You are currently viewing AMAH VANG A NI!
Oplus_131072

AMAH VANG A NI!

Spread the love

AMAH VANG A NI!

BY : Vanlalpeki Fanai

‘’ Mami pa, inhnuaia thawm awm reng chu eng thil nge maw ni le, I zu enfiah dun the ang’’ mut hun dawn ruaiah ka nu chuan a rawn tih tha leh a, keipawh ka lo hawi ve deuh hu hu hman. Nia, ka nu in a han sawi takah chuan nichin Rammawia rawn len lai atang tawh khan inhnuai hnawmhnawk dahna lamah khuan thawm ri neuh neuh reng kha chu ka lo hre ve zeuh zeuh tawhin ka hre reng a, mahse, sazu leh zawhte vel an che ni turah ngaiin ka ngaihsak tha duh vak lo a nih kha.

Sihdet nena ka nu te chhuak ta chu in chhung atanga lo thlirin ngawi reng hian ka lo ngaichang ve kar reng a, chutah, ka hlauhthawn ruk ang ngeiin ka nu chu a rawn au zui ta țhat mai. Ka phu zuang zawk thei.

‘’ I hmu ve lo emni Mami pa, awi ka duh lo keizawng’’ ti deuh chul chung hian a phe kual ruai reng mai bawk si a, ka tlan chhuak zui ve ta ngawt.

‘’ Inbengdai the, khatin au kual ruai ruai suh. Eng thil chiah nge I hmu chu ni a?’’ ka pa in a tih lai te pawh chuan mangang ru zet hian ka lo hawi ka lo hawi ve tawh a, awm dan tur ber pawh min ti hre lo a nih chu. Inhnuai lamah chuan chhukthla ve in ka nu chu ka zu kuah ringawt a, alo la khur dar dar zui reng bawk nen min ti awm nuam lo zual vek.

‘’ Nu, I tha em?’’ ti mawlh mawlhin in chhungah ka kuah lut zel a, ani erawh chu ala tawngvai mual mual reng thung. Chumi zan chuan thu zawh chian tlak loh khawpin a tawngvai bual bual reng a, khuma kan mut tir hnu reivakloah a khua te chu rawn sik lehin damdawi pawh han ei tir ve mah ila awmzia a nei thei ta lo reng reng. Min ti mangang takzet a ni e.

‘’ Nu, engtin chiah nge I awm’’ ti mawlh mawlhin ka thutchilh a, a kut chu ka vawnsak pah reng bawk. Mahse, min chhang thei chuang lo thung. Ka pa nen chuan tih vak ngaihna hre silo in rilru nuam lo em em hian a bulah kan thu dun tlawk tlawk reng a, kei thung chuan doctor pan mai te pawh han rawt ve bawk mah ila ka pa zawk hian a remi rih tlat lo. A reh ve leh mai ang ati tlat. 

Zing khua a rawn var a, dimtea ka sam rawn chul hliau hliau tu an awm tak avang chuan zawimuangin ka tho chhuak zui a, ka nu mutna khum tlang bawh chuan ka lo muhil ve tih ka hre chhuak chiah. Ka nu chuan nui hmel pu sang chuga min lo nuih var varin,

‘’ Ti nge I khumah I mut loh a’’ a rawn tih sap rual chuan keiin a pang te chu ala sa nge sa lo tih hriat tumin ka lo dehsak ve zung zung thung a. Rinai tak chuan zan hmasa lam ai khan alo dai diak tawh. Ka thaw zui deuh sawng sawng mai. 

‘’ Nu, nizana I buaina chhan ber kha eng thil chiah nge a nih tih min hrilh tawh la. Ka pa nen pawh kan mangang lutuk alawm’’ ka han tih chuan peih loh hmel zet hian a rawn nui ve leh sak a. ka lo la en reng. 

‘’ Engmah a ni hleinem. Ka thil hmuh sual kha a tak emaw ka tia, chuvang mai mai a nih kha’’ lo ti daihin, kei chuan ka awih hran lo hle. Ti khawp khan a hlau a, a phili buai bawk a, hmuh sual mai mai ni tur atn chuan a awihawm loh mah mah deuh chu ka ti. Ka nu hian dawt min hrilh tih ka hrethiam mai. Ka hrehchiang lutuk. Tichuan, a kut chu na deuh a han hmer sak vang vang chung hian

‘’ Nu, ka bulah hian engthilmah zep a ngai hleinem. Sawi tlang vek law law zawk la. A nih loh chuan kei hi ngaihtha takin ka awm thei dawn miah lo a nia’’ ka sawi zawh rual chuan alo then ve deuh sak mai. A mitmengah ringawt pawh khan tim deuhna ka hmu tel tlat.

‘’ A,, nia, tak tak chuan nizan khan thil engemaw maksak deuh hlek hmuh chu ka nei ngei alawm. Englo, khatia I pa nen inhnuai kan zu thlen thlak khan I pa hnung chiah ah hian sihdet keng chungin ka lo ding ve reng a, khatia ka sihdet ken hmanga ar in hlui vel ka han chhun kual lai tak khan kan thingzai dah khawm phen atanga min rawn thlir rengtu niawm tak hi ka va hmu deuh thut mai a! Ka chhun fuh angreng bawk si nen tikhan ka rawn au chhuak ta chiam mai a nih kha’’ a rawn tih chuan keiin rang deuh hian

‘’ I thil hmuh chu eng nge a nih reng reng’’ ka lo ti thuai a. A chil chu a lem zui khawlh thei. Chutah, 

‘’ Ka chiang bik lo. Ka hmuh fuh dan berah chuan hmeichhia nimaiin ka hria. A sam kha a tla deuh hnuang a, min melh deuh kur bawk. A taksa phei kha chu thingzai dahkhawm ho khan an hliah vek bawk nen ka hmu fuh lo hrim hrim’’  a rawn ti leh ta a. ngaihtuah dan tur ber pwh ka thiam ta lo. Eng aiah nge kan inhnuaiah chuan hmeichhe thla chu alo awm ngawt ang. Thla ni lo in kan venga rilru lam chiang zan lo tuemaw ber te hi an ni zawk  lo ang maw tih te thleng mai chuan ka ngaihtuah kai chhova, hlauh ngaihna tak pwh ka hre lo zawk a ni e. ka pa a rawwn luh ve hnu chuan ngawi zui daihin thudang ka sawi chhunzawm a, ka rilruah erawh ka nu thilsawi ringawt kha la awm ve in, thildang pawh ka ngaihtuah hleithei lo. K awm te chu a tinuam lo zo vek lehnghal a, ka hrehawm ru veng veng mai.

Nilengin in chhungah chuan rilru nuam lo reng rengin ka hun ka hmang a, ka nu pawh kha a dam that leh deuh tawh avangin vawk zawng turin a chhuak bo leh daih tawh a, ka pa nise ram lamah a chhuak bo bawk si. In chhung chu ka hlauh thar tak viau awm ka hre lo na a, nuam erawh ka ti chuang hauh lo thung. Engemaw riau hi keimah ah a awm tlat a, min mawlh tlat. Ka sawi thiam chiah bik lo. Chutia nuam lo ti zet leh ți ru em em chunga ka lo awm ve rak rak lai chuan vanneihthlak takin Rammawia a rawn lut ta hlawl mai a, ka lo kuah zui nghal buan buan lo chauh a ni.

‘’ Ti nge I hmel kha. Hlauh nei iva ang ve’’ rawn ti nghalin, ka hmelah thleng pawh chuan alo lang chhuak a ni tih ka hrethiam ve chiah mai. Ka hmai te chu tuai zui nawk nawkin ka tiril khur tthup tum tak chung chuan,

‘’ Aih, ni love, chhuat ka nawt zo chiah a ka la hah vang mai mai a nih hi’’ ka sawi zawh rual hian ani lah chuan chhuat dung vel chu a han thlir kual nghal zat bawk a, maktih hmel fe hian min rawn en leh thuai

‘’ Chhuat hi I nawt zo chiah maw? Chuti chu I nawh hma aiin a bal  a nih dawn hi!’’ eng thu nge maw a sawi ni. Nia, chhuat kha ka la nawt reng reng lo alawm. Za lo fahranin ka nuih sak a, min rawn kuah ta ringawt.

‘’ Lo kal the. Han thu dun ren rawn phawt ila I hah te pawh a dam mahna’’ tih paha min thutpui hnu chuan tlemin ka awm chu a nuam ve lek lek thei.

