You are currently viewing HMINGTHANMAWIA

HMINGTHANMAWIA

Spread the love

By : Vanlalpeki Fanai

“Avan nâ tak, nâ tak ani”  

ka malpui ruh te chu a tliak sawm vek nimai hian ka hria. Peihlo zet a ka han tho chhuak chu ka phu zawk mai. Ka awmna hmun hi ka khum dup nuam tak chung emaw kalo ti a, alo nilo nasa mai!  Kawng thlang hnim buk pik karah ani kalo awm. A reh ruih lehnghal. Zawimuang chuan ka tho chhuak ṭaih ṭaih a.      

“A nâh!”  

Ka ke chu a na takzet, tin ka taksa khawilai mai pawh chu a pilh pheng phung a nâ lo lai pawh a awmlo, ka lu pawh chutiang tho chu. Ka ti thei thlawtlo,ka ṭhu leh hnawk a, lu dawm meuh in helai hmun a ka awm ngawt dan chu ka ngaihtuah ta a.

Birthday lawmna ah ka kal anih tak kha mawle. Wine pawh ka lem nual a, damdawi nen ka tihpawlh bawk a, ka chiang vaklo. Mahse mahse engnge ni ngai?  Engtin nge hetah hian?  Malsawmzual, inthingharh rawh, i hriatchhuah ngei ngei angai ania.

 Ka hre ta!  Ka hre ta! 

 Ka tho chhuak hluai a. Ka mal chu a thip leh zawk mai. A ho lutuk, khatiang maimai, tia infuih ru sauh sauh chung chuan kawngpui chu ka pan chho ta chhat chhat a. Kawngpui ka thlen chhoh chuan khawvelah hian keimah chiah emni awm ta ka ti hial mai. A reh hian a reh vawng vawng a, mihring hmuh tur reng reng an awmlo. Thinrimna, hah leh na tuar nen chuan ava han in millo tak em. Kawngsir a culvert lo awm ah chuan ka ṭhu ta ringawt, motor lo tlan hmasa ber ka phar tawp mai ang tiin ka nghak chu ania, beisei erawh chu a chau angreng.

Darkar 1 chuang ka ṭhut hnuah chuan ka vanneih a siamin bungraw phur truck hi a rawn tlan hlauh a, thei leh theilo chuan kalo phar ve hram a, ala tlan tlang zawk zui. Mahse chhak deuh hlek ah chuan a ding ta hlauh, ka va lawm tak.

“Ramhuai emaw min ti chiang”  driver chu alo nui hul hak.

“A mak ve ṭep a”  ka nui ve hak thung. A bak chu kawngtluan in kan inbe leh tawhlo. Khawchhung kan lut a, mahni În lam emaw hospital pawh pan ta lo chuan Hmingmawia te În chu ka pan ding chat. Ka hmel pawr phing pheng te, thawmhnaw ṭet hrip hrep leh thi hnuang mai min han hmu thut chu a meng phawk teh asin. Eng khaw sawi set set lo in kei lah chuan a kawr nghawng ah ka ṭham a.

 “zaktheilopa! mak tih hmel deuh a min en kha a ṭulna a awmlo, hetiang a ka awmna chhan hi haider reng reng suh, theih chu nise thah nghal mai che hi ka duh ania”  ka sawi zawh rual rualin ṭhutthleng ah chuan min kuai ṭhu hnawk.

“I sawi awmzia hi engmah ka hrelo”  ka thinrim dan chu ropui tak ani.

“Min han en teh. Kei hi nizan khan thi tur a kalsan ka ni asin. Harhchhuak leh hlauh lo ila chuan sawi pawh hi ka sawi peihlo zawk e”  ka mittui chu a rawn far fap a. Hmingthanmawia chuan a ngaihna hrelo zet, min hnem tum tak si hian min rawn kuah a, mahse rang takin a kut chu kalo phihthla nghal.

“Min khawihlo teh. Nangnen hian in zawmna chu nei tawhlo mah ila nangmah vanga ka tawrhna te hi ka ning zozai tawh, ka tuar peih tawhlo”  ka inhnit ri hlap hlap bawk a.

“Bawihte, pawi ka ti lutuk, Nunsangi hi ka hrilh tam tawh viau asin hetiang thil i chung a ti tawhlo tur hian”   a ṭawng pah chuan dettol leh lapua a la a, ka hliam ah chuan a hnawih ta malh malh mai a. A hmel chu ngawi rengin kalo thlir ve thung a. Mipa hmelṭha leh pa tak hi ani ringawt he pa hi chu. Mahse Nunsangi hian lo hêl ve in vo na thu hrang hrang leh tha rum nen a min beih takah chuan ka tlawm ta ani. kan tan a ruat lo hi chu kan chelh theilo tih ka hria.

“Hospital ah ka hruai ang che aw”  rang fahran in ka mit chu ka la sawn nghal.

“Aih angai lo, ka ti ve thei e”

 thawh mai ka han tum leh ngawt pek a, ka theilo nasa mai, rang lutuk in ka ṭhu leh hnawk.

“Kalo pui ang che” 

ka hnial duhtawh biklo.  Min kuah chhuak a, step ah chuan min pawm ta nawlh mai a, a car chhungah min ṭhuttir nghal sawk sawk bawk a min thlah ta nge nge e. Ka thinlung chu lawm avangin a nui. Kan ṭhut dun chhung khan vawikhatmah kan inbe lo. In kan thleng a, chhuah nghal mai ka tum chu ka kut ah alo man chat. Min kiss a han tum ringawt a, kalo nam sawn chiang kher asin. Rang zetin ka chhuak a, ka hawi let tawhlo hrim hrim ani. Ka inbual fai a, damdawi te ka ei hnu chuan ka chau tawng khawng bawk a, ka mu hlawm nghal hmak. Ka chhungte zawhna zawng zawng pawh chu ka chhang lo. Ka ṭhan harh leh chuan zan dar 8 alo ri tawh a, chaw eitur takngial pawh a ka thawh peih tak loh avangin phone game te chu ka khel ta maimai a. 1 new message!  Hmingmawia ala ni zui.

“I chau viau ang tiraw? Ka tihpalh takzet ani. Nunsangi pawh ka hau tawh a, a inthiamlo khawp mai”  ka ner nghal sawk. Khawiahmah Lalnunsangi kha a inthiamlo ngailo ang. Mi zaktheilo lutuk, ka bialpa min chhuhsak a keimah zawk min la tibuai char char bawk katih rilruk   hrep hnuah  “Lo ngawi tak rawh se, ka hmuh leh hunah a hria ang”  tih ringawt in ka reply a.

Mi fel tak chu ka ni biklo, damdawi ei ruih ka hrat a, wine ka duh viau bawk. Ṭhian ka ngaina a, party huau huau ka hre thei hle bawk. Ka heti chung pawh hian Hmingmawia chuan min la hmangaih ber tho tih ka hria.

Mc vel a bazar leh teihawi hi chu nuam ka va ti tak. Dawr pakhat a an thawmhnaw zawrh kalo en kual lai chuan hnunglam aṭang tu emaw hian min rawn ko tuarh a.

 Zawimuang a hawichhuah pah hian “eng nge ni?” Nunsangi chuan rum zet hian min lo melh kawr chu niin. A hmel aṭang chuan min seh duh tur hmel a pu in ka hria.

“Tun thleng a ila dam ve reng nachhan hi chu ka hrelo, mahse min lo nghak rawh, kan la intawng leh chek ang”  kalo nui hul hak mai. Ka thawmhnaw ken lai chu ka paih sawk a, tumah chu ka zah peih tawh biklo e.

“Engmaw? Lalnunsang, hmeichhe zaktheilo tak chu ilo nih hi le, mi ngaihzawng chhuhsak in ila vo let ngam zel ania tiraw? ka hlau che emaw ti reng reng suh, i ngam ngam chu ka ngam e”  ka ti let ve ta hrep mai a. Ka ṭawng thawm hria kan bulhnai a awm te chu an lo hawi ṭhap a,ka pawi sa vak lo. Ka hlau lo tih a hriat vang emaw ni Nunsangi chu a kun daih a, a kalsawn ta nge nge. Thuamhnaw pawh chu ka en zui peih tawhloh avangin ka inkhalh haw nghal nal nal.

A peih chen chen chu min han bei teh se, ka tlawm ngawt lovang. A bialpa pawh engmah ka hrilh tawh hek lovang, ka tâwn tlang ve thei chiang alawm..zanah chuan Nunsangi hnen aṭang message ka dawng ta nawlh a.

“Malsawmzual, vawiin kha ila hria maw? In ring reng khan lo awm rawh”  a rawn ti ringawt.

 Min cho viau anih chuan itih theih ang ang kha chu iti dawn ania, kalo nghak e ka ti let ve leh mai a.

Nunsangi!  Nunsangi!

 Hneawm lutuk. Intih hahdam nan tiin Tv han en ila Lalnunsangi hmel hlir hlir! Nia, a chhelo a a hmel pawh a ṭha. Model niin a luck hle ang tih pawh a hriat. Mahse a nalh na phen a a rilru chhiatna hi an hmu tel ve lo ani. Tv ka off hmak a, ka hmu peih thlawt lo e.

“Bawihi, mamawh kan ngah tlat mai, nang nula zawk ah va bazar lawk mai ta che”

  ka nu ṭhin lah hi!  zawi zet in room ah ka lut a ka insiam nghal. Bazar aṭanga ka chhuah hnu chuan Hmingmawia ka hmu hlawl mai. Amah chauh ani lo a, Nunsangi pawh a tel ve. Hmingmawia chu a ding dawt a, ka hmulo der ta vel. Nunsangi chu alo mengrum ngei e.

“Kal ang”  tih pah chuan min rawn melh rawm rawm bawk a. Kalo ṭhen khum sâwng ringawt. Rilru chu a nâ lo bik reng reng hleinem, ka hmangaih ber leh ka hmelma nu kha an ni miau a, mahse tihtheih dang ka neilo, beih let ani mai. Ka hmangaih ber hi lo let leh turin thlem ka tumlo, ani pawhin duh hle mahse lo kir chu a tum buai hauhlo ang, a chhan chu he ramhuai nu hian min umzui zel dawn tho a , a bansan maimai dawn lo tih kan hre lawk vek. Ka hrehawm lai hi  a hmuh theihloh vanga duh lo chung chung a kawp ta kha ani reng bawk a. Mahse min ti hrehawm zui zel tho bawk si.

“Bawihte, min ngaidam ang che aw, hetiang dinhmun a i din angai ta mai hi hrehawm ka ti, ka thiamloh vek ani, i hnena lo kir leh hi ka duh ani,

engtinnge ka tih ang min pui teh”

“Hmingthanmawi, i rui vel elo!? Zu i in ngai silo a eng thil nge maw itih tak le?”  Ka nam sawn rawk a.

“Nia ka rui, ka rui ngailo bawk i hriat kha, mahse ka ngai che, ka rilru hi a nâ a hah takzet asin. Zanin pawh he ta lo leng tur hian ka huaisenna zawng zawng ka sawm khawm ve alawm”

“I huaisen lo aniang chu zurui chung a ilo kal”  ka tih chuan

“Engtinnge Nunsangi kalsan

 hian i hnenah kalo kir theih ang? min han hrilh teh mawh” ka ngawi kar a, a zurui lah chu a thle tawn sek lehnghal. Chutah  “ilo kir angai tawh hleinem, Nunsangi bulah khan hlim takin awm tum la, ila duh chho ve mai ang”  chu thu ka sawi zawh rual chuan a ṭe deuh tuarh a. Thinrim hmel zet a thawh hluai pah hian  ” chu chu maw i rilru? A ṭha e, nang hian engatanmah min lo ti miahlo anih hi ka hrereng tawh ang” tiin a kal tau ta hmak mai. kei chuan um zuiin hrilhfiah ka han tum ngial na a kawngka khar ri chiah hriat zui tur a awm ta ani.

“I hrethiam lo ani”  ka ti sap a.

 Kha zan aṭang kha chuan min be duh tawhlo a, khawi emaw kal chang a han inhmuh ve pawh hian min hmulo der ngat ngat ṭhin. Ka rilru chu a ti nâ ve det, amah vanga ka tawrhna te ka ngaihtuah chuan. Ka khawhar a zual a, tihtur thlawt hi ka hrelo ani e. Damdawi ka stock ṭeuh a, beer pawh ka ngah narawh e. Damdawi nen ruih pawlh in ka chatthla nitin ani ta ber mai a, min tlawh tur a ṭhianṭha rawn kal te pawh in ka hmel an hmuh chuan an meng phawk nasa thei teh asin. Ka chhe thawkhat hle ni tur ah ka ngai. Chhungten min zilh awl lova, engahmah ka ngai duh chuanglo thung.

