You are currently viewing HMAI HNIH NEI-A CHU!

HMAI HNIH NEI-A CHU!

Spread the love

Vanlalpeki Fanai

******************

“Kha, thawm ri rum rum kha in lo hre ve em?”

Țhianho a Kan lo țhutkhawm țhep țhawp lai chuan Tlanmawia chu thaw hlawp hlawp a rawn tlanpheiin, a rawn au pah lung lung bawk. Keini ho erawh chuan amah chu phâwk fe hian kan lo melh Leh let țhap a, chutah, Kan zinga te ber leh bengparh tak, Immanuel-a lah chuan zawi set sut zet hian

“Khawpui ri Mai Mai a ni lawmni? Dawih-a” lo ti ve zauhin, Tlanmawia erawh hlauh thawn vang nimaw, ala meng phâwk hrû Mai. Anni pahnih tih loh, kei leh Rintluanga chu Kan lo nui zui kiah kiah bawk a.

Kan Țhianho hi mipa hlang Pali niin, hmeichhia Kan kawm ve vak lo a, hnawk Kan tih bakah, min ti chhangchhetu Kan ti Mai țhin. Tin, Țhianho a chhuah thawven, hiking leh kháwi hmun hmun emaw tlawh a vahchhuah tih vel hi Kan hrat ang reng phian a, tunah pawh chutiang chu ti leh mek in, Sialsuk Tlâng lamah tent Siam chawp in, Kan riakho leh tawh a ni. A tlangchhip a riak Kan ni bawk a, thli a tam in, boruak a thawveng ang reng hle a, van a arsi pe tuar te pawh chu Chiang takin Kan hmu leh thei tawh. Hetih hunlai hian keini Țhianho tihloh, midang riak ve an awm pawh in Kan hrelo nghe nghe a, Kan zalen phah phian bawk.

Guiter perh pah a Kan lo zai al al lai in Tlanmawia bawk kha a rawn țawng chhuak leh ta.

“THAWM ri rum rum kha in hre ve miahlo maw?” a rawn ti leh e. Kan zinga zai ve lo aw chhun Rintluanga chuan lo chhang let thuaiin

“Immanuela sawi ang kha ka hriat dan ve tho a nia, Khawpui ri nimai ah ka ngai”

Hmm, Tlanmawia zet hi zawng, Kan Țhianho zingah pawh a phili buai chi leh, a thil hriat tawh te vawng reng chi, thil nihna diktak a hriatfiah hma loh chu ngawih bosan hleithei lo chi kha a ni ve țhin a, keini a thiante hi hi chuan ngaih kan nei titih tawh. Diktak chuan tun a thil sawi, ri rum rum a tihte pawh kha, Kan thlang daih motor kawng pui lam ațanga thawm rawn chhuak Kan lo hriat fuh Mai Mai a nih ka ring a, chutiang in Khawpui ri pawh a ang ka ti ve lem lo.

Zan dar 10 hial a rik takah chuan zunram te thiar leh te te in, mahni tent awmna hmun țheuh ah Kan lut leh ta dial a. Tin, Kan tent hi inkarhlat lo te te a Siam hlawm in, chil chhak phak taktak vek ah Kan Siam hlawm a ni.

Ka muhil dawn chiah tih ah hian ka riahna bûk rawn beng dawt dawt tu chu an awm ta Mai a, phâwk fe in ka țhu chhuak nghal zawk. Ka țawng chhuak Mai ngamlo bawk. Mahse, chutia Kalo țhut ngawih Kar lai tak chuan pawnlam ațang au thawm ka hre zui ta a. Tudang nilo in, Tlanmawia aw ngei a ni tih pawh ka hre nghal. Ka riahna chu rawn Ben leh dawp dawp pah hian

“Lo hawng teh Zico, I muhil tawh emni?” a aw ațang ngawt pawh chuan thil engemaw tak zawng tawn leh hriat a nei a nih hmel e. Chutia, țhjanpa Tlanmawia lek alo ni tih ka han hriat takah chuan ka tent kawngka chu va hawnsak thuai in, Ani chu a rawn tlu lut thawthang hi a ni ringawt e. Min ti phu zawk thei.

Thaw hlawp hlawp Chung hian amah bawk chuan

“Ilo hre ve em? Englo, tuin emaw ka tent kha a rawn Kal hual reng a, a mak lutuk” ti zui bawrh bawrhin, a hlau hle tih chu a awmdan ah pawh a Chiang viau awm e. Tin, Ani hi ka riahna bul hnaih ber a riak ve kha a nih bawk avangin keimah min rawn pan ta hi ni turah ka lo ngai Mai a. Kei lah chuan, Lu thak lo pui hiah nuah nuah pah hian

“Chutiang thil pawh Kalo hriat ve miah si loh. Chuloah, ka muhil tur min rawn ti harh zawk anih hi. Mi mah muthilh harsat naklai in, i dawih thei lutuk” Kalo ti let erh. Chutah, a chhuak veleh Mai dawn emaw tih laiin ka awmna lamah chuan Ala rawn tawlh hnai ang surh surh zui a, ka va han ning tawh tak. A hawi kual zuk zuk reng bawk si nen min ti bangbo hle a ni.

“Nilo Zico, thil engemaw tak chu helai hmunah hian a awm a ni. Ramhuai nge mihring tih chu hrelo mahila, engemaw tak zawng a awm tih hi ka Chiang khawp. Kan va fish chhin dawn emni?” te chu Ala rawn ti tak deuh deuh a, a hneawm mange.

“Aa eng thilmah a awm dawn lo, tunhma zawng pawh in Kan riak fova, keini chauh lo pawh in riahnan hian an hmang ve bawk. Eng thil danglam leh maksak mah an tawn thu hriattur pawh a awm ngai hleinem le. I ngaihbel Mai Mai a nih kha. Sazu puitling thawm bak a ni hlei lawnge” ti zui nghek in ka mu țha ta sauh sauh. Chutah, amah bawk chuan tent luhka zip phui hmak pah hian

“Chuti, zanin chu I bulah hian Kalo riak ve teh ang aw. Awm a nuam lo duh em mai” ti khur hluk hlukin ka bulah chuan a rawn inhawlh ve ta kûk Mai a, ka chhang let peih tawhlo, ka muthilhsan zui hmak.

Khawvar rual deuhthaw a tho chhuak in Mei ka tinung leh vat vat a, hetihlai hian țiau chhum pawh la zing paw deuh chiai in, Dai tla te chu a far ri fap fap reng bawk. Vawt Mai Mai reuh tak a ni. Chutia, Mei chhem a thingpui in turte Kalo chuan țan mek lai chuan ka hnunglam ațang tuemaw hian min rawn be deuh thut. Ka phu zawk leh ta nghal a. Chutah, min rawn be tu awmna lam chu hawiin, ka hnungah Mai chuan mipa sa țha nelh nawlh leh, taksa fit hmel tak, sang ang reng fu bawk si chu alo ding zum reng a, mipa ve tho chu ni mahila, mipa hmelțha leh vantlang pawl tak chu a ni ngeiin ka ring e. Lo nui deuh var var pah hian keichu a mitmeng fiah zetin min lo en reng.

“Aa, eng thil nge I duh tak a?” ti ban chuarin, ka tho chhuak zui bawk. Chutia, țawngkam ka han neih ve takah chuan ani pawh rawn Che zui ve hrutin, Ala nui deuh sâng reng Mai. A biang dinglamah khan biangsum niawm tak Ala khur kelh zui a, hmeichhe ho duh chi tak a nih dawn hi Kalo ti rilru leh hmanhmawh tawh. Chutah, ani chuan

“Eng em em chu ni hran love, nizan ațang khan ka rawn riak lut ve e ka tia, keimah chauj ka ni dawn emaw tih laiin hei, in lo awm ve hlauh a, a tih zia ang reng khawp mai. Aa țhian thar ka rawn zawng a nih deuh ber chu maw” rawn ti leh in, a aw Ala thum em em zui. Țhianpa Tlanmawia ka hre chhuak zawk Mai a. Hepa nen hi chuan in ang lo Vai Vai tak hi anni awm e. A thu rawn sawi te chu han dawnsawn Mai dan tur ka hriat loh em avangin ka nui ta vur vur. Chutihlai vek chuan țhiante ho pawh kha rawn tho chhuak ve sap sap in, Kan țhian thar chu mit nuai chat chat Chung hian an rawn en ta he hû hlawm a. Kei in, thil awmzia chu kalo hrilh pah ve mawlh mawlh hlawm bawk. Tichuan, hming te I hrilh leh in, ani chu Vanlal hriatpuia a nih thu leh, Aizawl Falkland veng a khawsa a nih thu te pawh a sawi ta zung zung a, Kan in chibai zui sap sap. Rei pawh kan bulah chuan țhu tawh lo in thingpui a in zawh hnuah a tho chhuak leh mai a, kei chuan

“Tukțhuan te min kilpui ve law law la, a thuhrim ah, I riahbuk pwh chu helam ah rawn sawn hnai ve daih la, a khawharthlak duh dawn em mai a” Kalo tih chuan a biangsum lang kalh hian a rawn nui leh var var. Chutah, Lu thing mat mat pah hian

“Engemaw Chang hi chuan mahni chauh a awm a, lehkhabu chhiar te hi ka thlang zawk țhin a, a hrehawm loh e. Zan lamah ka rawn phei leh zawk dawn nia” ti leh in thudang pawh sawi tawhlo chuan min Kalsan zui ta a ni.

Rei rial lovin eitur kan Siam leh zung zung a, zing dar 8 velah ei zo fel in, Kan țhian ho pawh tlâng chhipah chuan Kan vak darh leh țan ta.

He hmunah hian tihtur nei em em a Kal Kan ni hranpa lo a, intithawveng tur leh thla la turte, shooting tenau nei turte a Kal Kan ni zawk mah. Ka țhiante ho phei chu thlalakna tur hmun mawi zawng in kháwi khawiah emaw ni an Kal darh zo vek. Chutihlaiin keipawh, zawimuang hian ka tho ve a, camera te chu la chhuak leh te te phawtin, kan chhehvel hmun te chu ka tin kual ta Mai Mai. Chutihlai vek chuan kháwi hmun ber ațang emaw hian hmeichhe au țe thawm ka hre ta Mai a, ka hawi phâwk zui hle. Hawi kual nghal vut vutin, thawm lah kha a reh leh daih Mai si a, a ngaihna ka va han hrelo tak. Ka țhiante ho pawh rawn tlan khawm ve țak țakin, Hriatpuia hmel pawh kan hmu leh ta nawlh. Hah thaw hluam hluam Chung hian Hriatpuia chuan

“Hmeichhe thlabar au ri kha in lo hre ve em?” a sawi zawh rual deuhthaw hian Tlanmawia lah khan bul hmukin

“Hriat vang alawm, Kan Kal khawm vek ni”,

Kei chuan Ani chu va melh zawk in, alo tum lian bur bur hlemai. Hepa hian Hriatpuia hi a ngai thei lo deuh tlat ni khan Kalo hre ru tawh reng a. Mahse, Hriatpuia zawk chuan a ngai pawimawh lem lo tih hriat tak hian

“Ka riahbuk awmna lam saw niin ka hria a, mahse, mihring tumah reng ka hmu bawk silo. Kan en kual chhun dawn emni ang. Chesual te pawh an lo awm reng thei a” a rawn tih leh tak zung zung ah chuan kei chu a sawina lama Kal rukin Kalo inher deuh vut. Mahse, Tlanmawia bawk khan

“I riahbuk khuarna lam chu nang in va dap la, keini chuan Kan awmna lam hi Kan lo dap ve thung a nge. Chutiang chuan a țha Mai alawm tiraw?” tih pah a kiai suk Chung hian awmze nei zetin Hriatpuia chu ava melh Kher lehnghal. Chutihlaiin, Ani Hriatpuia erawh alo ngawi kar reng a, biangsum khuar kalh kalh khawp hian a heh te chu a lo pet sawi leh țhin. Reilote hnuah erawh, Lu buk zauh zauh pah hian a inher vut a, keini ho chu min Kalsan ve ta hram a ni. Tlanmawia chu ka va melhrum nghal hrâwk bawk. Tichuan, mahni duhna lam țheuh pan in Kan Kal darh ta hlawm a, kei leh Țhianpa Rintluanga chu Kal dun in, Tlanmawia leh Immanuel-a te pawh an Kal hrang ve bawk. Nasa taka vawikhat vel a rawn au chiam tih loh kha chu thawm danglam han hriat zui tur a awm leh ta miahlo a, hrilh a hai duh ang reng hle. Tin, hma han lak zel dan tur lah nise a vang hrep bawk.

