You are currently viewing BEST FRIEND-7 & 8

BEST FRIEND-7 & 8

Spread the love

BEST FRIEND-7

(Veronica’s pov)

Eng nga ti nge ka khawvel hi hetiang hian a awm ziah bik le? Engkim hmachhawn thei turin ka in ngai a, ka dam vek tawh ka ti a chuan ka nun a danglam vek bawk a mahse kum4 hnuah pawh ka thinlung hi ala khawi che tho chu anih hi.

Ka hnena lo let turin ka ti lova, inngaihzawn leh ka ngaihtuah pawh a ni chuang hauh lo, ka hmangaih hmasa ber a ni a,midang ka la tawn leh loh vang leh ka thinlung luah khat tu ka la neih leh loh vang a ni mahna.

‘Thinlung luahkhat tu midang’ tih thumal chuan benchawrh ang maiin min ti harh zawk ni maiin ka hria. Kei hi mipa dang vangin Vanlalruata hmaah tikhan ka awm leh ta chu ania. Eng nga ti nge mipa dang tam tak ten min star a, hmelṭha, chhelo tia min duh em em laia Vanlaruata hian hetiang zawnga min en ve duh miah loh?

Ani nen hian inngaizawng ta ila Lalramliana hi ka thinlung aṭang hian ka paih chhuak thei mai angem le? Nilo Ani paih chhuah ka duh vang ringawtin Maruata hi ka ngaizawng thei lo. Ka ngaihtuahna buai zet chu duh lovin ka inthing nawk nawk a, Vanlalruatan min ngaizawng ta pawh a nilo, Ṭhian ang bak in min en lo. Ka duh vang ringawt hian min duh ve ta tihna pawh a nilo a, ka bialpa la a ni thei ngai dawnlo.

Ka duh vangin ka vei ngut ngut pawh a nilo, kan inkawm tam a, ka bula awm reng chu hmeichhe dang te hmuh ang Amahah hian ka hmu satliah ve a ni mai. Ani nena inngaihzawnna lam hi chu ngaihtuah pawh ka ngaihtuah tur a nilo. Vawiinah Lalramliana vangin ka na a, tunah Vanlalruata ngaihzawn maw ka ngaihtuah leh daih, hmeichhe nikhua lo tak ka ni. Ngaihtuahna mumal pawh ka neilo. Ka nunhlui vangin ka nun thara ka ṭhianpa tan hian natna ka thlen theilo, chu thil chu engtikah mah ka thlen tir hauh lovang.

Naktuk aṭangin Lalramliana hi ka theihngilh ang chuan Maruata pawh hman aṭanga kan nih dan ang chiah in Ṭhian ang chiah in ka en leh tur a ni. Ka ṭap tur a nilo, ka ṭap miah tur a nilo. Tlai lama ka chet dan ṭul lo zet kha ka ngaihtuah let a, bike ka chuan ngamloh ṭhin laia Ke ngata school kan kal duh ṭhin lai te ka ngaihtuah a, A hriat chin zawng zawngah khan bike ka chhuang ngailo kha a ni a. Lalramliana hian Bike ka chhuang alo hmu anih pawh in ka khalh erawh a beisei ngaiin ka ring lo. Ka khalh a hmuh meuh chuan a meng phawk hru alawm. Sarah-i pawh saw a meng kual kawi nasat kha mawle. Ngeiawm zetin ka nuih kher anih kha. A hnunga mi khi chuan a haw ringawt mai thei mahse ka mitmeng, ka awmdan leh ka nui engkim hi Lalramliana erawh chuan a hrethiam khawp ang. Awm nuam chuan a muhil bikin ka ringlo.

Ka bike chuan thiam loh avanga min nuih fo te ka ngaihtuah chhuak a, kan inngaihzawn hnu te khan min hauh phah fo anih kha. Mahse min hrechiang a, min tilui ngailo, chuan min hauh pawn ngaihdam min dil leh fo ṭhin bawk. Engtin nge hmeichhe zawiawi tak ni ṭhin kha hetiang taka ka harh tak pawh hi ka hrelo. Volleyball ka beng ve ang tih pawh ka rin phak loh, volleyball player tia sawi tur ka ni ve ta reng mai te, motor ka khalh in bike hial ka chuangin ka khal ve ang tih te, ṭhian tam tak ka nei ve ang tih te thleng hian ngaihtuah pawh ka ngaihtuah pha ngailo kha ania.

Mahse tunah zawng tih theih loh pawh ka nei in ka in hre tawh lo, Dan bawhchhe ngai lovin, Bawhchhiat turin a lawm Dan an siam tih ṭawngkam hial te ka hmang ve ta chu ania. Ka nunhlui leh ka tun hun ka khaikhin a, keimah in ka nui vur vur ringawt. Ka ngaihtuahna kal kual velah chuan Maruata ah a tawp a, kan haw khan a damlo nih kha, ka be ta miah lo a, a bike ka hawn sak daih lehnghal, ka haw dawn khan eng nge a sawi kha, “Ka naute kha lo duat rawh aw….” a ti vel anih kha maw. Ka sawp chhiat sak vek zawk dawn a mi le. Ni leh lo ka bike duh ber a lei ve em em a, naktuk zingah silfai sak hliau ila a ṭha ang.

Zan a tlai tawh viau na in ka be tho ang, naktukah College-ah closing function kan hmang dawn a, chuan tlailamah ruai kanṭheh dawn bawk a, a nuam khawp in nia ka rin. Maruata ka call a, pick up har phian lehnghal. “Hello…” a aw chu a muhil ka ti harh a maw ni le?
“Eng nge i an?”thildang sawi kual vak ka thiamlo.
“Ka ṭha,ka chau mai mai lawm. Nang eng nge i an?” A tih chuan mahni inthiamlohna in ka khat nghal, engvangin nge A hmuh lai kher khan tiang khan ka awm leh le.
“Keipawh ka ṭha, min ngaihtuah suh.” ka inthlahrung tak tak,
“Ok. I ṭhat chuan a lawmawm,muttui…” tiin Phone a dah nghal daih. Eng nge awmzia? Ka ngaihtuah avangin ka call ve em em a. Phone ala dah daih zui. “Ngeiawm lutuk misual em em pa.” tiin ka phun nghal nang nang a. Ka message tone a ri a ka en chuan maruata message a ni..
“Misual ka nilo, muhil rawh a tlai tawh” tih zawng a rawn thawn. Ka ṭawng a hretheilo tih ka chiang, mahse ka awmdan tur a hrechiang hle si chuan ka nuih a ti za zawk hial.

Zing hma takah ka tho a, ka inbual a. Ni thar hlimawm tak a ni ngei ang, vawiin aṭang chuan rilru mumal lo zetin ka awm tawh lovang, chuthil chu ka inhrilh nawn mawlh mawlh a. Chuan tumah in ka thinlung hi an control tawh tur a nilo. Ka insiam sawk sawk a,cotton jeans dum leh college T-shirt var ṭha zet chu ka ha a, vawiin chu converse aiah sneaker var ka bun thung. Helmet la inhnuai lamah ka chhuk thla nghal a, ka nu chiah ala tho.

“Mami khawiah nge tun ang zingkarah i kal dawn?”a tih chuan ka ding a, Chaw eina dawhkan bul ṭhutthlengah chuan ka ṭhu khawmuang leh rih a.

“Nu..” ka tih chuan, min melh zawkin, “Hluai zel a che,eng nge itih dawn ka tih chu?” alo ti nghal a,
“Nizan khan Maruata a dam lova ka kal dawn.” ka tih chuan, a ngaihtuah leh mai mai ang chu.
“Ni tak, engmah pawh kha kan zawt hman lo che a, a eng nge na a?” A tih chuan sawi mai tur ka hre biklo,a eng nge na pawh ka hre chiah lo.
“A chau deuh aniang, ka nuamlo a ti ringawt a.” ka ti ṭha ve mai bawk a, “Anih chuan thingpui tal hi in la kal rawh, ka makpa tur chu duat viau ang che aw.” a tih chuan ka ner nghal sak a. Min fiam ve dan ania ka ngai haw lem lo.
“Thingpui chu nuhmingtei(maruatanu) siam a tui zawk.” tiin ka tlan chhuak nghal, a ngei leh ang chu. Ei tur hi siam thiam a inti ve sia, ka sawisel sak vak vak zel a, a haw thei viau mahse he khawvel ram zauvah hian ka nu siam aia tui ka la ei chuang hauh lo.

