You are currently viewing KA HNEH  TA🌞

KA HNEH TA🌞

Spread the love

#Short story

By Zuãl’s Khiangte 

Suangtuahna leh beiseina pawh nei ngam tawhlo mihring chu eng ang mi nge an nih i rin? Keichuan thinlung rethei ber,suangtuahna pawh nei ngam tawhlo tur khawp a an thinlung an mi hmangaih ber ten a an tih natsak tawh te annih ka ring.

Ka mi biakin Call a tih tawp hnu chuan damdawiin khum atang chuan damdawiin tukverh atanga lang thei chin pawnlam chu ka thlir vang vang a,heti em em a vanduai tur hian enge ka tihsual bik a enge ka tih dikloh bik,hetiang tak a vanduai ai chuan ka nu khan a pumchhung a ka awm lai khan minlo peih daih mai se tha zawk tur.

Lalnunngili ka ni a Te-nu tiin min ko thin, khawvela piang tawh zingah keiai a hming inhmehlo hi chu an awm kher ka ringlo ang,ka nun tawpzia leh hrehawm zia hi ka pu khan lo hre lawk selang chuan he hming hi min puttir lo tawp ang, nula Kum25 mi ka ni a MRB bank ah cashier in ka thawk ve mek bawk,ka nu in kum13 ka nihin min boralsan a a thihni a ka tah nasat zia kha aw mahse kha ni a ka tah bak kha ka tah awm ka hreleh tawhlo,ka nu thih hnu deuh lawk kum khat em pawh a ral hma in ka pa in nupui dang nuthlawi fa pakhat nei anei leh nghal mai a tunah an chhungkua in khawzawl ah an awm ho mek,a nupui in a tihlim thiam bawk a keichuan a ngaihsakna leh a hmangaihna ka dawng ve tawh ngailo,ka nuhrawn fapa in hliam dam thei tawh ngailoh tur min tawrhtir pawn, thil tisual tu zawk in a tanga chhuahtir lo in a fanu a thisen zawmpui ngei a hmuh phakloh ah min awmtir zawk a,belh tur neilo in min awm tir a min rawn ngaihven ve ngailo a keipawn ka ngaihven ngai biklo.

Thlakhat liam ta mai khan khawvel a ka mipa hmangaih ber fa ka pai a,mahse ka vanduaina a kal tluang nge ka vanneihna zawk ka hrelo, hna atanga ka haw lam ka scooty in ka accident palh a ka naute ka chhiat phah ta a ni.Naute pa ka mipa hmangaih em em mipa nep tak ka ngaihtuah chhuahrual chuan ka thinlung chu a thip vawng vawng thei.

Ni e ka mipa hmangaih Michael Lallawmkima mipa smart,zaidam leh rinawm taka ka ngaih thin khan a kum a kum minlo bum a,tlangval pangai emaw ka tihkhan fanu kum4 a upa a lo nei reng a,hmeichhe pakhatah mai nilo hmeichhe pahnih, a fa neihna nu leh a bialnu nen minlo kawp reng anihkha,amah vangin mipa ka huatna a reh a ka engkim ka hlan a mahse ani chuan natna engkim min hlan thung si.

Ka ruaklo tih ka hriatni a ka hlimzia kha aw,ka 

hmangaih ber fa ka pai avang khan ka lawm em em a mahse chu ka hlimna chuan darkar khat pawh a daihlo,ka mipa hmangaih em em leh a bialnu in hlim taka kan awmna thin a khumah ngei nupa nun an hmang lai ka hmuh khan ka che sawn theilo anihkha.

Inthiamlo na nei miahlo in zanah alo kal a,ka hmangaih em avang leh a fa hial ka pai tawh avangin a lakah ka thinrim ngamlo a,vawiin a ka thil hmuh te pawh kha sawi chhuaklo in tha tak in ka bia a,thingpui a in laiin nau ka pai tih ka hrilh in a thingpui in lai a phuhchhuak vek anihkha,mak ti zet a min en pah in ka fiam emaw kha a ti a mahse fiamthu hmel ka put tak siloh ah chuan thutak deuhin ti tla tur in minti anihkha,chutah keiin tih tlak ka duh silo kha a thuruk ka laka a zep zawng zawng a puanchhuah rualin kan inkar chhe thei a ka rin ngailoh kha a chhu chat ta vek a.

Min hmangaih ve emaw ka tih lai kha chuan ka tan khan engkim huam ang mai khan a awm a,min ngaihsak huam huam lo mahse a theih ang tawk kha chuan min ngaihsak ve in ka hre thin,a tan khan a ber ang hial a in inngaihna ka nei hial a mahse mihring chu danglam thei kan nimiau a,ani pawh khan min hmangaih hle emaw ka tihlaiin ka inrin hmain min danglam san a,ka tel ve na khawvel aiin ka tel veloh na khawvel kha a thlang ta a,engtinge ka awm anga? Engtinge nun ka hman chhoh ve ang? tih pawh min ngaihtuah puilo in min kalsan ta anihkha mahse maw ka mittui hi far mahse ka dam khawchhuak ang,i tello in hun khirh leh harsa tam tak ka paltlang tawh a tun a he natna pawh hi ka zirlai thar ka zirchhuah hun a ka inchhuanna tur a la ni zawk ngei ang.

Nimin a ka accident khan tinge ka thih ve nghal mai loh?Khawvelah hian beisei tur enge ka la neih ve? ka hmangaih apiang min laksak tu Pathian chungah khian ka vui a,ka mamawh ka dil apiang ka lak atanga pawt hla tu anih avangin ka dem ngawih ngawih asin.

Cabin kawngkhar a rik rual chuan ka mittui chu ka hru sawk sawk a,nurse fel ka tih deuh mai nuisang a rawn lut ka hmu zawm nghal zat bawk “Chaw i ei tawh tiraw?” a rawn tih chuan a zawhna chu chhanglo in “Engtikah nge ka chhuah theih ang?” ka lo ti a.

“Ka hrelo le” tih chauhin min chhang thung ka bp leh ka drip khailai a en dik hnu chuan min chhuahsan a,he damdawiin pawh hian ka mal zia bak min hriatchhuah tir lo chuvang chuan a rang thei ang ber a chhuah ka duh..

A tukah chuan doctor remti vaklo chung ka chhuak lui a,damdawiin atanga ka chhuah ni pawh chuan min ram lam tur tumah an awm ve lo mahse ka vuilo e hmangaih tu ka nei ve tlat hleinem,a thisen zawmpui a pa ngei pawhin a a hmangaih theihloh hi tuin nge hmangaih thei tehlul ang?

