You are currently viewing INHREMNA CHU!

INHREMNA CHU!

Spread the love

                    By : Vanlalpeki Fanai

Hmangaihsangi hna bâng chu hmanhmawh tak hian a chenna In lam pan chuan a kal deuh hlawk hlawk a. Hetih hun hi zan dar kua lai a ni tawh nghe nghe. A hnathawhna dawr hi engemaw chang chuan an lun zual hle ṭhin a,an buai thei hle ṭhin. Chuvang chuan a duh ai hian a haw tlai ziah mai a, mi fate anga duh hun hun a lek chhuah maitur lirthei nei ve ta lo chu ke bawk hian zan tlai taktak ah a haw chu a ngaih phah fo.

Chutia hmanhmawh zet a a kal hlawk hlawk lai chuan thawklehkhat ah a ding deuh thut. Hlauhthawn hmel zet chuan a chhehvel chu a han thlek kual thuak thuak a, a bikin a hnunglam chu a thlir ngun zual hle. Mahse a ngaih anga thawm leh thil danglam deuh a hmuh a a hriat leh tak silo ah chuan a kal chhunzawm veleh mai bawk a. A kal liam rual chiah a amah lo zui ru reng tu, a bihrukna hmun aṭanga lo chhuak ve nghal chu han hmu hman se chuan a chi-ai ve khawp ang le.

Hmangaihsangi hi pasal ṭhen tawh niin a kum 26 na hmang mek nuthlawi ani. Hmeichhe hmelchhe lo tak leh tê lampang, hmeichhe nu hnâp mai kan tih ang chi hi ani reuh a, a hmel leh a pumrua han en mai chuan a huaisen theilo hrim hrim tihtur chi ni mahse, a chhungril erawh hmeichhe tumruh leh huaisen, luhlul ve thawkhat tak ani a,a pasal hlui Jimmy-a nen hian kum hnih chuang inṭhen tawh in fa erawh an nei hman lo thung. Tunah hian amah chauh in apartment pakhat chu luah hawh ve in thawmhna dawr lian ve tak pakhat ah a thawk mek bawk ani.

Thla liam ta aṭang khan hetia zan a a hna bang haw hi zui ru tu an awm ni a hriatna a nei ṭan tawh a. Vawi engemaw zat chu man chhuah tum hian a lo châng ru ve tawh ṭhin bawk,amaherawh chu a hlawhchham zel thung anih hi. Mahse kan sawi tawh ang in Hmangaihsangi hi hmeichhe dawihzep tak ani lem lo a, a thil tawn mak taktak te pawh hian a ti hlauthawng em em hrihlo.

“Tunlai chu hna kan bang tlai thei bawk si a,ka haw kawng lah hi alo reh ruih tawh zel bawk nen. A nuamlo ve ṭhin khawp mai a”  a thil tawn chu kimchang tak pawh in a ṭhiante hnenah chuan a sawichhuak duh chuang lo. A thawhpuite pahnih Hmingtei leh Zothansanga te chu an lo in melh ralh ralh mai a.

Chutah Zothansanga zawk chuan 

“Awi dik chiah ṭhiannu, kei chu a ruk tak hian i huaisen hi kalo ti thei lutuk a, keini chu Lalhmingtei nen hian kan haw dun thei mai a kalo ngaihtuah thei tawp che” a rawn ti deuh hlâwi hlâwi.A sawi zawh rual in Hmingte-i pawh chuan “Nia a dik chiah alawm,in veng lah hi a hnai tehchiam silo a,kan pû te hnenah advance dil la scooty tal hi chu nei thei la ka ti ngawt mai” alo ti ve bawk.A thusawi lai chu pawm pui tih hriat tak hian Zothansanga chuan a lu alo bu nghat nghat bawk.A ṭhiannu thusawi chu Hmangaihsangi pawh chuan ṭha ati ve reng a,nileng deuhthaw chuan tihdan tur a ngaihtuah ta reuh reuh mai.

Dawr neitu ber Pu James Lalrosanga  pa thil phal leh midangte hmangaihna leh hriatthiamna ngah zet mai hi ani roh a,sum ah a buai lo a,chumi vang erawh chuan sum a ren lo in,thil ṭul lo ah a khawhral ve maimai ngailo thung.A hnuai a thawk a mi chhawr te pawh hi tumah en hrang lo in an hlawh a pe ṭha em em bawk si,a mi chhawr te pawh hian a hnuai a hnathawh chu nuam anti em em a an pu pawh hi an ngaina phian ani.A duh phawt chuan Hmangaihsangi pawh hian a hlawh lâk advance chu dil mahse a phalsak nasa dawn lutuk tlat.Chutiang thleng thleng a a ngaihtuah kual chiam hnu chuan a rilru siam fel nghal in Pu James-a chu biak a tumruh ta ani.

A rilru kawm melh melh pah a kal lai chuan harhchhuak thut niawm tak hian a han hawi chhuak hlawl mai a,a rilṭam tawh zia a hrechhuak zui nghal.A han hawi kual deuh hnu chuan thingpui dawr lian lemlo tak lo la inhawng chu ava hmu ta mai reng a,a pan ding nghal.Zanin chu bâng tlai vak lo mahse rawngbawl chawp leh kher ngailo in dawr ah chuan inhnawh puar law law mai a thlang ta zawk a.

Chutia a eitur chah nghak pah a alo ṭhut ngawih reng lai chuan tu emaw,a hriat ngai pawh ni miahlo hian a dawhkan tereuh te chu a rawn ṭawm ve ta tlat mai le.A tirah chuan mak pawh alo ti tehchiam hranlo,mahse a han hawi kual a dawhkan tam zawk chu alo ruak heng hung ani tih a hre nghal.Anih chuan engvang a he mihring hian a dawhkan kher chu rawn ṭawmpui ve nge anih ang? Chu pa melh zawk pah chuan

“Min lo hrethiam la,hei chu ka dawhkan ania,pawi itih loh chuan saw a dang ruak a tam lutuk asin” ati deuh ta kher a.Chu pa lah chuan khaw dang hawi lek lo hian amah chu alo melh ngar ngar chu niin! A ngaihṭhat thlak tehchiam lo khawp ang chu.

A thusawi te lah kha a hrelo nge a ngai pawimawh lo ve hrim hrim pawh a hre nek lo e.Reivaklo hnuah amah bawk chuan bung nghut hian “Ṭhianpa,ka thusawi kha i hria em aw?” A’n ti leh ngat a.A sawi zawh rual chiah hian a hmaa ṭhu pa thung chuan a hming ngei mai hian a rawn ko ta mai! Ani chu alo meng phâwk chiang kher asin.Amah ah chuan hlauhna a rawn awm nghal a,aw khur dar dar hian “Eng-engtinnge ka hming i hriat a?” A bo ta tulh tulh mai.Chu mihring chuan tunge anih chu a hriaa,ani erawh hi chuan engmah hriat anei lo thung.A hmel chu a vawikhat hmuhna mai anih bakah a khawsak dan chu a duhzawng ani lo hrim hrim.Chawl miahlo hian ala melh ngar ngar reng mai bawk si a.Chutianga a lo hawi buai vel lai chuan a eitur chah pawh a rawn thleng ve chiah a,a phûr tehchiam tawhlo kher.Waiter chuan mipa chu melh pah in

“Ka pu,eng nge i duh ve ang?” A tih zawm zat.Chu pa lah chuan Hmangaihsangi melh pah reng hian bung nghut in “Engmah!” Alo ti.Hmangaihsangi chuan nuam ati tawh hauhlo.Waiter pawh chuan polite lo tih hmel zet hian a kalsan ve ta a.

Amah pawh en tawh chuanglo a a thil chah lo thleng a ei mial mial lai chuan chu pa bawk chu rawn ṭawng chhuak in

“Hmangaih,tunge ka nih tih hi min han hrilh teh!” A rawn ti leh ta heu mai a,a coffee in lai chu a phuh lo chauh.Fiamthu thawh ah a in ngai nge maw le?

“Nangmah pawh i inhriat loh chuan ka tan hriat ngaihna i awmlo” alo ti let ve hmak.A chhanna chuan a ti lawm vaklo ani tih chu a hmel ah a hriat kher bawk.A hma aia thutak zawk hian a zawhna ngai bawk chu a rawn zawt leh ta.Chutah Hmangaihsangi dawhtheihna chuan a tlin tawhlo chhiava ani a ding chhuak hluai a,dawr chhung a awm te hriat theih tur khawp a ring chuan a au ta mai.

“Ka hrelo ka hrelo,tunge inih hi ka hrengai lo che,a tawk em?”

Dawr chhung a awm ve mi ṭhenkhatte chuan mak tih hmel zet in amah chu an rawn melh nghal ṭhap a,a bul a ṭhu mipa pawh chu a hmel aṭang chuan a zak ve hle ani tih a hriat theih bawk.Tichuan a thil ei lai pawh chu hre chang tawhlo in a bag chu a la tau sawk a,dawr aṭang chuan a tlanchhuak nghal.

Mut hmun ah te chuan a thil tawn mawlh mai chu a han ngaihtuah nawn leh ṭhin a,kha pa kha tunge anih a hrechhuak theilo mai nilo in a hre ngailo hrim hrim zawk.Engvang a khatia rawn zawt ta chiam nge maw anih ang le? Tun hma pawhin amah ang reng reng kha a hmuh pawh ala hrengai eih lo nia.A ni lah khan a hmingpum in a rawn ko nalh mai kha ani si a,lawk in aw…amah zui ru tu awm ang tlat a a hriat ṭhin te kha he pa thil tih vek hi alo ni mai lo ang maw? A mu lai chu a tho chhuak zawk! Amah ngei kha alo nih vaih chuan mi hlauhawm tak ani thei tlat ani.Amah tihchhiat vek duh tu mi hlauhawm tak ani thei tlat.

A tûk ah chuan an boss Pu James-a hmu tur chuan a office chu a pan ta rawih mai.Pu Jamesa’n alo hmu thut chu mak alo tih hmel kher mai.

“E..Hmangaihi teh tlat chu! Ava pawimawh awm em,eng thil nge i duh ve tak a? Lo ṭhu ta che” alo ti bawrh bawrh.Hmangaihsangi chuan han sawi ṭan mai dan tur chu a hrelo hle a,a mit fing tak mai chuan an pu office chhung chu a melh kim thawkhat hle ang tih tur ah hian a sawi ve thei ta chauh a.

“Englo ania ka pu,thil pawimawh lutuk mai dil che ka duh deuh a,rem itih dawn chuan” ati ta niah niah mai.An pu lah chuan a hmel chu chîk zet mai hian alo la en ve reng bawk si,a zam ani.

“Aw,eng thil nge ni ta a? A pawimawh hle tur ah ngai ila” alo ti dam leh dup mai.Tichuan bah deuh nuaih hian scooty a mamawh thu leh a mamawh nachhan te chu a sawi ta vek a.An pu chuan uluk tak hian alo ngaithla ve bawk.Chutah nui hawk hawk chung hian Pu James-a chuan “scooty chu i khalh thiam dawn reng reng emni? I nei ngai bawk silo a” alo ti thuai a,mahse a khalh thiam thu te,tun hma chuan alo neih ve ṭhin tawh thu te a han sawi leh tak duah ah chuan Pu James-a pawh in a dilna chu a pawm sak ve ta hlauh mai a.Hmangaihsangi tan chuan thawk huaina tham ani ngei ang chu.Chumi ni la la chuan a duh chu ti nghal zung zung in a tawp ah zawng a mamawh tak mai scooty nalh zet chu a nei ve thei ta ani.A hlawh aṭanga rulh leh tur mahnise a pawi ti hranlo,an hlawh hi a chhe hran lo a amah lah ṭul tawpkhawk lo ah chuan hna han ṭhulh maimai chi ani lo bawk nen reilote ah a rul zo thuai mai ang chu.

Hna kal lam leh haw lam ke a kal hah a han ngai ta lo ringawt mai pawh chu atan chuan hahdamthlak tak hi ani ringawt.Heti chuan tupawh in lo zui ru sek sek mahse a tlanchhiatsan zung zung tawh mai dawn ani.A ngaihtuahna ho angreng tak avang chuan tu hriatpui si loh hian a han nui ru leh suk suk ṭhin a.A hnathawh lai chu thawk chhunzawm nghal in a hlim ru veng veng.A che vel pawh a zangkhai sawt khawp mai.

“Anih Hmangaih,kan kal mai aw,muttui le” Zothansanga chuan no zet a bân rawn vai pah chuan a ti a.Hmangaihsangi pawh in nui var var chung chung a lo chhang let ve thuaiin a helmet chu a ban zui zat.

“He pa zet hi chu” tiin amah chauh chuan a nui leh vur vur ṭhin a.Scooty chu ti nung in a chhenna lam pan chuan  muang chang hian a inkhalh chhuak ve ta a.

An veng thlen hma hian kawng reh leh thim ruih mai hi hmun pakhat a awm a,he lai bawr kal pelh mawlh hi a nghakhlel ṭhin hle.A huphurh em em  hmun a thlen lai tak chuan thawklehkhat ah tu emaw hi kawng cross zawngg chuan a rawn tlan ta thut mai le! A scooty chu brake hman hek lo a thal zui tawp.Tlem a tlem ah a inti na lo hlauh e.Zawimuang a thawhchhuah pah hian a bul a mihring lo let ve reng chu tunge tih hriat tum in a han kal hnaih nghal a.

“Hei,i ṭha em? Awi! Ka duh theilo,i rawn tlan thut bawk sia a pawi taktak ani,i ṭha maw?” Ati zui mawlh mawlh.A mihring sut bulah chuan ṭhingṭhi in kaihthawh mai a han tum chu a che hman lo,ani chu a rawn ṭhu chhuak ta hlawl mai.A hmel a han hmu chiang zet chu ramhuai a hmu ta emaw tih mai tur in a meng zau kawk kawk a,a âng phuau bawk.

“Nangmah bawk maw”? Tiin a ding zui hluai a.Chutah thil zawn nei ang mai hian a hawi zui ruai ruai a,thawklehkhat ah a tlan ta phut mai.A scooty pawh chu a hrechang tawhlo ani ngei ang,a hma zawn ah chuan a chak thei ang ber hian a tlan ta dawr dawr mai a,a vanneih a siam in zan duty police pahnih hi ava nangching ta hlauh ani.Police awmna ava thlen chuan a thaw hlawp hlawp a ,police pahnih te pawh chuan hrilhhai zet hian amah chu an lo en reng ringawt.Reivaklo hnuah chuan a hahdam ta ani ngei ang le,a rawn tlanna lampang kawng chu kawk in “min pui rawh u,sawtah sawn ka scooty pawh ala awm,ka pu,min pui rawh u” a thaw zui leh hlawp hlawp.Chutah duty pakhat zawk chuan zaidam tak mai hian

“I sawi chiang deuh thei em ka pi?”  Alo ti thuai a.Ani chuan thawk alo la leh kawk phawt  “mi tu emaw,ka hriat ngai pawh nilo hi min zui ru tu a awm a,min tibuai ani” atih leh tak ah chuan police pahnih te pawh chuan a thusawi tum chu man thiam ve deuh in rang tak chuan a sawina hmun chu an pan pui leh ta a.

An va thlen phei nâk chuan a scooty kawngpui lai tak a lo let bûl tih loh chu tu mihring mah hmuh tur an lo awm tawh hauhlo.Makti deuh hian Hmangaihsangi chu an en ta he hâw a,police pakhat zawk chuan nihawichi chip mual mual pah hian “ka pi,khawiah nge nangmah tibuai tu che chu? Hei,i scooty chiah a awm bawk si a?” Atih chuan Hmangaihsangi chu a harh deuh zawk.

“ka hrelo,hetah hian a ṭhu a ka rawn kalsan lai kha chuan ala awm chiang alawm,dawt ka sawi lo,zan dang ah pawh amah tho khan min zui ru fo ṭhin alawm”

“A zui ru ṭhin che tih chu i chiang meuh maw? anih leh ka pi,nangmah hi i dam ṭha hrim hrim em?” Alo ti leh daih.Hmangaihsangi lung chu a awi tawhlo kher a,an zawhna pawh chhâng tawhlo chuan a scooty awmna lam ah a kal vat a,scooty chu tung ding in a ti nung thuai a,ngawi reng hian police pahnih te chu a tlansan ta daih ani.A tlansan tak police pahnih te pawh chu an hawi an hawi ringawt mai a,chutah pakhat zawk chuan khap deuh fuk fuk pah hian “mak tak hlemai” a ti zui sup.

Inchhung a lut fel chiah tih in a phone chu a rawn ri ral ral a,a han nak chuan a number hriat ngailoh aṭang ani tlat.

“Hello” lehlam aṭang chuan mipa aw hian 

“Tunge ka nih min hrilh rawh!” A rawn ti leh ta! Hmangaihsangi phu nasa lutuk chuan a phone chu a thlauh lo chauh a,a khur chhuak nghal vek thei.Aw khur hlawk hlawk chung hian “tunge inih? Tu mihring hnen aṭangin nge ka number hi i neih theih?”

“Ka hming min hrilh rawh,tichuan engkim ka hrilh ve ang che” a la rawn ti ta deuh deuh mai.

“Tunge inih ka hriatloh ang bawk in i hming lah ka hre heklo.Engvang a min tibuai reng nge inih a?” A huaisenna zawng zawng a sawm khawm ve ani.Chutah lehlam ami chu lungawi loh hmel zet hian a thawk nghal hawk a.

“Kei chuan tunge inih tih hi chiang takin ka hria,i hming,i kum zat,i hnathawh,i hun kal tawh leh eng thil nge i duhzawng,duhloh zawng te chen in ka hre vek” Hmangaihsangi mangan tawh zia chu sawingaihna pawh a awm lo zawk.Ṭap aw ṭuau hian

“Tu in nge min en thla tur hian ruai che tih tal hi han sawi teh” atih leh chuan phone chu a in cut ta daih mai a.A hlauhthawnna chu a zual kher mai.Hmanhmawh zet in a kawngka chu a kalh ṭha sawk sawk a,a tukverh leh thildang mi luh ruk theihna tur chi tawh phawt chu a check kim nghal vek bawk.A ṭha thawkhat tawh a a hriat hnu chuan inbual turin bathroom chu a pan ve thei ta hram ani.

A tûk chu Sunday anih angin In-ah chuan a tawm ngat ngat mai a,chumi ni berkher lah chuan zingkar aṭang hian ruah a tla cherh cherh reng mai,a khât mawi tawk hian khawpui a ri leh dur dur ṭhin bawk.Mahni chauh a khawsa ṭhang ani bawk a hna kalloh chang a chutia In a han awm nilen vel te chu engahmah a ngailo,mahse hemi ni kher kher hi chuan khaw chhia nen a thil tawn teh hrep te nen chuan nuam ati lo ru hle a.Nidang ah pawh a tih ngai hleih loh khawpui rik rual te chuan alo phu leh dawrh ṭhin.Chu mai anilo,thawm engemaw hlek ah te chuan a hawi leh nghal hrû hrû zel bawk nen,a nuamlo vel vek hi animai e.

Rilru lak pen nan tiin movie te chu han en ve bawk mahse a dik thei chuanglo,a rilru lak pen chu sawi loh,chutia a han ṭhut ngawih reng te chuan a hlauhna chu anti zual tulh tulh zawk a,ring deuh hlek a music a play lah chuan misual lo lut in an bei thut ang tih maimai chu a ngaihtuah leh bawk si,a muhil ngam bawk silo nen a a awmdan chu a hahthlak takmeuh meuh ani.Amaherawh chu chawhnu lamah thung chuan khua pawh a rawn veng ve ta deuh a,vanneihthlak zet hian a ṭhiante pahnih Hmingte-i leh Zothansanga te chu an rawn leng hlauh.A hlauhthawnna te pawh chu vawm bo ang duak anni leh ta ani. 

