You are currently viewing HUGO

HUGO

Spread the love

“College thlen hma deuh ah sawn accident an awm an ti,hawh va en ve ang” tiin ka thiannu Ramhlui chuan ka ban ah min pawt nghal dawr dawr, keini hi zawng hawkdak chi Kan ni bawk a,eng emaw hlek a awm chuan hmu lo bik leh hrelo bik Kan ni ang tih hi Kan hlau zek zek emaw tih mai tur hi Kan ni, college atang a hla vak lo ah hian mi thenkhat an lo bawr laih a,keini thiandun pawh rem leh rem lo in mi kar ah Kan va in hnawh ve leh sawt sawt tawh, chuta accident pa hmel ka hmu chu ka chi-ai ti tih nghal thei, mipa thenkhat in bike an lo tung mek a,an sir ah Malsawmzela chu a khup leh kiu vel pilh hrep hrup in a lo thu a,a hmai erawh a mitko a sawh ve deuh e tih bak hliam a neilo, “e nge thleng a” ka ti he haw a,Sawmzela pawh chuan min rawn hmu ve in ,nuih suk pah chuan “hei khawvel ka su ve zuai a nih hi” tih pah in a bike chu a kawk pah zauh a,a mah nui vur vur mahse keichu ka nuih a za ve Miah lo, a bul ah chuan Ramhlui nen thu thla ve in “khawimaw i ban kha” tih pah in a ban hliam lai chu ka en sak a, a ban ka khawih chet zawng a a then sak dan ah a na ve viau a nih hmel.

“I chhungte call la,bike hi rawn la mai rawh se,I khalh haw thei tawh nang tiang te chuan” ka ti leh zung zung, “nangmah khan phone mai teh” a lo tih deuh tlat avangin a chhungte chu ka phone sak a, thil thlen dan tlangpui ka hrilh bawk, a ni Sawmzela hi Kan thian ve tho  ni in,a chhungte nen pawh Kan in pawh viau, a mah nen tak erawh hman deuh tawh ah, ka tleirawl chhuah hlim hlawt ti ila,highschool ka kallai vel khan kar khat vel awm chu Kan lo inkawp ve zuai tawh a, chung te vang chuan nge ni, Kan inkar ah hian eng emaw riau a awm a,a chang a han laih leh Tut ang chi te,in be mumal lo a thian ho zing a Kan awm chang pawh a tam mai, tun ah chuan college ka kal ve tawh a,a ni erawh a kal tawh lo thung, Kan inkawp lai khan chhan leh vang awm em em lo in Kan in tha then a,board exam ka hmachhawn Kum a lo ni kher nen kha kha Kan inthen chhan ah ka puh ta ber mai,ka tang lutuk khan ngaihzawng in tihbuai tir ka duhloh vang ni ber in ka hria, khang hun kha rei tawh viau mahse tun thleng hian kan inkar hi sawi thiam siloh hian a ri ret ret ka ti mai,inngaihzawn na thu sawi lo mah ila Kan in ngaihsak tawn hle thung.

A chhungte pawh rei ngah ngailo in an lo thleng thuai a, keini pawh college tan a hun dawn avangin college lam Kan pan a,rilru erawh a khingbai duh viau, class lak lai te chuan Sawmzela ka ngaihtuah avangin message in a that leh that loh ka zawt a, lecture pawh ka ngaithla mumal lo, a khat tawk in min reply leh reply loh thlithlai in ka phone ka en zeuh zeuh thin a,reply na erawh ka dawng mai lo, mahse minute 5 vel ka nghah leh hnu chuan ka message tone chu a rawn ri kharh a, ka en vat “ka tha,i zirlai ngaihsak rawh” tih hi min lo thawn hi a lo ni, ka ner sak ringawt. “Tun a mi kha tu phone nge,message ri kha” Kan professor in a tih Chuan ka thu ngil nghal zawt ,tuman Kan chhang lo, professor pawh chu a hawikual vual vual na in tu ber nge a hrelo a nih hmel, lecture min pek chhunzawm leh a tum lai tak chuan ka message tone bawk chu a rawn ei leh karh a, professor chuan a tarmit phen a a mitmu bial Lian zet chuan min rawn melh ta kal mai ,ka phone ka lo silent theihnghilh chu pawi ka ti vawng vawng lutuk,hremna ka hmu ngei dawn e, “Biaknunsang ding rawh” ka rin ang ngei in a rawn ti fiah fak mai,zum deuh duk chungin ka ding a,he professor hi chu a mah a Lian in a ngo lutuk bawk silo nen a hlauhawm ru riau bik a lawm,mipa a ni kher bawk si,class room ah emaw office vel ah Kan pahnih Chauh in Kan tang dun ang tih ka hlau a nia.

“lecture ka pek lai cheu in e nge I lo ngaihtuah,phone khawih na hun chu a tam lutuk class a I awm chhung tal chuan I insum thei lo em ni” min ti ta zek mai,ka thiamlo zawk tih chu ka hria,mahse mi tihzah  a thiam thei lutuk hi chu ka ngei thin khawp mai, hawi pawh ka hawichhuak ngam mang tawh lo, “class I ngaihsak lo a nih chuan ka class ah hian awm Suh, pawn ah lo va ding rawh” ti leh in keichu a class atang min chhuahtir a,kawngka bul sir ah ka ding ran, ka va han zak tehlul, a class a zo a, a rawn chhuah leh chuan “lut rawh” tih pah in a lehkhabu ken lai in ka lu ah a khawng pah a,a kalsawn nghal nul nul ka va han ngei tak.