Nikhat erawh tihtak zet a ka nu in leng chhuak a ṭhiante kawm ve tur a min nawr tluk tluk takah chuan Sangkimi birthday party ah chuan ka kal ve ta nge nge a. Ka rui leh viau tho. Rinloh deuh in Hmingmawia pawh alo kal ve khauh. Mak kati kher a, mak katih leh zualna chhan erawh Nunsangi a tel ve lo chu ani. Kil khatah hian a ṭhu ngawi reng a min rawn melh leh ralh ṭhin bawk. Chutih pah chuan a no dawm chu a lem pah khalh khalh bawk a. In ngaihsak tawn lo ang taka lan kan tum ve ve a mahse, chhungril hriatna aṭang erawh kan 2 chauhin chu lai hmunah chuan kan awm thung si ani. 

Ka ruih tawh em avangin sofa ah chuan ka ṭhu thle nguai mai a, mipa tan chuan kalo zuam awm viau ania nge, ka hmelhriat pawh nilo tlangval pakhat hian ngampa zetin  “ṭhiannu chu kawppui inei biklo ani maw?inkawm ila”  tiin min han chul thuak a, kei lah chuan zawi zet a ka ban lo vai khum chungin  “ninawm, kalbo teh” kalo ti thung. A rei hnuah phei chuan a ninawm taktak ta khawp mai a, min be reng a,min mutpui ngei a tum tih ka hrechiang khawp. Chutia kan buai dun em em lai chuan mipa aw hriam zet hian  “Kalsan nghal rawh”  a rawn ti ta. Chulai hnaia awm ho chu kan ngawi nghal ṭhap. Chutianga rawn ti tu chu tunge anih ka hai hauhlo, Hmingmawia ngei ani. Ka nui sak a.

“Ka sawi chu i hria em hmela? Kha nu kha tibuai tawh suh”

Chuveleh pâwr zet hian tlangval chuan  “nang kha tunge inih ve aaa ??  Ve ringawt che chuan, kalsawn zawk teh”  a sawi zawh rual chuan a hmai chu a ri no chawk mai a, ka bulah chuan a rawn thal thla nghal hawl mai, thawh leh tum a a inbeng kang tur chu midangte chuan an lo man bet ta hlauh a. Keipawh chu peih leh peihlo hian ka tho ve a, an inkarah chuan ding in  “A tawk tawh e, keimah vang, a ho lutuk”  kati nuah nuah, ka rui lutuk chu ka meng hleithei tawhlo ka tlu dawn…ka awn ruai ruai tawh chu Hmingmawia chuan min rawn chelh hman hlauh a ,ka nui suk a, a bak chu engmah ka hre tawhlo. Ka harh leh nâk chuan ka roomah kalo mu tawh chu niin, khua pawh alo éng uarh tawh mai a, makti zet hian ka tho hluai a, inhnuaiah ka tlan thla nghal. Ka nu chu ka zawng kual  vut vut a, choka ah alo awm hlauh e.

“Nu, engtinnge nizanah khan kalo haw theih a?”  Makti zet hian min rawn melh nghal kawk mai.

“I hre miah nange?”

“Hria ila ka zawt dawn che mi?”  Kala ti zui ah!

“Bawihi, hetiang em em hi chuan awm tawhlo teh aw, en teh, a hming in i pa pawh kohhran Upa te anni ve a a mualpho thlak ṭhin emai”  a sawi zawh hma hma chuan “hneawm, ka hre vek ka hre vek”  inchungah bawk ka tlanchho lehnghal a. Ka suahsual zia te chu ka hria alawm. In hrelo zawk ani in fanu nun hahthlak zet hi.

Zankhua alo thim a, tukverh a dah chhuah vang vang pah chuan engtinnge ruihna tur ka lakluh leh ang tih chiah ka ngaihtuah leh tawh. Ka tho ta thurh a, ka insiam nghal mial mial mai. Ka hman chu ani leh ta der mai e. Ka ṭhiannu Rsi ruih duh ve zet mai chu ka call zui nghal a

“Mate, zanin chu lo neih tum teh a, kalo kal dawn aw, ka chiri ṭep tawh ania”

“Awle awle, lo kal rawh”  alo ti hlauh.

Chhungten min koh let hman hlau zet hian ka dawk chhuak zawk a. Rsi chu amah chiahin alo la meng hlauh a, t.v en pahin kan thil mamawh chu kan ti dun leh ta mial mial a. Kan titi pah reng bawk a, chutia kan titi lai chuan sawitur ti tam tu atan Nunsangi chu advertisement ah a rawn lang leh hlawl. Kan han chai leh taktak mai chu(h) kan sawi tawp hleitheilo, sana ka’n en meuh chuan zan dar 10 lai alo ri tawh chu niin!  Ka tho nghal hluai mai a,  “mate, haw a hun tlat, ka lawm lutuk ania, ka nuam tawk khawp mai”  tih pahin kan in mangṭha ta a.

 Rsi te În leh kan în hi a inhlat vaklo bawk a ke in ka kal hnak hnak. Khawlai te chu alo reh ruih tawh a, kal pah chuan Van lam ka han en a khua a thiang kher mai. Ka ruih deuh vangin ka kal sawt thei meuhlo chu footpath ah te chuan ka han ṭhu leh ren rawn ṭhin bawk a, diktak chuan ka khua a har a, hnemtu ka mamawh takzet ani. Ka hriat miahloh laiin ka mittui te chu a rawn luang ringawt. Phone ka lek chhuak  a, Hmingmawia chu call ka han tum zet a, mahse insumtheihna hi a ṭha ani.

 Muangchang a tho chhuak in În lam chu ka pan leh ta zawk a. Inchhung ka luh rual a ka pa mitmeng chu a nelawm loh kher asin, thu tamtak a sawi leh hmain tiin room ah ka tlan chho thuai a, min ko let lo hlauh.

“Hmingthanmawi, iva induh sawt ve a, min hua ani tiraw?”

Zah pawh dawn zo lo in Hmingmawia te Inah  ka kal ve hmak, ka kâi deuh chiai lehnghal a. Ani chu pawnah motor silfaiin alo buai hle a, kei erawh a sir ah chuan ding in kalo be buai ve chhen bawk. Min melh zawk a, min chhang duh mailo.

“Hey, induh ve a, ṭawng ve ta che” 

“Ngaih man ivan awmlo tak, thei leh theilo in kalo leng ve a,min duat lo hlemai”  tiin ka inkuangkuah sawk a, ka hawi tau vei hmak bawk. A ruk tak chuan ka nuih a za thung. Hmingmawia chu a rawn ding hluai a, kawng dawm meuh a min han melh tak vang vang ah chuan ka lai ve lek lek mai.

“Malsawmzual, chhun chhunah (min hnim pah thut thu a)tinge? Sim tawh rawh ka tih che kha”

Ka ner nâwng a, ka zam duhlo lui ve tlat.

“Hmân a zu in ngailo tlangval fel deuh khan tunah chuan zu a in ve tawh a, kei chu hmân aṭanga zurui ṭhin kha ka nia, ka rui ani mai ani”  ka melh leh zeuh a, alo meng rum nasa mai.

“Umm anih chuan motor hi min han silpui lawk teh a zo ṭep a”

“I high hope anih chu, i duh leh Nunsangi va sawm mai rawh”   chutia ka tihrual chuan a hmel awmdan chu rawn inthlak danglam in a meng rum ta hle a. Engnge ni ta, sawi sual ka nei emni? Chutah zawi sup hian 

 “Kan inṭhen tawh” 

Awi awi awi!!!  Eng thil nge a sawi tak hi?

“Engmaw?  Sawiṭha leh teh”

chuveleh ka beng bulah ringtawk tak mai hian,

“I beng a chhet emni? Kan inṭhen tawh ka tiiii”  ava han chimawm tak..ka awih lo lutuk nui vel chu min ten hmel zet hian min melh rawm rawm a.

“Chuvang chuan rui tawh suh, mi pangngai lo chu bialnu atan ka nei duhtawhlo ania”  a kiai zui sak.

“Engmaw engmaw, fiamthu thawh hlek suh aw Hmingthanmawi”  alo nui var var thung a.

“Thingpui lo va lum teh ka sil zo dawn”

Thuawih zet chuan ka lut ve mai bawk a. Ka awmdan chu ka hrethiam lo kher mai. Mahse inchhung ka luh rual chuan ka harhchhuak chiah, inthiamlohna hlirin ka khat nghal a, tlanchhuah leh tum a ka inher lai tak chuan Hmingmawia chuan hnunglam aṭang min lo kuah chawt.

“Hey, min thlah rawh, hetah hian engti turin nge kalo kal? Ka haw duh”

“Nilo ve, ka chelh bet tawh che anih chuan thlah leh che ka tum miahlo, a hma khan hmeichhe pakhat vangin ka kalsan che a tiraw?  Kalo huaisen tawklo ani. Tunah chuan teuhlo mai, engpawh tawk dawn ila nang hi ka venghim zel tawh ang che zuali, Ka hmangaih che”  ka khabe chu dawm in ka hmui lo khur ru der der chu dim zet hian a rawn fawp ta a.

Kan inthlah chiah chu kan che lai dun angreng. Ani aiin ka lai zawk fe, hnuailam ka en reng ringawt.

Ka chhungril chu a hlim veng veng a, ka famkim leh ta nimai hian ka hria. Anilo thei nang, ka engkim chu ka kiangah a awm leh tawh tlat alawm.

“Vawiin chu ilo kal fuh hlemai”

“Engvangin”

Motor sil zawh ah rawn kal ka tum hrim hrim a”

“Min ngai tawh viau ani maw chu”

“Min ngailo thei em anih vei kha”

“Min ngailo hmasa zawk anih kha”

Chutia ka chhan takah chuan min chhang let tawh lovin a ner nâng a, min nghawk zauh zauh reng bawk. Hun rei tak lo inzui ve tawh ta chu an inah pawh hian ka tlangnel hle a, a chhungte pawh hian min en hrang ngailo hle, amaherawh chu hemi ni hian an lo awmlo hlauh.

Tunah chuan ka hmangaih kha ka nunah alo let leh ta chu ania, engtikahmah ka ta anih leh theih pawh ka ring tawhlo asin, mahse alo let leh! Ka bulah ka kiangah ngei alo let leh anih hi, Ka hlim ani. Tunah zet chuan Nunsangi ka huatna te pawh dah bo in ka tan leh ka hmangaih tan hian ka nun chu siamthat ka duh hmasa ber tawh ani. Ka thei ang, tiin mahni chu ka infuih thar mawlh mawlh mai ani. A dik alawm, engvangin nge khang ruihhlo te kha ka sim theihloh tehlul ang ni?  Damdawi chu ka rui ṭhin, mahse ka thisen zungzâm ah ka luan luh tir ve ngailo tlat, ka ei mai ani. A harsa dawn lo e,ka tan sual sim hi. Zu te chu a harsa lo lehzual, ka sawi peihlo zawk hial ani. Hmingthanmawia ka nun a alo let leh hnu aṭang chuan Nunsangi chu khawi hmunah pawh a hmel hmuh tur awm mahse engatanmah ka tilo lui ve thei tawh. Keimah pawh ka hahdam huai niin ka hria.

Zankhat chu ka ṭhian sual kwm ve ber Rsi call ka dawng tlat mai, ani nen hian inkawm nasa viau e ti lo chuan kan in call ngailo thung. Rang takin kalo la vat a.

“I hun a in ṭan e mate, ve tehmial che chuan”  kalo ti duah.

