You are currently viewing HOUSEMAID!

HOUSEMAID!

Spread the love

BY : Vanlalpeki Fanai

Facebook group pakhata hnaruak an rawn post , aizawl veng pakhata nula awmpui tur an duh chungchang chu hmu fuhin ka va bawhzui ve a, ka han biak chian chuan chhungkaw member pali chauh an nih thu leh, naupang pahnih, nu ber leh nu ber pa, kum upa lam tawh te an nih thu chu sawiin, aizawl veng hmawr lama mahni In leh lo ngeia khawsa an nih thu te chu min hrilh a. Tin, an nu ber, naupang pahnihte nu hi damlo ve reng thin a nih vangin enkawl a mamawh deuh ber a, hlawh pawh a thatt tur thu te chu lo sawiin, tunlaiah hnathawh turte a vang si a tiin keipawh chu ka phur angreng hlemai a. Tin, nu ber damlo tih loh kha chu naupangte chu enkawl lutuk ngai an ni tawh lo bawka tih thu an sawi tel avang khan ngaihtha takin ka awm zui a, an hnenah chuan inhlawh tura chhuk theih ngei pawh chu ka tum ruh ta hle nghe nghe a ni.

Kum khat tal tawp chu hnathawh tur , eng hna pawh nise ka thawh theih tur zawng reng reng hian ka lo hawihai kual ve tawh a. Tin, kei hi thingtlang nula niin school pawh ka zir sang ve hran lo viau a, chu erawh chu ka thiam theih loh vang leh ka peih loh vang lam pawh ni miah lo, chhungkaw lam harsatna vang zawkin pawl 12 thleng bak kha chu school pawh kal theilo in zirna ka chawlhsan a, tihian ka thiamna ten an tlin tawk tur hna te pawh bawhzui ve in, ka tling zo thei ngai bawk si lo. Chubakah, thingtlang atang hi chuan thil tih zung zung te hi alo harsa em em a, hnaruak a awm tih thu kan hriat ve meuh hi chuan kan lo tlai chhe duai tawh zel bawk nen, office hna chu zawng duh tawh lo in mi ina inhlawh dan tur kawng ka dap ta zawk a ni. Kum chanve chhung kha chu aizawl veng pakhata chhungkaw khawsa ve thei tak te inah ka lo awm ve ren rawn tawh a, mahse, sawi leh sawi hnu, ka tluang lo laklawh a, ka awmna kha fuh lo in kum chanve zet ka awmpui hnuah felfai takin ka chhuahsan thei ta hram a nih kha. Ka ngaihtuah a, thingtlang mi hmu hniam a hmuhsit ching lutuk mite hi chuan awmpui turte pawh hi zawng kual ve tawh lo maise ka lo thin. Mi ina awm tur hian khawpui nulate hian an tlin lo, peih lah an peih hek lo. Awmpui tur an rawn zawn reng rengin anmahni awmpui duh tu te chu thingtlang lam nula hmeichhia te bawk kan ni leh thin tho. An ni lo hmuhsit a, en hniam ve ngawt tur hi kan ni lo reng reng thingtlang mite hi.

Tichuan, chhungte phalna thlapin aizawla mi ina khawsa tur chuan mahni in lum chu ka chhuahsan ve ta rawih a, chhuahsan lohna a lo rei ve tawh nen ka huphurhin ka lung te pawh a leng lawk angreng viau. Chutihrualin hei hi ka tih a țul miau a, ka chhungkaw tan hian sum tlemte tal kha ka thawh chhuah ve a ngai miau si a ni. 

Aizawl ka thlen thlak chuan a tira kan lo inbiak tawh angin sumo counterah chuan an hmelhriat taxi pakhat hi an rawn tir deuh tawp a, anmahni pawh rawn inlan ta lem lo in chutiang chuan taxi hmang chuan ka awmna tur hmun chu ka pan zui ta a ni.

An chenna hmun kan thlen thlak lai hian khua pawh chu a thim deuh chhulh tawh a tih theih a. An awmna lai bawr chu a rehin a lun lo bawk nen, an in lah kha alo fal deuh nalh mai bawk si a, nuam lo chu ka ti ru ve veng veng mai.

In chhungah lutin, light te lah chu dim zet hian an lo chhi eng ve teng teng a, an in nise a lian ve pangngai fu bawk nen nuam lo chu ka ti tulh tulh.

Sofa lian ve pangngai tak pakhat chungah chuan mipa naupang pahnih lian ve tawh lam te hi lo thu in, phone an lo en mek bawk a, kei chu min rawn hmu ang pawh hian an awm lem lova. Chutah, chhuanlam a tan tiin ka aw te chu ka han thian ta kharh phawt a, an ni naupang pahnih te pawh chu an rawn hawi chhuak rang kher.

‘’ I nu te hi an awm lo emni?’’  bah deuh nawka ka sawi zawh rual chiahin room pakhat atang hian nu ber niawm tak chu sam pawr fap chung leh mit bui lik lek chung hian a rawn chhuak ta hlawl mai a. A mu tho chiah a nih ka ring. Peih loh hmel fahrana min rawn nuih sen sen chung hian

‘’ I lo thleng thei ta maw. Lo thu rawh. Hei Bawiha, chibai rawh u. Tun atang chuan Û thar in nei tawh dawn a nia’’ ti nghal zung zungin, kei chu a nelawm thei tur ang ber hian ka lo nui ve hak hak reng a, mahse, naupang lian zawk leh upat hmel zawk chuan tum deuh bur chunga min rawn melh ralh pah hian

‘’ U thar hi kan va nei ngun tak’’ a rawn ti ta zauh mai a. A nu chu ka lo melh zui ve zeuh bawk. Ani lah chu alo meng dur viau niin ka hriaa thil tha lo zawk a thlen palh hlau chuan ka han nui der kual vel ta hak hak ngawt a. Nu ber pawh chuan a fate chu engtia ti zui lem lo in a khi ve ta suk ringawt. Inthiamloh hmel taka min rawn en chung hian

‘’Awi! An hahthlak thin asin. Hrethiam hram mai the. Kan nula hlui te ho kha an fuh lo thei lutuk a, engmah lah hi an hrethiam ve tawh thin silo a maw’’  tiin ka thawmhnaw dahna bag te chu ka room tur lamah chuan min thiar luhpui ta thlap bawk a.

‘’ zanriah kha kan lo eisan mai che a. mahniin I ei hreh viau lo ang tiraw?’’  rawn ti lehin, kei chuan ka hreh loh thu leh pawi ka tih loh thu lo sawi ve in, ka lu te pawh chu ka lo thing zui deuh nawk nawk bawk a. Biak a nuamin a fel dawn viau pawhin ka hria. 

Tichuan, keipawh zanriah te ka eifel hnu chuan ka inbual hmasa leh te te a, chutia ka inbual zo bathroom atanga ka chhuak chiah tih chuan chu in chhunga pa ber niawm tak chu bathroom rawn luh tum ve niawm tak hian a bul velah chuan alo tei deuh nulh nulh tih ka han hmu thut chu ka phu ropui lutuk hi ka zuang sawn lo chauh. Mahse, pa ber a ni tih ka hriat rual chuan insiamtha lehnghal vatin, hmel hlim pu lui sang chung chuan ka han be ta zawk a.

‘’ Ka lo inbual rei deuh hlek a, a zialo hle mai’’ tiin, kalsawn mai chu ka han tum a, tin, min chhang mai dawn emaw ka tih lai khan ani chu a ngawi ngul rneg a, min melh rum hle bawk a nih kha. A beng a tha lo nge, kei chu a vawikhat hmuhna chauh ka nih vangin min la ngaithei vak lo zawk ni ang tih te ngaihtuah neuh neuh pah chuan ka room turah ka lut zui a. Ngaihtha lo ru deuh chung chuan ka inthlak zui nghal mial mial bawk.

Khatia in chhung ka luh hlima nu berin min lo dwngsawng tih loh kha chu hemi zan hian vawikhatmah a hmel hmuh tur a awm leh tawh lova, a lehlam zawnga ngaihtuah chuan damlo ve reng kha a nih hmel si a, vuina tur chi ni pawhin ka hre ta viau lo. Chutihrual erawhin, ka tan chuan an ni hi ka vawikhat hmuhna vek an ni a, an in chhunga ka vawikhat luhna chauh ala ni bawk si a, thil chin chang te ka hrelo in an kal phung te pawh ka la hre lo ve hle a, min hrilh hre ve zung zung ang chu ka lo ti ru ve kha a nia, mahse, a pawi chuang lo e. kan dam a nga ka la awm dawn chauh bawk a, chutiang te chu hun ka la ngah ve tawk alawm tia ngaihtuah lehin ka inthlak zawh hnu chuan thutkhawmna lamah ka phei leh ta zawk a.  sofa chunga lo la thu mek naupang pahnih te chu bia in, an mut hun tur te ka zawt a. an ni pahnih lah chuan ka hmel pawh rawn en chuang lo chuan

‘’ Kan mu tep’’ ti ringawt hian min lo chhang bawk si. An nu hian mut hun mumal te hi a siamsak ve ngai lo nge, min ti hrilhhai reuh hle mai. Chutah, an piah deuh a tv en paha thu ve an pu chuan an mi chhan dan chu mawi lo ti ve deuhin, a rawn khap zui ta fak mai a.

‘’ Khatin aia upate an chhang ngai emni? Va mu tawh rawh u. zanin chu an nu hi a nuamsam lo zual deuh a nih hmel e’’ tih pah hian keimah chu min rawn melh ta zuk bawk a, ka lo bu ve nghat nghat ringawt. Tichuan, naupang pahnih te pawh chu an pu thusawi awih chuan an room lamah ngawi rengin an tlan lut ta thuai a, ka umzui ve zat bawk. 

‘’ In mut tawh dawn chuan in phone kha dah ula, thawnthu ka hrilh zawk ang che u. chuan , naktuk school ban hunah pawh lehkhazir zawhah chiah phone hi chu in khawih tawh ang’’ tiin an phone chu ka laksak nghal hmak a. min melhrum zui sateh mahse engatanmah ka ti duh lo lui ve ngat. An nu leh an pu te hian naupang angin an enkawl lova, enkawlna mumal tak an dawng ngai lo ang tih pawh ka hre nghal mai. Chuvang chuan heta ka awm chhung chu ka kut tur an nih angin ka thu hi a kawi a ngil in an zawm tur a ni ringawt mai a ni.

‘’ In mit kha chhing tawh ru le’’ ka tih leh chuan thuawih takin an mit chu an chhing zui mai bawk a. tichuan, ka naupanlaia ka nu min hrilh thin mizo thawnthu hrang hrangte kha ka hriat ang angin ka leh phuah belh deuhin ka hrilh zui ve nghal mial mial bawk. Keimah ber ber chuan chutianga thawnthu phuahchawp han sawi vel chu nuam ka tih avangin ka lo tui leh lutk a, ka naupang hrilh berte pahnih muthilh lai pawh hre lo lek chuan ka lo sawi tui chu niin. Ka hriatchhuah leh meuh chuan tui tak hian an lo muhul sek sek tawh a, tichuan puan te chu sin that tirin ka chhuahsan zui ta a ni. Naupang room ka chhuahsan rualin nu ber room lam kha ka pan lehnghal zat a, mamawh a neih leh neih loh zawh tuma lut kha ka ni ber awm e. mahse, a room chu lo ti thim phui khupin amah chu khumah chuan a puansin hmang kjan a lo inlukhup deuh tlat bawk a, a muhil tawh a nih ka ring. Chuvang chuan tibuai chhunzawm duh ta lo in thawmdim tak chuan ka chhuahsan leh ta zawk a. A room ka chhuahsan hian putara kha chu alo mu daih tawh tih ka hre ve chiah a, tv pawh kha alo off thlap tawh bawk. Tichuan, tukverh te kalh tha in, kawngka te pawh ka kalh fel leh vek a, light zawng zawng ka off hnua ka room lam pan mai ka tum lai chuan choka fridge bula inhung reng chair pakhat chu a rawn chesawn deuh rawk nimai hian ka va hre ta tlat. Keimah tak pawh chu ka hawi let nghal zawk thei. Mahse, light ka tih thim vek tawh avangin engmah phei chu ka va hmu fiah tha thei lo thung a, thawm lah kha a reh leh daih bawk si nen, thawm siamtu chu sazu mai mai a ni turah puhin room lamah ka luhsan ta phawt zawk a ni.

