You are currently viewing FRANKIE

FRANKIE

Spread the love

BY: Vanlalpeki Fanai

‘’ Malsawmzual, I hman chuan ka hman aw’’ choka lam atanga min rawn au lang lang thawm ka hriat chuan ka nui deuh vur vur. Ramengmawii hman hma theih bik zia hi aw.

‘’ Ka hman e ka hman e’’ ti chungin room atang ka tlanchhuak vat a, min lo melh shalla leh tawh kher mai. Ka melh tha ngam ve lo.

‘’ Hmanhmawh rawh. Bus in min tlansan leh vaih chuan I chaklo tawh viau ang’’ ti hluk hluk chungin min kalsan nghal a, ka umzui nghal dawr dawr. 

Kan school pan tur hian bus chan chawp kan ngai thin a, kei lah ka țuan alo fum ve bawk si nen, engemaw chang hi chuan min lo tlansan daih zel bawk a, ke ringawta school thleng rawk kan kal chang te pawh hi a tam ta viau awm e. Ramengmawii huat tawk hi a tling thin viau a ni. 

Kan veng kawn lai takah hian café lian leh changkang tak pakhat awm in, an lun thei ve hle mai a, chumi dawr bul chiah chu bus stand ni nghal bawkin, chutah chuan nitin mai hian bus chang turin kan thian thum in kan va thu ve ran thin a, café chhunga lut chhuak mihring nalh tak takte chu thlirin kan lo hisap kual nasa ve thei hle. Keimah tak zawk hi chuan café neitute fapa Frankie an tih kha ka duh ber mah zawk a, mahse, ka phu lo. Kan in neih hleih chu thuhran nise, kan inhmelthat hleih lutuk ringawt. Ka phu lo lutuk hi ka inthlahrung zawk a ni e.

‘’ Hey thiante u, ka lo thleng a nia’’ kan piah kawngkawi atanga rawn au lang lang thawm kan hriat chuan Ramengmawii nen tihtur inhrilh chawp kan ngai lo. Kan  biru lehnghal hmak. Khatianga min rawn autu kha tudangmah nilo in kan thian pathum zinga a thawveng ber leh vei nei lo em em, bawl nuam tak leh min bawl let tum ve khanglang thin tu Lalrinlawmi niin, a koh duat nan Rinthawveng kan ti thin. A thinrim ngailo, a nui vur vur zel. Kan thutna hmun a rawn thlen chuan kan lo bihruksan daih avangin min zawng hmu zo ta mai silova, a hawi kual ruai ruai.

‘’ Ehe! Nichin lawk pawh khan an la thu ve regng sia. Avan mak. Ka hmuhsual a mi le’’ ti nuah nuah chungin a ke te chu a han per leh dat dat thin a. ka nuihza insum nasa lutuk chu hrehawm tak a ni. Chutah, a lam pana rawn kal mek mihring ka va hmuh takah chuan ka mawng hi a rawn za ta zawk zawk mai a, inhmuhtir mai chu ka duh tawh rum rum. Nia, Frankie khan amah chu rawn panin a be tlat alawm le!

‘’ Thil tihbo inei emni?’’ tiin Rini chu a rawn be ve nia! Rinthawvengi lah chuan,

‘’ Aw, ka thiante pahnih ka tibo a!’’ alo la ti zui a. vanneihthlak tak hian Ramengmawii chu a rawn nui phuh ta hlauh mai a, min rawn hmu zui nghal bawk. Frankie nena kan mit han intawng siah mai chu ka  țek chhawk nimai hian ka inhriaa, ka țim sung sung thei. Ani lah khan a mit ti zim sun chung hian uluk zetin kei chu min la rwn thlir reng a, chhuanlamah Rinthawvengi nen chuan ka lo melh tawn zak zak ringawt a nih kha.

‘’ Frankie, min ngaihtuah a kan lawm lutuk’’ lai chhe zet chunga Rini’n a rawn tih leh takah chuan Frankie pawh a lo bu ve ta zoh a, min kalsan thei ta hram e. ka thaw nghal huai mai.

‘’ Mawli, kan bo emni? Kan bihruksan che tih kha hrethiam ve ta mai che. Chhuri, hmelchhenu’’ ti nawk nawkin Ramengmawii zak lutuk chu a biang a sen vek thei a. sawitur ber hre lo hian ka lo ding ngawi ve reng ringawt. Frankie-a min rawn melh dan chauh kha rilru a awm leh tawh tlat. An dawr bul lawka bus kan va chan thin avang hian min hmu ve fo tawh bawka, kan thianho hmel na na na hi chu a hre lo der thei tawh bik lo ang. Chubakah, mi induh tak ang chi kha a nih ka ring lo hrim hrim bawk. Smilling face a ngah em em bawk si.

‘’ Bawihi, engtik maw exam in neih dawn’’ ka nu min zawhna chu ka han ngaihtuah vang vang a, ka lehkhazir thatchhiat zia ka hrechhuak nghal zawk bawk.

‘’ Thla leh ah’’ tia lo chhangin min rawn nghal kawk mai. 

‘’ Thla leh exam tur ni si tunah pawh tihian ila thu vel mai mai a, ava zialo ve’’  a rawn tih leh chuan lo tlak deuh karh chung hian,

‘’ A,, second term exam chauh ala nia. Ho em mai’’ ti let ve pang pangin phone ka khawihsan leh daih a, a chek deuh hlak ri chu ka hre zui nghal bawk.

‘’ Eng term pawhnise a pawimawh vek tawh aw. Pawl 10 lai in zir ve tawh a a,, ka sawi tam peihlo. I fail vaih chuan thingtlangah hlo thlo turin ka thawn chho nghal ang che. Ka vaw nghal nghe nghe dawn che nge le’’ a tih leh duah ah chuan chhang let duh tawh lo in room lam ka pansan nghal zal zal a. A hmingin lehkhabute chu ka va keu der ve ta hram a nih kha. Mahse, ka chhiar lo. Ka chhiar chhin eih lo. Phone ringawt ka rilruah ka dah a, Frankie nise ka mitthla ah a cham reng mai bawk si. Engmah hi ka ti tui thei thlawt lo ani ber e. chutah, ka nu bawk kha ka roomah chuan rawn lut lehin,

‘’ E, lehkha chu ilo zir ve maw’’ tih pah hian ka hnungah a rawn ding zui bawk a. kei chuan inti zir fea amah melh chung hian,

‘’ Aw, ka thiam nual tawh bawk a nia’’  kalo ti let vel ham ham. Mahse, ka tukkhuma rawn kuk fawk pah hian,

‘’ Malsawmzual, I lehkha hi I chhiar miah lo tiraw. Awi! A dik zawng tal te khan dah ve la, a letling zawng hlirin a nih kha I chhiar le! Hetiang reng reng chuan in exam question pawh hi a letling veka an rawn set a nia ka rin ni. I mak lulai bawk em mai a!’’ ti vang vang chungin min chhuahsan leh a. ka va han zak tak. Ka nu phei chu nilo se, khuk ral pui chem chem tlak a ni hial ang. 

Hetiang em ema ka lehkhaizir peihloh chhan ah hian Frankie bawk kha ka mawhpuh lo thei lo. Nge, alo chhiatloh the vawr em ni. Rilru a hruai peng vek alawm le. Kumin hian pawl 10 hi ka pass lo a nih vaih chuan e, ka nu khan a thilsawi thingtlang a inthawn chhoh tih vel kha a ti leh duh tak tak mai ang tih pawh ka ring. Ka duh reng reng hleinem.

‘’ Zuali, thil tha lutuk mai hrilh tur che ka nei ‘’ Ramengmawii hnen atanga ka call dawn vang chuan ka khi deuh sak a. 

‘’ Naktuk zanah Frankie ten an café ah khan party an buatsaih dawn a, kal ve ang u. Party te chu duh duh kal theihna a nia’’ a rawn ti ta mai a. ka lo phur nghal hurh thei. Mahse, ka han ngaihtuah tha leh vat a, ka phurna a dai leh ta rih tlat.