Kan peih Chen a thui Kan vah kual tawh hnuah pawh eng thil danglam mah hmuh leh hriattur a awm tak loh ah chuan tiin, Kan tent lamah bawk Kan let leh ta dial a, khua pawh alo chawhnu veleh ta ruih Mai. Tent awmna Kan thleng fel chiah tih hian kan țhian thar Hriatpuia pawh kha alo lang chhunzawm leh ta vat. Eng thilmah a hmuh zui bikloh thu a rawn sawi luam nghe nghe. Umm, chuti na na na, eng thilmah Kan hmu in Kan hre zuilo bawk a, ngaihțha taka awm leh Mai loh chu tihtur dang awm Chang heklo. 

“Lalrintluang, tunge ilo biak leh tak a? Ngaihzawng te hi nei bik viau țhin suh u” Immanuel-a’n a rawn tih tak zauh ah chuan midang ho chu Kan lo țhen deuh țha Mai a, amah Rintluanga erawh bengchhet ang hmak in Ala țhu ngawi reng thung. Rintluanga hi Kan țhian ah pawh bialnu nei awm chhun kha a ni ve a, a urhsun thei viau. Mahse, tunah hian mi tihdan hria in a han kawp ve zân Mai a, kei hian ka hau Naaa thei hle. A hial u senior zawk nen hian kum 4 Chuang inzui ve tawh in, an on off reng thung a, chutihkarah chuan mi thar la naupang tak alo chhai tlu leh hman pek a, kei hian Kalo ngaimawh thei khawp mai. A bialnu te pahnih ah chuan a tu zawk nge a hmangaih tih ka han zawh erawh in a senior zawk leh kum 4 tehmeuh alo kawp tawh kha niin a sawi mauh a, mahse, a hnuhnung zawk erawh hi chu Ala ui ve tlat thu a sawifel thân zel Mai nia. Kan Rintluanga zet zawng, a hmel in puak ti lo mahse, a bank account a ruak ngailo tih hretu an awm nual a, nula lamah chuan tla na ve tak hi a ni rauh e. 

Chutia, meilum ai pah a Kan lo titi malh malh lai chuan Hriatpuia kha a rawn Lang leh ta hlawl. A hmel lah chu a pawr fap bawk nen a meng phâwk hrû Mai bawk si a, a ngaihna Kan hrelo tlang Kher. Makti zet a a hmel chu Kan lo en țhap laiin Ani chuan aw khur dar dar Chung hian

“Ruang ka hmu!” a rawn ti ta Mai! 

Rang lutuk a tho chhuak ve nghal in, Kan au deuh țhat thei nghe nghe. A thusawi khan min țhawn hlawm em avangin han sawi ve mai tur pawh hi Kan hrelo a ni ber ang chu, phâwk zet hian kan in melh tawn he hû ringawt mai. Mahse, Tlanmawia chu aw khur dur dur a rawn țawng chhuak ve in

“I rawn uang Mai Mai chu a ni em lo maw? Khatiang fiamthu kha kan ngaina ve tehchiam lo a nia”

. “Ka uang miahlo. Ka tent hnung lawkah khan hmeichhe tleirawl Ruang ka hmu a ni. Ka Chiang lutuk. Eng lo, mut ka tum tawh a, zunram thiar tur hian tent hnunglam kha ka pan ta a, Tichuan ka hmu chhunzawm ta mai a ni” tiin a thlan rawn bawl țiam țiam te chu a han hru zui leh pâwk a. A hmel landan ațang ringawt pawh in a thil tawn chu a hlau a, dawt a sawi pawh ka ring lo nghal bur. Tichuan, a sawi zo ta maw tih ah kei leh ka thiante chu Kan Che zui nghal hrut a, thudang pawh sawi tawh lo hian Hriatpuia riahbuk awmna lamah chuan Kan tlan phei ve ta nghal.

Khai le! Hriatpuia khan eng fiamthu mah a rawn thawh hauhlo Mai le. A rawn sawi ang ngei khan helai hmun ami hi hmeichhe tleirawl Ruang ngei chu a ni e. A zangthal zawng a mu in, a hmai chu thisen leh a Sam tla hnuang te chuan an hliah khuh zo vek a, Chiang tak hian a hmel erawh chu hmuh theih pawh a ni lo. Kei chu hnunglam hawi a inher let leh vut Chung hian.

“Rintluang, police call nghal teh. Thil thlen dan hi a dik hauhlo Mai” tih pah a Tlanmawia hmel ka va en chu hlau tih hriat zet hian alo men țuau tawh a, a khur chhe lo chauh tawh bawk niin a hriat. Hetiang thil hi a thleng ta a nih si chuan keini hi pawh in a zan la la a helai hmun Kan chhuahsan hi a țul ngei ang le. Kan motor lah chu tlâng hnuai lam ah Kan dah daih a, zan thim nen a peih awm dawn loh hle a ni. Keini ho tan chuan tih theih vak awm tawh heklo, Ruang bulah țhu in police lo thlen hun tur chu Kan lo nghak ta ngawt ngawt. Tichuan, police Kan call ațang a darkar 1 dawn a liam leh hnuah anni pawh rawn thleng chhunzawm ve nghal in, an tihtur ang ang te pawh chu an ti nghal mawp mawp a, keini ho pawh zawhna min zawt awl heklo. A bikin, Hriatpuia mawlh chuan zawhna a dawng hnem narawh e. Ni e, a awmlo hran hauhlo, Ruang hmu hmasa bertu kha a ni miau Mai si a. Police ho in an tihtur ang ang te an tih zawh hnuah keini pawh insiam zui veleh in, Kan motor dahna lam pan chuan Kan inzui thla ta Dam Dam. Thuamhnaw Kan lo ngah fahran lo bawk a, a tih zia in, a hahdam thlak zaw phian e. Hetihlai hian țhianpa Hriatpuia thung kha chu engemaw thil ah tiin station lamah an phur tlang ta daih a, a hmel hlauh thawnna nasa tak awm te kha ka hmuh hmaih hauh loh avangin ka lo khawngaih ru ang reng hle. 

Tichuan, zan dar 10 velah mahni in lum chu thleng ve in, ka thawl deuh huai thei nia. Ka chhungte’n thil awmzia min lo zawh a, ka hrilh leh thuak thuak hnuah, room lam ka pan San ta daih a. Ka Chau ve bawk em atin ni. 

Khawvar rual deuhthaw a ka nu in min rawn kaihthawh chuan ka muhil tih ka in hre ve chiah. Phak chial chual zet a meng Chung hian ka nu chu ka han melh ve țawk țawk a, ani lahin phâwk fe Mai hian min lo la en reng zui. 

“Nu, eng nge ni ta? Iva hmanhmawh hmel ve a, thil thleng a awm emni?” ka tih chuar chuar hnuah ka nu chuan, aw lawi fe maiin țhianpa Immanuel – a ruang an chhar thu chu min hrilh ta Mai anih chu mawle! Ka mu lai tho zawtin ka hawi phâwk nasa ta Kher. Rindan ka thiam loh piah ah, ka ring phal thlawt lo bawk. 

” Kháwi hmunah nge ruang chu an chhar a?”

“Phunchawngah anti ta in ka hria, Bawiha, thil thleng te hi mak ka tiin, min țhawng takzet a ni. Nizan lamah lah tikhan nula ruang an chhar tawh bawk si a, kei zawng, rapthlak ka ti em Mai” tih pah chuan min chhuahsan zui a, keipawh rang zet hian ka tho ve nghal bawk. Thawmhnaw te inbel leh sawk sawk in țhiante ka phone kual zung zung a, mak tak Mai hian ka țhiante chuan chanchin reng reng an lo la hre ve lo chu niin. Kan bengvar lo tlang teh e maw. Chanchin ka han hrilh hriat takah chuan an thu hriat chuan a țhawng ve takmeuh tih pawh an țawng Kam leh awrawl ah a hriat theih awm e. Tichuan, inthurual in ruang an postmortem na hmun tur damdawiin lam pan tur chuan thu kan ti tlu ve ta a ni. 

Damdawiin Kan thlen lai hian postmortem chu an lo zo fel tawh a, mi kut tuar a boral ngei a nih pawh an ring nghet bur bawk. Chuti a nih takah chuan Immanuel – a chu tuin nge lo that ang tih chiah ka ngaihtuah tawh. Kum hei leh Chen hi Kan inkawm in Kan inzui ve tawh a, amah haw tu hmelma emaw, tih chhiat vek duh tu, chutiang awm reng reng a neih hi Kan hrengai lo. Mi țha leh fel tak kha a ni a, tu pawi mah a sawi ngai lo in, a țawng tlem em em bawk. Mahse, ni e, zep thu cheng lo, amah hi zu leh sa lamah thlem a Sam ve a, zu hming lam rik tawh phawt chuan Kal duhlohna leh tih peih loh pawh hi a nei ngai meuhlo. Immanuel – a tualthihna chuan sawizui a hlawh in, mi maktih pawh a hlawh nasa e. Chu Mai ala nilo, tikhan zan hmasa lawkah lah, Kan intih hlimna hmunah hmeichhe tleirawl ruang chhar a ni tawh a, tihian, a chanchin sawi zui pawh kan la bang fel lo tih in, ruang dang chhar chhunzawm a ni leh si. A Makin a rapthlak a ni tih Mai loh chu sawitur ava vang si em. Hetiang thil thleng vel vang hian ka nu leh pa te phei chuan min khuahkhirh sauh a, pawn chhuah pawh min phal sak ta Mang lo hial. 

Mahse, tlai khat erawh chu, tawmsen reng ka nin em avangin ka uipa Roger hruai chhuah chhuanlam hian ka chhuak ve thei ta hram a. Chu ringawt pawh chu min phal sak Mang lo hle. Ni e, an ngaihtuahna ah chuan thil awm ang lutuk leh an tihtur diktak ti pawh an ni reng a ni. A dik alawm, heng tualthihna thleng pahnih te nen hian keini țhianho kha kan inhnaihchilh thei in, Kan nunna atan tak pawh hian a hlauhawm pha ve thei tlat atin ni. A hriat bik miahloh. Chutia, Roger a Kai pah a Kan lo Kal Bek Bek lai chuan kawng khawiah Hriatpuia kha a rawn Lang hlawl Mai. Min rawn hmu thut chu a ding deuh chawt a, keipawh chuti tho chu. A chhan awmang tur hrelo mahila, a hmel a hamhaihna rawn lang chhuak te kha ka hmuh hnaih thei hauhlo. Mahse, reilo te hnuah insiamțha leh thuai in, a biangsum lang Kalh bawk khan a rawn nui leh ta var var zawk a. 

“Teh hlawl Che chuan. Kha, I uipa chu ava han țha tehreng em!” tih pah hian Roger a chu rawn khawih a tum ngaawt a, ani Roger a lah chuan a hmuh ngailoh hmel thar a nih vang nimaw, alo ngur chhar chhar Mai nia, ka ngei reuh Kher. Ka inthiamlo lutuk chuan chhuanlam Siam pah hian

“Hmel thar hi a ngaina har thei khawp a” Kalo ti ve ngawt. Ani erawh alo nui leh Sui tawh a. Tichuan, rei pawh titi zui lo in Kan ințhen leh rih ta a ni. A Kal liam turte chu ka thlir zui vang vang Mai. A mizia hi maksak han tih dawn a, pangngai ru fu si. zakzum tak a ni e tih dawn a, ni leh Chuang miah silo. Thil engkim Mai ah hian a inkiltawih hmel țhin in, inthlahrung hmel hi a pu fo reng a, Kan hriatpui miahloh natna leh harsatna engemaw tak te hi alo hmachhawn ru ve reng nge ni ang tih te ka ngaihtuah leh țhin. Aaa chu zawng, ka hriatthiampui phak pawh va ni suh. 

Zanriah eikham hnu, Immanuela te in lama len phei tuma kalo insiam mawlh mawlh laiin, pawnlama rogera bauh vak vak thawm chu ka hre thut a, ka hawi buai nghal hle. A chhan pawh, chutiang em em a uar chuan roger-a hi ala bauh buai ngailo, tin, a bauh ve mai mai ngai lo bawk. Chuvanga mak han ti em em ta pawh chu ka ni reng a ni. A thawm chu a reh mai dawn emaw ka tih laiin a bauh uar tulh tulh a, a tlankual vel pah bawk ni hian ka hria. Chutah, ka ngaihṭha vaklo chu room aṭanga tlanchhuak thuaiin, sitting room ka thleng fel tih ah hian roger a thawm pawh a reh zui ve hmak. Mahse, pawnah chuan chhuak tlang tho in rogera hmel reng reng hmuh tur alo awm hauhlo. Eng thil tak chu bauh ta chiam chiam ni ang maw, tih pah chuan ka han ko chhin vel a, a reh hmiah mai. Ngaihṭhatlohna em em chu la nei chiahlo mahila, inchhungah lo lut tawh se tih ka duh avangin amah zawn hna chu ka thawk chhunzawm nghal char char. Lehlamah, Immanuela te in a kal kha rilruah a lian lo thei bik silo a, a buaithlak in, roger a pawh chu ka ngei angreng kher mai.

