You are currently viewing BEST FRIEND – 2

BEST FRIEND – 2

Spread the love

BEST FRIEND – 2

(Maruata Pov)

College kan thleng a, an class-ah a lut nghal a, keipawh kan class lam ka pan ve nghal bawk a, kha zana thil thleng kha ka ngaihtuah let a, a hlimna hi ka tan a pawimawh hle ni tih ka hria mahse engmah a sawiloh chuan ka pui thei silova, mahse min hrilh tum ang pawn a lang hauh lo anih kha. A ngawi thei ve mai sia, ka zawt miah lovang ka ti a, mahse ka zawh mai a ngai a ni. A ṭawng mawlh mawlh lai chuan, “Engtikah nge min hrilh dawn??” Ka ti chhuak hlol a, min melh deuh ha in a ngawi reng a,a in ngaihtuah nasa hle tih ka hria. A kut pahnihah chelh in min en turin ka hrilh a,a inthlahrun hmel reuh lutuk.
“V i sawi duh miah lo anih chuan ka nawr lui lo che mahse hei erawh hre turin ka duh che,he khawvela mi zawng zawng te hian nang hi hnungchhawn in kalsan vek che mahse kei chuan ka tiam a che ka kalsan ve ngai lovang che. Chu chu ring rawh,” Ka tih chuan min en kar a, he a mitmeng a natna in phum ru te hi paih chhuah sak vek ka duh, lungngai hmel taka awm hi a inhmeh ve hlollo a ni.
“Ka ring a lawm,Lalramliana tih ang hi chuan tumah in an ti ngai lovang.” a ti zuai raih a,
“Ni e,Ani nena in chungchang chu engpawh nise Keichu i ṭhian nangmah kalsan ngailo tu che ka ni a ka ni reng bawk ang.” ka thusawi hi ka sawi mai mai lo a ni tih hrethiam se ka duh takzet, ka thusawi avang chuan a nui ve sak a. Mahse a hma ang tho in “Ihhh,,,Maruat.” tiin riat nawi leh mai mai a tum a,
“Ihhh kual ziah suh dangawk ang mai.” ka tih hluk chuan a meng rum leh ṭan tawh e. Henu kar chhuah dan te chu ka hre viau mai. “Ka hrilh lo tawp dawn che mi le?” Atih chuan ka nuih tlawn leh vel chiam a. Tinge a bulah hian ka nung em em mai reng mai le?
Balcony lam chu kawk zeuh in “tah sawn ṭhu ang” tih leh a chair chawi phei a rual nghal a,chair dang chu chawi ve in a hma ah ka ṭhu ve nghal vat a,Vana arsi eng phe tuar chu a thlir deuh vang vang a,a nui deuh sang lehnghal, a hmelṭhatna pawnlang tak hi chu ka hmu fo a, mahse hetiang tak hian a hmelṭha tih ka lo hre ngai miah lo, kan inkawm nasa a,mipa zawng zawng in hmelṭha leh piannalh an ti ṭhin mahse ka hrethiam ngailo, zanin zet zawng mipa zawng zawng hmuh kimloh a ṭhaṭna thuruk hmu ang mai ka ni a, ka rilru chuan Henu hi ka DUH a ni, a ti chhuak mawlh mawlh bawk.

Nilo…nilo….. chutiang te chu awm ang lo lutuk,ka ṭhiannu anih hi, Ṭhian chauh, ka rilru chu a inhnial buai char char a mahse ka mit erawh in a thil hmuh hi a en lo phal hlollo, a ṭhatna zawng zawng te hian Angel zinga ṭha ber pawh a tluk zo ngei ang le.
“Ani nen khan naupang tet aṭanga inkawm kan ni a, midang tumah inah leh school ah pawh ka kawm ve ngailo,Ka unaupa ang mai a ni. Hetiang nungchang harh deuh hi ka pu ngai miah lo, nungchang zawiawi tak ka ni ṭhin asin” a tih chuan, ka en reng a, a nui sen sen a, hetianga a awm hian a duhawm takzet. Heiham a thusawi hi ka ngaihthlak a ngai a ni, ka lu ka thing nawk a,ka lu ka thing a hmuh chuan min melh deuh hrawkin, “I duh leh awi suh,ka chhungte i zawt thei ang.” a ti deuh hmak, a thusawi ka awi loh avanga lu thingah min ngai tih ka hre mai. Ka lu thing chan a hre lo lutuk chuan ka nuih a ti za letling zawk. Ka nui suk a, “ka awiloh vang anilo nia,” dam thlapa tiin, “sawi zel rawh” ka tih nghal zat a, a ṭhut dan siam rem in, a sawi zawm leh a, “Ka tan chuan ka Angel, ka engkim leh ka inngahna a ni a,a tellova nikhat hun hman pawh kha harsa ka ti ṭhin. Ka best friend i ni min ti a,chu chu keipawn ka pawm thlap, a tana ṭhianṭha ber ni turin a duh dan in ka awm thlap thlap ni berin ka hria. High school kan kal ṭan khan ka rilru chu a danglam hret hret a, mahse a ṭhian bak nih tumin ka huang chin pelh ka tum ngailo, mahse min duh thu a sawi ni aia nuam tih leh hlim kha ka nei thei leh tawh pawh in ka ringlo. Min hrechiang em em a, ka ei duhzawng, nuam tih zawng leh ka rawng duhzawng aaa ka thil ngainat zawng engpawh hi a hre fai vek ni berin ka hria, chuvang ania Zebra tia min koh.” tiin a nui hul hak a.

“Ka thinlung ka pe a,ka hmangaih hle bawk,ka hlimna a ni a,Ka pasal tur ni hiala ngaiin avanga nung ve mai mai angin ka in ngai hial ṭhin, mahse eng nge a chhan tih pawh ka hriat lohvin min ṭhen a.” a ti zuai raih a.
“A ṭhen che a maw!?” mak ka ti tih ka hmelah hian chiang takin a hmuh ka ring, engtin nge Ani ang hmeichhe ṭha lutuk a ṭhen phal zawk.
“Um, ka thinlung hi chemtea vih ang mai hian a na a, ka ṭap a mahse a na hi a reh lo reng reng, Ani kha min ṭhen lo turin ka ngen lawm lawm a, ka thlah theih loh thu ka sawi a, ka ṭah khum bawk a, min kalsan suh tiin nasa takin ka ṭahkhum asin mahse min hnungchhawn hmiah si a. Hmeichhe dang a tih ang tho in ka chungah pawh a ti ve a ni.” A mittui a hnam nghal ṭiam ṭiam a,hruksak ka duh mahse ka thei lo.

“Ka best friend i ni min ti chhung leh Ka hmangaih hmasa ber i ni min ti chhung khan na takin min siam asin,min ṭhen mai duhtawk lovin ka hmuh phak lohah hla takah biak takngial pawh ka biak theih lohna hmunah min kalsan daih asin. A tellova hringnun hman kha zir thiam a har in ka hawina lam apiangah ṭahna chauh ka hmu ṭhin. School-ah khan ka nui ṭhin ngei alawm mahse kha kha ka natna ka thup ve thiam dan a ni. Ka inthup tumna lamah hetiang hmeichhia hi ka lo ni ta anih hi. Eng sports-ah mah ka tui ngai lo, hmeichhiaah pawh hmeichhia ngawih ngawih ṭhin kha tunah chuan mipa nen eng nge kan danglamna awm? Mipa pian ang ka nei ve lo tih chauh loh chu. Bike ka khalh thiam a, sports ka ti thei zel zul a,meizial ka zu thei bawk a,alchohol thlengin.”
Mittui luang zawih zawih tho siin a nui lui hak hak a,mahse kei a hmu tu hian hrehawm ka lo ti ngawih ngawih thung si a. A natna hi tuar ve lo mah ila ka na a ni.

