You are currently viewing Deborah-i Kha

Deborah-i Kha

Spread the love

“Thanpui lo ding teh”ti a thaw hlawp hlawp chung in Zorini chuan min rawn um a,ka bul a rawn thlen chuan a khup dawm meuh a thawk la halh halh phawt in,a dinmar leh te te hnu ah ” Ramthara te huan a riah chu i peih ve em, i haw vut sia I ngaihdan I sawi ve silo a” tiin ka chhanna nghak chuan min en ran, “ka u in rawn hmanhmawh deuh rawh a tih vang mawle, tih tur Kan nei a, riah chu ka peih a lawm, naktuk em ni riahluh in sawi hun kha” ka tih chuan a chhanna duh tak ka pe tih hriat tak in a hmel a phur nghal sarh mai, “aw, dar 9 vel a chhuah kan tia,kan in hrilh kual leh hlawm dawn nia,lo in peih har lo la aw” a tih chuan ka lo in peih hma tur thu te hrilh in,kan in then hrang ta a.

Ka u in min lo nghahna hmun ka thlen veleh bazar lam min pan pui nghal “ka nu in chawhmeh rawn lei haw rawh min tia, lei tur ka hrelo,nangman thlang rawh” a ti a, ka thiante ti ti pawh ngaihsak tha hman lo a min lo tur ve sek na chhan chu ho ka van ti tak, mahse ka phunnawi lem lo, chawhmeh Kan lei zawh hnu ah Kan unau chuan in lam ah in zui haw in ,ka nu in rawng a lo bawl peih vek tawh, “nu naktuk atang tunkar chhung college Kan chawl dawn a, chawlh hmang in Ramthara te huan lam ah thianho a riah Kan tum a,” tiin ka nu chu ka hrilh a, “Ramthara te huan chu a hla viau lo em ni?” ka nu chuan a lo ti , “hla ve tho,ti ila a hla em em lo, tuivawl kai kha a nia, motor a lut thlang thei vek bawk, bridge atang an thlam a hla lo,” ka ti zung zung,ka kal ve a phalloh mawlh chu ka hlau,ka pa chuan a phal dawn sa a, ka nu ber hi khirh ve deuh tur chu a ni mai, a ni pawn min hnial ka ring em em chuang lo, “engzat nge in nih dawn” ka nu chuan a ti lehzel ,a dilchhut dawn tih Chu hriat sa, min ngaihtuah thin em a ni “Kan thian ho a ni mai,”ka tih Chuan ka nu chu a bu nghat nghat, “zan thum aia tam chu Riak Suh u aw,ram pa laileng ah naupang an tangkhang rei lutuk ngailo” a tih Chuan ka ner nang nang, college ka zir chhuak ve tep tawh a,Kum 20 ka pum tawh bawk,ti chung hian ka nu leh ka pa mit hmuh ah chuan naupang ka la ni tho, ‘nu leh pa mithmuh ah chuan Kum engzat pawh ni ila ,naupang Kan ni reng thin,min hmu puitling har a,min hmangaih vang zawk a ni’ an tih hi chu ka hre fo thin,mahse mahni tawk a in lak puitlin ve tawh si hi chuan naupang chhia ang mai a min la en hi chu ninawm chang a awm leh thin, nu ka nih ve hun ah ka nu leh pa feelings hi chu ka hrethiam ve Chauh in ka ring .

A tuk ah chuan keini thian ho pawh tuivawl kai a Ramthara te huan lam pan chuan kan in khalh liam a,
thian ho ngang Kan ni bawk a,Kan thawm a ring in , a hmun thlen hma atang reng nuam Kan ti thla nghal em em, Kan thian ho hi paruk ni in mipa pathum leh hmeichhe pathum Kan ni,tumah in ngaizawng kan awm lo a, chutih rual in kei leh Zothana inkar ah erawh boruak in mung mek erawh a awm thung, a tu ve ve mah in sawichhuak lo mah ila Kan chetzia leh mitmei erawh in eng emaw zawng a sawi Chiang alawm, tuivawl kai Kan thlen chuan motor atang chhuk sap sap in ,hmeichhe ho chu bridge ah thla la nghal sap sap in,a hnuai a lui luang tlang te chu en in Kan ri chel chul mai, motor tha tak a an dah rem hnu ah mipa ho nen Ramthara te huan lam chu Kan pan a, an huan hi bridge atang a hla lo ka tih tawh kha, motor luh theih loh na chin ke a tlem kal ngai erawh a awm a ,chupawh minute tam kal a nilo,Ramthara te thlam atang bridge chu a lang thei vek a ni . Thlam Kan thlen chuan a hmun a rem in a zawl bawk a ,nuam Kan ti hle, nul an tui hmel tak tak te chu an lo dawng hluah mai a,keini nul hmun nei velo tan chuan hmuhnawm tham a ni, Kum tin a nul hmun nei an nih avang in Ramthara te thlam pawh an sa tha viau a, thenkhat chuan a chhuat lei ring a an sak mai laiin an ni thlam erawh a chhuat pawh thingphel ni in, a bang ah pawh a then rangva,a then lai tile te an ni, khum pangai a awm lo a ,chutih rual in nampuk Lian tha tak an Siam thung ,tah chuan kan vaiin Kan leng vek ang,in pangai ang tak a khawr pum vek ni mahse tukverh Lian tha tawk tak hmun hnih lai ah an hawng a ,thlam chhung chu a uap churh lo,tukverh atang a chhuah mai theih hian leihka ang deuh hi an Siam bawk a,thi thaw dawn nan chuan duhthusam a ni.