Chumi zan chuan ka muthilh theih lwk loh avangin khumah chuan meng kar chung hian phone te chu ka han khawih leh ren rawn thin a. ka chhungte nen pawh inbia in ka thiante ka be kual bawk a. A bikin ka thiantha em em leh min ngaihtuah reng thin tu Puia nen phei chuan kan inbe nasa zual. Mak ka tih deuh chu chutianga phone hmanga ka tawng mawlh mawlh lai te pawh chuan ka room lehlam bang zawk chu rawn ri leh ruk ruk thin in, a rikna lam hawia ka inher veleh khan thawm lah kha a reh zui nghal hmiah zel bawk si a, min ti awm nuam lo ve takzet. Ka hlauh phei chu hre lo, a chhan pawh ka room lehlam chiah hi nu ber UZiri room kha niin, a piah leh ah a fate an mu bawk a, kei hi choka leh kawngkapui hnaih lam room thlang ber a mu ka ni thung. Tin, bang rikna lam kha UZiri nena kan bang intawm lam zawk a nih miau vangin hlauh tur ka hre lova, sazu bawk chu ka mawhpuh leh ta ringawt.

Engpawhnise tiin zan dar 11 velah chuan muthilh tumin ka inlet zui ve ta thak a. ka muhil thei ta chek a ni ang chu, ka harh leh meuh chuan khua pawh chu lo var ve tawhin in chhung erawh thawm ala reh tha angreng hle a, tutemah kha an la tho chhuak lo ni turah ka ngai. Zawimuanga tho chhuakin room ka han chhuahsan ve chuan pa ber putara khan thawm nei lo hian amah chauh in Tv chu alo en leh daih tawh tih ka hmu a, ka nui deuh suk ringawt.

‘’ Pu, thingpui ilo in tawh em’’ zaidam deuh a ka han tih chuan rawn che zui ve hrutin, keimah pawh min en lem lo hian

‘’ Han lum ta che’’ a rawn ti ve sup a. chokaah ka lut zui nghal vat.

Thingpui lum paha eirawng ka lo bawl mawlh mawlh laiin naupang pahnih te pawh kha an rawn tho zui ve ta hlawl bawk a, an rawn bengchheng nghal hle lehnghal.

‘’ Dar engzatah nge school kal tur hian in chhuah thin’’ tia ka lo biak chuan a nau zawk Ethana khan phur em em mai hian min rawn chhang vat a.

‘’ Dar 9 ah kan țan a. Dar 8ah kan kal thin’’ alo ti mai a. chutah, a upa zawk Israel-a thung kha chuan rum zeta min rawn melh pah hian

‘’ Phone kha lo charge full vek ang che’’ a rawn ti kha kha mai a nih chu! Naupang maiin chutia mi han ti chu ka beng hrep law law dawn emaw ni ka ti hman hial a. mahse, ka insum leh ta hram a ni e. 

Tukthuan ka peih fel hnu chuan nu ber pawh kha rawn tho chhuak ve in, nui sang chung hian sitting-room a thingpui in na no ruak rawn keng phei chung chuan min rawn melh a. zingkara putara thingpui ka pekna no kha ka lo seng theihnghilh daih tih ka hrechhuak a, ka inthiam lo hnuhnawh hle. 

‘’ chaw kha ei zung zung ula in tlai a nge. In insiam chhung a rei thei si’’ nu berin a fate pahnih a rawn tih leh chuan Putara nen khan kan lo inmelh ve zawk a. An putar kawl hi a tawng tlemin, thian kawm tur te hian a chhuak ve ngai lo nge, a thiante tia sawitur takngial pawh hian an la rawn tlawh chhin miah lo. Chu chu ngaihtuah chhuakin mizo putar khawsak dan tur a tan chuan a khawsa zia hi mak ka ti ru riau, um engpawhnise, a tha vek e. ka la awm rei hranpa hleinem.

‘’ Ti daih ila Mami, hrehawm iti viau em?’’ a chaw hmuam lai țhial țalh țalh chung hian UZiri chuan mi rawn tiin, kei erawh chuan amah chu ka lo melh ve nghal zawk ringawt a. min lo nuih sak.

‘’ Aih ti love. Nuam ka la ti dawn chauh niin ka hria. I fate pahnih nise an felin thu an awih bawk sia, a nuam lutuk’’ ka lo ti let ta duah mai a. amah bawk chuan a lu chu lo buk nghat nghat pahin,

‘’ A that hlauh chu. I hriat twh ang khan kei hi damlo deuh reng mai ka ni si a, hriatthiam ka ngai lutuk a. naupangho pawhnise I kutah ka dah tawp rih an ngai chu a nih hi’’ alo ti ve leh a. kei lah chuan rang fahran hian

‘’ I eng ber nge na a. I in entir tawh em’’ lo ti zui zatin, ani chuan min rawn melh leh zawk ringawt a. 

‘’ A,, ka natna hi chu a tam angreng khawp a. Nakinah ka la hrilhfiah zawk dawn che nia. Damdawi hi ka ei reng mai a ni e’’ tih pahin a chaw thleng chu a chwi a, keipawh chu hamhaih angreng fe in ka lo bu ve ta nghat nghat ringawt.

Hemi ni hian nilengin in chhungah chuan tihtur awm ang ang ka ti a, ka intibuai ve hle. Chutihlaiin UZiri thung kha chu a tih dan ngai te bawkin room lamah tawm bo leh tawh a. Putara erawh chu thlanglam verandah ah lunglen hmel em em hian ngawi rengin tukthuan eikham atang khan ala thu deuh ngat ngat reng a,biak pawh kan inbe lo. Engemaw chang phei chuan ka awm tih hi a hrelo nimai te hian ka hre thin a, biak mawlh mawlh pawha min chhan nachang a hriat miah loh țum te hi a tam ta viau. A beng a that loh thu ka hre ngai lova, hun danga zawi te tea ka biak pawhin hriat loh a nei ngai heklo. Kum upa a nih tawhna hi thuhran nise, amah hi pa danglam leh ngawhngawl tak a nih te pawh ka ring deuh thin. A mizia hi ka man fu thei lo tlat. Khawi hmunah pawh țhu in lo awm se, thingpui in tur han pe ila a no ruak hi a hnutchhiah  a, a kalsan daih zel bawk a, a no ruak seng hian kan phe kual zak zak reng mai a ni e.

Chu inah chuan chawlhkar khat leh tlem ka lo khawsa ve ta reng a. Tlangnel țan tawh viau mah ila nuam erawh chu ka la ti hleithei der lo nia. An chhungkua lah hi an tawng tlemin, naupang pahnih te tih loh hi chu han biaka han kawm hleihtheih vak hi an awm lo tlat mai a, a khawharthlak duh takzet. UZiri nise sawi tawh ang khan mu deuh char char ang hi a ni hawt a, putara lah biak tlak a awm bawk si lo. Tin, naupang te lah hi an lehkhazir hun a nih loh chuan phone khawihin an buai tawk em em zela, tihtur neih vak tawh loh hnuah phei chuan ninawm duh tak a ni ringawt e.

Ni khat chu in chhung sekrek khawih a ka lo buai em em laiin khua chu a rawn dur ta khup khup mai a, ruah a rawn sur hnai dawn ta mai. Naupang te nise an school kal kha an la rawn haw bawk silova, ka tal buai zui ta mai. Chutia tih hmasak ber tur pawh hreloa ka lo phi kual sek lai chuan UZiri kha a room atang a rawn tlanchhuak ta sawk sawk mai a, mitmeng phelh phung leh hlauhthawn hmel em em mai hian

‘’ Ethana te unau kha! Ethana te unau’’ tih paha au chiam chiam chung hian in chhung dungah chuan a vir kual ta ruai ruai mai a, a natna a zual tih hrethiam in keipawh chuan hnem vat a țul tih ka hria a, a bana va vawnsak nawk nawk pah hian

‘’ UZir, hahdam phawt rawh. Ruahsur tur in țham mai mai alawm. Lo mu hahdam la, Ethana te chu keiman ka va hruai a nge’’ tih pahin a roomah bawk ka hruai lut leh a. He ina ka awm hnu hian UZiri hi țum hnih vel chu a natna vang hian alo talbuai ve tawh a. A tirah kha chuan ka hrethiam lo viau. Mahse, a fapa upa zawk Israela sawi danin a nu hian depression nasa tak a neih thu min hrilh atang khan tlemin a en dan tawk ka thiam chho ta deuh a. Hetianga a khawsak thin dan te pawh hi a duh dan a ni lo ang tih pawh ka hriatthiam phah ta deuh kuarh bawk a ni.

A khuma ka mut tir lai pawh chuan phawk hru a min rawn melh chung hian ka kutah nghet zetin ala man bet char char mai a, a hmel leh awm dan engkim mai khan mi rap ru ve thei lek lek nia.

‘’ Ethana te unau kha. Aih, ni lo, ruah a ni lo. Khawvel hi a tawp dawn!’’ zawitea phun ser ser chunga a rawn tih leh chuan keiin ka thiam dan tawk tawk chuan ka lo hnem ve pah reng tho a. A damdawi te chu ei tirin a tawpah zawng, kan in mut tir fel thei ta hram a ni e. A mut fel rual rual chuan thil dang pawh ngaihtuah tawh lo in nihliap ka ban rawk a, Israela te school lam pan tur chuan ka kawh chhuak zui nghal vang vang. 

School ka va thleng fel chiah tih hian ruah lah chu nasa mangkheng hian ala rawn baw zui hawk hawk lehnghal a, hetianga ni khua a awm chang apianga buai thin UZiri chu ka ngaihtuah deuh avangin call mai ka han tum a, phone lah chu ka lo la keng chhuak miah lo zui chu niin. Ka hmanhmawh lutukna lamah khan ka khum chunga ka dah mai kha ka lo ken theihnghilh palh daih a nih dawn hi. Chutia pawi ti zeta ka lo țhen chawk chawk lai chuan naupangho pawh chu rawn bang ve țan in, ka hmel an rawn hmuh rual rualin Ethana te unau pawh kha ka dinna lamah an rawn tlan phei vat a, keiin an nihliap leh raincoat te chu ka lo pe nghal zung zung. 

‘’ I nu kha ka ngaihtuah riau. Haw nghal ang u’’ tih paha kalpui mai ka tum lai chuan hnunglam atang hian min rawn betu an awm leh hlauh mai a. ka hawi let nghal vat.