“Ka nungchang danglam lutuk avang hian ka chhungte’n min hau ngawt dawn se, exam naah ka tih chhiat phah chuang silova,min en liam tawp mai a nih hi. An lo sawi ṭhin, ‘I pawisa i tih bo chuan i thil neih pakhat a bo mai a,i eizawnna i chan pawh in,thil pakhat i chan a ni ve mai mahse i nungchang i hloh chuan engkim i chan vek.’ an tih hi, a dik a ni, Ramtea theihngilh ka tumna lamah engkim ka chan vek a nih hi.” a ti chuai raih a, a mittui luang zung zung chu engvang pawh in hruk hul sak ka duh.

Engmah sawi lova a bianga ka dawm chuan a mittui kar aṭangin min en kiau reuh a, ngawi reng in a mittui ka hruk sak a, chu chuan a ti lungchhe zual anih ka ring mi kuah chawt in a inhnit nghal hlap hlap a, hetiang hian ka ṭangah thlamuang takin ṭap sela ka duh ber a ni a, ka duh ber a ni fo bawk ang.

“Engkim chanah in ngai suh,Tum chuan kawng a awm an ti ṭhin,chan anga i in hriat kha i tum loh vang leh i duh loh vang mai mai anih kha.” Ka tih chuan rawn hawi chhuak vut in, “Ka nun dan te hi min en teh, hetiang te chu, shit, Mi â ang mai in ka khawsak hi. Ring tak takin ka nui a, ka zai a, ka lam a, engmah ngaihtuah duh lovin khau phar thawveng an sawi ang chiah in ka khawsa anih hi!” A vin leh ṭan tawh hle a ni. Nia kha mood chhe lutuk kha thai bo a hun chiah alawm, “Khatianga i awm khan i lawmawm alawm.” ka nuih a, a ngaihdan erawh a ni lo leh viau tawh,
“Lawmawm a? Nang chiah in hetiang mizia hi lawmawm i ti ang, a chhanchu nang te chuan hmeichhia hi hmeichhia anih angin i en ve ngailo tlat alawm.” a thusawi duh dan mai mai chuh. Ngaihzawng ka neih ngailoh vang mai hian hmeichhia te hi hmeichhia anga enlo ka nilo, ka duhzawng ka thinlung ti che khawp a min hip bettu ka hmuh loh vang zawk mai a ni, henu tereuh hian engmah a hre tawp silova.
“Kha nungchang,Lalramliana duh em em,mahse keiin ka huat em em hmeichhe derdep leh chaklo kha ka hua a ni,,mahse maw.”A inhum ruh ngat ngat a,a ngawi deuh vang vang bawk a.

“Mahse kha hmeichhia chak lo leh derdep tia ka sawi,keimah aṭanga ka paih chhuah tak kha ka ngai a ni, a chhanchu maw kha nungchang ka paih chhuah rual khan ka hriat miah lovin ka inrintawkna leh huaisenna ka lo paih tel daih a, engmah kha paih ṭhen lovin khuarei in min tuam dam hun kha lo nghak ni ila vawiin ni hian hetianga mahni indah hniam reng reng hian hun ka hmang lo tur. Chuan hetiang hian ka tlu in ka chaklo reng lo tur ania.” a tih chuan a dikzia ka hrechhuak uar thei. Hmeichhe harhvang tak leh lehkhathiam thei tak ni mahse a confi loh zia hrechiangtu ka ni, volleyball court chungah tih loh chuan a che buai nuai zel ṭhin. Mahse hmeichhe buai tak leh fiam nuam em em hi ka ngain tlat si a.

“Ka engkim hi a inbuatsaih a,ka hmuh leh hun chuan tiin thil tam tak ka lo suangtuah ve ṭhin mak min tih tur khawp a awm ka tum a,zam leh buai hauh lovin mahse eng nge thleng hi? Khang kum4 a ka suangtuahna zawng zawng te kha a thlawn vek,” tiin a ngawi vung vung a, “Maruat” zawi sapa a tih chuan melh ranin ka chhang vat a, “Um”
“Nangnen hi chuan ṭhianṭha kan ni reng ang tiro??” A tih chuan “Um, Best Friend Forever” tiin ka lo chhang thuai a,ka nui khi sung in nia ka rin, hetianga ka nuih hian a ngei tih ka hria.
“Khatin nui sung kher suh.” a ti nghal hlar a, kha maw ka sawi reng kha, a haw viau a ni.
“Lalramliana ka ṭhian inti ve si phatsantu ang hi chu ngaihzawng atan leh ṭhian atan pawh ka duh lo” tiin a ang tan tan a, lawmawm thei lutuk mai.
“Insum teh, a hahchhiau nasa lutuk palh ang.” ka tih chuan a nui ring leh mah mah tawh a ni e. Ka kut tum hmuh in, “Veronica Hmeichhe huaisen,Sir te table a lawn a, lam ngam ngat,Wonder Woman i nih kha This is khawvel,Everything is Cartoon, Be Strong”
Ka tih chuan A nui nasa lutuk chu a mittui te a tla hial a, “I am Strong” tiin ala au vak zui.Hetianga hlim taka a nuih hian a hmelṭhaṭna a zual a,ka mitah hian Ani tluk tur ka hre lo, hlim taka awm tur hian siam reng thei ila ka duh. Ka Angel Duhawmte, ka nun khawhar leh ruak hnawhkhat tu ka ṭhiannu leh min ti hlim em em tu hi a hlimna ka la pe ve ngei ang.

“Ngaihtuah nasa vung vung ve?” titu an awm avang chuan ka hawi chhuak zawk a. Kan Sir ka bulah alo ding reng chu niin, ding nghal vatin ka kun deuh lap a, Veronica-i ka ngaihtuahna nasat lutuk vang vek a ni. “I thil ngaihtuah chu kan vai hian lo share ve la.” a tih chuan midang ho chu an lo nui vur vur hlawm a, keipawh inthiamlo zetin ka nui tawi ve tak tho. College ania inhrem awm ve tawh lemlo bawk a, min ṭhut tir ve leh mai bawk a, mahse thil nuam zawk zawk erawh a ni hauh lo. Class a zo a, a ngaite bawkin ka ngaihtuahna ka kawm leh a.

Fapa mal ka ni a,ka nun hi khawhar chang leh mal intih chang hi ka ngah ve ṭhin,mahse Veronica-i ka nunah alo lang a,keimahah danglamna tam tak a rawn thlen a,ka nun nuam takin ka hman phah bawk.
Ka hlimna thlentu a ni a,kei chauh nilo kan inchhung cool ruih ṭhin te kha Veronica-i vang hian kan hlim tam phah hle a,kan in a ka hruai hmasak ber ni a,ka nu leh pa te nu pa tia a ko ve mai te kha tun hnua ka ngaihtuah hian a chhuanawm ka ti ṭhin.Kan chhungkuaa a tlaktlum ang chiah in,ban chhungkua a tello theilo in min siam a, a nu leh pate’n min duat thiam zia te min tih tlangnel thiam dan te,a unau te fel zia te ka hmuh in chhungkaw ṭha tak an ni tih ka hre bawk. Lungngaihna awmzia pawh hre ve lo tura ka lo ngaih ṭhin hian, lungngaihna awmzia te, natna awmzia te a hre ve a,mahse mihring ania chutiangte chu a hre ve tur chu tia ka ngaihtuah leh rualin a tuartu te zinga mi a ni erawh a pawi ka ti, hmangaihna lam kawngah chuan kei aiin hma a sawn tihna ania.

Class ṭan aṭangin thla1 a ral leh ta reng mai,College Week(sport) pawh hnai ta khawp mai, hetiang hun hi Veronica-i nena nuam kan tih ber hun a ni ṭhin. Kumin pawh nuam kan ti leh khawp in ka ring. Mahse kha Thla1 chhung zawng khan a biru char char ti ila ka sawi sual lovang. Rla hmuh hlau reng rengin a khaws a, an class-a lunch ka pek chang a tam, a chhang chuan college campus pawn lamah lunch kan ei fo bawk. Hmachhawn tawp tura ka hrilh la in,ka duh lo tih bakin min chhang ngai bawk silo, ṭawngkam thiamloh nen, ka hnial hneh bawk silova, a thu ka zawm leh nghe nghe zel zawng anih hi.