“Roger, rawn chhuak rawh. Ka infiam hman lo a nia, khawnge i bihruk?” tih pah a huan lam ka pan lai chuan hnimpik kar aṭang hian tuemaw a rawn dawk chhuak zawk mai a, a lo thim teh hrep bawk nen, light pakhatmah keng lo a chhuak mai kha ka ni si a, tunge a nih chu ka va hmu hleithei ta tlat lo. Chak zet hian kawngpui lamah a tlanchho puat a, ka au zui tuar tuar bawk. Mahse, a tlan chak dan kha mak tak a ni, kawngkawiah hian a mawng phe ka hmu hman ṭawk awm e. Tu phiangsen chu nimaw tih hluk hluk pah a a rawn tlanchhuahna hnimbuk ka han keu chu, karei leh! Ka uipa duat em em roger a ngei mai kha thisen nen inchiahpiah tih hriat tak hian alo mu a, ala thaw dep dep bawk niin ka hria. Meng bial kawk kawk pahin a bulah chuan ka zu ṭhingṭhi vat a, a meng ṭha peih tawh der lo lehnghal. Kei thung chu min ṭhawn em avangin ka khur hlawk hlawk tawh a, rogera taksa zawi hnuang mai te pawh chu ka khawih fuh hleithei der lo mai. Ka ṭap ta pur mai bawk a. Ka mihring mawlh kha, tu phiangsen nge a nih ang. Khawilamah nge a tlanchhiat tak ang le. Engvangin nge ka uipa berkher hi hetiang taka nunrawng hian a rawn khawih tak mai. Kha mihring pawi kha ka sawi ta mai emni? Ni lo, chu chu thil ni theilo tawp a ni. Ka fel in ka ṭha e, tihna nilo se, Pathian zarah tu pawi mah hi ka sawi ngailo ve tlat in ka hria a. Chutin, an tan a pawi thei tur thil lah ka ti ngai bawk heklo.

Ṭap pur chung leh taksa khur hlawk hlawk pah a rogera taksa zawi nguai tawh chu pawm kang nawlh in, inchhungah ka luhpui thuai a. Chutia, keini putu han inpawm ta ûr mai chu ka chhungte chuan min lo hmuh in mak an ti kher. Choka lamah an rawn tlanphei ve vat a, choka chhuatah chuan a dim thei ang ber hian rogera chu ka muttir ta bawk. Zawite te chuan la thaw ve reng mahse, a dam khawchhuah leh hi ka ring tawh lo bur thung. Ka va han ngai dawn tehlul em.

Rinlawk ang ngeiin roger chuan minute 5 hnuah a hliam chu tuar lovin min kalsan ta nge nge a nih chu. A hnuk a chat fel tih ka hriat rual khan ka zawi hnawk thei a, ka taksa khur lah a reh fel hleithei der lo. Chutihlaiin, ka nu leh pa te pawh khan min tawrhpui lo bik miahlo a, ka nu phei chu a mittui te tla ve in, ka pa thung erawh a melh ngai melh hian a khap eih lo. A rilru a nat ve hmel hle in ka hria. Awle, a tawp nan tiin ka uipa, kum 12 zet kalo enkawl ve tawh leh ka chhungkua min venhim sak ṭhin tu ka hmangaih leh ka duh em em, rogera ruang dai ngei mai chu kuah hnawpin ka han ṭap ta a nih kha. Tlangval a pumpa hian zahpah tih vel ka nei hman tawh lo a, ka rilru hi a na in a su dup dup tlat si a ni. Tichuan, a zan a zanin a ruang chu kan huan mawng lamah kan phum zui leh ta thlap bawk a. Kan zawh fel meuh chuan khua alo tlai duai tawh nen, hmundang a kalna hun pswh a awm tawh chuanglo tiin zawi zet hian khumah ka let thla tawp a, ka ruak huai ni ber hian ka inhre tawh. Roger ka mitthla rualin mittui alo hnai zel a, ṭhianpa Immanuela hmel mitthla lahin chuti tho. Ka ṭhianṭha leh ka tan a awm reng ṭhin te ka chân rual deuhthaw chu a ni si a, ava han hrehawm tehlul em. A nat dan hi a ril in, mihring ṭawng a  sawifiah mai theih pawh niin a lang lo. Ṭhianṭha chân zet zawng alo rapthlak em mai.

Khua alo var a, hawina lam apiangin lung min len tih ang deuh in, ka hawina lam apiangah an pahnih sulhnu hlir hmuhtur a awm si. Anni erawh, lo kir tur awm tawh lo in an reh fel hmiah a, min kohna aw ri emaw, an thawm takngial pawh hriattur awm ta lo chuan min ti na ngut ngut thei a, ni e, vanram chu a nuam hle a nih ka ring. A kal tawh te apiangin rawn kir leh zai reng an rel si lo chu a nih hi maw.

“Vawiin chu leng thawveng Mai Mai ila, Tlanmawia leh Hriatpuia te kha lo sawm ve bawk la” Rintluanga’n call hmang a min rawn hrilh chuan ka phur lo takzet. Mahse, zawi sup a lo chhang let ve in

“Khawiah maw Kan len ang”  Chutah, ani chuan ring fe Mai hian

“Park ah te, lenna tur te zawng a tam lulai em Mai. Kan nu ka rawn hruai bawk anga” kei chu ka lo ner nawk. 

“A tu zawk?” Kalo ti leh hram. 

“Heiham, a senior zawk. I hriat angin a naupang zawk te kha chu e, side dish Mai Mai a nih kha. Lungawi vak loh Chang a tlanchhiatna. I hre thiam em? Min zawt nawn tawh suh aw mawlmuk”  a rawn tih deuh tak bawrh bawrh ah chuan Kalo nui hawk hawk thung. Nia, rilru tih thawven te pawh hi a țha ve alawm. Kan chungah eng em a thleng lo ang chu tiin Tlanmawia leh Hriatpuia ka call nghal vat a,mahse, Hriatpuia zawk chuan min lo hnial in, a buai thu alo sawi tlat a, pawi pawh ka ti em em hran ta Chuang lo. Kan țhian nghet kha a ni ve lemlo bawk a, tih tlangnel ka tum ve mai a nia. 

Tukțhuan te ei felin ka insiam zui leh a, reilo ah Tlanmawia pawh a rawn Lang ve zat. Tichuan, Kan veng kawn laiah in nghak khawm leh in Kan Kim hnuah chuan Lalsavunga Park lam pan in Kan chhuak zui ta a ni. A hmuh Kan han thleng a, reilote Kan chawlh hahdam leh hnuah Rintluanga te nupa chuan min Kal hran San vatin, kei leh Tlanmawia thung chu Kal hla peih ve heklo, Kan awmhmunah Kan la awm reng a, țhut khawmuan pah hian thla te Kan la kual vel ta Mai Mai. Kei tak phei chu ka Tha hi a tho thlawt lo bawk nen. Chutiang na na na chu reilo teah Tlanmawia pawh in min Kalsan veleh daih Mai. Pawi pawh ka ti Chai lo e a. Mahni chauh pawh hian ka tleina khawp chu ka hmu ve țhin tho alawm tiin Kan eitur ken ang ang te chu ka phawrh zui sawi sawk a, a khat tawk hian a hmunhma vel erawh ka click leh zauh țhin thung. Chutia, thil ei pah a Kalo țhut hawi vual vual lai chuan Tlanmawia kha leidawh lam ațang rawn tlan dawr dawr nimai hian ka va hmu ta thut a, nî lag alo sa țha vel vawl bawk nen, amah a ni chiah em tih chu ka Chiang hleithei lo tlat. Mahse, ding chhuak meuh a ka han thlir leh hnuah erawh țhianpa Tlana ngei a ni tih chu ka hre thei ta. Eng tak thleng ang maw, tia Kalo ngaihchan vang vang hnuah ka bul chu thaw hlawp hlawp Chung hian a rawn thleng phei ve ta hram a. Thaw hlawp hlawp Chung leh hlauhthawn hmel tak hian ani chuan

“Rintluanga te pahnih kha ka hmu miahlo a nia” a rawn ti ringawt. A ngaihna ka lo hrelo hle. 

“An duhna hmun hmunah an Kal ve ang chu. Engatan nge I tih a?” Kalo ti deuh hmuk chu a lawm loh hmel Kher. Meng nur nung Chung hian amah bawk chuan

“Thla lak kual pahin ka vak kual deuh nual a, a Mai em alawm. Khawiahmah ka hmu zo lo” ka hnar Kalo tum khum dût. 

“Ngaihtuah suh. An lo kir veleh Mai ang. I ril te a țam tawh zawk em?” ka tih leh pawh chuan min chhang lem lo in a hawi leh vut vut țhin a, a thil ngaihtuah mek chu hre tho mahila, ka sawi pui țha peih vak lo. Mipa ve si, chi ai hma thei lutuk ka ti ve tlat. 

Tichuan, kei chu ngaihțhat lohna pawh nei lem lovin ka țhu zui leh mai a, eiturte pawh chu ka ei chhunzawm leh mawlh mawlh bawk. Chutihlai te pawh chuan Tlanmawia thung kha chu kawng dawm meuh hian ala ding hawi vung vung reng a, Rintluanga te mawlh khan a rilru chu an luah hneh a ni tih a theih awm e. Eng nge maw, mi in ngaizawng leng kual vel pawh chu alo ngaihtuah em em ni ka ti rilru neuh neuh. Kan Tlanmawia khawsa tia dangdai maksak thei lutuk hi chu a Chang hi chuan a Ninawm ve deuh țhin alawm. Tin, mipa țheuh țheuh pawh hi Kan thil tawn a zir a Kan chet chhuah alo danglam thei in, Kan lo in ang lo tlang hlawm khawp a ni tih hi he Tlanmawia ațang hian ka hriatthiam phah a. Inti mipa ve fu, mahse, a hun a chet thawh leh thei miahlo, phili buai Chung țhin ang chi hi mipa chu anni ve tho sia. Kan țhianpa Tlana te ang hi mipa diktak tia chhiar chi chu ni ve tak ang maw? Tuai tihtur lah chu ni Mang bik bawk silo. 

Chutia mahni rilru ve ve kawm chunga Kan lo hawi veng veng lai chuan hla deuh tak ațang a min rawn au vau vau thawm chu ka hre ta tlat. Keini pahnih pawh hawi rual zawk in, Kan in en deuh hê hâw phawt a, khatia min rawn au kha tudang ni lovin țhianpa Rintluanga ngei a ni tih pawh kan Chiang khawp e. Aw lo chhuahna lam pan chuan Kan han tlan ve ta ngawt a, a rawn lang har hrep lehnghal. Mahse, chutia Kan lo ngaihchan reng lai chuan rinloh lamah rawn Lang thutin, a rawn meng phâwk hrû leh ta nghal a, a thaw pah hluam hluam bawk. Min va han ti hrilhhai țhin tak em aw. Chutah, Tlanmawia chuan rang zet hian

“Hei, khawilamah nge in Kal daih a, Kalo zawng ru ve ngat ngat cheu sin” lo ti nghal bawrh bawrh in, Rintluanga erawh Ala țawng chhuak hleithei lo nge, a thaw hlawi hlawi reng Mai. 

“Hrim hrim in khawnge innu pawh chu?”

Keiin Kalo ti ve thung a, min rawn melh zawk. Chutah, la thawk hlawp hlawp pah hian

“Khu_khutah! Aih, ka hrelo! A bo daih!” a rawn ti zui ta nawk nawk mai. Chutia a rawn tihtakah chuan keini pahnih pawh chu Kan lo phu deuh zawk thei a, Kan in en leh he haw bawk. Kei erawh, ka awih loh em avangin ka khi suk ringawt a, Tlanmawia thung chu a hmel put hmang Ala thutak ngar ngar Kher. 

“Lalrintluang, eng thil chiah hi nge maw I tawn le. Sawichiang thuai teh aw. Ka awm iti nuam miahlo a nia”  Tlanmawia bawk khan a rawn ti leh. Tunah chuan tlemin Rintluanga hmel landan pawh alo danglam ta deuh a, a hah zualpui pawh kha a reh tawh a ni ngei ang. A Khap ta fuk fuk mai. Chutah, ban charh leh zawi sup si hian

“A bo! A chin ka hre tawhlo.”

