You are currently viewing A Scandolous Marriage(Bung lina)

A Scandolous Marriage(Bung lina)

Spread the love

“MAW?” tiin Natlie chu a ding zawt a. “Inhualna zungbun lei thu i sawi em ni?”
“Tehreng mai,” tiin Mike pawh chu a rawn ding ve nghal a.
“Mahse chungte chu a ngai kher hlei nem.” Tlereuh dawr a va luh a, inngaizawng ang a va lan der vel chu a theih a ring lo a ni.
“Ngai e mawle,” a rawn ti hluk a. “Mr Chuck Helsinger hnen a ka nupui ang a ka hruai hun ah che chuan ka nupui in a a neih tur thil ang zawng zawng chu i nei kim vek tur a ni. Chu chuan i kut zungtang a lunghlu leh thawmhnaw, kan putara mitmu ti pawng zawrh thei tur khawp a ti duhawm tu tur che a huam vek a ni.”
“Mahse…”
“Mahse tih lam a ni lo, Natalie. Tihpalh, Natalie tia a ka koh che a ngaih hmel, bawihi, duhtak tih angreng vel chu i duh si lo a, nge ni a Nat tiin ka ko zawk dawn che?”
Chutiang a a hming lamtawi a a rawn sawilan avang chuan Natalie chu a lo ner nak a, high school a kal lai a an koh dan thin a niin, tun thlengin a la ngaithei lo a ni.
“Natalie tih chu a tha tawk khawp ang,” a ti ram hmak a.
“A that chu. Chuan Mike tiin min koh theihnghilh hauh suh ang che. Mr Stone tia min koh mai chuan a tih chi vak loh khawp ang.”
“Nia. Chuan thawmhnaw chungchang ve thung kha le….”
“Sawi ta che.”
“Hetiang hian ka inthuam reng bik hauh lo a nia aw. Hengte chu ka hnathawh na hmun a ka hak thin mai an ni a.”
“A tih chi hlauh a nih chu.”
Natalie chu a sa hat a. “Khatiang a min hnuaichhiah kher kha a ngai lem lo ang.”
“Ka hnuaichhiah na che lam a ni lo, ka rilru tak ka sawi mai a nih kha. Tun a i inthuamna kha chu nalh lo tak chu a nia lawm. A rawng kha i inhmeh lo hrim hrim bak ah a thui dan kha a mipa thawmhnaw mah mah a ni.”
“Incheina lam endik tu nilo in, computer thiam chungchuang i ni khan ka hre si a.”
“Mipa ka ni a, hmeichhe inhmeh zawng thawmhnaw chu ka hre ve tawk a ni. Khatiang thawmhnaw i han lei hrim hrim khan i mizia awm chu a tilang nghal ruak a ni. I duh emaw duh lo emaw December hmalam hian thawmhnaw lei tur in ka hruaichhuak dawn che a ni.”
“A lo nih tak chu a,” a ti hlak a, diktak chuan mi hausa ho nen a hun an hman ho na tur atan chuan a thawmhnaw neih sa ang chuan a mamawh a phuhru zo in a ring bik chiah lo a ni.
“A that chu. I mizia a ka duh deuh mai pakhat chu maw Natalie, i chan a that hun lai i haider ngai loh na hi a ni.”
Natalie chuan a tawngkam chu han chhan let sak a chak ngei mai. A thawmhnaw chungchang ah a sawisel a, chu pawh chu la duhtawk lo in a mizia a a duh lai chu a hmakhua a ngaih na lai chu a ni tiin a la sawi tak deuh deuh chu a ni si a.
He thil a a inhnamhnawih nachhan chu a chhungte sum leh pai dinhmun harsat lutuk vang a ni ti a sawi piap tak a nap a.
Hriatchhuah a nei thut mai.
“Kan chhuah hma in mi biak lawk tur ka nei a,” a ti ta zawk a.
“Aw le. Ka car ah ka lo nghak ang che. Tualzawl mai ah khuan ka hung a. A dum a niin a number plate ah STONE tih a lo intar mai ang, i hmaih thei lo ang.”
