You are currently viewing KA CHHUAH ZALEN EMNI?

KA CHHUAH ZALEN EMNI?

Spread the love

BY :  Vanlalpeki Fanai

‘’ Ka pu, min pui rawh u! Min pui hram the u’’ hah lutuk vanga thaw hluam hluam chung hian nu pakhat, kum lam tawh chu police station-ah a rawn tlan lut deuh rawk rawk mai a. chu station chhunga lo awm mek police tlemte te chuan makti tih hriat zet hian an lo thlir deuh thap hlawm bawk.

‘’ Min pui rawh u’’ tia alo la phun mawlh mawlh lai chuan an zinga police duty pakhat, inspector Thanmawia chuan rawn din hnaih ve vatin a thutna lamah chu nu buai em em mai chu a hruai phei nghal bawk a, an inthut fel tir hnu reivakloah Pu Thanmawia bawk chuan chiang taka a mit rawn melh chung hian

‘’ Ka pi, I buaina te chu min han hrilh ta che. Puih theih dan che a awm phawt chuan kan inhuam reng a nia aw’’ aw ki zaidam tak chuan a han ti ta a. chu nu upa tawh lam pawh chu a hma ai kha chuan tlemin a thla te pawh a muan ve hmel ta deuh.

‘’ Ih maw ka pu, ni 8 chawhnu lam khan ka fanu nula Remruatkimi chu a thianten an rawn sawm angin birthday lawmna lamah a kal ve a, a kalna hmun tur ber a thlen hnuah pawh min rawn be leh nghe nghe. Mahse, chumi chin chu inbe tawh lo in tihian vawiin hi ni 10 lai a ni tawh a, ka rilru hi a hah tawh em a ni’’ a tap chhunzawm nghal zawih zawih mai a. police pa pawh chuan fiah zet hian alo la melh ve reng.

‘’ Ni 8 a chhuak chin hriat loha awm zui ta kha tunah ni hnih ral hnuah I rawn zawng ve chauh a, eng nge awmzia? A lan dan ah chuan I fanu chu I ngaihtuah tak tak lo zawk ava ang ve’’ Pu Thanmawia’n a rawn tih ve chuan chu nutling Pi Ramthari chuan nasa zet hian a lu chu alo thing zui ve ta nawk nawk. 

‘’ Ni lo, ni lo, ka fanu hi ka neihchhun a nia, ani lo hi chu fa dang reng reng neilo in tihian pa tello in ka lo chawi seilian ve tawh bawk a. ka hmangaih ve em em bawk. Fanu neihchhun tihtakah hetianga nulat te a hah hriat chhoh hnu atang hian hlauh tur dang nei hek lo, kei chu min hlau lo angreng sawt viau a, tun chauh lo pawh hi zan vah chhuah zeuh zeuh chang chu a nei ve thin. Chuvang a nia tun țumah pawh hian ngaihthat loh mai nachang hre lova ka ngawih bo ve reng ni’’ a rawn tih leh chuan Pu Thanmawia pawhin rang takin,

‘’chuti chu a awmna chin hre thei tur a thiante ho chu chanchin te I zawt tawh reng reng em? Ni 8 zana a chhuahpuite ho pawh chu nise’’ lo ti ve zatin, pi Rami pawh chuan mittui tla phung chung hian a lu chu alo bu ve leh nghat nghat tawh a. A fanu thiante a hriat phak chin chin chu chanchin zawt kuala a tlawh chhuah vek tawh thu alo sawi ve vat. 

‘’ Awle, engpawh chu nise, ni 8 ni a a kalna hmun address engkim mai chu min han hrilh ve phawt mai la, keini pawhin zawhna te pawh kan lo zawt nawn ve leh ang chu’’ Pu Thanmawia bawkin a rawn tih ve hnu chuan address te chu inpe felin pi Rami pawh chuan station chu lungdam lo ru tak chungin a chhuahsan ve leh rih phawt a. In a thlen hnuah pawh thildang reng reng a ngaihtuah thei tawh lo. A fanu neihchhun Remruatkimi chauh khan a rilru a luah rih a, tunah te hian khawi hmunah nge a awm ang. Riltam mangangin a awm mek a ngem? Vawt tiin a khur mek a ngem? Aw, nu te tan chuan fate hi ngaihtuah an nat tawh sa tehlul vei nen, a tha chu a zawi zova, eng tih mah a peih lo bawk a, chaw takngial pawh ei hleithei lo khawpin a thu zawi ngawih ngawih reng mai a ni.

‘’ Min lo zui ta che’’ a hma lawka hmeichhe tleirawl ding zum zat, fiah taka amah rawn en reng tu ngei mai chu en chungin Remruatkimi chu a han thu ngawi deuh ren rawn phawt a.

‘’ Tu nge inih’’ zawi sapa rawn ti chhuak chung hian muangchangin a inbengkang zui ve nghal bawk. Chutah, a hmaa tleirawl ding reng chuan amah hnungchhawn zawnga inher pah hian a hmalam kawngah chuan muangchang bawkin a kalsan zui ta hnak hnak  a, Remruati pawh chuan thinphu dut dut chung hian a zui ve ta zel ringawt.

‘’ Tu nge ka nih tih chu min zui phawt la ila hre em em ang. Heng lai ramhnuai pilrilah hian eng nge ilo tih zawk a, mahni chauh lehnghalin’’ tih paha a rawn hawi let zeuh lai chuan Remruati thung chu za lo fahran hian alo kiai ve sak ringawt. Chhan ngaihna tak pawh a hre mai lo zawk. Ni e, an  in chhung a chhuahsan hnu atang khan a thiante bulah hlimhlawp bawlin a khawsa ve a, harhfim lai nei miah lo in a awmzui ta bawk a nih kha. Chuvangin khami zana thilthleng te kha mumalin hriat chhunzawm reng reng a nei tawh lova, a then a zar, motor hmanga chak tawka an tlan kual lai ang chi te kha chu mumang ang ruaia fiah lo in ala hre ve thei awm e. Engtin nge helai hmun fianrial leh pilril lutukah hian mahni chauha alo awm theih tih erawh hi chu hriatchhuah theih dan tur chhetemah a hre lo, ngaihtuah chhuah ngaihna pawh a hre zui bawk hek lo. Tun dinhmun atan chuan a bo chiang ni ta berin a inhriaa, kalna tur kawng leh haw dan tur takngial pawh a hre tawh hek lo. Chuvang chuan he hmeichhe tleirawl hi a zui phawt mai a țul tih a hriaa, an ni hian tanpui dan tur an hriat a, tih dan kawng an hriat tak hlauh leh a nu nen pawh khan hlim takin an la inhmu ve leh thei ang chu maw..

Khaw chhung lamah pawh amah zawn hna chu police te chuan rim taka thawkin kil tin kiltang an dap kim thawkhat tawh hle a, mahse, Remruatkimi sulhnu awm reng reng chu hmuh tur erawh a awm chuang lo. A bopil hmak. A chanchin a kip a kawi a thiante hnena an han zawh ve pawhin thil awmzia an hriat bik loh thu leh, party zanah pawh Remruati chu an bula a awm ve reng thu te, an in kawt thlenga an thlah hawn thlap thu te kha an lo sawi ve zel mai si a, police leh a chhungkhat laina hnai te tan chuan khawpum deuh thaw chu a ruk thei ang bera tuam chhuah a hun ta tihna a nih ber chu. A phone nise an call tlang thei tawh lova, a awmna chin chhui zui theih a ni lo. A patea te leh midang zawng, police te pawh tiamin, nung dama hmuh leh inring reng reng hi an awm tawh lo a tihtheih a, beiseina chhete la neitu awmchhun chu a nu chauh a tihtheih awm a sin. Nu hmangaihna leh dawhtheihna nge nge hi chuan tawp chin hi a lo nei ve lo a nih ber hi mawle.

Ramhnuai ram pilril chhungah chuan thui tak kal tawhin a tawpah, in lian ve pangngai tak, chhawng hniha sak leh hlui ve tawh lam[ang awmna hmun chu va chuang chhuak deuh hlawlin, Remruati kal lai pawh chu a tawp zui chawt thei. A hmaa kal mek kha tleirawl , amah rawn hmuchhuak tu pawh kha ding zui ve maiin, mak tih hmel deuh hian chutia Remruati lo ding khawng reng mai chu a rawn thlek zui leh vang vang thin a, an ngawi dun zui ta vang vang.

Minute 5 chhung vel chutia an din ngawih vang vang hnu chuan boruak rawn tidanglam turin in chhung atang khan nupa niawm tak leh hmeichhe naupang kum 7 mi awm bawr vel te hi hmel hlim pu sang chung hian an rawn chhuak ve ta hlawl mai a. Remruati pawh chu a harh zui nghal zawk thei. 

‘’ In lo thleng thei maw?’’ nu ber niawm tak khan nui snag chunga rawn tiin, Remruati thung chu alo hawihai lehpek hle mai a. Ava kal dawn tih hi an lo hre lawk vek tihna emni ang. Tichuan, tawngka pawha chhang tawh lo in a lu chu a han  buk khum deuh nghat phawt a, pa ber niawm tak kha a rawn tawng chhunzawm ve leh,

‘’ Hawh u, I lut ang u. Pawn boruak chu a hriselllo em mai’’ tih pah hian amah chu In chhung lamah a inher zui a, an ni ho pawh chuan ngawi reng hian an zui ve ta mai bawk.

