You are currently viewing A Scandalous Marriage

A Scandalous Marriage

Spread the love

Mahni a intung nung chawp Sydney milian Mike Stone chuan thla khat chhung in nupui a neih ngei a ngai a ni – chuti a nih loh chuan sum tam tham tak a chan dawn miau si a! Natalie Fairlane chuan chu pa chu a duhawm vang leh a itzawng tak a nih vang ni hauh lo in, a pawisa hlawhchhuah tur thahnem tham tak avang chuan a sawmna chu pawm mai a duh rum rum hial a ni.

BUNG KHAT

Glebe lam pan a taxi a a chuan lai chuan Mike chu a in ngaihtuah muk hle mai. States lam a sumdawnna thil a a va kalna a a thil tawn chuan a tilawm lo hle in, ngaihtuah chiang mang hlei lo a a rilru a siam dan ah pawh chuan a lung a awi zan lo a ni.

Mahse a rilru thlak leh nan chuan a tlai lu hrat tawh in, tun ah chuan a tum ang chu a kaltlangpui ngei chu a ngai tawh thung.
In a thlen hnu chuan Mike chuan Helsinger nen a an inhmuh hun a hak tur atana Italian suit a lei hranpa ngat chu hlip in bualin lam a pan ding nghal nalh a. A inbual fel hnu ah chuan T-shirt leh jeans ha in ei tur a insiam nghal mawlh mawlh a. Thlawhna a an ei tur rawn chhawp khan a pum a fah ve zo tak tak tlat lo.

A eitur siam chu a in hnunglam leika ah chuan thu chung in a ei malh malh a, chulai atang chuan Sydney khawpui chu a langchiang in a mawi danglam riau hian a hre thin reng a ni.

Tun a a chen na in a lei nachhan pawh hi he a a thutna hmun a awm vang liau liau hi a ni nghe nghe. Tui fawn vel chuan a hah a ti dam sawng sawng thin a ni tih Mike hian a hrechhuak tawh miau a ni. Nileng a hna hah tak a a thawh hnu ah tawh hi chuan chulai hmun a whiskey no dawn chung a thut hahchawlh veng veng a, a rilru tawt lutuk te chu tihziawm nan a tuipui fawn ri ngaihthlak chu nuam a ti ber thin a ni.

Mahse tun tum zet zawng eng thil mah in a rilru hah na chu a chawk zo in a ring lo a ni.
A thil ei lai chu puar a duh hrim hrim vang in a ei mawlh mawlh a, a in ei puar hnu ah khawpui lam a inkhalh chhuah a a thian tha ber leh a banker ni bawk va hmuh chu a rilru ah a lian ber tawh. A ei na vel a seng fel lai chuan Mike chuan a thianpa Richard chuan a thil tum chu eng ang tak in lo dawngsawng ang maw tiin a ngaihtuah pah rauh rauh a.

Mike chuan a thil lo tum tawh dangdai angreng tak chu a pawmpui theih mai a ring deuh rum rum a. Pawnlam landan ah chuan Richard chu thupui fun hmel riau in lang mahsela, a ruk tak chuan chutiang mi chu a ni bik hauh lo a ni tih a hre miau a. Kum sawmli tlin hma a International Bank CEO ni thei tur chuan mi zawiawi leh mi kimki a ni dawn lo a ni tih chu tu tan pawh thil hriat har vak a ni tlat lo. Mike thil ruahman chu thil awihawm loh leh mak tak ni mahsela a hlawhtling a nih hlauh chuan an pahnih chuan an hausak phah lawih dawn miau a ni.

Minute nga hnu chuan Mike chu a leather jacket dum ngainat ber chu ha in a chhuak zui nghal zat a, darker chanve a liam leh meuh chuan Richard-a office ah a thu vang hman tawh a ni.

“Enge Helsinger ka va hmu lo i tih awmzia chu?” tiin Richard chuan hrethiam lo zet in a lo zawt ha a. “Sydney i chhuahsan hma khan inhmu tur khan engkim i ti fel tawh emaw ka lo tia sin.”

“Ka va thlen tlai khan Helsinger chuan LA a lo chhuahsan ve hman chiah a ni,” a lo ti bauh a. “Chhungkaw thil pawimawh eng emaw vang a ni awm e, pawi a tih thu a lo hnutchhiah nghe nghe a.”

“Khai aw, Mike. I va vanduai ve le.”

“A pawi vak hlei nem, a managing director nen kan inhmu a. Comproware chuan kan anti-virus leh anti-spyware programme chu an la ngaihven viau thu min lo hrlh tho alawm.”

Richard chuan, “Nia, an duh ngei ang chu,” a lo ti hlak a, “A tha riau tlat alawm.”

Mike chuan Richard thusawi chu a lo pawmpui hle a. A tha thlawt a ni, a bik in virus emaw spy emaw lo chhuah na chu chhuichhuak a, a bul thut atanga doletna, amaha a lo insiam chhuah thei dan phei kha chu tha chungchuang tak hi a ni ringawt. Chu program a buaipui tantirh atang chuan Mike chuan a software company te tham tak, Australia a inbun lehnghal chuan a thilsiam chhuah chu a phu tawk ang in a theh lar zo dawn lo a ni tih a inhre lawk daih tawh a. Khawvel pum a thehdarh thei tu tur international company a mamawh tih pawh a hre nghal a ni.

Ngun tak a a chik fe hnu ah American software company tharlam tak mai, Comproware chuan a mit a la ta thuai a. Chu company chuan thil an vawrh lar chak mai bak ah, program thar leh game thar siamchhuak tu te hnen ah chuan contract lian tham tak an pe thin in, company dang te ang a vawikhat a pawisa hlawm a pe tawp lo in royalty an pe reng a ni tih a hriat vang a ni.
Telehone leh internet a mumal lo tak a an inbiak kual fe hnu ah Mike chuan America a va kal a, Comproware company nei tu nen chuan hmaichan ngei a indawr a rilruk avangin a va pan ta kha a ni a. Ni hnih a va cham chung in Helsinger chu contract a ziah fel pui hman a in beisei kha a ni a. Thil lo thlen dan chu a beisei ang a ni hauh lo mai bak ah, tun a a thil tum ang te phei hi chu ngaihtuah pawh a lo ngaihtuah pha bik hauh lo a ni.

“Contract chu ka va hmu ta lo a,” a ti muang ruih a. “Mahse partner ni tur a sawm na erawh ka dawng thung a ni.”