A chhan let hman hma in Mike chu a chhuak zui nghal zat a. Meng kal ralh chung in phone chu a lakang a, a nu te in number chu a hmet nghal mawlh mawlh a.
Engthu nge a nu chu a hrilh ang aw. A account a maktaduaih khat a rawn luh hma chuan eng thu mah hrilh tur a nei tlat lo a ni.
Chuti a nih chuan Mike lak ah chuan thinrimna tur i zawn loh hram hram a ngai a ni, a nih loh chuan i hawi hil reng mai ang tiin a inzilh ru hlak a.
Inhual na zungbun te, thawmhnaw te a leisak duh a nih chuan a tha a ni mai. Dik tak chuan lo induh a, lo hnial thei dinhmun ah a ding rih tlat lo.
A nu in a rawn chhan tak ah chuan, “Nu, keimah ka nia. Thu lawmawm hrilh tur che ka nei a nia. Min dawr tu thar ka nei hlauh mai,” a ti nghal zung zung a.
“A va lawmawm ve. A hausa em?”
“Hausa thawkhat e.”
“A hmel tha em?”
“Tha tho mai.”
“A pawimawh zawk a chu, nupui tur i zawn hmuh sak thei ang em?”
“Aw, a harsa lo ang. Chuan sum ka hmu nual dawn tih na a nih chu. Chuvang chuan thil atthlak tiin pawisa puke maw thil dang dahkham emaw lam kha lo ti suh ang che. Chuan inhmun i dahkham na bank hming kha min rawn hrilh bawk dawn nia,” a ti zung zung a. A nu zawk hian bank lam chu a dawr zel thin a ni.
A nu in an bank dawr thin hming a rawn hrilh chu rilru a vawng chung in engtin nge an leiba a rulh sak theih hma in hma a lak ang aw tiin a ngaihtuah rauh rauh a. Lo rulh sak thei pawh nisela engtin tak insawifiah ang maw. Lottery man ang in a insawi thei mahna le.
“Naktuk ah manager chu va hmu in in loan lak chu a pung tlem zawk a va tih nawn dan ka lo ngaihtuah dawn nia. Loan in lak hnu khan rate hi a tla hniam tawh lutuk alawm. Chuan thla hnih thum chu ka lo rulh sak phawt che u ang a, thawk lak na hun in nei thei mai ang.”
“Takzet? Awi, duhtak, chutia i tih chuan a lawmawm ngawt ang. Ka rilru a hah hman lutuk a.”
“Nia, i rilru chu a hah viau ngeiin ka ring a ni. Mahse tun ah chuan hahdam takin awm tawh rawh khai. I in atang khan tumah in an chhuahtir che hi ka remti ngai lo ang tih chu i hriat ve reng kha.”
“Hmeichhe naupang fel tak chu i va ni em!”
Natalie chu a ner sawk a. Chuzawng fel tih thumal in a huam chin a zir a ni ang chu. Sum duh vang ringawt a pasal neih chu fel na a ni thei ang em le?
Thil tha tih duhna avang a nih chuan a pawi lutuk hran in a hre lo, chulo ah a mipa hnen ah chuan a va inzuar in an mu dun tih pawh a ni hran lo bawk nen.
Mahse a ruk tak a chutiang tih duhna neih chu thil tha a ni hauh lo thung.
Nataliue chu a ruk in a rum hak a. Phat tum in awmzia a nei tlat lo, Mike Stone nena hmangaihna par chen dun chu a thil chak ber a ni tih chu a inpawm ngei a ngai a ni.
Mike in an inkar a sex awm lo tur a a rilru a siam fel avang leh amah in a rawn it ve lo hlauh chu thil lawmawm tak chu a ni.
Mike chuan han mitmei ve deuh hlek chu nisela, Natalie chuan a che chhe leh hle ngei dawn a ni tih lah a inhre lawk kar mai si a. Brandon lak a a awmdan ang phei kha chu a ni hran lo ang. Engtik ah mah Mike hi chu a hmangaih theih a inring lem lo, tun a a landan ang, mi nunrawng, chapo leh mahni hmasial ang bak hian a ngaih theih pawh a beisei hran lo a ni.
