You are currently viewing
Oplus_131072

Spread the love

TUNGE TIMOTHY CHU!?!??

By : Vanlalpeki Fanai

Tunah hian chawhma dar 11 ri tawh in, college tharah admission te tifel in, hun tam zawk chu Kan VA hmang ral a, țhiannu Hmingte-i nen Kan inluah lam pan leh tur in Kan haw let dawn mek a ni. Ka țhiannu Hmingte-i nen hian tette ațanga inkawm chho tawh niin, school te pawh lut chho dun zelin, tunah hian Champhai District thingtlang khaw pakhat ațang tihian Aizawl Khawpui ah college țha zawk te bel ve tawh turin Kan Chhukthla dun rawih Mai a ni a, Kan pahnih bawk hian apartment pakhat luah in Kan chenna building pawh lian leh sang ang reng tak a ni nghe nghe a, a chhungah chuan mi engemawzat cheng mekin, kaw tamtak luah theih chi kha a ni bawk.

Tette atanga țhian inlungrual leh in kalhlatsan ngailo kha kan ni bawk a, hetia apartment pakhata Kan han cheng dun lehzel te pawh hi nuam Kan ti dunin, Kan thla pawh a Muang dun viau e. Chhungkaw khawsak lamah pawh harsa tak Kan nilo ve ve a, thingtlang khuaa a khawsa thei pawl an tih ang chi kha ni ve ve in, hetiang a nih rual erawh hi chuan chapo chu sawi loh, Kan khawsak a sang lo dun hle a, keini aia thingtlang mi veleh chhawng te leh harsa zawk te han kawm duhloh ngawt ang chi kha chu Kan nei ve lem Chuang lo. Mahse, ti teh ang, keini pahnih hi chu sawitawh ang khan, inhlatsan thei lo niin, rual pawh hi Kan pawl Mang lo hle a, țhian dang pawh hi Kan mamawh belh viau lemlo bawk.

Kan țhian dun apartment hi 2nd floor a awm niin, thenawm Kan nei bawk a, a nuam ve dar dar țhin hle.

Chutia, Kan floor pan a step Kan rah chhoh bek bek lai chuan Kan hmanah hian luggage lian fe Mai chawi chunga lo Kal ve mek mipa pakhat chu a awm ve a, keini țhian dun chu in melh deuh he hâw Chung hian, Hmingtei zawk chuan tlawmngaih chhuah Chung leh aw ngaihnobei zet hian

“Țhianpa, puih I ngai em? A rih hmel Mai si a” ti chungin a lam pan chuan a han tlanchho ta zat zat a. Kei erawh ka ke pen ngai reng in ka Kal ve zel thung. Chuta Hmingtei’n a han biak takah chuan chu pa pawh chu rawn hawi let ve vutin, a rawn nui deuh suk bawk. A hmel kha chu ka țha tihzawng ni hran lo mahse, a pian erawh a nalh hmel fu Mai. Chutah, a hah tih hriat taka thaw deuh kawk Chung hian

“Ah, ngai hran love, step ni Kher lo se chuan a rit hauhlo mawle” tih pah hian a luggage chu a han beng deuh thuk thuk a. Kan mit a Intawng zui siah lehnghal. Engtin emaw hian ka awm zui sulh thei a, chu chu amah ka va imaita lam pawh ni chiah in ka hre lo. A mak em a, ka sawifiah thiam chiah lo ni zawk rawh se. Duhlo sateh mahse, Hmingtei nen chuan a luggage chu a chenna hmun thlengin Kan chawi chhohpui ta țhak tho a. Ani chu Kan floor Chung chiah, apartment step tawpna kil sir chiah ah hian a rawn awm thar ve dawn hi a lo ni a, a chenna hmun tur chu Kan apartment ațang pawh in a han lang Chiang thei hle nghe nghe. Umm, a tih chi dawn viau e. Amah lah tlangval tha chak lai kha alo ni ve bawk nen, engemaw thutah mipa mamawhna Chen hi Kan nei ve țhin si a tiin, Hmingtei nen chuan Kan lawm ru ta phian. Tichuan, lawmthu te min hrilh leh luam hnuah nidang a inkawm țha leh tura inthlah felin, Kan chhuahsan ta phawt zawk a ni. 

“Inchungpa thar tur chu a chhiat loh kha, a fel dawn khawp in ka hria”  Lalhmingte-i țhin lah hi a. Kum engemawzat lai Mai ngaihzawng nei tawhlo tih takah, a rawn te hi a pe na țhin hi a nia. Nui var var chunga min rawn melh chu keiin lo ner khum sak sak in

“A hmel kha chu a țha e, han tihtur chi chu a nih mawlh loh kha. A duh chhiat hmel thei em Mai, a duh ngei ngei ang che” ka Lu a rawn ri zui nghal fawk. 

“Ka pian a hnu lamah hian vawikhatmah mipa ka la bem hmasa ngailo. No teeee hi a ni tawp Mai a ni” tih pah chuan inbual Turin bathroom ah min luhsan zui a. Kei erawh ka lo nui zui awr awr Mai. 

Muangchanga eirawng te bawl chhunzawm leh in, tlai dar 5 velah zanriah ei chu Kan hman ta der mai a, tichuan, khawmuang tawh lemlo in zanriah chu Kan ei nghal mawp mawp. Zanriah eikham hnuah kei chuan Kan zirlaibu chu ka keu nghal sawk sawk a, kumin hi Kan kum khatna, 1st semester Kan zir țan hun tur a nih angin leh in elna a sang dawn riau a ka hriat avangin, zir laiah pawh rilru pek nasat hle ka tum viau a, ka thei angem tih phei chu hrelo mahila, țhiannu Hmingtei te anga ka rilru a chak ve lemloh avang chuan kei chu uluk leh urhsun taka zir chi ka ni miau Mai a, inthlahdah thing ka ni ve tlat lo. 

Admission Kan tihfel tukah chuan class țan nghal login fresher te tan hun min buatsaih sak leh phawt a, hmel hriat thar leh țhian chhar te pawh kha kan nei ve ta nual awm e. A tu a te mah hi Kalo notice bik lemloh avangin kei chuan ni thar țhian chhar thar pawh ka nei mumal lo. Hmingtei erawh hi chu a țawng duhin, țhian Siam nise a awlsam em em a, hetiang lamah hi chuan ka tluk lo zual hle țhin a nih hi. Tin, midang te ngainat pwh a hlawh hma țhin reng bawk a ni. Kei erawh chu, khatiang mizia leh nungchang kha ka ni leh miahlo thung a, ka khirh ru hrep zel. 

“Didik, eisiamna tur bawlhlo vel kha kan nei mang tawh der lo a, Kan lei kawi nghal Mai dawn emni?” 

College Kan chhuahsan rual hian Hmingtei bawk in a rawn ti leh. Kei chuan ka remti tih hriatnan ka Lu chu lo hu zauh zauh in, ka rilruah erawh lehkha chiah awm leh tawhin, ka zir chak em em vang erawh a ni hauhlo. Ka vei leh tut tur tawh a nih ber chu. Ka dawih em em reng bawk si nen hian Hmingtei hi Chu awm țhin lo se zawng, ka laktlak loh ve ngawt ang le. 

Tichuan, duh tawk a Bazar vela Kan vah kual leh hnuah in lam pan chuan Kan haw ve thei ta hram a. Hetih lai hian khua pawh lo tlai veleh duai tawhin, a thim lek lek tawh hial Mai. Kei chu eng thil in nge min mawlh tih pawh hriat loh hian ka rilru a hmanhmawh leh et et tawh nia. Ka van ning țhin tak aw. 

Kan building gate pui Kan lut chiah tih ah, Kan inchung a rawn awm thar pa nen khan intawk chawtin, a mitmeng rum zet leh thip fahran a min rawn melh rual chiah khan kei chu kalo ip leh zawk tawh nia. He pa hmel ka hmuh apiang Maia ka awmdan danglam leh diklo țhin fo mai hi keimah pawh hian hrethiam biklo in, nuam lo ka tih phah thei khawp mai. Be țha a, ti tlangnel ve tur pawh hian keimah min kap tlat tu thil hi a awm ka ti mai, ka ti lui thei ngang lo tlat a tin ni. 

“Timothy, kha, khawilamah nge i inkahchhuah dawn a, iva simart reuh si em” tiin Hmingtei bawk khan alo be leh thuai a, kei erawh kalo ding ngawi reng thung. Chutah, Timothy chu kan lam hawi a rawn meng thip râm chung hian

“Company ah ka va dâk ve zuai ang e. Nangni zawk in va tlai ve” lo ti ve in, an han inbe chhunzawm leh duah phawt a, rei fe an inbiak kawi leh hnu chuan inchhung lamah kan lut thei ve ta chauh a ni.

Khami hnu aṭang khan inchungpa chu company engemaw takah a thawk ve tih ka hre chauh a, mi pangngai tak ni turah pawh ka ngai ta chiah. Chumi a nih avang chuan ka va ngaihsan phah ta chiam in, ka be ṭha nghal huam dawn e, ka tihna erawh a ni hauhlo thung. Tunlai Zoram khawvelah chuan a tu te pawh hian kan thawh theihtawk leh kan phak tawkte hi thawh nachang kan hretawh lo hle a, nu leh pa chhungte thawhchhuah leh lakluh sa hmanga inchhekarbawm ve vak hi ṭhalai tamtak te thiam chhun a  ni tawh tlat. Hna sâng leh zahawm chauh thawk ang u, ka ti miahlo, i tlin phak bak pawh thawk rawh ka ti chuang lo che. Tumah pawhin an phut heklo ang che. Mahse, ka ti teh ang, sum lakluhna tur a nih a, hna ṭha leh him chin a nih bawk chuan thawk bawrh bawrh ang u. Tuna ka college kal theihna pawh hi a hma daih aṭanga kalo intuak lawk vang niin, tihian chhungte pur buai lo in admission engkim ka tihfel phah bawk a, aizawlah pawh hian ka thawh awm tawk tur hna chu zawn leh ngei pawh ka la tum. Tin, ka krismas thawmhnaw leh mamawh engkim mai hi ka chhungten min leisak lohna a rei lutuk tawh tlat mai bawk. Hautak lutuk nih hi tum lo tlang ila, inren chemin kan thawhchhuah mil te hian i khawsa ve hram teh ang u.

“Vawiin chu in awm ve khiah maw?”  Timothy chu kawngka ah a rawn dâk ve heu mai a, zawhte note duhawm zet hi ala rawn pawm zui lehnghal. Hmingtei nen amah chu va en rual ṭhawtin, Hmingtei zawk chuan

“Awi! Teh thut che chuan. Kan awm alawm, inrinni te a ni ve bawk sia, hawh, lo lut ta che” ti sawk sawk in, Timothy pawh nui suk chung hian a rawn lut ve nghal mai a. Kei lah chuan engdang sawilo hian a zawhte no pawm lai chu kalo chuh ve vat thung.

“Zawhte chu i lawm ve hle a nimaw?” min rawn ti supin, ka hawichhuah chuan chiang zet leh mitmeng thip tak bawk khan min lo melh leh reng mai a, ka ṭim sawk thei. Mahse, ka awmdan chu insiamṭha zui leh thuaiin  ka han nui lui ve ta zawk a. Zawhte ka ngainat zia thu leh kan inah pawh kan vulh reng thu te chu ka hrilh ta mial mial zawk. Chutah, ani chuan lo buk nghut nghut pah hian

“Nei daih rawh. Vawiinah ka ṭhianpa in min hawntir ringawt a, tikhan nei rawh u, in duat zawk tak ang” a tih chuan kalo lawm ngei mai. Zawhte chu chuk nghal mawlh mawlhin ka lawm a kim takzet e.