In chhungah chuan ți dai chunga thu ngawi vang vangin, a hawi a hawi a, mak tih tak tak thil pawh a hmuh fuh leh nual a nih kha. Chung zingah chuan an in chhung bungraw hmanlai tak tak te leh, calendar hlui turu lutuk tawh te, tapchhak niawm tak te, tunlai khawvel changkang tawh tak mil lo em em a an bungraw hlui leh hmanlai zet zet hmuh tur la awm fur mai te chu a mak tih langsar zual an ni awm e. 

‘’ I ril a țam em?’’ amah hnaih taka rawn ti thut tu an awm avang chuan phu deuh zawkin, a suangtuahna ram ata chu a harhchhuak zui hawk bawk a. a meng zau deuh kawk hman. Mahse, amah rawn betu chu nu ber niawm tak kha a ni tih a hriatchian hnuah erawh chuan thaw zui deuh sawng sawngin a ril a țam loh thu leh, phone hman tur a duh zawk thu chu alo sawi ve vat thung a. a chhanna pek dan vang chu nimaw, nu ber pawh chu a meng kual zui ta zak zak mai.

‘’ Ah, heng laiah chuan eng phone mah hman theih a awm ve lova, a pawi khawp mai. Tunhma kha chuan landline kha kan kawl ve thin a, chu pawh chu a chhe leh tawh’’  lo ti liam puatin, choka lamah a pheisan leh ta daih a. Remruati tihngaihna hrelo pawh chu a khap zui fak fak ringawt. Chutah, a thutna piah lama thing thutthleng hlui ve tawh tak awmna a han hawi phei nak chuan hmeichhe naupang tereuhte sam kir bip bep khan nui hmel rapawm angreng tak pu sang chung hian a lo melh kiau tih ava hmu leh thut a. A phu zui zawk zawk nghe nghe thei. Chutah, aw sin rat chunga,

‘’ Infiam I duh em’’ ala rawn tih zui phei chuan chu hmun nuam a tihna zawng zawng chu a bo zui nghal vek tawh a, a tih dan kawng hria chu ni ngat se tlan haw nghal nal nal a duh ta hial ang chu. Chutia, a kut khur ru der der tawh khal neuh neuh chunga alo thut ngawih veng veng lai chuan nu ber bawk kha lang leh thutin, chaw ei a siam peih tawh thu a rawn sawi the thut a. Remruati phu nasa thei lutuk ber chu a meng kawk kawk reng tawh mai hi a ni ber e.

‘’ Haw dan tur kawng min kawhhmuh theih chuan ka inbuaipui theih mai ka ring’’ chaw ei dawhkan kila an thut thap tawh hnu chuan rawn tichhuak lehin, an ni chhungkaw thum chu an inmelh zui leh ralh ralh hlawm a, chhanna pawh pe ta chuang lo chuan an hmaa inchhawp an thleng theuh chu ban zuiin, ngawi reng hian an bar zui ta mial mial mai. Chhanna an pek mai loh avang chuan an khawsak dan mawlh chu mak ti takin Remruati bawk chuan a han en kual te te hlawm a,

‘’ Khawnge helai hmuna min rwn hruai thleng tu hmeichhe tleirawl kha a awm tak?’’ rawn ti lehin, an ni ho chuan amah pawh chu rawn melh chuang lo hian nu ber khan zawi sapin.

‘’ A damlo a, pindanah a awm’’ a rawn ti ve leh mai bawk. Remruati pawh chu ngawi chhunzawm ve leh maiin, a nu leh pa te hian eng thumah an hrilh chiang tha duh lo a nih pawhin ani tal kha chuan a hrilh tha duh em ang chu maw, a biak ngei chu a ngai dawn a ni.

Zan a rawn thlen chuan tihtur dang awm thlawt hek lo, Remruati pawh a riahna tur room an pek lamah chuan lutin, khum lian leh zau em em maiah chuan lungsi lo ru zet hian a han mu ve ta ren rawn phawt a. chu hmun chhuahsan dan tur ringawt chu ngaihtuah tawhin a awm chu a nuam thei tawh lova, hmeichhe fel tak leh chhungte tan pawha tangkai em em ni ve lem lo mahse tun dinhmunah hi chuan an in lam a ngaihna kha a zual tawh em em a, a nu rilru tur leh awm dan turte ngaihtuah kaiin, chhungte dang hrim hrim pawh chu amah vanga an rilru hah dan tur chenin a han suangtuah kual chhin a, a mu tha hle hle lai pawh chu a tho chhuak zui zawk thei. Chutah, a mutna zawn corridor ah chuan thawm ri deuh hraih hraih thin hi hre zuiin, khum atang chuan muangchang in a han chhukthla zui vat a, thawm dim takin kawngka awmna lam chu a pan zui nghal bawk. Chutah, kawngka lo inhawng sa chu han hawn zau belh lehin, corridor thim mup lam chu a han bihthla zui ta a. chutihlai chuan tuemaw hian a room zawn chu a rawn kal pel ta fua mai le! Phu zawkin ama roomah bawk chuan a pil zui nghal zawk a, a thin te pawh chu a phu zui nghal dup dup thei hial. Tu tak chu ni ang maw tih pahin kawngka lam bawk chu a han pan tha leh te te a, a hawng zui zat bawk. Chutah, corridor ah ngei mai chuan kha tleirawl, amah rawn hmuchhuak tu ngei kha thei leh thei lova ama pindan lam pana lo kal hnak hnak lai chu ava hmu fuh ta mai a! A meng phawk zui chiang the asin. A lan dan maiah chuan chu tleirawl chuan hliam na tak a tuar niin a hriat a, a ke pawh chu kal pangngaia kal tha hleithei lo in a hnuh hian alo hnuk hnalh hnalh a ni ber. A chauh hmel takzet bawk.

‘’ Ding the. Eng nge thil awmzia?’’ tih sar sar paha a han pan hnaih chuan chu tleirawl pawh chu alo ding zui ve ta mai bawk a. mahse, a rawn hawi let ta hauh lo thung. A bul maiah chuan va kal hnaiin a hmel chu a han en chiang a, e khai! A tawlh let nghal dawrh thei nia! Heihi chu helai hmuna hruai thleng tu tleirawl hmeltha tak kha a ni thei lovang. Hmel hmuh tlak a lawi a lo nei mang rneg reng hleinem mawle.

‘’ Helai hmun hi dam takin I chhuahsan thei tawh lo ang!’’ kun reng chunga a rawn tih chuan hlauh vanga khur hlawk hlawk chungin Remruati thung chuan amah chu alo melh ve ngar ngar tawh a, a chesawn hleithei tawh der lo.

‘’ Tu nge inih a? Eng nge I thil sawi awmzia chu’’ tia a han zawh chuan a hmaa ding chu a rawn nui chhuak leh ta kur kur mai. Chutah, a lam hawiiin a rawn inher chiah tih ah chuan a mangram ata chu chu rawn harh chhuakin a khum chungah ngei khan a rawn thu chhuak ta zawt mai a. A thaw zui nghal hlawi hlawi bawk. Thlan tui hlirin alo bual huh vek avang chuan a puan hmuh remchan ang ang hmangin a han inhru fai leh thuak thuak phawt a, a mumang rapawm tak mai bawk kha a ngaihtuah chhunzawm ta neuh neuh. Awmzia a nei thei a ngem a hrethiam ta lo kher mai.

Lu na ber bur chunga tho chhuakin inhnuai lamah a chhukthla zui ve leh chhat chhat a. chutah, thutkhawmna pindanah chuan zan hmasa lawka rapawm taka alo hmuh tawh kha tleirawli ngei mai khan hmel hmel pu sang chung hian lo lawmin, alo be ta siam siam mai nia! A thlen tawpna chinah chuan ding khawng awtin, chu hmeichhia chu phawk fe chung hian a han melh leh ta vang vang phawt  a, ani lah kan nui sen sen chung hian alo be ve mawlh mawlh reng bawk si.

‘’ Hawh, infiam ang. E taka, ka hming chu Hriatpuii a nia, chuan , ka nau saw chu Thianghlimi a ni e. nang eng nge I hming ve’’ a rawn ti siam siam reng a. mahse, Remruati thung chuan tawngkaa chhang ta mai loin amah chu a zu kal hnaih ta sauh sauh phawt a, a mitah tak chiang em ema en leh chung hian

‘’ Nang hi!’’ a han tizawi deuh sap phawt a, Hriatpuii nui hmel pawh chu a tawp zui ve nghal ta hmak mai.

‘’ Nizana ka hmuh nu ngei kha nangmah hi ini tiraw. Engtin nge tunah’’ tih pahin Hriatpuii darah chuan a vuan zui chawt mai a, a taksa te chu a thlek kualsak ta thuak thuak bawk. Chutihlaiin kha tleirawl Hriatpuii thung kha chu alo la ngawi ngal reng thung a.