‘’ Party tih ringawt. Thil engemaw bik vanga buatsaih tur pawh an lo ni thei a, min sawm bawk silo a tihchi loh ang’’ ka tih chuan rang zet hian,

‘’ A ninawm e.. eng thil lawmna mah a ni lo. An café tih hmingthan belh nan an ti dawn alawm. Reilote tal va kal ve chhin ang u, party naah pawh kan la kal ve ngai miah loh kha. Rilru tih thawven nan reng reng pawh a tha ang’’  a rawn tih leh pawh chuan han chhan let vak ngaihna ka lo hre lo. Exam a hnai tawh bawk si nen ka nu hian a hriat vaih phei chuan min khai zai duh tawh ang. Chutihrual erawh in ka kal chak em em thung a, Frankie hmel mawlh mai kha hmuh leh ka chak tawh a ni. A hmeltha lutuk mawlh mai kha.

A tuk zan a rawn inherchhuah chuan hma lutukah lehkhazir tur ang deuhin room lamah ka tawm bo daih a, ka nu pawhin  ngaihtha tak hian Tv min ensan bawk. Mahse, a ruk thei ang bera insiam pah mawlh mawlhin Rinthawvengi khan ka room tukverh chu a rawn kik ta karh karh mai a. ka va hawi phei nak chuan kamsir chuangliam pherh nuai khawpa a lipstick inhnawih pherh chu ka va hmu hmasa ber ta lehnghal. Ka mit sulh thei. Rang zeta tukverh chu va hawnsak pahin a lipstick hnawih pherh chungchang chu ka zawt nghal vat bawk a, nui vur vur chung hian,

‘’ Ka rawn kalna lamah balhla pil ka rap palh a, ka tlu a’’ a ti hu mai. Ka nui chhuak hawk lo chauh a ni. Amah leh tho chuan,

‘’ I hman tawh tho chuan rawn zuangthla mai rawh. Ramengi pawn a hmunah min lo nghak tawh a nia’’ ti leh zung zungin ka lo hawi kual deuh zak zak a, ka zuangthla thurh. Lei ka thlen thlak ruala Rini ‘aiah’ țhat thawm ka hriat chuan ka thin a phu nghal zwih zawih a. ani lah chuan tawng rin leh au rin hlau tak, na a nei tih hriat em em bawk si a ner nang nang chung hian,

‘’ Tawlh rawh. Tawlh ta che. Ka ke I rap bet tlat alawm’’ tih pah hian min rawn nam deuh chawt chawt a, ka awm dan chu hrechhuak ve leh chiahin ka tho nghal nawk nawk. Ani pawh si deuh hlarh hlarh chunga rawn tho chhuak nghalin a inbeng fai deuh thuak thuak reng a. 

‘’ kal ang. Ka ke chu avan na tak’’ ti leh bai bai thin in, 

‘’ Nge, min rawn bawh tluk kher a. in tukverh hniam hniam nen. I korean movie en zozaite hi a takah hmang chhuak kher thin suh. A na e’’ a rawn tih leh hmuar hmuar chuan ka lo nui ve ringawt a. phunchiar si, in ang tui thei si ah! 

Café kan va thlen chuan mihring kal khawm pawh an lo thahnem ve tawh angreng hle mai a, boruak a len hmel ham ham khawp mai. A kawtah chuan Ramengi pawh kha mahni chauha lo dingin a hawi deuh vual vual reng a, kan hmel a rawn hmuh rual erawh chuan rawn nui deuh vur vurin a thla pawh a muan hmel ta sawt.

A chhung kan han lut chu pui tak a ni. Pui tak. Mihring kal khawm ho chhiatloh zia kha chu thuhran nise, mi changkang tak tak bula hun han hman vel chu alo nuamin midang han kher nget nget te hi an nei ve lem lova, kan zalen halh mai. Chutiang zelin Frankie thiante ho pawh an rawn chhelo lehpek hlawm hle a, phone vel atang baka kan hmuh phak pawh kan rin loh model chhelo tak tak te khan nui sang chung hian min rawn kal pel leh suau suau thin a, a nuam ve thlawt. Hemi zana kan awm dan engkim. Rinthawvengi chet sual lehpek dan te, Frankiea’n fel min dan zawng zawngte leh Ramengi’n a theitui in laia hmeichhe pakhat sam a bual huh palh vek thu te kha chu sawilang chipchiar lo vek mai ang. A rei.

Zing dar 2 velah in ka thleng thei ve chauh a. Thawmdim tawka lut ru zal zalin ka nu chu thutthlengsei chungah Tv pawh off lo hian alo ka mu tih ka va hmu nghal. Ka hnar suk suk lai ka han kai tho chiah chu phawk zet chung hian a rawn meng chhuak ruai mai a, a tho a dawn emaw ka ti hman hial. 

‘’ E, lehkha I zir zo chiah emni?’’ min rawh tih pawh chuan lehkhazir awm ve hmiah in,

‘’ aw, khumah va mu tawh rawh’’ ka ti ve leh mai a. A tho zui țaih țaih. Ka hmai make-up tlem azawng inhnawih leh ka thawmhnaw inbel te chu a rawn hmu lo hlauh tih ka hriaa, ka thaw sawng sawng. 

Tunah chuan Frankie nen pawh kan inhmuh nikhua hian kan inbe ve fo tawh a, ka dam deuh. A chhiat loha an khawsak hmel theih tehlul nen hian a induh lo ve thin ngawt mai ka ti. A tu a te pawh hi thian angin a en vek thei ka ti mai a, a tluangtlam takzet. Nui hmel a pu tam a, a hmel hi hmuh a nuam em em reng a, a nuih tam avang hian a mawl hmel chuang hauh bawk si loh. A duhawm thlawt.

Tun atang chuan an café bul lawka bus chan pawh chu a nuam kan ti thar sawt a, a awm remchan lai a nih a kan hmel a rawn hmuh fuh tawh hi chuan koh chawp kher ngai lovin a rawn thu ve chat thin. A tawng duh reuh lutuk han tihtur chu a ni miahlo na in ka thiante hian biak vel dan an thiam em a, a tawng duh hmel zo vek. 

Second term exam a hun ta. Ka va han huphurh tak. A hunlai zawnga zir tha peih hlei silo khan exam dawn a ruaiah ka han bei tha leh tak tak mai a, sawt duh lo tak a ni. Rinthawvengi leh Ramengi te pawh hian thiam  bik dawn hauh lo mahsela, min hnem turin eng an ni bik chuang lo. Ka tawngtai tawp. Mahse, kan han exam ta tak tak a, rinai tak chuan ka lo tithei ve leh phian mai. Kumtir lama reilote tal ka lo beih ve na kha tunah a result ka hmu ka ti mai a, ka pass zo ve turah chuan inngai phawt ang.

‘’ Science leh chhiarkawp ka hne zia hi chu maw. A hmuchhuak tute chawpa reh nawk nawk mai hi nia ka duh ni’’ Rinthawvengi’n a rawn tih bawrh bawrh laiin Ramengmawii thiamlo lutuk pawh kha alo khek ve leh duarh duarh thin a. kei thung chuan kan lam pana Frankie rawn kal tih chauh lo chu ka thinlungah engmah ka dah leh tawh lo. Khawnge a kal dawn tih ringawt ngaihtuaha ka lo phun ruk mawlh mawlh lai cuan min rawn nuih deuh sakin kan hmaah tak a rawn ding zui ta mai a. ka hmazawn ah tak a rawn din tlat avang chuan ka lum nghal pup pup thei mai. 

‘’ Hi Frankie, kan exam zo chiah a kan thiamlo hlawm rap’’ Rinthawvengi leh bawk chu. Ava han  țul the duah lo thin tak. Frankie-a nuihza insum hmel ka hmuh khan ka zak ru ngawih ngawih tawh a, he mihringnu tawng duh leh lutuk thin hi chu a tul lo thei chiang khawp mai. Mahse, Ramengi zawk chuan pangngai tak hian,

‘’ Khange I kal dawn a, iva nalh em em’’ tih pahin a inthuam dan te chu ka lo en uluk ve nasa. T.shirt lian hnek hnuk tak hi ha in, kekawrtlawn thawl lampang a ha bawk a, a chhelo a ni.

‘’ khawiah kal dawn love, ka kal zo tawh zawk. In hmel hi ka rawn hmu a, in thiam em tih rawn zawh che u ka tum mai mai’’ rawn ti nawi niah niahin Rinthawvengi kha alo nui chhuak leh hak hak tawh a, ka va melhrum nghek.