Kan chhuak hma bawk a a la hma ang reng hle, “tlai chawhmeh atan Sangha ei a va chakawm ve,Kan thlang deuh a suar khu zuk vawm ang u,Sangha in a duh khulai khu” Ramthara chuan a ti a,Zothana leh Nunsiama pawh an phur ngang mai, “hmeichhe ho kha chu in duh leh a chhak deuh lui Kan ah in lo awm mai dawn nia, in rawn kal ve duh chuan” Ramthara bawk chuan a ti leh a, keini pawh mipa ho bul a kal ve chu Kan duh avangin Kan tho ve nghal sap sap. Mipa hi chuan an thawmhnaw an hlip sap sap a, Kan bul ah an rawn vawmkhawm tawp, boxer nen Chauh a Zothana awm ka hmuh chuan ka sa pup pup thei in ka hria,ka lo lai ve ringawt,melh pawh ka melh tha ngam lo, Zothana lah chuan ka awmdan chu hrethiam ni awm tak in min nuih ang suk suk lehnghal, Kan thlang deuh ah mipa ho chu an chhuk a,keini pawh in lui thuk lo lai chu dai in Kan infiam a Kan nui ring ngang mai, mipa ho pawh Kan hmuh phak ah tho an awm avangin an ni lam chu ka hawi thla leh zeuh zeuh thin, an duhtawk an man ta nge mipa ho pawh Kan lam pan in an rawn inzui chho ta a,an Sangha man Kan han hmu chu Kan ri le lu mai, “awi a tui dawn lutuk,tuivawl Sangha hi chu phai Sangha hi chuan a tluk hlawl lo” Zorini chuan a ti chul a, Kan ei khawp zan chu an man e, rei pawh awm zui tawh lo in thlam lam ah Kan inzui leh ta diah diah a ,rawngbawl a lo hun ve tawh bawk nen ,rawngbawl in Kan che nghal sang sang,Kan in daih bawk a,thil tih a sawt viau,rawngbawl velo ho in thing tuah te lo fawm khawm in ,antam zan a tlak tur sik tawk Kan awm bawk, zan dar sarih vel ah Chaw Kan ei ve thei hram, an ni Ramthara te hian solar inverter tha deuh mai ram ah hian an dah a,pakhat dang Kan ken belh bawk nen zan ah pawh Kan eng tha pap pap hle.

Chaw eikham a mut nghal mai chu Kan peihlo tlang bawk nen, playing card Kan ken chu phawrh in chhuat ah puan kan phah a,tah chuan thu bial laih in card chu Kan deng a, punishment awm Miah lo a card den chu ho Kan tih avangin a chaklo apiang tui in Kan ti ta a lawm,a chaklo ah ka tang thei si tui chu ka in ta tluk tluk a, zun a chhuak zing leh dawn mang e, dar 10 thleng rak card Kan den hnu chuan mut a chhuak ti tih der, “mutna Siam tawh ila,vawiin lam ah Kan tal hah bawk nen” Zothana chuan a ti ta hlauh a,mut mai chu pawi Kan tilo tlang a niang Kan che nghal sang sang, mipa ho chhak lam ah an mu a ,hmeichhia a thlang lam ah,kei leh Zothana chu a lai a mu Kan ni na in nampuk hi a zau tha bawk a kan in tawk lo. Rei lo ah hnar ri a awm a,ka thian te chu an muhil nghal  a ni der mai,kei pawh ka muhil ve tan dawn tih ah zun chhuak in min ti harh leh a, tui kha ka in hnem bawk a ka muthilh mai theih pawh ka ring lo, mahni a zung tur a thawh chu zan thim a ni nen,thian te an muhil vek tawh si,ka tho chhuak ngam chiah lo, ka insum tang tang a nga,muthilh tum ang tiin ka han maimichhing lui ngial a,ka muhil thei thlawt lo,ka zun lah chu a chhuak tulh tulh mai bawk nen,ka tai a puar lung tawh.

Tap a kan mei chhem ,nasa deuh silo a  la alh ve hlep hlep Chauh chu eng awm chhun ni in, thlam chhung thim lutuk tur pawh a zia deuh, a tawp a tawp ah chuan ka insum thei tawh ngang lo,ka thlang chiah a mu ,Ate-i chu ka han sawi che dat dat a, a rum tiah tiah a, in lek thawk in a thaw ri zui nghal sak sak, ka kai harh zo dawn lo ni a ka hriat avangin ka thaw hak nghe nghe, midang kaihthawh chu ka inthlahrung ve tho bawk nen mahni a zun mai chu tum in thawm dim deuh chuan ka tho them them a,  thawm ka dim viau emaw ka tia ,ka chhak a mu Zothana chu a rawn thu chhuak ve hlawl, ka phu zawk nghe nghe “khawnge I kal dawn?” Ti a min zawh chuan, “ka zung dawn” tin ka lo chhang ve mai, “ka lo zun pui ang che” tih leh thawh chu a rual ve nghal a, ka thla a muang deuh sawt, pawn lam ah in zuichhuak in, varenda/varanda a dap hmang a bual-in khawr pum ve at chhung ah chuan ka lut zui nghal, pawn lam ah chuan thla a lo eng in arsi an pe tiarh a,boruak chu a nuam tawk viau mai,ka zun zawh a luh leh mai ka tum lai chuan “tah sawn thu lawk ila” tiin Zothana chuan ka ban ah a rawn chelh a, a chetdan teh thut avang chuan che chang lo in a mah chu ka en reng, ka en reng avang chuan nuam lo a ti leh chiah lo ni ngei tur a ni ,ka ban a vawn na chu thlah in “ka sawi awmzia chu,eng lo a nia, va thu lawk ang” ti nuah nuah chung a a tukhum  hiat pah zauh in a nui put put, “tinge a tlai tawh hi” ka lo tih Chuan “Kan rei lo ang” a tih deuh tlat avang in, thlam piah deuh zawl lai a thing tuluang awm ruah lam ah chuan kan inzui phei ta a, thing ah chuan thu dun in “sawi duh I nei em ni,i neih chuan  sawi vat la” tiin Zothana chu ka melh ralh a ,”sawitur chu ka nei a ,mahse eng atang nge ka tan ang ka hrelo” a ni ve thung chuan a lo ti thung, “boruak hi a nuam tiraw, arsi a tam bawk sia,thla a eng bawk si” Kan thusawi in persan deuh a tiin van lam chu ka thlir ta daih, “min lo en teh” Zothana’n a tih Chuan a lam chu ka hawi ve mai,Chiang zet in a ni chuan min lo en a ,ka en veleh chuan nui suk in “ka awmdan atang hian I hrethiam tho tiraw?” A ti ta a, ka haihaih deuh na in ,ka hmangaih reilo “eng chu maw ka hriatthiam tur” tiin ka hrelo der tlat thung, a nui suk a,ka kut ka malchung a ka dah chu rawn la in a hum vang vang “ka rilru ang hi I pu ve tho tiraw?” A ti leh a, a mah pawh en tha ngam tawh lo chuan lehlam hawi pah in “I sawi awmzia ka hrelo” tiin ka nui ru put put,  ruk tak chuan nuam ka ti,a thusawi awmzia pawh ka hre vek ka hriat lutuk vang in ka lai zawk hle a ni.