‘’ Ti nge dawrah in buai lo emni? Iva rawn leng hman zawk ve a’’ lo ti lehin, ani chuan

‘’ Aw buai tawh lo e. chubakah chawhma lamah hian kan buai zual a, tun ang hun chho ah hi chuan kan awl leh hlauh zel. Tihian, tlai ni tlak dawn hunah kan buai leh chiah ang’’ alo ti ve mai a, keipawh ka lo bu zui ve nghat nghat.

Rammawia hi tlangval hnah khat kum 31na hmang mek niin, tunhma chuan aizawl lamah ama pualin computer dawr a hawng ve thin a, hun rei tak chhung kha chu aizawlah pawh a zu khawsa ve ren rawn thin a nih kha. Chung hunlai chuan keiin  kan khuaah hian zirna run la bel ve in high school zirlai mai ka la ni thin a, tunah erawh zirna chawlhsanin tihian in lamah ka nu leh pa te puia a țul apiang ti turin ka awm ta thung. Tin, lehkha hi ka thiam thei lo thin em em a, school ka kal ve lai pawn first term hi chu ka fail ngei ngei ziah a tih theih. Chuan, kum tawp examah pawh pass ngawr ngawr ang khan pawl chu ka sawn ve hram zel tho. Pawl 10 thleng bak chu ka zir chhunzawm peih ta lo bawk. A pawi ka ti chuang lo, zirsan tluk chu awm lo mahse, sang tak thlenga zira chhawr tlak nih leh si loh ai kha chuan tihian chhungte tan tangkai hma ila a tha zwk niin ka hria. Marawh chu, tih tak takna nun nei tan erawh chuan sang tak thlenga zir tluk kha a awm hauh lo ang bawkin, bei fat fat rawh se. 

‘’ Aizawla I awm thin lai khan bialnu engzat nge I neih hman’’ amah melh ralh ralh chunga ka han tih chuan lai hmel pu zet chung hian min rawn en ve zuk zuk reng a, a nui chhuak deuh hak lehnghal.

‘’ Pakhat bak ka nei lo hrim hrim. Min la then daih zui’’ a nui zui leh put put a, ka lo țhen ve sak mai.

‘’ Ka awih lo lutuk. I hmel a chhelo a, I pian a nalh bawk a aizawlah chuan I che na thei lutuk an tih che kha’’ ka han ti leh chiah chu a hma aia nasa mah khan alo nui chhuak leh hawk hawk a, 

‘’ Min dawp kha tum vel suh aw’’ tih bak chu sawi tur pawh a hre ta lo a nih hmel. Diktaka sawi chuan ani nen hian kan inngaihzawnna ala rei vak lova, a tir phei kha chuan a hmeltha ka tih vang leh a pian hi a nalh ka tih vang chauha duh ve kha ka ni ta berin ka hria. Mahse, ni khua a rei a, hun te a liam ve tak zelah chuan ka hmuh dan pawh danglam ve ta hret hretin a rilru thatna leh felna te, taimakna te zawk hian min hneh chho ta phian a, a pawnlam lan dan te kha chu a ve lek chauh an ni tawh. A bialnu ka nihna ang leh hmeichhia ka nih angin min zah der thiam em em a, min ngaihsak bawk. Heng thil te hian zawi zawia min hneh chho zelin tunah chuan ka hmangaih tawh takzet a ni. 

‘’ Zanin tlai chu kan inah chaw rawn ei phei rawh aw’’  Rammawia’n a rawn tih chuan ka zak nghal ngawih ngawih ringawt. Ngaihzawngte ina chaw han ei tawp mai chu, min sawm tute zawk pawhnise keimah hian nuam lo ka ti a, ka inthlahrung bawk.

‘’ A, ka zak’’ ka han tih chuan nghet zet hian a kutah a rawn vuan a, chiang zeta min en leh chung hian

‘’ Zahna tur a awm lo. Rawn hruai rawh an tih vang che nia, I duh kha chu ring lo mah ila hei chen hi kan lo inzui ve tawh bawk a, chaw rawn ei chu I ba ve hrim hrim tho’’ a tih leh chuan hnial duh tawh lo in ka ngwi zui ve ta daih. Ka chhungte pawhin min lo remtihsak hlauh avang chuan zanriah ei tur chuan an in lam chu kan pan dun ta zwk a. 

An chhungkua hi an fel em em a, an polite in ka chungah nise an tha a, keia phulo hian an thatna chu ka chungah an tilang nasa hle ka ti mai. A nuam duh lo lek lek thei zawk.

Zan riah eikham hnu chuan a țul țul tihpui lehin, reilote kan thut khawmuan leh hnuah Rammawia chuan min va thlah haw ve leh ta a. chutah, kan in kan thleng a in chhung kan luh fel rual rual chuan ka pa khan mangang tih hriat tak vir kual ruai chung hian

‘’ Ilo haw thei maw. I nu hi damdawiinah kalpui mai ila a tha ang. A buaithlak dawn tlat’’ lo ti zui hlawk hlawkin a hmel puthmang atang rengg reng pawh chuan a buai tih chu hai theih a ni lo. Rammawia nen pawh chuan hamhaih dun fe hian kan inmelh ve zawk a, chutah Rama zawk chuan

‘’ Ka pu, engtin chiah nge ka pi chu a awm a. A khua a sik nge’’ ti nghal zung zungin pindan lamah kan tlan lut nghal dial bawk a. ka nu chu a hma zana a awm dan ang chiah khan lo awm lehin a khur hlak hlak reng a, a pang erawh chu a sa vur reng tho bawk si. Tih harh tuma kan sawi nawk nawk hnuah pawh awmzia a neih theih loh em avang chuan Rama chuan a pawm chhuak deuh nawlh mai a, tichuan a car chhungah dah lutin kan khaw damdawiin lam pan chuan kan chhuak zui ta ringawt mai a ni. Thil thlen dan hi ka hrethiam lo thin hle mai. Ka nu hian hman zan maia a thil hmuh ang kha hmu nawn lehin hetiang hian a awm ta nge, thil dang vang zawk. Rilru a tibuai takzet a ni.

Damdawiin kan thlen hnuah pawh a khawsik te khan ala thlah theih loh avang leh a tawng vaih bual bual reng bawk si avang khan doctor leh nurse te pawh chu an che zui nghal sap sap hlawm a, an tihtur tiin an phe kual hlawm vat vat bawk.

‘’ Pa, eng nge thil awmzia. Ka nu hian eng thil chiah nge a tawn a min han hrilh the. Kei chu ka hlauthawng zozai thin em mai’’ khur dar dar chunga ka pa han zawh chuan ani pawhin mitmeng buai nuai chung hian min lo en ve kar reng a, han sawi mai dan tur chu a hriat loh hmel ve khawp a ni. Mahse, 

‘’ Ka chiang chiah bik lo. Ram atang khan ka rawn haw tlai angreng a, inah khan ilo awm bawk si lo nen I nu hi alo che buai khawp mai. Tikhan in ka thlen hnu, eirawngbawl a zawh tawh hnuah khan vawk chaw pe turin inhnuai lamah a chhuk thla ta a, chutihlai chuan kei ka lo inbual mek thung. Khatia a chhuk thla kha rinai taka zu thang reiin, ka inbual zawh hnu reivakloah hlauh nei ang mai hian a rawn au chhuak ta chiam chiam zui a. a awmna ka zu thlen thlak ve chuan khatiang khan  buai nuai chungin alo khur hlawk hlawk tawh a, a mitmeng a buai vek bawk si nen a biak tlak loh chu a ni nghal mai awm e’’  a ti ve leh ta. Rammawia nen pawh ka thil sawi avang chuan kan inmelh leh zak zak thin a, sawi ve ber tur pawh kan hre lo hial. Tin, Rammawia takngial pawh chu a hlauhthawn hmel angreng viau a, ka nu khawsak dan mawlh mai khan a țhawng na hle te pawh a ni mahna le. A melh ngai melh hian alo thu ngawi leh veng veng thin. Tichuan, ka nu chu damdawiinah admit niin kei leh Rammawia chu ka pa chuan in lamah min tir haw zui ta a. hemi zan hian mahni chauha ka riah ngam mai ka inrin avangin min ngaihtuah em em tu Rama pawh chu ka tir haw ve ta phawt kha a nia. Hetianga ka nu ngeiin thil mak tak tak a tawn hnu pawh hian ka la tawn ve loh vang nge, hlauh em emna ka la nei thei ve miah lova, nuam erawh chu ka ti chuang hauh lo thung. Mahse, hmuh loh leh hriat ve lem loh thil te hlau a kimki ngawt tur atan chuan ka kum a tam ve tawh alawm tih te chu rilru ah dah in, ka in la paukhauh lui ve hrim hrim bawk a ni.