Zing ni chhuak hian ni ṭha tak i hmang dawn ania, a rawn ti ni maiin ka hria,morning routine ka tih zawhah ka inbual a,class kal turin ka insiam nghal a, Veronica-i ka sawm a,a bike duhzawng ka lei ngat Bullet-in kan inphur a, Mahse tukin chu a khawsa zia a Nghal leh ngar ngar e. College week inbuatsaih tur anih tawh avang hi aniang ka phur em em,ka khi reng mai.

“I tho â mi?” a vin leh tawh hle mai, henu tak hi chu aw engtik lai pawh hian ṭek hi a hmuam aniang, nulian deuh an zaidam tih te hi chu dawt vek a ni, Veronica Lalrinfeli, hmeichhia hleitling zuah bulah hian awm ve ngat se, tumah hian hetiang thu hi an sawi peih tawh teuh lo mai. Thinrim sa in a piang a ni mahna. “Engvang ngawt chuan maw?” A hma ang tho in, zaidam takin ka chhang leh mai. “I khi sung reng a.” tiin ka hriat tham lohvin a phun nghal sap a. Ka khi suk ringawt, Ni e,nuam ka ti lutuk,ka hlim bawk, nikum anga khawhar ru zet leh mal inti rilru zeta Week hman kha ka peih tawh lo,tunah chuan V-i ka bulah a awm tawh dawn a,engkim hi a perfect vek tawh ang. House hrang hrangah kan inṭhen a House khatah kan awmdun leh zel nen Week nuam ber kan hmang a ni ang chu !

“Hey, eng nge i ngaihtuah??ka bia che.” lungawilo zeta tiin, min rawn beng deuh pawp a, henu zet hi chu a hming phuah sak angai a ni,kut rang si,harh bawk si. “I nickname tur ka ngaihtuah.” ka tih chuan kawng dawm meuhin min melh kiau reuh a. A awmdan avang hian Ka nui chhuak leh ṭep tawh.
“Maw, Hmela nangmah kha phuahsak zawk i ngai.” tiin hlakin, a nui ring lui vak vak lehnghal, a va han chimawm thiam tak em! College kan thlen chuan,bike aṭangin a chhuk vat a,min la nuih sawng zui, nghal lutuk tih der teh ang.

“Hey,RL.” Amah en duh miah lovin, ban ka vai zeuh a,
a tlanchhia nghal vang vang nia, tlan chak reuh phian a, haha khawiah tak biru ang maw! ti rilru in muangchangin class lam panin ka kal a,thingkung phen aṭangin rum mang khengin min lo melh khuau ka hmuh chuan nuih loh tum pawn ka nui lo theilo a ni. Ka nui hmel a hmuh chuan a aia rumin min melh leh nghek a, chupawh chuan ka nuih a ti za tho. “Vanlalruat, ka rep che a nga, kan kawmthlangpa vawk chaw ah ka chhum dawn che.” rum ala a tih chuan, ka nui phuh chhuak ṭhawt a, ṭawngkam a nei mak thei em alawm, “In kawmthlang ten vawk an nei lo.” nuihza insum zeta ka tih chuan, “An ui chaw ah tal.” ala ti hram. “Ok min man chuan min rep dawn nia,” Ka tih chuan, ka sawi tur hre lawk ang maiin a rawn che ve nghal phat a. Henu tlan chak zia hi chu aw hmeichhia ve si tlan chak lutuk mai. Ka chau,ka tlan peih tawh lo,ka ding a min man ve nghalin, ka hnungah a zuang lawn nghal zat,
“Class thleng Min paw rawh anih loh chuan haw tur i awm tawh lovang,” tiin min vo nghal zat a, a rapthlak thei bawk si, nuih za leh hah inpawlh nen hnial peih lovin, ka paw ve mai bawk a, mahse henu hian eng nge a tih leh tak hi ka sakawr tlan rawh tih leh ka samah min kek dak awrh anih chu a na bawk si ka lo inringlo nen ka thlauh ṭhelh a ni e.
“Lalrinfel” Keimah anglo zetin ka vin a, henu hri hi ka kai tawh aniang, a thiltih lai a chawl dat, ” ka sam kha i khawih leh chuan,ka bin let tawp ang che.” ka ti leh hmuk a, mi hi chu a hlau thlawt lo a ni. “Ok” ti sam etin, a hma aia na in min kek leh a, “Ana.” ka tih rualin ka hnung aṭanga zuang thla in a tlanchhe nghal nal nal a, henu zet hi chu aw, min ti â zo dawn. Ka um lovang ka ti zeta lei mi rawn chhuah leh kher chuan ka um nghal a, mahse ka hah tawh takzet a ni e.
An class kawngkhar bulah alo ding a,thaw hlawp hlawp a, abul ka thlen chuan, a nui vak vak lehnghal a, a chezia hi mipa nise sawp a tawk zing ve khawp ang le.

“Khati khan Sportman i inti ve a, nep sazu lutuk, huh.” Ngeiawm zeta tiin min la nerkhum lui sawng zui. Mahse tuna a awmdan tak hi chu a lawmawm ru zek bawk si, hnial leh ila ni mai lawm.
“Sazu ka ni lo, nep sazu min ti suh.” ka tih chuan, a nui lai tawp hmakin, mawl min ti hmel zetin kut kuangkuah atin min melh, “Awiii Vanlalruat i mawl zia hi.” ti leh vakin a nuih khek vak a, a nui nasa mah mah a ni. Mahse hetianga lungkham neilo a nui ri hi lawm ngaihthlak nuam ka tih em em ṭhin chu. I mawl lutuk tih leh mi ben pawp a rual leh tawh. Awi henu bulah zet hi zawng, hriamhrei pakhat tal pai angai anih hi. “Ana.Hriamhrei pai tawh ila a ṭha ang.” ka tih chuan, pum dawm meuh in a nui kun tlawk tlawk a, va han hahthlak tak em!! Mittui tla phungin a rawn hawi chhuak a, ṭawng pawh ṭawng ṭha hlei thei lo hian, “Par-a ni rawh.”a tih chuan, ka ner nghal sawk.
“Pangpar huanah awm rawh,i mawlhmuar emai.” tiin
ala nui dir tlak tlak a, a nui tawp theilo chu anih ber hi maw. “Nui rawh, nui rawh, Nui kaih bawrh bawrh rawh.” Ka tih chuan a ke per meuhin a nui tawh a,
midang zawng zawng mak tih khawp in a nui tawh, a eng ber khan nge a nuih ti za pawh ka hre tawh lo, ka en tawp ringawt. A nui pawh in ka hre lo, a ṭap tawh zawkin ka hria. Ka kalsan loh chuan a nui kaih tak tak mai ang, hahthlak hian henu zet hi chu mi pakhat nih hi a tling ve khawp mai.

Class ka lut a,Veronica-i ka ngaihtuah a ka khi nghal var var, ka classmate pakhat Sawma ka bulah rawn kalin, “Tukin chu tho fuh awm ve a ṭhianpa.” a rawn tih chuan ka chhang lem lo. Ka bulah a rawn ṭhu nghal zat a, “Veronica-i hi i bialnu a mi?” A tih chuan ka en nghal zawk. Ka bialnu a nilo mahse hetiang zawhna ka dawn chang hian Aw tia chhan ka chak ṭhin.

“Aih…”

“I bialnu anih loh chuan min tihpui la, ka hmuh tir aṭang khan ka star tawh.” a tih chuan, ka ngawi ngul a. Sawma hi mipangai tak a ni, ruihtheih thil a khawih awm ka hrelo a, hmeichhe lamah pawh a tla na tih ka hria. Mahse Veronica-i nena in ngaizawng tur hian ka duh chiah em ka hrelo. Veronica-i bialpa neih hrim hrim hi ka duh lo. Ka hma ka sial vang pawh a ni mahna, henu lakah hian eng rilru chiah nge ka put hi ka hre tawh bikko, ka hrelo takzet a ni e.