“Mawla! Chutiang thil chu mahni bialnu te chu ngah engtinnge i thlen tir theih zawk a. Iva nikhualo ve” Tlanmawia khan din hnaih sauh in, ava ti zui leh khur khur ta mai. He pa hi, eng thil nge maw hriat țhin le aw. Ka inrawlg ve thuai a țul a nih hi tiin, anni pahnih chu ka pan hnai ve vat. Zaidam zawk hian Rintluanga chu thil awmzia ka va zawt țha leh a, ani chuan la khap fak fak pah a min rawn en kur Chung hian

“Thlanglam thing hmun deuh ah khuan Kan Kal thla zel a, midang tumah pawh an awm ve lo niin ka hria, tikhan, ih, hmun remchang lai tiin Kan chesual dun lehnghal a, Kan zawh fel hma hian thawm ka hre nghe nghe. Mahse, tumah chu an rawn lan zui tak loh avang khan ngaihțha takin ka awm ve leh mai a, a rei hauhlo thung. Thawm bawk kha, a hma aia hnai zawk ah chuan hre leh in, min en thla tu chu an awm a nih ngei pawh ka ring ta tlat a, tichuan, laklawh pawh sawi thei lo in ka inha țha zui sawk sawk a, Kan nu kha lo Kal sawn miahlo tur a chah leh thlap in ka va thlithlai ta a ni. Rei pawh ka thang lo ang, ka let leh chuan Bawihi kha alo awm tawh lo reng reng a! Mak ka ti lutuk, sawi ngaihna tak pawh hi ka hrelo zawk” tiin a mittui a rawn luang ta ngiai ngiai a, a insut ri leh hruih țhin bawk. Hnem ngaihna vak chu hrelo mahila, a dar a va vawn sak Chung hian engkim a țhat leh vek ka rin thu te chu ka hrilh ta ringawt. Chutihlaiin, Tlanmawia thung kha chu alo meng dur khûp reng ringawt a. Hmun hla tak thlir niawm tak hian alo hawi sawn vauh vauh bawk. Awle, hetiang hi Kan dinhmun alo nih tak si ah chuan muangchan chi a ni lo tih hria in, Kan chhehvel a midang awm ve te pawh chu Kan ko khawm ta sawk sawk a, hemi ni berkher hian mi lah kha an lo tam vak bawk silo nen, a luhaithlak letling hial mai. Mahse, a awmchhun ang ang te chu thurualpui tura sawmin, Kan theih dan dan chuan Bawihi bo chu Kan zawng ta sup sup mai a ni. Hetihlai hian hmundang ami țanpui tu tur koh tih vel kha ka rilru ah ala awm lo hrim hrim a, kha chu, beidawn tawpah chauh nise ka ti hrim hrim bawk. Mahse le, tu berin nge police te chu lo call tih pawh ka hre ta map lo, mahni thu thu a darkar 1 lai Kan zawn tawh hnuah, police engemawzat hi an rawn lang ta țuk țuk mai a. Umm, eng nge kan tih theih chuan tiin pawi ka ti ta em em lo ringawt. Tichuan, police engemawzat leh mihring, chulai hmun a awm ang ang te chuan inthurual tak leh felfai tak hian Bawihi zawn hna chu Kan han thawkho leh ta tak tak a, park leh a chhehvel pawh chu Kan lipse hneh ang reng viau bawk in ka hria kei chuan. Mahse, a reh hmak thung. A hnuhma emaw, misual hniakhnu awm ang reng reng hmuh tur kha zu han awm miahlo a! A reh hian an reh țhiap ringawt mai a ni. Hmm, khawiah tak chuan kalbo ang maw, tia Kalo hawi vauh vauh laiin Tlanmawi khan min rawn su thawi thuak a, ka harh kawk thei hial. 

“Eng nge ni ta. Iva hmanhmawh hmel ve a?” kalo tih chuan a rawn tlan thlakna lampang chu kawk let vû vû chung hian a chil a lem zui khawlh.

“Khitah, hmeichhe pheikhawk khing ka hmu!” a rawn ti ta mai a. Chuveleh, kei chu awm hle hle thei tawh lo hian ka vir deuh zawk a, inher let vutin a kawhna lam hawi chuan ka tlan chho ve nghal thuai. Ani pawh chuan rang zet hian min rawn umzui ve nghal thuai. A sawina hmun kan han thlen chhoh chuan a sawi ang taktak hian hmeichhe pheikhawk, school shoe ang deuh a dum hi a khingbai chiah awmin alo let bal mai a. Ka meng phâwk chiang hle. Tichuan, rang takin midang ho kha ka han ko khawm leh ta zung zung a, an rawn pungkhawm chak hlemai bawk. Police ho chuan pheikhawk khing chu la in, tih zel dan tur an rel nghal sap sap. Chutihlaiin, Rintluanga kha a bialnu pheikhawk an hmuhchhuah tak avang chuan alo ṭap leh pur tawh a, a hmel landan aṭang ringawt pawhin a chi ai takzet tih chu a hai theih awmloh e.

Awle, darkar 3 chuang tehmeuh, chulai hmun zau tak kan dap hnuah pawh eng thilmah kan hmuhchhuah leh tak siloh ah chuan police ho pawh beidawng ṭan in, keini ho chu min tir haw ta diak a, keini ṭhianho pawhin haw san daih chu hreh hle mahila,tihtheih dang vak nei heklo. Police mithiam rual ho duhdan leh ngaihdan chu thlawpin hreh tak chung chuan park pawh chu kan chhuahsan ve ta nge nge a ni. A diktak chuan, a bo hun kha darkar 24 em pawh ala ral miau loh avangin police ho tan pawh thapui han thawh theih vak kha niin ka hrelo ringawt a, darkar 24 ral hnuah chuan tun aia an chet nat deuh te pawh kha ka han ring leh ringawt ṭhin. Chu erawh, ka suangtuahna leh ngaihdan mai a nia, engmah han hriat thui em em pawh ka nei chuang love.

Zan lo niin, ṭhianpa Tlanmawia nen Rintluanga te chenna in lam pan chuan inthurual takin kan kal ve ta phawt. Hetah hian mak tak maiin Hriatpuia kha a rawn lang ve hlawl. Chutia, rinloh tak mai a a hmel kan han hmu thut chu min ṭhawng tlang deuh nge tih pawh hriat va ni suh. Kan lo ka deuh hau hlawm mai. Mahse, boruak chu dai leh vatin keiin kalo dawngsawng ta zung zung zawk a. A hmelah chuan nuamlo tihna ka hmu theiin ka hre nghe nghe bawk. Tlanmawia lah ngawi reng hian alo meng thip run reng mai bawk si a, biak chakawm loh tur tak hi a ni ve e. Chutihrualin, Rintluanga thung kha chu han biak tlak vak pawh hi a ni rih lo hrim hrim zawk a, a melh ngai melh hian a khap fak fak reng ringawt mai a ni.

“Ṭhiana chu a zialo hlemai. Vawiina in kianga kalo kal ve lo kha chu pawi ka tiin, ka inthiamlo takzet. Min hrethiam hram teh u”

“Khawi aṭang nge khatiang thu te kha ilo hriat ve theih zawk a?”  Tlanmawia hmek hmuk ṭhin hi chu aw. A awki nelawm loh lutuk avang chuan Hriatpuia pawh alo meng bial deuh kawk thei. Mahse, pangngai zui leh vatin, a biangsum khuar kak khawp khan a han nui leh sak phawt a, a hmel na na na hi chu a ngainatawm ve thlawt. Nui sâng chung leh zaidam tak mai hian amah bawk chuan

“Nia, zanin whattsaap group pakhatah kalo hmu fuh hlauh mai a, a mibo ber thlalak an rawn posted kha Rintluanga bialnu hi ni a ka hriat avangin ka phu deuh zawk nghe nghe alawm”

“Chu chu khawi group ah maw an rawn post a!?”  maktih hmel fe hian kan Tlanmawia bawk chuan a rawn zawt leh. Mahse, rang zetin Hriatpuia thung chuan

“Aa tunah chuan an delete leh tawh in ka hria. Ala hlimchhawn bawk nen, puanzar vak loh kha an duh leh zawk niawm tak a ni” a rawn tih takah chuan kalo thaw huai mai. Huiham! Mizote hian engah nge maw, mi aia bengvar leh thu hre hmasa tu nih hi kan chak zek zek zel mai le aw. Social media ah nise, mipate hi a ṭawng thei ber berah ṭangin, mi pawisawi tam tu ber ah kan ṭang tawh a. Hmeichhe thlalak leh  hming hawh in fake account lah kan siam nasa narawh. Mizo mipui tamtak te hi chu kan buailohna turah buai in, mi nunah kan inrawlh thuk em em tawh a, tin, social media aṭang chuan aia upa zahna chang reng kan hretawh heklo. Kan chhanglet in kan hnial pâwng pâwng a, mahni nih lohna ang hlir a lan lah kan hreh tawh heklo. Chuvang chuan mizote hi nasa taka in enfiah kan mamawh a, a bikin, Mizo mipate mawlh mai hian kan mamawh zual. Hmeichhe tam zawk pawhin an khel peihloh leh buaipui peihloh thleng hian kan sawi vul chûk a, kan post tak tuar tuar bawk. Zahmawh nise, a ngial a ngan deuhthaw leh a ruh lang rawt rawt a post kan hreh tawh miahlo lehnghal. Kum naupang zawk te chu sawi loh, upa zawkte tan a en nuamlo leh nuihpui hleihtheih loh tur hi group chi tinreng ah hian hmuh tur a tlep tuarh a, an tan han awm ve ngam na chi ziazang pawh hi a ni ta bar love. A zahthlak lulaiin, hnamdangte hian min rawn hre tam ang tih a hlauhawm ta hle a ni. Min hmusit dawn lutuk tlat.

[12/11, 9:34 am] Peki: Ni a liam a, chawlhkar a ral a, thla meuh a vei leh pawhin Rintluanga bialnu hmuh leh thawm ri vâ reng reng hriattur ala awm theilo a. Police te chuan hma pa zelin la beidawng ve hauhlo mahse, khawtlang erawh an lu a hai thung a, hmalak ngaihna pawh an hretawh meuhlo. An zinga mi tlawmngai zual tlemte te chuan mibo zawnna hun la insiam fo tho mahsela, a beidawnthlak e tih bak lo chu thu thar an nei thei bik meuhlo a ni e. Kei, Hriatpuia leh Tlanmawia te chuan kan hman chang changin, a remdan ang ang chuan han bei ve bawk mahila, a mualbo hian kan bo a ni ta hawt mai si. Chutihlaiin, ṭhianpa Rintluanga erawh a laktlak hleithei der lo a, zan lah a mu tlemin, chaw a ei mumal bawk silo, a biak tlak loh chho chu a ni ta der. A awmhmun sawn miahlo te hian a melh ngai melh in a ṭhu chawhma leh ṭhak mai ṭhin a, chutihrual vekin, a side dish zawk lah khan thinrim engphiar hian alo chhuahchhal ve reng a, alo ṭhen fel ve hmiah bawk. Chung te pawh chu Rintluanga chuan  hria ang pawhin a awm ngai reng reng lo a, a tihzia phian e kan ti ta mai. A chhungte mangang tihngaihna hretawh lo lah chuan chhuah harh pui turin min lo ti ve reng bawk nen, awmzia nei lem dawn in hre lo mahila, an thu chu kan zah ve bawk si avangin kan chhuahpui leh nge nge ṭhin. Mahse, a khawsak dan kha hriatthiam a har em em a, biak ṭawng hleihtheih ni bawk silo chu, kan tan tak pawh a beidawnthlak angreng hle.