“Ni ngawt mai tiraw? Englo ania, lo leng la ka la ngah lutuk a, dahṭhatna tur ka neilo a min lo pui mai teh rawn tih ka tum a”  a thusawi avang cbuan ka  phu deuh zawk mai. Diktak chuan ka ṭhiannu chu hrâwk nghal hrep mai ka duh hial a, amaherawhchu ka ruihhlo khawih ṭhin te sim tumin ka fight mek tih hi Hmingmawia leh ka chhungte bakin an lo la hre hauhlo tih ka hrechhuak leh a, ka insum leh hman hram. Nui har har chung hian

“Mate, ka sim tawh chu ka ti hmak theilo, mahse hei ka bei ve mek ani. Tih nawn leh hi ka duhtawh lo a, min lo hrethiam mai rawh. Midang duh tu an awm ang, kalo zawn pui dawn che mi?”  Ka tih chuan Rsi chu a thaw halh a. A ngawih vang vang hnuah a lawm vaklo tih hriat tak hian  “aih, angailo mai e”  tiin phone chu a off ta hmak a. Mak chu kati ve reng. Ka ṭhian kawm tam ve ber maiin chutiang a min lo dawngsawng ta mai chu. Nghei ka tum a ka fight mek thu ka hrilh khan min lawmpui ve a min fuih zawk te kalo ring ve asin le. Engpawhnise, ṭhianṭha alo ni hauhlo tih leh min hmangaih a ka hmakhaw ngai tu anilo tih tal ka hriatphah alawm le.

Rsi nen kan inbiak tawhloh hnu aṭang chuan ka chanchin chu kan ṭhian dangte pawhin an lo hre pung ve zel a, kei chu min deusawh hle bawk. A chhan chu khati khawp a min ti nâ a ka thinlung min hliamsak tawh tu, Hmingmawia nen kan inkawp leh te, amah avanga ruihhlo thlah ka han tum ta mai te chu an sawi duh in a chhe thei ang ber a min sawi leh nuihza siamnan a min hman chu an chaw tui ber ani ta ringawt a. Reilote ah Hmingmawia chuan min kalsan leh mai te pawh an rin thu an sawi bawk. An ngaihdan chu dik pawh kati hle. Mahse engvangin nge a chhe lam kawng zawh duhtawhlo a ṭhat ve ka tumna te chu min ṭawmpui duh tlat loh le kati ani. Ka ṭhiante anni ve ngei si a maw? Ka zak zawk e a. Engpawhnise kei leh Hmingmawia inkar hi ṭha se la, ka nun ka khalh ngil theih phawt chuan anni ho khan an duh duh chu lo sawi maimai phawt rawh se. Ka chunga  rorel tu tur chu Pathian chauh ani, anni nilo in.

Nunsangi laka ka awmdan leh ka rilru put hmang chu danglam tawh mahse ani erawh ka laka a rilru put hmang te alo la danglam ve hauhlo mai a! 

 Vawikhat chu Hmingmawia nen kan inzui chhuak lai min hmu fuh hlauh mai a, amah tawk zawngin kan kal hauhlo nain a thinrim na chu a thunun theilo ani chek ang aniang chu, kan hmaah tak chuan a rawn ding ta heu mai ah. A kutzungchal chuan ka chal ah tak mai min han nawr siah siah a, thinrim ha chang ṭhial bap bap pah chuan  “Nang hmeichhe zaktheilo nu, ka bialpa hi ilo chhuahpui ngam vel animaw a!? Ka hriat sa nimahse, i zaklo mah mah ani”  tih pah chuan min kawk sawk sawk reng bawk a. Hmingmawia chuan a theihtawp a lo dan beh ve chu tum mahse he nu hian zah a hre hlawllo, engahmah a ngai duh bau lo bawk. Kei chu ka ngawi reng a engmah sawi ve ka tumlo hrim hrim ani. Hetiang mihring hi ka khing in ka bei let peih vel lo ani e khawlaiah lehnghal.

HMINGTHANMAWIA-II

Chutah Nunsangi chuan hawi kual zak zak chung hian

  “hre rawh, helai hmun hi mihring tamna nilo se chuan maw i lu hi ka la ang, tunah chuan mi hriat hlawh te ka nih avangin i chungah hian zah ka ngai maimai ani tih hi lo hria ang che”  tih leh pah chuan min su her sawk a, min kalsan ta hram ani.

Chutiang teh hrep a mi tamna hmun a min han ti mualpho kher chu ka rilru a nâ lutuk a ka khawng vek ni ber in ka hria. Lei lam en a ka din khawng reng lai chuan Hmingmawia aw chu ka hre thut a, chet nachang ka hre ve chauh. Ka thinrim lutuk leh ka rilru na chuan engmah ka ngaihtuah thei tawhlo, Hmingmawia min chelhna kut chu ka paihthlak sak a amah pawh hre chang tawhlo in ka hma zawnah chuan ka kal ta hmawk hmawk mai a, mi reng reng chuab min en deuh hrek hrek te hian ka hre lehnghal a, ka ṭah a chhuak kher mai.

In ka thlen rual rualin ka room ah ka lut nghal a, bathroom ah lut tlang lehin ka ṭap nghal zawih zawih ringawt. 

Nunsangi khan engtinnge Hmingmawia chanchin kha a sawi kha(h)? Ka bialpa atih tak kha mawle. Mi zingah lehnghal, a au ring nasa mai si a ka zak ngawih ngawih tih bak chu sawitur pawh hi ka hrelo. Chumi zan chuan zankhua in Hmingmawia chu biak pawh ka be peihlo a, a text leh a call reng reng pawh engmah ka chhang peihlo. Mahni chauh a awm rih a in ngaihtuah ṭhat leh ka duh ani. Hmingmawia ka ngaidam leh ta mai hi ka tisual angem? Ani hian a damchhung atan he ramhuai nu lak ata hi min humhim zo taktak angem?  Amah ber pawh hi he nu lak ata hi ka ta chauh ni turin ka chelh hlen thei meuh ang maw? Zawhna chhan sen loh chu alo lut zut zut mai a, chhanna erawh ka nei der silo.

A tûk ah erawh Hmingmawia chu ka nep zo leh ta lo ani ber e. Zingkar aṭangin a beidawng duh miau silo a, a hmasa ber atan min rawn text phawt in, ka reply duh tak silo ah chuan mi rawn call leh a, chutah zet chuan kei hmeichhe awmnem, hnuk no ta na na na chu ka tlawm leh ta duai duai mai ani e.

Tichuan hun a ral ve zel a,kan pahnih inkar pawh chu ṭha leh tawh tak ani. Nunsangi a rawn lan hmaa Hmingmawia ngei mai kha ani leh tawh a, kan hlim a, kan inlungrual a,tudang mah hi kan ngai biklo ani. Kan hlim e ka tih rual hian thil engemaw mak tak mai erawh a awm ani.

 Hmingthanmawia nen  kan intawn tirh kha chuan kan inkarah tumah an inrawlh lo chu sawiloh a chhungte takngial pawh khan min duh in, min ngaina a min tlawn ta emaw tih mai tur khawp khan min be ṭha hûrh reng anih kha, mahse kan ramhuai nula Nunsangi a rawn inrawlh chho a, midang a tlawn thiam in a ama ṭang hma a hai thiam nasa mai si a, a chhe thei ang ber in Hmingmawia chhungte bulah chuan min hek ṭhin hi alo ni a,anni chhungkua lah mi rilru tluangtlam, mi sawi ang ang pawm leh awih mai zel mi an lo ni bawk nen, a sawi zawng zawng chu thudik emaw tiin an pawm hmiah hmiah zel bawk si. Tichuan kei chu misual tak leh hmeichhe awmṭha duhlo tak mahni ngaihzawngte bûm ching leh mipa chi hrang hrang kawp lawr ang chuan min hriat phah ta hi alo ni a. A ruk tak chuan hetia an fapa nen kan inkawp leh ta mai pawh hi an lawm lo hle tih an hmel leh khawsak dan aṭang chuan a hriat theih a, amaherawh chu an fapa hi chhungkaw enkawltu ve bawk leh an fapa neihchhun alo nih si avangin engmah sawi buai ngam erawh an neilo ani. Engkim hre vek mahila hrelo ang thlapin ka awm a ṭul a, an In a ka len chang pawhin min biak hmasak tum tawhlo mahse a hma anga awm leh ka duh em avang chuan ṭhat ka chhuah lui hram hram ani. 

Ni e, keipawh in diklohna leh thiamlohna tamtak ka nei teh meuh mai, hmeichhe fel tia sawitur kha chu ka ni mawlh lo ve bawk alawm. Anni hi chuan thiamlohna an nei hleinem, a hrilh tu in a zir em a, anni ang mi rilru tluang lutuk tan chuan lo pawm tawp mai kha a awm ve viau ani. Ka beidawng dawn lo a ka hlawhtling leh khawp ang tih hi ka ngaihdan nghet bur chu ani . Hmingmawia pawhin ka lakah chutiang a a chhungte an han khawsa ta mai chu han hau ve bawk mahse kei chuan ṭul kati ber lo. Ka tih dik loh hmasak zawk anih angin keimah ngeiin ka chingfel leh tur ani.

Thil pakhat ka la sawi lan loh chu Hmingmawia leh Nunsangi te hnathawhna hmun hi in ang in, private school lian ve tak pakhat ah an thawk dun a, nitin an inhmu thei dawn ani tih kha chu ngaihtuahna nei tan chuan hriatthiam loh tur a awm hauhlo ang. School a kal hlan te hian ka ngaihtuah nasa thei lutuk hi ka rilru a hah hluah hluah a, keimah hi kalo tawt up up ṭhin ni ber in ka hria, mawng a hawlh ang mai hian ka za sek ṭhin bawk. Nunsangi hi a zahtheihloh bakah midang biak hmasak hreh miahlo, ri deuh har har thei reng mai chi hi ani lehnghal a, amah a hmelṭhat chu sawiloh a pian a nalh in model te alo ni ve bawk nen a vawikhat melh ah pawh tlangval tamtak an tlu pheng phung ṭhin dawn ani tih ka hriat phei hi chuan Hmingmawia chu alo chhai tlu leh mai ang tih ringawt ka ngaihtuah lo theilo. An hnathawk lai lo va biak buai ve sek lah kha ka duh bau silo a, bakah mi induhtawk ve tak ka nihna hian min dang bet ve bawk ṭhin ani. A chang chuan chutia mahni bialpate han rinhlelh vak mai pawh chu zialo kati leh viau ṭhin bawk a, a hahthlak anih hi ah!

Hna a ban rual a min rawn biak nghal hi chuan ka hah hi a dam lehnghal sawng sawng ṭhin bawk a, ka thaw huai ti ila a fiah ber ang. A chang leh pangchang takin

“Tinge min rawn biak miahloh a?”  te ka han ti leh ngawt ṭhin. 

Ani thung chuan zaidam fe mai hian 

“Aw..hnathawh lai te chuan a tih chi loh alawm, ka ngaih zia che hria la chuan ilo kal ve duh hial ang”  a han tih leh takah chuan ka nui veleh thei hram. Ka engkim anih zia hi chu kei baka hrechiang tur an awm tawh kher in ka ring lo ṭhin. Ka hmangaih tih mai hian a sawifiah zo lo a, ka hmangaih ngawih ngawih ti ila a fiah teuh ber ang chu!

Tlai khat erawh an ban hun awm velah pawh ala reh tlat avang chuan ngaihṭha lo zetin ka va call ta a, a vawikhat naah chuan alo la miahlo lehnghal. Ka thin a phu nghal dup dup thei. Ka call nawn leh ta ngat a, a ring ral ṭep tih chuan alo la ve ta hram a

Ṭap aw ṭuau hian

“Engnge i hriat a nilengin i hna ban hun nghakhlel takin kalo awm a, nang lah hian min ngaihtuah ve miah bawk silo”  kati nghal buan buan. A han ngawi vang vang phawt a, chutah zaidam tak bawk hian

“Bawihte, zanah ka hrilhfiah ang che, ka la buai deuh a,hei motor ka khalh mek nih phawt, zanah kalo leng ang, umm?”  Tiin ka chhanna pawh nghak lo chuan phone chu a cut nghal hmiah. Ka lungawi lo lutuk chu ka in thing deuh nawk nawk mai a, ka tum bur a, ka meng nûr hle bawk. Mahse a buai taktak anih chuan tihtheih ka nei chuanglo, zanah alo len loh phei chuan e..ka nasa khawp ang ti rilru bawrh bawrh in ka room chu ka chhuahsan nghal a.