Zirtirtu lo luh lai ka hre hauh lo,ka hminga min ko ri ah chuan ka phu zawk a. Kan class zawng zawng chu ka lam an lo hawi ṭhup a, a nuam viau lo. Zirtirtu chuan nui hmel lek lek hian,”I dream chu lo share ve la.” a tih chuan, Sawi tur ka hrelo chu ka nui ringawt a, V-i vanga vawihnih hetianga koh chhuah ka nihna, mahse rei awm lovin a chhuak zui nghal daih a, tihzia phian mai. Week inbuatsaihna hun hman tur a ni a, House pali-ah kan inṭhen a, keini hi Blue House kan ni. House meeting neih tur anih avangin Blue house awmna tur Hall ah kan kal a, Veronica-i ka zawng ru deuh a,Ka hmuh chuan ka nuih pawh a za lo. Mipa rual kar aṭangin Par-a tiin ban a rawn vai zauh a, mi pawh ngaihsak zui tawh chuang lovin,a ṭhutpui te nen eng eng emaw sawiin a nui uar uar a, a nui hmel mawlh mai hi midang hian hmu ve lo mahse pawi ka ti hlollo. Sawng mipa ho sawn it hmel takin an en ngawih ngawih a chupawh hrethiam lovin an zingah ṭhu in ala nui uar uar chu ania.

Bialpa neih leh hi duh ta se, a ṭhutpui te zingah sawn a mi duhzawng an awm angem? Ka thil ngaihtuah avang chuan thikna in ka khat a,ka thinrim ru ṭun mai.
A bul ka thlen chuan ka tum hmuk tih a hmu nih ka ring, “I thinrim ni maw?” ngaihsam zetin a ti a.
“Khatin mi ko tawh suh.”Ka ti nghal hluk, mahse min kohna vanga thinrim erawh ka nilo, ka thinrim chhan erawh hre turin ka duh lo bur.
“I rilru zim vang anih chu.” ala ti zui. Ti tau der teh ang, ka tana awm reng ṭhin ka ṭhiannu hi a buai leh ang chu. “Ka rilru a zim bawk sia ka kalsan phawt mai ang che u.” tiin ka kut ka vai zeuh a, ka kalsawn nghal, “Hey..” Ka banah a rawn chelh nghal vat a, min nuih tlawn veleh, ka meng rum ve sauh thung.
“I sual e, min kalsan i tum a,i rilru zim tak tak mi?” hrehawm tih hmel zetin min melh kiau reuh a, “Ka rilru zim leh zimloh chu nangman sawi la.” ti deuh hmuk. “Zimlo.Ka fiam mai mai che nih kha.” a ti nghal vat a, mahse lungawi ala hun lo tlat.
“Chuan.” Amah pawh en duh lova ka tih chuan, “Chuan ahhh thinrim tawh lo la.” zaidam zeta a tih chuan ka nui chhuak ṭhelh a ni. “Duhlo ta ila..” ka ti leh ngat. “Anih, ka tihpalh.” a inthiamlo tak tak tawh in ka hria, “Ka tihpalh i tih vang ngawt khan i sawilo tihna a ni chuang hleinem. Tihpalh tih ngawt hian engkim fel thei nise.” ka tih chuan, “Isua kha a thih lovang.” ka sawi zawh hma in, mi la rawn sawi khalh zui.”Tihpalh tih sawtloh zia i hre tawh bawk a,Ka kal.”
tiin ka hawisawn nghal hmak. Ka hmaah a rawn ding zawm nghal zat a, “Ok ka treat ang che, Ahhhh a ni leh lo pawisa ka nei ve i ti leh dawn.” tiin Amah leh Amah a inhnial a, kan inhrechiang bawk si a.
“I thu thu in ka awm ang.” a tih chuan a nui nghal suk. He thu a sawi hi alawm ka duh chu. “Eng chen?” ka tih chuan, “Vawiiin” a ti zawi sap a, ka melh nghal ngur a, a hmui pet a pet nghal zeuh chu fawh nawk nawk ka chak. No… eng nge ka ngaihtuah a?
“Week chhung” a tih leh chuan, rang zetin”Deal” ka lo ti ngual vat a, ka nuih vur vur chuan “Deal” a ti ve nghal mahse a hmelah erawh a chak viau lo tih ka hria. Ka chimawm dan tur vel a ngaihtuah leh anih ka ring.

Hmeichhe tam tak biak chak mahse an biak ngam loh leh ka ṭawng tlem avanga min zah em em laiin Henu ve hi chuan min nel in min kawmngeih em em a,ka mitmeng hmeichhe tam takin apa an tih leh rum an tih ṭhin la hi a ngai pawimawh der lo,ka thinrim mitmeng erawh a hre hma in ngawih hun a hre hle a mahse henu bulah erawh thinrim tak tak theih loh anih hi.

(Veronica’s POV)

Engtin nge Hepa hian ka lungngaih leh hrehawm chang pawh hian thinlung takin min nuih tir theih ka hre biklo mahse a kiangah hi chuan thinlung takin ka nui a ka thla hi a muang hliah hliah si a. Hetianga midang bula ka awm ngai pawh ka hrelo, Rl-a bulah ngei pawh khan hetiang hian ka awm ngai lo asin.
House meeting kan nei dawn a,hall kan thlen khan Maruata te class an la rawn kal ve lova, kan class mipa ho bulah ka ṭhu a,eng eng emaw fiamthu an sawi a, kan nui leh nasa in, ka rin aiin hmelhriat leh min hretu an tam daih lehnghal a. Maruata rawn lut ka hmuh chuan a ngei dawn tih ka chiang aPar-a tiin ban ka vai zauh a,ka sawi reng kha a haw khat tlat anih kha.

A sual si, Week chhung a Kid ka ni dawn ka van peih lo tak em! A chimawm thiam si, min ti duhdah leh ngawt ang. Kan inhriat aṭang a kid a vawi 3 ka ṭanna chiah, mahse ka ṭang reng biklo vawikhat a ṭang ve tawh Ni3 chhung haha. House hruaitu kan thlang a, kan house Leader a ni a, Asst.Leader-ah min la thlang zui ka peih zawng a ni ve hauh lo, bakah sinior an tam nge keini kher thlan kan nih, awm ang lo lutuk. Rla te nen House khat kan nilo hi ka lawm hle a ni mai. Red House an ni in ka hria, Sport na a tel tur hming list in an buai viau a, kei erawh ka hruaitu pui te an fel a, min awl thiam viau, hetianga buai vel hi chu ka peih ve lo hrim hrim a ni e.

Class pangngai a awm lo bawk a, class room pakhatah mipa rual zingah eng eng emaw sawiin ka awm mai mai zel a, bakah Lalramliana hmuh ka hlau a, ka chhuak peih lo. Corridor lama mipa aw in, ‘Red House leader chu eng nge i tih dawn?’ a tih ruala Hmeichhe aw in, ‘Red House luh kan phal lo’ a tih ri ka hriat chuan, class hnunglamah chuan kal nghal vatin tukverhah chuan ka lawn a, a hnuai chu playground zawl zet a ni a, a sang over lo bawk nen,
mipa pakhatin “eng nge i tih dawn?” A tih rual chuan ka zuang thla nghal hmiah a, lei ka thlen rual chuan ka kut bengfai that that in, “Ka him e.” ka ti chhuak sap. “wow.” ti rual dual a, kut an ben dar dar chuan ka hawi chho zawk a, Lalramliana’n tukverh aṭanga min rawn en chu ka hmu chiang kher mai, A mit sawn laser kap thei sela chuan bung thumah chuan ka chhuak hman hrim hrim ang, min melhrum em alawm. Ngeiawm taka nuih khum sawngin playground sira volleyball lo beng ho lam ka pan nghal nal nal a.