‘’ Khawnge nizan maia I hliam neih zozaite kha an awm tak’’ a han tih leh chuan chiang leh fiah em emin a mitah tak ala rawn en chho ve kiau reng a, a mitmeng ngawt pawh chu a rap duh tu tan chuan rapawm tia sawi theih te pawh a  ni ve ta awm e. mahse, tun boruakah rih chuan Remruati hian khatiang lam reng reng kha  a ngaihtuah thleng pha tawh meuh lo zawk. He tleirawl chunga thil thleng te leh a khawsak dan mak lutuk mawlh mai te hian an ti chi-ai zo vek rih a, a finfiahna tur a nei rih silo zawk a tin ni.

‘’ Khai le khai le! Tukthuan a ei theih ta e. lo kal khawm tawh ula’’ choka lam atanga rawn ti lang lang tu nu ber hmel an hmuh takah chuan an ni pahnih pawh chu chesawn ve leh thei chauhin, nu ber lam hawi khan an inher rem dun ta vat a. mahse, an bula lo ding ngawi ve reng Hriatpuii nau Thianghlimi thung khan a bula tlan phei nal nal pah hian ring angreng fe in,

‘’ Nu, mikhualnu hian UHriatpuii hi a hau a! A kawr te a en sak bawk’’ a han tih chuan Remruati leh Hriati chu an lo inmelh zui kawk thei a, nu ber pawh kha a ngaihna hrelo tih hriat fe hian a rawn ,eng phawk ve nasa ta hle bawk.

‘’ Eng nge awmzia? Eng thil nge thleng a’’  hlauhthawn hmel taka nu berin an ni pahnih a rawn zawh ve lai chuan thil awm dan a dik dawn lo tih hria in Remruati zawk chuan teisawn nulh pah hian,

‘’ Haw ka duh a ni. Ka haw ngei ngei a ngai tawh’’ a ti ta chung mai a, nu ber pawh chu a ngawi zui leh ta hmak mai. Mahse, reiloteah tun lawka thil thleng te kha theihnghilh zui ta niawm takin nui hmel pu sang chung hian nu ber bawk chuan

‘’ Engpawhnise tukthuan chu I kil phawt the ang u. Nula, kha lam kha chu dahtha rih la nakina sawiah kan khek zawk dawn nia aw’’ rawn ti leh zung zungin, Hriatpuii chuan dimte hian a kawr hak lai hmawrah chuan a lo pawhsak ve zeuh zeuh reng a, nia, an thu chu awih a tukthuan bar ve hmasak phawt chu a tha zawka hre lehin choka lam chu a pan zui ta phawt zawk a ni.

‘’ Lalpa, ka pa duhtak, ka fanu mawlh mai kha min han venhimsak hram rawh aw. Tunah te hian khawi hmunah nge a khawsak ve ang. Ka ngaihtuah zozai tawh em mai keizawng. I khawngaihna ka rawn dil mawlh mawlh e Lalpa, min lo venhimsak hram la, buaina a tawh loh nan I kutah ka rawn hlan nghal ni bawk rawh se. Amen!’’ tiin pi Rami chu thingthi meuha kutsuih chungin a pindan chhungrilah alo tawngtai mawlh mawlh a, a tawngtai zawh rual chuan a mittui tling piau tawh te pawh chu hru hul leh sawk sawkin thutkhawmna lamah a chhuak phei zui a, chutah chuan a laina hnai a pasal farnute ho leh Remruati pa nau te ho pawh chu an lo țhu kim thap tawh hlawm mai.

Thawk lak halh paha an bula va thut thlak ve pah in,

‘’ Kei chu mihring lamah chuan ka beidawng tawh. Nitin in Pathian hnenah ka thlen ve fo thin a, tawngtainaah chiah hian ka innghat tawh mai. A bak chu tihtheih nei pawhin ka inhre tawh love’’ ti halh halhin, a kun zui daih bawk a. a bula thu ve a nau chiah , Remruati nutei chuan dimtein a hnungzangah alo chulsak nghal hliau hliau bawk a, hmeichhe thenkhat la awm ve te pawh chuan a khat tawk hian an mittui chu an lo hru leh zeuh zeuh thin bawk. Chutihlaiin, Remruati pa te unau zinga naupang ber a pate Muanzuala chuan thawk rawn lak ve hak pah hian

‘’ Um, engpawh chu nise, police te pawhin an hna an thawk pah ve mek zel a, ti daih ila, kei leh hei, Thantea te hi kan tih dan pangngaiin naktuk chu khu lai  ‘Pa ngen ram’ an tih mai, ram pilril tha zet mai lamah khuan sa chan pahin kan zu teihawi thla dun chhin mai mai dawn emaw ni kan tia, chumi pah chua n duh leh Remruati sulhnu te a awm mial em tihte pawh rawn en nghal ila a tha tak anga’’’ a rawn tih ve takah chuan midang lo awm ve te ho pawh chuan a that an rin thu chu an lo sawi ve ta sap sap hlawm a, fimkhur tur erawh chuan an inchah uluk hle hlawm. 

Hemi ni vek hian Remruati pawhin tukthuan bar zawh hnu atang khan chu lai hmun chhuahsan dan tur chu a lo ngaihtuah ve nasa tawh mai a. in neitunu ber lah khan nui deuh sang chung hian

‘’ I thu thu ni rawh se. Helai hmunah hian englaipawhin kan lo lawm reng che a nia aw’’ ti chungin a thlah hlauh mai thung a, tichuan , thudang pawh sawi lo leh midang pawh chu ngaichang tawh lem lo in chu in chu chhuahsanin ram pilril lam bawk pan chuan a kal zui ve ta ngawt mai a ni. 

A hmazawna kalna tur awm ang angah chuan harsa tak chunga kal ve mawp mawpin, a thleng ril tual tual a, a bo zau tulh tulh a tihtheih awm e. A khat tawka thing tlu ruah ruah thin thawm te, sava hram ri te leh ke pen thawm niawm takte chu ngaihthla kar chungin a kalna tur chu a han belchiang pah ve zel bawk a, a nihna takah chuan khang a thawm hriat zozaite kha a tak hmuh tur awm hauh si lo thawm ringawt mai an lo ni zel tih a hrethiam chho tial tial a, a thluak a buai ta tulh tulh. A lo kalna lamah khan let leh dawn pawhnise khawilam nge kalkawng kha tih reng reng a hre tha thei tawh hauh lova, a bo kual nuai tawh. Mahse, a hriat dan ang anga kal chu chhunzawm zelin a tawpah chuan a chhuahsan hnu, kha chhungkaw maksak takte chenna in kawtah  bawk khan ava chuang chhuak leh ta nawlh mai le! Makti zet hian chu in chu a han thlir chho ren rawn phawt a, a thaw zui hak bawk. Khua lah chuan thim lam alo pan ve mek bawk nen a tawpah chuan beidawng zetin chu in chhungah bawk chuan ava pen lut leh ta nge nge a, an ni chhungkua pawh khan hlim tak leh pangngai takin an lo dawngsawng ve leh mai. A ril a tam leh tam loh te zawtin, tui in tur te an lo pe zui sawk sawk a, ava kalna kawng chungchang chu mak takin a them pawh hi an zawt zui lo a nih chu mawle. 

‘’ Khaw nge Hriatpuii’’ a han tih chuan chumite nupa chu lo inmelh deuh ralhin nu zawk chuan khap ban deuh chalh chung hian

‘’ A mu tawh a’’ a rawn tichhuak sap. Chuveleh Remruati chu in chung lamah tlan chho in Hriatpuii room thim em em maiah chuan a tlan lut nghal rawk thei a,

‘’ Min rhilh tur I nei. I thawh chhuah a ngai’’ tih paha a han sawi deuh nawk nawk chuan Hriatpuii pawh chu lo tho ve maiin, meng vai riai chung hian amah rawn kai tho tu Remruati hmel chu a han thlek chho leh veng veng phawt a, chutah

‘’ I lo kir leh ta nge nge maw! ‘’ ti zawi raihin hmun dang a melh nghal daih.

“ Aw ni e. helai hmun atanga ka chhuah theihna tur kawng hi min kawhhmuh rawh. I hria tih ka hria. Khami ni, min rawn hmuh chhuah ni pawh khan nang chuan khang chen chen kha rawn kal dan tur I hriaa, a dik tiraw, helai atanga ka chhuah theih hi a pawimawh takzet a nia aw’’ ti sawk sawkin Hriatpuii chu a sawi pah leh nawk nawk thin bawk a. mahse, Hriatpuii thung chuan za lo zeta lo țhen khum sak chung hian

‘’ Hria ila helai hmunah hian ka awm tawh kherin ka ring lo! Ka hriat bik loh vang alawm hetia ka awm reng’’ a rawn tih chuan Remruati thung chuan a uang emaw tiin lungawilo zet hian a han sawi leh det det phawt a,

‘’ Khawngaihin min pui lul rawh. I hriat angin nangmah ang tho hian chhungkua ka nei ve a, thiantha te pawh ka nei bawk. An ni ho chuan kei hi min ngaihtuah tawh dawn lutuk asin. Min pui ang tiraw?’’ 