Ka beisei ang ngeiin zanah chuan a rawn leng ta ngei. Eng dang a sawi hma in  tlai a a buai nachhan mawlh chu kalo zawt nghal a. Ani chu a nui hul hak mai. Min chhang ta mai lo chuan a bul a ṭhutna awl chu a beng thuk thuk a, keipawh lawm lo rilru tak chungin ka ṭhu ve nghal bawk. Hnai set sawt a min melh leh vang vang hnu chuan,

“Class ka bâng chiah kha În pawh ka thlen hma in kawng lakah ka ṭhianpa nen kan in tawk a, ani lah ke a kal ani si a, ka han be khaw tlai leh hnuhnawh mawle”

“Chuvang chuan maw i buai a?”  kalo ti hman hram. A nui leh hak a, a lu a thing mut mut.

“I nghak theilo ṭhin e…nang chu…ka la sawi zo reng reng hleinem. Ka ṭhianpa ka tih chu Ramdina ania, nangpawhin i hmuh tawh kha, an veng a hla angreng sia, kan lo inhmu khat ve bawk nen. Inkawm pah tiin ka motor chuan an veng thleng ka thlah lehnghal mawle..ka duh ai ka rei ta phian a, ka thiamloh ani”  ati leh ta zung zung a. A thusawi lai chuan chiang takin a mitah kalo en kar bawk a, ka ring chiah em tih chu hrelo mahila rin tur dang erawh ka hria pawh ani chuang hauhlo. Chumi zanah chuan ka tihtauh tlat vang leh tlai a min lo biak miahloh manah tiin a hrem nan rei deuh ka len tir a, thingpui pawh ka lum sak duh lo. Mutchhuak ham bui bui chungin dar 12 velah ka haw tir ve ta hram ani.

A tûk chhunah chuan ka tihtur ang ang te ti zk thuai in coffee in maimai pawh chuan Tv ka han on a, channel in play sa ah chuan Nunsangi hmel ka hmu thut. Ka ner nghal nawk a, advertisement thar atan an lo ruai leh tawh tih ka hrethiam nghal bawk.  Amah chu huatna nei viau tawhlo mahila a hmel hmuh fo erawh ka duh loh avangin channel chu ka thlak nghal vat. Nunsangi hmel ka hmuh hi chuan ka mood hi a uih nghal vek ṭhin in ka hria. Huatna ka nei tawhlo chu ti mah ila thinlung takin ka ngaidam fel vek em tih hi ka hrelo ani. Vawikhat tal ka pawi chu sawi leh chhin se la chuan ka alh leh vut vut maithei tho. Ka chunga a thil lo tih tawh zozai te kha theihnghilh mai chu a har ve alawm.

“Mate, kei chu orange color hi ka duh ber a”  tia ka ṭhiannu Siampuiin a t.shirt lei tur color alo thlan mawlh mawlh lai chuan kan awmna dawr chhungah ngei mai  Nunsangi leh Hmingmawia farnu Zikpuii chu nui har har chung hian an rawn lut ve anih chu!  An inti thiam viau tih chu ka hria, mahse anni pahnih hi a hranpa chuan an inkawm ngai ani tih reng reng hi kalo hrelo. Ka ṭhiannu pawh ngaihsak lo chuan anni pahnih ringawt chu kalo melh vung vung. An pahnih chuan an in duhsak in an in ngainat hmel ngawih ngawih.

“Engnge ni ta vung vung a?” tia Siampuiin min rawn nghawk tak zauh ah chuan ka harh thut a, ka inthiam lo hnuhnawh kher mai. Bah nuaih hian ka ṭhiannu chu “aw..aw…eng ber maw i lak dawn?”  Kati nghal nawk nawk. Ka ṭhiani lah chu a ngaih alo ṭhalo nasa mai. Min en deuh hu hu a.

“I ṭha meuh a maw?” min ti ta nge nge. Chhang tawh lem lo in ka lo buk khum zauh ringawt a. A duhzawng a lei fel hnu chuan chhuah mai kan tum a, kan chhuah dawn chuan Nunsangi te thusawi chu tlemte ka hre thawi fua hman a, Nunsangi chuan aw ki zangkhai vah hian

“Zanin chu ka nalh ngawt ang”   atih ri chu!  

Zanin hian eng boruak danglam nge thleng ang? Hmingmawia a tel ve dawn em, nileng in ka awm a nuam leh tawhlo nasa. Zanin a an tihtur chu hriat ve ngei ka duh. Hmingmawia tel ve na tur chi thil ani em tih te thleng in. Engtin nge ka hriat theih ang? Hmingmawia chu zanin ah Nunsangi te nen tihtur lian tham deuh an nei em tih ka zawt dawn tihna nge? Teuhlo lutuk, anni pahnih chu ka ringhlel tih hi sawichhuah ka duhlo bur. Umm…ka hre ta. Ka phone ka phawrh vat a, Hmingmawia ka call nghal.

“Hello”  a mut a chhuah hmel kher mai.

“I mu tui lai kati harh che emni?” kati nghal thuai. Ka inthiam lo ve tho, ka phone nachhan a ho angreng si.

“Umm…ti harh e..(a nui leh hak hak)taktak a thawh kalo tum mek a, min ngai leh tawh emni?”  Ava han sualthiam tak.

“Ngai tho, mahse thildang daih, zaninah engnge itih ang ilo leng ang tiraw?”  ka thin a phu dup dup mai. Reivak lo a ngawih hnu chuan maktih hmel zet hian a aw ki a han ti sang a.

“ehhh teh tlat a, min va zawt lawk hma angreng ve”

“Sawi ṭha maimai teh, ilo len dawn chuan pudding tui tawk kalo siam ang che ka ti deuh”  kati ta ringawt. Ka zak leh hnuhnawh zawk. Ala nui hul hak zui a…

“Zanin hi Zikpuii birthday ania,  lawm an tum a a  ṭhiante ho nen, mahse ka awm ve chak tehchiam lo, i bul a awm ka duh zawk”  atih chuan ka thaw ta huai mai.

Hlauthawng reng reng a hmangaih neih ve hi alo hahthlak anih hi. Ka thikthu chhiat vang pakhat chu nimahse a tir aṭangin thil a kal diklo nasa em a, ngai ah ka nei hleithei tawhlo ani ber. Chân leh ka hlau a, a hma ang khan a kut hi chelh zo lo in ka thlah leh mai ang tih ka hlau a, damchhung hun hmang dun lo turin min liamsan leh mai ang tih hi ka hlau zek zek tawh. Ka thlah leh anih vaih chuan ka kiangah hian alo let leh kher in ka ring lo bawk. Kum za emaw a aia tam pawh dam dawn ila ani anga ka hmangaih mipa hi chu ka tawn leh kher pawh ka in ring tawhlo. Engvangin nge min ti nâ tawh tu, vawitam tak  min ti na fo tu mipate hi hmeichhia hian thlah harsa kan tih bik em em le aw tih hi in ngaihtuah ve ngai em?

Awle, ka chhuanlam ṭhing tak mai pudding pawh chu ka siam zo vek tawh a, ka siam chhan ber lo kal hun tur chiah ka nghak ta. Sana en pah a kalo vir kual sek lai chuan ka phone a rawn ri ta ral ral. Hmingmawia chu alo leng leh dawn lo emni aw.

“Aw, ilo kal ta em?”  A han khuh kharh phawt a.

“Kalo kal ta lo mai”  ka nghing dawt.

“Engvang?”  Ka ṭah a chhuak nghal kher mai.

“Ka nau te ho hian min chelh ve tlat si a, sorry aw”  ka ṭap lo chauh taktak tawh. Chutah ka chhan let hma chuan a rawn nui ta hak a.

“Pawn ah lo chhuak la”  ka phu leh nghal zawk. Enge maw a hriat le.

Rang tak a tlan chhuak nghal in kawngka zawnah tak chuan teddy bear lianpui mai hi ka hmu nghal pang mai a, ka hrilhhai angreng. Amah zawng a ka hawi kual ruai lai chuan min rawn barakhaih thut. Kawngka bulah chuan kan râk ta chel chul mai a. Min ti phu nasa lutuk chu a âwm ah chuan na lo te hian ka chum taih taih. Min rawn kuah pahin teddy bear chu a la kang a, min pek zui pah hian  “i ta tur”  ka hawi hai lehpek.

“Engatinge? ka birthday pawh ani silo a”  kati nuah nuah.

“Birthday ah kher thil in pek tur anti emni ka pi?  Kha la rawh, vawiin ah ka chhuahna lamah ka hmu fuh a, i ta tur ni tlat a hriatna hi ka nei a ka rawn lei ve tawp”  atih chuan ka nui a. Lawm takin teddy bear chu kalo pawm nghal chawt. Ka duhzawng a hriat bakah ka lawmna hi a ho thei hle tih pawh a hrechiang.

Chumi zan chuan an In lamah Nunsangi te ho an khawsa tih hre rengin an haw darh hma chu ani pawh ka haw tir phal mai lo a, ka roomah inkawm in hemi zan hian a vawi engemaw zat nan Angel te dai ngai loh ram chu kan dai dun leh a, Kei chu ka hlim em em a, ani pawh kha a hlim lo bikin ka ring lo. A âwm ngheng a a mu der der chung hian a kut pa tak mai chu ka khalh sak niap niap bawk a. A chau ani tih hriat takin ani chu alo thaw lum ham ham.

“Engtikah nge keini pahnih hian  ‘tiam tlat e’ hi kan tih ve ang le”  ka tih chuan a rum dat a, a thaw zui leh ham ham bawk.

“Ka hrelo le, engtikah nge i duh ang?”

In ngaihtuah rei vak ka ngailo.

“Naktukah!”  A nui ani tih hriat tak hian a taksa chu a nghing dawt.

“Nui suh, i bul a awm reng hi ka chak tawh alawm”  kati leh thuai.

“Kei hian alawm nghakhlel, mahse i hriat angin i chung a ka chhungte rilru put hmang ala danglam loh zia chu, heti chung hi chuan nuam iti dawn silo a reilote nghak leh hlek ila, keipawhin thawi dam dan kalo zawng ve zel anga, a ṭha iti em? An rilru a danglam hunah chuan harsatna dang ka neilo”  

Kei chu zawimuang hian ka ṭhu chhuak nghal a.

“I chhuanlam maimai ani lo tih hi engtinnge ka hriat theih ang? I chhungte chu ka hmachhawn thei lutuk ang, hmeichhia hi i ngaih ang ngawt a dawihzep kan nilo ania, kan huaisen in kan chak ve lutuk asin”  ka tih chuan ani pawh lo ṭhu chhuak ve tawh in min rawn kuah zui nghal.

“I huaisen zia chu ka hre tawh alawm. Mahse i ngaihdan leh i thlir lawk dan ang ngawt hi ani dawn lo tih hi hria la ka duh. A rei anga hrehawm iti tulh tulh ang. In hrang chang thei ka nilo tih lah chu kan hre ve ve a, hmanhmawh lutuk lo phawt ang, nang lo chu nupui atan hian ka nei dawn lo ani tih hi hre tawp la, min ring turin ka duh che”  atih leh hnu chuan sawi mai tur ka hriat tawhloh avangin ka ngawi ta reng a. Ka biang a a chuk zeuh hnuah a thawmhnaw te chu inbel nghal sawk sawk in

“Ka haw tawh mai dawn asin, min thlah duhlo mai rawh”  ati leh sup. Chhang lo in kalo bu zeuh ringawt. A chhuak zui nghal a.

Kâr khat lai alo liam leh ta. Hetih chhung hian Hmingmawia nen kan inhmu khat hle a, naupang an exam dawn avangin question papar set vel avanga a buai ṭhin thu a sawi a, keipawhin sawi buai ka tumlo, a hna ani miau a. Mahse ka ngai lutuk hi ani tawp, ngai tak ka ni. Phone aṭang inbe reng mah ila ka kham thei hlawllo hi ani ber e. 

Kâr khat dang a liam leh a, naupang an exam chhunzawm a, inhmuhna hun kan la nei ta chuanglo. Thla khat tehmeuh kan inhmuh tak loh hnuah chuan a tawp a tawp ah a zalen ve thei ta. An exam zawh zanah chuan a rawn leng nghal a, ka lo ngai tawh lutuk chu a hrilhhai letling zawk hial in ka hria. Ka zaktheilo hiam hiam ngawt mai.

Chumi zan chuan âm takin hun kan hmang dun leh a, eng chen pawhnise he pa bulah hi chuan a ninawm taktak thei dawn lo anih hi.

“Tun sunday chu chaw lo ei ta che. Tlai lamah kalo hruai ang che aw”  atih chuan ka phu zuk.