“Thanpui ka duh che,nangpawn min duh ve tiraw,min duh ve thu han sawi teh” tiin ka in rinloh lai in Zothana chuan a lam ah min kuaiher a, Kan mit leh mit a intawng Chiang hle,zah hun a nilo tih keipawn hria in “aw,keipawn ka duh che”ka ti ve ta a,Zothana hlim hmel chu hmuh a nuam takzet, Kan boruak chu a engmaw nawm riau ,romantic riau in ka hre bawk ,chutia kan rilru te kan in hrilh tawh hnu chuan ka thawl ta huai ni in ka hria,in thil reng reng a awm a ngai tawh lo tur pawh chu thawven hawk na tham a ni, zan thim a pawn lam a awm reng chu a nih ber loh avangin keini pawh rei awm lo in thlam chhung ah Kan lut ve leh a, ka Thinphu in thum rawn tlut tlut chuan muthilh a ti har ve talh mai, ka in lettawn sek a, ka thianpa,a ruk a ka lo duh thin em em nen bung thar Kan Kai ta chu nuam tih vang in ka Mur chuaih chuaih reng mai, chutia ka inlet sek chu Zothana chuan ka awmdan a hrethiam a niang, ka kut chu a rawn chelh a,keipawh ka tal sek ta bik lo, ka kut a chelh atang a rei vak lo ah keipawh mutchhuak in min zem in ,mangram ah ka lut ve ta riai riai a.

Zing ka harh ve meuh chuan ka thian te dang zawng chu an lo tho vek tawh ,”ka van mutui em em,in lo tho vek tawh a” ti a ham bai bai chung in ka tho chhuak ve a, “keini pawh Kan tho chiah, Kan mipa ho hi an tho hma, var Tian atang khan an thawm reng tawh’ Ate-i chuan lo ti in ,a ni Zorini hmai phih zo chiah ni awm tak pawh rawn lut ve in ,”vawiin ah lenkhang zar an tum a, chumi chhung chuan thlam a thawmhnaw leh mutbu thenkhat hi lo su ang u,dah rei chuan a rinchhe ve duh e mai” a ti a,Kan lo hnial lem lo, muthu Kan ken ve tho avangin Ramthara te mutbu Kan kaipharh lo a , lo suk sak pawh chu a pawi hran lo, chutia hmeichhe ho in ro Kan lo rel ve lai chuan Zothana chu a rawn lut a, ka lai deuh nghal ringawt emaw ni, melh pawh ka lo melh tha ngam lo,a ni lah chu min melh zeuh zeuh in a nui ang ruh ruh a,ka awmdan a tibuai vek tep chu a ni, tiang te chuan Chaw pawh ka bar tha ve ngam tawh dawn em maw ni.

Chaw fak kham ah thingpui te in leh te te in ,mipa pathum pawh lenkhang zar tur in an chhuak a,keini pawh mipa ho chhuah atang a rei vak lo ah mutbu leh thawmhnaw thenkhat nen insu tur in lui kuang lam Kan pan ve hlawm a,ni a sa tha bawk a thawmhnaw pan lam ho chu a ro duh viau maithei a ni, “sahbawn Kan theihnghilh daih, thlam ah khan a awm” Zorini chuan a rawn ti hlut a, “ka han la leh ang,tikhan thawmhnaw kha lo ti huh Ula” tiin thlam lam ah ka thian te chu ka chhoh san leh,  sahbawn  chu la in Bluetooth speaker Lian vak lo Kan ken chu ka la tel bawk, ka thiante awm na lam pan a kal leh mai tum a ka in tintuah lai chuan, zan lam a Zothana nen Kan thutna bul a hmeichhe pakhat antam lo la ni awm tak hi ka va hmu a, tunge ni ang tih ka ring thiam mai lo, thlam ah tumah Kan awm lo emaw tiin antam chu a rawn la ni mai tur ah ka ngai,henglai nul hmun hi chu an mahni an awm loh pawn chawhmeh tur tlem a zawng la hi an awm leh nawk thin, chu nu lam chu va pan hnai deuh in “min lo hrethiam lawk” tiin antam la a lo kun mek chu ka va bia a,mahse ka tawng chu a hrelo nge ni a thil tih lai a chhunzawm mawlh mawlh tho, tlem a panhnai leh deuh hlek in ,”min lo hrethiam lawk” ka va ti leh a, chutah chuan ka tawng chu a hre ve ta a niang a thil tih lai chu tawp in a ding ngil a, hnunglam min chhawn tlat avangin tunge a nih ka hre thei lo, “englo,I antam lak lai neitu te kha Kan nia, ” ka ti leh a, Chunu erawh chuan min la chhang hauh lo,Chet pawh a che eih lo, a awmdan chu mak ti deuh mah ila, a antan ru lai ka man chian em avangin a che ngam tawh lo ni mai ah ka ngai, “antam hi I lo la a,mahse a pawilo,chawhhmeh tur a nih chuan, ” ka ti leh a,min la chhang Chuang lo, “khawilai ah nge in thlam a awm ve a” ka ti leh hram a mahse min la chhang lo cheu ,a che eih bawk silo nen a awmdan chuan ka ngaih a ti thalo lek lek tawh, a mah pawh chu ka va hnaih ngam chiah tawh loh avangin tlem tlem in ka tawlhhnung hret hret a ,ka thian ten min lo au ve chiah bawk nen “ka lo kal” tih pah in ka thiante lam pan chuan ka kal ta daih,mahse thlam ka pelh chuan ka hawilet leh hram a, kha ka hmeichhe hmuh kha ka hmu tawh Miah lo a nihchu, ka hawikual ngial pawn tumah ka hmu lo,ka hawisawn chhung kha  minute hnih pawh a la rallo a nia, chutiang hun lek a a lo bo daih chu mak ka ti takzet ,a biru a niang ti dawn ila hmuh theih chin chu zawl vek a nia ,biruk na tur awm ang a awm lo, ka thau ah min man ve deuh avangin chak zet in ka thian te lam ah chuan ka pen ta hlawk hlawk.