Bike zawn ka thleng a, Vanlalruata Bullet hi ava han nalh chiang em! Ka bike ni zawk se ka ti. Nizan kha chuan ka silfai sak ang ka ti a, mahse Hepa hi chuan a dah bal ngailo hrim hrim a sil pawh a ngaih loh hi. ka hru ve thuak tho.

An in ka thleng a, kawngkhar an hawng tawh e, fuh lutuk. Door bell hmeh hran a ngai lo ka lut nghal a, Maruata nu leh pate an tho tawh, dar 6:30a.m chiah a la nia. a nuam lo anih chuan Vanlalruata chu ala tho lo hrim hrim ang.

Sitting room lamah ka lut a, Nuhmingtei leh Pa Sawma(maruata pa) te an lo ṭhu a. “Nu.” an lo hawi nghal, “E Bawihi ilo kal elo, i va zing ve?” Nui sangin a ti a, nuhmingtei hmel hmuh hi chu a nuam ve ngawt mai, Pa Sawma erawh a ṭawng tam ngailo, Vanlalruata nen hian an in ang fuh tawp a ni mai. “Nia,naute damlo ka lo kan a,”ka tih chuan a nui hak hak a, Pa Sawma pawh a khi ve suk. “A damlo tih pawh kan hre hleinem,a ngawi ngul zel bawk si a,” a tih chuan Pa Sawma melhin ka nui nghal var var a.
“A damlo tak tak pawh a nilo ang,inla no kual leh vel anih ka ring.”ka tih chuan an nupa in an nuih a za ngang aniang an nui leh nasa viau tawh.
“Midang awm loh lai hian rel ziah suh.” ka hnunglam aṭanga rawn ti tu chu ka en nghal vat a, tho ve chiah a ni maw. A mit ala sen rum zui, a kawng a dawm a boxer ha in tawnzau a ha leh tawp bawk a, A tawnzau hnuaia a taksa nalh zet ka mit thla nghal, a taksa a uluk zia hrechiang tu ka ni a, mipa tam tak neih chak Six pack a nei bawk. Ka ngaihtuahna ṭullo zet avang chuan ka lu ka thing nawk nawk a,ka thaw chhuak hak bawk.

“I dam tawh a mi?” Ka ti nghal hluai, min chhang lovin ka hriat phak lohvin a phun sup a, choka ah a lut nghal daih, Nuhmingtei chu en in, ka ril a ṭam thu ka sawi a choka ka pan ve nghal daih.

Maruata thingpui thli mek chu no la ve nghal in, “min thlit kep” ka ti a,min melh rum vak in a kalsawn daih nia mawle. Hepa hian eng nge a hriat a, a mood a va chhe ve. Hmeichhe period tur ang mai. Ka ngaihtuahna avang chuan ka nui ri hak lehnghal a. Dawhkanah a no dah in a ṭhu thla dawt a, eng chuan nge a mood ti chhe em em a, nge ni a a damlo tak tak zawk? Ka thingpui no chawiin a hma zawna ṭhutnaah chuan ka ṭhu ve a, melh takngial pawh min melh duh lo.

“I damlo tak tak a mi a?” Ka tih chuan min melh zawk a,a hawisawn lehnghal daih.

“Ka biak che chu Par-a” Min chhang duh loh hi ka haw lutuk,

“Khatin min ko tawh suh.” a ti deuh hmuk a.

“Nge min chhan duh loh vel.”tiin ka ner khum vak.

“Ka dam. I lawm em?” A va han sual thiam tak e aw, ka ngaihtuah avangin zing hma tawkah ka kal ve em em a, Ani mood fuh lo mai mai avanga hetianga min tih.

“A ṭhat chu a, Pangpar chuai lam hmel i pu tlat, hming pu zo lo lutuk mai” ka ti deuh hlak a, a ṭhutna aṭangin a rawn tho kang nghal, a tih tum ka chian em avangin ka tho ve nghal vat a, kan in um kual nghal chiam a, Kei la ka rak chel chul bawk.

“Nu, Par-a hi.” tiin ka nui lui uar uar a, a thin a rim zual sauh. Lei chhuah khum in “blehhhh” ka la ti vak zui. Dawhkan chungah a lawn ta mai tlanchhiatna tur ka hre tawh lo, Nuhmingtei alo lut ve chuan alo hau kei a hnungah ka biru ve thung. Min man meuh chuan pumna vekin ka nui tawh. Ani erawh a nui ve em ka hre lo, ka hnung lamah a awm daih sia. Nuhmingtei pawh a nui ve hak hak tho.

“Lalrinfel tikhan min ko leh angem?” ka kut pahnih a man tlat a ka tal chhuak thei bawk silo a hmer na phian lehnghal a.

“Aw.” ka nuih a za tulh tulh a. A aia na in ka kut chu a hmer leh a, hmeichhe te zawk zawk ka nilo mahse Maruata lakah hi chuan ka lian lo ve bawk sia, min hmer hneh lutuk chu ka rak deuh ṭhat, nidang chu nise min thlah daih tawh ang mahse tukin zing chu tinge maw min thlah duh hauh lo.

“Ka tlawm, ka ko tawh lovang che.” ka ti nghal chul a, min thlah ve hram,

“Vanlalruat misual em em pa.” ka kut ka en a, a sen deuh ram a, a na reuh phian lehnghal a.

“I sual fê.” ka ṭap der nghek dawn zawk a mi le. Ka kut chu ka chul heuh heuh a, Nuhmingtei chuan ka kut en in a hau deuh hlak a. Nuhmingtei hnugah chuan ka dinga Maruata ding ngawi ngul chu lei ka chhuah leh zeuh a, a run leh ang chu.

“Ṭawngthei em em nu,i lei kha ka tan sak dawn che rul lei a an an nen.” a tih chuan kan nui vek, duhthaw zet hian a sawi ve bawk a, ṭawngkam hi a thiam lo ve sia. Nuhmingtein chaw ei ve nghal rawh a tih chuan ka bu nghauh a, Vanlalruata’n Choka chhuahsan paha “Angailo kan chaw a hek” a tih chuan “I thu lo ber” ka ti leh hram.

Chaw ei lai pawn Maruata a ṭawnglo hrim hrim kei erawh anu leh pa te nen kan titi luam a, kan eikham a, insiam turin a chho nghal, a rei zek lehnghal a mipa ve si rei lutuk mai.

A dress chu min ngaisang chiang alawm, college t-shirt chu hak ngei ngei angai a, mahse tinge cotton jeans dum leh sneaker var kher, racksack a ak a, saw chu kan inṭawm tur, ti rilru in ka nui nghal var var a.

Helmet a la a, a chhuak nghal nul nul. Anu leh pa bye bye in ka zui chhuak ve nghal a, chahbi ka ak a, min dil loh chuan pek ka tum lo bur. Helmet khumin a chuang vut, a ngawi ngul a, ka phawrh bik awmlo emai. A kut a rawn dawh a, ala ṭawng chhuang lo, a ngeng ve bawk sia. Ngawi rengin chahbi chu ka phawrh a, a kutah ka dah a, a sirah dingin ka en duh tawh bik miah lo, ka kun ngar thung.

“Lo chuang ta che.” a ti hmuk, zawi zetin ka lawn kai a ka ṭhut fel leh loh pawh ngaichang miah lovin a tlanchhuak nghal a, ka in ring lo ka tla ṭhelh a ni e. A kawrah ka pawt vak zui. Ka ni ṭha ber ve chu leh Vanlalruata Mood uih zet avangin Ek mai a ni dawn anih hi.

College kan thleng a,Min lawm tu leh min chibai tu an tam lutuk hi nuam ka ti over. Mahse kan house mipa ho hian eng nge an tih hi, Min zawn an tum a, teuh lo mai, Ka tlanchhe nghal nal nal.

Engvanga Vanlalruata hi hetianga awm hi nge a nih le? ka hrethiam lo a ni. Nilenga hetianga chip hmuk hi a tum a mi? Lawmman kan dawng dun hnem bawk si a, nuam tihna pawh a nei velo hrim hrim a maw ni, nui hmel a pu duh hauh lova, ka rilru chanve chu a nuam zân tawh lo. Ka thinlung hian tumah a ngaihtuah tawh lovang ka ti a,Lalramliana pawh ka hmu mahse ka awmdan a buai lo, mahse Vanlalruata hian min tibuai leh tho si a.

