You are currently viewing KA FANU
Oplus_131072

KA FANU

Spread the love

BY : Vanlalpeki Fanai

‘’ Ka nu pawh ini lo! Kalbo rawh! ‘’ min titu  ka hmaa hmeichhe naupang ding chu ben deuh lawlh mai ka duh tawh a, mahse, ka thei lo. Hei hi ka pasal fanu a ni tih hria in kut ka thlak thiang lo tih pawh ka hre ve vek.

‘’ Bawihi, lo ngaithla rawh. I pa hi a duh lo chung chungin ka nei lui bik lova, I nu nena an inneih lai khan ka tibuai hauh lo bawk. Kei hian ka huat loh ang bawk che in nangpawh hian min huat nachhan tur inei lo in ka hria’’  ram deuh hmarha ka han tih ve te chuan a mitmeng lian leh bial kel kawl mai chuan rum em emin min lo melh ve reng a, ka hlauh phah ve deuh te hi a ring nge maw ni, ka hlau therte mang silova, kut ka thlak hreh thin em avang hian min hlau lo zo vek tawh ni berin ka hria. 

Sawi tawh ang khan tuna ka pasal hi ka pasal pakhatna niin, pathlawi fa pakhat nei tawh a ni a, a fanu hi hmeichhe naupang kum 7 mi ni ve in a nu bulah a khawsa lo a tihian kan bulah, keini in duat takin kan lo enkawl ta a ni. Naupang kum 7 mi lek mahnise ka thu hi a awih duh ngai hauh lova, min hnial char charin a pa leh a pi leh pute thu erawh chu a kawi a ngilin a zawm thin thung. Ka laka a khawsak dan mawi lo lutuk vang hian a pa chuan han kam khat ve bawk thin mahsela engatanmah a ngai chuang lo. A thuawihna hian ni khat takngial pawh a awh ngai bawk hek lo. Ka hrin, ka rila rah nilo mahse hmangaih taka enkawl ka inhuam tehlul nen hian a khawsak danin a zir lo em thin a, naupang tia en liam theih chin pawh ka nei ve ta fo mai. Mahse, kut ka thlaka, tawngkam na deuh hlek ka hman khum vaih zawngin a nu bulah a chhe thei ang berin min chhuah leh dawn a chu chu ka peih ve loh luatah ka ngawi mai a, chuti chung pawh chuan min la hlau chuang eih lo. Naupang sual ve tak chu a ni e.

‘’ Mawimawi, I nu han ko rawh le chawi ei kan hman tawh a nia’’ kan pa in a tih ri chu inchung pindan atang ka hre pha ve reng a, mawimawii chhan dan tur ngaichangin ka la ding ngawi kar thung.

‘’ Aih! Ka ko peihlo’’ a ti leh ta nge nge e. chuveleh kan pa chuan vin that mai hian, 

‘’ Het! Naupang te tein peih lo tih tawngkam kha hman loh tur kan ti em? Han kal nghal rawh’’ ti leh tuarhin Mawimawii tap in a zui nghal bawk a, ka awmna lam panin a thawm pawh chu a rawn hnai zel bawk a, chutihlai chuan inhnuai a lamah kan pa nu, ka nu in a,

‘’ Aw,, naupang hriatah hian tawngkam vin hi hmang thin lo the u, in mak lutuk em mai’’ a tih lang lang thawm pawh ka hre zui nghal. Ka rin dan tawk vel a ni e. keini nupa in a thiamlohnaah han hau deuh ila a pi leh pute hi an lo inrawlh ve nghal zat zel a, heng te hian naupang rilru ti kal kualin an pangchan phah zo vek ni ber hian ka hria.

Zanriah pawh bar duh lo in Mawimawii chu a titau chhunzawm nghal hmak mai a, a pi bawk chuan zankhua maiin a ei duh tur buaipuisakin a phi sek bawk a, kan pa mit chu an tikham pitu thin the asin aw. Eng thumah hi sawi ve ka tum hran lo va, ka ngawi hmak. Thu kam khat pawh nei ve leh vaih ila chuan I fa a ni lova, I hrethiam chuang lovang tih bak chu chhan letna dawn tur dang ka nei leh dawn chuang lo. Ka peih vel tawh lo a ni e. chutihrualin kan pa bulah erawh chuan an naupang enkawl dan chungchanga ka lawm lohna te leh, Mawimawii nungchang tha lo lai siam that theih ka chak zia tih vel te chu ka sawi lang ve fo thin a, ani hi chuan a zualko zawnga eng thumah a sawi chhawn tawh ngai lem loh avangin a hautpui hran lo bawk. Mahse, tih tak taka Mawimawii control beh a tum ve velah hian a pi leh pute bawk kha an rawn inrawlh nghal thin si a, a nu bula dah ah te hial pawhin a pa zawk chu an vau thin bawk. Buaithlak tak a ni.

Ni khat pawh ka nu leh pa te chu mitthi vuina lama kal daih an țul avangin keiman Mawimawii school kal tur chu ka buaipui mai a ngai ta si a, school uniform ha tura ka han tih pawh chuan a ha tha duh ta tlat lo. A khum chungah tum bura thu chung hian a kut a kuangkuah deuh tlat bwk a, hnuailam a melh ran reng bawk.

‘’ I tlai dawn a nia hmanhmawh rawh’’ ka tih pawh chuan ka kut te chu min lo thin per sakin, a tal nawk nawk reng bawk a, ka thin in a tuar lo teuh khawp mai.

‘’ Vanrammawi, I pa ka koh hmain ha fel vat rawh. I pa in a thlah nghal dawn che nia’’ ka tih deuh hrak hnu pawh chuan a che duh chuang eih lo va, ka tihngaihna hre tawh lo lutuk chu a bulah thu in ka thaw leh hawk thin a, amah chu beidawng zet hian ka melh ta rneg ringawt mai.

‘’ E he! Ilo la insiam zo na nge. Kan tlai dawn a nia ti vat vat ang le’’ a pa zawkin a rawn tih takah chuan fel deuh huan a awm ve leh mai a, a pa tih ang ang chuan sawisel nei lo in a awm zui leh mawp mawp tho si. Ka va han ngei thin tak aw. 

Tichuan, an zavaia min kal chhuahsan hnuah ichhung tihtur tul ang ang te chu tifel ve zung zungin ka insu pah nghek bawk a, tlai alo nih meuh chuan ka chau ve angreng khawp a ni. School ban chu rawn hun in kan pa hmel ka hmuh rual rual chuan ka lakah lungawilohna a nei tih pawh ka hre nghal mai a, a dur tha khap khap phian. Mahse, eng thumah sawi lo in a fanu nen room lamah an inkai lut nghal daih mai a, ngawi reng hian an che vel chu ka lo en ve reng ringawt. Chutah, ka nu leh pa te mitthi in kal pawh chu rawn haw ve lehin, a engamah hma hian ka nu zawk chuan min rawn pan nghal nal nal mai a, awka ngaihnobei lo zet maiin,

‘’ Tukin khan Mawimawii school kal tur ilo siam duh lo a nimaw? A nu a hrilh leh vek a, a nu lahin min rawn ankhum hrep bawk a, ka zak tak tak a ni’’ a rawn ti ringawt a nih chu! Ka ding khawng zui awt a, hetiang kum rual lek naupang ni siin dawt chiang lutuk tak mai a han sawi duh chu ka lungawilo ve takzet a ni

‘’ Chutiang chuan a nu bulah alo va zualko vel a maw!? A mak thin’’ ka sawi zawh rual rualin kan pa kha room atang a rawn chhuak zui ve thar thar bawk a, a kutzungchal meuha min rawn kawh pah hian,

‘’ Ka fanu hi I ngaithei lo reng dawn a nih chuan kan innei rei thei lovang! Hria ang che. Tun hi a vawikhat thlenna chauh pawh a ni tawh lo tih ka hria, ka zep sak che a ka zep zel bawk a, ka tlin tawh lo tep a ni e’’ a rawn ti ve ta buan buan mai a! Mak ti lutukin ka ang phuah tawh ringawt.

