You are currently viewing Chimawmpa Zûn-12

Chimawmpa Zûn-12

Spread the love

Kan ti ti mawlh mawlh laiin u mama a rawn lut a, “a va súr duh em em ve” tih pah in a thawnhnaw huh lai a thing  nawk nawk,  ruah lah chu a hàn mai dawn emaw tih laiin a súr tha leh thin a, khua a vàr pui dawn pawh a ni maithei a ni.

“Lo thu ve rih rawh, tlem a a zia deuh hun ah Kan haw dawn nia” sir Opa’n a tih Chuan ka u pawh Kan bul a thuthleng hniam ah chuan a rawn thu ve mai bawk a, u mama awm lai a thut dun chu nuam ka ti chiah lo, thian dun ve tho ni mahse ka zak deuh tlat. Rei vak lo kan ti ti leh hnu ah Kan haw a, u mama khan sir opa a awm ve tih a hriat avang in nihliap a rawn keng Chuang a, u mama hi chu a rilru a zau in a fel a, mahse a tih tawh loh chin ah erawh a ngaihdan thlaksak mai mai theih a nilo thung.

Inchhung kan lut chiah chu ka nu in “zial lei tur mai mai i va tawng leh chiam a niang chu, rial in a deng hlum lo che kha vannei in ti hle rawh” a lo ti nghal hmuar hmuar a, ka ngawi kár ringawt, min ngaihtuah em vang zawk a ni tih ka hre ve tlat, “han in thlak thuai rawh, i damlo a nge” a tih leh chuan room lam ka pan a , ka in thlak zawh ah ka mu nghal , rizai hnuai ah chuan a lum nuam ta khawp mai.

Zing ka tho chu zan lam a ka ruah do vang nge ka rit bur a,ka bek a na ngut ngut bawk, damdawi mum hnih ngawt ka hmawm a, class ah ka muthlu em lo ang chu, sir Opa nen bawk Kan inphur leh a a hma a ka chhuk na ngai bawk a ka chhuk leh a, sir Opa a tlan leh chiah tih ah chuan vli te thian ho an rawn lang hlawl, an tawngthei si a sir nen Kan inphur tih college pum in an hre leh nghal vek dawn a nih hi,  “tinge sir khan a rawn phurh che a” a mitko sàn ak pah in a ti ta ngei, “kan veng a in ang a” ka ti liam puat, “a nupui tur in a thik lo che em ni,mi pà ni mai tawh tur rawn inphurh tir te chu a” awmze nei deuh a men kual ralh pah in Rinkiri chuan a ti a, engmah lah hi an hre ve silo a.

“Nupui a nei dawn tih thu ka va hre velo ve,bak ah Kan veng a in ang a,kan in phur satliah ve mai mai a nihkha, buai na tur a awm loh chu’ tiin ka kalsawn hmak, min thik vang bak a nilo, sir Opa bike a chuan theih na chance nei se vli hian a bawh pelh phal dawn lo tih ka Chiang ve e mai,kan in ngaizawng a ni tih hre ngat phei se chu, min rél nasat lehzual bak ah mit pawng zawrh zawrh khawp in min melh rum ziah ang .

Ka thian ten min lo nghak ka hmuh chuan an lam ah ka tlan thuai a, zan lam ah ruah a sur vak a vang khan khua a la hnawng deuh a, kawng nàl lai ka rap palh ta,ka balance hloh in ka thian te lam ah chuan ka tlan pur pur a, kawng chhuk lai ber kher a lo ni bawk nen speed chu chak duh tak a ni, “kha min lo man ru! Ka ding thei tawh lo a nia!” Tiin ka rak chúl a, ka sam a phe lawp lawp mai, ka thian te chuan nui chung in min man beh in ring tak in an lo awm a, an bul ka thleng chu Hluzuala ka bawh rawp a, Kan tlu tur chu Saivula leh Ringheti’n min lo man hman hram, “i lím puat puat a, fimkhur tak in kal ve thin ta che, hmai vaw chawrh in rawn tlu la chu i hai chhawlh ang” Ringheti chuan a ti nghal barh barh a,mahni lo mah a hlauthawn ve nak lai a .

