You are currently viewing KEIMAH, THINGTLANG NULA S2-32

KEIMAH, THINGTLANG NULA S2-32

Spread the love

KEIMAH, THINGTLANG NULA S2-32

Kan khua ka thleng chu Sangkhuma leh Fawnvela ten min lo hmuak a, sumo aţanga kan ipte an lak chhuah rualin, “Reilote chiah cham tur si i va in keng hnem lehpek ve mawle” Sangkhuman a ti nghal ringawt a, “Pangpar te kha engatan nge?” Fawnvelan a lo ti bawk a, “Dingdi florals a mi u Zirbawngan min leisak a, a chhiat ka hlau a nih hi” ka tih chuan an pahnihin ngawi rengin min en tlawk tlawk a, “Engati nge khati vak vak a min en?” ka tih veleh Sangkhuman, “Bialpa i han nei fel leh der tawh tihna mi?” a ti a, “Nei mai mai lo, kal ang, all go” ka tih chuan kan in lam panin kan inzui phei a, “Kalvari in vawiinah Remkalami a lo haw dawn sia, naktukah chaw lo ei rawh u a ti” Fawnvelan a ti a, ka lo remti nghal thlap a, an fapa erawh ka hmu peih lo lawk sa.

Kan in thleng min thlah hnuah an haw a, ka nu a awm tho bawk a tiin khaw thim hmain thlanmual a kal turin ka chhuak leh a, u Zirbawnga pangpar min leisak chu pakhat ka phawi a, ka keng ran bawk. Thlanmual hi a hlat loh bakah feh kawng a ni a, en lai chuan ka hlau lem lo. Ka thlen chuan Maski thlan bik chu hui fai sawk sawkin pangpar mal khat chu ka dah a, sawi tawh ang khan a thih chhan kan hriat hma chu tumah kan dam tak tak theih ka ring lo.

Thawm ka hria ka hre lehnghal a, hnar ri ka hriat takah phei chuan ka ding ngil nghal zawt a, ka hawikual nghal bawk a, Maski a thlan piah daih, thlan lung pakhat nghengin u Lalhuma a lo muhil chu niin, ka pan hnaih chuan a bula zu bur leh no pahnih let ngât chu ka hmu a, pu Taipuian a haw san a ni ngei ngei ang.

“A buaithlak thei e…thi si lo hian thlanmual ah a chat thla ve ziah, i harh hun hunah haw mai teh” ka ti a, miin a chhip a siliper an dah sak ni awm tak chu la thlain ka haw san a, u Nobawihi nen an inngaizawng chiah chu a chhe rawk rawk mai. Zu hi tui angah a hmang a ni ringawt tawh.

Thlanmual aţanga ka haw hnuah ka nu’n, “Zirbawnga nen in inhmu em?” a lo ti a, min hauh ka hlau chuan, “Hmu e…mah se ka hmu phe vek. Min hauh theihna tham khawpin ka hmu chiang lo” ka ti a, rilruin ka uang a ka ti zui zat bawk a, “I pi Binladari hian a fel zia a sawi chamchi a, ka lo hmu dik lo laklawh a ni maithei. Thianghlim takin inkawp mah ula a pawi lo” a ti ve ta nge nge a, ka thaw huai dawn chauh tihah, “Ngaihzawngte an thih hian an thi zawm zat duh an tia, pakhat a thih chuan a zawnin pahnih an thi leh ţhin a, pathum an thih hnuah chauh a reh ţhin an tia, a lungthu kimin an tih ţhin hi, thlan a i kal hlan khan chu ringawt chu ka lo ngaihtuah” vin hauh lo vin a ti ve tak na a min ţhawng tak tak a ni.

“Bialpa pakhat a thih chuan a hnuah a dang pahnih an thi leh duh tihna maw?” ka tih chuan, “Chutiang chu an sawi dan alawm” a lo ti then a, u Zirbawnga em chu thi turin ka duh ve bawk si lo. Ani lahin min be tluk tlukin min duh zia a sawi chamchi a, min hmin leh hmain ka induh leh lawk ang a, setanic Nicky hi ka ngaizawng hmasa ang a, a thih leh thih loh ka enchhin phawt mai dawn em maw ni, a thih tak leh duh leh pu Taipuia te pawh ka ngaizawng leh ang a, a thih ve leh hlauh chuan a hnuah rilru nuam deuhin u Zirbawnga ka ngaizawng ang a te ka ti rilru nghal rum rum a, a sual thlak ka ti tho bawk si, mi fate ngaihzawn hlum phawk phawk laia lo dam bik chu ka tan pawh a nuam dawn lo, an thla ka hmu ang a, sam tla kawlh vek khawpin ka hlau ang a, ka sam a ţo leh rualin an thla bawk ka hmu leh ang a, damchhungin ka lu a kawlh phah ang tih te a hlauhawm.

“Eng nge i ngaihtuah vung vung a? Mi a ang mai, va inbual thuai rawh” ka nu’n a ti vin leh hlak hlak tawh a, ka lu um a nalh lo si, sam nei lo chi ka ni ve lo. “Tu nge fate zin haw sawi ţhaih chiam ngai?” ka tih chuan, “A thuphungin a nih kha ka sawi. Kan nunnaah hian thu kan nei lo, va inbual rawh” a ti leh tawh a, “Thingpui ka in phawt dawn” ka tih takah chuan, “Fithangi te chanchin i hria em?” a lo ti leh a, “Fawnvela zu in vangin nau ka chhiat zel ka ţhen rih dawn a tia, Fawnvelan ka ko dawn lo, duh leh anmahni’n min ko rawh se a ti” ka tih chuan, “Inhrechiang lo va nupui pasal neih ngawt hi a ţha lo reng a sin, an puitling lo dun bawk si, Fithangi nu leh i nu Mawisacheki pawh an inhauh hrep kha. Fithangi chhungte hi ţullo ah an inrawlh nasa a, Fawnvelan a zir lo bawk a, an thiam lo kual vel vek a nih hi. Nangpawh fimkhur viau ang che, mi puitling tak lo chu pasalah nei suh” tengtere mu kan pah hian a ti a, a ei ve ziah. Ţum khat pawh biakin chhungah tengtere mu a hmuam lut a, zai laiin a hak leh si a, kan zawn haw lo chauh a nih kha.

