You are currently viewing Chimawmpa Zún-11

Chimawmpa Zún-11

Spread the love

Saivula leh Rinngheti te in hnial reng chu ning in an hma ah ka kal daih a, hnung lam ah an la in hnial reng tho, “A nuam em” ka bul a rawn kal hnaih pah in Hluzuala chuan a ti a, “eng chu maw” tiin ka lo in ti hrelo der, “I duh deuh i nei tawh a” a tih leh chuan a mah chu ka en a ,a ni pawn min en ve tho, nui hmel a pu na in a nuih a za tak tak lo tih chu ka hmu thiam ve reng.

“A pangai a ni mai, ka hlim a ka hlim loh pawh ka hre Chuang lo,lehkha zir reng tho a la ngai a” tiin ka nui lui a, fiamthu a lakpui daih ka tum, a lak ah  feelings danglam ka pu lo a ni tih hre tho mahse a hriat a ngaihzawng lam sawi vak ka duh lo, a ruk in hreawm a ti dawn tih ka hriat avang in nuam lo ka ti ru tho bawk sia, a bul a awm tam loh a ngai dawn a nih hi,tiang chuan tawng sual hlau deuh in ka awm reng a, Hluzuala bul ah hi Chuan thla a muang lo,ka thlamuan loh dan hi darthlalang tih keh hlau deuh a keng reng ang vel ka ni.

Tawng leh tum a a án zuau lai chuan “Lalrinnghet in va muang ve ,in hnial reng su” tiin kan hnung a mite chu ka au daih a, thildang min sawi zui pui vak ang tih ka hlau, Ringheti te pawh in min rawn úm pha thuai in class lam Kan pan a, kan class hi chu mi harh hlang,zàwng rual awm khawm kha kan ni hrim a,class lak lai bak chuan a bengchheng em em reng mai a ni.

Nidang zawng aiin sir Opa class chu ka nghakhlel, ka ring ka fan ka fan tawh, a rawn lut te chu ka lo nuih sàng a ,min en ve lem lo, lecture a pe lai te chu mit lasawn lék lo in ka en a, a hmeltha ngawih ngawih lutuk a ka vawm lawlh zawk dawn emaw ni, “khatin chilthli uai duah duah in en Suh” Rinngheti’n a tih Chuan ka hmui ka tuai vat a, eng chilthli mah a awm lo ‘Ringhet min tihder ziah Suh” ka tih khar khar lai chuan kan lam  pan in sir a rawn kal a, a lehkhabu ken lai in ka lu ah a khawng a nihchu, lu tuai vut vut chung a ka en chhoh chuan,

“Zirlai ngaihtuah tur” a ti a, a kalsawn lehnghal daih,ka van ngei reuh tak, a bialnu te ka ni ve tawh em em a,vawikhat tal te chu min hmuh loh der ve mai tur a nia,midang pawh an tawng a engtin mah a tilo,kei kher hi min hauh a min tih zah a chak thin a nih hi, ka be miah lo ang mawle, min rawn en apiang in rum deuh deuh in ka lo melh a, eng ah mah a ngaih hmel der lo, class ban a min lo nghah te chuan ka hmulo der a, ka kaltlang daih , min lo call a ka la duh Chuang lo, ho e mai ,a ni pawn mi zawng zawng hmuh laiin min ti zak ve ziah tho.

In ka thlen veleh ka in tifai a, ka in tihfai lai chuan tu te emaw an rawn kal ni ngei tur a ni, in pui lam chu an ri nawk nawk mai,ka nu a awm tho avang in muangchang in ka inbual a, hmeichhia duh ang thal a kan han inbual tak tak hi chu , e pah ziah kan ang,kan rei ngei ngei.

Ka inbual zo thawm rik na lam ka pan chu zu rim a lo nam hak mai, Kan inhnuai te nupa sofa ah kawisawi deuh in an lo thu a, an in hau leh tawh nge an rawn leng ve mai mai pawh ka hrelo, mihring mihrin na ah fel viau mah ila ruihhlo hi chuan kan nihna bak aia chhia in min lantir thin a,mihausa inchhung pawh hremhmun ang mai ah a chhuah thei a, rethei te tan lah retheih belhchhah tu a ni bawk,ruihhlo hi chu fak mawi chawp viau na tur a awm thlawt lo,tunlai thalai tam zawk hi chuan ruih te hi changkang na emaw te an ti a,ruih hian eng emaw ta viau ah an in ngai a ni chék a niang chu ,a nih na tak ah chuan hmeltha deuh pawh ruihhlo an tih hi Chuan,’a hmel chu a tha,mahse’ tih ah Kan tawp zel tho.