Damdawiin lam ka biak zawh hnu in mu tur chuan a insiam zui nghal a, hemi zan hian thli a thw deuh fur fur reng a, van lam ka han thlir chhoh lahin khua chu a dur awm pawh ka hre mang bawk si lo, nuam ti lem lo chung chung chuan ka mu lui ve ta hram tho a ni. Chutia ka mu chu engtiklaiin nge ka lo muthilh ka hre miah lova, ka lam pana pen thawm rawn awm leh thin chuan min tiharh in, ka meng zau nghal kawk thei. Ka muthilh hma ang chiah khan thli pawh kha alo la thaw ve fur fur reng tho a, mut dawn a ka kalh that vek ka khum bul tukverh erawh chu alo inhawng huau twh a nih chu! Makti tak leh peih lo zeta tho chhuakin tukverh chu khar leh mai ka han tum a, mahse, kawmthlang huan theihai kung buk hnuai velah chuan thil engemaw tak chesawn zuk zuk reng hi ka zu hmu ta tlat mai nia! Meng phawk hru chung hian ka ding khawng zui nghal awt a, chu thil mawlh mai chu ka duh vang reng pawh ni lo in ka melh zui ta tlawk tlawk. Hmuhfiah theih chu ni chiah lo mahse a chesawn tih kha ka chiang em em thung a, eng thil chiah nge a nih tih kha ka zu finfiah thei lo mai zawk a ni.

‘’ Min tanpui rawh’’ tia huan mawng lam atanga rawn au chhuak ruai ruai thawmah chuan harh chhuak zzawkin khumah bawk khan ka thu chhuak leh ta hlawl mai a! A dik thei lo, nichin khan ka tho chhuak tawh a ni lawm ni? Tukverh lam bawk chu hawi zui vatin, alo la inhawng hiau tih ka hmuh chuan hlauhna hlir hian ka thau ah a rawn man zui a, ka khur titih ta mai. Kut khur zawih zawih chungin phone chu ka han dap a, ka la dap fu lawk thei lo zui lehnghal. Ka dap fuh hnu chuan rang takin Rammawia ka call zui thuai a, min rawn riahpui turin ka ngen ta ringawt.

Tlawm leh zah ka sawi thei tawh lo. Ka hlau em a tin ni. Rammawia pawh chu reiloteah rawn thleng zui ve maiin, thil awmzia min zawt nghal zung zung a, ka lo hrilh ve vek. A awih leh awih loh chu hre chiah lo mah ila a mitmeng atang erawh kha chuan awih chin a nei tih ka hrethiam tho. A rawn thlen hnu reivakloah ruah lah chu nasa em em mai hian a rawn baw zui hawk hawk mai a, thli nen a beih avangin thawm pawh chu a namai lo angreng hle. Mahse, hemi zan hian inkuah rialin khum khatah kan mu zankhua țhak a, rilrua thlamuan loh rukna awm ve reng nen kan ngaihtuahna ah pawh chuan thil tha lo leh diklo lam reng reng a lut thei lo ka ti mai. Duat takin min kuah a, tui takin ka muhil zui ta bawk. Thil thleng danglam pawh lo awm le mahse kei chuan ka hre zui tawh lo hrim hrim a ni.

Ka harh leh chuan khua pawh lo var tawhin, Rammawia kha chu alo tho chhuak daih tawh thung a. harsa ti zet leh peihlo fe hian ka inbengkang lui ve ta hram.

‘’ Ilo tho ve peih ta maw?’’ nui sang chunga min lo be nghalin kei chu ka lo bu deuh nghat thung a. ka nu te chanchin zawh tumin phone ka ban nghal bawk. 

Ka pa chuan awki zangkhai angreng taka min lo chhangin an ziaawm tawh thu chu alo sawi nghal zat bak a, tlem chuan keipawh ka awm a nuam ve thei ta deuh e. tichuan, tukthuan turte bawlin Rammawia pawh chu ka chelh lui ve ta rih a, ka bula tukthuan ei ve nghal law law tur chuan ka duh a ni.

Tihtur ang ang tifela tukthuan ei fel hnua min han hawsan zet chuan ka ruak nghal huai nimai hian ka inhriaa, awm dan tur leh tihtur ber pawh ka hrethiam lo. Damdawiinah kalin ka nu te chu chaw ka han pe leh te te phawt a, rei pawh awm zui lo in ka haw thla leh vat thung. In chhung dungah chuan ka tei ka tei a, ka chhungrilah hian kaptu lian tak nei ang maia inhriatna ka nei reng bawk si nen ka awm dan hi a nuam thei thlawt tawh lo a ni. Sawifiah hleihtheih siloh thil engemaw tak hian min chenchilh ni berin ka hria. Chutihrualin chung thil te chu hlauh tur chi an ni em tih ka hre chuang lova, hlauh loh tawp tur thil an ni em tih pawh ka hre hek lo. ‘

Chhun dar 12 a rawn ri chiah tih in kan veng information atang chuan chhiat tawh thu an la rawn puang tak deuh deuh a, ka chi-ai zo leh vek tawh. Ka phone chu phawrh nghal sawk sawkin Rammawia ka va call ta vat vat a, alo la rang kher.

‘’ Aw, eng thil nge ni ta’’ a rawn tih rual rualin kei chuan

‘’ Zanin chu kan va tlaivar ve ngei ang chu tiraw?’’ ka han ti ringawt a, a rawn nui chhuak deuh hwk thei.

‘’ Ngai ve ang chu, iva hmahmawh ve ala hma alawm’’ a rawn tih tak si ah chuan tlema inthiamlo ve leh deuhin za fahran lo chuan ka han nui lui ve halh a, nia, tunah khan mitthi chungchang an puang zo chauh a, tlaivar tur atan chuan ka hmanhmawh ve mah mah deuh chu a ni e. 

Zawimuangin khua pawh a rawn tlai ve hret hret a, eirawngbawl a rawn hun meuh chuan hmanhmawh deuh a bawl sawk sawkin damdawiinah bawk chaw pe tur chuan ka tlan chho leh vat a. rei pawh awm tawh lo hian ka haw thla lehnghal mai. Zanriah ka bar zawh hnuah mitthi in kal tur chuan ka insiam zui leh sawk sawk a, ka che rneg reng hi ka hmanhmawh in ka rilru te hi a hmanhmawh ut ut reng tawh a, a chhan ka hre bik lo. Ka phili ruai ni ber hian ka inhria. Tichuan, tlaivar tur kan ni bawk nen , Rammawia pawh chu zan dar 8 velah a rawn kal hman ve ta hram a , in chu chhuahsanin mitthi in lam pan tur chuan kan inzuichhuak dun ta nghal bawk.

Kal lamah chuan buaina leh harsatna tawk lem lo in pangngai takin mitthi in pawh kan thleng ve thei mai a, khaw var hun thleng rawka awm tum kha kan ni lem lo bawk nen, thalai kalkhawm an lo thathnem tho si avangin in lam ngaihtuah nen chuan Rammawia nen pawh zing lam dar 2 velah kan haw dun leh ta phawt kha a nia. Kawngtluan mai hian thlifim in min chhem haw heuh heuh reng a, boruak a uap deuh bawk nen a lehlam zawng chuan a nuam angreng phian. Mahse, kan in thlen hma chiah kawng kawi kan thlen phei lai hian tuemaw faifuk rat rat ri chu hriattur a rawn awm leh ta zeuh thin a, kopang chhak lam atanga rawn chhuak a ni nghe nghe. Chu lam chu hawi chho dun vatin. Keini pahnih pawh chu hrilhhai zet hian kan inmelh leh ralh thin a, a tihngaihna kan hre lo. A chhan chu, kopang chhak lamah hian hnim buk tawi te te leh thingkung sang lem lo tak tak hlir an ding fir fer a, mihring emaw khatiang thawm rawn siam thei tur thil hmuh tur kha a awm lo tlat a tin ni.