Zan khat ka mu chu, muttui lai tak hian ka phone a rawn ri sek a, ning lutuk mai hian ka va ban chawt chawt. Min lo call tu ka han en nak chuan Tlanmawia lo niin, ka ner sawk thei. Tun ang hunah eng thil chu a hria nimaw, ti nuah nuah in ka call back leh vat. A lo la rang em em khawp lehnghal a. Ka nuih a za ṭep zawk a  ni. Mahse,

“Bawiha, lo phei thuai teh. Ka hlau a nia” tiin a rawn ṭap lo chauh ta mai. Min ti bangbo ṭhin mange aw. Mahse, min rawn tihder vel mai mai tura kalo ngaih tlat avangin ka la ngai pawimawh ṭha duh lo hle a, ham pah bui bui chung hian

“Engvangin, khawnge i awm a?”  kalo ti fân duai duai. Chutihlai taka ka awmdan chu min rawn hmu ngat se zawng, min hnek duh hial ang chu. Chutah, a hma aia zawi leh fiah zawk si hian ani chuan

“Ka uang lo aw. Ka chhungte an zin bo vek a, mahni chauh in ka awm.Ni leh lo, kan inchhungah hian midang tuemaw an awm ve tlat in ka hria a ni. Lo phei teh” a rawn tih leh takah chuan a hma aiin ka lo thutak ve ta deuh. Peihlo zet a tho chhuak ṭuih ṭuih chung hian thil awmzia te chu ka han zawt leh te te phawt a, ani thung chu a hmanhmawh hmelin, a hlauhthawn hmel kher bawk. Aw khur dur dur leh zawi sup hian

“Lo tlan rawh. Inhnuai lamah khuan mi tuemaw an awm ve tih hi ka chiang a ni. I hrethiam em ka sawi chu. Inah hian ka chhungte an awmlo ka tih tawh kha, i hria em?” min rawna ânkhum ta emaw ka ti zawk hial mai. A thil tawn mek te chu ka va ngaihnep sakin ka ngai ho viau ta tihna nilo in, amah hnem nan zawk tiin za fahran lo hian ka han nui lui hak hak phawt a. Min run hmel kher asin. A mangang leh chi ai lutuk chu bengdaih a hun tih hria in , a hma aia thutak zawk khan ka be ta nge nge.

“Awle, awle, kalo kal em em ang. Chumi hma chu tikhan, awm lo ang hmak in lo awm reng rawh aw. Phone pawh hi ka dah dawn a nia. I chhungte an zinbo vek avangin nangmah ngei pawh kha awmlo turah a dah maithei che tih hria la, lo thlaphang suh. Chuan, room kha kalh ṭha la, ngawi reng in lo awm rawh” ka tih mawlh mawlh lai chuan a thaw ri halh pawh ka hre thei reng.

“Awle, ṭhianpa, ka ring ang che. Chuan, hmanrua engemaw tak kha rawn pai ngei ngei rawh” a tih leh sup takah chuan za lo zet hian kalo nui leh hak phawt a, phone chu off in, kawrlum te ka in bel ṭhat leh hnuah ka pa te roomah thawmdim thei ang ber tur hian ka va lut ru leh phawt. Ka pa revolver ngei mai kha ka va ru chhuak dawn tihna a nih ber chu. A harsa hran lo, save chhungah dahin alo lock lo hlauh bawk a, awlsam angreng fe mai chuan ka la chhuak thei ta. Thawmdim tak bawk a chhuak lehin revolver ngei paipawn chung chuan Tlanmawia te in lam chu a zan a zanin ka pan ta a ni.

Ka va thlen lai hian zanlai tak tak a ni tawh a, mi veivak vel hmuh tur pawh an awm tawh map lo. Nuamlo chu ka  ti ru ve reng. Mahse le, ṭhiante thlabar a an awm laiin ka ngawih bosan ngawt thei bik silo a, engpawh tuar huam in tihian ka thawk chhuak ve ta rawih mai a ni ber ang chu. A nih nih kan ni tawh anga nimai lawm le.

Tlanmawia te inkawtah chuan dingin ka thlek chho vang vang phawt a, alo thim ṭhiap tawh mai. Tin, an in leh a bul vel te pawh chu a reh ṭha tawhin an thim ruap a, a inthlahrunawm lek lek thei. Tlanmawia chu ka thlen tawh thu hrilh tuma call mai ka han tum uk a, mahse, a tihchi leh lo a ni tih hria in ruahmanna dang ka siam a ṭul zawk tih ka hre leh. A sawi ang tak tak khan mihring dang an lo awm ve reng a nih hlauh chuan , va chawh buai rum rum chi kha a ni dawn silo a, fimkhur a ṭul takmeuh a ni ber e.

Tlanmawia te in hi thing ṭha chi hmanga sak niin, khawthlang sapho style ngat a duan kha a ni a, chhawng hnih neiin, a hnuailam hi chet tlatna hmun atan an ti a, chhawng chunglam erawh mutna atan chauh an duang bawk. Te fel at niin a nuam reuh phian mai a, a changkang ru zek bawk.

Tichuan, inchhung lama luh nghal tawp aiah tiin in hnung lam chu ka pan ta zawk a, inchhung hmuhtheihna tur tukverh emaw, engpawh, ka zawng dawn a ni. Vanneihthlak tak hian choka hnunglam tukverh pakhatah chuan parda eng chi mah hi alo in zar ve lo hlauh a. Amaerawhchu, inchhung chu light off deuh vek tawh a nih avangin a hmuh tam theih miahloh thung. Ka theih chin chinah inchhung chu ka han bih ngial pawh in chutiang a thil dangdai, Tlanmawia rawn sawi ang chi reng reng kha hmuh leh hriattur awmin ka hre ta tlat lova. Helai hmun pan nan a hun ka khawhral chhung te khan alo kalbo hman tawh pawh a ni thei e, tiin ka thaw deuh hawk. Engpawhnise, fimkhur tluk a awmlo , chu mihring luh ruk theihna niawm te chu ka han rin dap leh vel phawt. Chutih pah chuan Tlanmawia kha ka text bawk a, min lo reply rang ngei mai. Inchhungah chuan thawm ala hriat leh hriatloh te ka han zawh chuan ,a hriat tawhloh thu a min chhang in, a chhuak tawh nia a rin thu te pawh a rawn sawi duah. Chuti a nih tak si ah chuan , inhnuai lama lo chhukthla tur leh light te pawh rawn on a, kawngka te chu min rawn hawnsak turin ka ti veleh nghal mai. Ani pawh ka awm hnai tawh tih a hriat takah chuan a phurin, a thlamuan hmel ta takzet. Tichuan, phone chu ak ṭha leh in, tukverh dangte chu ka han enkual leh thuak thuak a, ka pawt chhin vek bawk. Mahse, mak tak mai hian han luh ruk theihna tur awm reng reng ka hmuin ka hre hauhlo. Alo inkalh ṭha em em vek mai nia. Ka thaw zui halh mai. Chutiang a nih si chuan tiin, inchhung thlithlai theihna ber tur, choka hnung tukverh lam bawk kha ka pan leh ta zawk a. Tlanmawia pawh  a rawn thleng thla ve ṭep tawh tho ang chu, tih rilru pu chuan ka va ding leh ta vang vang mai. He tukverh aṭang hian an inchung panna step kha a lang chiang thei hle a, a remchang phian. Chutia, Tlanmawia lo lan hun nghak a inchhung lam kalo bih vung vung lai chuan ngai teh! Sitting room lam aṭang hian mihring ruangam niawm tak rawn kal phei a inchung lawn chhoh tum mek chu ka va hmu ta mai! A inthuam dan kha a thim lam vek a nih bakah, light eng mumal awm bawk silo nen, amah chu tunge a nih tih hmuhchian theih mai a ni tawhlo. Mahse, chiang taka ka hmuh leh hriattheih erawh a kutah khan chem lian leh hlai pui hi a keng tih chu ka chiang khawp mai. Ka thinphu zui nghal dup dup in, inchung lam chu ka han thlek leh ṭhin a, ka hmu thui thei mang bawk silo. Tlanmawia mawlh kha, room aṭang a rawn chhuak tawh angem? He mihring hi a rawn hmu ve tawh zawk hial a ngem? Amah chu ka call ngawt mai dawn emni ang? Chung zawng zawng ka ngaihtuah chhung chuan hun a tlai mai dawn tlat. Tihdan tur dang ka dap vat vat a ṭul a ni tih hria in, ka buai ru ta hle. Saw mihring saw a tlanbo hmaa man hman ngei ka duh a nih si chuan, thawm chhuah hmasak vakloh kha a fuh ang tih chu ka hria. Mahse, engtinnge chu chu a thlen theih tak ang le. A ruk thei ang ber  a luhna tur lah ka zawng hmu der tawh bawk silo kha a nia, darthlalang chhanah hian va kap dawp pawh ni ila, kan awmna hi a inzawn tehchiam loh avangin a ṭhelh thei ṭawk emaw kha a ni dawn a, rang lutuk in a pil bo daih thei ve tlat. Emaw, inchungah chuan a duh aia chaka tlanchho in, ka ṭhianpa dinhmun kha a derthawng zual thei bawk. Lalpa, i ṭanpuina ka va mamawh tehlul em! Chutah, zawimuanga ka phone chu phawrhchhuak leh in Tlanmawia bawk chu text leh ka han tum a, ala deliver thei der lo lehnghal. Ka han call dawn a,, signal a nei ta lo nge, keimah zawk tih pawh ka chiang ta lo. A reh vung vung ringawt mai. Hreptaka! ti supin ka ak ṭha leh ta phawt a, inchhung lam bawk chu mit tla lo lek hian ka en leh ta vung vung ringawt. Kha mihring niawm tak ka hmuh lah khan a thawm chu a han dim ve em em khawp a, step laihawl a thleng tawh ang tih ah chuan rinloh lutukin ka phone a rawn ri ta thut. Chuveleh, inchung lam pan a chhoh tum mek pawh kha thawm awmna lam rawn hawi ve nghal zawkin kei erawh, kalo ṭhu pil hman zuk thung. Min hmu fuh hman kher lo ang. Tlanmawia mai mai chu aw, ava han hun lo tak ti nawk nawk in call chu ka hmet tawp thuai a, chutihrual chiah a kawngkapui inhawng rawk thawm leh metal road a mihring tlan ri hlawk hlawk thawm  te chu hre chhunzawm ve nghalin, chulamah chuan chak mangkheng hian ka vung chhuak ve nghal vat. Rawl chhuah meuh a au tuar tuar pah hian kawngpuiah chuan ka tlan zui puat puat a, a mawng phe chiah ka va hmu hman e, tihtur ang vel a ni. Chutihlai chuan kan thawm hria in amah Tlanmawia pawh kha kawngka bulah alo ding ve reng tawh a, a rawn thaw deuh hlawp hlawp bawk. Keipawh ka bang bik chuang hauhlo mai. Tlan thui hman lo hle mahila, hah ve tak tho chu ka ni e. Umm, kha mihring zet chu, tu phiangsen tak ni ang maw ti bul bul chungin inchhungah chuan ka lut ve vat a, ṭhianpa Tlanmawia lahin rang mangkheng hian kawngka chu alo kalh ve sawk sawk bawk. Tichuan, an inchhungah chuan luh ruk theihna tur tukverh inhawng te a awm em tih chu enfiah leh zung zungin , alo awm lo hlauh e. Chutihlai a mak ka tih tak ber zawk chu, engtinnge kawngka kha a chhunglam aṭang alo inkalh daih theih tih hi a ni. Tukverh leh ventilation engkim te kha a nihdan tur ang thlapin an awm vek si a, kan Tlanmawia fimkhur tawk lo deuh hian thil tihsual palh nei in a lut ru thei ta emni ang aw , ka ti hial. Chutiang thil vel chu tun atan chuan amah hi zawhfiah leh mawhpuh chi pawh niin a lang lo a, ala pawr in a insawi fihlim leh nasa dawn bawk a, inhnialna tur kan chawk chhuak mai mai ang tih a hlauhawm zawk.

“Engkim te kha i kalh ṭha vek tawh maw?”  thaw dep dep chunga ka han tih chuan rawn inher deuh vutin, sofa ah a rawn ṭhu thla zui hnawk a. A thaw zui ve ham ham mai. 

“Tlem a tlemah ka nunna hi a tawp lo chauh chu a ni si a, ṭhianpa, ka lawm e aw” tih pah hian a rawn khi vei suk a, a thaw zui leh ham ham. Keipawh chu lo nui let ve maiin, engkim thilthleng te kha Pathian vang chauh a nih thu leh, lawmthu sawi a ṭawngṭai mawlh mawlh zawk tur kan nih thu te, tun chinah chuan fimkhur zual a mamawh tawh nia ka hriat thu te chu lo hrilh ve nghal luamin, kan han in nuih leh rih , tichuan, t.v te en in, kan mu thei dawn chuanglo tih kan inhria a, eitur te pawh siamzui leh te te in, kan ṭhu tlaivar ta ṭhak mai. Vanneihthlak kan ti dawn nge, chu zanah chuan eng thil danglam mah a rawn thlen chhunzawm tawh lo hlauh bawk.

