You are currently viewing BESTFRIEND-11 & 12

BESTFRIEND-11 & 12

Spread the love

BESTFRIEND-11

(Maruata Pov)

Lu na bur in ka tho a, Veronica chimawmi vang vek a ni, Amah ngaihtuah in zan ka mu ṭha lova, ka mit la chu a thip viau lehnghal a. Inhnuai lamah ka chhuk a, ka nu leh pa te hi khawiah nge an awm ni? Chokaah lutin tui ka in a, ka nu te ka hmu hauh lo, pawn lamah an awm anih ka ring, ka nu hian pangpar huan a siam a, ka pa la hian a tui pui phian lehnghal a, an hlimna a ni a, ṭha ka tih pui viau bawk.

Kawngkhara ka chhuak chu, ka mihring hmuh avang chuan ka tui in ka hak nghal ṭhat. Veronica-i telin pangpar an hung ṭha mawlh mawlh a, an bul ka thlen pawh chuan min hria ang pawh in a lang duh hauh lo. “Eng nge in tih a?” Zawh bik pawh ka nei lo, ka nu chu ka lam lo hawi in a nui sang a.

“E mama ilo tho tawh a ni maw? Hei fanu duat alo leng a, pangpar kan rem ṭha nih hi.” atih chuan, Veronica-i chu ka melh zawk a, Ani la chuan min hmu lo der hmiah thung.

“Nu, mikhual in nei elaw?” a tih chuan ka melh rum nghal ul a. Mahse ka melh rum ve na te chu engah mah a ngai lo nge pawisawilo hmel zetin min melh kiau a, a awmdan ngeiawm zet leh chimawm lutuk avang chuan ka nui tawp.

“Bawihi, i ṭhianpa maruata kha anih hi,ni hre tawh na nge?” A tih chuan lu ala thing nar nar zui a, ava han chimawm thiam tak em! Sawi tur pawh ka hre love a.

“Nu pa ka haw tawh mai ange, hna kal ka ngai si a” tiin ka nu leh pa chu a bye bye a, melh takngial pawh min melh hauh lo, kha thil kha eng nge? Chimawmi mai mai chu zingkarah mood a rawn tichhe vek alawm, Nilengin mood a fuh theilo. Zingkar thil thleng ka ngaihtuah a, ka thin a rim tulh tulh ni mai in ka hria. Inla innocent zetin ka nu leh pate a bye bye vel a, kei erawh ka awm ve tih pawh hrelo angin a awm hmak thei ania.

Hnaah rilru ka pek theih thlawtloh avangin chhuanlam siamin ka haw ringawt a, henu hian min va han tibuai tak em! Kan inah pawh ding lovin an in lamah ka in khalh tlang nghal a, Buaina leh harsatna ka nei anih chuan Veronica-i vang zel a ni, Ani lo in hetiang tak hian min tibuai thei lo.Door bell ka hmet a, Ka hriat ngai ni lovin kawngkhar a rawn hawng a, ‘lo lut rawh’ tiin a nui sang a, a hmel a zahawm in a fel hmel khawp mai.

Ka lut a,,naupang an lo awm deuh nuai a,Numaroi(V-i nu) in min hmuh chuan ding meuh in min chibai a. “Engtik khan nge ilo haw a, Bawiha?” Tiin Ṭhutkhawmna Pindanah min luhpui a,,
“Hei Mamapa, Maruata alo haw ania,” a ti nghal a, Pu Mawia nen pawh chuan in chibai leh in kan ṭhu ho a.
An titi aṭangin kawngka min hawntu kha Umama nupui Sawmtei a ni a, Chuan Udindini leh Sanga te pawh in nupui pasal an nei tawh tih ka hre bawk.

“Veronica-i hi.” ka tih chuan,

“Eng nge Hetah i tih?” Rawn ti vin ṭhattu lam chu kan en ṭhap a, Anu khan min chhang hman lo, “Bawihi, i va vin ve, Hei i ṭhianpa alo leng ania, lokal rawh,” Numaroi chuan a ti nghal vat a, Pa Mawia erawh a ngawi ngul thung. A nu pawh chhang lo chuan min melh rawm rawm a, “Lokal rawh” ti deuh fak in, a pen sawn nghal a. A awmdan avang chuan a nuam lo ka ti viau mai. Numaroi chuan nui sang hian, “I ṭhiannu hi chu ala ngai reng anih hi, han inbe ru.” a tih chuan tho chhuak in Veronica-i room lamah chuan ka chho ve nghal a.

Room chhung ka lut a, kut kuangkuah ât hian alo ding a, a nalh in a hmelṭha kher nen a incheina zawng zawng chu a mawipui em em vek a, a thinrim hmel te hlei hlei hi a duhawm ka tih fo ṭhin leh ka lawm em em ṭhin te kha a si a, tunah pawh thinrim tak hmel pu mahse a duhawmna a la ngai reng chu anih hi. Engthil nge ka ngaihtuah leh tak vak vak hi le? Hetiang zawnga ngaihtuah tawh tur pawh ka ni tawh lo asin.

V-i lam ka hawi chuan min melh rum mah mah tawh a ni, nga ti nge a chhungte ka tlawh pawh chu a huat em em mai le.

“Zawhna ka zawt che in ka hria.” a ṭawngkam ngeiawm zet avang chuan ka nui suk a, mahse a huat tawk a tling leh viau tho ang.

“I nu leh pa te inah ka rawn leng.” ka ti hmuk a, inpawh taka inbiak leh duh viau mah ila a hmelma lian ber angin min en a, midang ta anih tawh miau avangin hman angin ka thlêm thei tawh bawk silo. Tin, khang kum 8 zet liam ta avangin khan ka sawi thiam silovin kan inṭhianṭhatna thleng hian kan kar a hla ta em a ni.

“Ka nu leh pa te chu i taneng nge an nih a?” A ṭawngkam hman duh dan zet chuan ka thin a tirim leh ṭep tawh a ni. Duh ai hian a chimawm mah mah chu anih hi.

“Midang ina leng turin, ka chhungte an nih kher a ngai em ni? Nang pawh kan inah i rawn kal tho alawm.” Ka chhanna avang chuan tifuh inti zetin ka en a, Ngeiawm zetin a ṭhen sak thung, henu zet hi zawng Pathian siam sual a ni ka ti lo thei lo. A ngeiawm thiam dan em em te, a chimawm zia leh a thinchhe zia em em te hi, Nghal chikim hian a nghal bawk. A mi huat zawng laka a awmdan ṭhin chu ka hre hneh lutuk, mahse nga ti nge a mi huat ber anga tunah hian min en tlat ka hre bik lo. Ka kalsan a, a hlim viau turah ka ngai a, mahse chutiang pawh in a lang bawk silo.

“Tukin zing ka len chungchang kha i sawi anih chuan, Ka nu leh pate khan fapa sual deuh an nei a, An fapa ve khan kum8 chhung a awmbo san a, An dam nge damlo tih pawh a ngaihtuah silova chuvang chuan an fanu hian in hrang aṭangin tihian ka ngaihven tawp anih kha. Kei talin ka ngaihven loh chuan fapa laktlak loh leh mahni hmasial zet an nei miau a, a kal dawn anih pawh in, a kalsan tur inchhung tal rel ve tur ania, a kal tawp a, a bo zui daih si a, kei chuan ka tih tur ka ti mai a ni.” tiin min melh ran a, A thusawi avang chuan sawi ve tur reng ka hre lo, ka chip hmak a, ka ngaihtuahna erawh a kal thui khawp mai.

Ka nu leh pate fapa mal ka ni a, hla takah ka awm bosan a, An duh huna pawh an biak theih turin ka awm ngai lo, ka be zeuh zeuh chauh a ni lehnghal. An damloh chang te, min ngaih chang te pawh in an tan ka awm ngai lo chupawh ka hma ka sial vang vekin. V-i tan tiin ka kalbo a mahse anihna takah chuan V-in midang min neihsan hun tur kha ka hmu ngam lo a ni. Ka thlen hlima ka nu in mittui tla chunga min kuah ngawih ngawih te kha, kei an fapa neihchhun hi min lo ngai takzet a ni.

“Hei hi hre reng rawh, kha kan in i tihah khan ka la rawn kal fo dawn tih hria la, ilo awm ve anih pawh in min biak emaw, min hria anga i lan ve kher a ṭul lovang,” a tih chuan chhang tawh lovin ka chhuak hmak.