Chutih rual chuan tunhma a a hmeichhe lo kawp leh lo mutpui tawh te ho ang a a rawn thlir chu a duh hauh lo thung. An pahnih a inkar ah chuan hmeichhiat mipat na lam nilo in inneihna chauh a awm tur a ni.
“Chuan ka bei rei hman chuang lo che a ni, ka nu. Min dawrtu nen chuan zanriah kan kil dun dawn a.”
“In ei man chu amah in a tum ngei ka beisei.”
“Nu, tun a i biak hi keimah, mi inren kha ka nia lo’m. Ei man te chu a pe dawn teh meuh mai.”
“Chuti chu ei teuh rawh khai, bawihi. I cher chhe lutuk mah mah tawh a nia.”
Natalie chu a nui hak hak a. Cher ti a sawi tur chu a ni hauh lo, mahse a nu chuan cher hi a ti reng thung.
“Naktuk zan lam ah ka rawn be dawn che nia. Chutih hun ah chuan bank nen a kan inbiak dan vel pawh ka hrilh thei tawh ang che. Bye aw.”
“Bye le, bawihi. Chuan ka lawm lutuk a nia.”
Mike a zuk fin hma chuan han inchei a in penparh deuh chu a chak viau nang in a insum thei hram a. A bag la in, kawngkhar a kalh nghal a, enghlelh nei loh hmel zet in tualzawl ah chuan a tei chhuak ta thauh thauh a.
Car lam pan a a kal pah chuan chu car chu a neitu ang mai a pa a nih saw le tiin a ngaihtuah a. Car chu a dum hlap a niin a tukverh te pawh chu rawng dum lam in a kap deuh a, han en mai pawh in a rapawm thei lek lek a ni.
A thutna lam tur kawngkhar a rawn inhawn deuh thut ah chuan a khur ru der der a.
Car chhung a a thut luh a kawngkhar a kar fel hnu chuan Mike chuan, “Hmeichhe dangdai tak i nih hi le,” a rawn ti sup a.
“Engti zawng chuan maw?”
“Mipa i innghah tir vak tlat lo.”
“Chu chu a tha nge tha lo le?”
A rawn melh kual dan dan a. “A hun a zir a niang chu.”
“Eng hun chu maw?”
“Kan thil tih tur leh kan kalna tur te a zir mawle.”
“Khawiah nge kan kal dawn a?”
“I awmna vengchhung a ni a, Natalie. Khawiah nge zanriah kil ila i han tih deuh a?”
“Khulai deuh ah khuan Italian cafe Bertollini a awm a. An tuan a tha in pizza leh pasta an nei tui thei khawp mai.”
“A tihchi nasat chu, ka ril a tam tawh teh mai a nia,” tiin Mike chuan car chu a ti nung nghal zat a.
“Kei deuh,” a lo ti leh sap a.
Mike chuan chiang zet hian a rawn thlek a. “I in diet lo tih chu min hrilh i tum lo ang chu maw. Ka hmeichhe lenchhuah pui tawh te reng reng in diet lo hi an la awm lo reng reng.”
“Ka in diet ngai lo hrim hrim.” Dik tak chuan a thau chi a ni mawlh lo zawk a ni, chuta kar ah a rilru a hah deuh hlek tawh hi chuan chaw a thlah tawp thin bawk nen. Brandon nen an inthen tum pawh khan Kg 45 ah a tlathla kawk a, mahse tun ah chuan ngai a awh leh ta hlauh zawk a ni.
“A mak telh telh mai a,” tiin Mike chu a phun bal bal a.
An thil ei na tur cafe neitu nu chuan Natalie chu nidang zawng aiin a lo ngaihsak a, mipa a kalpui vang pawh chu a ni mahna le. Chumai chu duhtawk lo in wine a thlawn in an rawn chhawpsak a, a thawk a te hrim hrim chuan an ngaihven sarh hlawm mai a ni. Awmze nei deuh deuh a an rawn melh chen tak ah phei chuan Natalie awm chu a nuam lo sawt kher mai. Chulai hmun ah chuan amah chauh in kum thum chhung a lo inhnawh puar tawh thin a, bialpa a nei ta nge nge a an ngai a nih pawh in a awm lo hran lo e.