Class ban veleh Ramhlui nen Sawmzela te in lam Kan pan nghal a, a lo awm kan rin tehreng nen a lo lengchhuak daih a nihchu ,a hliam na lo tihchu hriat tak a ni, keini pawh Kan haw leh ta tawp, ka nu in tlai ah bai a Siam hliah a thenawm te  suah ve tur a min tih avangin dekchi Lian vak lo ah bai chu ka chawi a, “nu Rinpui hei ka nu in bai va suah rawh a tia” inchhung luh pah chuan ka ti lut lang lang a, “a va lawmawm ve, khawi ka lo ruak ang” tih pah in ka dekchi kenlai chu min rawn laksak nghal a, chutih lai chuan nu Rinpuii fapa upa zawk u Mapuia leh Sawmzela hi Mapuia room atang  an rawn in zui chhuak a, “Nunsangi chu e nge I rawn tih a” tiin u Mapuia chuan min be nghal a, keipawn bai ka suah thu in ka lo chhang ve mai, Chik deuh zawk a an ni pahnih ka en chuan an mitmeng a diklo deuh in ka hria, “zu in in a mi” ka tih Chuan “shhh! Ka nu in a hria a nge,Kan in tam lo sil damdawi ah tlem Kan lem mai mai” u Mapuia zawk chuan a lo ti vat, engmah ka sawi zui lem lo, Sawmzela chuan nuam a tih vak hmel loh in ka hria, biak Miah loh ai ah tiin “vawiin khan I na lo em ni,Kan rawn kal a I lo awm lo a ” tiin be hmasa tu zawk ah ka tang a ,”na vak lo tlem ka pilh ve hlek Chauh” tiin min chhang, a nuih zawng a a biangsum rawn lang chu nalh ti deuh in ka lo thlir dauh dauh,a hmai hi tlem in a bial deuh a, keimah ka san vang nge kei aia a san na a tam em em lo,mipa ze zawi pangai ve tak a ni a, a mi ngainat zawng te bul ah erawh ri ve bawrh bawrh chi a ni thung,a mah hi tlangval sual ti a sawi a ni ngai lo a,zu  in ve zeuh chu a ching a, rui khawp erawh chuan a in ngailo thung , “kha le,I nu bul ah chuan lawmthu min lo sawi sak dawn nia,a tui ngawt ang” dekchi min pek pah in nu Rinpuii chuan a ti a , keipawh ka awm zui rei tawh lo.

“Naktuk tlai ah leng ila” tiin Sawmzela ka text a, min chhang har hrep lehnghal ka mut dawn tawh ah “awle” tih ringawt in min rawn chhang a, thian ang in Kan in kawm ka tih kha, Kan thian dang te pawh an tel ve dawn nghe nghe, “Ramhlui te pawh an tel dawn thian ho in” ka tih leh chuan “aw,ka phur dawn che nia” tiin min chhang a , eng emaw ti tak hian nuam ka ti ru veng veng,a tuk nghakhlel deuh chungin ka mu a ,mut pawh a tui duh khawp mai, zing ka harh chuan  dar 6 Chauh a lo la ni, tho chhuak in rawng ka bawl nghal a,tuk dang ah hetiang ang hun ah hian ka tho ngai lo, dar7 bawr vel hi ka thawh hun chu a ni, tukin erawh vawiin tlai lam hun tur vangin ka helhhawlh nge maw ni ka tho hma ve khawp mai,ka chhungte rawn tho pawn mak min ti deuh nge ni “I tho a em ni” min ti hial,ka nui sak duh Chauh, inrinni a ni bawk a chhun ah chuan in leh a vel tifai in hun ka hmang a,tlailam dar thum vel ah in tifai in chhuak tur in ka insiam a, Sawmzela pawn a bike a min rawn lam in Kan thian dang ten min lo nghah na hmun lam pan in Kan in phur chhuak a,an lo kim thap tawh,thianho a han kal chhuah te hi a nuam dangdai ve a,Kan thianho phei chu Kan phawk tlang bawk a kan thlen chin hi a hriat theih khawp mai, nepnawi ei tur Kan keng bawk a kan hlim tlang viau,thim lek lek ah Kan haw a ,ka chhungte ka chin tur ka hrilh vek avangin Chaw ei ah min lo nghak lo a,mahni in ka ei ve leh rak rak, Chaw eikham veleh room ah lut in khum ah ka bawkzal mai mai a ,Sawmzela chu ka ngai veng veng, ka be mai dawn em ni aw ka ti a,mahse kan in thlah zo chiah a ni a tiin biak chu ka inthlahrung ve deuh tho bawk si,phone chu awmze neilo in ka tuailet ka tuailet ringawt, mahse dar 8 bawr vel ah “zanin chu ka ngai veng veng che,a mak lutuk” tih hi Sawmzela hnen atang ka dawng a, helhhawlh ang hian ka awm ka taksa chhung hi a Mur chem chem ni in ka hria ka feelings ka sawithiam chiah lo ,a nuam a ni tawp mai, “Kan in ang chiah,keipawh I awmdan ang khan ka awm” tiin ka chhanglet a,in zep buai vel kha ka tum lo, “ka lo kal dawn” Kan thusawi inperhsan deuh a a tih Chuan ,”a ngailo,Kan mu vek tawh” tiin ka chhang thuai, lo kal lo se ka duh ngawih ngawih pawh a nilo,ka lo mu lum ve laklawh tawh sia,ngai veng veng mah ila ka tho chhuak peih lo, ‘a nih call tal in” a tih erawh chuan ka lo hnial tawh bik lo, “a mak tiraw” a call ka lakrual in a ti nghal ringawt a,”eng maw mak chu” tiin ka nui hak hak, “hei,Kan awmdan hi mawle, vawiin tlai ka thlah hnu che atang khan ka rilru ah I awm zui reng,ka ngai veng veng che” a tih Chuan ka zak deuh leh nuam ti ru bawk si chu ka nui pat pat mai.

“Englo” tiin a ngawi leh dat a, “e nge englo chu” ka lo ti, “hman ah khan Kan nih ve zuai kha I la hria em” a tih Chuan ka hriat thu in ka  lo chhang thuai, “renew leh ila I duh em,chhan tha tak awm lo in Kan in tha then tawp a, bul tan tha leh ang I duh em?” Ti a min zawh chuan ka ngawi vang vang, bultan that leh chu ka duh lo pawh a nilo, Kan chhungkaw khawsak a inthlau ve em a,rei tak Kan inkawp thei a ngem ka hrelo,an ni chu khawtlang leh vengchhung ah pawh a langsar pawl leh a neinung pawl an ni a,keini erawh mipangai chhungkua nitin kham khawp thawkchhuak ve tawk tawk Chauh Kan ni,Kan dinhmun in thlauh na hian in sitna min neih tir lo thei lo a tin ni, “tinge i duh lo em ni” ka ngawih reng a vang chuan a ti a, “ka duhlo pawh a nilo,Kan dinhmun a in San hleih lutuk a rei Kan daih a ngem ka hrelo” ka tih Chuan a chek hluk a ,”a van ho tak,chutiang ngaihtuah a tullo ,mihring, lei a khawsa theuh theuh dinhmun in thlau tih hian hmangaihna dal Suh se,min duh a nih chuan ka duh che ti tawp rawh,Kan phuloh a Kan ngaih te pawh hi nakin ah chuan lei hnuai ah phum an la ni ve dawn ,a tawp ah chuan dinhmun in ang ah chiah Kan duh emaw,duh lo emaw Kan la awm dawn tho tho” a rawn ti vei duah ,chhuanlam tur dang pawh ka hre tawh lo,ka duh ve tho bawk si a,chumi zan atang Chuan Kan pahnih thawnthu chu ziahzawm in bung thar Kan Kai dun a, bul Kan tan tha leh tihna a nihchu.