‘’ Nang lehzel pawn maw’’ tiin ka pasal chu mittui tling piau chug hian ka melh ta reng ringawt a, min ti hrilhhai em a tin ni. Ka mang vek thei.

‘’ Inlak khawngaihthlak vel kha a tullo em maia’’ ka nu khan lo ti ve leh hramin min kalsan nghal bawk a, kan pa nen erawh chuan ngawi rengin kan la indinchilh vang vang. Mahse, ani pawhin reiloteah min kalsan ve in roomah a lut nghal a, ka zui lut ve leh mai bawk.

‘’ Ka sawi kha hrereng ang che. Tun hi a vawikhat thlenna chauh a ni tawh lo ka tih kha. Then che ka duh loh vang hian ka zep pui ve char char chea, ka dawhtheihna te hian tlin chin an nei ve thin tho a nia’’ zawi supa alo tih chuan khumah ka thu thla nghal hnawk a, ka mittui a luang ngiai ngiai bawk. 

‘’ I fanu hi ka hrin ang chiah a en ve pawh ka tum thin. Mahse, a harsa hi ka ti a ni. Amah ber hian min lawm lo em em a, tihluih pawh ka tum nasa. Tih vak ngaihna erawh ka hre tam lo em a, min hrethiam tlang dawn a nia ‘’ ka tih ve chuan eng thumah sawi tawh lo in min rawn en leh vung vung thin a, min kuah ta ringawt. Dim tea ka hnungzang chu rawn chul hliau hliau chung hian,

‘’ Ka tihpalh a ni. Duh aiin ka lo tawngkhum na deuh hlek che a, min hrethiam rawh. Ka fanu mittui tla lai ka hmuh khan ka insumtheihna te an lo kalbo vek a tin ni’’ rawn ti dam dapin, a awmah chuan ka bei zui ve hle hle bawk a. insut deuh hlap hlap chung hian,

‘’ Zingah khan ka siam duh lo pawh a ni lo a nia, Mawimawii zia chu I hriat tho kha. Min hua tihte thleng pawhin I hriat vek kha’’ ka lo ti ve leh hram a. ka samah chuan a rawn chul zui hliau hliau bawk.

‘’ Um, a tawk tawh e. sawi tawh lo ang. Min hrethiam dawn a nia’’ a tih ve leh takah chuan ka dam zui nghal huai huai theiin ka hriaa, ka zang deuh hwk bawk. 

Khatiang thil a thlen hnu phei kha chuan Mawimawii chu ka hnaih tha duh tawh lova, dawt sawi loah chuan naupang hi ka ngaina hranpa lo ve bawk nen, min ngaina duh lo tute ngat phei chu hnaih buai loh law law hi ka duh thin zawk. Mahse, ani hi chu ka fa a nihna chen a awm ve tho avangin dawhtheihna nen ka hnaih lui hram hram zawk a ni a, ka tlin lo lek lek chu a nih tak ber hi.

‘’ In awm maw?’’ kawngkaa rawn dah pah hian ka pasal nupui hlui Mawimawii nu ni bawk,  Umatluangi chu a rawn khi deuh vur vur mai a. Tum loh deuh a ka han hmu thut chu engvang ber ni maw, ka phu ve zawk mai. Lut tura ka sawm hnu chuan rawn lut zui ve maiin, inthlahrung lemlo tih hriat tak hian sofa chungah te chuan a han thu pah ar ar bawk a. ka nu leh pa te pawh chu tha tak taka bia in sawi tur nise ala hre em em zui. An nui ho leh dar dar thin ri ka hriat te chuan nuam lo tihna hlirin ka khat tawh a, ka inkiltawih phah zo vek dawn in ka hre mai. Chokaa ka awm laiin ka nu lah chuan min la rawn au lang lang zui bawk a.

‘’ Siamte, thingpui hang kha lo lum lawk ta che’’ zaidam tak hian  a rawn ti ve tehmial a, ka ner zui nghal sak thei. Tichuan, an thingpui in tur keng chung chuan thutkhawmna lamah ka phei ve a, UMatluangi chuan mitmeng de sar sar chung hian min lo en reng tih pawh ka hria. Dawhkana thingpui no ka dah rualin amah bawk chuan,

‘’ I fel thin ngawt mai nang hi chu. Ka fanu nise I fa ang chiahin ilo en thei bawk a, ka lawm tehmai a nia’’ tawngkam tha leh nem hliak hluak chuan a rawn ti ta vel kher a. A fanu in ka chunga a rilru put dan leh min en dan engkim kha a hre vek a, duat hleihtheih a nih loh zia pawh he nu hian a hrechiang ber awm e. a awki hrim hrim pawh kha a thin khei tur zawnga a sawi tih ka hrethiam ve vek a, ka thin a rim nghal hlur thei hial. Nui deuh sakin ka chhang let duh ta lo thung a, ka huat tawk hi a tling ve thin em a ni. Inzawmna an neih tawh loh hnu thleng pawh a tikhawpa ala rawn tlangnel thei hi mak ka ti a, ka pasal tih loh chuan an be tha em em bawk si nen. An tan hian ka tling zo ve thin riau a inhriatna te min neih tir thul a, mahni ka insit in,a chhe thei ang ber ka ngaihtuah thin a, a hrehawm duh takzet. Engemaw chang phei chuan ka pasal thleng thlengin ka rinhlelh phah thin bawk a, ngaihtuah loh tum pawh hian ka rilruah alo lut ve leh thin bawk si, nuam lo duh tak a ni.

Chutiang chuan hun leh ni kan hmang chho ve nawk nawk a, Mawimawii pawhin a zei ngai tho kha la chhuah ve rengin engemaw chang erawh chuan a han fel ve leh viau thin a, a tlangpuii ka chhut dan ah chuan a nu in a fuihpawrh loh  țum hian ka chungah a tha thin ni ta ber te hian ka hria. Nia, naupang rilru thianghlim tak pu rual lek kha ala ni bawk a, fuih khawlo tu a nei a nih loh chuan midang chunga rilru chhia han pu ngawt thei tur kha ala ni lo ve bawk a ni. A khat tawka a nu in  a awmpui chang apiang hian a rawn haw leh hmel hi a danglam zo ve ta thin a, a sual a zual ngei ngei bawk. Chu chu duh lo in keipawhin kan pa hnenah hian tha ka tih loh zia chu hrilh ve thin mah ila, ama thu in engmah hi kaltlangpui thei rih hek lo le, a nu leh pa te thu thu chu a ni zel mai.

Ni khat a school bang chu mahni in a rawn haw ve hnak hnak mai a, hruai hman kan awm loh vang a ni pakhat. Roomah rawn lutin tap pur chung hian min rawn en kiau mai a, ka nawmsam loh avangin hetihlai hian khumah ka lo mu mek a, ka bulah chuan rawn kal hnaiin a mit nuai leh chat chat chung hian,

‘’ A nu Siamte, kan class ami mipa lian deuh deuh ten min hau leh a’’ tiin ala insut hlarh hlarh reng a, peih leh peih lo hian ka lo tho chhuak ve ta ringawt bawk. Min koh dan kha han sawi hmasa ta ila, vawitam ‘nu’ tia min ko tur hian tap khawp khawpin bei mahsela a duh tlat loh avangin leh, keimah pawhin pawi ka tih rih loh avangin tihian min ko ta ringawt mai a ni. Tichuan, ka bulah pawt hnaiin school lama an lo hauh chhan te chu ka zawt chiang ta bawk a. La insut deuh hlarh hlarh chung hian,

‘’ I te bik lutuk min ti thin a! A hma pawn ka pencil te min thuhruksak a, ka samah te min kekin ka tiffin pawh min eizawhsak thin’’ a rawn tih chuan ka lungawilo nghal em em a, ka inpet ruh ve nasa hle nghe nghe.