“I tih dan vel chu u Zirbawnga nei turin min duh chiang” fiamthu a ka tih chuan, “Pasal nei rual i ni ţep tawh. Kan khua angah chuan nula senior an ti ţep tawh ang che. College zirtirtu pawh kha a pawi lo” a tih veleh, “Kha berkher kha chu ka duh lo, a te si, ka lian si, nau puakpuan a puak tham lek pasal atan ka duh bik lo, fa pawh nei ila kan fate zinga mi emaw ka ti ziah dawn a sin” ka ti bawrh bawrh a, “Puak tham lek pawh nise i paw dawn tihna a ni hleinem. Pangngai deuh a thil sawi tum ve pawn mi hnial zawt zawt reng mai” a tih chuan, “Ka duh loh zawng hlir i sawi ţhin sia lawm, a engkim a te vek a, a hnar pawh chengkawl bial tiat lek tak tak a nih hi, mi te khawngaih ve ta che” ka ti let erh a, mi fate pawn an duh bik awm lo emai.

“I pi Binladarin aieng rawn dah belh rawh se a tih kha” a ti ta daih a, fridge ka en vat a, tih tham a awm tawh lo. “Naktukah Kalvari te inah chaw kan ei phawt ang a ka siam chauh ang” ka ti a, ka inbual zawh rualin ka pa feh a lo haw a, ka nu ang lo takin, “I chau em? A nuam em?” a ti sawk sawk a, ka pa hi chu a zaidam nain tih thinrim chi a ni lo, ka pa a thinrim tawh chuan hmangaihnain leh khawngaihnain hmun a chang lo a ni tawp mai. Ka naupanlaia a letling zawnga min khai te khan ka lu a hai nasa a nia aw, ka pumpui zawng zawng hi ka awmah an rawn chho ni tein ka hria a, min khai rei lo nain a letling zawnga khai kher kher chu a zawngchhang tlak loh khawp mai.

Zanah u Lalhuma a rawn lut chhur chhur a, “Ka inbual harh dawn” tih pahin bualin lam a pan ding nghal a, a in leih ve phur phur a kan hriat laiin huh miah loin a rawn chhuak leh a, “Ka haw na tur ka hai alawm mawle, a va chi loh ve mawle” ti bul bul chungin a chhuak leh a, kan lo en tawp a, a ruih zia chu pui tak a ni, min en ve ngei nain min hmuh pawh ka ring lo.

Mut hmunah u Zira nen kan inbia a, “Aieng bur tur chu ka ţhianpa ka hrilh tawh, nghak hret la, ka rawn thawn dawn che nia” a rawn ti a, u Zirbawnga fel sawt lutuk hian ngaih a ti ţha lo, a thih ve daih ka hlau. Maski pawh a fel lai takin a thi a, u Zirbawng kher kher phei hi chu a landan leh fel a inhmeh hlawl lo.

“A sirah Maski aieng tih a bel theih dawn em?” ka tih chuan, “Theih dawn e..duh leh aieng lem kan dah tel ang a” a rawn ti a, “Maski hi i ngaihtuah sawt e” ka ti daih a, a damlai te khan hria se a lawm viau ang. “A lo vanduai reuh em a nih kha. Mi hi hriatchian hma a ngaihdan siam ngawt loh tur tih te kan zirchhuah phah a, a ţha phian alawm” a tih zet hnuah, “Ah…a zia lo rualin a ţha phian” a ti leh a, “A thi kher kha chu a zia lo a, mahse a ţha phian” a ti leh bawk a, “Awii…sawi ve lo mai teh. A thihna aţangin zirlai ka zir chhuak a te ti ve mai ta che. Mitthi inah a zia loh rualin a ţha phian han ti chhin teh, mitthi bulah duk churin i mu ve bal mai ang, damin i haw tawh miah lo ang. A changin ţawngkam i thiam a, a chang leh i thiam lo leh a” ka tih chuan, “Mitthi chanchin sawi chuan fimkhur a ngai a, ka buai vek a nih kha” a rawn ti a, “I haw daih sia min ngai em?” a tih leh chuan, “Lunglen hi ka hre ve vak lo a” ka lo ti a, “I thinlung hi chhut sawm a chakawm” a tih chuan, “Eng vangin?” ka lo ti a, “Aww…min ngai ve deuh ang a” a ti chu ka ke hnuai a za vek thei alawm le. “Awiii….what a very low oxygen, ka thaw seng lo, dêk reng angin ka awm” ka tih chuan a nui hawk hawk a, “Hetianga kan awm hian nuam ka ti. Induh tawh miah suh. Ka hman veleh ka lo zin ang a, park ah pangpar kan phun dawn nia” a rawn ti a, “Mipa zawkin pangpar i ti reng a, bakah i taksa leh pangpar hi inrem ka ti lo. Mipa ve si pangpar han ngainat tlat” ka tih chuan, “Pawi an sawi loh em hi. Kan inhauh hmain mu ang, naktukah ka ţhianpa ka be leh ang a, chanchin ka rawn hrilh ang che” a ti a, a dah zui nghal a, kolasib ka thlen hlim khan ka ro rep a, a rukin thla min lak sak ni ngei tur a ni whatsapp ah min rawn thawn a, ‘what a skin crack’ a rawn ti chu ka lawm chiah lo, khawlum lai em em chuan ka chât bik lo a, kawng a khûk nasat em vang zawk a ni.

Zingah hma tawkah thoin ka insu a, ni chhuah rualin buh ka pho a, zin chauh pawh a sawi theih loh. Min dawr ţhin tute lahin, “I dawr chhung a lum emai min rawn pan rawh” an ti ţan tawh a, fan in min chhem phei chuan a lum zual ting a ni mai.

Tukţhuan eikhamah Fawnvela te inah ka phei a, “Nunhlimi leh a pasal hlui kha an innei leh tawh” an lo ti tak nain ka sawi zui pui lo, rilru a tawp hi chuan ka ngaihven zui peih tawh lo ţhin a, hrehawm pawh ka ti tawh lo.

“Nu Mawisachek, Fithangi nu nen in inhau a ni maw?” ka ti daih a, “Hau ang chu, a fanu hi ka fanu ang chiaha ka en ve chung hian eng emaw hlekah min rawn ankhum chiam zel a, ral aţanga ro rawn rel a tum a, in khata kan awm chung hian keini pawh an nupa inkarah kan inrawlh ngai mang lo a nia, fate pawh nise nupui pasal an neih tawh chuan nu leh pate hian awmdan kan thiam ve a ngai, kan hauh bur thiang tawh lo. A rawn tihdan kha a ngeiawm em a, ka chhang let ve a nih kha” a ti bawrh bawrh a, sachek a chhuak bawk si, inchhung a lum uap churh a, sachek a chawhna chu dahin a dul langin a kawr a hlim a, “Ngawi teh Remkalam, thlasik huna sawiah khek ang, a lum emai thinrim theihna lam ka sawi peih lo” tih pahin a ţhu hnawk a, “Thlasik a la hla e…hriat pawh i hre leh tawh lo ang” ka tih chuan, “Khawlum lai chuan ka thinrim peih hlawl lo, Fithangi nu nen a kan inhau zo pawh ka chau hnawk reng a, Fawnvela lah insiamţha duh mang si lo, ‘sachek zuar fapa’ tih thupui hmangin Fithangi nen a kan thawnthu ka ziak dawn a tih kha” a tih laiin Fawnvelan, “Ziak dawn reng e, a nu hi zoram mipui huat rawn theih khawpa sualin ka ziak ang, a chak lo viau ang. Sual mangkhengin ka ziak ang a, kolasib mipui, a hman hmanin lo beng rawh se” a ti tun tun a, “I ziah ţan hma hmain i peih lo leh tho ang” Nu Mawisachekin a tih laiin Sangkhuma a lo lut a, kan lo en ţhup vang maiin, “Min rel a ni maw?” a ti nghal ringawt a, “Khua a lum, tumah kan rel peih lo, chhuak teh u” nu Mawisachekin a tih takah chuan kan chhuak nghal dial a, ţhianho a quarter lam kan pan leh ţham ţham chu nuam tak a ni.