“A tihchi dawn ami?i chhungten anti nge nangma thu in i sawi ve maimai”

“Tu thu pawh chu nise a hma anga in pawhna ṭha kha nei leh thei ula ka duh vang ania, i duhloh chuan ka tilui theilo che”  ati deuh nghut a, ka ngaihtuah vang vang hnuah a pawina em em ka hriat tak loh avang chuan ka yes ve ta nge nge.

Alo sawi lawk tawh ang ngeiin sunday tlaiah chuan min rawn hruai ta a, ka phur na leh huphurhna chu a in chen tawk vel hle in ka hria. A hma pawhin an inah chuan chaw kalo ei fo tawh, nimahse tun hun ang reng reng a huphurh hi ka la nei ngailo. Nia, tunah chuan a dan a dang tawh tlat ani. Umm pawilo e, min lo melh miahlo pawhnise ka tuar ve thei mai ang. Ka inhum ruh sauh sauh mai.

An In kan thlen chuan khua a thim chhalh tawh a, inchhung kan lut chu ka rin lawk ang ngeiin tumah chuan a hma ang khan min lo lawm tehchiam lo. An nui suk duh chauh ani mai. A pawilo, a pawilo.

Chutah nu ber chuan “Mama, lo ṭhu hahdam lawk rawh u, kan mikhual tur pakhat alo la thleng lo a”  atih chuan Hmingmawia chu ka va melh zawk a, a hawi buai deuh in ka hria. Kei chu ngaihṭhat loh na pawh ka la nei chuanglo, hlim hmel ka pu lui ngar ngar. Chutia an rik mam mam lai chuan Zikpuii chu pawn ah a tlan chhuak vut a, a nui zui awr awr bawk. Chutah Hmingmawia nu bawk chuan kawngka lam melh chung hian

“Ekhai, kan mikhual pakhat zawk alo thleng chiah e. Nunsang, i chau em?”  tih leh kal chu a rual nghal a. Kei chu kalo nghing dawt thei.

 Hmingmawia erawh chhuat bih in a melh ngai a melh reng mai . Ka va nghawk zauh chu a rawn hawi chhuak rang hle.

“A ni sawi alo tel ve dawn tih sawi ta che”  ka va ti sar sar.

“Ka hre lawk biklo bawihte, pawi ti duh suh, a ho lutuk. Zikpuii nen hian an lo inkawm ngaih hman pek alawm le”  ati hmarh hmarh a. 

Ka kut chu ka khal niap niap a, ka in sangmar ṭeuh tawh. Ka bet thlawt tawhlo bawk.

 Chutah Nunsangi chu kan awmna lamah lo kalin, kei chu min rawn melh pah zeuh a, Hmingmawia nen kan inkarah chuan a rawn inthawlh nghal sawt sawt bawk.

“Awi Hming, school kan chawl rei dawn sia, engnge tihtur ruahman bik deuh te i nei em?”  A rawn ti nghal bawrh bawrh. A zak miahlo. Hmingmawia chuan min rawn melh zauh pah hian

“Nei em em lo e, ruahmanna siam tur pawhin nimin leh vawiin bak chawlh kan la nei silo a”  atih chuan kalo kiai sak. Chawh reuh lutuk mai. Nunsangi`n a chhan let hma chuan Zikpuii chu ka hmaah rawn ding in min rawn chhuk melh run mai a, nelawm loh fahran hian

 “chaw ei siamna lamah kan indaih lo khawp mai”  a rawn ti deuh kher.

 Chuveleh Hmingmawia chuan  “hei Nunsangi te pawh an awm hi, va kal rawh u”  alo ti ve vat. Nunsangi leh Zikpuii chuan min melh no tawhlo tih ka hriat chuan ka tho zui tharh a.

“A ho lutuk, ka hman alawm, tikhan lo inkawm rawh u”  ka ti ve mai a. 

Choka lam chu pan in Zikpuii chuan ka hnung ah min rawn zui bawk. Nunsangi erawh a che sawn eihlo. Hmingmawia chu a bawh tlu lo chauh ani ber.

Chaw ei dawhkan chu kan kil ta ṭhap mai. Nunsangi chu Hmingmawia bulah chuan a ṭhu nghal thurh a. Chuh pui chi ni a ka hriatloh avang chuan Zikpuii bulah tui lo zet in ka ṭhu ve ta ringawt.

 Nunsangi chuan ngeiawm fahran in min rawn melh leh ṭhin tih chu ka hre reng, mahse en loh hram hram ka tum thung ani. Chu hmunah chuan kei chu awm ve lo ang mai hi niin ka in hre tawh a, a tu a mah chuan min biak an tum silo, Nunsangi erawh in a chhan sen loh leh a lawm sen loh ṭawngkam ṭha a dawng reng thung a. Kei erawh kalo in sehruh ngar ngar mai ani. He mihring nu hi awmlo se a fuh vek nimai tur hi.

“Hminga, kha hei hi i duhzawng niin ka hria”  tiin arsa kan tuihnai tak an siam te chu a plate chawp a chawiin Hmingmawia thleng ah  chuan a dah sak hmiah hmiah mai a.

 Chutih pah chuan kei chu nui sâwng chung hian min rawn melh leh ralh ṭhin bawk. Chutah Hmingmawia chuan a ning ta deuh nge ni, ram hmak  hian “Zuali, i hmaa bowl kha min lo pe teh”  a rawn tih chuan an ngawi nghal ṭhap a, kei chu min melh nghal ṭhup nimai hian ka hria. A nuamlo ber awm e.

 Kut khur der der in bowl chu ka ban a, Hmingmawia chu ka va pe ta a, alo lak pah chuan Nunsangi lam chu hawiin a han nui suk a,

“Ṭhiani, i chaw kha ei ve tawh rawh. I puar ve hman lo ange” ati zauh.

 Ka duh thei ania ka duat laia hi chu. Mahse Nunsangi hmel ah erawh chuan zahna chhete mah ka la hmu chuanglo.

Chaw ei kham ah chuan reilote kan ṭhu khaw muang leh a, nuamlo ka tih em avang chuan Hmingmawia pawhin min khawngaih deuh ani ngei ang

“I haw duh hunah i sawi mai dawn ania”  a rawn ti sup a. Kei chuan haw ka duh tawh thu kalo hrilh nghal var.

Kan chhuak tur chu Zikpuii chuan min lo ko ding in

“Mama, lo haw har lo la, Nunsangi hi iva thlah ve loh chuan”  alo ti anih chu! Hmingmawia nen chuan kan in melh zawk. Chhang tawhlo in kan chhuak zui a. 

Motor ah pawh chuan kan inbe zui lem lo hle. A khât tawkin min rawn melh leh zauh ṭhin tih loh ah chuan kawngpui lam hlir ka hawi a, ka rilru ngaihtuahna hi a chau takzet a, zanin a a sawmna pawm a chaw kalo va ei ta kher te chu ka inchhir hluah hluah. Kallo ila chuan Nunsangi phiangsen pawh kha a kal bik miahlo ang chu tihte ka ngaihtuah. Ka ngaihtuahna hria niawm takin Hmingmawia pawh chuan min biak a tum bik lem lo. Min be hreh pawh a ni maithei, a chhungril chu a inthiam biklo tawp ang. Mahse ka dem em em hranlo e, kha ramhuai nu kha alo kal ve dawn tih a hre lawk bik hleinem.

In kan thlen rual chuan ngawi reng a chhuah nghal mai ka tum chu ka ban ah nghet zet hian min  rawn man chawt a. Kalo melh deuh kawk.

“I lungawi lo ani tiraw?”  Ka rum halh.

“Chutiang a awmlo, ka chau a mut hahdam ka duh mai zawk ani”  a awihloh hmel kher asin.

“Dawt sawi suh. Ka thiamloh anih rualin ka hre lawk biklo tih i hriat ve tho kha. A pawi kati lutuk, kha kha ka tum anilo”

“Tunah chuan engmah ka sawi peihlo. Ka mu duh,muttui”  tiin a kut chu ka paih thlak sak a, ka chhuak zui nghal. 

Rei mawi tawk a din ngawih reng hnu chuan a inkhalh haw ve ta hram a. A tlan liam tur chu ka room tukverh parda kâr aṭang chuan kalo thlir reng a.

Ka phone ri ral ral chuan min ti harh chiang hlemai. Peihlo zet hian ka han en a. Hmingmawia.

“Engnge?”  Ka aw chu a nelwm loh hlemai.

“Mut duh nu, tho ve tawh la, mu tluk tluk reng chu nupui atan ka duh miahlo ania”  ka nuih pawh ati za lo e.

Bul hmuk hian  “eng nge i duh a?”  Kati duh lek.

“Taktak a program dang te i neih loh chuan vawiin chu kan huan lamah picnic pahin kal ila kati deuh a, pool ah te pawh kan in chiah dai ang chu”  a rawn ti duah. Ka in let thawk a.

“Ka peihlo, mut nilen pawh ka thlang zawk e”  ka tih chuan a nui tawi tak mai.

“Ila thinrim reng emni, hahthlak ṭhin e”  ati bai bai a, ka nuih a za ve ṭep. Ka ngawih tak reng avang chuan a han thaw leh halh a.

“Thinrim tawhlo la, a nuam miahlo ania, ka rawn sawm ang che lo insiam rawh. Kan chhungkua chauh ani mai, midang an awm ve tawh dawn lo”  chutia a tih rual chuan i chhungte pawh kha an danglam chuanglo e, ramhuai nu kid te vek annih kha, kalo ti rilru ṭhuai ṭhuai a.

“Ka nuamlo emai, kalo kallo mai ang”  tih pahin phone chu ka off nghal daih. Sana en nghal in dar 9 lai alo rik tawh avang chuan muhil tawhlo in ka tho zui nghal a.

Chaw kan eikham meuh chuan dar 11 lai alo ri tawh. Ka chhungte pawh tumah an awm leh tawhlo, kan nula Sangi nen chiah kan awm leh tawh a.

 Engmah ti peih lo a sofa a kalo mut der der lai chuan Hmingmawia chu a rawn lang thut. Ka meng phâwk nasa mai. Ka kal peihlo kati vek tawh a, a mak hram hram mange.

“Eng nge, ka peihlo ka tih kha”  kalo ti nghal hmiah. Nui ruh ruh chungin ka ke lamah chuan a rawn ṭhu nghal a, ka ke thluang duai chu chawi kângin a mal chungah a dah nghal zat a.

“Keipawh ka ṭhulh fel, i damlo sia  kalsan hi i har em alawm” ati liam leh puat a. Kalo ner khum nâwng nâwng.

 Hemi ni hian rei fe chu min thlem a, a tawp a tawp ah ka nui veleh thei ta ani.

“Theihtawp chhuahin ka chhungte nen a hma anga in pawh tlang leh tur a ka duh che u vangin hun hi ka siam ve ṭhin a, a vawikhatna kha chu Nunsangi vangin a flop ta si a, a vawihnih na atan picnic turin ka sawm leh che a, i hnial leh bawk si. Nangmah hi anih hi inneih duh taktak lo tu zawk chu” atih nuah nuah lai chuan kalo en kar a.

“Engkim huam in min nei ngam la hetiang hi chu ka tuar chhuak thei ang. I duh tlat silo a, ka tan chuan har ve deuh asin. Ka mizia a inthlak danglam tawh tih i hre vek a. A hma anga nula zaktheilo ve tak leh ṭawng zung zung ṭhin kha ka nih tawhloh hi. A hmasa ber ah chuan kan inneih angai, a hnu lam kha chu ka kut ah dah rawh. Ka sual loh na na na chuan ka chungah an sual reng thei dawn lo. Mahse i thu thu ani e”

“Ni e, kan tum dawn ania. I huaisenna hi ka duh takzet.” tiin min rawn fawp ta vawng vawng a.

“Zuali, i hman ve tawh maw? Kan kal mai dawn emni?”  Ka ṭhiannu Siampuii alo ni. Hemi ni hi Hmingmawia pa a hna ah a kaisan avangin a lawmna hun an buatsaih dawn a, kal ve turin Hmingmawia chuan min rawn ngen ve tlat si a, hreh tawh hle mahila kal ve chu ṭha ka tih avangin kalo inbuatsaih ve mek a. Tin, Siampuii hi Hmingmawia pa Pu Romawia te nen a thawk ho anni bawk.