(VERONICA ‘S POV)

Lalramliana hmachhawn tura huaisenna ka neilo ṭhin hi chu in ben chawrh mai hi ka duh ṭhin, mahse ka la hmachhawn ngei a ngai dawn tho tho tih hre mah ila tunah chuan ni rih lo. Mipa rual in volleyball an khelh na lamah chuan ka kal zel a,ka hmelhriat pakhat ka hmu nawlh mai.bTu nge a hming kha aw? Puia a ni ta in ka hria. Ka hmelhriat nia ka hriat chuan ka hminga min ko in, an zinga khelh ve turin min sawm a, ka hreh loh zawng tak a ni. Mipa kara inkhel mah ni ila ka zam lohna ve kawng tak a ni bawk a, ṭhenkhat thiam tih ka hlawh ve bawk. Min fakna awka vang pawh in a ni ang nuam ka ti phian lehnghal. Tu nge fak lawm lo teh lul ang ni.

Court sira Sarah-i te ṭhian zei fahrana lokal te chuan ka mit an la lo ka tih chuan dawt ka sawi a ni ngei ang. Mahse ka mit an lak dan erawh a dang daih thung. Henu hian ka pawi a sawi hauh lo mahse a mipa hnaih em em Lalramliana hian ka pawi a sawi miau alawm. Ani hnaih tu apiang chu ka haw vek. Ka thil ngaihtuah vang chuan ka ball ben lai ka theihngilh hmiah a, engtianga na in nge tih leh engtin nge tih ka hriat hma in Sarah-i te ṭhian thum awmna lamah chuan ball ka hlap per pawp a, an la rak chiam zui, tu a fuh phei zawng a nilo, an inla no ve mai mai a ni e. Kan zinga pakhat chuan ball a char pah in tihpalh lutuk tiin thupha a chawi a, kei erawh ka nuih a za leh tlat pek a, Insum duh hauh lovin ka nui nghek anih kha, mipa ho pawh ka nuih rualin an nui vek a, diktak chuan an In ti no ve em bawk a ni, lapua pawn vawm ila an pilh thei hialin nia ka rin, ball hlau rual pawh an ni tawh lo asin le.

“Nangnu kha.” thinrim zeta ti ri ah chuan Sarah-i te lam chu ka hawi a, a mitmeng ling hlar mai a min melh in, thinrim tih hriat hluah hluah in ka lam a rawn pan nghal hlawk hlawk chu chesawn lovin ka lo en reng tawp a, “Hmeli…..Engtin nge kei hi min nuih ngam zawk? Ve khanglang che hian.” thinrim zeta tiin, min ben tumin a kut a lek kang nghal a,mahse henu khawih mai mai theih hi ka ni lo. A kutah man sakin ka vai per lawp a, a pheikhawk a sang ve nen, ka tha pek lo na ve tho nen lei charah chuan a ṭhu nghal hnawk a, thinrim zetin ṭawngkam chhe zet phuh chhuak in a rak chiam lehnghal, ka thin ter tek a chhuak lo hi a vannei thlawt a ni. Kun hniam in a mitah tak ka melh a, “I duh duh sawi rawh,mahse ka hmuh phakah awm tawh suh, i cho phak ka nilo.” ka ti sap a. Ka ṭawng a ring lo na a, ka aw ki erawh ni aiin a phu rang bawk. Chuan engtik lai maha ka hmingpuma min ko phallo tu khan tunah khan ka Hmingpum ngatin min ko ania. “Lalramlian” ka ti sap a, mahse Ani erawh ka hnung lama awm a ni, ka hawi let ang nge ka tlanchhe daih dawn, ka ngaihtuahna chu a buai leh hle tawh. Nilo, tunah chuan a hun tawh a ni mai, ka hmachhawn a hun tawh a ni. Ka rilru in number ka chhiar a.

Ka hawi let chu ka inchhir nghal, a mitmeng uk kharh leh mawi ka tih em em ṭhin kha hmuh ka inbeisei pawh a ni chuang lo, mahse min huatna mitmeng erawh hmuh ka duhlo, tunah hian chu mitmeng min huatna a khat chuan min melh mek si a. Ni e, a bialnu nen kan inhnial mek, chuan awmang zetin tunah hian a ṭap der bawk. Henu hian ka hnunglama Rla a hmuh vang anih ngei dawn hi a lo ṭah der. Awihawm loh lutuk, ka ngaihtuahna avang chuan ka ner sak a, ka hmaa ding chu zam hauh lovin ka melh ve nghal ran a, midangte lemchhan kual vang mai mai a, zam a, hawisawn tur ka nilo, chutiang taka dawizep la ka ni heklo.

“Engthil nge i tih hi?” A ṭawng chang fak a, zaktheilo hlawm hian a. “Kei nilovin Ani kha zawt zawk ta che..” A awki ang chiaha chhangin ka zaidam bik hauh lo, mahse inhnial buai erawh ka duh hauh lo.
“I zak miah lo a mi a.” a tih leh chuan ka kut ka hum ruh a, a ṭawngkam ngeiawm tak hi chhan ka duh mahse ka hrawkah hian hnawh tu awm ang mai hian ka ṭawng chhuak thei hauh lo. Kei min chhan ṭhin ang chiah in a bialnu a chhan a, nat loh tum viau mah ila ka theilo chu anih hi. Sarah-i kaitho pah chuan ngaihtuah hmel zetin, “i ṭha em?” A ti a saw Drama Queen la saw a awmah beiin a la ṭap der char char zui, ka ngei avang hian thi dawn se tun minute reilo te chhung hian vawi tam a thi nawn awn awn tawh ang mawle.

“Midang te chaklohna laia diriam zui ching hmeichhe nep maw ilo nih tak a.” a tih leh chuan mit khap hauh lovin ka melh a, a ṭawngkam zet chuan ṭek angin min deng dawt ni maiin ka hria. Ka chhang thei tawh lo,ka mittui erawh a hul vek, nat lutuk hian mittui pawh a insiam theilo anih ka ring, ka chhungril erawh chemtea vih sawk sawk ang chiah a na a ni, a na takzet. Ka nat lutuk vang leh sawi tur ka hriat loh lutuk avang chuan ka nui ri hak a, ṭawngkam khat mah ka chhak chhuak lo thung. Midang zawng pawh an ngawi ṭhup a, Lalramliana khawsa zia chuan tumah ṭawng tur a hriat tirlo pawh a ni ta ve ang.

“Engtin nge hmeichhe laktlak loh ang maia i khawsak theih?” a tih vin leh tuar rual chuan, ka phu zawk a, theih nise bo daih ka chak, “A tawk viau lo maw Rl.”
Thinrim insum tih hriat taka rawn titu chuan Vanlalruata a ni. Ka mamawh hun apianga ka tana awm reng ṭhin hi ka tan a rawn tlai lo, tunah hian ka mamawh hle si a. A aw ringawt pawh in min thlamuan miau a ni.

“Rawn in rawlh suh” Rl-an a ti hmuk a, mahse Rl-a hi a kalsawn anih loh chuan Maruata hian min hlat dawn lo tih chiang takin ka hria.

“Hmeichhe intih buaina a mipa in rawlh hi a mawi viau lo.” Engtik lai pawh hian a aw hi chu a zaidam alawm mahse hei tak hi a thinrim a hlauhawmna a ni tlat. Ka bulah a rawn kal a, chiang zetin min en a. A mitmeng fing zet chuan ka ṭhat leh ṭhat loh min zawt a, a ngaih ṭhatnan lu ka bu zauh a, mahse ka ṭha lo, ka ṭha hlollo a ni. Ka kutah a rawn vuan a, chu ringawt pawh chu ka tan a tawk em em a ni. Ka kut khur dar dar chu a feel nghal tih hriat zetin a rum nghut a, a mitmeng erawh a danglam nghal vek, hetiang em em a, a thinrim mitmeng dur khup hi ka la hmu ngailo a, keimah vang anih ngei pawh ka ring. Zaidam taka thil sawi chi leh thinrim ve mai mai ngailo a ni a, mahse tun ṭum erawh a thin a rim a, engpawh ti dawn se ka dang thei kherin ka ringlo, ka kut chu nghet zetin a hmer let ngawt ngawt a,a mit erawh kei nilovin RLa a melh thung.