‘’ chutiang chu ti nge min hrilh vat loh zawk a. An timak hle mai’’  ka sawi zawh rualin amah bawk chuan,

‘’ Anu bulah ka sawi thin a, kan hau dawn nia a  ti zel a, a hau bawk silova’’ a rawn tih chuan amah chu ka melh leh zawk. I nu hi chu a tawng chauh hi a chak a, a bawhzui tak tak ngai hleinem tih melh in ka melh a.

‘’ Um, bang daih rawh le. Naktukah ka thlah che a nga min hmuh tir ve dawn a nia’’ tih pah chuan a thawmhnaw te chu ka thlaksak mawlh mawlh a, ani erawh chu lungawilo tih hriat tak hian ala ngik deuh faih faih reng mai thung.

Tichuan, a tuk pawh rawn inherchhuak ve leh maiin, ka sawi tawh ang ngei khan schoolah chuan ka va thlah ta thlap a. school compound kan luh rual rualin ani chuan a hmazawn chu kawk nghal va va in,

‘’ A nu Siamte, saw mite pathum saw an nia’’ a ttih chuan chung ho chu ka melh ta vang vang phawt. Mipa naupang thau lian ve lampang pathum hi lo niin, mi hausa fa pawh an nih ngei ka ring. Mahse, k fanu lo ti naa, lo hmusit thin tu an nih chhung hi chuan chief minister tu leh fate pawh ni rawh se, ka hlauh viau bik nachhan tu kha ka hre lo tlat. An bulah chuan va kal hnai zung zungin,

‘’ Naupangte u’’ ka ti hmasa te te a, naupang pathum te chu rang zet hian an rawn hawi let nghal vat. Mak min tih hmel hlawm hle lehnghal. Tichuan, ka hnunga ding ka fanu chu kawh leh zauh pahin nui hmel pu sang chung hian,

‘’ Hei hi ka fanu a nia, thian anga inkawm ve duh lo a nih pawhin lo tibuai tawh lo ula tir’u? A nih loha inlo velh tah leh chuan hetah hian ka rawn kal leh a nga, school gate-ah sawn nilengin ka tar tawh ang che u! In hrechiang em?’’ ti khar kharin ka sawi chhung zawng khan ka nui sang reng bawk a, ka ti mah mah tih chu inhre ve tho mah ila ka fanu tana ka tih ve theih tawkah ngaiin ka inthiamlo hran duh chuang lo. Mahse, a tukah chuan Mawimawii nu hnen atang call dawng nghal zatin, a rawn pawr tha khawp lehnghal a. 

‘’ Niminah Bawihi thiante ilo va hau na deuh a ni ang maw. An nu leh pa ten zirtirtute hnenah an lo thlen leh a, keimah emaw tiin min rawn call a nih kha! I tawngkam alo na hle a niawm a, a zialo ngawt a ni’’ a rawn tih chuan ka nui ve suk ringawt a. 

‘’ Mawimawii’n I bulah pawh vawi engemawzat a sawi twh a, chet chhuah I tum silo alawm. Mittui tla khawpa a rawn tah takah chuan ka va kalchilh ta mai a nih kha’’ lo ti ve kherin, amah bawk chuan,

‘’ Chupawhnise, naupang bulah em chuan I tawngkam kha fimkhur ve deuh la. Gate-ah ka tar dawn che u han tih em em te chu a nunrawnthlak deuh hlek lo maw’’ chang fak hian a rawn ti ve leh a, za lo zet hian ka lo nui chhuak ve ta hak.

‘’ ka tar duh tak takte in ring emaw ni. Engpawh chu nise, nangmah emaw an lo ti che chu a zialo hle mai. Pawi ka ti tak tak’’ ka han ti ve ta ngawt a. thildang kha chu pawi ti em em awm pawhin ka lang duh tawh chuang lo. Ka inchhir lo ka tih tawh kha.

‘’ Ka fanu hi chu keimah hian enkawl tawp thei ila atha ber ang mawle. Min chuh buai tlat lo se chuan thil hi a tha vek mai tur a nia’’ a rawn tih leh chuan ka lo ner sak sak tawh a. Thu awihawm loh lutuk hi ti nge maw a sawi a sawi thin le. A fanu a enkawl zawh mumal loh avangin kei niin duat leh hmangaih takin kan lo enkawl kha a ni reng si a, a fanu chu sawi loh, amah pawh hi a inchawm zo mang lo chu a ni tak sia le! Zaktheilo ve tak chu a ni e. 

‘’ Um, kha lam kha chu ka sawi ve tur a awm lo em mai duhtawk phawt ang’’ tiin min lo call tu mahnise, a call chu ka off sak ta hlauh a. ka ning, ka be reng peih lo. Ka rilru chhe sa hi a rawn tizual dawn tlat.

Ka naupang hauh dan chungchang bawk chu zanriah kilnaah pawh ka nu leh pa te chuan min zawt nawn ve leh ta a. Awi! Mawimawii nu han tawng tam dan em em hi chu aw. Chanchin la hre ve lo ka pasal pawhin min rawn melh phawk hra thei a, nuam lo chu ka ti ve ta lek lek mai.

‘’ Tawngkam chhe tak tak kha chuan tu fate mah hi ankhum tawh lo la a tha ang. Kan tan tak pawh a zahthlak zawk alawm le. A hmingin I pa nise kohhran upa ve pawh an ni ve a, a zialo khawp mai’’ ka nu in a rawn tih chuan kan pa chu a lo inrawlh ve vat thung a. 

‘’ Ah, nu, pa, hrethiam rawh u. A fanu an rawn velh sak fo mai khan a tha an tina ve tawh bawk a nih kha’’ lo ti zauh in, engmah a hre ve lo emaw ka ti a, alo hre vek tawh zawk a nih hmel. Chuveleh, ka nu thung chu ngaih dan nih loh hmel zet hian a han meng rang zui nghal a, eng thu mah chu sawi tawh lo mahse a rilru tur chu ka hrethiam ve tho. An tunu duat ka hauh deuh lahin min sawisel a, alo vel tap tute ka hauhsak lahin sawisel bawk a, an mit hi chu ka tlung zo lo ve chiang ngawt mai. An lung ka dum theihnan hian engemaw tak chu ka tih ve a ngai tih ka hriaa, mahse, tun atan erawh eng ber nge ka tih ang tih hi ka hrethiam rih bawk silo. Lu te lam lam an tihai zo vek.

Khatianga a thlavang ka hauhsak hnu atang kha chuan Mawimawii pawh tlemin ka lakah chuan a nem ve leh ta deuh a, chubakah, a nu nen an lo inhmu khat ve ta deuh bawk nen, tih a nuam sawt khawp a ni. Mahse, an duat khawlo laklawh tawh a, hun tam zawkah chuan la khirh tha vet vet tak a ni e. A nu ang pawhin min la en duh chuang hauh lo mahse thian ang maiin kan in en chho tan thung a, a thiam loh leh hriat loh thil te min zawtin, school lama buaina a tawh leh pawhin keimah hlir min hrilh tawh thin a, keiin a buaina zozaite chu thiam ang tawk tawkin chinfel dan ka lo zawnsak ve thin. Tawngka chauh ni lo, a taka ka chet chhuahsak thin avang hian a thinlungah hna a thawk ve a, a thla ka timuang bawk tih chu hrilhchawp kher ngailo in ka inhria. Tin, kei tak pawh hian kan boruak inmung chhoh dan chu nuam ka ti ve a, a duh tihhlawhtlinsak zel pawh ka duh phah bawk a ni.

‘’ A nu Siamte, a nu bulah ka awm rih dawn a, exam chawlh a ni bawk sia a nu in lo awm rawh atia’’ tiin phur em em hian room chhungah chuan a rawn tlanlut a. ka lo kuah ve chawt. A hmeltha tak leh mitmeng fiah em em te chu uluk taka lo thlir ve vang vangin , ka hrin alo ni lo hi chu pawi ka ti ve thin. 