Mike chuan Marinara an ei lai chuan, “Nih leh engvanga pasal la nei lo nge i nih hrim hrim a? Tumah in an la sawm loh thu che chu min hrilh tum hauh suh ang che. A chhan chu inchei thiam lo tak mah nila, hmeichhe duhawm tak chu i ni tho tho a ni,” a rawn ti bauh a.
Natalie chuan ngeiawm tak a chhan let a tum chu thulh leh in a ngawi rauh rauh a. He pa hi pasal a a neih a, a samzai tin pawh duh ngawih ngawih ang a a lan dawn rau rau chuan a chanchin diktak a hriat a tha ber in a ring a. Thudik a ngainat zia thu lah a sawi chamchi bawk nen.
“Diktak chuan tu mipa mah in min la sawm lo a ni. Ka that lai hun chu nupui a min neitu tur a ka beisei mipa bul ah ka hmang zo thak a. Mahse a ni chuan inneih pui ah min sawm ta lo a ni. Min sawm loh chhan chu kan inkawp atanga a kum li na ah ka hrechhuak a, chuti chung pawh chuan chhuanlam tur ka la zawnpui ngar ngar a ni.”
“Ngawi lawk aw, min hrilh lo la, kan ring chin ang e,” a rawn ti hul hak a. “Nupui a lo nei reng tawh a ni.”
“Engtin nge i hriat theih a?”
“Duhtak, nangmah ah khan a lang vek alawm. Khaih, tihpalh. Ka insum hman lo a nih kha.”
“Enge keimah ah a lang vek i tih awmzia chu?” a lo ti let hlar a.
“Ka rei leh, nangmah kha in en mai ta che.”
“Keimah ah hian fel hlel na engmah a awm hauh lo!”
“Pasal neih tak tak te i duh a nih chuan
nangmah ah khan fel hlel na a awm khawp mai. Hmeichhe tam zawk in an duhdan a nih ang in nang pawh in i duh ngei chu ka ring a. Min tawng ta hi i vannei ngawt mai.”
“Eng maw?”
“A nihna ang ngau ngau a hrilh tu che i mamawh a ni, hmeichhia. Chuan han ti it awm deuh tu tur che nen.”
“Min ti itawm tu tur maw?” a ti tham chhal a. An dawhkan kilna bul a tumah an awm lo chu a lawm ru ngei mai.
“Ni e. Khatiang a inthuam chung leh tun a i awmdan ang kha chuan tu mipa ma hi hmin thei ngai lo ang. A chang chang in an han hnaih ve deuh thin ang che a, zankhua a i bul a awm chu an duh dawn lo, nupui a neih leh lek phei che chu.”
Natalie chuan a hnaih der mai mai nge ni ti a zawh a duh rual rual in a ka chu chip hmak tur a hrilh a nap rum rum bawk a.
“Heti lam ah hian i ril hle a ni ang maw?” a ti let nghat a.
“Aw.”
“Karei, mi vannei ka va han ni em!”
Muangchang a thil thial nauh nauh pah chuan a rawn en vang vang a. Chutah a thirkut chu dahthla in Chianti no chu a dawm ta zawk a.
Wine tlem a in hlek hnu ah chuan, “Thu ka thup lo mah mah tia sawisel ka ni for eng a ni,” a rawn ti bauh a. “Mahse thil tha tih duh chuan nunrawng tak a lanchhuah a ngai fo thin a ni. I hnen ah dawt sawi zawk ila min duh em ni?”
A aw ah leh a hmel ah chuan a thutak hle a ni tih a hriat theih a. A rilru chu a ti nat rual rual in chu chu a tum ber niin a lang lawi si lo.
Natalie chuan a thusawi chu a pawmsak thei a, a nih loh leh ngeiawm tak in a lo dawngsawng thei bawk. Dik tak chuan pasal neih a, chhungkaw din chu a duh ngawih ngawih a ni.
Fa nei miah lo tur ang a han inngaihtuah chu atan thil hrehawm tak a ni. Mipa in an hnaih theih loh nachhan chu a mizia vang a ni tih chu a inhriat na a rei tawh a. Mike te ang hi a thil hriat tawh sa rawn phochhuak tu atan a mamawh reng pawh a lo ni mahna le.