Ni a liam leh hret a, class pawh kan kal ṭha pangngai leh viau tawh e. Ka lo sawi tawh ang khan, college huamchhungah chuan in elna hi a sang tawh em em a, a tu a te mai pawh chu a ruk hian kan ṭang ru tlang em em vek nimaiin ka hria. Chutihlaiin, mamawh lei ve reng lo ngai ṭhin bawk nen, ka pawisa khawlsa pawh ka hmang zo lek lek tawh mai a, chhungte pur buai duhlo mi tihtakah, zan lam tala hnathawh theih tur chu ka zawng kual nasa hle. Vanneihthlak tak hian restaurant lian tak pakhatah chuan zan lama dish washer tur an duh chu hria in, ka dil ve nghal bawk a, Pathian zarah min lo duh ve hlauh mai. Ka thawk ve nghal tawh dawn bawk a ni. Hetihlai hian Hmingtei pawh khan a thawh theih tur hna chi a melh ru ve reng a, kan hun neih dan a zir a hna pawh chu zawn chawp te a ṭul miau si avangin a buaithlak duh angreng khawp mai. Zan hi kan hunawl neih ve chhun a nih tlat avangin Hmingtei pawhin hna chu a zawng hmu lawk thei lo nghe nghe. Mahse, zawng reng ta na na na chuan a tawpah zawng, phone dawra thawhna tur chu a hmu ve ta hlauh mai. Kan hlim dun kher asin.

Tlai khat ka class bang chu hnathawk leh tur ka nih avangin hmanhmawh zet hian step ah ka tlanchho hlawk hlawk mai a, kawngka hawng leh thuai thuai in ka inthlak ta vat vat. Ka inthlak zawh a ka chhuak leh turin kawngka ka han hawng a, Timothy chenna lam ka hawi chhoh thuak lai chuan thilmak tak hmuh ka han nei ta. Ka phu zawk thei hial a nih kha. Ka rinloh lutuk hian Timothy chuan a kawngkhar zimte a inhawng kar aṭang chuan min lo bih kur mai a nih chu mawle! Ding chawtin, ka thin a phu nghal zawih zawih mai a, ka mit sulh bawk ni hian ka hre tawh. Mahse, amah tih ka hriatchian leh takah erawh chuan pangngai zui leh vatin, ka nui lui sak a, ani erawh chu ngawi renga inchhung lama tawlh lut chung hian zawimuang in kawngka pawh chu a khar chhunzawm veleh mai. A awmdan teh hrep chu mak ka tiin, min ṭhawng angreng viau mai. Khatiang kha mi pangngai khawsak dan tur pawh niin ka hrelo a, a tho â vel mai mai ni turah ka ngai ta ngawt.

Tichuan, zankhuaa hnathawk lehin ka thiltawn vel te pawh kha kalo theihnghilh hmin leh hmiah tawh a, a tihzia phian. Ka tihtur engkim te tifelin, zan dar 11 velah ka haw ve thei ta chauh a, alo reh ṭha tawh khawp mai. Kan building ka thlen lai hian security Pu Kapmawia pawh kha alo muthlu nasa tawh hle a, amah chu melh zauh chungin ka nuih ta sak. Tichuan, inchhung lam panin step thim rek ruk tawhah chuan ka pen chho zel a, chutihlai tak chuan khawi aṭanga lo chhuak nge tih pawh hriatloh hian zawhte hram thawm ka hre ta thut mai. Ka ke pen lai chu tawp chawt in, thawm chu ka han ngaithla chiang leh deuh a, a reh zui leh daih lawi bawk si. Umm, ka zawhte thar, a hming atana nono-i ka phuahsak kha chu a ni em lo turah ngai phawt ang, tiin ngaihṭha tak chuan ka kal chhunzawm leh mai bawk a.

Ka hnathawhna vang leh chhun lama class kalna vel te vang chuan ka chauh ve em avang in ka insilfai thuak thuak ringawt a, ka muhil zui ta daih. Mumang nei zui in, ka mangah lah chuan ka zawhte thar kha mihringah alo chang pek a, min thah tum hian chemte nen min lo um kual ngat ngat lehnghal. Harhchhuak kawkin ka han ṭhu chhuak hlawl mai chu, kalo thlan dup tawh nia. Ka thaw ri hlawp hlawp thawm chu hriain Hmingtei kja a rawn tlanphei ve vat a, min rawn en kual deuh vut vut bawk. Chutah, ngaihṭhat loh hmel fe mai hian

“Eng nge ni ta? Mangṭhalo i nei a nimaw?” tiin ka sam te chu a rawn zut ta delh delh a, kei chuan thudang a lo chhang ta lo chuan

“Khawnge nono-i?” kalo ti hmuk. Chuveleh, Hmingtei pawh chu rawn nui chhuak hakin, kalsawn leh pah chuan

“Ava ho e aw. Ka hrelo, a chhuak lawk a ni ang. Nono-i vangin maw khati khan i awm a?” tih pah chuan min nuih zui ar ar mai. Kei erawh, hlauhna chuan min kiansan tawh tho mahsela, a chhan hriat si loh hian ngaihṭhat lohna hlir in ka khat nia mawle.

Thochhuak zawt zawtin, hmai chu ka phih leh phar phar phawt a, ka harh deuh kawk theiin ka hria. Darthlalang hmaa ka hmel ka han enchiang leh zet chu le, ka tla dâwk ni hian ka hriaa, umm, tunhnaiah ka thawkrim ve deuh a, zan nise ka mu tlemin, chaw lah kha kan hnathawhna hmunah kan ei zel mai si a, hetia ka khawsak dan phung lo danglam ta deuh hi ka taksa hian alo hre ve te pawh a ni ngei ang chu, ka ti ve ta ringawt. Ngaih han tihṭhat lohna tur em em pawh awmin ka hre ta love. Ka chau zual ve deuh a nih mai mai hi.

“Ṭhiante u, hei in zawhte aw” 

Chu aw chu inchungpa Timothy aw ngei ni tlat a ka hriat avang chuan bathroom aṭangin ka tlanchhuak ta thuai a. Umm, amah ngei alo ni e. Tin, ka nono-i kha alo pawmbet reng bawk. Rang taka nonoi chu va laksawn sak thuai pah hian ka kalsan leh ta daih a. Ani chuan maktih hmel fe a min en deuh vung vung chung hian a khi ve ta suk mai. Hmingtei lah khan

“Iva han fel ṭhin em. A bo ta emaw kan lo ti hman ṭep a” lo ti ve luamin, Timothy pawh chuan awki zangkhai fe mai hian

“Nia, ka awmna lamah hian a rawn kal veleh zauh zel a, a khua te pawh a har ve a ni ang”  lo ti veleh maiin, a ṭawng pah te chuan kei chu min la melh char char nia mawle. A hmel ka hmuhrual apianga ka awm ṭhin dan kha hrechhuak in, ngaihṭhat loh ruk riau na hi ka nei lehpek tlat tawh. He pa ah hian thilmak engemaw tak hi chu awmin ka hria a, mahse, hriatchhuah dan tur erawh chu ka hrechuang hauh silo. A hmel te pawh chu hmu rapawm ru thar leh riau in, ka hrehawm ngat ngat zel a, min nek chep ni mai a hriatna hi ka nei reng mai. Ka awmdan hi kei ngei pawh hian duhlo in, hrehawm ka ti hle a, ka in haw deuh tlat tawh bawk. Kei hi min ngaizawng ni tlat a ka hriatna te hlei hlei chuan amah chu min ngainat tir theilo zuala, lehlamah ka mipa duhzawng chi kha ni mawlh heklo. Engtinnge ka tih vak chuan bik ang ni.

“Didik, zanin chu kan in lamah zanriah eiturin rawn phei ve ru aw, in ṭhianho khan ka sawm che u nia” chutia min rawn betu lam ka han en chian nak chuan kan class a mipa chhelo ka tih ruk em em leh to ve tak mai, Ruatsanga chu lo niin. Hmel hlim pu sâng chung hian min lo nuih var var mai a, a bulah chuan kan class ami tho nula chhelo zet, Melody alo ding tûm ve vuau bawk. Henu hi chu chhelo in, a incheina te hi changkang thei fu mahse, a nungchang erawh chu eiawm loh ve thlawt hi a ni thung a. A nihna leh ṭhatna te hi a hre lutuk mah mah ṭhin. Chutah, kei chuan nui ve var var chung hian

“Engatinge? I piancham lawmna i siam dawn tihna emni?” ka tih sap takah chuan Ruatsanga pawh chu lo bu ve nghalin, min chhan let leh hma hian kan hmeichhe ṭhian dangte an rawn thleng chawpchilh ve zat a, an la rawn bengchheng em em leh ta nghal. Kei chu min rawn kuah thuak thuak pah hian

“Zanin chu, hei, Ruatsanga te inah hian a piancham va lawm ang u aw. Sa free kha a ni leh mai a” ti a nui hawr hawr pah hian min sawi pah deuh nawk nawk bawk. Chutihlaiin, Hmingtei pawh chu alo bang bik chuang hauhlo. Kan ṭhiandun chuan kan bu lawp lawp reng hi a ni ringawt. Ruatsanga bawkin kal ngei ngei tura min tih pah a min kalsan hnu chuan ani chu kan thlir zui ta ṭhap. Hepa hi chu aw, chhelo hi kan va han ti tlang hlawm tak em. Chhe mawlh heklo le. Chuti anih si chuan zan lam chu  kan hna pawh chawlh kan lak mai a ṭul dawn a nimaw, tiin Hmingtei nen chuan in lam pan pah chuan kan sawizui neuh neuh reng a, mahse, hahchawlh pah kha a ni veleh mai a, pawi pawh kan ti em em hran chuang lo.

“Kha, khawnge in kal dawn a. In va nalh dun angreng em”  Ruatsanga te in lam pan tuma kan chhuah dawn lai tak hian hnunglam aṭang min rawn be tu an awm thut a. Kan han hawilet nak chuan Timothy bawk kha lo ni leh in. Alo khi deuh sûng mai lehnghal a, ka ten lek lek tawh zawk. Hmingtei zawk bawk chuan lo chhang let leh thuaiin nui ar ar chung hian kan tihtur te chu alo hrilh leh zung zung a, chutah, mak tak mai hian Timothy hmel landan chu rawn inthlak danglam nghalin, a meng thip leh ta râm râm mai nia. A hmel landan aṭang chuan Hmingtei thusawi ah khan lawm lohna tur a hmu emni aw, kalo ti hman hial. Mak pawh ka ti zawk hle. Tichuan, mi pawh chhanglet tawh miahlo hian a inher deuh vut a, a kal ta nul nul mai. Hmingtei nen pawh ka hau chung hian a awmdan mak lutuk avang chuan kan in en he haw ta ngawt a. Hetiang hi midang mai nilo, ṭhenawmte chunga khawsak dan tur ṭha emni, ka ti rilru hial a ni.