Min vin reng a, ṭha taka biak ka tum pawh in min chhang hmuk hmuk a, hrehawm ka ti takzet tawh. Ka ko a, min chhang ṭha duh bawk silo, min la vin nghek zui, a tawk be tawh lo tawp ang. Ka kalsan nghal hmak a, Ka lung a awi hlollo a ni. Thinrim loh ka tum pawn ka thei hlollo, Khatianga ṭawngkam vin ka laka a hman vanga ka rilru a na ve ngawt pawh hi ka duh lo.

Class pakhat ka kal pel chuan an lo awm deuh laih laih a, Zu leh beer a in hung nual bawk, Ka hmelhriat ka hmu a, higher kan zirlaia Hruaia kha a ni tih ka hria. A chhungah chuan ka lut a, ka zak vel peih lo.
“Hruaia.” an vaiin an rawn hawi vek a.
“College Star chu. lokal rawh” tiin Hruaia chuan min ko nghal vat a.
“Ka duh ve.” ka tih chuan nui hukin, ka hnung lam en zeuh in, “I body guard in a phal a mi?” a ti nghut a, ka melh rum teh e. Class12 picnic kha ala hre reng a ni mahna. Beer mug min pe in i duh duh saw va hawng ve tawp rawh a tih chuan, Beer can chu hawng in, a bula Whisky chu ka pawlh hmak a, Chawl miah lovin ka in nghal khawlh khawlh, Ka inzo chu min lo en ṭhap tih ka hre nghal. A dang hawng leh in ka in lehnghal a. Engmah pawisak ka neilo. Lalramliana vangin dam ka tum a, mahse Vanlalruata vangin tunah ka na lehnghal a. Hetiang teh hrepa nat reng hi ka peih lo. Ka duh chu engkim theihnghilh a hlim taka awm a ni mai.

“Eng thil nge i tih?” Kawngkhar atanga vin zeta rawn titu chu ka en a. Heng zawng zawng hi nangmah vang vek anih hi tih chiam mai ka chak takzet, thinrim tih hriat zetin min melh rum ul a, Ka bul a rawn thlen chuan ṭawng na chi a nilo tih ka hre nghal. A hmelah chuan kut hial min thlak duh khawpin a thinrim miau alawm.

“Eng thil nge i tih hi?” A tih chuan ka ngawi ngal a, ka chhang anih chuan kan inhau dawn ka thil in a thawk ṭan tih ka hria ka kâ ka ang anih chuan Ani ai hian ka nasa ngei zawk bawk ang. Hruaia chu rawn kalin a in rawlh vat a, mahse Vanlalruata hian ka lak aṭangin a mit ala sawn duh hauh lo. Inbeng daih tum in thawk ala hawk a, a mit a chhing vang vang a, a rawn meng leh chuan a hma ang em em khan a meng rum tawh lo.

“I ṭha em?”a ti zawi sup a. Ka la chhang chuang lo. Ani pawn ka biak min chhangṭha duhlo chawhma ṭhak alawm le. “Eng nga ti nge khatianga i in vak a?” Hepa in thunun theih bik zia hi chu aw, mahse ka chhang dawn lo a ni tawp, Hruaia lam ka hawi a, “Hruaia lamna ah kal ve ang u.” ka tih chuan mak tih hmel zetin min en hu a, hepa mawl zia hi chu aw, mitmei pawh a hrethiam hlollo. Maruata melh zawk in, tim dai hian “I lam thei dawn a mi?” a ti hu a. Ka melh rum nghek takah chuan, “Ah, aw, awle.” tiin ka banah a rawn vuan nghal vut a, mahse Vanlalruata ban vai fua ah chuan ka hawi let zawk kei nilovin Hruaia darah nghet zeta vuanin, “Keiman ka lo lam pui a nge,” tiin ka kut a chelhna chu a dahthlak sak hmak a.

Ka banah chelh in min pawt sawn dawr dawr a, kei la tal chhuah tumin ka ṭang ve sauh thung. A hnunglamah ka kal a, min hnuk hi a ni mah zawk. Engtin pawn tal ila ka tal chhuak dawn in ka hre lo.

“Vanlalruat min thlah nghal rawh.” ka ti vak, ka ṭawng chu hrelo ang hmakin a kal hmiah hmiah a, A kut ka la kang a ka seh sak vak, ka seh na bawk aniang ka kut chu thlah in a rawn inher vut a, ka thinrim lutuk vang nge ka thawk a rang in ka awm hi a in sep dawt dawt thei hial, ka awmdan chu engahmah a ngailo tih hriat zetin, ngeiawm zet hian a rawn nui hawk a,

“College dancer hian lam a duh a ni lawm ni?” A ṭawngkam ngeiawm lutuk leh a mitmeng min huatna a khat a min melhna chu ka ngawih san mai mai bik dawn hauh lo. “Lam te duh e, mahse i bulah nilo.” A tawng ki aia ngeiawma ka chhanna chuan a mitmeng a tidanglam lehnghal vek tawh. Ani ai thlawt chuan ka ngeiawm thiam zawk, ka ner khum sak rual chuan ka dar tawn tawnah a kut pahnih a chelhin,

“Kan in hrechiang a midang bula intheh kual vel ai chuan ka bula lam chu i duh zawk daih ang?” A kut ala thla a, mahse min melh run tho. Tun hnai hian min melh hi a ching thar a, a chhan pawh hetianga min melh reng chuan sawi tur ka haihchham fo ṭhin vang a ni.

“Nge ni a, tu emaw anga Game anga play kual mai mai tu che ka nih i hlau zawk?” A ṭawngkam kha zet avang chuan ka in ring hman lo ka harh chhuah meuh chuan ka kut thip zet chu ka hriat a ni mai, Tunah khan kei hian engtik lai pawh a ka zah em em, ka best friend ka beng a ni. Min tih elna leh hmusitna ṭawngkam in min den nat tluk zetin ka benna khan kan in ṭhianṭhatna tawp rawh ka ti tlukah ka ngai. Chu chuan min ti na hle bawk.

Ka ben avanga ka mittui hi tla nge anih a, min diriamna ṭawngkam khâ zet avanga tla tih pawh ka hre lo, tla turin ka duh hauh lo mahse ka dang thei lo a ni. Mi zawng zawng hian min hua in min diriam pawh nise ka tuar thei ang mahse Vanlalruata hnen aṭanga hetiang thu dawn chu ka tuar thiam ngai in ka ring lo, min vin hlek pawn ka na a ni a.

Engmah sawi lovin a kal nghal nul nul a, umzui tumna erawh ka nei hauh lo. Ka in her a ka kal hmawk hmawk a ni ber mai. Khawi lam nge ka pan pawh ka hre chuang lo, ka mittui la hi a tla reng zui.
Hmun reh leh biru deuhah ka awm tih ka hriat chuan ka hawi kual a, Maruata nena kan spot bawk a ni, thingkung bula ṭhutna rem zetah chuan ka ṭhu a, Ka thil tawn zawh chiah chuan ka ngaihtuahna a luah khat nghal.

Lalramliana nena kan inṭhen a ka nat zia hmu vek lo mahse a hretu a ni a, ka natna te chu min diriam nan a hmang zui a maw, Engtin nge hetiang hi Vanlalruata’n a tih theih chu pawh ka chungah lehnghal. Ka awm chhung hi a tawt up up a, ka ṭap tur a nilo ti mah ila ka mittui erawh ka dang theilo. Ka awm chu ka chum dat dat a, ka thaw te hi a chham hial dawn in ka hria. Ka na a ni, ka na thlawt.

Tu emaw hian ka dara min khawih chuan ka dak chhuak nghal vat a. Maria-i a ni, Ka hmel a hmuh chuan ka bulah ṭhu in min kuah a, ka hnungah a chul heuh heuh a, ka ṭap chhuak nghal hawk bawk. Engtianga rei leh nasa in nge ka ṭah ka hrelo mahse ka ṭah zawh chuan ka veng hawk thei hial nia.