‘’ Chhungkua ka nei lo! Thian pawh’’ a chhanna dawn zet chuan Remruati chu a țhawngin a tiphu nasa angreng hle mai. Phawk fe hian Hriatpuii chu a han melh leh tlawk tlawk thin a, mahse, zawh chian leh tuma alo inbuatsaih leh lai takin kawngka kha a rawn inhawng thut a, tuemaw hi room thim zet chhungah chuan hmawlh lian leh sei tawk tak keng chungin a rawn pen lut ta zan zan mai le! Chuveleh, Hriatpuii kha hlau in a khur chhuak nghal hlawk hlawk thei a, aw khur hlawk hlawk leh zawi angreng tak si hian

‘’ Biru vat rawh! ‘’ tih chiah chu a sawi hman. A rang thei ang berin Remruati pawh chu khum hnuaiah a tawlhlut zui a, room chhungah khan êng pakhatmah a inchhit loh avang chauhin chu mihring rawn lut thar pawh chuan a hmu thei lo tih a hriat mai awm e. A khum chunga la thu khur hlak hlak reng Hriatpuii pawh chu a thil tawn tur hre lawk karin a thu ngawi reng tawh a, a hlau a ni.

‘’ I sawi em? Thil zawng zawng hi ilo sawi chhuak leh vek hman tawh em’’ ti tuarh tuarh chungin nu tling niawm tak chuan Hriatpuii awm tha hle hle lai chu a hmawlh lian tak hmang khan a han hlap ri ta pawp mai a! A hmawlh lian tak mai bung hmak khawp khan a hlap ni ta berin Remruati chuan a hre nghe nghe.

‘’ Ka sawi lo. Ka sawi lo min ngaidam rawh’’ tap khur hlak hlak chunga Hriatpuii’n alo chhan ve te chuan chu nu chu a thin a rim tulh tulh zawk emaw tih mai tur. An thawm chu a rapthlak em avangin khum hnuaia la biru mek Remruati pawh khan a beng te alo hup a, awmngaihna a hrelo lek lek tawh zawk a ni. Tlema thawm a daih hnuin kha nutling bawk khan chang angreng fe hian

‘’ Tho hma ang che. Naktukah I pa a ramvak dawn a, sa eitur a rawn hawn ang buaipui a ngai’’ ti leh ringawtin a tawpah chuan a chhuahsan ve thei ta hram. Chuveleh, rang rang zet in Remruati kha a rawn inkhawh chhuak ve nghal zat a, khur dar dar chunga khum chunga lo la mu meng kar Hriatpuii chu a han thutchilh leh te te phawt a, a lainat ve takzet a  ni. Mahse, heng thil zawng zawng te hi engvanga thleng nge a hrethiam thei lova, thil awmzia hi a hre lo takzet a ni. Tun tut tuta han zawhfiah chu thil tih chi ber ni a a hriat rih loh avangin ngawi reng hian a chhuahsan ve leh ta phawt. Ngawi renga kalin a khum chungah chau tih hriat fe hian ava bawk zui ta thlawp ringawt a. A muhil thei ngut a nge maw.

Hriatpuii nu in Hriatpuii hnena a thil zawh kha eng chungchang nge ni ang. A nih loh leh, Hriatpuii’n chhungte ka nei tawh lo a tihte pawh kha eng nge a awmzia ni ta ang. He in chhungah hian thilmak inthup hi a lo awm chiah reng em? Engtin nge a hriatchhuah theih tak ang le,,,

A tuk khaw rawn var leh pawh chuan eng thiltha mah han thlakhlelh tur dang hi a rawn her chhuahpui chuang hauh lova, phut lo leh nguai em emin a thut hmunah Remruati chu ngawi reng hian ala thu ve tlawk tlawk reng a. chutihlaiin, Hriatpuii thung kha chu a harhvang thei ang ber hian in chhung dungah thil pawimawh tiin a teikual zak zak reng a, zan lama kut thlak hrep, kut tuar hnu a ni tih lang miah lo in tunah chuan a hmel pawh a hlim leh sang tawh mai nia. Chung thil ringawt te pawh chu Remruati tan chuan thilmak an tling tawk em em a, hliam leh pem neilo ang maia hetianga tuk tin mai a han khawsa leh thei thin hi a mak duh ve reng reng bawk e. chutianga a unaunu a chet buai em em lai chuan hmeichhe naupang Thianghlimi ve thung kha chu Tv hlui zet hmaah chuan ding in hla hlui a ngaithlaa, a lam hah hah reng thung a. midang te chu an awm ve pawhin a hrelo ni hial hian Remruati chuan a hre tawh.

Chumi nileng chuan chhuah dan tur ngaihtuahin a rilru a seng buai lehpek hle a, awm hle hle hleithei lo khawpin tual laiah te chuan a vei kual chhen reng ringawt tawh. An awmna piah lawka ramngaw pik leh thing ding hlira khat lam te chu hawiin a thaw hi a ipik hluah hluah reng tawh a, a phone a lo thlauh bo kher kher te chu pawi a  ti thar leh hluah hluah tawh zawk. Amah hringtu a nu kha a ngai em em a, a thiante bula khawsak leh an bula hlim taka awm ve leh te kha a chakin a thlahlel bawk a, tunah te hian an rawn ngaihtuah chhuak ve a ngem? Amah zawng turin an ke tal an rawn pen chhuak ve hlawm a ngem. Nge ni a, tu tan mah aa tangkaina nei lo ani ve mai hi a kalbo tak avang hian an lawm a nga hlim takin hmalam hun tur an thlir zawk tawh ni ang. Ni lo, a thil ngaihtuah dan chu duh lo in a biang te chu a han beng zui ta thek thek a, in chhungah a lut zui nghal daih bawk.

Tlai lo niin, chu In chhunga pa ber ram chhuak pawh chu hlawhtlin hmel em em hian a rawn haw ve ta bawk a. a sa kah sa niawm tak, la sen seng sung mai te chu an nu hnenah chuan pe chhawngin ani chuan fridge hlui zet chhungah chuan a lo rem khawm ve leh zung zung a. chung zawng zawng te pawh chu Remruati chuan ral khat atang alo thlir ve reng mai. Eng sa tak chu ni ang maw tiin alo zeldin vel mai mai a, chutia choka lam ringawt a a suangtuahna khawvel a lo chen kual tir lai chuan tuemaw hian a kawr hmawrah khan rawn pawtin, a harh phah ta zawk nghe nghe. Chutianga amah rawn pawttu a han en nak chuan Thianghlimi khan amah chu nui sang chung hian alo chhoh melh ve reng tawh chu niin.

‘’ Min infiampui la’’ a rawn ti lawi rat bawk. Remruati erawh thung chuan hrilhhai fe hian ani chu alo la en ve ngar ngar mai a, chutah, an piah deuh atang hian aw dang lo chhuak ve in,

‘’ Infiam hi nuam a ti thei lutuk a’’ Hriatpuii kha lo niin, Remruati chuan a melh zui leh tlawk tlawk. Nia, he nau hian mak danglamna tamtak a nei tih a hre thei a, zing karah chuan hlim hmel pu sangin tihtur awm ang ang a khawih thin a, a hmel hmuh a nuam thei hle. Mahse, chawhnu her atang hian a khawsak dan chu danglam țanin a hlim hmel pawh an bo ve tial tial a, a vun rawng te thleng mai chuan a dik lo, an chul riap tawh thin nimai hian Remruati chuan a hria. A hrilhfiah theih loh thil engemaw tak hi chu a awm chiang alawm.

Tichuan, zanriah ei hma tiin peih lo zet hian Thianghlimi pawh chu a infiampui ve ta mai bawk a, hetihlai hian Hriatpuii thung kha chu a bo zui leh daih tawh a, khawi lamah nge a tawmbo tak ang tih pawh Remruati chuan rin ngaihna reng reng a hre lo. A reh leh hmak tawh mai. Zanriah kil hunah pawh a tih dan ngai te in a hmel chu hmuh tur a awm lo chhunzawm nghal a, a chhungte hnena a chanchin a han zawh erawh chuan nu ber bawk khan hreh hmel zeta lo chhang lehin,

‘’ A damlo thin a’’ a ti zawi sap. Mahse, Remruati ngaih erawh chu a tha thei tawh hauh lo thung. Heng mite hian amah rawn chhanchhuaktu kha hmeichhe tleirawl ve ek ek țan tawh Hriatpuii chungah khan thil engemaw tak tih chu an nei tih a hrethiam. Ala ngaihruat thiam lo mai chauh zawk a ni.

Khua a rawn thim chiang tual tual a, Remruati ngaih chu a tha lo tial tial bawk. In chunglamah chho in a room piah chiaha Hriatpuii room kawngka lo inhawng sa hiai lam chu pan phei zelin, thawm dim tak hian kawgka chu a han hawn zau belh hlek a, a dan ngai te bawk khan room chhung erawh chu alo thim phui tha leh mup mup tawh kher. Chutah, light on zawn tuma thawm dim thei ang bera a pen luh leh den den lai tak chuan amah rawn be tu an awm ta thut

‘’ On suh!’’ a rawn ti țhat mai a. ani pawh chu a ding zui nghal chawt thei. Mahse, khatianga rawn ti tu kha Hriatpuii a ni tih a hriat hnuah erawh chuan thaw zui deuh sawng sanwgin khumah ava thu phei ve ta zawk a. hriatpuii chuan rang takin a kut chu alo chelhsak nghal vat bawk.

‘’Engvangin nge light on chu I duh loh a’’ a han tih chuan zawi ser sawr tak hian Hriatpuii chuan alo chhang let ve a,

‘’Min rawn hmu thei lo se ka ti! Tihian ka biru ve nimaiah ka inngai bawk’’ lo ti letin, Remruati chuan maksak alo ti leh nasa tawh mai.