Damdawiin atanga ka chhuah tukah chuan ka hna ah ka kal nghal a,damdawiin a ka awm chhan ka thawhpui ten an hre thum bawk nen an zinga awm erawh a nuam chiah lo mahse enge ka tan a pawina duhleh sawi se sawilo se anih tur ang a ni vek tawh,ka hnathawhna a ka kawm ve ber Nu Rengi bulah chuan ka thu hnawk a “I va rawn chhuak hma ve,rawn kân che ka tum ve nen ilo chhuak hman daih a”a tih chuan ka lo nui ringawt “Kha ten nui ringawt thin suh,tak tak in hrehawm te kha tih phah miah suh,Kima nen lah in inthen ta sia pathian in nangman tan tha tur a a ruat ah ngai zawk hmiah rawh” a tih chuan lu ka lo bu ngauh nghauh a.

A duhtawk tawh dawn emaw ka tih laiin “A hrim hrim in iva fimkhur awmlo ve,scooty i lei thar ve chauh a, engtin nge maw i accident reng reng ni?” a tih chuan “Keipawn ka accident dan tak kha ka hrechiang biklo ka â mual mual mai, ka harhchhuah meuh chuan damdawiin ah ka lo awm reng tawh a, damdawiina min hruaitu taxi driver khan ka taxi i rawn su a nangmah kha i perchhuak nawlh a ti a” ka tih chuan ” I vahan vannei em em, tak takin ka sawi duh pakhat chu saw kan Christy tihpah chuan kan zawn a awm kan thawhpuinu chu a kawk a sawnu lah sawn i chanchin sawi nuam a ti bawk sia,hrehawm te kha tih phah miah suh aw i beng leh lamah luh tir la lehlamah i chhuahtir leh nghal daih dawnnia” a tih chuan “Thudiklo sawi a nei hleinem” ka lo ti a “Sawnu saw chuan a phuahbelh thiam lutuk,a rilru te saw a chhe kir ker ania a hmelchhiat nen a rilru tal te hi tih that ve tur ania” a tih chuan ka lo nui hak a,ka nui min hmuh chuan “Tak tak alawm pasal pawh a hmulo ang,kum5 kan thawh dun tawh heta a thawh tantirh a a bialpa tihloh kha chu ngaihzawng anei leh tawhlo reng reng mipa te pawh hian mihring rilru chhe lutuk hi chu an hre ve lutuk” atih chuan ka lo nuih mai mai ringawt,mirel turin thian ka kawm tamlo a ka hawizau lem lo bawk,Kima nen kan inngaihzawn lai kha chuan amah tawp kha ka innghahna a ni a nun phung pangai min pe leh tu ani bawk,ka lu chu ka thing nawk nawk a enge kha mihring pawh kha ka ngaihtuah chhuah chhen le? ka mood rawn ti off leh vek.

Office ban hnuah chuan bazarah ka pengkawi a,thlairah ka en lai a ka hming a min ko tu an awm avang chuan ka hnunglam chu ka hawi vat a Nu Rintei alo ni “I ni khan ka hrereng ani,i vahan ngaihawm em em ve leh,tinge ilo haw ngailoh?” a rawn ti zung zung a,ani hi Khawzawl kan thenawm hlun anni a a fapa Zomuansanga nen kan inkawm thin avangin an inah pawh ka chuangkai ngun hle “Nia hetah hna ka thawk a” ka tih chuan “Pasal te kha ilo nei ringawt a? min la sawm velo zui ka vui teh mai ania” a tih chuan ka lo kâ ho ringawt “Nu Rinte enge i sawi awmzia pasal ka la nei reng renglo” ka tih chuan keiaiin mak a tih hmel fe zawk “Khawi maw tahsawn va inkawm lawk teh ang” tihpah chuan thingpui dawr lam chu min panpui a rual a.

“I nu khan pasal nei angin a sawi che a,Bawiha pawn a tuarna asin aw” thingpui dawra kan thutrual chuan a rawn ti a,ka nuhrawn dawtsawi ani tih ka hre thiam nghal mai “Eng pasal mah ka neilo,hman atanga tun thlengin nula ka la ni,ka chanchin tlangpui ka hrilh law law ang che,Aizawla ka chhuk thlak khan hostelah ka awm nghal a,Christmas pawh helamah ka hmang ta zel a,higher ka zawh khan rawn chhoh ka tum deuh a mahse ka nuhrawn nen kan inngaihlo zia i hriat kha a hmel ka hmuh peihloh avangin ka pi (ka nu nu) te bulah Christmas ka hmang a,chuan college leh master ka zir thlengin private hostel a awm chungin ka kal char char a,chuan hei bank lamah hian ka exam ve a min la ve hlauh anihhi” ka tih chuan “I nuhrawn khi chu a sual nge a chapo pawh hi ka hrelo” a tih a “A pahnihin” ka lo ti nghut a,Nu Rintei hi chuan kan chhungkua a hrechiang bawka a bulah engmah ka zep peih vello.

“Zomuana chuan tunah hnate a nei ve tawh em?” ka tih chuan “Nei ve tawh e,kha nikum hmasa nita in ka hria company an dinthar SKY an ti amaw ni ah khan a thawk ve a,a engah ber nge a thawh phei chu ka hre ve chiahlo a hlawh pawh a tha ve khawp mai” a tihchuan ka lawm khawp mai,ni e a tan khan thil tha ber ka duhpui thin a tun thleng pawn ka la duhpui,ka tan chuan ani kha chu ka thinlung phek ka keu tawh ngailo a lo la awm ve reng kha ani miau a.

“Nih Nu Rinte nupui anei tawh em?” ban deuh charh a ka tihchuan “Nei mai mai lo ahh,ka rilru te hi a tihah ania,a gay anih te hi ka ring hial tawh,hmeichhia reng reng ngaihsak lo mai,college leh master a zir laiin lehkha ringawt a buaipuia tunah hna an nei ve a a hna ringawt a buaipui leh a hmeichhia pawhhi ngaihsak a tum lo” a tih chuan ka lo thaw huai ringawt a chhan tak erawh ka hrelo,neilo se ka duh ve deuh tawp nimaiin ka hria.

“He lamah in rawn pem nge in rawn zin?” tih zawhna ka zawh leh chuan “Pem lo e,Bawiha a damtha vaklo a hei ka rawn awmpui hrih anihhi,nangpawh i hman chuan rawn la tlawh ve rawh” a ti deuh zung zung a,a hmanhmawh em avangin duh ang pawn kan titi rei hmanlo,number te in pe tawnin kan inthlah liam a.

