You are currently viewing KA DAM TA

KA DAM TA

Spread the love

KA DAM TA

BY : Vanlalpeki Fanai

Chu zan thlasik khaw vawt vin tuk mai hnuaiah chuan pan ber tur pawh hre chuang lo in ka kal ve mawp mawp reng a, kawrlum hak tur takngial pawh ka lo keng chhuak mang bawk si lo nen ka hak lai t-shirt ban tlawn pan angreng tak nena chhuak ve tawp kha ka nih miau avangin vawt duh ve tek tek tak a ni. Chutia khaw lai dung reh leh thim angreng taka ka lo kal thauh thauh lai chuan ka hma lawkah tu emaw hi rawn ding deuh thutin ka ke pen pawh a tawp ve nghal chawt. Amah chu han en uluk ve viau mah ila tu nge a nih ka hre thei der lova, mipa erawh chu ni ngeiin ka hre thung si.

‘’ Eng nge I duh’’ chang faka ka han tih chuan alo che ve deuh hrut nimai hian ka hriaa, mahse, min chhang lo thung. Reivaklo hnuah chuan ngawi renga inher deuh vutin zawi sap hian
‘’ Min lo zui rawh’’ a rawn ti leh ringawt a. min ti bangbo angreng khawp mai.
‘’ Khawiah chuan maw. Min hria emni? Tunge inih? ‘’ ti mawlh mawlhin a zawna kal chu ka han tum zet a, mahse, ani chu alo ding zui leh chat. Chutihrual chiah chuan keipawh a hnung lawkah ka ding ve leh nghal bawk.
‘’ Ka hnungah khan thuawih takin rawn kal hle hle rawh!’’ a rawn ti leh hmak mai a. E khai!! Tu angah nge maw a in ngaih chiah chu le ka ti.
‘’ Hey, tu angah nge I in ngaih a? Hetia zanlaia khawlaia ka tei ruk ruk avang hian kalna tur nei lo leh vakvai emaw min ti em ni? A ve lutuk a che a’’ ka sawi zawh rual chiahin ani chuan zaidam angreng fe hian
‘’ I nei hleinem! Chuvang chuan min zui la I tana tha tur ka kawhhmuh thei ang che’’ a rawn ti ringawt a nih chu!
‘’ Ka chhungten min hnawt chhuak tih hi engtin nge I hriat. Khawi atang nge ilo hriat’’ ka han tih leh chuan a nui deuh hak tih ka hre thei a. min chhang ve mai dawn emaw tih laiin a hmalam pan bawk chuan a kal zui leh ta vang vang mai. Zui ve zel mai loh chu kalna tur dang hre bik chuang heklo, chubakah, min hruai a tumna hmun kha ka hrechiang duh ve hrim hrim bawk. Tichuan, ngawi renga inzui dun zein ka rilru chuan thil tamtak a ngaihtuah pah ve zut zut reng a, nia, kei hi tlangval kum 25 mi lek niin, drug addict ka ni der tawh thung a. chupawh chu eng dang vang ni lo in ka sen tet atanga fapa mal ka nih vang leh ka pi leh pute pawhin an tu hmuh hmasak kher kha ka nih miau avangin duat sual ka lo nih phah ta a. Tihian a bak chu sawi tam vak ngaiin ka hre tawh lo. Misual awmtha duh lo tak ka ni a, chu chu a nimai.
Chutiang vel ka lo ngaihtuah kual chiam lai chuan ka hmaa kal pa kha rawn ding thutin, ka ding zui ve nghal. Ka han hawi chhuah nak chuan in lian leh nawm hmel em em kawtah hian kan lo ding reng tawh tih ka hriaa, chu pa lah chuan a hmazawn a in lian tak chu uluk zeta thlirin ala ngawi deuh vang vang mai reng abwk si nen, tihtur ber pawh ka hriat loh phah zo vek mai.
‘’ Ih’’ ka ti chiah tihin, a lamah chuan na zet hian min rawn pawt ta dawrh mai a,
‘’ inchhungah khuan zu lut la Francis Zothanpuia thianpa inih thu zu hrilh ang che. A bak chu a tlachawp zelin a rawn thleng chho mai ang’’ a ti leh ringawt nia. He mihring hi a che maksak thei hle mai a.
Chutah, chhanna ka pek ve hma hauhin chu in hnaih lamah chuan min nawr kal leh ta nawk nawk a, ka ngaih dan chu a ni tawh lo ru takzet. Hetianga mipa leh mipa han intih chiam chiam mai chu tih hi rilruah rawn lutin, ka mi hriat zawng ala ni hauh lo lehnghal a. ka inpet ruh ve fan fan tawh. Mahse, che lo chang lova min lo en tak rengah chuan a fiamthu mai mai lo a ni tih chu ka hrethiam ve ta deuh a, engti tur chiahin nge min duh tih hriat nan pawh in chhungah chuan luh ngei ka tum ta zawk. Tichuan, inthlahrung zetin kawngka chu ka han kik karh karh phawt a, reiloteah nula pakhat hian min rawn hawnsakin, hmel hlim pu sang chung hian

‘’ Lo lut rawh’’ alo ti ve mai. Ka luh dawn a ruaiah hnunglam kha han hawi let leh zuk zukin kha mihringpa kha ka han zawng ru ve deuh a, mahse, a dinna hmunah khan hmuh tur awzawng alo awm tawh miah lo nia. Khawiah chuan lo kalbo hman ang maw.

Chu in chhung chu a pawnlam ai mah khan alo la ropui zawk a tih theih a, a changkangin kei ve tehlul hetiang in chhung changkang lutuk a ka han ding ta mai hi te chem chem a inhriatna neiin, ka zak hnuhnawh ngawih ngawih bawk. Mahse, kawngka min lo hawnsak tu nula khan sitting room lama awm a nu leh pa te niawm tak, kum la valai tak te chu han ko zeuhin, kei chu min han kawk pah leh zauh bawk a, an ni pahnih pawh chu rang tak hian ka dinna lamah an rawn inher rem ve vat. Chutah, mak tih hmel deuha min rawn melh vang vang chung hian nu zawk chuan ban charhin,

‘’ E, tu nge ni ta?’’ a rawn ti a, ka zak lutuk cbu ka thlan te hi a sa chhuak hut hut tawh nimaiin ka hria. Chutah, pawnlama ka mi hmuh pain sawi rawh a tih kha hrechhuakin , zak ru em em chung chuan
‘’ A,,Fran, Francis zothanpuia ka nia, amah khan eng lo’’ ka swi zawh hma hma chuan nu zawk chu a rawn țap chhuak ta hak mai lehnghal a, sawisual ka nei ta emaw tiin ka han inngaihtuah tha leh a, ka neih awm chu ka hre bawk si lo. Hawi kual vel in, kha nula lah khan mittui tling piau chug hian kei chu min lo melh ve reng bawk si. Pa ber niawm tak lah chuan rilru hah hmel emem hian kawng dawm meuhin min lo melh ve vang vang thin a, nu ber tap bang thei bawk si lo nen ka tihngaihna hre lo lutuk cuan inher let vut pah hian
‘’ A,, ka kal leh phawt mai ang’’ ka han ti ringawt a, mahse, rang taka min lo ko ding tu chu an awm ta tlat mai. Chu pawh chu tudang ni lo in pa ber kha a ni tih ka hre nghe nghe.

‘’ Lawkin Bawiha, hetah hian lo thu phei la ilo titi ho lawk the ang u’’ zaidam taka a rawn tih chuan inthiam lo fe chung hian ka lu chu ka lo bu ve nghut nghut tawh a. ka va thu phei zui nghal bawk.

Nu ber pawh kha lo tap bang ve tawhin lungawi hmel em em hian kei chu min lo en leh veng veng thin tih ka hriaa, thil awm dan hi ka hrethiam thei lo. Engvangin nge Francisa hming ka lam rik rual khan an khawsak phung an hloh nghal vek nachhan ni ta ang. Francisa chu an eng nge a nih chiah. Ka la bo he haw hle a ni.