Inhnuai ka thleng thla a, Sawmtei min biakna pawh chhang lovin ka chhuak nghal nal nal a. Kei hian thil ṭha ka ti emaw ka inti a mahse a nilo, ka nu leh pa hrehawm in ka siam a, ka Veronica-i pawh ka chan tawh, a ṭhian takngial pawh ka ni thei tawh lo. Ka thil tih kha a vawikhatna atan ka inchhir ve ta,Nep ka in ti tharin, V-i thusawi avang khan ka thinrim ngam lova, ka zak a ni. Ka nu leh pa te lo enkawl tu tur tal pawh ngaihven hmasa lova ka kalsan mai leh an khawhar tur pawh dawn lova ka be khat em em te kha ka inthiamlo thar takzet.

In ka thleng a, ka nu ka hmuh chuan nui sukin ka kuah nghal a. Ka sawi fo tawh ngaihdam in dil a, chham kual vak hi ṭul ka ti ve lem lo, Mahse a hma aṭanga ka tih daih tawh tur fapa ṭha ber erawh nih ka tum ang. Ni a liam a thla hial a ral a, Veronica-i te in ka tlawh aṭang khan ka kal leh ta miah lova, zantina ka tih fo erawh ka bansan thei lo, a awm dawn lo tih hre reng chungin a tukverh zawn ka thlir fo a, kan inhmuh tawp bera a thinrim hmel te kha ka ngaihtuah fo a, thinrim takin min ankhumin ka diklo a ni tih sawi mahse a mitmengah erawh min ngai ve tho a ni tih ka chiang. Mitmeng hian dawt a sawi ve ngailo, min ngaih avangin ka lakah a thinrim tih ka hre thei mahse ka awmdan in a zir lo em a, hlim taka ka bula awm ala duh lo mai a ni. Min ngai ve tur chu a ni alawm Best Friend kha kan ni miau a, Kei hian rilru dang pu lo ta ni ila ṭhianṭha tak kan la ni reng awm si a tiin ka ngaihtuah fo ṭhin. Engkim hi ka thiamloh vek a ni.

Zingkar hma takah ka tho a, Darkar 1 vel ka insawizawi hnuin, Ka nu le pate nen choka lamah kan ṭhu a, tukin chu ka nu in a thingpui siam in ve tura min tih tlat avangin ka in ve nghe nghe, hna lam te sawi in kan titi a, ka pa erawh kan bulah a ṭhu a, chanchinbu a chhiar a. Door bell a rik chuan ka nu hawng turin a kal vat a, a rawn let leh lam erawh in leng a nei tih hriat takin a rawn titi lut bawrh bawrh a, Amah rawn zui tu ka hmu chuan ka phu zukin ka hria.

Kan in biak hnuhnung ber kha thla 1 a tling leh tawh a, tukin zing hi eng nge a rawn tih ni? ,A inchei dan en chuan gym kal haw te pawh a ang. A duh dan ang chiah in ka be lova, a awm ve chu hrelo ang mai in ka awm hmiah hmiah bawk. Ka nu leh pa te erawh a titi pui thei viau a, Mi ṭawng tlem lutuk Ka pa meuh pawh V-i bulah hi chuan a ṭawng bawrh bawrh a, a nui huah huah zel zawng anih hi.Mahse eng nga ti nge hmeichhia ang maia hetianga ka khawsak vel chiam mai le? Ka awmdan hahthlâk zet chu kalsan tumin Inbual tum rilru in ka tho a, choka chhuahsan ka tum lai tak chuan, “Vanlalruat.” ti tu vang chuan k ding dawt a, ka hmingpum ngat in min ko lehnghal a, Ka hawi let a, tunah hian ka nu leh pate an awm ve avang chauh in ka insum hram hram a, awm lo sela inhnialpui ka cho leb zak tawh.

“Eng nge?”ka ti hmuk a, a mit a la sawn duh miah lo te hian min tibuai. A laih theih em avanga Mit a en duh ngailo hmeichhia hian min entlang vek tum ang maiin min melh ngar te hi ka tan chuan a mak ti a sawi tham hial a ni.

“Chaw rawn ei rawh.” teh tawp chuan leh, chaw ei in sawmah chuan ei a chakawm loh ber awm e. Aih tih tawp chu ka nu leh pate an awm ve bawk si Awle tih dawn lah in a mitmeng zawng zawng nen hian han phur chiam na tur a awm bawk silo, Han tlawmngai der dawn la in, ka biak chak loh ber ṭum a ni bawk si, Chhan dan tur chu a vang ve khawp mai.

“Naktuk zanah, Hei address,” tiin lehkha tê dawhkanah a dah a, ka nu leh pate thlahna thu sawiin a chhuak nghal daih a, chu mihring mai mai chu.Thu ka pe e te min ti vel a, a hnuaia hnathawk pawh ka ni tawp silova, a khawsa zia chimawm lutuk hian min ti â zo takngial dawn. Mipa angin khing dawn ila a ni chiah bawk silo, Hmeichhe khing nih la ka duh der bawk silo, A chet dan erawh mipa tam tak ai pawh in a Chimawm zawk si a. Mood tichhe zawng hian a rawn awm ziah lehnghal a. “Hm, Nangnu hi engtin nge ka hmangaih theih che, Misualnu, khawvela hmeichhe sual ber i ni hial ang.”

“Tu maw Misualnu chu?” titu David-a chu ka en a, Ka phun chhuak a nih ka ring, nilengin ka ngaihtuahna a tibuai leh tawh chu anih hi. Ani hi sawipui ila a zia deuh ang.

“Kan zawh hunah inbe teh ang.” ka tih chuan min melh deuh kawk a, ka ṭawng deuh hmuk vang nge a mitmeng a tlanchhe dui a, ka nui lui nghal suk. Ward kan round zo a, David-a nen chauh a office a kan ṭhu chu ka ṭawng hma hauh in min ṭawng khalh a.

“Hrilh che kan tum reng a mahse nuamlo i tih kan hlau a, tak tak Maruat Emily-i chungah lungawilo miah suh aw, i duh leh keimahah thinrim mai rawh.” atih chuan a ngaihna hrelo zetin ka en ringawt, eng thil nge sawi a hi le?

Ka mitmeng aṭangin a thusawi ka man lo a ni tih a hriat chuan, min melh deuh hu lehnghal a, Emily-i a rawn lut ve chiah a,

“Nangni pahnih hian ka lakah eng nge zep ruk in neih a?” Ka melh tawn zak zak a, Emily-i chuan chil lem deuh kalh in, ka hmaa chair-ah chuan a ṭhu ve a,

“Ih keini pahnih hi kan in, ahh…” a sawi hreh tih hriat zetin a ṭawng bah nak a, “Kan inngaizawng.” Davida zawkin a rawn tichhuak phawng a. Chu chu maw an lo zep a, sawi an hreh ve em em chu ni a.

“In va ho dun tak, chutiang te chu a thleng ve thei alawm, a lawmawm em chu. Tlaiah dinner ka show sak ang che u.” ka tih chuan an nui lui tih hriat zetin hian an he he ringawt a, an hmel erawh rilru hah hmel tak an pu a.

“Eng nge in duh lo a mi?” ka tih leh hmuk chuan, “Maruat chutiang pawh a nilo, englo ania, Emily-i hi.” tiin a ngawi leh daih a, nga ti nge an sawi hreh em em a? Puitling vek kan ni tawh a, ngaihzawng neih te chu thianglo pawh ni nghal lo chuan, an awmdan chu mak ka ti zawk hial tawh.

“Eng nge Emily-i chu?” Ka melh tawn a, Emily-i zawk chu a kun ngal a, eng nge an awmzia hi, an awmdan hian min ti hah.

“Englo ania, Em-i hi a Rai a.” Inthlahrung taka Davida’n atih chuan sawi tur ka hrelo. Emily-i hi a rai a maw? Mahse chupawh mi 2 inkara hmangaihna a awm phawt chuan thil thleng ve thei tho alawm, Eng nge an buaina ber hi?

“Em, i rai maw?”ka ti nawn leh kher a, a bu nghauh a,
“Anih te chuan in innei ang nga ni mai lawm, chutah chuan eng nge in harsatna?” Ka hrethiamlo tak tak a ni, an awmdan hi. An in hmangaih a, chuan chumi rah chhuah chu a hun hma in an hmu ve a ni mai a, hlim taka awm tur an nih laiin, an hlim hmel bawk silo. Nge ni a, Anni pahnih hian inneih an duh lo zawk ?