“Chu khanu thil tih mawilo zet ka zilh chu i huatpui viau elaw.” Engvanga Lalramliana hi ṭawngtam viau nge maw anih le. A ṭawngkam la a chhe em em zui.
“I zilh turin i fanu a ni em? Nge ni a i farnu, Aih a pahnih khan a nilo ve ve chuan a ṭhian pawh.” Maruata’n ngeiawm zeta a chhanna chuan a ti thinrim kher mai. Insual inpeih at in a rawn kal hnai a, Maruata la hian a hlau lo tih hriat zetin, min en zawk a, nui nghal suk in ka kut a thlah rualin in a pan ve nghal hmiah a, insual lo turin ka duh mahse Lalramliana ṭawngkam ngeiawm zet khan ka ngaihtuahna a tibuai a, Khanu, hmeichhe laktlakloh a tiri te chu ka bengah a ri nawn tluk tluk a, ka awmna ngaiah dingin ka en reng tawp. Mipa palian tak, sa ṭha leh infit zet te pahnih insual chu hmuh an nuam viau lo, mipa dang lo awm ve te chuan an ṭhelh na in an ṭhelh hlei thei lo chu a ni e. Sarah-i te ṭhian thum la chu an rak chel chul a ka thluak an tibuai zual vek.

An lam pan chuan ka kal hnaia, an pawh ṭhen rual chuan an inkarah dingin ban ka phar a, an thi nual hman lehnghal a, “Duh tawk rawh u” tiin ka au nghal ṭhat. An pahnih chuan ka en tawn sek a, ka na ngawih ngawih, mipa zaidam lutuk Maruata keimah avangin a insual a, lehlamah Lalramliana kum4 hnuah pawh ka rilru luahkhat em em tu a ni a, hetianga an pahnih ka hmu hian min ti na belh.
“In pahnih khan duhtawk rawh u,in hria em.” Vin ṭhat a ti leh in, ka thaw hak a, ka rilru a na a, ka thinrim hle bawk. Lalramliana lam chu ka hawiin, “Lalramlian hei hi lo hre rawh nang leh he Sarah-i te hi ka hmuh phakah in rawn lang leh emaw buaina min thlen leh anih chuan kei aia nasa hi in tawng tawh lovang” ka ti rum al a, ka thinrim insum nasa lutuk hi ka hah vek thei. Min chhang tawh lovin a ngawi ngul a, Maruata ka en chuan ka lung a awi chuang lo. Ka thinrim mitmeng hi a chhiar thiam vek tih ka hria phun hlukin a kal nghal nul nul a, RLa leh Sarah-i te chu melh leh nghekin Maruata chu ka umzui ve nghal a, thinrim eng ang mah ila Hliam nei chungin ka kal tir ngawt theilo.

‘Lalramlian nang hian na in min siam anih chuan kei hian engvangin nge ka tih loh bik ang? Mit aiah mit, ha aiah ha an ti ṭhin, keipawn chu chiah chu ka ti ang vawikhat chiah nang leh i hnaih a awm zawng zawng te hi ka ti na ve khawp ang che u.’ ka ti rilru mawlh mawlh a, dawizep ka intih avangin ka in hau a, Lalramliana ka huat em avang leh a ṭawngkam chhe tak tak avangin ka thin a rim bawk, vawiin zet chu ni ṭha tak a va ni lo em.

Vawiin chu nimin ang em chuan ṭha lo tawh suh se. Vanlalruata pawh ka thlem lungawi tawh bawk a, a ṭha leh vek mai ang. Thil pawimawh a awm avangin Maruata nen min lo ko a,ka kal ve leh peih lo. Class-room pakhat aṭanga music ri ka hriat chuan chu lam pan chuan ka kal a, kawngkhar aṭang ka bih dek dek chuan hmeichhe 6/7 vel hian lam an lo zir a, Ka lut ve leh hmiah. Min hmuh rual chuan an phawk nghal hra mai. Nga ti nge khitia mak tih hmel zeta min melh hlawm a? Nge ni a keimahah hian diklo a awm zawk? inrinhlel ru takin ka in en thuak thuak a diklo awm pawh ka hre chuanglo. An zinga pakhat hmelṭha zet leh piannalh zet chuan min hui zeuh in ‘Lokal ve rawh Vero’ atih chuan mak ka ti hle a, engtin nge min hriat a?

Keimah chu in kawk ha in m”Keimah maw?” Ka ti hu a, ka landan mawl hmel lutuk chu darthlalangah inhmu ila ka in nuihzat viau ta ve ang. “Umm” tiin min hui leh zeuh a, a nui sang lehnghal a, ka kawm hma hauh aṭang ka nel ve nghal tawp. An bulah chuan kal hnaiin dawhkanah chuan ka ṭhu nghal tharh a, asawi dan in kan House an ni a, Last day-ah house aiawh in an lam dawn a ni awm e, mahse lam a tel tih pawh ka lo hre miah lova.

“Maria-i ka nia,helaia incharge hi,” ka chibai theih turin a kut min pe a, ka lo chibai ngjal vat. “Ah , ih, Veronica.” ka ti bah nak a, “Helaia awm te chuan kan hre vek che lawm, 1st year aṭanga House OB ni thei te chu ilar ve tawk tihna.” tiin a nui hak hak a, ka zah avangin ka hmai a sa hat hat thei nia mawle. Hetianga hmeichhia han kawm vel hi ka tih lohna a rei ve tawh nen an bula awmdan pawh ka thiamlo lek lek a ni e. “Eng nge ilo tih reng reng?” tia min zawh chuan,ka ngaihtuah a eng ti tura helai hmuna kal hi nge ka nih ka hrelo reng reng. Mahse Lalramliana ka huat em avangin ka ngaihtuahna ka kawm anih kha, chuan helai hmun hi ka thleng a. Mi zawng zawng mak tih khawp a chet thawh ka chak chuan Lalramliana ngei tura awm ka duh ber, min huat avanga thinrim leh alh pup pup a siam ka duh a ni.

“Mi surprise ka duh a, Friday chuan in bulah ka lo lam ve thei angem?” ka thusawi avâng chuan mak an ti tih an hmelah ka hmu vek, mahse eng nge ka tih chuan ang, ka chak miau alawm. Maria-i pawh chuan min en vung vung a, sawi mai tur a hrelo tih a hmelah a alang mahse in siam rem vatin,
“Oh…..Volleyball Queen hian lam a duh ve maw!” tiin nelawm takin a nui zui hak hak a. Midang dinna lam chu en in, “A laia lam tur kan mamawh tho a rem in ti em?” tiin a zawt nghal zat a, an ni la an lo phur nasa, ka tel ve dawn vang nge chu ka hrelo a…

Kan han zir chhin a, awi ka zei loh dan rapthlak zia hi, kan nui leh rih ṭhin a, Maria-i chuan a hran in min zirtir a, harsa chu ka ti ve khawp mai, mahse ka tum tawh, ka ti hlawhtling ngei bawk ang. Dar4 a rik chuan ban kan tum ve chiah. Maria-i bawk chuan, Saturday leh sunday-ah zir ka duh chuan an in lama min zirtir theih tur thu a sawi a, ka lawm khawp mai, a phone no min pek lai chuan ka phone a ri ve chiah. Nui sangin min kalsan a,keipawn Maruata call chu ka pick up nghal vat a, nilengin ka bosan sia, a lungawilo ve khawp ang le.

“Um, Ruat khawiah nge i awm? Ka lokal nghal.” Ka pick up rualin ka ti nghal ngawt a, “I haw maw ka tia,ka haw san daih che.” a tih chuan ka ding nghal chawt, chupa mai mai chu, min hawsan tak tak chuan a chaklo ang. “Vanlalruat i haw tak tak anih chuan i chak lovang.” vin zeta ka tih chuan, “Engtin nge mi tih vak chuan ang?” ngaihsam hmel zeta atih chuan ka ngei leh hle tawh, chhan mai dan tur la ka hre lehpek lo. He misualpa em em ṭhin hi chu aw, a chang leh min chhan viau a, a chhang leh min ngaihsak leh hauh silo anih hi maw. A tam zawk an haw tawh a, Taxi a haw mai ka tum avangin hmanhmawh deuh in Gate lam ka pan a,Vanlalruata’n min hawsan chu ka ngei in, keima hriat turin ka phun hlak hlak a.