Khawvar rual deuhthaw in ka chhungte lah chuan min rawn call sek tawh a, zanlam ah chanchin engmah inhrilhna hun kha awm tawh heklo, zingtin a min rawn kaitho ṭhin tu ber ka nu in ka awmlo tih a hriat rual khan a hawihai zui hlemai hi alo ni a, ka dem hranpa lo e. Zanlam a thilthleng te chu lo hrilh ve thuak thuakin,  tukṭhuan pawh heta ka ei nghal tur thu thlengin kalo hrilh zo vek a, vanneihthlak tak hian harsatna min siamsak ta bik lo.

Tukṭhuan eizawh lamah pawh han tihtur ṭul em em nei tawh heklo. Hriatpuia kan ko phei ve a, ani lah chu rinai tak hian a rawn phur vei phian lehnghal. Holiday a nih angin hunthawl kha kan ngah ṭha hlawm bawk a, video games te khelh pah a intihhlim mai mai chu kan rel tlang ta ringawt. Tin, zan lama kan thiltawn maksak tak te kha Hriatpuia pawh chu hrilh ve in, ani chuan mak alo tih hmel ve hle a, tichuan, games khelh hma law law tiin, misual sulhnu awm thei ang te chu kan han thlir kual vel leh rih. Mahse, eng thilmah phei chu hmuhchhuah leh thilthar hriatzui tur reng kan nei ta lo thung.

Kan ṭhianpa chet vel dan hi tun hma aṭang tawh khan mak kalo ti ru deuh ṭhin a, a chhan pawh engdang nilo in, a che felfai thlup zel a, a fimkhurin engemaw hlekah a phi buai ve hlut ngailo bawk. Ka sawithiam dan leh hmuhdan berah chuan a che detective ka ti tawp mai. Mipa fimkhur tak leh chengvawng tak pawh a ni ka ring mai a. Tlanmawia te nen hi chuan lei leh van ang vel anni hial ang chu.

Tichuan, games te chu khel ho in, nî chu kan tumtawi ve ta ṭhak a, a nuamin a hlimawm phian e ti tawh mai ang. Hetih hun chhung zawng pawh hian Rintluanga bialnu chanchin reng reng kha hriatzui tur ala awm hleithei lo fo a, thuthang belhchian dawl lemlo chi hrang hrnng erawh awm nuk mahse, engmah chu rintlak an awm lemlo thung. Police ho erawh chuan theihtawpin hma chu la ve reng tho mahsela, hmasawn harsa thil chu a ni ve reng reng e. Amah Rintluanga ber lah chu biaktlak ala ni mang tlat silo a, an inah lenchilh in va kawm pawh han tum viau ṭhin mahila, awmzia a nei mang der lo. Keiniho chu min hria ang pawh hian a awm ngai hauhlo a, min lo biak chu sawiloh, melh khat pawh hi kan hlawh ngailo ti ila kan sawi uar kher awm lo asin. Chutiang chu kan dinhmun mek nimahse, kan ṭhianpa chu kan hmusitin, kan endawng a , kan phatsan ta tihna erawh a ni hauhlo a nia. Kan hmangaih a, kan ngaihsakin, ngaihtuahna luahtu erawh ala ni reng tho a, tun atan engmah han tih rum rum theih a nih miau loh vang zawk a hetia tlawh pawh tam lo mai chauh pawh hi kan ni kan ti thei ang chu.

Tlai dar 5 bawr velah Tlanmawia chhungte zin pawh lo haw ve in, kei leh Hriatpuia pawh chu ngaihṭha tak hian mahni chenna lam pan chuan kan haw ve thei ta a. Thawkkhat a veng huai mai. Hriatpuia chu lo lengkawi ve tura ka han tih ngial pawhin a ṭang ve tlat a, zan lamah tihtur pawimawh lutuk a neih thu chhuanlamin min hnial a, kan inṭhen zui ve ta a ni.

Ka chhungte lah chuan an bula ka awm chhung zawng khan Tlanmawia te in lama thil thleng ringawt kha min zawt awl lova, a tawpah phei chuan ka nin tak deuh avangin phuahbelh nen ka hrilh ve ta nge nge a nih kha . Mahse, an awih em em vek tho. Tichuan, mutchhuak chhuanlamin zan dar kaw bawr veleh room lam ka pansan ta ngawt a, ka khum chunga ka dah, ka phone chu ban zui leh zatin, tah chuan mak tak hian ṭhianpa Rintluanga message alo awm teh tlat a nih chu! Hawng zui vatin, ani chuan

“Ṭhiana, thilmak leh awmang lo tak tak thuruk hi hriat ka nei a nia aw”

A thu min rawn thawn teh tawp avang chuan ka meng zau deuh kawk. Eng a sawi tumna nge ni ang tih chu hrethiam hrihlo mahila, a ngaihṭhat thlak hauhlo. Thu thawn hmanga sawifel tum ai chuan tiin ka call ta vat a, alo la rang kher mai.

“Rintluang, eng nge i thil rawn thawn awmzia kha? chuan, engtik aṭang khan nge biaktlak in ilo awm ve tak a?”  Ka sawi zawh rual chuan a rawn nui ve mai a, min ti hrilhhai lek lek thei. A aw te chu rawn thian leh te te in, ka rinloh tak mai a fiah fel fai hian a rawn ṭawng chhuak ta anih kha.

“Ni e tiraw ṭhianpa, a tir kha chuan ka biak tlak loh in, ka laktlak loh tak tak khawp mai. Mahse, chawlhkar khat pawh a vei awmlo e, keimah ah hian rinhlelhna lian tak a rawn lut ṭan a, chu ka mi rinhlelh pawh chu tudang ni lovin kan ṭhian thar Vanlalhriatpuia ngei kha a ni bawk asin!”

A rawn tih chuan mak kalo tih em avangin ka rum chhuak kawk thei. Ka awih nge awihlo tih chu tunah engmah ka chiang theilo bawk. Mahse, khatiang ngaihdan a nei mai erawh kha chu mak ka ti ve thlawt a ni. Tin, amah Hriatpuia berkher chu atir aṭang reng khan rinhlelhna pakhatmah ka nei lo hrim hrim a, han rinhlelh tura a awmlai lah engmah ka hmu in ka hre bawk silo. Rintluanga hian a rin thu a rawn sawi mai mai nge ni ang tih te ka ngaihtuah phah ta daih.

“Ṭhianpa, eng chungchang nge maw i rawn sawi tak hi le? Hriatpuia berkher chu, ava mak duh dawn ve aw!” ka awih lemloh avang chuan ka la nui deuh sâng reng a, ani pawh a rawn nui ri ve hak mai. Kei lah chuan min fiam ta emaw kalo ti lehpek hman a, mahse,

“Nia, nang hi chuan i awih leh dawn lo tih ka hria alawm. A chhan chu, mi fel leh rilru ṭha tak i ni a, midangte rin i awlsam em em bawk. Mahse, ka han hrilh ang che aw. Park a kan kal ni khan Hriatpuia kan sawm ve a, mahse, hna ṭul dang a neih thu chhuanlam in alo kal ve lo a nih kha, ila hre ngei anga, mahse maw, khami ni vek khan park chhungah Hriatpuia kha ka hmu asin! Amah chauhin a ni lehnghal a, a buai hmel hle bawk. Ani thung kha chuan min rawn hmu ve lemlo a reiloteah a kalbo zui leh ta a, ka hrilh duh ta lo law law che u a nih kha. Tichuan, kan nu nen khan thinghmun lamah kal zelin rei pawh kan awm hman lo ang tihah kalo sawi tawh ang khan thawm ka hre ta a. A vawikhatnaah kha chuan hmuh pawh ka nei lemlo. Mahse, vawihnih nan thawm ka hriat leh a ka han hawichhuah khan thingkung phenah hian tuemaw pil lut zuk angin ka han hmu ta a, a pheikhawk bun kha ka hmuh hman tlat avangin hriatchhuah ka nei ta bawk. Chu chu tudang nilo in, amah Hriatpuia tho kha a ni e. A chhan chu maw, kha pheikhawk ngei mai kha park chhunga ka hmuh lai pawh khan a bun tlat vang a ni” a rawn tih leh chuan keichu mak tiin kalo ang phuau ringawt tawh. Han sawizui ve vak dan ka hrelo a, engmah kha hmuh leh hriat ka neih ve miau loh avangin ka ngawi tawp mai. Chutah, amah bawk chu rawn ṭawng chhunzawm leh in

“Chu chauh chu ala ni hleinem ṭhianpa, hmannia min rawn kawm hlim tura in rawn kal ṭum a thusawi in neih kha ila hria em aw?” tih pah a a rawn nuih rik tak hak ah chuan keipawhin kan thusawi te kha lo ngaihtuah chhunzawm ve in, a eng ber kha nge sawi a tum tih erawh chu ka la hre fuh thei ta chuang lo. Chutah, amah bawk chu rawn thaw leh hawkin, engkim mai te chu a rawn sawifiah leh ta a.

“Hriatpuia khan engtinnge ka bialnu chungchang chu alo hriat ve tih in zawh khan, a hmaa alo hmuh tawh thu a sawi a nih kha chhura. Iva han hre rei theilo em em ve a”  ka harh zawk mai. Ni e, kha thu kha a sawi ngei alawm. Mahse, eng nge chutah chuan buaina tur la awm ang tih reng hi ka hrethiam pha leh chuang hauhlo. Ka ngawih rei tak em avangin amah bawk chuan vin zet leh nin hmel fe hian

“Ka hrilh ang che. Vanlalhriatpuia hian ka bialnu kha vawikhat pawh a la hmu chhin ngailo. Thlalak ah takngial pawh ala hmulo tih hi ka chiang em mai. Tih ah chuan, nangni ka ṭhian kumhlun zawk te takngial pawh hian in la hmu tam lo tih chu in hre mai anga, chutiang a nih laia, ani khan alo hriat daih nachhan tur hi a awmlo reng reng. I hrethiam em mihring!?” a rawn ti leh ngheng. Awle awle, chutiang zozai te chu thil awmdan a lo nih tak si ah chuan keini hian ṭhu khawmuang mai mai lo in hma kan lak ngei a ṭul ang chu, tih ngaihtuahna ka nei ta rup. Chutah, kei chuan

“Chutiang chu thil thlen dan a nih si chuan ṭhianpa, ruahmanna te ilo nei ru khiau em? Chet kan lak ve ngei a ṭul dawn a nih chu le. Awm mai mai tur kan ni lo in ka hria”  a ngawih vang vang hnuah zawimuanga rawn ṭawngchhuak ve leh in

“A dik alawm. Mahse maw ṭhiana, he thil hi fiahna tak kan neih miau loh avangin leh, rinhlelh thilthu chauh ala nih bawk avangin tu midang mah rawih buai pawh ṭul ka ti lo a, tihian Tlanmawia sawm ila, Hriatpuia khawsak dan enthlak hna pawh chu thawk mai ila ka duh zawk a ni. Fiahna mumal tak a awm miau loh avangin, midang midang han rawih kual buai vel kha buaina dang zawk kan hmachhawn palh ang tih a hlauhawm tlat. Chu chu a ṭha maiin i ring em?” a rawn tih leh tak zung zungah chuan keipawhin ruahmanna dang nei heklo, kalo pawm zui ve mai. Kan inbiakna pawh chu ti tawp zuiin , ṭhianpa Tlanmawia ka call leh vat a. Ani chu thil awmze tlangpuite hrilh leh thuak thuakin, zanin ngei aṭang hna ṭan nghal kan ngaih thu pawh ka hrilh nghal vek bawk. Rinloh tak hian ani chu alo phur hmel kher a, a lawmawm lamah ka ngai ta mai.

Zan hun alo inherchhuak a, zanriah te eikham fel leh te te in, thuamhnaw lum ṭha tak ka inbel zawh leh hnuah Tlanmawia te in lam pan chuan ka inkhalhchhuak ta a ni. An in ka va thlen chuan ani pawh lo inpeih ve tawhin, muangchanglo hian Rintluanga te in lam kan pan zui thuai a, chumi hnuah, Hriatpuia te chenna lam pan tur chuan kan chhuak ho ve ta chiah a ni.

Hriatpuia te hi kan veng aṭanga hla deuh takah a ni a, vawikhat vel chu an inah pawh hian kalo chuangkai ve tawh nghe nghe. Chhungkaw khawsak nuam em em annih hmel loh bakah, an khawsak a sang lo ang tih chu an inchhungkhur landan aṭang khan a hriat theih mai awm e. Nimahsela, chung zawng zawng aia pawimawh ta chu, an chhungkua kha mifel leh rilru tluang tak annih erawh a rinawm thung a, inleng te chungah reng an hawihhawm in, min duhsak em mai. Amah Hriatpuia pawh hi ka lo sawi thuak tawh ang khan misual chu a ang chiahlo ka ti ṭhin a, a ṭawng tam lo in, thil pawimawh chin lo hi chu a phuhchhuak tam lo khawp mai. Ka sawi thiamdan berah chuan a nungchang hrim hrim kha hmeichhe ho duhzawng tak ti a sawi theih a ni ber e.