Hmingmawia te In kan va thlen chuan an tual zawl zau ṭha tak mai ah chuan an mi sawm te chu an lo awm liai liai tawh a. An in thuam dan leh an hmel aṭang reng reng chuan mi nei nung anni tih a hriat hliah hliah bawk. A zamawm duh angreng hlemai. Siampuii nen kan lo din maimai lai chuan Hmingmawia call ka dawng nawlh.

“Ilo thleng tawh em?”  A rawn ti thawp sat.

“Aw, pawnah hian kan ding ve maimai”

“Ka room ah hian lo chho rawh”  ati mak ṭhin ania.

“Mate, ka kalsan lawk dawn che aw”  tiin Siampuii chu ka bekbawr sar sar a.

 Ani pawh chu alo bu nghat. Kei chu hreh zet in inchhungah chuan ka lut zui a. Inchhungah pawh an lo tei suau suau mai chu niin.

 Inchung chhohna step ka rap tur chiah chu Nunsangi leh Zikpuii chu Inchung aṭang chuan an rawn chhuk thla ta mai a, ka hmel an hmuh rualin an titi lai chu an tawp chawt a.Kei chu min hmu ngailo ang hrim hian min en deuh haw haw leh ta nghal.

Hmingmawia chu a room tukverh ah chuan alo dak vang vang mai a. Kawngka bul a ding chungin ka aw ka han thian kharh a. Alo hawi let deuh vut. Min rawn nuih nghal sak a, ava han hmelṭha chiang tak. A mal chung chu a beng nghal thuk thuk a, keipawhin hrethiam vatin ka va ṭhu nghal chat. Min han kuah chiah chu a lum nuam ham ham hlemai. Ka thla hi a muang nghal huai huai thei nia mawle. Reitawk fang kan awmdun hnu chuan muangchang a tho chhuak in

“Inhnuaiah drinks lampang ka zu dap ve lawk ange, ka reilo ang”  tih leh chhuah a rual a, keipawh a room chu chhuahsan in balcony chhete lo awmna ah chuan ka ding ta daih a. Chutia ka hawi vang vang lai chuan balcony a bathroom niawm tak kawngka chu chhung lam aṭang chuan a rawn in hawng thut a, kalo phu leh zuk hman. Chutah a chhung aṭang chuan Hmingmawia ṭhianpa Ramdina a rawn chhuak ta heu mai a! Ani pawh min rawn hmu thut chu a phu ve zuk in ka hria. Kan “ehee!!”  Rual ṭhawt.

Inthiamloh hmel deuh hian Ramdina chuan  “inhnuai bathroom a rush lutuk a, helai hi a reh ṭha bawk sia”  ati nghal zung zung. Kalo nui ringawt. Ka bulah chuan a rawn ding zui ve mai bawk a.

“Iva mal ve a”  atih leh lai chuan Hmingmawia chu wine no hnih keng chung hian a rawn thleng ve chiah bawk.

“E, Ramdina chu helaiah ilo awm daih ani maw?  Kha hei hi lo in ru, ka ta tur ka’n la leh lawk ange”  tiin inhnuai lam bawk chu a pan leh ta a. Ka wine ken lai tem zeuh pah hian Ramdina chu ka melh leh zauh.

“Zemabawk ah khan emni in la awm reng?”  Ka tih chuan Ramdina chu a che deuh hrut a.

“Aih nilo e, hemi vengah hian kan rawn insuan luhna a rei leh tawh alawm. Kum a vei leh tawh”  atih chuan ka ṭim sawk mai. 

Hriatchhuah ka nei nghal bawk. Ka hrilhhai hmel chu Ramdina chuan a hmuh hmaih hauhlo. Zawhna min zawh leh hma in Hmingmawia bawk chu a wine tur keng chuan a rawn thleng ve leh tawh a. A rawn nui vur vur lehnghal. Kan bul alo thlen rualin kei chu engkhaw sawi set set lo hian ka wine ken lai chuan Hmingmawia hmai ah chuan kalo theh pawp mai a, inhnuaiah  tlan thla nghal in,pawnah ka tlan chhuak zui. Mite chuan mak min ti dawn mahse ka pawi sa zo tawhlo, ka ṭah lah chu a chhuak ut ut a.

Hla deuh hlek ka thlen hnu in Hmingmawia chuan min rawn um phak ti tih a. Ka hnung hla deuh hlek aṭang chuan min rawn au vawn vawn mai. Chuveleh kei chu ka kal chak sauh. Ka hawi let awmlo emai. Engvangin nge dawt min hrilh?  Ka pheikhawk sâng bun chuan min kal chak tir theih thlawt loh avangin ka phelh sawk sawk a, ka khai nawlh. 

Ka kal leh tur chiah chu ka ban ah hian tha chak zet in min rawn man bet chawt mai. Ka hawi let nawk thei nia. Kan awmna hmun hi kawng reh lai anih tawh avangin min hmu tu an awmlo tur ah ka ngai.

Thaw hlawp hlawp chung hian

“Eng eng i hriat a?  Sawi teh, Ramdina nen khan eng thil nge in sawi?”

Chutah kei chuan ring ve fe hian

“Khatin min au khum reng reng suh aw. A thiamlo zawk inih kha”  ka ṭap pur tawh a, ka mittui chu ka hru pah zauh zauh bawk.

“Eng chu nge ka thiamloh na chu ni a ka zawt reng che alawm. Ka hriatthiam theih turin sawi la.

“Ka sawi peihlo”  ti hmuk pah a kal leh tum a ka in her chiah chu min lo hma khalh leh hman hram. Ka ding chawt. Mahse a awm lohna zelah chuan kal tum in ka kual kawi zak zak a, min dang bet zel tho. A manganthlak.

“Thudik sawi rawh. Puitling kan ni tawh a, hetiang a naupang chhia lutuk hi chuan khawsa ṭhin lo teh. Ka tan a hahthlak zia hi i hrelo ani” atih chuan vin zet in kei chuan

“A hahthlak iti maw?  Tunge hah zawk, naupang takngial pawhin dawt an sawi duhloh khawvelah hian nang hi chuan dawt sawiin kei hi min la bum tluang zel chu anih hi” kati ve tan tan mai a.

“Sawi rawh, eng nge ka bumna che chu”

“Ramdina kha zawt mai rawh eng nge kan sawi chu. Ka kal dawn. I inhmuhchhuah hunah kan la inbe leh dawn ania, a rem chuan”  ti let ve sak in ka kal zui nghal a. Min dang buai duh tawhlo ani ngei ang. Beidawn hmel zetin min thlir liam ringawt.

Ka room ka thlen chuan ka ṭap leh thei tawh der lo. Ka thinrim lutuk vang ani ngei ang. Kum 1 chhung tehmeuh veng khat ah an lo khawsa ho tawh a, ti chung chuan an veng a hla deuh a ka thlah a te kha ati vel a, tenawm lutuk. Dawt min hrilh kher kha eng nge a ṭulna?  Dawt sawi ngai khawpin eng thil chiah nge kha mi ni khan a tih ang? A insawi danah kha chuan a buai hle si a. Thil engemaw tak chu zep anei tih hi ka chiang ani. A theih chhung chu zep rawh se, ka be lo chiang khawp ang  tiin ka insehruh ve nasa kher mai.

Zan dar 8 velah chuan ka whatsaap message a rawn ri ral ral mai. Rang zetin ka en nghal a, amah ngei ani.

“Hey! kan mi sawm te an ṭin chiah a, ka inbual hma in ka rawn be hmasa che anih hi. Thinrim tawh suh aw. Nia, ka thiamlo alawm. I tan hian buaina hlir ka thlen si che a, Bialpa laktlak loh tak ka ni. Kan inhmuh hunah min kek hrep dawn ania”  ka seen ringawt a, ka reply peihlo. Whatsaap aṭang chuan out nghal in IG ah ka lut leh a. Post ho chu ka scroll deuh thuak thuak. Lawk in lawk in, ka scroll chho leh thuai a. Nunsangi post chu leh!  Time chu ka en vat a, 1 hour ago chiah ala ni. Vawiin a hun hmanna alo post nasa mai niin. Hmingmawia biang a a fawh sak lai te, Zikpuii nen an ṭhu dun lai te leh Pu Romawia te nupa nen an lak dun te, a tam lutuk. Midang kha chu engpawhnise, Hmingmawia nen an lak dunna mawlh hi. Ka haw san hnu a an lak dun anih hmel hle lehnghal a. An va han zaktheilo tak!  Umm screenshot hmak ang. Ka phone chu theh thla tawp in keimah pawh chu khumah chuan ka let nghal tawp bawk a. Ka ning, ka ning ngawih ngawih. Engtia awm zel tur nge pawh ka hrethiam tawhlo e. Hmingmawia hi ṭhen hlen tur anga ka in ingaihtuah ringawt pawh hian harsa kati lawk takzet. Chutihrual chuan kei aia harsa ti zawk tu leh min tihbuai chak zek zek tu mi pakhat alo awm ve bawk nen. Tihian kalsan ta ila ani chu Nunsangi hian a chhuah dawn miah silo a, chu chu ka beng tluk in ka chiang ani. Lehlam ah Hmingmawia hi rin harsa ka ti em em bawk si, Lalpa, min pui lul teh.

A tûk zingah chuan Hmingmawia hnen aṭangin eng text leh call mah ka dawng lo nghal pang. Ka pawi ti chailo, ti rilru pang pang chungin choka ah ka kalsan daih a. Nileng in rilru lak pen nan tiin Sangi chu ka pui char char a. Bazar ah te kal puiin nilengin ka phone chu ka khumah ka dah tawp. Ka khawih leh tawhlo. Chutia buai tak a ka chet ve taktak chuan rilru hahna te pawh kan lo theihnghilh ve a, a ṭha takzet. Keimah pawh ka zâng hawk theiin ka hria.

Zanriah ei kham ah phone chu ka han en veleh hram a, mahse ka ṭhiante min biakna tihloh chu ani hnen aṭang khan engmah ka la dawng chuang lo fo. A ṭha alawm, tu awm thei zawk zawk kan ti dawn anih hi.

Kar 2 lai a liam hnuah pawh ani chu ala reh hmiah. A facebook profile ka stalk ṭan a, mahse post thar a awmlo. Story pawh awmlo. Whatsaap ah lah status a nei miahlo bawk. A last seen ka check leh, yesterday alo inti daih mai. Ani chu mitthi nen ka tehkhin ta vel a. Theihnghilh tum ve tawh mai rawh Malsawmzual. Engvangin nge i luhlul em em le aw. Be chak et et khan awm lo la, ngaihtuah tawh suh. I ta tur a ruat ani lo anih hi. I ta tur a ruat chu chung Pathian khian a pe em em ang che. I hmangaih ang hian alo hmangaih ve miahlo che anih dawn hi. Mipate hi bumtu anni a, lemchan thiam anni bawk. Chuvang chuan Inti chak la, hma lam pan tawh zawk rawh. Khua i tlai hma hian.

Thla 3 lai a liam leh hnuah pawh a tu ve ve mah chu inbiak kan tum ta miahlo niin a lang. Mahse zantin hian a last seen erawh ka la check ṭhin. A last seen aṭang chuan ala dam ve ani tih ka hriaa chu zawng chu. 

Zep tur a awmlo, hetih lai hian mi tu emaw chu biak ka nei ve ṭhin. Mahse khawhar hnemtu satliah atan a ka tih mai kha ania, rilru pek chu sawi loh, ka chhungril khawharna nasa tak hi a chanve takngial pawh a phu hru zo meuhlo chu ani e. Amah lah chuan min duh em em a, kan veng ṭhenawm lawk ami hi ani nghe nghe a, hna ṭha tak thawk in amah pawh a iaiawm loh tak meuh. Mahse chhete mah in ka rilru hi ka pe theilo ani. A beidawng duhlo lutuk te chuan ka thin anti rim zawk ṭhin. Mi pangngai chu ni ila emaw, hmeichhe dang daih chu ni ila ka hnawl dawn loh tehlul nen hian, a khawngaihthlak ngawt mai. 

 Hetih lai hian Nunsangi leh Hmingmwia chu an inzui zeuh zeuh ṭhin ani tih chu ka ṭhiante hnen aṭang ka hre fo mai. Ka nâ viau dawn emaw ka tih laiin kalo rinlawk deuh tho ani bawk a, ka ngaih ang aiin ka nâ miahlo..Mahse maw, a mak erawh ka ti tawp theilo ani. Ti diklo hmasa tu zawk leh dawt min hrilh a min bum tu zawk kha anih miau avangin a inchhir thu emaw, ngaihdam dilna ṭawngkam engemaw tal chu a rawn neih ve kalo rin rilruk tehlul nen khan a reh ve nghal hmiah mai chu ani si a, a mak tih loh chi rual ani hleinem. 