“Hello” ka kutah phone ka keng tih ka theihngilh hman, “I kid ka nilo nghal ang.” ka rilrua rawn lang hmasa ber ka sawi chhuak a, a nui huk a, hetianga a nuih hi chuan a chimawm leh dawn tihna.”I ni dawn tho sia.” a awki ngeiawm lutuk chu ka bulah awm se, ka khawih hnang duh ang. “Ka ni bawk lovang ka thu ka sut leh vek,” ti hlar in, “Nang.Misual Pa.” ka ti nghal tuar a, ka au ring angreng bawk sia a awmhmunah a phu ve zuk tho ang. “I thinrim hian Zawhte nghal deuh i ang.” ka au ri ngaipawimawh lo zetin min rawn chhang a, chimawm zetin a nui ri leh kher bawk. A nui ri chuan min ti thinrim takzet a ni e. “Vanlalruat, Misual satliah pawh i nilo, Misual Boss i nih kha, Min nghah loh avangin i mutnaah phung in delh che rawh se.” phone ka dah nghal hmak.

“Engtin nge min hawsan theih, a chaklo ang chu aw. Ka phun zui mawlh mawlh. Taxi la hi a ding duh bawk silo.” Ka hriat tawk turin ka phun char char a, khua la chu a tlai chak in, mi zawng zawng an haw tawh a, college gate pawh an khar tawh bawk. Nge maw taxi ka mamawh velah a awm duh miah lo le?

Ka hma a bike rawn ding thut chuan min ti phu kher mai, en pawh ngai lovin tu bike nge tih ka hre nghal, Dawheh lutuk mai, ka theih tawka rumin ka melh a,min la nuih sawng zui. Min nghah te chuan darkhat dawn min din tir kher a ngai lo asin. “Phung delh ka hlau sia, ka lo hruai leh mai che.” tiin a khi sung lehnghal a, ngeiawm lutuk. Min nghak hi ka lawm rualin min din rei tir lutuk erawh ka haw takzet.

“Misualpa, khi seng sung suh, mi â i ang.” A huat leh ka rin tehreng nen, zu haw duh ṭhak lova. “I khalh duh zawk em?” Min tlawn tih ka hria, ka lungawi dawn lo reng reng. “Taxi a tam khawp in ka hria.” Eng ngah nge maw a nuih char char le. Fiamthu ka sawi der silo, nge keimah hi min nuihzat zawk. Min nuihzat chiang lutuk. “Min nuihzat a mi?” Ka aw chu, naupang chu nise a tlanchhe daih ang, ka rilṭam tawh nen ka thin a chhe takzet mahse naupang nilovin Vanlalruata a ni tlat, a nui char char chu ka thin in a tuar hlollo, ka ban rawk a, a samah ka man rawk a, a au ring ania, engtiang pawn ti ila min khawih let dawn lo tih ka chiang ve em alawm.

“A tawk, a tawk, ka tlawm, ka tlawm.” Bike aṭangin a rawn chhuk nghal a, ka thlah awm lo emai.

” Ana, min thlah la chuan ka treat ang che.” a tih chuan, “Pawisa ka nei ve bawk.” min tih ṭhin dan chiah in ka chhang a.”Anih ka kid i ni reng ang.” ala ti zuiah, ka huat tawk a tling leh viau. “Vanlalruat i va han sual tak.” ka thlah ve hram. “Ka sam i pawt ṭil vekin ka hria.” a lu a dawm vang vang a,a na ve det ang, chawh nge a nghal viau.
“Thinawrh.” nui huk huk a atih chuan,

“Eng nge Para?” ka ti vin hlar a,

“Hriamhrei pai hi a ngai tak tak anih hi.” a ti hluk a, mahse a nui reng tho.

“Pai ngei ngei ang che, ka ril a ṭam” ti zui in ka ner nang a, ka awmdan a hrethiam tih hre takin ka pum zawn a melh a, “Kal vat ang thil ei vat rawh.” a tih chuan, kan nui dun leh thei ta. Bike khalh ka tum tlat avangin min dang bik lo, kan inphur haw ta hram. Ka thin a ti rim em em a,darkar reilote ah ka lung a ti awi leh mai a,a chezia pa zet te, fel thlup te, a nuih zawnga a ha uingho lang zeuh ṭhin te hian eng emaw zawng tak hian min ti hlim veng veng ṭhin.

Tun hnaia Maruata ka chik dan em em hi eng nge a chhan pawh ka hre lo. A vun ngo vur ni silova fresh vang mai te, sportman tih takah a pian nalh zet leh sang ṭha zet te hi a hma khan ka ngaihtuah ngailo. Hetiang em em hian alo chhe lo a ni tih hi ka hre ngailo, eng nga ti nge hetiang zawnga ka ngaihtuah vak vak tak tih pawh hi ka hre hek lo,mahse ka ngaihtuah reng si. Kei hian ka ṭhianpa hi ka Duh tihna a mi, ka duh niin ka hre bawk silo. A ngaihtuah tawh lovang rilru buai mai mai.

Ka ṭhian a ni a, ka nun hrehawm lai bera hlim taka min nuih tir thei tura Pathianin ka hnena a rawn tirh a ni a, ka tan hian a hlu in, Ka Angel ang maiin ka ngai hmiah. Ani hi awm lo sela chuan College kal pawh ka peih in ka ringlo. Ka school chawlh chhunga hrehawm a tih ṭhin zia ka ngaihtuah a, nitin a rawn lang zut a, khatih lai khan ka nu, dawrah ka pui fo a, ka nu bulah a phun ziah a, a chang hi chuan a lawmawm thei lutuk a, ka nuih leh vak zel. Ka tello in i awm theilo tia ka fiam la hian zak miah lo hian ka thi dawn i tello chuan a ti ziah a, ka nu te hian an nuih leh nge nge zel. Ka school chawlh avang khan an in aiin kan inah a tal tam zawk a, ka chhungte hian an ngaina hle tih ka hria. Ṭhian kan nih hrelo tam zawk hian inngaizawng emaw min ti fo reng a.

(MARUATA POV)

Engtik lai pawh a min hnial reng ṭhintu Veronica-i ka Ṭhianṭha ber chu mit hmunah ka ngaihtuah a, a nungchang harh zet leh lawmawm lutuk te chuan mahni in min ti nui leh nge nge ṭhin anih hi..
Week ṭan nan ni thum chiah a awm tawh a. Tel tur tam zawk hming list pawh ka nei tawh, kan buai zual pawh a reh ṭan a,eng eng emaw buaipui ala ngaih neuh neuh avangin Veronica-i nen pawh kan inkawm hman meuh lo ṭhin. Henu hi hruaitu a ni ve a mahse pawn lamah a rawn chhuak duh ngailo,a chhan ka hriat avangin chhuanlam ka siam sak zel a,hruaitu dangten min hmaizah avangin kan awl tluang zel chu ania.

Vawiin lama a chetdan maksak zet kha ka ngaihtuah a, tukverh aṭanga a zuangchhuak ka hmuh ruala hlauhthawnna leh thinrimna ka neih ngailoh neiin, ka tawt nghal ṭun a, Mipa tan pawh a sang mah mah tih tur aṭanga a zuangthlak ka hriat leh lek phei chuan ka rilru hi ka hrethiam lo, ka lawmlo a ni tawp mai. Kan mipa ho la chuan kut an la beng dar dar zui a, mahse an kut ben thawmah erawh ka thlamuan phah viau si a. Thinrim ṭun mah ila a duhnaah chuan he hmeichhe lawmawm leh Nghal zet hian ka thu a awi leh dawn chuang silo tih hre reng chunga playground kual kawi zeta helin ka thleng thla a, RL-a nen kan inbiakna chu ka ngaihtuah kai a.