Tichuan, thu ho deuh deuh sawiin an dawr thleng rawk chuan kan inzui ve ta zel hlawm a. Ava han fel tak aw he pa hi chu. Changkang leh sang taka khawsak a tul hunah a ti thei mai a, hniam taka awm a țul hunah pawh a awm leh thei mai. Englai pawhin biak a  nuam em em reng a, keini ang mi satliah lehkhathiam  bawk silo thawveng ve ringawt chen hian min la be tha duh ve zel chu a nia. Thawmhnaw manto leh changkang a inbel lai pawhin biak hmasak a ngai ngailo ti tawp mai the ang. 

‘’ Lehkha I zir nasa leh tawh em?’’ chu message chu en deuh vung vungin min lo thawn tu chu tu nge tih ka hre lo. A dp a hmuh theih miau loh a. 

‘’ Tu nge I nih’’ tia ka reply na chu a rawn chhan leh tak mai loh avangin phone ka dah a, lehkha ka zirsan nghal daih. Kan class ami mawl deuh, min ngaizawng ve em em tu Chhanbuh-a bak kha a nih pawh ka ring lo ve a. vawi tamtak ka phone number hi min dil ve tawh thin a, ka pe duh ngai lo a nih kha. Ka thiante pahnih zinga a tuemaw zawk zawk hian an lo pe a nih vaih chuan an chak lo ve khawp ang.

Dar 10 thleng rawk lehkha ka zir hnuin ham bai bai chung hian phone chu ka han en tha leh phawt a, kha number ringawt pawh khan min lo reply ve leh tawh.

‘’ Frankie Lalramliana’’ tih ringawta min lo reply takah chuan ka thin a phu zui nghal dup dup thei a. he pa hian ka number te alo nei a maw!? Khawi atang nge a neih theih. 

‘’ Avan mak em em’’ ti ringawta ka replyna chu seen tawh lovin a last seen pawh dar 9 leh a chanve daih kha alo ni tawh a, a muhil tawh a ni ngei ang chu. Mahse, ka helhhawlh a, ka za chhuak vek thung.

Kan inbe tam tual tual a, ka ngaina tulh tulh bawk a, ka chhan letna reng reng te pawh hi a ngai pawimawh thiamin a nun dan engkim hian zawimuangin min hneh chho tak tak tawh. Sawi tur hriatloh changa emoji mai mai ka thawn te pawh hian phur em emin a rawn reply ve thei zel mai a, heti khawpa min lo be chak ve tu ka han tawng hi chu nuam tak a ni. Ka zirlaiah min tihbuai a hlau em em a, chutiang bawkin keipawhin a zirnaah tihbuai ka hlau ve tho. Biak reng ka duh a, tawp chin nei lova biak mai te chu ka duh thin. Reilote chhung kan inbiak loh hlek pawhin holam taktaka kan inbiak thinna te kha ka en nawn leh ngat ngat peih a. hetiang khawp hian amah ah ka luangliam tih hi hre ta sela min ngainep ang nge min en hniam phah nan a hman phah palh a ngem . Chu zawhna chu ka inzawt awl ngailo. Heti khawp hian inbe nasa ve tawh mah ila a tu ve ve mahin kan induh thu leh inngaihzawn kan chak thu reng reng chu kan la sawi chhuak chuang lova. Kei chuan ka zah lutuk vang chauha sawi ngam lo mai ka nih laiin, ani ngaih dan hi ka hre leh miah lo thung. Thian ang chauha min en duh vang mai mai zawkte hi a ni a ngem tih ka ngaihtuah thin.

Ni khat chu number hriat loh atang bawk phone call dawng lehin hmeichia alo ni nghe nghe a. inhmuh a duh thu chu min rawn hrilh. Kan school kalloh ni avangin keipawh  chuan inhmuh chu ka lo remti ve mai bawk a, a sawi ang ngeiin chhun dar 12 a rawn rik chuan amah hmu turin restaurant pakhatah ka va kal ve ta rawih. Tu nge a nih ka hrengai lova, mahse, Frankie hming sawia min koh chhuah miau avang khan ngaihthat lohna em em pawh ka nei hran chuang lo. A sawina hmun ka va thlen chuan amah ber kha tu nge tih ka hriat miau loh avangin ka han call tha leh te te phawt a, alo la rang kher. Tichuan, a thutna hmun te chu sawiin a chhungah ka lut vat a, kilkhatah hian min rawn be tu nu ngei mai chu ka va hmu ve ta a ni. Han en mai pawh khan nula intichangkang leh tunlai ve tak a ni ang tih chu a hriat theih mai a. A thawmhnaw inbel te pawh kha man tlawm zawk zawk tak an ni dawn lo tih chu ka hrenghal mai. Ka hnual nghal rawih nghe nghe a ni.

A hmaah chuan ți zeta thu thla ve nghalin, fiah em em mai hian min lo en kiau mai a. A engamah hmain ka zam titih der mai nia. Chutah, rawn nui deuh sang chung hian,

‘’ Nnagmah hi Sarah Malsawmzuali chu ini ang maw? Rebbec-I ka nia’’ min rawn tih chuan ka lo bu deuh nghat nghat a. A tawngka chhuak a zaidamin a nem thlap bawk a, a rilru pawh a chhelo turah ka lo ngai ve ringawt. Mahse,

‘’ Frankie nen hian eng inzawmna nge in neih a?’’ chang deuh hleka min rawn tih leh takah chuan a rukin ka thin hi a phu zawih zawih thei tawh a, a khawsak dan hi ka duh lo țan. Ban deuh chuarh hian,

‘’ Eng inzawmna mah nei lo ve. Kan inkawm ve thin ringawt’’ ka tih zawh rual chiahin awki pangngai tak hian,

‘’ Ka tih chhan chu maw, Frankie te nen hian thian inkawmngeih leh inzui reng thin kan ni ve a, engpawh ti dawn se la min rawn ko thin. Chutiang bawkin keipawhin ka tibuai ngam a. Hei, han en mai che hian I kum nise ala upa dawn lo tih hriat lutuk a ni a, zirlai inih ngei pawh ka ring. Tiraw? I hming hi a sawi ri ve ziah a ka rawn hmuchak deuh mai mai che mawle. Ka hmuh tum dan ai chein ilo chuti tehlua lo!’’ min rawn ti a nih chu mawle! Deuh sak sak chuan a! Kan vawikhat inhmuhna ve ve ah pawh hetiang hian min tawngkhum nghal a ni a, a zia hi ka ngaina miah lo. Tin,a sawi tum leh thil tih kual tum dan hi ka hrethiam chiah lo bawk a, kei hi eng ti turin nge min duh ang le.

‘’ Frankie chuan ka nihna hi a en lemlo a nia. Thiantha tak niin a fel em a ni’’ ka lo tih leh chuan min ngaihsan loh hmel zeta min la en vang vang chung hian a  țhen deuh sawng bawk a.

‘’ I hriat țhelh duai a nih chu! Ka hriat laiin I chanchin a tha zawnga a sawi awm pawh ka la hre lo! A khawngaih hmel riau che’’ a rawn tih leh chuan ka thu hle hle thei tawh lova, coffee pawh chu ka in tui nek tawh lo ve. 

‘’ Chuan, ka hrilh tum awmzia che chu I hrethiam tawh mai em. Be duh tawh suh. Nangni ang kum naupang lutuk leh, class sang bawk silo hi chu a theng thawngah in thawk vak ngailo’’ a rawn tih leh kher hnuah phei chuan ka ngaithei tawh thlawt lova, ka tho deuh nalh.

‘’ Hetiang hrilh tura min rawn koh vang vang avang hian ka lawm e. ka lo hrereng ang’’ ti ve ngatin ka kalsan ta a. min enzui vang vang tih pawh chu ka hria. 

Rilru na leh țah insum tak chungin roomah ka lut a, ka thin chu a rim hluah hluah a ni ber mai. Frankie hian khatiang ngaih dan kha keimah ah alo nei ru reng tihna maw ni a. ka duh lutuk tih hria in min khawngaih biak mai mai tihna maw ni a nga? Ala hre ve khawp ang. 