Chapo ve ve leh induhtawkna ngah ve ve bawk in ngaihzawn chu alo namai lo hle anih dawn hi.

Nikhat chu kan dawr kalkawngah hian Ramdina kha ka hmu fuh leh hlauh mai a, a hmanhmawh hmel viau na in ka lo be ding ta hram a, min hmu leh thut chu a hamhaih deuh nge ni, a meng phawk hrû leh ta nghal.

“E zuali, ka hmanhmawh deuh a, kha i ṭha maw?” kalo bu zeuh. Min kal pel mai tur chu a  bân ah kalo vuan chat.

“Lawk in Ramdin”

“aw,  eng nge ni ta?”

“Englo ania, i ṭhianpa nen hian inhmu ngai em?  Emaw inbiak tal pawhin”  kati deuh nawk nawk. A hmai a thlan tui lo bawl chhuak ṭiam ṭiam chu hruk fai deuh kawk pah hian

“Be zeuh zeuh, in ṭha vaklo emni?”

Kei chu kalo bu leh nghat ringawt. A thaw deuh hawk a.

Chutah

“Khami ni khan i tlan chhuak ta daih si a, a rawn umzui thuai che a, a rawn let leh hnu khan thil awmzia kalo zawt a, min hrilh a in ṭha leh tawh emaw kalo ti asin”

Rang zet hian kei chuan 

“Eng thil nge a hrilh che?”

“Aaa…keimah hmangin dawt alo hrilh che ani awm a, diktak chuan kan inhmu anga a sawi ni khan kan inhmu lo ti ila, amah khan min hmu ve lo zawk. Khami ni khan Nunsangi nen thawmhnaw dawr lian tak pakhat a an lut dun lai ka hmu a, kha nu nen khan an la inkawp char char emaw kalo ti zawk a, mahse promotion kan lawm ni khan ilo kal veleh bawk sia ka rilru inti buai vek alawm”  tiin a han nui hak hak a. 

Kalo bu nghat a, ka inseuhruh ṭeuh bawk. Thil awmzia chu ka man ta kuarh kuarh mai.

Ramdina chu kal pelh thuak pah hian  “kan inṭhen tawh”  ka ti sup a. Mak tih hmel zet hian min en zui vung vung.

Min bum tih ka hriat tawh tho te chuan eng nge Ramdina kha zawh nawn leh kher a ṭulna le aw?  Mi mawl nu tiin kal pah chuan ka chal chu ka han beng thawr a a thip zawk mai. Ka rilru ka ti na thar leh hi a ni hawt e, eng tih mah pawh ka tui leh thei tawhlo a, ka chaw ei lah a tui thei heklo. Zanah nise ka mu tlem si, ka chhe rawk rawk hi ani ber mai. Chutih chhung zawng chuan number hriatloh aṭang in message duhawm loh taktak ka la dawng fo lehnghal a.

“Nang tih nat dan che hi chu ka hria”

“I keh chhiat vek hun tur hi lo nghak rawh, a rei tawhlo ang” tih te, aaa a tam mai. A zavai chuan thu dengkhawng taktak vek anni. Ka chhang let ngailo na in ka call chhin a, a tlang thei map lo thung. Rindan ka nei thiam mai, Nunsangi bak anih ka ring chuanglo bawk. Ka in ngaihtuah nasat poh leh ka hah ting ani mai si, ka mangang lutuk chuan ka nunhlui a let leh mai te chu ka duh rum rum ṭhin bawk. Mahse ka ngaihtuahna kil khat ami erawh hi chuan min dang bet ve reng thung.    Mipa pakhat vang maimai a nun tihchhiat leh vek chu ka duhlo, hma lam ka pan zawk tur ani. Amah vanga sual kawng ka zawh leh anih chuan eng ang in nge min ngaih ang. Min ngainep hle anga, an nuih ka ti za in ka chaklo tihna ani bawk ang.

Ka thawpik lutuk leh ka tawt lutuk chuan in paih thawlna tur ka mamawh ani tih hria in Siampuii chu ka va call ta ringawt a. Chawhnu lam ah kan dawr a lo leng tur in ka va sawm ta ringawt ani. Hna a kalloh avang chuan alo hman hlauh, ka lawm kher mai.

Chawhnu dar 1 velah chuan Siampuii nghak in kan dawrah chuan kalo awm ran tawh a. Alo thleng ta. Ka hmel a hmu chiah chu a hmelah khan a lawm tehchiamlo tih a hriat mai.

“Hetiang tur ani lo,

i chhe vek tawh alawm in ngaihtuah ṭha leh rawh, a zialo emai mate” Ka nui suk ringawt a.

 “Ka tum ve alawm”

“Anih chuan eng ber nge i sawi duh chu ni ta. Kalo ngaithla ange”  atih chuan ka thaw halh a.

 Ka hreh takzet zawk ani. Mahse ka ngawi reilo thung.  Hmingmawia nen kan inkawp leh hnu a thil thleng zawng zawng chu zep ṭhen nei hauhlo in ka hrilh fai ta vek a. Ka sawi zawh meuh chuan ka mittui a lo tling pam mai. Ani chuan uluk zet a ngaithla chung hian min lo en kar bawk a, chutah muangchang a ka kut chu rawn vawn pah hian zawi sap in  “mate, thil tamtak i hriatloh pawh hi ala awm asin”   atih chuan phawk fe hian amah chu kalo melh ngawt ngawt.

Sawi tur a ka tih hnu chuan tihian a sawi ṭan ta a.

“I hriat angin Hmingmawia pa Pu Romawia te nen hian hnathawk ho reng kan ni a, a kaisan hma kha chuan ka dawhkan bul chiah hi a a dawhkan ani ve a, i hrethiam mai anga inbiakna hun kan ngah dan tur chu. A sawi tam ber chu a fapa leh Nunsangi te inkar thu hi ani bawk”  kei chu kalo thaw ṭha ngam mang tawhlo. Sawi zawm lehnghal in

“Khatia nangnen in inkawp leh tak hnu pawh khan Nunsangi chuan a zar buai hneh hle a. Nunsangi pa hi kan MLA Pu Chhuantlinga ani bawk si, thil anti thei em em a, Hmingmawia chhungte tan chuan biak ṭhat loh ngam chi ani mawlh hleinem. Pu Romawia pawhin promotion hial a hmuh pha ta ania, hei pawh Nunsangi hian a pa alo be thiam tihna ani mai a, Hmingmawia te chhungkua chuan a lakah pek let tur an nei ve ngei ang chu”

Kei chu kalo hah ngawih ngawih tawh zawk.

“Sawi zo law law rawh”  kalo ti zeuh a.

“Diktak chuan mate, Hmingmawia hian a hmangaih lutuk che, a nei ngamlo mai zawk che ani. A chhan chu Nunsangi lakah an hming an tihchhiat vaih chuan a chhungte leh a ma hna ngei pawhin a tuar dawn ani tih hi a hre ve reng a, chhete tal pawhin huaisenna nei ni se chuan a paltlang thei tur hi a nia, mahse chutiang mi chu anilo tih kan hriat hi. In inkar a ṭha reng emaw itih lai pawh khan lehlam ah a pen san zeuh zeuh che angai ṭhin tihna anih chu!”

Ka kut chu a rawn hum nghet sauh sauh a.

“Chuvangin mate, i theih lai hian thlah hlen tum la, khua rei ah ila tuar dam ve mai ang. Ani ai a ṭha pawh hi ila hmu dawn tih ka chiang ani” atih chuan ka mittui kalo khap per sak. Sawitur reng reng ka hrelo ani. Dawhkan chu bawh in ka ṭap tawp.

Ni a liam a, engmah ka la ang thei chuanglo. Ka nu leh pa te pawh kati mangang tawh hle tih ka hria. Ka nu chuan ka awm maimai te hi min lo en leh ngawih ngawih ṭhin. Ka pa thung chuan zaidam tak hian kohhran bel tam tur leh ṭawngṭai tam turin min ti fo thung. Eng pawh sawi se ka beng ah chuan a lut a, ka thluak hian a chhinchhiah lo thung ani.

Siampuii nen kan inhmuh hnuah pawh kar 3 lai chu a liam veleh tawh a. Zan khat chu Hmingmawia hnen aṭangin call ka dawng nawlh mai. Mak kati lutuk chu lak mai nachang pawh ka hrelo. A ring ral dawn takngial tih ah chuan ka la ve ta hram a. Ṭawng nachang pawh hrelo in ka ngawi vang vang mai. Chutah amah zawk chuan 

“Bawihte”  a rawn ti thawp sat. A aw ka hriat te chuan min ti ṭap lo chauh nia.

“I ṭawng dawn lo tihna mi?”

 Atih leh pawh chuan ka la ngawi reng. Ka luhlul ve sia.

“Umm..a pawilo, keimah ka ṭawng char char anga,lo ngaithla mai rawh aw”  a zaidam kher.  

Ka insum thei tawh thlawt lo chu ka ṭawng chhuak ve ta nge nge. Mahse ka ṭawngkam erawh a ngaihno bei vaklo thung.

“Engnge sawitur ila neih a?”

 Ani pawh a hamhaih ve ani ngei ang, a reh deuh vung vung hnuah a rawn nui chhuak hak a. A za lo lutuk tlat.

“Ila thinrim reng animaw?  I thinrim rei ngailo emaw ka tia, thla 3 lai a liam tawh hnuah em em chuan nui ve tawh la”

Chutah kei chuan pawr fe hian 

“A hma ang kha ka ni tawhlo tih i hria ni lom ni?  Dawt hlir sawi leh tur chuan min rawn biak ve fo hi a ṭul tawhlo ang, dawt hrilh tlak leh bûm tlak pawh ka nih tawhloh hi, min hrethiam rawh”  ani chu alo thaw leh halh.

“Bawihte”

“Bawihte min ti tawh suh”  ka sa ve kher mai.

“Anih leh MALSAWMZUAL! ka thusawi reng reng hi ngaihthlak i tumlo emni?”

“Aw!aw! aw! ka tum buai peih tawhlo. I ṭhianpa leh ka ṭhiante kâ aṭangin kalo hre nual tawh a, ka puar lutuk a ka luak chhuak leh thei tawh silo anih hi”  kalo ti let pang pang mai. Ka thaw hawk a, ka la sawi zo lo.

“Khami ni a i awmdan zawng zwng pawh Ramdina ka zawt chhuak vek tawh. Kha ramhuai nu khan dawr pakhat ah advertisement tur atan sawmna a dawn avangin i kal pui ani lom ni? Kalo hmu diam tawh e, chuan maw (kha thaw hawk mai) kha nu kha lo hrilh la, number dang hmangin vo na thu min rawn thawn tawh suh se, a huaisen ve hle anih chuan min rawn hmachhawn zawk rawh se. Ka sawi zo”  tiin ka thaw leh kawk.

“Bawihte, i  sawi chu a dik vek. Mahse nangmah bak a hmangaih ka neilo tih chu i hriat kha, ka sawi hi—” atih laiin phone chu ka lo cut hmiah. Ka thinrim lutuk chu ka sa chhuak vek in ka hria. Engpawh rawn sawi se kan inkar hi a rem taktak tawh dawn chuanglo. Rem theilo tur nen a hun khawhral dun reng kha eng nge a sawt na. Nunsangi’n min rawn vo nan a a hman number pawh chu ka block hmak a.

Ka insiamṭha ang, hmalam pan tur ka ni, hetia awm reng leh in ngaihtuah buai reng hi a sawt lo tiin a vawikhat nan biak inah ṭawngṭai turin ka kal ta ani. 

Ka pa thu min râwn angin biakin chu ka bel tam tial tial a, ka ṭawngṭai tam tual tual a, ka nun pawh a hlim in a zangkhai sawt viau mai. Ka nun hlim sawt zia chu ka hmel leh ka taksa ah pawh lo lang chhuak in hmuh ka nuam leh tawh hle ani tih min hrilh ṭhin. Hnungtawlh hi ka tum tawhlo a, theihnghilh dawn lo mahila hriatreng erawh ka tum tawhlo.

Hmingmawia nen kan inbiak tawp na aṭang khan thla 3 dang chu alo ral ve leh reng tawh a.

