You are currently viewing Chimawmpa Zûn 15

Chimawmpa Zûn 15

Spread the love

“I lo hmu em, min zah der na chhete mah a neilo a nih hi, nangpawh a zahloh che tih a chiang reng” Teremi chuan a lo ti leh hlak hlak a, Rinngheti ai pawn a tawngthei zawk, a rilru a chhe tel bawk si, hmel a that loh pawn rilru tal tih that tur a nia,henu Teremi hi chu a hmel mai bak ah a rilru pawh a chhe tel a nih hi.

Opa thinrim insum chu a taksa a tang tung tawh, Teremi hi mipa chu nise a hnek chawrh tawh maithei a ni, “hetiang a ka bialnu zahna nei miah lo a i khawsak ai chuan Aizawl ah chhuk leh vat rawh,i tello pawh khan Kan khawsa thei lutuk” u Vala chuan a ti leh fak fak a, a tawng nà ka ti,  “Lalthanmawi i nau khatiang khan tawngkhum Suh” pa ber in a rawn ti ve ta thak , Opa la melh rum viau mahse u Vala pawh a ngawi rih a, “kha,khatiang kha a nia,he inchhung ah hi Chuan nang leh kei hi chu Kan leng ve thlawt lo a nih hi, i nau a nia zilh pawh i zilh ve thei lo chu a nia, he in ah hian chan  engmah i nei ve lo,engkim hi i nau chan vek a nih hi” Teremi zawk chuan a ti leh hmarh hmarh a, a thisen a sang ka ti ngei mai, u Vala hi chuan Teremi a duh na vangin a thil engmah a hrethiam lo a, mahse keini erawh in u vala a pam kual dan chu Chiang tak in kan hmuthiam, henu hi hmeichhe tha tak zawng a nilo tawp mai.

“He in ah hian kan leng lo a nihchuan Kan chhuak ang, a tha em, in chhungkua a hlim tak a in awm theih na tur a nih chuan kan chhuak em em ang” rin ang ngei in u Vala thinrim chuan a ti ta a,ka thlaphang tawh lutuk ringawt mikhual mai Kan ni bawk si ,kan hun tawn mek chu nuam lo tak a ni, “Teremi hi ka nei dawn, tuman engmah sawi buai suh ang che u” ding hluai chung a u Vala’n a tih Chuan Opa chuan  ,”thaibawih tur rim i nam tlat” nui huk chungin a lo ti a, u Vala huat tawk a tling lutuk ringawt “eng maw i sawi kha” thinrim zet a u Vala’n a tih lai chuan dawhkan a ri bur a, ka phu nasa lutuk chu ka eu awrh thei ,”Lalthanmawi thu nghal rawh, i va zaklo em em ve,in nu leh pa te dawhkan kil in kan thu tih in hmu lo em ni,in mit a del zawk em ni? Nu leh pa zahna nei lék lo a àw rawl ring in han chhuah chule! Tu man Teremi hi nei Suh nei rawh kan tilo,in awm dan mawilo kan sawisel mai a ni,mipangai i nihchuan hrethiam ta che, chuan Terem nangpawh kan inchhung ah hian mó em pawh i la nilo a hmeichhe tan a mawi leh mawi lo chu thliar thiam ve tur,in khawsak dan hi a zahthlak zo zai tawh lutuk, in duh dan dan in awm rawh u,” pa ber chuan a ti ta hrep a, Chaw pawh ei zawm tawh lo in a tho zui hmak bawk, chhun lam a nuam kan han tih barh barh nen, tlai lam ah ve thung chuan boruak a in thlak hlawk a ,nuam lo tak a ni.

Chaw ei pawh a tui tawh lo, kan tho pheuh pheuh a, reilote ah kan puar  vek, thlengsil ka chuh a, Rinngheti leh Sangbawihi’n hmun an ti fel thung, “u Teremi rawn lan ve hma chuan kan chhungkua hi a nuam asin,u Vala pawh a fel lutuk zu pawh a in ngailo, min duat bawk,tum ah pawh min duat tho mahse u Teremi hian min thik thin a, u vala pawh hian min khak leh fek fek a chin phah,u Teremi hi u vala hian then daih se ka ti a nia àw, kan inchhung boruak a ti nuam lo” sangbawihi chuan a ti niah niah a,  ‘hmeichhe thalo chuan chhungkua a leng darh thin’ an lo tih thin hi a ni thei tak tak dawn viau in ka hria, hmeichhia pawh mipa pawh kan kawppui te a zir hian kan danglam thei a ni tih u vala ah hian ka hmu chiang hle mai,chu vang chuan a thalo lam ah chuan kan kawppui thu kan hnial a ngaichang te a awm a nga ,ngaihtuahna fim kan hman thiam a ngai hle ni in ka hria.