‘’ Nula, Is-a (Israela) te inah khan I rawn awm tihna emni?’’ nu pakhat school naupang kut kaia lo ding, keimah min lo en reng tu chu va hmu in, zahzelah ka nui suk ringawt.

‘’ Nia, ka rawn awm thar chu a nih ber hi’’ lo ti ve in, ani chu alo țhen deuh sak ringawt a. mi pawh chhang let tawh lo in a nau hruai lai nen chuan ngawi reng hian min kal pel zui ta daih bawk a, mak ka lo ti angreng kher. Mahse, chu lam chu ngaihtuahb zui lo in UZiri ringawt kha ka rilruah a lian tawh bawk si a, naupangte pawh chu hmanhmawh zet hian ka tlan hawpui nghal ta hlawk hlawk a tih theih ang.

In kan thlen fel meuh chuan ruah pawh chu a hma aia nasa mah khan a rawn sur tam tawh lehnghal a, khua nise khawdur vel vang chuan a thim ti tih ta der mai bawk nen, in chhung te chu light pakhatmah on lo hian a thim chhah tha angreng phian bawk a. Naupangte pawh chu inthlak tura hrilh zung zungin light te chu ka on kual nghal pawp pawp bawk a. ka hrilh angin an ni unau pawh chu an khawsa zui ve mai. Naupangho chu lehkhazir tura ka hrilh leh te te hnuah UZiri that leh that loh en turin a room lam ka pan leh nghal a, ani erawh chu a dan ngai te bawk khan khumah alo inkhuh leh hlun tawh a. A tha turah ngaiin ka chhuahsan leh mai bawk. Chutah, ka room a ka han lut, ka phone lak mai tuma khum lam ka han pan nak chuan ka phone awzawng kha hmuh tur alo awm tawh lo reng reng chu niin! Ka dahna te chu ka hre sual palh a nih ringin hmun dang ka han dap kual nghal zung zung a, room chhung chu ka dap kim thawkhat viau tih ah pawh ka phone hmel reng reng chu hmuh tur a awm ta hauh lo mai le! Hlauthawng zet hian room atang chuan ka tlan chhuak lehnghal a, putara kha ka zawng zui vat bawk. Ani putara lah chu hmuh mai tur alo la awm hauh lo zui bawk a, tun ang hunah khawilamah nge maw alo chhuah bo daih dawn chu ni ka ti. A room lamah te chuan han en in chutah pawh chuan hmuh tur ala awm chuang lova, ka mangang ru twh takzet. Tichuan, nuam lo ti chung leh inthlahrung ru tak chungin UZiri chu chanchin hrilh tumin ka va pan leh ta ngawt a, ka phone bo bawk, a pa kalbo bawk. Tihngaihna dang ka hre thlawt lo. Han ngawihbopui mai mai niin a lang silova, ka hlauthawng ru zo vek tawh. 

Tichuan, a puansin lai chu zawimuanga hawnsak de de in, zawi ser sawr tak hian ka han ko chhunzawm nghal bawk a. reiloteah ani pawh chu rawn harh ve maiin, thil awmzia ka han hrilh chuan ka rinai takin makti hmel hi a pu hauh lova, a chi-ai eih lo bawk.

‘’ Ngaihtha tak khan awm rawh. Eng thilmah a thleng lo ang’’ lo ti ringawtin kei chuan thawk ka han la deuh halh phawt a,

‘’ A nih leh ka phone bo chu engtin nge kan tih dawn tak a. Police min call sak mai dawn emni? In chhungah hian ka chhuah bo hlan khan mihring rawn lut te hi an awm nge niang’’ lo tin ve zatin, amah bawk chuan mi pawh rawn en chuang lo hian

‘’ Chutiang thawm reng reng ka hre ve lo. Chubakah police nena buaina neih hi ka duh miah lo a nia. Uluk deuh zawkin han zawng kual hmasa leh phawt la, ila hmuh loh fo chuan a thar te pawh kan ngaihtuah tawh mai dawn nia’’ awki zaidam pangngai taka a rawn tih leh chuan chhan let ngaihna pawh hre tawh lo hian ngawi rengin ka chhuahsan zui ta ringawt. Heng thil te hi phone thar ka awh vanga ka ruahmanna siam chawp ah a ngai deuh tihna emaw ni le. Phone khawih tam lo ve tak mai ka nih angin social media ah te hian tihtur ka hre ve vak thin lova, thian leh chhungte ka bia a nih loh chuan tihtur dang em em ka hre lo ka phone ah khan. Chuvang tak chuan a hmel pawh kha ala thar hle a, hun rei tak pawh ka la hmang thei ang tihtur a ni a, a thar hi ka mamawh lo reng reng, tin, ka awt lo bawk. Ka dahna chu ka hai tak tak a nih ringin ka room mai ni lo, in chhung pum mai chuan ka lipse zo vek tawh a, mahse, ka hmu zo chuang hauh lo. Um a pawilo e. UZiri hian police chu min hrilhsak duh lo eng ang mahse keimah ngei hi police station ah chuan va kalin ka va thlen mai dawn a ni. An niin tih dan tur tha zawk an lo hre ngei ngei ang ka ring tlat. 

Eirawngbawl ala hun lo bawk a tiin nihliap chu ka ban zui sawk sawk a, naupangho chu ka chhuah lawk tur thu hrilh leh thuakin ka kalna tur erawh ka sawi duh ta lem lova, ka chhuak zui nghal bawk.

Station ka va thlen chuan police uniform ha pahnih chiah hi lo awmin, ka duh te chu min lo zawt nghal zung zung a. keipawh chuan zep miah loin ka phone bo dan chungchang chu ka han sawi ve ta zung zung a, putara chungchang erawh kha chu ka sawi lang duh ta lo thung. A fanu ber pawhin ngaihtha taka awm tura min tih miau avangin ka buaina tur ni chiah pawh hian ka hre rih lo tlat. 

Tichuan, ka thilsawi te chu police te pawh chuan chhinchhiahin ka phone number te chu an han dial zui nghal a, mahse, switch off alo inti tlat a nih chu mawle. A tu chuan nge keia phone man tlawm lutuk kha rawn it a rawn ru duh ang tih ka ngaihtuah. Nia, tunlai thalaite phone man zat ngaihtuah chuan a man ka a to lo ve em a, ruk tlak pawh niin ka hre lo. Call tlang theih bawk si loh a ru tu rinhlelh ber sawi tur nei bawk silo ta chu police te pawh chuan tih dan dang vak hre hek lo le, chanchin in hrilh leh intiamin min tir haw leh ta rih phawt a. ka tha hi a za lo takzet. Chhungrila sual a lo luh fuh phei chuan putara te kha ka han mawh chhe lek lek thei dwn a, ani lah alo kal bo daih mai bawk si nen, mahse, chu ani erawh kha chu rin tak takin ka ring chhe thei thlawt lova, ka ngaihtuah thui duh lo bawk. 

Rilru hrehawm tawh sa nak alaiin in chhung ka han luh rual chuan UZiri khawsak dan chuan min ti hamhaih zual hle  lehnghal a, amah chu melhin ka ding ngawi zui ta reng rih phawt. UZiri chuan a fate pahnih chu an tukkhum samah țham sakin alo hrawk tuarh tuarh mai a! Hetiang hian an hnena ka khawsak ve hnuah a fate chunga a khawsak awm pawh ka la hre ngai lova, mak chu ka ti takzet. Chutihnakalaiin Ethana te unau chu hlau in an rak tuarh tuarh reng a, an tap bawk a. chu chuan ngawi renga lo thlir ringawt chu harsa min tih tirin an awmna lam pan chuan thinrim zet hian ka tlan phei zui ve buan buan a nih kja.

‘’ UZir, eng thil nge itih hi. Thlah vat rawh’’ tih paha a fate sam a kehsakna kut phih thlaksak mai ka tum lai chuan ani chu thinrim zeta rawn inthing nawk nawkin a rak ta duarh duarh mai a! A rapawm thei lehling hial mai. Chutah, a mitmeng sen rum chunga min rawn melh rawm rawm pah chuan thinrim hmel em em hian

‘’ Heng naupangn sual leh awm tha duh lo hi zirtirna pek hlak an ngai thin. Phone ruk ching an nih hi!’’ a rawn ti ringawt a, makti zet hian ka lo meng zui nghal kawk kawk tawh.

‘’ Eng thil nge maw I sawi le’’ tia ka han din hnaih leh deuh chuan a hma aia chiang mah khan min rawn melh leh run run mai si a, a sam thur nen, a mitmeng rapawm lek lek mai te nen khan ka thau ah min man deuh a, nuam lo duh tak a ni e.

‘’ I phone bo pawh kha hemi te unau ruk vek hi alawm. An sual a nia’’ rawn ti leh chher chherin, Israela zawk khan tap hlawp hlawp chung hian

‘’ Nu, engmah kan ru lo. Hei te chu nangmah in min leisak vek kha alawm kan hman’’ a aw khur hlak hlak ri ka hriat chuan ka khawngaih dun lutuk a an unau chu nghet zet hian ka kuah zui ta ngawt a. UZiri erawh chuan keini pathum in kuah khawm lai chu rum em em hian min la rawn melh ngar ngar thung a ni ber e. Engvangin nge hetiang hian a khawsak ka hrethiam lo. Engvanga a fate hi huaa tih nat chak tlat nge a nih pawh hi ka hrethiam thei lo hulhual. Tin, Ethana te unau sawi dan kha chuan an nu hian depression leh anxiety nasa tak a nei niin an sawi tawh a. chubakah, keimah ngei pawh hian chung damdawi a ei lai chu vawi duai lo ka lo hmu fuh ve tawh a nih kha. Chutiang chu thil awmdan ni ta tehreng pawhnise mahni fate chunga han țuan duh tlat mai te, mahni mihringpuite tih nat chak tlat zawnga khawsak te chu tha ka ti lo in a thawh dan a maksak ka ti a, ngaih a ti thalo angreng viau bawk.

Hemi ni hi chuan vanneihthlak takin kan inbengdai thei ta hram a, damdwi a ei fel leh hnuah thil thleng te kha hrelo ang  hmakin tui ti tak hian min muthilhsan zui leh mai bawk. Tin, UZiri khawsak dan mak ka tih leh em em bawk chu, chhun atang tawhin a pa, putara kha a awmna chin pawh hriat miah lohin ala awm a ni a. a rilru ah hian a lut hlawllo ni berin ka hria. Ka phone chungchang ringawt a ngaihtuah a, a pa chinchang reng reng erawh chu ngaihven a tum buailo a tihtheih awm e. ka mangang tihngaihna hr si lo chuan naupang te chu thutchilhin an pu chungchang chu ka han zawt ta ringawt a, min la chhang duh lawk lo leh ta nghal.

‘’ A pu chu khawiah nge a kal in rin?’’ tia ka zawhna chu Ethana zawk khan min rawn chhangin

‘’ A nu hi chuan hmun pakhatah a leng thin a, alo haw ve leh mai zel a ti!’’ lo tiin, mak ti angreng tak hian an ni unau chu ka en ta ngawt ngawt ringawt a.

‘’ I nu sawi ringawt chu in ring ta tihna a nia. I pu che vel reng reng chu in lo ngaihtuah ve vak ngailo tihna emni?’’ tia ka han zawh leh chuan chiang em em hian Israela zak khan min rawn melh leh te te phawt a,

‘’ Aw chutiang chu’’ ti hul hakin, a phone bawk kha a bih zui leh ta ngar ngar mai. 