A tûk aṭang chuan a hna pawh pangngai takin a kal leh thei tawh a.Amah zui ru reng tu pawh khan chawlh a la ve ta nge tih chu tu hriat mah va ni suh.A reh ve ta vang vang mai nia.

Hmangaihsangi pawhin ngai awh veleh ṭan tawh in nunphung pangngai takin hmang veleh thei tawh a, zui ru tu a nei ṭhin ani tih pawh kha a theihnghilh titih ta der mai. Ala fimkhur em em tho nachung in a hma ang kha chu lutuk tawh bik lo.

Zankhat a  hna bang inchhung a han lut chiah chu thil diklo engemaw tak hi awm hian a hre nghal a. A ṭi nghal duk mai. Thawm dim takin a pen a a sitting room tukverh inhawng aṭanga parda lo phe hlap hlap lam chu ava pan hnai nghal bawk. Chu tukverh chu a chhuah dawn ah khan a kalh theihnghilh ani tih a hrechhuak a, pawi ati hnuhnawh kher mai. Tukverh chu kalh ṭha  in inthlak tum a  room a pan tur a inher chiah chu a hmaah chuan  mipa pakhat hi alo ding reng chu niin. A hmu thut a phu nasa lutuk chu a khawng lo chauh ani.

Chu hriatngai loh pa lah chuan zam map lo hian ” chibai le,hrilh lawk lo che a kalo  len ve ringawt vang hian, tihpalh lutuk”  a han hawi kual pah vual vual bawk a.

“I inchhung chu ka rinai daih in alo nuam a, In lian leh zau lutuk chu  i duhlo ṭhin kha emaw ka tia, mahse hei alo diklo anih hi tunah ka rawn hre chiah”

Chu mihring zam lo lutuk chuan hlauhna aiin a thin ati rim ta tlat mai. Insehruh ṭeuh chung hian a ṭawng chhuak ve nghal a.

“Engvang in nge min tihbuai reng? Tunah hian chhuak nghal rawh. Anih loh chuan Police ka call ang” tiin a phone chu a han lek chhuak zui a. Chutah chu mihring chu alo nui deuh hak. A hmel ah aṭang chuan a hlau lo hle ani tih a hriat theih a.

“I duh duh chu call la, tunge thiam chang zawk kan hre mai ang chu. Call rawh, kalo nghak ang che” tiin a dinna bul mai a ṭhutthleng ah chuan a ṭhu zui nghal daih. Hmangaihsangi thinrim lutuk chuan police chu a call ta ngei bawk a, mahse chu mihring pa hmel ah thung chuan hlauhna emaw zamna chhete pawh hmuh tur a awm hauhlo nia mawle. A inringtawk ve hle ani ngei ang.

A tu ve ve mah chu che sawn lo hian an awmna ngai ah chuan ngawi reng in an awm dun ta tlawk tlawk mai a. Hmangaihsangi pawh a dinna ngai ah khan ala ding reng a, a sawmloh inleng khan chet a rawn thawh thut pawh a tlanchhe nghal thei tur chuan a inring ru ve reng, a che vel chu a thlithlai pah reng bawk a a mit takngial pawh a khap ṭha ngam tawhlo. Chutihlai chuan hla vaklo aṭanga Police motor rawn tlan thawm chu an hre ta a, Hmangaihsangi chu alo thaw huai mai. A chenna building kawt ah chuan police motor thawm chu a reh chat. Reivak lo ah a kawngkhar chu an rawn kik ta ngei mai le. Chuveleh rang zet hian kawngka lam pan chuan a tlan zui nghal a, kawngkhar a han hawn chuan police pahnih hi rawn lut zui in Hmangaihsangi hnenah chuan 

“Pi Hmangaihsangi ini ang maw? I rawn report ang khan i Inchhungah misual an lut ani awm a, khawnge amah chu?” An tih zawm zat. Chutah rang zet hian ani chuan ṭhutthleng sei a ṭhu mek amah tibuai fo ṭhin tu awmna lam chu kawk in 

“Amah saw, vawi tamtak min zui ru tawh a, zanin ah pawh ka phalna la hmasa lo in ka inchhungah alo lut ani” ati nghal. Chutihlai chuan ṭhutthleng sei a ṭhu mek pa chu rawn tho chhuak ve nghal in an awmna lam chu a rawn hawi a, nui deuh sâwng chung hian

“Pu te u, engmah sawi buai angailo e, min man phawt thei ang” tiin a rawn inpe ta mai. Rang zet hian police pakhat zawk chuan alo handcuff thuai a, engmah sawi zui tawhlo in an chhuahpui ta ani.

Sana in zing lam dar 3 a kawh meuh chuan Hmangaihsangi chu mu tui tawh tak ani. Amaherawh chu choka lampang thawm engemaw lo awm zeuh ṭhin avang chuan a harh ta nge nge a. Tho chhuak ta mai lo chuan a mut hmunah thawm chu a ngaithla ta reng zawk a. A hriat dan chuan sazu thil ei thawm a ang ber. Mahse sazu thawm atan chuan a duh aiin a lian hret thung si. Sazu thawm maimai tiin muthilh leh chu a han tum ngawt a, a thei ta hlek lo mai. Choka lam a awm lah chu a khat tawk hian alo ri ve reng bawk si a, lungawi lo zet chuan a tho chhuak ta nge nge ani.  Choka light a han on nak chuan le a hmuh tumloh hlir mai chu ava hmu ta ani. Fridge chu alo in hawng huau a, a chhung a eitur a dah ṭhenkhat te chu dawhkanah chuan a bawm  ruak nen an lo let pheng phung bawk. Chutah zet chuan sazu thil tih ni theiin a hre ta tlat lo. Thawm dim takin fridge chu a han khar te te phawt a, chumi hnuah chemte pakhat chu a bawm aṭangin a phawi chhuak leh zal zal bawk. A inchhung ah chuan tunge lo lut ru tih leh mihring ani chiah em tihte chu a hre hauhlo na in, a man chhuah ngei erawh a ṭul thung si ani.

Chutia inring reng a chemte nen a tei kual vel lai chuan thawklehkhat ah sitting room aṭang chuan thil ri deuh bur thawm hi a hre ta mai a, a phu zuang deuh zawk mai. Thawm chu a reh leh ta vang vang mai thung. Reivaklo thawm dang ngaichang pah a a din ngawih reng hnuah chuan a dawhtheihna chuan a tlin ta ngang lo ani ngei ang, chak takin thawm lo chhuahna sitting room pan chuan a kal ta hmawk hmawk mai a, sitting room a thleng phei chiah a thil va hmuh chuan a ṭhawng kher mai. A t.v hunna bulah hian amah hnungchhawn zawng in mipa pakhat alo ding reng chu niin. Chutah aw khur hlak hlak chung hian 

“Tunge inih?” Ati chhuak thei hram a, a thinphu ri te chu amah pawhin a hre phak hial tawh.

INHREMNA CHU!(2)

                By : Vanlalpeki Fanai

T.V bul a ding mek pawh chu a tum dan ni miahlo thil thleng a awm ani ngei ang a ding khawng nghal at mai. Hmangaihsangi bawk chuan  “I bân kha phar rawh, hriamhrei ka keng ania”  atih leh chuan zawimuang hian a bân chu a phar chhuak ve mai bawk.

“Rawn inher rawh, mahse buaina dang siam chu tum miah suh ang che” atih leh chuan chu pa bawk chu a rawn inher riai riai a, ala nui deuh sâwng lehnghal. A hmel a han hmu chiah chu Hmangaihsangi pawh a meng phawk hrâ ta mai. Alo rin rilruk deuh leh rin ngam tawh chiah siloh ang ngeiin tlai lama a Inchhung a lo lut ru tawh ngei pa kha alo ni daih!  A chemte ken lai chu a thlauh lo chauh mai a, a khur chhe titih der mai le.

“Nang bawk maw!!? Police in an man tawh che kha!”

“Ka thil duh a hlawhtlin hma chuan bansan che hi ka tum hleinem” a zawhna chu a chhang chiah pawhin a hrelo.

“Eng thil chiah nge i duh chu?”

“Nangmah!”

“Engtin maw!? Mi â inih kha”

Za lo zet chuan a rawn nui ta hak hak mai a. Chung lam a a phar  chhuah mek a bân pawh chu zawimuang hian a la thla ṭan a, chu thil Hmangaihsangi’n alo hmuh chuan a chemte chu a hum nghet sauh sauh, a hmaa ding mipa chu ala tin pah reng bawk.

“Mi â zawk chu a hriat tawh mai alawm. Nang hian ka nihna i theihnghilh tawh a, itan tunge ka nih ṭhin i hriat tawh loh piahlam ah ka hming takngial pawh i theihnghilh tawh. Nge ni a i hrelo der zawk?” 

Aw khur der der chungin Hmangaihsangi chuan “Hriatloh der che hi ka tan a ṭulna a awmlo, ka hrelo che, ka hrengai lo zawk che ani mai”

“I pasal hlui, kei hi kum hnih liam ta a i pasal ṭhen tak Jimmy-a ngei kha ka ni e Hmangaihsang!!”

Chutah Hmangaihsangi hmel chu a rawn dâng nghal sawp sawp a. A chemte ken pawh chu a thlauh ri ta bawl mai. A hmaa ding chu en ngawt ngawt chung hian a hnungtawlh hret hret zel.

“I nilo, chutiang pawh an awm bawk lo. Kei hian pasal ka la nei lo hrim hrim bawk.” Atih chuan Jimmy-a chu alo chek tlak tlak ta mai.

“I ngaihtuahna kha han hmang leh hlek ta che. I nei chiang khawp. I hrelo der anih lek zawk kha” alo ti let vat. Hmangaihsangi lam pan chuan a pen pah ve zel bawk a. Hmangaihsangi thung chuan a lu a thing nawk nawk thung.

“Min rawn kal hnaih tawh suh. Ka pasal hlui pawh ini lo, Jimmy pawh ka hre ngailo, ini lo misual mai inih kha misual. Ka report dawn che” ti chung a au tuarh tuarh pah chuan a tlan ta thut a. A room ah tlan lut in a thawmhnaw dahna chhuar lian ve tak ah chuan a tlan lut ta mai a. A tawm ta kar mai le. Jimmy-a lah khan a rawn umzui ve zel bawk si nen a hlauthawng lutuk chu a ṭap chhuak lo chauh tawh a, a thawm chu a hriat mai a hlauh em avangin a hmui a hup ngawt ngawt bawk. Jimmy-a chu room chhungah chuan a hawi kual vual vual mai a, a lungngaih hmel kher lehnghal. Chutah a hma aia zaidam zawk hian a rawn ṭawng chhuak ta ani.

“Hmangaih, ka tih hlauh ṭhin che avang khan ka tihpalh takzet. Dawt ka sawi lo ani tih erawh hi chu min lo hriatsak hram dawn ania, tih nat che pawh ka tum hek lo. Kei hi kum hnih liam ta a i pasal ngei chu ka ni alawm! Ni e, khatih lai aṭang tawh khan i damlo fo mai a khawsik sang tak te neiin i hrisel lo em em ṭhin. Tichuan doctor check up i neih hnuah thluak natna chikhat, Amnesia i vei tih kan hrechhuak ta a, khami hnu aṭang phei kha chuan pangngai tak a nun hi kan nei tawhlo reng reng ani. Hetiang a min theihnghilh ta mai pawh hi kei chuan demna che ka nei hauhlo, mahse min hriatchhuah leh ngei erawh a ṭul thung. A chhan chu maw Hmangaih, ka hmangaih takzet che ani. Hetiang a tihbuai che hi keipawh hian ṭha ka ti reng reng lo asin ka tihpalh. Ka kalsan phawt che anga ilo chhuah hunah khumah hian thlalak hlui ṭhenkhat te ka dah a, ilo en dawn ania” tiin khumah chuan engemaw hi a dah pah zauh a. A chhuak zui ta ani.

A chhuah aṭanga reivak lo hnuah ani pawh a tawmna hmun aṭang chuan a rawn chhuak ve ta a. A hlauhthawnna te ala reh mai loh avang erawh chuan a hawi kual pah zak zak bawk. A chhuak ve taktak tawh ni a a hriat hnuah khumah chuan ṭhu in Jimmy-a dah thlalak ṭhenkhat lo awm darh niaih te chu a han ban de de a. A han en hlawm nak chuan Jimmy-a sawi ang taktak khan an pahnih a thlalak hlir chu an lo ni hlawm a.

An pahnih chuan in ngainat tawn hmel tak a an inkuah dun lai te leh an in fawp lai te ani nawk mai. Makti zet a meng phar awn awn chung hian thlalak ho chu chhuat ah a thlauh darh ta vek mai. A hmui chu a hup leh ngawt ngawt bawk. Chutihlai chuan a ngaihtuahna chu a vir kual mup mup a, tunge anih pawh a hriatloh mipa nen an inzui lai te, amah ngei chu hlim taka a nui ri har har te chu a mitthla ah an lo lang zung zung a, a beng chuan a nui ri har har lai te chu a hre reng bawk. Mahse a reilo, a thluak chuan a khawl khawm sa nunhlui te chu a tihbo sak leh ani ngei ang a thim leh mup ṭhin a, engmah a hre chhunzawm leh thei tawh hauhlo. Chiang tak a a harh leh meuh chuan khua alo var kuar tawh a, khumah chuan amah pawh alo la ṭhu reng chu niin. Rang takin chhuat a thlalak tla darh nuaih mai ho chu a chhar khawm zung zung a, hnathawh na hmun pan leh a ṭul si avang chuan inbual turin bathroom a pan nghal thuai.

A hnathawhna dawr a thlen hnuah pawh a ngaihtuahna chu hmun khat ah chauh ala awm a. A hnathawh lai ah pawh a rilru a pe hleithei meuhlo. Zan lamah lah a mut ṭhat bawk si loh avangin a tha te chu a zawi em em a, diktak chuan an pu hnen a chawlh dil mai te chu a chak rum rum hial. Mahse chu erawh thil ṭha ber niin a hrelo. A chang phei chuan a thawhpui te pahnih chuan biak pawh an be ṭawng zo lo leh hial ṭhin a, hrilhhai zet in an melh leh ralh ralh ringawt ṭhin.

Customer pakhat chuan a thil lei tur chu a thlang rei in a hawi kual nasa em em mai a, amah lo buaipui tu ber chu Hmangaihsangi ani nghe nghe. A duty anih angin a customer kalna apiang ah chuan a zui ve zel bawk a, thil man zat te chu a zawt pah reng bawk nen, kalsan chi ani lo reng ani. Chutia an in zawh mawlh mawlh pah chuan chu customer chuan a bag ah lai chu hai sawk sawk in a bag chhung aṭang chuan dawmdawi bur, a tuamna vâr vek hi a rawn ti tla ta nawlh mai. Mahse a nei tu nu chuan a ti tla ani tih chu a hre reng reng lo a, a dinna hmun aṭang chuan ala kalsawn daih zui. Hmangaihsangi zawk chuan alo hmuh fuh em avangin a chhar thuai a, pek mai a tum la8 chuan a tawp leh chawt. Uluk fahran in damdawi bur chu a melh ta ngawt ngawt mai a, a thluak chu rawn vir deuh zawk in, engtik lai khan nge a hrelo, chutiang damdawi ngei mai chu alo ei ve tawh ṭhin ani. A bûr aṭang a damdawi a bun chhuak lai te, a bâr mawlh mawlh lai te chu a rawn lang leh ta zut zut mai a, mak tak maiin chutiang a a awm lai chuan a lu lah chu namen lo hian a rawn na em em lehnghal a, a lu rawn na lutuk chu a tuar thei hlawl tawhlo, damdawi bur pawh chu a thlauh deuh bawl mai a, lu dawm ngawih ngawih pah chuan chhuat ah a tlu hniam ruai ruai zui. Chutia a awm lai chu a hma a kal a customer khan rawn hmu thut in a a ṭe ta chel chul mai ani.

Hmangaihsangi chuan a mit chu a chhing siai siai a, a chhing nghet thei der lo mai, a ṭhiannu Hmingte-i hmel chu chiang vak lo hian a hmu ṭhin a, mahse khua a dur nge chhum a zing zawk le aw..Hmingte-i hmel chu alo hliah leh daih ṭhin. Zothansanga rawn lang leh in amah chu alo au khum chiam chiam mai a, tui te chuan alo theh huh vek mai bawk. Chutah a tak ram nge a mumang tih pawh  a hriatloh aṭang chuan a harhchhuak ta kawk mai. A han ṭhu chhuak hlawl mai chu a khumah ngei alo awm daih chu niin. A bulah chuan a ṭhiante pahnih Hmingte-i leh Zothansanga te chu an lo ṭhu reng bawk a. Zothansanga zawk chuan tui tlem te awmna chawhtawlh keng chung hian a khat tawk in amah chu tih harh tum in alo theh zeuh zeuh hi alo ni a. Tui ah awzawng alo tla lo, a han hawi vel a, khaw dur chu sawi loh, nî a sa uarh mai. A han tho chhuak hlawl mai kha a ṭhiante chu a ti hrilhhai zawk a mak tih hmel fe hian an lo melh reng ringawt. A hmel a mak tihna leh hlauhthawnna la inpawlh nuaih chung hian Zothangsanga chuan  “awi! Lalṭhian, i harh theihloh chuan damdawiin ah kan kalpui mai ang che kan lo tia” a rawn ti sup. Hmingte-i pawh chu lo inrawlh ve vat in  “nia, kan pu pawh in tui hmanga tih harh phawt che hi ṭha a tia, a theihloh tak leh hospital chu in pan pui chauh dawn nia ati bawk, mahse hei i rawn harh leh tawh a, a lawmawm takzet” alo ti ve zung zung.

Tun ni reilote chhung a a chung a thil thleng lo danglam ta lutuk chu amah ber hian hriatthiam har a tiin a ti hrilhhai zawmah hial a. Khatiang teh thut a a lu na vak mai te leh thil mak pui pui a  mitthla zut zut ṭhin te kha a hrethiam lo leh zual, bakah tun hma in hetiang hian vawikhatmah ala awm ngailo bawk. Chutiang tehnuaih anih avang chuan ngaih han tih ṭhat na chhan tur vak a awmlo ve bawk ani. A pasal ni awm a inchhâl Jimmy-a lah khan thluak natna chikhat Amnesia vei niin a hrilh lehnghal a, doctor han pan dawn se, chu natna chu alo nei taktak anih ngat chuan ngaihtuah pawh a ngaihtuah chhunzawm ngam tawhlo hial zawk. A in dawm kun tlawk tlawk a, eng thil nge a tih tak ang? Amah ṭanpui thei tur awm a han ngaihtuah ngial pawh in a hrechhuak thei tlat lo, amah Jimmy-a tih chauh loh kha chu! Ani khan a hriatchian hmel hle si a, a nih chuan a thusawi zawng zawng te kha a dik vek tihna emni dawn? Lo dik vek ta se ani hian Amnesia chu alo nei taktak tihna maw ni anga!? Khatia damdawi bur a han hmuh chiah khan a damdawi ei ṭhin niawm tak te chu a mitthla ah an rawn lang zut zut reng anih kha, mahse mak tih deuh erawh ala nei tho. Jimmy-a sawi danah kum hnih lai an inṭhen tawh a, an inneih lai la la in he natna hi a nei ṭan bawk a chuti anih chuan engvang in nge khang kum liam ta chhung leh tunah pawh hian eng damdawi mah a ei chhunzawm tawh miah siloh. A ngaihtuah nasat poh leh a bo ril tual tual ani mai si a, a lu lah chu a rawn na leh dawn ṭan tlat bawk. Chu chu hre ran in engmah ngaihtuah vak vak a duh tawh rihlo, a hun liam ta te chu eng pawh lo nise Pathian in rem atih hun ah ala hriatchhuah tir leh em em ang chu tiin a inhnem ta ringawt.

Jimmy-a hnen aṭang bawk khan call a dawng leh ta nawlh mai.