A hma pawh a thian ang a lo inkawm tawh Kan nih avangin,in zah tut tut ang kha a awm lem lo,Kan boruak hip erawh a dan a dang ta deuh ,rei  kan in zui hma in kan chhungte lam ve ve in kan inkar pawh an hria a,engmah sawisel an nei hran lo,Sangpuia chhungte lam pawn min iai na lam an sawi ri ngailo,an chhungkua hi mitha chhungkua ti a khawtlang hriat kha an ni ve hrim hrim a,a tir ah kha chuan kan dinhmun vang in rei tak kan inkawp theih kha ka ringlo a nia, mahse ka rin ai daih in kan in mil ta phian a,chhungkaw dinhmun chu thuhran ah dah ta ila,kan duh zawng leh ngainat zawng a in ang in ka ngaihdan min zahsak thiam a, ka thuhnuai theih ni hauh silo hian ka thu a awih in a zawm thiam riau bawk,ka lo suangtuah fo thin leh ka mil pui mipa chu a mah ah hian ka hmu ni in ka hria,a ni tel in a mah ka duh na a zual deuh deuh a,ni khat lek a hmel hmu lo a awm pawh hreawm ka tiin ka ngai vawng vawng thin,kan in laichin na in a vanglai tak a thleng chho bawk nen Kan hun awl neih ang ang chu Kan hlauh meuh lo,kan khua hi thingtlang khaw Lian ve pangai tak a ni a,  Kan veng  a lo in hlat ve deuh bawk nen bike in a rawn phei mai thin, zan lam a rawn len a tum a ruah a sur chang pawh in tihdan a zawng hram hram a,a chang chuan raincoat ha in a rawn in khalh thleng leh nge nge zel tho, chu ti khawp chuan kan hmangaihna lipui chu Kan hlimpui in tudang mah Kan ngai bik lo.

“Babi zanin tlai chu Kan in ah zanriah rawn ei ta che” Sawmzel an a tih Chuan ka thingpui in lai ka hak lo Chauh,”ngawt a che,i ti zahthlak” ka ti hlak,”zahthlak loh,ka chhungten Chaw ei ah sawm rawh an tia lawm” a la ti lehzel ,”Hugo i a deuh mawn le,ka ngam lo”ka lo ti leh hmak, “e nge maw Hugu,Babi ti a in in koh kher a” min melh dun ram ram pah in Ramhlui chuan a ti a,a awm ve a ni tih ka lo theihnghilh daih, “aw, i hrelo mi 3meters above the sky a mi kha,nalh Kan tia” ka tih Chuan Ramhlui chu a ner nasa ngang mai, “in over hi ka tia lawm,bak ah hetah in bul mai ah ka awm ve reng a,in pahnih phul phul in in phul a,ka awm ve tih in hrelo, in ngaizawng ni mah ula thian te awm ve lai chuan chintawk hre ru aw” a ti leh hlak hlak, ni e a sawidik reng, thenkhat hi chu mi zing a ni emaw, mi tam na kar ah pawh nise an in ei zo duh mai ang a,tih tur khawp hian midang hmai zahna nei Miah lo in an khawsa thin a,midang mit Kan ti kham em tih lam reng reng an ngaihtuah tawh  ngai lo,in ngaihzawn na kawng ah pawh hian a awm leh mawi zawn thiam a pawimawh khawp mai, “tihpalh” tiin Ramhlui chu ka nuih tlawn ta vel chiam,kan dikloh na a nia huat a lak ka tum hran lo.

Min sawm ngawrh em avangin keipawh in ka hnial thei ta bik lo, ka chhungte bul ah a man a sawi thlap a , an in ah hian a hma in chuangkai ve fo tawh mah ila, tih takzet a hetia Kan inzui tak hnu hian ka la lenglut leh Miah lo, chu vang chuan a hma ang ngawt chu a ni thei biklo,zam ruk na riau ka nei tlat,inchhung Kan luh hma in thawk ka han la halh phawt a,”ral tawm buk a lut tur ang mai,helh hulh a che” min ti chu ka run kher mai, “ka Ning aw,ka zam ve a nih hi” ti in ka melh pah rawm rawm,a nui hak a “zam Suh,an lo seh lo ang che” ti Liam leh puat in ka dar ah chelh in min nawr kal nghal dawt dawt, inchhung Kan luh chuan pa ber chanchinbu chhiar in sitting room ah a lo thu a,a then in rawng an lo bawl bawk.

Inthlahrung ru deuh chung in an rawngbawl chu ka va pui ve nghal a,a ngai lo ti mahse ka pui lui tho, Chaw ei lai te chuan “I lo ei puat ngam lo a nge aw,chawhmeh pawh a tui tha tha Kan Siam a nia I ei teuh rawh” Sawmzela nu leh pa chuan an ti Siam Siam reng a,ka ei ta teuh tak nghe nghe kha, Chaw eikham ah rei vak lo ka thu khawmuang leh a ,ka haw har lo, ka chhungten ‘mipa in a rei tak awm a mawi ngai lo’ an tih vang a ni pakhat,zalen tak in inkawp mah ila Kan chhungte lam ve ve hian thu tha leh awmdan mawi te min hrilh ngun viau a,Kan theih chin chin a zawm Kan tum bawk.

Kan inkar a tha viau e maw tih laiin Kan inkar chu eng emaw ti tak in a diklo riau in ka hria, Sawmzela mizia ah han danglam em em ka hrelo na in keimah ah hian min mawlh tu a awm ka ti mai,ka sawithiam chiah lo, tum khat  a rawn leng chu a bet lo riau in ka hria,hemi zan hi Chuan ka nu leh pa pawh in min men pui ve a, a khat tawk in Sawmzela chu an be ve leh zeuh zeuh thin,”tunlai I nu leh pa an dam tha maw,veng kar a hla deuh a chanchin in hriatpawh zung zung te hi a har si a” ti a ka nu in a biak chuan a lo phu deuh zuk , “a nia,tunlai chu a bp a sang deuh a eng vak mah pawh a ti thei lo” tiin a chhang a,a phone bawk a hmet leh mual mual tawh,zan dang ah hetiang hian a awm ngailo,ka nu leh pa awm lo se chuan a phone ka phihtlak sak tawh ang, “a va zialo ve,bp sang ah chuan phuihnam te hi a tha a sin,tawkte te ei tir ula,a theih phei chuan lui lam sa te hi ei tam tir ru” ka nu bawk chuan a ti leh a,”nia,eitir ila a that dawn chu” a lo ti Liampuat a,ka nu biakna pawh chu a ngaihven teh chiam lo tih a hriat hle,chu chuan min ti lawm lo viau,ka nu leh pa hmuh ah a mark a chhiat ka hlau ve tho bawk nen a awmdan chu ka mil lo ru viau ,ka beng chak khawp mai,ka nu leh pa mut hnu ah pawh in be mumal lo in Kan thudun reng a, TV Remote ka hum ran ,a ni erawh in a phone ngawt a buaipui a,zan dang a a zia leh zanin a a zia chu dang tak a ni.