‘’ Thuawih deuhin va awm la, min rawn be thin ang che aw’’ ka tih chuan a kutzungte chu a rawn ti pir deuh va va mai a, ka kut chu la lehin, a tih ang chuan min tih tir ve bawk a, tichuan kan kutzungte ve ve chu insi riala dah dunin,

‘’ Promise! La rawn be ziah ang che’’ ti sapin a nui leh sen sen reuh a, min rawn kuah zui ta hle hle mai. Aw, a taksa tereuhte, lum nuam em em mai ka deh rual te hian keimah ah danglam alo awm ve thin a, ka hrin, ka chhul chhuak nimai awma ngaihna pawh keimah ah hian alo awm ve leh thin. Chu erawh, mumang duhthusam man tum ang vel chauh a ni leh thin  si. A nu in a rawn hruai a, a kal liam dawn thleng chuan rawn hawi let țawk țawkin a ban te chu a rawn vai lawp lawp reng a, a mittui tling kiau pawh kha ka hmuh hmaih lo. Ka khawngaih zawk e a.

Mawimawii awm ta lo chu ka ruak deuh huai nimai hian ka inhriaa, hun danga a kalbo te kha chuan thawl hawkin ka inhre thin kha a nia, tun tum zet zawng, ka ngai ve veng veng mai nia. Kan pa pawhin ka awm dan chu lo hrethiam in min kal hlatsan duh bik hauh lova, Mawimawii pawh kan va call deuh chhen a nih kha. Ani lah chuan hlim em em mai hian,

‘’ A nu Siamte, apa, a nu in cycle min lei sak a, khalh ka zir dawn chiah. Zanah ka lo bia ang che u’’ ti thar tharin phone chu kan dah a, zan ni leh vat vat se ka ti nghal hle.

Tichuan, eirawngbawl hun alo thleng a, zanriah turte chu siam deuh sawk sawkin ka zai pah leh rat rat thin bawk. Chutihlai chuan thutkhawmna lama awm ka nu khan phone call dawngin, reiloah mangan hmel tak hian a rawn rak chhuak ta hlut mai a, keipawh ka tlanphei ve nghal vat. Ka va thlen phei ve chuan ka nu hu alo phili buai chung tawh hi alo ni a, ka pa pawhin a chhan chu alo ngaihven ve pah reng tho. 

‘’ Nu, eng thil nge ni ta. Tu nge lo call che kha’’ ka han tih chuan hlauthawng aw khur dar dar chung hian,

‘’ Ka tunu, Mawimawii’n accident a tawk an ti! Ni khua pawh a hre lo a nih hmel. A biak ttheih loh an tia, kal nghal ang u’’ a rawn ti bah nuai ta mai a!! Kei chu lo nghing nghal dawtin tihtur leh sawi tur ber pawh hre lo hian ka ding khawng a, ka mang vek a ni ber e.

‘’ Va insiam ve vat rawh. Kan kal nghal a ngai a nia’’ ka nu bawkin  a rawn tih leh chuan ka harh chhuak veleh chauh a, roomah ka tlanlut nghal bawk. Engvanga accident nge, engtia thleng thei nge  a nih tih pawh chu engmah ka hre ve lo mah ila ka hlauthawng em em tawh a, nikhaw hrelo khawp khawpa a awm thei a nih zawngin a chesual na ve thawkhat turah ka ngai tawp mai. Chu mawlh chuan min ti hlauthawng zual em em a, ka insiam pawh chu mumal nei lo in ka phili em em ringawt mai a ni. 

Tichuan, phuailuai zeta insiam zo nawk nawkin damdawiin lamah chuan kan tlanchho ve ta nghal a. Damdawiin kan thlen hnuah Mawimawii chu ICU lama an nawr luh thu min lo hrilh leh lek phei chuan ka nu nen chuan kan a vek tawh hi a ni ber mai. ICU lamah chuan tlan phei nghal vatin chutah chuan Mawimawii nu pawh kha tap pur chung hian pawnah alo thu reng tawh tih chu kan hmu a, kan hmel a rawn hmuh rual chuan tap chhuak hawk chung hian,

‘’ Nu, pa, ka thiamloh vek a ni. Ka zak lutuk’’ ti țuau in a bulah chuan ka han kal hnai hret a, awi, zu rim alo nam thut thut nia! Mak ka ti lutuk ringawt.

‘’ engtin chiah maw hetiang thil hi a thlen a’’ tia ka nu in a zawh lai chuan kan pa pawh thlan sa phul kaiin a rawn lang ve ta chiah a, kei chu ka thla alo muang deuh sawt thei. Hlauthawng thaw hlawp hlawp chung hian kan pa chuan,

‘’ Eng thil chiah nge thleng a Tluangi. Engtin nge hetiang hian ka fanu hi a awm theih’’ ti chungin a meng phawk deuh hra reng mai bawk a, kan zavai chuan hlauhthawnna hlirin kan khat tawh bawk si nen, ngai kan la awh hleithei lo hlawm a ni. 

Chutah, la tap hlarh hlarh chung hian UMatluangi chuan Mawimawii chetsual dan chu hetiang hian a rawn sawi ve ta a.

‘’ Vawiin chu nileng maiin inleng ka nei a, ka buai riau a ka fanu pawh kha ka ngaihven tha hman lo reng bawk. Zing lama in rawn biak hnu lawk khan amahin compound zau laiah khan a cycle thar khalh zir turin a in nawr chhuak ve mai a, inleng ka neih avangin ka lo en zui bik lo. Tichuan, chhun thil ei turin ka va ko leh a, a ei zawh hnuah chhuak lehnghalin chumi chin chu a reh ta vang vang mai a, ngaihthat lohna pawh ka nei hran chuang lo. Mahse, eirawngbawl hun chho ah khan hla vak loa mihring au chel chul thawm ka hriat tak avangin ka tlanchhuak nghal vat a, chutah chuan ka ffanu chu kawngsirah lo mu in thisen hian alo bual huh zuih tawh tih chu ka va hmu nghal a, a cycle khalh erawh kha chu kawnglaiah alo awm daih thung. Kan rin dan chuan cycle kha khalh thiam inti ve tawhin motor kawngpuiah alo va tlan a nga, chu chu motor dang in an rawn tai ta a nih ka ring ngawt. A su tu awm ang lah chu hmuh zui tur reng reng a aw, silova, a tlan tlang daih a nih hmel e. min ngaidam lul r’u aw. Ka thiamloh vek an ni e’’ tap hlarh hlarh chunga a han tih takah chuan thinrim zet hian ka pasal chuan a hmaiah a ben sak nghal chawrh mai a! Kan lo au deuh that thei. 

‘’ I rintlak loh zia hrerengin a nu inihna vang chauh zawkin kan enkawl tir ve thin che a, ilo laktlak loh tak tak hle mai. I zurui chatthla ve mai mai khan I fanu chin pawh ngaihsak thei lo in I han awm a nia, mipa ila khawi zui lehnghal! Ka ten che’’ ti hmarh hmarhin ka nu nen chuan  kan lo meng bial kawk kawk tawh mai. Ka pasal chu ka chelhbet zui ringawt. UMatluangi lah chu a awmna hmun ngaihtuah lo lekin a tap ring sauh sauh mai bawk si a, ava han zahthlak duh tak aw.

‘’ Ka fanu hi alo harhchhuah leh hunah pawh maw, I kut hmawr pawh in khawih lo tum ve tawh suh ang che, hre rawh’’ a thawp zawi suta ti zui leh khur khurin kei chuan ICU chhung atanga doctor lo chhuak lai ka hmuh tak avang chuan ani chu ka va kheuh ru ta zeuh zawk a, ani pawhin lo hrethiam ve vatin doctor awmna lam pan chuan a tlan zui ve nghal vat.

‘’ Doctor eng nge kan an hmel’’ tia ka pasalin a han zawh chuan doctor pa chu a lo thaw deuh halh mai a. ka hlauthawng zo leh vek.