“Ti khan min ti kher Suh, ka balance ka hloh laklawh a nihkha” ka ti let khar khar, “i na em?” Hluzuala zawk chuan a lo ti a, “na lo, ka lung chiah a Phu rang” ka tih Chuan a nui hawk ,”i nat loh chuan a that chu,mahse ka rin aiin i lu a chang,ka áwm i tauh na lai hi a auh in ka hria” tiin a áwm a dawn a ,a then sak bawk , ka speed kha a chak ve ang reng si a, ka tauh na tak tak a nih chuan a pawi ngawt ang, “khawimaw ka lo en, khawilai tak hi nge nà” tiin a àwm chu ka khawihsak a, chutia ka va khawih mai chu a ringlo ni tur a ni ,a Phu zuk lehnghal, “sawi teh khawilai tak hi nge na, damdawiin ah kal ila” ka tih leh lai chuan ka kut chu a lo man a, a mah chu ka en chho nghal hàw mai, Chiang zet in min lo en a, min en reng chung chuan “helai tak hi a na’ tiin a thin zawn ah ka kut chu a dah a, ka irh awk ringawt, hetiang thil danglam deuh a thlen hian ka irh ve ziah.

“Ti khan i hrethei em ka lungphu kha” a tih Chuan mit ka khap fak fak, a lungphu chu a rang hle tih ka hria, hrethiam lo tur khawp a mi mawl ka ni bik lo, chuvang tak chuan nuam ka ti lo, ka kut chu la let in, “i nat lutuk loh chuan a that chu, nakin ah na i neih chuan min hrilh dawn nia” ka ti ta daih. “Kal ang u tan a hun dawn”, tiin ka in her a ka kal nghal daih bawk, Hluzuala hi mipa hmeltha tak leh fel tak a ni a, a hma pawh a ka sawi tawh ang khan sir Opa aiin tawng hmasa ni ta ila chu ka hnar kher lo ang, mahse a ni aia hmasa an awm zawk tlat si a,  thian kan ni a ka ngaihzawng neih chungchang pawh hre vek tu a ni,a feelings te a control ve nasat zia pawh ka hai lo, mahse a in control zawh loh chang a thlen hian ka tan a nuam lo thin,a ni pawn nuam a ti bik in ka ring lo, ka lak a a feelings te a bo hma chu in kawm tam loh ka duh, a tu ve ve tan pawh a nuam lo ru riau.

Rin ang ngei in class kan lut chu  Vli te thian ho in nui pat pat chungin min lo melh ralh ralh a, midang ho in min en ve dan atang sir Opa nen Kan inphurh chungchang kha class pum in an hria tih hai rual a nilo,mahse pawi ka ti lo , kan class a mi te hi chu ka ngam vek, vli te thian ho tih loh chu rilru kher mei pu an awm lo bawk.

Sir opa a lo luh chuan hmeltha ti zet in ka en leh ngawih ngawih tawh,”ti khan en ngawih ngawih zel Suh, mi zawng zawng aiin bialpa i nei” Rinngheti bawk in a ti leh tawh,henu hi chuan min khak reng mai a ni, “a ho emai official tak in ka bialpa a ni tawh a,duh leh mitmu chhuak púr pawn ka en a nga,” ka tih Chuan a chek hlak.

“Léé.. nangni ho nen Kan la in hrawn reilo hle na chung in in professor ang a ka rawn kal hun chu naktuk thleng Chauh hi a ni tawh dawn a,chuvang chuan naktuk ah in thlahna ang reng deuh kan nei dawn nia aw” sir in a tih Chuan che chàng lo in a mah chu ka en tawp, tinge eng mah min hrilh loh le, college ah nitin kan in hmuh thin ang khan Kan inhmu thei tawh dawn lo ringawt pawh chuan min ti hnial rawih thei, kal rual a haw rual leh te kha a nuam a sin le, ngawi reng a ka en lai chuan a ni pawn min rawn en ve a,tawité in a nui a,ka nuih let ve lo,a tello a college kal chu ka huphurh takzet.

Midang ho pawh in an ui ve hle a niang an phun nang nang hlawm , sir Opa hi a fel mai bak ah a thiam a, a mah a lo hmeltha teh vawr bawk nen a bik in hmeichhe lam in an ui lehzual khawp ang, tun atang Chuan nitin hmel chawhnu deuh deuh hlir in min lecture leh dawn a nih hi.