“Hmangaih, Inah khan lo awm rawh aw, hmun pakhat hruai duh na che ka nei a” a rawn tih chuan a bang bo hman viau a, mahse Jimmy- a bawk chuan zaidam tak hian ” hlauthawng suh, kan nunhlui i hriatchhuah theihna tur hmunah alawm hruai che ka tum” a han tih leh chuan a thaw deuh huai mai.

“Kalo in ngaihtuah ang” diktak chuan he Jimmy-a lakah pawh hian a hma ang a khauh reng kha a ṭha ati tawh chiahlo. A sawi ang taktak a natna vang a hun kal tawh theihnghilh alo nih lek phei chuan a pasal hlui a theihnghilh tihna ani dawn a, a zialo ve reng mai. Chuvang chuan engpawhnise vawikhat na na na chu a thu chu han zawm ve phawt ṭha ati ta ani.

Jimmy-a hruaina hmun chu vawikhatmah ala kal ngai lohna hmun ani tlat mai. Mahse chu chu ama hriat dan mai pawh ani ve thei tho. În te fel ren rawn, a chhung felfai thlap mai ah hian an lut dun ta a. Hmangaihi chuan mak ati ani tih hriat tak hian a hawi deuh zak zak reng a, a awmdan aṭang chuan nuamlo a ti in a ṭi hle bawk. Jimmy chuan a hmel chu ngun tak a en chung hian 

“Nangnen nupa kan nih lai chuan he hmunah hian kan khawsa ṭhin a. I hre tawh miahlo emni? Chhete tal pawh in i hre tawhlo maw!?” Tiin a hmel ah chuan beiseina te, lungngaihna te a in pawlh nawk mai. Hmangaihsangi chuan chu zawhna chu hrethiam lo tih hriat tak hian a lu alo bu ngut ringawt.

Chutah muang ban charh hian

“Chu chu ni ta se, engtinnge kan awm hran theih zawk? Ka sawi awmzia chu-” atih lai mek in Jimmy chuan aw zangkhai leh aw ki sâng, vin ni hauh silo hian alo pawt chat thuai a.

“I tlanbo alawm! Hmangaih min tlanbosan kha i theihnghilh vek tawh taktak ani maw!? Hetah hian lo kal teh” tiin choka niawm tak ah chuan a kai phei ta dawr dawr mai. Chair ah chuan ṭhut tir in an bul mai a bel bawm chhuar chu a hawng nghal rawk rawk bawk. Reivak lo hnuah bel bawm chhung aṭang chuan nausen mawza niawm tak hi a rawn khai chhuak ta mai a, Hmangaihsangi hmai zawn ah chuan khai then nal nal chung hian

” anih chuan he thil hi ila hria em?” Ati zui zat. 

Hmangaihsangi chuan uluk leh chik tak hian chu nausen mawza chu a han en ta vang vang mai a, a maimitchhing zui leh veng veng.

Chutah le, hriatchhuah thut nei niawm tak hian a rawn meng thut. Ring leh pawr fahran hian

“Ka naute! Jimmy, ka naute kha!!” Tiin a khur zui nghal hlawk hlawk bawk. Chutah rang takin Jimmy chuan alo kuah vat a. A hnem zui nghal mawlh mawlh.

“Ka lawm e ka lawm e, tunah chuan i hrechhuak leh ta ani tiraw ka naute?”  Tiin a chal ah chuan a han fawh sak zauh a. Hmangaihsangi pawh chuan nghet zet hian alo kuah let ve thuai a, a mittui a tla zawih zawih thei. Aw khur dar dar chung hian

“Jimmy, nangmah ini tiraw? Aw ini, nangmah ngei ini e. Ka va lawm tak em!” Ati ta mawlh mawlh mai a. Jimmy-a hmel ah chuan lawmna chhiar sen loh alo lang nghal a, a hlim lutuk chu a ha sen a lang ta deuh reng mai ani.

“Tunah chuan bul kan ṭan ṭha leh anga, kumkhua in nangnen hian kan awmdun tawh ang. Min kalbosan tawh miah suh aw” tiin a nupui hlui, a hriatna lo kir leh ta chu a fawp leh vawng vawng a. A hlim ani. Hmangaihsangi pawh chuan lo buk zauh pah hian alo kuah let ve chial mai.

Jimmy hnen aṭang chuan kalbo tawh lo in a apartment a a bungraw neih ve ang ang te pawh chu an la chhuak nghal a, nun bul ṭan ṭhat pui leh tur chuan Jimmy-a chu a bel tawh dawn ani. A thawhpui te pahnih lah chuan zawhna an lo zawt ve reng a, a chhanna a pek hma chu an kalsawn san duh hauhlo lehnghal.

“I apartment ah kan lo kal a, i ṭhenawm ten i chhuah tawh thu an sawi a, phone lah i chhang thei bawk silo. Tinge ngawi reng a i chhuah daih a, khawi hmun ah nge i in sawn?” Anti sek mai chu ning in a tawp a tawp ah chuan

“Pasal ka nei alawm” tiin a chhang ta nge nge. A ṭhiante pahnih awihlo lutuk chu an in en ran ran a, an nui dun ta nghek mai. Chutah Zothansanga zawk chuan mittui tla phung a la nui awr awr chung hian  “awi dawhehnu, chutin ngawi reng in pasal a neih ngawt theih emni? Hriatpui tu pawh awmlo lehnghhal in” ala nui zui nghek. Hmangaihsangi lah chuan a hma aia thutak zawk hian  “ka pasal hlui ania, midang hriatpuina kan lo mamawh vak hleinem” ala ti lehzel. Chutah chuan anni pahnih nuihza lutuk pawh chu an hmel awmdan rawn inthlak nghal in thutak zawk hian an ṭhiannu an melh ta reng ringawt a. Hriatchian tum a an zawh leh tak sek ah chuan thudik chanve chu thup in a chanve dang chu a hrilh ve ta nge nge ani. A sawi zawh meuh chuan an mak ti lutuk chu an chek tlak tlak ringawt. An ṭhiannu hi nula hnahkhat emaw an lo ti char char kha ani a, an thu hriat chuan ati hrilhhai em a, lawmpui na thu sawi mai nachang pawh an hrelo hial nghe nghe.

Hun te a ral ve zel a, Jimmy-a te nupa pawh nun bul ṭan ṭha leh tih tak ah an inhmangaih thar in an in ngaina thar sawt emaw tihtur hi ani a, an awmdun tawh phawt chuan an inkuah chawt hi ani mai e. Jimmy lah chuan a nupui chu a hrechiang si a, a ngainat zawng leh a thil duhloh leh nuam tihloh te thleng te  chuan a hre hnehsawh em em a, ka sawi thiam dan ber chuan a nupui chu lal fanu ang mai hian a sawngbawl a, a duat hlum lo chauh hi ani mai e. Hmeichhia zawng zawng in kan kawppui te lak aṭanga kan dawn chak ṭheuh ang chu Hmangaihsangi hian a nei mek a, a tan chuan han kalsan leh chi ziazang a nilo. Tin, rinhlelh rual loh in a pasal hlui ani tawh ngei ani tih chu a hrefiah mek zel bawk. A chhan chu Jimmy hian a nupui hi a hrechiang a, a nunhlui a hriat sak a a duhzawng leh duhloh zawng te thleng pawhin a hre vek kan tih tawh kha.

“Jimmy, ka sawi hreh viau na in sawi erawh a ṭul ka ti bawk si a, englo ania” atih niah niah lai chuan Jimmy chuan bangbo tih hriat zet hian alo en thuai a.

“Eng thil nge ni, sawi hreh tur thil engmah a awm lo ania duhtak”

Hmangaihsangi chu hnuailam melh chung hian a kut a khalh pah niap niap mai a. Eng thil pawh chu nise a sawi hreh tih chu a hriat reng mai.

“Tun hma thil thleng chu ka hre hauhlo na in, hetia kan awmdun leh hnu hian nang in emaw keimah zawk pawh in kan chhungte chanchin hi kan sawi ri ngai miahlo a, ka ngaihdan chuan chhungte chu kan nei ve ngei anga, engmah han hrilh hriat ve loh tawp chu te kalo ti maimai a” atih lai chuan Jimmy-a chu alo nui deuh suk a. A nupui thil sawi chu a tum loh deuh thil ani tih a hriat mai.

“Ngaihtuah hah suh an ṭha, engkim an hre vek tawh e” alo ti liam puat. 

Mahse Hmangaihsangi ngaih erawh ala ṭha famkim theilo thung. A duh khawp chhanna ala hmu lo ani tih hriat zet hian a nui hul hak mai a.

“Khawi hmunah nge an awm tih pawh hi ka hrelo a” zawite a a tih leh hnu in a pasal bawk chuan 

” Ka hrethiam che. Kan pahnih a kan pian leh seilenna hmun Champhai ah an khawsa mek aw, i ngaih a ṭha deuh tawh em?” A rawn tih chhunzawm leh zat hnu chuan Hmangaihsangi pawh chu tlem in a engthawl ve ta deuh a. Biak a duh thu erawh a sawi buai peih ta lo ani. A hriatna chu alo hloh taktak ani tih a ring ve ta hmiah a, a chhan pawh kan hre mai awm e. Mi pangngai, rilru fim pu reng in mahni chhungte khawsakna hmun hriat loh ngawt thu a awm dawn emni? Khang kum liam ta chhung zawng pawh khan a be ngai miahlo tihna emni dawn? Mak angreng tak ani.

Nikhat chu hna a chawlh avangin nileng in inchhung sekrek khawih chuan a phar buai ve hlemai a, bel bawm chhuar vel tifai a a hai rawk rawk lai chuan a hma pawh a Jimmy-a’n alo hmuh tir tawh nausen mawza bawk kha a hmu fuh leh ta. Zawimuang a khai chhuak chung hian chair ah chuan a ṭhu ta riai riai mai a, chutiang nausen mawza a han nei ringawt mai chu a ngaihna a hrelo thar kher mai. A chhan chu a pasal nen hian fa an la neilo hrim hrim a, nau takngial pawh a pai chhin awm hi a la hrelo, mahse a thil hriatloh hi a tam zawk ala ni rih tlat thung si. Chutia mawza keng chung a alo ṭhut ngawih reng lai chuan a pasal chu a rawn lang ve hlawl bawk, a nupui in lungngaih hmel tak a nausen mawza alo en vang vang mai chu hrethiam lo tak a dinchilh chung hian a samah chuan alo chul sak nghal heuh heuh.Hmangaihsangi chuan harhchhuak thut nimai awm hian Jimmy chu a melh chho nghal hâw mai.

Zawi sap hian  “Jimmy, nangnen hian fa kan nei tawh emni?”  Ati chhuak phawng mai a. Jimmy-a chu a han ngawi deuh vang vang phawt a. Thawk a lak deuh halh halh hnuah chuan tihian a sawi ta a.

“Duhtak, khang kan inneih chhung zawng khan naute hi kan awt em em a, mahse i hrisel loh chhoh tak em avang khan pai erawh kan awlsam hauhlo. Nikhat erawh chu i zun test result kha a positive hlauh mai a, khami ṭum a kan lawm zia kha aw..mahse” atih leh mek lai chuan Hmangaihsangi insum theilo chuan 

“Eng nge mahse? Khawnge naute chu?” Alo ti ta chul mai. Jimmy-a chuan a mittui hru deuh zeuh pah  hian

“I chhiat ta si a!”  Ati chuai ta raih mai a. Hmangaihsangi lo insangmar ṭeuh tawh pawh chu a ṭhu zawi hnawk. A mittui chu dir nghal zung zung in engmah sawi thei ani tawhlo. A pasal kut chu nghet zet hian a hmer vawng vawng a, chutiang bawk in Jimmy-a pawh in a nupui chu nghet takin alo kuah ve bawk. Thil hlui lutuk tawh mahnise Hmangaihsangi tan chuan thu thar ang mai ani tlat a, a tuar na lo theilo ani.

“Hmangaihsang, zawngi, min chhang let ve ngam ani maw a? Kei i pasal Jimmy-a , nangmah ngaihtuah em em tu che hi tikhan min ti let ve anga maw!? I chaklo khawp ang” tiin Jimmy-a chuan a sam ah ṭham in a hmai ah chuan a beng zui sawk sawk mai a. Hmangaihsangi thung chuan aw rawl pawh a chhuah ve eihlo, a pasal khawih ang ang chuan a awm ve tawp mai ani. A duhtawk a a ben zawk hnuah chhuat char ah chuan a theh thal tawp a, ṭe ruai ruai chung in chair leh dawhkan te chu a theh thal rem rum bawk. Chutia a inhrosak zawh hnuah chuan chhuatlai a a nupui mu kawm reng lam chu a pan leh ta chhut chhut mai a. Engkhaw sawi set set lo in a pum ah chuan a chhir sak leh ta zawt mai anih chu. Hmangaihsangi chu a ṭe chhuak ṭhat a, a kâ aṭang chuan thisen a rawn baw chhuak hawk bawk. Ankhum bawrh bawrh pah a a pasal in a sam a a  rawn ṭham thawh leh dawn lai tak chuan a harhchhuak ta phut mai. A harh chian meuh chuan alo ṭhu chhuak reng tawh a, thlan hian alo bual huh vek bawk.

INHREMNA CHU!(3)

                       By : Vanlalpeki Fanai

La thaw hlawp hlawp chung in a bul mai a tui tak a muhil mek a pasal chu a han en a, mumang mai anih avangin a pasal chu kaitho duh lo in ani pawh chu a mu zui veleh mai bawk. Amaherawh chu a muhil zui mai thei tawh tlat lo. A rilru ah chuan thil tamtak rawn lut in hrehawm ati takzet. Mahse engmah chu siamṭhat theih ani tawhlo thung si. Chumi zan chuan muhil tawhlo in a meng tlang ta ṭhak a.

Zan lam a a mut tlem deuh avang chuan nileng in a lu a na lehnghal a. Dawr ah pawh chuan engmah sawi lem lo hian alo ṭhu ngawi leh ngat ngat mai ṭhin. A ṭhiante pahnih biakna pawh chu a chhang ṭha mumal leh peih tawh meuhlo ani e. A ṭhiante pahnih hi mi â anni lo a, tih hlim dan ngawt chu an zawng reng a, an awm tir maimai duh hauhlo. Hmingte-i chuan aw zangkhai veh vawh tak mai hian  “Lalṭhian, zanin chu kan bâng hma dawn bawk a, zanriah ei chhuak ila kan lo tia Lalṭhiana nen hian”  Zothansanga a sawina ani.

Zothansanga pawh chuan lo tuihnih veleh vat in  “Nia Lalṭhian, ti teh intiharh rawh, hetiang hian awm duhloh tur, kan pathum hian hnathawhna ah bak inhmuhna hun pawh kan neih theih tawhloh hi, zanin tlai chauh chu ei chhuak ang u aw”  alo ti ve zung zung bawk.

“Duh leh in pa chu kan phone anga a hrethiam ve tho ang chu” an han tih chuan ani pawh in hman aṭang tawh a alo chak ruk ve tawh tho anih ve bawk avangin a hnial duh ta biklo a. Jimmy-a chu call in a hrilh lawk nghal bawk a, ani pawh hna aṭanga a haw tlai dawn tho avangin alo pawi ti em em hran lo hlauh.

Tlai dar 4 velah an shift chu zo in dawr chu an chhuahsan ta a, a ṭhiante pahnih chuan restaurant book lawk an lo neih tawh tho avangin chu lam pan chuan an kal zui nghal a. An phur surh surh khawp mai. Hmangaihsangi pawh a lu na te a reh fel ve tawh avangin a mood chu a fuh veleh tawh hle a, a nui leh har har ṭhin. An dinner ei na tur hmun chu thleng in order te an han siam fel leh te te a, an order an nghah chhung chuan Zothansanga pek chuan phone phawrh in  “hawh u, selfie ila ,restaurant changkang a chawlh te hi a khât ve sia”  a rawn ti hluai a, hmeichhe pahnih te chu an lo nui zui hak. Hmingte-i thung chuan  “eitur lo thlen hunah eitur show off nan ti zawk ila”  atih pawh chuan Zothansanga chu a ṭang laklawh tawh.

“Ah, eitur lo thlen hunah pawh kan ti tho dawn nia, hawh u in post ve ula” tiin a phone chu a hmet zui nghal mawlh mawlh mai.

Zothansanga duh ang tak a an selfie zawh hnu chuan Hmingtei chuan  “Lalṭhian, tunlai hi in nupa in hlim reng reng em? I hmel hi damlo ang mai hian i dâng bel reng bawk si, nau te hi ilo pai reng zawk nge?” A rawn ti chhuak ta khauh mai a. Zothansanga mit chu alo che kual nghal ralh a, Hmangaihsangi pawh in a rinlawk loh zawhna a dawn thut avang chuan a hamhaih ve tho mai.

A ṭhiannu hmel pawh en lem hlei lo chuan

“Aw hlim e, keimah pawh ka ṭha alawm. Ti teh thut nge chung te min zawh tak mai a?” Ati let ve hû. Hmingtei chu alo nui suk duh chauh.

“Hei leh chen hi hna vang in kan lo in hre ve tawh a, i lan dan aṭang ringawt pawh hian i chhungril hlim leh hlim loh tur te, buaina i tawk em tihte hi chu hre ve tawh tur kan ni alawm. Ni lom ni?” Tiin Zothansanga chu ava nghawk zeuh bawk a, Zothansanga erawh alo phu uih thung. Hmangaihsangi chu za lo tih hriat zet hian a han nui leh ringawt ṭhin a. A awm chu a nuam chiah tawhlo. A ṭhiante hian a thuruk zahpuiawm tak hi an hriat mai a hlau hle  si a, engtikah emaw chuan a in thup theihloh hun pawh ala thleng ngei dawn tih chu a hria, chung hun a an dem dan tur pawh chu a hmu lawk vek bawk. Mahse a theih chin chin chu thup ala duh fan tho. Za fahran lo a a ṭhiante chu nuih leh suk pah hian  “Jimmy-a nen chuan engmah buaina kan neilo, kan hlim. Ka mu tlem ṭhin a chuvang maimai aniang” tiin a riat nawi ta vel maimai ai. A ṭhian ten an rawn chhan leh hma chuan an eitur chah a rawn thleng ta hlauh mai. An thusawi lai chu chhunzawm tawh lo in chaw chu an ei nghal bawrh bawrh a, Hmangaihsangi chu a thaw huai mai.

Restaurant an chhuahsan meuh chuan khua chu a thim chhalh tawh a, a ṭhiante chu mangṭha in In lam pan chuan a haw zui ve ta ani.

Inchhung a han luh chuan Jimmy-a chu ṭhutthleng sei ah hian nghet lo fahran in alo ṭhu nuaih mai a. Hmangaihsangi chuan a ngaihna a hrelo kher.

“Iva chau awm ve a”  a han tih tak ah chuan Jimmy-a pawh a nupui thawm hria in a rawn tho chhuak  nghal ṭuih ṭuih. A mitmeng aṭang chuan a harhfim lo ani tih a hriat nghal mai.

“E……duhtak, ilo va haw har ve a?”

“Nia, order hi an rawn dah har ṭhin deuh alawm le, inthlak la” tiin amah chu room ah a lut zui nghal. A luh hnu reivak lo ah a pasal chu rawn lut zui ve nghal in, in control hleithei lo tih hriat zet hian khumah chuan a ṭhu zui hnawk mai a. A pasal awmdan chu mak ati ve ṭan deuh. Mahse ala ringhlel ngam chuang lo fo.

“I ril ava ṭam tawh awm ve aw?” Alo ti sap. A pasal thung chu rui tih hriat zet hian a thle bûk bûk mai a, a nupui pawh a melh hleithei lo, a ṭhu reng reng pawh chu chhuat ah chuan a hlawm thla tawp lo a a mak zawk ngawt ani. Chutah sehchilh nawk chung hian

“Duhtak, ka kawr, ka kawr hi…min, minn phelh sak loh chuan..” tiin thei leh theilo hian a nupui chu a ban tak ṭawk ṭawk a.