A tawp ah chuan ka insum thei ta lo, “zanin hi e nge i hriat a”ka ti ta thlawt,min rawn melh zawk in “e nge ka hriat a”a ti tawi tan a,a phone ah bawk attention pe leh nghal in a nui ang suk suk lehnghal,”khawi maw I phone kha lo la teh”ka tih tak ah chuan min rawn en in ,”eng vangin” a tih Chuan ka chum chawrh lo Chauh a ni,”rawn la rawh ka tih Chuan rawn la la ni mai”ka ti leh hmak a,”i ho e mai a”,a ti ringawt,aw ka zaidam ka hmang thei lo tep tawh chu a ni, “Malsawmzel I phone kha minpe teh ka tih chu”ka ti chang leh fak a ,”a mak ee! Babi e nge I hriat a”a ti bul bul, a phone chu minpe duh chuang lo , ka thinrim teuh tawh,”min pe dawn lo maw” ka ti tiau a,ka tap ti tih tawh ,”A va buaithlak,Babi tinge hetia i awm thut a”tiin min rawn hnaih deuh a,min kuah a tum chuan ka lo namsawn,”tinge i phone ka en chu i phaloh”ka ti leh tiau a ,”ka phallo pawh a nilo” a tih Chuan “a nih khawi rawn la rawh”ka lo ti, a tho nulh a,”e nge I hriat reuh le zanin hi,haw tawh zawk ila a that ka ring,muttui ka thlen hun ah ka lo bia ang che”tiin a chhuak daih a nihchu,ringhlel ru deuh chungin a chhuak ta chu ka en zui reng a,ka awm zawn hi a na vawng vawng mai.

“Ka thleng chiah” tiin a chin chu min rawn hrilh ngei a,mahse ka chhang lo,ka muhil thei hek lo ka inlet tawn sek ringawt ,a tuk ah chuan a dan ngaite in morning wish  ka dawng leh,vawiin ah a phone ka check sak ngei ang ti rilru in tha deuh in ka lo chhang a, ka college kal tur min thlah hun ah a ruk in ka en sak thei mai in ka ring, Kan khua ah college a awm loh avangin Kan khaw thenawm ah college Kan kal thin a,hla tak a ni hran lo, “thil ka ei lo a, hetah hian chawl lawk ang first period ka off dawn tho”tiin thingpui dawr pakhat ah ka chawlhpui a, engtin nge a phone chu ka en ruk sak ang tih ah ka buai ru viau, Kan thil chah an rawn dah lai chuan “ka pum a diklo riau, bathroom ah Kan kal lawk”a ti ta hlauh a,vanneih thlak deuh in a phone a keng lo, a kal chiah tih ah a phone chu ka ban thuai a ,hetiang a a phone khawih ruk sak hi ka vawikhat na tur a ni, phone hi Kan in check sak mai mai ngailo a,Kan in rintawk vang a ni pakhat ang chu,tun tum erawh ka rinna aiin rinhlelh na a Lian zawk miau a,ka tih ngai loh mah nise tih ka duh tlat, a phone lock chu hawn mai ka han tum a,mahse ka hawng thei ta Miah lo, a hma kha chuan  ka hming bul a hmang thin a,chi hran hran ka try hnu ah pawh ka hawng thei tlat lo, ka hriatloh tur a a pattern a lo thlak ringawt pawh chu lawm lo tak ka ni, phone in check sak em em hran ngai lo mah ila,Kan lock Kan in hriat tawn chhung chu ngaihtha in a la awm theih,mahse Kan ngaihzawng emaw kawppui ten kan hriatloh tur a lock an thlak a nih chuan zep ruk an nei ah ka ngai hmiah ,thinrim deuh chung in a pattern chu ka thaikual hrep ringawt,a rawn chhuah thut ka hlau ve tho bawk si nen a phone chu dahlet leh mai ka tum a,mahse a phone dahlet ka tum lai a message lo thleng chuan ka mit a la ta zar mai, “in inthen tawh i ti emaw ka tia,vawiin ah in inphur chhuak lai ka hmu leh tho sia” tih chu vawi thum ka chhiar nawn hman, Kan lo inthen tawh  a maw.. hah!!,hei hi a ni maw ka lak a a lo zep leh a phone ka khawih a lo phalloh chhan chu, “hmarcha ka ei hnem deuh a niang” tih pah in a rawn thu leh a,a phone keng chung a a mah ka lo en reng a ni tih a hmuh chuan rang zet in a phone chu min chhuhsak vat a,ka nui sak, “englo” ti a pha dai chung a min en chuan “Kha thil kha a ni maw ka lak a i lo zep leh i pattern hial I thlak chhan chu”tiin a mit ah tak ka melh kal a, “ka sawifiah thei” a tih Chuan ka nui chhuak hawk,nuih erawh a za tak tak lo viau ,”I sawifiah a nga tichuan keiin ka lo awih a nga maw, sawifiah pawh a ngaih loh kha,inthen I duh chuan a tha Kan inthen ni rawh se,kawplai nei reng chung a hmeichhe dang be duh tu hi ka mamawh lo” tiin ka ding hluai a ,”Babi,inthen ka duh lo,ka sawifiah thei,ka,ka thiamlo tih ka hria ,mahse inthen ka duh lo” tiin ka ban ah a chelh thuai a ,a mangan hmel viau bawk,mahse kei mi lunglian leh ka duhloh na lam a luhlul ve tak rilru hi chuti mai in a sawhsawn thei lo, a mi chelh na chu thingtla in “bill hi I lo pe dawn nia” tiin a mah pawh en tawh lo chuan ka kal nghal nal nal.