Hemi te chhungkaw khawsak dan leh in enkawl dan kalphung hi mak ka ti ta tulh tulh. Thil engemaw tak ka hriat ve loh tur chi hi awm tlatin ka hriaa, a nih loh pawhin he ina ka awm hma khan thil thleng engemaw tak alo awm tawh anga, ka hre chhuak rih lo te pawh a ni ve thei tho. Chung thil te hre tur chuan a tu hi nge ka han zawh fiah a nga, tu thurawn nge ka lak ang ka hre mai lo. Ka awm a nuam thei thlawt bawk silova a hrehawm duh takmeuh a ni.

‘’ Isa, I pa boral lai hi I hre ve hman em?’’ an mut hmunah chuan thutchilhin thawnthu ka hrilh pah a, a karlakah zawhna ka zawt pah zeuh zeuh bawk. Isa mit chhing diar diar tawh pawh chu rawn meng tha ve lehin, min rawn melh zui kiau mai a. keipawh chuan uluk fahran hian amah chu ka lo melh ve reng bawk.

‘’ Um, hre deuh reuh. Ethana chuan a hrelo ang’’ ti chuar chuarin a chhing zui lehnghal daih a. khum pakhat zawka mu ve Ethana kha lo inrawlh ve leh vatin,

‘’ A pu thih dan pawh ka hre ve hman lo. A pi pawh ka hre tep’’ naupangchhia zeta a rawn tih chuan kei chuan nui suk chung hian,

‘’ Ta mai mai thin a, a pu te chu ala thi hleinem. A leng bo mai mai alawm’’ lo ti ve zatin, Ethana bawk chuan rilru pe lo leh mutchhuak aw zet hian

‘’ A ni tak’’ a ti a, a inlet zui tap a a muhil chu a ni nghal der. Naupang â mai tihtakah thu mak deuh deuh hi rawn chhak chhuah leh fuk fuk a hrat thin a, a nuihzatthlak thei phian.

Chumi zan zankhua chuan putara chu rawn haw miah loin a reh zui ta vang vang mai a. ka ngaih hi a tha thei tawh thlawt lo. Chutihrualin UZiri thung erawh chuan a pa chungchang chu a ngaihtuah hauh lova, a buaipui hauh lo bawk a. A chanchin chu min zawt lo in ngaihven tur takngial pawhin min ti hek lo. Muhil theilo in in chhungah chuan ka tei ka tei a, kawngka pawh kalh tha ngam lo in alo haw ve mai ring chuan kawngka lam chu ka va melh leh zauh zauh thin a, thil ngaihthat thlak tak a  ni hian ka hre ve thei mawlh lo. Mahse, chutia tei kual sek reng mai chu awmzia neia ka hriat loh avangin thutthlengseiah chuan ka han thu thla leh te te phawt a, chutia ka thu mai mai chu ka lo muhil chhunzawm nghal daih ni tur a ni. Hnai zeta min rawn bih kur tu chu an awm tlata ka hriat avangin thawklehkhatah ka meng chhuak nghal ta kawk mai a, chutah, putara ngei mai khan ka muhil hmel chu hnai zetah hian min lo bih reng a ni tih ka han hmu thut a, ka phu zuang lo chauh hi a nimai e. Tin, khua alo var der tawh tih ka hriat chuan ka hawi a zual nasa hle a, ani lah khan ngawi reng hian min la kalsan ve leh mai zui bawk. A che maksak thin khawp mai.

‘’ Pu, nimin nileng leh zankhua khan khawiah nge I kal daih a. kan ngaihtuah lutuk tawh che alawm’’ ka han tih chuan a tih dan ngai te bawk in thlanglam veranda pangpar khawina bulah chuan ngawi reng bawk hian a zu thu zui leh ta daih a. ka zawhna te kha chu hria ang pawhin a lang tawh lo renh reng bawk a nih chu! Hemite chhungkua hi ka hrethiam thei lo tulh tulh a ni ber mai. An inngaihsak lo tawn in an inhmangaih hlawm pawh hian ka hre tawh lo zawk.

Putara chu a thingpui in tur chu pe in kei chuan choka lamah ka tihtur ang ang te ka tih chhunzawm leh mial mial zawk a. chutihlai chuan naupang ho pawh kha rawn tho chhuak ve in thingpui ka lo pe nghal zung zung hlawm a. ngawi reng hian an ei ve mial mial. 

‘’ Ethan, Isa, a pu chu alo haw tawh a. va be ve ula, nimina a kalna te pawh kha va zawt chhin ula’’  nui sang chunga ka han tih chuan an ni unau hnih chuan min rawn melh ve zawk ringawtin, an thingpui no ruak chu dawhkanah an nghat zui chawrh a, bathroom lamah inbual turin min luhsan nghal daih a nih chu mawle! A mak ka ti thin. He in chhungah hian kum upa lam tawh an khawsa ve ang tih hi rin thiam te pawh a harsa zawk niin ka hria. An ni unau pawh hi an hringtu nu chhun in aia upa zahna an tlachham ve nge, an pu hi an ngaihtuah lova an ngaihven lo bawk a, an nu ang chiah hian an en liam ve mai mai thin zawk ni ang. Heti em ema mahni mihringpui leh mahni thisen zawm te han hlamchhiah theih mai chu maksak tak a ni a tih loh theih loh. Nge ni a, an pu pawh hian thiam lohna tam tak neiin a tu fate ho hi alo ngaina vak bik lo ni zawk ang tihte mai mai ngaihtuah a ka rilru ka lo kawm melh melh lai chuan UZiri pawh kha tukthuan ei turin a rawn tho chhuak ve leh chiah bawk a. ni dang ang bawk khan nui sang chung hian nitina ka tih theihnghilh fo thin, putara thingpui in na no ruak bawk chu rawn seng phei lehin, sil hmunah a rawn dah ve leh mai a. kei chuan ngawi reng hian a tawng chhuah hun tur chu ngaichangin a che vel chu ka lo thlir ve char char ringawt. A chhan pawh, ni khat tal tawp kal bo a pa putara kha alo haw miau a tin ni. Mahse, ka ngaihdan min thiahsak hlawk turin UZiri chuan a hmel put hmang danglam eih lo hian

‘’ I chawhmeh siam rim chu ava tui em em ve a,, chaw ei kha han siam la, kan ei mai dawn emni? Naupang ho school kal a hun leh tawh tlat’’ a rawn ti the daih a nih chu! Nimin nileng khan a pa putar chak vak tawh lo saw a bo nileng zak a ni a, lo biak chu sawi loh, tunah chanchin takngial pawh kei hi min la zawt chiang miah lo a nia, mak ka ti lutuk hi ka ngaihdan te a ni lo lek lek tawh zawk hial. Mahse, hei hi ka in chhung, ka chhungkua ka thisen zawm te an ni ve lo bawk a tiin ngawih chu ka chuh leh ta hram a, eng thu mah pawh sawi duh ta lo in ngawi reng hian chaw eitur chu ka siam chhunzawm nghal ta mial mial zawk a.

Naupangho an chhuah fel hnu chuan uZiri chu a tih dan ngai tein khum lamah bawk a mu fel leh diam tawh a. kei leh putara pawh ngawi reng hian kan buai buaiin kan lo buai dun ve bawk a. kei chuan in chhung sekrek te chu khawih lehin, putara thung kha chu thlanglam verandah lamah bawk ngawi reng hian a țhu leh mual mual tawh a. ka tihtur ang ang te ka tih zawh hnuin reilote chu ka han thu chawl hahdam ve leh phawt a, inbual turin bathroom lam ka pan nghal vat bawk. Chutah, zai rat rat chunga ka lo inbual sar sar lai chuan bathroom pawnlamah chuan thawm engemaw tak hi hria in ka thil tih lai pawh chu ka chawl zui nghal dat thei a. Thawm chu ka ngaithla zui kar mai. Mahse, eng thawm danglam mah hriat zui tur a awm tak siloh ah chuan inbual chu chhunzawm ve leh maiin ka hmanhmawh ru tawh hle nghe nghe a, ka inbual zo zui vat bawk. Bathroom  atanga ka chhuah lai hian putara kha a dan ngai te bawkin verandah thlanglamah bawk khan ngawi reng hian alo la țhu vang vang reng a. UZiri nise a muhil mek niin ka hre bawk si. A nih chuan tu nge nichin lawka bathroom bulhnaia thawm rawn siamtu kha ni ta ang. Putara hi inthiar tumin alo kal zawk te hi a ni thei mai lo maw.. Huiham! Ka hrethiam ta niaih nuai lo e.

Naupangin school an rawn bang a, an roomah inthlakpui lehin, chutia kan pathum chauha kan lo rik ve laih laih lai chuan nu ber UZiri kha sam thur bem bum chung leh mitmeng rum em em, mitmu sen vek khawpa meng sen rum chung chuan a fate roomah chuan a rawn dak lut ve ta hlawl mai a! A hmel kan va hmuh rual khan keini pathum pawh chu ngawi zui țhapin, a fate pahnih phei kha chu an kimki deuh hlek ni mai hian ka hria. Kei chuan a awmdan chu a dik lo deuh ni a hrethiam in zaidam tk hian ka lo be ve nghal zung zung a, mahse, min chhang lem lo in a kalsawn leh ta mai.

‘’ Ti khan lo awm lawk ru aw’’ tih pah hian naupangte chu ka kalsan a, an nu chu ka va umzui nghal vat bawk. UZiri chu umzui zelin ama roomah bawk chuan ka um lut leh ta nge nge a, ka va hmuh lai hian ani chu a khum chungah thinrim hmel tak leh lungawi loh hmel zeta lo țhu in a melh ngai hi alo melh vang vang reng mai a, a ngaihna ka hrethiam lo angreng kher. Tichuan, zawimuanga amah chu va hnaih leh hret hretin thawmdim angreng tak hian a bulah chuan ka zu țhu thla ve ta nge nge a, min lo ngaihven hauh lo thung.

‘’ UZir, I tha em? Mamawh te I nei em’’ tia ka han biak chuan keimah pawh min en chuang lo in alo rum chhuak deuh nghut ringawt a. tih zui vak ngaihna ka hrethiam lo thin the e.

Chutianga a ngawih tak rng avang leh min chhan mai a tum tak siloh ah chuan tiin kalsan mai ka han tum zet a, ka tho deuh uaih tawh. Chutah chiang em em hian ka kutah chuan rawn man betin, min rawn chhoh melh zui ta kur mai a! A mitmeng kha a thipin a sam nise a bei thur angreng bawk si a, mi rap thar angreng ta kher.

‘’ Min tanpui rawh!’’ aw khur hlawk hlawk chunga a rawn tih chuan a ngaihna hre lo zet hian ka han hawi kual leh te te phawt a, ka thaw zui deuh halh halh reng bawk.

‘’ UZir, dik lohna I neih chuan min hrilh la, ka tanpui em em ang che. Damdawiina kal te I duh em’’ lo ti ve sawk sawkin ani chuan a lu chu a thing zui nghal nawk nawk a. ka kut pawh chu thlahin a khumah a mu zui leh mai a, a inlukhup nghal hmak mai bawk. A khawsak dan mawlh mai hi mak ka tih em avangin che lo chang lo hian ngawi rengin ka dinna hmunah chuan ka han ding zui leh ren rawn phawt a. reivaklo hnuah ka chhuahsan ve thei ta hram.