Faifuk ri a reh a, thildang chu hmuh tur awm hek lo, ngaihtha lo deuh chung chuan hmalam pan bawkin kan kal zui leh ta mawp mawp ringawt a. mahse, kan hnunglamah chuan zui tu nei ang tlata inhriatna ka nei leh ta tlat. Ka hawi let zuk zuk reng a, kan ke pen a tawp rual chiahin a thawm chu alo reh ve zel bawk si, min ti hlauthawng țan tlat. Chutah, Rammawia chuan ka kut chu rawn chelh nghet sauh sauhin

‘’ Kal chak ang’’ a rawn ti ta sup a. hnunglam pawh hawi let duh tawh lo chuan chak takin hmalam pan chuan kan kal dun ta sauh sauh zawk a ni. Hetihlai pawh hian kha ke pen thawm kha la awm ve rengin kan ke pen mil zel hian a lo pen ve a, a chang phei chuan a rawn tlan ta emaw tihtur hian a ri leh hlawk hlawk thin a, han en zui ila hmuh tur awm ngai bawk si lo nen, in chhung kan luh hnuah thawm chu a reh fel ve thei ta chauh a ni e. ka hlau mangang lutuk chu thaw hlawp hlawp chungin thutthlengsei chungah ka thu thla zui nghal hnawk a, Rammawia pawh khan kawngka te chu kalh tha leh te te in min rawn thutpui zui ta vat bawk.

‘’ Eng thil nge a nih I rin?’’ tia ka han zawh chuan melh pawh min rwn melh lo hian a hmazawn chu a lo en ding ngar ngar mai a, a thaw leh deuh hak thin. Nuam a ti bik lo hle tih chu chiang takin ka hria a ni.

‘’ Ka hre lo le, engmah a ni lovang. Kan hriatsual vel mai mai a nih ka ring’’ ti ve bawk mahse a mitmeng kha chuan dawt a sawi thei hauh lova, ka hlauh lutuk a hlauh vang mai mai a chutiang thu chu rawn sawi a ni tih pawh ka chiang. Ka zawt zui zel duh ta lo bawk.

Zan khua chuan inkuah rialin mu dun mah ila hemi zan hian ka thla chu a muang thei thlawt lova, ka muhil lawk thei lo nghe nghe bawk. Phone sana ka han en chuan zing lam dar 3 lai alo ni tawh bawk nen, muthilh tumin ka han in let zui deuh tap a, chutah, rei pawh ala ni lovang tihtur ah hian

‘’ Kalsan rawh!’’ rawn ti tuarh thawm chu hre lehin ka inbeng kang zui zawk thei a, ka thaw zui nghal hlawp hlawp bawk nen ka bul chiaha mu Rammawia pawh kha rang takin a rawn thu chhuak ve ta hlawl mai. Dimtea min rawn kuah pah hian

‘’ Eng thil nge ni ta. I mumang a tha lo emni?’’ a rawn tih chuan ka âwm dawm chunga thawk lak halh halh pah hian kei chuan

‘’ Au ri kha I hre ve miah lo tihna nge, ka hria alawm. A rapthlak lutuk’’ ka lo ti ve hlawk hlawk thung a. ani thung chuan eng au ri danglam mah a hriat loh thu chu rawn sawi ve in ka ngawi zui leh ta vang vang phawt. Au ri ka hriat lai khan ka lo muhil hman tihna emni ang? Muthilh tuma ka insiamrem chhung leh khatianga a rawn au chhuah vak hun kha hun rei a ni thei miah lo asin. Mak chu ka ti kher mai. Tichuan, thawh hun ala ni chiah lo bawk nen hreh tak chung chua ka mu tha ve leh mai a, hemi chin hi chu tibuaitu pawh awm lo in ka muhil zui ve leh thei ta a ni. 

A tukah chaun ka nu te damdawiin awm pawh kha tha takin an rawn chhuak ve thei tawh a, chhungkua chu kan kim leh ta. 

Damdawiin atanga ka nu te an rawn chhuah leh hnu atang hi chuan thilmak leh danglam tak takte pawh khan min kiansan ve ta nge chu ka hre lo, an reh zui hmiah a, keiin emaw, ka nu pawhin nise sawitur leh hmuh tur hi kan nei tawh ngai lo. Tichuan, Rammawia nen pawh khan la inkawp chho dun zelin kan inzuina te pawh alo rei ve tawh tho bawk nen inneih hial chu a rawt ve ta. Palai hmel duhawm tak pawh kan hmu zui bawk. Man leh mual te inhlanfelin dan khatna hmang ngei chuan pasal chu ka nei ve ta rup mai a! Ka hlim a ni. Chutiang bawkin ka pasal lo ni ta Rammawia leh kan chhungte ve ve pawh an hlim a, boruak muanawm tak hnuaiah chu inneihna hun lawmawm tak mai chu hman zawh niin, tunah chuan ka pasal kiangah ngei hun ka hmang ve thei dawn ta a, a tirah chuan awm dan tur ber pawh ka thiam chiah lo. Nula zei lo ve tak mai kha ka lo ni thin bawk nen, pasalte in chhungah chuan ka chesaul palh anga zahpuiawm takin ka awm palh ang tih mawlh kha ka hlauthawng a, ka che reng reng pawh ka fimkhur phah thei nasa. 

Kan inneih atanga chawlhkar khat liam hnu velah chuan aizawl lam a an chhungte tlawh turin kan bolero hmang chuan kan zin chhuak dun nghal a, phur tawh tak ka ni. 

Hetia aizawl lam pana kan kalna ah hian kawng chanve kan thlen atang buaina kan tawk chho tan a, a hmasa ber atan kawng reh lai kan tlan thlen hian motor hmalam chu ring angreng deuh hian a rawn ri pawp mai a, Rammawia nen pawh kan in melh zui kawk thei. Mahse, a reh leh tak mai si avang leh motor ah pawh buaina a awm chhunzawm lem loh avang chuan ding khawmuang duh lo in kan tlan lui ta zel a, chutah, thui pawh kan la tlan lo ang tihtur ah chuan a hma aia nasa mah khan motor hnunglam chu rawn ri zui leh pawpin, motor ngei ngei pawh chu a kang deuh zawk nimai hian ka hria a, kan ding zui nghal chawt bawk. Tlan luih zel chu tum sateh mah ila a theihloh hulhual. Kan motor chu a thi fel hmak mai a ni. Tichuan, motor chhung atanga chhuakin a hnung leh hma te chu kan han hawng kual chhin vel a, engmah dik lohna phei chu kan hmu lo. A tha vek. Tin, he bolero hi ala thar tha viau bawk a, hetia kan chhuah hma lawk pawh hian nilengin ka pasal in a en dik fel vek tawh nghe nghe a nih kha. A mak khawp mai. 

‘’ A nung thei tawh miah na nge’’ ka han tih chuan thawk lak halh pah hia min rawn melh zawk a. A bu zui deuh nghat ringawt. 

‘’ A siam thiam call tur zawng ila, hetia lo awm mawl tawp ai chuan tiraw. Motor veivak lah chu a vang nasa bawk sia’’ ti ve lehin, ani thung chuan

‘’ A chhiatna lai ber hmuh tur a awm si lova, a siam thiam pawh lo kal mahse tihngaihna vak an hriat bik ka ring lo’’ a ti leh tlat bawk si. A hrim hrimin hetia awm mawl tawp chu a dik lo tiin kan chanchin chu chhungte ho hrilh ve ka han tum a, mahse, network awm lo a ni zel mai a. Ava luhaithlak lehzel tak aw. 

Darkar chanve zet inbe mang lova kan awm nawk nawk hnuah pawh chuan motor tlan pakhat mah hmuh tur hi  a awm thei reng reng lo mai a, a rehin a reh duk. A khat tawk hian Rammawia thung chuan motor chu tih nun tumin a bei ve fo thin a, awmzia erwh a nei thei chuang lo. Mahse, darkar khat dawn lai mai chulai hmuna kan tan tawh hnuah chuan beidawn nan tiin motor bawk chu vawikhat dang tihnun a han tum leh chhin a, chutah chuan rin loh tak mai hian a rawn nung ve ta hlurh hlurh mai le. Ka thaw zui sawng sawng thei hial. Tichuan, khawmuang zui tawh lo in kan tum ram lam pana tlan zui nghal vang vangin kawng lakah pawh chawl mang lo chuan kan tlan ta par par ringawt a. Aizawl kan hnaih tawh tih ah hian khua pawh chu rawn thim ve țanin, mutchhuahna thlarau hian kei chu min rawn zem ta tlat mai. A chhuak lutuk kha a tawpah phei chuan insum hleithei tawh lo in ka lo muthlu ta nge nge a ni chek ang. Kan hmalam kawng thui leh ngil em em mai, motor light in a chhun phak chinah chuan thil engemaw hmuh ka va nei ta tlat pek a! Mihring niin hmeichhia a ni ngei tih pawh ka hre bawk. Kan motor tlanna lam rawn hawi chung chuan a ding tlawn reng a, kan pa chuan a su ngei dawn nia ka hriat avangin ka au chhuak zui nghek nghek bawk. Chu chu a takah pawh lo au chhuakin ka pasal chuan min lo ko mawlh mawlh  tawh mai a, ka ti hlauthawng hle tih ka hria. Mahse, ka inbengdai lawk thei lo zawk khan keimah hi min tibuai vek tawh.