‘’ E, rawn koh che u ka lo tum tho a, mahse, a chhungte tak tak in nih hmel tho bawk a eng lo…. a lu leh a ke ah hian hliam a tuar nual mai a. A lu atanga thisen chhuak kha chu kan ti tawp thei tawh thung a, a,, han sawi tlang tawp mai ila, a ke veilam ruh hi a sawp chhe vek  tawh a, tan sak mai loh chu tihngaihna dang a awm lo a ni!’’ a rawn ti ta a nih chu! Kan phu deuh zawk hlawm. Kei leh UMatluangi k nu te nen phei chuan insumthei lo in kan tap zawih zawih tawh mai a, hrehawm hi ka va han ti tak em aw.

Thinrim rilru hah tih hriat takin kan pa pawh chu ICU thutthlengsei chungah chuan ava thu thla deuh hnawk a, a indawmkun nghal ngawih ngawih bawk. A khat tawk hian UMatluangi hmel chu ka va melh leh thin a, a inthiamlo awmngaihna hrelo lutuk chu a khawngaihthlak letling zawk hial mai. A thiamlohna chen tamtak chu awm ve mahse a fanu , a hrin ngei chunga thil thleng tur atan chuan hetiang em em hi chu a beiseiin a duh bik hauh lovang. Tun dinhmunah hian a hrehawm ti ber tur pawh amah ngei hi niin ka hriaa, hnem chu ka chak. Mahse, ka thei tlat bik silo a ni. Kum naupangte niin tun atang chuan Mawimawii chu a ke hmangin a kal leh thei tawh dawn lo chu a ni sia, ka hrawk hrep hrep thin lai te kha ngaihtuah kirin ka inchhir ta mah mah chu a ni e.

Doctor thurawn angin a ke chu tan sak a ni ta a. Tluanga taka an hna an hlen thei te chu lawmna tur chi a nih tehlul vei nen, keini tan erawh chuan vanpui a chim hi a ni ta ringawt si a. Nui hmel reng reng hi kan pu theilo a ni ber e. chutihlaiin ka nu leh pa te lah chuan mittui hru pah fap fap chung hian,

‘’ A sutu tal kha han zawng chhuak thei hram ila aw. A phu tawk hremna emaw, sum thahnem tak te pawh chawi thei tur ania sin’’ ti leh thin in an rilru chu a hah a, a chawmawlh tih hriat tak hian an nguai bur reng tawh a, hlim hmel reng reng chu hmuh tur a awm lo a ni e. chutihrualin, kan pa erawh chuan,

‘’ Kan hmu lo kha a nunna atan pawh a tha zawk ngawt alawm. Hmu hman vaih ila chuan khami ni la la khan a thi ve nimai tur! Tin, ka fanu chetsualna denchhen hian eng pawisa mah ka la bawk hek lovang. A nunna pawh tawp se ka fanu hian a ke kha a neih leh phah dawn miah lo, ka hua a ni’’ ti charh charhin a sawi ang chuan a ti duh lo ang tih pawh a sawi lawk theih loh. Kan thin hi a rimin kan rilru a na em a tin ni. Tawngkam pawh a tuihnai hleithei tawh lo a ni e.

Tichuan, Mawimawii taksa pawhin that lam chu pan ve zelin, damdawiin atang pawh kan chhuak ve ta nge nge a. thawven khat chuan a thawventhlak deuh huai thei e. Mahse, inchhung kan luhpui tep tihin kan pa bawk chuan Umatluangi chu inchhunga a rawn luh ve a phal ta tlat lo mai a, kan en deuh tawp ringawt. Ka nu in hlauhthawn hmel zeta,

‘’ Mama, eng nge thil awmzia’’ a han tih chuan kan pa chuan ram hmak hian,

‘’ Tluangi, kan fanu hi chu Siamtei nen chauha kan fa bik a ni tawh tih hi lo hria la, a hmel pawh hi rawn hmuh tum buai duh tawh suh ang che! Fa nei ve tlak I nih loh zia I nemnghet tawh bawk a, nang hi chu I tawp tawh. Chuan, I hmel hmuh nawn fo pawh hi kan duh tawh lo e. Rawn luh ve kher pawh a ngai lo ang’’ ti hmakin wheelchair chunga thu Mawimawii chu a pawm chhunzawm nghal a, room lamah a luhpui ta daih bawk. Ka sawi ve tur hrelo lutuk chu ngawi rengin ka pasal kalna lamah ka kal ve ta ngawt a, rin loh tak maiin UMatluangi pawhin sawi buai nei lo hian min hawsan ve ta hram a nih kha.

‘’ Ih, eng lo, Umatluangi kha khatiangin I tawngkhum kher tur a ni dawn emni? A hmel en reng reng pawhin a inthiamloh zia a hriat vek a, a khawngaihthlak ve khawp asin’’ ka pasal bula ka han tih chuan rum zet hian min rawn melh nghal hrawk mai a. ka inthiamlo leh lek lek hman. Tunlai phei chu kan boruak vel vang hian a fuh hleithei mang bawk silova, biak pawh hi a chakawm loh thin reng a ni. Mahse, ka rin loh dan lutuka zaidam hian,

‘’ A phu tawk chiah a nih kha. Khami ni khan damdawiin ka rawn thlen hma in thil thlen dan engkim ka rawn hre lawk vek tawh. A thenawmnu sawi dan chuan khami nileng khan a bialpa nen zu te in dunin an mu dun bawk a, Mawimawii pawh kha pawnlamah an tirbo zawk tihte thlengin min hrilh vek alawm. Tluangi hian fa neih a phu hlawllo. A hmangaih bawk hek lo. Chuvangin, tun atang chuan nang leh kei chiah hian kan enkawl dun tawh a nga, kan pahnih inkara naute dang a rawn pian hunah pawh Mawimawii chu kan kan en hrangin kan thlahthlam tur a ni lovang. I en hrang dawn lo tih chu hre tho mah ila Mawimawii hi I hrin leh I chhul chhuak angin I en ve thei reng ang tiraw’’ a rawn tih leh takah chuan mitui tla pur chung hian amah leh khuma mu bal reng Mawimawii te hmel chu ka lo entawn deuh zak zak tawh a. ka va han hmangaih dun tak em.

‘’ Ka thei lo tur anga I ngaihna rilru kha paih bo daih rawh. Fa 10 pawh neih belh mah ila nangni pahnih hi chu ka hmangaih hmasa ber leh a awmchhun tur in ni reng tawh ang’’ lo ti ve in kan inkuah zui a, chutah, khuma mu reng Mawimawii pwh chuan zawi sap hian,

‘’ Keipawh min kuah ve r’u’’ a rawn tih chuan mittui karah kan nui chhuak hak hak phawt. Kuah pahin a biang leg hmuiah te chuan ka han chuksak ta nawk nawk mai a nih kah.

Hun a ral ve bek bek a, Mawimawii pawh hmasawn chho ve zelin, a taksa a hrisel thaa, ke in a kal ve thei lo tih mai loh ah chuan that lohna dang em em a neih awm kan hre lo. A rilru tih nat leh tih hahsak kan phal lova, eitur nise a tui leh hrisel nia kan hriat apiang mai chu pek theih zel pawh kan tum bawk. A duh ang thlap leh inchhunga tawm reng ai chuan tiin wheelchair nen school pawh a lut tha ve leh ta a, a lan dan maiah chuan a hlim takzet rih niin ka hria. Hetihlai hian a nu hming reng reng a lam ri ngai hauh lova, a ngaih thu emaw, hmuh leg a chak zia takngial pawh a sawi ri ngai lo. A lehlam zawnga ngaihtuah chuan kan tan hian a lawmawm angreng phian tthung a. chutiang bawkin a nu, Umatluangi pawh khan rawn ngaihven luih tumna a nei hran tawh lo bawk a, a reh zui hmiah. A lehlam zawnga ngaihtuah chuan a thei ngreng hi ka tia, ti khawp khan a fanu pa a pasal hlui meuhin tawngkhum tawh mahsela, nu hmangaihna atang chuan hetianga mahni fanute an awm tawh hnu a han ngawihsan nghal hmak theih mai chu nu pangngai tih dan turah pawh ka ngai lo. Kei ni ila ka thlahthlam rei theih ka ring miah lo. Kum chanve a liam hnuah pawh thawm ala rawn nei ta chuang lo fo va, diktaka sawi chuan ka nu leh pa te pawh hian mak an tih thu an sawi ri ve leh zauh zauh thin. Thenkhatin a chanchin an sawi dan ah phei chuan a chenna hmun kha chhuahsanin a bialpa a um an ti a, zu leh sa nen a che nasa viau a ni awm asin. Fuh lo tak a ni. A pasal hlui tawngkhum dan avang khan a rilru chu a na hle ang tih ka hria, mahse, hetiang zwng lo deuh hian rilru natna te pawh hi a lanchhuahtir theih ve bawk asin. Ka tihngaihna hrelo lutuk hian ka tawngtaipui leh ringawt thin a, kan pa hi chuan hria se, min hau duh zawk hial maithei. Tute mah hi huat ren run ka duh lo tlat a, chu erawh ka fel a ka that bik vang a ni hauh lo thung.