“Partner ni tur in maw!” tiin Richard chu a rawn au that a. “Chuck Helsinger nen maw? I fiamthu a nih chu a. Ani saw chu mi pakhat a tling asin. A thil khawih tawh reng reng hi chu rangkachak ah a chang ta emaw tih mai tur in a hlawkpui thur thur zel a nia. A ni nen a partner in nih chuan vaibelchhe tel ah i hleuh dawn tihna a ni mai.”

“A, Rich, tluk leh ding awn a ni mah zawk ang. He thil hi ka ti puitling thei a nih chuan, ka company te tham tak a i chanpual za a sawmpanga hian tun ai hian nasa tak in a tih hausak belh dawn che tih na a nih chu.”

Chuan ka chanpual za a sawmsarih hmang chuan ka thil tih duh thin zawng zawng pawh ka tih theih phah dawn a ni tiin a ngaihtuah zui rauh rauh a. Australia khawpui leh khaw lian deuh tawh phawt ah chuan boy’s club a din ang a, summer camp a buatsaih tam lehzual in, scholarship pawh a siam nual thei dawn tawh tih na a ni.

Tih theih a va han ngah dawn tawh tak em.
Parnership chu a hmu a nih hlauh chuan.
Richard chuan a lu a thing nar nar a. “Ka awih thei lo. Thil duhawm lutuk a nih chu le.”

“Harsatna pakhat a awm a, mahse ka chingfel thei maiin ka ring.”

Richard chu a meng muk nghal ruih a. “Eng harsatna maw?”

“Chuck Helsinger chuan a partner tur chungchang ah chuan duhdan eng emaw bik tak a nei nghet tlat a ni.”

“Eng ang duh dan maw?”

“Nupui nei an ni in, chhungkaw ngai pawimawh a, inbengbel tha an ni tur a ni.”

“I fiamthu a ni ngei ang maw?”

“Ni lo.”

Richard chu rum nghat pah in a thu awn nghal ruai ruai in, a chair ban ah chuan a kiu chu nghat in a kut a suih nuap nuap a. “Anih chuan chu thil chu engtin chiah nge han tih fel i tum tih chu min han hrilh ta che le?” a rawn ti bauh a.

“Ka che tan der tawh mawle. Chuck chu e-mail thawn in, hmeichhe duhawm tak nen kan intawn thu leh Christmas hma ngei a inneih kan tum thu ka va hrilh tawh a ni.”

Richard chu a lo meng phar ak ak a. “Chu zet zawng a fin thlak khawp in ka hria, Mike, mahse a fuh vak lo mai thei a ni. Chuck Helsinger te ang hi chuan an hnathawhpui tur te chu uluk tak in an enthla ngeiin ka ring a ni. Chuan, dawt i hrilh a ni tih a hrechhuak vat mai dawn asin.”

“Chung te chu ka ngaihtuah ve tho alawm, mahse dawt a ni rei dawn chuang hlei nem.”

Richard chu a rawn thu ngil nghal auh a.

“Nupui i nei tak tak dawn tihna em ni?”

Mike chuan a thianpa mak ti hmel chu hrethiam tak chung in a lo melh ran a. Diktak chuan tlangval thlang tlat mi a ni miau a, Richard hnen ah chuan engtik ah mah nupui neih a tum loh thu vawi duai lo a lo hrilh tawh thin nghe nghe a ni.

Mahse hetiang dinhmun ah hian a la ding ang tih a hre lawk bik miau lo a ni. A chang hi chuan mipa chuan tihtur tul ang hi chu an tih mai a ngai fo thin reng a ni.

Mahse ama duhdan ang thlap in thil a kal thung dawn ang.

Muang raih in Mike chuan, “He partnership hi chan ngei ka duh anih chuan ka tih ngei chu a ngai alawm. A rang lam in a ngai bawk a. Helsinger chu December ni li ah hian a nuamtawlna lawng siamtir lam tur in Sydney ah hian a rawn kal dawn a, a chhungte Christmas thilpek atan a a pek tur a ni awm e. Chumi hun ah chuan ka nupui thar nen chuan a lawng a ni rei lo te cheng ve tur in min beisei a ni. Sydney tuipui kam vel fan pah a inhriatchianna hun tha neih a duh a nih hmel. Chuan chhungkaw ngai hlu a, nupa nun hlim tak nei ang a kan lan theih chuan partnership chu ka chan sa ang ah ka ngai thei mai tur ah ka ngai a.”

Richard chuan, “Karei leh!” a rawn ti hluai a.
“En teh, chutia nupui neih reng chu ka tum hran hlei nem,” tiin a lo khap thuai a. “Sumdawnna thil ang a ruahman a ni ang a, ka partner nihna chu tihfel a ziah hnan anih hma chu lem kan chang mai chauh dawn a ni.”

“Chuzawng a rilru sak thlak deuh lo maw, Mike? I tih atan pawh a lutuk mah mah a ni.”

Mike chuan a dar a san ak a. “Kan tum ber kan hlawhtlin chuan a pawi hran hlei nem. Tih em ah chuan kan putar thu duh a chuan engvangin nge chutiang dinhmun a ding kher chu a han duh khanglan reng reng ni? Nupui neih avang hian kan sumdawnna kawng ah mi hlawhtling kan ni kher hran hlei nem, kei hi a finfiahna tha tak ka nih hi maw.”

“Ni tho mai, mahse chu chu a thu a duh tih na a ni hran lo.”

“Chuti maw? Comproware ka va biak pawh hma hian a neitu chanchin tlem azawng ka chhui ve thuak thuak a. Tun a mi hi Chuck-a nupui pathum na a ni tih i hria em? Chuan maw kum thu hla ah pawh a ni chu kum sawm sarih chuang a nih tawh lai in tun a a nupui erawh hi chu amah aiin kum sawmhnih panga vel laiin a naupang ngei ang mawle. Chuan kum sawmparuk chhung an innei tawh in fapa pahnih an nei tawh a. Mahse chumi avang chuan mipa fel, chhungkaw ngaihlu mi a ni tihna a ni hran hauh lo a nia.”

“I sawi awmzia chu ka hre thei mai e,” a rawn ti hlak a.

“A nupui pawh eng ual a ni hran hauh lo ang. A pasal duhawmna chuan a hip ah i ngai ngawt ang e. A teuh lo mai, hmeichhe dang tamtak ang tho in putar un tawh tak chu a hausakna avangin a nei mai mai a ni. Thil nihphung chu i hria alawm, Rich. Dik tak chuan kei pawh hian millionaire ka nih hnu hi chuan hmeichhe kawp tur ka haihchham ngai hauh lo asin. Nupui lai lawk tur pawh zawn hmuh a harsat ka ring vak hran lo. Ka hmeichhe duh ang zawng hnen a a hnar theih loh tur a tam tham sum ka tawktarh a nih chuan ka hlawhtling maiin ka ring.”