‘’ Francisa te nen chuan in inkawm thin takzet a maw?’’ pa berin chiang zeta min en chunga a ranw tih leh chuan ka lo bu ve nghat ringawt. Ka lo sawi ve laklawh tawh si a, Francisa chu hria anga ka awm ve phawt a țul a ni. A thuhrimin keipawh hi mi mawl ka nih hi. Tuemaw ka hriat ngai pawh ni lo khawlaiah ka hmu a, ti tura min tih angin ka ti ve ringawta min rawn buaipui zui leh tawh mang bawk si lo. Mawla ka nih hi mawla. Chutah, nu zawk chuan a mittui tla mai tur hruk leh zauh zauh pah hian

‘’ Kan fapa khan a sawi lawk vek tawh a ilo kal tur thu hi. Kan hriat lawk vang a nia zaninah pawh nangmah nghah pahin hei chen chen hi kan lo la men ni. I ril a țam em? I mut te a chhuak tawh em?’’ a rawn ti leh ta mai nia! Ka hawi buai nghal vek thei. Mak ti fea an ni pathum entawn zak zak chung chuan
‘’ Ah, aih. Ka kal tawh zawk phawt ang’’ tih paha ka thutna ka han thawhsan rual chuan an lo tho ve nghal suau thei a, min dan beh hram chu an tum hlawm bawk.
‘’ Ni lo, khawngaihin kal lo hram rawh. Kan fapa neihchhun Francisa thiantha ilo nihna ah pawh kan kiangah hian awm ve ta che’’ an rawn tih pawh chuan ka duhlo a ka hnial ve zel a, nuam pawj ka ti thei hek lo. Heng mite hi ka chungah sual lo mahse tute nge an nih ka hre ngai lova, an fapa Francisa ngei ngei pawh chu tu nge a nih ka hre bawk hek lo. Chutiang a nih vang chuan kalna tur nei lo sawmsarih pawh ni ila an ni hi ka tibuaiin ka awmchilh ngawt theilo miau a ni. Addict mai mai pawh ni mahila zanin hian riahna tur hmun dang chu ka hre ve em em turah ngai ang tiin an thu chu ka hnial lui char char a, ka chhuahsan ta nge nge a nih kha.

Pawn khaw vawt leh thim zeta ka chhuah rual rual chuan nichin lawka helai hmun min hruai thleng tu pa kha va hmu lehin, ka phu zui zawk thei. A lo haw daih tawh ang chu tih naklaiin. Rum zeta min lo melh chung hian a ding khawng reng a, a chesawn eih lo bawk.

‘’ Nang bawk chu’’ tih paha kal pelh mai ka tum laiin ani chuan zawi sup hian
‘’ Helai hi I awmna hmunna tur diktak a ni’’ alo ti ringawt a. Ding meuhin ka han hawi let a, ka melh zui ta veng veng mai.
‘’ A tu chu nge maw inih le. Kei hi I duh dan dan a awm thei turah min ngai deuh tihna emni?’’ lo ti let zekin, ani chu a ngawi zui leh ta daih a. ka kalsan ta hmak. Kalna tur nei lo ngawih ngawih leh chuti em ema baihvai chu ka ni bik hleinem le. Thian tamtak te pawh ka nei ve bawk alawm. Ani khan min rawn zui leh em tih pawh ngaihtuah tawh lo chuan ka duhna lamah ka kal zui ta hmawk hmawk a, ka hawi let chhin bawk hek lo. Kal zelin ka damdwi tihpui te ho awm khawmna hmun, hmun biru deuh hlek chu ka thleng zui ve mai a, inhmuh lohna chin alo rei ve ta bawk nen, tha taka min lo dawngsawngin an thil neih ang ang te pawh ui hauh lo hian min lo pe ve nghal zung zung bawk. He hmunah hian mi hausa uikawm tak tak leh midang tana luang chhuak duh lo te kan awt ve lova, keini hi chuan tihian kan neih ang ang hi intawmin, a thlum a al kan ei za mai a, nun tha leh pangngai zawk chu awt ve thin mah ila, chumi ni lo kan ban phak loh tur awhna dang hi kan nei ve lem lo thung.

‘’ Engvangin nge I kalbo. Tho la, kha inah khan va lut lehnghal rawh. Kawng dik zawh tum la nun tharin bultan ang che’’ chu thu ringawt chu ka bengah rawn riin, zan chu ka muhil thei ta der lo. Ka harh deuh zawk zawk reng a, ka bulah chuan muhil lo hmuh tur reng reng awm tawh lo in an hnar bawrh bawrh hlawm twh bawk si. A nihna takah chuan ka bengah khan min rawn hrilh ru nimaiin ka hriaa, min hrilh ru tu erawh ka hmu thei lo tih mai a ni. Thaw halh halh chungin ka han mu tha leh a, mumang ka lo nei zui ta bawk.
Tlangval hmeltha leh piannalh em em mai pakhat hian ka kalna tur kawng chu min dangin, kaltlang hi min lo phalsak hauh lo mai a, ka talbuai hle. Ka biakna reng reng te pawh chu chhang duh lo in uluk tak hian min melh vang vang reng a, chutah, zawimuanga a kawr ban chu hlipin a bana ser nung tamtak awm, rapthlak em em mai te chu min hmuh tir ta a, min entir satliah pawh ni lo hian hnai em emah min bih tir a nih ber chu. Chutia a ban ser rapthlak tak tak ka lo en lai chuan a vun kaw sep seop chhung atang ngei mai khan pangang hrawl zet zet mai hi an rawn vak chhuak ta țual țual mai a nih chu le! Ka țe tuarh tuarh a, tlansawn ka tum lahin ka thei si lo. Chu pa chuan ka tukkhum samah țhamin nghet tak hian min vuan bet tlat a, chesawn thei ka ni ta lo. Chutia ka mang lama ka au chu a takah pawh lo au chhuakin ka bula mu te ho khan min rawn sawi harh zui vat a. Thaw hlawp hlawp chung leh thlan sa phul kaiin ka tho chhuak ve ta hlawl mai a ni.

‘’ Eng thil nge thleng Biaka? I mumang a tha lo emni?’’ rawn ti zui sap sapin, hmeichhe thenkhat chulai hmuna riak ho te pawh chuan ka hnungzang te min lo chulsak leh hliau hliau thin bawk a, kei erawhin ka mumang kha sawi chhuah harsa ka tiin, swi chhuak pawh ni ila heng ho hian a ho min tihsak viau maithei e.
‘’ ka tha ka tha’’ ti mawlh mawlhin ka mu zui ve leh mai a, an ni ho pawh chuan thudang sawi twh lo mahse ka awm dan ah khan an ngaih chu a tha chiah lo tih ka hre tho. Ka ngawi tlat tawh mai si a, eng thumah an sawi zui ngam tawhlo zawk nimaiin ka hria.

‘’ Francisa te inah khan kal rawh’’ ka hnuglam atanga min rawn ti tu an awm avang chuan lehhawi zawkin , a hma pawha ka lo hmuh tawh kha pa tho kha va hmu lehin, makti zet hian ka en zui ta vangvang. Chutah, ka thin tertek chu rawn chhuakin rang zet hian ka inperh tho vat a, amah chu pan hnaih pah hian vin angreng takin,
‘’ Hey, engtin nge ka awmna I hriat a. kei hi min en thla turin ka chhungte khan an ruai zawk che nge, engvanga min zui reng nge maw inih le’’ ti hluk hlukin amah chu ka va din hnaih sauh sauh bawk a, ani erawh chuan zam hmel pu hauh lo hian
‘’ Ka zui ru lo che. Eng nge itih a, khawi hmun nge I pan dawn tih hi ka hre sa vek zawk. Helai hmun hi chhuahsan la, Francisa te inah khan kal rawh. A nih loh chuan haw ang che’’
‘’ Ka haw miah lovang. Ka awm dan tur a thu rawn nei ve ringawt tur hian tu chiah nge maw inih le. I zak lo hlemai ka ti thianpa. Hriat pawh la hre ngai lo che a, ih maw, kan thil tih mek ang saw iti ve duh a nih loh chuan min kalsan la kan zavai tan hian a tha zawk anga’’ ti leh buan buanin ka thiante awmna lamah ka kalsan a, an ni ho lah chuan kei chu mak tih hmel em em hian min lo la thlir thap zui lehnghal. Zahzelah, ka nuih zui ta suk hlawm a nih kha. Chung zinga ka kawm tam ber leh min duhsak em em reng tu Zorama chuan mitmeng dava ruai chunga min lo melh in,

‘’ Tu nge a? Tu chu nge iva biak chiam chiam kha’’ rui tawj tih hriat tak chunga lo ti nghalin, kei chuan la nuih deuh vur vur pah hian
‘’ In lo hmu ve lo emni? Min zui buai reng ringawt mai a ka han tih tak zek kha’’ ka ti liam leh mai a. Rui tawh tih hriat tak hian an lu te chu an lo thing deuh sap sap hlawm. Melh pawh min melh tha hleithei tawh hlawm meuh lo.
‘’ Kha ti ve nghal mai rawh. Zanin lam share tur hi engtin nge kan han ngaihtuah leh ang aw’’ Zorama bawk chuan rawn ti lehin, kan zinga pakhat Nuntluanga chuan men deuh suap suap pah hian
‘’ Lungngai suh u. kan in ka chhuahsan dawn khan ka farnu leh ka nu te puan man tam ka ruk chhuahsak hman a, zan lam share tur na na na chu a thlaphan thlak loh ang’’ a rawn ti liam leh puat.