Naupang ho lehkhazir ven pah chuan choka lamah eirawng ka bawl pah char char a, ka bawl zawh hnuah pawh UZiri chu zanriah kil tur a ala rawn thawh chhuah loh avangin Ethana chu a nu ko tur chuan ka va tir ta ringawt a, ani pawh chu rang fe hian a nu room lam pan chuan a tlan lut zui ve zat bawk.

Chaw ei ka siamfel vek tawh hnuah UZiri chu ngawi renga rawn tho chhuak ve in, kan lo en deuh thap ringawt hlawm a. chutah, a thutna thin a rawn thut thlak dawt pah hian keini ho chu a mitmu bial lian kel kawl fe mai khan min han melh kual zui ta rulh rulh phawt a! A nuam duh tawh hauh lo. Amaherawh chu, eng thumah pawh sawi zui ta lem lo chuan a hmaa chaw thleng chu ban in a bar zui ta buan buan zawk a. chutihlai chuan ka bul lawka thu ve Ethana chuan zawi ser sawr tak mai hian

‘’ A nu chu a damlo nasa leh tawh a nih hi’’ rawn tiin, kei chuan tawng lo turin ka lo khap ve vat thung a. ani pawh chu a ngawi zui ve leh hmiah bawk. Chutah, kan dawhkan kil lai chu rawn nghawr che dawt dawtin a chunga chawhmeh leh thleng inchhawp ho te pawh chu an ch zui ta lawih lawih hlawm a. kei leh naupangte chu phawk fe hian kan inmelh kual nghal ta ralh ralh mai. Chutah, ring angreng fe hian Ethana bawk chuan a nu kawk va va chung hian

‘’ A nu hi! A nu hi!’’ a ti zui ta nghek mai a, chuveleh keipawh chu UZiri lam hawi chuan ka inher zui ve ta thuai a. khai a! UZiri chuan chung dawhkan te chu a khup hmanga lo do che in, amah lah chu thinrim engphiar tih hriat fe hian alo țhen deuh chawk chawk a, a fian ken lai te pawh kha a hum ruh tawh nasa hle nghe nghe bawk tih ka va hmuh chuan thil awm dan a dik dawn lo tih hria in ka thut hmun ka thawhsan nghal vat a. naupang pahnihte pawh chu ka phih tho zui nghal lawp bawk.

‘’ In roomah lut ru’’ tih tuarh pahin an hnunglam atang chuan ka nawr kal dawt dawt tawh a. chutah, mahni pawh ka insaseng ve hma hauhin ka hnunglam atang hian thawklehkhatah UZiri chuan ka sam chu a rawn kek ta chawt mai a. ka rak chhuak nghal țhat thei. Ka sama a țhamna chu phelh sak tumin theihtawp hian ka han ban ve țawk țawk tak naa, a chelh nghet kher mai bawk si nen ka chet nasat pauh leh ka lu chu a na tulh tulh mai bawk si a, tih dan dang zawn a ngai tih ka hria. Mahse, ka che zui hman ta lo thung. Ka sama la țham reng chung chuan min phih let deuh sawk a, chaw ei dawhkan ah chuan na zet hian min intauh tir nghal sawk sawk bawk a le! Hnar thi phung khawpa dawhkan min tauh tir hnu chuan room lama ka tirh bo tak a fate unau kha rawn tlanchhuak ve lehin kei chu min rawn puih ve ngei pawh an tum tih ka hriaa, mahse, an nu chu hneh zo mwlh hek lo le, an nu chuan lo tlawh thlu zui tawpin chhuat charah chuan a hnuk kual zui ta nghek mai a! Kan thawm chu a na zui teng tung ta viau mai. Dawhkan min tauh tirna ah khan ka lu chu a hai deuh chhawlh thei tawh a, la meng ve hram hram mah ila ka duh ang tak pawhin ka che tha hleithei tawh bawk silo a, a fate a nghaisak lai pawh chu thei leh thei lo hian ka lo thlir liam ta ringawt. Tichuan, ka mit pawh chu zawi zawia chhing zui ve in, ni khua ka hre lo chhunzawm nghal chu a ni ta der mai.

Ka harh leh hnuah pawh ka awmna ngaiah chuan lo la awm rengin in chhung te lah chu light kha kan la on lo ve bawk nen a thim deuh țhuap tawh a. Hlauhthawn luatah thin a phu zui dup dup mai. Tichuan, thei leh theiloa inbeng kangin thim thamah chuan ka indap phei ta zel a, a nihna takah chuan light pawh chu ka hmet eng ngam tawh lo a ni zawk mah awm e. Putara roomah khan va dakin, ani chu alo awm leh tawh hauh lo mai a, ka thin phu hi a reh hleithei ta der lo. Tun ang hunah khawiah nge alo kal leh ang tih hi ka hrethiam ta lo a ni e. Tichuan, rang taka inher lehin UZiri room chu ka han bih kual leh te te phawt a. mak tak hian ani thung chu tihsual nei lo ang hmakin fel at hian alo muhil leh bawrh bawrh tawh nia mawle! Thil tha ber chu ni dawn ngat sela chuan tunah hian va kalchilh pawp a va sawisak ve mai te ka duh hman rum rum a, mahse, chu chuan buaina bak min thlen dawn loh bakah ani hi rilru leh taksa lama fel lohna nei a nih miau avangin hriatthiam chin neih a ngai a, tih zui deuh buan buan kha a chi rih lo tlat si. Chutah, thildang hrechhuak lehin naupang ho kha ka hrechhuak ta zawk mai a. ka theih anga rang chuan an room lamah ka tlanlut nghat vat. Ni e, nikhaw hreloa ka awm hma chiah khan an nu khan room lamah a pawt lut a nih tak kha mawle. Thinphu zawih zawih chunga an room ka va thlen phei chuan an ni unau chu chhuatlaiah hian darh sarh angreng takin an lo mu ral mai a. An muhil nge nikhua an hre lo zawk tih pawh ka hrethiam chiah lo. Ka hlauthawng viau bawk.

An mutna hmunah chuan zu thutchilh sawk swkin kaihthawh mai ka han tum a, an harh hleithei der lo lehnghal. An taksa lang thei chinah chuan hliam leh thisen chhuak hmuh tur awm hauh lo mahse hemite unau hi an tha miah lo tih ka hre thei. Tichuan, tho chhuak lehnghal vatin chokaah ka lut zui a, tui ka va la ta vat. Tui hmanga tih harh ngial ka han tum pawh chuan awmzia a neih hleihtheih loh miau avangin room atang bawk chuan ka tlanchhuak leh a, UZiri roomah bawk ka tlan lut leh. A mu tui lai chu kaihthawh mai ka han tum zet a, mahse, thil zawng zanwg hi a rawn chawk khwlo leh vek ang tih ka hlauh avangin kaitho ta lo chuan a phone awmna zawk ka zawng ta phawt a. mahse, ka hmu zp hauh lo nia. Chutah, ka tihngaihna hrelo leh mangang hlauthawng tawh bawk si chuan a tawp a tawpah ani chu kaitho ta nge nge in, muangchang hian a rawn thu chhuak ve ta țial țial a. Ham bai bai chung leh mit nuai deuh chat chat a min rawn melh in,

‘’ Eng thil nge ni ta’’ a rawn tih chuan kei chuan awm khaw muan chi a ni tawh lo tih hria in a fate dinhmun chu ka lo hrilh nghal vat a. mahse, ka ngaihdan ang lo deuh a khawsa zui lehin ka thusawi te pawh chu ngaihtuah loh hmel fe hian

‘’ Va mutsan rawh! Zing khaw var hnuah tha deuhin an rawn harh ve leh mai ang. Damdawiin pan kha a țullo’’ a rawn ti hmak mai a nih chu. Eng ang nu nge maw a nih le tia au khum vak mai chu ka chak hman viau a, ka sawi tawh ang khan amah hi chiangkuan lohna engemaw tak nei mek a nih vang zawkin tih buan buan chi a ni tlat bawk si lo.

‘’ I phone ka lo hmang the ang. Motor ka bia anga keiman I fate chu damdawiinah ka han hruai a nge’’  ti let ve leh nghatin ka la dinchilh reng a, hetihlai hian ani thung chu a mu fel leh diam tawh thung. Lehlam min la hawisan hmak zui lehnghal a.

‘’ ka thil sawi kha I hrelo emni? Damdawiin , doctor , police tih vel te nena inhnimhnaih hi ka duh lo. Va mu tawh rawh’’ ram hmak chuan a rawn ti leh nghut pek a. ka lo thaw zui deuh halh thei. Tichuan, thudang pawh sawi duh tawh loin  a fate room lamah bawk chuan ka luh pheisan leh ta nge nge a, an ni unau lah chu harh tih reng reng nei thei bawk silo nen, midang han pun buai turin ka lo sawi twh ang khan kan awnman hmun hi a fianrial angreng em em a, thenawm hnaivai reng reng an awm lo chu thuhran, anrei thil thu te a ni tawh a, ka chhuak ngam bik hauh silo. A luhai thlak duh angreng viau a ni. Tichuan, ka thiam dan ang anga bawihsawmin khumah ka mut that tir bawk a, tui vawtin an pang te chu ka hruksak leh thuak thuak thin ringawt. Chutia ka buaipui lai chuan keipawh chu ka taksa na leh chau tawng khawng ve tawh nen khan ka lo mu thlu ve daih hi alo ni a, ka harh leh meuh chuan khua pawh lo var ve tawhin, ka thutna bula mu Ethana te unau pawh chu vanneihthlak tak hian an lo tal ve ta suap suap mai le. Ethana phei chuan a mit han nuai chat chat chunga min rawn melh chho chung hian,

‘’ Au Mami, ti nge kan bulah I lo mut ve daih a’’ a rawn ti deuh sap mai a. kei chuan ka lo nuih ve sak ringawt. Chumi hnu chuan a upa zawk Israela pawh kha rawn harh ve lehin a lu chu a nat zia thu leh a taksa te pawh an sil them thum thu chu a rawn sawi zui nghal niah niah bawk a. kei chu ka lo inperh tho nghal at bawk.

‘’ Ti khan lo mu hahdam ula, in inbualna tur tui ka va lum a nge. Tui sa ver vawrin in inbual dawn a nia’’ ka ti sawk sawk a. ka chhuahsan nghal bawk. Chuta room atanga ka han chhuah chuan veranda thlang lamah khan putara bawk kha ngawi rengin alo thu leh ngar ngar tawh tih ka zu hmu thut a, ka phu deuh zawk thei nghe nghe hial.

Ngawi renga a thingpui in tur va pek pah chuan ka han dinchilh deuh vang vang phawt a, thaw zui hakin amah chu ka melh ta vang vang bawk.

‘’ Pu, zanah hian ngawi rengin kal chhuak tawh lo la. Nangmah vang hian kawngka pawh ka kalh tha ngam ngai lova, a him viau lo thin a nia aw’’ zawi angreng taka ti sapin ka inher a, choka lamah chuan ka pheisan zui leh ta vang vang.