‘’ Eng thilmah sut tur pawh a awm loh saw en ta che. I muhil emaw ka tia I mumang mai mai zawk nge’’ mangan hmel taka a rawn tih tak hluaiah chuan keipawh chu tlemin ka ziaawm ve ta deuh chauh a, ka thaw zui leh huai huai mai.

‘’ Hmeichhia kha I su dawn ta emaw ka tia’’ zawi sapa ka han tih chuan min rawn melh ve zawk chungin,

‘’ Tu hmeichhia mah helaiah hmuh tur an awm hleinem. I muthlu seka chuvang a nih dawn kha. Kan thleng tep aw’’ ti ve nghal zung zungin a speed chu a han tisang leh ta sauh bawk a, thlen vat vata hahchawlh vang vang chiah a ni ka duh tawh ni. Hlauthawng thlabar reng renga awm reng mai hi ka hne tawh zozai lutuk.

A tawp atawpah chuan Aizawl pawh chu thleng ve ta hramin, kan thlenna tur Rammawia chhungte pawh khan min lo dawngsawng tha hlawm em em a, kan bungraw neih ang ang te pawh chu kan khawih ve pawh phallo in min dah felsak nghal zung zung mai. Tichuan, zanriah te ei felin rei pawh kan țhu zui peih lo kan mutna tur kan pan aa, ka muhil zui chu a ni deuuh mai. Hemi zan hian eng thil danglam mah ka tawn zui awm ka hre lova, ka mu tui lutuk ringawt. A tuk zingah pawh dam taka tho in chumi ni chu lenkualna hun atan kan nupa chuan kan hmang dun a, aizawl thlen lohna chin alo rei ve tawh bawk nen nuam ka tizual hle a ni. Mahse, bazar kan thleng, a chhung kan luh leh lai hian buaina danglam engemaw tak mai ka nei leh ta tlat! Zion street chho ah hian hmel danglam tak hmu tlatin ka inhriaa, chung mihring insulpel suau suau karah chuan hmuh ka han nei a ni. Kan lam rawn hawiin a ding ngawi vang vang reng a, a sam kha a bawrchhawr in a thuamhnaw nise a bal khak bawk si nen, a lak atang khan ka mit chu ka lasawn thei ta meuh lo a ni ber e. A khat tawk hian ka han melh chho leh thin a, kan pa min biakna pawh chu chhan mai nachang hre lo in ka hawi zui ta veng veng mai a nih chu! Chutah, thil hrechhuak thutin zan hmasaa motor chhunga ka mut thluk lai ngeia ka hmuh hnu kha ka mitthlaah a rawn lang ta zut zut mai a, ka hrechhuak ta! Tuna min thlir reng tu khi nu ngei mai khi amah kha a ni tih hrechhuakin stepah chuan ka tlanchho zui ta buan buan mai. Ka pasal khan min lo ko zui vat tho mahse ka hawi let tawh lo hrim hrim. a kalbo hman mai kha ka hlau em a tin ni. Marawh chu, ka hlauh ang tak takin kha nu kha alo kalbo hman ta tho tho a, nichina alo dinna hmun nia ka hriat ah khan han ding zui ve in ka hawi ka hawi ta mai a nih chu. Khawiah chuan nge alo kalbo hman ang le ka ti. 

‘’ Hei eng nge khatia I tlan chhoh chiam a. eng thil nge I zawn’’ thaw hluam hluam chunga min rawn umzui tu ka pasalin a rawn tih chuan mangang zet hian amah chu ka lo melh ngar ngar ringwt a, kan bul vela kal ve midangte lah chuan mak tih hmel em em hian min rawn en leh hrek hrek thin bawk si. Mahs, tun dinhmunah tak hi chuan zah reng reng ka hre thei tawh lova, kha nula mawlh mai kha hmuh nawn leh ka chak em em zawk a ni. Engah nge hetiang hian ka hmuh theih tur chauh a a rawn inlar thin tihte hi zawh ka duh a, tu nge a nih hrim hrim tihte thleng pawh a zawh chhuah vek mai ka duh. Min en thla nge, thil engemaw tak min hrilh duh a nei zawk. Tun dinhmunah chuan ani tluka ka rilru tibuai tu hi an awm rih awm lo e. 

Chumi ni zet chu chawhma lama nuam ka tih ve tehreng nen khan chawhnu lamah erawh phurna leh tha thona reng reng hi ka nei tawh lo a tih theih a, engpawh tiin khawi hmunah pawh kal ve mah ila ka chau chhe zo hi a ni ber e. A nawmna ka pawh thei tawh lo. Mitthla ah lah chuan kha nula ringawt mai kha a cham reng tawh bawk si nen kan pa bulah pawh in lama haw mai chu ka rawt a thuai reng a, kan haw zui ta bawk a ni.

Kan thlenna hmun hi kan pa nutei te chhungkua niin, an chhungkua hi an rual ve angreng viau a, naupang ringawt pawh 5 vel lai awmin, a te nawi deuh hi pahnih chu an awm ve bawk. Engtiklai pawha ri laih laih tham chu awm ve reng thin mah ila kei chu ngaihthat lohna hlir mai hian min bawh buai reng bik a, eng thilmah hi nuam ka ti thei tawh lo. Thil hmuh sual ka hratin thawm mak tak tak hriat ka ching bawk si a, a nuam duh lo vel vek mai. 

Zan khat pawh khuma ka lo mut zal mai mai lai chuan kan room kawngkhar chu zawimuang hian a rawn inahwng ta țiah țiah mai a, hetihlai hian kan pa kha chu thutkhawmna lamah a chhungte ho nen titi in an la ri dar dar reng thung. Chutia pindan kawngka zawimuanga rawn inhawng lai ka lo melh ngar ngar lai chuan rin loh tak mai hian nula pakhat raipuar ni bawk si hi a rawn tei lut ta nawlh mai a le! Ka meng phawk ngha hra thei. He in chhungah hian raipuar an awm awm ka hre lova, chu chu sawi loh, hetiang tiat tiat nula pawh hi an la awm lo hrim hrim bawk. Chutah, a lu khuhna puan chu la thla in chiang zet hian min rawn en ta kuau mai  a, chutah chuan tu nge a nih tih chu ka hre nawn leh ta chiah mai. Kha nula ka lo hmuh tawh thin ngei mai kha alo ni a nih chu! A danglam lo. A hmel ka hmuh rual rual chuan khur zui nghal hlawk hlawkin ka mit te ka hup a, mahse, awmzia erawh chu ava nei chuang silo em. Ani chuan ka chhipsam chu dimtea rawn khawihin , aw zaidam leh vawt ru em em si hian,

‘’ Min tanpui thei ang tiraw. Nangin min puih loh chuan tanpui tu tur midang ka nei tawh lo a ni’’ a rawn ti ta a. ka khur chhe vek tawh nimai hian ka hria. Tin, min rawn khawihna kut kha a vawh em avangin ka lu vun zawng zawngte pawh chu an na chhuak nghal vek thei a, vawt tha tak a ni.

‘’ Min kalsan zawk rawh. Ka thei lo’’ ti mawlh mawlhin ka hmai chu ka la hup reng tho a, ka khur dar dar tawh bawk. Chutah, aw daglam leh khauh angreng tak mai hian

‘’ Min tanpui duh loh chuan I chungah leh I chhungte chungah pawh thil thalo zawk ka la thlen tir zel ang. In la tuar ve dawn a ni!’’ a rawn ti leh ta a nih chu! Eng buaina chiah nge he nula hian a neih ang ka hrethiam lo. Ani ka tanpui duh loh vang hian chhiatna ka chungah a thleng ang maw. Ani setana tirhkoh ka tanpui duh loh vang hian buaina ka tawk ang maw?