“I rui ani maw!? Zu i in ngailo emaw ka tia, eng nge awmzia?”  Lungawi lo tak a melh ran chung chuan a dinchilh ngar mai a. Chutah irh deuh uk uk pah hian Jimmy chuan 

“Ka tih..palh.Sorry! Ka kawr hi..” ati leh nuah nuah. Lungawi fahran lo a a kawr phelh sak nawk nawk pah hian   “i muhil dawn nge chaw chu i ei phawt dawn?” Ati ram leh hmak a.

“Chaw..chaw te chu lo ei ve ila,,tiraw?” Ala irh zui leh uk uk a. Hmangaihsangu chu a ner sawk a, choka lam a pan san nghal. Chaw ei a siam zawh tawh thu ava hrilh meuh chuan a pasal chu alo mu hna4 burh burh tawh mai a. Ten hmel zet hian a en tlawk tlawk ringawt.

A mu tui lai chu a dul bawr vel za leh mer mer ṭhin avang chuan a harh deuh thut mai a. A han en chian nak chuan a pasal chuan alo bawh deuh ûr tawh hi alo ni a. A hlauthawng ta kher mai. Zu rim lah kha ala nam hum hum lehnghal bawk nen. Meng chiang mang lo hian amah chu fawh tum in a chung lam aṭang chuan a rawn thle tawn sek lehnghal a, a ten lutuk chu a uak lo chauh tawh. A tha neih ang ang chuan a pasal chu nam sawn alo tum ve bawk. Jimmy-a lah chuan meng mang hlei lo hian

“Duhtak, ka nupui inih kha..mawh…zanin chu min hrethiam rawh” ala ti sur sur zui a. A ten lutuk tlat. Hnuai lam aṭang hian harsa ti zet chuan  “khaw’maw…chhuk teh, i rim nen ka theilo” alo ti ve ṭawk ṭawk bawk.

“Mawh zanin chu min hrethiam rawh” ala thaw huam huam leh ta nghal a. A châkna chu a sosang hle ani ngei ang. Chutah a ning tawpkhawk tawh lutuk chuan a mal ah chuan a han tlawh sak pawp mai a. A na bawk aniang chu Jimmy -a pawh a mutna ah chuan a let thla tawp mai a, a rak ṭhat bawk. Hmangaihsangi chu a ṭhu chhuak nghal a. Aw khur hlak hlak chung hian  ” zurui chung in vawikhatmah min mutpui hi tum tawh ngai suh. I mu ṭha hle hle dawn nge, ṭhutthleng ah i riak zawk dawn?” Atih deuh hmak tak ah chuan  “umm min hrethiam rawh. Ka ti tawhlo ang, muhil rawh” a rawn ti thâm ta ṭuak mai a. Rum zet a melh pah hian a mu ṭha veleh ta mai bawk.  Chumi zan pawh chuan a tha khur ala reh hleihtheih loh avangin a muhil leh lawk theilo a, zing dar 4 rik dawn ah erawh chuan alo muhil ve ta hram ani. A tukah pawh thawh a hai chhap mai a, an nupa chuan hna pawh an tlai phah vek a, a pasal zu ruih man chu an tuar ani ber e. A hlawk lo hle ani.

A nun chu a hlim tehchiam tawhloh sa nen, chutiang a a pasal ber in zu an rawn ruih a a  duhloh chung mutpui ala tum lehnghal chu hrehawm a tiin a thiltih engkim ah chuan a tuilo hle a, nuam ati lo in a ṭhiante lak aṭang pawh chuan a inti hrang tulh tulh a, amah chu hrang ta riau te hian a inhriat phah thul. Hrehawm ati ngawih ngawih ani ber e. A ṭhiante bulah lah an nupa chuan buaina an neihloh thu leh an hlim zia thu te kha alo sawi ve luam tawh si a, an nun dan chu rawn hmuh pui ve ta se eng tiang takin ngai ang maw le? Zahthlak ati ru ngawih ngawih ani.

Kha zan aṭang khan a pasal chu a hna bang hi a rawn rui haw ta fo mai a. Kha zan ang em em kha chuan rui lo mahse harhfim lo bul a khawsak hrim hrim chu hahthlak ati em ani. A zu rim ringawt pawh chu a duh ve lo tan chuan tawrh har tur tak hi ani tawh reng reng a.

“Jimmy, engvang in nge zu hi i rawn ruih haw tak fo mai le? Tihsual ka nei zawk emni?” Tiin a bul lawk a ṭhu bu lûk lûk a pasal chu a han zawt chawt mai a. Chutah Jimmy -a chu a rawn meng duar duar, a rum leh nghut ringawt. A nupui chu meng leh meng lo hian a han melh siai ang ṭawk ṭawk phawt a. A khi suk.

“Nang hian tihsual i neilo, khawvel a nupui fel…ber inih hi.Nupui fel ber mai. Ka lal fanu, ka hmangaih, ka duh nu…inih hi” tiin a nupui chu kuah a han tum ringawt a. Mahse a ṭhutna chair chu lo nghet lo in chhuat ah chuan an nupa chuan an in bawh tlu ta rem rum mai a. Hmangaihsangi chu a ṭe ṭhat.

“Tho teh, va mu rawh. I hahthlak emai ah” tiin a nam sawn lawp a. Amah chu tho zui nghal in a pasal chhuat a mu zangthal huang mai chu pawh thawh tum in a bei leh ṭauh ṭauh bawk. Rum ṭuah ṭuah pah hian ani pawh chu a rawn tho ve mai a, room lam pan chuan an in chhawm lut ta chhut chhut mai ani.

“Lalṭhian, tunlai chu in pa hian zu a rui ṭhin ani maw? Kan hna bang hian haw kawng ah kan hmu ṭhin a, kawngpui hi a sáwi nasa thei khawp lehnghal a, inchhungah buaina a siam ṭhin em?” Ti a Hmingte-i’n a rawn zawh thut avang chuan a ni chu alo phawk nghal hrû a, a hmai te chu a sen nghal awp awp thei. A chanchin ṭha lo lam hi chu a ṭhiante hian hre tam lo hram se a duh tehlul nen. Zep vek theih ni tawh heklo le, thup mawi hram hram a tum lai tak hian

“Nia, tunlai chu a hna ah a buai ve si a, a chau thei em ani. Buaina siam chi leh a sual zawng a a khawsak lem loh avang hian kalo pawi ti tehchiam hran lo a” ati ve ta tawp. A ruk tak chuan a thin a rim kher asin. Zahthlak ati takzet ani.

“Jimmy Laldingchhuak! Ka ṭhiante lak a min tih zah zia hi i hria em? Nang hian i zu in hi i sim lo anih chuan e, kei hi ka chhuak ang. Kumkhua atan chu chu hre rawh”

Jimmy-a chu alo ruih deuh avang chuan alo sa ve zak mai a. Ha chang ṭhial bap bap pah hian  “ka hmingpum a min ko tur hian tunge maw inih le? Zawngchhe nu!” Tih pah in a bul mai a chair chu a han theh thal ṭhuai mai a. Hmangaihsangi thinphu nasa lutuk chu a hnungtawlh dawrh mai. A meng bial kawk kawk bawk.

Jimmy-a bawk chu rawn ṭawng chhuak leh in 

“Kei i pasal hi mipa ka nih hi mipa! Chu chu hre rawh. Nang, hmei a kar a chhia lehnghal in i cho tur hi ka ni lul lo e, zah ka ngai anga engtinmah ka ti lo ang che” tiin a chil te chu a han chhak deuh pharh pharh bawk a. Room ah lut in a muhil zui daih bawk. Hmangaihsangi thinrim lutuk chu a khur ngawt ngawt thei nia. Engpawhnise zanin chu a bulah mu lo in ṭhutthleng ah a riak dawn ani. Tin, a pasal khawsak dan hi a ten piah lamah a ṭih ru tawh tlat. Engtin tak awm zel ang maw?

A tuk ah pawh chuan a dan ngai te te in an khawsak dun leh nawk nawk a. Hna ban hnu a mahni In lam pan te chu a hreh ru ngawih ngawih tawh mai a. Tlanbo daih mai te chu a chak rum rum tawh hial nia. Inchhung a han lut chu a pasal leh a ṭhian mipa pahnih te chuan ṭhukhawm pah hian zu chu an lo thli leh kerh kerh tawh mai a! An chetna hnuhma te lah chu chingfel tu nih chakawm loh khawp in alo hnawk nuaih mai bawk si. Ani hnathawk chau lungawi tawh lo sa nen chuan a insum zo ta thlawt lo ani e, a duhloh dan in chet a thawh ta tlat. A pasal leh a ṭhiante zu in lai chu a bottle chawp chuan chhuat laiah a paih keh sak ta chuaih mai a le! Amah chu an rawn melh nghal ṭhap bawk. Thinrim insehruh leh sehchilh nawk pah hian

“Min haw san phawt rawh u, he inchhung hi zu in na hmun tur ani  lo tlat mai” tiin kawngka lam chu a kawk va va bawk a. Chuveleh rang zet hian Jimmy-a ṭhiante pahnih pawh chu an tho zui a, ngaihdam dil sawk sawk pah in an chhuak zui ve ta ani. An chhuak chiah tih in Jimmy-a chu ngeiawm tak a nui ṭhâw chung hian a ṭhutna aṭang a rawn tho chhuak ve nghal a. A nupui chu kal hual pah in kut a ben khum sak sak bawk. Hmangaihsangi thung chuan a ngaihna a hrelo hle.

“Duhtawk rawh!” Ati tuarh a.

A nihna takah chuan a â lo chauh tawh ani. Jimmy-a thung chuan a hma aia uar leh ring zawk hian a kut chu ala ben khum sauh sauh mai.

“Nupui huaisen tak kalo nei anih hi. Mahni pasalte pawh ṭhiante hmaa ti zak ngam ngat nupui huaisen, tunah chuan lal fanu aṭangin lalnu dinhmun ah i ding ta emaw i inti anih ber hi!”

“Ngawi hmak rawh!”

“Engtin maw? Kei i pasal hi ngawi turin min duh a maw? Nang zawk hi kan ngawih tir teh ang che” tiin a tukkhum samah chuan a ṭham sak ta thut mai. Hmangaihsangi chu alo in ring hman silo a a râk ṭhawt mai.

“Mmin thlah rawh Jimmy!”

Room ah hnuk lut in khumah chuan a theh thal nghal tawp. Hmangaihsangi hlauthawng lutuk chu a thaw hlawp hlawp tawh a. A pasal chuan engtia tih nge a tum tih a che vel a lo thlir reng lai chuan a kamij chu a phelh ta sawk sawk a, amah lah chu thinrim tih hriat tak hian a ṭhen sawk sawk reng bawk si. A chet dan chu rapawm tak ani. A kekawr chu phelh leh in saruak deuhthaw chuan a awm ta mai a. A nupui chu thîp zet a rawn melh pah hian khumah chuan a lawn zui nghal. Hmangaihsangi erawh chu alo tawlh hnung rawk rawk thung a.

“Min khawih hlek suh ang che, ka au vak ani mai”

“I au nge au lo chu kan hria ang” tih pah in a nupui chu a lamah a pawt hnai lawp ta mai a. Hmangaihsangi chu a thidang lo chauh tawh. A theihtawp in a pasal thil tih tum chu lo dan ve a tum a a tal nasa hle bawk. Chutah Jimmy-a hah tawh leh ning ta deuh chuan ram hmak a  “Nang hmeichhia!” Tih leh hnek chu a rual ta mai a. Hmangaihsangi khaw hmuh chu a fiahlo nghal vek a, engmah a hre zui tawhlo. Tichuan Jimmy-a chu a nupui nikhaw hre lo a mu reng mai chungah chuan duhthawh tak hian  ramsa ang maiin chet a thawh zui ta ani.

A harh leh meuh chuan a hnathawh kawr nen a ngai ngai in khumah chuan alo la mu reng niin. A han thochhuak mai dawn a a taksa chu a na lutuk tlat. A taksa khawilai maii pawh chu a na lo lai hi a awm lo ani tawp mai. Na tih vang a ṭhen châk châk chung chuan a tho lui ta hram a. Bathroom ah lut in darthlalang a a hmel a han hmu zet chu a ṭe chhuak lo chauh. A mit hnuailam chu alo duk kual ruih mai a, a nghawng ah pawh hmun engemaw zat ah chuan duk alo awm kulh kulh bawk a, a in chiang zel a a taksa ah chuan duk lo lai hi a awm zeuh zeuh chauh ani ringawt. Rapthlak ti zet chuan a in en ta ngawt ngawt ringawt mai ani.

Bathroom kawngkhar rawn chum bur bur pah hian  “Intifai thuai thuai la, doctor kan hmuh angai ani”  a rawn tih tak ah chuan a mittui rawn luang thla ngiai ngiai chu a hru fai pâwk a, a hmai te chu phih fai zuiin a nat em avang erawh chuan a ṭhen leh sawk ṭhin thung. Chaw te an eikham fel hnu chuan a han insiam ve liam luam a, hetiang chung a chhuah chu a chak tehchiam lo khawp mai. Mahse tih theih neiin a inhre bawk silo. Lukhum parh khum chhuak in sunglass a vuah a, muffler a awrh tlat bawk. Heti chuan  mi nazawng in a hmel an hmu theilo anga a ziaawm deuh ang. A pasal chuan hospital ah  hruai ta lo in private clinic pakhat ah hian a hruai ta thung a, doctor pawh lo awm in  in entir tur midang tlemte an nghah leh det hnu chuan an hun a thleng ve ta a, an nupa in doctor hmu tur chuan an in zui lut ta ani.

Doctor in an hmel alo hmuh chuan nui sâng hian ṭhu turin alo ti thuai a.

“Eng harsatna nge in neih ve le?” Alo ti zung zung bawk. Chutah Jimmy-a chuan a nupui melh zauh pah hian zet in  “englo ania doctor, ka nupui hian diklohna engemaw tak a neih vang in kan rawn pan tawp che, tukin zingkar a rawn be tu che kha ka ni e” tiin a thusawi chu a han tawp lailawk a. Doctor chuan an nupa hmel chu chik zet mai hian alo melh tawn zak zak bawk. A aw han then kharh kharh pah hian

“Chuti chu damdawi ei lai te a nei em aw? A hrim hrim in engtia rei nge alo nat tawh a, hetiang natna hi alo neih tawh le, in hriat dan pawhnise min hrilh theih chuan” alo ti dam thluam a. Chuveleh Jimmy-a chu a nupui bul hnai a tawlh surh surh chungin a beng bulah chuan zawite hian  “Duhtak, i tan hriat a nuam dawn lo a, pawn ah min lo va nghak mai ta che” a han ti sur sur a. Thuawih takin Hmangaihsangi pawh chu a tho ve mai a, a sawi ang chuan pawn ah chhuak in alo va ṭhu ngawi ta reng ringawt. 

Darkar khat dawn lai a nghah hnu in Jimmy-a chu nui vur vur chung hian a rawn chhuak ve ta nge nge. Hmangaihsangi chuan engmah pawh lo zawt lem lo hian a zui veleh mai bawk a.

“Kha hei hi, tun aṭang chuan ei char char tawh ang che. Nghei thiang ani lo”  tih pah in damdawi bur var chu dawhkanah chuan a theh thla chhak mai. Hmangaihsangi’n damdawi bur a hmuh rual chuan a phu dawrh thei. A meng zau nghal kawk kawk bawk a. A customer pakhat in an dawr chhung ngei mai a a rawn thlauh tawh leh, a nunhlui niawm tak a hriatchhuah phah a nikhaw hrelo hial a alo awm phah tawhna kha ani tlat. Kut khur dar dar chung in damdawi bur chu a han ban de de a, a mak ani, a mak takzet. Kha a customer in thlauh tak nen khan alo in ang chiah chiah nia! Danglamna reng reng a awm hian a hrelo zawk hial. Chutah a luak chu rawn chhuak thut in rang lutuk hian a hmui a  hup nghal vat, a pum dawm in bathroom ah a tlan lut nghal a. Chuveleh Jimmy pawh chuan damdawi bur chu la vat in a nupui chu a um zui ve nghal a. Bathroom kawngka alo kalh daih avangin  a pawn aṭang chuan a han au ta lung lung mai a.

“Duhtak, i damdawi i ei angai anih kha. I ṭha deuh em Hmangaih” tiin alo buai ve em em a.

Hmangaihi luak zo chiah chu chau tih hriat tak mai in Europian commode chungah chuan a ṭhu deuh hnawk. A khat tawk hian a thaw leh halh ṭhin bawk a. A pasal kohna leh biakna te pawh chu a chhang peih lo hulhual ani.

Reitawk fang pawn a alo din hnuah a nupui chu hmel pawr phang mai hian a rawn chhuak ve ta hlauh. A nupui hmel a hmuh rual rual in alo pawt sawn nghal dawrh mai a.

“Kha ei rawh. Engvang a ka hun hi ti hek em em nge inih a!?” Tih pah in a kalsan nghal. A pasal khawsak dan zet chu mak ti tak hian a en zui vawng vawng mai a. Kut khur der der hian damdawi chu a bun chhuak a, a hmawm zui nghal hmak.

Reivaklo ah Jimmy-a chu rawn let leh in a nupui chu no lo fahran hian a rawn melh ta run mai a. Hmangaihsangi pawh a lo zam ve lek lek thei.

“I ei em?” Ati chang fak. 

A mit ah pawh lo en chuang lo hian 

“Aw ei e” a sawi zawh rual in a pasal bawk chuan a rawh kuah nghal chial mai anih chu. A ngaihna ati hrelo ṭhin mange.

“Damdawi kha ei ṭha la i dam thuai mai ang, ka hmangaih che ania” ati leh sup. Chhan dan tur pawh a hre nek lo e.

A taksa nâ chu sawi loh a rilru nuam lo reng mai leh a zan mu tlem lutuk te hian an ti chau zo vek tawh a, eng tih mah hi phurna leh châkna a nei tawh mawlh lo. Hmuh theih khawp in a hmel ah chuan danglamna a rawn lang chhuak nasa hle lehnghal a. A vun te chu a dâng bal tawh a, a cher in  a mit khur pawh a tla dûk tawh. A thawhpui a ṭhiante pahnih hian an ngaihtuah thei em em zel a, hna an thawh lai pawh hian ani chu an dah awl leh hram hram ṭhin. Mahse chutiang ringawt chu thil ni thei ni heklo le, zawimuang in a thawk ve zel a, customer te pawh alo welcome ve hram hram zel ani ber e.

Hahdamna thlahlel in Inah han haw se a pasal lah hi tlai tin a rui si a, a mizia lah chu a danglam nasa em em tawh bawk nen, a tlin tawhlo lam chu ani e.

Inchhung a lut chiah a pasal chuan a damdawi bur chuan a rawn vawm nghal thawr mai a, a bangbo chiang kher. A ding chawt a, a pasal chu a melh ngawt ngawt ringawt.

“I hna kal hma in i ei miahlo ani tih min hrilh suh” alo ti nghal tâwng.

“Ei ngai khawp in ka buai hleinem”

“Engtin maw? Damdawi ei ngai khawp a buaina chu eng ang nge anih a!? Nimin a i luak nachhan te kha han sawifiah nghal law law la anih chuan”

Chutah a lu chu a rawn hai leh ta kher. Ava han hun lo ṭhin tak em.

“Keiman ṭul ka tih hunah ka ei ve mai ang” tih pah in bathroom ah a tlan luh san leh daih a. Jimmy-a thinrim chu alo in sehruh ngawt ngawt ringawt. He damdawi hi a tam thei ang ber a ei tir ngei tur ani tawp mai ani.