“U Zirbawnga fel sawt zia chu e..min buaipui vek a, Maski pawh a thik tawh lo reng reng. Aieng bur tur pawh min chah sak vek dawn” phur deuha ka tih chuan, “Tu nge mitthi tawh thik ngai?” Sangkhuman a tih laiin Fawnvelan, “Mitthi tawh ti bawl bawl kher lo la, Remkalami tan pawh a nuam nang” a lo ti ve thung a, “A thattu te hi hre ngat ila chu e…ka sawisa nasa viau ang. Awrawl chhuah meuha a pa ţap ri kha ka bengah a la cham reng. A fapa neih chhun a nia, police tel lo in zalen deuhin a ruang pawh a kil ve thei lo a nia, Maski kha a vanduai a, a khawngaihthlak nain vanduaina a inhneh tir kha a pawi a nih kha. Ani aia vanduai tam tak an awm a, ruihhlo ah an ţuan vek kher lo a, Maski chu ruihhlo ah a ţuan a, a ţhian kawm duh zawng te, a khawsak duhna hmun ten a zir loh vangin a tualthi reng bawk a, ka khawngaih e tih bak a hlawh lo, a nun uluk sauh zawk se la chu a la dam ve reng ni mai tur” Sangkhuman a tih chuan, “A dik alawm” ka lo ti a, mi vanduai rau rauah pawh Pathian leh kohhran bel tlat ho chuan zah an kai tho a, nun beidawn luat a ruihhlo a tlan, khawlai a tal tam deuh te tawp dan hi chu a rapthlak ţhin. Maski nun aţang hian mi tam takin zirlai eng emaw tak zir chhuak se, insiamţhat phah nan hmang se a lawmawm viau ang.

Quarter kan thlen rualin, “My friend” ka ti nghal lang lang a, bucket khumin u Rinchuta zawk a rawn chhuak a, a pai khut hnuah bucket chu la thlain min rawn en a, engmah sawi lo vin a lut leh a, “Fa pakhat chiah an la nei a, pa berin bucket a khum nghal ur ur a” Fawnvelan a lo ti a, inchhung kan lut chu naupang lawm a lo darh nuai mai.

“Fa hi hetiang em em a harh lo deuh hlek hi neih theih dan a awm lo em mawni le” u Rinchutan a lo ti bui bui a, Kalvari lahin a lo melh rum nasa, “Bial i fan hlan te hian ka hah ţhin reng a sin, a sa a ţha si, a rit ropui si, a hrisel miau chuan a harh ve bawk ang chu” a ti hlak hlak a, aw thian kharh kharh chungin kan ţhu tlar ţhâm a, “A hrisel khawp mai” u Rinchutan a ti ban churh a, “Mut te hi a mu tlem a nia, my friend, lo ţhu rawh u ka’n ti fai ang e, ka kawng a na em em mai lehnghal, u Rinhlua lah hi nau a awm ve dek dek a ‘ka inherh’ a ti nghal zel a, nilengin mawng ka hung hman lo reng reng” tih paha a ţhu chu u Rinchutan, “Kha, i mawng i hun chiah kha” a lo ti a, kan lam hawiin tawitein a nui a, pawisawi loh hmel deuhin Kalvari a en leh vat a, “I chhe seng sung” Kalvari in a lo tih chuan, “I ţha seng sung a nih chu luliannu” a tih laiin hnunglam aţangin Dawnfuhan a rawn nam a, Dawnfuha zawk a tluk takah chuan hmanhmawh deuha pawmin a lu a tuai sak a, an duat si, a harh lutuk hi an ning tho bawk si, pathum chauh an ni nain an inchhung hi a lun a ni tawp mai.

“Bible vel kha a ban phakah dah lo la, a khawih chhe palh hlauh ang e. Chhuar sang laiah rem vek mai rawh, Bible lehzel kan ven him zawh loh chuan a zahthlak lutuk ang” tih pahin u Rinchuta chuan choka lamah Dawnfuha a pawm phei a, “Tv hi rawn entir leh mai rawh” Kalvari in a tih chuan, “Nileng ţhak ţhaka tv a en chuan hma a sawn mawh dawn emai. Naupang tv en nasa, changkang mawh deuh te, mizo ţawng thiam ţha lo te an awm ţhin hi. Nikhatah darkar khat vel a en chuan a tawk viau a ni. Phone phei chu a khawih theih a dah reng reng loh tur, tv leh phone ni lo, a awmna hmun leh a hun tawn a zirin inzir rawh se. Tv leh phone a awm tlei i tum chuan a changkang har lutuk ang” a ti ve duah a, “Naupang enkawl hi fimkhur a ngai a nia, buai vanga tv hmaa dah tawp te, phone pek leh chawt zel te hian thil ţha a hring chhuak lo, an hlawk pui theih tur zirtir an ngai, tun aţanga bul kan ţan loh chuan nakinah kan inchhir ang” a ti leh a, Kalvari a ngawih reng takah chuan, “I hria maw luliannu?” a ti leh kher a, ball lian vak lo hi choka lamah a thlawk phei rang khawp mai.