Reiloteah, Ruatsanga te in pawh chu thleng ve maiin, mi an lo ṭhahnem tawh hle a, kan hmel a rawn hmuh rual deuhthaw chuan Ruatsanga chu rawn kal hnai nghalin, chibai te kan inbuk tawn leh lawp lawp phawt a, lawmthu nise a sawi luam bawk. A hmel hlim sâng reng mai nen chuan hmuh a nuamin a va han ṭha chungchuang tehlul. Mahse, a hnung lawkah chuan a  mei, Melody bawk kha lo ding zum leh zât tawhin, hnunglam aṭang chuan a bialpa chu a rawn pawt leh zauh ṭhin tih pawh ka hrereng. A khawsak duhdan vel chu ka va han ngei mai mai tak aw. Umm, a pawilo e, a bialpa kha a ni ve miau mai si a, keini sawiphak pawh a awm hleinem tiin lungawi chawp te chu ka zir ta ngawt. A hnuah, zanriah tuihnai takte chu kilho leh in kan hlim tlang dar dar hle a, kan zi nuaih nuaih reng bawk. Mahse, awm tinuam lo tawk lek tur vel hian Ruatsanga leh Melody te chuan a hranpa ve ve in min rawn en leh zeuh zeuh ṭhin. Ruatsanga min melh dan kha chu ngaidam in, nuam ka ti ru veng veng mai a, marawh chu, Melody melhna erawh, zep thu chenglo, a mitmeng mawlh kha thikna hlir hian a khat tlat tih ka hrethei. Engah nge maw, kei thingtlang nula ve mai mai hi, anni ang, khawpui nula ah pawh hmelṭha leh changkang bawk si hian min lo thik ve ngawt duh zawk le, ka ti a ni. A bialpa chu chhuhsak duh tur angin min hria nge, chutiang chu a thleng ngai dawn hauh silo . Engang a ka mipa duhzawng pawhnise, kawppui nei lai te hi chu e, ka umzuiin ka chhaih buai duh bik reng reng hleinem. Chutiang lutuk a hmu zo lo leh rilru chhia chu ka ni bik hauhlo mai. Ninawm lutuk mai a.

Zanriah eikham hnuah reilote chu han ṭhu khawmuang lehin, amah Ruatsanga ngei mai chuan pawn thleng hian min rawn thlah vei thlap a, a nuam dangdai ṭhin teh e. Mitmei ven tur kha an lo awm ṭhin mai pawh a.

Building kan thlen lai hian zan dar 10 vel ri tawhin, alo reh ṭhap tawh mai a. Chutia titi mawlh mawlh pah a step a kan chhoh bek bek lai chuan tuemaw hi inchung lam aṭang chuan rawn tlan thla puatin, kei chu min rawn su her sawk mai. Ka rak ṭhawt thei hial. Amah lah chu tunge a nih pawh hriat hman miahloh hian a tlan tlang thla daih a, thupha chawina ṭawngkam takngial pawh kha zu nei miahlo a mawle. Mak ka tiin, ka ngaihdan chu a nilo kher. Mahse, Hmingtei’n min hnem mawlh mawlh pah a

“A â deuh a nih dawn kha” a rawn tih tak supah chuan keipawh lo nui zui ve halhin kan kal ṭha veleh mai. Zan dar 9 a rik dek dek apianga step zawng zawng light an hmet thim kher ṭhin hi chu security ho bulah pawh sawi chi a nih hi ka ti rilru neuh neuh. Mi fimkhur lo deuh deuh hi kan kat nuk tawh si a, hetiang chuan kan la chesual pheng phung mai ang tih pawh a hlauhawm tawh riau.

Inchhung kan lut fel , khumah ka ṭhu thla chiah tih hian whatsaap  message ka dawng ta ral ral mai a, rang zetin ka seen nghal. Mak tak hian Ruatsanga hnen aṭangin chu message chu ka dawng ve nia mawle! Ka lawm lutuk nge ka helhhawlh tih pawh hriatloh hian ka nui zui leh ta vur vur mai a, Hmingtei pawh chuan mak min lo tih hmel kher asin. Kei lahin a chhan diktak chu sawi chhuak nghal duh bik silo hian ngawi reng in ka nui leh vur vur ṭhin a, min thlek ta vung vung ringawt. Hmai pawh phih phal tawhlo hian khumah chuan ka let zui thlawp a, Ruatsanga nen chuan kan inbe chhunzawm ta ngar ngar. Reitak hnua ka han hawichhuah leh meuh chuan Hmingtei chu lo muhil tawhin, khua pawh alo tlai ve fe tawh mai. Dar 12 hi alo ri vû vû tawh nia. Keini pahnih lah chu kan la inkawm tui nasa mai bawk si a, kan la mut mai hmel loh tlat. Rilru a vei ruk leh duh ruk takte nen a han inbiak hi chu alo nuam dangdai ve em asin. Mahse, chutia kalo la khik vur vur lai chuan pawnlamah zawhte ngiau thawm kha ka hre leh ta tlat mai. Ka hawi phawk nghal hrû thei nghe nghe. Chu zawhte lah chu uar fahran hian a rawn hram vak vak mai lehnghal a, nono-i ka hrechhuak ta zawk. Phone chu dah sawk sawk in ka tho chhuak ta hluai a, room chhungah chuan ka zawhte kha ka zawng ta chiam mai a nih chu. ka hmu hauhlo lehnghal. Ka khum mawng leh ṭhutthlengsei vel a alo mut ve mai ṭhin avang hian ka ngaih a ṭha a, kalo ngaihsak tawk lo deuh ṭhin a ni e. Chutia, inchhung berah ka hmuh tak silo ah chuan pawnlama hram reng chu amah ngei a nih ka ring nghet ta bur mai a, mahse, engtinnge ni ang. Tun ang hunah mahni in pawn thim ah ka chhuak ngam tawh teuh silo a. Roomah tlan lut leh rawk rawk in, Hmingtei kha kaihthawh tumin ka han sawi pah leh nawk nawk a, ani lah chu ala mu tui em em zui. Ka sawiharh zo ṭhaklo nia mawle. Umm, engpawh ni rawh se, mahni a ka hmachhawn mai a ṭul ta a nih hi ti a phun hlak hlak in pawn lam chu ka pan nghal chhat chhat. 

Pawn ka va chhuak chu, ka lo rinlawk ang chiah khan corridor phei zawng zawngte chu alo thim phui khup tawh a, ka khur ru nghal der der thei hial. Kut khur dar dar a phone light chu on leh vat in, light rinchhan cbuan zawhte hramna lam ni a ka hriat pan chuan ka kal risk ve ta ngawt. Ani lah chu ala hram ring ṭha lauh lauh viau a, ṭanpuina a mamawh ngei tih pawj chu phat rual a awm ta love. Kal zelin, Ruatsanga nen pawh khan kan la inbe pah deuh reng bawk a, tlem chuan ka thla pawh a muan phah ve deuh. Mahse, ka tha khur erawh ala reh fel thei hauhlo thung. Corridor tawpna ka thlen hnu pawhin zawhte hramna hmun tur awm ang reng reng chu ka hrefuh thei hauhlo a, chutihlaiin, kha zawhte lah kha a thawm chu alo la reh zui ve hmiah bawk nen. Ka bangbo ta angreng hle. Chutah, ka phone light hmanga inhnuai lam ka han chhun chiah chu, tuemaw hi hall lama tlan lut pil zuk angin ka zu hmu ta mai a, hnunglamah ka tawlh lut nghal zawk thei bawk. Ka tha pawh a hma aia nasa mah a khur lehzualin, kan room lam pan chuan ka tlan let leh ta hlawk hlawk a, rang taka kawngka chu kalhin, khumah ka inthawlh leh vat a, puan in ka in lukhuh zui ta vat bawk. Ka hlau a ni. ka hlau takzet. Zawhte lam reng reng chu ka ngaihtuahna ah an awm phak tawhlo a, nono-i a ni chiah em tih phei chu ka suangtuah zui ngam tawh lo hrim hrim. A thuhrim in, kei hi mi dawihzep chi ka ni ka tih tawh kha. Khatiang a ka thil va hmuh te pawh kha hlauh tur diktak anni chiah em tih pawh ka hrechiang miahlo chu a ni si a, mahse, mak ve thlawt tih chuahlo chu switur dang reng hi ka hre thlawt bawk silo. Huiham, hetiang chuan ka tlaivar thei takngial dawn a nih hi tiin ka in let zui tawp a, Ruatsanga pawh alo muhil hman tawh a ni ngei ang, a out vung vung tawh mai. Umm, a pawilo e, mut chhuak chu reh hman vek tawh mahsela, a tuk class kal leh hnathawh tur nei ka la ni si a, ti rilru nawk nawk chung chuan muthilh tumin ka bei ṭan ta a, a tawpah zawng, kalo muhil ve ta a ni chek ang chu, ka harh leh meuh chuan khua alo var chiang ta khawp mai. Phak chual a tho chhuak ṭuih ṭuij chung hian Hmingtei ka zawng vat a, alo la awm hauhlo zui nia. Tichuan, lu thak hiah nuah nuah pah a pawn vel a zawn tumin ka chhuak thurh a, chutah, tihpalh thilthu takzet hian Timothy in lam chu ka han hawi chho leh zauh pek, mahse, a kawngka chu chhete a lo inhawng kau deuhin, mak deuh hian inchhung lama tawlh lut zuk niawm tak, phe zeuh chu ka han hmu leh ta mai nia! Ka phu leh dawrh thei nghe nghe. Rang lutuk a kawngka chu khar chhunzawm vw thuaiin inchhungah thinphu dep dep chung chuan ka ding ngawi ve ta ren rawn phawt a. Eng thil ber hi nge ka chunga thleng mek tih chu hre hauhlo mahila, sawithiam chiah siloh hian min fan ruih reng a  awm nuamin min dah thei reng reng lo bawk. Tin, zan hmasa lawk a ka thil hmuh leh thawm hriat te kha ka chungah hian eng thil emaw tak hi lo thleng dawn a hriatna ka nei tlat pek a, a ngaihna tak pawh min ti hretawh lo a nih ber hi maw.

Chutia, thinphu dep dep chunga kalo din ngawih veng veng lai chuan kan kawngka chu rawn kik dawt dawttu an awm leh tlat mai. Phu phar dawrh in, ka hawi phawk nghal hrû a. Chet mai ngaihna tak pawh ka hre heklo. Tin, kawngka chu va hawn tur nge, thawm nei miahlo a hetia awm reng tur zawk hi ni ang, tih takngial pawh ka hrethiam tawh lo a ni. Ka tiril ah hian hlauhna hlirin min ṭham er er a, ka hlauh ber chu sawichiang thei hauhlo mahila, engkim mai hi ka hlau vel vek tawh ni ber hian ka hre tlat.