Ka thian te bul ka thlen chuan an ni Chuan thawmhnaw vel chu an lo ti huh Kim vek tawh, “hmeichhe pakhat in antam a lo la a,mahse a bo daih” tiin ka thil hmuh chu ka hrilh nghal a ,” I han man Chiang sia a tlanchhia a niang’ ngaihsam zet in Zorini chuan a lo ti mai, ngaihtha vak lo mah ila ka sawi zui tawh bik lem lo, insuk tur Kan neih ang ang te chu Kan su nghal mawlh mawlh a,pathum in Kan su bawk a rei Kan su lo,  “bridge ah khian han zar ang u,a ro hma deuh ang” Atei’n a tih avangin bridge lam ah in zar tur chuan kan inzui chho a,   thla pawh Kan la leh nual mai,lum ka tih deuh avangin keichuan tui a in chiah daih ka duh a,lui lam ah ka thiante pahnih chu ka chhuk san leh , an ni erawh in thawmhnaw pho veng pah in bridge ah thla an la la kual thung a, ka thiante pahnih ka hmuh phak reng avangin hlauhna ka nei hran lo, chutia mahni a tui ka hleuh barh barh lai chuan ka chhak deuh ah tui rawn dai ri ve bawrh bawrh thawm chu ka hria a,thawm rawn rik na lam chu ka en ta reng,chutia ka en reng lai chuan hmeichhe pakhat hi a rawn lang hlawl, ka lam chu a rawn pan zel a keipawn ka lo la en ve reng, ka bul a rawn thlen chuan “thiannu tu te nen nge in nih a,in riak ve tho em ni” tiin min bia a,”aw,thianho in Kan nia,nangni in riak ve tho em ni” ti a ka lo zawh let chuan a bu nghat a ,a nui var var reng bawk,a hmel en mai chuan a la upa dawn lo tih a hriat ,kei aiin kum thum kum li vel bak in a upat ka ringlo, “khawilai ah nge in thlam a awm a”tiin chu hmeichhia chu ka zawt a “khilai deuh ah khian ,keini pawh thianho ve tho in Kan nia” a tih Chuan ka hawikual deuh a,a thiante dang erawh an rawn thlengthla velo nge tumah midang ka hmu velo ,”hming pawh Kan la in hrilh Miah lo,kei hi Deborah Lalruatkimi ka nia,Debo min ti mai dawn nia” tiin a nui var var a,a nelawm phian mai ,a pian chu a in khai thli thlarh mai a,thau ti a sawi tur ni silo hian a khal reuh pian a ,a sam sen buang chu a in hmeh hle bawk, keipawh in ka hming te chu hrilh ve in, Kan ti ti dun luam a, a fel reuh phian lehnghal a mah chu ka ngainat chi tak a ni,  Zothana te pathum pawh Kan thlang lam atang an rawng lang ve hlawl a, hlat erawh Kan la inhlat deuh thung, “ka thian ten min lo ngaihtuah tawh ang,ka han chho ve dawn tawh a nge,keichu ka tawng duh sia ,ka lo tawng leh duah thin” tih pah in Debo-i chu a tho zui nalh a, “Khi lai lawk ah khian keini pawh Kan awm a, Kan in hlat loh chuan zan ah rawn leng thla ru aw” tiin ka au zui a , a ban a vai zauh a ,awka erawh in min chhang tawh lo, chutia Debo-i chho lai ka en reng lai chuan, “tunge I lo biak a?” Tih pah a ka dar a khawihtu an awm avang chuan ka Phu dawrh thei, Zothana lek lo ni in “min ti Phu a lawm” ka ti vak , a nuih hawk hawk hnu ah “tak tak in, biak nei ni awm deuh khan I awm a” thu tak deuh zawk a a tih Chuan, “khi ,khilai hmeichhia khi ka”ti a Debo-i kal chhoh na lam ka hawi leh chu tumah ka hmu tawh lo, “ehe,khawnge a kal hman a” ka ti chhuak hluai,

“Tu maw?” Zothana’n a lo ti vat “tah khian Debo-i tunlawk khan a chho sia, kawi khi a la thleng silo a,a va kal chak awm ve” tiin a ngaihna ka hrelo viau, Zothana’n ka dar a rawn khawih khan hla a la kal Miah lo, kawi lai a hla ve ang reng a ,a liam tur tal chu hmu hman tur chu Kan ni a lawm, “tunge Debi-i chu’ ti leh zel in Zothana pawh a hrilhhai tih a hmel atang Chuan a hriat theih “Kan chhak deuh ah khian thianho riak an awm ve a,chuta hmeichhe pakhat chu Deborah-i a nia,ka bul ah a rawn kal ve a,Kan inkawm reng a lawm” tiin Debo-i nen Kan inbiak dan te chu ka hrilh nel nual ,”a nih chuan zan lam ah rawn leng thla se a that chu,Kan tam belh deuh a nga a nuam phian ang” Zothana pawh chuan a ti mai a , thiante dang in min rawn pawh ve ta bawk a, kan chhak a Riak ve dang an awm thu te chu Kan lo hrilh nel nual ,”Thanpui nichin khan tunge I biak reng a, mahni te khan I nui leh uarh uarh thin a” thlam lam pan a kan kal lai in Ate-i chuan a ti a, “keimah in ka awm loh kha” ti a ngaihsam zet a lo chhang in Ate-i bawk chuan “a nia lawm, nangmah khan I nui vak vak a,biak nei ni awm tak in I awm bawk si,Zorini nen ral atang Kan lo en reng che a, Kan rawn au bawk che I hre thei bawk silo a” thu tak zet a a rawn tih leh chuan ka ke pen ka chawt dawt, Ate-i chu en in “ka bul a hmeichhe awm ve kha in hmu lo em ni, Debo-i ka bul ah a awm ve reng kha, Kan chhak a Riak te zing a mi’ tiin Ate-i chu ka zawt “nangmah chiah in lui ah khan I awm,mak Kan tih zia chu ,rawn kal Kan tum lai tak in Zothana kha I bul ah a rawn thleng ta sia,Kan rawn hmanhmawh duh ta lo zawk a lawm”a ti leh zel ,uluk deuh in a thusawi lai chu ka lo en a,dawtsawi hmel a pu lo, Ate-i hian dawt a sawi ngai lo hrim hrim bawk , “ka bul ah hmeichhia a awm ve reng kha,in hmu Miah lo tak tak maw” ka ti nawn leh hram “hmu lo nangmah chiah I awm kan tih tawh kha,mi a i ang lutuk a lawm”Zorini zawk chuan a lung lung a, an ni chu nui mahse kei erawh ka nui ve thei ta hauh lo, ka ngaihtuahna a vak kual thui ta deuh a, thlam bul a ka hmeichhe hmuh leh Debo-i chu in ang ka ti ta viau mai, ka bul a a awm lai khan ka lo Chik lem lo a,tun a uluk tak a kan ngaihtuah tak ah chuan an sam rawn leh pian phung,thawmhnaw hak thleng in a in ang tih ka hre chhuak, mak deuh a a bo ngawt dan te ka ngaihtuah Kai ta zel a  ka tiril khur in ka thau ah min man ti tih ta mai,Zothana chu ka vuan bet chawt a , “ka hmu ngei a lawm ,thlam bul a lo awm pawh kha a mah ngei a ni”ka ti leh hram ,a bak ka sawi zui lo,ka thiante chuan min awih ka rinloh vang a ni.