INHREMNA CHU!(4)

                       By : Vanlalpeki Fanai

Kawngka chu kik karh karh in reilote a nghah leh hnu chuan pa hmel fai veng vawng tak leh tarmit vuah hian kawng chu a rawn hawn sak ta a. Hmangaihsangi hmel a hmuh rual in chu pa chu a nui nghal suk.

“Lo lut rawh”  tiin inchhungah chuan an inzui lut nghal. Hmangaihsangi’n ava hmuh pa hi Psychiatrist niin tun hma daih aṭang tawh khan alo pan fo tawh a, amaherawh chu hetia Jimmy-a nen an inneih leh tak hnu hi chuan ava kal zui ta lo ani.

Doctor Johny chuan  hmel hlim sarh hian a han chibai ṭha leh phawt a.

“Kan inhmu khat ta hlemai a tiraw? I dam ṭha reng reng em eng nge i an zel a?” Alo ti surh surh a. Hmangaihsangi chu a zam ani tih hriat tak mai hian a han nui seih ringawt a. A kut chu a hmer pah nawk nawk bawk. Doctor melh pah zauh chung chuan

“Umm ka dam a ka damlo leh a doctor, englo, han sawi ṭan dan tur mai pawh hi ka hrelo ani” doctor chuan uluk tak a lo en reng pah hian  “anih chuan i harsatna chu han sawi la, a hma ang tho kha ila ni reng em nge,,,thildang zawk?” Alo ti vat. Hmangaihsangi chuan aw khur der der chung hian  “Danglamna chu a tamlo, mahse doctor, tunhnai hian ka taksa ah thil inthlak danglam chu a tam thung  a. Eng lo..Jimmy-a nen khan kan innei leh tawh a!” A han tih chuan doctor chu alo meng zau kawk! Ṭhut ṭhat sauh sauh pah hian

“Chuti alo nimaw? I sawi chiang deuh dawn emni?” Atih leh tak ah chuan Hmangaihsangi pawh chu alo bu nghat nghat.

In lam pan a a haw kawng ah chuan a in ngaihtuah kual nasa khawp mai a. Chutah Doctor thusawi kha hrechhuak thut in damdawi dawr a zawng nghal vut vut a. A hmuh rual rual in a tlan lut nghal thuai.

“Test kit a awm em!?” 

Dawr  nghak tu nu chuan rinloh hmel fe hian alo melh deuh ngar ngar phawt. Mahse ngawi reng chuan a duh chu a pe ta nge nge a. Test kit chu pathum lai leiin a haw zui vang vang ani. Inchhung a lut chiah chu a pasal bawk chuan a lo melh leh run tawh mai a. Mahse a hlau duhlo lui ve tlat thung.

“Khawnge nileng in i len kual vel a? Hna ah pawh kallo in khawilam tlangval nen nge in inhmuh kual sawi rawh” tiin a awmna ah chuan a rawn dawk phei zawk a. Bang ah chuan a namchilh nghal rawp bawk. Chutah hnai set sawt a in melh ran chung hian 

“Ka awm a nuamlo a ka leng khaw thawng mai ani. Iva haw hma awm ve” alo ti sap thung. Chutah a pasal chuan a ha chang ṭhial bap bap pah hian  “Nangmah en thlithlai tur che hian ka rawn haw hma anih hi. I tan a ka thawhrimna zawng zawng te hi nang hian i hre duh miahlo a tiraw?”

Hmangaihsangi chu a hrilhhai angreng. Mahse zam hmel pu duh miahlo hian a pasal chu a han melh chho ve ta kar mai a.

“Ka thawk ve miahlo tihna emni? Nitin a inchhung ka chhuahsan ve ziah nachhan te hi eng nge min hrilh teh. Khawnge i thawhchhuah pawisa chu? Hnathawk te chuan hlawh pawh kan nei ṭhin asin..khawiah maw i thawhchhuah zozai te chu. Vawikhat pawh ka dawng tawh em?” Ati let ve ta khar khar mai a. Chutah le ring tak leh vin zet mai hian Jimmy-a chuan,

“Zaktheilo nu!” Tih leh a nupui hmai a ben chu a rual leh ta mai a. Hmangaihsangi chuan a biang chu a dawm nghal vat.

“Ka la zo fel lo” tih pah hian a nupui chu a han kuai her leh a, a biang lehlam ah chuan beng leh pawp in chil a chhak zui bawk. Chutia a tih zawh hnu chuan ngawi reng in a chhuahsan ta daih lehnghal a. 

A biang chu nâ a ti kher mai, a kamsir aṭang chuan thisen hi a rawn chhuak ser ser bawk a, na reuh tak ani. A rilru na leh thinrim lutuk chu a mittui a tla nghal zaih zaih thei bawk.

Zanriah kil lai pawh chuan an in be ta miahlo a, Jimmy-a phei chuan melh khat pawh in a melh chhin eihlo. Hun rei tak aṭanga chaw ei tawhlo ang mai hian a chaw chu a hap deuh buan buan mai a, a che zia aṭang chuan ala thinrim hle tih a hriat theih awm e. Hmangaihsangi erawh in a chaw chu a ei hleithei meuhlo a, a pasal in a benna avang khan a biang chu a nâ ngut ngut a, a kâ pawh chu a âng hleithei lo ani ber mai. Mahse ei loh tawp ai ah tiin a chaw chu a chawk kual vel maimai ani. Chutihlai chuan an chawhmeh zing a engemaw ber rim chuan a hnar a rawn verh ta zawk mai a, a uak leh dawn ta mai. A hmui chu hup vat in amah pawh chu a ṭhu khawng nghal awt bawk. Chuveleh Jimmy pawh chu a rawn hawi chhuak ve nghal zat a, a nupui chu rûm fahran hian a melh nghal khur khur bawk. Hmangaihsangi pawh chu rang tak a tho chhuak in bathroom ah bawk chuan a tlan lut leh ta thuai a.

A ngaihṭha thei tawhlo chuan Doctor Johny-a thusawi kha hrechhuak zawk in a mu lai chu a tho zui thuai a. A bulah chuan Jimmy-a pawh chu bawkkhup zawng hian alo muhil bawrh bawrh mai a. Thawm dim tak a tho chhuak in bang hrul a a khai a bag chu a hai tak rak rak a, test kit pathum ṭhawt chu la chhuak in bathroom ah bawk chuan thawm dim tak bawk hian a lut leh ta ṭhem ṭhem mai ani. A vawikhat test naah chuan line pahnih na chu fiahlo ruai hian a in rin raih a, a thin a phu nasa lutuk tawh…mahse ala duhtawk mai lo cheu. A vawihnih na ah pawh chuan ala fiah em em chuang lo. Mahse le a vawithum na zet chu a in rin fiah chiang ta kher mai! A thawchhuak nghal hawk a, a khur nghal der der bawk. A rinlawk ang deuh chu ni tho mahse a duhdan erawh ava ni lo tehlul em! A lungngai lutuk chu a tum lawk pawh ni miahlo hian a ṭap chhuak ta hawk hawk mai a, a hlim hlawl lo ani. Han hlim vak nachhan tur pawh a nei lo reng reng bawk a, a dinhmun ang ah hi chuan.

Engpawhnise Jimmy-a chu a hrilh tur ani lo ang. A hrilh theilo, a hre tur hi ani lo tawp mai ani. A tho vat a, a hmai te chu phih faiin room ah chuan a lut leh ta a, test kit pawh chu bag ah dah leh in ṭha tak chuan a mu ve leh ta mai bawk.

A tuk ah pawh chuan a damsam loh chhuanlam in hna chu a kal leh ta lo phawt a. A ṭhiante chuan an ngaihtuah tawh viau ang le. Mahse a dinhmun hian a zir mawlh silo. Tunah chuan mahni chauh a awm a in ngaihtuah maimai chu a duh rih tlat ani.

A pasal hna kal tur chuan mak tak maiin a chal ah chuan a rawn fawp zauh a. A kalsan zui. A che maksak thei ve ngawt mai he pa hi. Ala thinrim viau dawn emaw tih laiin hetiang hian a chungah a khawsa leh daih a. A pasal a chhuak chiah tih in mut maimai tum chuan room ah a lut zui ve nghal mai a, khum a a lawn tur chiah chu a pasal phone lo awm reng chu hmu thut in a tawp chawt. A theihnghilh anih hi ti rilru neuh neuh a mut san mai a han tum chu eng thil in nge amah chu rawn mawlh pawh a hrelo, a pasal phone chu enchhin a chak ta tlat mai. Ṭhut ṭhat sauh sauh pah hian zawimuang in phone chu a han ban ta a, alo lock hauhlo mai. Rang zet in whatsaap chat chu a han en nghal zung zung a.

Karei leh! Jimmy-a chu a rindan mai piahlam ah a rinphak bak aia nasa in alo che ngap hrep mai anih chu! A chat ah chuan hmeichhe biakna hlir! A han scroll thla nghauh nghauh a, group chat alo awm ve pheuh pheuh tih loh chu hmeichhe hrang hrang nen a an inbiakna vek ani. Chung zing ah chuan a mit han la fal nalh tu an awm ta!! Chat list a chung ber leh a message dawn thar ber ni bawk chu.

“I nupui mawl zet chuan damdawi chu ala ei ṭha em!?” Tih hi. Tih mai ngaihna a hrelo, a ṭhawng bawk em ani. Chutihlai chuan kawngka in hawng thawm a hriat thut avang in phone chu a hmet thim thuai a, a awmna ngai ah chuan dah leh vat in a mu nghal vat bawk. A muhil der zui hmak. Jimmy-a chu thawm dim tak hian a rawn lut a, a nupui chu a muhil ngei ni a hria in a phone chu muangchang hian a han la zauh a, ak ṭha vatin a chhuahsan zui leh ta ani. A chhuak chiah tih in thinphu dep dep hian Hmangaihsangi chu a rawn tho chhuak leh hluai mai a. A thaw zui hawk mai. Engpawhnise inbual harh phawt angai ani tiin a tho tharh a. Chumi hma chuan a thawmhnaw hak lai chu hlip vek in darthlalang lianpui mai hmaah chuan saruak ngal ngat hian a ding ta teu mai a. Nu lian tak chu ni hran lo mahse a pian hi a nalh ve reng a, a tawk chiah ti mai ang. A vun lah a ngo in a mam em em a a hmel hi chu a ṭha takzet ani mai e. A itawm tawk chiah a a hnute lo kawh vei lah te chu a han vang vang a, chutah a dul chu zut in a han thle pah deuh ngiai mai bawk a. Zawi sap hian,

“Â nu hian a hmangaih che ania aw” tiin a pum chhung a naute insiam ṭan mek chu a be mawlh mawlh mai. Chumi hnuah a biang chu chul leh in, a la nâ phian mai nia. A duk deuh raih bawk. Chuveleh a mit aṭang chuan mittui a rawn hnâm leh ta ṭiam ṭiam mai a, amah leh amah chu a in khawngaih zawk ani tih hriat tak mai hian a in en ta vawng vawng. Chutah hrechhuak thut niawm tak hian a mittui chu a han hru fai zauh a, towel chu ban vat in bathroom a pan zui nghal a.

“Zanin ah ka thawhpui te nupa chaw ei turin ka sawm a, eitur tuihnai tak kan lo hlui ngei tur ani”  a pasal in a rawn tih chuan a phu zawk mai.

“Eng- engati teh thut nge?” A pasal chu a meng thip nghal kher mai.

“A chhan i hriat kher a ṭul lo e. Ka ṭhian te anni, a ṭha em?” 

A lu chu lo buk zauh pah hian choka lam pan mai a han tum a, a pasal bawk chuan lo ko ding leh in,

“Hey! I damdawi kha theihnghilh suh ang che. Ka ṭhiante hmaah min tih zah a thiang hauhlo ang” alo tih leh chuan chhang tawh lem lo in choka ah chuan a luh san ta daih a.

Rawngbawl a zo fel ve chiah tih in a pasal ṭhiante nupa pawh chu an rawn thleng chhunzawm ve nghal mai a. A pasal chuan lo chiau au thuaiin alo phi buai sek. Ani pawh a pasal hnungzuiin an mikhual te lo dawngsawng tur chuan a tlan phei ve thuai a, an hmel a hmuh rual chuan a thin a phu nghal dup dup thei. A bik in a ṭhianpa nupui hmel mawlh kha a hriat hnu ani tlat. Ni e, a hrechiang khawp. A pasal phone a a hmeichhe hmuh ngei mai leh a pasal hnen a ama chanchin ngei lo zawt tu kha ani miau ani. Engtinnge hetiang hi anih theih zawk? Hemi te pahnih hian eng inzawmna nge an neih ang? Chu nu pasal chu Jimmy-a  hian ka ṭhianpa ati bawk si a, mahse a ṭhianpa nupui nen chuan regular tak in an inbe fo ṭhin niin a lang bawk si. A pasal hian a nupui awmdan chu a hriatpui ve angem? Nge ṭhianṭha tak angin Jimmy-a leh he nu pawh hi an lo in be ve maimai ṭhin zawk. A ring chiahlo, anih chuan a pasal nen he nu hi an lo in kawp ru reng tihna emni? A rilru ava hah tak em aw.

A ngaihtuahna a vak kual nasa bawk a a pasal in a hming meuh a alo ko mawlh mawlh pawh chu a lo hre hauhlo niin. A harhchhuak thut a han hawi chhuah meuh chuan amah chu maktih hmel fe hian an lo melh ṭhap ringawt hlawm a. Jimmy-a chu ava melh zauh a, ani chuan a mit ko alo san khum ûk ringawt.

“Ka tihpalh lutuk. Thildang daih kalo ngaihtuah alawm mawle. Min lo hrethiam hram ru aw” ti a thupha chawi zung zung chung chuan a han nui hul hak mai a. Chutah an mikhualpa zawk chuan lo nuih var var pah hian  “A ho lutuk, inthiamlo duh re re suh. I nawmsam loh hmel si a mu hahdam daih zawk ta che” alo ti khauh. Chuveleh Jimmy-a chu za lo zet hian alo nui chhuak hak hak a.

“Nia, tunlai chu a nuam hleithei meuh lo a min lo hrethiam mai teh u” tiin a nupui bân ah chuan a kai lawk a, room ah hruai lut nghal in khumah a ṭhut tir deuh hnawk. A dinchilh sauh sauh a a insehruh nasa ngang mai le.

“Ka hrilh che em engtia awm tur nge tih kha? Mang ti ang nu, khawnge i damdawi i dah?” tiin a nupui khabe ah chuan a dawm sak deuh nawk bawk a.

“Damdawi eitur in min duh tihna emni?”  tiin Hmangaihsangi chu alo ner sawk. A chhanna chuan Jimmy-a thin chu a ti rim zual kher mai. A hma aia na zawk hian a khabe chu a han hmer sak leh salh mai a.

“Aw mi mawl nu, beng tla lo nu, ei rawh tunah hian ei nghal rawh”  a sehchilh deuh nawk nawk. Hmangaihsangi chu ngawi reng in a tho chhuak a, a damdawi bur chu rawn la chhuak in mum nga ngawt chu a pasal hmuh lai ngei mai chuan a han hmawm pawp mai anih kha. Jimmy-a chu alo ṭhen deuh sak. A pasal bulah chuan rawn phei leh in awki zangkhai vah mai hian  “Ilo hmu maw? Tikhan ṭha iti tawh em aw?” A han ti ve salh a.

“Lo mu rawh. I rawn chhuah veleh kher pawh a ngai tawh lo ang” tiin a chhuahsan zui. Hmangaihsangi thinrim lutuk chu a insawh ngheng ringawt a..

“Mihring pawh ini lo ramhuai inih hi”  ti hmarh hmarh pah hian a mu zui nghal thlawp a.

Tui hal huam huam leh dangro lutuk chuan a mu tui lai chu a ti harh zawk mai a. A bulah chuan a pasal chu alo mu tawh hauhlo. Khua a var tawh a a tho tawh ani mahna. Reilote chu a pasal thawm a han ngaithla vang vang phawt a a reh rei tak em avang chuan insawizawi turin a chhuak tawh anih a ring thiam mai. A lukham hnuai chu dap nghal thuaiin vanneihthlak tak mai hian a phone chu alo keng lo hlauh e. A rinlawk ang ngeiin zan hmasa lam a an inleng nu in a rawn biakna chu alo awm leh tawh. A hming pawh Lily-i a ni tih a hre ta alawm..

Tun ṭum chu a pasal hian message chu a seen vek tawh a ala reply lo thung ani.

“Morning duhtak”

“Morning le, nizan kha nuam iti meuh maw? I pasal kha a awm ve si a” 

Hmangaihsangi chu a ner sawk mai. Tenawm lutuk hian.

“umm nang i awm a, i nupui i dahbo thei bawk a, kan pa te chuan engmah a hrethiamlo”  uar fahran a nui lai emoji a dah kher bawk.

“A ṭhat hlauh chu, zanin chu dar 7 ah kan ti dawn nia, lo awm rawh”  

“Awle, lutuk tlat, ka nghahhlelh tawh dan hi!!” 

A chhiar zo chiah chu mak tih lutuk avang in a meng phawk chiang khawp mai. Zanin hian a fâl a  inhmuh an tum tihna maw? Dar 7 ah. A hun chu a chhinchhiah ta ran mai a. A zui ru ngei tur ani dawn lom ni tenawm hlawm hian ah. A pasal thawm a hriat a tak avangin a awmna ngai ah phone chu a dah leh vat a, a tho chhuak ve nghal bawk.

A hnathawh chhung zawng te chuan a rilru chu a bet lo hlemai a. Haw thuai thuai chu a duh ber tawh ani mai. A khat tawk hian sana te chu a bih deuh chhen tawh a, a awmdan ching cheng chu thup hram hram erawh a tum ve khawp mai. Tlai dar 4 a rik rual rual chuan a phit chhuak nghal a, a ṭhiante biakna pawh chu mumal lo zet hian a chhang liam puat ringawt.

In a thlen chuan a pasal chu alo la haw ve lo hlauh. In thlak sawk sawk in eirawng a lo bawl nghal zung zung a. A pasal alo thlen ve meuh chuan zanriah ei alo hman der tawh mai. A helhhawlh tawh lutuk chuan chaw pawh chu a ei tui hleithei lo ani ber e. Alo rinlawk ang ngeiin chaw eikham rual chuan a pasal chu a insiamzui ta mawlh mawlh a.

“Chhuahna tur inei emni?”  A rawn melh zawk a. A kawrkilh ṭha zui leh mawlh mawlh pah chuan  “Aw. Ka ṭhiante nen kan inhmukhawm lawk dawn. Damdawi kha ei la lo mu ang che. Ka rei maithei” tih pah hian damdawi bur chu a nupui bulah chuan a han theh phei zauh a. Alo dawng ve chat bawk.

A pasal hmuh lai ngei mai chuan damdawi mum chu a han hmawm leh thawr a. Jimmy-a chu alo nui leh suk. A chal a rawm fawh sak zauh pah hian

“Lo mu hahdam rawh”  tiin a chhuak zui. A pasal a chhuak fel ta maw tih ah a kâ chhung aṭangin damdawi chu a phawrh lehnghal vat mai a! A tih fo ṭhin dan in a lei hnuaiah alo thukru ṭhin chu niin! A thawmhnaw bawm chu hawng nghal rawk in shawl pan pakhat chu a la chhuak zauh mai a, a tlanchhuak ve nghal.