“Mi tu emaw chu hual i nei tawh a va ang ve a. I bialnu hlui te zing a mi a ni ngei ang chu maw? I nghah thawkhat tawh viau bawk alawm.”

“Teuh nang aw, an ni zawng an tih chi loh ang. Buaina leh harsatna pumpelh hi ka tum ber a ni. A lak atanga ka beisei hre sa nupui a ni ka mamawh chu ni. A lang a ka nupui ni tur. He inneih na hi a hming mai mai, a hnu lawk a thiah leh mai theih a ni tur a ni. Nupa nun hman a ni lo bawk ang, chu chu hre reng rawh,” a ti chang fak a.

Diktak chuan hmeichhia ten amah an hmangaih a ni tih an hrilh fo mai hi a kham tawh a ni. A tir ah chuan ‘thian ang leh hmeichhiat mipatna hmanpui atan’ a tih thin chu an pawm mai a, a han mutpui tak ah erawh chuan an ngaihdan an thlak leh thuai mai thin a ni. Hmeichhia ten an hmangaih thu an hrilh hi a ngaithei thin lo, a chhan chu a awih zawng a ni tlat lo a ni. Hmeichhia hrim hrim hian he thumal pathum hi mipa rilru hneh na hmanrua a hman an tum in, an thang kam a awh tir nan an hmang thin a ni.

Mike hnen a hmangaihna thu hrilh chu thihna fawh tluk a ni tih an hre hauh lo a ni.

Chuvang chuan hmeichhe kawp hnu a nei thluah reng a ni, an intih neihtu viau chin ah chuan a tawp a ni zel mai. A bialnu hnuhnung ber chu hna thawh nei, ukil hna chelh lai a niin, a danglam deuh a beisei vang a kawp kha a ni a. Mahse a ni pawh kha a rei deuh hnu ah chuan a hma a mite ang tho a ni leh lawi a.
Mike chuan hmeichhia nen a han inhnial buai ngai thin chu a nin avangin tunlai phei chu kawppui neih pawh a bansan rih in, a hna leh gym a kal a uar phah sauh a ni.

Richard chuan, “Anih leh he hmeichhe duhawm lutuk tak, sum a thlem thei si chu khawi atanga hmuh nge i in beisei deuh a, Mike?” a rawn ti hlak a. “Hlawkna um a pasal neih an duh thu tarchhuak in tu hmeichhia mah an vak kual ngai bawk si lo.”

“Aw, i thluak hi chu a va han chak lo tak em, Rich. Internet atangin ka zawng mai dawn alawm. Holly nen in intawn hma khan Wives Wanted tih kha i tlawh thu min hrilh a ni lo’m ni kha? Chuan Johnny Walker kan in dun lai khan chutah chuan sum men a meng hmeichhe chhe lo tak tak an awm thu i sawi bawk a ni lo’m ni?”

Richard chuan a chal a chuar tap a. “Ni dawn tak, ka sawi kha mawle. Mahse tun hnu hian ka lo ngai diklo a nih ka ring leh hnuhnawh a. Khang hmeichhia ho ka kawp kual lai khan ka rilru a fim kak lo miau a ni. Chutiang ang em em chu an ni kher lo mahna. Tih ah chuan Reece hian Alanna hi chu agency kaltlang a a tawn chu a ni a. Tumah in sum um tiin an sawi thei hauh lo ang.”

“A danglam deuh bik hi an awm zel alawm,” tiin Mike chuan Reece-a nupui duhawm tak leh a pasal hmangaih thiam taktu chu a ngaihtuah zawk a. “Alanna hi chu a dang bik a ni ngei ang, Wives Wanted chuan ka mi duh ang chu a kawl ngei ka ring a ni. Chuan i hnen atanga ka mamawh chu va biakpawh na tur number a ni, i nei tawh lo a nih chuan Reece’an a la neih ngei ka ring.

Richard chuan, “Khawi ah emaw hian a la awm ang,” a ti ta nge nge a. A dawhkan pawhdawh chu hawng in business card a dahkhawmna kil khat chu a hai nuap nuap a.
Lo hnial zel chu a sawtna awm in a hre tawh lo a ni, Mike chuan a rilru a siamfel tawh niin a lang. Han dem ngawt theih pawh a ni lo, Chuck Helsinger te ang partner han nih chu vanneihna tawp hi a ni ngawt si a.

Chupawh chu nise….

Zanin ah tuna an inbiak na hi Holly a hrilh hun ah chuan a awih lo hle ngei ang. An mi hriat te zingah Mike chu nupui neih duh lo ber, hmangaihna ngaisang lo leh hmeichhe ngaithei lo ber a ni hial ang chu.

Ni leh lo, a lutuk deuh. Hmeichhe ngaithei lo chu a ni hauh lo, a pangkhing ah hian hmeichhe nalh tak tu emaw hi chu an bei deuh reng a ni mah zawk. Mike chu khuai in khawizu an bawm thin ang mai hian hmeichhe nalh tak tak hian an vir hut hut ni maiin a hre thin. Mipa hmeltha a ni si lo a, Richard chuan mak a ti deuh viau thin a, mahse Holly chuan a sanna te, a vun rawng uk khak mai leh hlauhawm ru riau a a lanna vang chu niin a sawi.

Richard pawh chuan a hmel pa hrak mai leh a taksa inphiar fat mai chu hmeichhia te hiptu ber a nih a ring ta deuh ber a.

Suit te hi a ha ngai mang lo in, jeans leh leather jacket dum lam hi a inbel tlangpui a, chuti chung chuan hmeichhe kawp tur a haihchham ngai lo a ni.

Vanneihthlak takin Holly duhzawng a lo ni lo hlauh a, amah ang a mipa inchei uluk leh in vawngfel chi a lo duh zawk hlauh chu lawmawm tak a ni.

A thil zawn chu zuk dap fuh in, “Hei le,” tiin Mike chu a pe a. “A enkawl tu ber chu Natalie Fairlane a ni a. A hming leh a number chu hnunglam ah khan a inziah kha. Internet kaltlang in tumah a dawr ngai lo a, a hmun a i va kal a ngai ang, chuan interview te a lo neihpui ang che. Chuan i thiltih chhan hi Ms Fairlane hnen ah chuan sawitlang rawt nghal lo la a tha in ka ring, a hna hi a la thutak teh mai a nia. Chuan thil pakhat leh, saw agency atanga ka hmeichhe lenchhuahpui tawh ho te chu duhawm leh nalh tak tak an ni hlawm a. Duhawm fal lutuklo thlang la i ti fuh in ka ring, a nih loh chuan nang ni ang tan chuan inven zawh a harsa mai thei a ni.”