In ka thlen chuan eirawng ka bawl deuh nghal zung zung a,ka bawl zawh rualin chaw ka ei nghal ka ril a tam bawk a ka rin ai daihin ka ei tam,ka tukverh ah chuan dak pahin cigarette chu ka tan a hip deuh vang vang pah chuan ka nunhlui kum10 liam ta a Lalnunngili mihlim thei leh harhvang tak anihlai chu ka ngaihtuah let a.

KUM10 LIAM TA KHAN:

Higher miin kum hnih a an zir zawh thin chu keichuan a kum thumna a tan zir nawn leh turin kan school ngaiah bawk chuan ka lut leh a ,class 12 ka fail chu chhungte bulah pawh inthlahrun ana duh khawp mai mahse keichuan pawi tihna ka nei lem chuanglo,virus chikhat vangin class11 atangin school kan kal thalo a chutiang bawkin class12 pawh,class12 kha lo pass pawh ni ila kan zirlai hrethiam miah lo in ka pass te kha ani vel anga, mahse nakum kan exam hunah chuan ka pass tawh chiang khawp ang..

School ka kal leh ni hmasa ber chuan ka tah a chhuak ngei mai ka thian ka kawm tam zawk ten min pass san vek a kawm tur neilo in keimahin ka thu ngawi kar a,ka mal ngawih ngawih nimai hian ka hria,ka thutpui nu Sangsangi chuan hrehawm ka tih hlau in min be siam siam a a fel reuh ngei mai mahse a hming erawh a pu zolo ve chiang khawp mai ft5 a tling awrh ang tih vel ani.

A nikhatna ni chu ka tlingtla thei hram a,kan school lahhi college thlangah a awm a khawpawn deuh a awm ani bawk a kan in leh school inkar hi km1 vel ani hial ang,lut kan tam ve nen hian bus pawh kan la neilo.

Sangsangi nen chuan eng eng emaw sawiin kan inzui ve hnak hnak zel a rinai tak chuan kan in kawm thei phian mai,nikhat kan haw lam kan thenawm pa Zomuansangan “Ngili” tia min rawn koh chuan ka melhrum teh asin ka hming hi thing ka ti ngawih ngawih tih hria in hetiang kher hian min ko thin,kan bula rawn kal pah chuan “Zingah minlo kalsan tawh suh ka rawn sawm thin ang che” a tih chuan “awle” ka lo ti ve mai a.

Zanah chuan Zomuana chuan min rawn text a “Ngili i thiannu kha tunge a hming?” a rawn ti a,min be tha kha a mak ka ti reng a heivang lek hi alo nimaw “Sangsangi,i star ami?” ka lo tihchuan a star thu a rawn sawi nghal zat,a number chu pe in lehkha ka zirsan daih a.

A tukah chuan Zomuana nen chuan school chu kan kal dun a,keini pahnih hi tetlai atanga inkawm kan ni a school ka lut hmasa zawk a Zomuana ai hianka pawlsang thin reng kha nia, mahse hei tunah ka fail ta sia kan in classmate ta anihhi,ani in Arts alak laiin keichuan a lehkha zir peih ber niawm takin Science ka la a mahse lehkha ka zir peihloh ngaihtuahin rinaiin ka subject lakah hian ka tui ta phian,inhnial reng chung chuan school chu kan thleng a,mipa ka hnial dang theihloh awmchhun ani hial ang.

Ka ler bawk a kan class ah chuan star ka nei leh thuai a,a hming chu Cedric-a ani,chersang lampang leh ngawichawi tak ani a,a eng hian nge min hip phei chu ka hrelo Zomuana nen an inkawm zeuh zeuh tih ka hria a a number chu ka nei harlo tawp ang,Sangsangi bulah chuan ka tawngthei bawk a Cedric-a ka star thu vel chu ka hrilh vek a min sawipui lem ngailo na in a lo ngaithla ve char char zel.

Karkhat ka han kal meuh chuan ka tlangnel leh viau tawh,hmeichhe harhvang tak ka ni bawk a min hre ngailo tu te phei chuan tunlai tawng takin over min ti thei lutuk mahse min hrechiangtu te ho erawh chuan ka bula awm nuam an ti thei hle,lehkha ka thiam thei a lehkhazir lamah ka insawrbing bing ve deuh a test naah pawh a ti tha pawlah ka tang ve zel thin, kan zirtirtu te pawn test na a ti tha thin na na na chu min duhsak ve viau mai Miss nutei tihloh chuan henu hi chuan ka phawhawr lutuk hi,min ngei mai bakah a class a ka mutthluk ziah avang hian min hrem ziah,Cedric an min en ve kur zel sia ka zak ve det zel.

First term kan exam zo a,ka thiannu Sangsangin bialpa a nei a a bialpa erawh ka thianpa Zomuana nilo in kan class ami Rina ani,an te dun reuh bawk sia an inhmeh ania aw,ngaihzawng nei ve talo chu Zomuana nen kal lam leh haw lamah inthurual in kan innghak deuh chawt zel a thenkhat te phei chuan inngaizawng emaw minti hial,min han dem der velte pawh hian kan nui liam mai zel.

Zan khat Zomuanan min lo text chuan “Nangmah vanga bialnu neilo ah ka inngai deuh tawp” a rawn ti a ka nuih a za ngang mai “I zeiloh vang a nihkha” tihchuan ka reply a, ka reply hnu reilote ah a message a rawn thleng leh nghal “Ka zei reng min tihpuitu hi i zeilo em ani, pawilo ka hmeltha tho a midang ka zawng mai ang” a rawn tih leh chuan emoji nui lai lem ka va thawn teuh a.

Result a chhuak a pahnihna ka ni a,ka pa a lawm em avangin phone thar min lei a keipawh ka lawm ve khawp mai ka nuhrawn erawh a tum hmuk ringawt a fapa hi keiaiin kum3 in a upa a lehkha thiamlo zet mai ruihtheihthil duh ve tak ani a,kan school chhak college ah a lut ve a kan inhmuh pawn kan in be ngailo,tul tawpah lo chuan kan inbe ngailo ti ila a dik ber ang.

Second term kan tan hnu reilote ah annual sport turin kan school chu kan inbuatsaih tan a,a phawvuak ah ringawt pawh kan phur tawh,house li ah kan inthen a keichu red house ah ka awm a Cedric-a pawh red ah a awm ve a ka lawm mai zia, Sangsangi erawh Green house ah a awm a Zomuana pawh green ah tho,an inhmu ve reng dawn sia an lai dun ngawt ang chu.