“Remkalami bulah awm tam lo bawk se la” fiamthu a a tih leh chuan, “Min sawi tel ve ringawt suh, a harh tehreng nen, a sen lai chiah khan a lawmawm” ka lo ti a, “Ka fapa hi chu lawm chawp a ngai hleinem, dah tawp mah ila a hlim em em reng mai a ni. A harh leh lutuk erawh engtianga hmalak chi nge a nih ka la hre lo” tiin lungawi hmel deuhin Dawnfuha chu a en a, “Tu nge i chhun ang aw? Kei lah ka pian a hnu lamah vawikhatmah ka harh lo a” u Rinchutan a tih chuan, “Khatin min rin loh hmel deuhin ţawng ziah suh. I harh zia ka nu’n a sawi vek, enteh my friend, Dawnfuha hi a en a, tu nge i chhun ang aw a ti ve ziah. Kan nupa inkara inrawlh ve an awm ang mai hian a ţawng a, a chang chuan ka haw riau zel” Kalvari in a ti hlak hlak a, “Ţawngkam ka thiam lo a, tu nge i chhun ang aw ka tih hian nangmah leh keimah bak ka rilruah an awm ngai lo” u Rinchutan a lo ti leh hlauh a, “Fa in neih hnua in in a lo len hian ngawih reng a awl e” Sangkhuman inthlahrun hmel deuhin a lo ti ve bawk a, “Ţawng bawrh bawrh rawh u, u Chuchua thusawi hi chu engahmah ngai suh u. Inchhung ka ti fel ang a thingpui kan lum dawn nia, vawksa rep kan ngah a, Fawnvela leh Sangkhuma ten an duh ang thlapin siam bawk se la” Kalvari in a ti sawk sawk a, “Ngah nge maw ka beng i pawh i pawh le? Mutchhuak hmel te hi pu ve ţhin teh rilru a nuam deuh ang” Dawnfuha en chunga u Rinchutan a tih chuan Kalvari a ner nang nang a, u Zirbawnga nen hian in anna lai an ngah rualin an inang hlawl bawk si lo, tehkhin ka tum apiangin ka tehkhin thiam lo ziah. Dawnfuha a harh pawhin u Rinchuta chuan engtinmah a ti phal lo a, u Zirbawnga chuan a sik ru mai zel a, fa nei ve ta se a sik ru phal angem tih te ka ngaihtuah a, an thlah ho fa te hi an harh hmel hlawm si, u Zirbawnga hi lo nei ta ila Dawnfuha aia harh fa kan neih chuan keichu ka damchhuak zo lo ang.

“Chhuat ka’n nawt leh zuai ang” Kalvari in a tih chuan ka tho nalh a, “Ka lo nawh chhawk ang che” ka ti a, a chauh hmel tak tak a, a duh lo viau nain ka nawt lui tlat a, a ni’n thingpui leh a hmeh a lo buaipui a, “Fawnvel, Fithangi chu engtin nge?” a ti a, chhuat ka nawh zawh hnuah keipawh dawhkan kilin ka ţhu ve a, khua a lum bawk a ka tukhum lam hi a lum zual pup pup ni maiin a hriat. “Hmeichhia zawk a nia, a tlan zawk a ni chung hian min koh hma chu ka ko dawn bik lo” Fawnvelan a lo ti hmuk a, “Nupa chu inhauh chang a awm a” Kalvari in a tih laiin ka kutah thil tui ril lum pup hi a rawn far a, ka dak zui nghal a, “Remkalami hnar a thi” tih pah tho nghalin Sangkhuman ka tukhumah a dawm a, “Lapua kha” u Rinchutan a ti ri ka hria a, midang chu an che sawk sawk niin ka hria. “Nisa ah i awm nasa em ni?” tih pahin Kalvari in lapaw huhin ka hnar bul leh khabe vel a rawn hru fai a, “Ka hre lo, tukin a buh ka pho bak chu nisa ah ka awm lo” ka tih laiin ka hnarkua ah lapua a hnawh a, Sangkhumab ka tukhum a la dawm reng bawk a, “Ngati nge i hnar a thi thut a? Na i nei mi?” hnai deuha min bih chunga a tih chuan, “Ka engmah a na lo, ka zin chau a, ka hah ve aniang” ka tih pawhin, “Lehlam hi a thi ve em?” a la ti tho a, min thlek du du a, Fawnvela pawh a bang chuang lo, “Sangkhum, thisen ka hlau i ti a ni lo’m ni?” ka tih chuan, “I thisen te chu hlau nang” a ti a, Fawnvelan, “Hna i thawk nasa lutuk a, i la bawk rawp ang kan tih kan tih ţhin kha” a ti bawk a, “Ka ţha” ka tih hnuah pawh min la veng ru ran reng hlawm a, Kalvari lahin dawhkana thisen kai thlenga hru faiin kawr hak tur min pe a, “Pawisa chu a awm ve zel mai alawm. Hna thawk hah vak vak tawh suh, i taksa hian a tlin reng dawn lo a nia aw” tih pahin Sangkhuman na lo te tein min nghawk zeuh zeuh reng a, ka hnar thi mai mai ah pawh an vaiin an buai a, an ngaih a ţha lo nghal a, natna nasa deuh phei chu nei ila an hriat rualin an ţap tliar tliar thei ang chu. Hna ka thawk nasa lutuk a, ka taksa in a zo lo a nih ka ring ber a, kolasib lum bawk, kan khua lah a lum bawk, kan che reng bawk si a, luhai a kan tlu tawp lo te hi a mak zawk ngawt alawm.

Kalvari nen a anţam kan then laiin Fawnvela ten sa an buaipui a, u Rinchutan nau a awm ve thung a, a phun reng mai, Kalvari kheuh zeuh paha, “Awii my friend, hetiang hian a phun peih tih ka hre chiah, khawlum lai phei chuan ka ning ţhaks” ka ti a, amah ka sawina tih a la hre miah lo zui a, “A thawk ţek ţek chhung chu a phun reng ang, ţawngkam a thiam lo a, a duh ang a sawi chhuak thiam lo te hi ka vannei letling a sin” a ti a, ka lo bu nghat nghat a, nawm loh nen a ninawm tak tak a ni.

“Miin, ‘u Lalhuma hi Nobawihi a neih chuan a thi vat ang’ an ti a nia aw, tunlai a bei viau em ni a?” a tih chuan, “Bei ang chu, kan in pawh an in emaw tiin a rawn lut a, bualin a luh hnuah chiah a ni lo tih a hria, a reh leh vang vang tawh bawk a, ka zin haw hlim hlawtin khati khawpa a rui ka hmuh nghal chat theih chuan a bei viau tihna a ni mai, tumah zawt lo mah ila ka sawi ngam sak” ka ti a, “A zia lo e…zu hmun sa hmunah pawh tal se mahni inthunun thei tur khawpin a kum a upa tawh han ti ngawt dawn ila ruihhlo a nih tawh chuan mahni inthunun a har a, ruihhlo hian mihring a thunun tawh ţhin si a tiraw? Zu pawh ka in thiam an ti an tia, an thiam reng chuang lo. Lo kal ve se ka ti, tunlai chu ka hmu khat a, ka ngai reuh tak tak a ni” a ti malh malh a, u Lalhuma hi chu kan khuaa a awmna a rei tawhin mi a chhawnchhaih peih ţhin si a, a awm ve tho, tupawn kan ngai vek ang.