Kawngka kik thawm a reh hmiah a, reivaklo hnuah chuan rawn kik leh dawt dawtin, a hma ai mah khan a nasa zawk tawh awm e. Kei chu kalo khur zawih zawih tawh thung. Awmngaihna tak pawh hrelo hian inchhung zim leh chep takah chuan ka teikual sek tawh a, ka thlanfim te chu a rawn bawl ṭawk ṭawk leh ta nghal. Chutah zet zawng, rilru ṭawngṭaina neiin Pathian chu ka au ve ta ruai mai le. Mahse, a hma ang tho khan thawklehkhatah hian thawm chu reh leh hmiah in, ka hawi tang nghal hru mai. Kawngka lam chu melhin ka ding khawng ngawt ngawt tawh a, chutah, rei fe hnuah hian kawngka bawk chu rawn ri leh dawtin, kalo phu leh zawk. Mahse, vanneihthlak tak hian pawnlam aṭang chuan Hmingtei min rawn au thawm zawk ka hre ta hlauh a, ka thaw zui sawng sawng mai. Tha khur dar dar leh awm dawm vang vang chung chuan zawimuang hian ka pen phei chhat chhat a, kawngka ka va hawn nak chuan Hmingtei chu pawnah thlan hluam  chung hian alo ding phâwk hra mai a, a hah vang nimaw, a biang te chu a tai sen têk lehnghal. Zawi sap leh thawk halh pah hian

“Ilo tho ve tawh maw? Chawhmeh siamtur reng reng kan lo nei tawhlo a, ka va bazar zuaih” ti nghal mawlh mawlh in, kei erawh chu ka la ding ngawi reng thung. Zawimuanga kawngka khar leh pah chuan Timothy a in lam bawk chu ka han thlek chho leh hram a, mahse, pawnlamah hian tala lianpui jn alo inkalh bur tawh mai. Mak tihna in ka khat lehnghal vek a, khatiang khawp a kawngka rawn sawitu kha Hmingtei hi chu a nih theih ka ring chiahlo. Chhunglamah kalhin, ka la muhil turah lo ngai tehreng pawhnise, ka hming ngei a min rawn ko leh vat turah ka ngai hmin hmiah. Râwl chhuah miahlo a kawngka kik mawl tawp hi ka huat ṭhin zia a hrechiang tu ber kha a ni tawh tlat a. Imm, engpawh chu nise, Timothy a chu a kal chhuak tawh tih ka hre ta bawk a, ka nuamsam lo vel bawk nen, vawiin chu class kal lo phawt mai teh ang ti rilru in, hmai te chu ka han phih leh phar phar phawt a, ekhai! ka mitkhur pawh alo tla leh ta dûk mai. A hma zawng ai khan ka chhia in, ka chawrche hmel ta ngawih ngawih nia. Chiang lehzual a ka hmel ka han en leh chu, awi! Mahni leh mahni pawh hi kan in râp thei mai dawn alawm le. Hmingtei leh ṭhian dangte hian ka chhiat sawt zia thute hi min hrilh ngai miahlo a, min  lo chik vak ṭhin lo nge, keimah chiahin ka hria ni zawk ang tih pawh ka in hrethiam ta lo khawp mai. Zan tamtak mu tawhlo hmel hi ka pu tlat a tin ni.

Class kal lova awm nilen ṭhak mai chu a reh in a nuamlo duh angreng phian mai a, kan building a khawsa ve midangho lah hi, school naupang leh hnathawh nei a chhuak bo ve vek ṭhin tho kha anni hlawm si a, chhunah chuan building chu a reh ṭha in, a nuamlo dangdai duh khawp mai nia. Khuma mut zal ar ar pah hian zirlaibute chu kalo sam kual vel ve mai mai a, rilru lakpenna tur thil kha ka mamawh tlat a tin ni. Chutia, thawm pawh neilo a kalo awm ve ngat ngat lai chuan kan kawngka zawn pawnlam a vei leh thuak thuak ṭhin niawm tak thawm chu hre fuh in, ka hawi chhuak nghal zawk. Mihring ke pen thawm ngei ni pawhin a lang. Tin, a thawm lah kha a theihtawp a dim ve ni hian a hriat a, tu tak chu ni ang maw, tia kalo ngaihtuah reuh reuh lai hian a hma aia zing mah khan a rawn pen ri leh ta thlarh thlarh mai. Chu ke pen thawm chu midang ni turah dah ngial ka han tum a, ka thei ta tlat lo. A chhan chu, a kal kual velna mawlh kha, kan kawngka zawn leh a bulhnai bawr velah chauh a teikual tlat a ni. Khur dar dar leh chechang ngam tawhlo hian thawm chu ka han ngaithla vang vang phawt a, a reh zui leh ta daih mai. Rei deuh tak ka nghah hnu pawh a ala reh zui zel si avang chuan a kalbo ta ni turah ka ngai deuha , ngaihṭha lemlo tak chung chuan lehkha te pawh chu ka chhiar chhunzawm leh ta ngawt. Tu tak chu ni ang maw? Ṭawng ri, nui thawm leh khatiang thawm dang hrim hrim tih vel kha a awm tlat siloh avangin ngaih han tih ṭhat viau chi ah pawh ka ruat ta lo tlat mai.

“Didik, Diki,i muhil emni? Lo chhuak thuai teh”

Tia min rawn ko lauh lauh thawmah chuan harh riai ruai in, kalo muhil daih a ni tih ka inhre ve chiah. Rang zet hian inbengkang nghal in, min rawn kotu Hmingtei awmna lamah chuan tlanphei ka rual a, kawngka ka va hawn sak nak chuan thil rapthlak tak ka hmu leh ta! Hmingtei lo dinna bul, kan ke tahna chungah chuan ka zawhte nono-i ruang lo let bal mai chu ka va hmu ta mai a nih chu! A lu chu chhum lo chauh in a vun chhete hian alo la awh ve dawr dawr ringawt chauh a, a mitmu pawh chu kher chhuahsak ve ve an ni tih ka hrethei. Ka lainat reuh lutuk. Chutah, 

“Hmingte, ka zawhte chungah hian eng thil nge thleng a, hetah hian tuin nge rawn dah reng reng?” ka tih hlawp hlawp hnuah Hmingtei pawh chuan hlauhthawnna mitmeng nen a min rawn en let ve vatin

“I hre zawk lo emni? Tunah ka rawn thleng ve chauh a, tihian ka rawn ve ta mai a nih hi. Chhunah khan eng thawm ri mah i hrelo tihna emni?” min rawn tih chuan ka lu kalo thing nawk nawk. Mahse, thil engemaw hriatchhuah chu ka nei leh zawk si. Rang tak hian Timothy in lam chu ka han hawichho nghal vat a, ani pawh alo haw ve tawh ngei niin a lang. A kawngka a inkalh tawhlo tlat mai. Thinrim sehchilh nawk nawk chunga a in lam chu pan nghalin Hmingtei pawhin min umzui ve zat a. Ani thung kha chuan a ngaihna a hriatloh hmel nasa mai.

Timothy kawngkhar chu theh hawn ṭhuai pah hian ka la in petruh ve nasa a

“Hei, nangkha. Engvangin nge ka zawhte note khu min thahsak leh si a. Sawi teh. Engkim hi sawi chhuak vek ang che. Engvangin nge min tihbuai reng a nang hian?!” Hetihlai tak hian, hlauhna ai chuan thinrimna hlirin ka khat tawh zawk a. Chutianga ka han ankhum ta bawrh bawrh mai pawh chu lo hrethiam lo in, a hawi buai nasa ta mai. Hmingtei zak leh nuamlo ti lutuk lah chuan ka kawngah vuan in min pawhchhuah kha alo tum ve sek mai bawk a.

Chutihlaiin, Timothy lah chuan a thiltih lai chu dah meuh hian chiang zet leh rûm mangkheng chuan min rawn thlek ta vang vang mai a, a awmdan khanglang chu mak pawh kalo ti lehpek zawk hle. Chutah, la thusawi te kha ngaih pawimawh loh hmel fe a min rawn vei nuih suk pah hian

“Nang a zawhte no that tur mai mai hian hun ṭha ka nei hleinem. Tin, kha zawhte lah khan ka pawi asawi pawh ni hlei lo”

“Ngawi teh, nizanah pawh inhnuaiah ka zawhte kha i pawm bo lai ka hmu tawh che a, vawiin chhunah lah nise, kan kawngka bul velah i rawn tei fua fua reng bawk. Kan lak aṭang hian eng thil chiah nge i duh tih hi min hrilh rawh”

“Nangmah kha!” 

Chutiang a min rawn chhan tak thutah chuan kei chu kalo ngawi chiang hle. Tin, ka hnung lawka ding ve, min lo pawt buai ngar ngar tu Hmingtei pawh kha hamhaih tih hriat tak hian a ding khawng zui ve ta lah bawk. Timothy a melh ngawt ngawt pah in kei chu ka la ding khur zawih zawih mai a, sawitur ber pawh chu ka hre ta lo hle. Chutah, amah bawk kha rawn ṭawng hmasa ah ṭang leh in, ala nui sâwng leh ta nghal.

“En teh u nulate u, ka ti hlauthawng che u tih chu ka hria alawm. Mahse, tumah ka that ngailo aw. Kei chuan tute mah hi ka haw ve lo che u tih hi in hriat kha. Engvangin nge zawhte pawhnise ka thah ngawt ang ni?” tiin za lo tih hriat zet hian a han nui leh hak hak phawt a. A hmel landan ringawt pawh kha kalo râp rilruk tawh tehreng nen, min duhthu a han sawi leh ngat phei kha chu e, a hlauh in ka hlau tawh hi a ni ber mai. Chutihlai chuan, Hmingtei kha rawn inrawlh ve vatin, a aw pawh chu a rawn khur ve dar dar thei nia.

“Mihring i that kan ti lo a nia. Zawhte chungchang chauh a ni kan sawi zawk daih ni” 

Timothy chu chimawm zet hian alo nui leh vur vur ringawt.

“Aw, chu tak chu alawm keipawhin ka sawi ve mek ni. Tumah ka that lo. Hrilh rawh i ṭhiannu kha, amah kha ka duh a, mahse, eng buaina mah ka siam si lo thung tih hi hrilh teh” ti chungin a inher deuh vut a, nui uarh uarh chung hian a room lamah min luhsan ta daih lehnghal. A khawsa zia teh hrep chuan min ti thinrim in, ka ha chang ka ṭhial deuh bap bap thei. He mihring, tlangval ṭha pangngai tak emaw tia kan lo  biak ve ṭhin hi mi rilru diklo leh piangsual, mi ṭhalo diktak a nih dawn hi tih rilru chu ka pu ta hial mai.

Thinrim luattuk vanga kalo din khurh zawih zawih lai chuan Hmingtei bawk khan min rawn pawt leh salh mai a

“Hawh, kalsan ang. Hetiang mihring dangdai, biak tlak pawh a nih nek loh hi a” rawn ti pah sur surin a chenna chu kan chhuahsan ve thei ta hram a ni.

Chuti fakau a nunrawng a ka zawhte an lo khawih thei mai chu, tu pawhnise mihring nunrawng leh tualthah hrehlo a ni ngei ang tih chu ka ring nghet bur mai a ni. Ka zawhte ruang hmuh hrehawm tak pawh chu kan college kalkawngah lei lai khuar chawpin kan phumbo ta ringawt mai a nih kha.

Khatiang thil a thlen hnu aṭang kha chuan kan apartment pawh chu nuamti tawhlo zuiin, insawnchhuah dan tur ngawt ka ngaihtuah ta reng a, college lama kan ṭhiante ho leh laina hnaite hnenah pawh kan ṭhiandun awm theihna tur tawk vel inruak ṭha pangngai tak chu min lo zawn sak tur pawhin ka chah ta hial mai. Kan building a apartment tinte lah hi ruak awm miahlo in luahtu kha an awm ve vek bawk si a, chutihlaiin, inruak ṭha ve pangngai lah chu a vang pherh hrep mai bawk si. A beidawnthlak duh angreng hle.  Hun a liam ve tak nial ah phei chuan engtia hma han lak tur nge tih pawh ka hrethiam ta lo tawp. Keiai mahin Hmingtei lah chu ala bangbo zual leh ta nghal a. Chubakah, ani hi chuan Timothy a hi a hlauhawm ruk riau na leh a chet ṭhin dan te kja hrethiak ve heklo i, atan chuan tlangval awm ve satliah ang chauh kha a nimai a, han ṭih nachhan tur vak kha a nei ve lo tlat. Ka thil tawn leh hriat engkim hi han hrilhfiah pawh tum viau ṭhin mahila, min nuihsan loh leh, Timothy chu a nih a rinloh thu chauh khan min chhang leh mai ṭhin a, amah ngei pawh hi ka huat phah lek lek ta fo mai.

