawm, ka ti ang. Ka ti vek ang” tiin phone chu a hmet tawp hmak a. A reh zui ta tlawk tlawk. Chumi zan chuan chhin khat pawh chhing lo in ka meng tlang ta ṭhak mai a. Ka tawt ve em ani. Engtinnge a khawsak zui tak zel ang le. Khawilai kawmkar thim leh reh takah emaw amah chauh a ṭhu in a ṭap keuh keuh angem? Tlangval ve ṭan ek ek, zakzum chi tak leh mi inkiltawih tak kha ani ve si a, he khawvelah hian ava han riang in ava mal tehlul em. Ka ngaihtuah thui lutuk a ka hrehawm ngut ngut bawk nen ka call leh ta ngat. Mahse, a la duhtawh miahlo thung.

Khua alo var a, ka ziaawm ve deuh ang chu tih laiin ka tawt tulh tulh thung si. Tichuan, tukṭhuan te ei in, ei zawh ah hna kal turin keini pafa ho chu kan insiam zui leh sang sang tawh a. Chutihlai tak chuan kan kawtkai mai ah hian Police motor rawn ding dat in inchhungah an rawn lut zui ta.

Ka pa chuan rang taka lo chhawn thuai thuai in thil awmzia te alo zawt zung zung a. Chutah, an zinga hotu ber, Inspector niawm tak chuan hawi valh valh pah hian

“Dingngheti leh Ṭhuamliana te chenna in hi khawiah nge maw a awm le. Hei, report a rawn lut tlat mai a, an fapa chungchangah ani nghe nghe” atih chuan kalo khur der der thei. Ka meng phawk hrû a, chutihlaiin ka nau chuan min rawn melh hrek hrek bawk. Ka nu thung erawh hlauhthawn hmel zet a a âwm chu lo dawm pah in 

“Awi! Pute u, eng chungchang nge ni ta a? Nangni meuh inrawlh ngai ta chu ava liantham awm ve aw” 

Inspector chu lo nui suk in, a tiang ken laia a kut chu hlap rik thak thak pahin

“Lian lutuk hran love, zan hmasa lamah bungraw tlem a zawng leh mobile phone alo ru ani awm a. Chung vel chu anj ber e” atih leh takah chuan reipawh be khawmuang tawhlo hian ka pa chuan Chhantluanga te in chu a han kawhhmuh zui a, kei erawh room ah tlanlut in khur dar dar chung hian khumah ka va ṭhu ta ringawt. Ka kut khur nasa lutuk chu khalh neuh neuh in an man lai a a hrehawm ti tur hmel te mawlh mai chu kalo ngaihtuah a, ka hrehawm hluah hluah hi ani ber mai. 

Dawr chu khar ngawt theih ni heklo le, pawnah ka chhuak chiah tih hian kan In bul step aṭanga police ho in tu emaw an rawn hnungkhirh leh an hrawk khur khur chu hria in ka va hmu ta mai reng a. Umm, Chhantluanga ngei mai chu a kut hnungkhirh sak in an hruai dawn ta . Zah hmel tak hian ani chu a kun reng a, min rawn hmu ve lo hlauh. Ni e,khatiang dinhmun a a ding lai kha ka hmu tih hrelo se ka duh zawk daih. A tan a hrehawm in a zahthlak dawn lulai em mai . Ka mittui tling pam chu hru zoh in scooty ka ti nung zui leh a, inpetruh fan fan chung hian dawr awmna lam pan chuan ka tlan ve ta hram ani.

“Chhantluanga chu a mak hlemai tiraw? Hman zan te pawh khan ala ṭha in a inkhawm ve thlap kha ani si a. A pawi ṭhin ngawt mai” tih pah a rawn nui deuh vur vur Malsawmdawnga hmel chu ka han en a, ka nuih hi a za ve hlawl silo. He pa pawh hi a, mi chetfuh lohna lai hrethei si, sawi zui nuam ti bawk si anih hi ti rilru reuh reuh in ka melh peih ṭawk. Engemaw, chhun chhun ah te a rawn tih reng reng ni. 

“A tang rei angem le” kalo ti daih thung a. Chuveleh ani thung chuan la  khi vur vur chung hian a kekawr chu a han beng zui leh thuk thuk phawt. Chutah, vei loh hmel zet hian

“Hrelo le, rei vak dawn emni? Phone leh bungraw tlem a zawng case kha ani a, a rei ber ah thla 1 te chu ani ve ang” tiin pawnlam a melh zui leh vung vung. Kei chu kalo thaw halh thung a, thla khat pawhnise a rei ka ti mah mah lam chu ani. Theih chu nise, emaw, ka thu chu nise, tunah hian a rawn chhuak lehnghal mai tur hi ania le. Ka pian a hnu lamah tun ang reng reng a police hotu lu nih ka chak hi ka la hrengai love. Keimah vang pakhatin a nunhlui nimai tawh tur ah a let leh a, chutah, min biak chak vang liau liau in keimah vang bawk hian mobile phone a han ru leh bawk a. A tan hian ka tling lo in ka va han ṭhalo tak em aw. Theihnise, a tawrh ai te pawh kha tawrh chhawk mai ka nap asin le aw, ka khawngaih em mai. 

Chhantluanga ber a awm tak silo ah chuan khawvel hi a reh duk tawh nimai in ka hria a, ka ngai ngawih ngawih. A mitmeng, tlawmna a khat tih hriat tak a min melh ve ṭhin na te, a hmel pawisawi lo leh lai zet a a che kual vel ṭhin te kha. Suangtuahna nen alo let hun tur ka thlir a, duhthusam hmanga in awiin a thleng dawn em tih hrelo mahila duhthusam chu ka muthilhpui ṭhin a, mahni chauh a inkawm in ani chu ka kiangah ka awm tir ve zel ṭhin. Kim lo hle mahse, min ti famkim ru veng veng ṭhin chu anih si hi. Bible ka chhiar nasat phah a, a tan khan thilṭha ka dil awllo bawk. Tin, ani kher min tawn tir avang pawh hian vui a hnek in lawmthu ka sawi bang thei silo. Hetia Chhantluanga a awmloh hnu phei hi chuan Malsawmdawnga chu rawn lenglut tam zual in ka pa leh ka nau hian an lo be ṭha hle a, an lo lawm thiam khawp mai. A bikin ka nau Mawla hian awmngaihna a hrelo ṭhin ni berin a lang. Pakhat lah in alo be thiam a, a ti thiam ṭhin bawk si nen, an hneawm dun takzet. An pahnih hian innei law law se a ṭha ang. Chutihlaiin ka nu thung chuan hmeichhia ve tho tihtak ah ka awmdan leh rilru engkim, ka chetzia te lo chik ṭhin in ka rilru ah Chhantluanga bak an tla nalo ani tih hrethiam in Malsawmdawnga chu biak chintawk a hria a, a awmdan vel aṭang ka nu chuan min lainat tih pawh ka hria, a sawichhuak lo mai zawk ani. Nu te nge nge hi chu, fanute tan hian an lo va hlu lehzual tak em.

“Nu, pa, nupui te hi min neih sak ve tawh ula”

Chu chu ka nau Rampuia thusawi ngei ani. Tukṭhuan ei a kan ṭhut ṭhap laiin pangchang aw zet hian a rawn sawi chhuak hlawl mai a. Ka chaw hmuam lai pawh ka phuh lo chauh. Ka pa chuan phawk fe a melh pah hian

“Ila puitling lo nasa mai si a, tuna i khawsak dan lah, naupang lianpui mawl buang mai hi i nih hmel roh lehnghal. Duhtu che pawh inei ve dawn emni?” A rawn tih leh lek phei chuan keichu ka insumthei tawhlo, ka nui chhuak ta nge nge e. Ka nu pawh a nuihza insum chu a sen zui ṭan ṭan mai nia. 