“Maruat i hrethiam lo anih kha, ka chhungte hian inneih an phal ka ringlo.” Emily-in a tih chuan, a thusawi awmzia hrethiam lo takin ka melh a. Engvanga a chhungte chuan phallo nge an nih ang?

“Ka pa hian ka zir zawh vela ka pasal tura duh a nei a, Ani pawn min neih a hreh lo, mahse keimah ber hian ka duh silova chuvanga Delhi a thawk ve reng kha ka ni a, mahse tunah tiang hian in bulah ka kal ve zel a, hengtiang hun hi kan tawng ta anih hi.”

Tunlai khawvela pasal tur inhual sak tih vel te chu a zia lo ka ti. Doctor makpa pawh duh lova an fanu midang neih tir tlat tumtu chu, engang chhungkua nge an nih reng reng le?

“Chinfel dan tur kan ngaihtuah dawn nia.” ka ti ve ngawt a, ngaihtuah pui dan tur pawh ka thiam bik hauh silova.

Davida hmel ka en chuan a ngui lap a, rilru hah hmel zeta thawk a han lak hawk te chu ka khawngaih viau mai. An chhuah hnu chuan ka ngaihtuah zui neuh neuh a.

Ka ṭhiante an ni a, kan zir chhung hun leh tun thlengin engkimah ka duh dan an zah in min ngaipawimawh thiam em em a, engtik lai pawh in Veronica-i chanchin emaw thil dang engpawh ka sawi apiang an ngaithlain, ka mood off chang pawh in ka tan an awm zel ṭhin, mahse kei ve hian eng nge an tan ka tih ve?

Hetiang harsatna an tawk tih pawh ka lo hriatpui hauh lo a ni a. Ka inthiam lo thar in, an lakah ka inthlahrung thar hle a, Veronica-i sawi dan deuh in Ka lo Mawl tak tak anih dawn hi.

V-i ka ngaihtuah thlen chuan, Ani khan zanriah ei turin min sawm anih kha. Min sawm pawh a nilo an Ina zanriah ei turin thu min rawn pe a ang zawk. Khatiang khawpa min lâwm loh te chuan min sawm hmingchhiat ve loh mai tur. RLa a hnial hreh te pawh a ni mahna. A no ka neih ve la hi vawikhat pawh ka la en nawn leh lo, a card erawh ka wallet-ah ka dah khiau thung.

OPD duty ka neih loh ni a ni bawk a, coffee tal in turin ka chhuak harh teh ang tiin pawn lam ka pan a. Ka phone phawrh in contact list chu enkual in a no chu ka hmet chhuak a. Ka call ve reng reng teh ang, class a lak lai anih leh a pick duh kher nang, ti rilru ka dial nghal a. A ring ve alawm, a vawikhatna chu a ring ral a, ka call nawn leh ngat chuan a pick dawn lo emaw ka tih hnu ah pick up ve hram a.

“Hello.” Châng faka a rawn tih chuan, chhaih kawlh ka chak tlat. Zinga min tih thinrim vang hrim hrim pawh in, nuih ka mamawh alawm.

“Thinawrhi i ni em aw.” ka tih chuan a thaw haka, a lungawilo hle tih ka hrethei. A hmel awmdan tur ka ngaihtuah a, ka nui suk a.

“Setana ruat tan chuan ni lo.” ti hmak in phone a dah deuh hmak a, a chetdan ngeiawm zet chuan keimah zawk min ti thinrim leh ṭep tawh. ka call leh ngat a, rinloh deuhin a pick up leh hram.

“Eng nge?” a lak rualin a rawn ti vin nghal ṭhat a, Thinawrhi dik tak chu a ni ve chiang alawm.

“Naktuk tlaiah maw zanriah chu ka lo ei dawn a?” Pangngai takin ka bia a, “Um, Naktuk tlaiah.” a ti hmuk a, “Zanin tlaiah a theih zawk lo a mi?” Ka tih chuan, “Zaktheilo.” tiin a phun sup a, ka lo nui ri hawk thung. Chupawh a haw leh viau ang le.

“I duh leh vawiin tlaiah chuan lo ei la, mahse chhungkuain dinner eiin kan chhuak dawn a, kan awmpui te nen in lo ei ho mai dawn nia.” tiin phone a dah lehnghal hmak a, Setana Ruat min ti a Amah hi Setana note anih hi. Kawlh si, thinchhe si. A thin tih rim tum chuan ka be ve bawk a keimah zawk ka thin a rim leh der si a. Ani vang hian ka thinrim ta fo chu a ni si a. Khawvel awm tir ata Henu ang reng reng hi chu an la piang lovang, an piang leh tawh pawh ka ring chuang lo.

Heti chung hian ka hmangaih ber chu a ni si a, hmangaihna mita ka en chuan Ani aia Perfect hi ka hmu chuang hauh silo a ni, Mahse pawi ta ber erawh ka hmangaih angin min hmangaih ve lova, kan karah hmangaihna a piang ngai dawn bawk lo, mi nupui a ni tawh miau si a.

Ngaihtuah fo tawh tur pawh hi ka nilo, ka tan hian hmeichhia an vang lo, mahse ka thinlung luahtu hian midang tan hmun a kian ve duh silova, Ngaihzawng neih tumin mi han be ve ṭhin mah ila, vawiin ni thleng hian ka la nei thei lo chu a ni e. Mipa rilru aṭang chuan Nep tak ka ni, Mahse a der in ka nung thei lo, Ani theihnghilh ka duh vang ringawtin midang thinlung ka tihnat sak thei heklo.

(Veronica’s Pov)

Class ka nei zo, staff room pana ka kal laiin ka phone a rawn ri a, tun ang hunah call ka dawng khat viau asin le, ti rilru in ka phone chu ka en a. Screen-a Setana tih rawn lang kuau chu mak ti zetin ka melh a, a ring ral ṭhak thleng ka melh tawp. A call avang ringawt in ka dang a ro zo va, ka buai leh der chu ania. Phone ri a tawp a, hmanhmawh zetin kan room ah ka lut a, tui ka in ṭeuh ringawt. A rawn call leh chuan Aw thian kharh kharh in ka pick up ve hram a.

Midang te bula rum zet leh tak ngul ṭhin mahse ka bula nui huau huau ṭhin, chimawm leh khirh zet kha ala ni reng anih hi. Mahse A kid ni fo ṭhin hian a tih dan te chu ka thiam ve lutuk alawm, Amah anga Chimawm taka awm hi ni mai. Kan inbiak zawh chuan ka khi var var a, a thinrim hmel tur ka ngaihtuah a, a ner suk ruala a phun bul bul tur nen lam ka ngaihtuah chuan ka nuih a za tulh tulh a, keimah in mittui tla phungin ka nui a, midangin min hmu ang tih pawh a hlauhawm zawk.

Ruahmanna kan neih avanga chaw ei kha sawm kan nia, RLa chuan a sual thlak a ti a. Maria-i erawh chuan ti ngei ngei rawh a ti ve thung. An in chhung awmdan ka hrechiang a, a chhunga cheng te ka hre chiang bawk a, ka thil tih tum hi ruahmanna ṭha tak niin ka hre bawk.

Kan in a Maruata alo kal ni khan ka chhungte bulah thil awmzia engkim ka sawi a, pasal ka neih leh neihloh chungchang hrim hrim sawi puilo turin ka ti bawk. Nuih za tak siin an aw ve mai bawk a, A chhungte pawh ka hrilh leh thlap tawh. Nuhmingtei chuan innei tak tak teh u tiin min fiam hlak a, nidang ang lo deuh in ka lai ta pek anih kha, min la nuih nasa em em zui.

Ka Room light ka off vek a, tukverh bulah dingin van lam ka en a, arsi lang pe ur leh thla eng zet te chuan ka lung a ti leng veng veng a, Hmanlai hun ka ngaihtuah kir a, Uniform ha a school kan kal lai te, Maruata nena kan inkawm dan te, Volleyball kan khelh lai te, hlim taka kan nuih dun lai te kha ka ngai ṭhin. Ka thinlung na taka siamin min kalsan a, a kal liam aṭanga ka tawrhna zawng zawng te kha a tam lutuk a ka chhiar senglo, ka mittui a rawn far fap fap a, hruk pawh ka tumlo. Min kalsan ve ngai lovang tia ka rinchhan mipa ngei khan mal tak leh khawhar taka awm turin min kalsan a, he khum, he pindan vawi tam tak kan lo awm tlan a, kan lo nuih dunna pindan ngeiah hian keimah chauh in ka ṭap ṭhin anih kha.”Vanlalruat,,Misual pa misual tak i nih kha.” ka ti chhuak sap a. Chutiang chuan vawitam tak ka ti ṭhin Mahse chutianga vawitam tak ti mah ila ka ngai em em reng ṭhin si a.