An ni chu ngaihsak lo in room ah ka lut daih a, ka nu a awm tho a kei ai chuan a kawm thiam zawk dawn tho,room ka luh rual in khum a ka phone dah ka ban nghal a, ka han hmet eng chiah chu sir Opa call leh message a lo awm nual mai,  a thinrim loh pawn a ngaih a tha tawh lo viau ang, message pawh chu ka open duh ta Chuang lo a, ti hian zan thleng in ka be duh lo ang.

Dar 6 vel ah ka nu in Chaw ei tur in min rawn ko a, lehkha zir ka duh avang in kan ei na ka seng fel veleh room lam ka pan lehnghal, phone ngaihsak Miah lo a lehkha ka zir mawlh mawlh laiin room ah ka u a rawn lut a, “kha” tiin ka hmai zawn ah a phone a rawn lek a, ka lo en hàw, “be rawh, ka Ning lutuk” a ti nghat a, tu nge tih ka ring thiam nghal mai, ka be peih lo viau a sin mawle, ka u in min en rún rún a vangin phone chu ka la a,’hello’ ka tih rual in “khawnge i phone” a rawn ti nghal hluk, ka ner nàng,

“Khum ah ka dah” ti a ka chhan hnu ah ,”i phone kha en rawh” tiin call chu a ti tawp hmak, ‘a van in ti thu reuh tak,thu ber emaw a in ti a ni maw” tiin ka phun zui hlak, ka u phone ka pek let leh lai chuan “nangni hi in ni ve deuh emaw ni,min tibuai Miah Suh ang che u” eng a mah hma in a ti a, a chhuak nghal daih lehnghal,khum a ka phone dah a rik chuan peihlo deuh chung in call chu ka chhang a, vawiin a min tih dan avang khan ka la lungawi lo reng.

“E nge’ ka ti hmuk a, a vin hluk dawn emaw tih lai in “lo chhuak lawk la” dam deuh in a ti a,nichin a a awki leh tun a mi chu in ang lo tak a ni, “lehkha ka zir” tiin ka chhang a, “a reilo ang’ a ti deuh tlat, zep lo chuan ka ngai ve tho bawk sia, lungawi lo lai mek ni mah ila hmu tur a chhuah chu ka chak zek zek tho, “zirtirtu ve si,i zirlai te han koh chhuah” ti niah niah chung in darthlalang ah ka in en a, “a rei lo ang,lo kal lawk rawh in in piah thim chin ah khan ka lo awm ang” a ti a, room chhuahsan in ka u room  lam ka pan a.

“U,meizial lei I ngai em?” Tiin ka u chu ka va zawt dék dék, min rawn melh rulh pah hian “ngailo” a ti liam puat a, “lei ngai eng emaw tal i nei Miah lo maw’ ka ti leh ,chhuanlam ka Siam loh chuan ka nu ten chhuah min phalsak dawn silo a,zan lam ah hi Chuan chhun lam aiin an strick zual a zan ah a pawimawh viau a nih loh chuan ka chhuak mai mai ngai lo,, “in hmuh in tum em ni” a lehkhabu chhiar lai khup pah in a rawn ti ta a, ka bu nghat ringawt,”hmeichhia zan lam a mipa hmu tur a chhuah hi a tha viau lo asin’ a tih hnu ah “Opa hi ka mi hriatchian a ni a, ka ring bawk, chuvang Chauh chuan i chhuah ka phal sak ang che, mahse chin tawk hria la,” tiin min hrilh a, ka lawm luat ah ka u chu ka chuks nawk lo Chauh a ni.

“Kha zial lo lei rawh, rei lo la” tiin pawisa minpe  a, “keima u bik bik han fel zia hi chu aww!! I samkir theu bum pawh ka hmu mam thin then, mam thin then khua atang a lo kal em ni i nih’ uar zet a ka tih Chuan ,lo ner sawk in “over Suh,tlak duah lo khan kal la,rawn haw leh nghal ang che,darkar chanve aia rei i awm chuan LED torch light cell 4 hmang nen ka rawn zawng ang che” a lo ti hmak ,a rang a rang in room atang Chuan ka tlan chhuak nghal.

Rin ang ngei in ka chhuak tur chu ka nu in “khawnge i kal dawn?” A lo ti a,ka u pawisa min pek ken lan va pah in “u mama meizial tur ka lei dawn” ka ti a, min ringhlel lo a niang tv a en leh daih ,keipawh in kawngka chu pel rang tak ka ni.

Pawn ka chhuak chiah chu boruak a lo vawt vúr mai, thli a thaw vuk vuk a,kawl a phe uaih uaih bawk, ruah a sur dawn a niang ,hetiang ang khua ah te in koh chhuah ngai a maw ni le, ka hmuh hun ah ka hau ang, thli leh ruah vel hi hlau hran lo mah ila,ték leh rial hi chu hlau tak ka ni, ka tetlai phei chuan rial a tlak hlek chuan khum hnuai ah ka vak lul ziah ,ka vah luh lai ka chhungten an hre hman ngai reng reng lo, ti khawp chuan ka hlau.