Tichuan, doctor thurawn ang zelin Mawimawii ke tha lam chu exercise kan lakpui nasa ve thin hle a, hmasawnna erawh hmuh tur a awm lo thin hle. Chuvang chuan ani naupang mai rilru chu ti hnualin, a hmel hlim te kha a bo leh thin a, mahse, a pa nen erawh hi chuan beidawnsan kan tum hauh lo thung. Zingah hma tak takah kaitho in, pawn boruak thiang kak hnuaiah chuan exer kan lakpui a, a tihrawl tichak thei tur ang ber chuan kan tihpui nasa ve thin. Mahse, a ke tha lam zawk pawh hi a chet hleihtheih loh miau avangin a chang phei chuan a han tap leh ringawt thin a. ka khawngaih thei takzet. Ni khat phei chu a beidawn lutukna lamah kan inrin hman hmain a rawn tap chhuak deuh hawk mai a, a pa chuan alo thutchilh nghal vat thung.

‘’ ka kal thei tawh dawn chuang lova, ka peih tawh lo ka ning’’ rawn ti thlawtin, a tap zawih zawih mai a, ka lo en reng thung. Chutah, a pa chuan a mit taka melh kar chung hian a kut a chelhsak pah bawk a,

‘’ Bawihte, I damchhungin I ke hi hmang thei tawh dawn lo mah la, kan fanu I nihna erawh a bo tawh lovang. Keini ho hian kan thlahthlam dawn hek lo che aw. Mahse, hetah, I rilru leh thluak chak theihnan te, lehkha I thiam theih nan te, schoolah pawh naupang chhuanawm ber inih theihnan te erawh I taksa I sawizawi taimak hi chu a ngai asin. I ke dinglam zawk hi ti che theilo in hmasawnna hmuh tur neilo mah la, khang ka sawi tak te ah khan hmasawnna I neih phah phawt chuan keini chu kan hlim ang. Kan hlim em em ang. A bak chu kan duh lo’’  zaidam taka a han tih chuan mittui nen a pa chu a lo melh ve kiau reng a, chumi hnuah muangchang hian a rawn bu ve ta nghat nghat a nih kha. A khat tawkin a pi chuan

‘’ Mangang duh reng reng suh ka duatte’’ a lo ti ve reng bawk a, mittui karah pawhnise kan nui ho ve leh thei ta.

‘’ Lalrinsiam! I awm em? Zawngi!’’ rawn ti lut pung pung thawmah chuan choka atang ka tlanchhuak vat a, karei! Rui tih hriat zet leh sam thur em em mai hian UMatluangi kha thutkhawmna lamah alo ding kawh teu mai chu niin! A eng chu a hria nimaw chuti vak vaka min rawn koh tak chiam chu tia a bul ka va thlen phei chuan tawngkam khat pawh ka neih ve hmain ka samah a rawn  țham nghal ringawt mai a! Ka rak deuh that.

‘’ Nang mi zaktheilo nu hian ka fanu min chhuhsak a ni! Ka phalna tel miah lo in ka fanu min neihsak I tum a, ka phal nge phallo, nu thil tihtheihna hi lo en ang che’’ tiin min kek zui ta buan buan a. zurui zawk mahnise keiin a lian daih a, tha a ngah ve hrep lehnghal. Mahse, a harhfim lo zawk  inkeh tir reng chu ka tum bik hauh lo, a samah chuan theihpatawpa țham let ve in ka thing zui nawk nawk a, thutthlengah chuan phih thlu lehin a hmaiah na zet zet hian ka bensak pah bawk a, thei leh theilo in hnuailam atang chuan min rawn ban ve țawk țawk mahse, ka dinhmuh a fuh laklawh tawh a, min leh thal thei lo tlat. Mahse, chutia na zet zeta ka lo ben sawk sawk lai chuan Mawimwii aw kan hre ta thut.

‘’ A nu Siamte duhtawk rawh’’ a rawn ti ri chu ka hre ta a. ka tawp nghal chawt thei. Chuveleh rang zet hian ka hnuaia mu UMatluangi chu sam thur em ema rawn tho chhuak nghalin a fanu awmna lamah chuan nui vur vur chung hian a tlanphei nghal a, 

‘’ Ka fanu, ilo awm reng a nimaw. Ka fanu duat ka va han ngai thin tak che em’’ ti mawlh mawlh chungin Mwimawii bulah chuan a thu ve nghal a. mawimawii erawh chu alo ngawi reng thung. A wheelchair hmaah chuan thingthiin a fanu chu a en chho vang vang a,

‘’ Ka fanu duat, he nu hian alo hau ngai che em? A duat che em? Eitur te a pe tha  thin che maw’’ ti kual duahin kei chu rum zet zet hian min rawn melh pah leh zawk thin a, ka lo sa leh pup pup tawh mai. Chutah, Mawimawii chuan engdanga chhang ta lo hian zaidam takin,

‘’ Nu, ka nu pawh ni mahla helai hmunah hian rawn kal tawh suh! Ka hmu duh tawh lo che. Mahse, ka haw chuang lo che a nia. Mahse maw nu, ka chetsual ni a ka kohna che zawng zawng kha hrereng chungin I hrelo der tih ka hre vek a, kei ai chuan kha I bialpa nena hun hman dun kha I duh zawk alawm tiraw!? Chuvangin hetiang ka nih chhanah hian nang hi chu ka mawhpuh lo che, mahse, insawifiahna tur erawh chu I nei chuang lo. Hetah hian lo kal tawh lo la, I fanu ka ni tih pawh hi rawn theihnghilh daih rawh!’’ a tih takah chuan mittui tla zawih zawihin UMatluangi chuan a fanu hmel chu alo en ve rneg a. sawitur a hriat tawh loh hmel hle bawk. Engemaw ti zawng tak hi chuan ka khawngaih ve thin tho. Mahse, khawngaih tlak nun hi a nei lo ve thin em a, ka lainatna te pawh hi an thamral leh mai thin zawk.

‘’ Chutianga sawi tur chuan I pa leh he nu hian an fuihpawrh che a ni tiraw?’ eng aiah nge hetiang rual lek naupang hi thu thalo hlir in lo ziritir thin a’’ tih pahin a tho chhuak hluai a, kei chu min rawn pan leh ta chhur chhur mai le.

‘’ Mawimawii hi ka fanu ve tho a nih avangin eng thil thalo mah ka zirtir ngai lo. Kan duh lo bawk. Diktaka sawi chuan e, I bula a rawn awm thin lai khan a nia nungchang tha lo chu a rawn neih haw ziah ni. I haider nge I thup zawk’’ ka lo tih ve rual rual chuan ka lamah rawn tleh pheiin min keh bawk chu a rawn tum nawn leh ta mai a, mahse, ka pasal aw kan hre zui nghal hlauh mai.