Mike chu a thu ngil awt a. “Enge nang ni ang i tih awmzia chu ni a?”

“Sex hman nuam i ti a, Mike, chu chu phat buai tum lo mai rawh. Ka hriat hnu che, reilo te chhung pawh hian stock market tlakhniam leh thlensan zat aia tam mah bialnu i nei hman der tawh a ni. He inneihna hi nunpui i tum lo chu i ti fuh khawp mai. Mahse thlemna chu i do thei ang em tih hi a ni zawk? Anihna tak ah chuan he in ‘inneih’ chhung hian,” tiin Richard chuan a kut chu a han phar kual zuai a, “- nang leh i nupui thar chu inhnaih takin in awm deuh reng dawn a. Chutah Helsinger-a lawng ah chuan pindan pakhat ah in awmdun dawn bawk si nen. A duhawm viau a nih chuan i inthunun zo lo thei tlat a ni.”

“Min ring sual a nih chu, Rich, sex tel lo in ka awm thei alawm.” Kar tam tak chhung chu a lo insum tawh a ni. “Hetiang ang a sum tam tham inrawlhna ah hi chuan maw, damchhung puithiam pawh ka ni thei hial ang chu.”

Richard chuan a awih hmel loh ngei mai. “I tih tlat chuan le,” a lo ti hlak a. “Chuan Natalie Fairlane chungchang ka sawi kha hre reng ang che, a bul ah khan i tawng fimkhur deuh dawn nia,” tiin Mike dingchhuak chu a chah zui a.

“ ‘Wives Wanted’ neitu chungchang ah chuan i thluak i hmang vak lo a nih ka ring,” tiin Mike chuan a lo hnial a. “Ms Fairlane pawh hian sum um in he agency hi a din a ni ve mai a. A hmaichhan ah pawisa tam tawk han tawktarh ila, ka pitar-i chuan ka hmeichhe duh ang chu Jack Robinson i tih hman hma in min hmuhsak lutuk ang.”

Mike chhuak lai thlir pah chuan Richard chu a nui deuh suk a. A thianpa in Ms Fairlane khirh tak mai a va hmuh hun ah chuan, bang a tho ang a lo fuk a chak riau mai.

Sum um a ti a ni a, ti a a sawi chu a dik pawh a ni mahna le, a chhan chu a rilru puthmang hre tur khawp in a la belchiang ngai lo a ni.
Mahse pitar chu a ni hauh lo thung.

BUNG HNIH

Natalie chuan, “NU, a va han zialo ve aw,” a ti hawk a. “Engtin nge ka pa nen chuan chutiang em em a in tlakchhiat theih a?”
A zawh lai reng chuan a chhanna tur chu Natalie chuan a hre lawk sa vek tawh. A pa hi reilote chhung a hausak thut theihna tur a miten an sawi, an thang tawktarh ah hian a awk fo a ni. Mi te ang a pawisa khelh ching leh inthap chi chu a ni hauh lo, mahse sum invest na leh sumdawnna thil, han sawi mai pawh a awihawm loh khawp a tha leh hlawk ho hi a hnar zo lo a, a tawp ah chuan a chan leh nge nge thin a ni.

A naupanlai khan Natalie chuan a pa chu eizawnna kawng a a finvar vak loh dan kha a hre ngai hran lo a. Engmah a tlachham ngai lo in, pianpui dang a neih loh avangin duatsual pawh a hlawh phah reng kha a ni a. A puitlin deuh hnu ah chauh a nu leh pa te chuan ba an nei nual a ni tih a hrethiam ve chauh a.

Hun eng emaw chen atang tawh khan a nu nen a an inhmuh chang apiang in an ei leh in man tur a pe ta zauh zauh a. Mahse tun ah chuan mangan vawrhtawp an thleng ta niin a lang. A pa chuan phaitual hnim thlawhfaina khawl, a pawisa bat teuh tawh hnu a a ba bawk a a lei leh chu a enkawl thei tawh lo a ni. Chutiang khawl enkawl tur chuan mipa chak tha leh thahrui la nghah tak nih a ngai miau a.
Natalie pa chu a la chak vak thawkhat viau nangin kum sawmnga leh pasarih lai a ni ve tawh miau a ni.

Thla hmasa khan a tluksual na lam ah a kheimit a ti na a. Insurance lah a nei bawk si lo nen. A kum han en reng reng pawh in eng company mah in insurance chu an tihsak duh tawh a rinawm loh hrim hrim reng a ni.

Bank lam lah chuan an chenna in chu an sum puk an pek theih loh chuan chhuhsak an lo tum reng bawk nen, chuta kar ah thla tam fe an ba chu a lo tlingkhawm tawh bawk si a. Natalie chuan thla eng emaw zat ba chu a rulh sak thei mai ang a, mahse an ba zawng zawng chu han rulh zawh sak na mai tur a nei bik si lo a ni.

Chuti a nih chuan a chhungte chuan sum leh pai mai bak ah chenna in tur an nei lo thuai dawn tih na a ni.

Natalie chuan a bul a rawn cheng ve tur ang a a ngaihtuah chuan a mur ar ar a. Kum sawmthum pali a ni ve tawh a, chhungte nen a chen ho nuam tih hunlai a pel thui tawh lutuk lam a ni.

Chumai a la ni lo, a chenna in chu office ang ah a hmang nghal in, a mut pindan pakhat chu computer room ah a hmang a, thutkhawmna pindan chu khualchhawn nan leh mi lo chiau au na pindan atan a hmang bawk si a. Puitling pahih, tih tur engmah nei lo in an rawn fin lehzel a nih chuan thil tih a harsa sawt ngei ang le.

A nu chuan, “Lungngai mah ta che, bawihi, hna ka zawng mai dawn alawm,” a rawn ti sap a.

Natalie chu a meng kual ralh a. A nu pawh hi a pa ang mai a duhthusam kual ching ve tho a ni. Kum sawmhnih chuang hna mumal thawk lo in a awm tawh a nia, a pasal a tak ngaihdan lak tlak loh tak tak te chu tih puitlin tum in a lo puibawm ve mai mai thin a ni tak si a maw, chuta kar ah a pa aiin a la upa zawk leh ta nghal a.