A ruk a midang min biak san thei kha mak ka ti in,na ka ti,duh tu leh be tu dang neilo ka ni bik lo,mahse a tan ka rinawm a vangin min beisei ve tu ho pawh beidawng in ka Siam thin,a ni ve chuan kan inthen tawh thu a lo hrilh a nia, Kan rilru put hmang a lo va in ang lo tak,ka rilru na lutuk chu ka mittui a far leh fap fap thin, college pawh nuam ka tilo, min rawn biak a tum nasat em avangin ka phone pawh ka off phah tawp,ka bia a nih chuan ka nem a nga,ka pawm leh mai ang tih ka hlau,kar khat chhung chu Kan inbe tawh lo,a ni chuan min biak a tum reng a keimah zawk in ka be duh lo , kha a hmeichhe biak nu nen khan chanchin an nei zui ta lo nge ,thawm ri va a awm awm ka hrelo, be duh lo mah ila a chanchin erawh ka ngaihven ru reng tho.

Tum khat chu Ramhlui hian “Singapore ah kal ka tum ve a sin,ka thian dang te pawh kal an awm tawh a,hna nuam leh chhuan tlak tak chu a nilo,mahse mahni tan leh  chhungte tan theihtawp chhuah a ngai a, mi tuarchhel te tan chuan a dinchhuah ve theih lutuk” a ti Siam Siam a, “lo kal ve daih la,I rilru te pawh a dam ve deuh a nga” a tih Chuan ka ngawi vang vang,ramdang a chhungte hmu phak Miah lo a awm chu ngaihtuah pawh ka la ngaihtuah ngailo hrim hrim ,”ka hrelo ka chhungte ka lo rawn ve phawt ang” ka ti ringawt, ka ngaihtuah Chiang a Ramhlui rual a kal ve daih mai chu ka pawi ti hran lo, ka chhungte phur ka lo chhawk ve theih na tur a nih bak ah ,mahni tan vek a nia tiin ka chhungte hnen ah pawh thiam tak in ramdang a hnathawk a kal chu ka dil a , a tir ah chuan an phal mai lo “hausa em em lo mah ila mi zing a zahpuiawm loh tawk in Kan la Siam thei cheu a,in mamawh ang chu Kan la tihsak thei lutuk cheu a lawm” ka pa chuan a ti nuah nuah a, mahse chu chu a ni ber in ka hrelo,hmalam hun ka ngaihtuah a,zirna lam ah hma ka sawn em em ka ring vak silo,dam te a Kan awm zel a nihchuan pasal ka neih hun te a lo la awm a nga,ka nu leh pa hahdam in ka Siam ve hman in ka ringlo,chuvang chuan tun ah ka la naupan deuh lai ,hun tha ka la neih lai hian ka theih ang ang a puih ve chu ka duh. Ka dil ngawrh em avangin ka chhungte pawn min phalsak in ,Ramhlui nen Aizawl lam ah Kan inzui thla ta a, rilru Kil khat ah erawh Sawmzela a awm ve reng mai,Hostel ah awm in midang lo awm sa pawh an awm nual,Chaw Kil ho a mu ho ta reng chu Kan in nel chak hlawm viau bawk, nitin mithar awm belh an rawn awm ve zel bawk a,chhungte leh Sawmzela ngai viau mah ila ,thiante zar ah lungleng em em in ka awm bik lo.

Covid hluar lai ngang kha a ni bawk a,mi pawh Kan fimkhur tlang khawp mai, tumkhat erawh Kan thian pahnih a tuk mai a kal tawh tur te chu covid an positive ta tlat mai,Kan chi ai in Kan mangang tlang hle, keini ho pawh Kan positive ve leh veloh in test nghal in ,a in text hmasa apiang an positive zel bawk nen la in test lo  ho pawh Kan in ringhlel thum tawh, vaneih thlak deuh in ka hun a lo thleng a ,ka negative hlauh ,a hmasa lam pathum Li bak chu Kan negative a ,lawm lutuk avangin mittui a far lo Chauh a ni, Kan miss in “a duh chu mahni chhungte emaw,in khaw lam ah pawh in kal hma chu in haw thei ang, quarantine Kan ngai dawn si a,nangmah ni him zawk Nan pawh” a ti hlauh a,keipawh Kan khaw lam a haw chu ka tum ka kal a hun ve tep tawh nen chhungte hmu lo a Liam ngawt chu ni thei in ka hrelo,Ramhlui erawh vanduaithlak deuh in positive zing ah a tel ve hlauh a,ka rual in a haw ve theih loh hmel, a tam zawk hostel atang Kan in suan chhuak a,thenkhat erawh hostel ah la awm tlang in positive ho nen erawh in kalpawh thei lo in an awm thung. Khua a haw ka huphurh na chhan ber pawh Sawmzela ka hmu ngei dawn tih ka hriat vang a ni, hostel ka awm lai khan Kan inbe zeuh zeuh a, that erawh Kan la tha thei meuh lo ,a lo biak thin nen pawh khan an in zui chhunzawm lo a ni awm e,ngaihdam duh viau mah ila ka luhlul na leh in duhtawk na hian min la in phahhniam tir thei rihlo a ni ber,  Kan khua Kan thleng a ,ka chhungten Kan inkawt ah min lo nghak thap mai, mahni in lum nge nge chu a tha emaw a chhia emaw a lo nuam a ni.

“Bawihte sawmzela nen in la tha leh Miah lo em ni” Kan Chaw eilai in ka nu in a ti a,ka bu nghat ringawt ,”mihring hi tumah famkim Kan awm lo a,tisual thei vek Kan ni, ti sual tu nih ai chuan ngaidam thei tu nih hi a hlu a nia,nangpawn ngun deuh in ngaihtuah la,in Kum a la naupang a ,a ni pawn in siamthat na hun a la ngah a lawm,” a tih leh chuan ka chhang lo,ka nu leh Sawmzela hi an in ngaina a ka awmloh chhung khan ka chhungte rilru engtiang in nge a lo hneh ka hrelo, “chungte chu an inkar a nia,an pahnih in an la chingfel mai ang,lo in rawlh ve lo zawk ang,Chaw kha ei rawh” ka pa zawk chuan a lo ti hlauh a,ka nu pawh in  a sawi zawm tawh lo.