Gate pawn lama Car Var ding chu ka en reng a, Vanlalruata Car a ni tih ka chiang. Ka awmna a thim em avang hian mi rawn hmu ve kherin ka ring lo. Eng nge tun ang zan tlaiah hetah a tih? Naktukah a tan surprise ka nei tak e, he thil hian nuam ti tak chuan a siam bik hauh lovang. Tikhan i duh leh lo spy mai mai teh. Khum lamah ka kal a, ka mu ve tak na in muthilh a har takzet.

Pawnlama motor tlan thawm ka hriat chuan thawk ka la halh a, ngaihtuah loh hram ka tum ve a mahse a awm tih ka hriatna hian Amah ngaihtuah lo thei lovin min siam si a. Zing khua a var a, Ka phur lutuk vang anih ka ring, zingkar aṭangin ka khi leh vur vur tawh. Walk pahin RLa te Inah ka kal a, Anu leh pate zin lai a ni a, An nupa Bawiha leh an nula te chauh an awm a, lemchangin Zanriah kan kil dawn a ni.

Door bell ka hmet a, Maria-in kawngka a rawn hawn rualin, phur hmel zet hian min kai lut a, ka lut chu Wow tih bak sawi tur ka hre lo. Engkim chu ka suangtuah ang chiahin a dum leh a var vek a ni mai.
Ka duhthusam inchhung hi Maruata bulah khan ka sawi fo ṭhîn.

“Ṭha i ti em?” Maria-in a tih chuan, ka bu ngauh a, an nupa chuan min nuih sang a. Tlai lam ni tawh se ka ti takzet.

A hun a thleng ta. Door-bell a ri a, Thawk la halh in kawngkhar lam ka pan a, Maria-i chuan a kutzungpui ti pir vah in choka lamah min luhsan a, nga ti nge ka zam em em mai le? Kawngkhar ka hawng ruala Maruata lo ding run chu enin ka nuih seih a, zanin atan chuan hei bak hi ka nui hmel a hmu tawh lovang, rilru nuam a haw tir ka tum reng reng lo bawk.

Lut tura ka sawm hnu chuan ṭhutkhawmna lamah kan kal a, RLa’n Bawiha pawm chunga a ṭhutna bulah chuan ka ṭhu thla ve a, Maruata pawh kan hma chiahah a ṭhu ve bawk. RLa nen chuan hmanlai hun te, zirna leh an mahni hna ve ve te sawiin an titi a, kei erawh ka ngawi ngal thung. Maruata chu ka en leh zeuh ṭhin a, ka en apiangin min lo melh ve hman ziah lehnghal a. Hetianga ka awm reng chuan ka che buai vek mai ang.

“Choka lam ka va en lawk a nge.” tih leh thawh ka rual nghal a, Choka ka luh rualin ka biang sa ham ham chu ka dawm vang vang a, ka kawr la thlan in a ti huh dup lehnghal. Maria in min hmuh chuan nuih insum zetin a hmui a hup a, taksa chetna a chang ta maw tih turin a nui khur char char a, a mittui la a tla phung zui a. Nula pakhat chuan thlengin min lo zap a, pakhatin tui vawt in tur min pe bawk a, kan awmdan zet chu min hmutu an awm ang tih pawh a hlauhawm hial zawk. Chuti em em a,Vanlalruata vanga ka han zam tak chiam mai chu, ka duhlo viau mahse keimah pawhin a tireh dan ka hre chuanglo.

Ka thlan a daih deuh hnu chuan Maria-i chuan”Huaisen kha a pawimawh” tiin min nuih var var a. Lut tura ka sawm bak kha kan be miah lova, Bawiha ka chhaih char char a mahse chuti chung chuan ka zam em em tho si a. Zanriah ei a hun a, awmpui nula pakhat in Bawiha alo chawi nalh a, Anu bulah a hruai dawn anih ka ring, Chaw kan kil lai chuan ngawi rengin ka ei malh malh a.

“Professor i ni bik a?” Zawhna angreng deuh a Maruatan a tih chuan, ka lo in ring lawk bik lo nen,
“Nia, i dawheh em a i ni velo anih kha.” ka ti hmak a. ka ṭawngkam vang chuan, RLan lang lamah min nghawk zeuh a, ka sawi zawm biklo.

Ka tan chauh a nui ṭhin ka ṭhianpa landan chu ka en a, a danglam tawh takzet. Amah a palian in, a tâk rûn ṭhin a, Higher kan kal lai aṭang rengin midang te zah a hlawh in, leadership a nei ṭha hle ṭhin. Tunah phei chuan anihna zawng zawng nen hian a zahawm zual sauh a, Misual mantu nise, a misual dawp tur chuan a melhna vang ringawt hian a in puang nghal vek thei in ka ring. Tumah hian dawt an hrilh ngam lovang tih khawpa hmel zahawm a pu a, mahse tunah tak hian kei hian a damchhunga a theihngilh tawh ngailoh turin dawt ka sawi mek chu a ni si a.

Chaw kan eikham a, RLa’n Bawiha ngaihven chhuanlam in pindan pakhatah min luhsan a, Maruata nen chiah kan ni ta.

“In In chu suangtuah ang ni chiah lo mahse a chhung lam erawh i duh dan vek anih hi.” atih chuan ka melh zawk a, Hepa hian ala hria maw!

“A mawi lutuk.”a ti leh sup a.

“Ila hre ve a ni maw?” ti el zeta ka chhanna avang chuan, a nui suk a,

“Engkim kha ka la hre vek ti ila i awi angem?” A tih chuan, ka melh reng ringawt. A mitmenga natna ka hmuh hi engvang nge ka hrelo, mahse ka hmu tlat si a. “Ka ngai che.” ka tum loh deuh in ka sawi chhuak hlol a, “Keipawn thildang zawng aiin ka ngai che.” a thusawi avang chuan a bula kal a l, va kuah vawng vawng ka chak mahse chuthil chu zanin hian ka ti theilo.

“Maruat.”

“Um.”

“Nang hian vawikhat chiah hmeichhia ang khan min lo en ve ni la vawiin ah hian hei ai hian ka hlim tur.”
Ka sawi zawh chuan, mak ti zetin min en reng a,
A tho lawka pawn lam pan a akal chu ka umzui vat a, Kawngkhar zawna a ding chu a rawn hawi letin, a nui sak a. A mitah erawh natna chauh lo chu eng thil dang mah ka hmu lo. Khatiang em em a ti na tu nih kha ka duh lo, a rilru tih hrehawm chiah ka duh mahse Nga ti nge kehchhe vek ang maia min en tak le?

“Maruat, haw i tum a mi?” Ka ti leh hram a,

“Pawi ka ti lutuk, Pawi ka ti takzet, Min hrethiam rawh.” tiin a chhuak nghal daih a, Khatiang taka a na hmel kha ka la hmu ngailo.

A kal liam hnu chuan RLa leh Maria-i te an rawn chhuak a, ka mittui a far nghal fap a. RLa’n min kuah a, ka hnungah a chul heuh heuh a, Maria-i pawh in engmah sawi lovin min rawn kuah ve bawk.

“Khatianga a na hmel kha ka la hmu ngailo, thil ka ti sual niin ka hria.”ka tih chuan, An nupa chuan an in melh a, an nui var var a.

“Ṭap mah ta che, i thusawi avanga rilru na hmel a pu anih chuan A duh ve tihna anih chu.” Maria-in a tih chuan a ngaihna hriat loh hmel zetin an nupa chuan ka en tawn zak zak a.

Conti…

BESTFRIEND-12

(Maruata pov)

Hmanhmawh zetin Veronica-i te in aṭangin ka chhuak a, Ani khan eng nge a sawi kha. “Vawikhat tal hmeichhia angin min en ve ni la tun ai hian ka hlim tur.” a ti anih kha. Engvanga kha thu kha sawi nge anih? Inngaihzawnna lam thil a sawi em ni? Nilo a theih loh henu hian chutiang chuan min en ngailo, Lalramliana kha lawm a hmangaih, kei nilovin.

Anih chuan engvanga khatiang thu kha sawi nge anih. Ka hmangaih ngei alawm, ka hmangaih vanga kalsan pawh ka ni mahse eng thu nge ka hriat hi, Ani khan ka rilru ang hi alo pu ve ṭhin em ni?