Tumah in pitar kum sawmnga pakua ni tawh, thiam thil nei hranpa pawh ni lo chu an ruai duh hauh lo ang.

“A viau teh suh, ka nu,” a ti bak deuh hlak a. “Nang ang rual nih tawh chuan chutiang a awlsam in hna a hmuh mai theih tawh hlei nem.”

“In ka ti fai dawn alawm. Computer leh printer i pek khan i pa in lehkha min siamsak a, kan vengchhung a lehkha thlak na bawm ah ka thlak chhuak vek tawh alawm.”

Natalie chu a tah a chhuak ngei mai. Amah hring tu nu chu tun ang a mi in tifai tu a a tan chu a dik in a hre thei lo a ni.”

“Nu, ka in hi ka dahkham thei mai ang. Ka lei hnu ah khan a hlutna a pung ve leh viau tawh alawm,” a ti ta nge nge a.

A nu chuan, “Chutia i tih a ngai hauh lo a nia,” a rawn ti fiah kak a. “Kan in ti fel thei mai ang, lungkham ah lo nei suh ang che.”

Anih chuan ti nge min rawn hrilh si ti rilru chungin Natalie chu a rum ru hak a.

A kawngkhar hmehrik a rawn rik tak ah chuan Natalie ngaihtuahna chu a harhchhuak zawk a. “Nu, nakin ah ka rawn be leh mai dawn che em ni ang? Min dawr tu tur a rawn kal a?” a ti nghal a. Ni li chhung a dawrtu awmchhun tur a ni, tunlai chu Wives Wanted chu a lun lo riau mai a, chanchinbu lam ah tan lak a ngai leh tawh a ang khawp mai.

“Va ngaihven ta che, bawihi. Mahse min rawn be leh ang che aw.”

“Aw, ka rawn be leh dawn che nia,” tiin phone chu a dahthla a, a kawr hma chu a kilh tha nghal mawlh mawlh in, kawngkhar lam pan chuan a kal phei nghal a.

A kal pah chuan darthlalang ah a in bih zawk a, sumdawng mi diktak ang in a lang tih a inhrechiang hle. A sam sen uk deuh khak chu hnunglam ah mar tak in a tawnkhawm a, a hmai a chei lutuk lo in, tlereuh pawh langsar lo tawk chuah a hmang a ni. Rangkachak sana lian vak lo leh rangkachak bengbeh lian lo tak a beh tih loh chu engmah dang a hmang lo a ni.

Kawngkhar vawn ban a ban rual chuan Mr. Mike Stone chu eng ang tak ni ang maw tiin a ngaihtuah ve chauh a.

Tun kum tir lam ah amah dawrtu Richard Crawfort, sumdawng mi leh bank nei tu in a a rawn sawipui a ni a. Mahse Natalie chuan Mike Stone chu banker a nih ve chu a ring hran lem lo. Phone a an inbiak na ah khan mi hawihhawm tak niin a lang lo a ni, Richard Crawfort ang a min tawngkam thiam a ni tlat lo. Chumi avang chuan a rethei bik tih na a ni em lo ang chu maw. Amah rawn dawrtu mipa te ho hi chu mi hausa, eizawnna ngialnghet nei an ni tlangpui thin miau a.

Mahse kutdawh chuan duh a thlang thei miau lo a lawm le, tun ah kher phei hi chuan. Mr. Stone chuan nupui a hmuhsak theih nan cheng sang eng emaw zat pek a inhuam a nih chuan a duh leh truck driver pawh lo ni sela a pawi na a awm hran lo.

Chu ai mah chuan truck driver hausa tak ni sela chu a duhawm zawk ngei ang.
Hmeichhe tam zawk te hian pasal atan eichawp thawkchhuak tawk tawk ho hi chu an duh lo tlangpui a ni.

Natalie chuan kawngkhar chu a hawng a, a hma a mipa lo ding a hmuh chuan a meng zau kawk a.

Kum thum chhung Wives Wanted a siam hnu ah hian, tun a a hma a mipa ding ang hi dawrtu a la nei ngai hauh lo a ni.

A hmel han en mai chuan truck han khalh tur awm hmel a pu hauh in a hre lo mai. A khalh thin a nih vek pawh in tun a leather jacket dum leh jeans ha chung ni lo in, sipai thuam famkim nen a inthuam in a khalh a ni ta ve ang tiin a ngaihtuah kual neuh neuh a.

Mike Stone chu han en reng reng pawh in sipai ni awm hliah hliah a ni tlat.

Sipai satliah ni lo deuh ti a ngaihtuah in Natalie chuan a pian chu a en chho dan dan a, a taksa lian tak mai te, a mitmeng dum kak mai te leh a sam uk lam deuh, fai tak a meh te chu a hmuh hmaih hauh lo. A ni hi chu commado ang chi a ni ngei ang, tim hauh lo leh thawm nei hauh lo a mi that thin ni awm tak a ni.

A hmel chu tha ti a han sawi theih a ni lo in, a hnar ruh chu a tliak tawh ni ngeiin a lang a, a hmui chu a nunrawn hmel lam mah mah bawk a ni.

Chuti chung chuan Natalie chuan a duhawm thlawt hian a hre lawi si.

Natalie chuan a ngaihdan tilang lo tur a insum pah chuan a ruk in a rum hak a.

A hriat theih chin ah Natalie chu hetiang mipa ho hian an hip tlat zel a ni. Mipa pangngai zing a chhiar tel ve theih loh, hlauhawm ruk na riau nei a lang te hian an ti phur in amah ah hriatchian chakna a nei tlat thin ve reng a ni.
Kum sawm kal ta kha chu ni sela a hma a mipa ding chu a atchilh thei ngei ang le, mahse tun ah chuan chutiang tih duhna rilru a putna chuan a thin a ti rim teuh tawh zawk a ni.

Chu pa chuan, “Ms Fairlane i ni em?” tiin a rawn zawt a, a aw chu a hmel ang mai chuan a thap deuh tak hian a hre nghe nghe a.

“Aw,” a lo ti sap a, a thin phu dup dup te leh chupa in a a en kual dan te avang chuan a thin a sa deuh phat mai. A hmel ah chuan mak tih na a va hmu leh ta nghal bawk nen. A chanchin chu Richard Crowford chuan engtin chiah nge maw a lo sawi teh hrep le?

“Mike Stone,” tiin a kut a rawn pharchhuak a.
A chibai tur chu engtin mah a innghawng tir loh tum in a intipaukhauh ru ran ran a.