Chaw ei na vel ka tihfel zawh ah room ah ka lut a, hostel a ka awmpui ka thian te nen video call a inbia in Kan nui hak hak reng,chutia hlim deuh a thian ho a Kan inbiak lai chuan,”in leng i nei lo chhuak rawh” tiin ka nu in min rawn ko a, in leng neih  ka peih vak loh nen ,ka thiante nen in mangtha in phur lo deuh chung in ka chhuak a, chuta thuthleng a lo thu mipa ka hmu chu ka ding dat, a ni erawh a biangsum lang karh in a lo nui var var thung,a hmel hi zawng a tha Chiang a ni ,”e nge I rawn tih dawn a” tum deuh hmuk a ka tih Chuan ,”nula ka rawn rim” tiin min lo chhang a,a la nui ang tut tut leh nghal,ka hmui ti pawrh zeuh in ka tum deuh bar bar,”i bialnu rim ta che,tinge hetah te I lo kal,tu te emaw mit Kan lo ti kham viau thei a nia” mei nei zet a ka tih Chuan a nui hak a,”chutiang tur an awm lo hlauthawng Suh” a tih Chuan tlem in ka phur ve ta deuh,dik tak a sawi chuan ka hmangaih em a,lungawilo rih mah ila kha ka hmangaihna kha a la reh tlat lo a, hun in tlem tlem in ka thinrimna pawh a Liampuat ve hret hret a ni tih pawh keimah hi ka inhria,vawi tam tak ka in ngaihtuah tawh a,chance pek chu a tha lawm ni ti a mahni in hrilh chang pawh ka nei,mahse he ka luhlul na bawk hian min la in phah hniam tir thei lo chu a nih hi.

In be em em lo in darkar khat vel chu Kan awm,a zawhna ka chang tih bak chu a hranpa in ka be lum lam meuh lo, kan piah deuh ah ka nu te an awm ve reng avangin biak chhiat lut pawh ka ngam chuang lo,dar 9 bawr vel a a haw tur chu pawn thleng ka va thlah, ka lungawi famkim ta e tihna erawh a la nilo, “a nih mangtha ka lut a nia”a mah pawh en mang hlei lo a ti Liam puat in inchhung lam a luh lehnghal chu ka tum,mahse ka ban  ah min pawt let dawrh in, in piah deuh thim chin ah chuan min pawtlut ta daih a, “e nge I hriat a,i mawl deuh mi” ka ti khar khar, “ka ngai lutuk che” tiin min rawn kuah a,kei ka lo tal ve laih laih thung,a ni erawh in min kuahnghet sauh sauh chung in,”khawngaih in Babi,vawikhat chiah,vawikhat chiah chance minpe rawh,ka tihsual ang kha ka tisual leh tawh lo ang,ka tiam a che,a ni khan min lo zar ve bawk nen thil ka tisual palh a ni,Kan inkar ah engmah a thleng lo, min ring rawh Babi khawngaih in ka tisual nawn leh tawh lo ang,” a ti mawlh mawlh,keipawh tlem in ka in thlahdul ve ta deuh,”,engtin nge khatiang khan midang min biaksan theih,misualpa”tiin a awm ah ka chum pawp pawp ,ka mittui ka lo dan ve tang tang kha dang hneh ta lo in,a lo lung ngiai ngiai bawk ,”ka tihpalh lutuk,thiamthu sawi tur ka neilo,mahse nangchauh ka hmangaih awm chhun I ni,min ngaidam rawh Babi khawngaih in” ti leh mawlh mawlh duat zet in ka lu ah a chul a,ka chal ah a hmui a nawr si vang vang,chu chuan min ti hahdam sawng sawng ni in ka hria,ka mittui luang chu min tuai hul sak in “ka hmangaih che,”a ti leh sup a,ka insum reng thei ta bik lo,”,keipawn ka hmangaih che Hugo” tiin ka kuah let ve ta nge nge.

Tam tak chuan nep  pawh min ti maithei,’vawikhat a bum tawh che a nih chuan a bum nawn  hreh Miah lo ang che’,min ti tu awm mahse,ka hmangaih a nih chuan vawikhat a thil tihsual chu ka ngaidam thei tur a ni,Pathian pawh khan Kan sualna te min ngaidam in,hun tha dang minpe lo ni te se chuan keini  mihring te chan tur chu a rapthlak ngawt ang,chu vang chuan tupawh hun tha dang hi chu Kan phu a lawm, Sawmzela nen Kan inkar a tha leh ta bawk a,keimah pawh ka harhvang leh ta sawt ni in ka hria,hmangaihna hi thil mak tak pakhat a ni,eng vangin nge mi tam tak hian an kawppui te thil tihsual an ngaihdam leh thin tiin pawnlam mi chuan kan lo dem viau a ni thei,mahse maw Kan hriatpui ve loh tam tak hi a awm a,hmangaih te inkar hi chuti mai in a chat mai mai thei lo ,hei hi hmangaihna special bik na pawh Kan ti thei ang chu ,hmangaihna mak zia leh thil tih theih zia chu Pathian hmangaihna atang pawh hian a hriat mai awm e.

Kan khua ah pawh karkhat ka awm tling ve leh dawn ta reng mai,karthar lam ah aizawl ah ka chhuk a ngai tawh,ka flight kha Saturday a ni tawh tlat, chutia ramdang a ka han awm ta daih tur chu Sawmzela chuan a huphurh ngang mai,keipawh ka bang bik lo,ka thinrim lai a ka thutlukna Siam vang hian ka inchhir lek lek a ni,mahse thulh leh erawh ka tum lo, “thinrim lai hian thil i ti zung zung zel a,Kum hnih chu a rei lutuk,lunglen vang in ka sam an tlakawlh vek hman ang,ka lu a kawlh chuan ka hmelchhe vek dawn a mawi lo ngawt ang” titau lek lek chung in a ti nuah nuah reng a,a lungleng dawn tih Chu hre tho mah ila ka nuih a za ru viau lawi, a  tihtauh hian a duhawm thlawt a lawm, “in sak te kan ngai ve tawh a,ka chhungte ka puih ve a ngai a lawm” ka tih Chuan “chu pawh nise ramdang a kal kher lo pawn tihdan a awm tho a” tiin a la lawm hleithei lo “nia,mahse ka tum vek tawh sia thulh theih tawh loh” ka lo ti ve leh, a thaw hawk a,”a nih chuan Kum hnih aia tam han awm Miah Suh,hrehawm i thh viau chuan lo haw leh thuai ang che, khawvel ah hlimna tluk a thil hlu a awm lo” pangai deuh in a ti ve ta a”mahse hlimna Chauh hi Kan nei thei hleinem, hlawhtlinna hi awlsam tak a Chan theih a nilo a,a beih a beih a,hreawm zawng zawng deuh thaw tawrh a ngaih chang te a awm a,chuta a tuarchhel te Chauh chu an dingchhuak thin” ka tih ve leh chuan a hmui tih pawrh pah in a bu nghat nghat a,ka sawidik a ti tih ka hria,ka nui pat pat mai,

“A nih chuan Kum hnih chu Han awm la,I rawn haw veleh Kan innei ang” thu tak zet hian a ti a,hma hun  ah enge thleng dawn tih hrelo mah ila chumi zan ah chuan Kum hnih hnu a innei tur in Kan pahnih in thu Kan tiam dun ta a ni.