‘’ Min kalsan rawh. Tu nge inih a. Tu the hrep chu nge inih a. engvangin nge min umzui reng’’ ti zui hlawk hlawkin ka ban te chu ka vai kual ta buan buan mai a. hetih chhung zawng pawh hian ka mit chu meng ngam lo in ka chhing tlat reng tho. Nia, a hmel kha ka hmu nawn ngam tawh thlawt lo a ni ber e. mahse, chutia au tuarh tuarh chunga ka lo in vai buan buan lai chuan ka bul lawkah naupang tap thawm hriattur a rawn awm ta mai a! Ka meng zui nghal kawk thei. Khai! Nula raipuar thlarau kha ka ankhumin ka vai buai char char emaw k alo in ti ve a, ka nutei fanu te ber Nautei zawk a ni ka lo vai thluk reng tawh zawk chu ni! Chhuata thu sawp nuai chung hian kei chu tap chungin min lo en en chho ngar ngar reng a, chutah, amah kuah tuma ka han hnaih rual te chuan lo tawlh sawn dawr dawrin min hlau hle tih ka hre nghal bawk. Chutihrual chuan chhungte dang ho pawh kha roomah chuan rawn tlan lut ve in, thil awmzia min zawt zui nghal sap sap hlawm a, sawifiah ngaihna tak pawh ka lo hre lo zawk. Ka chi-ai zo vek tawh.

‘’ Naute, engah nge chhuatah hian I thut nuai a’’  tih paha Nutei’n pawm a tum lai chuan Nautei chuan kei chu tap hlarh hlarh chung hian min rawn kawk zui ta va va mai a, eng thumah chu sawi lo mahse amah vel tap tu ka ni tih chu chiang takin a hriat mai awm e. kan pa pawh khan min rawn thutchilh ve in zaidam tak hian thil awmzia te min zawt ve a, chhan ngaihna tak pawh ka la hre fumfe chuang lo.

‘’ Ih, kha nu kha alo kal leh emaw ka tia’’ ti ringawtin ka chhang a, ka tap zui nghal bawk nen, anni ho chuan min lo en deuh thap tawh mai. Chuveleh, ka pasal bawk chuan thil awmzia hrethiamin duat tak hian min rawn kuah ta thlawp mai a, a nutei te chu han melh kual leh te te in,

‘’ Min lo chhuahsan phawt ru, nakinah thil awmzia chu ka hrilhfiah hlawm dawn che u nia’’ a tih takah chuan an ni ho pawhin min chhuahsan ve ta diah diah hlawm a, hrehawm hi ka ti ru ngawih ngawih thei. An hmuh dan leh thil thleng thei niawm a lang ah chuan kei hian Nautei kha au khum tuarh tuarhin chhuatah ka vai thlu a nih hmel ta ber a, nutei te nupa lakah pawh chuan ka inthiam thei lo takzet. Rooma lo lut kha nula thlarau ni lo in Nautei zawk a ni tih chu hre lawk ngat ila chuan ni dang ang tho khan duat takin ka lo pawm anga, ka lo kuah leh tur a nia. Engkim hi ka tikhawlo zo vek a ni.

‘’ Helai hmunah hian ka awm duh tawh lo. Haw ka duh’’ ka pasal kuah paha ka han tih chuan dimte hian ka samah a rawn chul hliau hliau reng a. ka mittui te pwh chu inthiamlohna avangin an la luang ngiah ngaih reng lehnghal.

Ka nutei te chhungkua in thil awmzia an hriat hnuah pawh chuan nuam ka ti lui thei tawh thlawt lova, aizawlah chuan rei pawh cham zui tawh lo in kan haw dun leh ta nge nge a nih kha. Khua kan thlen hnuah pawh eng thilmah hi nuam ti tak leh phur takin ka ngaihtuah hleithei tawh der lova, ka ning ngawih ngawih ringawt mai a ni. Mahse, Pathian tanpuina azarah thla te hial a lo vei a, keipawh chuan vanneihthlak takin nau ka pai ve thei ta hlauh mai. Kan nupa chuan kan hlim em em a, kan chhungte ve ve pawh chu hrilhin anni pawhin min lawmpui ve khawp mai. A khat tawk hian ka pasal lah chuan

‘’ I hetih dawn vang lek hi a ni lo maw thilmak tak tak kha ilo hmuh thin ni’’ te hi min ti leh ngawt thin a, chhang let lem lo mah ila kei chuan ka ring chiah lo thung. Ka thil hmuh sual leh thawm hriat zozaite nen khan ka naupai hian inzawmna an neih theih ka ring lo. A awihawm loh lutuk zawk. 

Um, engpawh chu nise, tunah chuan nu nih hmabak ka lo ni ve ta a, ka pum chhunga awm mek ka naute tan hian a tha ber ngaihtuahin ka taksa ka tih chak a ngai tih pawh ka hria. Chuvangin thil reng reng hi a chhe zawng ringawta thlir a hun tawh lo a, kan hma hun eng tak tur te pwh hi tihchhiat mai a hlauhawm ta riau. Ka in dim dawi deuh chu a ngai tawh dawn a ni. Tichuan, kan pa thu min rawn angin zanah hma tak takah muthilh luih ka tum ta thin a, a tirah chuan harsa hle mahse hun a liam a, ka thei ve mai. Zingah pawh hma tak takah tho lehin taksa sawizawi nan zing tin kawngpui dungah te chuan muangchang hian ka kal ve bek bek thin a, naupai tan mut tam a tha an tih angin chhunah pawh reilote tal chu mut ngei ngei ka duh thin bawk. Chutianga thla khat chhung nitin zantin ka han tih takah chuan ka taksa pawhin alo duh phian tih ka hrethiam a, keimah tak pawh hi ka zangkhai phah huai huai nimaiin ka hria.

Tuk khat pawh exer la tur chuan kawngpui dung reh takah mahni chauhin ka lo kal leh bek bek tawh a, chutia hmalam hun ngaihtuah paha ka lo pen chhet chhet lai chuan hnunglamah thawm hria in ka lehhawi zui vat. Mahse, engthilmah chu ka hmu lo thung. Ka hmalam pan bawk chu pan chhunzawm lehin a ruk tak chuan ka hmanhmawh tawh angreng hle a, ka duh dan ang takin ka kal chak thei chuang bawk silo. Thinphu dut dut chung hian hmalam chu ka pan ve zel a, chutah, tuemaw hian ka kal tha hle hle lai chu hnunglam atanga min rawn su thawi thuakin lei charah chuan ka thu sawp zui nghal nuai mai, ka hawi zui vut vut bawk. Mahse, min rawn su tu awm reng reng eng thilmah ka hmu ta lova, an awm bawk hek lo. Tichuan, ka theih anga ranga inbeng kangin hlauthawng thaw hlawp hlawp chung chuan ka hmalam ah bawk ka kal leh ta zawk a, eng nge a nih pawh ka hriat loh min rawn su thlu tu ngei mai khan ka ke chu min phehsak lehin kan in panna step chhuk thla ah chuan tum lawk pawh awm hauh lo hian ka han lum thla zui ta tak tak mai a nih kha! Step tawp ka thlen thlak lai hi ka hre lova, pangngai taka ka harh leh meuh chuan damdawiin khumah ka lo mu fel der tawh zawk. Ka mit ka men rual rualin ka bulhnaia lo awm ka pasal kut chu ka va vuan zui chat bawk a, ani pawh kha alo phu deuh zawk nimai hian ka hria.

‘’ Eng thil nge ka chungah thleng’’ tia ka han zawh chuan ka mitah pawh min en ngam lo in hnuailam zawk a melh daih a, min tihrilhhai angreng hle mai.

‘’ Sawi rawh Rammawi, eng nge ka chungah hian thleng a. Engvangin nge hetah hian ka mut’’ ka tih nawn leh tak nghekah chuan zawimuanga rawn hawi chhuak ve in, tim dui chung hian ka mitah pawh min rawn melh ngam ve ta hram e.

‘’ ka tihpalh takzet a ni. I lumna lamah khan I taksa I sawh khawlo nasa lutuk a, kan naute chuan a nunna a hloh phah ta a ni e! A dam chhuak zo ve ta lo!’’ a rawn ti chuai zui raih mai a. ka nghilh zui dup thei. Chu damdwiin leh a chhehvel boruak  te pawh chu an reh zui nghal duk nimai hian ka hria e. mittui tla zawih zawih chungin amah bawk chu ka han melh leh kar phawt a,

‘’ A theih loh. Heng ah hian ka thiam loh eng thilmah a awm lo. Amah vek kha a ni. Ama thil tih vek kha a ni’’ ti hlawk hlawkin ka insehruh a, ka inhumruh bawk a, ka thinrim lutuk chu ka khur zui hlawk hlawk thei hial.