Thlam Kan thlen hnu thleng chuan ka awm a nuam thei tawh lo, vawiin khan ka hmu ngei a,biak pawh Kan inbe ngei a lawm, khatiang a hnai tak a kan in din chilh chung pawh khan engtin nge ka thian te khan Debo-i kha an rawn hmuh ve Miah loh,thil awmdan chu mak ka ti tawlh tAwlh ,khua pawh in min rawn thim hnan ta a ka hmulthi a ding leh uaih uaih thin, mahni in ka awm fal ngam meuh lo, ka thil tawn kha ka thian te chuan an tawng ve miau lo a chuvangin tun a ka awmdan hi an hrethiam pha kher lo ang.

Zanriah ei kham ah thlam kawt zawl ah meipui chhep in ‘tu dang ngai lo ten Kan leng,hlim tak in vanglai Kan chen,chhiatni thatni ah Kan in fuih,Kan in hnem’ ti in  zai hla Kan rem a, thla bial zan a ni kher bawk nen Kan hlim tlang hle, Debo-i te thian ho chu Kan lo nghak deuh a ,mahse tumah an rawn lang lem lo, an rawn chhukthla peih lo a nih Kan ring, chutia kan zai ho thap thap lai chuan lui kuang lam ah hmeichhe au ri ninawm tak  hria in ka beng ka han tun deuh a, mahse a reh zui leh vang vang, ka thiante zai ka zawm leh chiah tih ah hmeichhe au ri ni awm tak chu ka hre leh ta “chu in hre ve em,?” Ramthara chuan a rawn ti a, “engmaw ?” Atei’n a lo ti, “lui kuang lam khu ni in ka hria,hmeichhe au ri kha in hre ve lo em ni” Ramthara bawk in a tih leh chuan kan thiante dang chuan an beng han dawn ve deuh in “a reh thiap si chu” Zothana chuan a ti a, “keipawn ka hria lawm vawi hnih lai ka hria” ka lo tih ve tak ah chuan mak an tih hmel ngang mai, “Kan zai nasa bawk sia Kan hre ve lo a niang” Zothana bawk chuan a ti leh mai a, “Debo-i te thian ho lui kuang ah an kal a ni mai lo maw” ka tih Chuan min en thap, “a ni maithei, mahse Debo-i I tih ve ziah hi Kan hmuhpui ve mang bawk silo che a” Zorini chuan a ti niah niah, “a tlai tawh lut ila mu ang u” tih pah in Rochhara chu a ding hluai a, sana Kan han en chuan dar 10 a lo ri der tawh Kan mei chheh chu ti mit in thlam lam ah Kan inzui lut hlawm a, thlam kawngka a ka lut ve tur chiah chuan e nge  ka hriat tehreng ni, Kan meipui chheh na lam chu ka han hawi leh kher a,ka van Phu Chiang tak, Kan mei chheh na chhak ah chuan Debo-i ni awm tak hi a lo ding reng a nihchu, keini chu min lo en reng a Chiang tak in hmu thei lo mah ila thla eng hnuai ah chuan a ruang-am chu a hmuh theih vek, “Debo” tiin ngaih thatlohna pawh nei lem lo chuan ka han au a, mahse min chhang Miah lo Chet pawh a che eih lo a nihchu “tunge, I thiannu chu a lo kal em ni’ Ramthara chuan a ti thuai a, “aw Kan mei chheh na chhak deuh a khi a ding” tiin a awm na lam chu ka kawk a,” tumah an awm loh khi” Ramthara chuan a ti ta mai, mak ka van ti tak tun ah pawh a la ding reng si a, hlauhna in ka ti ril a man a, ka khur nghal der der thei “khawilai ah hian nge a awm a,tun ang hun ah hmeichhia rawn kal te chu” tiin Zothana chu Kan mei chhem na lam ah chuan a chho leh a Debo-i bul vel ah te chuan a han vai thuak thuak a, engmah a hmulo , Debo-i chu mihring pangai a nih ka ring thei tawh lo, “Zothan lo kal rawh” tiin ka tap tiau a, ka hlau lutuk chu ka zun a chhuak vek thei , Debo-i lah ka lam hawi in a la ding reng bawk nen hlauh tak te in ka hlau tawh,chutia ka tah tak ah chuan Zothana pawh thlam ah rawn let leh in “a tha vek tumah an awm lo,I mit vai mai mai a nihkha”tiin min rawn kuah a,duat zet in ka lu ah a chul hliau hliau bawk, mahse ka mit vai a nilo tih chu ka hming ka hriatchian tluk zet in ka hrechiang,a chhan chu tun ah pawh Debo-i chu a la kalsawn miau lo tlat.

Thlam chhung ah min kailut a Zothana ban ah ka chelh reng,ka thlah ngam  lo, “a van mak awm ve,keinin engmah Kan hmu ve silo a” Ramthara chuan a ti nuah nuah a, keichu ka kha a chih vek a,ka tawng thei rihlo, hlauh na vang in ka taksa hi a khawng zo ni ber in ka hria, ka ti der a nih chu ring chiah silo ,min awih chiah silo in ka thian te chu an awm niin ka hria,Kan mut hnu thleng chuan Zothana pang dek lo in ka mu ngam lo, ka kuah deuh chawt a, “nangni pahnih hi in rinhlelh awm riau” Rochhara chuan a ti leh hlut a, keichuan ka chhang lo, Zothana erawh in “ngawi mai mai teh” a lo ti hluk thung, Kan thiante chuan an hrethiam a ni teh chek ang chu an aw an thian kharh kharh hlawm a, hun dang chu nise ka lai in ka zak viau maithei,tun hun ah erawh tumah ka chhawn peih lo. Pawnlam ah khan Debo-i kha a la awm a ngem ka hrelo na in hlauhna in min kiansan thei lo, tinge keimah chiah in ka hmuh theih tih te chu ngaihtuah kual in ka hlau telh telh a ni ber, Zothana kuah chial a ka mu chu engtik lai in nge ka lo muthilh ka hrelo, ka harh leh chuan midang ho pawh an lo muhil vek tawh, hlauhna khan min kiansan tawh nge mit khap fak fak chung in chunglam ka melh ran, chutia mit khap fak fak chung a chunglam ka melh reng lai chuan boruak chu rawn inthlak thut in ,vawt in min tham er er a, ka mit chhung in Zothana kuah mai ka han tum chu tumah ka dap fuh ta lo, chuta ka mit ka han meng leh chiah chu mak tihna hlir in ka khat, bridge ah keimah in ka lo mu reng a nihchu, thli lah chu a thaw vuk vuk a,ka thiante hmel reng reng ka hmu lo, “Zothan,Ate” tiin ka au a,mahse chhawntu ka neilo,ka aw thangkhawk bak ri hriattur dang a awm lo,chulai hmun chu a reh hian a reh tlawk tlawk a ni ber.