Chuti chung pawh chuan a kut hrawl pui a a va tawh meuh chuan a tek deuh chhuaih ni hian a hria in, a ban chu a mur nghal ar ar a.
Kawr ban tlawn a lo ha hlauh chu a tih zia khawp mai, hetiang thil hi a thlen a lo rin sa ve reng reng kha a ni a.

A ngaihtuahna chu ti lang map lo in, “Ka hmu che chu ka lawm khawp mai, Mr Stone,” a ti vawt raih a. Mike Stone chu hmun dang a hmu chu ni sela a kalsan ngei ang, nilo, a tlanchhiat san zawk hial ang, mahse tun dinhmun ah chuan chutiang thil chu a ti thei rih silo a ni. Sum a hlawhchhuah theih mai na tur, cheng sang nga a hlawh mai theih na tur a ni in, tun ah tak phei chuan chu sum chu a mamawh ngawih ngawih a ni.

“Mike tiin min ko rawh khai.”

“Mike” tih sap pah chuan a nui lui deuh sak a. “Lo lut ta che, Mike,” tiin inchhung lam ah chuan a phar a. “Veilam a pindan hmasa ber ah khan va lut la, thut hmun lo va rem ta che.”

Mike’an a rawn kal pelh dawn lai chuan Natalie chu kawngkhar sir ah chuan a theih ang tawk a ip chung in a lo ding a, a kal pah a a taksa a rawn nawk chu a duh hauh lo a ni. A kal pel fel ta maw tih ah chuan a hnunglam chu hmuhnawm ti tak in a thlir zui vawng vawng a, a thlir rei mah mah a ni tih a inhriatchhuah chuan thinrim ru teuh chung in kawngkhar chu a khar deuh sawk a, a meng kual ralh bawk a.

A va luh ve meuh chuan Mike chu sofa ah lo thu in, pindan chhung chu a lo melh kual vang vang hman tawh a.

Natalie chuan chu pindan chhung chu vawikhat hmuh na mai ah chuan a lang mak angreng hle ang tih a hrethiam thei mai a. A chhunga a bungraw dah te chu an inmil lo hlawm hle nachung in a duh ang ngei a thlan an ni hlawm miau a ni. Armchair lian tak tak pathum, puan inchei deuh buai a khuh a inhung a, chumi bak ah chuan tukverh bul ah sofa uk khak a hung bawk a ni.

Sofa ep ah chuan sound system changkang tak a inhung ruah bawk a, chu mi man chu tun ah pawh a la pe mek nghe nghe a ni. Sofa dinglam ah chuan lehkhabu chhuar,chhuat atanga inchung tleng a inrel chho uaih a, chumi hma ah chuan mahagony dawhkan hnum hlarh a inhung in, chu dawhkan ah chuan laptop tunlai ber chi a awm a, kil lehlam ah thung chuan khawnvar hring lam deuh, hmanlai chhuak tih hriat fahran hi a awm ngat bawk a. Chhuat chu thingphel nawh tlet a niin, oriental rug a inphah kual raih bawk a ni.
Pindan chhung ah chuan coffee hun na dawhkan hmuh tur pakhat mah a awm lo nachungin, dawhkan pianzia in ang lo tak tak, thil lilam na hmun a an zawrh chi hrang hrang inhun na a khat nuk thung. Sofa sir tawn ah chuan light bulb, rangkachak rawng a in khuh a inhung ve ve a, zan a TV a en duh chang pawh in chu chu a hmang tangkai hle thin a ni.

A thian pakhat chuan a thutkhawmna pindan chei dan chu amah ang maia hriatthiam mai harsa a nih thu a lo hrilh tawh nghe nghe a ni.
“Hun i vawng dik hle mai,” ti a a sana bih zauh pah in, a dawhkan hnung a thutna lam chu a pan a.

“Hna ka thawk te a nih loh chuan hun ka vawng dik ziah thin.”

Natalie chu a thu mar awt a. “A pawi ka ti khawp mai, mipa hna nei lo nen indawr na ka siam ngai lo a ni,” a ti chang fak a.

A hma a thu pa chuan a rawn melh kual dan dan a, a mitmeng atang chuan enge a ngaihtuah tih pawh hriatthiam a har khawp mai.

“ Hna ka neih loh thu ka sawi hlei nem. Tun ah tak hian ka thawk lo e ka ti mai a nia. Sofeware company ka nei a, chutah chuan ka thawk nghal a ni.”

Chu thu chuan Natalie mak tih a hlawh hle mai, computer hma a thu ngut ngut hmel a pu tlat lo a ni. A taksa chu a inphiar fat in, a vun rawng te lah chu a uk khak bawk si a ni.

Brandon ang chiah khan.

Chutia Brandon a hriatchhuah tir avang chuan a thin a rim zual sauh a.

Natalie chuan muangchang in a mimal chanchin a chhinchhiahna tur chu a hmet chhuak a, hawichhuak lem lo in, “Chuan hna i thawhna ah chuan engchiah nge i tih thin le?”

“A chang chuan ka kal lo tawp thin a ni,” a rawn ti mawl leh tawh a.

Ngainatawm hle mai maw, tiin a lo ngaihtuah a.

Hetiang ang mipa pian nei ho hi an mizia a in ang deuh vek niin a lang.

Brandon pawh kha a hun ah a thleng ngai mang lo a nih kha. Mahse Brandon kha chuan tlai chhan leh rawn lan miah loh chhan kha a nei tha em atin ni.

Anti-terrorist agent a nih mai bak ah khan, amah Natalie’in a hraitpui hauh loh a nupui leh fa pahnih te avang khan a rawn hmu hman lo fo reng a nih kha.

Mike Stone chuan eng chhuanlam tak hmang ve ang maw tiin a ngaihtuah chhunzawm a.
“Hnathawh atchilh mi i nih hmel chu mawle.”

“Chutiang a min sawina hmasa ber chu a ni hran lem lo e,” tiin chupa chuan a dar a lo san ak a.

Natalie chuan chupa chu a ngaina lo tawlh tawlh mai. “Chuvang chu em ni tun thleng a nupui tur i la hmuh mumal theih loh a?” a ti thap tak a.

“Ni lo e. Nupui tur chu, ka duh duh ka thlang thei reng alawm.”

Natalie chuan chutiang a chapo tak a a chhanna avang chuan ngei awm zet in, “Takzet?” tiin a zawt nawn ngat a.