Inah ka lut a ka chhungte pawh be mumal lovin ka room-ah ka chho nghal a, ka rilru a buai takzet, Engvanga khatiang thu kha a sawi nge anih ka hre silova. Amah avanga ka thinlung na sa hi a tih nat belh tih pawh a in hrelo a ni. Ka hmangaih zia leh a laka ka rilru puthmang hre miah lovin Ani khan hmeichhia anga ka en lo nia ngaiin a hlim tak tak loh thu a sawi a ni si a. Veronica kei hian thil ka tisual em ni?

Ka room kawngkhar inhawng riah chuan ka hawi zawk a, ka nu a rawn lut a, ka bulah rawn ṭhu ve in,
“Nga ti nge i hmel a va hlim lo ve, Bawihi te inah chaw i ei si a?” a tih chuan ka thaw hak a, ka rilru buai ru zet leh Veronica-i hmel avanga hrehawm ka tihna hi engtin emaw tal tih reh ka duh takzet.

“Nu Veronica-i hian ṭhian satliah nilo angin vawikhat tal min enin i hria em? Anih loh pawh in ka chanchin i bulah a sawi ngai em?” ka tih chuan min en deuh vang vang a. A bula hetiang zawhna ka zawt hi mak a ti pawh a ni mahna mahse Kei nena kan inkawmngeih ang bawk in ka nu leh pa te hi a kawmngeih a, engkim a hrilh vek ṭhin tih ka hriat avanga zawt mai ka ni.

“Bawiha, chu thil chu i zawn chhuah tur anih chu. Mahse hei erawh hria la, i awm loh hnu zawng zawng khan i ai a awh zo takzet tih hi. Vawiin ni thleng hian atan chuan a nu leh a pa, a ṭhian angchiah kan ni a, heng thil zo zai kan tana a tih nachhan pawh Maruata nu leh pa te kan nih vang chauh a ni.” tiin a nui sang a. Ka nu thusawi avang chuan sawi ve tur pawh ka hre lo, ka awm lova ka ai a awh vek a mahse engvang in nge chutiang chuan atih?

“I rilru khan engvang nge i ti pawh a ni mai thei, keini pawh in engvang nge tih hi kan in zawt fo ṭhin asin, Nupui i nei dawn anih pawh in Vero-i tluk tu hi chu kan chhungkaw tan hian an awm lovang.” Ka rilru hrethiam zeta ka nu ṭawng chuan min ti hrehawm zual, a chhanchu he in chhungah hian Veronica-i a rawn lut thei ngai dawn silova, Pasal fanau nei a ni tawh miau a, kan pahnih tan khawvel din tum chu thil theihloh a ni.

“Ka nu pawi ka ti mahse Ani te chuan pasal neiin hlim takin a awm tawh alawm.” ka ti sup a. Ka nu nui ri hakah chu ka en nghal zawk a, “Bawiha, a hlim takzet a ni tih chu chiang phawt la, Ani khan alo hmangaih reng lovang che tih tu nge sawi thei.” tia nui var varin ka chhan let hmain a chhuak nghal daih a, eng nge a thu sawi awmzia kha?

Ka nu chhuah hnu chuan ka inngaihtuah nasa hle a, ka ngaihtuahna vir kual nuai nuai chuan, kan tunhma nun a thleng a, ka vanga mood thlak kual zut zut ṭhin Veronica-i hnen a thleng chuan ka nui suk a. Class lak laiin a muthlu fo a, a thiam theih em avangin an hauh erawh a pumpelh ziah thung. Chhuanlam siamtu ah min hmang ziah a, “Zanah lehkha a zir nasa lutuk a, a lu na a” tiin dawt ka sawi sak fo anih kha. Mahse Ama vanga dawtsawi kha pawi ka ti ngailo.

Volleyball khel turin ka hruai ziah a, a tirah chuan a beidawnthlak ṭhin mahse a rei a, thiam tia sawi theih khawp in a hming a chher a, ka ṭhiannu tia ka sawi reng laiin, a hmelṭhatna leh mawina ten ṭhian bak nih duh in min siam a, min kalsan ka hlauh vang ringawt in ka zep ta kha ania. Atan khan mipa pakhat chiah an awm, chu chu RLa a ni. Mahse college pumpui hmaah ka tan a lam a, A Best Friend ka nih thu min hrilh fo ṭhin. Amah kalsan ve lo turin min ti fo bawk a. RLa vanga a na te erawh ka tuam dam a duh hauh silo.

A tana ka tih theih zawng zawng ti tur khan min hrilh sela chuan ka hmangaih thu hi ka hrilh mai tur, ka nghak a nga min hmangaih ve ngei theih nan khan ka theih tawp ka chhuah mai tur ania, mahse a thinlung kawngkhar kha midang tan a hawng duh silova, nge ni a keimah hian khang hunlai khan ka hrethiam lo zawk? Kei chuan RLa ala hmangaiha ka hriat vang chauh khan ka rilru puthmang ka ti lang ngam ngai lo kha ania, mahse nga ti nge tunah hmeichhia anga ka en loh vanga hlim lo ang mai a a awm le? Ka nu khan a hmangaih reng lovang che tih tuman an hrelo a ti anih kha. Ani hian RLa nilovin kei hi min hmangaih zawk ang maw? Veronica min va han tibuai tak em!

Zan ka mut ṭhat loh vang bawkin lu na burin ka tho leh ta. Dar 6:30 a pel awr chauh a ni, mahse ni dang zawng aiin ka tho tlai zawk. Ka khum sir dawhkantê chunga ka phone ri ral ral chu la in, ka chhang nghal vat a, Emily-i number rawn lang va va ka hmuh chuan mak ka ti viau mai, tun ang zingkarah eng nge ni ta ang le?

“Hello.” ka tih rualin, “Maruat, buaina kan tawk.” manganna a khata Emily-in atih chuan ka ṭhu chhuak nghal hlol a. Engtik lai maha chiai buai chhung chi ka nih loh vang in pangngai takin ka chhang let a, “Eng thil nge?”ka ti sup a, mahse ka rilru tak tak erawh hlauhthawnna in min tuam nghal hlup thei.

“David-a nen nizanah ka nu leh pa kan bia a,mahse kan rin aiin thil a ṭha lo.” tiin a ṭap aw ṭiau a, “Eng nge thleng?” ka ti lehnghal vat, Hnem a ṭawng thlamuan tur ka ni tih ka hria mahse ṭawngkam ka thiam loh ang bawkin thil ti nghal pawp chi ka nihna nen pehhel lova zawt ka ni.

“David-a haw hnuah ka pa in mi a biak lai ka hre palh a, hnathawhna tih tawp tih vel a sawi ṭeuh mai. Tu chungchang nge a sawi ka hriatloh avangin David-a call ka tum a mahse call a pick up theilo reng reng, ka ngaih a ṭha lo takzet, tukin zing thlengin a biak theih silova.” a rilru a hah hle a ni tih a aw aṭangin a hriat theih.

“Em, lungngai lutuk lo la, David chu biak kan tum ve a nge?” Ka tih chuan thawhakin phone a dah ta a. David-a chungah chuan eng nge thleng ni ta ang le? Vawi tam ka call hnu pawh in a ring ral zel a,a hnuah phei chuan a in switch off ta daih a. Ka ngaih ṭha lo in, Emily te in lam pan chuan ka bike la chhuak in ka inkhalh a, Ani hian tawh sual a tawk a mi niang le?

Uluk taka kawng chhak leh thlang zawng zawng ka en hnu pawh in David-a hnuhma tur awm reng ka hmu lo. An in ka thleng a, lut lovin ka tlan let leh a, hmuhhmaih ka neih takin tiin ka en leh uluk leh hle bawk. Kawngthlang awi lutuk lo aṭanga darthlalang phe zawk ka hmuh rual chuan bike tidingin chulai hmun chu uluk zetin ka enkual a, ka thil hmuh avang chuan ka tlan thla rawk rawk a. Thui lo te ka chhuk hnu chuan David-a bike ngei chu ka zu hmu nghal. Amah hmuh mai in ringin ka hawi kual vat a, ka ko bawk a, thawm a awm em tiin ka ngaithla vang vang a. Ka awmna aṭanga hla vaklo aṭang chuan zawi tê tak taka mi ko ri awma ka hriat avangin hnim buk in a hliah chin lam chu rem lo zetin ka pan a, David-a thisen kai hnuanga ka hmuh chuan ka pan nghal vat.