Tun ang reng a a khawsa a nih chuan a nupui thar, amah atchilh em em tu lem chu a chhangchhuak zo hauh lo ang le.
Thawk a la halh a. “chindan tha lo ka nei nual a ni tih chu ka inhre reng alawm. Hetiang a khirh leh ngeiawm hi ka ni ngai hran lo asin. Mahse Brandon’n nupui mai bak ah fa pahnih a nei tawh a ni tih ka hriatchhuah khan ka tal buai ta vek a ni ber mai.”
“Engtin nge a bum theih che a?” tiin Mike chuan a rawn zawt bauh a. “Ka sawi awmzia chu engtin nge a nupui leh a fate pahnih chu i lak ah a thup theih a ….. eng chen nge i tih kha?”
“Kum li.”
“Khai aw! A va rei ve le. Rinhlelhna eng emaw chu i nei ngei ang chu maw?”
“Nei tur chu ka nia, mahse ka nei ngai hauh lo. A hna avang chuan khawi ah emaw kal bo a ngaih hun te, ka biakpawh theih loh hun te leh a awmna min hrilh a remchan loh hun te a awm thin a. Amah kha spy a nia.”
“Spy a!” tiin Mike chu a thaw hawk a. “Khai aw, Natalie, chutiang chhuanlam tlanglawn lutuk chu i awih thei lo ang ti raw?”
“Spy chu a ni ngei alawm,” a lo ti ram hmak a. “ASIO a anti-terrorist unit hnuai a thawk a ni, chu chu chiang takin ka hria alawm, Mike. Khatih hun lai khan kei pawh in sorkar hna ka thawk ve bawk a ni.”
“Eng ang in?”
“Premier’s Department a minister pakhat PA ang in ka thawk a. Brandon nen a kan inkar buai vel avang chuan thla ruk chawlh ka la a, ka kir leh ta lo a ni. Chuan Wives Wanted hi ka din ta a ni.”
“Engvangin?”
“Engvangin a?”
“Aw, engvangin? Thudik chauh. Zep nei hauh suh ang che.”
“A chhan tamtak a awm ang chu. Khatia chawlh ka lak tak ah khan ka khawhar in internet a inhmelhriat na website ka tlawh ta a. Khatih lai khan kum sawmthum chauh ka la ni a. Mahse email uchuak tak tak, min mutpui duh avang chauh a min rawn chhan let na tam tham tak ka hmuh tak hnu ah chuan ka pasal duhzawng ngei hmuh theih nan agency din ka tum ta a. A hnu lawk ah keimah ang hmeichhe leh mipa pawh, rilru natna tawk tawh hnu, mahse nupui leh fanau neih duh tamtak an awm a ni tih ka hre ta thuai a.”
“Chu thil tha tak ti ang i nih chu le. Zep lo mai teh, Natalie, pasal tur i hmuh theih nan Wives Wanted hi i din a ni ti raw?”
A thaw halh a. “ni deuh ber mai. Vanduaithlak takin ka hlawhtling ta lo a nih hi. Mahse mipa lak a ka hmeichhiat pui ten an duh ang ngei an hmuh hian keimah ah lungawina eng emaw chu a awm thin. Phuba lakna leh inenkawlna kalkawp ang vel a ni ber in ka hria.”
“Nia, a nih theih dan a awm tho mai.”
“Anih nang ve le?” a ti nghal chat a. Ama chanchin ngawt sawi a, a rilru natna mu hnu kaihthawh chu a nuam tih zawng a ni tlat lo.
“Kei ve thung hi maw?”
“Engvang a hmangaihna leh inneihna hi ngaithei lo viau nge i nih a?”
“Hmangaihna leh inneihna hi ka ngaithei lo lam a ni lo. Chutiang a hlim nah mu tu te chu vanneihna ka duhsak a, ka tan chuan a inhmeh ve lo mai a ni.”
“Engvang chuan maw? Dawt min hrilh hauh suh ang che. Thudik chauh i sawi thin thu min hrilh tawh kha.”