‘’ engvangin nge mahni in chhungah pawh hetianga I khawsak fo thin. Zan riah kilnaah nise ka hmu ngai miah lo che a, eng nge thil awmzia. I chungah hian eng thil chiah nge thleng mek tih hi min hrilh rawh’’ ti khur dar darin Hriatpuii kut vawt leh cher em em mai te chu a han humsak ve ta ngawt ngawt bawk a. Thil kal dan hi mak a ti tulh tulh mai niin a lang.

‘’ Ih, eng lo, an ni hi ka nu leh pa te tak tak an ni lova! Thianghlimi pawh hi ka nau diktak a ni lo bawk. I hrethiam em? Kei hi fahrah neitu nei lo mai ka ni tihna a nih chu!’’ a sawi zawnga  a aw a lungchhiatna rawn lang chhuak te thleng mai khan Remruati chuan a hrait hmaih thei hauh lo. A chiang em a tin ni.

‘’ Chu chu min hrilh chiang rawh. Engtin nge helai hmun pik leh fianrial lutukah hian in khawsak theih reng reng a. chuan, khawiah nge I nu leh pa te chu’’ lo ti ve sawk sawkin, Hriatpuii’n zawi sapa

‘’ An thi tawh’’ a ti hman chiah ang tih rual chuan room kawngka bawk chu rawn intheh hawng lehin, tuemaw hi hmawlh keng chung bawk khan room kawngka zwnah chuan a rawn ding ngawi leh ta run mai a. Rang lutuk hian Remruati pawhin a tih dan ngai te bawkin khum hnuai lam chu a pan zui leh nghal zat bawk.

Chumi hnu chuan thil reng reng chu a hma ang tho kha ni lehin, khum chunga thu mek Hriatpuii țap vawn vawn thawm te leh, a na tuar rak ri te chuan khum hnuaia biru mek Remruati ngaihtuahna chu kai harh zawkin a insum hleithei ta thlawt lova, rang tak hian a bihrukna khum hnuai atanga rawn dawk chhuak zawk chungin,

‘’ hey, tupawh chu ni la, khatianga naupang kutthlak theihna dan kha I nei lo hrim hrim aw’’ tih pah hian Hriatpuii kut thlaktu , nu ber ngei mai chu a rawn namsawn ta rawk rawk mai a, nu ber pawh kha alo rak zui ve țhat mai. Tichuan, rang takin Hriatpuii kutah chuan ava chelhsak leh chat a, room chu tlanchhuahsan dunin in hnuailamah chak tak hian an tlan thla zui dun hlawk hlawk a, rooma la awm mek nu ber pawh kha ring tak takin rawn au chhuak ve mahse inhnuai lama lo awm a pasal fanau te chuan hre tha thei hek lo le, chutianga an ni pahnih rawn inkaithla hlawk hlawk te pawh chu an infiam emaw tiin an lo en liam mai a, pawna an tlan chhuah thleng pawhin umzui tumna reng reng pa ber pawh khan a nei hauh lo nia.

Tichuan, chu zan khaw thim leh khaw dur karah chuan hlauh dang pawh sawi thei tawh lo in an ni pahnih chu ramhnuai lam kawng zelah chuan an tlan dun ta chiam chiam mai a, hah pawh sawi hleithei lo khawp chuan an hnunglama thil awm te hrereng in chung ramhnuai pik zet lamah chuan an tlan char char ringawt mai a ni.

Thui fe an tlan tawh ang tihin Hriatpuii chau lutuk tlan thei tawh lo chuan thu kam khat pawh sawi lo hian amah vuantu kut chu phelhin lei charah chuan thuthmun a rem deuh ta sawk sawk mai a, a thaw zui nghal hlawp hlawp mai bawk. Chutihrual chuan Remruati pawh kha ding zui ve chawtin, kawng dawm meuh hian a han thaw chhuak ve ta tak tak maia, hah dun tak hi an ni e.

‘’ ka tlan lui thei tawh lo’’ thei leh theilo a Hriatpuii’n a rawn tih chuan Remruati pawh khan thawk lak halh pah hian

‘’ Kan tlan luih hram hram a ngai. I hrelo em ni, an ni khan min rawn um phak vat dawn asin’’ alo ti ve nghal zat a. mahse, Hriatpuii thung chuan reilote a ngawih leh det hnuah zawi sap hian

‘’ Kha in ah bawk khan kan let leh tho tho a ngai dawn!’’ a rawn ti leh ta tlat a nih chu! Remruati chuan a ngaihna a hrelo em em a, a rilru pawhnise a chi-ai chhe zo vek lo chauh tawh.` Kha inah khan engtikawng maha kir leh hi a duh tawh lova, a let leh a nih vaih zawngin amah mai ni lo, Hriatpuii chen hian an that fel hmak lo ang tih pawh a sawi theih loh tlat a ni. A duh tawh teuh lo mai.

‘’ Engvang chuan in nge kan kir leh a nga? Ka duh tawh lo. Ti rawh, helai hmun atang hian ka hruai chhuak ang che’’ tih paha kalpui mai a han tum lai chuan Hriatpuii thung chuan la thut beh tlat pah hian sawi tum nei niawm takin a kâ te chu a lo ang deuh zuau zuau hman a, mahse, chutihlai vek chuan an hnunglam thim chin atang hian an sam ve veah chuan rawn țham sak tu awm thutin, nghet zet hian an chelh tlat a, chu zan thim leh reh duk hnuaiah chuan khawilam nge an pan pui dawn tih pawh hriat miah lo in an hnuk dun ta hawl hawl mai a nih chu! Rak nasa dun tak an ni e.

A tawpah chuan kha inah bawk khan hnuk lut lehin, an pahnih chuan in chung lamah hnuh chhoh zui an ni a, tichuan, room ruak hlui leh hnawk zet pakhat chhungah chuan khungbeha phuar beh dun niin, pawnlam atang an la kalh khum zui bawk a. Hetihlai hian an kâ erawh kha chu hup phuisak an nih loh avangin an țe dun tuarh tuarh thei a, mahse, chung lai hmunah chuan anmahni tanpui tu tur an lo kal dawn lo tih a chiang sa bawk nen, anmahni mantu te pawh khan chu chu hrereng in an thawm zozai te pawh an ngaithla liam vel mai a tihtheih awm e.

Theihtawp chhuaha au chung chuan an phuar behna hrui hrawl em em te pawh chu tal phelh tumin han bei ve bawk mahsela, awmzia a neih loh em avangin a tawpah phei chuan Hriatpuii khan zwi sup hian

‘’ I tha chakna kha khek zawk rawh. Awmze nei loah kan chakna te hi hmangral tawh lo ang’’ rawn ti khauhin, Remruati pawh chu a ngawi zui ve maia . He nau hian a thil tawn apiang mai te hi a dam zawng hlirin engtin nge a hmachhawn theih zawk a hre bik lo. Makti deuh a amah chu melh vang vang chungin

‘’ Helai hmun hi chhuahsan kan mamawh alawm. I hria em, khang I nu leh pa, ni leh lo, an ni pahnih khan keini hi min that hreh hauh lovang tih hi hre ta che’’ a han tih chuan Hriatpuii chu za lem lo tih hriat tak hian a lo nui ve mai a. A thaw zui nghal hak bawk. Chumi hnuah lunglen hmel em ema tukverh lam hawi pah vang vang chung chuan

‘’ Ka nu leh pa te kha laa dam se la chuan’’ rawn ti chuai raihin, Remruati beng verh zawng tak a lo ni bawj a, thil awmzia leh nihphung t hi a zawh chhuah a hun tawh takzet tih a inhria,

‘’ Ti the, I nu leh pa te chanchin chu chipchiar deuhin min han hrilh ve ta che. An boral hnuah an ni hian fa angin an la che nge’’ lo ti ve nghal zatin, Hriatpuii tung chu ala chesawn eih lo a, tukverh lam hawi chung khan a khat tawk hian a rawn thaw leh halh halh thin ringwt. Nakin deuhah chuan,

‘’ Ni love, mi kut tuarin an thi a ni! ‘’ a rawn ti zawi leh ta sap. Remruati chu a bo thuk tual tual hi a ni ber e. khap fuk fuk chung hian amah Hriatpuii chu ala melh ve vang vang reng a, thil awmzia chu chiang takin han sawi law law sela alo ti tawh kher.