“Kan upa ve tawh alawm le. Duhtu pawh kan hmu ve a, ka hmu ṭha thei teh ania ka pa. Umami ang ngawt chu ka ni lo ang aw” tih pah hian min rawn melh leh zuk a, kei chu ka nui lai tawp chawt in amah ka melh zui nghal kawk

“Eng nge kei chu min rawn hmer tel ve ngawt. Bialpa ka nei ngai reng reng lo e” ka’n ti chu ka nau chuan ring zet hian

“Duhtu i neih ve chhun pawh rukruk hrat. Jail a tang mek tih vel te an nia. Zahthlak lutuk”

“Ramzawnpui, ngawi mai mai rawh”

Ti hmak in ka chaw thleng ka chawi a, ka tho daih. Khati zawng kher a min elhsen ṭhin kha chu ka pai dai thei thlawt lo ani. A bikin Chhantluanga chungchang ah kher hi cuan tumah hi lo inrawlh lo law law se tih ka duh zawk. Ka huatthu a chhe bawk. He nau mawl lutuk hi chu a sim rawkna tur a zirtirna pek ala ngai dawn anih hi ti rilru neuh neuh in roomah ka lut a. Ka insiam zui. Hemi ni hian Chhantluanga kha a bail chhuah theih thu mi kâ aṭang kalo hriat ruk ve avangin ka chhungte pawh hrilh lem lo chuan station ah han kal a, bail chhuah mai chu ka tum nghet bur. Thla chanve chuang jail ah awm tawh in, a hrehawm tawrh kha tawp tawh se, enkawl ve tawh thung ka duh tlat atin ni.

Ka insiam zawh chuan engmah pawh sawizui tawhlo in ka chhuak nghal. Station ka pan tiin dawrah ka lut kawi leh a, ka dawr nghaktu chu thu te chah leh te te in scooty nen station lam pan chuan ka liam zui leh ta a ni. 

A hmun ka thleng a, bail tur a tihfel ngai ang ang te ka tihfel zawh hnu chuan ka hmuhchak em em leh ka thlakhlelh ber mai Chhantluanga chu an rawn hruaichhuak ta. Kan han inhmu leh zet chu lung te lam lam a chhia in hnuk a ulh ṭeuh mai a, a lawmawm tho bawk si nen, awmdan tur kha kan hrelo dun ani ber e. Mittui tling pam a min melh vang vang hnuah min rawn kuah thut mai a, ihe lovin kalo kuah zui ve thlawp. Chutah, ka beng bulah zawi sap hian

“Ka lawm lutuk ania, chuan, ka ngai thei lutuk  che” tiin a thaw zui halh a. Engmah pawh sawizui tawhlo hian station chu kan chhuahsan ta nghal a ni. Haw kawng tluan in kawng lakah kan ding leh zeuh zeuh ṭhin a, min rawn kuah leh ringawt zel. A awmdan aṭang sawitur chu a ngah dawn tih ka hria a, mahse, sawichhuah tur ber kha a hrelo zawk ani e te pawh kan ti thei ang chu. A mitmeng mawi leh fiah kak mai a min melh vang vang pah hian ka khabe chu a rawn dawm a, ka hmui khur der der tawh ah chuan zei lemlo tjh hriat tak hian min rawn fawp ta anih kha. Keilah in duhthawh zet a lo chhang let ve in, kan awmna chu kawng reh ṭha lai tihtak ah kan duhthawh dun kher. Chutah, thawklehkhat ah hian in la hrang deuh thut in a khuh zui ta bawrh bawrh mai a, keiin a hnungzang a lo chum zui dat dat in thil awmzia ka han zawt chu le

“Ka thaw a chham dawn alawm” a rawn ti chu za fahran in kan nui zui ta hawk hawk ringawt. A awm pawh ka ti viau mai, hetiang hian a rawlthar chhuah hlim ata bialnu ala nei miahlo a, kei hi a first love niin a zeilo lutuk leh a lai chhe thei takte pawh hi ka hrethiam lutuk tlat. Kei, kum lamah pawh a duailo zawk mah hi ka zei lo in tiin ka hawiharh lo hle si a, han inpuhtawn tur bik kan awmlo e a. 

In kan han thleng chu, ka chhungte an lo hawi phawk hrâ mai a, a bikin Chhantluanga hmel an han hmuh leh ngat phei kha chuan an hawi â zual hle tih theih ani. Ka bail chhuak tih hi tunah hrelo mahse, nakin lawkah thup theilo in hriat hun kha an la nei leh dawn tho si a ka tih vang ania hetia kan inchhungah ka luhpui nghal mai ni. Ka nu chu rawn ṭawngchhuak hmasa ber ah ṭang leh in a aw pawh a khur der der mai. Tin, a zawi ṭha angreng viau bawk.

“Tluangmam, hei eng nge thil awmzia hi. Ani hi chu thla 1 chuang tang tur ang khan an sawi si a” a rawn tih chuan kalo ngawi reng thei tawhlo. 

“Ka bail chhuak ta mai ani e” ka han ti chu Rampuia rawn ding chhuak zawk in vin zet hian

“Ka bail chhuak iti elo!? Hetiang mihring ṭangkaina neilo leh khawtlang tan a hnawksak lutuk hi i han bail chhuak a maw!?” Tih pah chuan ka hmai a ri zui ṭhuai! Keichu lo ṭe ṭhat in ka bula ding Chhantluanga pawh kha alo che ve zawk a.                      

Mahse, zawldawh tak hian

“Khatin i û zawk iti tur ani lo asin. Mipa mahni la, û te hi chu zahthiam hram hram a ṭha e” a han ti ve chu Rampuia lo ter zui leh at in

“Nangkha lo ngawi rawh. Ka hnek ve law law zawk dawn che emw ni le” tih pah a a rawn tin leh uaih chu Chhantluanga hmaah ka ding vat a, ka nu leh pa ten Rampuia chu an lo chelhbet ve vat bawk. Chiang tak leh rum fahran a inmelhtawn in, mipa puitling ve ve tihtakah an incho âr âr khawp mai. Keichuan aw khur hlak hlak hian

“Ramzawnpui, duhtawk rawh! Ilo va rapthlak reuh ve a, tin, i û hi min zahlo hle bawk tih hria ang che” 

ka thin tawt lutuk chu ka ṭap pur tawh mai a, tunah tak hian ka sosang hle ani e.