Hriatpuia te chenna hmun kan va thleng chu alo reh ṭhap tawh mai a, êng reng reng hmuh tur lah a awm bawk heklo. Mak zawk tak a ni. Sana chu ka han bih deuh zoh a, ka ṭhiante hmel chu en leh thuai pahin

“Khua lah chu ala hma ropui si a, an mu tawh nge maw ni le” ka tih sup takah chuan Rintluanga kha lo inrawlh ve vatin

“Ka hremai lo, mahse, ka la sawichhuah miahloh, in hriatloh tur chu, zan engemawzat he Hriatpuia hi kalo enthla ve tawh a, ih, zantin, dar 8 chho velah hian pawnah rawn chhuakin, khawi hmun emaw a pan ṭhin tih ka hria. Ka dawihzep chu thuhran, mahni chauh a han kal thui pui kha ka inbuatsaih lawkna hranpa neih loh nen chuan ka zuam silo a, um, chu chu in la hriatloh tur thil a ni e. Zanin pawh hian a tihdan ṭhin ang khan a rawn chhuah leh mai ka ring deuh a, lo chang ru phawt ang u aw. Dar 8 a ri har tawh dawn lo a nia” a rawn ti leh duah. Kei leh Tlanmawia chu kan lo ner sak sak mai.

Tichuan, Hriatpuia te In lan chian theihna tur ni a kan rin, an in hmalam lan fiahna ber tur ah chuan phei zui leh dial in, hnimbuk lo awm laih mai phenah chuan kan va biru zui nghal ṭhap a. Minute 20 vel kan ṭhut hnuah pawh mihring hmel hmuh tur reng reng awmlo in, a reh dûk a. Khua lah chu a vawt in, thosi a tam vei phian nen, a hneawm ta lek lek mai. Mahse, chutia kan lo buai ruk ve nek nek lai chuan hmuh kan nei ta! Kan mi chan mek leh melh ruk reng, Hriatpuia ngei mai chuan thawmdim tak hian kawngka chu rawn hawngin a hawi kual deuh zak zak phawt a, a ralmuang tawk tih a hriat hnuah thawmdim tak bawk a kawngka chu khar ṭha leh in a hoodie lukhum chu a han khum deuh thak a, tichuan hmundang pan in a kalsawn zui ta a ni. Chuveleh,keini ho chuan rang fe mai hian kan umzui ve zat bawk a, thawmdim ngai nen a buaithlak dawn hrep mai. Zawimuangin a hnung hla mawi tawk zelah kan zui ve ta reng a, a rawn hawi let ngai hauhlo chu kan vanneihna pakhat a tihtheih awm e. Kal zelin, In awmlohna hmun lam a pan ta tlat mai. An awmna lai vel hi a fianrial in, mihring cheng pwh an khat pharh tawh a, a nuamlo ve reng bawk. Mahse, a kalna lam chu ka lo rinlawk dan ang a ni ta hauhlo nia. Khawchhungah lut zelin, khawi hmun kawmkar leh kilkhawr tak emaw a pan ang chu ka tih rilruk laiin a teuh ta lo khawp mai. Mahse le, eng nge sawi buai theih kan neih ni. Amah zui zel mai loh chu tihtheih a awm rih lo.

A kalna hnu lah kha a han thim ṭha em em khawp lehnghal a, kan che buai ta lek lek fo mai. Chutihlaiin, ani erawh zantin alo kal tawhna hnu kha a ni miau a, eng tello pawhin a che buai ve lo chiang khawp. Darkar chanve dawn kan zui ruk hnuah, vanneihthlak tak leh che buai miahlo chuan hmun pakhat chu kan chuang chhuak ta hlawl. Inruak rawp chhe tawh tak chhungah hian ani chu tim miahlo in a lut zui leh zat a, keiniho erawh chuan eng thil nge thleng dawn tih ngaichang in kawngc chhak thim lai aṭang kan lo thlir ve reng ringawt. Reilote hnuah, chu in rawp chhe tawh tak nia kan ngaih chhung aṭang chuan eng a rawn awm ta thuai a, thawm erawh chu ala awm miahlo thung. Keini ṭhianho chu kan han in enkual leh hrek hrek phawt a, chutah, Tlanmawia pek chuan

“Zu luhkhung hmiah ila nimai lawm, in hlau emni?” a rawn ti leh ta pung pung mai. Kei erawh chuan lo khap zui thuai in

“I mawl emni? Hmanrua pakhat pawh i ken ve loh kha. Tihian, a thawm ngaichang rih phawt ila, tihdan tur chu a rawn awm chawp ve mai ang”   Ka sawi lai mekin Rintluanga chu in awmna lam pan chuan a tlan thla ta puat mai a, min va han ti phu nasa tehlul em! Rang zet a umthla ve nghalin, kan nangching thuai a, kan man bet zui nghal rawk rawk. A hmui hup sak lehin, in kawm thim lamah chuan kan pawt lut ta nawk nawk mai. Chutah le, kan thawm hria hian Hriatpuia kha pawnah a rawn chhuak ta chhut chhut. Mahse, kan bihrukna hmun hi hnai hle mahse, a thim ṭhat em avang zawk in min rawn hmu ta lo hlauh. Hetih hunlai kher hi chuan mipa mahni ila, hlauhthawn luatah thaw a chham lo chauh chu a ni e. Vanneihthlak takin Hriatpuia pawh inchhung lam panin a inher let leh ta hlauh a. Ka thaw zui huai thei. Mahse le, inchhunga a luh rual deuhthaw chuan hmeichhe ṭawng ri lo chhuak in , keiniho chu kan lo meng phawk nasa leh hle.

“Hriatpui, min haw tir tawh mai rawh. Ka thinlung hi chu i nei let leh thei dawn chuanglo a nia”  ti tu hmeichhia ngei mai chu, kan mi zawn mek, Rintluanga bialnu aw ngei kha niin ka hre ta tlat. Rintluanga pawh chu tho kang deuh uaih hman mahse, kalo pawt ṭhu leh vat thung. Reilote chauh nghak leh lawk tura ka tih hnuah chuan thuawih tak hian a ṭhu veleh mai a, a thaw ri hulh hulh tawh mai .

“Nang hi ka hmeichhe hmangaih awmchhun niin, englaimah hian bansan che pawh ka tum ngailo asin. Mahse, engtinnge heng thil zozai te hi ka chungah i thlen tir theih zawk le. Kei hi min lo hmangaih ve ṭhin emaw ka ti a, Bawihi, i thil han chai kual dan vel hi e, ka tan chuan natna hlir, ṭahna hlir. Chuvang chuan zanin ah ngei hian ka kut zalah thi la, kei chu lungdam takin ka awm thei tawh ang. Ka neih ve theihloh tur mihring, hlim taka a leng kual vel ka hmuh leh hriat fo hi ka tan a harsat zia leh nat zia i hria em? I hrethiam phak hauh lovang le!” tih pahin engemaw hi a ri zui dup a, hmeichhe ṭe ri in a zui zat bawk. Chutah le, kan Rintluanga insumthei tawhlo pawh chu ka man behna ata talchhuak zawk in Hriatpuia te awmna lamah chuan ava tlan lut ve ta mai a. Kei lah Tlanmawia pawhin tihtheih dang nei ta heklo. Rang zet in kan um zui ve nghal a, inchhung kan va luh ve chuan Hriatpuia leh Rintluanga te chu an lo in dinchilh ran tawh mai. Chutia, keini ho hmel a han hmu thut chu a mitmeng aṭang rengin mak ati tih hairual a awm lova, mahse, a hmelah erawh zamna pakhatmah ka hmu hran lo thung. Chutah, a dinna hmuna la ding reng chung hian a chemte ken hmang khan Rintluanga chu a rawn kawk khur ta ngat ngat mai. Sehchilh rap rap chung hian

“Nang kha, i damlai hmel kan hmuh tawpna tur a ni tih hi hre rawh!” a rawn ti ta hmiah. Mahse, mak takin Rintluanga chu chhete mah hian a tawlhhnung eihlo nia. Hmanrua pakhatmah ala keng ve der lo zui a, kalo hlauthawng tawh ngei mai. Chutah, Rintluanga thung chuan a bialnu ṭhutna lam va hawi phei pah hian aw khur hlak hlak chungin

“Bawihi, Lalrammawi, hetiang thil te hi engvangin nge ka lakah i lo zep reng. Khang kum 4 chhung zawng zawng pawh khan nang hian min lo bum reng tihna emni?”  ka ṭhianpa chu a kehchhia a, a na thawkhat hle tih a awrawl aṭang pawhin ka hre thei hial. Bawihi lah chuan ṭap pur chunga rawn melh ve ṭawk ṭawkin a lu alo thing deuh nawk nawk a.

“Nilo e Bawiha, ka bum ngai reng reng lo che. He mihring hian min neih tumin min umzui reng a, min kidnap leh bawk a, tunah hian chhanchhuah ka ngai mek zawk a ni”

“Zawngi, ngawi rawh aw!”  Hriatpuia’n a rawn tih tak nghekah chuan hawi rual ṭhapin, thawm pawh a reh zui ta hmiah. Huiham, thil awmdan leh nihphung vel hi ka va han hrethiam tawhlo tehlul em! Heng ho in hmangaihna inkar buaina vang mai mai hian hei chen chen ka thleng a, tin, khang zozai buaina te pawh kha kan lo tawh phah a maw!? Ka thin chu a rim thar ta kher mai. Mahse, ka ṭawng ve hmain Hriatpuia bawk kha a rawn ṭawng chhuak leh.

“Haw rawh u, helai hmun a thih vek hi in duh te a nihloh chuan  haw rawh u. Tute mah hi ka that hreh miahlo che u nia. Chuan, keini pahnih erawh chu ngaihtuahawm kan ni love” a ṭawng dam dap lehnghal a, ngaihtuahna a ti buai nek. Mahse, Rintluanga bawk khan thinrim aw khur hlak hlak chung bawk hian

“A teuhlo! Hetah ka bialnu a awm a, nang hian i hrengbet mek bawk a, a mipa hmangaih ber kei hian ka lo haw san daih a nga maw!? I mawl hle a nih kha!” tih leh Hriatpuia chu va zuan a rual ta mai a! Bawihi kha lo sarak ve nghal chulin, keini ṭhiandun pawh kan phe ve nghal zawk. Mahse, a tlai zo ta! Vanduaithlak tak hian Hriatpuia chemte ken laiah chuan Rintluanga chu ava in thil fuh tlat. Ngaihtuah fim lo leh thinrim khaw hmu fiahlo chung khan chet a thawh ve ngawt a, a pawi zo ta a ni ber. A kâ aṭang chuan thisen tam tham tak rawn phuhchhuak in, a thaw ri zui bawrh bawrh a, a thin zawn chu dawm vang vang in chhuat ah a tlu pah ta riai riai mai le. Amah buaipui turin a lam pan chuan ka tlanphei ve thuai a, ka va sawi pah nawk nawk ringawt. Chutihlaiin, kawngka bula ding mek Tlanmawia khan hlau aw khur chung hian Hriatpuia cju alo be ve mek bawk a. Ka va hawi phei ve nak chuan chemte hi kut khur hlawk hlawk chungin alo keng ve ran tawh. Tin, Hriatpuia chu alo tin deuh vang bawk.