‘’ Tuin nge that a. A that tu chu in man chhuak tawh em’’ lo ti ve zatin, Hriatpuii chuan a lu chu alo thing leh mai a. A mitmenga lungngaihna tamtak awm chung chuan a nui chhuak leh sen sen phawt

‘’ He in hi ka pa pa, ka pu khan a pa hnen atanga a rochun tawh niin, a chhehvela ram zau takte pawh hi a zah chiah chu hre lo mah ila, zau tak thleng khan kan chhungkaw ram a ni ve bawk. Tichuan, in thlahchhawng zelin ka pa khan a pa, ka pu hnen atang khan a chang chhawng ve leh ta a. khawpui chhungah pawh khawsa duh lo in helai hmunah hian chhungkua in kan khawsa chho char char a, chakkhai lam nan pawh lirthei pakhat kha kawl ve thin in, a tlan theihna tur tawk vel lek kawng  pawh kha an sial ve thin. Tichuan, hun rawn kal zelin ka nu leh pa te inneih hnuah kei hi a hmasa ber leh a awmchhun ni turin ka lo piang ve ta a. chhungkaw hlim leh inlungrual em em ni thin mah ila chhungkua chu a dam kim reng theih loh avangin tikhan pakhat te tein kan inboralsan ta pheuh pheuh hlawm a, a tawpah chuan kei leh ka nu leh pa te erawh chu helai hmuna khawsa tura hnutchhiah hi niin, ka pi leh pute kha ka hrehciang lutuk hman lo na a, ka nu min hrilh dan chuan mifel tak niin , keipawh hi an tu hmuh chhun tihtakah min duat sual lo chauh a nih hmel. Tichuan, hun rawn kal zelin ka kum 8na piancham alo thlen ni chiah hian nupa niawm tak, bag ak bawr em em te hi kan inah chuan an rawn chuang lut ta hlawl mai a! A tirah chuan sumdawng an nih thu te sawiin, mamawh kan neih leh neih loh te min zawt a, kan in ah chuan zan khat tal riah ve pawh min dil nghe nghe a nih kha. Ka nu leh pa te kha mifel leh tha lutuk mai an lo nih avangin an ni pawh chuan an lo remtihsak mai a, an thil zawrh niawm taka an sawi bungraw maksak deuh deuh te pawh chu an leisak ve ta nual bawk. Tichuan, a zan khatna chu pangngai taka hmang zo in, a tukah pawh chuan haw chu an la tum ta reng reng lo mai a! Chhuanlam chi hrang hrang siamin zan khat dang riah leh chu an beisei ta tlat. An lan dan leh awm danah khan misual an nih loh hmel em avangin ka nu leh pate pawh khan ngaihtha takin an lo mikhual ka ti mai. Mahse, an zan hnih riahna zanah chiah hian buaina chhuakin, zanlaiah ka nu au tuarh tuarh thawm chuan min kaiharh ta nge nge a, room atanga ka han chhuah ve nak chuan ka pa kha an room zawn corridor ah thisen nena inchiah piahin alo mu khawng reng tawh! Chutihlaiin ka nu thung kha chu a kut hnungkhirhsakin an man bet tlat a, mittui tla pur chung hian kei chu min rawn melh țawk țawk bawk. 

Hmeichhe naupang kum 8 chiah ka la ni ka tih tawh kha, ka pa ber an tih hlum tak siah chuan ka nu kha chu awlsam takin in chhung atang an hruaichhuak thei a, kei chuan room tukverh atang ka hmuh theih chhung chu ka lo thlir ve char char bawk. Tikhan ramhnuai lamah kalpuiin reiloteah an ni nupa chauh chu an lo kir leh ta a. chutah chuan kei hi an fanu ka nih tawh thu te, kan in leh kan ram zau takte pawh hi an kuta a awm vek tawh thu te chu rawn sawiin, kei chu ka tap a, khami ni atang khan hlim taka nuih leh ni hi ka nei thei tawh ngai lova, kutthlak tuarin an thiltih kha sawi chhuak lo tura vauna pawh ka dawng nitin zantin bawk. Fa nu an han neih hnu ngat phei kha chuan kei chu tih duhdah ka ni nasa lehzual a, naute hmel takngial pawh kha min entir an remti lo thin. Ka nu kha ka ngaizual thin em em a, alo lan hun tur nghakin nitin zantin hian ramhnuai lam saw ka thlir a, mahse, alo lang tawh dawn lo tak tak a nih ka ring. Vanramah a kal tawh a niang’’ a mittui luang thla zaih zaih chu hru in a insut ri leh hlap hlap thin a. chutia thil awmzia a han hriat fiah takah chuan Remruati pawhin a khawngaih zual ta em em a, theih chu nise kuah vang vang hial pawh a chak ta ve ang.

‘’ A nih leh engvanga he in chhunga min hruai lut hi nge inih . Khami zan khan ramhnuaiah khan eng ti turin nge I rawn kal’’ tia a han zawh chuan Hriatpuii chu alo nui leh var var phawt a.

‘’ Tlai tin hian a rukin ramhnuaiah sawn ka nu zawng turin ka chhuak thin a, ka haw hnuah erawh vuak ka tuar ziah thung. Mahse, chuti chung pawh chuan luhlul chhuahin beiseina nen ka nu zawn hna chu ka thulh phah ngai chuang lo. Khami ni khan kha lai hmunah khan nikhaw hre lo in ilo mu hlawm reng tawh si a, tanpui dan tur thlawt che kha ka hre lo a ni e. A chhan chu, I haw theih dan tur kawng kha hrilh tur chein kawng chin ka hre tawh silova, tanpui I mamawh em em tawh bawk si nen min hrethiam hram dawn nia’’ inthiam loh hmel taka a rawn tih chuan Remruati pawhin a han ngaihtuah ve a, a dem lutuk hran bik ta lo ve.

‘’ Ka lawm lutuk e. mahse, ka venghim in ka chhanhim thei ta chuang silo che a, ka tihpalh lutuk’’ mittui tling piau chunga a han tih ve chuan Hriatpuii thung kha chu ngaihnobei em em hian alo nui ve leh sen sen thung a. 

‘’ Ila ti thei em em ang. Inthiam lo duh suh’’ lo ti ve in an han ngawi zui leh ta vang vang phawt a. chutihlai chuan in hnuai lamah khan inhnial thawm hria in, nu ber kha thinrim tih hriat em em hian a ang deuh buan buan reng a, a ri bur bur reng bawk. An ni pahnih pawh chu ngawi reng hian hamhaih ru tak chungin an lo inmelh leh hrek hrek thin a, sawi tur reng hi an hre tawh lo a ni ber e.

An thutna bula tukverh tereuhte inkhar phui tlat chu pawnlam boruak awm dan an hmuh theihna awmchhun niin, tunah chuan khua pawh a var țan titih tawh a, thing ler sang tak tak te pawh chu fiah lo ruaiin chhum zing karah chuan an lang tan ve tawh bawk. 

Tunah tak hi chuan hnuailam thawm pawh kha a reh ve leh tawh a, an mu bo zo ta a nih hmel e. chutia muthlu pah titih a thil lo thleng tur an nghah ve rauh rauh lai chuan an awmna room kawngka ngei mai chu pawnlam atanga rawn khawihtu an awm tih hriat takin a ri leh rek rek thin a, an ni pahnih pawh chu tu nge lo kal dawn tih ngaichangin thinphu dep dep chung hian an lo hawi hrek hrek reng tawh mai. Chutah, kawngka bawk chu zawitea rawn inhawng riai riai in rin loh tak mai hian hmeichhe naupang Thianghlimi kha a rawn dak ta kar mai a! Remruati leh Hriatpuii te tan chuan thawk huaina tham a ni ngei ang.

Thianghlimi chu ngawi reng leh muangchanga rawn lutin muangchang bawk hian Remruati awmna lamah chuan rawn tawlh hret hretin, pangchang aw zawi sap hian

‘’ Min infiampui a ka lawm e’’ tih pahin Remruati chu a rawn kuah zui leh a, Remruati thung chuan mak alo tih deuh hlek avangin mitmeng hmang hian Hriatpuii chu thil awmzia ava zAwt thin a, Hriatpuii pawhin hrethiam taka a lu chu lo buk khum nghat pahin

‘’ A lawmthu hrilh ve na che a nih kha. Kan chhuah vat a ngai’’ lo tiin, zawimuang hian hian Remruati pawhin amah kuah bet chial tu Thianghlimi kuahna ata chu zawimuanga inla hrangin, a mitah tak chiang em ema en kiau chung hian

‘’ Bawihte, ka thilsawi tur hi uluk takin lo ngaithla rawh aw. Tunah hian kan inah ka haw ngei ngei a ngai a, chuvangin ka kut phuarna hrui hi min lo phelhsak rawh le’’ a han tih chuan Thianghlimi chu naupang mai tihtakah, a mitah chuan mittui rawn tling nghal piau in, a men ta piai piai mai a,

‘’ Min hawsan dawn maw?’’ lo ti let ve leh te tein, Remruati haw daih tur chu a phalloh hmel hle mai a, Hriatpuii pawh rilru hmanhmawh tawh nen a khat tawk hian a lo thaw ve leh hak hak thin

‘’ Aih, eng lo, ka lo kal leh ang. Ka bungrua te, I inkhuallemna turte kha ka la lawk anga ka lo kal leh ang, chuan, kan infiam dun char char thei tawh dawn alawm. Hmanhmawh la’’ a rilru hneh tum taka nui sang chunga a han tih leh takah chuan nui sang chung leh phur em emin Thianghlimi pawh chuan a lu chu alo bu ve ta nghauh nghauh mai a. A phuarna phelh tum chuan a theihtawp chhuahin a bei zui ve ta mai bawk. Naupang mai tih takah an phuarna hrui phelh chu a harsat angreng hle mai a, a bei rei fu bawk nen, a nu leh pa te kha rawn harhin an rawn hriat chhuah phah mai ang tih chu an hlau ru dun zek zek tawg a, mahse, chutia bei ve ta reng na na na chuan a tawpah zawng a kut phuarna nghet fahran mai chu bakcheh te nena tangkawpin a phelhsak ve thei ta hram a, a inphelh ta tih rual rual chuan Hriatpuii phuarna pawh chu phelhsak ve leh zung zungin room atang chuan an tlan chhuak zui vat. Tichuan, thawm dim em emin corridorah chuan an phei dun ta dan dan phawt a, chumi hma chuan an hnunga lo zui ve zel tu Thianghlimi kha bengchheng lo tura hrilhin in hnuailamah an tir thla leh te te phawt. Nu ber leh pa berte room chu kal pelh mai tuma Remruati’n ngaihtuahna alo siam ve lai chuan a hnunglamah Hriatpuii khan a rawn pawt ta nawk nawk mai.