Mike chu a inseh ruh a, a inthlahdul leh thuai a.
“Thudik thenkhat hi chu sawi loh a tha zawk thin a ni,” tih bauh pah in a thil ei lai chu a chhunzawm san daih a.
Natalie chuan a en hau a, a chhan na chu hriat a chak em avangin a chaw ei tui na pawh a bop hah hial a ni. “Chuzawng chu maw? A chhan min hrilh i tum miah lo a ni maw?”
A thil ei lai chu Mike chuan ngawi reng a ei in, a ei kham hnu ah chuan, “Dawn lo,” a ti sup ringawt a.
“Ekhai, a va lawmawm ve!” a lo ti let nghat a.
“Ka nun kawng chhuk chho i hriat vek a ngai hran lem lo. Kan innei tak tak dawn pawh a nih loh hi.”
“Keiin ka hrilh vek che alawm.”
“Hmeichhia te chuan mahni chanchin sawi nuam an ti a, mipa chu kan ni hran lo.”
Natalie thin chu a ling ta phat mai. Hetiang mipa hi chuan Brandon kha an hriatchhuah tir thin a ni. Ani pawh khan a chanchin engkim a sawichhuah tir hnu ah ama chanchin engmah a hrilh tha leh duh lo a nih kha.
Pasal a nei dawn a nih ngai chuan Natalie chuan mipa, a chanchin engkim hrilh tu leh zep then nei lo a thlang khawp ang. Hmangaihna chu a nunrawng lo a, a dawhthei a, ngil a nei a, midang a venthawng thin a ni si a.
Natalie chuan a dawhkan kilpui pa chu a melh vang vang a, chu pa chuan dawhthei na te, ngilneih na te leh midang venthawn na a nei pha in a hre thlawt lo a ni.
He inneihna hi a rem tihna lam ah amah setana nen inremsiamna an nei hi a ni ringawt, tun ah lah talchhuah ngaihna a awm tawh bawk si lo.
A eng a pawh chu nisela, a thiltih duh loh chu tuah in an tihluih tir thei dawn chuang lo a ni.
“Mipa te hian an chanchin an sawi tha duh lo a ni tih chu ka hria alawm,” a ti vawt raih a. “A vanduaithlak ngawt mai, an that phah mial maithei asin mawle. Hmeichhia te hi chuan mi a ang a inlantir hi kan duh lo thung a, chuvang chuan zanin hian i rualin inhualna zungbun lei tur chuan ka rawn kal dawn lo a ni. Mr Helsinger hma ah duh ang tak che a ka lan a ngai a ni tih chu ka hria a, mahse zungbun zuar hmeichhe hma lehzel a lem ka chan chu a tul na ka hre hran lo. Ka pi hian a tlereuh hlu zawng zawng min hnutchhiah a, a inhualna zungbun chu ka bun mai ang, chuan a inneih zungbun pawh a tul hun ah ka bun ang. Chu chu i remtih loh leh a tawk a ni mai.”
Mike chuan a dar a lo san ak ringawt a. A thusawi a ngaih pawimawh loh em avang chuan Natalie chu a thin a rim ru teuh a. “A tha alawm. Zungbun mawi tak an nih a ngai thung ang. Kei ang mi hausa chin hi chuan an nupui te tan zungbun thing tak an lei dawn lo tih i hriat kha.”
“Zungbun mawi tak an ni,” tiin Natalie chuan a sehchilh deuh rap rap a.
“Chuti a nih chuan hun a hek lo sawt a nih chu. Mahse i thawmhnaw chungchang ah chuan ka inhnukdawk dawn hauh lo a nia. Chu pawh chu nakin lam ah a tih theih tho a. Inneih phalna license lak erawh chu a ngai tawh a ni. A thla fe a ngaih thu kha i sawi a. A la tur in khawi ah nge kal a ngaih le?”
“Khawpui chhung a registry office ah. I birth certificate i ken tel a ngai a nia, a copy i nei em ang chu maw?”
“Nei lo.”