Naupang pahnihin tukthuan an eikham hnu chuan damdawite ei fel tir leh te tein an peih mang lo chung chung chu school kal tur chuan ka tir chhuak lui ta hram a. Nu ber hi biak that la duh tlat. Tichuan, UZiri pawh chu rawn tho chhuak ve tawhin a dan ngai te bawk khan hlim hmel pu sang chung hian a pa thingpui in ruahna no bawk kha a rawn seng phei leh tawh a. fiah zet hian keiin ka lo melh ve kalh reng thung. Tichuan, tukthuan te chu bar țan in, ka insumthei ta lo chuan zan lama thil thleng te kha ka sawi chhuak tan ta a. khatianga a khawsak nachhan kha ka zawtfiah nghal bawk. Chung thu ka sawi chhung zawng chuan a hmelah danglamna emaw, inthiam lohna chhetemah ka hmu tel hauh lova, a chaw ei dan pawh chu nise a danglam phah chuang eih lo.mahse, 

‘’ Chutianga ka lo khawsa a nih chuan min hrethiam hram dawn ania. Zan lama thil thleng te chu hriat zui pakhatmah ka nei tawh lo a ni tih hi min hriatsak la ka duh a ni. Ka thiam loh a ni e’’ felfai taka rawn ti ve in, mak ka ti lutuk chuan a hmel chu ka lo en ngawih ngawih ringawt. Khati khawpa nasa khan chet a thawh tawh a, engtin nge a hriat zui loh theih zawk ka hrethiam tawh bik lo. Engemaw chang hi chuan a natna hi chhuanlam a tan a hmang mai mai ni te hian ka hre deuh thin a, mahse, damlo kha a nih miau avangin han pawngpaw dem ngawt chi chu a ni chuag hauh bawk si lo. 

‘’ Tun hi a vawikhat thlenna chauh pawh a ni tawh lova, hmanniah pawh ti khawp khan I fate sawisak tumin I buai tawh a. kei chu maw UZir, hetiang in chhunga khawsak hi ka duh ve lo. Hetiang hmun mak leh thlamuanthlak loh lutuka khawsa tur pawh hian ka lo kal chiah lo in ka hria. Diktaka sawi chuan hawsan daih che u hi ka duh dan zawk a nia, mahse, naupangte hi ka ngaihtuah lo thei lo si a, ka tan pawh a hrehawm ve duh khawp mai’’ lo ti ve salhin, ani chu alo thaw zui deuh halh thung a. khawngaih thla la mitmeng zeta min rawn melh zui ta vang vang chung chuan

‘’ Khawngaihin haw chungchang kha chu sawi ri lo hram rawh. I duh phawt chuan I hlawh pawh ka punsak ang che nga, phone te pawh a thar kan lei ang chu’’ rawn ti ve bawk mahse, chung thil te chuan chhungril takah hian min ti lawm zo ve tawh tlat lo. Diktaka sawi chuan tutemah hian hlauthawng leh inveng ru renga khawsak hi an duhin an peih bik ka ring hauh lova, a hahthlakin a hrehawm hle bawk. Mahse, a natna vang leh naupang pahnihte vang chauh tak tak hian tun atan chuan hriatthiam leh hram ka tum a, chutihrual erawh chuan khatiang thil kha a thleng leh a nih ngat chuan thudang thudang nei tawh lo in ka chhuahsan vang van tawh thung ang. Tin, amah UZiri tak pawh chuan a tih nawn tawh loh tur thu leh, alo thleng nawn leh palh a nih pawha ka duh dan dana a chunga che tur chuan phalna min pe ta nge nge a. Thil engkim te chu fel phah hauh lo mahsela tlem chuan ka awm erawh a nawm phah ta deuh. Chutiang a nih laiin phone hmansak ka han dil erawh chuan a phone chu a recharge lohna a rei deuh tawh avanga a thih tawh thuin min lo chhang a, naupang pahnih te phone ah lah khan sim card a awm ve bawk si lo. An thil en duhzawngte pawh wifi hmanga an en theih mai thin avang hian a nu pawh hian a buaipui zui viau lo niin ka hria. A thawpikthlak takzet. Chubakah, ka chhungte pawh in min ngaihtuah twh dawn lutuk hian ka hriaa, an ngaih te kha alo tha lo viau ang tih mawlh hi a ni ka hlauh ni. Ka that thu hrilh tur takngial pawha ka be thei lo chu pawi ka ti takzet. Tin, ka la sawi tel miah loh pakhat chu he ina ka awm hnu hian UZiri hian naupang hruai tura ka chhuak a nih loh chuan khawi hmunah mah ka kal chhuah hi mi phalsak ngai lova, min veng hranpa hauh lo mahse keipawhin in neitute chu zahin chhuah luih ka ngai bik chuang lo. In chhung mamawh lam khawm kawngah pawh harsatna a awm hran lova, an hun tiam sa chat chata rawn supply thin tu an neih avang hian ka tan pawh a hranpaa han chhuah leh kher chu a țulna a awm hranpa lo ve bawk a ni e.

Tichuan, nilenga ka tihtur ang ang ka tih fel hnuin tlai alo thleng a, eirawngbawl hma chiah chuan intifai turin bathroom ka pan nghal vat. Hetihlai hian naupangho an la rawn thlen loh avangin in chhung chu a reh leh duk tawh a, putara kha chu awm ve reng tho mahse biak biak pawha a tawng that duh miau loh avangin awm ve lo ang chauh hian ka en tawh mai. Uziri nise a mu bo hmak zel bawk si nen, khawharthlak duh thin tak a ni.

Ka tih thin dan anga zai rat rat chunga ka lo inbual leh lai chuan thawklehkhatah bathroom kawngka chu rawn pawt ri leh thin in ka zai lai ka tawp chawt a, thinphu zawih zawih chung hian ka hawi ka hawi ta mai. Inbual chhunzawm leh mai lova thawm ngaithla chung chuan

‘’ Eng nge?’’ ka han ti vin deuh tuarh phawt a. mahse, a reh zui hmak. Rei fe thawm ngaichanga ka din ngawih vang vang hnuah pawh thawm dang hriattur a awm leh tak siloh ah chuan tiin ka inbual chu ka chhunzawm leh ta mai a, mahse, a hma ang tho khan kawngka bawk chu rawn ri leh burin, ka hawi phei nghal zawk thei. Chutah chuan kawngka chung lawka ventilation chhana thil phe vuai mai chu han hmu fuhin ka towel chuan ka intuam tha nghal sawk sawk a, ka chhuak zui ta vat. Chutah, ka lo rinhlelh tawhna kha a dik ngei a ni tih min rin tir zual turin a thutna hmuna a thu thla leh tur chiah hi ka zu hman kher kher ta bawk a. Putara thutna lam pan chuan vung zetb hian inhumruh sauh sauh chungin ka tleh thla ve nghal ta vut vut mai. 

‘’ Ka inbual lai min bihthla duh tur khawpin maw I nun hi alo khawngaihthlak a!? Putar che hleithei tawh lo, mahni pawha engmah tifel thei tawh lo leh biak pawha min chhan let nachang hre tawh lo awm ve satliah mai mai emaw ka tih lai che a, ilo mak kher mai. I tenawm takzet. Ka report khawp ang che’’ ka tih hlawk hlawk laiin ani chuan mitmeng pha dai chung hian min rawn melh chho ve zawk ringawt a. A hma ang tho khan eng thu mah ala chhak chhuak chuang hauh lo bawk. Ani bula thusawi chu awmzia nei dawn lova ka hriat avangin ka kir leh a, UZiri be tur chuan a room lam chu ka pan ta zawk. Vanneihthlak takin ani pawh chu alo muhil lo ve hlauh a, ka va dinchilh deuh nghal rawk rawk mai.

‘’ UZir, I pa khawsak dan hi ka duhdan a ni lo. Ka lawm lo khawp mai’’ ti zui nghal buan buanin, a lehkhabu chhiar lai chu a khup zui thak a, fiah em em hian min rawn melh nghal vat.

‘’ Mam, eng chungchang nge I sawi hi. Eng thil nge thleng a’’ rawn ti ve vatin, kei chuan nasa zet hian thawk ka lo la ve ham ham phawt. Chutah thil thlen dan engkim te kha hrilhin, ka lawm loh zia chu uar fahran hian ka han sawi ve mawlh mawlh a, tin, tun hi a vawikhat thlenna chauh pawh a ni tawh lo ni a ka hriat thu te pawh chu sawi nghalin police a report mai ka duh thu te thleng chuan ka hrilh fai ta vek. Police hming ka sawi rik ruala a mitmeng lo danglam zawk kha hmuh hmaih hauh lo mah ila ka haider lui ngar ngar thung a. police te nena buaina neih chu a duh emaw duh lo emaw hei hi ka mimal buaina a nih angin keiman tha ka tih ang anga tih ka duh ve tawh a, a hun tawh bawkin ka hria. Chutihrual erawh chuan tuna thil thlengah khan putara hi a thiam lo hulhual tih chiang takin ka hre bik lova, a chhan chu, bathroom ventilation atanga hlimthla kal ka hmuh kha amah putara hi a ni em tih pawh ka fiah bik chuang lo tlat. A thuhrimin mak tih leh deuh mai ka nei a, bathroom ventilation awmchhun hi a sangin mihring pangngai tan hmanraw dang tello phei chuan han ban phak chi a ni miah lova, chulai tak chu mak ka ti. Putara chu ka han ringhlel ve ngawt tak na a, a nihna takah chuan police hnena report tak tak pawh kha ka tum chiah pawhin ka hre lo. Ka lo report ta  a nih pawhij amah ni lo, midang rawn lut ru an awm emaw ka tih vang zawkah ngaiin ka report ta mai tih thu ka thlen zawk ka ring. Hetianga a hriat laia ka han sawi tak vak nachhan diktak hi chu sawi țhaih nana ka hman duh vang leh, ka thinrim sosang inhrithlak nana ka tih ve mai chauh an ni ber e.

‘’ Awi, avan zialo tak aw. Ka lo hau dawn nia. Ngaihtha tak khan lo awm phawt rawh. A thleng nawn leh tawh hauh lovang’’ zaidam leh pangngai taka a rawn tih hnu chuan keipawhin ka chhuahsan ve leh mai a. naupang school bang an lo thleng chawpchilh ve bawk nen anmahni buaipui pah chuam eirawngbawl te ka țan zui a, lehkha ka zirtir pah bawk. A khat tawk hian putara awm dan leh che vel te erawh chu ka va mitmei ru leh zauh zauh tthin a. mahse, amah ah chuan danglam hmuh tur engmah a awm zui chuang lo nia.

Tichuan, zanriah te eikhamin tihtur ang ang ka tih fel hnuah naupangte nen chuan kan inkawm a, kan infiam bawk a. Hetihlai hian putara thung kha chuan Tv chu en in ama hriat tawk leh hian volume a pe a, a melh ngar ngar  hi a ni ber e. ka ngaihtuah thin a. A hun tam zawk hi mahni chauha khawsak nan a hmang ral chu a ni deuh ber mai a, a nupuiin a boralsan tawh bawk si nen, upat hnuah phei chuan inthlakhlelh a na in, in mamawhna a sang duh awm hle si a, amah chenpui tu a chhungkua te lah hi heti ve mai hi an ni hlawm bawk si . Kei lah hi midang biak biak leh kum upa lam te han kawm vel thiam lo ve tak mai ka lo ni lehzel bawk si a, a khua hi chu a har ru ve thei ngawt ang, tih mai mai chu ngaihtuahin amah chu ka lo melh vang vang thin a. A ruk tak hi chuan ka khawngaih ve thin viau a ni. Tin, khati tehchiama tlai lama ka lo tawng khum tawh vang te pawh khan a ruk chuan ka inthiamlo ru ve tho. Sawi chhuah leh kher ka  inthlahrung a, nuam ka ti tawh chiah lo mai mai zawk a ni e.