Hetiang hi kan boruak a nih mek laiin, lehlamah, Ruatsanga nen chuan kan la inbe awl lova, a chang phei chuan call hmang te hial pawhin kan inbe ve tawh ṭhin. Mahse, sawi leh sawi hnu, ani chu bialnu nghet nei lai kha a ni miau mai si a, ka tan hma han lak vak ngaihna leh amah chu han intih tâtû theihna dan kha ka neilo hrim hrim. Engpawhnise, min biak dan vel hrim hrim te, college lamah pawhnise, min chhawnchhaih duhdan leh ka bula a khawsak dan hmang aṭang hi chuan hepa hian min iai bikin ka hre thei tlal lo a ni. Mahse, a karah, mahse tihtur hi alo awm ve zel ṭhin zawk hian min ti laklawhin, tuilâi rap hian ka awm mek tih pawh ka hria. Beiseina sang tak chu min siamsak hauhlo mahsela, ka beiseina te erawh a ti thi chuang bik miah silo. Engemaw chang phei chuan beisei loh law law a, kalsan daih mai tur emni ang aw te hi ka ti ve rum rum ṭhin hial. Chu erawh, ka phal chuang hauh bik silo. Um, tihian, a ṭhianṭha angah in ngaiin, a hlimna tur chhete tal pawh kalo siamsak ve thei ṭhin hi ka lawm tawk tawh phawt mai ang chu, ka ti ta ngawt

Ni khat pawh, kan chenna hmun a hriat duh vang hrim hrim leh ka lehkhabu chu rawn hawh pah a duhthu chhuanlam hian kan inah min zui haw ta poh mai a. A ruk tak cbuan nuam ka tiin, ka zak ru veng veng lawi bawk si.

College aṭanga a bike hmanga kan inphur chhuak dun tur te chu a bialnu khan rum zet hian ralkhat aṭangin min lo thlir reng mai a, a nuamlo duhin, hrehawm ka ti ve reng.  Mahse, ka awmdan kha a laklawh kual vel vek tawh zawk a tin ni.

“Melody nen hian in inṭhen tawh tihna emni? Nge, in taurau vel mai mai zawk ni a?” tiin kan floor pan chhohna step a kan kal lai chuan ka han ti ve ngawt a, ani erawh alo ṭhen sak duh chauh. Na lo te a ka sam chu rawn tuai thur pah hian

“Tau love. A buaithlak leh lutuk ṭhin a, ka ning ve deuh mai mai” tih pah hian a ner zui leh sak. Keiin, a hmelṭha zet mai chu chik zet hian ka lo melh vang vnag thung a. Aw, heng tr hi ka ta niin, ka chanpual chauh han ni ve thei lul se aw, ti chungin a hmui chhah leh khabe ruh kual invuah dik vel thlup te chu kalo melh kal ralh ralh. Ka va han zaktheilo ṭhin em aw!

Chutia titi mawlh mawlh paha kan kal zel lai chuan kan hma takah hian Timothy bawk kha ngawi renga rawn lang ve thutin, kei phei chu kalo phu deuh zawk thei. Min ti hlau hle nia inhria in, Timothy lah chuan ka bân a rawn dawmbet chung chung pah hian inthiamlo hmel ala pu deuh reuh lehnghal.

“Aw khaih! Didik, ka va han thiamlo nasa tehlul em! Ka ti hlauthawng hlemai che a!” tih pah chuan ka hnungzang te chu ala rawn chul thuak thuak zui a, kei erawh rang zet a lo tawlhsawn ve thuaiin, ka chek zui hlak bawk.

“Hlau lo, min ti hlau lo. Eng thil nge i hriat a?” tih hlak paha a hmel chu va melh hrawkin, ani erawh chu chimawm zet hian alo nui vur vur thung a. Tuna a hmel landan tak hi chu a mawl hmelin, rilru kim lo diktak te pawh a ang ta mah mah. Chutah, amah bawk chuan la khi vur vur chung hian

“Hei, i bialpa emni? Ilo inzep thei hlemai maw” 

“Aw! Ka bialpa, ka hmangaih em em, ka pasal nimai tur a nih hi, chutah chuan eng nge buaina i neih a?!” lo ti nghal zat zatin, min chhanna pawh nghak tawh lo chuan Ruatsanga chu ka kai ta dawr dawr a, Timothy thung chuan lehhawi meuh hian min lo enzui vuung vung nia. Engahmah ka ngai peih tawh biklo e a.

Hetiang mi rilru piangsual, rilru chhe lutuk leh maksak tak ni bawk si hi ka hmu hne hluah hluah tawh a ni ber e. 

Inchhunga kan luh hnuah pawh kan thil tawn teh hrep te khan min la chiah hneh em avangin, kalo tûm leh bûr ṭhin hi a niawm a. Ruatsanga chuan min rawn fiam ta zauh nghe nghe.

“I ṭhenawmpq nge, i bialpa hlui….zawk?” ti ban charhin, a hmel chu chiang zet hian ka va melh nghal kawk thei a, alo ṭhen ve sak mai. Mahse, kei chu insiamṭha leh vatin, ka mood tih dik hram tum chuan ka han thaw zui deuh halh. Umm, tlem chuan ka zia ta hlek e. Inthlak leh sawk sawkin, room aṭanga ka chhuah rual chuan rinloh lutuk mai hian Ruatsanga khan chiang zetin min lo pawmbet chawih a, ka va han phu nasa tehlul. A hmai silo chauh a min pawmbet chung chuan min vuat nghet kher lehnghal. Ka phut nasat lutuk vang leh a awmdan teh thut kjan min tih zam em bawk avangin ka khur der der thei tawh a, kan thaw ri chu a ring dun tawh angreng khawp mai. A thaw lum ham ham te mawlh kha, ka hrechiang ta mah mah bawk a ni. Ka kut pahnih awmngaihna hrelo a ka dah kual vel mai mai te chu rawn man bet chatin, a awmkhauh tak chhanah chusn min han dah sak leh te te phawt a, hetihlai hian ka thaw te chu a rang tawh takzet hi a nimai e. A hrehawm lek lek tawh zawk mah. Mahse, ka chesawn in ka tal pit phal chuang hlek lo thung. Chutah, thawk deuh halh halh paha ka mit chu chiang zet a rawn melh chung hian

“Tihpalh lutuk, hetianga khawsa tur hi chu ka ni lo asin mawle, ka tihlau che a ni tiraw?” a rawn tih sar sar lai chuan rang tak hian ka lu kalo thing nak nak mai. Ani chu rawn nui leh sak in

“Ihmaw Didik, ka hmeichhe ngainat zawng leh duhzawng tak i ni a, min hrethiam hram rawh. Mahni ka inthunun zo thlawt lo a ni e” 

Kei chuan hrethiam tih hriat takin a thusawi te chu kalo buk pui nghat nghat reng mai. Chutah, ṭawngkaa chhanna ka pek ve hma hauh chuan ka hmui chu rawn chuktuah in , a vawikhatna atan ka mipa duh leh ngainat ruk em em mai hmui pa leh sexy zet chu ka fawp ve thei ta. Nuam hi ka va han ti chiang tak em ve le! Mahse, ni leh lo, hetianga khawsa dun tur hi chu kan ni lo tak. Melody kha hrechhuak thutin, min fawhna a rawn duhthawh zual lai tak chuan kalo in la hrang ta vat a. Kan thaw zui dun halh halh thei. Kei chuan la thawk halh halh pah hian

“Melody kha hrechhuak hram rawh. Ih, ka hmeichhiatpui a nih angin kei chuan hetiang hi a chungah ka thlentir theilo a ni. Pawi ka ti lutuk” 

Chuveleh, ani pawh chu lo nui ve halh in, a inthiamloh zui hmel hle a. Ka khawngaih hnuhnawh phian mai. Mahse, chu chu ka ti lang tur a ni miahlo thung.

“Awle, ka hrethiam che alawm. Ka thiamloh vek annih kha aw. Tihpalh lutuk, ih, ka haw tawh zawk mai ang e” ti zung zungin a bag leh ka lehkhabu chu a ban zauh a, a chhuak ta nal nal. Han umzui ve vat mahila, tihngaihna dang phei chu ka hrechuang miahlo thung si. A lungawi loh vang chu nilo turah ngai phawt teh ang. Hmm, chu zawng, ka buaina tur pawh niin ka hrechiah tawh lo e.

Ruatsanga chhuah fel hnu aṭang darkar 1 pawh a liam lovang tihtur ah hian Hmingtei call ka dawng teh nawlh a, mak ka ti ru angreng hle. A chhungte an rawn zin avanga a pate-a, aizawl mihlun te ina an inhmuhkhawm tur thu leh zan pawh a riah nnghal tur thu chu ala rawn sawi zui a, ka van huphurh lawk tak em aw. Chhunah mah, mahni chauh a khawsak chu nuamlo tihtawh naklaiin, zan hun ngat phei chu, sawi pawh ka sawi lawk ngamlo hial zawk. Hmm, mahse, zankhat na na na te chu eng em thleng lovin kan tlingtla ve thei mai ang chu maw, tia inhnem chawpin eitur ka siam zui a, rilru tih thawven tum tak hian ka zai pah deuh rât rât bawk. Chutia, mahni buai buaia kalo buai chhoh ve mawp mawp lai chuan kawngka kik thawm ka hre leh ta tlat. Thu thinṭhawng tak han tihtur chu nilo mahse, ka phu leh dawrh tawh mai. Chet mai nachang pawh hrelo hian kawngka lam chu ka melh leh ta ngawt ngawt a, ka hamhaih leh vek tawh a nih ber chu. Mahse, rei pawh a rial lovang tihtur ah hian pawnlam aṭang chuan ka hming ngei a min rawn ko tu an awm ta hlauh. Ka thaw sawng sawng nghal thei. Tichuan, rang taka kawngka chu va hawn pahin, pawnah hian rinlawk loh takin kan floor chung chiah a high school zirlai hmeichhe pahnih, inluah a awm ve te chu an lo ding reng nia. A thawhnihnan ka thaw zui leh kawk thei. Eng thil nge an duh tih ka han zawt chu, an zirlaiah chuan hriatthiamloh hi an lo nei niin, chumi min zawt tura min rawn pan ve tawp mai pawh an nih thu te an sawi leh hnu chuan inchhungah inzui lut nghalin, ka han enpui ta sawk sawk a, vanneihthlak takin an harsatna te chu ka thiam zawng leh hriat zawng tak kha alo ni hlauh bawk a, karlovah kan inhrilhthiam ta vek nghe nghe. Anni pahnih pawh chu kei ai mah hian an lawm hmel zawk mah a, kan hlimtlang dar dar hle. Tichuan, rei pawh awm zui lovin, min chhuahsan leh ta mai. Sana ka han bih chu, zanriah ei pawh a lo hun veleh der tawh. Muangchang tawhlo in chaw chu ka ei nghal sawk sawk a, lehkha chhiar ve leh zuai kha ka duh tlat a ni. Tin, hetah hian class test nei mai tawh tur kan nih avangin,, ka zan lam hnathawh pawh kha chawl lailawk rih ka ni nghe nghe a, anni pawhin min lo hrethiam ve hle a, a lawmawm angreng viau.

Zan dar 7 vela lehkha kalo chhiar malh malh lai chuan pawnlamah thawm hre leh in, a ri deuh dup dup a, a chang leh thil vawm rik niawm tak, thawm ri leh rum rum ṭhin te chu hria in, ka hawi tang nghal hrû. Kan chenna hi concrete tihtakah, inhnaih te te a khawsa hlawm mahni ila, ṭhenawmte thawm riva takngial pawh hi hriat theihloh chang a tam ṭhin viau. Chutihlai a thawm ring leh nasa lutuk mai hriattur a han awm ta thut pawh chu a mak tihloh rual hi a niawm love. Khawi apartment ber aṭanga rawn ri chhuak nge tih lah kja ka la hrelo lehzel bawk nen. Ka awm chu a nuamlo leh em em ringawt tawh.