Chu hriau, a thianghlim nge thianghlimlo tih pawh hriat tawh loh ngei mai chuan ka thisenah damdawi chu vih luh a han ni leh a, reiloteah ka taksa fan chhuakin, ka lu ah a thawk chho a, ka nuam zui leh ta chiai chiai mai le. Khawvel dang daihah chengin ka awm dan ka hloh a, keimah ka nihna pawh inhre tawh lo in tunge ka nih ka intheihnghilh fai vek a, nuam dangdai tinreng chuan min fan chhuakin khawvel hi ka hnuchhawn ni ta mai hian ka inhria. A danglam hlak a ni.
Chutiang chuan nileng maiin thildang pawh ngaihtuah lo leh vei dang pawh nei lo in hun chu kan hmang ral a, kan rilruah chuan ruih dan tur bak eng thildang mah hi a leng tawh lo. Min hnawtchhuaktu ka chhungte khan min ngaihtuah em, ka awmna chin te hi an rawn ngaihven ve a ngem chutiang lam reng reng chu ka rilruah a awm tawh lova, chung ai chuan engtin nge tlai a lo thlen hunah ka ruih leh theih anga, khawi a miin nge ka taksa nawmna tur hi a hnawhkhahna tur ka zawn hmuh leh ang tih chiah a awm.

Ni khat pawh ka thianpa Zorama nen chuan thawmhnaw hralh ruk tur kan neih avangin bazar lamah a tih ral dan tur zawng tur chuan kan tei chhuak ve nawlh mai a, chutah chuan ka tum lawk loh deuh hian Francisa nu leh pa te nen khan intawng nawlhin, an hmel ka lo la hriat ang chiah khan an ni pawh chuan kei ve tehlul hi min lo la hre duh a, min ko ding hmasa tuah an la țang zui nghe nghe.

‘’ Bawiha, Francisa thianpa kha ini tiraw?’’ min rawn tiin, a ruk tak chuan ka inthlahrung a, ka inkiltawih bawk. An ni ang mi pangngai lutuk hi chuan keini hi chu min be ve lo law law se ka ti thin. Chhungrilah nuam lo tihna riau hi a awm zel a, a hrehawm tlat.
‘’ Aw ni e, ka hming chu Biaksanga a ni e’’ ti ve maiin, pa zawk chuan ka darah a rawn vuan a, kan thiandun chuan chiang tak mai hian min en tawn zak zak reng bawk. Chutah,
‘’ Min rawn zui ta che u. In thawh theih tur hi ka nei maithei a nia’’ a ti ta mauh mai. Thinphu dup dup chungin Zorama nen chuan kan han inmelh deuh zak zak phawt a, nia, kan ruihna tur leinan pawisa kan mamawh a, chu erawh chu kan thawh chhuah ve a ngai thung si. Chumi hrereng chuan amah Francisa pa pawh hian khatiang thu kha a rawn sawi chhuak tih ka hre mai. Keini thiandun pawhin thluak fim kan la put ve miau avangin a thusawi chu ihe lo in kan zawm ve mai bawk. An chenna kan thlen hnuah pawh ka chungah chuan an felin an tha em em reng a, inthlahrunawm khawpin kan chungah chuan an tha a tihtheih ang chu. Thingpui te min chhawpsak in, eitur tui tak tak min lo siamsak bawk a, min en dan chu mi pangngai an en dan nen danglamna a awm hauh lo.
Thingpui ina kan thut ngawih reng lai chuan pa ber chu kan bulah rawn thu thla in, keini thiandun chu min rawn en kar reng a, a thaw zui leh halh bawk.
‘’ Um, eng lo a nia maw, hetia ka han koh nachhan che u chu. In hriat angin nitin hian in mamawh leina tur pawisa in tuak a țul a, chumi nei tur erawh chuan thawhchhuah hi in mamawh ve bawk a, dik taka sum thawhchhuah dan hi in zir dawn a ni. Ka thilsawi te chu in pawm zawng a ni em aw?’’ rawn ti charh charhin, Zorama nen chuan min la melh tawn zak zak reng mai a, keini thiandun pawn a thusawi kha ngaihtuah zui pahin kan mitmeng hmang hian kan in râwn ni berin ka hria.

‘’ A, ka pu, eng hna nge I neih hrim hrim a?’’ Zorama’n a rwn tih chuan kan hmaa thu patling chu alo nui deuh ta vur vur a,
‘’ A hahthlak ve deuh maithei. Khu, kawmthlangah khuan thlai chin ve te kan duh deuh a, in hmuh leh hriat fo angin bazar chawhmeh leh thlai te hi an to thei angreng si a, mahni intodelh te hi zir chhuah a tha deuh hlekin kan hriaa, chuan , chung thlai chinna tur hmun lei chu min chawh phut sak tur cheu in ka duh ta che u tihna a nih chu. Hnathawk tur ka zawn ruk lai tak alo ni nghe nghe zawk a, remchang takin nangni thiandun nen hian kan intawng ta hlauh bawk si nen. Biaka nen hian kan lo inhmuh ve tawh avang khan ka mi hriat ngai miah loh chhawr ai chuan tiin ka han ko ta rawih mai che u a nih hi’’ a ti leh ta charh charh mai.

Zorama nen chuan kan mamawh hre rengin a mi sawmna pawh chu hnialsak kan tum lova, eng anga hahthlak tur pawhnise , midang thil ruk leh chhungte tibuai reng renga damdawi man tuak fo mai chu a hrehawm zia kan hriatchian ve vek tawh avangin a mi sawmna aw nem pwh chu kan pawm zui ta bawk a ni.
Tichuan, thil te chu ei zo in kan hnathawhna tur lamah hmanrua nen min liam thlak tir zui a, a hmun kan zu thlen chuan chutiang em ema alo zau loh bakah, a hautak viau dawna kan rin loh bawk avangin kan huphurh lo dun ve nasa mai. Kan hnaah chuan bung nghal chawtin, chhun ni sen sat lai tih takah reiloteah chuan thlan tui hi a rawn luang nghal a, keini, nitin maia ruihhlo khawih thin tan phei chuan taksa a chak vak lo in chauh a awl bik em a, rei pawh kan lai hman lo, kan in chawlh chhawk sek hi a ni ringawt e.

‘’ A hmel en aia a hahthlak hrep chu le’’ Zorama’n a rawn tih bai bai lai chuan keiin ka lo nuih ve vur vur thung a.
‘’ Ti hram hram ang. Sum leh pai kan mamawh ve em kha. Chubakah, kan taksan tan pawh a that phah phian hi ka ring tlat’’ ti a lo chhangin, ani pawh chu alo bu zui ve nghat nghat a. Diktaka sawi chuan tlangval puitling ve uaih tawh mah ni ila hna rorum leh kut hna hahthlak tak tak ang chi hi ka pian a hnulamah tun hi ka vawikhat thawhna a ni hial maithei. College kalin hun tam zawk kha kan hmang a, khang lai khan ni khat vel chu inhlawh turin ka chhuak ve tawh tak. Chumi tih loh ah chuan chhungte thawh chhuahsa ringin kan khawsa a, tihian damdawi te kan han khawih zui bawk a, taksa fit țeng țawng neih chu harsa ve tak a ni.