‘’ Naupangte u, mut a hun e’’ ti hluaiin an ni unau chu roomah ka nawr lut leh ta dawr dawr a, an mut hmunah thutpuiin zan danga ka lo tih thin dan ang tho khan mizo thawnthu chi hrang hrang ka hrilh leh ta nual phawt. Dar 10 velah chuan muhil ve thei hramin phone khawih tur nei ve ta lo chu keipawh reilote ka inleh kual leh sek hnuah ka lo muhil ve ta a ni chek ang. Ka mang lamah chuan ka thaw te hi alo hah em em a, thaw tha thei lo in ka lo meng zau deuh kawk kawk tawh a, boruak chu hip luh tumin theihtawp hian ka lo ang phuau phuau bawk a nih chu! Chutia ka awm chu a takah rawn meng chhuak thutin, kha thil kha ka mumang mai mai awzawng a lo ni hauh lo mai le! A takah chuan thaw hleithei lo leh boruak tlachham hian ka lo awm mek tih ka inhriaa, tin, ka hrawkah chuan tuemaw hian min lo rek bet mek bawk tih ka hre nghal bawk.

‘’ Ka pa in I inbual lai a en thla che a police-ah I report ang maw? Kal ta che. Police hneah chuan va report rawh. Kal rawh’’  thinrim aw chher zeta rawn ti ri ah chuan ka hrawka min rek bet tu chu tudang ni lo in UZiri ngei a ni tih ka hre thei ta a,a thim em avangin a hmel chu hmu hleithei lo mah ila ka theihtawpa nasa hian a hmaia ham tum chuan ka kut te chu ka ti che zui ta buan buan. 

‘’ Zanin hian I thi a nga, I ruang hi ka theh thang hmak bawk ang. Chuan, police hnenah pawh I kal nge kallo chu kan hre tawh mai dawn a ni’’ rawn ti lehin, vanneihthlak zet hian a sam thur em em mai chu ka han țham fu thei ta hlauh. Ka theihpatawpa na in a samah chuan ka kek zui nghal nawk nawk a, a rak zui țhat mai le. Chutihrual chuan ka hrawka min rehna pawh kha a thlah dul ve ta hlek mai a, ka uak zui nghal tuarh thei. Mahse, tun dinhmunah hian muangchang hman ka ni lova, he nu hi ka khawih let ve ngei ngei a  țul tih ka hria. Min rehna a thlah rualin keipawh chu ka inperh tho zui nghal vat a, khum atang chuan ka chhuk thla nghal sawt sawt bawk. Chutah, light on tuma ka kal leh tur chiah chu ka hnunglam atanga min rawn ban in, ka ke rekah a rawn phih a, chhuat charah chuan ka bawkkhup zui nghal thlawrh.

‘’ Khawiahmah I kal dawn lo. I hria em zawngi’’ tih pah hian ka nakah leh ka pumah te, ka malpuiah te chuan a rawn chhir zui nghal zawt zawt bawk a. Na tak a ni. Mahse, tlu sawp reng thei ka ni lo tih I hria in theihtawp chuan ka han bei let ve nghal bawk a, a ke chu manbehsak ve thungin ka phih thlu tawp. A au ring kher lehnghal. Tichuan a tlu tawh chu rang taka bawhzui nghalin ka theih ang tawka na hian a hmaiah te chuan ka hneksak zui a, ka beng a, a samah ka kek bawk a, ani pawh chu alo awm mai mai bik hauh lo. Theihtawpa ka hmai vel sawisak tum chuan min lo ban ve zuau zuau reng a, ka tan pawh hnek ringawt chu a tawk lo tih hria in a tawpah phei chuan a hrawkah ka rek bet zui ta hial a. chumi chin chu tal chhunzawm hlawk hlawkin a meng pual zui nghal rawm rawm tawh a, a ang deuh phuau mai bawk. Chutah, ka thiltih a ka rilru ka lo pek lai tak chuan ka hmaiah tak hian torchlight hmanga min rawn chhun tu an awm ta thut mai a. ka thiltih lai pawh ka thlah zui nghal hmak thei. Chutianga min rawn chhun tu ka va hmuh nak chuan ka room kawngka bul lawkah khan Ethana te unau kha tap zawih zawih chung hian torchlight kengin an lo ding khawng reng tawh chu niin! A zialo thin mange.

‘’ Let rawh u. in roomah ve tawm bo rawh u’’ lo ti nghal tuarh tuarhin an ni unau lah chu an tap ring zui tual tual leh ta nghal bawk si a. ka rilru an rawn tibuai zui vek mai. Chutia an ni unau ringawt buaipuia ka lo au vak vak lai chuan ka hnuaia mu mek UZiri khan na zet hian ka hmai chu a rawn hnek zui ta chawrh mai a! A na lutuk leh ka lo in veng hman si lo kha a bulah chuan ka let thla zui nghal twp a, chumi chin chu min petin min chhir a, min hnek zui chawrh chawrh bawk a, ka hai chhawlh tawh . Chutah, 

‘’ Nangni unau pawh kha’’ tih ram hmak paha Ethana te unau awmna lam pan a tum lai chuan rilru fim la pu ve hram hramin a kal tur chu a ke ah ka lo man behsak ta tlat pek a. mahse, chiang em em mai hian ka lu ah chuan min rawn chhir zui leh ta chawrh mai a, ka che zui thei tawh lo. Reilote chu nkhaw hre mumallo a awm hmanin ka harh leh rual rual chuan Ethana te unau kha ka rilruah an rawn lut nghal zawk mai a, harsa ti tak hian ka inbeng kang zui thuai bawk.

Choka lam pawh chu lo thim phei vekin, harsa ti zet hian kalna tur chu ka indap chawp phei nawk nawk zel a, Ethana te unau room kha ka pan hmasa ta ber. Mahse, an ni unau chu hmuh tur awm miah lo in an lo reh tlawk tlawk mai a, ka rilru a buai zui ta kher. Khawiah tak a nu chu bihruksan ang maw tia pawn lam pan mai ka tum laiin ka pum chu a rawn thip ta zawk mai le! Chemte hmanga vih ka ni tih ka inhrethiam nghal a, min vittu pawh chiang takin ka hre bawk. Engtin  nge ka hmuh loh theih zawk ka hre bik lo. Min vihna chemte a phawi rual rual chuan ka pum chu dawm bet vatin chhuatah chuan ka thu sawp zui ta hnawk mai a, ka mit khaw hmuh te pawh chu rawn fiah lo in a thim zui tial tial ni  ber hian ka hria. Chumi chin chu eng thilmah hre tawh lo in ka let zui tawp a, mumang ang deuh te hi nei zuiin Ethana te unau khan kei nikhaw hreloa lo let reng chu min tih harh tum hian an lo bei ve ngat ngat mai a. mahse, ka harh thei chuang bawk si lo. An beidawng lutuk chu ka bulah țhu in an lo tap kerh kerh tawh a, eng thil mah tihtheih ka nei bawk si lo chu rilru hah em em hian mittui luang zawih zawihin ka lo khap fak fak reng a. ka khawngaih unau takzet. Chutah, chutianga ka awm lai cchu kaitho tu nei ang mai hian thawklehkhatah ka meng chhuak deuh ta kawk mai a, ka harh chiang lutuk kha mak pawh ka ti zawk. Tin, kai tho tu nei anga ka inhriatna kha dik tak takin ka bul lawkah chuan putara kha lungngaih hmel em em mai hian alo thu ngawi ve char char chu niin. 

‘’ I umzui vat a ngai. Police station ah kal la heng thil zawng zawng te hi hrilhfiah vek ang che. Tunah kal nghal rawh. Ka tû te pahnih nunna kha derthawngin a awm mek a nia’’  lo ti mawlh mawlhin kei chu thei leh thei lo, ner sawk sawk chung chuan ka inbeng tha leh a. Putara pawh chu ka chhang let tawh lo.

Zan rei tawh lam tih takah, pawn boruak chu a vawtin a reh duk tawh a. veng fianrial leh reh sa tawh nen, kan thil tawn the hrep te nen chuan a rapawm thei lek lek hial mai. Tichuan, ka duhna lam lamah kal zelin Ethana te unau chu ka aw neih ang ang chuan ka han ko pah bawk a, min chhang tur awm lo in a reh hian an reh tlawk tlawk a ni ber e. UZiri min sawisakna leh vih tawhna hliam te kha a na em em reng tawh mai si a, ka tuar thei lo lek lek tawh zawk hial a ni. Chuti chung chuan ka tihtur ka hai lova, tin, hetia thei leh thei lova an ni unau han pawngpaw zawn tawp mai ai chuan tiin tanpuitu ka koh thuai thuai a țul tih pawh hria in kawngpui lam pan tur chuan theihtawpa chakin ka kal leh ta zawk a.

Mahse, kawngpui reh duk mai ka han thlen chhoh chuan ka hliam te kha an nat tawh lulai em avangin tihtheih ka nei zui ta lo hle a, kawngpui dungah chuan mihring chenna in te chu intlar thla ve del dul mahse chulam pan tur pawh chuan ka che hleithei tawh tlat lo. Ka thlen tawpna hmunah chuan che hleithei tawh lo in k let zui tawp a, a vawi engemawzat nan nikhaw hre lo bawk chuan ka lo awm leh ta bawk a. ka harhchhuah leh meuh chuan damdawiinah lo awmin, damdawiin khumah ka lo mu fel diam tawh tih ka inhre nghal a. ka meng zau nghal kawk kawk thei. Chutah, ka bula nurse pakhat lo awm ve chuan ka harh tawh tih hria in uluk fe hian min rawn en leh te te a, a tlanchhuak zui nghal nalh bawk. 

Ka thi tawh mai dawn emaw tih laia chutianga nung dama ka la harhchhuak leh thei chu ka lawmin ka rilru chuan lawmthu sawiin Pathian hnenah ka tawngtai rilru nghal mawlh mawlh a. chutia ka tawngtai zawh rual chiah chuan keimah min rawn be tu hi chu awmin ka lo phu zui deuh zawk lehnghal. Chutah, keimah min rawn be tu police SI hmeltha veng vawng tak mai chuan inthiamloh hmel deuh a min rawn thutchilh sawk sawk pah hian,

‘’ A khaih! Rawn tih hlauh che kha kan tum miah lo a nia. Thu chiang hrilhfiah tur che a lo kal mai mai kan nih hi aw’’  dam dapa a rawn tih takah chuan tlemin ka awm a nuam ve ta deuh chauh a. ka thaw zui sawng sawng thei.

‘’ Hei, damdawiinah hian zan hnih ngawt mai I mu tawh a. chu pawh chu I hre miah lo ang tiraw?’’ a rawn tih leh chuan makti zet hian an ni ho chu ka lo en kual deuh he haw phawt a, zan hnih ngawt he khumah hian ni khaw hre lo in ka lo mu tawh a maw!? Chutiang khawp chuan a nimaw ka taksa kha a nat a, alo chauh tawngkhawng theih ni ka ti hial. Um, kha chu engpawhnise tiin police pa zawhna chu ka chhang ta zawk a. Eng thilmah ka hriat chhunzawm loh thu leh Ethana te unau chanchin leh awmzui zel dan te chu zawt letin, ani chuan a aw chu a han thian leh ta kharh kharh phawt a.