‘’ Ti nge khatia kal tlang mai I tum ngawt. An ni saw kan dah that hmasak phawt an ngai alawm’’ a rawn tih chuan amah chu phawk fe hian alo melh hmasa leh te te a. a hrethiam lo a ni. Alo rinlawk dan chuan hetia an muttui lai tak hian pawnah chhuakin ramhnuai lamah khan hawna kawng tur zawng chawpin an tlan chhia ang chu alo ti ru ve a, mahse, a ngaih ang ngawtin thil hi a awlsam lo a a kal dawn hauh lo bawk tih a hrethiam chiah.

‘’ Khawih zui kher chu an ngai emni. Kan kalsan thei reng alawm’’ zawi angreng taka a han tih ve chuan nasa zet hian Hriatpuii khan a lu chu alo thing ve nawk nawk thung a. A hlauhthawn luatah a mittui te pawh an tling zui piau thei nia.

‘’ Ni lo, an ni saw I ngaih ang ngawt mihring kha an ni lo. Helai hmun I rawn thlen hma kha chuan nitin zantin in an biak setana hnena inthawi turin ramhnuai kawngah sawn an kal dun thin a, eng lo, setana betu niin, helai ram pawh hi setana lalram turin zau taka buatsaih an tum bawk a, chumi chu an duh vang alawm ka nu leh pa te pawh kha an kawng daltu nia hria in an tihhlum tak daih’’ a rawn ti leh ta a nih chu! A thu hriat thar avang chuan Remruati chu a khur ru zaih zaih tawh a, engtia tih chi nge a hrethiam ta lo. A mitmu chauh chu ti che kualin a meng kual zui ralh ralh reng a, a hlauthawng zual ta ngawih ngawih. Chutah, Hriatpuii bawk kha rawn tawng chhuak ve lehin,

‘’ Anni hi an thi te a nih ngawt loh chuan engtikawng mahin khaw chhungah pawh I let leh thei lo ang. I mit kha an tih delsak tlat tawh che a, haw na tur kawng pawh I hmu fiah thei lo zo a nih kha. An thi a nih erawh chuan ramhnuai thianghlim leh ralmuang tak kha alo ni leh thei dawn a ni’’  rawn ti lehin, kut khur dar dar chung hian anmahni phelh nana  a nau in a hman bakcheh ngei mai kha Remruati kutah chuan muangchang hian a han hmehbel zui ta bawk a. A mitah chuan chiang em ema rawn en chungin an ni nupa mawlh mai chu thahsak hram turin a ngen ngawih ngawih tih pwh a hriat theih awm e.

Chutiang na na na chu a haw theihna tur kawng awmchhun a nih chuan tiin khur dar dar chung hian bakcheh pawh chu a han hum nghet ve ta sauh sauh mai a. Tichuan, a kawng dal sak tu, chu nupa sual leh rapthlak ru tak te mutna pindan lam pan chuan thawm dim takin a kal zui ta nghal a ni. Tin, Hriatpuii pawh khan a hnungah rawn zui ve zelin inveng ru reng hian alo awm ve bawk.

‘’ A pasal saw khawih hmasa rawh. A thin hnunah tak sawn na takin vit ang che’’ rawn ti leh sar sarin, khum chunga mu, tui em ema muhil mekte nupa lam chu muangchang hian a han hawi ve leh te te phawt a, a hmabak chu hreh takte in a hreh a ni. Mahse, engkim thatna tur a nih zia hria in thawmdim leh muangchang hian pa zawk mutna lamah chuan a inher kual ta riai riai a, a kuta bakcheh pawh chu a hum ruh tawh angreng hle. Tichuan, pa ber mu hnar suk suk lai chu uluk taka melh vang vangin a bakcheh hmang ngei mai chu a han tin leh vang vang phawt a, chutah, a tum lawkna zawng zawng bo vek khawpa na leh rapthlak hian pa ber thin hnun tak chu a bakcheh hmang ngei mai chuan a vit tlum zui ta thawih thawih mai le! Thisen te chu rawn pik chhuak nghal puat puatin thawm pawh a chhuah tha hman lo ngei ang, a thi tih chu chiang taka a hriat hnuin ngawi renga lo ding mek Hriatpuii lam kha ava hawi phei leh zawk phawt a, ani chuan inring renga awm chung hian rap hmel zetin amah chu alo melh ve ngar ngar mai. A rinai taka a thil tih chu a hnehsawh leh si avangin țhen deuh sak chung hian nu zawk mutna lam pawh chu phur ru takin a han pan chhunzawm leh mai a, mahse, nu zawk kha chuan an thawm te chu lo hria in a rawn harh hman ta tlat mai le! Thil thlen dan a hmuh rual rual chuan rang zeta rawn inperh tho nghalin, eng thil nge an tih tih chu chang zet hian a rawn zawt nghal thuai bawk a,a mitmeng a rum sa bawk nen, an ni pahnih pawh chu hnung lamah an tawlh let ve zawk thei hial.

‘’ Nang hian ka in chhungah tual I that a maw!? Ka inah rawn lutin ka pasal min rrawn thahsak a maw!? Khaw maw bakcheh kha rawn la the. Eng tiang taka na nge tih hi I hriat duh chuan ka lo vit ve chhin dawn che emni?’’ rawn ti khur khurin a rawn tho chhuak zui ta sawk sawk mai. An ni pahnih pawh chu tawlh hnung zui leh rawk rawkin corridor lamah an tawlh chhuak titih der tawh a. chutah, nu ber chuan englai pawha a inchhawp thin dawhkan chunga chemte hlui ve tawh tak ban zauhin, an ni pahnih chu a rawn veh let ve ta thung. Remruati hlau mangang tawh chuan he hmun atanga dam taka a chhuah leh theih pawh hi a inring tawh lo zawk hial a, a tuemaw ber hi chu an thi ngei dawn niin a hre bawk nen, a khur chhe titih der mai. Mahse, Hriatpuii thung kha chuan chuti maia tlawm chu alo tum ve awzawng lo thung a, thawklehkhatah a nu chu va bei thutin a chemte ken lai chhuhsak tum chuan an inchai zui ta bian bian mai a, chuveleh, chutia a buai lai chu Remruati pawh khan tanpui a mamawh tih hria in an lamah chuan a huaisenna zawng zawng sawm khawm chung in a bakcheh ken lai nen khan a tlan phei zui ve rawk a, chutihlai chuan nu ber khan Hriatpuii thung chu room bang det dawt khawpa na hian alo paih leng dawrh bawk a, mahse, Remruati thung chu inti paukhauh luiin chutianga a nu ber insaseng theih loh lai, Hriatpuii ringwt a buaipui lai tak cjuan a hnungzangah khan na hian alo vit zui ve leh thawih mai. Meng pual awk awk chungin amah vit tu awmna lamah chuan a rawn inher let nghal țual țual a, a kâ atang te chuan thisen te pawh tlem lo tak chu a rawn chhuak zui ngiai ngiai thei. 

A awm dan tur ngaichang paha inring reng chunga alo awm vang vang lai chuan nu ber na tuar awmngaihna hre tawh lo chu inhnuai pan thlakna step lamah khan vak pheiin, stepah chuan a tum lawk pawh awm miah lo hian a lum thla zui ta bawp bawp mai. Step tawpna a thlen meuh chuan a ring ruh sawh tliah belhin dam khawchhuahna ngaihna reng reng a awm ta lo a ni. Chutia a thi meng kur mai chu hmuh hrehawm tiin bangkil lama na tuar a rum mek Hriapuii awmna lamah khan a kalsan ta zawk a. reilote chhung an inbuaipui leh hnu chuan Hriatpuii pawh chu rawn pangngai ve leh maiin a rawn thu chhuak thei ta hial. Thil thlen dan kimchang a han hriat takah chuan lawm avangin a nui dawn emaw tih laiin a mittui zawk chu a rawn tla ta ngiai ngiai a, tap hawm hawm chung hian amah chhan chhuaktu a hmaa thu mek Remruati chu kuah bet thlawpin a insum thei lo chu a tap chhuak deuh hak hak reng a, tihngaihna hre vak lo chung hian Remruati pawh chuan alo kuah let ve ta ringawt.

Tichuan, Hriatpuii thurawn angin ruang pahnih te chu an hal ral leh te te hnuah Remruati pawh chuan haw mai chu a rilruk tha leh ta a. 

‘’ min zui ula ka bulah in awm daih dawn alawm’’ tia Hriatpuii a sawmna tawngkam te chu zahawm hle mahse Hriatpuii thung  chuan a zawmsak thei hauh lo thung. A nau Thianghlimi chu kuahin, mittui tling piau chung hian an hmaa ding mek Remruati chu a han melh chho țawk țawka, a lu a thing zui mat mat mai.