“Zah tlak hian nung mawlh heklo che u” ti leh nghut in Rampuia chu a ṭhu ṭha ve leh mai a, chuveleh ka pa chuan lo khap ve vatin a hau zui mawlh mawlh . Ka pa bawk chuan ṭhu turin zaidam tak hian min han ti zui leh a, keini pahnih pawh kan ṭhu zui ve mai. Chutah, ka pa chuan zaidam zawk hian

“Umm, engpawhnise, thilthleng turte chu a thleng zo vek tawh a, her danglam kher a ṭul tawhlo ani. Chutihlaiin, mami pawh i nu leh pa tal chu i thiltih turah hian min biak hmasak ve tur ani a, mahse, a ṭha vek e. In lo inhmangaih tawh vang anih si chuan sawitheih kan nei tawhlo khawp mai. Mahse, Chhantluanga pawh tihian jail aṭang i rawn chhuak ta sa sa a, i û Tluangpuii hi i duh a, i hmangaih taktak anih chuan i nundan te siamṭha in Pathian bel zui la ka duh hlemai a. Tluangpuii kum hi a tam zual zel hma in nang hian rilru nei taka awm i mamawh tih hria ang che. Anih loh a, tunhma ang mai mai kha i nih leh dawn erawh chuan, keini chu kan remlo tih kha lo hre tawp mai la. Tichuan, thil engkim hi i kutah a in nghat ta tihna anih ber chu aw. I zawm thei dawn ange maw chu?” A han tih dap dap takah chuan Chhantluanga pawh lo bu ve zoh zoh in kei chu min rawn en a, a nui sak. Chutah, fiah zet hian

“Awle, ka pu, ka thei em em ang tih ka tiam e. Tin, ka tum anga, theihtawp ka chhuah bawk ang” a sawi zo chiah chu Rampuia kha awihlo hmel zet hian a rawn nui hak hak mai a, kan melh zui ṭhap. Mahsela, eng thu mah sawizui tawhlo in a chhuak ta daih thung a, kan ngawi ṭhap ringawt. 

Keizawng, ka hlim ani tih hian a sawifiah zo kher awmlo e. Ka hmangaih ber alo let leh a, insiamṭhat nan theihpalingkawh in a han bei leh anga, keiin a hma zawng ai khan ka ngaihsak in ka ṭanpui zel tawh bawk ang. Jail ah pawh khati chen kha a han awm a, a tuar thei anih si chuan, tun atak a tihtheihloh tur thu a awm dawn emni le. A nunhlui vang a a lunglen chang in kei ka awm dawn a, hnemtu tur ber ka awm miau si chuan hneh theihloh tur thu hi awm in ka hre tlat lo ani. Tin, khatia ka han bail chhuah tlai khan, zan lamah a nu leh pa te lo leng nghal in a nu zawk chuan min rawn ankhum leh nghek mai a, mahse, engah teh vak kalo ngai lem lo. Chutihlaiin pa zawk erawh a ngawi reng thung a, ṭawngkam pakhatmah hi a nei ve lo reng reng nia. An chhungkua  chuan hnawksak tiin ṭangkaipui lo mahse, keiin ka duha, ka ṭangkaipui thung a, ka engkim ani tawh bawk. Kan pahnih leh Pathian inkar a ṭhat phawt hi chuan tumah kan ngai lova, kan tlei ve tawk em em ani. 

Khatiang thil a thlen tawh hnu kha chuan, kan inchhungah pawh rawn chuangkai ve fo mahse, a hmel a hmuh rualin ka nau chuan inchhung a chhuahsan a, nihloh leh alo len chhung zawng te hian kei chu min veng ang hrim leh min dipdal tum ve hranpa in a mu bo duh miahlo a, kan bulah chuan a ṭhu ve ngar ngar ṭhin. A khawsak dan zet chu ka ten tulh tulh mai a, nungchang mawi a hrelo hi ka ti sawt hle bawk. 

Tuk khat chu, kan veng pa pahnih, Pu Siampuia leh kan YMA Secretary, Pu Hrangkima te chu kan inah an rawn chuang lut ve hlawl mai a. Mak pawh kalo ti lehpek hman hle. Chumai ani lo, engamah hma hian kalo hlauthawng leh hman em em ringawt bawk. Ka nu leh pa te chuan lo dawngsawng zung zung in an ṭhut fel leh te te hnuah he thu hi an rawn sawi ta ani. Chu thil chu, ka nau Rampuia’n YMA Secretary Pu Hrangkima fanu lakah sâwn a thlak tih thu hi!! 

Ka nu leh pa leh keichu in melh kualin kan phawk tlang hlawm hlemai a, min ṭhawng takzet ani. An sawi zel dan phei chuan thla hmasa vel khan zan khat chu ka nau te ṭhianho hian zu te rui ve in Pu Hrangkima fanu, tleirawl hmelchhe lo tak mai chu ka nau nen hian an lo inbiak ve ṭhin avangin, remchang la in zanlai ah an ko chhuak a, tichuan, zu nam phial phual in khawihmun ah emaw an lo va chesual ta niawm tak ani e. An fanu in a ruak lo tih thu a hriat khan ka nau chu rawn hrilh in inruk mai a duhthu te pawh a rawn sawi nghe nghe. Mahse, Rampuia chuan nupui neih a la duh tak tak loh bakah ani kher kher chu a duhloh thu te, naute chu a fa taktak anih pawh a rinloh thu te nen lam lo chhang in alo hnar fithla ṭhak mai a. Vawitam tak an fanu in kan nau chu a rawn nawr hnuah pawh a tihngaihna a awm tak siloh ah chuan tiin tihian sawn man min rawn dil ta ngawt mai hi alo ni. Ka thu hriatte chu rapthlak ka tiin, pawi ka ti a, zahthlak ka ri ru kher. Tichuan, ka pa te chuan ṭha taka lo sawipuiin Rampuia pawh lo haw ve phawt se, engkim kan sawipui ang tia intiam in Pu Hrangkima te ṭhiandun chu an thlah fel leh ta phawt a. Anni pawh lungawi takin an haw niin ka hria. 

Khaw thim rual deuhthaw a lo haw ka nau chu, inchhung a rawn luh rual rualin ka pa chuan chiang zet hian a hmaiah alo beng sawk mai a. Kei leh ka nu thung chu kan lo ṭe ṭhat. Ka nau chuan a biang chu dawm pah vang vang in ka pa chu hrilhhai hmel zet hian a melh zui ta vang vang. Ka pa thung chu alo meng thip râm râm hle a, biak chakawm loh tak ani tawh. Thâm chal hian Rampuia chuan

“Pa” a’n ti dek dek chu ka pa bawk chuan vin ṭhak hian

“Pa pawh min ti suh! Laktlak loh pa. Hnunglamah kua hreuh in keini hi min bum char char a, a ruk a zuruih leh nula koh chhuah te, sawn thlak te thleng pawhin ilo thiam ta a maw!? Tunge hetiang tur hian zirtir che. Tun aṭang chuan I unaunu khawsak dan te pawh hi sawisel ve tawh suh ang che. Tin, nang ngei ani, khawtlangin kan vei rawn tur leh kohhran pawhin kan ṭawngṭai sak mamawh tur mihring zawk chu” ati zui phiar phiar mai le. Chutia ka pa in thil awmzia zawng zawng a han sawichhuah tak vek ah chuan rei pawh ṭang ngam lo in Rampuia chu a ṭap pur a, a inpuang fai zui ta leng mai ani. Kha zan kha a vawikhat zuruih na chauh pawh ni tawhlo in kan inchung zawl ah ngei pawh hian a ṭhiante nen zu chu an lo in ru fo tawh a, tin, hmeichhe hrang hrang be kual in mutpui theih pawh a nei nual ani awm e! Chung zingah chuan Pu Hrangkima fanu kha vanduaiah ṭangin alo rai ta hlauh mai si a, tihian, kan nau a chu a talbuai zui ta anih ber hi. Ka nau mahnise, a khawsak dan ah hian ka ṭan hauh lova, ka dem hle zawk. Chhungkua leh khawtlang bum in kohhranah a inhmang em em a, langlo ruamah erawh alo che ngap ṭhin hle thung si. Ka ti ta a, Chhantluanga te ang chu addict niin mi zawng zawng hmuh leh hriat ah sual an khawih mualpho ta law law a, an suahsual man pawh thup bo ngai lo in an tuar leh mai. An ruihhlo khawih kha ka va sawimawi sak in ka duhpui tihna ni hauhlo mahse, ka nau anga sual inthup pai reng chunga ṭhatchhuah der ṭhin te hi an tam dawn mange kati ta. Hmm, kan khawvel zet hi zawng, kan chunga thleng ve theilo tur a kan ruat thlengin a thleng mek zel chu ani si a, a hahtlak lulai ta mah mah chu ani e.