Ka lo awm ang a tih na lai chu ka pan ding nghal a, ka han hawi kual deuh a a mah lah chu ka hmu mai lo lehnghal, ruahsur a hlau a nga a haw leh daih a niang te ka ti rum rum tawh,min hrilh lo a a lo haw leh daih tak tak a nih phei chuan ka ngei ngawt ang,ka then lehnghal daih duh maithei a ni.

Thim chin ka thleng a, a mah hmuh tur a la awm bawk silo, “ka ning, awm leh tawp silo ka then Chiang viau ang,dawt in min han bum chhuah chule” ti hluk hluk in let leh daih tum in ka in her a, kal mai ka tum chu ka hnunglam atang min rawn kuah thut , “awi ka nú liantawn!” Ka ti vak a ,ka Phu nasa lutuk a zun ka cheh thawt lo chauh a ni, “ka bum chhuak lo che” ka dar a a khabe nghah pah a a tih Chuan “khawimaw, i va mawl ve a, phut nasat lutuk avangin tlu khur char char ila engtin nge nia nga,” ka ti hlar, thim zing ah lehnghal in thawng thut ngai pawh va ni suh,lungphu thalo nei phei ila chu lei char ah ka tlu hlawm reng tawh ang chu.

“I tlu lo a a lawmawm” tiin ka nghawng zawn ah a nui ri suk a, “mawla” ti nghat in ka kiu in ka nghawk a, ka in la hrang nghal bawk, “e nge min koh chhuah chhan” tiin a mah hawi zawng in ka awm , a thim deuh avang in a hmel erawh Chiang tak in ka hmu thei lo, “mipa in a bialnu a ko chhuak a nih chuan eng dang vak nge ni a i rin’ a tih Chuan ka awm zàwn ah ka kut dah kawkalh in, “a theihloh,a thleng lul lo ang” ka ti a, a mah ka awm hlat nghal deuh bawk.

“Nang té hi e nge i ngaihtuah na ah khan awm a,thil nilo lo ngaihtuah Suh” tih pah in a chek tlak tlak a, ka zak leh hnuhnawh viau , “eng, eng thil nilo mah ka ngaihtuah lo, a lum lutuk a ka ban ka vai vel a nih hi” tih pah in ka ban chu ka han ti che kual leh vel a,ka lai zo vek tawh, chutah “e nge thleng ngailo tur chu’ nuihza insum áw deuh hian a rawn ti leh kher a, a hrethiam a nih chuan min tih zah belh loh ve mai tur a nia, hei vang hi a lawm ka ngei thin,mi tih zah thiam leh lutuk mai. “Ruah hi a lo thleng lo ang ka tihna a nia, hei khua a veng leh tan tawh” tih pah in chhuanlam ah van lam ka kawk a, a lo la dum tak ngúk mai,ruah chu a rawn thleng ngei ngei dawn Chiang sa, pawilo ka sawi zo vek tawh.

“Kha hei hi,ruah a sur dawn si a, mu pah in i ei mai mai dawn nia ” tih pah in ka kut ah chocolate a rawn hmehbel a, “he chocolate min pek duh vang Chauh hian maw tun ang khaw vawt hnuai ah min koh chhuah a” ka ti hé háw ,a ho ve em bawk a ni, chocolate Cheng sawm man pahnih lek minpe tur hian min ko chhuak chu a nia, a vawh tehreng nen, “ka neihchhun a ni sia lawm, thil dang beisei I nei em ni” a ti a, “nei lo e” tiin ka nui tawi tak, ho hi ka ti em a ni, “minpe tawh bawk a,haw tawh rawh keipawh ka haw dawn” tiin ka in her nghal a,mahse ka hnung a tang nghet zet in min rawn kuah leh, “chhan dang pakhat a la awm” a hma a a awki aia zawi deuh zawk hian a ti a,”e nge thildang chu’ ti a ka chhan chuan ,”ka ngai che’ a ti a,sawi ring hran lo mahse ka beng ah chuan ri ring tak a ni, ka beng bul ah a sawi miau a lawm, ‘ka ngai che’ tih thumal khan ka lung normal tak a Phu kha a rawn ti kir phei zawt zawt, sihal chu ni ila ka ú ring ruah ruah ngawt ang, sir Opa’n min ngai a nihchu,keimah Lalrinawmi hi min ngai Chiang a lawm.