Kawngpui a thlen thlak rual chiah in a pasal chu a car nen chuan a lo tlan liam hman chiah chiah. Rang takin a helmet chu a khum a a scooty ti nung in a pasal tlan liamna lamah chuan a dawk chhuak ve nghal ta a. A hnung zelah a hmuh phak loh tur tawk chiah zel hian a tlan ve reng a. Thui tak an in um hnu chuan an thleng ta ani ngei ang, a pasal car chu a ding dat mai a. A hnung daih kawng thim chin ah chuan ding zui ve in scooty chu a han ti thi leh phawt a, a pasal che vel chu enthlak phawt a tum anih hmel. Reivak lo a nghah leh hnu chuan car aṭangin Jimmy-a chu a rawn chhuak ta nge nge a. Kal ta mai lo chuan a phone chu a phawrh leh a tu emaw chu a be leh te te phawt mai. Rei pawh be lo hian phone chu a ak ṭha zui leh mai a, tichuan a dinna kawt a In lianpui mai chhung ah chuan a lut ta zauh mai le. Chuveleh rang tak hian Hmangaihsangi chu a tawmna hmun aṭang chuan a rawn dawk chhuak nghal bawk a. A pasal luhna ah chuan lut ve nghal in step thim rik rek tak zawh tur chhoh tur hi alo awm nghal pang mai. A pasal kal liam tur chiah pawh chu hmu hman in, a rawn hmuh mai a hlauh em avang chuan a han biru leh lailawk ṭhin a. Mahse ala vannei tluang zel e. 

Thawm dim tak leh fimkhur takin a zui ve zel a, 2nd floor ah chuan Jimmy-a chu a lut ani tih chu a han hmu hman. Rang zet in ani pawh a tlanchho veleh nghal bawk. A han thlen chhoh ve meuh chuan kawngka chu an lo khar hman vek tawh a, a lungawi lo kher mai. Mahse ala pawi em em chuang lo. Chu floor chuan corridor sei pui mai hi tukverh nen a in zûl in alo nei hlauh mai. Pardah an zâr phui vek anih loh chuan a tan chance chhete chu ala awm hmel e.

Corridor chu a han thlek phei dâk dâk chhin a, alo thim phui khup mai lehnghal. Inchhung aṭang a an êng chhit  in a rawn kah chhuah êng chhete tih loh chu a thim viau mai.Mahse ala pawi chuang miahlo, inchhung ber a ên ṭhat tho chuan engmah buaina a neilo e. Che sawn ta mai lo chuan kawngka bulah chuan thawm ngaichang pah hian a han ding leh ren rawn phawt a. Reivaklo a ngaihchan hnuah inchhung aṭang chuan hmeichhe nui ri har har thawm hi a hre ta thut mai. Alo ngaihchan sa reng mahnise a phu deuh zawk tho. Chuveleh zawimuang in a kawr ipte aṭang chuan a phone chu a han phawrh ta zal zal mai a, thawm dim thei ang ber in corridor ah chuan a pen phei ta ani.

Tukverh lo awm hmasa ber ah chuan parda a in zar phui vek avangin a piah chiah tukverh zawk chu a pan phei leh thuai a, vanneihthlak takin chu erawh parda alo in zar ve lo hlauh. Fimkhur tak chuan inchhung chu a han bih thuak thuak a, chutah le a pasal leh zan hmasa a an mikhual nu ngei mai kha ṭhutthleng sei ah chuan in haw lem lo tih hriat  fahran mai hian an lo in pawm ta chial mai anih chu! A rinlawk thil mahnise a mit ngei a a han hmuh tak ah chuan a thawh dan a dang ta zar mai. Rei mawi tawk vel chu mittui tling pam chungin a han thlir leh te te phawt a, chutah, hrechhuak thut niawm tak hian a phone ken lai chu a hmet eng vat. Camera hmetchhuak in a tam thei ang ber thla chu a lak sak ta mawlh mawlh mai a. A duhtawk a ngah hnuah a pasal haw hma ngei a an In a thlen hman angai tih hria in a haw leh ta vang vang mai ani.

Tunah chuan a rilru a buai ve ta takzet ta. A pasal in Amnesia natna nei a neih thu hrilh in engkim i theihnghilh tawh ati a, damdawi lah a ei luih tir reng bawk, mahse a dawlh ngailo thung. Chuta karah a pasal chuan ngaihzawng dang alo neihsan kual vel thul. Tunah lah a fa chu a pai mek ani bawk si a, a khawvel chu a zim sawt takzet zet ani. Tal chhuah a duh a, tihngaihna a hriatloh bakah amah mai chuan a theilo niin a inhria a nau alo pai leh kher bawk nen. Engkim hi a khirh in a buaithlak kual vel vek ani ta ber e. Tu hnenah nge a buaina tawh zozai te hi a hrilh tak ang le. Inbunruahna tur a mamawh takzet tawh ani. Anih loh chuan a chhiat rup hun hi a la thleng ngei dawn niin a lang. A pum chhung a naute insiam mek lah hi a ti tla phal dawn teuh silo, a fa paina  a pasal lah chu heti mai hi ani tawh bawk si. A rilru tawt lutuk chu in rinlawk na pawh awm hman miahlo hian a ṭhingṭhi rawp a, mittui tla zawih zawih chung chuan a ṭawngṭai ta thlawt mai ani.

A pasal a zui ruk zan tihloh kha chu Jimmy-a pawh a nupui thlim in hmeichhe dang chu a hmu leh tawh rihlo a. Zu ringawt a buaipui te pawh chu a ziaawm ve ṭan hret hret bawk niin a lang. Hnaah a kal anih loh chuan  Inah a tawm deuh chawt a, a hma ang khan a nupui chu a duat thar leh in a ngaihsak leh tawh hle a, a hmangaih thar leh ta emaw tihtur khawp a khawsa chho in a nupui chu a vil chawt ani ber.

Chutiang chu nimahse Hmangaihsangi ngaih erawh a ṭha ve ngawt theilo thung. A phen ah chuan thil tih tum te a nei em tih lah a hre der silo a, chubakah amah bum tu anih vang hrim hrim chuan a ring thei tawh heklo. A der in a hlim a, a der bawk in a nui hmel te chu a ti lang ve ṭhin a, a nun chu a der vek nimai hian a hre hial tawh. He a tanna khuarkhurum chhung aṭang a khaichhuak tu tur hi a mamawh ngawih ngawih ani.

Ni khat a dawr nghak chu customer dangdai tak mai pakhat hi a tawng hlauh mai a. Chu a customer chu hmeichhia niin a nû ang rual vel tur hi ani nghe nghe awm e.

“Ehee!! Hmangaihi chu hetah ilo thawk reng ani maw!? A van mak tehdaih ve a” a rawn ti chel chul mai a.

Hmangaihsangi leh a thawhpui midangte chuan chu nu chu an melh nghal ṭhap.

INHREMNA CHU!(5)

                         By : Vanlalpeki Fanai

Hmangaihsangi chu a ṭhawng angreng hle lehnghal a, a chhan chu  a customer chu a hriat zawng niin a hre thei tlat lo mai. A hmel chu chiang deuh tak mai a en in a melh ta vang vang ringawt. A customer lah chuan alo la nuih var var zui a.

“Min hre tawh lo emni? I nu ṭhiannu, i nu Ramliani champhai khua khaa!” 

Hmangaihsangi chu a harhchhuak ta zawk mai. Amah chu kawk pah hian bah nuaih in 

“Ka nu Rami, ka nu ṭhiannu, ṭhiannu Dingpuii nu kha ini tiraw!?”  ati ve ta hlawl. Chuveleh Pi Rami pawh chu alo rak ve chel chul ta mai a, an han inhrechhuak ta chu an lawm dun kher mai, an inchibai nghal lawp lawp mai bawk.

“I chhungte hian i be pawp ngai miahlo niin an sawi a, an ngaih a ṭha tawh lo viau asin. I ti mak ka ti khawp mai” atih leh tak ah chuan Hmangaihsangi nui hmel chu lungngai hmel hian a rawn thlak a rawn thlak nghal thuai a. Rang zet a Pi Rami ban a kai lawp chung hian  “Lo kal lawk teh” tiin an dawr bathroom ah a chuan a luh pui ta dawr dawr mai. Pi Rami chu a hrilhhai teh asin.

Bathroom an luh rual rual in kawngka chu chhunglam aṭangin a kalh nghal hmiah bawk a. Pi Rami chu a hrilhhai tulh tulh.

“Eng nge thil awmzia? Hetah kher!” A lo ner deuh nâwng nâwng mai. Chutah Hmangaihsangi chuan thaw hlawp hlawp chung hian  “Englo ania Nu Ram, ka chhungte chungchang kha i rawn sawi chhuak a, diktak chuan an phone number hi ka nei tawh miahlo a!”  A rawn tih tak ah chuan Pi Rami ngaihṭha lo sa chu a a ṭhalo leh zual hle. A che sawn hrut a, a ner nûng mai bawk.

“Eng nge maw sawi i tum chiah le? Engtinnge mahni chhungte biak pawhna tur pawh neilo a heti chen chen a i thangbo theih zawk?” A lungawi tawh chiahlo ani. Hmangaihsangi thung chu alo thaw deuh halh mai a, za lo tih hriat zet hian alo nui suk bawk.

“Nia, ka dinhmun hi a laklawh buaithlak vek anih ber hi. Min hriatthiam pawh ka ngai khawp mai” alo ti leh daih. Chuveleh Pi Rami thung chuan  “Eng chungchang ah maw hriattiam i ṭul viau a? Han sawichiang law law teh a” alo ti thuai. Chutah harsa tih hmel zet hian

“Pasal ka nei leh a!” A rawn ti chhuak phawng.  Pi Rami pawh chu alo phu deuh zawk thei. A chal chuar nâng nâng pah chuan 

“Tu chu? Jimmy-a emni? kha mihring kha chu ani tawh em lovang chu!” Ati zui zat.

Hmangaihsangi chu a nui leh mai a. Hnuailam bih ran chung hian   “Amah tho kha ania!” 

Pi Rami chu a nghing dawt hi ani ringawt mai. A awki pawh a sang sawt viau bawk.

“Engtin â!? Engtin-engtinnge i tih theih zawk? Champhai aṭang i tlanbosan tawh a, hetah angai te bawk in, nilo engtinnge i tih theih zawk le?” 

Hmangaihsangi’n chhan let leh a tum mek lai chuan bathroom kawngkhar chu an rawn chum ta dawt dawt mai a.Chuveleh hmanhmawh zet hian Pi Rami phone number chu a phone ah chhu kai zung zung in a save nghal thuai a. Bathroom aṭanga an han chhuah nak chuan Zothansanga kha pawn lamah chuan alo ding reng mai a.

“Boss in i awmna min zawt a, i bo daih bawk sia” inthiamloh hmel zet hian alo ti dui a. Zothansanga chu chhan pawh chhang let lo hian an kal pel ta fua mai a, ani chu alo ner deuh nawk thung.

“Vawiin chu nangmah in ilo awm mai dawn ania, chhuahna tur ka nei” a pasal in a rawn tih lai chuan a lo meng bial kawk a.

“Sunday ah lehzel pawh maw? Khawnge i kal dawn?”  ati deuh halh.

Chuveleh rum zet a a nupui chu rawn melh hrâwk pah hian  “Zawhna hi i ngah ka ti. Patling ka ni a ka duhna hmun hmun ah ka kal ve thei ang chu. Ni lomni?” Ngeiawm zet a nui sâwng chung hian a rawn ti let hlauh a. Chutah zawi sup in

“I thu vek alawm” tiin a meng hnual nghal rawih.

“Ka inbual dawn” tih pah a Jimmy-a bathroom a luh rual rual in ani chu room lamah a tlan lut nghal zauh a, nuam lo chu ti ve tho mahse a pasal phone check chu ngai ah a nei ṭan der tawh. Ekhai aw!!? A rinloh deuh in tun ṭum chu hmeichhe dang a hmu dawn tlat! Hotel ah lehnghal mawle. Tu hmeichhia nge anih a khawi lam mi nge maw anih le? Rang tak a che zung zung in a pasal bialnu hmasa zawk phone number chu a save thuai thuai a, a pasal leh hmeichhe dang inbiakna chu a screenshot nghal thlap bawk.  A tih zawh hnu chuan rang takin phone chu a dah leh thuai a, a chhuahsan zui nghal. A hrim hrim in a pasal pawh hi mi rinawm lo tak ni chung si hian a phone te hi a dah duhdah angreng in a lock ngai miah bawk silo, a nupui hi a ringhlel miahlo zawk nge hetiang ti duh tur hian a nupui hi a fing tawk lo in a hre zawk ni ang? Chu chu thu khat lo nise, a fimkhur lo ve thlawt ani e.

“Ka kal hma hian i damdawi kha ei teh. Ilo ei lo leh ringawt ange” tiin a nupui hmaah chuan damdawi chu a han dah zawm zat bawk a. Phur hmel zet a damdawi chu lo ban nghal in a hmawm leh ta hmak mai. A dawlh leh chuang miahlo thung a. Rei mawi tawk a pasal chuan a che vel chu alo en reng ani tih a hriat hnuah a lu te chu a ti hai der leh ṭan ta a, meng ṭha peihlo niawm tak hian room ah lut in khumah a bawk zui thlawp. Muhil ang mai a rei mawi tawk a ngawih reng hnu chuan Jimmy-a chhuak thawm chu a hre ta nge nge a. A tho chhuak leh rang kher mai. A lei hnuai a a dahṭhat damdawi mum ho chu a chhâk zui pharh bawk. Tichuan a phone phawrh in Lily number chu a hmet chhuak zui a, a han chawl leh det a, a thaw leh hak ṭhin. Umm he thil hi a ti ngei tur ani. A pasal chuan a chantawk chu hmu mawlh teh se ti rilru neuh neuh pah in Lily chu a call zui a, a pasal thiltih tum mek te leh a screenshot te kha a thawn in a hrilh bawk a, mahse a nihna chu sawichhuah sak lo tur in a vo zui ve bawk. A nihna a pasal hnen a a hrilh anih vaih chuan tun ai a an mualpho theihna tur thil hi evidence a nei ṭha ve tlat. Lily a biak zawh chuan Pi Rami a call zui zat bawk.

“Nu Ram, keimah Hmangaihsangi”

“Aw Sangte, min rawn be dawn ta lo em ni aw kalo ti tawh a, i ṭha zel em?”

A ngawih vang vang hnuah a han khuh deuh kharh phawt a.

“Umm ka la pangngai reng ani mai. Nu Ram, ka chhungte chuan i bulah engtinnge ka chanchin an sawi dan, min hrilh theih chuan”

“An ngaihtuah em em che a, nangmah vang hian an rilru pawh a hah ṭhin khawp in ka hria i be lo deuh thut bawk sia, bakah i pasal hlui mawlh kha ineih leh mai an hlauthawng em em bawk a”

Hmangaihsangi chu alo nui tawi tak mai a.

“I chanchin hi hre ngat se zawng an ngaihdan ani lo khawp ang le” atih zawm leh zat bawk..

“Nia Nu Ram, nakinah ka rawn be leh dawn che nia, sawitur hi ka la neih nual ka ring, anih phawt le” tiin Pi Rami chhanna pawh nghak ta lo chuan phone chu a off leh ta daih a. A thaw zui hawk bawk. Chutah Lily chuan a pasal leh a bialnu thar te chu engtin tak va suasam ang maw tih chu a ngaihtuah chhunzawm nghal daih a. A nui deuh vur vur bawk.

Tlai alo nih chuan Jimmy-a chu a rawn haw leh hma hlemai a, Hmangaihsangi lo rinlawk ang chiah ani e. A pasal hmel leh awmdan chu ngawi reng hian alo thlir ru reng ringawt. Jimmy-a hmel chu a dur khup mai a, thil lian tak vei nei hmel hi a pu bawk niin a hria. A kawr chung hak lai chu ṭhutthleng sei ah chuan a theh thla deuh hnawk a, amah pawh a ṭhu zui nghal. A khat tawk hian a han thaw leh hawk ṭhin bawk a, amah lo thlir reng tu Hmagaihsangi chu alo nui ru leh suk ṭhin thung.

“Thingpui mi va lum teh” a rawn tih khar khar takah chuan zangkhai zet a tho chhuak nghal in choka ah a lut zui ta a. Zawhna siam emaw biak emaw chu a tum reng reng lo. Amah hian a rilru hahna leh thinrimna chu tuar  tlang ve maimai rawh se tih hi Hmangaihsangi ngaihdan nghet bur chu ani. Chutia thingpui siam a alo buai rak rak lai chuan a pasal phone chu a rawn ri ta ral ral mai a. Hmangaihsangi chuan thawm chu alo ngaichang ve kar bawk.

“Aw Lily”  Hmangaihsangi chu alo meng zau kawk.

Chutah Jimmy-a chu a ṭhutna aṭanga tho chhuak zawk chung hian a ṭe zui ṭhat mai.

“Engtin maw? Min ban anga maw? A theihloh, hna dang ka neilo tih in hre vek ani lom ni? Ngaihtuah ṭha leh rawh u”

A hna aṭangin a pasal chu an rawn ban ta ani ngei ang le. Mahse Hmangaihsangi tan chuan engtihnamah ala ni chuang hauhlo tlat. A thil tih lai chu a ti chhunzawm mawlh mawlh a, a hmel leh awmdan aṭang chuan a phur hle tih pawh a hriat. A pasal in tur thingpui keng vâ vâ chung chuan a han zai pah vel bawk a. Jimmy-a chu a ṭhutna ngai ah bawk lo la ṭhu chung hian a melh ngai chu alo melh vung vung bawk.

“Kha, i thingpui” tiin dawhkanah chuan a han chhawp sak zui mai a. Jimmy-a erawh chuan a biakna chu hria ang pawh in a awm eih lo thung. A rilru chu a hah hmel hle lehnghal bawk nen. Amaherawhchu lainat na leh khawngaihna chhete mah nei ngailo tu he a pasal hi ala khawngaih let ve thei chuang hauhlo. A chantawk a hmu a, a phu tawk chiah ani bawk. Zawhna zawh buai pawh a tumlo kan tih tawh kha. A pasal, kha leh chen a pasal lo ni tawh, a nun thar ah pawh amah lo chu pasal dang a nei miahlo, chu chu he Jimmy-a ngei hi ani. Anih chuan Jimmy-a hi a hmangaih miahlo tihna ani thei angem? Nilo e, a hmangaih lutuk alawm. Amaherawh chu he Jimmy-a zawk hi nupui te bul a khawsak dan ṭha leh nupui nei te awmdan tur dik a a awm miau loh avang hian hremna engemaw tal chu a phu ve ani.

Ni a ral a, kâr a liam a, thla lai alo vei leh meuh chuan Hmangaihsangi pum chhung a naute pawh a awm maimai lo tih a hriat ṭan ta hlemai a, hmuh theih in a pum te chu la puar lian hauhlo mahse a nu chu a chawk buai thiam ve ṭhin khawp mai a, a nunphung pawh tih kaihhlak chang a lo ngah ta. Hmangaihsangi hi a nulat lai aṭanga nula hrisel tak alo nih bik loh vang ani ngei ang naupai pawh chu a haw angreng hle. Chaw ei theihloh chu sawiloh, hmawmsawm dang hrim hrim, pum han ti puar thei chi tawh phawt hi chu a ei lui theilo ani ber e. Chuvang tak chuan a taksa pawh in a tuar hlemai a, mahse a naupai thu hi a zep tlat a ṭul miau avang erawh chuan a tawrh theih hle a ngai thung a, a tuar hram hram a a thup hram bawk ani.

A pasal lah chuan hna dang thawh tur a hmu leh mai tawh lo bawk nen amah zawk chu an fa lo piang mai tur tan chuan a thawk ṭauh ṭauh zel a, midangte hraitpui lemloh chuan a ṭang ru em em ṭhin. Jimmy-a hna neilo ta chu inchhungah tawmsen reng peih heklo, pawn ah hmuh tur a tam sawt em em a a rui deuh reng ṭhin bawk. An nupa chuan a hming chauh in  nupa anni a, an khawsa dun hi ani deuh tawp mai. In a an awmdun ve ṭum ah te pawh hian an inbe khat sawt viau a inbe ngailo ang mai in inchhungah te hian an in kal pel ngawk ngawk chang lah a tam. Mahni seh seh mual ah ti niawm tak hian an buai buaiin an buai a, an in mamawh lo dun hle.