Khatiang teh hrep a ka pa in Rampuia a ṭawngkhum tak si ah chuan hreh hle mahse, a fa lo piang tur chu tih fahrah ngawt chi ni heklo. Hreh tak chung chuan nupui chu a neih ve mai a ṭul dawn ta a. A hun atan pawh thla thar thla laihawl vel an ruat ta nghe nghe anih kha. Zahthlak in min ṭhawng viau hlawm mahsela, kei chu kalo phur ru viau lawi thung a. Mo han neih ve hrim hrim te leh vahte han pawm kual vel chu ka chak tawh ni berin ka hria. Chu chu hria in Chhantluanga pawhin min fiam zuk zuk ṭhina , kan inru ve thut mai dawn emni te pawh ati fiamthu fo mai. Tin, a laka ka nau chet duhdan te pawh danglam chho ve hretin a hma zawng ai kha chuan an inbe tam ve tawh a, an inkar chu la fel lutuk hran lo mahse, a hma ai ngawt kha chuan ziaawm tawh tak hi ani. Chubakah, Chhantluanga pawhin  a nundan siamṭha zelin ka bail hnu aṭang khan vawikhatmah damdawi chu ala ti chhin leh lova, zu lah a in ngai heklo. Nitin, sunday tihloh ah chuan hnathawk turin a chhuak ve reng a, a hlawhchhuah ang ang te pawh a bo a bang awm lovin a chhungte kutah a pe ve zel. Tin, a hlawh zat nen lam hian keipawh min hrilh ve zel bawk. A chang chuan a khawsak dan naupangchhia lutuk hi buaithlak hlek ṭhin mahse, a duhawm riau ka ti tlat pek a. Ṭahder ala hrat em em zui te hian min ti hlim thei khawp mai. 

Thianghlim taka inneih ngei chu tumin sawi ve fo mahila, zan khat erawh chu kan bawhchhe dun ta tlat mai a. Ka chhungte ho an inkhawm vek hlan a thleng ani nghe nghe lehnghal. Mahse le, ka mipa hmangaih ber nen a chesual kan nih vang leh amah ah chuan rinna nasa tak kalo nghah ngam ve tawh bawk avangin pawi tihloh na lian tak kha ka nei ve tlat. Engkimah ani hi mipa nih tling tak niin, hetia a insiamṭhat hnu phei hi chuan nei tawp tawh mah ila ka tihsual kha ka ring lo bur. Mahse, enthlak hret kan la duh vang leh ka nau in nupui neih mai a tum vang ani a, hmanlai pi leh pute khan, kum khatah in pakhat aṭanga lut leh chhuak rual an awm hi ṭha lo an lo tih ṭhin avangin chu chu kan zah ve bawk si. Chuvanga hetia la awm ve mai mai pawh hi kan ni pakhat a, ani ngat phei hi chuan inneih rum rum chu duhtawh in kan pahnih chauh a khawsak dun kha a chak ber tawh tlat ani. Ka nau Rampuia te anga mahni bialnu kawp te khawihchhia a hawisan leh daih ang chi kha ani ve lo tih hi ka chiang ngam sak. Tin, kalo sawi hmaih daih mai chu, khatia ka bail chhuah ni khan a thisen kan test haw thlap a, ala thianghlim tlat mai bawk. Ama sawidan takin nulat tlangval kawngah a hlei lem lova, a damdawi tih puite nen hriau an in hmanṭawm ngai heklo. Ani hi chu a mal tlat tlangpui bawk anih kha. Heng zawng zawng vang te hian amah ka rinna chu a zual hlemai a, ka hmangaihna leh khawngaihna pawhin zual lam a pan zel kati lo theilo. 

Ka nau nupui neih ni tur pawh a hnai ve zel a, theihtawpin inbuatsaihna te pawh kan kalpui bek bek zel e. Nupui nei mai tur e ti lo chuan Rampuia ber lah hi a hlim lova, a hmel leh chetzia pawhnise, han phurna reng reng hmuhtur a awmlo ka ti mai. Chu chuan thui tak min nghawng ve in, ka chauh phah rawih rawih thei nia.

“Hna ka thawk leh dawn a, kal hmain ka rawn hmu lawk mai mai che” tih pahin Chhantluanga chu zing dar 10 velah a rawn lut leh hlawl. Hemi ni hian a hmel chu hlim angin lang tho mahsela, a thawhrim vang nge ka hrelo, a ruk taka chau hluah hluah hmel hi a pu tel tlatin ka hre pek a. A dik alawm, hetia damdawi a thlah tak hnu hian taksa tih fit pah na ni fawm in hnathawh tur a dap nasa em em a, insakna tih angreng leh hna rorum hrang hrangah thawhtur pawh a hmu thei phian. Chutianga a phaktawk tawk te phur leh thatho tak maia a han thawk  ṭhin ka hmuh hian chau hle mahse, thinlung takin keipawh kalo lawm ve ani. 

Nilengin keipawh dawrah ka buai a, nidang zawng ai pawhin ka chau zual nghe nghe awm ea. Rinai taka ka chauh phian avang chuan hma takah haw in ka nau chhawr kutah engkim chu ka dah zui leh ringawt. In ka thleng fel a, ka thawmhnaw ka thlak fel deuh chiah tih ah hian ṭhutkhawmna lama awm reng ka nu chu rawn au chhuak ṭhat in a rak zui ta chel chul mai a, keipawh thinphu zawih zawih chungin ka tlanchhuak ve nghal. Chutah chuan ka rinloh lutuk thil ka va hmu ta anih chu le. Kan kawngkapui bul mai, inchhung chin ni si ah hian Chhantluanga chu lu thing phung chungin alo let hlawm reng mai a, chumi chu ka nu tihngaihna hrelo khan khur zawih zawih in alo dinchilh ve mek bawk. Kei erawh, Chhantluanga ani tih ka hriat rual khan ka tlanphei thuai a, a thawk leh thawk loh te en vatin ka sawi pah nawk nawk bawk.

“Chhantluang, i harh em? I ṭha em?”  Ti mawlh mawlh in tih harh ka tum reng a, ani erawh zawite te hian alo thaw ve ṭek ṭek thung. 

“Nu, lapua leh damdawi kan kawl em? Han zawng thuai teh” ka tih leh rualin ka nu pawh a inher vut a, a hmelah khan a mangang nasa hle tih chu a hmuhtheih awm e. Hetihlai vek hian ka nau hna bang pawh lo haw ve chiah in kan awmdan a rawn hmuh chuan a mengphawk nasa teh e.

“Tluangmam, lapua leh damdawi engmah kan kawl lo ania” ka nu chuan ala rawn ti zui a. Ka va han mangang tak. Ka bula lo ṭhu ve reng ka nau chu melh kawk pahin

“Engpawhnise, mama, ṭhutthlengsei lamah chawi sawn phawt ang aw, hetah chuan miin min rawn hmu tam lutuk palh ange”

“Ka khawih duhlo ea!” Rampuia lah chuan chhuata thisen tlem a zawng lo kai te chu a melh pah in a rawn ti zui lehnghal. Ka va han beng chak ṭhin tak aw. Melh leh hrawk pahin aw khur dar dar chung hian

“Ti mai rawh. A thianghlim vek ka hria, hmanhmawh teh” tih pahin ka tho zui a, chuveleh Rampuia pawj muangchang a rawn tho chhuak ve in Chhantluanga ke lamah a ṭang zui ta bawk. Ani chu zawn sawn in ṭhutthlengsei lamah kan va mut ṭhat tir ta zawk a. A hming in ka ko pah reng bawk nen a rum hlat hlat reng mai a, a meng thei der lo lehnghal. Engvang teh hrep a hetia awm hi nge maw anih chu le tiin ka thinrim ṭeuh tawh mai.