Min ngaih thu a sawi a,mahse keichu sawitur ka hrelo daih, nuam ka tih lutuk vang nge,ka laih ém vang tih zawk pawh ka hrelo,sawitur a bo vek , electric a shock zawh hlim ang mai ka la ni, “eng emaw tal sawi ve la” a tih te chuan ka la ni huih mai, “u mama’n meizial lo lei rawh a tia” ka ti daih, a nui ri hawk a ,”awle ka hria e” a ti a ka ban ah laiin dawr lam min pan pui a,dawr lam Kan pan lai chuan ruah fang a rawng tla tan a, reilo ah a rawn haw hawk mai, khum engmah Kan keng bawk silo, chak deuh in kan chhuak a dawr lam chu Kan pan a, ruah Chauh pawh tih tawh nak lai in ka hlauh ber mai chu rial a rawn tla tel lehnghal “tlan vat vat rawh, rial a lo súr a nia,min delh dawn!” Ti in Opa chu tlan chak tur in ka hrilh a, a hnung zawk a tlan chung in min Kai chung a ka hma a tlan chu tlan muang ka ti em em.

Rial a tlak tel miau avang in min den na lai chu a thip zawk zawk mai, dawr chhung Kan luh chuan kan huh vek hman tawh, rial lah chu a tla Lian tawlh tawlh a, dawr chung chu rangvà a ni bawk si,a ri a ring nasa ,rial chuan a deng pawp mai ang tih hlauhawm khawp in a tla Lian, rangvà rial den na lai chu a rawn khuar thla dàwk dàwk thei in ka hria, rangva tuiék tawh hnuai ah chuan ka thla a muang thlawt lo ,chhuak dàwk dàwk lo in in ah khan ka lo awm hle hle lo a ni,men pawh ka ngam tawh lo, dawr nghaktu u mapuii pawh zah zo lo in dawr lai tak ah chuan ka thu tung a, ka beng hup in ka mit ka chhing tlat bawk, ka rilru in rial in min den hlim loh nan leh tek a tlak loh nan Pathian ka dil mawlh mawlh.

Chutia hlau em em a ka awm lai chuan tu emaw hian ka beng ah earphone a rawn vuah a, ka hla ngainat em em mai a in play bawk, chutah kut khingkhat in min rawn kuah a, ka hlauh na te an kalbo nghal riai riai niin ka hria, chuta mit ka han meng chu Sir Opa nen Chiang zet in kan in hmachhawn a , a kut lehlam in min kuah a, a kut lehlam erawh in kan chung zàwn ah thlangrà a keng thung, ka hlauh zia hria in ka hlauh na tih zia nan chutiang a a ti chu a ni tih ka hria.

Mahse rei tak pawh romantic tak in kan in en hman lo, inchung a Rik pawp rual in kan thlangrà khum chu a ri leh pawp a, ka au nasa ngang mai, ka ke bul ah rial artui tia dawn hi a rawn lir tawl bawk, sir Opa chu ka kuah chung chung a, ka tap tep tawh, tun ah chuan pawn a ka lo chhuak kha inchhir tawh tak ka ni, kan awm na chu Kan sawn a, u mapuii chuan a hlau ve vak lo a niang ka che buai lai te chu min lo nuih mai mai, rial tlak tawh loh hun ah ka hau ang.

Rial a tlak tawh loh hnu pawh chuan thlamuang tak in ka awm nghal mai thei lo,hetiang a hnai ah hian rial ka la hmachhawn ngailo, rangvà a hniam bawk si, thlangrà kha khum lo phei ila chu ka chhip a déng kaw hawk in ka ring.

Ka chhungten min ngaihtuah ngawt in ka ring, phone phawrh a ka han en chuan rin ang ngei in ka chhungte call a lo awmkim vek,ka nu chu ka call back nghal a, ‘khawnge i awm?” A rawn ti nghal a ,a hlauthawn hmel viau bawk, rial ka hlauh zia an hre miau a lawm ,”u mapuiii dawr ah ka awm, ruahsur ban veleh ka lo haw ang” ka ti a, ruah chu sur rei ka ti tawh khawp mai, tam tak ni tawh lo mahse dó chuan kan zàwr vek tho ang, ‘a sur tam tawh Chuang lo a,i u in rawn hruai che rawh se,lo nghak rawh” tih leh u mama auh chu a rual nghal a ,phone ka off hnu chuan ,”u mama’n min lo hruai dawn” tiin sir Opa chu ka hrilh a. Sir Opa chu a bu nghat ringawt, duh ang in rial in min ti romantic thei lo a ni e.

U mama lo thlen hma chu YMA thuthleng ang ah hian kan thu dun a, u mapuii a tawng duh bawk a nichin a rial hlau a phi ruai kha ka nui leh uarh uarh thei tawh.

Conti

Leave a Reply