“Nang hi emni kan ṭhianpa Immanuela thattu pawh kha? Damin ka chhuah hauh lovang che mawle” a sawi zawh rual chuan Hriatpuia thung chu alo nui ve hak hak a, Tlanmawia thusawi te kha chu a ngai pawimawh lo in, a thamloh hmel takzet mai. A chemte vilik zauh zauh pah hian Hriatpuia thung chuan amah chu ava pan hnai zel a, ka thin alo phu dep dep tawh. Chutah,

“Ni chiang ang chu mawle. Atir aṭang rengin nangni ṭhianho hi ka target inni tawh. A chhan pawh, he mi laktlak loh Rintluanga vang phiangsen hian. Ih e, ka hneichhe hmangaih em em hian he pa nen phiangsen hian lo kawp ve khanglang a, chu chu hrechhuak in Sialsuk tlângah pawh khan ka rawn umzui reng che u a nih kha. Mahse, in tan a vanneihna ni turin hun ṭha ka hmuthei lo hlauh. A chhan chu, sialsuk tlanga hmeichhe ruang an chhar tak khan ka hun ṭha min bawhpelh tir a, tumloh deuh in pawisawi lo nunna chu ka lak phah ta ringawt. Mahse, ka inchhir chuanglo, mihring thah hi alo nuam khawp mai. Immanuela kha maw, zu a duh hle tih ka hriatna a rei ve tawh a, zanah bum chhuakin phunchawng lama zu inpui ah ka sawm a, tichuan, hrai rui te te in a lu ah ka chhut sak ta ngheng mai a, a thi ta! Phew!! Tichuan, he Zico hi ka bitum leh tur chu a ni tih hria in, zan ah bawk an inah va luhchilh tumin ka kal ta nge nge. Mahse, kha a uipa lian mawl leh bauh peih zet khan min lo hmu fuh hlauh mai a, a pu nunna aiah a ma nunna in a tawrh phah leh ta a nih kha le. Zico chu dahṭha leh phawtin remchang hmasa berah nang mi dawihzep hi ka rawn bitum leh ta che a. Ila hria em? Zanah in inchhunga misual lo lut ru an awm ni a i hriat tlat kha”  chutihlai chuan Tlanmawia nen kan lo in melh zawk a, ani chu a hmai a thlan hluam tawh mai. A hlau hle ang tih chu ka hriat sa a ni. Mahse, Hriatpuia bawk chu rawn ṭawng chhunzawm leh in

“Inchhunga ka rawn luh ruk theihnan khan, tlaiah khan pawnlam ah thawm ka siam hmasa te te a, tichuan, nang chu thawm awmna lam panin pawnah i rawn chhuak a, khatihlai tak kha kei a tan remchang lo ni hlauh pek, ka lut ve nghal vat a, bihrukna tur te chu …a awlsam lutuk. Thah nghal mai che kha ka tumdan a nihloh ang bawkin tun thleng hian ila dam sen phah ta luau a nih hi.  Khami scene a pawi ta ber chu, mi mut reh hun kalo chang kher kha a niawm e. Misualpa hian a thluak alo hmang lo khet, te pawh kan ti thei ang chu. Umm, chuan, a bak eng nge in la hriat duh le?” tiin a teikual chhen a, a han ṭawng duh dan vel lah chu a ngeiawm phian lehnghal. Lungawi hmel zet leh ngeiawm fahran hian a nui vur vur reng bawk. Hetihlai hian kei leh Tlanmawia chuan sawitur kan hrelo takzet a, kan tumlawk loh lutuk thil kan tawn tak vang pawhin kan hawihai ani ber.  Mahse, kei chu ngawi rei thei ka ni lo. Engkim mai hi ka la hrethiam theilo a, hengte hi a tih nachhan diktak ka hre duh. A bialnu in kan ṭhianpa nen alo kawp vang ngawt a thleng tur atan chuan a ho lulai ka tiin, rapthlak ka ti mah mah deuh a ni. Chutah, zawi sap a ṭawng chhuak ve in ka tho chhuak tawh nghe nghe bawk. 

“Hriatpui, heng thil te hi engvang ber a thlentir nge i nih a. Nangmah vang hian ka ṭhianṭha te ka chân a sin. Tin, pawisawi lo nunna in a tawrh phah bawk. Eng mihring chiah nge i nih a, eng rilru chiah hi nge maw i put le?”  Ka tih chuan chiang zet a min rawn melh let ve in, a biangsum khuar kalh bawk khan a rawn nui leh ta. Chutah, a hma ai maha uar zawk a nui leh uarh uarh chung hian

“Ka sawi tawh a ni lawmni? Mawla, heng mi pahnih inhmangaihna kara tlazep tih vel hi chu chhuanlam ve mai a ni. Tualthah hi a nuam em asin. Ka mi thah tawh case tamtak hi zuzi ta an awm nual mai. An la awm zel bawk ang. E,taka, i duh chuan nangpawh hi mihring thah dan chu kalo zirtir ve ang che chu! Nang hi chu i danglam, i fel riau!” ti chungin a nui leh ta uarh uarh mai. Ava han tenawm tak.

“Chuti chu kei hi, tualthah dan chu min lo zirtir zawk ta che. Ka kut a za hlemai a” a hnunglam hawi a inher vut chungin, a hnung a ding Tlanmawia kha a han melh ta ren rawn phawt a. Chutah, Hriatpuia bawk chuan chet thawh thutin a chemte ken lai chuan ka ṭhianpa chu ava vai thawi ta fua mai. Mahse, mak tak hian Tlanmawia chu a hnunglamah alo eu hman hlauh a. Kalo thaw dep dep tawh. Aw…eng aiah nge ka pa revolver te kha kalo ken chhuah ve mai loh le. Changtupa hi ka va han che chukchu ṭhin in, ka va han changtupa zo lo thei tak em! Chutia an chemte ken ve ve hmanga an invai buai lai chuan remchang chuhin, chair a ṭhu zawi hnuang reng leh a taksa phuarbeh tlat Bawihi kha kalo sawi harh nawk nawk a, a phuarna te pawh chu ka theih ang anga phelhsak zung zungin, reife hnuah ka phelh zo thei ta hram. Ka phelh zo chiah tih a Tlanmawia ṭe ri chuan min ti phu chiang kher. Rang fe hian Bawihi nen chuan kan hawi rual nghal ṭhawt a, karei leh! Tlanmawia thinhnun ah chuan chemte sei tak hi alo bur vû vû mai chu niin! Amah vittu, Hriatpuia dar vuan pah ṭawk ṭawk chung chuan lei lamah alo awn thla ruai ruai tawh a, ka sa ve ta phat mai. Rang taka Bawihi chu kaitho thuaiin, tukverh lamah ka pawt phei dawr dawr a, remchang lai lai a lo va biru tur chuan ka chhuahtir ta ringawt. Mak takin hetihlai hian Hriatpuia khan min lo thlir ve reng ringawt a, Bawihi chu lo dan beh emaw, rawn tihnat tum ang pawhin a awm hauhlo.

Bawihi a chhuak fel chiah tih ah chuan rum dur dur chung hian ka lamah a rawn tleh phei ta mai a. Kei lah, lo inring hman em em silo nen ka kiu hmang  chuan kalo in dang bet ve ringawt. Chutah, tukverhah chuan tla lek lek hian min nawr bet ta reng mai a le.

“Ka mi hrenbeh lai lo chhuah zalen tur leh min rawn chawk buai tur hian tu chiah nge i nih a? I thi dawn cju chu a nimai. Zawngchhepa” ti tuarh tuarh in ka hmaiah a rawn hnek zui chawrh. A na kher. Ka ṭan hmunin a zir lo bawk nen ka tan chuan kut han thlak ve vak theih a ni bawk silo a, ka kut ka dahsawn a nih vaih chuan tukverh aṭang khan ka tla nghal a ni mai dawn si. Thei leh theilo hian a hmaiah chuan theihtawpin ka ham sak ve a, ka khup hmangin a kap ah tak ka chhoh dawm ta nghek bawk. Rak ruai ruai chung hian a tawlhsawn dawr dawr a, a kap bawr vel chu hupin reilote chu a kun ngawih ngawih phawt. Chutihlai chuan chhuat a chemte tla chhar tum khan kei kalo che chhuak ve mek thung a, mahse, ka che sawn thui hman lo. Rang zet a rawn phit chhuak lehin a lamah min pawt leng zui dawrh mai a, a palian in tha a ngah bawk nen, mipa ve bawk chu nimah ila, kan inkhan lo keih keih khawp mai le. Chhuatah min theh thlu hnawk in, ka hrawkah chiang zet hian a rawn rek bet ta. Chutihpah chuan a taksa lian leh rit zet chuan ka pumah min ṭhut zui hnawk mai bawk si a, ka tla rawih rawih. Ka chesawn zui thei tawhlo. Reiloteah ka thaw chu chhamin ka thi thuai dawn tih pawh ka hria a, tihtheih ka va han nei tlem tawh tehreng em! Theihpatawpin, ka tha neih zawng zawng hmang te chuan a hmaiah ham kualin a samah ka ṭham sak ve bawk a, a thengthawngah a thawk tawh mawlh silo. Ka thaw a chham ṭan a, ka khaw hmuh pawh a vai chho ta tlat. Ka rilru pawh a chavai zo vek tawh a, chutihlai erawh chuan ka theih ang angin rilru ṭawngṭaina erawh ka la nei pah reng tho. Mahse, a harsa ṭan takzet. Ka mit ka chhing a, a thim dan chu rapthlak tak a ni, mahse, mak tak hian chutia min rehbehna a tha pek dan chu zawi tial tialin, hla taka awm ang mai hian thil ri leh chawk ṭhin hi ka hre zui bawk. Min rehna kut chu thlah fel tawhin keipawh zawimuang hian ka meng leh thei ṭan ta a, boruak te pawh hip ṭha leh thei ṭan in, ka han meng zau chu ka chungah hian a rawn bawkthla lo chauh tawh a, a kâ aṭanga thisen rawn chhuak nguah nguah te chuan ka hmaiah an rawn far ṭan mek bawk. Chutiang a ani tehlul alo awm theih nachhan pawh engdang vang nilo in, a hnungzang ah chuan Bawihi khan theihpatawp leh nasa tak mai hian alo vih sawk sawk vang a ni tih chu ka hre ta. Mahse, ka harhchhuak leh tawh a ni tih a hriat takah chuan zawimuangin a inthlahdul ve ṭan ta chauh a, tin, chemte hmang khan rawn vit chhunzawm tawh miahlo pawhnise, Hriatpuia tan khan chet ngaihna a awm tawhlo hrim hrim. Thisen chhuak reng a turu em mai.

Ka harh chian tak hnuah chuan ka boruak mamawhna a sang deuh nge ni, ka khuh zui ta bawrh bawrh mai a, chutihpah chuan ka chunga bawk reng Hriatpuia pawh kha ka sirah a rawn hlawm thla nawk tawh. A che zui der tawhlo lehnghal a, a thi chiang hle ni turah ka ngai hmak. Zawimuanga thochhuak a ka han in enchiang zet chu leh! Ka thisen pakhatmah tel miahlo hian misuaksualpa thisen hlir mai chuan kalo khat vek a nih chu le. Ka va han in ten mai mai tak. Marawh chu, chutiang ngai pawimawh rei hman ka ni lo thung. Bawihi chu thei leh theilo a en chung hian ani lah khan min lo nuih seih lehnghal a. Keini pahnih chu mahni thisen tel miah silo hian midang thisen hlir kaiin kan berh dun luai ta mai.A nuihzatthlak lek lek thei zawk awm e. Zawi sap hian Bawihi chuan

“I ṭha tawh em? I kal thei angem?” a rawn tih leh chuan kalo la khuh deuh ṭhawt ṭhawt reng a, ka pum a na zui em em bawk. Chutah, tham deuh ṭiak hian kei chuan

“Umm, ka thei ang. Ka lawm lutuk. Ih, ka laktlak loh hlemai, a mipa zawk si, ṭanpui ngaiin” ka tih mek lai chuan ka hmui a rawn hup thut a, ka meng zau kawk. A mitmeng nalh zet a chiang taka min rawn melh leh pah in

“Khatiang thu te sawi a ngailo. Englaipawhin mipate hi in che changtupa thei bik reng hleinem. Chet fuhloh ṭum te chu kan nei thei vek. Chubakah, nangpawhin min ṭanpui hmasa a, ka chetchhuah hun tur a Pathian ruat vek ah ngai mai ang aw” a rawn tih leh chuan za lo tak hian kalo nui suk. Tichuan, ka bânah min rawn chelhin zawimuang hian min pawt tho ta a. Ka pum a na leh zawk thei . Mahse, ka ṭha tih hriatnan amah chu ka va nuih lui sak. Chutia kal mai tuma kan inher lai chuan chhuata mu reng, nunna nei tawhlo kan ṭhianpa emaw kan lo tih ṭhin Hriatpuia chu zu en leh thuakin zawi sup hian

“Hmaihnih nei-a” ka ti sap a. Chu hmun chu muangchang in kan chhuahsan zui ve ta a ni.

**      ***   *****     ****     ******    ***     *********   ***

This Post Has 2 Comments

  1. StephenVom

    Избранные актуальные новости часового искусства – свежие новинки лучших часовых компаний.
    Все модели хронографов от бюджетных до супер люксовых.
    https://bitwatch.ru/

  2. Robertnon

    Абсолютно все трендовые новости часового мира – актуальные коллекции известных часовых марок.
    Все модели часов от бюджетных до экстра премиальных.
    https://watchco.ru/

Leave a Reply