Ka nu chuan aw khur der der chung bawk hian

“Mami, a chhungte pawh zu hrilh ve phawt ila a ṭhalo emni?” A rawn tih chuan ka lu kalo thing nawk nawk. 

“A ṭul hrih lo. Tihngaihna an hriatbik dawn loh chu thuhran, keini aiin an ngaihsak lo daih zawk dawn” kalo ti nghut a. Chuveleh ka nau chu lo inrawlh veleh thuai in

“Mami, engtia enkawl vak nge i tum bik chuang a. I pasal em pawh ala nihloh hi mawle” a rawn ti chu kei kalo mengrum nghal em em. Amah melh zui rawm rawm pah hian

“In centre ami lapua, bandage leh damdawi hnawih chi han la vat teh. A lu aṭang hian thisen ala chhuak deuh reng ania, hmanhmawh rawh” kati leh hnuhnawh. Chuveleh ani pawh ihe lovin  a chhuak a, scooty nen an centre lam pan chuan a tlan zui ta nal nal. Reiloteah lo let leh thuaiin a thil rawn hawn hmangte chuan Chhantluanga hliam chu kan han sawngbawl ṭan ta a, kan zawhfel meuh chuan ani chu tui tak hian a muhil zui ta sek sek niin ka hria a, ka thaw huai thei. A muhil hmel chu thlir vabg vangin ka lainat reuh takzet. Chu chu engpawh lo ni ta se, engvanga hetia awm mai hi nge anih ang? Mi kut tuar a ni nge, a chesual palh ve hrim hrim zawk tih chu amah alo harhchhuah hma zawnh chuan hriat ngaihna a awm der silo. 

Khua a thim ṭan a, eirawng ka bawl zo chiah tih in ka pa pawh alo haw ve a, chutihvek chuan Chhantluanga pawh lo harh ve in zawimuang leh ṭhen sak sak chung hian a rawn tho chhuak ve ṭaih ṭaih mai. Chu chu ka hmuh rual in rang zet hian ka tlan phei nghal a, ka pa pawhin makti zetin keini pahnih chu min lo en ve kar bawk. Engmah han hrilhfiahna hun kha ala awmlo bawk a, ka thiamlo hran love. 

Chhantluanga chuan aw tham chhal chung hian

“U Jo, engtinnge ka awm a hei” tih pahin a hawi â deuh hu hu. A lu berkher ah hliam a tuar bawk si avang in a la vai ruai ni ber hian kalo hria. Chhanna ka pek hmain ka pa thung chu alo inrawlh ta vat.

“Chhana, eng nge thil awmzia? Kutthlak i tuar nge, i rui zawk” alo tih chuan keiin  mitmei hmangin kalo khap vat. Chhantluanga chuan a lu lo thing nawk nawk in

“Ka rui lo reng reng ka pu. Lawkin, tun mai ah chuan ka chiang theilo tlat. Ka haw phawt zawk mai ang” a tho zui nghal ṭuih ṭuih chu kalo dawmbet vat a. Ka kut lo laksawn pah hian

“Ka kal thei ang, min ngaihtuah suh ka ṭha ania””

“Step ah i kal thei dawn emni? Khua a thim tawh ania aw”

“Ka thei ang. Anih phawt u” tih leh chhuah a rual a, kei chuan dan beh luih pawh a tum hran chuanglo. A ṭhat chhunzawm ve mai kha ka ring tlat ani.

Chu zanah chuan, zankhua in ka hmu lo zui ta a, amaherawhchu, a hliam kha chauhpui tham niin a mu hahdam zui ta ni turah ka ngai leh mai. Hliam a tawrh nachhan te lah chu engmah han hriat zui kan nei ta mang silo a, a pawilo e, a damchian hunah kan la hre em em ang ti tawp mai teh ang.

“Nizan chu kan Lalchhantluanga te ṭhianho an lo insual buai pek ani awm a, khu, a mut leh bûr tawh khu. A laktlak loh taktak asin aw”  Chhantluanga nu rawn âng bawrh bawrh thawm chu zingkarah ka hre ta mai. Bathroom aṭang tlanchhuak nghal in Pi Dingngheti hmel pawh ka va hmu ta chiah a, plate ruak niawm tak hi keng in a lungawi loh hmel phian lehnghal. A ngaihna tak pawh ka hrelo e.

“Pi Ding, eng thu nge ni ilo sawi zawh chiah kha. Chhantluanga te ho in buaina an siam e iti nimai khan kalo hria a”  ka va tih ve takah chuan ka nu nen rawn hawirual ṭhawt in ka nu zawk in zawi sup tim deuh dai chung hian min lo chhang hmasa a

“I pi Dingi hian chawhmehte min rawn suah a hei, a lawmawm taktak ani” alo ti zoh. Mahse, ka nu thusawi chu bengkhawn duh loin Pi Dingi zawk chu ka zawt nawn leh ta ngat. 

“Aa nia, nizanah an ṭhianho in field hlui lamah khan buaina an lo chawk chhuak leh ani awm a, field bul vela khawsa ho phei chuan zankhuaa an mut theihloh thu te sawiin an lo buai viau anj awm e, a zahthlak ṭhin khawp ani” a tih lai chuan ka thin a phu zui dup dup a, zawhna hlir mai hian ka khat zui leh ta ani ber e. A thuhrim in chutiang khawp buaina lian chhuak chu engtinnge maw kan hriat ve loh theih zawk le, han ti hluai ila, kan veng aṭang field hlui lam hi ava hla ve reng a, hriatloh pawh a awm tho mai. Umm, a eng a pawh chu nise, Chhantluanga chuan a nunhlui ah bawk min kirsan leh in kei hi min phatsan leh dawn ta tihna emni? Ka hrehawm ngut ngut thei nia mawle.

“Chhantluanga chu a rui leh tihna emni?” 

Ka sawi zawh rualin Pi Dingi chu ngeiawm tak hian alo ṭhen deuh sak a, a fapa leh a kaihhnawih vel te pawh chuan a rilru anti na in a chhungril an chhun nat phak pawh hi ka ring lo e. Ni e, ani hi chuan a fapa hi a chet pelhna lai apiangah a mualpho thei ang ber in awmzui se tih hi a duhber hrim hrim tlat a ni. 

“Rui lehpek ang chu mawle. Huiham, i ṭhianpa ve zawng, engtikahmah a nungchang leh thiltih ṭhin te hi a sim tawh in ka ring love, nangpawh hian rawn buaipui duhtawh suh”  a sawi zawh rualin ka tlanchhuak nghal puat a, ka nu in mangan hmel tak hian min lo ko zui chul bawk. Tichuan, mittui tla phungin Chhantluanga te Inah ka tlan lut zui a, tu midang mah an lo awm lo hlauh mai. A awmna tur nia ka rin, pindan lamah tlan lut thuaiin rin ang ngei chuan khumah duhdah zet hian a lo mu reng a, a chatthla anih hmel zawk mah ang chu. A awmdan pangngai lo tak ka han hmu leh zet  chuan min tina lutuk a, ka tliak hnawp ni ber hian ka hria. A mutna bul chhuatah chuan va ṭhingṭhi hnawk in a kut chu zawimuang hian ka chelhsak leh a, chu fawh pahin mittui tla zawih zawih in ka ṭawngṭaisak ta ringawt. A bak tihtur dang hlawl kha ka hretawh lo ani ber e. 