“Anih chuan i siam tir a ngai a nih chu, ni lo’m ni? Births, Deaths and Marriages office ah nangmah ngei i va kal chuan an lo pe mai ang che. An office chu khawpui chhung ah tho chuan a nia a awm.”
“A that chu. Naktuk chawhma lam ah kan tifel vek thei dawn a nih chu. Dar kua ah ka rawn lam ang che.”
Natalie chu a sa zak a. “Naktuk zing a ka buai dawn leh dawn loh te min zawt awm tak i nia.”
“I buai dawn em?”
“Ka sam siamtir ka tum a. Zirtawp tuk apiang in ka kal thin a ni.” Thil tul lutuk a ni lo tih chu Natalie chuan a hre reng a mahse kartluan a a thiltih hahdamthlak ber a ni miau a ni.
A sam chu a rawn melh a. “Chuti a nih chuan tun December hma hian is am siamtu chu thlak la a tha in ka ring. Kha aia khawih thiam kha zawng ang che.”
Natalie chuan a va melh kawk a. “Chuan nupui tur dang zawng la a tha in ka ring,” a ti hmak a.
A lungawi loh na tur a sawi a ni tih inhre lo ang maiin a phu deuh zawk a. “Khatiang a is am put kha i duh tih na em ni?”
“Ka sam put lai hi ka duhdan a ka siam a nih hi, ka sam siamtu tih ni lo in.”
“Aw, a lo ni maw. Chu mipa dawrtu che an awm apiang in, it awm lo thei ang ber in i inchei thin tihna a ni maw?”

Chuti em ni? A ni mahna le. A hlim vak loh lai hi chuan a thatna tur a ngaihtuah ngai lo a, tunlai phei chu thla eng emaw chen chu rilru hah reng reng in a khawsa ve bawk a ni.
Mike chuan, “Engtik hun ah nge is am chu i siam zawh ang?” tiin a rawn zawt leh bauh a.
“Dar sawmpahnih vel ah.”
“I chenna in ah dark hat le a chanve ah ka rawn lam ang che.”
“A tha alawm, ka lo inpeih ang e.”
“Khati zawng kha zan in atan chuan a tawk in ka hria,” tiin an ei na bill a lam nghal zat a.
A ei man a pek pah chuan Natalie chuan tip thahnem tham tak a dah tel tih a hre thei nghal a.
Brandon pawh khan chutiang chiah chu a ni, a ni pawh kha a pa lian hle bawk a. Duh aiin Brandon leh Mike chuan in an na an nghah mah mah a ni tiin a ngaihtuah zui nauh nauh a.
A in an thlen leh hnu chuan car atanga a rawn chhuah a, a kawtkai thleng a thlah a rawn thlah chu a remti lo a, chutiang a a thlah vaih chuan insum zo in leng lut tur a a sawm mai a hlau tlat. A nihna tak ah chuan naktuka hun an hman dun hun tur ngawt chu a thlahlel tawh a ni si a.
A mipa duhzawng chu a ni hran hauh lo, mahse amah ah phurna eng emaw tak a neihtir miau si. Car a minute thum vel lek an thut dun pawh in a thaw a chham lo chauh chu a ni ber mai.
A kawngkhar kalhna a hawn lai pawh chuan a la rawn thlir reng a ni tih a hre thei mai a, Brandon ang chiah a ni, a ni pawh khan him riau a inhriatna a neih tir thin a nih kha. A chak hmel vang nge a len hrim hrim vang tih lam phei chu a hre hauh lo. Mike Stone bul a a awm chuan nu ta riau leh sih hnip ta saw tang mai hian a awm miau a, chu chu a thil duh loh zawng tak a la ni zui.
Naktuk dark hat leh a chanve ah chuan tun a Mike mitmeng ang hi ni tawh lo in, mak tia a meng zau kawk lai a hmu ngei ang chu maw tiin a inhnem chawp a. Mahse chu chuan an inkar ah danglam na engmah a thlen phah hauh lo ang, Mike chu a mi duhzawng a la nih loh ang bawk in Mike pawh chuan a ngaihsak phah vak chuang in a ring lem lo.