Sport tan ni chuan Cedric-a chu ka bula a tap chawt a nuam ka vahan ti tak, sport tan ni anih avang chuan item kan ti tam lutuk lo a,kan house outdoor lamah kan tha lo tlang bawk nen medal pahnih chiah kan hum haw, haw lamah Cedric-a nen kan haw dun a, nuam ti em em a ka khiksung lai chuan Zomuanan “Ngili” a rawn tih ri ka hriat chuan ka tum zui nghal hmuk mai.

Rum deuh a ka va hawi phei chuan khisung hian min rawn en a ka vahan ngei mai mai tak, a bula kal Muankimi lah chuan min lo la en kiau zui, rei pawh en peihlo chuan ka hawilet hmak a “Zomuana nen hian inni ve deuh ami?” Cedric an a tih chuan “Ni mai mai lo, ani ang te duh ila hmaiphih angai nang, nghal si tawngthei ropui si” ka ti bawrh bawrh a, ka bula kal chuan nasa min ti deuh nge min en kur ringawt,ka inthiamlo deuh chuan “Nilo e kan thenawm pa ania tette atangin kan inkawm tawh alawm thian aia thui bak kan inkar ah engmaha awmlo ,ka duhloh dan deuh a min rawn koh avang khan ka mood a rawn tiuih vek alawm” ka tih chuan a nuisuk a, awi a vahan hmeltha tak.

Zanah chuan Cedric-a chuan whatapp ah min lo text a badminton practice pui turin minlo sawm alo ni, kan group aiawhin naktukah kan pahnihin badminton ah kan chhuak dawn a mahse kan la khel dunlo hrim hrim.

Zanriah kan ei hnu reiloteah chuan scooty in a rawn kal a, ka insiam ve zawk a kan kal nghal a, kan inhmeh hi ka vahan ti tak em,a kawr hak rawng ang kher dark blue ka ha a chung te chu couple Jersey ka rilru in ka ti ve hmiah.

Badminton a kan han tang dun chu kan in man ngei mai, ka lak theihloh pawn a rawn la thei zel a tangpui a hahdamthlak hliah hliah mai, kan inkhel en tur chuan kan house ami thenkhat an rawn kal ve a, rawn kal ve zingah Remruati pawh a rawn tel veleh ngei bawk henu hi chu ka vahan hne tak Cedric-a hi a star ve a,a kalna apiangah a zui nimai hian ka hria,kan inkhel zo chu haw mai ka ti a mahse Cedric an “Hei pubg khelh lawk ang an tia game khat kan khelhpui lawk ange” a tih chuan an bulah chuan ka thu ve mai a, Remruati pawh rem leh remlo in Cedric-a bulah a thu leh chet tawh ka mit hi chu a vahan ti kham thiam chiang tak, game khat an khelh zawh hnu a haw tawh ila ka ti chu Remruatin “an la khelh chak em hi enge haw pawh chu i lo tih renga? nangmah khan lo va haw mai rawh” a rawn ti reuh a.

Chhan ka tum lai tak chuan Cedric an “Te-nu vawikhat chauh tak tak” a rawn ti a, thinrim deuhin ka ngawi zui hmiah,Zomuan chu ka call nghal vat a “Ngili” a rawn tihrual chuan “Min lo hruai teh,vengthar hall a ka awm” ka ti a,a rawn kal tur thu a rawn sawi chuan ka lo thawhuai ringawt Zomuana a rawn thlen chuan a dinna lam chu ka pan nghal vat a “I tha em?” a tih chuan “Ka chhe mawlhlo” ka lo ti a “I vahan zaktheilo tak ” tihpah chuan min tlanchhuahpui a.

A tukah chuan lirthei ken an phal avangin Zomuana nen sport kan neihna hmun tur IR veng lam pan chuan kan inphur phei a,kan thlen hnu reiloteah Cedric-a pawh a rawn thleng ve a ka bulah a rawn thu nghal chat “Nizan kha tihpalh aw” a rawn tihchuan “Tihpalh tihna tur thil a awmloh kha” ka lo ti a min en vang vang pahin “Tha deuh a khelh tum ang aw” a rawn tihchuan ka lo bu nghauh a.

Vanneihthlak takin Mixed double ah chuan pakhatna kan ni hlauh a, Men’s single ah Cedric-a pakhatna a ni bawk a,indoor items dangah pawh red house in medal kan la deuh vek bawk a vawiin chu red house day ani ringawt,haw a hun chuan Zomuana chu ka zawng a ka hmu mai silo ka call chuan a haw tawh thu min rawn hrilh a ka vahan ngei mai mai tak,Cedric an “Ka lo phur mai ang che” a tihchuan hnial chi ni heklo ka chuang ve mai a Remruati a mengrum teh asin.

Closing function kan hman ni chuan minlo be reng thin tu Hriata chuan min bem a, hmaichhanah ngei tuman min la bem ngailoh avangin thiamlo deuhin ka hnar thei hram ka khawngaih reuh ania aw a fel reuh nen,school kawtah function chu kan hmang a hla an play ri dum dum a zirtirtute leh zirlaite an lam mup mup a, Sangsangi nen lam ve tur chuan kan va inkai phei a vawihnih vel kan han zuang ve a “ka peih tawhlo” kan ti dun a kan innuih ringawt,hirha hle mahila lam kher hi chu ka tilte then na kawng a ni thlawtlo.

Best boy ah ka thianpa Zomuansanga an thlang a ka thutna tangin ka au ring asin aw, tunah hian eng mit in nge ka thianpa hi ka en ka hre ta hauhlo mai ka la hmu hmeltha ve em em zui,best girl ah Zuali an thlang a, kan zirtirtu ten an han ding dun tir lai te chuan engtin emaw ni ka lo awm,stage atanga an chhuk hnu chuan Zomuana chu Muankimi bulah a a phei leh a ka lo thinrim ve ringawt,keihi ka awmdan hi ka duh hauhlo mai,ka lu thing nawk nawk pah chuan duh leh lo inngaihzawng mai mai teh se ka buaina tur a awmlo,ka hriat tham lek chuan ka ti a.

Ruai kan theh zawh hnu chuan Cedric-a nen chuan kan haw a,keini pawhhi kan awmzia ka hrelo kan in care dun a,a thikthu ka lakah a tichhe zeuh zeuh bawk a mahse min bem a tum chuang silo,ahh engkim hi ka hne,Zomuansanga vang vek.