Thawm lah chu a reh ve mai tura ngaih laiin a awm ta reng zawk a, tun ang hunah chutiang thawm te chu tute mahin kan siam ngailo bawk si nen, a nuam duh lemlo khawp mai. Tin, a rawn rik chhuahdan teh thut pawh kha, zan lama hnathawk thawm vel a ni ange, han tih dawn pawhin a ang thei tlat si lo atin ni. Ka chhiar lai pawh ti tui theilo zo in, khum aṭang chuan dimte hian ka chhukthla a, sitting room lamah chhuak phei leh zatin, kawngkhar chu dim tak bawk hian ka va hawng ta dek dek. Pawnlam chu alo reh ṭhiap a, mihring tumah hmuh tur pawh kha an lo awm map lo. Kan ṭhenawmte chhungkaw hnih, min karcheh tute hi chu an zinbo lai a ni tih kha hria a, a bak zawng hi chuan eng hna nge an thawh ṭhin tih takngial pawh ka la hrelo. Sawi tawh ang khan, kei hi chu tu te tan mah hian ka nelawm in ka ngainatawm ve theilo a, ṭhianthar siam leh midang han biak hmasak vel te pawu hi ka harsat lutuk ka tih tawh kha. Ka dawih em em vang te pawh hi a ni thei maithei. 

Corridor sei pût mai chu lo thim phei mup in, an kawngkhar tinte lah chu alo inkharphui ṭhup mai bawk nen, mihring hmuh tur awm miahlo karah chuan thawm erawh chu ala rawn ri chhuak ve reng thung a, khawi aṭanga rawn ri chhuak ber nge tih lah a hriat theih mai loh lehnghal. Min ti hamhaih buai kual vel hlemai. Keimah tak lah hi engemaw hlek a phi buai chi leh, chíâi hma em em mihring ka lo ni ve tak bawk nen, a hrehawm duh ṭhin khawp mai.

Chutianga engmah hmuh leh hriattur thil danglam a awm tak miau siloh ah chuan kawngka chu dim tak bawk hian ka han khar ṭha leh mai a, kawngka ka khar rual chiahin thawm pawh kha a reh zui ve hmak nia mawle! A reh leh tlawk tlawk tawh. Umm, tuemaw berin hna a thawk ve a nih dawn hi. Ngaihṭha fahran lo chunga lehkhabu ka keu leh hnu minute 20 ral hnuah chuan ka kawngka kik thawm bawk rawn awm leh in, ka hming ngei hian min rawn ko ta tlat mai.  Hlauhthawnna pawh nei em em lemlo chuan kawngka chu ka va hawng ta mai a, mahse, pawnah chuan mak tak mai hian Timothy kha alo ding ngawi reng nia. Chiang fahran hian min lo la melh kur zui lehnghal a. Chutah, rang fahran a kawngka chu pawh khar leh mai ka tum laiin ani chuan min lo dang bet hman tlat a, ka khur der der thei. Tah chuan, aw zaidam zet hian

“Kalo lut lawk thei angem? Hlauhawm ka ni lo a nia” a rawn tih tak supah chuan keipawh inthlahdul ve hlekin, ka thiltih lai te pawh ka tawpsan ve mai a,mahse, ka la mengrum al al hle thung. Ram hmarh hian

” I duh chu tikhan sawi rawh!”  ka tih nghut laiin ani chuan kiai suk chung hian

“Hetah ni lo, min luhtir thuai thuai rawh. He building chhunga thuruk inthup te hi hriattir che ka duh a ni”  a rawn ti leh ta mai. A ngaihna chu hrelo hle mahila, a hmai a uang lo in, nichin lawka ka thawm hriatte nen a thusawi chu ka han hmehbel chho ta a, eng thuruk tak nge lo awm tihte chu hriat ka chak ta zek zek mai. Keimah tak pawh hian tunhnaiah thil mak taktak ka tawng tawh a nih kha. Ka thil ngaihtuah chhuah tak te avang chuan  Timothy thusawi tur pawh chu ngaihthlak ka chak phah lehzual hle. Tichuan, kawngka chu hawng zau leh hlekin ani chu inchhungah ka luhtir ve ta hram a. Kei erawh, kawngka bulah chuan inring reng in kalo la ding tlat thung.

Inchhunga a rawn luh rual khan nuam tih hmel tak hian a hawi zui vual vual a, a nui pah vur vur reng bawk. A awmdan leh hmel landan vel chu mak ka tih tak deuh avangin a sawi duh te pawj kha ka va zawt nawn leh ta nge nge. Chutah, nui vur vur chunga mjn rawn en deuh vut pah hian

“E, he building chhunga thu inthup tamtak te hi maw, nangmahah khan an awm vek!” a thusawi chu ka va han hrethiam lo. Ka hriatthiam loh luatah chuan ka nui ta suk lehnghal a, min lo melh kawr mai. Chutah, a hma aia mengrum zawk leh thinrim hmel pu, sehchilh rap rap pah hian ka lam chu rawn hawi ṭha lehin

“Eng thilmah hi i hrethiam miahlo a nimaw? Atir te aṭanga kalo duhtawhna che leh, nangmah vanga buai rukna ka neih zawng zawng te hi i lo hrethiam ngai miahlo a, mahse, hei hi hre rawh. Nang hian min duh lo a nih chuan maw, he building chhunga khawsa zawng zawng te hi thah chimih vek an ni dawn. Chu thil chu ka tihtheih loh i ring vel a maw!?”  a rawn ti ta phiar phiar mai nia! Min ti bangbo takzet thung a ni.

” Eng thil hi nge maw i sawi vak vak chu le, mi â , mi mawl leh rilru piangsual diktak chu inih chiah hi”  tiin ka hnungtawlh hret a. Ani erawh, ngeiawm taka rawn nui leh sukin, ka lam pan chuan a rawn pen pah hret zet bawk. Tin, min la melh thip em em reng bawk.

“He building thuruk hi i hre duh maw? I hre duh a ni lawmni? Ka hrilh tawh che kha, kei hi min hnawl a nih vaih chuan, anni ho zawng zawng hi chu thi turah dah la, chu chu thuruk a ni leh mai. Ka hre re re hleinem”  tih pahin a nui ta uarh uarh mai a, ka hmaah tak rawn ding zui zatin, hnai fahran ah min rawn melh ta kur. Ka hlau lutuk tawh chu khur der der chung hian kalo ding ngawi ve reng ringawt a, ka chil ka lem leh khawlh. Chutah, a kekawr kawng hnunglam chu dap leh ruk rukin, chemte hrawl zet mai hi a rawn phawrh ta mai a nih kha! Kalo meng bial kawk thei. Amah bawk chuan aw khur dur dur leh sehchilh nuai bawk hian

” Hei hi i hmu em? I awmdan a zir a i hma hun hriltu tur a nih hi aw, ka thu hi zawm la, keimah ah intulut rawh. Chuan, i hmachhawn kher pawh a ṭul lo bawk ang”  ti chungin chemte chu ka biangah a rawn tat ta zeuh zeuh mai. Ka hlauh luatah awmngaihna ka hrelo a, sawitur ber pawh ka hre tawh heklo. Chet ka thawh thut a nih chuan, min tihnat mai kha ka hlau bawk si a, a hrehawm in, ṭanpuitu ka va han mamawh tak em. Tin, he mihring lakah hian kei hi engtikahmah intukluh emaw, a duhna tihhlawhtlinsak kha ka tumlo bur bawk si. Hetiang mihring hlauhawm leh piangsual lakah hian ka damchhungin ka inpe hlek lo bawk ang.

” I rilru i siamfel tawh em le?” a rawn tih leh tak sur sur ah chuan harhchhuak zawk in, ani chuan chiang leh hnai fahran hian min lo la en reng tih ka hre chiah. Ka thluak leh rilru chhete tal hi ka hman ve a ṭul tih hria in, aw khur dar dar chung hian

” Ih, roomah sawn va sawi fel ila, englo, helai hi chu a ualau angreng em mai, lo va kal la, kawngka hi ka han kalh ṭha ve phawt ange”  ti chhuak thei hram in ka chil chu ka lem leh khalh phawt a, ani thung chuan a lu lo bu ve nghut tho mahse, min rin hmel em em hran loh. Chutia, rinhlelhna nen min melh zuk zuk chung a zawimuang a room lam a pan lai chuan thawklehkhat ah kawngka chu hawg thutin ka tlanchhuak ta puat mai a le. Ka hnunglam a thinrim tih hriat tak mai a rawn au tuar tuar  ri pawh chu ka hre pha reng. Step thim takah chuan tlan thla buan buan in, ka tlu leh lek lek ṭhin bawk a, ka hnungah chuan min um thawm niawm tak pawh ka la hre pha ve zel. Mahse, hawi let thiang ka ni tawh silo. Tichuan, tlanna tur dap chawp in hmanhmawh ru tak si chuan ka tlan thla hlawk hlawk zel a, ground floor ka thleng ṭep tawh tih ah hian  ka hnunglam aṭanga min rawn ban zuau tu an awm tlat a ka hriat avangin , ka hlauh luatah ka hma lam pawh en chiang tawh lo chuan step railing chu bawh liam puatin ground floor lei char ah chuan ka hlawm thla ta hnawk. Ka rak ṭhat thei nghe nghe. Thaw hlawp hlawp chunga hnunglam ka han hawi leh erawh chuan tumah lo awm lovin a reh zui duk a, a thim khup mai bawk si. Awle, muangchang hman ka ni lo tih ka inhria, tho deuh ṭiah ṭiah in, ka malpui leh ke rek te, ka bân puam vel te pawh chu an na ngut ngut thei mai. Hmanhmawh ru viau mahila, ka ke chu ka rap na ṭha ngam tlat tawhlo. Ka bai zui ta uih uih mai a nih chu. Chutia, bai suih suih chunga ka han chhuak ta mai chu security duty khan min lo hmu vatin, makti leh hamhaih tih hriat zet hian min rawn buaipui ta vat. He zan a security duty hi hmeichhia niin, keini ai chuan kum lamah pawh upa daih tawh mahse, ka thlamuan phah em em viau hran lo.

” Awi aw Bawihi, engti zai zia nge tun ang hunah te. Kha, pem leh hliam te i nei a nimaw? Hawh” ti zung zungin ngaihṭha lo tak chuan inchhung lam chu ava thlek pah leh zauh zauh ṭhin bawk a. Tichuan, a ṭhuthmun lamah inkai pheiin chair ah min ṭhut tir vat. Kei chu ka hliam neuh neuh vel vang kjan kalo ṭhen leh sak sak ṭhin a, tunah tak hi chuan eng hmanrua nen pawh min rawn tihṭhaih leh mahse, che thei ka ni tawh lo a, tha lah ka nei tawh bawk heklo.

Security chuan ka hliam vel a damdawi rawn hnawih mawlh mawlh pah chuan thil awmzia min zawt pah reng. Han sawi chhuah mai dan tur erawh ka hrelo hle thung a, mahse, a tawpah zawng, hreh tak chung hian 

” Ih, tuemaw, mihring hlauhawm tak hian chemte keng chungin min rawn um a” ka tih lai chuan ani chu a lo meng phawk chiang kher. A thiltih lai chawl meuh chuan min han en deuh vang vang a, mahse, rei rial lovin a insiamṭha leh vat.