‘’ Tluangi, he inchhungah hian eng ti turin nge ila rawn kal fo a? Chhuak rang rawh!’’ tih pahin kan lamah a rawn kal phei nghal buan buan a, Umatluangi banah chuan phihsak leh lawpin hnuhchhuah a tum nghal bawk. Chutihlai chuan Mawimawii kha a thil hmuh zozai ten an tih mangan em avangin a lo tap hlarh hlarh reng tawh a, ka va kuah bet ta rinagwt. Pawnlama inhnukchhuak dawr dawr chung hian ka pasal chuan,

‘’ He inchhung rawn rap tawh lo tur che hian ka hrilh lo che emni? Ka nupui kutthlak te ilo la tum lehnghal a, mi chhungkaw tihbuai tum tiin case ka siamsak daih mai dawn che emni? ‘’’ a ti leh kher bawk a, UMatluangi hlau thlabar chu a tap pah hlawp hlawp twh mai.

‘’ Min ngaidam the u. ka insumthei tawh thlawt lo a ni. Ka rawn kal nawn leh tawh miah lovang’’ tiin tap ul ul chung chuan pawnah a chhuak a, ka lo thaw zui hak mai. 

Tichuan, Mawimawii chu tawng thlamuan mawlh mawlh pahnin pindanah kan nawr lut dun leh ta a. ani pawh reilote hnuah chuan a hlimin a thla a muang chhunzawm ve leh mai bawk. Mawimawii muthilh hnuah kan pa nen chuan room lamah lut ve in, a thawmhnaw hak lai te chu ka thlaksak pah mawlh mawlh a, min lo en reng.

‘’ Kut a thlak na hman che em?’’ rawn ti supin, ka lu ka lo thing ringawt. Ka sam la thur deuh bum mai te chu min tuai mam sak mawlh mawlh pah chuan,

‘’ Pem chhete chu a hnutchhiah ve che a nih hi. Kan mihringi mai mai chu aw’’ tih pahin a han tlak deuh karh hman a, ka lo khap ve vat. Chutah, ka biang ki lai taka pem chhete lo awm ve chu damdawi rawn hnawih nghal mial mialin, a hmel chu ka en reng a, nichin khan ani hi rawn haw hman lo ta sela chuan Umatluangi khan kut min thlak piah ah ka nunna hial pawh hi min laksak a hreh lo ang tih ka ring. A tan chuan kei hi a kawng daltu, khawvela mi hnawksak ber ka ni pha ve tlat a tin ni. 

‘’ Ka pem neih te hi chu a ho tham lutuk. Amah zawk kha naktuk zingah chuan a tho duk ve chur maithei a ni’’ ka han ti zauh a, kan pa chu a lo nui phuh ta that mai. Chutah, fiamthu dang dang thawh chho zelin kan nupa chuan za mangkheng hian kan han nui dun ta tak tak mai a. hetianga za taka kan nuih lohna pawh hi a lo rei ve ta hle tih ka hrechhuak. 

Chumi chin chu tha takin hun kan hmang ve leh mai a, chhungkua pawh kan dam tlangin, dan ngai te te hian Mawimawii pawh zing leh tlaiah a taksa kan la sawizawipui fo thin a, a hmel chu hmuh a nuamin a nung ve sawt khawp mai. A pa duh dan ang ngeiin school lamah pawh a ke tha lo ber chu a thiam thei leh filawr pawl, zirtirtute duhsak hlawh khawpa thiamthei a rawn ni chho ve ta reng a, fai ber lawmman pawh vawi duailo a rawn dawng haw tawh bawk. Kan hlimpuiin kan chhuang a, kan hmangaihin kan duhsak bawk a, a lungngai hmel hmuh kan duh lo bawk nen, ani pawhin kan lungngai hmel hi hmu lo thei se kan duh. Vanneihtthlak takin keipawhin hun engemaw chen hnuah nau chu ka pai ve ta hlauh mai a, Mawimawii mawlh chu a nghakhlel leh a phur ber berah lo țangin, nau ka neih hun tur te chu nitin zantin hian min zawt thin. A hlimawm thin em asin.

Chutiang chu kan boruak a ni e ti mah ila, thawkkhatlai atang khan buaina engemaw tak kan nei leh ta tlat mai a. chu pawh engdangmah ni lo in, Mawimawii school kal chu a nu bawk khan lo va chang ru ve thin in, amah hruai tura kan kal hma te hian min lo hma khalh thin a, a fanu chu alo hmu thin a ni. A tirah chuan a fanu a nia, inchhungah a rawn hmu tha ngam tawh bawk silo nen pawnlamah tal alo hmu ve duh a ni ang tiin kan ngaizam mai a, mahse, hun a rei tial tial a, an zirtirtute chu an hlauthawng ta tlat.

‘’ A chang chuan mipa sual hmel taktak te hi a nu khan a rawn hruai tel ve thin a, Mawimawii pawh hi an din hual khup thin bawk si a, kan ngaihtha lo hian kan va veng ru leh ngawt zel. Khawngaihin in theih hram chuan rawn hruai hma thei deuh ula kan duh ngawt a ni’’ an tihtakah chuan keini pawh kan hlauthawng ve tan ta a. An school ban hun hma daihin school pawh chu ka va thleng ve ta thin reng a nih kha. Mahse, ka kal hma thin tih chu an hre lawk nge ka hre lo, chutiang hunah chuan an ni ho hmel chu hmuh tur reng a awm ngai hauh lova, an reh leh hmak. Ke ringawta haw thin kan nih avang hian kawngtluanin an hmel te chu k han zawng ru ve bawk a, mahse, hmuh tur erawh an awm ngai lo thung.

‘’ I nu chuan eng thu nge I bulah alo sawi thin’’ tia Mawimwii kan han zawh chuan,

‘’ Min ngaih thu a sawi a. amah ka zui phawt chuan hmun nuam deuh a kan kal tur thu pawh a sawi’’ a tih chuan kan inmelh hrek hrek hlawm a. kan hlauthawng a ni. Chan loh khanah hian an rawn chhuak leh a nga, tum loh deuhin kan fanu hi min hruaibosak mai ang tih pawh kan hlau ta takzet. An zirtirtute sawi dan khan mipa pawh a hruai tel thin a nih hmel si a, ani ang naupang mai ru bo tur te chuan hun rei pawh an duh vak lovang tih a rinawm.

Ka pasal ngaih dan ni lo chuan a phone phawrhin Umatluangi chu a han call nghal zat a. mahse, chu number chu a hmang tawh lo tlat mai. Engtin nge maw kan tih tak ang le. A chenna hmun kan hriat ve chhun lah kha a chhuahsanna  rei tawh angreng si a, tihngaihna dang a vang ta angreng kher. Tun atana kan tihtheih sang ber chu uluk taka Mawimwii venhim hi a ni rih ta mai e.

Tichuan, ngaihtha famkim lo takin school pawh chu kan inkaltir ve ta phawt a. An zirtirtute hnenah  pawh thu chu kan chah uluk thin hle. An ni pawhin hrethiam takin Mawimawii chu an lo en bik tur thu min hrilh ve a, kan lawm takzet.

Ni khat chu zingkar atangin ka buai em em a, khua alo chhe ve angreng bawk nen, ka thawmhnaw suk sa tih ro tumin ka buai ve takzet. Hetihlai hian ka naupai pawh a hram ve tawh viau a, chetpui zung zung chu thil harsa tak a ni ve tan tlat. Chutia buai em em a ka lo phar kual lai chuan ka phone chu rawn riin, school an ban tawh thu leh, Mawimawii’n min nghah reng tawh thu chu rawn sawiin ka thil tih lai ka dah sawk sawk a, in ka chhuahsan nghal.