“I ṭha deuh tawh em?”a tih chuan ka inthlahrung angreng. ka lu ka bu ngauh a,
“Ok a ṭha, min sawipui duh te i nei em?” A tih chuan ka melh zeuh a, a nui leh sen sen tawh. Boruak hip lut kawk in ka thaw chhuak deuh ham ham a,Maria -i chu en leh in, “Maruata hi.” a bak engmah ka sawi lo,
“Maruata chu ti nge?” a tih chuan, ka ngawi sawn nghal daih. “Ih….Maria,,,sawilo mai ang….” ka ti ta ringawt, sawi puitu neih chu ka duh mahse sawi chhuah dan ka thiam lo, ka sawi leh chuan ka ṭap leh thei mai ang tih ka hlau a ni. “Ok, mahse eng chungchang pawh sawipui min duh phawt chuan ka awm ania, Lokal rawh midang awmna ah kal ve ang.” a ti zawm nghal, zat a.

Ka ding uai tawh na in ka tim leh deuh, a chhan tam tak zingah ka mit sen ram tur leh leh bui luk tur hi ka hre ve reng alawm. Maria-in chik zetin min en a,,,,ka ngaihtuahna te chu a hrethiam a ni ngei ang a bag hai rak rak in min ṭhut tir leh nghal a, make up min hnawih nghal mawlh mawlh a, Min chei zawh chuan thaw hak in midang awmna lam chu kan pan ve ta a. Ka zu in khan hna pakhatmah a thawk lo nge, ka mittui ah khan a luang ral ta vek zawk aw? Engtin mah ka awm phah ta silova.

(Maruata Pov)

V-i tana ṭhian ṭha anga awm reng ka duh rual hian he ka chhungril lam ami zawk hian a thei ve angem tih ka hre lo. Hetianga Amah duhna rilru ka pu ringawt hi ka inthiam bik lo mahse mipa ve tho ka ni a, ka bula awm reng hmeichhe mawina hi ka en kan reng thei silo a ni Ngaihzawng neih hi ka ngaihtuah ngai lem lo, Lehkha zir hi ka tan a pawimawh zawk miau a.

Mahse ka duh dan ni hauh lovin Ka Best friend tia ka chhal ngam ngat leh hlim taka ka nuih pui fo ṭhin hi ka thunun theih ni hauh lovin a zunah ka uai a, ka chhuak thei lo, a chhan chu kei hian ka lo hmangaih lutuk tawh a ni. Ni e, ka nu khan a sawi dik kei hian Veronica-i hi ṭhian ang nilovin Hmeichhia anihna angin ka hmangaih a ni. A thinlung nat laiin ka ta ni turin ka siam ngawt thei lova, a rilru buai tak ti buai belhchhah turin ka rilru puthmang ka hrilh ngawt thei heklo.

Lo hrilh pawh ni ila, henu midang rinna tlachham em em tu hian min ring kherin ka ringlo. Tum chhin miah lova beidawn san pawh min ti mai thei mahse Ani hi ka hrechiang a, Ka tum loh law law khan kan pahnih tan a ṭha zawk tih hi ka ngaihdan nghet tak a ni.

Zan ka mut that loh avangin ka mit a thip rum mai, hawina lam apiangah Veronica-i ka hmu a, a nui hmel, a thinrim hmel leh ti tau hmel te, a engkim a ni mai, chu chuan min ti muhil theilo. Amah ngaihtuah in ka tlaivar deuh tho chu anih hi.

Week Star a ni ngei dawn tih ka chiang a, ka lawmpui viau mahse ka mood a dik thei hlollo. Min tibuaitu chu Amah Veronica Lalrinfeli tho hi a ni.

Tukin zinga ka awmdan ka ngaihtuah let a, Ka tho peih lo hle anih kha, mahse zankhuaa min tibuai tu suangtuahna in a kalpui ka mitthla ah a lang leh hram anih hi tia, Choka lam pan mai ka tum chu Veronica-i leh ka nu inbia chu ka ennawn leh ngat a, ka mitthla nilovin a tak tak a ni. Tun ang zing hma lutukah eng nge a rawn tih dawn? tih ka ngaihtuah hmasa ber.

Ani hi a phur lutuk leh ta mi? A insiam vek tawh lehnghal, khawiah nge a rilru natna a ṭahpui hialna te kha a awm tak. zing khua a vara a theihngilh nghal vek tihna mi? Hmeichhe maksak tak hi chu a ni ve chiang alawm. Zawi zawia ka duhna te ka tireh dawn anih chuan ka hlat hret hret a ṭul a ni. Mahse a va harsa dawn si em! Hlat tum ve deuh pawh hian a theih loh, Amah vang hian zan pawh ka muhil thei lo a,mi la rawn chhaih nawmnah zui.Sawp hrep te hi ania ka duh ni.

Kan choka a a kut ka man sak chu na a ti tih ka hria, hei ai hian ka thinlung a na daih zawk, Ka thlah hnu chuan ka inthiam lo ve hlek, a sen vek alawm. Nidang chu nise damdawi emaw, vur tal ka laksak ang mahse Vawiin niah erawh ka tan V-i a danglam dawn miau si a. Rilru tibuai em em nu, khawiah pawh hian awm la, engpawh ti ila ka rilru hi i tibuai vek chu anih hi.

Ka be peih lo nilovin, ka be chak lo, a awmdan phur zet hi phur pui a nuam ti taka a bula awm tur ka nih laiin,vawiin zet zawng ka chaklo a ni e, ka be lem lova,a ṭawng zeuh zeuh,Ka awmdan avang hian nuam a ti lo tih ka hria, ti lo ve rih mai rawh se.

College Star chu a ni ngei e. Thawm a ring in an au nasa kher mai. A phu a, ani aia phu an awm chuang lo. Mahse mipa an thlan chuan ka ring ngam chiah lo kei aia phu zawk an tam tih ka hria. Ka ṭhutna aṭanga tho vutin stage lam ka pan a, Veronica-i chuan nui sangin min en ngar a, hmun dang a hawisawn lo hrim hrim, Sawtiang sawn nidangah min en ka hre ngai lo, Engvang nge hre lo mah ila sawtianga a mitmeng danglam zet saw nidangah ka hmu ngai miau lo. Ka bialnu anb zetin min duh hmel takin min en miau alawm. Engvanga min duh hmel ngawih ngawih a min en nge anih?

Ka hnung ka en zawk a,RLa leh Sarah-i te ka zawnah ka hmu a, Anih chuan sawtianga min melh na chhan chu RLa a tih elna a ni ngei ang. Ka nui ve hman ṭep asin, mahse ka ngaihtuahna avang chuan ka hmui ka chip nghal hmak anih kha.

Kha thikthu avang mai mai khan, Ka hmangaih, ka thiannu a nat ka hlauh a, ka dimdawi em em ka ti na chu a ni si a. A mita natna mawlh kha engtikah mah ka theihngilh tawh dawn lo. A nat avangin a ṭap a, a mittui a luang a, chung zawng zawng thlentu chu keimah ka ni. A hliam tuamdam tu nih ka duh ka ti a, mahse kei hian a hliamah chi ka phul zawk chu anih kha. Maria-in a kuah laia awrawl chhuah meuh a, a ṭah khan ka buai vek. Ka tawt up up a, hetiang tak hian ka hmangaih na hmuh hi a hrehawm dawn a ni tih ka hrethiam phak lo. Mahse a nata a mittui a far rual chuan ka sawi thiam hauh lovin ka na ve zel chu a ni a. “Veronica min ngaidam suh, ti na tu che hi min ngaidam ngailo la, ka tihsual man erawh ka tuar vek ang. Khawngaih in Khawngaih takin ṭap tawh suh, ka vang hian ṭap tawh miah suh aw.” ka phun chhuak hial a.

BEST FRIEND-8

(Veronica’s pov)

Week a zo a, ka khawvel erawh a danglam leh ta, thla ruk vel chauh College-ah hian ka la awm a, college pum hriat ka ni a, ka tan tupawh an inhawng em em a, hmelhriat leh ṭhian tih tur pawh ka nei ve leh ta nual mai.