Ka ṭawngṭai zo chu ka thawm hria in ani pawh zawimuang hian a rawn meng chhunzawm ve ta diar diar a, ka hmel a hmuh thut vang chu nimaw, tlem chuan a meng phawk ve deuh hlek. Mittui kar aṭanga lo melh let ve karin kan in melh zui ta ngawt ngawt mai. Sawi tur ber pawh hi ka hretawh lo aniang e. Ka ngawi reng mai. Mahse, amah zawk chuan zawi sup hian

“Min kalsan tawh zawk mai rawh. Kei hi chu chelh reng tlak pawh ka ni love” tih pahin lehlam a hawi zui daih a. Tho chhuak vatin khumah ka ṭhu zui thuai a, amah chu ka en vang vang reng bawk.

“I lakah hian tihsual ka nei emni? Engvanga hetiang thilte hi ti leh mai nge maw inih le. Min ti na lutuk tih hi i hria em Chhantluang” ka tih chuan alo thaw hawk mai.

“Min kalsan tawh zawk rawh.Chuan, thiamlohna leh tihsual engmah inei lo ania aw, keimah hi mi diklo ka nih vang chauh zawk a hetiang thil te hi thleng ṭhin anni e. Haw tawh rawh, ka muhil duh ania” ti leh ngatin a thusawi dan kalhmang vel chu ka hrethiam thei thlawt lo ani. Min hnar a, min hnawl a duh vang hrim hrim in nge khatiang thu te kha a sawi  tak ni ang. A lakah hian nasa takin ṭhat ka chhuah ve ṭhin a, ka ṭawngṭaisak awl lova, kan inhau buai ngai hek lo. Mahse, chuti chung chung pawhin ka hmangaih hi ka chân leh tho dawn tihna emni le. A hrehawm ṭhin ngat ngat em mai Lalpa, chakna min pe lul teh.

“Chhantluang, min hmangaih lo tihna emni?”

Ka tih leh sap hnu chuan rawn ṭhu chhuak hluai pahin leh min nin hmel zet rum zetin min melh zui ta reng.                      

A mitmeng rum tak leh dur khup mai te chuan chhete in amah chu hlauh ruk deuh na min pe ve e.

“Haw rawh. I tan hian beisei tur ka awm tawhlo ani. I tan hian mi ṭha lah ka ni bawk heklo. Chuvangin, tun aṭang chuan kan kar thu hi a tawp ni rawh se” atih leh tak hmakah zawng, ka tan han ṭawng zui leh, sawi ngam neih chi reng reng hi ani tawh lova, zawimuang a tho chhuakin an In chu hreh zet in ka chhuahsan ta nge nge ani.

Nilengin dawrah pawh ka awm a nuam thei lova, a khat tawk hian ka hui leh pap pap ṭhin mai. Ka chunga thilthleng thut te hian min ti hamhaih a, ka chau chhe zo ta kan ti thei ang chu. Kei hi, hetiang ruihhlo ngai te tan hian ka va han tling zo lo tak em tihte rilru ah lo lutin ka tum bûr reng mai. Chawhnu dar 2 alo ri a, mihring teivak an reh bawk nen, ka chau zual ngawih ngawih. Mahse, chutia kalo ṭhut nguai bur lai chuan mak lutuk maiin Chhantluanga leh tleirawl pakhat, kan veng chhungah pawh hmeichhe hmelṭha pawl ni ve ṭhin, mahse a damdawi ruih nasat luat avanga taksa chhe zo ta vek mai Tetei ngei mai chu rui tih hriat zet a inkuah nghawl nghawl chung hian dawr chhungah an rawn lut anih chu mawle. Chutia, an hmel ka han hmu thut mai chu ka ṭhutna aṭang ka tho chhuak zawk a, an pahnih chuan thinrimna leh maktihna nen kalo melh ngar ngar mai. Chhantluanga zawk chuan zamlo taka nui vur vur chung hian kei chu min rawn melh in

“U Jo, hei kan nu anih hi! A fel teh mai ania” a rawn ti phar phar anih chu. Hei hi ka hriat ṭhin Chhantluanga kha ni thei hian ka ring tawhlo hial. Chutihrual vek in Tetei zawk lah khan rui tih hriat zet hian

“Kher kher ṭhin a cheee” alo ti per ve duai a. A ding ngil thei meuhlo bawk.

An awmdan chu ka tei theih meuhloh avang leh ka hmuh duh miau loh avang chuan ram hmarhin

“Eng thil nge in duh ve a?” Kati deuh nghut.

Chuveleh, Chhantluanga chu zawi zet mai a lo phei ve nghal in ngen ngawl aw zet hian min rawn be ta thung

“U Jo, taktak chuan maw, kan ril a ṭam dun lutuk a, eitur engemaw tal min pe thei angem le?” Atih chuan thaw hawkin chair ah ka ṭhu thla hnawk thei. Chhantluang, iva han tlachhe sawt em em ve aw ka ti rilru vawng vawng mai. Tin, a hmel mawlh kha ka en rei ngam thlawt lo nen lu dawm vang vang chung hian hnuailam ka melh zui ta daih a. Zawi sap in ka mi chhawr lai ka nau bulah chuan

“Hemite pahnih hi biscuit kha pe la, chhuak lehnghal rawh se” kati ringawt. Ka nau chhawr pawh chuan anni pahnih chu biscuit pocket khat ve ve a pek hnuah inkuah rawl rawl hian an nui dun zui ta har har. Keichu lawmthu min hrilh chamchi pah hian min chhuahsan leh ta chauh ani. An kal liam rual chiah in ka hrehawm ti lutuk mittui tla tur chu ka dang hman tawhlo , a luang ngiai ngiai a, ka nau hmuhloh tur chuan ka inhru ru leh zeuh zeuh ṭhin bawk. 

A ni telin ka nau te inneih hun tur lah chu a hnai tual tual mai si a, kei lah Chhantluanga vang khan chakna reng neilo hian ka chhe zawr tial tial mai bawk nen. Chutihnak alaiin ka nau Rampuia  nuipui nei hreh lutuk lah chuan zu chu a rawn bei ngawrh sauh emaw tih mai tur hian zantin a rui ta mai a, tunah chuan pawn chauh pawh nitawh lovin inchhungah, ka nu leh pa te hriat reng lai pawh chuan a zuruih chu a thup seng ta meuh lo. Anni erawh in hauh tinah pawh tin tawh loin an ṭha en hmiah a, nupui erawh a nei dawn tho tho tih chu an thupui hmak mai ani. Chutihlai vek chuan keiin dik lohna ka nei tih ka hria a, ka thla bi a danglam ta tlat mai le. Thla a thar tawh a, a tlangpuiin thla a thar rual deuhthaw hian ka period ziah bawk. Chu chauh pawh ni lovin eitur rim huat tak tlat te ka nei chho ṭan a, thil thur lampang te chak huam huam in ka luak lah a chhuak ru reng bawk nen. Ka nau nupui neih ni alo her chhuak a, chutah pawh kei chu cheṭha hleithei lo in ka laktlak loh chhunzawm viau. Mahse le, ṭhenawm khawveng leh khawtlang mipuite an lo fel em em a, ka chet hah ve vak pawh ngailo in min chhawk zangkhai thei phian mai.