‘’ ka thei lo a ni min hrethiam rawh. Helai ram hi ka chhuahsan thei lo. Ka nu leh pa te lu nghahna hmun leh an sulhnu ka hmuh theihna awmchhun a ni a, ka than lenna hmun a ni bawk nen, khawi hmun dangah mah ka kalsan thei lo’’ tiin a nau leh a neihchhun lo ni ta Thianghlimi chu kuahin, ani Thianghlimi pawh chuan rilru hahdam tih hriat tak hian a unaunu chu nuih sen sen chungin alo kuah let ve mai bawk. Chutiang na na na chu a khaw tlai tak tak hma hian kalsan a tha tih a hriaa, Remruati pawh chuan lawmthu te hrilh leh mawlh mawlhin a kalsan dawn ta a ni. Ramhnuai lam hawi chunga kal mai a tum lai takin Thianghlimi khan alo be ding leh lailawk a, a aw sin rat chung khan

‘’ Inkhualtelemna tur kha lo keng la ilo haw leh vat dawn nia aw’’ lo tiin, harsa ti tak hian Remruati pawh chuan mittui karah an ni unau inkuah riala ding te chu en vang vangin a lu a buk khum ta nghat a, a kalsan zui thei ta hram a ni.

Ramhnuaiah chuan Hriatpuii hrilh lawk tawh ang tak tak khan mihrng kal theihna tur kawng pangngai tha tak mai hi alo insial chho ruih tak tak a, a hma kha chuan kan misual nupa te vang khan eng kawngmah hmu thei lo in a kal risk pawp pawp a nih kha.

Khua a thlen hnuah chuan mahni in lam pan nghal nal nal in, a chak thei ang ber hian a kal a, a nu mawlh mai kha hmuh hlan a nghakhlel takzet tawh a ni.

An in chu thlengin, muangchang hman a ni tawh lo. Kawngka a sawi zui dawt dawt a, chuta a nu in kawngka a rawn hawn ruala, pawnlama a fanu bal pawr zeta lo ding a han hmuh thut takah chuan awmngaihna tak pawh hre lo hian a zuang zui tawr tawr thei a, an nufa chu inkuahin an tap dun zui bawrh bawrh thei. Thildang reng reng hi a ngaihtuah thei tawh lo. A fanu mawlh mai chu thlah hleithei lo in a kuah bet chawt reng a, a hnuk kual hi a ni ta ber awm e. a hlim lutuk leh lawm bawk si chu a â vek mai ang tih pawh hlauhawm zawk tak a ni.

A nih tur ang ang niin , a thlen tur ang ang te a thlen hnuah, an nufaa thlamuang taka zan riah an lo kil lai chuan Remruati pate Muanzuala nupui kha in chhungah chuan rawn lut thutin, tap pur chung hian an chaw eina dawhkan bul lawkah chuan a rawn thingthi zui ta hnawk mai a. An ni nufa pawh chuan an lo buaipui chhunzawm ve vat bawk.

‘’ Sangi, eng nge thil awmzia? Awi, ka fanu lo haw tawh chungchang pawh ka la rawn hrilh hre hman lo che u a, eng nge thil awmzia ni a’’ pi Rami chuan lo ti nghal zung zungin, chutah, Sangi chuan insut rik hraih pah hian harsa tih hmel takin,

‘’ Muanzuala leh Thantea te ram vak kha tun thlengin an chin hriattur ala awm lo a ni! Ni hnih a liam tawh a ka mang hi a ang em mai. Engtin nge ni dawn ka u’’  a sawi zo chiah tihin Muanzuala ramvah pui Thantea, Remruati putea ni bawk chumi nupui chu thaw hlawp hlawp chung bawk hian an in chhungah chuan a rawn tlan lut ve leh rawk rawk mai a, Sangi rawn sawi zawh chiah a pasal bo thu bawk chu rawn sawi ve lehin, an ni pahnih chu an tap dun ta tlawk tlawk mai le. Remruati nu pi Rami tan tak chuan a luhaithlak duh angreng hle a, a tihngaihna hre lo chuan an inah chuan police ko in report an ziak a, an ram vahna hmun tur nia an sawi ‘Pa ngen ram’ te pawh chu dap sak hram turin an ngen ta mawlh mawlh bawk a  ni.

‘Pa ngen ram’ tih hming an han sawi rik takah chuan Remruati ngaih chu a tha thei ta hlek lo lehnghal a, a chhan pawh, chu ram chhung buai chuar leh maksak zet atang chuan ani ngei pawh hi harsa takin a rawn chhuak ve thei hram a nih kha. Ngaihtha lo zeta awm in, a nileng hun hman te pawh chu an tinuam lo zo vek tawh a, a patea leh a putea te mawlh mai chu nungdama chung chen chen chu lai ram chhunga an awm theih chu a ring tawh lo hulhual a ni mahna.

Ni khat leh zan khat tal tawp police hoin theihtawp chhuaha an zawn hnu chuan report mak leh deng khawng zet hi rawn hawn in, ruang tihtur pawha mawi lo, an lu leh an ke bung chauh mai chu ‘Pa ngen ram’ ah ngei mai chuan zu hmuchhuakin a bak erawh chu Sa hram velin an pu darh tawh a nih te hial an rin thu an rawn thlen ta ringawt a! Chu chanchin zet chu khawpumah a khat hnehin a chhungte mawlh mai chuan an tuar thiam lo angreng hle bawk a, an na ngawih ngawih hi a ni ber e. Remruati erawh kha chuan alo rin lawk tawh thil a nih angin tawrh dam dan a thiam angreng phian a. mahse, thil pakhat awih theih loh leh rin loh deuh a neih erawh chu a patea te taksa bung hrang hrang kha sa in a put darh theih hi a ring lo hulhual. A awih lo hlawm tawp a nimai e. 

A chhungte sawi dan atang chuan an bo hun kha a han chhut kual chhin vel a, nia, a patea ten khu lai ram an rawn pan ni chiah khan Hriatpuii pahrawn pawh khan ram chu vak ve in, tlai lamah sa hrang mak tak tak nen a rawn haw a, a nupui pawhin hlim em em in fridge hlui leh țawih tawh takah khan alo khung tha mawlh mawlh a nih tak kha! Chung thil vel a han ngaihtuah chhuah chuan awm hle hle thei tawh lo in in chhung atang a tlan chhuak deuh nulh a, police staion lam a pan nghal vat bawk. Chutah chuan zah pawh dawn thei tawh loin kha ramhnuai pilrila a thil tawn zozite kha ava sawi chhuak fai ta vek mai a, mahse, mihring a thah thu erawh kha chu a lang duh lo thung.

‘’ Ka patea te taksa them chu kha inah khan ala awm chiang a ni!! Ka chiang lutuk’’ ti hlawk hlawkin a thusawi lai lo ngaitha tu police te pawh chu mak tih vang hian an in en kual leh rulh rulh thin hlawm a, amah chu a chiang lo in a â ta emaw an ti hial zawk.

Chutah, police inspector pakhat chuan awki dam dap mai hian,

‘’ Bawihi, I chiang meuh maw? That lohna te inei em aw ka lo ti hial mai. A chhan chu, khu ram chhung hrim hrimah khuan kum 1990 hnulamah hian eng mihrng chen theihna in mah a ding leh tawh lova, mihring nise an khawsa tawh bawk hek lo! Nia, tunhma, 1990 hmalam te kha chuan mihring pawh an la cheng a, chhungkaw pakhat an khawsa thin nghe nghe. An hming erawh kha chu ka lo hre mai ta lova, kan la naupang ve deuh bawk nen. Chumi hnulamah chuan tutemah khawsa zui tawh lo in ram ruak sawrkar ram a ni zui ta a, mihring khawsak nise an phal tawh bawk hek lo! I hre sual a nih ka ring hle mai’’ a rawn ti ta mai a nih chu!  

Remruati ngaihtuahna chu a mang nghal vek a, thil chi hrang hrang ngaihtuah chhuakin kha in chhunga hmanlai bungraw hlui tak takte leh, banga 1995 calendar intar kuau mai te, thil engkim mai kha ni e, a chhuak hlui ber chi vek niin, tunlai bungraw changkang leh manto chi hi hmuh tur a aw miah lo hrim hrim a nih tak kha. Chuti a nih chuan kha ramhnuaia a khawsak chhung zawng khan ani hi tih at leh bual ata awmin hun kal tawh ah a kir a nga, hmeichhe tleirawl pakhat chhanchhuah ngai tak mai kha a hunlaia va kir lehin ava chhuah zalen ta mai tihna emni ang? Ngaihtuahna hman dan tur a thiam tawh lova, eng thilmah hi a her rem zung zung thei tawh lo bawk. Tichuan, rilru ngaihtuahna buai em em chung chuan pai khut khut chungin police station pawh chu a chhuahsan ve thei ta hram a, mahse, thui pawh ala kal hman lo ang tihturah chuan a lu chu rawn vir zui muai muaiin lei charah chuan tukkhum vaw chawrh khawp hian nikhaw hrelo in a tlu zui a, a thal zui ta der mai a nih chu!

****************************************************************************

Leave a Reply