“Fawnvela leh Sangkhuma te pawh hi zu in an awlsam mah mah, zuin a la in let vat ang tih a hlauhawm” Kalvari in a tih chuan kan hma lam a ri bawp a, sa awmna chawhtawlh chu dawhkanah an khawng ri a nih hmel, rum zeta kan lam rawn melhin Fawnvela chuan, “U Rinchut but buta aiin in phun peih daih zawk. Zu ka in vanga min hauh hian Fithangi ka hre chhuak a, ka thin a rim ziah, min hau rih suh u” a ti hmuk hmuk a, “Hmangaih vangin a hau che a nih kha, i lung a leng hmasa leh dawn tho tho” ka tih chuan, “Hmangaih vanga kolasib pan ta tumah ka hre ngai lo, vawksa ka hmuh te hian a nu kha ka hrechhuak ziah lehnghal, a tui em a, peih lo chung chunga ei luih a ngai lo hlauh zawk a” a tih laiin dawhkana ka phone dah chu a ri a, u Zirbawnga bawk a lo ni.

“U Zirbawnga a nih hi” ka tih veleh, “Kha lah kha, nula an nih chuan eng hnam pawh a kawp thei” Fawnvelan a lo ti fiamthu a, a tawp hmain ka la a, pawna ka chhuah hnuah chauh, “Kalvari te inah chaw kan ei dawn ka tih kha” ka ti nghal a, “Aieng bur tur chu ka chah tawh aw” a rawn ti hmasa te te a, “I va chah hma leh si ve” ka tih laiin, “I hnar a thi em ni a? Natna i nei em ni?” a rawn ti thung a, kawngka zawna ding ka ni bawk a inchhung lamah ka hawi let a, Dawnfuha pawmin u Rinchutan min lo en reng a, ka hawi let rual khan a kalsawn daih thung a, min en liam mai mai emaw tih laiin u Zirbawnga hnenah report a lo pe fel diam tawh a nih hmel.

“Hnar thi zawng zawngin natna a chhawm hleinem, u Rinchutan a rawn sawi hlauhawm a ni chiang mai” ka tih chuan, “Râwn duhna ka nei a, nichin khan ka rawn bia a” a ti ta chiah reng a, a va han ţawng thei sawt tak, a tlangval lai a ang tawh lo reng reng, fimkhur viau a ngai tawh dawn a nih hi.

“Khawlum ka zo lo a nih hi” ti mah ila, “Na i nei lo tak tak maw?” a la ti tho a, “Nei lo” ka tih tawh hnuah pawh, “I nu dil la, Aizawlah in entir turin ka hruai ang che” a rawn ti leh a, “Vawikhat hnar thi vang mai mai a Aizawl kal ka rawt chuan min beng hrep a ni mai. Aieng chu ka lo ngaihtuah deuh ţan ang” ka tih chuan, “Siam dan min lo hrilh la i damţhat loh chhung chu ka lo siam chhawk ang che” a ti leh tawh a, “Hnar thi mai mai ka mut pui hmak ngai lo, ka lo ngaihtuah ang a ka hrilh leh ang che. Bawm man chu engtin nge?” ka ti a, a reh vang vang a, “U Zirbawng” ka tih veleh, “Dam ţek ţek aiin pawisa ngaipawimawh suh. Pawisa duh min ti ziah a, nangmah hian a nih hi lo duh zawk” a tih chuan, “Duh ang chu, dam ţek ţek kan tum poh leh pawisa a pawimawh zual alawm. Mitthi mukbang nawk nawk i hre ngai em ni? Dam dawn chuan eitur a ngai. Mitthi ai chuan a la dam sen kur ho hi kan hautak a, pawisa thawhchhuah harsatzia hriain ţhalaite pawn nu leh pa te tih hautak loh hram dan kan ngaihtuah a ngai, tunlaiah pawisa hmuh theihna tur thil a tam tawh. Pathian nena taima taka thawh chuan hlawhtlinna hi mi zawng zawng ban phakah a awm. Chuan aieng bur tur chu engzat man nge?” ka ti bawrh bawrh a, muangchangin, “Cheiiii” a lo ti ban charh a, “Eng nge?” ka tih chuan, “Min chhang nasa hle mai, phone line a kal sual emaw tih mai tur alawm. Aieng bur chu keiman ka lo buaipui ang, nakinah ka lo be leh ang che” tih leh phone dah a rual a, a duh zawng sawi loh chuan chhuanlam siamin a dah nghal zung zung zel.

Fawnvela ten rawng an bawl laiin bathlarah Kalvari nen kan ţhu chhuak a, tlemin a dai deuh tawh bawk a keipawh ka harh ve deuh. “I hnar a thi leh palh ang” tiin Kalvari in hmaizahin min zap leh ţhin a, “U Zirbawnga khan eng nge a sawi?” a tih chuan kan inbiak dan leh aieng bur tur vel ka hrilh a, “U Rinchuta hi a mak tak tak a ni. A buaipui ngai loh tehreng nen tunlai chu u Zirbawnga nen hian a buaipui thar cheu a, u Zirbawnga hian na deuhin a lo vau a ni lo maw?” a ti heu mai.

“Awii…a vau awm lo e my friend, in pa hi a ţawngthei ve hrim hrim a nih hi” ka tih chuan, “A awihawm loh, thil ţul lo a sawi ngai lo. A phun ve pawh hian ning ţhin mah ila thil ţul chiah a sawi tih ka hre tho. U Zirbawnga hi a upa zawk a, engtin emaw tak a vau a nih ka ring” a ti tlat a, “A fel tawh em hi, Maski pawh a thik tawh lo a” ka tih chuan ka sawi zawh hma hmain, “A thik reng nang, Maski-an engmah a ti thei tawh hleinem. I rilru lo ti na lo la tunah phei chuan ruh ro bak a ni tawh lo ang a, mitthi tawh a thik te chuan i hlat sauh dawn tih a hre vek ang chu. U Rinhlua hian mi chanchin a sawi ngai lem lo a, i hnar thi thu thlenga a hre nghal vek a nih chuan u Zirbawnga hian a vau tihna” a ti pang pang a, a inringtawk ropui si, “Khati khan ti suh aw” lungawi lo deuha ka tih hnuah pawh, “Vau lo se u Rinchutan engmah a hrilh lo ang” a la ti tho a, “U Rinchut but buta te ang chu engtin pawn vau se a vau zam thei lo ang. A ţawngthei khawp a nih saw” tih pahin inchhung lam ka hawi a, Dawnfuha pawmin a lo ding leh reng tawh. “En ta che saw, min en leh kur tawh saw” ka tih rualin Kalvari pawh ka hawina lamah a hawi ve a, “Eng nge i tih a?” u Rinchuta hnena a tih chuan, “Ka ding” tih leh inher a rual a, a kalsawn ta daih a, “I hmu mai em? Kan ţawng a ngaithla ru a nih kha. U Zirbawngan a vau hlawl lo ang, u Zirbawnga nupui neih loh a hlau zawk a nih kha. Tunlai chu keimah bak a buaipui leh tawh si lo a” ka ti a, Kalvari lama hnai deuh deuh a kun chungin ka khuh lui vak vak a, “Nia…Maski nen in inkawp chiah khan u Zirbawngan a lo duh zia che ka hre chhuak” a tih te chuan ka awm ka dawm a, amah pawh en lo va a lama kun hnai paha ka khuh luih vak rual chuan a ri bawp a, ka lu a na nghal vung vung mai.