Lalramliana nen kan inhmu fo a, min biak a tum erawh chuan ka be duh ngailo, Ka tum vang nge midang ngaih pawimawh zawk ka neih tak avang a Ani hi hre renglo ka nih ka hrelo, mahse engtin pawn awm se, tu nen pawh nise ka buai phah tawh lo tih ka chiang. Vanlalruata, ka tana awm reng ṭhin nen erawh kan kar chu sawifiah theih silovin a hla takzet a, ka ngai em em a, ka ngaihtuah fo a, biak duh viau mah ila Week closing function ni kha ka hre chhuak leh ṭhin. Ama vanga thinrim ka ni a, chuan Ani khan a ti ang tih pawh ka ngaihtuah phak loh ka chungah a ti a, ka na em em anih kha. Khang zawng zawng aia ka natpui erawh ka lak aṭangin hla takah a awm a, min biak pawh a tum lo, en takngial pawh min en duh lo, Eng nge tihsual ka neih? A hmaia ka beng kha thiam ka intilo, mahse khatih laia ka dinhmun hretu khan min nawr lui a ni. Mahse chumi avang chuan ka thiam ka tilo, ngaihdam dil pawh ka duh mahse ka hnaihah takngial pawh a awm duh lova, ka lam takngial pawh a hawi duh tawh bawk silo.

Ka ṭhian a ni a, kan inkar buaina chu engpawh nise chinfel theih loh a awm ka hre hauh lo, mahse ti nge chinfel aia min hlat hi a thlan zawk tlat ka hrethiam lo a ni. A hma chuan harsatna neuh neuh pawh nei ve in titau bar bar ṭhin mah ila min thlem a, min umzui a, min nuih tir leh ṭhin, mahse tunah chuan chung zawng zawng chu engmah a ti lo a, ka bia ang tih hi a hlau ni berin ka hria. Chuti chung chuan kei hian ka ngai a, a tel lova awm hrehawm ka ti a, nuih har ka tih ang chiah in ka hlim mawlh lo a ni.

Ka hringnunah hian mipa pahnih ka tawng a, pakhat chu ka naupang lai ṭhian, ka ngaihzawng hmasa ber leh ka hmangaih hmasa ber mahse a hnuhnung ber ni thei ta lo a ni, A pakhat leh chu ka ṭhianṭha ber leh min ti hlim em em tu, tuna ka thinlung luah tu ber mahse ka TA ni ve thei ngailo tur a ni.

Ka ṭhian angin ka en leh ang ka ti a,mahse ka thinlung a tih nat aṭang khan kei hian ṭhian aia nasa in alakah rilru ka pu tih ka hrethiam chiah, hmelṭha ka tih te, a awmdan engkim ka lo chik a, ka lo en ngung theih em em nachhan te, ka rilru buai taka a awm fo na chhan te kha kei hian ka lo Duh em vang a ni tih ka hre tawh mahse Ani chuan chutiang chuan min en ve ngailo. Vawikhat tal ka duh anga min duh ve lo anih pawh in ṭhian ang nilo, hmeichhia ang hian min en ve se ka ti ṭhin mahse chu erawh Beiseibo mai a ni a, tunah chuan kan inṭhianṭhatna pawh a thamral mek chu a ni si a.

Hun kal chak lutuk hian ka thin a tirim, a chhan chu Maruata nena kan in kar a zau chak lutuk tawh vang hian. Nitin hian kan in hlat tulh tulh chu anih anih hi maw! Kan inbiak lohna pawh thla4 dawn a ni ta. Room-ah lehkha ka zir a,mahse ka rilruah a lut lo ve khawp mai, test neuh neuh a awm reng avangin zir ve tho angai bawk si. Ka ngaihtuahna vak kual ruai hian Vanlalruata hnen bawk min hruai thleng leh ṭhin, bul kan ṭan hma hauh in a tawp chu a ni bawk si a.

Ka kawngkhar kik ri ah chuan ka hawi zawk a, USanga a rawn lut nghal a, tunlai chu ka chhungte pawh hi ka be khat khawp mai, in khata cheng ve si hi an ruala chaw ka ei bak loh chu an bulah ka awm ngailo reng reng.

“U eng nge i duh a?” Ka tih chuan kawng dawm meuh in min thlek vang vang a, ka dawhkan bula chair pakhatah chuan a ṭhu nghal zat a, nga ti nge a hmel hi a hlimloh viau le? Ka chhungte laka ka awm hran lutuk vang hian ka lo chik ngai lova, a chauh hmel lutuk te chu ka lo hmu ngailo nen ka inthlahrung zawk hial.

“I damlo a mi, i hmel adiklo” ka tih chuan a nui suk a,
“Mam, College-ah harsatna i tawk a mi?” atih chuan ka mit ko ka san âk a, teh daih chuan a, ka tawk lo mahse ka chhungril lam erawh buaina ka chinfel theih loh hlir a ni.
“Tawk love ti nge?” ka tih chuan, a thaw hak a,
“Mam thlakhat ai a rei tawh hetianga i awmna hi.” a ti leh ringawt a. Engtin nge ka awm le, U Sanga hian ka mood off em em hi a chhan a hria a mi le?
“Eng nge i sawi awmzia chu?” A thusawi hrethiam lo derin ka zawt a, “RLa nena in inṭhen laia i awm ang khan i awm leh tawh.Eng nge a chhan?” a tih chuan, chhan loh mai ka duh. Lalramliana nena kan inṭhen khan ka room-ah ka awm tam ber a, ka chhungte bulah erawh engmah thleng lo angin ka awm ve ṭhin a ni sia.

“Engtin nge ka awm a? Chuan Ani te chu lehkha zirin Khawpuiah a awm mai alawm.” Phat ka tum viau a, mahse min chik em em tu ka unau te hian ka awmdan an hai lo tih ka hria. Chutih rualin RL-a nena kan inngaihzawn erawh tuman an hriat ka ringlo. Min kalsan vangah an ngai vek ang.

“In in ngaihzawn kha kan hre vek alawm. In inkawmngeih zia kan hre bawk, in la naupang a tumah in kan sawi chhuak ngailo mai mai anih kha..” A tih chuan ka zak thar lutuk, ka zep ve em em a mahse an lo hre reng a, chuan kan inṭhen pawh an hria,

“In hre vek maw?” Ka tih chuan, “Umm,kei phei chuan i room a i ṭah ṭhin pawh ka hria.”a tih chuan phawk zetin ka melh a, “Hlauthawng duh suh ka nu leh pate engmah ka hrilh ngailo.” a ti nghal vat a, ka veng deuh hawkin ka hria.

“Maruata nen in ṭha em?”a tih leh chuan ka en zawk a, nitin college a min hmu tu ania a hre khawp ang. Chhang lovin ka lu ka thing a, min khawngaih hmel deuh in min la melh zui.

“A duh che in ka hria.” a tih chuan ka en nghal zawk,
“Maruata hian.”a tih leh chuan ka nui chhuak hak a, a teuh lo lutuk, Ani sawn min duh lo mai pawh a nilo, A ṭhiannu engtiklai pawh a a kawm hi min diriam zawk asin, tih mai ka chak mahse ka sawi theilo, Anih loh chuan ka U min chan em em tu hian buaina a chawk chhuak duh mai ang.

“In inkar ṭhat loh chhan chu engpawh nise, hetianga rilru na deuh hian awm tawh suh. he khawvela mi zawng zawng hian nang hi hnuchhawn vek che mahsela, i tan i chhungte erawh kan awm zel ang.” Atih chuan ka hnuk a ulh a, ka ṭah a chhuak hial a. Aw tih nan ka bu ngauh ngauh a, ka samah chul zeuh in min chhuahsan ta a.

Ka chhungte hian engkim an lo hre vek a, chuvang chu a ni ngei ang, school chawlh rih ka ngen pawh khan min hnial miah loh, chuan tunah la Science la tawh lova Arts a inleh ka sawi pawn an lo remtih thlap ni. Khang hunlaia beer nam chunga ka haw pawn min hau ngai lova, engtiang pawn awm ila, an hre lo der hmak a, hlim hmel min hmuh vek zel ṭhin a, Ka awmdan ka ngaihtuah let a, ka zak thar ngawih ngawih a ni mai. Inchhunga ka ṭeu hlar chang pawn fiamthu thawhin thinrimin tuman min chhang let ngailo kha a ni si a. Ka chhungte lakah hian ka thup ve emaw ka tih pawh hi ka lo thup vang nilovin an lo haider zawk vang lek a lo ni, ka unau te pawh piang hmun nilo mah ila min hrethiam em em tu te an ni si a.