Ka thiante pahnih bula chanchin ka han hrilh ve chuan an lo thinrim in min laknatpui dun ve em em a, Rinthawvengi zawk phei chuan,

‘’ Awi! Chutiang te chu kek nghal țhuai țhuai ta che. Iva han laktlak loh tak aw. Min han hruai ve la chuan ka bin sak nghal hrim hrim ang che’’  tih pahin a inhrosa dur dur reng a, Ramengmawii thung kha chuan pangngai tak hian,

‘’ Frankie pawh chu be tawh rih lo mai rawh. A ti mak ve em mai. Nge, I zawtfiah law law zawk dawn a maw ni le’’ a rawn tih chuan rang zet hian Rini khan,

‘’ Zawt mahse, chutiang chuan ka sawi che a tih duh I ring emaw ni le. A thuhrim in amah zawkin a rawn be hmasa ve che a, hetiang hi I chungchang a sawi duh leh dan a nih si chuan min lo va han hmusit awm hlawm em em. Kei chu ka thin a rim tlat. Mipa mahnise insualpui mai hi ka pawiti miah lo’’ ti pang pangin ka lo nui deuh sak a. Rinthawvengi zet hi chu thiante chhan pe na thin tak mai kha a nia. Kan naupanlai phei chuan keimah vang hian mipa 3 vel lai a insualpui tawh nghe nghe. Hmeichhe sualpui chu ka peih lo a ho em mai ti thei chin ngat kha a ni ve a, ngaihzawng pawh a nei ngai lo reng. Engatanmah a ti lo tawp hi a nimai a ni. 

Awle, engpawhnise, tun atang chuan Frankie pawh ka be leh tawh ngai lovanga, eng ang pawhin min rawn be sawmsarih rawh se, ka be hauh lovang. School kal tura ka chhuah reng reng pawhin an café hlat thei ang berah kher bus pawh ka chang tawh thin a. ka thiante pahnih an rawn thlen har chang phei hi chuan nuam lo ka ti ru thei tawp. Mahse, chung hun zawng zawngah te pawh chuan Frankie hmel hmuh tur a awm ngai lova, khawiah pawh kal ila a hmel chu hmuh tur a vang ta pharh nia. Min rawn be tawh ngai miah lo bawk a, ni leh lo, a thiannu Rebec-I nena kan inhmuh hnu khan vawikhat chu min rawn be leh tak. Mahse, ka lo chhang let duh lo thung a nih kha. Tikhan, khami hnu atang kha chuan a reh leh ta vang vang mai a, engemaw tak hi chu a awm chiangin ka ring. Ka ring nghet tulh tulh. Ni lo se, hetianga reh thut thu hi a awm lo hrim hrim. A thiannu anga insawi Rebec-I lah khan a khat tawk hian kei chu min rawn be ve leh zoh zoh thin bawk a, 

‘’ I pian hi chu a nalh hran lo. Mahse, I hmel hi chu changkang tihtur nilo in a tha ve tho’’ tih mai mai te, chu pawh a number kha ka save ve avangin ka status engkim a hmu thei vek a, status rawn comment a hrat thei khawp mai. Tlema thuril han hmang deuh ila,

‘’ I lungleng a nimaw’’ tih te. A hneawm lutuk hi ka reply peih ngai chuang miahlo chung pawhin min rawn be buai ve sek zel a, a hman tak tak a ni. Ka thiante hnena ka sawi hnu phei chuan min hrawk hmasa hrep phawt a, a number chu delete tura min tih tak tlat avangin ka delete ve ta nge nge a ni e. A thawventhlak huai thei mai.

‘’ Naktuk chu class ka rawn kal thei dawn lova, ka ngai ngawt ang che’’ Rinthawvengi’n a rawn tih chuan a chhan ka lo zawt nghal vat. 

‘’ Ka putea fanu in pasal a nei dawn a, kal ve ngei ngei a ngai’’ a ti tlat bawk si.keia lo hnial sak ve ngawt theih ni hek lo. Tui lo zetin ka muhil a, zing ka thawh rual ruala ruah tla buan  buan te chuan khua a tichhe hle tih hria in ka phurlo zo vek. Chu mai pawh chu ni lovin, school kal tura ka insiam zawh vek tawh huah Ramengi hnen atang khan call ka dawng lehnghal a. class a kal theih dawn loh thu leh, hritlang khawsikin a man thu chu min la hrilh tak deuh deuh. A tawng zawng te pawh chuan a pik hle tih chu a hriat theiha, khawngaih viau tho mah ila ka ngei. Vawiin chu ka riang nileng dawn hle a nih hi.

Bus stand a ka din chhung zawng pawhin ruah lah chu ban a tum reng reng silova, a sur tam tulh tulh zawk emaw tih mai tur. Nihliap khum chung pawhin ka huh vek lo chauh tawh. Chutia ngui zeta mahni ngaihtuahna kawma ka lo din ngawih veng veng lai chuan tuemaw hi ka bulah chuan a rawn ding ve sat sat tih ka hre mai a. A ke lam chiah ka hmuh theih avangin a pheikhawk bun atang chuan mipa ngei a ni tih pawh ka hre nghal

‘’ Ilo tha maw?’’ chu chu Frankie-a aw ngei kha a ni. Ava mak the daih ve a. A aw ka hriat rual rualin ka nihliap ka la sawn nghal a, Frankie-a ngei chu alo ni e. nihliap keng chung hian min lo chhuk melh ve ran mai a, ka hmel a hmuh rual chuan mawi em emin a rawn nui leh ta nghal bawk.

‘’ Nnag chu’’ ka tih sap hnu ah a hma aia uar mah khan a rawn nui tha leh a. Ava han nui mawi chiang tak aw.

‘’ Nia, kan inhmu lo rei tawh sia,ilo tha em?’’ rawn ti nawn lehin ka lo bu deuh zoh zoh a. chutah, chhanna ka pek hma hmain amah bawk chuan,

‘’ Ti nge ka message hnuhnung ber che kha I reply duh miah loh a. min huatna I nei nge lehkha I zir nasa lutuk zawk’’ a rawn tih leh chuan ka thin alo phu dup dup tawha, ti nge, lehkhazir an sawi rik rual hian ka lo zah tlat zel le. Chhan mai ngaihna pawh ka hre ta lo. 

‘’ A,, ih,, nia tunlai chu ka zir nasa ve a. Nang zawk ti nge I reh vang vang a’’ tih leh daihin kan thupui thlak ka tum deuh.

‘’ Um, a that hlauh chu. Keini pawh kan department ho tour neiin kan chhuak a, nizan khan kalo thleng ve leh chiah’’ a rawn ti tha ve leh mai. Chuvang lek a nih chu a, alo reh em em ni. Chutihlai vek chuan bus pwh kha kan lam panin a rawn tlan ve mek tih ka hmu a, mahse, a ding mai dawn emaw ka tih laiin chak zet hian min tlanpel nghal daih nia! Driver khan min hmu miah lo tihna nge mawle. Bus tlanna lam hawi chuan ka au zui vak vak a, school ka tlai vek dawn asin. Engtin nge ka tih tak a nga. Chutianga ka lo buai chung lai chuan ka hmaah Frankie kha bike nen raincoat ha thlap chung hian a rawn ding zui zat a,

‘’ Rawn chuang vat rawh. Ka va thlah ang che’’ min rawn ti a nih chu! Ka rin loh dan lutuka a rawn chet avang chuan chetsawn mai nachang hrelo in ka ka hau ringawt mai a, min rawn koh nawn lehna ah chuan ka harh deuh zawk.

School kan thlen lai hian vannneihthlak takin țan dar alo la ri lo hlauh mai a. ka va han lawm tak. Ani chuan ka bag min khaisak in classroom awmna thleng min thlah deuh thlap a, ka classmate te ho in a hmel an han hmu thut chu a hmei a pa khan maktiin an meng phawk nasa ta hle. A ruk takin nuam ka lo ti veng veng thung a. 

‘’ Kal rawh le. Ban hunah pawh ka lo hruai leh dawn che nia’’ ala ti tak deuh deuh. Ka lawm leh helhhawlh nasa lutuk chu zuan vak vak mai ka duh tawh a ni. Nilengin ka mood a fuh chho char char a, nidang pawha ka biak peih ngai hleih loh Chhanbuh-a te thleng thleng khan hemi ni na na na hi chuan anmahni be hmasa tuah ka țang tluan chhuak parh! Fuh cher cher tak ka ni. Mahse, hetianga ka hlim em em lai hian kilkhatah engemaw hriatchhuah tur hi alo awm ve leh thin a, kha thil mawlh mai kh engtin nge ka hriatfiah theih a nga, ka zawh chhuah theih tak ang tih ah hian rilru ala buai deuh tlat. A thiannu sawi ang zawng zawg kha ka chunga a rilru put dan dik a nih theih chu ka ring ta miah lo. Ka zawtfiah ngam a ngem. Ka thiante pahnih hi ka sawichhuah tir tawp mai dawn emni. Mahse, thudik lo ni lo ta se, an thiandun inkar kha a chhiat phah vek ka hlau ve tho bawk si a, hei ber hian min ti awm nuam thei lova, ka nghet thei thlawt lo. Engpawhnise, khuareiah a khawsak dan atang ala hriat chhoh zel mai ang chu. Thil han inzawh nuam pawh ni nghal lo chuan. 