“A na lutuk Remkalam” tih vin ţhak pahin min ban zuau a, hnunglamah eu hman lo ila chu ka samah a kek leh daih tawh ang. “Nangmah ang chiahin na ka ti ve tho” ka tih chuan, “Khati vaka min rawn tauh a ngai hleinem, ka lu a hai nghal vek” a lo ti a, “Ka hmu hleinem che, i lu a lian tho, a na kha a insem darh zung zung anga, ka lu na aiin a reh hma zawk dawn tho tho” ka tih chuan min melh ram ram a, “U Zirbawngan u Rinchuta a vau ka tih vang maiin min tauh lui a ni maw?” a ti a, a lungawi loh hmel khawp mai.

“A teuh lo, chutiang rilru bal ka pu ngai lo. Awii my friend, keichu nangmah vang hian u Zirbawnga ka neih peih loh phah vek. In khata kan mo dun chuan kan pasal chhungte lamin buaina siam lo mah se kan pahnih hian kan inti buai reng tho ang, i thinchhe ropui si, em em che hian” ka tih chuan, “Nangpawh i thin a chhiat ve tho kha” a lo ti a, “All go a nih chu a” ka ti hmak a, “Nang aiin ka mo hmasa a, i rawn mo ve chuan ka ti rethei ngawt ang che” a tih chuan, “Awii..what a funny thing, misual ho an lo zin apiangin in nupa hian chhan in ngai ang. U Zirbawnga nen te chuan tumah kan hlau ve dawn si lo a, kan chhan lo tawp mai tur che u a sin. In pa pawh hi ţawngthei lutuk suh se” ka ti a, kan nui uar uar a, “An nutei te ho kha an sual si, in nupa in in fight back laiin keini nupa kan lo stand back ang a” a ti ve bawk a, “Kan hnungah kun ngulin in ding ang a, kei lah ka ang thei dawn ropui si, ka aw ri a chhuah theih ţek ţek chhung chu ka hnial let hreh dawn miah lo a, u Zirbawngan min chhan dawn ropui si, kan nupa a kan inhauhpui laiin ţap purin kan hnungah in lo ding ang a, ţawng ve ngam si lo vin in meng ker ang a” ka tih te chuan ka bana rawn dawmin a nui uar uar a, “A nuam dawn lutuk my friend, u Zirbawngan chhan duh lo ta che se la engtin nge i tih ang?” a tih chuan, “Amah ka hau tel ve ang” ka ti then a, kan uang mai mai emaw tih laiin, “Mo dun thei tak tak i la aw” a ti leh daih tawh.

“Enteh my friend” tih pahin min hnaih rawk rawk a, “U Zirbawnga hian a duh satliah che a ni lo, a hmangaih che a nih hi. A landan ang lo deuhin a rilru a phanchang a, a rilru a palian ka ti mai, a nghet churh a, thil bana charh bur ang vel a ni. A rilru diktak a hriatthiam loh vang te, nangman bialpa dang i neih vang ten in in ţhen zeuh zeuh reng a, in inhmuh rualin in inmil leh nghal zel a, tunah chuan amah hian i laka a rilru put hmang diktak a hre tawh a, a thlah mai mai tawh lo ang che” a tih chuan, “U Zirbawnga nen hi chuan inţhen hmak lai kan nei ngai lo, kan inmil leh zel a, pu Vana superglue a charh zawm ang hmak kan ni” ka tih veleh, “Pu Vana superglue han ban bik zia hi” a ti a, kan nui hak hak reng a, keipawh hian min hmangaih zia kan khuaa ka haw leh hnu hian ka hre tawh, sawi lo mah se ka hre tho, a chetziaah hian a lang ve thei tlat a, ka nat a hlauh dan leh min buaipui danah te, amah phei chuan kan inkawp nghetah a ngai leh hmak tawh ang.

Zanriah eikhamah Sangkhuma leh Fawnvela te nen kan haw ho leh a, Nunhlimi te in zawn kan thlen chuan, “A hlim angem le?” Sangkhuman a ti zauh a, “Thil dik lo a ti zeuh nain ka ngaihtuah ve ţhin. Fa an neih belh leh ang a, an rawn inţhen leh tho si ang a tih te, a tam mai” a ti charh charh a, “A in enkawl thei ang, nakinah kan bia ang a, fa neih belh rih lo a an pa enthla hmasa phawt turin kan hrilh dawn nia” ka ti a, ţhian kan nih angin keipawn ka ngaihtuah ve tho, rilru zawng zawngin ka kawm thei tawh lo thung.

Kan in thlen hma deuhah u Chianga te ho, Nobawihi team te an lo ding khawm laih a, kan hnaih rualin lei a u Lalhuma ţhu nuai chu kan hmu ve nghal a, “Tho teh, kal vat vat ang” pu Taipuian a tih veleh muangchangin, “Ka tlu a ni maw?” u Lalhuman a ti ban charh a, “Nakinah a duh leh mai ang che. Zanin chu ka inah riak mai rawh” pu Taipuian a tih leh takah chuan u Nobawihi nen an inţhen a nih ka ring a, “Nang a zu rui reng ka duh lo che min ti khanglang mawle…a zuar miau a ka ruih mai lohin, inbual nan a hman turin zu a zuar hleinem” a ti pung pung a, anni ho zu rui hi chu mak pawh kan ti tawh lo, tupawh hian kan en liam vel mai mai tawh niin ka hria, kan in bulah kher an awmkhawm ţhin lehnghal a, anmahni en tawp pawh hian zuin nuihzatbura min siam theih zia a hriat theih.