Hnim karah a tang tih ka hriat rualin lakchhuah tumin ka che nghal vat a, mahse a tanna hmin chu a bukin, lak chhuah a har hrep lehnghal a. Ani la a chau tawh in a thi chhuak nasa tak avangin nikhaw a hrelo ṭep tawhin ka ring. Ka la chhuak vat lo anih chuan nikhua a hre lo vat dawn tih ka hria. Hmanrua engmah neilo ka ni bawk nen rei deuh fe ka beih hnuah a tanna aṭangin ka la chhuak ve thei hram a, a mit a meng peih tawhlo, Sawi nawk nawkin, ka ko vak vak a, min chhang lovin a rum hawk, helai hmun aṭang hian ka lakchhuah vat a ngai a ni.

Harsa zetin kawngpui kan in hruai chhuak hlol a, Ka bike-ah ka hlang a, zingkar anih avangin jacket ka ha hlauh a, phelh vatin David-a chu ka taksaah ka ṭawn bet a, kan damdawiin lam pan in ka tlan nghal.
Damdawiin ka thlen chuan Emergency room-ah kan nawr lut a, nurse duty ten min lo buaipui nghal vat vat a, Doctor awm ve ten a ṭul ṭul an ti bawk a, keipawhin ka theih ang angin a dinhmun ka en nghal bawk.

“Dr.Maruat,” emergency unit a doctor duty pakhatin min koh chuan ka kal vat a, “Dr.David-a hian thisen a hloh hnem lutuk a, tunah kan pe mek a chuan a kut leh a awm ruh hi x-ray a tih a ngai ang.” a tih chuan ka bu nghut a, an mut tirna lamah chuan ka lut ve nghal a. Ka ṭhianpa bandage a tuam luk, muhil bulah chuan ngawi rengin ka ṭhu a, a chungah hian eng nge thleng? tih ka ngaihtuah zui neuh neuh a. A chhungte pawh ka call hauh lo mai. Ka phone ka phawrh a, call hmasak tur pawh ka hre lo. Emily pawh engmah ka la hrilh silova. Phone hmang turin pawn lam ka pan a, A chhungte ka hrilh hnu in Emily-i pawh ka call nghal.

Cabin lamah kan sawn phei a, a chhungte pawh an lo thleng tawh avangin haw phawt tumin ka chhuahsan rih a, Emily-i hmanhmawh zeta rawn kal nen kan intawk, a hmel a phelh phang a, a mu ṭha lo tih hriat takin a mithnuai a dum kalh a, a meng sen ram bawk.

“Maruat eng nge thleng?” A aw a hlauhthawnna leh manganna chu ka hailo, ka ṭhiante hian min mamawh takzet tih ka hrefiah kuar kuar mai. Emily-i chu ka ban vat a ka kuah a, a in sut nghal hlap hlap a, Room kawngkhar in hawng ri ah chuan kan in thlah a, David-a nu a ni. “Nangnu vang hian hetiang hian ka fapa a awm tih i hria em?” Thinrim zeta tiin Emily-i chu a kawk a,
“Nu ka thiamloh a ni pawi.” a sawi zawh hma in a hmai a ri nghal thlawp, Emily-i chu ka ban nghal vat a, ka sirah ka dintir nghal a. “Nu pawh min ti suh nang leh i chhungkaw hrim hrim hi ka hmu peih lo che u, heta ṭang hian chhuak vat rawh, chuan hei hi lo hre rawh ka fapa chungah hian eng thil ṭhalo pawh a thleng anih vaih zawngin ka ngawi mai mai lovang.” tia ang zui bawrh bawrhin, Room chungah bawk lutin, kawngkhar a khar nghal hmak a.

Emily-i ka en chuan ka na ngut ngut thei, Ka ṭhiannu mi fel leh zaidam em em mai, khatiang em em a ankhum leh kut hial a tuar kha, ka thin a rim takzet, a kutah kaiin pawn lamah ka chhuahpui a, naupai lai lehnghal hetianga rilru na lutuk a a awm hi a tan pawh a ṭha lo. Bike-a chuang tura ka tih chuan min hnial miah lovin a chuang ve mai a, kan inah hruai phawt mai ang. Inchhung ka lut a, ka nu ka ko nghal vat.

“Eng nge ni ta Bawiha?” Choka aṭangin a rawn chhuak hlol a, Ka bula Emily-i a hmuh chuan a be nghal vat bawk.

“Emily ti nge i hmel a va diklo ve thil ṭha lo a thleng em ni?” Ka nu in atih chuan keimah zawkin ka chhan khalh a,

“Nu Em hi a nuamsam lova, inchungah lo mu mai se ka inthlak anga ka rawn chhuk ang aw.” tiin inchung lamah ka hruai chho nghal a. Ka room piaha room ruakah luh pui in khumah ka ṭhut tir a, a mittui tling pam chu ka kuta tuai sakin, “Em, in sum hram hram rawh aw. Naute tan khan a ṭhalo ania, engkim ala ṭha vek mai ang.” ka ṭawng zawh rual chua a lu a bu nghauh a, engmah a sawilo thung.

“Damdawi inah ka let a ngai tih i hriat kha, vawiin chu ti hian lo awm phawt la a rang lamin ka rawn haw leh ang, ka nu leh pa te an awm dawn a, i mamawh lo sawi hreh suh aw.” Ka tih chuan a lu a bu leh nghauh a, mahse ṭawngkam khat mahin min chhang lo. Mu hahdam tura ka tih chuan thuawi zetin a mu a, rizai ka sintir hnuah room aṭangin ka chhuah san a, ngaihtuah viau mah ila Damdawiin lamah duty ka nei bakah David-a pawh ka ngaihven ala ngai si a, ka nu leh pate kutah dah phawt mai ang.

Ka room-ah lutin ka inbual a, hmanhmawh deuhin ka in siam zung zung a, inhnuai ka chhuk leh chuan ka nu in min lo be vat, ka pa erawh choka lamah a awm aniang ka hmu mai lo.

“Bawiha eng nge thil awmzia?” Ka nu chuan hlauhthawn hmel takin min zawt a,

“Nu, khawngaihin Emily-i kha vawiin atan lo ngaihsak hram teh aw. Tunah chuan a mu a, ei tur leh a mamawh lo tih sak rawh aw.” tiin ka nu chu ka melh a, ka nu lo ngen tur dang ka nei miau lo a ni.
“A damlo a mi?” A tih leh chuan, a tlangpui tal hrilh a ṭha in ka hria a,
“Aw, a damlo a, chuan maw nu ṭah tir miah suh, a chhanchu Ani khan nau a pai ania.” ka tih chuan, ka nu mitmenga min rinhlehna ka hmu nghal.

“Nu, i ngaih ang…” ka sawi zo hman lo, Choka aṭanga Veronica-i lo chhuak ka hmu ruala, a mitmeng a mak tihna, natna, thinrimna leh min huatna te chu ka hmu nghal zut zut a, hetah alo awm reng a maw, chuan kan ṭawng a hre vek em ni, mahse nga ti nge sawtiang sawn min melh? Ka thusawi ka sawi zawh hmain In aṭangin a chhuak nghal daih a, eng nge ka tih ang? A hrekim lo emaw hriatsual palh a awm tih ka hrethiam nghal. Ka in sawifiah a ṭul tih hriain, Kawngkhar ka pan ve nghal a, diklo taka min ngaih ka duh lo. Mahse pawn ka thleng a, gate pawn lama bike tlan chhuak ka hmu hman ṭawk.

Thuchiang tal hria se ka duh mahse Sana ka en a, dar10a.m a ri ṭep tawh si, Damdawiin lam kal ka hmanhmawh deuh avangin bike bawk la chhuak in damdawiin ka pan a,Veronica-i erawh nakinah ka la hrihfiah mai ang. Min haw reng bik em lovang chu.

(Veronica’s Pov)

Thil thleng avangin nuam tiin ka awm hauh lo, Engvanga Maruata khan khatianga min en kha nge anih tih ngaihtuah in ka tlaivar a, RLa leh Maria-i te chuan min duh ve vangah an ngai a, mahse Ani hian ka en ang hian min en ve ni ta se, engvangin nge tum thuhmun kan neih lai khan min kalsan, Professor nih tum in theih tawp kan chhuah dun emaw ka tih laiin, ngawi rengin min kalsan a, ka na lovang tiin infuih ve ṭhin mah ila ka na tho si anih hi!