Zan ah u mama chhuanlam in a rawn leng a, inchung balcony ah thu in kan ti ti mai mai, “tinge naktuk thleng Chauh college I kal tawh dawn tih min hrilh loh a” lungawi vak lo chung in ka ti a, “surprise che ka duh a” ti a min chhan chuan, “aw, i hlawhtling min surprised Chiang khawp mai, min surprised leh lutuk a ka meng bial kawk kawk” uar zet in ka ti a, a ni erawh a lo nui hawk thung, ka kut ka malchung a ka dah chu la in a tuai zui hauh hauh a, thinrim laklawh lai mah nise a nawm na a bo Chuang lo.

“Tak tak a,nizan ah keipawn ka hre Chauh a,Pu Muana kha a rawn kal thei tawh dawn a ni awm e, min rawn hrilh tlai ang reng bawk si a, hrilhna hun che a la awm lo a” a tih Chuan ka thinrim a reh chawpchilh nghal, “chutiang te chu Sir.Muana pawh in hrilh hma tur a lawm ,a ti ang lo é” ka ti niah niah, a kal hman tawh dawn ni a a in hriat te chuan tun aia hma ah in thawt lawk ve tur a nia, chawpchilh deuh in a hrilh a, sir Opa tan pawh a hrilhhai thlak ngawt ang.

‘Chuan e nge tih I sawi ang, college ah I rawn kal tawh loh chuan’ tiin ka zawt a, “ka hrelo le,kan khua ah reilote chàm tur in ka haw phawt a nga , zirtirtu lam bawk hi ka try leh ka ring” a tih Chuan ka lo bu nghat nghat, ai kal ringawt ai chuan a pangai in a tha zawk.

“In khua ah chuan ka kal ve chak hle mai” ka ti sep a, dik tak chuan college a nitin a lo kal tawh lo tur pawh tih nak lai a,an khaw lam a a haw lehzel phei chuan ka lung a leng ngawt ang, ka kut la tuai hauh hauh chung hian “lo kal ve mai la” a ti a, keima thu Chauh chu nise “yess” a ni nghal ang,mahse keimah ah hian kei aia thu zawk an la awm miau si a, mipa an khua a zui haw chu an rem ti hauh lo ang.

” Ka chhungten an rem ti lo ang” ka ti a, karthar hi kar tluan a kan chawlh dawn tho avang in zin khaw thawn nan chuan duhthusam a ni,mahse sawi tawh ang khan,keimah hi keimah ah hian ka thulo ve em a ni.  “Lo kal ve thei la ka ti,ka ngai dawn che” a ti ve nuah nuah a,in hmuh loh reng chu a ni pawh a hreh ve ni in ka hria, thildang Kan sawi zawm tawh rih lo a, naktuk friday a ni tawh a, nithum chiah in Chhamphai a haw chhoh loh na a dang tawh.

Chutia ngawi reng a kan thut dun lai chuan ngaihtuahna tha deuh ka nei thut,”ka hria!” Ka ti hluai a, a Phu zawk lehnghal, ka kut a vawn na pawh a thlah lo chauh, “ka u hi zin ve tur in sawm la, a ni a lo tel ve chuan ka nu ten an phal hrim hrim” phur sarh in ka ti a,u mama hi chu tu pawn an ring tawk a, a bik in ka nu leh pa in, “ni dawn tak, a ni pui hi lo kal ve se a tha ang” a ni pawh in a ti ve hluai a, phur dun tak kan ni.

Kan ding hluai a, ka u room lam chu in ráwn ngai miah lo in kan pan rual a, Kan luh ve leh “u karthar hi Kan chawl a, zin dun ila unau in,unau a zin dun pawh Kan la nei velo a “tih zawng in u mama chu ka thlem a, “Op Champhai ah i haw dawn em ni?” Ka zawh na pawh chhang lo in a ti daih a,Kan pahnih chuan min rinhlelh hmel deuh in min melh dun ralh ralh bawk, “nia,ka haw dawn” sir Opa pawn a lo ti ban charh . “A nih chuan ka peih lo,nang ni vang mai mai a, Champhai khaw vawt a kal ka peih reng reng lo”u mama chuan a ti tlat a,ka van ngei reuh tak.

“Unau a kan la zindun Miah loh vang a lawm” ka tih ve pawh chuan,”zin dun I chak viau chuan vai ram ah law law zin dun ila, khing lai Champhai vúr zing ah eng mah tih tur Kan neilo ” a ti leh hmak a, ka u nilo ngat se chu min chhan dan vang hian ka sual tawh maithei a ni.