A intiam ang tak takin tlai ban hnuah pawh bike hmang bawk khan min rawn hruai leh ta a. Nihliap lianpui chu nei ve tho mah ila ka hak atan tiin raincoat a rawn keng deuh thlap tawh. Chutihlaia min lo hmu ve tu zirlai naupang tam zawk te chuan min en duh angreng hle maia, a bik takin hmeichhe ho mawlh khan inhrilh ru ser ser chung hian min rawn kalpel leh thuak thuak thin hlawm. A hrehawm loh ve e. 

Kan inkawt thleng min thlah fel hnuin lehkha zir tha tur chuan min han chah leh hram a, min hawsan zui ta a ni. A sawi vang chu  nimaw, lehkhazir chakna hlir hian ka khat nghal huam huam thei a, zanriah eikham rual rualin roomah ka lut daih a, ka zir leh char char! Mahse, chutia tui ti taka lehkha ka la zir lai chuan Rinthawvengi hnen atang whatsaap message ka dawng zui a. 

‘’ Awi, vawiin kan awm lo chu nuam ilo ti hle mai maw. Class groupah pawh an sawi luai luai che u saw. Chhelo tawkin a rawn thlah an ti che’’ a rawn ti duah. Amah pawh chhang let ta lo chuan class group chat zawk chu ka va en nghal thuai a, min lo sawi nasa tak tak hlawm hle. Awm ve lo ang mai ka ni e. mahse, a tute mah khan min sawichhe hran lova, Frankie chhiatloh zia leh hmelthat thu ngawt chu an sawi nasa ber a ni. Inhmeh min titu pawh zu han awm miahloa mawle! An va han mawl hel hul hlawm tak e aw.

Rinthawvengi leh bawk chuan text hmang hian,

‘’ Nitin hian class hi thulh tawh mai ila a tha ang. Nuam ilo ti ngat ngat em mai’’ emoji dah tuarh chung hian a rawn ti leh a. Ramengi pawh kha a bang bik chuang lo. 

An ni pahnih tello te hi chuan ngaihzawng pawh ka nei hrang bik peih teuh lo mai. Ka thil tihna kawng engkima mi fuih phurtu te pahnih an ni a. piang nawn leh mah ila an ni pahnih tih loh hi chu thian dang ka mamawh belh kher lovang. An ni anga thian hlutna hria, thiante dah pawimawh thiam em em tih loh hi chu midang ka duh lo. 

Frankie nen pawh kan inzui tam telh telh a, school kal tur min thlah leh pawimawh a ka chhuak tur tih vel te hi a tam zawkah min kalpui zat zat thei thin. Mahse, college zirlai ve mai ala ni a, zirlai ve tho a nih angin ka tibuai hreh em em thin zawk. A thiannu in ka bula a thilsawi te kha an dik tawk loh zia ka hrefiah tual tual a, kha nu khan dawt mai mai alo sawi kual thin tih pawh Frankie hnen atang ka hre ve leh vek tawh. Frankie hnenah chuan kei hian ka nin theih zia thu leh, min rawn be sek te chu zirlai mai ka nih angin a ninawm ka tih thin thu dawt hmang vekin alo sawi pek a, ka bulah nise, Frankie thusawi ni lo pui pui chu sawi angin a sawi bawka nih kha. A ngampa ve angreng khawp mai. Khatiang tih alo chin vang khan Frankie ngei pawhin a biak duh tawh loh phah a, a kawm tawh ngailo. A thuhrim in tunhma atang alo ngaizawng ru ve em em tawh thin a nih hmel a, thian nihna changchawi hian thilpek te pawh pe in alo inhuam thui thei hle a nih hmel. Frankie nen kan inzui nasa leh tawh tih a hriat hnu pawh hian ka lakah  țuan in min rawn biak kha a hrat chho leh viau tawh a, tawngkam na tak taka min beih chu tum chuang hauh lo mahse min khei fak fak tur zawnga rawn tawng hi a hrat reuh phian lehnghal. Ka chhang let ngai miah lo na in a sim duh chuang lo. Ka thiante pahnih bula chanchin ka han sawi leh erawh chuan a number chu block hmak turin min lo duh thung a, mahse, kei hian ka fel fal vang ni hauh loin, ,mi number block hi ka hreh ve tlat thin si. Marawh chu, hetianga ala rawn che chhunzawm zel dawn a nih chuan harsa ti tak chung pawhin ka la block lo ang tih ka sawi thei lo. A ninawm mah mah tawh tlat. 

Ka nu in ngaihzawng ka neih thu alo hriat chuan min hau hrep mai a, ka zirlaiah chiah chuan rilru pe turin min duh bawk. Chubakah, kum lamah nise ka la naupang em em bawk a, nu leh pa tan chuan an naute anga cheibawl rual lek kha ka la ni hrim hrim bawk.

‘’ Hetiang I nih chuan I phone kha ka laksak tawh dawn che a nia. Board exam hnaih tawh tehreng nen hian I khawsak dan hi ka duh lo reng reng’’ ka nu in a tih bawrh bawrh lai chuan eng thumah sawi ve ngam lo in ka ngawi reng ringawt a. hrehawm ka ti takzet bawk. Inthup nachang kan lo hrelo mah mah deuh a ni e.

Ngaihzawng ka nei tih a hriat atangin ka nu chuan pawn chhuah min phalsak ta mang lova, phone erawh chu min laksak em lo thung. Class ka kal a nih ngawt loh chuan in lamah inkhungbet chawtin lehkha ka zir a, min vil ngar ngar thin. Zan mut hun hi ka phone khawih theih hun chu a nimai a, Frankie pawh a lungawi lo ve thin hle. A mawh love, ka awm dan engmah hi a rawn hre ve lo tlat atin ni. Mahse, kan inhmuh khat tak em avang leh , inbiakna hun takngial pawh kan neih loh tak em avang chuan a mipa thinnlung rawn chhuakin a chhan chu min zawt ta nge nge a. hrilh loh chi ni tawh hek lo, ka nu min khuahkhirh dan zawng zawng te pawh chu ka hrilh ve ta vek a nih kha. A lungawi lo viau dawn emaw ka tih laiin a hrethiam ta angreng phian zawk a, mahse, ka lo inthlahrung zawk daih. A thuhrim in, min hmuh te hi a chak in min thlahlel ve miah lo em maw ni le. A mak thei e.

Zan khat erawh chu ka nu inkawm bo hlan in ka chhuak ru ve leh a, kan inhmu ve leh thei ta hram a nih kha. Mahse, kan lo inkawm tui deuh nge ni, inkhawm ban hun theihnghilh thak khawpin kan teikual dun a, kan hriatchhuah leh meuh chuan zan dar 9 lai alo ri tawh nia! Rang lutuk hian min thlah haw a, inchhung lo lut ve lo tura ka tih pawh chuan a duh tlat lo. Ka nu chu min hmuhpui ngei a duh zawk a nih hmel e. Tichuan, inthlahrung zeta inchhung ka lut chu ngawi rengin min rawn zui lut zel a, ka hlauthawng ru takzet tawh. Hlauhthawn ang ngei ngeiin ka nu pawh chu chaw ei dawhkan kilin alo thu tum bar tawh ngei a, kan hmel a rawn hmuh rual chuan khawng zet mai in a rawn tho chhuak nghal zawk bawk. Rum zeta min rawn melh hnuah, ka hnunga lo ding ngawi reng Frankie chu ava melh ve leh a, a thaw zui hak bawk.

‘’ I roomah lut rawh’’ min ti chang fakin, ka lo phu deuh zawk hman a, tichuan, thu kam khat pawh chhak chhuak ngam tawh lo chuan Frankie-a ka melh leh zawk hnuah room lam chu ka pan ta zawk a ni. Khum chungah thu in choka lam thawm chu ka ngaichang pah reng a, mahse, eng thawm mah ka hre zui lo thung. Ka nu khan a hau hrep dawn emaw tih laiin an reh zui ta vang vang mai si a, ka thaw leh deuh halh thin ringawt. Chutah, choka lam bihthlak tuma ka tho chhuak tih chuan message dawng zuiin, rang zet hian phone chu ka laa, Frankie a lo ni.