‘’ E, in chau tawh em kha. Vawiin atan chuan duhtawk phawt mai ula, in rawn thawk hma vak bawk si lo nen. In chau lutuk a nge. Naktuk atang erawh chuan tukthuan eikham hunah chat rawn thlen in tum tawh a nga tiraw, chuan hei hi in hlawh tur aw vawiin atan’’ tiin pawisa chu min han pe nghal bawk a. ka thianpa nen pawh chuan lawm takin kan lo nui ve var var mai.
Chutianga hah thlan sa phul kaia ka thwh chhuah ve liau liau, cheng tam pawh ni lo mahse hah taka ka thawhchhuah ve ngat pawisa ka han hmuh takah chuan ka hlimin nuam ka ti a, damdawi ruih tur leinan mai maia han hman chhuah leh pawh chu ka ui tawhin, ka phallo ru ve hle. Mahse, zan khua a rawn thim a, thiante ho in an taksa mamawh leina tur buaipuia an phusak leh tak suau suau ah erawh chuan ngawi rnega lo thlir liam bik kha thil theih a nih loh bakah, taksa hian ngaiah alo nei tawh a, min rawn fan chhuak leh vek bawk si nen, a zungzam chuan min fan hnehin a tawpah zawng, tlukna ngaiah bawk chuan kan tlu lut leh dawn a ni e. chutia a leina tur ka thiante hnena pek tuma ka lo in ruahman lai chuan tuemaw hian ka kutah rawn vuan chatin, ka mitah tak min en kar mai bawk. Kha pa bawk kha!

‘’ Ti suh. A tello hian I awm thei. I tum chuan I thei tih hi ka hria. Han tum ve chhin the’’ zawi ser sawr tak hian a rawn ti a, a tawng zawiin ka awmna nise a lo thim bawk nen ka thiante ho chuan an rawn hmu ve kher lo ang ka ring. Chutah, a kut chu phelhsak sawk chung hian
‘’ Tu nge inih ve ziah a. ka nuna ro rawn rel tur hian tu nge inih. Tuin nge thuneihna pe che. Kalbo vang vang tawh rawh!’’ ka lo ti let hluk hluk a. min rawn hmer nawn leh ngat.
‘’ Nilenga hah taka I thawh hlawh kha hetiang tih nan mai mai hian I hmang ral ang maw? Zaninah nuam ti takin I rui leh a nga, zing khawvar hunah erawh chuan a ngai te bawkin hrehawm ti tak leh inchhir ru em emin hun I hmang thung ang. Zanin hian I thei. Tum rawh’’ a rawn tih chuan tlemin ka ngaihtuahna chu a han her kual ve ta deuh hlek a. Nia, zanin hian ka pawisa neih chhun chhun hi damdawi ruih tur leinan lo hmang ta ila, naktuk kahwvar hunah chuan zan lama ka thil tih te vang khan a inchhirin, hrehawm ka ti leh a nga, ka taksa ina chhiat zual phah bawk ang. Um, mi thenkhat te anga buai phili tur khawp ka la ni chuang lo ve tiin pawisa pawh chu ka dahtha leh ta zawk a. chumi zan chu harsa ti ru em em chungin ka tuar zui ve ta tlawk tlawk a, zankhua maiin ka muthilh loh phah țhak bawk.

A tuk zing ka tho pawh chu zan lam muhil thei lo tihtakah, ka tho nuam lo angreng hle mai a. khua te chu ka zuam lo ngawih ngawih bawk. Mahse, sana ka han en chuan hnathawk tura chhuah ka ngai tih inhria in ka inha fel sawk sawk a, Zorama ka kaitho nghal bawk. Mahse, ani chuan a peih tawh loh thu min lo hrilhin, sawm lui ta bik lo chuan phur lem lo fahran hian mahni chauh chuan ka kalsan ve ta ngawt bawk a.
Ka thianpa tel ve tawh loh chhan te chu min lo zawh ka rin rilruk tehlul nen, min zawt hauh lova, tha tak bawka min lo danwgsawng lehin huan lamah min hruai zui leh ringawt. Hemi ni hi chuan pa ber khan min rawn thawhpui ve in, min be pah mawlh mawlh reng a, a khawharthlak loh angreng hle.

‘’ Biaka, nimina I pawisa hlawh kha I hmag chhuak tawh em’’ a rawn tih chuan ka kun kut kut lai chu ding chhuakin, ka chala thlan tuifim rawn luang thla te chu ka hru hmasa leh te te phawt a, chumi hnuah ka la hman chhuah miah loh thu chu ka lo hril ve nghal a, ani pawh a rawn nui ta var var mai. Hlim hmel a pu bawk.
‘’ Ava lawmawm tehreng em aw. Pathian hnenah chakna dil la, ani chuan kawng engkimah a tanpui duh ang che. Chakna pawh a pek belh zel ang che tih hi ka ring’’ rawn ti ve lehin, kei chuan tawngka in ka chhang tawh lova, ka lo bu nghat nghat thung. Nileng ni tla van vuaiin kan pahnih chuan hna chu kan thawk dun ta char char a, mak tak hian vawiin chu ka chau chhe lo ve angreng khawp mai. Ka taksa pawhin thlan tla khawpa hna han thawh chu ngaiah te pawh a lo nei ve dawn țan a ni mahna. A lawmawm takzet a ni.

An hnuaiah hian chawlhkar khat chhung hna ka thawh hnuin ka zo fel ve thei hram a. Hetih chhung zawng hian ka hnathawh hlawh kha hmang hek miah lo in ka khawl khawm char char bawk a, eitur leinan a ka hman tih loh chu ruih nan ka phal miah lo. Ka lei ngai lo bawk. Tin, ka la sawi tel loh pakhat chu, hetia thianho a kan khawsakna hmun hi kan in luah lai emaw, ka thiante zinga tuemaw ber in lah a ni bawk hek lo. Khawi emaw lai hmun remchang dapin kan tawm khawm ve mai zawk a ni. A rem rem eitur kan dap chawp a, kan neih ang ang kan intawm bawk a. kan inhuphurhb ngai hek lo. Tin, heng laia awm khawm ho hi a ngai reng kan ni ngai bik lova, nitin hian hmel thar hmuh tur pawh kan awm thin in, a awm sa te pawh hi kan kalboo ve fo thin. Chutiang chu ni hlawm mah ila duh in an theuh na na na chu karloah kan in ngaina thuai mai thin thung a, tumah hi inhuphurh vanga inhau buai pawh kan awm ngailo bawk. Kan inhmangaih em em vek mai a ni.

Ni khat erawh chu Zorama pawisa nei lo khan bazarah min hruaiin, ruih dan tur ngaihtuah ang a ti tlat mai a. hetih lai hian ka pawisa kha ka hman tir duh loh bakah ani pawhin ka nei tih kha a hre tawh lova, min dil miah lo hrim hrim a ni. Tichuan, bazarah chuan chuang chhuakin kan teikual kan teikual a, kan la harhfim dun angreng bawk nen mite pawh chuan maktih hmel takin min lo en bik hauh lo mai.
Pheikhawk zawrhna dawr lian lemlo tak pakhatah hian lutin chutah chuan a nghaktu an nula chhawr lai leh, a dawr neitu niawm tak nutling pakhat te hian dawr chu lo nghak dunin, nula zawk chuan tha tak takin kan duh te chu min lo zawt seuh seuh mahse, a neitu niawm tak erawh kha chuan melh khat pwh min rawn melh lo a tih theih a, a phone en in a buai hle tih a hriat. Kei leh Zorama chu in melh leh hrek hrek thin in, an pheikhawk zawrh lai te en kual chung chuan a man zat kan zawt a, kan kal deuh chhen lehnghal. Nia, helai hmunah hian pheikhawk lei tura kal kan ni lova, ruk tur dapa lut zawk kan ni miau.