U Lalhuma hawi kual vel chuan min rawn hmu fuhin thei leh thei lo hian, “Laremmawi” min ti a, Lalremmawi pawh a ti thei tawh lo. “Min cho mi? Khawiah nge ka siliper?” lei lam bih kual du du chunga tih pahin a nui huk huk a, “A nuihzatthlak loh emai” ka tih chuan, “I pa siliper bun tawh loh kha a hrui lo pawt phawi ang che, ka siliper ah ka vuah duh” tih paha a tho ţuah ţuah chu a ţhianten lo puiin an dawm ding a, chhe tawh tak a ni, u Nobawihi nen an han inkawp tak tak chu a tar bawi mai.

“Nakinah i lo leng dawn nia” ka ti a, kan in lamah kan pen san daih a, “Fawnvel, zu i in reng chuan khatiang chiah khan nakinah i la awm ve dawn a nia. Keini’n fa kan neih duah tawh hnuah zu hmunah ţawp deuhin i awm hnuang reng bik mai ang. Inngaihtuah nasa viau ang che” thutak deuhin ka ti a, min chhang lo a, keipawhin ka sawi zawm lo. Fiamthuin, “Nakinah Sangkhuma sam hi ka la tih buan sak thâng ang, sap tlangval a ang viau ang” ka ti a, “Keipawh hi a kawlh viau nain eng rawng emaw chu min hnawihsak ve teh” Fawnvelan a ti a, keiin ţul ka ti si lo, kan inhnial zui bap bap hlawm a, kan nui pah reng tho. Thutak deuha tawi te ka sawi kha a ngaithla liam dawn lo tih ka hre bawk.

Kan khua a ka haw aţanga karhnih lai a liam leh tawh hnuah u Zirbawngan aieng dahna tur bur min rawn thawn a, bur a bel tur nen lam a lo siam tir thlap a, min rawn phone ruala, “Awii..i thil lo thawn hi hmu reng mah ila ka awih lo” ka tih chuan, “A in rin loh thlak e” a rawn ti a, “Bur hi a fai si, a chhin lah hi rawng chi hran hran a awm a, i duh chuan thil i lo tih theih hi le” ka tih chuan, “Umm..ka dawi chhuah a nih kha” a ti a, ka en nawn leh ţhin, an fim sar a, an thianghlim bawk si, a chhin awmdan lah duhthusam, a ang chiah chiah hi ka hmuh awm pawh ka la hre lo. “Sarang a thun tawp aiin a lang mawi dawn a, bakah thun tam deuh a ngai ang a, bur man leh a bel tur man zawng zawng nen 250 vel a zawrh a ngai tawh dawn a nih hi” ka tih chuan a nui a, engmah phei chu a sawi lo.

“Ka rawn zin hman ţep, min lo nghak rawh, ka siampui dawn che nia. Zawrh tur ka hawn ve bawk ang a” a tih chuan, “Bur hi engzat man nge?” ka ti leh a, “Bur kha chuan man a nei mang lo, khami bik kha chu ka pe char char ang che” a ti deuh tlat a, aieng hming ka thlak bawk si, Maski tih a ni tawh si a, ka inthlahrung ve deuh. Bakah amah nen hian tunah eng nge kan nih mek ka hre lo a, kan inbe ve ziah chung hian han sawi fak tur ka hre chuang lo.

“Ngaihtuahna i ti buai, a man zat i sawi duh bawk si lo” ka tih chuan, “Ka lo kal anga a dik vek mai ang” a ti a, ka nu lo haw pawhin, “Eng nge awmzia? A tam bawk si, eng tur nge?” a rawn ti a, ka sawi chuan, “A va fel ve” a ti a, thil dang a sawi lo, ka pi Binladari a zei bawk a ka nu rilru a hmin vek tawh. “Tunhma chuan kan khaw tlangval zawng zawngin min ngaizawng ţhin a” a ti te kha ka awih lo ţhin a, mahse ka awih vek tawh, a zei dan em em hi, a fanu pawhin ka hmin thei lo a, u Zirbawnga takngial pawhin a hmin theih loh kha a tar berin a hmin thei a nia. Kalvari pawhin, “Ka pu hi la dam lo se chu ka pi hi a la lerh peih ang” a ti ziah a, ka pi Binladari awmdan en hian chu chu thil ni thei tak a ni.

“I chawn kha engati nge a duk leh ringawt tawh a? I tlu leh tawh em ni a?” ka nu’n a tih chuan, “Teuh nang…ka pen apiangin ka tlu bik hleinem” ka ti a, “Tunlai chu i mak riau, i awm nguai nguai a, i duk leh ringawt zel a, in entir rawh” min ti a, na ka neih loh em vangin ţul ka ti lo thung. Kan khua anga lumah chuan tupawh awm se an ni nguai nguai vek ang. Chunglam mai bakah kawngpui ringawt pawhin min ur lum hum hum thei a nia, thlasik pawh a na, hah bawk si chuan a nun sarh reng theih loh.

“Gospel camping a awm leh dawn a, Lalhuma leh pu Taipuia pawh an luh dawn kha. I lut ve duh em?” a ti chu ka melh ram ram a, “Fawnvela hi thun ve tum rawh u, a ţul chuan Sangkhuma pawhin luh pui mai rawh se. Pathiana piantharna a chan loh chuan zu a in reng dawn, Fithangi nen pawh an inţhen hlen mai ang” a ti zung zung a, Kalvari in min rawn biain a rawn sawi ve chiah bawk a, a duh angin quarter ah Sangkhuma ka hruai a, “Gospel camping ah Fawnvela luhpui rawh, i tel loh chuan a duh lo ang” kan ti chu a peih loh hmel khawp mai.

“Chaw ei a tui duh si, ka thau vek ang” a tih chuan, “A pawi lo, ei ţeuh ţeuh mai rawh. Fawnvela hi zantin zu a in a, a buaithlak emai, a tlai hma a kan chhanchhuah a ngai alawm. Kan en tawp chuan eng emaw thleng ta se damchhungin kan inthiam dawn lo a sin” Kalvari in a ti a, kan thiam dan tawkin Sangkhuma zawk kan thlem a, mipa a ni a, Fawnvela a thlem thiam zawk dawn a, Sangkhuma kan hmin chuan Fawnvela kan hmin tel ah kan in ngai.

“Hei gamcha pahnih thar hlak hi la rawh, pai lut rawh u, ti mai mai lo ula” a tih hnuah u Rinchut but buta chuan, “Tum tak tak chuan Pathian aia zawn hmuh awlsam a awm lo a nia, kan ban pha reng” a ti leh a, “Tuktin hmarcha min rawn pe ang che Remkalam” Sangkhuman a tih chuan, “Tehreng mai, a thak ţha ber ber chi, pakhat ei a nileng daih ka rawn pe ziah ang che u” ka ti sawk sawk a, a indawm kun ngul a, “Thing zawrh ka tum a sin mawle” a tih pawhin, “I zawrh ai ka lo zuar ang” ka ti nghal a, min hnial ngaihna a hre lo a, zanah Fawnvelan rem a tih thu min rawn hrilh a, Fithangi ka hrilh ve nghal a, ani pawh a lawm khawp mai.