UDindini leh Usanga te hi ka pa nau fate an ni a, Mahse a nu leh pate inṭhen in, A pa bulah an awm a,ka nu sawi dan chuan Udindini kum10 anih hian apa chu a boral a, chuta ṭang chuan kan inah awm in, ka nu leh pate nu pa tiin an ko a,kei aiin ka nu leh pate fa an ni hmasa daih, ka pian har avangin in kei chuan ka hre pha lo, Udindini hi Usanga nen hian kum 2 in an in thlau a Usanga kum 10 a tling in ka nu hian min pai ve chiah.

Umama erawh thisenah inzawmna kan nei lo,Ka nu leh pate sawi dan chuan nu leh pa a nei tawh lova, chhungte sawi tur pawh a neilo kum 7 lek anih in kan bulah a awm tawh a, chuan lehkha te zirtir in tunah chuan Sorkar hna a thawk ve tawh, Udindini pawh college lecturer a ni a mahse kan college-ah chuan a thawk lo.

Tihian unau piang hmun ang in kan khawsa ho vek a,thisen chauh hian chhungkua min siam lo tih hrechiangtu ber ka ni. Umama leh Udindini te hi chu an sinior mah mah tawh lam a ni a, nupui pasal pawh hi nei ve tawh se kan ti, Anih loh chuan mite hian an hnawng an tih kan hlauhpui. Anmahni la hian an la ngaihsak lo em em zui.

Ka ngaihtuahna kual thui zet chuan mut chhuakah min hruai lut in khum lam la pan a, thlasik boruak a in ṭan a, khua pawh a vawt ṭan tawh bawk, ka phone chu en in zantina ka tih fo angin ka phone screen a maruata nena kan thlalak chu en in “Muttui Aw” ka ti sap a.

Ṭhian tam tak neiin,ka bul velah hian mi tam tak awm mahse Vanlalruata tello chuan ka kim lova, ka nuih chang pawh in Ani tello chuan ka thinlung takin ka nui thei silo, Rilru mumal lo zet neiin, a changin ka hua a, a changin ka ngai em em bawk a, hnaih leh ka duh a mahse ka rilru a tih nat hi a tih dam leh hma loh zawng ka lung a awi thei bawk silo, hetiang em em a rilru buai chuar zeta min siam avang pawh hian ka thin a rim ṭun tho. A lakah hian ka thin a la rim reng nge, min hlat tak avanga inti thinrim chawp ka nih pawh hi ka hrechiang thei tawh lo chu a ni e.

Ka tellova a hlim bik lutuk te, ka tellova a awmthei bik lutuk te hi ka haw ngawih ngawih a, A lakah hian rilru dang ṭhian nihna chauh lo hi lo pu lo ila chuan ho te te ah ka thinrim in, ka ti tau fo lo ang chuan kan la inkawm awm si a, ti te in ka ngaihtuah a mahse kei ngei pawh in Vanlalruata laka ka rilru danglam lai pawh ka hre si lova.

Lalramliana laka ka thinrimna avangin Ani laka ka rilru puthmang dik tak hrechhuak tur pawh khan ka in ngaihtuah ngai lova chu mai pawh ni lovin ka tana mi pawimawh em em hi ka lak aṭanga hla takah ka awm tir thei tih pawh ka ngaihtuah hek lo. A laka pangchang em em kha ka tih ve tur rengah ngaiin, a rilru tur lam ka dawn pui ngai lova mahse ka nun aṭanga a chhuah velah ka tan Eng nge anih tih ka hrethiam chauh si a, chu chuan na in min siam mek chu a ni si a.

Mut duh em em ṭhin kha tihian muhil thei lo leh ei mumal thei lovin ka awm a, tunah pawh zinglam dar4 chiah ala ni, darkar khat awrh chauh ka muhil tih ka hria mahse a chhuak tawh miau silova. Ka phone a music player chu on in Let Her go,Passenger hla chu ka ngaithla a

“Well you only need the light when it’s burning low,
Only miss the sun when it’s start to snow,
Only know you love her when you let her go.”

Kei hian ka kianga a awm loh aṭang chiah in ka duh tih ka inhria a, mi mawl tak ka ni. Ani te chuan ngaihzawng a ngaihven lo hrim hrim a, ka rilru ang pawh a pu hek lo mahse nga ti nge vawikhat chauh tal, ka rilru puthmang hi ka hrilh ve mai lohvang, Engvangin nge ka Duh ber chan a, na a ka awm reng? Chu ai chuan engtin pawn min chhang dawn se beidawnna min thlen tu tur pawh nise nakina ka inchhir lohna tur talin Ani hi ka duh thu ka hrilh angai a ni.

Ka ngaihtuahna avang chuan ka ka thinlung mu hnu chu khaihthawh in a awm a, ka na te chu damdawi ṭha mi ei ang maiin a dam nghal duak a, an sawi hnar a hlit phawi ang hlauh ka ni. Khawi aṭanga rawn kal nge tih ka hriat lovin, chakna thar ka nei a, ka thil tih tum huphurh awm tak si mahse a hun thleng vat vat se tia ngaihtuah chuan ka mu meng kar a, dar6 a rik chuan inhnuai lamah ka nu thawm ka hre thei tawh, ka u sanga thawh hun ka nghak rih, Ani nen hian kan inkawm tam ber a, kei aiin thil a hre tam a, sawipui hmasak ṭha ka ti a ni.

Room indawt chiaha awm kan nih avangin a tho tawh em tiin a thawm ka ngaithla kar a, a ke pen ri ka hriat rualin rang taka tho in a room ka pan a, a kawngkhar zawna min hmu thut chu a phu zawk lehnghal.

“Eng nge??” A ti nghal hluk a. A room ah nawr lut leh in a khumah ka ṭhutpui leh a, mak ti hmel zetin min la melh kur zui. “Eng nge, sawi vat rawh ka ril a ṭam ania.” a tih chuan lai angreng deuh hian kan nuih vur vur phawt a, ala ner nawng zui.

“U kan inbiak hnu khan thil ka ngaihtuah a,” ka tih chuan rilṭam hmel zetin a pum chula, “Chuan….”a tiin, a ham bui bui a. “Keimah zawk hian Maruata hi.” tiin ka tawi khawmawng a, ka sawi hreh leh deuh. Ka sawi hun nghak in min en reng a, “Maruata hi ka duh” ka tih thut chuan min chhang mai lovin min melh vung vung a mahse ka sawi zo erawh veng thawkhat chuan ka veng hawk mai. “Engtin nge i tih dawn?”a tih takah chuan hrilh ka tum thu ka sawi a, Maruata mizia hrechiangtu ve tho a ni a hrilh hmasa tu ka nih pawi a tih loh thu a sawi a mahse tlem chuan mizo rilru aṭang chuan a zahthlak a ti leh hram.

Mizo rilru tia a sawi chuan ngaihtuahna a ti thui. Hmeichhia zawkin mipa zawk duh thu a sawi hmasak hian kan ngai diklo fo ṭhin si a mahse ka ngaihdan chuan a tu zawk zawk pawh in a thinlung sawi chhuak se, chu chu thianglohah ka ngai lo, Hmangaihna leh indonnaah chuan a thiang vek tlat alawm.

Ka thil ti reng reng ka zang vah a, ka chhungte pawh in tukin zing ka awm dan zet chu mak an ti ve khawp aniang min fiam laih laih a, ka pa hnenah a ngai tê bawkin bike lei ka dil ṭan leh tawh bawk. Ka mood ṭhat apianga ka tih ziah ania, beidawng lo in ka dil char char dawn, hlawhtlin hun ka la nei khawp ang tih ka chiang bawk. Sawi chhuak lo mahse Udindini leh Usanga leh ka nu chuan an remti tawh tih ka hria, Umama leh ka pa hi an ni mai, Umama rilru ka hneh chuan Ka pa rilru ka hneh nghal dawn tih ka hre bawk.

Usanga rualin College ka kal a, ka rilru chuan ka bike chhuanna ka thlak ṭep tawh tiin ka nui var var a. Maruata min phurh leh hun tur ka ngaihtuah a, ka phur thar sawt ni maiin ka hria mahse ka thusawi tur erawh in nasa takin min ti zam si a ni.

College kan thleng a, Usanga chuan “Ṭha deuh in aw” tiin, a kut zungpui min hmuh zeuhin a khi suk a, ka lu ka bu nghauh a, Boruak hip lut deuh kawk in, nitina alokal ringa ka nghah fo na hmun kan spot lamah ka kal a, ka thlen hunah call a koh mai ka tum bawk.