“Zanin chu ṭhutthleng sei ah khan riak ang che”

A pasal zu in mek, men pawh meng ṭha theilo khawp a rui, chhuatlai a ṭhu nuaih mai chu ava dinchilh sauh sauh. A ṭhutna bul vel ah te chuan a zu in ruah na bottle te chu an let pheng phung mai a. Chutia amah rawn be tu thawm a han hriat takah chuan zawimuang hian a bul a lo ding reng a nupui chu a han melh chho ve ṭawk ṭawk a, a nui zui hak. Chutah sehchilh deuh nuaih hian

“I thu vek alawm…aw lalber” alo ti chuar chuar.  Hmangaihsangi nuih chu a za lo kher. A hnar tum khum dat chung hian  “Muttui” tiin a inher deuh vut a a kal sawn nghal. A nupui kalsawn hnuah Jimmy-a chu ala ṭawng  zui nuah nuah mai a.

“Kei ve maimai te chu..hna pawh nei tawhlo, thawhchhuah neilo civil zurui mai ka ni tawh. I hmuhsit tlak lek alawm ka nih Hma- Hmangaihsang!” Tiin a bu zui lûk lûk a, a rui lungpuam chu a ṭap deuh per pur bawk. A chet vel na ah bottle ruak te chu tlawh fuh palh in a ri leh rum rum ṭhin bawk a, room lam a mu mek Hmangaihsangi chuan a hne tawh takzet. Mahse insum phawt a ṭha tih hria in ala ngawi vel maimai chauh ani.

A naupai chu check up a hun leh tawh avangin a hna ah pawh chuan a kal tlai tur thu chu an boss a hrilh lawk diam a. In a chhuahsan lai hian a pasal chu ala mu thung a, ṭhutthleng sei ah mu in ala hnâr ring ṭha hle nghe nghe. Zan hmasa lamah a hming chu a ziah lawk tir tawh tho avangin Doctor chu a nghak rei lemlo hle a, a tihtur ang ang te ti zo thuai in clinic a chhuahsan chiah chu a pasal leh hmeichhe pakhat, a pasal car a an rawn in phur lai chu a hmu ta mai a, a duhloh dan deuh in Jimmy-a pawh chuan a rawn hmu zui ve bawk. Chutah motor chu ti ding thut in a rawn chhuak dawn ta mai a. Chuveleh Hmangaihsangi chu a theihtawp a chak hian a kal nghal sauh sauh. A thuruk chu hriatchhuah tir a duh hauhlo. Chutia a kal chak tak em avang leh amah lo nghak reng tu an awm bawk si avang chuan nakin a sawifel atan a tawpsan ta zawk a. A nupui lo chhuahna clinic chu a han thlek vang vang phawt a a lut zui ta ani. Receptionist bulah chuan tun mai a hmeichhe lo chhuak khan engnge a rawn tih tih chu a han zawt nghal zung zung phawt a. Chu receptionist lah chuan thu zep chi ani tih lo hre ve heklo le, a naupai avanga check up a rawn neih thu chu alo hrilh ta kelh mai a. Chu thu a han hriat meuh chuan Jimmy-a chu a phu deuh zuk a, a hamhaih hle bawk. Chutihrual erawh chuan a thin pawh a rim tel bawk a, chutiang khawp a thil lian tham a nupuiin a han thup bo thei mai chu pasalte tan chuan han lawmna chi ziazang ni heklo. Engmah sawi zui tawhlo in insehruh ṭeuh chung chuan a kalsan ta zawk ani.

A motor a amah lo nghak reng tu nula pawh chuan lo be sawk sawk mahse a rilru ah erawh a nupui chiah a awm tawh thung.

Tlai alo ni a, phur lemlo takin Hmangaihsangi chu a haw veleh hnak hnak a. A pasal khan a rawn hmu chiang viau mai si a a ngaih chu a ṭha thei mawlh lo. Phatmar dan tur chu a rilru in alo dap ve char char bawk a. A inthlak sawk sawk a ṭhut hahchawlh pah ti a chair a alo ṭhut dawn lai tak chuan a pasal pawh a rawn haw ve ta ngei e. Alo melh zawk ringawt a, ani chu a lungawi loh hmel hle tih ava hmu thei nghal pang. Rang tak a a nupui awmna rawn thleng phei ve nghal in

“Tu fa nge!?” 

Hmangaihsangi thung chu a thinrimna thup hram hram tum hian alo nui mai a.

“Tunge ka pasal!?” 

Chutah zet zawng Jimmy-a thin chuan a tuar leh ta lo ani e. Dawhkan chu a chum ta bur mai. Hmangaihsangi chuan a mit alo chhing sawk thung. Chutah, ha chang ṭhial bap bap chung hian,

 “Zawhna min zawt let ve lo khan ka zawhna kha chhang mai rawh”

“Ka pasal inih avangin ka zawt che, tunge kha hmeichhia kha!?”

“I zahpuiawm reuh hlemai, i pasal hi min zah derna chhete mah pawh i neilo anih hi le”

“I fa anilo! Tu fa mah ani hek lo, ka fa chauh anih hi” 

Chuveleh Jimmy-a chuan rawn ben tum hian a kut chu a han phar chhuak hluai a, Hmangaihsangi erawh alo ṭhu chhuak zawk thung. A pasal mit ah tak en kar chung hian 

“I ngam chuan min han beng ta che. Ka dinna hi ka sawhsawn dawn chuang hauhlo ania. Ti rawh! I duh duh chu ti rawh!” 

Chutiang em em a a nupui in a han hlau lo ta chu mak atih zawk em avangin a kut pawh chu zawimuang hian a la thla leh riai riai a, a inhumruh nasa kher thung.

“Kan la hria ang chu” ti hul huk chung in a nupui chu a kalsan ta hram ani. Hmangaihsangi thinrim leh thinphu nasa lutuk chu a thaw halh halh mai a. A ṭhutna ngai ah bawk chuan ṭhu leh in tui chu a in nghal khawlh khawlh.

Thawm engemaw vang a a mu tui lai a han harh chuan a pasal chu khum hnuai vel bih hian alo kûn leh kût kût ṭhin ani tih ava hmu nghal a. A ngaihna hrelo zet a meng zim sût chung hian a tho chhuak zui ve bawk.

“Eng thil nge i zawn a?”

“I damdawi bur mawle”

“Ka ei zo a, a bur ruak pawh ka paih daih tawh! Engatan nge itih a?”

Chuveleh a pasal chuan chiang zet hian a rawn melh nghal kawk a.

“I mawl emni!? I ei zo anih te chuan min hrilh ta che. Damdawi nghei thei ini hleinem, doctor pawh khan ka bulah a sawi vek asin”

“Chupawhnise, zingkarah ka damdawi bur zawng in ilo buai a, eng nge awmzia?”

“Ila ei ṭha zel em tih ka en duh alawm mawle aw..Lo awm rawh, doctor ka va hmu leh ange”

“A ngailo, a tawk tawh!”  A rawn tih chuan Jimmy-a chu a rawn in her leh vut a. A nupui hmel phelh phang mai chu en reng chung hian a nui zui hak hak.

“I duh duh hunah i course i ti tawp ngawt theilo. Doctor pawh inih loh kha  engmah hi i hrelo ania” a rawn ti chang leh fak mai.

“Ka naupai tan hian a ṭhat ka ring tlat lo mai. I hriat kha ka ei apiang in ka lu a hai nasa ṭhin tih te chu”

Jimmy-a hmel chu a dur ṭha tawh khup khup hle a, a nupui bulah chuan rawn kal leh in a hmai bul chet ah chuan a han kûn hniam zui a, chiang zet a a mit a en  chung hian

“I thusawi lai kha han sawi ṭha leh lawk teh” ati ta chheu chheu mai. Hmangaihsangi erawh in a pasal chu melh loh hram a tum thung.

Chutah Jimmy-a bawk chuan ram hmarh hian  “I ei leh khawp ang. Chuan, i ei zel bawk ang Mawli!” Tiin a chal ah chuan a han fawh sak ta zauh mai a. A pasal khawsak dan hi a ten hluah hluah a, a kham takzet tawh bawk. Hun ṭha rawn in her chhuah hun a nghak mai chauh ani e.

Diktak chuan Jimmy-a hi a tlangval lai aṭanga mipa hmelchhia leh laktlak loh hulhual chu a ni hauhlo a, chhungkaw khawsak nuam ve pangngai tak aṭanga seilian niin nula lamah pawh a tla na em em ṭhin a. Hmangaihsangi nen a an in ngaihzawn lai aṭanga an inneih hnu reivaklo thleng kha chu a nupui hi a duat in a hmangaih hlum lo chauh ṭhin ani. A ṭhianṭha te pawh in fiamthu hian “Em em a” an tih ve hial ṭhin kha ani reng reng a. Amaherawh chu hun a kal liam ang zel hian mihring mizia pawh hi alo inthlak danglam nasa thei khawp mai hi alo ni a, an inneih aṭanga kum khat leh  a chanve hnuah Jimmy-a chuan zu leh ruihhlo dangte chu khawih a ching chho ta tlat mai, hmeichhe lamah lah a tal ngap ṭan em em bawk si nen, a nupui lah nu leh pa te fanu duat rawn niin a lo hrisel lo veleh zel bawk si a, an khawsa dun hleithei ta meuhlo chuan kum hnih an in kawl hman lo deuh tih chuan an inṭhen fel ta nge nge anih kha. Nun bulṭan thar leh turin Hmangaihsangi chuan Aizawl a pan nghal a, thawmhnaw dawr lian takah tihian a thawk chhunzawm ta nghal ani. Hetih chhung zawng hian a pasal hlui Jimmy-a chuan a nun dan te chu sim a hnek in a khawsa bawraw tial tial tih thawm te pawh a ṭhiante leh a chhungte hnen aṭang chuan alo hre ve zel ṭhin.

Engtik hunah nge Aizawl hi a rawn thlen ve a, hna te kha alo thawh ve tak tih chu Hmangaihsangi hian a hre tawh hauhlo. Kan sawi tawh ang khan amah chu zui ru ṭhin in a luhchilh hial a, tihian an khawsa dun leh ta mai anih kha. A tir ah khan a nupui chung ah hian ṭha in fel hle mahse hun a rei a a mize ngai bawk, zu ruih leh hmeichhe hrang hrang kawp kual bawk kha a ching chho leh ta ani. Mahse tunah chuan Hmangaihsangi hian a hma anga tawrh thlawn leh maimai kha a tum tawh bau lo a, hetiang mipa awmngaihna hrelo lutuk hi chuan an phu tawk hremna leh tawrhna an hmu let ve ngei tawh tur ani tih chu a ngaihdan nghet bur ani tawh tlat.

“Khati khawp a hrehawmna leh mualpho na thlen tawh tu che hetia awlsam tak a i han pawm leh thei mai hi chu i mak ka ti ve hle ani”  Pi Rami chuan a han ti hmarh hmarh mai a. A hma dawhkan a coffee sa ṭha tak chu ban in a lem zui nghal khawlh. Hmangaihsangi thung chuan tukverh lam hawi hian khawvel  dang ah a suangtuahna te chu alo chen tir veng veng thung.

“I chhungte biakpawhna tur ka pek tawh che kha han bia la, engkim hrilh in ngaihdam te pawh dil nghal ang che. Keipawh in sawipui dan che kalo ngaihtuah ve dawn nia”   Pi Rami bawk chuan a rawn ti leh a.

Chutah tukverh lam la melh veng veng pah in Hmangaihsangi chuan  “Ka huphurh ani. Min ngaihdam theih pawh hi ka ring tawh lo hial zawk” a rawn ti chhuak sap a. Pi Rami chu alo thaw deuh halh.

“An fanu neihchhun inih angin thudik i hrilh phawt chuan an ngaidam em em ang che, thudik hi a tlo ṭhin zawk fo ania” alo ti let velej thuai bawk.

“Diktak chuan a hma anga hrehawm tawrh thlawn leh ka duhloh vang chauh a pawm leh mai ka nia, mahse kalo in veng hneh ta lo deuh ani e” tiin a pum rawn puar ve ṭan tawh chu a han chul pah zauh mai a. Pi Rami pawh chuan hrethiam tak hian a kut chu a rawn vawn sak thuai, lainat hmel zet a melh vawng vawng pah hian,

“I ti thei em em ang, diktak chuan mipa nep lutuk bul a naupang seilen tir ai chuan nangman i tuam hlawm anga hmangaihna diktak nen, i inchhir lo zawk daih dawn tih hi ka hre lawk sa vek ani. Lungngai miah suh” alo ti leh sap sap. Hmangaihsangi pawh chu alo nui ve suk a.

Inchhung a lut chiah chu Jimmy-a chuan kawngka chhung lamah chuan a lo châng reng mai niin! A pasal hmel a han hmu deuh thut chu a phu  zawk thei.

“Khawnge i kal chen chen a? Sana i en thiam lo emni?” alo ti nghal khur khur mai.

Chhang let lo a kaltlang mai a tum chu a banah hian alo pawt let sawk.

“Sawi rawh, tunge iva hmuh chu? Hna ah pawh i kallo tih ka hre vek ania” a sawi zawh rual rualin Hmangaihsangi chuan alo chhang let ve thuai a.

“Engtin maw? Ka hnathawhna ah te ilo va kal a maw!? Eng ang mi ah nge maw ilo in ngaih chu le!?” Ati let ve ta sak.

“Nang venhim che hi ka hna ani. Tin, vawiinah Doctor hnen aṭangin i damdawi tur pawh ka va laksak che a, chumi pe tur che chuan kalo kal mai ani, chutah chuan tihsual eng nge ka neih a?”

Hmangaihsangi chu alo ṭhen deuh sak mai.

“Venhim te i sawi ve emni? Nang a venhimna hi ka mamawh lo aw, kha damdawi laktlak loh zet pawh kha ka ei fo hi a ṭulna a awm miahlo ania. Dahbo lehnghal rawh!” Tiin a pasal man behna aṭang chuan talchhuah a han tum ngawt a, alo thlah duh awzawng lo mai le! A vuan nghet nghal sauh sauh zawk a. Room lamah nawr lut nghal in khumah chuan a theh hlawm zui nawk mai a. Hmangaihsangi chu a hlauthawng ṭan tawh kher mai le. Jimmy-a chuan damdawi bur chu hawng zui rawk rawk pah hian 

“He damdawi laktlak loh tak hi nang hmeichhe laktlak loh zet hian i ei dawn khawp!” Tiin a nupui chu a tukkhum samah ṭham sak in a kuai dâk ta awrh mai a.

“Âng rawh” tiin damdawi mum engemawzat mai chu barh luih a han tum ta taktak a, Hmangaihsangi lah in a kâ chip tum chuan ṭan alo khawh ve nasa mai bawk.

Thinrim sehchilh nawk nawk chung hian

“I kâ hi âng rawh tunah!!” Tiin a sam chu a hma aia na zawk chuan a han ṭham sak leh nawk mai a. Chutah Hmangaihsangi na ti lutuk chu a insum hman tawhlo, a râk ṭhawt a a kâ chu a âng palh ta hlauh mai le. Chu ngei chu Jimmy-a chuan alo hmuh hmaih lo nasa niin, damdawi chu alo barh nghal chawt chawt mai ani. A dawlh ngei theih nan a bul lawk a tui bottle chu ban thuaiin a nupui kâ chhung ah chuan a leih lut ta bawrh bawrh mai nia! Chutah a hmui chu a hmeh chip sak nghal hmak bawk. Hmangaihsangi pawh a inring hmanlo, a talbuai zo ani e. A tumloh deuh in damdawi mum engemawzat chu a dawlh ta vek mai kha ania! A mittui a luang nghal zung zung thei. Damdawi a lem fel ta tih a hriat rual chuan Jimmy-a chu a tho chhuak hluai a, nui sâwng chung a nupui melh pah hian 

“I ti ṭha takzet ani e. Ka lawm lutuk aw duhtak!” Ati vel sup a. Hmangaihsangi thung chuan thinrim aw khur hlak hlak chung hian 

“Kan fa lo piang mai tur tan hian a pawi thei tih i hrelo emni?” Alo ti ṭhat. Chutah aw rawl vin zet leh ring fahran mai hian 

“Engatanmah ka ti lo! Fa neih lah ka duh heklo, i rai tih ka hriat khan ka lawm in i ring reng reng emni Mi mawlnu!” Alo ti let ta ngheng mai anih chu!  Hmangaihsangi rilru na lutuk chu a mit a han chhing vang vang phawt a, a khur dar dar thei hial mai.

“Anih chuan ka chhuahsan mai ang che. Ka thei tawh hlawl lo ani e” ti a thawhchhuah a han tum chu a damdawi ei a rawn thawk ta ani ngei ang le, a lu chu a hai chem chem a, a luak a chhuak takzet bawk. Che zui tur awmlo in nikhaw hrelo chuan a mu hlawm ta reng ringawt mai. A nupui awmdan vel chu hmuhsit hmel zet hian alo en reng thung a.

A pum na lutuk avang chuan a muhil lai chu a harh ta zawk mai. A han hawi kual vel nâk chuan khua pawh alo la thim mup, a bul mai a a pasal mu lah chu a hnar ri leh bur bur tawh a. A thawpik thlak ṭhin mange. A pum lah chu a na tulh tulh emaw tih mai tur hian a awm lehnghal a.A pum chauh pawh nilo in a tâi bawr vel leh a mawng bawr te pawh chu a na hle tih a hre zui nghal. Chutah le, a kap aṭang chuan thil tui niawm tak hi a rawn chhuak ani tih a hre zui zat bawk. A tir chuan zun a cheh zawk emaw ati hial a, mahse a nilo! Zawimuang hian a kap chhungril chu a han zen lut ta de de maii a, karei leh! Zun awzawng alo nilo, thisen ani! A ṭhu chhuak zawk a, a hlauhthawn em avang chuan a khur chhuak nghal vek bawk. A taksa na lutuk avangin a ṭhen leh sawk ṭhin bawk a, engpawhnise bathroom ah kal a in enfiah vat angai anih hi.

Bathroom pan tur pawh chuan a tha neih zawng zawng a sen a ngai hial mai. Thawm dim ngai nen, a taksa khur leh na chhuak vek bawk nen, a khat tawk a a serh aṭanga thisen  lo chhuak ve chhen nen chuan a hahdam thlak loh hulhual ani ber. Khum a tui ti tak a muhil mek a pasal chuan a thawm a hria ang tih chu a hlau hle a, a dinhmun mek ah hian ṭanpuina chu mamawh hle mahse Jimmy-a puihna kher hi chu a mamawh thlawt lo ani. A tihbuai belhchhah maimai dawn. Khur sai hlawk hlawk chung in bathroom lam pan chuan a kal ta chhat chhat  mai a, a thlen chin apiang ah thisen chu a far phei zel bawk.

Bathroom a thlen meuh chuan a tlu lo chauh tawh a, a bawk vâk lut ti tih hi  ani hawt e. A nat tawh em avang chuan a thlanfim mai nilo, a thlan chu a bek ah te chuan an luang zaih zaih thei tawh hial. Thei leh thei lo hian commode chu a han ban a, a in hâm chho ani ber mai. Ṭhu nghal hnawk in a ner zui sawk sawk bawk. A ṭhu fel chiah tih chuan a hma ai khan a pum leh a tâi vel chu a rawn na zual leh ta nghal a, a duh vang  pawh ni miahlo hian a taksa pûm mai chu alo ṭang mar leh chiam ṭhin, chuvang chu ani em tih hrelo mahse, rei mawi tawk chutiang a a awm hnu chuan a serh aṭanga thil engemaw hlawm lian tak tla chhuak nalh chu a hre thei a, a nâ lutuk zual pui te pawh chu reh nghal huai hian a hre nghe nghe. Amaherawh chu a rilru a na a, a keh chhe nghal vek thung ani. A naupai chu a chhiat ngei ani tih chu tu hrilhhriat hranpa mah a mamawh tawhlo. A hrechiang lutuk tlat. Chutihrual chuan insum hman lek lo hian a ṭap dir nghal zung zung a, a tha neih chhun a zo tawh a, a ngaihtuahna te pawh chawmawlh vek in a mit sulh sulh ta mai. Bang ngheng chung chuan nikhaw hre mumal tawhlo tih hriat tak hian a ṭhu zawi ta ngawih ngawih mai ani.