Kalvari nen kan ţhiante pahnih kan thlah ve ngei a, pu Taipuia camp lut hreh chuan an hla play chu sak puiin tui deuhin a lam a, a ţap pur bawk a, “Pianthar tluka nuam a awm lo, lut zel rawh u, nakinah kan lo hmuak dawn che u a nia” a ti deuh reng nain a ruih vanga puhin amah pawh an luh tir ve tho a, hmuah tur zingah a tel ve ta zawk a ni. Kan ţhiante pahnih pawh an ngui bur a, “Ka lu a na” an tih loh leh, “Thosilen tel lo chuan kan damlo haw ang” an ti a, an phun reng nain kan khawngaih duh lo a, an tana ţha tur a nih miau avangin an riahna hmun tura an luh thlengin Kalvari nen kan thlir a, an luh fel hnuah, “Tunlai chu i chauh hmel thei e, i cher deuhin ka hria” a ti a, min en vang vang a, “Zanah ka mu thei lo a, zing thawh hma tho a ngai sia” ka tih chuan, “Ngati nge?” a lo ti vat a, “Ele..ka mut a chhuak lo” ka ti then a, “Thawk nasa lutuk suh, u Zirbawnga a hausa alawm” a ti zauh a, “Mihring chin a hriat loh a, in nghah bur chi a ni lo” ka ti ve tlat a, kan haw rualin Fithangi hnenah chanchin ka hrilh a, “An chhuah hmain ka lo haw ang” a ti a, Fawnvelan a zir phawt chuan bul an ţan ţha leh thei mai ang.

Kan ti nek nek a Sangkhuma te camp lut pawh an chhuah a hun der a, kan lo hmuak ve thlap a, midangin hlim hmel deuha an chhungte leh midang, anmahni lo hmuak tu an chibai laiin Sangkhuma chu a ham bui bui a, a sam a pawr chhup a, min hmuh rualin, “Remkalam” a ti lauh a, Fawnvela erawh a reilote chhung pawhin a lang thar vuk mai.

Zanah ka inkhawm pui a, an lam sup sup a, hla an la nawn sek a, Fawnvela pawh a lam ve laiin Sangkhuma chu a zai nasa em em ringawt a, a sang lai kan sak apiangin a dak vak vak a, a zai tui khawp mai. U Lalhuma leh pu Taipuia te pawh an lam ve ngei a, an kut an beng a, zai apiangin an lam a, tu te mai pawh chu lamtualah an su luih luih a ni ringawt.

Inkhawm kan bang chu Fawnvela te nupa pawh an inzui haw hnak hnak a, “Ka inkhawm khat lutuk a ka pheikhawk hi ka tawt hman em mawni, a sang bawk si” Sangkhuma bana kaih paha ka tih chuan, “Thiam hlei lo va pheikhawk sang bun ve ziah a ngai hleinem” a lo ti a, ka pi Binladari dawra kal phawt kan ti a, kan in kan pelh hnuah ka ke ka bilh a, a la na em em zui a, Sangkhuma awm lo se chu ka tlu hnawk thei hial ang.

“I pheikhawk kha khai la ke lawngin kal rawh” a lo ti vin hlur a, “Ka tih dan tur chiah a nih chu i sawi” ka ti tak nain kelawng pawn ka kal hleithei lo, “Aaa…Sangkhum, min paw mai rawh. Ka dam hunah ka paw ve ang che” ka ti ta ringawt a, “Ninawm, ka pi Binladari zut tir nghal law law ang che, ka paw haw peih dawn miah lo che a nia” a ti hluk hluk a, “A mak lutuk, a na vung vung mai” ka tih laiin ka hmaah a rawn ţhu hniam a, “Lawn vat rawh, ka peih laia i lawn loh chuan ka haw san ang che” a ti leh ţan tawh a, “Ka pi Binladarin ke zutna hriak ţha deuh a nei” tih pahin ka lawn a, min dinpui rualin, “I va han rit em em ve” a ti nghek a, “Ka chaw ei a tum alawm, khati vak vaka au a ngai lo” tih pahin ka pheikhawk hnuai sang laiin a chhipah ka khawng a, a thin a rim nasa mai. Fawnvela vanga camp lut angah a in ngai ang a, a piangthar chiah lo aniang a danglam lo hrim hrim, hmui sawi bawi bawiin biakin chhungah a zai tih mai loh chu a danglamna hmuh tur a awm lo.

Ka pi Binladari dawr lama min chhuk pui chu a tum lawk ni miah loin min tluk pui a, thawm pawh kan chhuah hman lo, “Sangkhum” ka ti tuar ringawt a, kawngchhukah na na na chuan hreh viau mah ila kan lum lo thei si lo, kan tluk dan phei chu sawi pawh ka sawi thiam lo, invuan ding lo mah ila ka lum thui teh chiam lo a, Sangkhuma thawm pawh ka hria, “Ka bal vek” a ti vin hlur a, “Remkalami vang vek” a ti thul, vin deuha, “Khawiah nge ka pheikhawk khing?” a tih chuan amah aia vin hian, “Ka dawlh” ka lo ti a, ka thin a rim hlur mai. Amah leh a pheikhawk phei chu ka hmu lo hrim hrim a, ka ke a na bawk si, ka phone awmna ipte chu a hruiah ka la hum hram hram a, ka thlan vek a, kal kawngah hian bawlhhlawh ţawih thei an paih emaw tih tur khawpin ka rimchhe huam bawk.

“Pu Sawia bawlhhlawh paih tumin a thlauh ţhen leh ţeuh tawh aniang chu, kalkawng kha a nal vek alawm, ka pheikhawk ka la thawl zui” Sangkhuman a rawn ti hluk hluk a, amah pawh ka hmu thei tawh a, thawh ka tum ve mek chu dim lo deuhin min lo pawt a, “I tlu leh ange” a ti tak nain ka kawng te ka herh tel tawhin ka hria, awii..keichu ka damchhuah zawh pawh ka ring lo, a na sup sup mai.

CONT…

4
1

This Post Has 4 Comments

  1. Anonymous

    Va ngaihnawm thin tak next hi a nghahhlelh awm ngawih ngawih

  2. Anonymous

    Remkalami hi thisen cancer vel anih duh hmel eee… Sad ending inih tir chuan k tap vak ang

  3. Anonymous

    A ngaihnawm hle mai,Remkalami hi ka ngaih a ti ṭha lo e

  4. Anonymous

    Ngaihnawm thin mang e

Leave a Reply