Ka awmdan danglam tak chu a hrehawm em avang leh ka inrinhlelh deuh tlat avangin a ruk thei ang ber hian test kit ka lei ve ta ngawt a. A ruk bawk a in test leh in chutah chuan ka ruak lo ngei ani tih chu ka hre fiah ve ta a ni. Mothar nei hlim hlawl kan ni a, ka rai thu hi ka sawichhuak nghal anih vaih zawngin kan buai dawn tih pawh ka hria. Kan monu tan tak pawh a hrehawm theih dawn em avangin reilote  chauh tal zel leh phawt chu ka thlang ta zawk. Ṭhianṭha tamtak chu nei ve bawk mahila, hetiang khawp a thuruk han hrilh ngamna tur ṭhianṭha erawh ka nei in ka hrelo a, a tute mah hi ka ring tawk hek lo bawk. Anni ai chuan ka nu hi ka la ring zawk fe a, mahse kan tun dinhmun ah erawh ka sawichhuak ngam thlawt bawk silo. Engpawhnise, Chhantluanga chu hrilh hriat ve hmasak phawt angai ani tiin amah hmuh tum chuan hun ṭha ka zawng ru reng a, an inchhungah lah a awm khât nasa mai bawk si. A address chu khawlai niin chutah pawh ka tawng fuh taktak theilo. A ṭhiante an awm ve zel tlat. Tin, amah hmuh ka tum leh tih hi ka chhungte chuan an hriat ve ka hlau em em a, a chhan pawh, hetia a nunhlui a a kir leh tak avang hian ring zo tawhlo in a nun chu a sim taktak theih an ringlo a, keimah ber pawh hi min zilh awl lo hial ani. Ka pa phei chuan

“A bansan vang vang tawh a, hetia a beihṭhat leh takah hi chuan tunhma zawng ai khan a bei ngawrh tawh zawk dawn a, a beiseiawm tawh loh” ati hial ani. A dikna chen pawh a awm ang tih ka ring e. Mahse, amah ka beisei leh beisei loh vang lam pawh nilo in a fa ka pai ani tih tal hi hria se, tlem te tala a nun alo vawn theih te kha ka ring ve ani ber zawk.

Ka duh ang ngeiin tuk khat chu amah hmuhna remchang ka nei thei ta hlauh mai. Vanneihthlak tak hian alo rui chhe lo hlauh bawk. A fa ka pai thu ka han hrilh zet chu a lawm ve hle niin ka hria a, a mittui te pawh a tling piau thei nia. Mahse, a lawm hmel chu lungngaihna in rawn thlak leh vatin ka pum chu a zut a zut ta mai a. Chutah, chiang zet a min rawn en leh pah hian

“U Jo, ka tihpalh ani. Kei hi ka damrei tawh in ka inring lo!” A ṭawng chu zawi hle mahse, ka beng ah erawh chuan  ava fiah ṭha tehlul em. Rang zetin a darah ka vuan a, ka sawi deuh nawk nawk bawk. Ka ṭap leh pur tawh mai.

“Engvangin nge khatiang thu kha i sawi. Sawi rawh, mawh!” Tiin ka ṭap ta hlawp hlawp a. Ani pawh chu a bang bik hauhlo. A  mittui tla chu hruk leh zauh pah hian

“Ka tihpalh takzet ani, mahse, in nufa hian ka hmangaih che u” tih pahin min tlansan ta daih a. Umzui tumna ka nei lova, umzui turin tha lah ka nei heklo. A hrehawm ngawih ngawih hi ani ber e.

Ka naupai chu thla 3 a nih in ka chhungte ka hrilhhre ve ngam chiah a, ka pumah a lan lemloh avang khan ka nu phei chuan a awih lo hulhual hman. Mahse, a fanu hian dawt ka hrilh ngailo a, hetiang hi fiamthu thawhna chi pawh ani lo tih hrechiang tu niin a tawpah zawng a awih lo thei ta biklo ani e. An hriat hlim chuan nasa takin min hau a, an ring ngam thlawt lo bawk. Chubakah, naute chu Chhantluanga fa ngei ani tih an hriatchian bawk avangin an duhlo hle a, ti tla tur em chuan min nawr lo tih mai ani. Tih tlak tir min tum pawhnise, ka duhloh miau avangin thih tha nen ka bei let ngei ang chu.

Ni khua a rei a, a tirah pawm lo hle mahse, khuareiah chuan an pawm ngei a ṭul tawh a, thla 6 a tlin hnuah phei kha chuan ka nu leh pa te khan min duat ta mah mah emni aw kati hial. Hetihlai hian ka nau te nupa pawhin an sang chhuak ve ṭep tawh bawk a, anni chu an pai lawk kan tih tawh kha. Pathian zar a kan dam tlang te anih chuan kan inchhungah naute 2 ṭhawt an awm rual deuhthaw thei dawn anih chu. A nuam dangdai dawn teh e. Tin, Chhantluanga pawh khan a fa chu la piang hauhlo mahse, keimah min ngaituah a pe na ve em em a, a khat tawk hian a rawn lang ve fo ṭhin. Ka chhungte pawhin lo hnar duhtawh biklo in an en liam tawp a, a rui chhe ngailo bawk nen khan amah chu pawr far tawh mahsela, ka mitah erawh ani tluk kha an la awm chuang love. Tun thleng hian an la awm lo fo.  

A nuhrawn ve thung kha chuan a tû lo piang mai tur cbu a pawm lo hle tih hriat nan a kalna hmun apiangah a chhe zawng hlirin thu a thehdarh a, amah vang liau liau hian kan chhungkua pawhin demna nasa tak kan dawng in, rel leh sawichhiat nise kan hlawh nasa. Mahse, chungte chu Pathian hming avanga tuar tlang zelin kan rilru pawh a na lutuk hran love. Anni chhungkua hian pawm duhlo in, khawtlang sel rawn pawh tawk mahila, keiin ka fa leh a pa hi ka hmangaih chhung chuan engkim hi ka tuar dai thei a, ka  palzam thei zel mai.

Ka naupai thla 7 a tling chiah tih in ka nau te nupa pawhin tluang takin fanu duhawm tak an hring chhuak ve ta a. Keini chhungkua chu kan hlim tlang teh e. Chutia, fanu meuh a han neih takah chuan ka nau pawh a rilru alo nem ṭan a, a nundan te pawh thlak chho hret hret in a nupui fanaute chu a hmangaih hmel hliah hliah ta mai. Tin, hetia fanu a neih tak vang hi nimaw, Chhantluanga dinhmun turte pawh chu hrethiam ṭan in, alo kal chang te pawh hian ṭhat a chhuah hle a, a khawngaih hmel ta ngawih ngawih nia.

Hun a kal bek bek a, thla 8 mi ka pai ve ta der mai. Ka rit sawt hle a, ka awm mai mai te pawh hi ka hah hluah hluah chho ta. Ka chhungte chuan min duat rawn hi kati mai a, ka monu pawhin min thik lovin min duat ber bertu ah a ṭang ta zawk hial. 