‘’ In ka thleng chiah e. I muhil tawh em’’ ka meng bial nghal kawk thei. A chet ran dan em em chu mak ka ti zawk hial. Ka nu nen khan an inbe miahlo tihna emaw ni le.

‘’ ka nu khan eng thu nge a sawi’’ tia ka reply chuan,

‘’ Eng em em sawi lo e. lehkha hi zir tha ula a tawk chiah min ti’’ a rawn tih chuan ka nui chhuak hak mai. Min thlah haw lo ang tih kha ka hlau leh hnuhnawh hle mai. Min thlah haw loin mahni chauh khan lo haw ngat ila chu ka nu hian min hrawk hrep loh pawhin min hlap duh ngei ngei ang. He mihringpa hi chu ka hmangaih tulh tulh dawn a nih hi. 

Kha zan atang phei kha chuan ka nu min enkawl dan chu a danglam leh ta tulh tulh a. ka rinlawk loh dan deuh deuh hian a che chhuak leh thut thut thin. Zan khat phei chu lehkhazir laiin phone ka lo khawih palh a, chu chu min rawn hmu fuh hlauhin ka phone chu min chhuhsak hmak.

‘’ tihtur ka hrilh chin che hi ti mai rawh. Exam zawhah bak phone hi I hmu let tawh lovang’’ min ti hmakin min kalh khum a, a tuk zingkarah bak room kawngka pawh min hawnsak duh lo a nih kha. Ka nu thiltih dan zawng zawng chu ka thiante pahnih bulah pawh ka sawi ve a, an thinrim dun kher.

‘’ Lo lungngai miah suh. Frankie chu chanchin hrilh dan kan lo ngaihtuah dawn nia’’ tia min hnem tak chinah erawh chuan tlemin ka dam phah ve deuh sawt a, lo hrilh mawlh the se.

Ka nu hian hmangaih hmasak ber leh, first love kan tih ang hi a nei ve tawh thin a ngem le. A nei ve tawh ngei ang le. A nih chuan ti nge min hriatthiam theih miah loh le ka ti. Frankie hi ka tan chuan ka mipa tawn hmasak ber leh ka ngaihzawng hmasa ber a ni ve a, tleirawl thinlung thianghlim tak ni thin kha hmangaihna danglam takin rawn palh dal zelin, tunah chuan ka lut thuk ve tawh lutuk a, mahni chauha inhaichhuah dan ka thiam leh tawh si lo a nih hi. A nih chuan ka nu hian tleirawl nih laia ngaihzawng neih dan dik te hi tha takin tawngkam pangngai takin min hrilh ve thin se, hetiang em em hian ka mawlmang lo tur a nia. Engpawh chu nise, tu thiamloh mah nilovin, keimah thiamloh vek an ni e. 

Ngaihzawng chu swi loh, mipa duhzawng pawh kan la hriatthiam loh lai, duhzawng neih nachang pawh kan la hriat loh hunlai te ngai tak chung zelin hringnun chu ka hmang chho ve bek bek zel a, ka nu lahin min biak chhunah pawh lehkhazir tur bakin min be tha duh rih bawk silo. Inchhung chu hrehawm ka ti ngawih ngawih tan a, ka ning tlat. Pa tia koh tur nei tawh lo ka ni a, pianpui unau lah ka nei chuang bawk silo. Ka tan chuan kaa nu hi ka neihchhun ngawih ngawih a ni ve a, min hmangaiha min enkawl seilenna te engtikahmah ka rul zo seng ngai hek lovang. Chutiang bawkin ka nu tan pawh a neihchhun tho ka nihna laiah min ta hauh bur thin a, min hmangaih takzet tih hi ka hria. A lung tih awi loh pawh hi ka hlau em em thin a ni. Ka phatsan thei ngai lovang.

Thla thar bultanna hi kan exam hun tur a nih tawh angin study leave kan nei ve  țan tawh a. lehkhazir nan ka hun tam zawk chu in lamah ka hmang mek a, chhunah hi chuan ka nu hian a hnaah min kalsan daih thin avangin mahni chauhin inchhungah ka tawm rek rek thin a, pawnlamah kawngka min la kalh khum daih zui. Phone nise min la pe let duh bawk silo. Lehkhazir ngar ngar mai chu ka tihtur leh tihtheih awmchhun a ni tawp.

Chutia, chhun pachan laia muthlu lawp lawp chunga lehkhabu ka lo bih ngar ngar lai chuan ka room tukverh rawn kik karh karh thawm ka hre ta phut mai a. chilthli tla phung chung chuan ka hawi phawk nghal hru bawk. Mahse, tukverh lam ka va hawi phei nak chuan pawnlamah ka thiante pahnih hmel kha ka va hmu zui nghal a, ka lawm kher. Rang zeta tukverh chu va hawnsak in eng nge an rawn tih dawn ka zawt nghal vat. Chutah, Rinthawvengi zawk chuan hmanhmawh hmel fe hian, 

‘’ I hmai te va phih fai la, hruaichhuah che kan tum. Frankie-an min rawn chah a’’ a rawn ti ta mai. Ramengi pawhin hmanhmawh tura min lo tur tak sek avang chuan rang zetin ka tlan lut lehnghal a, hmai ka phih a sam te ka țawn fel leh hnuah thildang engmah pawh keng lemlo chuan ka chhuak ve ta ngawt a nih kha.

Frankie lo awmna hmun nia an sawi lam kan va thlen phei chuan an sawi tawh ang ngeiin alo awm bawk a. min lo nuih var var. Chutah, Rinthawvengi bawk khan,

‘’ Ti vat vat r’u aw. Miin an hmuh tam hma che u hian’’ ti leh sawk sawkin min la hawsan daih lehnghal a. ka hawihai angreng hle. Mitmeng buai nak chunga Frankie-a va melh pah chuan,

‘’ Eng nge awmzia. Eng thil chu nge kan tih dawn a’’ ti he hu chungin ka hawi kual ruai ruai reng a. ka thiante pahnih lah chu hmuh phak rual loh hian an bo zui daih mai bawk si. Ka mangang  țan. Chutihlaiin Frankie lah chuan,

‘’ Hawh, bike ah hian chuang phawt la, hmun hla deuh kan pan dun dawn a nia’’ a rawn tih leh lek phei chuan thil awmzia ka hrelo tulh tulh.

‘’ Aih! Lehkhazir ka ngai alawm. Ka nu rawn haw hmaa haw let leh ka ngai’’ tih pahin ka lo la țang deuh fun fun a. mahse, amah bawk chuan dimtea min rawn kaihsawn pah hian,

‘’ Kan kal hla dawn lo. Min ngai ve miahlo tihna emni?’’ a tih leh takah erawh chuan hreh zet hian ka zui ve ta nge nge a. kan tlanchhuak nghal bawk. Kan tlan thui tulh tulh a, ka bangbo telh telh. 

‘’ Khawiah em em nge min hruai I tum a’’ ka tih chuan bike khalh chungin thei leh theilo hian  a rawn au ve  țawk țawk bawk a. 

‘’ ka patea te khuaah kan kal ang!’’ a rawn ti daih a nih chu mawle! A thilsawi leh awm dan avang chuan ka thin a phu deuh zawih zawih thei a, he pa hian tihian min ru ta mai tihna emni le. Pasal um nih ka duh lo asin.

‘’ Engmaw? Kan inru tihna mi?’’ ka va tih leh lawng lawng lai chuan a lu chu rawn bu nghat nghatin, a nui tih pawh ka hre thei. Karei leh! Kei hian pasal ka nei ang maw. Pasal nei rual pawh ka la ni hleinem. Bike atang hian ka zuangthla daih dawn nge, ni leh lo ka duh teuh lo mai. Thih hi ka hlau. Rinthawvengi te pahnih kha ka hmuh leh hun hun chu an chak lo nasa dun the ang chu aw,,ka kek kawlh vek thei ang. Min han bum chhuah ve khanglan chu le!