Zing khua a var a, ka rilru a buai takzet, zawt tura an in a kal ka duh rualin kum8 liam ta a ka tih ngam loh ang bawk khan timna ka nei leh tho si. Ka inngaihtuah chhung in dar8 a pel fel der lehnghal. Ka rilru ka siam a, zawh ngei ka duh a ni.

Bike la chhuakin an in lam ka pan kha a ni a, Kawngtluanin ka biak dan tur ka ngaihtuah char char a, an in kawt ka thlen lai pawhin ka zam chhe lo chauh chu a ni e. Inchhung ka lut a ala awm lo zui, ka in ngaihtuah nasat tehreng nen a ho zo vek.
Eng emaw ti a chhuak lawk anih thu Nuhmingte-in a sawi avangin, nghah pah tiin ka ṭhu khawmuang a, mahse lo ṭhut loh malek tur, Kha a doctor pui kha a rawn hruai haw a, an boruak tawn hre chiah lo mah ila, thil ṭha chu a ni hauh lo. Inchungah a hruai a, haw mai ka duh rualin thu chiang hriat ka duh zawk vangin ka awm zui ngat kha ania.

Ka na dawn anih pawh in a pawilo tiin an lo chhuk hun ka nghak a, mahse Maruata thusawi ka hriat meuh chuan engkim hi a tawp vek ni mai in ka hria. A hmaa ṭah leh tumna ka nei tawh lo, In aṭanga ka chhuah chuan pan lam tur hre lovin ka inkhalh kual a, Ka theih tawpa chakin ka tlanchhia a ni ber mai.

Bike ka tih din meuh chuan Kan college hlui gate zawnah ka lo awm reng tawh. College ka kal lai khan nitin kan spot ah khan ka kal ṭhin a, Maruata a rawn kal ve mai te ka ring ṭhin, mahse khawhar takin college ka zo a, Amah ka ngaih zual apiangin ka kal ziah bawk a, tunah pawh ka kal leh tho chu anih hi.
Kan spot ka thleng a, thingkung bulah ka ṭhu zawi hnak a, ṭah vak vak ka duh mahse ka ṭap thei silo. Eng nga ti nge ka nat reng bik le? Mite pawn hmangaih an nei a, an na reng bik chuang silova, kei erawh ka na reng bik si a. Khawvel hi ka tan hian a va han fair lo tak em!

Van lam ka hawi a, Ka mittui hul si mahse ka tawt em avanga ka awm chhung na em em si chu dawm in, “Eng nga ti nge hetiang hian ka awm ziah bik a? Ka tan hmangaih neih ve hi a thianglo a mi? Hmangaih ka neih ve apiang in na lua awm lovin kalsan ka ni ziah a, a chhan ka hre duh min hrilh teh mawh min hrilh rawh, kei hian hmangaih ka nei ve theilo a mi?” tiin ka ṭawngchhuak a, mahse ka ngawih rualin a reh nghal ṭhuap si a.

Ka zawhna zawng zawng te chu chhang tu tur tumah ka neilo, a reh tlawk tlawk a, tumah ka tan hian an awm tawh lo a ni. He thu hi pawm ka duh vawitam tak ka in hrilh nawn mawlh mawlh ṭhin mahse pawm erawh harsa ka ti takzet si a. Khami ni ka nun aṭanga Vanlalruata a kal tak tak nia ka hriat ni aṭang khan theihnghilh tumin ka bei a, tun hi a ni 4 na chiah a ni. Mahse na tak bawka min siamin kei hian ka theihnghilh tawh ngailoh tur natna min pe leh si a.

University kal turin ka insiam mawlh mawlh a, nidang zawng aiin make up ka hmang nasa bawk. Zan lamah mut ka harsat em em a, khami ni aṭang kha chuan hahdam taka mut pawh ka la neilo, Vanlalruata ngaihtuah in zan hun ka hmang a, mahse kan pahnih khawvel erawh a rem ve ngai dawnlo, tihah bawk a tawp leh ṭhin, chu chuan min ti na em em si a. Ka taksa in a tuar tih ka hria mahse ka in thunun thei rih lo a ni. Ka chaw ei tlem lutuk leh ka tla chak lutuk hi ka chhungte rilru ka tihah ngei ang, mahse ka dam ve leh mai ang. Ngawi renga khawngaih hmel taka min en ngawih ngawih ṭhin erawh hrehawm ka ti, engtik niah emaw chuan heng zawng zawng theihnghilh hian ka dam ve em em ang.

Tu emaw in ka motor a rawn phar tak vak vakah chuan car ka ti ding a, Glass down a ka en chuan ka Ṭhian hlui a ni tih ka hre nghal, “Hruaia nang, hetah eng nge i tih?” pangngai takin ka bia a, High School kal lai aṭanga ka hriat a ni a, mihrang angin ka ngai lemlo.

“Hei i hmuh ang hian ka car hi a chhia a, motor a vang reuh sia min lo phur ve mai la.” tiin a nui hawk hawk a. Hepa hian a zia ala paih lo anih dawn hi, Thawveng liana kha a ni ve hrim hrim a.

“Eng nge helamah i tih dawn a?” Ka hun tawn nen Ṭawng chaklo viau mah ila a mawiah ka biak a ngai tih hria in be ve luam a. Ka motor-a arawn luh rualin ka tlanchhuak nghal a.

“Ka nupui hualtu emaw in a kidnap a, a kidnap tu chu hmana kan classmate, ila hriat ka ring, i ṭhianpa, Maruata kha a ni.” a thusawi avang chuan motor brake ka rap nghal vak a, a ke pawh a ri nghal tuar mai. Hepa hian eng nge a sawi hi,

“Eng ang fiamthu nge a?” tiin lungawilo zetin ka melh ran a,

“Veronica, hmeichhe huaisar leh kawlh zet kha ila ni reng anih hi. Tuna ka thusawi hi i awilo anih chuan Maruata i zawt thei alawm. I duh chuan i be thei ang.” a tih leh chuan ka inngaihtuah hma hauh in Maruata ka call fel der tawh.

A phone ring ngaithla pah chuan thinrim zetin ka bula ṭhu Hruaia chu ka melh a, mahse eng nge thleng hi, Pawn lam aṭangin ka hnarah tu emaw in puanin ka kâ a rawn hup a, ka zawi hnawk a, a thim mup tih bak engmah ka hre zui ta lo.

(Maruata Pov)

Veronica-i hmu tur pawhin hun ka la nei miah lova, a chhan pawh tun dinhmunah hi chuan ka ṭhiante hi an pawimawh rih em a ni. An in hmangaihna kawng bumboh zet hi chinfel dan ka ngaihtuah ngei ngei a ngai si a. An fa lo piang tur lam nen hian kei hian ka buaipui lo anih chuan engtikah mah ka in thiam thei ngai lovang.

Khaw danga an kal bo theihna turin ruahmanna ka siam a, chumi buaipui tur chuan Damdawiin aṭangin ka chhuak a, Car-ah ka lut nghalin ka phone a rik avang chuan car ti nung lovin ka phone chu ka en a. Veronica-i call ka hmuh rual chuan mak ka tih rualin ka hlim hle bawk. A chhanchu ka lakah a lungawi tawh emaw thlem emaw a phut vang a ni ang, nilo sela engvangin nge min lo biak tehlul ang.

“Hello” ka chhan ruala mipa nui hawk hawk ri ka hriat chuan ka kut ka hum ruh nghal a,

“Tu nge i nih?” Ka ṭawng ring lo na in ka aw erawh thinrimna hlir in a khat thung.

“Ka nupui kha min pe la, I Chatuan best-friend hi ka pe ang che.” Rawn ti tu chu ka hailo chhiang kher mai.

“Hruaia, V-i chungah khan engpawh a thleng anih chuan ka chhuah hauh lovang che.” Thinrim sehchilh deuh nawk nawk a, ka thinrim luat avang leh ka hlauhthawnna vangin ṭawng pawh a harsa lam hret chu a ni e

“Hmangaihna awmzia hrechiang ber tu hian engvangin nge ka hmeichhe hmangaih i thuhruk.” a rawn ti vin ṭeng chuai a, Ani pawh a thinrim ve hle tih a aw leh tuna a chetdan avang hian a hriat hle.

“Darkar 24 chiah hun i nei anih loh chuan Veronica-i hi i hmu tawh lovang.” tih zawm zatin, phone a off nghal hmiah bawk.