‘’ Nula, hei hi engzat man nge ni dawn’’ kil khata sneaker nalh fahran lo chu a man zawwtin, kha nula pawh kha ka awmna lamah chuan a rawn kal zui ve vat a, chutihlai chuan ka thianpa Zorama erawh chu kawngka bul hnaih ah khan ala kun ve kut kut reng thung. A khat tawk hian kan in mitmei leh zeh zeuh thin thung. Chutah, ka pheikhawk ken lai man zat min hrilhfiah tuma a nghaktu nula a rawn kun thlak lai tak chuan dawr neitu nu kha ring em em mai hian a rawn au chhuak ta tuarh tuarh mai a, kei leh nula pawh chu kan hawi chhuak nghal zawk nghe nghe. Awle, thianpa Zorama chuan a tihtur tiin dawr a chhuahsan tawh tih ka hria a, ka hun a in țan ve chiah.
‘’ Kha rukru lo man the u’’ tia an au chuah chuah lai chuan tlanchhuak ve nghalin pheikhawk pawh chu ka la ve ta lem hlei lova, Zorama tlanna lam niawm taka ka rinna zelah ka tlan ve puat puat ringawt a, kawngsira chawhmeh leh thildang an lo pho tlar dul te chu su darh chum chum khawpin ka tlanchhia a tihtheih awm e. mahse, thui pawh ka tlan hman lo ang tih ah hian patling pali vel in min rawn nangching zuiin, tal chhuah ngaihna awm lo khawp chuan keimah zawk chu min rawn man bet ta tlat mai a. zorama thung kha chu a him ta tihna a nih ber chu. Pawi pawh ka ti chuang lo.

Police station hnai berah min hruaiin chung ho chuan ka kut chu min hnungkhirhsak tlat bawk a, tichuan, police S.I rawn thlen hun tur chu min nghahpui ta thap mai. S.I pawh chun lo thlengin, kan han inhmu chiah chu meng phawk hra chung leh thinphu dup dupin kan inmelh tawn a, Francis Zothanpuia pakha helai hmunah hian SI incharge alo ni reng a maw!? Lawm tur nge țah tur tih pawh ka hrethiam lo. Ka zak a ni.
Zawi sup hian min chelh bet tu patling ho hnenah chuan
‘’ A kut kha thlah rawh u. Eng buaina nge ni a?’’ ti zuiin a thutna lam a pan nghal a. keipawh chu a bulah chuan min hruai phei ve nghal zat.
‘’ A kut kha thlah rawh u ka ti lo emni’’ vin deuh hleka a rawn tih leh chuan min thlah zui ve ta vat hlawm a. chumi hnu reivakloah dawr neitu nu pawh kha hmanhmawh taka rawn thleng chhunzawm ve in, kei chu min hek zui nghal zat zat bawk , kei erawh chu hnuailam en in ka ngawi deuh reng. Francisa pa thung chuan uluk takin min la en tih ka hria a, ka hawi chhuak ngam tawh hlawllo a ni. Zahthlak hi ka ti em mai.

‘’ Chuvang chuan ka pu, heng ho hi na taka min hremsak ngei ka phut a ni. An ni ang damdawi addict mai maiin min rawn zuam lutuk pawh hi ka duh dan a ni lo sa hrim hrim bawk’’ dawr neitu nu khan ala tih zat zat laiin SI thung chuan fiah fai tak hian
‘’ Addict an ni tih chu I chiang meuh em aw. Tunah hian ruih neih ang pawhin ka va hmu ve lo ve kei chuan. Eng lo in ti ang. Tlangval, hei kan pi pheikhawk zawrh lai manto tak hi ilo ruk chhuahsak a nih hmel a, khaw nge a awm min han hrilh hmasa ta che’’ zaidam taka a rawn tih chuan ka chil ka lo lem deuh khawlh mai. A mitah tak pawh chuan ka la melh tha ngam lo a nih ber chu.
‘’ Sawi ta che’’ vin deuh taka min man tute zinga pakhatin a rawn tih chuan SI thung kha chuan a kut zaizir hmangin alo khap ve vat thung a. chu ringawt pawh chuan tlemin kei chu min tithlamuang deuh sawng sawng thei nia. Mak ka tih em em chu, Francisa nu leh pa te hmel ka hmuh apianga thlamuanna mak tak ka nei thin hi a ni. Pathian thiltih leh hnathawh tiin ka vuah thei mai a ngem ka hre lo. Ngawi the, Pathian nung zahawm lutuk hming pawh hi lam ri ve ngam tur ka ni chiah emaw ni le, misual rukru ka nih hi.

‘’ Le, han sawi tawh rawh le’’ zaidam taka amah bawkin a rawn tih leh hnu chuan hlauthawng taka an ni ho melh kual zak zak pah hian
‘’ Ka ru ve lo a ni. Ka , ka thianpa kha a tlanchhuak ta daih sia, ka hlauthawng a engmah pawh ka ru ve ta lo. Nia, kha lai hmunah khan ruk tur zawnga kal chu kan ni ngei alawm, kan tihpalh a ni. Ka tihpalh takzet’’ ka thusawi tawp lam phei kha chu a zuih ral titih.

‘’ Nangin I ru lo a nih pawhin kan pheikhawk zawrh lai min ruksak tu I thianpa kalna tur chin kha chu I hre tho ang chu. Ni lawm ni? Nangni ang ho hi chuan dawt sawi te hi in hrehlo’’ dawr neitu nu bawk kha a lo inrawlh leh a, SI thung chuan alo khap vat.

‘’ Engati nge maw, helai hmunah hian in buaina chinfelsak tur cheu in min beisei a, in lo kal a, thu kam khat pawh la sawi ve hma hmaa in lo au ve vak vak thin le. Mahni a in chinfel theih te chuan heta rawn kal kher hi a țul hleinem. Tun atang chuan ka biak loh ho kha chu lo ngawi hle hle tawh ang cheu u’’ a rawn ti leh ta hmak hmak mai. Ka awm dan tur huphurh lutuk chuan ka kut ka hum thlan dap tawh a, ka khur chhuak lo chauh tawh a ni.
‘’ Tichuan tlangval, I thianpa kalna tur awm chin chu I sawi maithei em le. Engpawhnise, rukru kha in ni miau a, in phu tawk hremna chu in hmuh a țul si alawm le. Han sawi rawh le’’ zaidam taka rawn ti chung hian ka mitah tak min la en kar reng a, a zamawm duh ve angreng khawp mai. Khap fak fak chung leh amah pawh melh tha ngam tawh lo chuan kan thianho khawsakna hmun kha ka hrilh ve ta nge nge a, chu lai hmun tih loh chu hmun dang han kawhhmuh tur thlawt ka hriat loh thu pawh hrilh ve nghalin, nia, ka thianpa kha chu humhim duh hle mah ila ka hmaa thu mek he police lal tak mai hi ka zah em em a, dawt kha ka hrilh thei tlat lo a tin ni. Zorama pwh chuan min ngaidam mawlh the se.

Tichuan , kei chu station-ah hnutchhiah niin, kan tawm buk nia ka sawina hmun va dap tur khan police thenkhat te chu an chhuak zui ta sang sang hlawm a, hun rei pawh an va thang lo ang tih ah lo let leh maiin, mihring hmuh tur tumah an awm loh thu chu an rawn thlen ta a ni. A ruk tak chuan ka lo thaw ve huai thei. Ka thiante ho kha va hmu in an va man phiar mai ang tih hi ka hlau em a tin ni. Mahse, chutihrualin Zoramaa chu khawilamah nge a tlanchhiat tak ang tih hian ka rilru erawh a tibuai ve veng veng tho mai. A ngaihtuahawm em lo ang chu maw.

SI chuan uluk taka min thutchilh in uluk tak bawk hian min han en leh vang vang phawt a, a zamawm duh thin the e.
‘’ Thil pawi khawiha rukru tu zawk chu I thianpa ber kha a ni si a, ani lah hmuh tur reng reng a awm bawk si lo. A nih chuan he thilah hian engkim hriatpuia inhnamhnawih ve tho inih angin nang hian I thianpa tawrh ai chu I tawrh mai a ngai dawn a ni. Pawi ka ti khawp mai’’ zaidam tak bawk chuan min rawn ti leh ta a. muangchang hian ka lo bu ve nghat nghat. A tawrh ai tawrh a lock up chhunga riah chu pawi tihna chhetemah ka nei lo. Mahse,
‘’ Ka pu, engtia rei nge ngai ang’’ ka han tih chuan nui suk chug hian
‘’ A rei lo ang. A case a lian hran lo bawk a chawlhkar khat vel a nimai’’
Um, engtia rei pawhnise a pawi ka ti lo.
‘’ Awle. Lock-up ah chuan ka awm hreh reng reng lo aw. Helai hmun atang hian chhuak leh pawh ni ila kalna tur dang thlakhlelhawm zawk ka nei tawh chuang hleinem’’ lo ti ve in, ani chuan thil thui tak ngaihtuah nei niawm tak hian min en leh ta veng veng phawt a, a bu zui nghat bawk.