Ni khat chu dawr kallo in inah kalo awm a, hetihlai hian ka rih tawh em avangin dawr pawh ka chhungte kutah a awm chawt tawh a, ka kal thei tawhlo hrim hrim. Chutia mahni chauh a kalo awmlai chuan pawr fap leh chau tih hriat zetin Chhantluanga chu a rawn lut leh hlawl. A taksa chhe lutuk tawh leh ruhkawl tawh em em te ka hmuh hi chuan ka na zual ngawih ngawih ṭhin a, beisei tur hi a awm tawhlo takzet niin ka hre nghe nghe. Ka bulah chuan rilru hah hmel em em a rawn ṭhu in a thlan hliam lehnghal. Keichuan a kut ruhkawl tak chu lo chelhsak vat in thil awmzia kalo zawt thuai a. Chuveleh ani chuan thawk lak hawk pah hian

“U Jo, naute hmel hi ka hmuh hman pawh ka ring lo!” A ti leh ringawt tawh. A chhan ka han zawh nak chuan tihian min lo chhang a-;

“Khatia damdawi ka khawih leh hnuah khan nang hi thlah hlen che ka duh a, i tan ka tling zo ngai dawn lo tih ka inhriat vang a rui leh mai pawh ka ni. Eng ang pawhin ṭhat kha tum ve mahila e, tute mah hian min ring zo ve tawh bawk silo nen, ka in ngaihtuah hah lutuk khan damdawi chu ka ti leh ta mai a, a hma zawng aia duhthawh chho telh telh in ka inthlahdah sawt em em a, tikhan Tetei te kawp chho in, kha pawh amah ka duh leh hmangaih vang ni hauhlo in nang hian min ten la, min haw ngawih ngawih bawk la ka tih vang zawk ani.  A chhan chu, Tetei kha HIV+ lo niin sex pawh kan hmang si a! Hmanni lawka thisen ka han test naah keipawh hian ka kai ve ani tih hria in ka beidawng zual ta takzet. Chuvang chuan U Jo, ka naute hmel hi hmu hman ta lo pawh ni ila, min rawn dem suh aw” 

Ka mitah pawh min en ṭha ngamlo chuan a rawn ti ta. Kei chu khur der der in ka ṭap chhuak zui ta hawk mai. Eng thu nge maw ka hriat tak hi. Ka thisen hi chu thianghlim mahse, khawvela ka mipa hmangaih awmchhun thisen erawh bawlhhlawh tawh niin tihian mual a liam mek chu ani si a maw. Ka nat loh reng reng hi chu ring suh u. Engtia chhanna pektur nge anih ka hretawh lova, ngawi rengin a kut cher ṭhiak mai chu ka hmer zui ngat ngat ringawt. Chutah, ka mittui luang ngiah ngiah te chu min rawn hruk sak mial mial in min nuih leh ver ver a, engdang sawi chhunzawm tawhlo in min chhuahsan ta zawk ani..

Khami chin kha chu a hmel pawh hmuh tur awm tawhlo in a damlo zui ani tih thawm ka hria a, a pawn chhuak hmuhtur pawh a awm ta ngailo. Kei lah chu ka rit tual tual mai a, ka sehsam vel ṭan nen khawiahmah ka chhuak hleithei tawh bik silo. A hun alo thleng a, ka nau neitur chu damdawiin min panpui in, naute pa tello chuan hrehawm tak leh na tak tuarin nau te duhawm deuh mai chu ka hring chhuak ve ta hram e. Lalpa, ka lawm e. Nausen hmelṭha leh ngo veng mai, a pa chhun em em tur chu hringchhuak in, a pa dubdan tak hian mipa ala ni zui a. A ṭap ngek ngek thawm te chuan Chhantluanga min hriatchhuah tirin ka lung hi ava han damlo tak em. Tichuan, damdawiinah rei pawh awmlo in kan chhuak zui leh mai a, In kan thlen rualin ka nu chuan phur zet hian Chhantluanga te chhungkua chu chanchin hrilh ve a han tum a, mahse, anni erawh amah Chhantluanga a zual deuh avangin damdawin lam an lo pan ve chiah tih thu chu min hrilh ta zawk anih kha. Chu thu ka hriat rual chuan ka na leh ngut ngut a, ka ngaihtuah em em bawk. Mahse, tihtheih ka nei der bawk silo nen keimah hi ka â ruai ni berin a hriat.

Naute ka neih aṭanga a ni thumna vel a liam leh ang tih hian ka pa chuan phone call dawngin damdawiin aṭang alo ni a. Engdang ani lo, ka hmangaih leh ka naute pa, Chhantluanga boral thu chuan min rawn deng zui ta anih chu! Ka tliak hnawp.

Ka pa chuan tim dui hian chanchin chu min rawn hrilh ve a, hetihlai hian khumah ka naute bulah mu in ka mu khawng ta reng a, ka ṭap theilo hial zawk. Kan nunhluite chhuikit in rilru a vak kual ruai a, a hrehawm takzet ani. Chhantluanga khan a naute hmel hmuh hman kha in beisei tawhlo hle mahse, a thinlung tak erawh chuan hmuh a chak a, a fight ve ṭang ṭang tih pawh ka hria. Ka hmangaih kha a fapa hmel hmuh nan tiin a tuar te kha a chhel asin, a damkhawchhuah theihna turin a bei ve hram hram a, mahse, chunglam rorelna chu a do let zo bik silo. Kan nunah hian thu kan va han neilo tak em ve aw.

Tichuan, damdawiin aṭang rawn phur haw in, kan in bul an rawn thlen hnu hian kei chuan kuang rawn zawn tute chu kalo pawt ding leh lailawk a, a kuang chu min hawnsak leh ta ani. Chuta a hmel ka han hmu zet chu maw, ka awih theilo hial mai. Amah kha ni tawhlo in midang, putar ruang zawk hi an rawn haw pui ta emaw tih mai tur hi ani a, a cher em em a, a ruh chu a vun in a tuam ve ṭawk ṭawk a, ava han danglam tawh tehlul em. Hetiang hian i natna zozai te khan an lo ei chhe ta che ani maw tiin ka kuah zui a, ka ṭap hawm hawm mai. Ruang zuitute chu kan chanchin hretu vek anni bawk a, maktih hmel taka min entu pakhatmah an awmlo. Ngawi reng hian min dinchilh ṭhap a, min thlir reng ringawt . Chutia ruang dai kuah a kalo ṭah bawrh bawrh lai chuan ka nu in kan naute muhil lai chu rawn pawm chhuak ve in ṭap chung hian min rawn pe ta a. Kei chuan rang taka lo ban vatin a fapa chu a hmai silo chauh a pawm thlak leh pahin ka ṭahkhum leh ta. Chhantluanga khan a hmasa ber leh a tawpna ni turin a fapa hmel chu a hmu ve thei ta asin. Tichuan, ka duhtawk chu ngah lemlo mahila, ruang chelh khawtlai reng chu thiltih chi ni heklo le, an kalpui leh ta a ni. An in lamah lehzel chuan ka tan zui  a harsat tawh avangin pawi ka ti hle a, mahse, inchhunga an luhpui hma zawng chuan ka thlir zui ta vawng vawng thung.

Inchhungah lut ve in naute chu khumah bawk ka mut tir leh a, ka nu in min awmpui reng in kan han ṭap dun leh rih ṭhin. Reivaklo ah khuang pawh rawn ri zui ve tlang tlang in ka fapa muhil hmel mawlh kha ka thlir ning theilo. Aw,, chu khuang ri te chu a pa thlahna hla satute khuang leh hla sa thawm tih lah ila hrethiam ve silo maw tih sap pahin a chal ah ka han fawhsak ta zeuh a. Mittui dir zung zung chung a a kianga mut thlak ve pahin an khawhar hla sak te chu zawite te hian kalo zawm ve zel a,  chutihpah chuan ka fapa hmel mawlh chu lungchim tak in ka thlir zui ta vawng vawng.

****    *****    *****    ****        ****    ********

Leave a Reply