Zanah chuan kan house bik chuan pakhatna kan nihna chu lawm anti tlat a,ka nuhrawn leh ka pa te awmloh lai ani bawk a,ka nuhrawn fapa Hlua bulah chuan ka kalna tur ka hrilh a Cedric-a nen Hmangaihzuali te in lam chu kan pan dun a,pawisa te thawh khawmin arsa kan kang a Hmangaihzuali tein a free bawk nen a nuam khawp mai.

Arsa kan ei laiin Zomuana te thianho an rawn lut ve hlawl a anla rui em em zui, ka bulah chuan rawn thu in “Ka rualin haw rawh aw” a rawn ti sup a, rum deuhin ka lo melh ringawt, hmun vel kan tifel zo haw kan tum chu Zomuana chuan Cedric-a bulah “ka lo phur ang” a rawn ti nghut a hepa hian enge maw a hriat ni?

Cedric-a chuan “Ka hruai ania ka thlah thei e,lo inrawlh buai duh suh” alo ti a, Zomuana chuan nuisuk hian “Ka thiannu hi i kut hmawr pawh a i tawh ka rem ti hleinem” a rawn ti leh a hepa hi a rui sual anih ka ring hial tawh, Cedric an “A tan engmah inilo” ti a a chhanlet rual chuan a hmai a ri nghal chawrh a, ka te thawt ringawt Cedric-a buaipui tuma ka panlai chuan Cedric-a chu rawn tho in Zomuana chu a rawn khawih ve nghal a, an insual chu ani der mai, ka thelh ngam der silo, Zomuana te thian ho chu an rawn phei vat a mahse thelh pawh an tum chuanglo,thinrim deuh a “Thelh ta che u” ka tih chuan Ruata leh Johntea te chuan an va thelh a,a thian dangte chuan han puih ve pawh an tum chuanglo,an insual chu hmuhnawm tih hmel takin an en ringawt.

“Zomuansang i inrawlhlohna tur ah rawn in rawlh tum tawh suh ang che” an pawh then hnu a ka tihchuan, a hmuikak liak zeuh pahin a nuisuk ringawt a , Cedric-a bulah chuan “Haw ang” tihpah chuan ka kai a ani pawn min zui ve mai, ka hlauhna leh thinrimna chu a inzat reng ka ring Zomuansanga khatianga a awmchhan ka hrelo a,mahse a chetdan erawh kha chuan minti thinrim takzet.

Kan in zawn a a scooty a tih din chuan ka chhuk nghal vat a “Zomuana chetdan avang khan ngaihdam ka dil e, a ruisual anihkha” ka tihchuan a lo nuisuk a “A duh hle che anihkha,muttui aw” tihpah chuan scooty chu a start a a tlanchhuak nghal mai a, kei erawh a thusawi khan min la ti hamhaih reng, Zomuanan min duh ang maw? A ngaihna ka hre hlawllo, ngaihzawng na lam hawizawngin vawikhatmah Zomuana ka la en ngailo a, ani pawn min en ngaiin ka hre biklo mahse zanin a min en dan erawh kha chu Cedric-a thusawi kha a dik theihna lai a awm tlat ahh ka rilru a buai ani chu ka thian ka mamawh lai a awm reng thin ani.

“Enge khatah i din reng?” Hlutean a rawn tihchuan ka phu zawk a “Khawnge i kal dawn?” a zawhna pawh chu chhanglo chuan ka lo ti thung a “Valpuia teinah ka riak dawn,in lo kalh tha mai rawh” tihpah chuan a bike chu a start a a tlanchhuak nghal daih, a riak bo tur chu ka lawm daih zawk kan inngaina lo bawk nen inkhata awmdun reng kha a hahthlak.

Kar khat a liam a,mipa lo tenawm zia a vawikhat nan ka hre ve ta,ka hriatna pawh tu dang nilo in Cedric atangin ani,bialnu nghet nei reng chungin khatiang khan minlo awmpui alo nia,a bialnu lo haw lo selang chuan ka hre tawp nang,Sangsangi pawn a ngei ve hle aniang “Mipa ngawi chawi deuh te hi mipa tawngthei deuhte aiiin anlo in thup thei fe zawk anihhi mipa ler hlawmzia hi aw” a ti ve vawng vawng a.

Zana lehkha ka zir zawh a phone ka khawih chuan Zomuansanga message alo awm reng a,ka hawng nghal “Chhan awmlo in engmah ka ti ngailo” tihte hi ani,message tawite mah nise a awmzia ka hrechiang hle “Khatiang a che lo khan tinge min hrilh mailoh?” tihchu ka thawn let a “Pawnah ka lo awm ang” tihte minlo thawn,ka call nghal zat “Enge? tiang hian sawi rawh” ka tihchuan “In inbulah ka awm lo chhuak rawh” a rawn ti a hepa hi a rui nge mawni..

“I â mi? dar11 a rik tawh hi” ka tih chuan “Dar12 pawh ala ri dawn alawm,ka nghak che nia” a rawn ti a,ka tawng leh hma chuan call a ti tawp hmak,thawk lak hawk pah chuan ka hoodie chu ka la chhuak a ka ha nghal,ka room kawngkhar chu dimte in ka hawng them them a,ka thin lah chu a phuchhuak dawn emaw tih tur khawp in a la phu dup dup zui,inchungah ka pa te nupa nen kan room a awm a,inhnuai ah Hlutea room a awm thung,ka pindan ka chhuahsan chiah chu ka thaw huai thei,kawngka pangai atanga chhuak ngamlo in kan kutsilna bul tukverh atang chuan ka chhuak a,pawn ka chhuak chiah chu ka thaw huai thei,kan in zawn chiah zunin bulah chuan phone khawihin Zomuansanga chu a lo ding kur a “Engtinnge gate hi ka hawn dawn?” tih ka va thawn chuan “Lawn liam la nimai lawm” a rawn ti sam et ka vahan ngei mai mai tak,dimte chuan gate ah chuan ka lawn a thawm chhuahlo pawh tum mahila kan gate chu a ri tet tet tho.

A awmna ka va thlen chuan “Engatan nge bag te i ah a?” ka ti nghal tawng a “Nakinah i hre mai ang, kal ang” tihpah chuan ka kutah chuan min rawn kai a,min kalpui nghal hlawk hlawk ringawt,kan kalna tur lam ka zawh lahin i hre mai ang a ti ringawt a,thuawi tak in ka zui ve hnek hnek ringawt.