Nikhat chu kan chhungkuaa zanriah kil a kan lo ṭhut ṭhap lai hian tleirawl pakhat hi lehkha phek pakhat keng vâ vâ chung hian a rawn lut hlawl mai a. Kan lo en ṭhap. Ka hmel a hmuh rual chuan

“Hei aw u zual, i lehkha tur” tiin lehkha chu min rawn pe nghal a, kalo ban ve vat bawk. 

Ka’n en chian nak chuan invitation card alo ni reng mai. Tleirawl chu melh zeuh in  “kan lawm e aw”  ka tih hnuah a chhuak zui nghal a. Hmingmawia leh Nunsangi te inneih sawmna card alo ni reng mai nia!!   

Ka mur chhuak nghal vek a, ka kut chu a khur der der bawk. Ka en rei theilo, dawhkanah chuan ri bur khawp hian ka dah a, ka tho zui daih. Ka nu chuan mangan hmel zet in min ko zui lawm lawm bawk a, ka chhang thei tawhlo, ka ṭap mai dawn. Ka luak te chu a chhuak nghulh nghulh thei nia. 

Ka room ah lut in bathroom ah ka tlan lut nghal a, toilet bulah chuan ṭhingṭhi in ka uak zui nghal bawrh bawrh mai. Chutah ka in rin hman hma in ka ṭap chhuak nghal hawk bawk. Ka insum hman thlawt lo a aw rawl chhuah meuh in ka ṭap chhuak ta anih chu. Ka nu chu a rawn tlan lut ve thuai a, tih vak ngaihna min hre biklo, ka lu te chul in min kuah nghet em em ringawt. Ka hmangaih tawhlo ka ti miahlo a, theihnghilh erawh ka tum, ka theilo chu anih ber hi.

 Engvangin nge ka rilru pawh ala dam fel hma in hetiang thu hian min rawn umzui tak mai le?  Ka nun a hlim ve dawn chauh a, ṭahna tur hlir hian tinge min umzui bik ni ang le? Ka sual man rah kha tunah hian ka seng khawm dawn tihna ani mai angem? Lalpa, i rorel dan hi a fair lo, a fair thlawt lo. In hmangaih takte hi engvanga awmdun ve thei ngailo nge annih ang?  Kan hmangaih te hi kan nei vek thei ngailo an tih chhan chu ka hre thiam ve ta in ka hria.

Hmingmawia leh Nunsangi chu tun thla ni 28 hian dan khatna ngeiin an inkutsuih dawn ani. Sawmna ka dawn angin kal ve ngei chu ka duh, mahse ka thei chiah angem tih erawh ka hre biklo. Ka ṭhiannu Siampuii thung chuan kal ve ngei turin min duh a, a chhan chu a hmunah ngei kal chilh ila ka tawrh thiam theih a beisei zawk ani. Ka thei ngut ange maw chu!  Ka nu leh pa leh ka ṭhian ṭhenkhatte erawh chuan kallo ila min duh pui thung. A chhan chu a hmunah va che buaiin ka mualpho mai an hlau ani. Chu em chu keipawh in thleng lo se ka duh hle.

 Hun chu a kal ve bek bek zel a, an inneih ni pawh alo hnai ta. A hnai tual tual a, kei chu ka buai tulh tulh thung, langsar takin buai lo mahila ka chhungril erawh buai nasa tawh tak ani. Lawmpui tur nge ṭah tur? Engtia awm tur nge tih pawh engmah hi mumal takin ka ngaihtuah thei tawhlo ani e. Sawmna dawng ve midang te chuan an silhfen inbel tur te an buaipui laiin kei erawh chumi letling thawk chu ani ka buaina chu.

Nimahse, ka ṭhiante leh ka chhungte hian min ngaihtuah em em a, a bikin Siampuii chuan min ngaihsak em em. Engkim min buaipui sak vek a, kei chu ruang kal thei an sawi ang chauh ka ni tawh. Siampuii min buaipui sak zarah Hmingmawi ni ropui ah chuan kawrfual mawi tak ka ha ve thei dawn ta ani. Ka lawm takzet e.

A hun chu a thleng ta. Ka mipa hmangaih ka chân hlenna tur hun chu. Kan In kan chhuahsam dawn lai chuan ka nu leh pa te chuan min ngaihtuah ani tih hriat tak hian min melh vawng vawng a, ka nu chuan a mittui hru pah zeuh zeuh chung hian min rawn kuah thlawp  mai a.

“Ka fanu, i mawi lutuk ringawt”  ati khur dar dar a.

Inneihna hmun hi biakin chhungah nilo in sap ho in ‘outdoor wedding’  antih ang khan an kal pui dawn a, a hmun kan va thlen chuan a mawiin an chei thiam kher a, a decoration chu a fuh takzet bakah a hmun chu a nuam in a thawveng em em bawk. Keipawh chhete chuan min ti thawveng ve deuh in ka hria. Kan thleng hma bawk a kan kal lai hian mi an la tam lo hle. Chubakah mi tam tak an sawm lo hrim hrim bawk tih chu Siampuii hian min lo hrilh tawh ani. Chuti chu sawm bik mi tlemte zingah ka tel ve tihna anih chu, a lawmawm viau em tih pawh ka hre nek lo e. Tlar hmasa lamah kan ṭhut duhloh avangin a laihawl ah chuan ṭhuthmun kan rem ve ta a.

 Darkar chanve vel kan ṭhut hnu chuan kal khawm pawh kan ṭhahnem ṭan a, ṭhutna tur an buatsaih te pawh chu awl lai awm miahlo in kan khat ta ṭhap mai. Phone bih a kalo kun rei deuh avang chuan engtik laiin nge mopa tur chu kan hma a stage tereuhte an siam ah chuan alo din hman pawh ka hrelo. Ka hawi chhuah rual a ka va hmu thut chu ka mur chuai chuai thei. A hmel chu a hlim niin ka hria, a chhungril hmu lo mahila a hlim tur ah ka ngai. A nui var var mai a, a kut pahnih chu a hma lamah a dah bawk a, a hma zawn chu nui sâng in a melh reng bawk. Chutihlai tak chuan midang zawng chu hnunglam en an inher ta sap sap mai a, keipawh ka hawi let ve nghal thuai. 

Chutah Nunsangi ngei mai chu mo kawr fual var thianghlim em em mai hnuk hnalh hnalh chung hian alo phei ta dalh dalh mai a. Hmingmawia chu va en in ani pawh a nui sâng mai. Rang takin Hmingmawia awmna lam chu ka hawi leh vat a, a hmel mawlh chu ka en ning thei lo ani. A nui mawi tak te, a taksa mawi tak leh lum nuam em em thlamuanpui awm takte, a aw pa tak leh engemaw chang a thawp leh sat ṭhin te, a zavai mai chuan ka ta tur anni ve ta silo.

Tun aṭang chuan Nunsangi chanpual an lo ni tawh ang a, ani chuan a duh duh hunah a khawih in, a kuah anga,a fawp in a pawm bawk anga, ka thik lutuk chu ka za chhuak vek. Pastor in thu a chham tir lai te chuan duh pawh ni ila khawdang ka hawi thei mawlh lo.

 Hmingmawia hmel mawlh chu thlir nin a har ani. Zungbun an in bun tir lai te pawh chuan ka kut chu kalo khalh ve niap niap mai a. Kalo nghah ve ngat ngat ṭhin ngei mai kha vawiinah hian Nunsangi zawkin a dawng ta chu ani si a. Ka nâ ani. Ka nâ ve thlawt. Thu chham a zo a, zungbun an bun zawh rual chuan an in fawp ta. Chu êm chu ka en thei tawhlo ka mit chu rang lutuk in ka chhing vat a, mittui a rawn dir nghal zung zung bawk. Chutihlai chuan Siampuii khan ka kut chu rawn chelh in a rawn hmer vang vang mai a. Ka la meng ngam chuanglo. Ka beng bulah chuan zawite hian 

“Ṭap bawrh bawrh rawh mate, insum a ngai miahlo ania”  a rawn tih leh lek phei chuan insum a har kati zual a. Ka ṭhutna ngai  ṭhu reng chung chuan ka kun hniam daih a, ka hmai chu ka hup tlawk tlawk mai. Siampuii chuan ka hnung min lo chul sak hliau hliau bawk a. 

Hun an hmang zo ve ta hram a, stage chu chhuahsan in kan ṭhutna lam pan chuan an rawn phei dawn ani. Ka ṭhu chhuak chiah leh Hmingmawia rawn hawi phei chu kan mit a in tawng ta siah mai. Ka ṭim sawk. Ani pawh kha a hawi buai nghal deuh in ka hria. Min kal pelh hnuah pawh ala rawn hawi let zuk zuk a,mahse a bula kal mek Nunsangi chuan alo hmuh hmaih hauhlo. Ka hmangaih, ka bialpa hlui,ka engkim ni ṭhin a pasal lo ni ta Hmingmawia khabe ah chuan dawm sak in a lu chu a kawih her sak vat a. Kalo alh leh hman ṭep. Mahse ka inrawlhna chi engmah a awm silo. An kal liam rual chiah chuan ka tliak hnawk hian ka hria.

“Thla va lak pui ve ila,tho rawh”

Min rawn tih chuan ka harh zawk. Ka hawi nghal hû hû a. Thawh erawh ka tum chuang lo. Ka ngaihtuah chiang a, ka duhlo bur. Ka ngamlo hi a ni tawp mai. A ṭul leh ka chibai anga, a tawk mai e. Ka lu chu thing nawk nawk chungin  “aaaa mate, ka ti lo mai ang,tihian kalo nghak ang che”  tiin Siampuii chu ka hnial fithla thei hram a.

Stage a an awmlai khan thlalak na hun an siam dawn emaw kalo ti a, alo nilo, kan ṭhutna piah deuh hmun zawl nuam tak ah chuan hun an lo hmang dawn zawk ani. A khawilai mai pawh chu an chei mawi vel vek ani ber e. Ka ṭhutna aṭang chuan an che tla vel chu kalo thlir ve vang vang a. Hmingmawia chuan ka awm ve ani tih a hre tawh a a awm chu a nawm tawh hmel chiahlo. Mahse a nupui chuan a control hneh piahlamah amah hi pa fing tak ani a, a ti lang lo mai chauh ani. Thlalak na hun a zawh chuan a tawp nan tiin ka huaisenna zawng zawng sawm khawm pah hian an awmna chu ka va pan phei ta chhat chhat a, an pahnih chuan chiang kek kawk tak mai hian min lo en reng. Ka zam duhlo lui ve ngat a. An bul ka thlen chuan nui lui var var chung hian ka kut chu ka phar chhuak nghal a.

“Nupa hlim tak ni ang che u, ka lawmpui lutuk che u nia” ka ti sap.

 Nunsangi chu ka chibai nghal a. Hmingmawia ka chibai lai chuan ka kut khur ru dar dar chu a hriat ka hlau kher mai. Ka kut chu alo hum nghet kher lehnghal a, ka buai ṭep ani. Harsa ti takin ka kalsan thei ta hram e. Ka hnungah hian Siampuii chuan hlauhthawnna mitmeng nen min lo en reng mai chu niin, mittui tling piau chung hian ka va nuih seih ringawt. Chu lai hmun a awm ve reng chu ka tan awmzia a neih tawhloh avangin haw chu ka rawt ta chung mai a. Haw kawngah pawh chuan han ṭawng luih ve ngial ka tum a, ka theih thlawt loh avangin ka ngawi ta hle hle zawk ani.

Hei tunah chuan kum te hial alo vei leh tawh a, hma lam pan in ka la kal ve mek zel chu anih hi. Hmangaih dang chu tawng leh rih lo mahila, Pathian in min hmangaih tu, mipa ṭha tak min pe thung a, a hma pawh a ka sawi tawh tho kha ani. Palaite rawn tir in, a hun te pawh sawifel ani ve ta. Nia, Hmingmawia kha lo kir leh pawhnise ka zui tawh dawn chuanglo a, ka pasal nimai tur Lalhmangaiha ngei mai hi ka thlang tho ang tih ka ring. Ani hi chuan min phatsan in min bum ve dawn hauh silo.

Zanriah kil zawh ah chuan ka room ah lut in ka room tukverh aṭang tlai ni tla tur, eng sen phût mai chu ka thlir liam ta vawng vawng a. Hun liam tawh te kha an lo kir tawh dawn silo.

               A TAWP TA.

Leave a Reply