“Awm loh na lam apiang ah hian min sawi ang sep sep a, mahni dinhmun hi hriatchian ve deuh tur” choka a rawn luh pah in Teremi chuan a ti a,Sangbawihi chu a melh deuh bik kher bawk, mahni dinhmun a tih awmzia chu kan hrechiang vek hlawm in ka ring,sangbawihi hi a hmusit tlat, mó em pawh a la nilo a, a mah hian a dinhmun a hrelo zawk a nih hi, “mahnin in nei  ve lo ang mai a midang in a lo va in tih thu vak ching hi  an awm an ti” tawng ka tum lai tak in Ringheti’n a lo ti a, ka tawng túm pawh ka ngawi leh rih.

“Eng maw i sawi kha, min sawi chhan deuh em ni a?” Teremi chuan tiin Ringheti chu a melh tur khai a, “sawi chhan tur in i awm em ni, lo in ngaihbel Suh ,Kan tunlai khawvel dinhmun a lawm ka sawi” ngaihpawimawh lo zet in Ringheti chuan a ti leh a, Teremi chu a sen tawlh tawlh tawh, a mah a sawi chhan a ni tih tuman kan hai lo, “mikhual mai mai i nihkha hre rawh aw” teremi’n a tih leh chuan ka in sum thei tawh bik lo, midang a hnuaichhiah dan hi ka ngaihdan pel zawng a ni tlat , “he in ah hian mikhual ve tho i nihkha ,i dinhmun a danglam vak bik lo” ka ti ve hmak,min rawn en a, za lo deuh a nui in a sam a tuai thuak, “Aizawl ah haw vang vang la ti nia” a tih Chuan ka nui hak, “lo lungngai lo la,haw Suh pawh ti la Kan haw dawn, tu emaw ang a chàm hlen tum kan ni hleinem” ka ti ve leh ngat, ka duh phawt chuan ngeiawm ka chhuah ve thei Chiang e mai, midang zahpah na nei Miah lo hi eng vangin nge maw ka zahpah viau bik ang .

Min chhan ngaihna a hre tawh lo nge ni, a in her tau hmak a, choka atang a in per chhuak nghawng nghawng ,ka vawm zui pawp chak ngei mai. “Khatiang mihring zahtheihloh na aia zaktheilo leh chhawng kha chu han ti let ve ila an zum leh dúk zel tho, ka piai hlak chak a nia, zahtheihloh na farnu a nihkha” Rinngheti chuan a ti zui hrep a,kan nui dar dar.

Dar 7 vel ah tualzawl ah mei kan chhem a, thuthleng kan la chhuak bawk , kei leh Opa chu in si chet in kan thu a, arsi a tam in thla a eng tha bawk a, boruak chu a nuam ngei mai, “ka room ah guiter ka dah a ka han la lawk a nge, kan zai mai mai dawn nia” tiin Opa chu a tho a, inchhung a a kal hlan chuan ,”naktuk ah kan haw mai dawn em ni,boruak hi a diklo riau, mi chhungkua Kan chawk buai zo ang tih te reu reu a hlauhawm” u mama’n a ti a, Rinngheti te nen kan pathum Chauh in kan awm rih a, sawina hun remchang a zawng niin ka hria, “keipawh chu chu pawi ka tilo, a tir a ka phur ang in a nuam lo” Rinngheti pawn a lo ti ve a,keipawh in haw chu ka pawi ti hran lo, ka tan pawh bialpa te in chám ve reng kha thil mawi tak pawh niin ka hrelo, buaina neuh neuh a lo awm ve bawk nen a inthlahrun awm riau.

Opa a lo let leh chuan kan tum dan te ka u in a lo hrilh nghal mawlh mawlh a,Opa pawn kan dinhmun a hai bik lo a engmah a sawi nawi lem lo, mahse a ni chu kan rual in a lo haw ve thei rih dawn lo a nih hmel,u Vala vangin a tum aia rei a chám a ngai dawn a nih hi.

Dar 10 vel ah kan mu a , mut erawh a chhuak lo , whatsapp ah text in Opa nen kan inbia a,min ngaih tur thu a sawi reng mai, keipawn ka ngai ngawt ang, kan inngaihzawn atang kan awm hran vawi khat na tur a ni a, ka lung a leng lawk takzet, “balcony ah lo chhuak la” a tih Chuan “Rinngheti pawh a la muhil lo” tiin ka chhang a, ka u chu a muhil tawh a nih hmel, “a muthilh hun ah lo chhuak rawh ka hmu lo rei dawn che si” a ti leh a, tun ah dar 11 vel a ni tawh a, Rinngheti lah ig ah reels en in a la nui kur kur a,zanin tak ah e nge maw a menrei viau ni.