Kan school thlen hma kawngchhak lo awm lamah chuan min chhohpui a,min hruaina hmun tur kan han thleng chiah chu ka âng phuau ringawt,khaw thlirna nuam tak ani “Lo thu la” tih pah chuan a thutna bul chu a beng thak thak a “Engmaw i sawi duh chu” a bula ka thutrual chuan ka ti a “Cedric-a kha mawle,i star hma khan bialnu nghet a nei tih ka hria a in inzui ta chawt sia ,a bialnu Chhantei kha ka va bia a anlo la inngaihzawng reng sia chuvang anihkha kha tia ka chet” A tih chuan “Ka lakah rilru dang i pu emaw ka lo ti hman a,i pulo tihna ami?” ka inrin hma chuan ka lo ti a,ka lam a lo hawi pah chuan “Ka put i duh em ni?” a rawn tihchuan chhan ngaihna pawh ka hrelo,ka ding hluai ringawt.

“Hei chips hi ei rawh,hei kan in lawks” a tih chuan amah chu ka en vat a,a bag ah lai atanga zu bur a rawn phawrh chhuah chuan ka lo tum zui nghal hmak a “I zu in na bula awm mai mai turin enge min koh chhuah” ka lo ti nghut a “I ngaihawm ve a” a rawn tih chuan “I hmelchhia” ka lo ti ringawt,a zu in lai ban pah a “Khawi ka lo in ve chhin” ka tih chuan a phallo chiang teh asin “Vawikhat chauh ka star thlah nan” ka tih chuan “Anihchuan sting nen khan pawlh rawh” a ti nghut a,a thuawi tak chuan ka pawlh ve mai a,kan in chiah chu a tuilohna em em ka hrelo ka in zo thuai a,no khat leh chiah tihpah chuan ka inthlit leh a min chhuh hma in ka tlak nghal pawp a ka hrawk pawh a sa thla nghal hem hem mai.

Reiloteah ka zawi deuh nguai a “I malchungah ka lo mu” tihpah chuan ka mu a “Zomuansang” ka tih chuan “Enge?” a rawn ti nghut a “Awiahh te ti ve thin ta che,ka ti mai mai a i ler nen hian tinge bialnu i neih miahloh a?” ka tihchuan a nui mai a “Muankimi nen hian tinge in inngaihzawn loh?” tih ka zawh chuan “Ka thian alawm” a lo ti nghut a “Anih kei?” ka tihchuan “Enge i beisei?” min rawn enchhuk pah chuan a rawn ti a kei ngei pawn enge ka beisei ka in hre biklo “Ka hre biklo” ka tih sep rual chuan “Heihi ani em?” tihpah chuan min rawn fawp a thleng rang lutuk a ka lo dawh tawp ringawt,a inlak hran rual chuan “Tinge?”ka lo ti hu a “Ka duh che a” a tih nghut rual chuan zawi nguai chung chuan ka thuchhuak a.

“Keimah maw?” ka lo ti hu “Nangmah lo hetah midang awm an awm ami?” a tih chuan “Anih tihian min bem tihna mi?”ka ti a “Anih mai kha ahh i mawl si” a ti zawm nghal zat a,a fing bik tawp silo a “Nih chuan kan inngaihzawng dawnnia” ka tihchuan “I chiang a maw? I rui a reh hunah i theihnghilh ange” a ti a “Theihnghilh lo ang,rui pawh ni ila ka rilru a harhfim vek alawm bialpa ka nei khat a,nang ka mipa hriatchian i ni bawk a tihian i han inkawp ve chhin reng reng teh ang” ka tihchuan a nuisuk ringawt.

A tuk zing ka thawh chuan ka lu a rit bur a,thawh hlim atanga ka nuhrawn âng ri ka hriat phei chuan ka tum bur thei henu hi chu ka hne ve ngawt mai,tukthuan kan ei lai a ka nuhrawnin “Tunlai thar thar ho hi chu zing thawh te hi in hrelo lutuk a,thawh hma te hi tum ve thin rawh” a rawn tihchuan ka pa pawn “Ni e mifa te nun ang hian nun tum ve rawh” a rawn ti ve luam a “Mifa te ang chuan nung ila sawn ka pai daih tawh ang” ti a ka chhan chuan,Hlutea a rawn nui huk a ka nu hrawn Parvuli erawh in Hlutea nen min melhrum dun teh asin.

Inrinni anih avangin inchhung ka tifai a ka insu pah bawk a,in ngaihtuah ve ngai em? hmeichhia hi chuan thil phakhat tih pah hian thildang kan ti teuh thei a mahse mipa te hi chuan an ti kawp thiam miahlo thung,mahse mipa in thil pakhata a insawrbing tawh chuan hmeichhia te hian kan um phak ngailo tluk ani.

In ka tihfai nen nen ka nuhrawn parvuli chuan ân na tur ala hmu reng tho, henu hi chu lawmna reng neilo i ka tih tawp mai,zanah chuan Zomuana alo leng a inngaizawng ang pawn kan awm chuanglo, mahse a haw dawn a min fawp zeuh erawh chuan awm a ti nuam veng veng thei,kei hian hepa hi ka duh dawn tlatin ka hria.

Sunday ah chuan chawhma ka inkhawm ve zuai a chawhnu erawh ka peih thlawtloh avangin ka inkhawmlo thung,ka khumah chuan mu pah in ka laptop ah chuan movie ka en a tunlai chu hetia hun hmang hi nuam ka ti ber mai,ka lo muhil ni ngei tur ani ka phone ri chuan min ti harh a,minlo call tu ka en chuan ka pa alo ni,tlaiah a thawhpuite inah kan chhungkua a chaw kan ei phei tur thu a rawn sawi chuan ka peih ve loh thu ka lo sawi vat a,ani pawn min hnial lemlo,kan inbiakna kan tih tawp.hnu chuan muhil thei tawh heklo whatapp ah chuan lutin status ho chu ka en kual a Zomuan an status a rawn neih chuan ka en nghal vat amah leh Muankimi thlalak alo ni,kawrlum orange rawng a ha a Muankimin tshirt orange rawng a ha ve bawk a,rawng in ang an han ha kher chuan ka thin a tirim ngawih ngawih thei nia.

Zana a rawn len chuan “Zomuan kan kal thui hma hian inthen ka duhh?” ka tichhuak hlawl a,amah pawn min enkur ringawt “Ngatinge?” a tihchuan “Ka thian chauh ni tur in ka duh che” ka lo ti a,a ngawi reng ringawt,a ngawih vang vang hnu chuan “Thian ang chuan awm leh i duh tak tak maw?” a rawn ti a ka lu ka bu nghauh a hmuh chuan “I thu vek alawm” a ti a,keipawh chuan nuamlo ka ti ve reng mai mahse ka thianpa hi duh ka duhlo a hetia ka tihloh hi chuan a zuna ka uai ka hlau ani.