Aizawl ka chhuk dawn te chuan kan in ah a Riak lo Chauh,zanlai pelh rawk ah Kan in nawr haw ve thei hram,mut pawh ka mu tam hman lo, mizoram ka chhuahsan hun pawh a lo thleng a, airport han rah chiah chuan mittui a hnam ve sak mai, kalsan tur thil tam tak ka nei a,ka hmangaihte tiam in ,dam tak a Kan in hmuh khawm leh beisei chung in mizoram chu ka chuahsan ta a .

A tir ah chuan a harsa in boruak dang han hip chu ka zo lo lek lek,ei leh in a lo dang ta bawk nen keini mizo, zing leh tlai a buh bar ziah tan chuan buh tel miah lo a han in hnawhpuar chu a harsa lam hret a ni,lunglen a rawn kal tawh tak tak phei chuan ka melh ngai te hi ka lo melh leh vung vung thin,ngaihtuahna hi vak kual nasa viau e tilo hian a tawi tak tho bawk si, ka awm mai mai pawh hi ka rilru in ka tawngtai fo a,chu chu ka lunglen hnem tu leh ka innghah na awmchhun a ni mai. Ka hun awl neihchhun chu ka chhungte leh Sawmzela biak nan ka hmang,Mizoram a ka tih ngai loh mut dawn a Bible chhiar chu ka ching thar bawk a,a tha phian,khawihmun ah pawh awm ila Kristian tan a Bible hlut zia leh tawngtaina thil tihtheih zia ka hre nawn mawlh mawlh mai.

Ka awmna a pi ber hian sumdawnna in lam ah a hawng ve a,thawmhnaw lo thleng zawng zawng tihfel hi ka hna a ni bawk nen zan lam ah pawh dar 12 pelh zak zak chang ka nei nual,dawr pangai Siam in heng a thawmhnaw zawrh te pawh hi a dawr ah a dah vek thei awm si a,eng vang a in lam a sumdawng tlat nge a nih ka hrethiam theilo ka hahpui hrep thin lehnghal, nawh mar a thleng fel leh vek a ngai thin bawk nen,a tam thei sia Ning thei tak ka ni,ka chhungte bul ah chuan ka hreawm tih na leh a zawng zawng ka sawi ngai lo,an lungdam zan lo chung a kal kha ka ni a,chu bak ah hreawm ka tih zia an hriat chuan min ngaihtuah lutuk ka hlauh vang a ni pakhat,Sawmzela bul ah erawh ka chhungte bul a ka sawi duh loh tam tak ka sawi a, chhungte hi hlu in ngaihawm viau mahse di ngaih lunglen hi a lo na zawk nge nge a niang,ka chhungte ai mah in ka be tam zawk, a lak ah chuan ka duhtawk in ka pangchang ngam a ,haw leh daih mai ka chak thu leh ka lunglen zia ka sawi zing hle bawk, chung ah te pawh chuan “vawiin hi i ni a ni a,vawiin a i hreawm na khan nakin ah nun nuam zawk a la neihtir tir thei che,chu vangin chhel tak in awm la,thil tha Kan hmuh nan chuan hreawm tawrh hmasak a tul chang a awm thin a nia” tiin chhel tak a awm tur in min fuih thin.

Tum khat pawh ka lunglen lutuk in video call a Kan inbiak laiin ka tah khum a, “Babi tap lo teh i mittui ka hrukhul sak phak ah i awm silo” a ti thlawt ,ka mittui tla chu hmuh hreawm a ti ngang ni tur a ni,keimah zawk chuan ka khawngaih letling lutuk ,a ni chu mipa a nia lungleng in min ngai ve viau mahse mittui em a ti tla velo mai Chauh a ni,a mitmeng ah min ngaih zia leh min thlakhlelh zia ka hmu thei tlat,kuah vawng vawng ka chak lutuk, “ka lo haw veleh inneih Kan tum kha,theihnghilh lo la,midang lo melh Miah Suh spy ka dah vek a nia aw” tiin ka tah tawng a, a ni pawh a nui ve ta hak “midang duh ni ila ka hmangaih lo ang che” a tih Chuan keipawh mittui nen ka nui ve leh thei ta, “khawngaih Babi ,chak tak in awm la I tuarchhuak thei a nia, ka hmangaih Babi i nih kha,tun a i mittui tla kha hmalam pan tir tu che nih tir la,I mittui kha a lo thlawn in a luang lo a nia,mittui man to i nei tih hrereng rawh” thu tak deuh a a rawn tih leh chuan a hmel chu ka en tlawk tlawk, a ni mi fuih na hian chhel na minpe ka ti lo thei lo, “lem,I nuimawi deuh kha min han hmuh teh ka hmu chak a nia” tlem a zangkhai deuh zawk a a rawn tih leh chuan ka mittui lo tla leh mai tur chu khap let in ka insut deuh a, ka nui lui deuh ,”i nuihmel kha tibo Miah Suh,I nui hmel nen khan I mawi ber” a lo tih leh chuan ka lai zo vek “I sawi maksak nge I sawi ril ka ti dawn, min ti zak a nia” tiin ka nui chhuak hak hak , a ni pawh nui ve in “ka ngai hle mai che” a ti a, keipawh hian ka ngai takzet si a ,hun hi thenkhat chuan hun hi a ka chak an ti a,kan tan erawh sana hian a ban a vai muang bik ni hial in ka hria.

Hun leh ni a liam zel a Sawmzela’n min fuih awl lo,ka lunglen pawh a tir lak ah chuan zia ve tawh tak a ni,off day neih theih hun tur te,thian ho a Kan in hmuh hun tur te  suangtuah chungin ,ka boruak hip pawh a zangkhai sawt viau,hna erawh a ngai te te in ka la ngah tluang zel thung,hostel a ka awmpui ka thian thenkhat te pawh harsatna eng eng emaw vang te in mizoram lam a haw leh ta pawh an awm nual tawh ,hetiang a haw leh ta te hi dem ngawt chi an nilo,Kan tawrh leh Kan thil tawn a in ang vek lo a thil hrechiang lo a ‘an tawrhchhel loh vang’ loh tih ngawt hi a dik ber lo, thil reng reng hi a tuartu te tawrh ang Kan tawrh ve phawt loh chuan ,an tawrhna hi Kan hriatthiampui thei ngailo ang.