“I la muhil dawn lo em ni?” Ringheti chu ka ti a, “ka mut a la chhuak lo” a la ti maih mai, zan a rei zel a ka rilru a hmanhmawh telh telh, ka tho a,kan tui chhawp te chu ka in thil, “enge i zat ruai a,mu mai mai teh mit i ti kham” Rinngheti chuan a rawn ti hluk , “englo a lum ka tia” nui pha dai chung a ka tih Chuan,min rinhlelh hmel deuh a min en in, “pawn ah nghak tu che i nei tiraw” a ti ta a, ka nui leh huih ringawt, “huisss! Inthlahrun der vel kha a ngai lo, kal teh i ninawm i za ruai bawk si,rawn let har lo la” a ti ta hlauh a, a rang a rang in ka chhuak nghal.

Balcony a ka va chhuah chuan Opa a lo awm reng tawh,min hmuh veleh a lo nui var var a, a nui mawi deuh chu thla éng hnuai ah chuan a mawi bik lehzual niin ka hria, a bul a thu tur in min lo ti thuai a, ka thut ve rual in ka dar ah a lo kuah nghal a, a hma chuan ka zám in ka lai huih thin kha a nia,zanin erawh ka feel dan a dang, kan in hlat thuai dawn vang te pawh a niang, ka ngai a, ka thlahlel ngawih ngawih a ni ber, “ka ngai ngawt ang che’,zawi sup a ti in ka sam chhawlleng chu ka beng ah a zep a, a áwm ah min kuah bei a, a kawr chhan a a taksa lum ham ham mai ka feel rual chuan keimah hi ka kim bik riau in ka hria, mit ka chhing vang vang a, “keipawn ka ngai dawn che” ka ti ve sep.

Min kuah loh na lam zawk in ka kuttang a khal niap niap a, a thaw chhuak leh halh thin ,kei ang bawk in inthen hran a hreh ve a ni tih ka hria, “inthen hran ngai tawh lo in ka kiang ah awm reng tawh la ka ti” a ti a, “mahse ka haw a ngai sia” ka lo tih Chuan ,”innei tawh mai ang ,ti chuan a hrang a kan haw a ngai tawh lo a nga” a tih Chuan ka nui hak a “pasal neih pawh ka lo tum hleinem” ka tih Chuan a rum dat a, “tum tawh rawh” a ti nghat a, a àwm ngheng in ka nui pat pat.

” Tak tak a, BA pawh ka la zir zo silo a, pasal nei thei ka la nilo a lawm,ka la naupang si,bak ah vawikhat kan in then hran na tur chauh a nia, Rinngheti’n hre phei se chuan min fiam nan a hmang leh nasa ngawt ang” ka ti a, min fiam leh duh tak tak pawh ka ring,over min ti dun leh ngawt ang chu. ‘a nih i lo lerh vaih,Rohluzuala bul hnai ah khan kal pawh kal Suh ang che” a ti a, Hluzuala hi a thik tlat a a buaithlak a nia,ka duhlo tih a hre reng tho sia.

“Ka thianpa a nia, a bul ah te chuan ka kal ve ang chu” ka tih Chuan min kuah na ti thawl deuh in min melh run a, “thian piah a awm chuan in pahnih in a letling in ka khai ang cheu,hre reng rawh,a letling zawng a Chaw ei i duh loh chuan mipa bul hnai ah hrim hrim tam Suh” a ti a, a uang emaw tiin ka nui hak a,mahse uang hmel pawh a pulo,ka nui tawp leh riai riai, “min van ring lo tak, thlamuang deuh in keimah ah chuan awm rawh,nangmah zawk hi a nia ngaihtuahawm chu, be tu che a piang i lo biak that vaih chuan Champhai ah sawisa tur che in ka rawn chho vang vang ang’ tiin ka kuttum ka hmuh a, ka kut chu la kang in a lo fawp zeuh , “i rin ang in ka lerh lo hei hi hman a ngai lo ang” a ti a, kan nui dun hak hak, “spy ka dah dawn a nia, fimkhur hle ang che” ka ti leh hram, kan luh hma in uluk fahran in kan in fawp a, zanin hi ral thei lo se ka ti ngawt mai.

Chelh din rual loh in zan hun a ral a, zing khawvár in kan inthen hun tur a rawn chhuah pui a, a mah nen a kal kha ,a mah nen bawk kan let leh dawn emaw ka ti a, a tello a ka let a ngai ta sia, engtik thleng nge Champhai ah a chàm dawn ka hrelo, Aizawl ah a lo chhuk tawh lo maithei bawk, u Vala a laktlak siloh a a nu leh pa a ngaihtuah ve tho bawk nen,ka dem hauh lo, lung erawh a leng viau dawn thung.