Tichuan, ka thianpa Zorama tan ai chu tangin, lock up chhungah ka thu ve ta ran mai chu a nia. Hrehawm ka tih leh tih loh a hre lova, nuam ka tih lah ka hre bawk hek lo. He station pawnlam a khawvel saw ka thlahlel zo thlawt tawh lova, ka hmachhawn peih bawk hek lo. Diktak chuan damdawi rui chunga khawvel hman ve reng te, chhungte bula dawt sawi leh an thil pawimawh ruk chhuahsak fo te, an thin tih rima an tawngkam chhe tinreng dawn ve reng mai te pawh kha ka thlahlel hlawl lova, ka hne ve lutuk zawk. Midang rinhlelh hlawh bik reng leh an hnuaichhiah nih fo mai te pawh hi hrehawm ve duh thin tak a ni asin. Ka ning tawh. He khawvel hi ka hne hluah hluah tawh.

‘’ Pawi liantham khawih lonin thil tisual tu ni lo mah la hremna chu I pumpelh thei chuang si lo tiraw? Khawvel hi chu a fair lo asin. Mahse, heng zawng zawng pawh hi I tana Pathian kawng ruat zel a ni tih theihnghilh lo la, hnual phah nan hmang reng reng suh aw’’ ka bul lawka zawi angreng taka rawn ti tu an awm avang chuan ka mu lai ch tho chhuak zawkin, amah bawk kha ka va hmu leh ta. Ni e, kha pa ngei mai kha.

‘’ Nang hi. Eng nge heng laiah I rawn tih ve a. Engtin nge a chhungah te hian I rawn luh theih’’ lo ti let vatin, mak katih deuh avang chuan bangkil lamah ka tawlh let rawk rawk bawk a, chiang zet hian min la en reng lehnghal. Tu chiah hi nge maw a nih le ka ti. Ka awmna hmun apiangah min țhawng thei tur deuh deuhin a rawn lang thut thut thin a, engtin nge ka awmna chin te pawh hi a hriat fuh theih zel zawk ka hre bik lo. Amah hi mihrng pangngai a ni chiah em? Chu chu zawhna awm thei a ni.

‘’ Nang hi mihring ini lo tiraw!?’’ ti chhuak deuh hlawl maiin, tlem chuan a rawn meng phawk ve ta deuh hlek a. mahse, a rei lo. A pangngai zui leh vat. Chutah, nui deuh sang chung hian
‘’ Chu chu I rin dan a nih chuan a tha alawm. Ka duh dan tak chuan khawiah pawh’’ a tih laiin kei chuan la tawlh hnun rawk rawk pah hian
‘’ Aw, thlarau inih kha. Min hlat rawh. Engvangin nge min umzui ve reng a. ka hlau dawn che emaw I inti elaw?’’ ti nghek nghekin ka inhrosak khum hi a ni ber tawh a, chutah, pawnlam atang hian police duty pakhat chuan rum zeta min rawn melh chungin
‘’ hey, engah nge khatia I au vak vak a?’’ ala rawn ti țhat zui. Ka hmaa thu pa nen pawh chuan kan in melh zui kawk thei. Amah bawk chuan nui deuh var var chung hian,
‘’ Ka kalsan phawt ang che. Kei hi chu nangmah venghim tu che thlarau pakhat angah min ngai mai rawh’’ tiin a tho chhuak a, rawn hawi let tawh miah lo in jail bar te chu a tawn tlang hmak mai nia! Chu chu ka hmuhin ka hlau zual em em a, ka thlan a rawn tla zui bawrh bawrh bawk a, ka khua a sik zui hluah thei bawk. Khawsik chuan min kiansan thei lo mahse, police SI , Francisa pa khan min ngaihsakna a tilang nasa em em a, min duatin eitur te hi lock up chhunga ka tan pui te aia tha tha eitir thin ka ni a, ka dawng thin bawk. Mahse, hetih lai hian ka thisen in alo tem tawg leh alo hriat fuh tawh damdawi zungzam mawlh mai khan min rawn luhchilh ve thin in, ka taksa te chu an zem chhuak zo vek thin a, ka talbuai teuh thei hle. Chung hunah pawh chuan Francisa pa mawlh kha rang takin min rawn buaipui tur hian alo tlan a, min tawngtaisak bakah Bible te hi min chhiarsak in, ka taksa za nuai nuai thin te pawh chu thiam takin min hmehsak fo thin a, min tawng thlamuan mawlh mawlh zel mai a ni.
Chutianga awm fo mai chu ka chin chhoh tak em avangin a hnuah phei chuan an In lamah min hruai haw ta ringawta, doctorah te min kalpuiin damdawite pawh min chawh ta hial. Chung damdawi ka ei erawh chuan ka tha ve leh mai zel bawk a, mahse, a hun a rawn inherchhuah erawh hi chuan hrehawm thin ngat ngat tak a ni.
Ka awmna chhungkaw tharah chuan tangkai lo takin ka damloh zui chiam avang khan ka mu deuh chawrh chawr a nimaia, an ni chhungkua erawh chuan keia damlo ve mai mai chu phur em emin min enkawl char char thung si. Inthlahrun hi ava han na duh thin tak aw. Mahse, tha takin doctor min chawh damdawite kha ka ei chho a, ka taksa pawh chuan ziaawm lam pan ve zelin ka tha chho ve hret hret ta. An tih fo thin dan in zingtin hian ka mutna bulah bible nen an rawn kal anga, min tawngtaisak thlap hnuah an hnaah kalin, an fanu nula KimKimi khan nilengin min awmpui thin thung. Tichuan, tlai hna ban hnuah ka mutna bulah rawn kal lehin zing lama an tih ang tho khan tawngtaina te chu min rawn neihsak leh thin a, zan mut hunah pawh chuti tho chu. A tir kha chuan duh lo in ning hle mah ila a rei hnuah erawh chuan ngaiah ka nei a, nuam ka tiin Pathian thu ngaihthlak te pawh chu ka kham lo ve ta hial mai. Lalpa hi chu a tha a ni.

Hetianga ka taksa a chak that hnu pawh hian Francisa te inah chuan ka awm chhunzawm ve zel tho a, Francisa nu leh pa, Pa Rama leh nu Siami te ber ber hian ka kalbo mai chu hlau in min chelhbet tlat zawl a tihtheih ang chu. A țulna apiangah puiin an fanu Kimi nen pawh chuan kan innel ve tawh angreng hle a, a nu leh pa te hnathawk tura an chhuah hlan te hian keini pahnih chuan in lamah tihtur dang te lo ti ve in, a tangkai thei ang bera awm ve chu ka tum thin. Chu chu ka tihtur diktak pawh a niin keimah pawh ka hlim a, Pa Rama te nupa tak pawh hian min ngaihsakna piah ah min hmangaih zia ka hre fiah tial tial a, an hna rawn ban hun te hi nghakhlel takin ka lo thlir zawk thin. Pathian thu han sawi ho leh mawlh mai kha nuam ka ti ve tawh em a tin ni. Ka kham thei lo.
Kawng engkimah an chhungkua hian min tanpui nasa a, an fapa boral ta Francis Zothanpuia ai zawng zawng kha min awhtir hi an tum ka ti dawn nge, an fapa ang maiin min tuam hlawm bawk a, min en hrang lo lutuk chu a inthlahrunawm zawk thin. Ti daih ila, hei leh chen hi an hnenah ka lo khawsa ve ta a, an fapa boral tawh Francisa thlalak takngial pawh chu ka la hmu ve lo reng rneg tih ka hrechhuak. A lehlam zawnga ngaihtuah chuan chutiang han buaipuina hun pawh kha kan nei lo tlang bawk a tin ni. Ka damlo min buaipuina lamah khan hun leh tha an khawhral hnem em bawk a ni.