Pawn ka han chhuak chu ruah pawh kha lo sur bang ve tawhin, chhum erawh alo zing phui chek chuk thung a. A vawt duh angreng hle. School kalkawngah chuan vawt tih vanga thaw khu hlat hlat cjung hian ka kal khur hlat hlat bawk a, karlovah ka tum ram pawh ka thleng ve mai. An principal rooma ka fanu lo thu ngawi reng mai ka han hmuh takah chuan ka lainat deuh thut a, ka mittui a rawn hnam ta ringawt a nih chu. A thian kawm thin te angin thawveng tak leh enghelh nei miah lo in pawnah te min lo nghak ve thei se, school busah te pawh a thiante ho rualin han chuang ve thei thin sela tih chu ka duh pui a, ka thlakhlelhpui em em a, mahse, chu zawng, beidawnna min siamsaktu chauh an ni leh thin si a nih hi. Tichuan, ka mittui hru hul sawk sawkin a kawrlum hak tur ka kensak te chu ka hak tir nghal zung zung a, office atang chuan kan innawr chhuak ta a ni. Kawngpui reh leh chhum zingin a bawm khah chuk maiah chuan in nawr kal zelin ka zai sak pah rat rat bawk. A hnuah phei chuan ani pawhin phur em em hian min rawn zawm ve ta bawk a. chutia kan lo in nawr hnak hnak lai chuan kan hnunglam atang motor horn rawn pe phei tuarh tuarh thawm hi kan hre zui ta mai a! Kawngsirah tho kan kal sia tia hnunglam ka han hawi nak chuan kan zawn tak rawn pan ding ngar ngarin bolero pakhat hi chak zetin a rawn tlan phei tih ka va hmu ta a. Thildang ka ngaihtuah hman tawh lo, Mawimawii chu theihpatawpa pawm kang zuiin a hla thei ang berah ka theh phei a, chumi chin chu insaseng ve hman lo in thil ri bur thawm hian a zui a, hriatzui pakhatmah nei lo in ka awm chu a ni der mai.

Fiah tha pangngai taka ka harh leh theih meuh chuan damdawiin khumah ka lo mu bal tawh mai a, ka sawi chhuah hmasak ber pawh

‘’ Mawimawii a tha em’’ tih hi a ni. Ka bula lo awm ka pasal leh keima chhungte ho chuan min rawn ngaihven nghal vatin Mawimawii pawh a that thu min hrilh nghal a, ka thla a muang deuh sawt. Mahse, ka taksaah hian dik lo a awm tih ka hriaa, ka ruak veka ka zang huih bawk a, chu chu ka taksa awm dan ni bera ka hriat theih dan chu a ni. Ka han in dap chhin vel a, ka pum mawlh mai chu! Tho kang zui nghal awkin,

‘’ Khwnge ka naute’’ ka ti nghal chul mai a. min buaipui laih laih. Chutah, ka pasal chuan inthiamloh hmel zeta min rawn melh vang vang chung hian,

‘’ Pawi ka ti lutuk Bawihte. Kan naute chu a damchhuak zo ve ta lo a nih kha!!’’ rawn tiin a mittui a parawl kuang mai bawk a, kei thung chu tah pawh ka tap hleithei lo. Ka meng phar awk awk a, an ni ho chuan min hnem ve liai liai mahsela mu leh mal hi ka nei hleithei lo a, ka na  a ni. Chu chauh chu ka chunga thilthleng leh ka harsatna tawh ni ta se chuan tlemin beiseina pawh ka la nei zawk tur. Mahse, a ni lo. Ka ke pahnih te chu a ruh zawng zawng an sawp chhiat vek avangin nikhaw hreloa ka awm lai khan nghah khawtlai chi ka ni silova tiin min lo tansak fel vek bawk hi a lo ni a! A na! Ka engkim mai hi a na vek. Tunah chuan ramtuileilo, damchhung zawnga ke a kal tawh lo tur, wheelchair chung atang khawvel hmachhawn ve tawh tur mai ka lo ni ta! Ava han rapthlak tak em.

‘’ Tu nge hetiang min ti tu hi’’ tiin mangang takin ka au chhuak ruai ruai a, ka na em a ni. Tap bang hleithei lo khawpin ka khawsaa, ka pasal mawlh chuan min hnem tumin min han kuahbet a, min chul hliau hliau reng bawk a. ka inbengdai thei ve hram chauh.

‘’ Hetianga min ti tute hian an tilui a ni tiraw. Kei hi chhe vek turin min duh a, min rawn su lui a nih kha. Khami ni khan kawnglaiah pawh kan kal lova, kawngsirah a sir thei ang ber kan zawh ve asin. Eng nge thil awmzia?’’ ka tih hlawk hlawk lai chuan ka chhungte ho chuan min la en thap reng mai a. An tahna lamah an mit te pawh chu a bui zo ni berin ka hria. An meng bui lek luk hlawm mai. Ka harh tawh tih hria in ka awmna cabinah chuan police 3 vel hi an rawn inzui ve ta a. kei chu thil thlen dan ka hriat theih chin chin te min rawn zawt fiahin, keipawhin chipchiar tak chuan ka hriat ang chhun chhun te chu ka lo hrilh ve ta vek. A theih ang ang lo chhinchhiah zung zungin,

‘’ Kan man chhuak har lovang. In fanu khan chiang lutuk lo in an hmel ala sawi thei bawk a, in rin loh lam daih  pawh an ni thei’; ti supin min chhuahsan ve leh mai bawk a. kei chuan beiseina sang tak mai nen an ni ho chu ka thlir liam ta nghe nghe a ni.

‘’ NU, a nu!’’ ring lemlo taka min rawn ko sar sar thawm ka hriat chuan zawimuangin ka mit chu ka han meng diar diar a, fiah lo ruai hian Mawimwii hmel chu ka hmu thei nghal. Ani chuan nui sen sen chung hian ka sam te chu alo chul pah hliau hliau reng a, chutah, min koh dan kha hrechhuak thutin a kut chu ka manbeh sak ta chawt.

‘’ Ih, tunah khan engtin maw?’’ tia ka han zawh nawn tak ngatah chuan ani pawhin nui hmel bawk chu rawn pu tha lehin,

‘’ A nu ka ti che a. A nu, dam vat vat la inkawm leh tawh ang’’ a rawn ti a nih chu! Ani hian hun rei tak hnuah kei hi nu tiin min ko ve thei ta a mw!? Lalpa, ka ba han lawm tak em. Fa ka chan zo chiah a mahse, tunah chuan rei tak atanga a nu nih ka lo chak em em naupang khan nu angah min pawmin min ko ve thei ta hial asin. Ropui hi ka ti lutuk. Lalpa, I remruat dan engkim ka lo hriatthiam loh a, ka lo haider tawh naah khan min ngaidam mawlh ang che. Hei hi ka tana I ruat dan diktak zawk a nih chuan a bak ka duh belh lo e. tunah chuan ka fanu nih chak em em ka fanu anga thinlung zawng zawnga ka pawm ngei mai nen nihna inang neiin, wheelchair ah hringnun chu kan hmang dun tawh anga, hei hi kan khawvel a ni tawh ang. Ka vui lo, ka lawm e. 

Hemi hnu atang hian ka khawvel chu a hma zawng ai khan a hlimawm a, nuam ka ti bawk a, ka fanu kiangah chuan ka hlim tawk em em a ni. Tin, khatianga keini kal tha hle hle lai chak lutuk tak maia min rawn su tute kha tudangmah ni lo in Mawimawii nu Umatluangi leh a pasal thar la naupang tak khawvel mi em em mai ngei te kha an lo ni bawk a. An tlanbo hma, tlanbo tura an lo insiam buai em em lai chu va nang fuhin reiloteah an inpuang zui ta mai bawk a. Tichuan, mahni mihringpui thah tum case in kum 10 ve ve chu an tang dawn ta a nih kha. Sum pawh thahnem tham tak ve ve chu chawitir tura ruahman an ni bawk. 

Tunah chuan buaina ka nei tawh lova, ka pasal leh ka chhungkaw duhawm tak te kiangah hian hringnun chu hlim leh nuamti takin ka hmang chho ve dawn ta a ni e.

****         *****       ***       *****        *****     ****      *****      ***

Leave a Reply