“Eng nge i tih dawn a?” ka tih chuan, Ka zawhna pawh chhang lovin, “Engtin nge Zebra nilo…..Veronica-i hi hetiang em em hian a danglam theih?” A ti chhuak hlol a, min zawt pawh a anglo,amah leh amah a inbia ni berin ka hria. Keipawn ka chhang lo. An tunhma nun ka hriat ve miau loh avangin. Ka hriat theih chinah chuan hetiang reng hi a ni tlat si a.

Playground hungna pawn lam grass-ah chuan kan ṭhu dun a,Veronica-i volleyball beng pawh hla deuh tak aṭangin kan hmu pha, kan ngawih deuh vang vang hnu chuan, “I hriat hmeichhia anih laiin eng ang mizia nge aneih ṭhin?” Ka biak thut vang nge ka zawh thut vang ka hre lo,min chhang lok lo.
“Zaidam,zakzum,mahni a engmah ti theilo mahse hmeichhe chhel tak..” a nui suk a, “V-i a zaidam ṭhin maw?” mak ti zeta ka zawh chuan a lu a bu nghut a,
“Zaidam mai a nilo,ka hmeichhe hriat tawhah chuan a ngilnei ber ang,Hmeichhe nû tak leh zakzum em em a ni ṭhin.” tiin Veronica-i awmna lam chu a thlir zui vawng vawng a.

“Ka hriat ve chinah chuan hmeichhe harh leh ṭawng duh over leh hmeichhe thiam thil ngah zet ni reng” tia ka chhan chuan keipawh ka nuih a za, RLa pawh a nui ve hawk hawk a. “Kan inkawmngeih ṭhin takzet,ka tan khan a awm reng zel a,min ngaihsak em em ṭhin,thu a awi in a fel em em a ni mai,Min ring em em tu,a khawvela min ngai tu leh ka nih phak loh leh ka thlen phakloh thlenga min thlen tir ṭhin tu a ni asin,” a hmela lunglenna chu ka hmuhhmaih lo, a chhan erawh chiang takin ka hria, Ani pawh hian ala theihnghilh biklo.

“Chuti si tinge tunah in inkar i siam ṭhat loh?” Ka zawhna min chhan dan tur chu ka ngaihtuah zui nghal neuh neuh a. “Delhi ka kal dawn khan rilru na takin ka siam a,chupawh keima thiamloh vang liau liau in,kum2 chhung kha ka haw lo,chuan vawikhatmah ka be lo bawk. A duh lohna lama a luhlul zia ka hria, a ngaihdamna ka beisei ngamlo a ni,,,Ka haw anga ka insawifiah ang ka ti a,mahse ka haw pawh khan mipa mah ni ila ka hmu hreh tlat a, amah hmuh inbeisei chungin a college kal chakna berah ka lut a,mahse School alo chawl daih a. Ralkhat aṭang ka thlir fo ṭhin,ka thil tih ka ngaihtuah a ka hnaih ngam lo a ni.” A ṭawngkam aṭang chuan Veronica-i ala ngaihtuah a lang anih kha.

Kan titi laia RLa tho vut chu ka en zui vung vung a, hmeichhe inhnialna a inrawlh kha Mipa tih tur a ka ngaih loh laia RL-an Veronica-i a ṭawngkhum danah kha ka thin a rim hle anih kha. V-i mitmeng a natna ka hmuh rual khan ka awm chhunga mi hi a che dawt thei, ka ngaihtuah nawn leh pawn keimahah danglamna ala thlen tho, venhim duhna. Ka hmel a hmuh ruala ka kut a vawn nghal chawt te,a tha khur ru der der te khan ka insum theihna min ti hloh zo ta a ni.

Mipa ṭawngtam zawk zawk nilo mah ila, dinhmunin a zir chuan midangte huatthu sawi erawh ka thiam ve khawp mai. Ka ṭawngkam a huat avanga RLa nen kan insual te chu mitthla zui in ka thaw haka, mahse Amah Veronica-i ka tana mi pawimawh berin ka thinrimna leh ka rilru nû but pawh a tireh leh vek kha ania, henu tak hi chu, ka tan hi chuan Mi Pakhat hi chu a ni ve chiang alawm. A ṭhinrim RLa a ṭawngkhum dan chu hmun dang nise ka nuih leh mahna, ṭawngkam dengkhawng tak hman hi a inhmeh ve miau lova, mahse Amah chhantu ka intih laiin, thinrim mit ling hlar in min melh nghek a, ka huat tawk a tling leh em em tho.

Ka phone chu la kangin, message ka type mawlh mawlh a, “Vawiinah khan min rawn umzui lo la chuan ka Rep ro ang che.” tiin ka thawn a, naupang chhia ti viau mah ila ka lung a awilo thar tlat alawm. Thinchhe si, a vin ve hlur zel a, Nulian hi chu an zaidam duh an tih hi chu an hresual deuh a ni tih mai a awl takzet. Henu ve hi zawng a kawlh em bawk a ni. Mahse a thinrim pawh in a hmel a ṭha tho anih hi.

Ka phone message a rawn ri a, ka hming pum leh Angry emoji sen tlar tuar avang chuan ka khi suk a.

“Khatin min ko ve ziah suh,ka kit i nih kha” tia ka reply chuan a hmel tur zawng zawng nen ka mitthla nghal vek thei. A ner leh nasa dawn mange.

“Monday aṭang chiah in ka ni dawn Hmelvarung.” tiin emoji leichhuah lem a rawn dah leh tuar a. Kan inhnialna bawk in ka rilru a luah leh a,

“Min dim ve deuh teh.” Tui bottle a ka kamsir thi dim lo zeta a hruk chuan ka ti hluk a, “Rak rak lo mai teh,dawh hle hle rawh.” a vin leh hlar tawh.

“Ka rak lo,ka ṭawng.” ka chhanna avang chu min melh rum leh viau tawh.

“Aw….aw….i ṭawng….che sek suh.” A va han thinchhe tak em! Chhang tawh lovin ka ngawi hmak a. A hruk zawh chuan,a hanky chu dustbin-ah a vawm lut nghal a,min kalsan a tum maw ni.

“Khawiah nge i kal dawn?” Tiin a banah ka chelh a,min chhan loh avang chuan ka bulah ka pawt ṭhu leh a, a titau leh nih ka ring.

“Ka tihpalh.” ka ti zawi sap a.

“Mimawlpa, khatiang kha ti tawh ngai suh.” a tih chuan ka melh run a, a mittui a tling pam a, mahse engvang nge tih erawh ka hrelo.

“Ok….ka tihpalh ka tih tawh kha..” Min ngaihtuah vanga hetianga awm anih ringin ka inthiamlo zual sauh. Kan boruak nuamlo zet tlak tumin a biang ka piai zeuh a, a haw ngang mai,a rak chiam a,mahse thinrim vang a ni tawh lo.

“Maruat…” a ti hluai a,

“Nge?” Ti hlukin a thusawi tur chu a ho leh dawn tih ka hre sa.

“I pâ e.e.e….”naupang chhia zeta a tih chuan ka nui vur vur a,

“Tak tak alawm,i insual kha pâ ka ti bon top che.”a kutzungpui a ti pir vah a,nuih loh pawh tum ila a thusawi leh a awmdan zawng zawng hian ka nuih a ti za takzet,ka nui hawk hawk a ani pawh a nui ve tho.

Hetiang hmeichhia hi a ni ka Veronica-i khawvela ka Ṭhian ṭha ber chu!! A hmel a ṭha a,a rilru a ṭha hle bawk. Harh in, Thinchhe ve ṭhin hle mahse Henu aia hmechhe fel leh ṭha hi ka hre biklo. Ka tan hian Ani aia Hmeichhe sial hi an awm pawh in ka ring, ka nu tih lo ah chuan.

Conti…

Leave a Reply