‘’ Kimkim, ti daih ila, iu Francisa thlalak kha kawl that In la nei miallo maw?’’ inthlahrung deuh hleka ka han zawh chuan ani pawhin ngaihtuah zui ve niawm takin a mit alo khap deuh sak sak a, a hnuah,
‘’ Um nei nual ang. Ka u kha a damlai khan thlalak uar ve tak mai hi a nia mahse, a han boral tak hnu kha chuan ka nu hian a tawrhnat em avangin a thlalak zawng zawgte pawh hmuh nawn fo a duh ta lo tlat a, kan khung bo ta vek a nih kha. Ka u hlimthla a hmuh fo kha chuan a mittui a hul thei thlawt silova, tunhma chuan frame lianpui siamin Tv hnung bang sangah khian kan tar ve thin alawm. Mahse, ka nu berin hrehawm a tih thin em avangin ka pa khan min lak thlak tir ta vek a kan dah bo ta a ni e’’ a rawn ti ta siam siam mai a. ka en chak ve ta hle mai. Ka dil ngam a nge maw. Zawt ngam chiah silo zawt chak angreng taka thildang ka lo tih kual leh laiin amah tho chuan

‘’ Ka u thlalak chu I hmu chak deuh tihna emni?’’ min rawn ti leh hlauh mai a, rang zet hian ka lo bu zui ve nghal zat bawk/
‘’ Um , lo awm rawh ka va hai chhin a nge’’ tiin min kalsan ta a.
Thlalak zawnga ava thanbo chhungin kei chuan thildang ka lo ti leh mawlh mawlh a, chhuat te chu nawtin Kimi hi chu ka awl hnehsawh ve thin viau.
‘’ Heng ho hi ka hmuh theih chhun chu an nia, a tam zawk hi ka nu in khawnge a dah zawh ka hre chiah lo’’ a rawn tih rualin thlalak chu ka lo ban nghal a. ka han en nak chuan ka khawng vek lo chauh hi a ni ber e. ka kuta thlalak ngei ngei pawh chu ka thlauh țhelh nghe nghe thei nia.

‘’ Hei hei hi iu Francisa chu maw!?’’ ti ban deuh chuarin, mak tihna hlir hian ka khat zui a, ka dang te pawh chu an ro nghal hulh hulh tawh. He lai hmun a min hruai thleng tu, ka awmna apianga min rawn tlawh awl lo tu leh lock up chhungah takngial pawh min rawn luhkhung tawh tu kha pa ngei mai kha Francis Zothanpuia chu alo ni tihna a ni ang maw!? A nih chuan kei hi engtin nge min rawn hriat daihb theih a. kha pa kha Francis Zothanpuia , mitthi tawh thlarau alo ni reng tihna maw? Mak ka ti tulh tulh. Mahse, ka awm dan danglam zet chu Kimi chuan min rawn hmu mai ang tih hkau in ka inthup zui leh ta daih zawk a, thlalak pawh kha rang zet hian a kutah ka hmehbel zui leh nawk nawk bawk.

Tlai hna ban huna pa Rama te nupa lo haw lai pawh chuan kei chu inthlahrunna leh inthiamloh rukna hlir hian ka lo khat zo tawh a. Biak pawh ka lo be mang lo hial. Nia, he inchhung ka luh hmasak ber khan Francisa chu ka thianpa a nih thu sawiin ka intat lut a, awm zui nghal hran lo mah ila a hnuah lehzel pawh Francisa thianpa tih chu a chhungte ho min hriat dan hi nih phahin, tun thlengin tihian min khawngaih a min duhsak phah bawk a. kawng engkimah nise ka vanneih phah bawk a tih theih ang chu. Kei lahin dawt hlang hlak hmangin ka bum ve ni tlata inhriatna ka neia, ka tihluih awm miah lo mahse Francisa thlarau khan ti tura min tih zan te khan ti lo thei reng ka ni tih ka inhria. Mahse, tikhan a chhungte hnenah dawt ka swi a, an fapa chu ka hriat ngai loh mai bakah, tun hnuah chauh tihian a thlalak hmangin ka hre ve leh chauh tihte hi hria se eng angin nge min ngaih ang. Dawt sawi hrat tak leh an fapa boral tawh hminga hamthatna hmuh tum ang maiin min ngai vek a ngem. Engtin chiah nge ka han hrilhfiah tak ang tih ah ka rilru chu a buai chho ve ta nak mai le.

‘’ Ah, pa Ram, min hrethiam ula. Eng lo, naktuk khua hi rawn var se ka chhuahsan tawh mai dawn che u nge maw ni ka lo ti deuh a’’ ka mut hmuna an rawn tawngtai zawh hnu chuan keiin ka lo ti ve thung a. mak tih hmel fe hian an nupa chuan min en zui ta tlawk tlawk phawt a, chutah, nu zawk chuan
‘’ Eng aiah nge chutiang te I han sawi chhuah tak a. kan fapa boral ta aiawh tu tiin kan fapa ang chiahin kan en che a, kan hmangaih bawk che a, heng te hi hrehawm ilo ti ru zawk nge, I duhkhawp lo zawk tih hi min hrilh la, insiamthat kan lo tum ve ang aw. Kei chuan I hmel ka hmuh rual hian ka fapa hmel kha hmu ve angah ka in ngai thin a, ka hlim asin’’ a tap zui ta hlarh hlarh a, hrehawm ka lo ti ru ngawih ngawih. Chutah, pa Rama pawh chuan a tarmit chu hruk fai nuah nuah pahin zawite hian

‘’’ Nia, nang hi kan chhungkaw member diktaka ziah luh che tumin hma ka la mek a, I chhungte hnenah pawh thil engkim hi ka sawi tawh nghe nghe. Kan lo rilruk dan phei chuan tun atang hian keini pawh hi kan hming lama min ko tawh lo in nu leh pa ang tak takin min ko tawh zawk la kan duh a. enkawl che hi kan inhuam takzet zawk a ni’’ a rawn ti ve leh dap dap mai. Kei chu ka inthiam lo tulh tulh thung si nen ava han hrehawm duh tak.

‘’ Min hrethiam rawh u. ih, a tir atang khan dawt hlir ka hrilh che u a, eng lo, diktaka sawi chuan in fapa boral tawh Francisa nen pawh khan kan inhrengai lova, vawikhat pawh a damlain khan kan la inhmu chhin hek lo. Aman ti tura min tih anginhelai hmunah pawh hian’’ ka tih lai chuan nu zawk bawk khan țap chung hian

‘’ Kan hria asin! Kan fapa nen khan in inhre ngai lova, in inkawm ngai hek lo tih hi kan hre vek asin! I hmel I rawn lan hma atang khan hetiang thil hi chu alo thleng dawn tih kan hre lawk vek tawh zawk’’ a rawn ti ve ta mai a! Meng zau nghal kawkin, sawi tur ber pawh hre lo hian ka lo ang deuh phuau ringawt tawh.