Mahse eng nge thleng hi, hnunglam aṭanga ka bana chelh tu chu chiang takin ka en a, Lalramliana maw? A luhlul zia hre reng mah ila Ka biak duh tawh loh thu ka sawi ziah a, tunah min biak ala tum tho anih hi.
Ka be phawt mai aniang chu, ka rilru a danglam tawh tih tal hi a hriat a ngai a ni. Amah anga beidawnga siam let duhna erawh ka nei tawh lo.

“RL, Nang… Eng nge ni ta?”ka hmanhmawh Maruata hmuh hman loh ka hlau.
“Inbia ang khawngaihin.” ati zawi sup a. Nga ti nge hepa hi a tlawm theih tak em em a.
“Khawngaih min dil tawh suh ka tih kha.” Ka ti chuai raih a. “Ni e, I khawngaihna dil tlak pawh ka nilo, mahse kei hian ka ṭhiannu leh unaunu, ka hmangaih hmasa ber hi ka damchhung atana chan hlen che hi ka ngam ngang lo a ni.” a tih chuan sawi mai tur ka hre lo, kei hi a engmaw ka nih a. Ṭhian, unaunu leh hmangaih hmasa ber maw? Keimah ang tho in. Mahse Eng nga ti nge a hmangaih hmasa ber ka nih chuan min kalsan a, min tih nat kher? Ka ngaihtuahna vang chuan ka nui hak a, ka nuih zat vang erawh a ni hauh lo. Ani erawh in ngawi ngul in min en reng thung.

“I hmangaih hmasa ber chu na takin i kalsan thei bik a maw?” Ka phun ri sap a, hmun reh tak anih avangin kan inhre tawn mai mai ni ber in ka hria.

“Khang hunlai khan ka hrelo, ka thinlung te kha ka hrethiam ngailo a ni. Mahse maw ka hriatchhuah meuh chuan hrehawm ka ti a, vawi tam tak i hnenah khan rawn let a ngaihdam dil che kha ka duh ṭhin, mahse ka ngam ngang lo a ni. Ka tihnat che avang khan nun nuam in ka awm ngailo khang kum 4 chhung zawng khan ka ngai che a, ka ṭhiannu, nui mawi tak kha ka ngai ṭhin asin.”

A thusawi avang chuan ka mittui a tla lo thei lo, na taka ka awm lai leh mi â ang maia ka khawsak lai pawh khan Ani pawh hian min lo ngai ve reng ṭhin a maw? Sawi ve tur hlol ka hrelo a ni, ka hrelo takzet.

“Fel, Mizoram ka rawn let tir khan hmuh che ka duh lutuk, mahse i U sanga hnen aṭangin i chanchin ka hria a, ka rawn lang ngam ta lo a ni. Mahse Khuanu hian min intawn tir leh tho a,” a aw chhuak a zawi hle na in, a thusawi erawh ka hrechiang takzat, a hmel ka en a, hrehawm tihna leh mahni inthiamlo ngawih ngawihna chauhlo chu amahah thil dang engmah ka hmu lo.

“A hma pawh in ka hmaah i rawn inlan ngam lova anih chuan engvanga tunah kher rawn lang leh si nge i nih?” A thusawi zawng zawng hian min ti na thar takzet a, ka thinrim leh hle tawh bawk. A landan zawng zawng te hian ka ṭah a chhuak takzet bawk.

“Mi pakhat hian hetiang hian min hrilh a, Tihpalh tih hi a sawt lo, tihpalh tih ai chuan tih nawn tawh lova, kan thiamlohna siamṭhat nan thil tih hmanga kan lantir hian, inlaichinna ṭha a chhuak zawk ṭhin.” a tih chuan ka khi sak a, Vanlalruata Thuvawn a rawn sawi tih ka chiang em bawk a ni.

“Chuvang chuan i tana ṭhian leh Unaupa ka nih leh theih nan chance khat chiah min pe leh rawh.” Chu thu a sawi meuh chuan ka ṭah nuih hawk a, min pan hnai hret rual chuan, ka kut hmalamah pharin ka tiding a. “Nang misual, kan inngaihzawnna kha chhe vek mahse i ṭhiannu hi khatiang lo deuh tal khan thlah la chuan vawiin ni a kan awmdan hi a danglam ngei ngei ang. Mahse chutiang nilo chuan i kal tawp a, kei hian ka tuar nasat zia pawh engmah i hrelo, theihtawp chhuah a theihngilh che kha ka tum ṭhin asin. kan inṭhianṭhatna zawng zawn thleng khan keimah aṭang khan paih chhuah vek kha ka duh.
Chutianga ti tur chuan kum4 chhung kha ka hmang asin, Chuan i rawn lang a.” Ka thinrim nge ka rilru nat luat vanga ṭawng chhuak ka nih ka hrelo mahse ka sawi duh erawh ka sawi vek ang, tun hunah ngei hian.

“Engkim ka siamṭha ang i ti a mahse dawt vek kha Sarah-i nena in2 fawp lai hmu tur em kha chuan nang hmachhawn che hian ka la inpeih lo, chu tal chu hre tur i ni asin.” Ka mittui mai a tla satliah lo, ka ṭap tak tak tawh. Min kuah thlawp a, tal chhuah pawh ka tum chhuang lo, ka ṭahkhum ngawt ngawt a ni mai.

Ka duh tawka ka ṭah hnu chuan min kuahna aṭang chuan ka tal chhuakin thinrim zetin ka melh rum al a,
“Misualpa” ka’n ti leh ringawt a, ka melhna ngai pawimawh lo zetin mawi ka tih dan ber in min nuih a, mahse a tawpah zawng ka nui ve leh thei ta, tunah hian ka hlim a ni, ka unaupa leh ka ṭhian ka hnenah a lokir leh a Maruata ka duh thu ka hrilh dawn bawk.

“Awiiii Lalpa leh.” ka tih hluai chuan RL-an mak ti hmel zetin min en nghal a, “Nge.” a ti sup. Engtin nge ka sawi ang aw a bulah hian.

“Ih, tunah hian Maruata hmuh ka tum a, Kan buaina chingfel turin..” ka ṭawng bah nak mai. Ka sana ka bih zeuh a class ṭan a hun daih tawh bawk. Kan lo awm rei hman hle mai.

“Break-ah be mai la, tunah chuan a tlai tawh emai.” a tih chuan bu nghauh nghauh in,bclass lam panin kan kal dun a.

Ka hringnuna darkar 2 rei ber a ni hial in ka hria. Break a hun chuan ka thaw huai thei, class aṭanga ka chhuah hma hauh in Maruata call ka tum a,mahse a pick up theilo reng reng, min haw viau a mi nge ni a ala thinrim reng zawk, a ṭha lawm thinrim rawh se eng chen nge a thinrim dawn kan hria ang chu.

(Maruata pov)

Veronica-i hlata awm hi hrehawm ka ti takzet mahse kei hian nat nawn tir ka duh lo. RLa laka a rilru puthmang a la danglam lova, RLa pawh in chiang takin ala duh thu a sawi anih kha. Ka mood off lutuk vanga Veronica-i ka tih thinrim ṭum khan mahni inthiamlohna nen ka umzui leh a, ka thil hmuh te khan min ti na tih ringawt hian ka natna a sawifiah zo in ka ringlo, ka tawt up up a, ka chhungril hi thinrimna leh natna in a in pawlh a, hetianga thinrim leh na hian tuman min la siam ngailo. Ka awm dan avang chuan ka sa hum hum thei mahse ka insum a ngai ka ti thinrim hmasa a, a thiamlo zawk ka nih avangin ka insum hram hram a ni e.

Mahse nga ti nge henu hian ka insum hram hram a ni tih hi a hriatthiam duh loh? Ka tum loh zeta ka ṭawngkhum khan chawp leh chilhin ka inchhir nghal, keima avanga a ṭap aia hmuh hrehawm hi ka tan a awm leh tawh pawh in ka ringlo. Tih mai tur la ka hre lo, hla tak aṭanga a awmdan thlur chauh lo chu. Maria-i nen kan inbiakna ka ngaihtuah a,
“Kal la, va hnem rawh.” min ti anih kha mahse ka chhanna kha nep ka va inti si em!
“Ka thei lo,keima vanga sawtianga awm saw a ni.” Ka ti na a, mahse ka tuamdam ngam ta silova.
“Tihsak theih che ka nei em?” A ti daih a, ka rilru chuan a bula kal a, thlem ka duh mahse ka thei lo anih chuan ka ai awh talin Ani hian min kal sak thei mai lawm ni ti rilru in, Inthlahrung zetin ka en a,
“Ka ai i awh thei mai angem?Khawngaihin,” Veronica-i vangin khawngaih ka dil ta chu a, mahse atan anih chuan pawi tihna ka nei lo.