Natalie chuan tisa in itna chu hmel duhzawng te lak ah chauh neih kher tur a ni lo tih a hrethiam ta uarh uarh a. Chutiang bawkin ngaihtuahna fim pawh in a hneh zo lo a, mahni a thunei ang maiin a kal fal nalh a ni ber.
Ngaihtuahna ril lrh chak tak mai, mihring duhna avanga lo piang a niin, hmeichhia te chub el ruak, hnawhkhah nghak a awm ang maiin a chhuah thei a ni.
Chu zan chuan Natalie chuan khum ah mu in, Mike Stone a mamawh na avang chuan a let a let a. “Mi a tak chu ka va ni em!” tiin a phun leh bal bal thin.
Chutiang rilru a put avang chuan a tuk a a thiltum pawh chu a thlak leh phah ta nge nge a. Thawmhnaw vut buak rawng lam chu a inbel lo ang a, chutih rual rual chuan Mike tan chuan a inchei parh bawk tur a ni lo. Eng ang a inphochhuah fuh pawh duh mahsela, a chapo na avang chuan chutiang chuan awm a tum hauh lo – chumai bak ah a taksa awm dan avang chuan thlem na tawktarh a duh lo a ni.
Chutiang a a landan a thlak chuan a tan a tha lo thei zawk tlat a ni, Mike chuan mak ti tak a en in, ngaihdan dik lo a siam phah thei tlat. Hmeichhe duham, pasal a neih hlen rilruk chung a thlem tum ang ah a ngai ang a, a tlanchhe palh thei tlat.
Chutiang a nih vaih chuan a maktaduaih hnih chu a tlanbopui daih dawn tih na a ni. He mihring hi a rilru a hnen theih dan kawng chhete tal awm sela chu a zia zia pawh a awm thei ang a, mahse Mike chuan an inremna ah khan hmeichhiat mipat na telh loh kha a tum bur thung si.
Nia, chutiang a nih chuan contract sign tir chi a ni tak ang. Maktaduaih hnih chu engtin nge a pe ngei dawn a ni tih a hriat ngawt ang? Ani ang mipa hi chuan dan ang thlap a nupui then tawh nih lam chu an ngaihsak hauh lo ang le. Nupui neih leh a tum awm tawp bawk si lo a, a partnership a hmuh rual rual chuan a kal bo san mai lo ang tih tu in nge sawi thei ang ni?
Kawng lehlam ah chuan thubuai neih a, vantlang hma a mualpho taka inkhin vel chu a duh hauh in a ring lo. A chhan chu Chuck Helsinger chuan a ngaihzam mai mai a rinawm loh tlat a ni.
Naktuk ah chu thu chu a sawichhuak lo a nih chuan hmeichhe a tak a ni ngei ta ve ang. Ni e, Mike Stone chu vawt raih leh thu pehhel kual mai mai awm lo in a dawngsawng thin tur a ni ang. Hmeichhe rilru duh na leh chakna tih angreng vel chu a dah bo hmiah tur a ni.
Muhil thei hlauh sela aw …..
Zing lam dar hnih pelh hnu ah a muhil ve thei tawk a, a muthilh tawh hnu ah pawh chuan a mumang lam ah mipa tu tih a hrait loh nen chuan hmangaihna par an lo tlan dun in, chu pa lak ah chuan duh duh a khawih kawi theih in a lo inphal zau em em a. Chu a mumang chuan tawp chin reng a nei dawn lo emaw tih mai tur a ni. Duhtawk an nghah tawh hnu ah chuan chu a tlangvalpa chu ngawi reng hian a lo kal sawn a.
A kal liam hma lawk chuan chu pa chu a rawn leh hawi a, chutah chuan a mitmeng chu chiang takin Natalie chuan a va hmu thei ta a. Mit uk tak ruih, nel awm loh tak hi a lo ni a.
“Mike,” tiin Natalie chu a au vak a.
Mahse ani chuan ngawi reng in a kal liamsan ta zawk a.

This Post Has One Comment

  1. Robertnon

    Абсолютно все трендовые новости часового искусства – свежие коллекции известных часовых домов.
    Точно все коллекции хронографов от дешевых до ультра роскошных.
    https://watchco.ru/

Leave a Reply