“Zothan” khawnge in awm vek tiin ka au leh chiam a, tuman min chhang Chuang lo chulai hmun ah chuan keimah bak ka awm lo a ni tih chu ka hrechiang ta viau mai, mahni a zan thim a awm ta chu hlauhna in min man in ka tap pur tawh ,Ramthara te thlam lam pan mai tum a ka inher lai chuan ka awmna bridge lehlam ah  hmeichhe nui thawm ni awm tak ka hre ta, chhum a chhah deuh avangin tu te nge an nih ka va hmu thei lo,ka thiante hian min fiam a nih ka ring leh ta rum rum, thawm ka hriatna lam chu hmanhmawh deuh in ka pan ta a,”Zorin nangmahni in ni tiraw, a nuihzatthlak miah lo a nia aw,in mawl emai” ka ti phei lang lang a, mahse thawm awmna ka thlen chuan ka thian te hmel reng reng hmuh tur an awm lo, “u” tiin ka phun chhuak sep a, ka u leh Debo-i te chu inhnaih tak a lo thu in zu ni awm tak hi an lo indun a,an sir deuh ah Ramthara u,U marema a lo awm ve bawk, an ni ka u leh u Marema te hi thian ve tho ni in an ni phei chu an tet te atang a inkawp chho tawh an ni, “u hetah e nge in rawn tih” tiin ka han bia a,mahse ka u chuan min chhang lo, ka awm ve a ni tih hrelo ang mai in Debo-i nen chuan an nui dun hak hak a,”Debo e nge awmzia” ka han tih leh pawn a tu a mah chuan min bengkhawn lo,  thil awmzia chu hrethiam lo tak ka ni, chutia hrilhhai tak a ka awm lai chuan ka u leh u Marema te chu in signal zeuh in ,Ka u chuan Debo-i in rinloh lai tak chuan a hrawk ah a rek ta mai, u Marema’n a ke ah a lo vuanbet thung, ka hamhaih em avang leh min thawn em avangin Chet lawk nachang pawh ka hrelo, “tal tawh Suh hmeli”ka u ti ri ah chuan harhchhuak zawk in , “a tawk,u rek tawh Suh Debo-i kha I that mai dawn a lawm” tiin mangang zet in ka u chu namsawn ka han tum a,mahse ka u chu ka tawk thei ta reng reng lo, ka kut chu ka en a,ka u chu namsawn ka tum leh mahse a tlang zel a ka tawk thei Miah lo, hlauhthawn na in ka khat a ka mangang takzet, kei hi ka thi ta em ni tih thleng in ka ngaihtuah a,tap pur chung in ka u te pahnih chu tawp tur in ka hrilh a,mahse an tawp duh chuang lo, Debo-i chhan tur in tih theih engmah ka nei bawk silo mangang tak ka ni, Debo-i chu a zawi tial tial a, ka u pawn a reh na chu a thlah a ,Debo-i chu a thi tawh tih hriat zet in a che tawh eih lo, ka u te pahnih chu rapthlak ti zet in ka en dun tlawk tlawk ringawt mai a ni.

Nunna nei tawh lo Debo-i chu ka u te chuan zawn in lui chhaklam ah an kalpui zel a, e nge an tih dawn hriat tum in keipawn ka zui ve zel , bridge atang hla ve tawk tak ah chuan kal in, lei an lai khuar a, chutah chuan Debo-i ruang chu an dah ta a ni,ka rilru na chu ka mittui a dir char char, chutah thawk leh khat ah ka awmna chu a rawn inthlak leh hlawk a,thlam kawt ah ka lo ding leh reng tawh ka hma ah chuan Debo-i ngei mai chu a lo ding reng a,lungngaih hmel deuh in min lo en bawk,”Debo” tiin ka tap chhuak hak a, ka mittui chu ka dang thei lo, “ka tihpalh ka chhan theih loh vang che in” tiin ka la insut hlap hlap, Debo-i chu mi nung damlai a ni tawh lo tih chu hrilh chawp ngai lo in ka hrechiang tawh lutuk tlat, mahse mak tak in a hma a hlauh na ang kha ka nei tawh hauh lo,a mah chu ka lainat ngawih ngawih, “min pui rawh Thanpui,ka chung a heng thilsual ti tu te hi ka ai awh in hremna pe rawh” a rawn tih Chuan ,ka lu ka bu nghat nghat a , “ka tihpalh” ka ti leh tiau “min tiam rawh,phuba min laksak ang tih hi” Debo-i bawk chuan ti leh in,mittui kar atang a hmel chu ka en a ka van lainat tak ,a na tuar lai hmel kha ka mitthla ah a lang lo thei lo, “ka tiam a che ka u pawh nise i tan ka auchhuak ngei ang” ka ti nghet ta charh a, ka thusawi chuan a ti lawm a ni tih hriat zet in a nui ta ver ver a, “ka ring che a nia” tiin boruak ah chuan a thamral zui ta a ni.

“Thanpui, i harh em! heyy,,harh rawh Thanpui!” Ti thawm ah chuan harh in ka thu chhuak hlawl ,Zothana leh ka thian te chuan min tih harh tum in min lo sawi chiam hi a lo ni, chutah ka mit chu ka han khawih a a lo huh dup mai, engkim kha ka mumang vek maw,mahse a tak ang chiah in ka feel bawk si,insum zo lo in ka tap chhuak hawk hawk, ka u mifel leh min hmangaih em em tu khan engtin nge hmeichhe awmnem zawk nunna kha a laksak theih,mang mai mah nise kha thil khan min tina takzet a ni, “a tha vek tawh,I bul a hi Kan awm vek,mangchhia I mang a nihkha,tun ah chuan a bo tawh e” tiin Zothana chuan min kuah a,keichu ka la tap bang thei lo, ka mumang a thil thleng engkim kha a tak ang vek in ka feel a,ka awm zawn hi a na lutuk.