Nikhat erawh chu ka chesual reng mai,zingkar atang ka chet a fuh thei meuh lo, ka eitur  Siam lah ka ti ut thul, sek rek ka khawih pawh in thil ka ti chhe nual mai,ka pi in min khik khak ngun malh malh viau bawk, nidang chuan ka chesual mawh viau asin mawle,keimah ah diklo riau a awm ,ka sawithiam lo,ka lung hi a leng ngawih ngawih, ka lunglen dan hi ril tak a ni, zan ah pawh Sawmzela bul ah pawh ka sawi nghe nghe “I chau lutuk a niang,in enkawl tha rawh” min ti mai a, a ni ka biak hi chuan ka hah te hi a sam sawng sawng thin in ka hria, rei tak Kan inbe lo ka chau ve deuh nen ka muhil thuai a .

A tuk zing ka tho chu nimin lam ngawt ai chuan ka zangkhai ta deuh , Chet pawh ka chesual rih lo nileng in phone khawih Miah lo in ka buai ngar ngar, ka mood ni hmasa lam aia a fuh deuh vang nge hnathawh pah in ka zai rut rut reng mai, dar 11 vel ah mu tur in room ah ka lut a, phone ka han on chiah chu Whatsapp ah  ka chhungte leh thian te hnen atang message leh call a lo tam ngang mai, chung message ho ka han en chiah chu,ka thaw a chham nghal ti tih ,ka awm zawn a rawn tut nghal up up a thawk lak a harsa takzet , ka chhungte chu ka call thuai a phone a lak rual in “bawihte a pawi emai” tiin ka nu chu a tap nghal a, “nu,,nu e nge awmzia min ti hrilhhai a nia,Malsawmzela chung ah e nge thleng min ti mangang a nia nu” tap pur chung a tiin ka vin lek lek bawk,  “bawihte tawrh thiam tum rawh aw” ka nu chuan a ti leh ringawt a ,ka tap chhuak hawk ,”khawi maw phone kha ” ka pa aw in lo ti in “bawihte,vawiin khan Sawmzela chu  bike in a accident a hospital panpui nghal ni mahse a na kha a na em a ,a tuarchhuak zo lo a ni, in ti chak la,chhel tak in awm tum rawh aw” ka pa chuan a ti dap dap a,ka thu hriat chuan min va thawng tehreng em, “pa dawt i sawi tiraw,nizan ah pawh Kan inbia a,tukin ah pawh min la rawn wish alawm” ka ti leh hlap hlap ,ka pa chu a thaw hak a sawitur a van ve hle a ni mahna, awih har ka tiin awih pawh ka duhlo,ka room ah chuan aw chhuah meuh in ka tap chhuak hawm hawm a,tumah ka vengthawng thei meuh lo ,ka tap thawm hria in ka pi te an rawn tlanlut thuai a thil awmzia min zawt mawlh mawlh bawk,harsa ti zet in ka tah chhan na sawi thei hram,  a tuk ah pawh engmah ka thawk lo ,ka mu tawp a ka mittui lah a tla bang lo, video call hmang in Malsawmzela ka Hugo ruangdai, kuang a an zalh chu ka thlir a, aww,duat tak in ka van chul chak tak em, a hun hnuhnung ber ah pawh ka telpui thei silo a maw,na ka van ti tak, ka haw hun tur leh airport a min lo hmuah dan tur sawidun in ,hmalam hun Kan suangtuah dun nasa thin a sin,khang zawng zawng kha thawk leh khat ah kumkhua a thleng ngailo tur a rawn chang a,suangtuahna ah bak Kan duhthusam kha a puitling thei tawh dawn lo, ka beisei ngai loh leh suangtuahna ah takngial pawh ka la suangtuah ngailoh thihna kutvawt chuan man in,in hmangaih te then na a thlen a,Khuanu hi ka dem lo ka tih Chuan thudik ka sawilo tihna a ni ngei ang,ni e Khuanu hi ka dem a ni,midang chung ah pawh thleng ve thin tho mahse Kan chung ah a tak a a rawn thlen ve meuh chuan Khuanu dem hi a awl takzet,thihna te hi midang tan Chauh ka lo ruat thin a,Kan chung ah thleng ve Turin ka ruat ngailo,mahse a tak in Kan tawng ta si a a na tih hian a sawifiah zo meuh lo .

Thlan thim thuk tak a ka hmangaih ruang dai an zalh lai chu ka thlir a,’Lalpa a la hun lo asin,a pang tilum kha ka la kham lo a ,a aw ri pawh ka la hre kham hek lo,ka hmangaih zia leh ka ngaih zia hrilh tur in vawikhat tal hun minpe leh ta che ,I rorel dan hi kei mi mawlmang ve tak tan hian hriatthiam a har em a ni’, ka rilru chuan ka ti mawlh mawlh. An zalh ta ka hmangaih chu,kumkhua a tho leh tawh ngai lo tur in a mu hlen ta,he khawvel ah hian a aw ri ka hre leh tawh ngai dawn lo,ka hming in min ko leh tawh ngai lo a nga, a nui hmel ka hmu leh tawh ngai hek lo ang,a pang tilum ka dawng thei tawh lo a nga,ni e ka hmangaih chuan min mangtha na thu pawh sawilo in hla tak ah min kalsan tawh a ni.

Sawmzela boral atang kar hial a liam ve ta,a mah ka ngaihna a na telh telh a ,min chhang tu tur an awm lo tih hrereng mah ila ka nitin hun hmandan text hmang in ka hrilh hmaih ngailo, a damlai a Kan tihdan fo dan in morning wish leh good night wish ka hmaih ngailo a ,chhanna erawh ka dawng ngailo thung.

A chang chuan ka message hi a rawn chhanglet dawn emaw tih chang ka nei tlat a, a call te hi ka dawng dawn emaw ka ti tlat thin,mahse chung zawng zawng chu ka duhthusam mai Chauh a ni a,ka beisei ang engmah a thleng dawn lo tih chu a hrechiang ber tu ka ni, zanin pawh ka dan ngai te in ka Hugo chu ka text leh a “Hugo ka ngai che,lo leng rawh” tiin.

A tawp ta.

Leave a Reply