Pianken fuh tak nei nimahsela Mike Stone tan a nupui tur zawn hmuh chu thil awlai a ni dawn in a lang tlat lo mai. A nula neih ho te chuan pasal atan chuan mi tih nuam tak neih an duh vek si a, a ni ang, mahni ngaihdan thlak tum hauh lo ang chu an duh a rinawm lem loh a ni. A tam zawk te chuan inlaichinna hrehawm tak an lo tuar tawh hlawm in, a ni an rawn pan ve meuh tawh hi chuan eng ang mi nge an duh tih an hrechiang tawh hlawm in, an duhthusam loh mi chu kawp an tum tawh bau hlawm lo a ni.

Mike Stone te ang chu atu amah in an ngaihsak vak peih in a ring lo a ni.

Mahse a naute zingah nei duh tu tumah an lo awm ta lo a nih pawh in a ni lo buaina tur a awm hran lo alawm le. Amah rawn dawrtu mipa te chu nupui a hmuh sak emaw a hmuh sak lo emaw pawh nisela, a tir phat ah dollar sangnga a chawitir nghal zel thin tho a ni.

A pawisa chawi avang chuan Mike Stone chu hmeichhe panga, duhawm tak tak, amahin a a duhzawng a sawi mize nei thiau nen inhmelhriat tir a ni ang a. A bak chu ama kut ah liau liau a awm tawh a ni.

Nupui tur a duh takzet a nih chuan tun a a awmdan aia nelawm leh hawihhawm erawh hi chuan a awm ngei chu a ngaiin a lang. Lan duhawm leh itawm ringawt chu a hmeichhe neih ho, thinlung hliam tawh tan chuan a tawk miau lo a ni.

A eng a pawh chu nisela, chulam chu a ni tan lo lungkham vak a ngai hran lo e.

Aw pangngai tak hian, “Computer software company i nei bawk a, Mike, min dawr tu te duhzawng thlankual nan a ka program hman chu i hre thei maiin ka ring,” a ti dam dap a. “Thil awlsam te mai a nia, mahse ka ta ah hi chuan security check ka dah tel a, chu chuan min dawrtu te chu an insawi ang mi an nih leh nih loh a finfiah thin a ni. Chutah chuan harsatna i nei lo ang chu maw?”

“Nei lo e.”

“A that chu. I tan nghal mai ang hmiang. I hming pum le?”

“Mike Stone.”

“Nilo, i hming pum mawle,” a ti vin deuh hlak a. “I birth certificate leh i driving licence a chuang ang kha.”

“Mike Stone.”

Natalie chu a inseh ruh teuh a. “Michael ni lo in maw?”

“Mike tih ringawt kha.”

“A tha e. I address leh i phone number thung le? I mobile number pawh aw, khawngaihin.”
A sawi ang ang chu a chhu lut mawlh mawlh a, Glebe a a apartment address a pek chuan a tha lam leh a chhe lam a kawk thei ve ve a ni tiin a lo ngaihtuah nghal vat a. Glebe chu tunhnai ah hmun lar a rawn ni chho mek a, khawpui a hnaihna leh Sydney University bulhnai a nihna chuan a hlutna a tisang a ni, chutih lai chuan hmun thenkhat erawh chu a la berh hle hlawm bawk.

“I hnathawhna hmun address thung le.”

“In ah hna ka thawk mai thin.”

Khaih, khaih, chu zet chu thu lawmawm loh lam a ni tlat. Sumdawnna te nau thenkhat hlawk tak chu an awm ve nual nang in, an tam vak lo a ni.

“Kum.”

“Sawmthum pali.”

A meng zau deuh kawk a, a hmel ah tawn hriat a nghah tawh hmel tehreng nen, a la naupang ngei mai a.

“December ah kum sawmthum panga ka pum ang, December ni sawmpanga ah,” a rawn tih zawm a.

Chhut mawlh mawlh pah chuan, “Chu Sagittarius i ni maw?” a lo ti zauh a.

“Chutiang lam chu ka rin zawng a ni lem lo.”

“Takzet?” Chung te chu hre sa awm tak hi a ni a, an star sign in inmil tur tak an ni tih a tarlan thu a sawi lai khan Brandon pawh khan a rin zawng a nih loh thu a sawi a nih kha. Virgo a niin, Scorpio nen chuan inmil tur chi hi an ni a. Khatih lai khan Scorpio chu thuruk nei mi an ni tih kha a lo mangnghilh pek a nih kha.

“Nupui chungchang thung le?”
“Eng maw?”

“Nupui i nei tawh reng em?”

“Aih.”

“Min dawrtu tamtak te hian nupui nei tawh an ni a.”

“Kei chu ni lo e, duhtak.”

Va melh kawk pah in Natalie chu a insangmar teuh a. “Ka hming chu Natalie a ni,” a ti ram hmak a. “Duhtak tih ni lo in.”

A va khakna chuan a nuih a tiza emaw chu aw tih tur in a lo meng de sawr sawr a, chutah, “Ka tih palh a ni,” a rawn ti bauh a.
A tihpalh a ni lo tih chu a hmel atangin a hre thei mai a, mahse a duhdan a sawilan tawh avang chuan ngawih a chuh ta zawk a. Mipa, hmeichhia lak a duhtak, bawihi tih tawngkam hmang thin ho hi a ngaithei tlat lo, a inhnuaichhiah na thil riau in a hria a ni.

A hnu deuh ah chuan, “Khaile, i insawi ang i nih loh thu rawn sawi tu a awm lo e,” a ti bauh a, man a nih tawh thu leh tanin a a luh tawh thu pawh a rawn lang lo bawk tiin a ngaituah zui a. “Tun ah chuan i pianzia lam ve thung le. I sam chu a uk tak leh tawi tak a ni tih leh i mitmu chu a dum a ni tih chu ka hmu thei mai a.”

“A dum a ni lo, a uk tak a ni, a uk in a pawlh nasat avangin an lang dum mai mai a ni.”

Uk duk raih leh duhawm lutuk.

“Awle, i san zawng le?”

“Ruk li, emaw a nga emaw a ni ang.”

“Chu chu centimetre in engzat nge?”

“Ka hre hauh lo mai.”

“A pawi lo e, ruk nga kan ti mai ang e. Kei hi nga sawm ka ni a, kei ai chuan i sang viau tho alawm.”

Rihzawng leh pianhmang tih ah chuan ‘in fit leh sa tha’ tiin a chhulut a. Amah chauh hi khawvel hmeichhe zing a mipa lian thelh thawlh duh awmchhun a ni tlat lo.

“Mei i zu em?”

“Aih.”

“Zu lam te?”

A nui hak a. “Varak in tui an cheng ngai em?” tiin a rawn zawt let a.

“Engzat vel nge i in thin a?”

“Dinhmun a zir a ni mai.”