“Mawhh! i nau ka nih hi,i tello in ka nu ten an phal dawn hleinem” pangchang deuh tak a ka tih leh chuan, ” àww! I u ka nih hi,ka tello chuan ka nu ten I kal an remti dawn lo” ka tih dan thluk chiah in a ti ve a,ka melh rum pán pan tawh, “Lianzeding ka hne aw” ka tih hluk tak ah chuan a tho hluai a “engtin maw tun ah khan min koh a” a ti a, min rawn hnaih deuh bawk,a hming hi thing a ti ém a, chu vang a mi zawng zawng mama lo ni ta pawh a ni, a hmingpum a koh hi a duh ngailo, ka thin a rim zual chang Chauh in a hmingpum in ka ko thin ,ka chal ah a pen ngei ngei bawk.

“Sawinawn leh teh, engtin maw tun ah khan min koh a!” A tih leh chuan , “Lianzeding ka ti che,I hming a nilo a mi, Lianzeding,Dingpui,Liana,Ze-a Lianzeding phen phún” ka ti zat zat a, a thinrim hmel ngang mai, “i u ka nih,u te zah nachang hrelo” tin pah a min lo pan a tum chu sir Opa’n a lo dang a, “pawn ah in be lawk ang” tiin u mama chu a chhuahpui daih a,u mama hi fel viau mahse a hmingpum a ka koh hi chuan kan ri hluai ngei ngei, in hnial satliah te chu nei ve fo mah ila a hmingpum a ka koh loh chuan a thinrim em em ngailo, min duat a,a mah a fel in mi thinchhe lutuk tih tur a nilo bawk nen, a Rik ve hluai tawh hi chuan a pawi ka sawi nasa hle a ni tlangpui.

Ka rin aiin an rawn let har a,eng tak an ni thian dun chuan va sawi ang maw tih te ka ngaihtuah a, ka awm hle hle thei lo, dik tak chuan Champhai a ka bialpa ka zui duh vang mai a ka u ka hnial chiam kha dik ka in ti bik lo, an chanchin ngaichang ran a ka awm lai chuan sir Opa’n min rawn call a,ka la rang viau “keichu ka haw tlang ta mai,lo hnial pung pung tawh lo la, zin chu a pawi tih loh kha aw, a tir ah a fiam mai mai che a,nangmah zawk kha i páwr hmasa hluai a nih kha” a tih Chuan ka thaw hak ,”min fiam tih ka hrethiam hleinem, a kal duh chuan a that chu,ka nu te pawn an phal ang” ka ti a, ka hlim leh vur vur viau tawh, u mama hi ka lak ah a strict loh vang a nilo a, thalai ve tho a ni a,Kan awm dan tur min hriatthiam pui bak ah, Sir Opa hi a thiantha ve ber a ni bawk nen,kei hi a nau mah ni ila , a thianpa sawm na a hnawl sak hreh ve tho dawn tih ka hria,bak ah a hmuhphak loh a ka awm ai chuan a hmuhphak a ka bialpa ka hmuh hi a duh zawk dawn hrim hrim,Champhai ah chuan bialnu tur fel deuh zawn sak nghal ila a tha ang.

Sir Opa nen Kan inbiak zawh chuan,ka u room pawh a ri rak a, a lo thleng chiah a nih hmel, a room lam chu ka va pan dek dek a, kawngka dim te a hawng in ka bih thla hmasa phawt ,a thinrim tawh em lo ang chu maw,khum ah phone en chung in a lo thu mu deuh a, min hmu lo emaw ka tih lai in “rawn lut hle hle rawh” a ti fiah fak a,keimah zawk chu ka Phu zawk thei, “englo a nia u, nichin kha ka tihpalh” tiin ka panhnai a, min melh rulh ringawt, “chuan zin i duh vangin ka lawm bawk” ka tih leh sep chuan a bu nghat ringawt a , a la lungawi famkim lo a nih ka ring,pawilo a lungawi thei nan chuan nitin a room tihfai ngai pawh nise ka ti mai ang.

“Va mu rawh,naktuk ah keiman ka nu leh pa ka lo hrilh ang” a tih Chuan ka thaw huai thei, “keima u bik bik lal u mama, i fel bawn aw, mi u te ka mamawh bik lo reng reng, i fel ber” tiin ka nuih tlawn vel a, min ei loh hmel ngang mai,kei erawh lawm vur vur tak ka ni, karthar ah sir Opa te khua ah Kan zin dawn ka phur tawh lutuk hi zanin atang in siam láwk nghal mai ka duh.

Conti…….

Leave a Reply