‘’ khami zan, buaina I tawh zan khan kawngpuia tuemaw te kawng kal khan an rawn hmu che a, tichuan, kawngpui kama chengte inah khan luhpui che in an ni ho khan vanneihthlak takin an lo hre hlauh mai che a. Tichuan, bawihsawm zui nghal che in helai hi an rawn thlenpui ta che a, hmu har deuh che sela chuan I hliam atanga thisen chhuak vang khan tun hun hi I thleng thei tawh lo maithei niin doctor te chuan an sawi nghe nghe. Chuan, kha zanah vek khan I nau te pahnih tlan chhia khan police station hnai ber rawn pan in in chunga thil thleng te kha an rawn sawi ta vek a. An ni hriat dan ah chuan nang chu in chhunga ila awm reng thu leh, I nu in thah tuma a beih thu che pawh rawn sawiin keini duty ho chu in chenna lam pan khan kan rawn kal ta nghal a. mahse, in chhung kan rawn luh chuan nang chu hmuh tur lo awm tawh lo in alo thim deuh thap lehnghal, tin, nu ber Zirmawii pawh kha kan hmuh tum loh ang deuha zu hmu in, felfai em em hian a khumah alo muhil ta barh barh mai a nih kha! Hrilh chu a tihai ve angreng khawp mai’’  chutiang thu a sawi lai chuan kei chuan lo pawt chatin, hlauthawng fe mai hian,

‘’ Chuan, Ethana te unau chu tunah hian khawiah nge an awm. An dinhmun kha a tha lo lutuk a nia aw, a nu bulah dah tawh lo hram rawh u’’ ka lo ti ve nghal chul a. Police pa erawh chuan zaidam tak hian

‘’ Um, an tha e. child welfare lamah thu kan thlen a, an ni in a tih dan tur an ngaihtuah mek e. ngaihtuah hah suh. An him dawn a nia’’ alo tih ve vat chuan ka thaw huai thei. Mahse, thil pakhat ka ngaihtuah chhuak leh ta zawk mai.

‘’A nih leh putara kha in zu kal lai chuan engtin nge a lo awm. Ani pawh khan venhim a mamawh ve asin’’ ka han tih leh chuan police pathum te chu a ngaihna hriat loh hmel zet hian an inmelh zui ta he haw mai a. chutah, Si ber chuan kei ch mak tih hmel fe a min rawn melh leh ha chung hian

‘’ Tu putara maw? Chutiang kum upa lam mi an awm awm reng rneg kan hre lo. A thenawm hnai te ber , khatianga nangmah lo buaipui tute chhungkua pawh khan Zirmawii pa hi chu a boralna a rei leh tawh a, tunah chuan nang tih loh ah, an nufa thum chauha khawsa an nih thu min hrilh tlat! Kum upa lam tumah an khawsa ve lo a nih chu!!’’ a rawn ti ta mai a! A nih chuan tu nge kha leh chen kan lo khawsak puia kan lo enkawl a, ei leh in engkim mai kan lo siamkep ve thin putar kha ni ta ang. A lan dan chuan UZiri pa ngei kha chu a ni si a, mahse, a pa erawh chu a boralna a rei tawh an ti leh bawk si. Ka rilru hah lutuk leh hrehawm ti lutuk chu ka thlan te hi an sa zui pap pap thei tawh a, ka hlau a ni.  kha leh chen kha thlarau pakhat kan lo chenpuiin kan lo be vel thin tihna maw ni a nga?? 

‘’ Chutiang chu thil awmdan diktak a ni thei lo ang. UZiri, amah ngei pawh khan a hmu ve thin asin. Zingtin in thingpui in ruahna no pawh kha a rawn seng sak ziah a, ih, a hmu ngei alawm’’ ka han tih leh takah chuan SI bawk khan min lo chhang leh vatin,

‘’ Nia, in hmuh thin ngei kha Zirmawii pa chu a ni alawm! Mahse, a dam tawh lo tih hi I pawm a ngai thung. Zirmawii kan kawmnaah pawh he thu hi chu  sawi lang tawh a, thudik ka han hrilh ve law law mai che a nga; I UZiri hian depression a nei thin tih loh chu eng natna serious dang mah a nei lova, a ti der vek a ni e! Tuna a fate pa Rotluanga nena an inthen hnu khan a rilru thuk taka hliamsak a nih avangin amah pawh a that loh phah rei hle a, depression te nei chho in tikhan a hnathawh lai zirtirtu hna pawh kha thawk chhunzawm theilo in a khum chu a bel ta reng ringawt a, a laktlak loh țan chu a ni ber e. chutihlai vek chuan amah hringtu nu, a nu Pi Rimawii khan cancer natna vangin alo la boralsan zui bawk nen, a rilru kha a dik hleithei tawh lo a ni ber mai a, ama sawi dan hmangah chuan khatianga a awm chawrh chawrh lai te khan a fate pawh enkawl thei lo in a pa, tuna putara I tih mai Pu Thasanga khan kawng engkimah enkawlin, in chhungkhur a kutah a awm vek a, a buaipui vek bawk. Naupang chumchiap pahnih te thleng khan a thlahthlam hek lo. Chutihlai chuan pu Thasanga kha high schoolah headmaster hna chelh lai la niin, an khawsak pawh a pangngai ve thin viau a, pa khirh leh tawrhhlelhawm tak pawh a ni ve thin a nih hmel e. mahse, pa sual ti a sawi tur erawh chu a ni lem lo thung. Chutiang chuan an pafa hoa in enkawl chho ve mawp mawpin hun tam a liam a, Zirmawii pawhin zawi zawi chuan hma a sawn ve ta hret hret zel bawk. Mahse, chutianga Zirmawii’n dam lam a pan dawn lai tak chuan a pasal hlui Rotluanga kha a rawn inlar leh ta tlat mai. A nundan siamthat a tum thu te, ngaihzawng neia a phatsan tawh loh tur thu te pawh chu a rawn kur pui leh dup a, a tirah chuan Zirmawii pawh khan lo duh loin lo hnar ve nasa hle a nih hmel e. mahse, pasal hlui te, fate pa na na na kha chu khuareiah a zun ngaih alo na deuh te pawh a ni mahna le, pu Thasanga remti lo chung chuan inhruai luih chu an tum dun ta hram a. vawikhat phei kha chu an fate pawh hruai lo in an lo inzui leh hman hram a niawm a, chu chu a hriat rualin pu Thasanga chuan a fanu chu pawh kir leh tum hian theihtawp a chhuah ve ta a. khatiang mipa lerh leh laktlak loh lutuk bumna hnuaia a fanu a han kun nawn leh tur kha chu pa tan chuan a harsa ve viau ang le. Police te pawh ruaiin thubuai a siamsak zui ta rup mai a, tichuan, pu Thasanga case siamsak hmang chuan Rotluanga chu jail lamah a awm ta ren rawn phawt a nih kha. Chumi thinrim kal zel leh, a hmaa depression lo nei tawh nen khan Zirmawii chu a khawsak dan alo danglam chho leh țan  a, pawi han khawih mai te leh a fa naupang te pawh han tih nat chak mai chang te a nei ta fo. Chu chu pu Thasanga khan ngai thei lo in nitin zantin hian an pafa chu an inhau ta mai a, a tawpah phei chuan a pa nihna pawh kha pawi sa zo tawh lo in Zirmawii chuan a pa chu a tukkhum lama hlapin a vawhlum ta der mau a nih chu! Tichuan, a pa ruang chu khawih danglamin an verandah thlanglam atang khan huan mawngah a thlak thla ta bawk a! Tla hlum angin police hnenah chuan report a pe zui ta a nih chu! 

Chumi hnu chuan a pasal pawh chu va bail chhuak lehin an han innei leh ren rawn phawt a, mahse, a pasal pawh khan a mizia kha thlah hleithei thlawt hek lo, an inthen leh thuai a, tunah chuan nupui dang neiin hmun hla takah an khawsa tawh nghe nghe. A chhan pakhat chu, amah Ziri hian a tuemaw zawk zawk kha thah ah alo vau thin niin a sawi bawk. Tin, a fate hnenah pawh an pa chu a boral tawh thu a hrilh thin nghe nghe. Chuan, thil pakhat leh chiah, a pa boralna kha a thup tum lutukna lamah tihian midang hnen atang a inla hrang chho ta em em a, tuma tlawhpawh mah duh lo in, tutemah pawh a tlawhpawh duh ta lo bawk a, tin, doctor lehkha lem siamtirin tihian natna chi hrang hrang nei angin a khawsa a, a awmzui a. nang leh midangte chu bumin kan lo awm ta a  nih ber hi. A nihna takah chuan hrisel lohna dang engmah a nei lova, depression nasa lutuk lo erawh chu a nei ve ta awm e. chumi tih loh ah chuan a hrisel tha a, heng a thil tih te hi chu a suahsual leh nunrawn vang hrim hrim a ni e kan ti thei ang chu’’ a rawn tih leh takah chuan ka harh tha kuarh kuarhin ka inhre thei a, ka thin a rim mai bakah mak ka tiin ka hlau thar hle bawk.

‘’ chuan, hei hi I phone a nih hmelin ka hria. Kan rawn kensak bawk che a nih hi’’ tih pah chuan mobile phone sarang fim chhunga la intuam thlap chu min rawn pe leh ta a. ka phone bo ta ngei mai kha a ni tih ka hriatin ka lawm a, mak pawh ka ti angreng viau.

‘’ Hei hi khawi hmunah nge in hmuh chhuah a. ka awm tirh atang khan chin hriat lohin a bo zui nghal ngawt ringawt a’’ tia chanchin ka han hrilh chuan SI bawk khan min rawn chhang lehin,

‘’ I Uziri roomah khan kan va chhar chhuak alawm. Alo dah thukru angreng khawp mai. Tin, he phine chungchang a sawi danah chuan in chhunga thilthleng engkim mai kha pawnlama I report ve zel a hlau a ni ber a, chuvang chuan I awm loh lai chuhin I phone pawh hi alo lakbosak ta che a nih hmel e. I UZiri hi mi rilru chiangkuang lo leh mi kim lo a ni hauh lo a, misual nunrawng tak a ni zawk e!’’ a rawn ti ve leh ta a. ka mittui chu dan hleihtheih loh khwp hian a rawn tla zui ta ringawt. Ni e, nung dama ka chhuak thei hi ka lawm a, chutihrualin Ethana te unau mawlh mai kha ka lainat takzet a ni. An chhungkaw neihchhun te lah chuan pakhat te te in an kalbosan zel mai si a, an kum nise ala naupang viau mai nen, hmun him takah awm sela, tha takin rawn thangchho dun thei se ka va han duh tak em.

‘’Ih, heng zawng zawng min hrilhfiah a min chhan chhuah avang hian ka lawm lutuk e aw’’ mittui tla zawih zawih chunga ka lo tih chuan SI pawh khan mitmeng dam dapa min rawn melh ve in, nui sang chung hian

‘’ tun atang chuan I awmna tur thlang fimkhur tawh la, belchiang hmasa zel ang che. Housemaid hna hi tih mai mai chi a ni lo a nia, pawngpaw zuam ngawt chi a ni lo aw’’ rawn ti supin, min chhuahsan zui ta a. 

Ni e, tun atang chuan khawi hmunah pawh awm dawn ila, tu inah pawh hnathawk turin lut leh dawn mah  ila ka theihtawp chhuahin  fimkhur tawh viau ang.

Tin, hetianga awmpui tur lo zawnsak tu an agent te chuah hi be lo in, kan va awmna tur te chhungkua ngei pawh kha biak chian ve a, finfiah hmasak ngei ka duh tawh bawk dawn a ni.

*************************************************************************************

Leave a Reply