‘’ Tu amah maw? ‘’ tia kan pa in min rawn zawh let hnu chuan ka hmalam melhin ka lo la inhumruh ve ngar ngar bawk a. 

‘’ Nula! Ka hmuh fo thin nula kha mawle. Tanpui turin min ngen a, ka duh lova, ka chungah tihian phuba chu a rawn la ta a nih dawn hi. Ka naute kha ka va han lainat tak em’’ ti chung chuan ka tap chhuak zui leh hawk hawka, ka pasal pawh chuan min rawn kuah ve ta vat. Ka sama rawn chul hliau hliau chung hian zaidam takin,

‘’ Pawi ti suh. Kan dam anga naute hmeltha tak dang kan la nei ve leh em em ang. Min tanpui turin Pathian a awm reng alawm’’ chutiang chuan a theihtawp a min hnem tum ve mahse ka lawm zo tawh hlawllo thung a, ka pum chhunga awm reng thin ka naute kha ka duh a ni.

Damdawiinah chuan rei pawh awm zui lo in ni 2 hnuah kan chhuak ve thei ta mai a. ka taksa te chu la derdep angreng viau mahse rinai takin ka tha chak angreng phian tho. In kan thlen rual rualin roomah ka tlan lut vat a, thingthi hnawk chung hian Pathian chu ka au zui nghal lawm lawm bawk. A tanpuina hi ka mamawh takzet zet a ni e. Tun dinhmunah hian a tello chuan kei hi engmah lo mai ka ni a, van chung sanga awm reng thin Pathian khian min tanpui ve se ka duh a ni. A thlamuanna hi mamawh ngawih ngawih.

Ka mu tui lai chu ka pasal phone ri chuan min ti harhin sana ka bih zui vata, zanlai dar 12 alo pel ve awrh tawh awm e. Tun ang hunah tuin nge lo call ang tih ngaihtuah paha ka mit ka lo nuai chat chat lai chuan kan pa chuan hmanhmawh tih hriat fe hian kei chu min rawn sawi zui ta nawk nawk mai a, ka thu chhuak zui vat thei.

‘’ Eng nge? Eng nge a?’’ meng siar siar chunga ka han tih chuan phawk fe hian min rawn melh ta ngar ngar mai a, phone ah khan tu tak chu bia ang maw ka ti hial.

Chutah, hlauhthawn avang aw khur dur dur chung hian

‘’ I nu! I nu a thi nih chu!! ‘’ ka hawi buai zui nghal vek. Amah chu ka melh zui tlawk tlawk reng a, fiamthu mai mai a rawn thawh ni turah ngaiin za lemlo zet te chuan ka han nuih leh sak bawk.

‘’ Rammawi, tun hi fiamthu thawhna hun pawh a ni chiah emni? Ka nuih a za miahlo a nia’’ lo ti khur dar darin, amah bawk chuan a thuamhnaw te chu inbel that mawlh mawlh pah hian

‘’ Fiamthu a ni lo. Tunah khan I pa nen kan inbe zo chiah. Tho la, iva phei vat zawk the ang’’  a hmel leh khawsak dan phung chu ka han belchiang a, he pa hian dawt min hrilh chu ka ring si lo. Mahse, ka nu chu engvang ngawtin nge a thih ang. A damloh thawm pawh kan hre lova, buaina dang lo nei ta pawhnise kei hian ka hre hmasa ber tur niin ka hre bawk. Ka pasal thusawi chu ka awih chiah em tih pawh inhre lo in khur hlawk hlawk chung chuan khum atang ka chhuk thla ve sawk sawk a, chapal bun tur ringawt pawh chu thil harsa tak a ni tawh. Ka taksa te hi an khur chhuak vek tawh a, thudik hriat chakna chuan min tuam rualin hriat chu ka hlau ru zek zek tho bawk si. Engtia tihtur nge, engti ang chiaha awm tur nge ka hrethiam thei lo. 

Ka pa te in kan va thlen chuan phat rual loh hian thil thleng engemaw tak chu a awm tih a hriat theih ta mai a, a kawt velah leh in chhungah te chuan veng chhung mipui ho chu an lo zi nuai nuai mai bawk nen motor tang ka tlan chhuak vat a, in chhungah tlan lut lehin, chutah chuan nunna nei tawh lo tih hriat taka an lo mut, khum chunga mu ngawi reng ka nu ngei mai chu hmuin, khur dar dar chung hian ka pan phei nghal a, ka mittui pawh a tla hleithei tawh lo, chhungrilah chuan rum vawng vawng mah ila, ka mittui hi a hul tlat. Ka na em a ni.

‘’ Nu, ka duh thei lo’’ ti chhuak hlutin ruang chu ka kuah zui ta thlawp a. hetihlai pawh hian ka mittui chu tla miah lo mahse chhungrilah erawh chuan ka tap vawng vawng reng a, na hi ka ti lutuk. Damdawiin atanga kan chhuah ni te khan ka bulah lo kalin, awmpui ka mamawh leh mamawh loh kha min rawn zawt a, kei chuan in lamah an buai thin zia lo hria in ka hnar haw leh ta mai a nih kha. Aw, khami ni te khan min awmpui I duhna kha lo pawm ta hle hle zawk ila chuan hetiang thil hi a thleng lo tur asin. Ni e, ka nu hi natna vanga boral aa ni lova, ka pa in ka pasal a rawn hrilh danah chuan a zan muhil tha hle hle lai kha tho chhuak thutin tukverh a hawng zui rawk rawk a, kawmthlang lamah a zuang thla ta mai a ni awm e. A zuan thlakna hi sang hran lo mahse a tlakna lamah a lu chu lung chang tak pakhatah hian a zu sawh fuh hlauh mai a, chu ber chuan a nunna pawh a tihtawpsak a tihtheih ang. Ka ngaihtuah chian pauh leh ka na a, hetiang the nuai kan ni bik hian ka thin a tirim thar leh hle bawk. Ka fa ka chan tawh a, tunah tihian ka nu. Ni lo, kha nu thiltih vek te kha an ni thei a ngem? Heng ka chunga thil thleng mek te hi kha nu phuba lakna leh min thungrulhna kha an ni thei a ngem. Chu thil ka han ngaihtuah chhuak chiah mai chu ka harh zui sawt sawt ni ber hian ka hria, ka nu ruang pawh kil tha hleithei lo chuan ka tho chhuak zui vut mai a, ka pasal erawh kha chuan min lo chelh zui vat thung. Mahse, chung thil zawng zawng te pawh chu pawi sa zo tawh lo in ka pasal min vawnna kut pawh chu ka thing thla nghal hmiah a, pawnah ka tlanchhuak zui ta bawk.

“Hey, rawn inlan rawh khawnge I awm? Rawn chhuak the’’ ti tuarh tuarhin pawnah chuan ka tlan kual ta thuak thuak mai a, mite chuan min en duhin ka pasal ngei ngei pawh chuan min man bet chu rawn tum mahse a thei lo. Ka tlan kual puat puat reng a, tumah chu ka hmaizah zo tawh lo reng reng.

‘’ Rawn chhuak rawh. I duh chu sawi ang che. Ka naute min tih hlumsak pawh kha duhtawk lo in tihian ka nu chungah lehzel pawh Ila țuan duh a maw? I tenawmin I rilru a chhe hle mai’’ ti tuarh tuarhin van lam te chu ka hawi chho a, kha thlarau sual leh chimawm zet mai kha hmuh tumin ka zawng chu a ni ber.

‘’ Eng thil nge itih tak hi. A zialo lutuk lo kal rawh’’ tih paha ka pasalin min vawn a tumna te chu na zeta lo phihthla in inhnuai lamah ka tlan thla leh ta a. chutah em chuan a tute mahin min rawn umzui ta lo thung.

Tunhmaa ka nu in hmeichhia niawm tak alo hmuh tawh thinna inhnuai leh thingzai remkhawmna bawr vel te chu hel kual thuak thuakin hmuh theih loh thlarau bawk kha ka au leh thin a, mahse, a reh zui hmiah mai bawk si. Beidawng zeta tap pur chung hian ka dinna hmunah chuan ka thu zui ta hnawk mai a, ka beidawng takmeuh meuh a ni. Chutia tap khur zawih zawih chunga ka lo thut tlawk tlawk lai chuan kilkhat atanga thawm rawn ri leh rek rek thin chu ka hre ta a. ka hawi chhuak nghal vat. Thwm chu a reh zui mai theih loh avangin tha khur dur dur chung hian ka tho chhuak ta țiah țiah a, alo chhuahna thingzai remkhawm kil lampang ka va en nak chuan thil hmuh ka nei leh ta! Ka ding khawng nghal awt thei bawk.