Veronica-i duhthaw zeta a ṭah khan ka na ngut ngut thei a, thawk harsa ka ti hial zawk. Tihpalh ka tih avang ringawtin a na areh phah dawn lo chuvang chuan a thleng tawh loh nan kei hian ka kalsan angai a ni tiin rilru ka siam a, Veronica-i mittui meuh chu mipa hi min ti mipa theilo a, a na ka hmuh vang ringawt a ka natna te hian ka mit aṭangin mittui a ko a, chung zawng zawng ai chuan na taka siamtu chu kei a ṭhian hi ka ni si a.

Khami nia thil zawng zawng kha ka ngaituah kai zel a, Kha hmun hrehawm tak ka kalsan hnu khan mu leh mal ka nei thei lo, Chhungril lam rum vawng vawng in chulai hmun chu ka chhuahsan a, ka pan lam pawh hre lovin ka kal mawp mawp a, mi tu emaw ka su deuh pawp a ka en chuan RLa a ni, Ani pawh in ngaihṭhat loh hmel zetin min en ve tho.

“In bia ang” ka ti hmuk a, midang awm lohna lai deuh lam chu ka pan a, ka thil tih tum tlawm thlak zet avang hian damchhungin ka inchhir tawh mai thei mahse Veronica-i tana ka tih theih awmchhun ni a ka hriat vang chauh a ni.

“V-i laka i rilru puthmang dik tak ka hre duh.” ka ti nghal hmuk, min chhang mai lo lehnghal.
“Ka hmangaih hmasa ber a ni.” a tih chuan engmah sawi lova kal leh nghal vang vang ka duh,,mahse kei hian ka tih tum zo lo chuan ka kalsan lovang.
“Tunah?” tia ka zawh chuan kan inmelh nghal run a,
“Ka tihsual avanga min ngaidam duh anih phawt chuan kei hian engtik lai pawn ka hmangaih tawh ang.” a chhanna awlsam zeta a sawi theih danah Ani hian ala theihnghilh bik reng reng lo a ni tih ka hria.
Keimah zawk hian ka kalsan ngei a ngai a ni chuan a hmangaih ber RLa bulah a let leh thei ang, ka awm ve reng chuan a hlimna aia a lungngaihna chauh thlentu ka ni dawn si a.

Khami ni aṭang khan Veronica-i lak aṭangin ka indah hla a, College-ah ka be ngai lova, ka hel a ni mah zawk ang chu, mahse a thil tih engkim hre turin ka en zui fo ṭhin, kan spot-ah a kal fo a, min nghak tih ka hria, mahse ka in lan ngai lo, min hmuh phak lohna chinah dingin ka thlir fo ṭhin. A chang chuan a bula kal a, a hma anga awm leh duhna ka nei rum rum ṭhin mahse ka ṭhiannu em em leh ka hmangaih hmasa ber ni bawk hian hlim a phu a, a hlimna daltu nih ka duh lo, RL-a a hmangaih a tunah la lungawilo mah se, nakinah a lungawi hun ala awm mai ang chutih hunah chuan hlim takin ala awm ang.

Ka nih tum ni ngai hauh lo, Doctor zir tumin entrance pek ka tum a, Ka chhungte pawh tumah ka hrilh lo, V-i hi sawm ve ka chak ṭhin, inbuatsaih dun ila nasa takin hma ka sawn ngei bawk awm si a. Mahse chu chu ka ti theilo, ka ngaih chang pawn ka bulah ka awm tir thei tawh silova. Thlasik a in ṭan a, kan awmdan ṭhin te ka ngaihtuah fo a, ka ngai a ni, ka ngai takzet. Zantin a hming lamin Ka muhil a, zingkarah kan ina rawn kalin, min inhnialpui leh tura ngaihna te ka nei ṭhin mahse a reh hmak a, a sulhnu erawh hmun tinah a hnuchhiah bawk si.

Eng nga ti nge hetianga mipa nep ber anga ka awm a, ka duh pawh nei ngam lo ang maia ka hel kual fo? Ka hrilh ang engtin pawn min chhang dawn mahse ka hrilh ang tia ka inngaihtuah apiangin Ka Veronica-i hlim hmel ka mitthla a, ka vanga a ṭap lai in a rawn zui a, ka theilo leh ṭhin. Veronica-i hmaah anih chuan ka zam a, kei mipa hi ka pa theilo ṭhin zawng a ni e.

Hetianga awm tur hi ka nilo, khua a var a nga ka bia ang, ka be ngei ngei tur a ni, ka rilru ka siam sauh sauh a, phone a biak nghal mai ka duh rum rum, mahse thla 4 dawn kan inbe tawh lova chhung zawng zawng siam ṭha tur chuan Phone nilovin hmaichanah ngei ka be tur a ni. Ka thu tlukna avang chuan thinlung hlim leh thlamuang takin ka muhil ve thei ta.

Zing hma takah tho in, morning walk turin ka chhuak a, Veronica-i te in zawn ka thlen chuan a room zawnah ka hawi cho vang vang a, henu hi a walk tawh ngailo a mi le? Ka ti rilru neuh neuh a. “A ṭha e, vawiinah engkim ka siamṭha a nga chuan naktuk zing aṭang chuan ka rualin walk turin ka sawm leh thei tawh ang” tiin keimah chuan ka nui suk a, ka Veronica-i vang hian ka na a, amah vang tho hian ka hlim bawk a nih hi maw!

College ka thleng a, kan spot lamah ka kal nghal a, Veronica-i ka nghak a, engtin nge ka biak ṭan ang, tiin ka biak dan tur ka zir lawk a, ka nui leh rih ṭhin, mahse kha chen ka hlatsan tawh be satliah nilo ka rilru puthmang thlenga hrilh ka tum avang hian Vanlaruata hi ka zam leh der tawh. Ka nihna ang anga lan nge ṭha ang, tu bul maha ka awm ang nilo, V-i bul chiaha ka awm dan funny ru zet ang khan, ti te a inngaihtuah in keimah a awm mi pahnih te hi an inhnial ngar ngar chu ania.

Sana ka en a a tlai tawh viau mai, tukin zing hi eng nga ti nge a lokal miah loh le? sana chu ka en leh thin a, class ṭan a hun ṭep tawh avangin, class attend phawt a, chawlh lai a kal leh rilru chhungin ka let a, thui pawh ka kal hma in thawm ka hriat avangin ka tawi khawmuang leh rih a, Ka kalpelh ngei an ngaih avangin,ka ke pen pawh a chak hran lo. Veronica-i leh RLa te an ni, a insut deuh hlap hlap a, ka kal hnaih hrut ruala ka thil hmuh erawh chuan hun hi a chawlh tir vek niin ka hria. RLa chuan Veronica-i a kuah a, duat hmel zetin a samah chul in ngaihdam a dil mawlh mawlh a.

Kei erawh tih ber tur hre lovin Anmahni hnung chhawn in ka let a, Veronica-i hlimna tur a ni tiin ka in hrilh nghal mawlh mawlh a mahse ka chhungril tawt up up leh hrehawm lutuk erawh mipa tan pawh tawrh a har takzet. Mipa takin ka ṭap lovang mahse ka na erawh a tih damna tur ka hre lo,ka thaw hawk a, ka veng phah chuang der lo. Veronica-i ka chan a, engtikah mah ka tan a rawn let ve tawh ngai dawn lo. A kal tawh, a kal hlen tak tak tawh a ni. A hlimna tur anih phawt chuan ka kalsan ang, mahse a va harsa dawn si em! He ka thinlung hian dam ni a hmu leh angem le? A hmu tawh lo anih chuan a hmaah ka inlan tawh lo mai ang. Veronica, Ka Veronica Hlim rawh aw, khawvelah hian Nang hian Hlim i phu ber a nia.

Conti…..

Leave a Reply