Ka rilru a buai ta hle mai lehlamah Emily-i ka ṭhianpa fa pai mek tu lehlamah Veronica-i ka hmeichhe hmangaih. Engtin nge ka tih ang, Emily-i duhlo leh David-a fa pai mektu hi saw misual Hruaia hnenah ka pe ngawt thei lo, chutih rualin V-i tihnata a awm ka phal heklo, mang ava ang duh tak em.

Veronica-i chungah engpawh a thleng thei chuthil, ka ngaihtuahnaa lang hmasa ber angin Veronica-i te in lam ka pan tawp a, mahse awmpui te chauh an lo awm. Hnathawkin an chhuah vek thu an sawi chuan RLa biak ka duh avangin an office lamah ka in khalh chhuak leh nghal a. RL Shopping Complex ka thlen chuan ka bo hu nia mawle, kum8 hnu a ka vawikhat hmuh lehna chauh a ni a alo danglam nasa tawh em bawk a ni. Kan naupan lai aṭanga he Complex hi awm tawh a ni a, Chung lai chuan a building a lian lutuk bik lo. RL-a te chhungkaw sumdawnna a ni a, dawr tam tam tak a chhungah hian a awm a, a hma aiin a lian tawh zawk a, a building pawh chhawng 6 lai a ni tawh bawk.

In hnuai parking-ah lut in lift hmang in In chung ber, offfice atana an hman ah ka chho a. RLa office ni ngei tur chu ka zawng hmu mai a, room pawn lama secretary lo ṭhu hnenah chuan RL-a hmuh ka duh thu ka sawi chuan meeting a neih thu sawiin min hnial a.
Mahse tunah hian a meeting aia pawimawh thu ken ka nei tlat si a. Ngawi rengin a office kawngkhar ka hawng zui zat, mahse eng nge ka hmuh hi, RL-a leh hmeichhe pakhat hnaih zeta ka hmuh chuan ka sa nghal zak thei, engmah sawi lovin ka pan phei mawp mawp a, ka hnek nghal pawp ringawt, a lo in ring bik lo nen a tlu nghal a, khawih leh ka tum chu a hmeichhia khan ka hmaah dingin min lo dang nghal vat.

“Maruat duhtawk rawh.”a rawn tih nghal ṭhat chuan hmeichhia chu chiang zetin ka melh a, henu hi Maria-i kha anih hi. RL-a chuan ding pah in a kamsir thi chu a kutin a hru zeuh a, a nui suk lehnghal, Hnek leh lo turin ka insum nasa takzet.

“Sawifiah rawh u.” ka ti hmuk a,

“Keiman ka sawifiah ang, chumi hma in eng ti turin nge helaiah i rawn kal.” Maria-i zawk chuan zaidam zetin min zawt nghal a, chu chuan ka thin a ti rim zual thut, RL-a kawr awmah chuan ṭham nawkin,
“I nupui in buaina a tawh laiin engtin nge nang hian nuam ilo tawl theih?” Ka thusawi avang chuan a meng buai nak a, Maria-i a melh zawk bawk.

“Feli chu engtin nge a awm?” A aw pawh a hlauthawng ve deuh alawm,

“Maruat i kut kha dahthla la, han sawi chiang teh, Vero-i chu engtin nge a awm?” Maria-i zawkin a tih ve chuan meng khui chungin ka thlah ve hram, Maria-i chuan RLa chu ṭhutna lamah chuan a pawt phei nawk nawk a anmahni zui in an hmaah tak ka ṭhu ve nghal run a.

“Hruaia’n a kidnap darkar24 chunga a duh ka pe lo anih chuan a that ang.” thaw hawka ka tih chuan, an mitmeng a buai nak a.

“Mahse engvangin, tu nge chupa chu?” Maria-i bawk in min zawt. Tunah hian henu hi ka be miah lo, Lalramliana erawh thil ngaihtuah tih hriat zetin a ṭhu ngawi ngul thung.

“Vanlalhruaia, VH Industry neitu te fapa, college a in classmate ṭhin kha mi i sawi?” RL-a’n a tih chuan,
Thil awmzia ka sawi hnu chuan, RLa chuan ruahmanna siam pah a police station lam leh a chhungte hrilh phawt a tih avangin, Office aṭangin kan chhuak ta nghal a. Maria-i rawn kal ve tum erawh phal lovin,

“Bawiha lo awmpui zawk rawh.” tiin a kalsan kha ania, kei hian eng nge hriatloh emaw hriatsual ka neih? an awmdan chu ka hrethiam lo, mahse zawtfiah turin hun ka neilo.

RL-a’n phone in Veronica-i chhungte a bia a, keiin motor ka khalh thung, David-a call ka dawn chuan rang taka hospital aṭanga chhuak a Emily-i hruai turin leh kan in lama kal turin ka tir a, thil awmzia ka hrilh thuak bawk. RLa nen erawh kan inbe lo hrim hrim, Police station kan thleng a, FIR thehlut in thil awmzia kan sawi a, Umama, V-i U alo lut ve hlol bawk. Police te nen chuan insem darhin kan zawng nghal a,
University kawngah a car chu ruakin kan hmu a, a bag leh thil dang a phone thlengin a kalsan vek.

Nileng deuh thaw a kan zawn hnuah pawh kan hmu lo, Tlai thim dawn hnaihah chuan call ka dawng leh a, number hriat loh aṭangin a ni, ka pick up vat a ka record nghal bawk,

“Hello,” hlauthawng zeta ka tih chuan, lehlama mi chuan, “Ka duh ti hlawhtling tur chuan i rawn kal ngei ka ring, a neitu tura i tih ber pawh kan kutah a awm leh tawh bawk si a.” tiin a nui hawk hawk a, ka kut ka hum ruh nghal vak. Anih chuan David-a an man ve tihna. Emily-i min la rawn dil danah Ani chu a him rih tih ka hria. Ruahmanna ka siam a, felfai tak a ni angem tih ka hre lo, mahse tuna ka ngaihtuah chhuah theih awmchhun a ni.

“A ṭha e, tumah i ti na dawn lo tih sawi la Emily-i chu ka rawn hruai ang,” ka tih chuan, “Nangmah in rawn kal ang che, chuan i rawn hruai lo anih chuan tumah nung damin ka chhuah hauh lovang.” tiin address a sawi a, a dah nghal. Phone a dah rualin ka phone a ri lehnghal,Emily-i a ni,

“Maruat, David-an min lo hruai tur thu a sawi a mahse a lokal bawk silova, ka call thei tawh bawk silova, thil thleng a awm em ni?” Mangang taka a tih chuan ka chhang mai lo.

“Maruat.” ṭap aw ṭiau in a ti leh a,
“Um keiman ka lo hruai ang che.” tiin phone ka dah a.

Ani hian nau a pai, naupai chung chuan ka plan-ah hian ka tel tir thei lovang, a tan a ṭha lo, midang be kual in police station lam a inhmu khawm turin ka rawt bawk. Emily-i hruai in police station lamah kan kal a, Inspector chuan palh awm thei tiin Umama chu police ṭhenkhat te nen an in lamah a tir a, kan in pawh police in an veng bawk. RLa sawi danin Maria-i pawh V-i te in lamah a awm a ni awm e. Anni pahnih awmzia hi ka la hrethiam chuanglo na in, heng thil a zawh vek hunah engkim ka hriatfiah ngei ka ring.

Hei hi kan ruahmanna ṭenkhat chu a ni. Emily- i nen Hruaia te min hrilhna hmunah kan kal ang, Chuan RL-a leh police ten a rukin min zui bawk ang, Tumah na leh hliam awm lova in chhuah kan tum a ni.

Zan dar6:15p.m- ah chiah, police station aṭangin kan chhuak a, Emily-i hmel ka en chuan hlauhthawnna nasa tak a nei tih ka hria, thildang ruahmanna siam ka sawi pawh in keimah ni vang ania ka tel ve ang a tih tlat avanga hruai ka ni mahse ka ngaihtuah takzet.

“Maruat engkim a ṭha leh vek ang tiro?? Veronica-i pawh a ṭha em em ang.” atih chuan ka melh zawk, Veronica-i a telve aṭang chiah khan ka buai zual a ni tih a hrethiam a ni ngei ang.

Ni e, Veronica-i telve na leh a buaina tawh phawt chu ka buaina a ni. Hmeichhia mahni in enkawl thei tak ni mahsela mipa rual khing thei tur erawh a ni hauhlo, a thinchhiat luatah kut hial a tuar lovang tih ka sawi thei lo mahse tupawh Amah khawih tu an awm anih chuan ka that hreh hauh lovang.

Conti…..

Leave a Reply