“Eng dinhmun chu maw?”

“Ka hnathawh leh thawh loh ah hian mawle. Hna ka thawh lai chuan ka in ngai lo a ni.”

Natlie chu a thaw hak a. “Chuan i hna thawh loh lai chuan le?”

A dar a lo san ak a. “Scotch ngaina mi ka ni a, khawlum zual lai chuan beer ka in ve thin.”

“Zu vang a buaina tawk thin niin i inhria em?”

“Teuh nang aw.”

“I hobby te?”

“Hobby a?” a rawn ti let hu a.

“I hun awl ah eng tih nge nuam i tih deuh ber?” tiin Natalie chu a hawichhuak a.

An mit chu a intawk zawk a, chutah Mike chuan muangchangin a kawrhma lam, a hnute bu in a a tawn mar tang lam chu a rawn melh thla dan dan a.

“Helam tih loh ah hian,” a lo ti vin hlar a.

Mike chuan mit zim san in a rawn melh a, engvanga in tih chi ai tir nge a nih aw tiin a ngaihtuah ang em le ti rilru chungin Natalie chuan a lo melh let a.

“Taksa zawisawi leh lenvah nuam ka ti,” a rawn ti ta nge nge a.

“Khawi hmun ah?”

“Club ah te, pub ah te, ka thiante nen a zu no kan dawm ho a, hmeichhia ka hmelhriat theihna hmun ah a ni mai.”

Hmeichhe han biak hmin vel ah chuan harsatna a nei hauh in a rinawm loh. A tawngchhuah pawh a ngai hauh lo ang, a mitmeng thim ruih leh a taksa duhawm tak chuan engkim a sawifel vek theiin a ring a ni.

“Hmeichhe tilawm thiam tak i ni em?”

Chu zawhna chu a insum hman hma in a sawichhuak hman a ni, chutiang zawhna chu tumah a zawt ngai lo asin mawle, mahse chu chu a hre ve lo hlauh a, a lawmawm khawp mai.

Pawisa lo tih hriat tak hian, “Chulam ah chuan phunnawi na ka la tawng ngai lo,” a rawn ti ril ruih a.

A nupui lak atang chuan engzat chiah nge a beisei ang tih a zawt hmen lek lek a, mahse a insum hman ta hram zawk a. Tun ah pawh hian a tul ai a tam mah a zawt tawh a ni si a.
“Sakhaw lam te?” tiin a zawt ta zawk a.

“Ka nei lo.”

“Ring lo mi i ni maw?”

“Aih.”

“Anih enge i nih chiah a?” a ti fak a.

“Keimah leh Pathian inkar ah hian tunthleng in inpawhna tak tak a la awm lo a, mahse hmalam hun ah enge thleng ang tih tumah in an sawi thei lo a ni.”

“A tha alawm. Sakhua na lam ah chuan rilru inhawng tiin kan dah ang e. Zirna lam ve thung hi le?”

“Ka zir sang lem lo.”

“Chu aia chiang chuan i sawi thei ang em?”

“Kum sawmpasarih ka nih thleng in school ka kal a, mahse certificate nei tur in ka exam ta lo a ni. College leh university ka rap ngai hauh lo a. Computer thiam chungchuang ni tur hian ka inzir chawp a ni.”

“Thiam chungchuang a? Khaih, i inthup lutuk lo teh ang hmiang.”

“Inthup lam thil a ni lo, a nihna ang in ka sawi mai a ni.”

“A tha e. Computer expert tiin kan dah ang e. I nupui tur chu…ih…chapo deuh a i lan avanga chan i duh lo ang chu tiraw?”

“Chapo na lam a ni lo, thudik ngainat vang zawk a ni, mahse i duh ang chuan dah rawh khai.”

A dah khawp ang. Lalpa leh, mipa ngeiawm tak chu a va han ni em. “Chuan i software company chu enge a hming le?”

“Stoneware.”

“Stoneware a?” tiin a meng rang ralh a.

“A hming hi ka lawm riau a,” tiin a nui suk a.
Nui nasa han tih tur chu a ni hauh lo, a hmui a ti che satliah mai zawk a ni mah.

“Chu, nuihna tur thil i hmu ve thin tih na a ni maw?”

“Ka mizia a bet tam thil chu a ni hauh lo.”

“Chuzawng a hriat theih mai alawm,” tiin a lo phun sap a. “Chuan Mike, a zat chiah i sawi duh lo a nih pawh in ka hrethiam tho ang a, kum khat ah hian engzat vel nge i lakluh le?”

“Hrilh che ka pawi ti hran lo. Nikum khan Stoneware chuan vaibelchhe ruk leh maktaduaih li in hlawkna a nei a ni. Company za a sawmsarih chu ka ta a ni a, chuan keima mimal lakluh chu vaibelchhe li leh maktaduaih li a nih chu. Tun kum chu nikum ai khan a hlawk zawk ka la beisei a ni.”

“A lo nih chu.”

“Chu chuan nupui ka hmuhna kawng ah min pui thei ngeiin ka ring,” a rawn ti hul hak a.

A tawngkam leh a aw ki ah chuan tih el na a lang thei a, chu chuan Natalie thin chu a dek zar mai.

“Sum ringawt chuan ka nau te lak atangin nupui tur a pe hauh lo ang che,” a ti ram hmak a.

“I chiang chiah a maw?”

“Tehreng mai.”

“A va pawi ve.”

“Enge sawi i tum chu ni a?”

A awm tinuam lo rawih khawp in Mike chuan a rawn melh a.

“Ka beisei ang i ni hauh lo mai,” a rawn tichhuak sup a. “Mahse eizawnna ngai pawimawh chi i ni tih chu ka hrethiam thei mai e. Ka sawi tawh ang khan thudik ngaina mi ka ni a. Mi bum kual mai mai hi ka duh lo in, inchhaih kual na hun pawh ka nei lo a ni. A nihna tak ah chuan maw, Ms Fairlane,” ti a rawn thu awn in a khup ah chuan a kiu a nghat sauh sauh a. “December kar hmasa ber hma ngei hian nupui neih ka mamawh a ni.”

This Post Has 2 Comments

  1. Robertnon

    Все трендовые события часового искусства – актуальные коллекции лучших часовых компаний.
    Все коллекции хронографов от дешевых до очень роскошных.
    https://watchco.ru/

  2. Robertnon

    Абсолютно все трендовые новости часового мира – трендовые модели именитых часовых домов.
    Точно все модели часов от бюджетных до экстра люксовых.
    https://watchco.ru/

Leave a Reply