A tuk ah pawh ka mumang chu ka ngaihtuah zawm reng a, ka ngaihtuahna a ti buai  takzet, ka thiante lui a infiam ho pawh in ka rilru an la peng zo meuh lo,ka mumang kha a tak ni ta se,ka u te pahnih khan Debo-i kha an that tih na em ni,mahse chutiang thil rapthlak ti duh tur khawp chuan ka u hi ka ring silo,ka ring phallo bawk, chutia ka ngaihtuahna ka kawm mek lai chuan ral khat a hmeichhe pakhat ka lam hawi a ding reng chu ka hmu a, uluk zawk a ka han en chuan Debo-i ngei a ni tih ka hre thei, ka tha chu a khur nghal der der, lungngaih hmel zet in a ni chuan min en reng a, a hmui phun in eng emaw a sawi tih chu ka hria,mahse enge a sawi tih erawh ka hrethei lo, ti ril khur dar dar chung chuan ka melh ve reng a, chutah ka beng bul mai ah hian “min pui rawh” Debo-i aw ngei mai chuan a rawn ti ta,ka Phu zawk thei,a mah tak chu ral lehlam ah daih a la awm tho si,ka beng bul ah erawh “min pui rawh” tih ri chu a ri nawn tlut tlut a ,”a tawk,a tawk tawh,khawngaih in duhtawk tawh rawh” ti a beng hup in ka tap ta vak vak ringawt, “Thanpui,enge awmzia,I tha em” tiin min ngaihtuah zet in Zothana a rawn tlanphei a,”a tawk tawh,ka pui ang che,khawngaih in duhtawk tawh rawh,” ka la ti mawlh mawlh, Zothana chuan min kuah bet in min hnem mawlh mawlh, “Zothan haw ang,helai hmun ah hian awm ka duh tawh lo,haw ang aw” tiin Zothana chu ka ngen a, “awle Kan haw dawn nia,a tha em” ti a min lo chhang in Kan thian te dang chu a au zui a,ka that vak loh thu leh haw mai  tha zawk a a rin thu te chu sawi in kan thiante pawh chuan min ngaihtuah deuh vangin haw chu an lo hnial lo, thlam lam pan in haw tur in Kan insiam zui a, haw kawng ah pawh Zothana chuan ka kut ah a chelh tlat a, kei erawh in ka mit chhing in ka mumang kha ka ngaihtuah a,vawiin a ka thil tawn mak tak nen ka han hmehbel a,ka mumang kha a tak ngei a nih ka ring ta, chu chuan min tina takzet, ka biang ah mittui a rawn luang thla ngiai ngiai a,dawt ni lul se ka van ti em.

In Kan thlen chuan khum ah ka bawk zui nghal thlawp,ka thil tawn zo zai khan min tichau takzet a ni,chutia ka mu zal mai mai chu ka lo muhil nge ni,ka room kawngkhar ri rek thawm ah ka harh a, “ka ti harh che em ni” ka u chuan tiin ka bul ah a rawn thu a,a ni chu ka lo en reng ,”ka nu in i nuamsam vak lo e a tia,hei damdawi ka rawn Hawn a Chaw ei hma in I ei dawn nia ” tiin damdawi bur hnih hi ka khum bul side table ah chuan a dah a,ka u hmel pawisawi lo lutuk leh min duatna aw ri chuan ka hnuk ti ulh thar leh in,ka u chu ka kuah thlawp a “u dawt vek tiraw” ka ti chhuak tiau a,”eng maw dawt chu,I tha em,tinge i tah a” hrilhhai hmel zet in ka u chuan a ti a,ka kuah na tihngheh sauh pah in “ka ngai tawh lutuk che u”ka ti ta zawk a, ka u nui ve huk in “nula ve uai tawh si nangpang chhia thei lutuk” tiin duat deuh in ka lu ah a chul hliau hliau a, ‘dawt ni lul se aw’ ka rilru chuan ka ti vawng vawng.

Tlai Chaw ei tur a ka nu in min rawn koh chuan ka phone keng chhuak in, “aw Debo hei Chaw Kan ei dawn chiah a,nakin ah ka lo be leh ang che” tiin ka u hriattur ngei chuan phone chu ka hmang der a,ka u awm dan chu ka en ru reng bawk, ka tawng chu a hrechiang lo nge ka u ah chuan danglam ka hmu lem lo, ka hah erawh a dam huai thung, ka thil hriat te hi dawt nise ka la tih fan vang a ni, “nia,nakin ah ka hrilh vek ang che,maw ka u maw,Kan zawt chhin a nge” tiin ka u chu ka panhnai a,”u, Debo-i tih hmelhriat I hria em?” Ti a ka zawh chuan min rawn melh zawk in, “ka van hre mai lo, a hmingpum e nge?” Tiin ka u chuan min chhang a “lawks aw,Deborah Lalruatkimi niin ka hria, mission veng a mi, I u nen Kan inkawm thin a tia” ka tih Chuan ka u chu a mengzau kawk thei in ka hria ,”eng maw a hming i tih kha,khawi,khawi veng a mi maw” bah deuh nawk a tiin min zawt nawn leh “Deborah Lalruatkimi, mission veng a mi,i hmelhriat em ni?” Ka tih Chuan ka u chu a mangang deuh in ka hria,ka u mitmeng a mak tihna te,Debo-i hming leh veng ka sawi a a awmdan danglam vek te khan ka thu hriat te kha dawt nilo in a tak ngei a ni tih a nem nghet ngei in ka hria, awih harsa ka tiin ka u chuan min tina takzet a ni, “I hre ngai em ni” tiin ka u chu ka zawt nawn leh a,ka hnuk a ulh deuh tun tawh, tawng pawh harsa ti tawh tak ka ni “a,,aih hrelo,chutiang hmelhriat ka nei lo” ka u chuan a ti a, uluk deuh in keiin ka lo en thung. “A mah chu nula sang tha ve deuh, langsar deuh ni silo a sam sen buang a nia,a sam a ngil lo bawk a chuan” ka tih leh lai chuan “a tawk,ka hrelo ka tih chu mawle!!” tiin ka u chu a ding deuh hluai a ,”Chaw ei ang I phone kha dah tawh” a ti leh hmun a choka lam ah a kal nghal nal nal,ka u in vawikhat awka vin a min biak na a ni a  hreawm ka ti, ka u kal veleh phone chu ka dah a,dawt nise ti viau mah ila thudik ngei a ni tih chu a fiah telh telh bawk si, tih tur ber pawh ka hre tawh lo, police ka hrilh tawp mai dawn em maw ni ti a ka ngaihtuah lai in “Chaw rawn ei ta che bawihi” tiin ka nu in min au a,ka mittui tuai hul zung zung in choka lam ah ka phei ve ta a, ka u chuan vawikhat mah min be lo,hmanhmawh deuh in Chaw chu a ei a a room lam a pan zui nghal nal nal,keipawh puar ve thuai in ka u kawngkhar bul ah chuan ka ding a, bang dep ah ka u thawm ka ngaithla,”ka hrelo,a mah ngei a nih leh nih loh,mahse a sawidan ah chuan a mah ngei kha a ang bawk si”tiin ka u chu a rilru a hah hmel hle,tunge a biak tih pawh chu hrilh ka ngai hran lo,hrechiang tak ka ni, “naktuk nghah a ngailo,zanin ah zuk fiah ang ‘ ka u chuan ti leh in phone chu a dah zui a,rang deuh in ka room ah ka tlanlut nghal ,ka u lo chhuak leh chu  zui chhuak in police ka call bawk ,police te nen chuan ka u te chu Kan zui ru zel a   ,ka beisei ruk leh ka hlauhthawn em em tho si ang ngei mai in lui lam ka u te chuan an pan zel a ,ka Thinphu chu a suk hian a su dup dup hial tawh, ka u te chuan ka mumang a Debo-i an phum lai ka hmuh na hmun lam ngei chu an pan zel a , hla ve deuh atang keini ho chuan an chetla lai chu kan lo en reng, a nihna tak ah chuan police ho zing ah hian tel ve tur ka nilo a,mahse keiman tel ve ka duh tlat avangin an rem ti vak lo chung ka kallui a ni.