Rilrua inhrosa kuk kuk chungin țang teuh leh bet lo zet chuan ka thu lui ve ngar ngar bawk a, ka thlan a luang zawih zawih thei tawh mai. Kan tum ram kan thlen hunah engtin tak awm zel ang maw. Men pawh ka meng ngam dawn emni? Ka nu mawlh mai kha. Ina a haw hunah ka hmel hmuh tur alo awm tawh dawn silova, a bangbo lutuk tur chu ka lo khawngaih lawk ringawt. Mahse, damtea kan awm chuan inhmuh hun kan la nei leh ngei dawn a, ka chak lo viau maithei a ni.

Tlai dar 4 velah a patea te khua chu lutin, a patea te inah min hruai lut nghal bawk. Min bum chhuak chiang bawk a amah chu ka la melhrum ngar ngar reng mai. Tichuan, inhmelhriatna te nei leh zung zungin chutihlai chuan kei chu za lo zet hian ka lo nui ve var var reng a, boruak hi a rit tawp. Chutihrualin, an han inbiak dan velah chuan a hma daih atanga he thil hi lo ruahman lawk vek tawh an nih duh hmel em a, ka zak leh hnuhnawh. A thuhrim in Frankie pawh hian hetiang thil tih a duh a nih te chuan min hrilh lawk ve bawk tur a ni a, ka thiante kaltlang tal pawhin min rawn hrilh hmasak ve bawk awm. Ka hmai ka phih a, ka sam ka țawn leh tawp a, tihian pasal ka um ringawt chu a nimai sia! Thawmhnaw hak thlak pakhatmah ka keng chhuak ve bawk silo a zialo ngawt a ni. Tichuan, a patea te nen an inbiak zawh hnuin roomah kan lut hrang a, chutah chuan ka chhuahchhal nghal zat mai.

‘’ Min hrilh lawk ve tal tur che hi a nia. Engmah pawh ka hre ve lo a’’ ti bai baiin ka hawi tau deuh hmak phawt a, nui var var chunga min rawn kuah pah hian,

‘’ Lungngai suh. Hei ka lo inring lawk thlap alawm’’ tih pahin a racksack ken kha a han hawng zui rak tak phawt a, chutah, hmeichhe thawmhnaw la thar tha tak ta hi rawn phawrhchhuah pahin,

‘’ Ka nau te thawmhnaw tha vek an nih hi! Lungngaihna tur a awm lo’’ rawn ti liam leh puatin, awi! Khua hi ava han var lo tak em. Hmeichhia hi chu khawi hmunah pawh kal ila mipa anga awlsam leh ti ve zung zung thei kan nih loh zia a hre miahlo a nih dawn hi. 

Ka rinai takin a patea te chhungkua hi an lo fel em em a, min ti tha in an bula khawsak lah a hahthlak miah bawk silo. Mahse, kei hi mi inkiltawih hma chi tih takah hian khawi hmunah pawh awm ila ka thiante an awm ve loh chuan hrehawm ka ti hma thei em em a, ka tlei tak tak thei ngailo. Thingtlanga khawsa tihtakah, huan lo ram te neiin sanghal dil zau tha tak te an nei leh zel a, chungah pawh chuan kan inthlahrun lutuk loh nan tiin Frankie nen hian min hruai ve thin. A nuam phian. Khawpui nun ri hulh hulh mai tem reng ai kha chuan helai hmunah hian nun a tluangtlam a, kan thawveng zawk bawk.

Mo thar ang mai ka nih bawk avangin inchhungah tihtur ka zawng kual ruai reng a, ka thu mai mai ngam lo. Engemaw chang chuan Frankie zawk hian  min tih chhawk ve leh lawp lawp thin a, a patea te khap ngai hial khawpin tihtur ka zawng ka ti mai. Mahni in lamah pawh kan tihthat peih hleih loh kha mi inah chuan kan kuta dah vek mai alo awl ve tawh si a, a hrehawm chuang lo bawk. Min ti awm nuam zawk.

‘’ Frankie, ka nu hian kan inneih hi min phalsak ka ring miahlo a nia aw’’ amah pawh melh tha ngam mang lova ka han tih chuan min rawn kuah nawk nawkin ka biangah a chuk zeuh a, a thaw lum nghal ham ham bawk.

‘’ Ka awm hi, lungngai lutuk thin suh’’ ti liam leh maiin kei ka lo thaw deuh hak thung.

‘’ Engvanga min nei ve duh ringawt nge I nih hrim hrim a. kum lamah nise kan la naupang dun ve angreng sia’’ ka tih leh chuan a chal hmangin min rawn nawr leh nek nek thin a, chiang zet hian min en deuh reng bawk.

‘’ Ka hmangaih che ka tih kha. A bak a awm lo. Hmangaihna leh rinawm tawnna hi a pawimawh ber a, chu chu kan nei ve ve bawk a, kan innei tihna a nimai’’ a ti leh a. A bak han sawi tur mai ka hriat loh avang leh, ka mut a chhuah tawh bawk em avang chuan ka ngawi zui ta daih a. ka sam a rawn chul heuh heuh lai chuan hriatloh karin ka lo muhil ta nge nge a ni.

A tuk khawvar ruala ka han harh chuan Frankie kha khumah alo thu tawh a. Phone ah chuan tuemaw nen an inbe mek tih pawh ka hre mai. Thu chhuak ve nghalin a hnunglam atanga ka va kuah rual rualin a rawn hawi let nghal vat a. chutah, phone chu min rawn pek pahin,

‘’ I nu a nia. Be lawk la’’ a rawn tih zet chuan ka thin alo phu leh dup dup tawh a. ka hreh takzet. Kut khur ru dar dar chungin phone chu ka la ve a, 

‘’ Aw nu, ‘’ ka aw pawh chu a dik hleithei tawh der lo niin ka hria. Mahse, lehlam atang hian ka nu chuan rinloh lutuka zaidam hian,

‘’ Ka fanu, I tha maw. Ka va ngai tawh che ve a. Engtik nge in lo haw theih ang le’’ a rawn ti dam dap mai nia mawle! Ka nu niawma mawilo khawpin a rawn zaidam tlat. Chhan dan tur mai ka hrelo lutuk chuan Frankie kha ka va melh leh ringawt thin a, ani pawhin min lo en ve reng. Chutah, ka nu bawk chuan

‘’ Frankie nu leh pa te nen pawh engkim kan sawi ho vek tawh a. A rang lama in rawn haw thlak phawt hi a ngai a ni. Heti ringawt chuan ro rel fel a harsa em mai’’ rawn ti lehin a dik chu ka ti tho mai. 

Rei pawh kan inbiak hma in phone kan dah a. choka lama kan chhuah phei chuan Frankie patea te pawh khan Frankie-a nu le pa te lamin an rawn biak thu leh, haw thla phawt rih tura min duh thu te lo sawi ve in, khu lamah a rang lama palai te intirh pawh an duh thu an rawn tiin min lo hrilh ve nghal a. frankie nen chuan kan inmelh leh ralh ralh thin ringawt. Diktaka sawi chuan aizawla lama chhukthlak leh hi kan hreh dun em em tawh a, mahse, helai hmunah hian heti ringawt hi chuan cham bang thei kan ni bawk si lo. Chutianga palaite tirh an tum tak taka min pawh then an tum lemlo a nih si chuan tiin patea te thu ang chuan aizwl panin kan haw thla dun ve ta zawk a nih kha.

Kan thlen thlak hnuah ka nu chu Frankie te inah rawn kal nghal in, min hruai haw leh ta phawt a. frankie chhungte chuan a rang lama palai rawn tirh an tum thu pawh sawiin, an intiam ang ngei chuan in lama ka haw hnu ni 3na ah palai hmel pawh kan hmu ta reng a. mahse, ka rinloh lutukin ka nu khan palaite kha alo hnar fithla  țhak a nih chu mawle! A fanu hian kum 18 ka tlin chian loh avangin pasal min neih tir mai ala phal loj nasat zia chu uar taka lo sawiin, palaite hmaizah zo lo khawp khan  alo ang hrep mai bawk. Ka zak lutuk hi khuk ral chem chem ka chak ber awm e. A hma lawka phone atanga min rawn biak dan nen kha chuan danglam tawh tak a ni e. Frankie chhungte chuan engtin tak lo ngai ang maw. Rapthlak an ti ngawt ang chu.