“Tho rawh! Hey! I harh emm? Tho teh” ti a a pasal in a rawn sawi tak nawk nawk avang chuan a han meng ta diar diar a. A hawi kual zui vut vut. Nichin mai a a awmdan zozai te kha a mumang maimai anni hauhlo tih a hriatchian hnu chuan a mittui a tling lehngal piau mai a, a bul mai a lo ding ngawi reng a pasal chu tlawh thluk tawp a reh zui nghal bawrh bawrh mai te chu a nâp hial. Mahse tualthat anih dawn bakah a chakna neihchhun te hian an pui tam dawn der silo.

“Chhuak rawh!” A han ti zui tuarh mai a. Jimmy-a pawh chu bangbo zet hian ngawi reng in a chhuak zui ve mai bawk. A taksa na ala reh fel loh avang chuan ṭhen sak sak pah in a tho ta ṭhem ṭhem. Commode a thil awm chu en loh hram tum hian flash chu a han hmet zauh a, mittui luang zaih zaih chung hian   “Bawihte, mangṭha aw” ati zui sap.

“Engvang a bathroom chhung a lo ṭhu muhil mai nge maw inih le?” A pasal in a rawn tih chuan a chhang buai peihlo.

“Umm engpawhnise i damsam hmel loh emai vawiin chu Inah hian lo awm hahdam rawh. I hna kal ai chu keimah ka va kal zawk ange” alo ti ve khauh.

“Ka thil tawn leh awmdan zawng zawng hi ka ṭhiante kha hrilh hauh suh ang che”

“Dawn lo e, an hriat kher a ṭul hleinem” tiin a thawhsan zui a.

Hnathawk tur a a pasal kal liam hnu chuan a tih ber tur hrelo lutuk chu inchhungah chuan a hawi kual ruai mai a, a nun chu ruak ta ngawih ngawih a hria in a pum lo thep ta zaih mai te chu a chul leh heuh heuh ṭhin bawk. Tukverh bulah te chuan ding in pawn lam a naupang te takte te an nu leh pa ten an kai det det a hmuh te chuan mittui tling piau hian alo thlir zui reng zel a, tunah chuan a lo hisap ve te leh duhthusam zawng zawng te khan an thlawhbosan tawh chu ani si a, chutiang thil ṭha te chu a tawng ve ngai dawn ta lo niin a lang ta. Jimmy-a nen an chen dun leh hnu ah kum khat em pawh ala ral lo ani a, mahse a thil tawn leh a hrehawm tawh zozai te chu a han chhut kual vel a rapthlak ati zawk hial mai. A taksa chau tawngkhawng lutuk avang chuan rei pawh ding zui theilo hian khum lam a pan vat a, rilru tih thawven tum tak chung chuan a chhing ta siai siai a.

Thawm ri deuh bur avang chuan a mu tui lai chu a harh zawk. A ṭhu chhuak hlawl mai bawk a, a beng a chhi nghal kar bawk. Chutah a pasal chuan pawr fe mai hian 

“Hmangaihsang! Khawnge i awm?” Ani chu alo phu deuh zawk thei. Rang takin a pasal bulah chuan a kal ve mai bawk a.

Jimmy-a chu a rawn rui haw lehpek hle a, a din maimai pah te chuan a bûk lui lui thei nia. Chutah a nupui hmel a han hmuh rual rual chuan a kawk deuh nghal ngawr ngawr ta mai a.

“I pasal in hna ka thawk anih chuan eirawng tal chu lo bawl ve ta che. I zak lo hlemai ka ti” a ti vel. Hmangaihsangi chhun mu kha lo mu tlang daih in eirawngbawl hunah pawh chuan alo harh miahlo hi alo ni a, a dik ang, a chau ve em asin. Chutia a pasal in a sawi rual chuan lehlam hawi hian a ṭhen deuh sawk mai a.

“Khawi a pawisa nge ruihna tur hi ila neih reng theih zawk a? I mak hi ka ti ve tawk ani Jimmy, hna i thawk dek dek a ruih nghal tur emaw iti leh a, hetiang chuan ka peih tawhlo, midang neih tur zawng ang che” ati let ve sak. A thusawi chu Jimmy-a helh tawk a tling takzet mai. A nupui bân ah chuan a phih lawp mai a, bang ah nawr bet nghal in a hrawk ah a reh sak zui bawk a. Amaherawh chu thah tum a rek erawh ani hauhlo. Sehchilh rap rap chung hian

“Nang hian pasalte zahderna chhete mah hi i neilo ani tiraw? I mitmu te hi ka kher chhuah sak law law dawn che emni mawh!? Ka thusawi reng reng hi hnial loh ila nei miahlo nang nu hian”

Hmangaihsangi chuan harsa ti zet in a chil a lem khawlh.

“Kal sawn rawh Jimmy min ti na ania, pasal diktak awmdan tur hian awm tum ve la, kan buai fo lo ang mawle”

“Engmaw i sawi? Kei tluk a ngaihsak tu che leh hmangaih tu che hi i tawng tawh dawn lo, hre rawh! Nang hmeichhe thluak kim lo mawl bawk si, ka duh duh a ka tih kual theih ve maimai hian min zah lo anga maw? Hre rawh, kei lo chu pasal dang hi i hmu leh tawhlo ang, tumah hian neih tlak ah an ngai hleinem che” tih pah in a nupui a reh behna aṭang chuan a insaseng zui a, chuveleh Hmangaihsangi chu a thaw chhuak nghal hawk. A dinna ngai ah chuan ala ding reng bawk a.

“Eirawng va bawl rawh” a rawn tih leh ṭhat tak ah chuan rang zet in choka lam chu a pan zui thuai a, chutihlai tak chuan room a a dah a phone chu a rawn ri zui ve zat bawk. Chuveleh a phone rikna lamah chuan tlan lut nghal in a han en nâk chuan Pi Rami alo ni reng mai. Thaw hlawp hlawp in a chhang zui nghal a. Lehlam aṭang hian Pi Rami chuan zawi sup hian  “Sangte, engkim ka tifel thawkhat e, ka be fel, nangmah chiah kan nghaichang tawh che ania aw!” A rawn tih chuan Hmangaihsangi lawm lutuk chu a mit a han chhing vang vang mai a.

“Ka lawm e Lalpa” ati zui sap.

“TUNGE INIH A? ENGVANGIN NGE I BULAH HIAN KALO MUT VE RIKNGAWT!!? THO VAT TEH”  tiin a pasal mu tui lai chu a ṭe khum ta chiam mai a. Amah chu khum  aṭang chuan a zuangthla zui zat bawk. A nupui au thawm ah chuan Jimmy-a chu chiang zet hian a rawn harh zui ve bawk a. A nupui awmdan avang chuan a bangbo kher mai. Thawhchhuah ve mai a han tum chu a che thei ta hlek lo mai a. A in en chian nâk chuan khum ah  a kut  leh  ke  te chu phuar beh tlat anni tih a hre ta mai. A mu kak ṭha ṭhe ṭhaw khawp lehnghal a. Mangang au ṭial ruai ruai mai hian 

“Eng thil nge maw itih le? Min phelh vat rawh” 

Hmangaihsangi lah chuan a thusawi chu ngai pawimawh duhlo lui ve ngat in a phone chu a lek kang zauh a, recorder a hmetchhuak zui bawk. A pasal chu chiang zet a melh pah hian

“Nang hian min blackmail ani!!” A rawn ti thawp sat. Chuveleh Jimmy-a chuan pawr fe mai hian  “I mawl emni? I duhthlanna ngeiin helai hmunah hian ka hruai che anih kha. I chhungte lakah pawh beisei pakhatmah ka nei heklo, i hriat vek kha” tih pah chuan a han tal laih laih bawk a.

Hmangaihsangi chu alo nui sak ringawt.

“I sawi dik. Sawitur dang ila nei em aw? I neih loh chuan ka hun a in ṭan ve tawh in ka hria, kha leh chen kha kalo ngawi tawh a, tunah chuan engkim ka sawi ve hi a hun tawh ani” a awki chu a zangkhai in a chimawm vei phian bawk nen, misualnu aw phawi niawm zawk tak hi ani a.

Jimmy-a hmel a manganna rawn lang chhuak chu a khawngaihthlak zawk hial mai. Ṭah chhuah hmel zet in a nupui chu a rawn melh ṭawk ṭawk bawk si. Hmun dang chu a hawi kual ruai ruai bawk a, chhuat ah te chuan a nupui suitcase leh bag te chu chhuahpui mai theih tur hian alo in hûng fel sa diam tih ava hmu thei bawk. Chuveleh ṭah aw ṭuau chuan

“Hetiang hi chuan mi ti lul suh Hmangaih, engkim kha ka thiamloh vek ani, ka pawm thlap. Khawngaih in min ngaidam la, bul kan ṭan ṭha leh dawn ania” a rawn tih chuan Hmangaihsangi ngaihdan chu alo ni awzawng lo, vin zet mai hian  “A vawithum nan maw!? Bulṭan ṭha leh turin ka sawm che emni? Tun a i awmdan ah khan chutiang ti duh tur chu ka ang in i hre reng reng emni? Ngaithla rawh, nangni ang mipa, hmeichhe hlutna pawh hrelo hi chu maw vawi za chuang pawh ngaihdam ni mah ula in nungchang hi in sim thei taktak lo, chubakah maw bul ka ṭan ṭha leh dawn anih chuan i tel lo in ani tawh thung ang. Ka nun ah hian rawn lang tawhlo turin ka duh che”

Jimmy-a chu beidawn hmel zet hian a han thaw halh mai a, a lu chu lukham a nghah deuh chawrh pah hian chung lam a melh zui vang vang.

“I natna nen kha chuan tu mipa pangngai mahin an pawm thei tawhlo ang che, kei tih loh chuan” ala rawn ti hram chuan Hmangaihsangi thin chu a khei leh ta zak mai a. Rang tak a a pasal kal hnaih pah hian a hmai ah chuan a han ben sak ta pawp mai ani. Jimmy-a chu ngeiawm zet hian alo nui duh lek chauh.

A pasal chu kawh sawk sawk pah hian

“Kei hian eng natna mah ka neilo, ni e, ka nulat lai a hrisel lo chu ka ni tehmeuh mai, ka rai vang ni hauhlo in nitin vawihnih tal ka luak ṭhin bawk anih kha. Tin, ka lu pawh a hai fo a, ka chau ngawih ngawih a, doctor hnen a check up ka sawi khan nang hian ka kal ve kha i remti lo ani lom ni? Tichuan ka aiawh in iva kal ta ngei a, nangmah ang bawk a mi tenawm leh verther doctor chu va tawngfuh in pawisa nen i thlem kual hnuah kei chu thluak lam fel lohna, amnesia nei angin min chhuah ta a lehkha pawh i rawn hum haw ngei tak kha. Khatihlai khan engtinnge kalo rin theih zawk che tih hi tun hnuah hian ka ngaihtuah ṭhin. Doctor bulah khan kei a damlo zawk nilo in nangmah i kal a, test pakhatmah pawh awmlo in Amnesia kalo nei thei anih hi a mak ka la ti reng! Tichuan amnesia natna nei ten an ei ṭhin damdawi tiin drugs chikhat, hlauhawm tak leh thawk chak em em mai kha min rawn hawn sak a, ka ei ta ṭhin kha ania. Kha damdawi kha drugs ani tih ka hriatna pawh ala reilo hle bawk” tih pah chuan a bag aṭangin a damdawi bur ruak chu a rawn phawrh ta a. A pasal hmuh theih tur a lek vâ vâ chung hian

“Hei en ta che, lehkha inbel hmasa zawk ah hi chuan thluak natna nei te tan a ei chi ani tih chu a lang ngei mai. Mahse, a bel hi a in khawk palh ta hlauh mai a, a hnuai ah hian lehkha dang alo in bel leh tih ka hmu ta a, chutah chuan drugs hlauhawm leh damdawi sâng tak ani tih ka hre ta ani. Hetiang drugs lei nan hian sum engzat chiah nge i hman ral ṭhin tih chu hrelo mah ila a man hi a tlawm dawn hauhlo tih chu hriat sa. Tin, doctor te thám nan khan sum tamtam i seng bawk in ka ring a, kei i nupui rethei ve tak, ka thih hnuah pawh insurance claim tur nei hauh silo hi engvanga min dahṭhat thuai thuai hi duh em em nge maw inih chiah le? Umm,, ma hrethiam e, hman aṭang tawh khan nupui nei chung reng a hmeichhe dang kawp kha nuam iti em em a, tichuan kei hian kalo dip dal che tih hi ka hrethiam e. Mahse chutiang vang chu lo ni ta se, min ṭhen ve thei mai lo emni?  Sual hle mah ila nangmah ang bawk hian dam te chu ka la thahlel ve tho asin” 

Jimmy-a chu alo hui leh pap pap ṭhin a, sawitur reng a hrelo ani ber ang. A nupui thang ah chuan a awk fuh chiang bawk em atin ni. Hmangaihsangi bawk chu rawn ṭawng chhuak leh in

“Tichuan drugs hmang khan min hrai rui ta ṭhin a, dam chu sawiloh kha damdawi khan min ti hrehawm ṭhin hle tih chu i hriat vek kha. Inchhung i chhuahsan dawn ah damdawi min ei tir fo a, tichuan nileng in hrehawm ti takin hun chu kalo hmang vel ta ṭhin a, nanglah hmeichhe dang nen nuamchen in hun i hmang ral a, tlaiah zurui chung a lo haw leh in kei pawisawi na nei miahlo kha i kut thak hnawih nan min hmang zui leh ta ṭhin anih kha. Kut min thlakna te kha na chu ti ve hle mah ila maw ka rilru kha a na daih zawk Jimmy. Nileng a i khawsak ṭhin dan te,  nula i kawp ṭhin tih te kha ka hre ve vek. Ka nun hi a rethei ngawih ngawih ṭhin asin. Zantin kut min thlak awl lo a, min sawisa a, nau ka han pai ve tak hnu pawh khan i hlim ve dawn emaw kalo ti a mahse, a teuhlo lutuk ringawt. Hlim chu sawiloh, zantin min sawisak chu i chawl chuanglo a damdawi nise min ei luih tir reng bawk nen, a tawp ah phei kha chuan ka chhiat ta nge nge a..” chu thu a sawi lai chuan a rilru chu a rawn na thar leh hle tih hriat tak hian a melh ngai melh in a ngawi ta vang vang. Jimmy-a zawk chuan zawi sup hian  “Ka tihpalh” alo ti zauh. Chutia a rawn tih veleh chuan a mittui rawn tla tur te chu a han hru hul nghal thuak thuak a.

“Awmzia a awm tawhlo, sawi duhtawh suh. Nang hian i fa piang tur pahnih lai chu i tihlum tawh asin, kei chuan hremna ka pe theilo che, i boral hunah i fate khan an lo hmuak ngei che in ka ring a hremna i dawn tur chu an kut ah ka dah ni rawh se”

“I memory i loss lo anih si chuan engvang in nge a tirah khan min hriat miahloh, min tih mangan zia kha i hria em?” Hmangaihsangi chu alo nui ringawt a.

“Ka pasal leh doctor in thurual in Amnesia ndi anga min chhuah miau kha chuan ka nei ani mai alawm. Chubakah i tihduhdahna hnuai aṭanga zalen kha alo nuam em a, helai thleng thleng min rawn umzui tak ah kha chuan lem kalo chang ta mai ani, nangmah ang maiin” a pasal chu a han mit sir ralh a.

“Mahse ka bulah tho ilo kir leh a bumna ngaiah bawk bum nawn in i awm leh a, mi mawlnu!”

“Chutin mi ti hlek suh. Min bum char char angah ilo in ngai maithei e a dik ang, ka ngawi reng a, phuba ka duh avang leh hrehawm kalo tawrh tawh zozai te avang khan hremna hmu ngei la ka duh bawk avangin  engkim haider  chung leh dawh hram hram zel che in ka zui haw leh chauh che ani. A nihna tak ah chuan he apartment pawh hi kan khawsakna ṭhin te kha iti vel a tiraw? Dawt hmang in min bum lut emaw i inti a, ka awm maimai bik hauh hleinem. Sum tamtak seng a ka ei tur damdawi i lei zozai te pawh hi min barh luih zan tihloh kha chu mum khat te mah ka dawlh lo aw. Hralh na tur i hriat hlauh chuan i hralh leh daih dawn nia” tih pah in damdawi bur, a damdawi tak la awm zawk chuan a pasal chu a vawm zui pawp mai a.

“Leh lawk in, hna aṭanga an ban chhan che kha i hre duh em? A bul ber chu kei, i nupui laktlak loh leh mawl zet hi ka ni e!” 

Jimmy-a chu alo meng zau nghal kawk mai a.

“Kha kha i phu tawk chiah ania lawm le, Lily kha duhtawk mai la chuan hetiang hian civil zurui maimai chu ini lo tur hi ania, ka zep sak thei reng tur che hi ania sin le aw..mahse i chan hi ala ṭha mah mah zawk ani ka ti kei chuan. I fate nunna pahnih lai i la tawh a, dan phalloh damdawi i nupui i ei luih tir ṭhin bawk a, i hrehawm tawrh ve te chu ala nep lutuk tlat” tiin a thawhsan zui a.

Jimmy-a chuan ram hmarh hian

“Zaktheilo lutuk” alo ti hluk.

A bag leh suitcase chhuat a a dah fel thlap ho chu lak pah hian

“Ka kalsan phawt ang che. Tikhan i hremna tawh tur nghak in lo mu hahdam la, a reilo ang. Sawi hmaih ka neih chuan min la zawt thei tho ania aw” tih pah chuan a pasal chu a han siai khum zauh pek a! Jimmy-a tan chuan ngeiawm vet vet tur tak hi ani ringawt. A chhuahsan hma in a phone kha a han bih leh zuaih a, recorder chu off in telegram hmang chuan Sub-Inspector Rothangliana chu a voice record kha ava thawn zui nghal a. Nui zui sak in a luggage chu a nawr chhuak a, chu inchhung hrehawm tamtak alo tawrh tawhna hmun chu hmu leh tawh ngailo turin a chhuahsan fel ta ani.

Hmun fâl leh reh ṭha tak, tlai ni tla tur  han thlir vel nan a rem em em mai ah hian amah chauh chuan a han ding vang vang a.

“Aw Inspector, voice record kha ilo ngaithla tawh anih chuan a bak a awm tawhlo aw. Champhai doctor zawk kha Ramhmangaiha niiin specialist ani bawk. Tin, Aizawl doctor zawk hi Lalnunmawia ani e” ati sap a. Phone chu dah in Pi Rami a call chhunzawm lehnghal a.

“Nu Ram, Pathian leh nangmahni vang liau liau in ka him thei ta! Ka lawm lutuk” ati sap.

Pi Rami nen an inbiak zawh rual chiah chuan a nu hnen aṭangin call a dawng zui zat a.

A nu hming a han hmu thut chu lawm avangin a nui zui var var. A tawp tawp ah chuan ka chhungte pawh ka be ve leh ngam ta ti sap in 

“Aw nu, kalo haw dawn” tiin a hma ral hla tak chu a thlir zui nghal vang vang a. A mitthla ah chuan a hun lo paltlang tawh zawng zawng te chu a rawn lang leh uarh uarh mai a. A natna lo tawrh tawh zozai te vang a a mittui rawn tla tur chu alo hru hul zeuh zeuh bawk. Heti chuan thinlung takin a nui ve thei tawh ngei ang chu.

Leave a Reply