Ka u te chuan lei chu an lai tan a, ruang an lai pawh ta ni ngei tur a ni an hnar chu an hup nghal thuai, chutia an inrinloh lai tak chuan “in ban chunglam ah phar rawh u,Deborah Lalruatkimi tual thih thu ah rinhlelh in nih avangin police station ah min zui a ngai ang” police chuan ti thut in,ka u te pahnih chu Phu nasa tak an ni,chuta police ho zing a kei min hmu veleh chiah phei chu mak an tih hmel lehzual in ka hria,an bul hnai deuh a kal chuan ruang tawih tawh rim a nam avangin a rimchhe hle.

Ka u te pahnih chu handcuffs in an kalpui a,keipawn ka zui ve zel ,thu hretu ka nih na ang leh eng vanga ka u chuan Debo-i chu that mai nge a nih ka hriat duh avang in police ho chu ka u te an dawp na hmun a awm ve chu ka dil a,an rem ti lo,mahse ka dil ngawrh tak em avangin pawn lam atang an thusawi ka lo ngaihthlak ve chu phalsak ka ni ta hram , “Deborah-i kha eng vanga that nge in nih?” Tiin police chuan ka u chu a zawt a, ka u erawh in an thah loh thu in a lo chhang thung “in that lo a nih si chuan khalai hmun ah khan engthil nge in tih?” Tiin police chuan a zawt leh a,ka u erawh a ngawi ta tlat thung ,chutih lai chuan police dang pakhat hi room chhung ah chuan lut ve in a rawn chhuak leh thuai thung “lem… luhlul chhuah tawh lo khan I thah chhan chu han sawi teh le,I thianpa a inpuang vek tawh,zep khan awmzia a nei tawh lo,I ka atang ngei a hriat Kan duh vang Chauh a zawt che kan ni” tiin ka u chu a han chhimbu dawi a,a nihna tak ah chuan inpuan chu sawiloh u Marema chu dawp pawh an la dawp velo ,chutah zet chuan ka u pawh in zep reng tul in a hre ta lo nge ni, heti hian Debo-i an thah chhan leh an thah dan chu a sawi ta a ni.

“Debo-i nen khan inngaizawng kan ni , a nihna tak ah chuan midang a ni aia hmangaih zawk ka nei a, ka bialnu diktak ti ila,ka hmangaih zawk kha phai lam ah zirna avang in a awm bo a,chumi chhung a lunglen hnem tu atan Debo-i chu ka hmang mai Chauh a ni, Chet pawh Kan chesual fo a, tum khat erawh a ruak loh thu min hrilh a , ka rilru a buai in ka bialnu in a hriat ka hlau bawk si, ka chhungten an hria a nih chuan ka fa chu Fahrah tir an duh dawn lo tih ka hrechiang si,kei lah in Debo-i  aia hmangaih zawk ka neih avangin Debo-i chu neih ka duh silo, naute chu ti tla tur in ka ti ta a,mahse Debo-i kha mi tha tak a ni a,a ril a rah a fa ngei kha tih hlum chu a duh ta tlat lo, ka mangang lehzual a,tih ngaihna tak pawh ka hre tawh lo, thlem chikim a ka thlen hnu ah pawh naute chu ti tla lo a pai tlang a la duh fan a, engtin tin emaw ni phai lam a awm ka bialnu chuan lo hre thawi in kan in hauh hrep phah hial a,chhuanlam leh dawt ka hrilh nuam hnu ah ka sawifel thei hram a ni,chu chuan ka thin ti rim leh zual in ,Debo-i chu huat takte in ka haw tawh, naute a ti tla duh bawk lo nen ruahmanna neih a ngai tih ka hria,ka thianpa ka tetea atanga ka kawm thin Marema chu engkim hrilh in Kan pahnih in ruahmanna chu Kan Siam dun ta a, Marema te huan a in tih hlim rawat in Debo-i pawh kal ngei ngei tur in ka ti a,Kan thian dang te pawh an tel ve tur thu ka hrilh bawk,a nihna tak ah chuan midang tumah an awm ve dawn lo, Marema te huan ah chuan kan kal ta ngei a,thian te  dang an hman leh loh thu ka hrilh a a ni pawn a lo awih ve mai bawk, a rilru kha a thianghlim em a rinhlelh na chang a hrelo a ni ber zawk,ti chuan zan ah a duhlo chung zu in tir in zu ah khan damdawi ka pawlh a,tichuan a in rinloh laiin a hrawk ah ka rek ta a ni, Marema hian min lo pui ve in a ruang chu in rawn hmuh na lai ah khan Kan phum ta a ni” tiin ka u chuan Debo-i nen an chanchin chu a sawi a,room chhung a luh a ka u chu sawisak hrep mai ka duh , engkim ka u ka atang ngei ka hriat tak ah chuan ka u chu rapthlak ka ti takzet .

Kan boruak chuan mizoram a deng chhuak ti ila ka sawisual kher lo ang,Kan chhungkua, Debo-i te chhungkua leh u Marema te chhungkua chu Kan buai  zual hle a ka u khawih ve chak tak tak pawh an awm fur mai, van lam chu ka thlir a “bedorah tun ah chuan I phuba lak in a awm ta e, hahdam tak in I chawl thei tawh tiraw” tiin ka phun sep.

Zan a ka mu chu ka mumang ah Debo-i ka hmu leh ta, a ni chu ka hma ah ding in hlim tih hriat zet in a lo nui sang a, “ka lawm e thanpui “tiin a hla tial tial a, boruak ah chuan a thamral ta,ka muhil pawh ka harh hlawl mai, imm tun ah chuan Debo-i chu zalen a ni ta e,thlamuang tak in a chawl tawh ngei ang.

Tawp ta

Leave a Reply