Hetih lai hian phone min pek let tawh avangin Frankie nen pawh kan inbe thei tawh a. ka nu thiltih dana an lawm loh thu chu min rawn hrilh ve nasa thin. Rilru hah tawh sa nak alaiin Rebec-I lah khan number dang atang hian min rawn tihbuai a hrat chho leh ta tlat mai a, a hneawm takzet. A sawi dan chuan ka nu thiltih dan ah Frankie chhungte chu an lungawi loh em avangin Frankie hnenah pawh kei chu min be tawh lo turin an ti hial a niawm a. kan inkawp leh hi an duh tawh lo hle a nih awm chu. He nu thilsawi reng reng hi chu awihsak ka duh tawh lova, ka lo thutaksak vak duh lo bawk. Mahse, Frankie khawsak dan a danglam tak em avang leh, min biak khat tak hlek avang erawh chuan tlem tlemin ka awih ve deuh chauh zawk. Thla hnih a vei leh hnuah phei chuan a reh zui ta hmak a. call pawhnise a la duh tawh ngai lo. Engtin nge hetiang hian min tihtheih zawk le. Ka na em em a, tihtheih lah ka nei chuang bawk silo. Mahse, a tawpah chuan thudik dang lo lang lehin he thu phei hi chuan min țhawng na em em a, ka tliak hnawp a nimai.

Ni khat chu ka nu awm loh laiin ka thiante pahnih kha an rawn lang ve leh a. kei chu ka chauh deuh hlek avangin sofa chungah ka lo mal zuai duai bawk.

‘’ frankie chuan lungawilo zetin Delhi lamah a chhukthlaksan tawh che kha!’’ an rawn tih chuan ka mu lai pawh ka inperh tho zawk thei. 

‘’ Eng nge insawi awmzia chu’’ tih paha an hmel ka entawn zak zak lai chuan Ramengi zawk khan min rawn chhang ve thung a.

’ I nu  tawngkam leh thiltih dan vanga an lawm loh tawh sa tehreng nen, amah chu neih I duh tak tak loh thu leh pasal neih ila duh loh thu te ilo sawi nge maw ni. An hre ve leh bawk sia, an sawi leh dan ah phei chuan nei duh tak tak ni la kum tling lo tihte mai mai chu chhuanlam a tlin loh thu te, a siam danglam theih vek tih tawngkam te hi nei angin an sawi che a, ilo sawi tak tak em tih chu hrelo mah ila I tih duh hi kan ring bawk silo keini pahnih hi chuan. Frankie pawh a rilru a na lutuka, a chhungte duh dan leh ama duhthlanna ni bawk siin Delhi lamah zirna chhunzawm leh a tum ta ngawt a nih kha. A kal tawh’’  a rawn tih chuan ka mit deuh sulh sulh nimai hian ka hriaa. Sawi tur ber pawh ka hre mai lo.

‘’ Chutiang chuan kei hian ka tih duh in ring a maw!? Ka nu in an palaite alo hnawl zan pawh khan hrehawm ka ti lutuk a ka muhil thei lo zawk asin. Chutiang em em a na tur chuan tu phiangsen in nge Frankie leh a chhungte hi lo bum thei ang tih chiah ka hre duh’’ tap zawih zawih chunga ka han tih ve takah chuan min khawngaih tih hriat tak hian min rawn kuah dun ta hle hle zawk a. ka lungchhe zual sawt. An thiltih kual dan hi a rilru chhiat thlak em atin ni. Frankie pawh call tumin ka bei nghal ngat ngat a, switch off a inti zel si. Min be duh tawh lo nge number a thlak ta tih pawh ka hrethiam lo. A reh vang vang a, a status leh story engkim ka hmu ve thei tawh ngai bawk silo. Puk kawrawng thim tak chhunga dah luh ang mai hi niin ka inhriaa, ka awm dan hi a hrehawm lutuk a, sawifiahna ngaihna pawh ka hre lo hial zawk. 

‘’ Zani chu arsa bawp hem hmin ngat hi hmeh ang aw’’ ti siam siamin ka nu chuan chawi ei dawhkanah arsa bawp hem hmin la lum vat vat chu a rawn chhawp zui bawk a, ka lo en vang vang lai chuan tum lawk loh deuh hian ka uak ta țhat mai. Chiang lutuk hian ka nu pawh chuan min rawn en ve nghal vat a, ka inthlahrung leh zo vek tawh. Mahse, a rei hnuah chuan zah sawi theih pawh a ni tawh lo ka luak chu a chhuak zual ngut ngut a, uak tuarh tuarh chungin bathroom lamah ka tlanlut ta ngawt a nih kha. Duhtawka rei bathrooma ka inkhung tawh hnuin ka nu min rawn ko thawm ka hre leh a, kawngka ka han hawn nak chuan test kit hi a rawn rawlh lut zal zal. Thinphu dup dup chungin chu thil chu ka lo la ve vat a. ka hreh ngawih ngawih mai. Ka thiam ang tawk tawka ka zun ka test hnu chuan a negative tih hria in uar fahran hian thaw pui ka han chhuah leh hawk phawt a. ka mittui a rawn tla chhunzawm nghal bawk. Tunah tak hian ka na nge na lo tih pawh hi ka inhrethiam tawh lova, ka buai a ni. Commode a la thu reng chung chuan Frankie bawk ka zuk call leh thin a, mahse, a hma ang tho khan beidawnna bak min thlen lo. A biak theih loh hulhual a ni ber e. um, a pawi love, a telloa nun dan ka zir chhoh tan a ngai dawn a nih hi tia ngaihtuah pahin ka inbual zui daiha, ka harh phah sawng sawng in ka hre bawk.

Ni khat pawh ka thiante pahnihin kan vah harhpui ang che min tih deuh tlat avangin phur viau lo tak chung chuan ka zui chhuak ve mai bawk a. Bazarah te kalin khawi khawiah emaw min kal kualpui hrep a, chutah chuan hmun pakhata kan kal naah hian kha nu, dawt hmanga rak rak thin Frankie thiannu Rebec-I ngei mai kha va tawng fuh leh in, thlalak tuma alo inherkual lai tak chu a darah ka va kuai her deuh sawk a, engkhaw sawi set set lo in na zet hian a hmaiah ka beng nghal țhuai. Midang lo awm ve ho chu maktih hmel deuh a rak țhat hlawmin a tu amah chu ka pawi sa zo tawh lo tlat. Ka ben zawh rual chuan ka kalsawn lehnghal nal nal a, ani pawh khan min rawn umzui chu a tum bik chuang lo. A ding khawng reng ringawt a nih kha.

Hre rawh se. A thil tih dik loh zia hi hre nawn mawlh rawh se. Amah tih chauh lo chu hetianga thu veivir kual thei tur hi an awm lo tih pawh ka hre vek tawh. Awm ang tak taka thusawi a thiam a, dawt hi eizawnna atan hmang se chuan mizoramah hian a hausa ber tawh hial ang chu tihtur khawpa mi dawthei a nih kha. 

Tunah chuan Frankie kalbona pawh kum 1 lai a lo tling ve ta reng mai a. kan la inbe leh miah lo thung. A phone number kha a thlak daih tih pawh chiang takin ka hre tawh a, min rawn bia a nih loh chuan biak buai tumna pawh ka nei tawh bik chuang lo. Ngai em em reng mah ila a tan ka tling zo ve tawh miau si lova, tihian ka ta tur diktak nghakin ka lo awm ve hle hle phawt mai a niang chu. Mahse maw, intawng tura khuanu ruat hi an lo awm ve hrim hrim nge chu ka hre lo. Ka piancham vawi 18na kan lawm zan hian ka thiante ho an haw rem vek tawh hnuah phone call ka dawng nawlh mai a. number hriat ngai loh atangin alo ni nghe nghe. Chuta ka han lak nak chuan Frankie ngei kha alo ni ta a!

‘’ Happy Birthday! Ka duh nu’’ rawn tiin, ka piancham alo la hre ve chuan min ti țim sung sung mai.

‘’ Tunah chuan kum ilo tling ve tawh bawk a, nang leh kei hian ‘tiam tlat e’ kan ti ve thei tawh ang chu tiraw?’’ a aw tham mawi taka a rawn tih leh chuan ka lawm lutuk hi ka so bulh bulh thei tawh hial a, chhan let ngaihna pawh hrelo in ka nui chhuak ve ta var var ringawt. Nia, tunah hian thinlung takin asin ka nuih ve tawh ni.

***     *****    ***     ***    ******     *****     ****      *****     ***     ***     ****   *****

Leave a Reply