A haw phei hnu chuan ka tah a chhuak tun a mahse ka thlentir tawh a,ka thu kha sut leh vel ka tumlo,ka mut hnu a a message chhiar tur awm miahlo te chuan ka tah a tichhuak zual a enge ka mittui tlakna chhan ber hrelo in ka mittui ka hru ka hru ringawt..

A tuk ah chuan School kal tur chuan kan gate bulah chuan ka lo nghak a,a rawn lan mai theihloh avang chuan ka sona ka bih sek a,minute10 chauh a awm tawh tihah pawh a rawn lantheih siloh avang chuan Hlutea chu min thlah tur in ka ti ringawt a,peihlo zetin min thlah ve mai a a lawmawm hrim hrim e.

Kan school gate bula Hlutean a bike a tih din rual chuan ka chhukthla vat a,Hlutea chu lawmthu hrilhin kan class lampan chuan ka pheisan nghal hmawk hmawk a,Zomuansanga te thianho bawlhhlawh peih zo lo chho nen kan in tawh chuan ka ding dat a,Zomuana ka en chuan minlo en ve reng a a eng hian nge ka thin tirim pawh ka hrelo,rei pawh en duhlo chuan ka kalsan nghal daih a,class ah chuan ka lut tum bur ringawt.

Ka thutna a ka thutthlak rual chuan thawk ka la hawk a,ka thutpuinu Sangsangi chuan mak tih hmel zet in minlo en reng a “Enge?” ka tih thawt rual chuan a phu dawr ringawt “I va thinrim hmel ve?” a rawn ti a “Mi vuakhlum a vuakhlum leh chakna thinlung i nei tawh ngai em?” ka tih chuan “Ahh la nei chiahlo tinge?” alo ti hu a,thawk lak huai pah chuan “Engmah nilo e keichu ka thin hi a rim khat a ka thin a han rim ve tawh hi chuan mi awm mai mai lai te hi ka tham nawk nawk chak thin” ka lo ti a “I thin tirim tu nih pawh a inthlahrunawm e a” a tih chuan ka nuih ringawt a.

Chawhnu lamah chuan school hall ah Teacher’s day anih ang in zirtirtu te pualin hun kan hmanga,.kan zirtirtu te pawh pangpar leh chocolate kan pe nasa bawk a an khi deuh reng mai,kan thutna hnunglam kan hawilet chu Zomuansanga leh Muankimi te thudun ka hmu a,ka ni deuh pup pup in ka hria,ka thik ni e Zomuansanga hi ka duh tak zet tawh ani,ka thianni leh tur in ka duh a mahse hmeichhe dang bul a a awm ka hmu leh thei silo ka hma ka sial nge ni a ka inkhawngaih pawh ka hre meuh tawhlo.

Nitin in Zomuansanga chu ka lak atangin a hla tial tial a,he ka chapo na hian be hmasa tu nih a duhlo bawk silo, a status leh a lastseen ka check reng a mahse chutiang ka thil tih thin te chu a hriat erawh ka hlau hle thung si ,min hlat tial tial mahse keiin ka thlahlehna a nasa tual tual a kha ka thuthlukna atthlak tak siam tak kha siam tha leh thei ila ka ti thin.

Zankhat a status kan view chu a status ah “Kan thil beisei te hi kan tan a tha vek kherlo” tih thu hi a lo hmang a,thu tawite mahnise a thusawi tum erawh ka hre chiang hle thung si “Bei nge sei rúndung” tih thu chu ka hmang ve nghal zat a,a rawn seen hmasa ber bawk, a seen hnu reiloteah chuan message minlo thawn a “Awmzia awm rawh aw” tihte mai hi “Awmzia awm tum in ka awm ve mek anihhi” tih thu chu ka thawn let a.

Ka thawn hnu reilote ah chuan a call a rawn nghal zat a ” enge i awmzia chu?” a rawn tih chuan ka huaisenna zawng zawng leh Sangsangi huaisenna tlem pukin “Ka duh che” ka ti ve nghal tawp a “Ka hrialawm” a rawn tih chuan, thaw ka la hawk a “I hriat chuan a that chu ka dah aw” ka tihchuan “Naktukah school kal turin minlo nghak dawnnia” a rawn ti a,chhang tawh lemlo chuan ka off hmak,call kan off hnu reilote ah chuan a message ka dawng chhunzawm nghal zat a “Ka bialnu tiang khan i ni leh chiah aw,a hma ang khan awm tawh suh ang che muttui aw Eki” tih thu hi a lo tawn a a message hmalam ka chhiar a ka lawm ve hman nen a tawplam a min koh dawn erawh chuan min ti tum bur mai,muttui tih chu ka thawn ve nghal zat a,Zomuansanga bialnu ka ni leh ta tunah chuan Muankimi pawh thik ila a nunah thu ka nei ve tawh a ka duh ang angin ka thik thei tawh.

Present time:

“Enge i tih a? i va reh ve,koh reng reng i hre thei bawk silo” tih ri avang chuan ka kawngkhar lamah chuan ka hawi phei vat a Nu Hmuni ka inluahna nu alo ni “Eng tilo e,enge nita?” ka tihrual chuan “Loan chu a lak theih dawn ta em?” alo ti a “Aw theih dawn e,kan manager khan nuai20 vel hi la chhin phawt se a tia,naktuk lamah a buaipui theih nghal ka ring” ka lo ti vat a “Ava tihzia dawn ve,ilo awm hlauh hi chu kan vanneih pui ngawt mai che naktukah i pa Dina ka lo tir phei dawnnia,kan chho nghal mai teh ang,chaw kan la ei ve silo kha kha rawn zawh che ka duh a” tihpah chuan kawngka lam chu a pan a ka zui ve nghal zat bawk,kan in mangtha hnu chuan kawngka chu kalhin ka intifai a engmah pawh ngaihtuah zawm tawhlo chuan ka mu hmak a.