” A hmel i hmu em? I hmuh phawt chuan sawi hreh suh aw” a rawn tih leh takah chuan engkim hrilh hriat mai ka pawi ti tawh lo. A nihloh chuan, tunah kei hi ngawi bo ta daih ila, midang chungah a ṭuan leh lo ang tih kha a sawi theih tlat loh a ni. Hreh tih hriat zetin ka chil te chu ka han lem hmasa leh te te phawt a, tichuan, engkim ka thiltawn zawng zawng te kha a zavaiin ka hrilh fai ta leng mai a nih chu. Ka sawi zo chu ang phuau chung hian min lo en reng ringawt a, a chek zui ta tlak tlak mai.

” Ti rawh , chho ang. Chu mihring chu han zawt chiang ila, a ṭul chuan hotute kutah pawh kan dah ngei dawn nia” rawn ti ve in, kei chu ka thin alo phu leh zawih zawih tawh thung.

” Amah a ni tih ka chiang alawm. Tikhan, police te chu call mai la, hmanrua a nei lehnghal a, a hlauhawm a nia aw”  ka chho hreh takzet tawh. Mahse, ani chuan call hmaa engkim tih chian hmasak phawt a ṭha, a tih tlat avang in hreh tak chung chuan ka pawm sak ve ta hram a ni. Kan luh chhoh hma hian step light zawng zawng te kha on leh hmasa vekin, a hnung zelah ka zui a, khur der der chung chuan ka zui chho ve ta zel. Kan apartment zawn kan thlen lai chuan kawngka chu a ngai ang angin alo la inhawng dar huau mai a, ka ṭim ru sung sung thei. Kan chenna chu kalpel in, Timothy chenna lam kan pan ta phawt zawk. Hetihlai hian zan lai dar 12 vel a ri tawh awm e.

Security nu chuan a kawngka chu kik leh karh karh in, a rawn hawng har phian lehnghal a. Kalo ning hman leh tawh hle. Chutia, vawi nga zet zawt chawl lo lek a a han kik tak rengah chuan rawn hawng ve hram in, a hmel ka va hmu chiah chu maktihna hian ka khat a, ka phu zui nghal dup dup bawk. Nichin lawka ka hmuh Timothy kha chuan Jumper dum ha in, lukhum hma thlawk a rawn khum bawk a nih kha. Mahse, tunah chuan Pajama ha in mu tho hlim hmel hi a rawn pu leh daih tawh a, ka meng bial kawk kawk thei. Engpawhnise, a thawmhnaw te chu a thlak danglam hman lutuk tih ka hria, ni rawh se. Chu tal chu ni rawh se. A kawngka chu zimte a hawng in, inchhung lam chu kan hmuhpui a duhloh hmel hle a, chuti chung chuan rem leh remlo hian ka va bih ṭawk ṭawk tho. Security nu chuan ka lam hawi a chiang zet a min rawn melh pah hian

“I mihring sawi chu hepa ngei hi a ni em?”  a rawn ti ser ser. Keipawh chuan rang zet a ka lu chu lo buk ve zauh pahin

“Umm, ni ngei e. Hun rei tawh tak aṭang khan amah lo hi chu tibuaitu pawh ka nei ngailo hrim hrim”  kalo tih zawm zat takah chuan Timothy pawh chu rawn inrawlh ve thuaiin

“Eng thu nge maw in rawn sawi tak chiam hi le. Kei hian tu chu nge ka tihbuai a?” tiin ngaihdan nihloh hmel zet chuan rum fahran hian min rawn melh leh. Tunah tak hian ka hlauhna te kha bo ṭan in, thudik chauh sawitur chuan ka inringtawk ve tawh phian.

” Hei, i chet dan mawilo tak avangin nula pakhat chu thlabar in ilo dah ṭhin a, nang hi he building chhunga awm ve tlak pawh ni tawhlo tur in report ka thehlut dawn a ni”  

Security khan a rawn ti leh chiah mai chu Timothy pawh a pawr tawh hle. A dinna hmun aṭanga tawlh sawn vat chung chuan a inchhung chu chiang tak hian min hmuhtir zui ta a. Alo hnawk kher.

” En ta che u. Hei hi ka tun dinhmun mek an nih hi. Nula, ka hrilh tawp ang che. I thil tawn leh hriat zawng zawng te kha kei a tih pakhatmah an awmlo tih hria  la ka duh. Ka phirpui Moses-a tih vek zawk anni! Keipawh tihian min tibuai fo a, ka inchhung ngei ah pawh buaina rawn siam in, min ching phar mek chu a nih hi. Kei hian eng thilmah tih ka neilo, mi pangngai ve mai ka ni a, heng thil zawng zawng hi chu ka phirpui kut hnu vek an ni e. Tihian, police ah pawj report duhlo in ka ngawi phawt rih zawk a ni e” 

” A nih chuan, tunah khawnge i unaupa chu a awm a, man tir ila a nimai alawm. Hetianga nangmah chauh pawh nilo, midang thleng thlenga a tihbuai fo dawn te chuan a awmna tur hmun diktak, police kutah lut hmak se a fel vek a nimai lawm”  Security nu khan alo chhang let ve vat. Kei erawh chuan reng reng ka hretawh lo a, thudik nge dawt mai mai an nih tih lah engmah ka hrethiam tawh bawk silo. Timothy hme chu ka han en leh ṭhin a , a thutak in a hmai a uang lo hlemai lehnghal. Chemte nen a min rawn rikrap tu kha amah nilo a, a phirpui zawk a lo nih taktak chuan, phir zawng zawngah hian an inang ber mai awm e, ka ti hial.

” Ka hrelo, tunah hian khawnge a kal tak ka hrelo. Building khawi emaw lai aṭang hian a put ru leh tawh pawh a ni mahna! Tu emaw lakah beisei a neih chuan hetiang hian a che fo ṭhin a, mahse, tute mah chu a tihnat awm pawh hi ka la hre lem lo thung. Aaa, sawi nuam tak chu nilo mahse, amah hi rilru lama rualban cjiahlo, psychopath kan tih ang chi natna nei a nih avang hian khawngaih in ngaidam ula, keipawhin ka hmuh leh hunah tihdan ṭha zawk dang kalo ngaihtuah ve ang e. Tin, hetiang hi a thleng leh tawh hauhlo ang tih ka tiam bawk che u”  tih pah chuan khawngaih thla la tak hian min rawn melh ta kar mai a, ka mit kalo la sawn vat thung. Security pawh chuan han bawhzui vak dan a hrelo ta hle tih hriat takin a thaw zui leh halh ṭhin a. Chutah, muangchang a ka lam rawn hawi pahin

” A sawi chu i pawm thei meuh em? Miin, ka tih a ni lo, ka phirpui zawk a ni e ,a tih miau si chuan han tih vak ngaihna a awm lo em a ni”  rawn tiin, kei chuan chhan let mai dan tur ka hrelo kher a, ka ding tlawn reng ringawt. Tichuan, Timothy lam hawi lehin amah bawk chuan

” Tun hnuah, hetiang thil hi a thleng leh ngai a nih chuan, i ni emaw ni lo emaw, i chungah hian na takin action lak a ni tawh ang tih kha lo hre rawh aw, kal ang le”  tih pah chuan min kal pel nghal fua mai a. Kei chu kal mai nachang pawh hrelo hian ka la ding khawng reng reng. Mahse, inthing harh leh vatin, ka kalsawn hma chuan Timothy hmel chu ka va thlek leh hram a, ani chuan chiang zet a min melh chung leh, nui sâwng chung hian a kawngka chu alo khar ve mek thung. A hmel landan leh chetzia vang khan ka thin alo phu leh zawih zawih tawh nia. A hrehawm duh ṭhin mang e.

Mahni inchhungah pawh awmzui ngam tawhlo hian ka phone ka la leh zuai a, kawngka te chu kalh ṭha leh te te phawtin, security nu kha ka zui thla ve ta daih. Tichuan, zankhua in amah nen chuan kan titi a, zan khaw vawt hnuaiah chuan kan ṭhu tlaivar dun ta zak mai a nih chu. Hmingtei rawn haw hma loh chu khua pawh var eng ang mahse, inchhungah ka lut ngam tawhlo a, ani chu call in rawn haw tur chuan ka va tur ta sek lehnghal. A chhan engmah ka hrilh nghal lemloh avang erawh chuan alo ning hle mai a, min phun khum hlak hlak reng mai.

Security duty an inthlak lai thleng pawh chuan Hmingtei chu rawn lan tih reng ala neih thei lo a, inchhungah lah ka la chho ngam teuh silo. Diktak chuan, Timothy khan a unaupa thiltih vek a nih thu chu engang pawhin sawi sawmsarih mahsela, amah ka hlauh rukna leh ka râp em em na rilru zawng zawng te, ka rinhlelh ruk na engkim kha an la reh ve miau si lo. Hlauhna hian ka chhungrilah min fan bet tlat tawh a, chuti mai mai a reh thei ngawt pawh a ni awm lo e..Tichuan, Hmingtei hmel lo lan hun leh, Timothy rawn chhuak thla hmel hmuh tur a awm hma chu tiin, chulai security ho duty na hmunah chuan zah pawh sawi theilo in kalo ṭhu ve ngat ngat ringawt mai a ni. A lehlamah, kan building duty ho hi an fel em em a, biak an nuam in mizo vek kha anni bawk nen, a hrehawm pawh ka ti lutuk hran love.

Ka call aṭanga darkar khat liam leh hnuah chuan Hmingtei pawh rawn thleng ve chauh in, a rawn hah hmel em em lehnghal a, a biang te chu a tai sen hlar mai bawk. Kei chu engkhaw sawi set set lo hian min kai phar ta dawr dawr mai a, inchungah min hruai chho zelin, eng thu mah ala sawi chhuak lo bawk nen, min ti bangbo ta angreng hle.

” Eng thil chu i hria nimaw, i ngawi reng mai bawk sia”  ka tih pawh chuan thusawi chu hria ang pawhin a lang lo a, a kal ngar ngar ringawt mai a ni. Tichuan, kan apartment chu thleng in, kawngka a hawng leh sawk sawk a, inchhung kan luh hnua min rawn melh leh meuh chuan a mittui alo tling piau tawh tih ka va hmu thei. A ngaihna hrelo leh hlauthawng aw zet hian kei chuan

” Eng nge thil awmzia ṭhiannu. I khawsak dan engmah hi ka hrethiam miahlo a nia aw” 

Ka sawi zawh rual chuan a rawn ṭap chhuak ta hak mai le. Mak hi ka va han ti ṭhin tak.

” Diki, ka thil hrilhtur che hi hre ve lo la ka duh zawk viau na in, ila hre dawn tho tho si a, ih eng lo, Ruatsanga ruang kha nichin mai khan an chhar a!”  a hmui hupin a ṭap zui leh ngar ngar. Kei chu a thilsawi vel avang khan kalo â chhulh hman a, ka hamhaih in ka chîâi vek a, awmdan tur mai chu ka hre lo a ni ber. Ka hlauhthawn vang nge tih pawh hriatloh chuan ka khur zui leh der der mai bawk si a, ava han thawpik thlak tak em aw. 

Ṭhutthlengsei ah chuan ṭhu hnawkin, ka melh ngai chu ka han melh leh vang vang phawt a, a thu rawn sawi te kha thil ni thei pawh niin ka hre thlawt lo. Ka ring phal hlawllo  hi a ni ber e.