Hmeichhe bal leh sam pawr em em, kawrfual thler țawp hnik hnek ha bawk si hi thingzai inremna kil lamah chuan a tawm thei ang ber a lo thu in min lo melh kiau mai a, a tap pah niin ka hre nghe nghe bawk.

‘’ Hetah hian eng nge itih?’’ aw khur dar dar chunga ka han tih chuan la insut faih faih chung hian a hmazawn chu a melh ta daih thung a. chutah, tawngkaa min chhang tawh lo in zawimuang hian a rawn tho chhuak ta riai riai a, um, naupai lai a nih ngei hi. Tin, amah, kha nula thlarau ngei kha a ni tih ka chiang ta bawk. 

‘’ Eng, eng thil nge maw I hriat le, engvangin nge ka hmuh theih tur hian I rawn inlan fo min hrilh rawh’’ thinrim khur hlak hlak chunga ka han tih leh chuan rum zetin min lo melh ve reng tawh a, chumi hnuah thudang pawh sawi ve lo hian kei chu min nuih zui ta uarh uarh mai a nih kha! Ka beng te chu ka hup hram hram a, ka mit nise ka chhing tlat bawk a, chuti chung pawh chuan a nui ri rapthlak zet chu chiang takin ka bengah hian ala rawn ri phak tho.

‘’ Duhtawk tawh rawh’’ vin zeta ka tih leh hnu chuan thawm chu reh zui ve maiin, a mitmeng rapawm fe khan min la rawn melh ve ngar ngar thung.

‘’Ka pum hi I hmu em? Chatuana piang chhuak ve lo tur a nih hi. A chhan I hria em. Ila hria ang’’ rawn ti țeng chhuaiin ka khur zui leh hlwk hlawk twh .

‘’ ih, I rai laiin I boral tihna emni’’ ka han tih chuan rum mangkheng hian min lo la melh ve char char a, ka en rei thei lo, ka thau ah hian min man a , ka hlau a ni.

‘’ Ka boral a ni satliah lo, ka naupai lai chawpa tihhlum ka ni! ‘’ a rawn ti leh ta a nih chu!

‘’ Tuin nge that che’’ kalo tih chuan keimah atang a mit chu a lasawn ta thuai a, in chung lam chu a melh ta leh ta veng veng. Hlau hle mah ila a thusawi tur ngaihthlaka hriat chian ka duh em avangin ka la dawh ve hram hram a ngai a, hlau lutuk anga ka lan hi a rem lo bawk. A thih chhan diktak, amah tanpui tura min duh em em chhan thil te kha tun hunah ngei hian ka hriat chhuah ve an ngai takzet tawh a ni.

Inhnuai atang chuan zawi zetin ka chho leh ta hnak hnak mai a, kan pa leh midangte pawh chuan ka awm chu rawn ngaihvenin min bawr zui nghal laih laih mai. Ka pa hmel ka hmuh rualin thingpuina lama an thutthlengsei dah ah chuan ka thu thla zui hnawk a, zawi sap hian,

‘’ Pa, police call rawh’’ ka ti nghal zat. Chuveleh, ka thusawi hre phal chunglaia awm ho chu phu zui nghal suau in an phun zui ta sap sap hlawm bawk a. ka pa phei kha chuan a ngaihna hrelo zet hian min rawn thutchilh nghal vat. Tichuan, ka thu chu awihin ka pa pawh chuan thil awmze hre miah lo hian police te chu a call ta ngei a, an ni ho pawh chu rei lutuk loah an rawn thleng chhunzawm ve mai bawk. Police hmel rawn lan rualin kei chu ka tho chhuak nghal vat a, inspector bulah chuan kal nghalin, 

‘’ Ani saw in man thei ang ka pu’’ tih pah hian ka pasal Rammawia ngei mai chu ka han kawk ta va va mai a le! Mak tiin an phu zui suau a ni ber. Hrilhhai zet in ka pasal chu ka bulah a rawn tlan phei nghal vat a, ka kutah chuan rawn hmer zui vang vangin, a thaw leh halh.

‘’ eng thil nge I sawi tak. Eng nge tihsual ka neih’’ mangang tih hriat em ema min en chunga a rawn tih chuan keipawhin chiang tak hian a hmel chu ka lo en ve a, mittui tih tlak loh hram chu ka tum bawk. 

‘’ I thiltih kha I hrelo maw? En ta che, nangmah vangin naute kan chan a, tunah nangmah vang bawkin ka nu ka chan leh a, heng zawng zawng thlen chhan hi I hre miahlo tak tak a maw!?’’ ka tawng chu a ring lem lo na in, in chhung lamah khan zai ri hriattur a awm lo bawk nen a fiah tha hle thung.

‘’ Bawihi, min lo ngaithla the. Heng vanduaina lo thleng zawng zawng hi chu Pathian ruat dan zawk vek asin. Keiin eng thilmah ka tisual lo tak tak’’ a tih leh pawh chuan a kut chu ka paihthlaksak nawk a, vin zet maiin,

‘’ Aw, tunah chuan tisual lo e. mahse, tualthattu I ni sia lawm!’’ ka ti zui ta nghek mai a, ka pa khan min rawn kuah bet zui vat mai. Kei erawh chaun ka la duhtawk teuhlo thung a.

‘’ Thup bo tuma ilo up beh char char I tualhthahna khan vawiin ni hian min rawn vaw let a, kan lo heti zo ta a nih hi hre ta che. I hria tiraw. Heng thil thleng zozaite hi nangmah vang a ni tih I hre vek tiraw? Tenawmpa, aizawla computer dawr I neih lai khan ngaihzawng I nei thin a, in induhin in inzui nasa ve thei hle bawk. Mahse, I hmangaih ngai lo thung. Chuan, kum chanve dawn lai in inkawp tawh hnuah I bialnu chuan I fa ngei a pai ta a, mahse, nang hian nei duh loin I bum kual ta char char phwt a, amah chu nei hram tura a ngen lawm lawm che pawh khan I hnawl zel a, a tawpah phei chuan a nunna hial tihtawpsakin I rekhlum ta hial a ni lawm ni kha? Mi tenawm tualthattu diktak chu I nih hi. Ihmaw, I hmel hmuh reng pawh hi ka peih tawh lo, kalbo la lo kir tawh suh ang che. Vanduaina min thlen tu, mi nunrawng’’ ti bawrh bawrhin amah chu chil te hial ka chhak zui ta țhat țhat bawk a. ani erawh chu alo la ngawi reng thung. A mittui tling puau te pawh kha hmu ve reng mah ila, ka khawngaihna ka tihlan hi a rem tawh lova, a phu tawk hremna chu hmu ngei se ka duh tawh zawk. Amah vanga ka tawrhna zozaite hi an nep bik lo chiang em asin.

‘’ Pu Rammawi, station lamah sawi zauna hun kan hmang dawn emni ang’’ inspector pa in a rawn tih ve lai chuan mittui nen in chhung lamah ka tlan luhsan ta dawr dawr a, khuma la mu reng ka nu chu kuahin ka va tap chhunzawm ta hawk hawk zawk a nih kha.

Tunah chuan ka neihchhun te ka chan zo ta chu a ni ber a. ka vanduaina bul lo intanna leh pawi khawihtu lian ber chu man in a kut phuarsak ni tawh mahse kei hi ka hlim ve thei chuang si lo. Ka nuna mi hlu ber ber te ka chan a, hmuh let tur awm tawh lo in an kalbo ta vang vang mai chu a ni si a. A na a, tawrhthiam a har a, a ka tliak a ni.

Lalrammawia pawh khan a thil tihsual te chu puangin zep nei hauh lo hian a inpuang fai ta vek a. tin, ka thil hriat ka sawi chhuah ang ang te pawh kha dik lo pakhatmah a awm lo tih chu an nem nghet ta bawk. Tichuan, Rammawia, khang hun leh chena ka pasal lo ni tawh thin leh ka hmangaih em em thin khan a tualthahna man chu hmu turin tunah chuan central jail lamah min liam thlaksan ta bawk a, tunah chuan min hringtu ka pa tih loh chu neih dang reng reng nei tawh lo in hringnun ka hmachhawn chho leh dawn ta a nih hmel e. Harsa dawn hle mahse ka ti thei ang tih ka hria. Pathian nung neitu ka nih chhung chuan ka ti thei em em ang ka tih ring.

*************************************************************************************

Leave a Reply