‘’ in lo hria maw? Engtin?’’ ka han tih leh chuan pa zawk chu alo thaw chhuak ve hak hak ta mai.
‘’ Nia, Biaka, kan fapa Francisa kha nangmah ang tho a damdawi rui thin nang ai pawh a khawih nasa zawk leh luhchilh thuk tak mai kha a ni ve thin a, kan fapa neihchhun a ni bawk nen a buai pawh kan buai phahin a nu nen hian kan mittui ti tla tu kha a ni zantin fo. Mahse, keini chuan heng damdawi khawih leh rui thin te, humsual daia che pelh thin te hi kan hnual suat lova, kan diriam ngai bawk hek lova, tanpui kan duh thin zawk. Chutiang bawkin kan fapa pawh kha himdam takin awm se, Pathian ah te inhmuchhuak thei se tih kha kan duh avangin nitin zantin hian a tan kan tawngtai a, a lu chunga kut nghat pawh khan kan tawngtaisak awllo ve asin. Mahse, ni khat a leng chhuak leh erawh chu zanah pawh rawn haw thei lo in a reh vang vang mai a, a nu nen phei hi chuan kan mangang lutuk kha zan pawh muhil thei lo in kan tawngtai tlaivar a, kan tap dun bawk. Addict niin tal hiar ve thin viau mahse, kan fapa khan riah bo mai mai a ching ngai lova, a leng rei thei hle thung. Chumi țum chuan amah nghak reng rengin kan khawvar zak a, a tukah pawh kan theih dan ang anga zawng kualin kan buai hle. Mahse, kan hmu ta chuang lo. Zan a rawn ni leh a, a rim a ra pawh hriattur a awm tak silo ah chuan ka thawhpui ka nau te ho hruaiin hmun hrang hrang chu kan dap chhin ta a, chutah chuan, phone call pakhat hi dawngin, veng pakhat daifem deuh a vawkin hlui bulah ruang an hmuh thu chu an rawn sawi ta mai a. ka tlan nghal vat. Tichuan,ka fapa ruang ngei mai chu va tuam hlawmin postmortem kan tih leh te te hnuah a nu pawh hi harsa ti takin ka hrilh hre ve ta chauh bawk a ni. Ka fapa khan midang kut a tuarin kan hre lova, postmortem result a a lan dan ah chuan overdose a thi tih pawh a chiang hle. Kan fapa thihna khan min run a, kan na a, kan vial ngawih ngwih a, kan keh chhe hneh hle a ni. Ka hnaah te thleng khan tling lo ni a inhriatna te neiin ka tlusawp ngawih ngawih a, kan tuar thiam lo a ni ber e. mahse,thawkkhat lai, I hmel rawn lan hma chawlhkar khat vel la awm ang tih atang khan a nu hian a mang lamah thil mak tak hmu thin in, chutah chuan kan fapa khan alo be thin niawm tak a ni a! Nangmah hi inih ngei thu chu sawi lang lo mahse, addict pakhat tanpui ngai em em hian min rawn pan tur thu lo sawiin, keini pawn tha taka lo dawngsawng a lo enkawl tur chuan a rawn chah ta thin a, kha mumang kha zantin mai a hmuh fo tak avangin ngaihthat chi a ni ta hauh lo tih kan hria. Uluk takin a rwn chah a, a chunga kan tih hlawhtlin hman loh a nun siamthat hna kha chu tlangval chungah tal chuan lo thlen dik tir turina nu leh pa te hi min rawn chah ta thin a ni. Tichuan, chawlhkar liam hnuah nang hi tikhan mak tak maiin I rawn lang ta hlawl bawk a, khami zanah khan e, ka fapa thianpa ini lo tih hi chu kan hre nghal vek tawh asin. tih tir tu che leh rawn hruai thleng tu che an awm ngei tih kha kan hriat avangin a nia kha zanah pawh khan kan lung a chhiat hlawm em em mai ni. Nang ngei hi kan fapa thar tura ruat leh kawng dik kan kawh hmuh theih tura Pathian mi ruat ngei mai chu ini tih kan chiangin kan thlahthlam thei ta lo che a ni. Ka swi tawh zawng zawngah khan dawt pakhat pawh a tel lova, min ring ngam turin kan duh bawk che’’ a rawn tih leh zet chuan ka harh chhuak kawk kawk ni ber hian ka inhria.
Ka rin dan chuan Francisa khan a damlai hun chhung reilote ah khan addict ni chungin a nun kha theihpatawpa sual chhuah ve ngei pawh a duh a nih ka ring a, a fight ve nasa hle pawhin ka ring bawk. Mahse, Pathian atanga piantharna taktak nei ta lo chu damdawi zungzam khan hnehin a tlu leh thin a, a tlun hlum ta nge nge kan ti thei ang. A nu leh pa in tha tura an duhna te, an beihsakna te leh an thawhrim na zawng zawng te kha a thlarau thleng pawh a hahchawl thei lo khawpa siamtu niin, a aiawh tur atan hian kei hi min rawn thlang in, amah ang tho a nun khawlo leh suala pil lut tawh kei ngei mai hi siamthat min duh te pawh alo nih dawn hi ka ti ta a ni.

Tap zawih zawih chungin ka hmaa la thu ngawi reng Francisa nu leh pa, tun atang ka nu leh pa ka chhungkua lo ni ta te chu kuahin kan inkuah khawm a, kan tap zawih zawih hlawm bawk. Hmangaihna leh thawhrimna hian thil alo va ti thei tak em tih hi ka nunah hmuh tur a awm zel a, ka hmu chho zel bawk a, tunah chuan damdawi tih chakna chhete pawh nei tawh lo in Pathianah chauh ka tuihal huam huam tawh zawk a, nitin mai hian hun awl ka neih phawt chuan Bible hi keu loh lai ka nei ngai lo. Phone te chu nei ve lem lo mah ila Tv atang sermon tha tak tak te ka ngaithla fo bawk a, Pathian hi ka mamawh a ni.

‘’ kha, nun thar I han neih atang chuan I hmel te pawh a tha a, I thar vuk mai alawm’’ rawn ti tu thawmah chuan hnunglam hawiin ka inher let zawk a, amah Francisa ngei kha alo ni. Nuih zui var varin lawmthu te ka han hrilh hmasa leh te te phawt a, alo khi ve vur vur.

‘’ A hunlaia zawm nachang ka hriat loh leh tih nachang ka hriat loh thil tamtak kha nang chuan I rawn ti chho zel thei a, tunah chuan nun thar neiin Pathian hmel I hmuh phah ta bawk a, ka lawmpui khawp mai che. Chuan , nangpawhin min lawmpui ve na tur I nei aw’’ a tih chuan hawi kual deuh zak zak chung hian kei chuan
‘’ Eng thil nge ni a’’ ka lo ti vat. Chutah, amah bawk chuan thil thui tak ngaihtuah ve niawm tak mitmeng hian
‘’ Ka boral hma minute tlemte la awm tih ah khan Pathian hmel hmu ve in piantharna ka chang a, amah nen chuan kan in pawl bawk asin’’ a rawn ti ta a nih chu! Makti em em hian ka lo en tlawk tlawk tawh a, thil awmzia ka zawt nghal bawk.

‘’ Um, overdose a thi ka ni e. ka thih chhan kha thudik ngei a ni. Mahse, khatia tanpui tu ngaia ka talbuai lai khan ka tum lawk pawh ni miah lo in ka kâ atang khan Pathian hming a rawn ri chhuak a, tichuan kan inpawl zui ta a ni. A nuam asin aw. Ka kalna tur hi ka chiang a, ka nu leh pa te tawngtai rah engkim mai kha kei hian a zavaiin ka tel ka ti lo thei lo a ni’’ nui var var chunga a rawn tih leh chuan lawm luatah kuah mai ka han tum ringawt a, a theih loh tih hrechhuak in lai angreng fe hian ka ding tlawn zui ta rneg.

‘’ Francis, ka lawm hle mai. Kei chauh ni lo nang lehzel pawhin damna ilo chang hman tih ka han hria hi ka lawm tak tak a ni. I chhungte hnenah pawh ka lo hrilhsak ve ngei ang che’’’ ti ve in, ani chu lungawi hmel em em hian alo bu deuh nghat nghat a.

‘’ Pathian thil tihtheihna vang liau liau in damna I chang tawh a, hawi kir twh lo la, I hmalam ah zel chak takin ke pen tu ang che aw unaupa’’ a ranw tih leh chuan keipawn bianga mittui luang zung zung chung hian
‘’ Awle unaupa, nang leh Pathian zarah liau liau tunah chuan nun thar ka nei tawh a. ka dam tawh. Ka lawm takzet a ni. He lei chhuahsan a pialral ka rawn kai ve hunah hlim takin min lo hmuak ngei ang che aw’’ lo ti ve in, ani chu eng mak leh nasa tak hian a rawn bawh zui ta chiai chiai mai a, ka meng hleithei ta lo. Boruakah chuan thamral riai riaiin a aw thangkhawk chauh chu ka hre thei tawh a,

‘’ unaupa, I dam tawh. I dam ta e’’ ti khawk rum rumin a bo pil zui ta a ni. Chumi hnu chuan nasa taka hmuh leh pawh tum eng ang mah ila Francisa chu a bo tawh a, a kalna tur hmun diktak lamah engdang mah lungkham nei tawh lo in a kal zui ta tih ka hre thei. Ka lawm a ni. A zarah Pathian hmel hmuh tirin ka awm a, hmangaihtu tawngin tunah chuan mi thar hlak ka lo ni ve ta si. Lalpa nen chuan thil engkim mai hi alo nuamin alo hlimawm em em vek a nih hi mawle. Ka dam ta e.

This Post Has 2 Comments

  1. StephenVom

    Все свежие новости мира часов – трендовые новинки лучших часовых марок.
    Абсолютно все коллекции часов от дешевых до очень роскошных.
    https://bitwatch.ru/

  2. Robertnon

    Все свежие события часового мира – новые новинки лучших часовых марок.
    Точно все модели часов от дешевых до очень люксовых.
    https://watchco.ru/

Leave a Reply