Opa kan rual a a haw theih loh tur hre lawk ni awm tak in kan kallam khan Kan motor zawk kan keng a, kan keng sual lo chiang khawp mai , midang zawng chu inhnuai lam ah an chhuk tawh a ,kei leh Opa erawh inchung ah kan la awm a, “chhuk ila rei min lo ti lutuk ang’ ka tih chuan, “aizawl hi bo thut se” naupang chhia zet hian a ti a,ka nui tawp ,a kut ka va vawn sak rual chuan hmui ti pawrh zeuh in min rawn en a, a duhawmna hi ka hmu chho mawlh mawlh chu a nih hi,ka ngai ngawt ang he chimawm pa hi.

‘kan inhmu leh vat dawn a lawm,upa zawk i nihkha” tiin a biang ah ka dawm,a lo thaw hak “a chang hi chuan kei aiin i upa zawk a ang thin” a ti a, mipa hi chu an rilru a puitling har a, chuvang chuan hmeichhe tan chuan mahni aia upa hi kawppui a neih a tha e,an lo tih thin chu ka hrechhuak zawk mai,Opa pawh rintlak in puitling viau mahse, naupang chhia tak a awm chang a nei thin a, a chang chuan keimah zawk in ka hnem chang a awm bawk, mipa hi mipa an nih avang ngawt in an rilru no thei lo an nilo a,hmeichhia ang tho in an mittui pawh a tla ve thin, an kawppui te lak ah pangchan chang an nei ve fo va, mahse chungte avang chuan mi puitling lo leh innghahna tlak lo an ni tih na a ni lo , mihring ve tho an ni a, emotional chang nei ve thei tho an nih vang zawk a ni.

“Ka hawn daih dawn che mawnle” nui chung a ka tih Chuan,”i luggage ah khan min khung bo daih la,ka chhungte hmuh loh in min Hawn daih mai rawh” a ti a,kan nui dun leh rih, “kan rei lutuk,chhuk tak tak teh ang” ti a kal mai ka tum chu min pawtlet thut in a àwm ah min kuah bei a, ka lu a chul pah in ,”ka ngai dawn che,ka hman hun apiang ah ka lo be thin dawn che nia,min ring la,keipawn ka ring che” a ti a, ka kuahlet vang vang, a rim pà hrak mai te hi ka hre khat tawh dawn si a, ka theih lai hian tam tawk a rim hip ka duh.

Kan in thlah rual chuan ngaihtuahna that ka nei thut, “khawimaw i kawr haklai hi phelh teh” ka ti hluai a, “eng vang in i ngaihtuah na a hmul” min lo ti hmanhmawh, “phelh mai teh” ka lo ti hlak thung, min melh rulh rulh pah a phelh a tum chu , “lawk, room ah VA phelh rawh thawmhnaw dang rawn ha bawk la, i kawr hak lai kha chu i rawn kengchhuak leh dawn nia” ka ti a, “e nge maw i hriat reuh le” ti nuah nuah chung in room ah a lut a, a rawn chhuah leh chuan, “eng atan nge ka kawr hi i tih” tiin a kawr chu minpe a, “ka lunglen zual chang a hnim ah,ti hian su Miah lo in ka dah reng dawn” ka tih Chuan a nuih a zat hmel viau mai.

“Khawi i kawr rawn la ve rawh” a ti a, “a ngai ve kher lo” ka lo ti thung, “ngai e,ka ngaih chang che hnim ah ka duh ve a” a lo ti ve a,lan nui dun hak kan van naupang chhuah tak, Kan kawr ve ve kan inkawl thleng dawn tihna a nih chu.

Kan kal dawn tak tak ah meuh chuan ka hnim ruih mai, Opa erawh a hmel ah danglam a awm hran lo, min en in a kut a vai zauh a ,”ka lo bia ang che” a tih a ,ka lo bu nghat, “kha hei hi ,haw kawng ah in ril a tam ang,kawng a hlat tham si” tiin nu mapuii’n motor ah eitur a rawn dah theih a, “a ngailo” ti mah ila ,min hnawn lui tho, “tluang deuh in in kal dawn nia” Opa pawn a lo ti ve a, an ni nupa pawh hi an ngaihawm dawn khawp mai,an fel si.

Kan kal dawn tak tak ah u vala te zing leng an rawn haw a, “tluang deuh in kal ru” u Vala’n a tih laiin Teremi erawh in rum zet in min melh a,henu nen hian in khat ah Kan mô dun a nih chuan kan pui khawp ang,kei in ka hlau dawn bik der silo a.

Kan tlan liam dawn thleng in ka lehhawi a, a dinna ngai atang Opa’n min la thlir reng, kawi ah Kan liam chiah tih ah message ka dawng a,Opa hnen atang a ni, “ka ngai nghal che ka Black Hole” tih hi a lo thawn, ka ngai che tih thleng chu lungleng deuh in ka chhiar a, a tawp a black hole a rawn ti kher chuan lunglen a hnawt tiau , “Chimawmpa” tih chu ka thawnlet a.

Conti…..

Leave a Reply