” Ruatsanga chu nimin tlai khan a rawn leng a, ih” 

” Khang thu te kha sawi a ṭul lo. Khawiahmah sawichhuak suh ang che i hria em? Engmah hi hriat fumfe kan neih miau loh avangin buaina lian takah i in hnuklut theih tih hre rawh”  tih pah hian ka kut vawt thlur mai chu a rawn vuan ta chawt a. Keiin, amah chu chiang zet hian kalo melh ve ngawt ngawt thung. Ni e, a rawn leng ve nimai a, tikhan, lawm vaklo leh zak ru takin min chhuahsan leh a, a bak eng thil nge hriat ka neih. Engmah ka nei tawh lo. Ka thu hriat chhun tlemte avang khan ka buai duah thei ve tlat. Mahse, ngawi teh lawkin,, Ruatsanga nen kan in phurchhuak lai kha chiang taka min hmu tu Melody a awm tlat. Chubakah, Timothy pawhin min hmu a nih kha. Timothy chu engpawhnise, Melody mawlh khan kei chu min tihchhiat vek a hreh dawn hauhlo. Ka hming hi a rawn sawi lang ngei ngei ang le. Chung thu vel Hmingtei ka han hrilh leh chuan ani chu alo thaw deuh hak a, a rilru a buai ve hle niin a lang.

” Umm, hmachhawn tawp rawh. Buaiin chiai reng reng suh ang che. I tih engmah a awmlo a, i hriat chin thudik kha sawi mai la, a bak chu Pathian kutah dah tawp rawh aw”  kei chu kalo bu ve nghat nghat ringawt. Tunah tak hi chuan rilru mumal engmah hi ka pu theilo a ni ber. Amah bawk chu rawn ṭawng chhuak leh in

” Ruatsanga chu nimin a class ban hnu khan a rawn haw leh tawh miahlo an ti a, a chhungte an khawngaihthlak ve khawp mai. An fapa neihchhun a la ni zui lehnghal vei nen”  a sawi zawh rual chuan kawngka chu rawn ri dawt dawt in, keini pahnih pawh kan hawi rual ve ṭhawt. Ka lungphu nasa lutuk te pawh chu a ri ka hre pha tawh hial in ka hria nia.

Hmingtei’n kawngka ava hawn nak chuan kan lo rinlawk leh beisei ruk ang ngei khan police pathum leh Melody chu an rawn lang chhunzawm ta reng a. Ka va han hlauthawng nasa tawh tak em. Inspector chuan fiah kelh kawlh zet a ka hming rawn lam rik pah hian

” A tu zawk hi nge Lalrindiki champhai khua chu”   a rawn ti ta fawk mai. Hmingtei chuan min sawi rik chu hreh hle mahsela a tih ngei ngei kha a ṭul miau bawk si a, hreh tak chung leh zawimuanga min rawn thlek pah hian

” Amah saw a ni e, ka pi, eng thil nge ni ta?” 

Chuveleh, inspector hmeichhe piannalh leh sang ṭha zeih zawih zet mai chuan ka lehkhabu kha rawn lek chhuah pah hian

” Hei hi, kan ruang chhar Ruatsanga bag ah khan kan hmu fuh hlauh mai a, tin, hei, kan nula sawi ang hian nimin tlaiah in lo in phurchhuak bawk a niawm a, a dik em?”  a rawn tih lai chuan ka lehkhabu chu en in ka phu nawn awn awn hi a ni mai e. Ruatsanga khan ka lehkhabu hi a hawh tih ka hrechhuak leh chiah bawk. Ava han zialo ṭhin tak em. Kei chu ngawi reng thei ka ni lo tih inhria in, kalo bu zauh zauh ringawt a, zawi sap hian

” Nimin tlai khan he lehkhabu hawh tur hian a rawn kal a, rei pawh a awm hman lo. Chhuak lehnghal in a chungah chuan eng thil chiah nge maw thleng le”  kalo ti zui duah. Chutah, inspector bawk chuan

” Tukin zing khan a ruang hi hmuhchhuah chauh a ni a, in building aṭang hian a hla lo hle nghe nghe. A nih chuan Rindik, hetiang alo nih tak si ah chuan min lo zui la, station lamah kan inkawm chiang deuh dawn emni ang? Aa thil tisual a, pawikhawih tu i ni e tihna lam ni lo se, thu hretu leh amah hmu hnuhnung ber tu kha i ni miau mai bawk si a, tiraw?”  a rawn tih leh chuan Hmingtei chu a ka va mitmei thuai a, ani erawh hlauhthawn hmel tak hmai dâng vek hian alo ding tlawn ve reng ringawt. Keipawhin engmah sawi buai neilo chuan police ho chu ka zui chhuak ve ta zawk a ni. 

Station kan thlen hnuah pawh ka thu ngai bak lo chu engmah han sawi belh tur leh hriatbelh ka neih thu han sawi zui vak tur hre tawh heklo, zankhuaa ka awmna hmun leh ka thiltih te chu min hriatpuitu security kha va zawt fiahin, ani lah chiang taka kan awmdan hre fiah tu kha alo ni bawk nen, tihtheih dang nei tawh heklo le, hmundang a lo kalbo tura thu min chah in, min haw tir ta ringawt mai a nih kha. Hmingtei nena kan han inhmu leh zet chu, lawm avangin kan inkuah chawt a, kan ṭap dun ta hial.

Ruatsanga te in lamah pawh va inlan ve ngam tawhlo in, apartment ah chuan ka tawm leh ta tlawk tlawk a, Hmingtei pawh kha a bâng chuang lo. Ani erawh, ava inlan ngamloh vang pawh ni chuanglo in keimah min ngaihtuah vang zawk a mi chhuahsan duhlo kha a ni zawk awm e. Tichuan, inah tawm chawrh chawrh in a chang leh kan ṭap a, a chang leh kan titi dun leh bawk a, eitur lam reng kan ngaihtuah tawh lo. Tin, kei ngat phei chu ka ril pawh hi a ṭam thei der lo a, Ruatsanga ringawt chu ngaihtuah zuiin tu kut nge a tawrh ang tih leh chutiang khawpa nunrawnga a chunga che duh tur tunge awm ang tih ringawt ngaihtuah chuan ka melh ngai hi kalo melh leh vung vung ṭhin. A chang phei chuan a bialnu Melody te kha ka han ringhlel leh rum rum ṭhin bawk a. An intihthiamloh lai niin, tikhan kan inphurchhuak te kha min rawn hmu lehzel si a, a thinrim insum zo lo hian hetiang thil hi a bialpa chungah a thlen tir ta mai emni ang, aaa ka ring chiah bawk silo. Chutiang rilru chu lo pu ta ang nise, keipawh hi min rawn tihbuai ve awm tak kha a nih vei nen. Heiha,ka ngaihtuah thui poh leh ka buai thui a nih hi ber hi maw.

Chawhnu dar 2 a rawn rik chuan mutchhuak hian min zem ṭan a, tin, ka ril pawh a ṭam ve ta hlemai bawk. Hmingtei pawh chu alo ni ve chiah nge a tho tharh a, choka lamah lutin, eitur vel chu ava buaipui ta sauh sauh mai. Nui sakin khumah chuan ka han let thla deuh tap a, Ruatsanga nen kan inbiak ṭhin dan leh infawh lai thleng khan ka ngaihtuah kai hman ang tihtur ah ka phone sms tone chu rawn ri ral ralin, company bawk emni aw tih pah a ka han en nak chuan ka phone number hriatloh aṭangin message kalo dawng reng mai nia.

“Engkim thleng mekte hi i tihsual rah vek an ni e, i chantawk chu i hmu ta!”  tih hi alo ni a, chu thu thawn chu tawi te mahnise awmzia engemaw tak erawh nei tlat in a hriat lawi si. Rang taka tlanchhuak in Hmingtei chu ka va chhiar tir ve thuai a, mak pawh alo ti ve hle. Atir takah chuan Melody thiltih ni turah ka han ngai thla ngawt a, mahse, alo ni hauhlo. 

” Police ah tlanpui thuai ang. Anni chuan tihdan tur dang te pawh an hre mial thei zawk asin”  a tih takah chuan harhchhuak zawkin, kan inha lum sawk sawk a, kan tlanchhuak zui nghal.

Station kan va thlen a police ho in ka sms dawn te kha an han chhiar ve hnu chuan, chu phone number ngei mai chu trace turin an ti nghal zung zung. Result nghah chhungin keini erawh tha khur der der chung hian station kilkhatah kan lo ṭhu ngawi ve veng veng ringawt. Rei pawh kan la ṭhu hman lovang tihtur ah hian sms dang dawng leh in, ka hawng vat. Karei leh!!

” Building thuruk kha ila hrereng em? Zawhte no kha tu sawisak hlum nge? Tunah chuan, i bialpa meuh pawh i chhanhim zo ta silo a, a zavai hian i luhlul rah vek anni e, eee kha inchhung hnawk tak te pawh kha, thikthu in a ken tel leh tharum thawhna leh inhrosakna inchhung a nih nghe nghe kha”  tih chu a rawn thleng leh ta hlawl. Hmui hup hian ka meng phar zui awn awn mai a, Hmingtei khan maktih hmel zet in min rawn en deuh ngawt ngawt bawk. Chutah, Hmingtei hriatthiam tur leka zawi sap hian

” TIMOTHY!”  ka ti ringawt a. A tir chuan a ngaihna hrrelo tih hriat tak hian a han hawi deuh vut vut phawt a, mahse, kei chu min phih tho lawp chung hian police ho ṭhutna lamah min kai phei leu ta dawr dawr. Thaw hlawp hlawp chung hian Hmingtei bawk chuan

” Ka pu”  ati hman chauh tihin kan hmaa ṭhu inspector pa chuan chiang leh fiah taka min rawn en let ve in

” Awle, kan hrechhuak tawh e. Kha number hmangtu leh location chu. In chenna building ngei niin, a hminga number book tu pawh Timothy tih a ni e”  a rawn tih leh lek phei chuan keini ṭhiandun chu kan sa chhuak vek tawh hi nimaiin a hriat a, kan meng â ruai mai bawk. Tichuan, ka message dawn thar te chu entir leh in, inspector pa chu a tho ta hluai mai a, a nau te ho ko khawm leh zung zungin

” Muangchang thei kan nilo, ti r’u le!”  tiin station aṭang chuan kan inzui chhuak ta dial.

Timothy apartment kan thleng a, police ho in kawngka chu an han kik takngial pawh a rawn chhawntu tur an awm tak mai siloh ah chuan, an tichhe ta ringawt. Chuta, inchhung awmdan kan han hmu chiah chu le…thisen hlir hian alo khat tlat a ni ngawt a, bângah leh ceilling ah te, chhuat leh bungrua engkim mai ah chuan thisen hi alo per kai tak chuai chuai a, rapthlak tak hi a ni ringawt. 

Police ho chu lut thuk zelin, a hming khan an ko pah reng bawk. Chutah, constable pakhat sitting room lama va kal fal bik chuan midang chu rawn au tuarh tuarhin, an va thlen phei ve nak chuan le, chulai hmunah ngei mai chuan ruang pahnih inang tak, engmah danglamna awmlo te hi silai a inkaphlum tih hriat takin an lo thal reng mai a nih chu mawle! 

Hmel inang chiah, sam leh taksa pianphung pawh engmah danglamna awmlo te ruang chu an la chhuak fel thei ta. He thil hi engtinnge a thlen theih zawk? Ruang khawi zawk kha nge Timothy chu ni ta ang? DNA test aṭang a fiah taktak thei angem? Timothy khan phirpui a neih thu kha lo sawi tawh mahsela, kei chuan ka vawikhat  hmuhna liau liau niin ka hria a, ti ila, tunge min tibuai a, buaina min thlen fo tu zawk kha ni ta ang? He apartment chhungah hian tu nge khawsa zawk tih te, hetiang em em a rapthlak a intihlum tur hian a tu zawk chu nge misual leh nunrawng zawk ni ta ang? A mak a ni. A mak tih chauh loh chu sawitur reng ka hre ta love.

****      *****  ***   —      ****    ****       ****    ****

Leave a Reply