Ni khat ka office bang ke a ka haw chu Kima leh a bialnu hi min tawk zawng tak hian an rawn kal phei a,birukna tur ka zawn mek lai chuan mi pakhat hian min rawn pawt dawr a min pawt dawrtu kan en rual chuan Zomuansanga alo ni,mak ka ti lutuk chu ka meng phar awk ringawt,Kima ten kan zawn an rawn thlen chuan keini mak tih hmel taka in en reng te chu min rawn melh zeuh a keini pawh min lo melh rual chuan kan awmdan chu kan siam tha ve nghal a,engmah sawi lemlo a min kal pelh chuan ka thawhuai thei.

“Ka lawm e tih pawh sawi i tum nange?” Kima ten min kal pelh hnu a Zomuansangan a rawn tih chuan “Tihna chhan tur a awm em ni?” ka lo ti hu a ” Tlanchhiatna tur i hmuhloh kha” a rawn tihchuan “Anih ka lawm e,chuan ka kal” ti a ka inher hman chiah tihah chuan “A hma ang khan tlanchhiat leh i tum em ni?” a rawn tih chuan kal mai ka tum chu ka ding dat a “Ka tlanchhe ngailo” tihpah a a lam ka hawi chuan a lo nuisuk ringawt, a hmel chu a upa ve deuh tawh tihloh chu a hma ang reng kha ani.

“Kan inbe lawk dawn em ni?” a tih chuan lu ka lo thing vat a “Hnuhluih i duhloh chuan minlo zui mai mai teh” tihpah chuan a kal daih a, ka tlanchhe phut dawn emawni tih ka ngaihtuah lai tak chuan “Ka um peih reng che ania minlo zui vat rawh” rawn hawilet pah chuan a rawn tih leh a tlan phut pawh nimahila min hnuklui duh leh dawn a ka hriat avangin a thuawi ber ang hrim chuan ka zui a, cafe ah chuan inhma tawn in kan thuran a min en chik lutuk te chuan awmngaihna minti hrelo ka ke ka phut det det ringawt a,ka awmdan a hmuh chuan min nuih suk suk ringawt “khatia nui suk suk lo khan i sawi duh chu sawi vat ta che” ka tihchuan “I thin ala chhe reng ani maw?” Nui deuh suk pah chuan a rawn ti leh a,nge maw a nuih suk suk reng le.

“Ka nu in pasal ala neilo a ti che a, chu chu thudik ani em?” a tihchuan ka lu ka lo bu nghauh a “Anihchuan khang kum chung zawng khan engvangin nge ilo haw ngaihloh?” tih zawhna min zawh chuan ka ngawi reng a,chhanna beisei in min melh reng tih ka hria mahse ka chhangthei tlat silo “Ngili i duh chen chen i ngawi thei mahse Thudik ka hriat hma chuan nang hi i hawlo ang,i hriat mai mai atan he cafe hi ka thianpa Kimtea dawr anihhi aw” a tihchuan thawk ka lo la hawk ringawt.

“Chhan tha tak a awm animai,enge miin an sawi duhloh an nunhlui chu hriatsak tumin i zawh luih tal” ti a ka chhan chuan a rum nghut a “Mi nilo in Lalnunngili i nihkha,kan inzawmna i tih chah chhan te ilo haw ngailoh nachhan te engkim ka hre duh i chanchin ngaithla tur hi chhan hun ka ngah khawp”ania” tihpah chuan a sona chu a bih a,keiin thawk ka lo la hawk ringawt ka sawi ang nge ka sawilo ang tih ka ngaihtuah lai chuan “I chungchang engkim ka ngaihven thin tih i hriat kha kum10 chhung ka nghak tawh che,thudik chu hriat ve ka phu in i hre lo maw?” a rawn tih chuan maimichhing in kha zan tihbaiawm tak kha ka ngaihtuah let a.

“Sawi rawh le” a rawh tih chuan “Zomuan” ka ti sep a “ka ngaithla” a rawn ti sup rual chuan “pawngsual ka ni asin” amahmelh pah chunga ka tihchuan,a rinloh lam daih ka sawi tih a hmelah alang vek thei “Tuin nge?” mak ti leh thinrim insum hmel tak chuan arawn ti a”Ka nuhrawn fapa Hlutea khan” ka tih chuan “Chuvang chuan tiraw min kalsan?” a rawn tih leh chuan ka lu ka lo bu nghauh a “Ngili” na tih hmel taka a rawn tihrual chuan “Class 12 second term kan exam zawh zan a ka damloh kha ila hria em?” ka tihchuan a lu alo bu nghauh a “Khami zan khan ka pa thawhpuipa a thih avangin ka nuhrawn leh ka pa kha an va tleivar a chuan Hlutea ruiin kei a damlo kha min sual ta ani” ka tihrual chuan ka kut a rawn vuan,a hmel ka en chuan min khawngaih hmel leh thinrim hmel inchawhpawlh nuai ka hmu thei.

“I pa i hrilh lo em ni?” a tihchuan “Hrilh e mahse maw ka pa hian minlo hmangaih ve lo aniang ka thiamloh angah a ngai zawk vek a,police hnen a report ka tum lahin min tuithlar a tum bawk a” tihpah chuan ka nui hak a “Tinge thudik engmah min hrilh i tum ve loh? khatih hunlai khan mipa tleirawl chauh pawh nimahila ,nang chhan nan che chuan engkim ka ti ngei ang mawle” a rawn tihchuan ka lo nuihsak a “Ka hria alawm mahse ka pa a thisen a fa ngei pawh hmangaihlo tu avang khan tumah kha ka ringlo a,mipa hrim hrim kha ka hua a ka hlau vek bawk,kha ramhuaipa in min khawihhnu karkhat hnuah ka pa in Aizawlah min dah a hostelah min dah nghal bawk min rawn tlawh ve ngailo,ka mamawh pawisa min pe a chung zawng chu,college leh master ka zir thlengin private hostelah ka awm a hna ka neih hnuah keimahin in ka luah hrang a,khi a hminga ka pa ve mai mai te chhungkua tello khian ka hlim a ka nunah hian ka mamawh ve tawhlo” ka tih chuan ka kut chu a hmerna zual sauh a.

“Innei mai ang hmiang?” a rawn tihchuan ka lo nuichhuak hawk ringawt,tiawm ang lo lutuk mai “Ka ti fiam miahlo ania,tunthleng a hmeichhe dang ka la ngaihsak miahlo nachhan leh hna chauh ka ngaihtuahna chhan chu nangmah hi ini asin,pasal i nei emaw ka tihlai pawh khan atthlak takin in inthen hun ka nghahchhuah theih beiseiin hna ka thawk char char a,ka nu in a hmuh thu che a sawi khan ka awmna hmuna i awm ve avang ringawt pawh khan ka lawm a chutah pasal ilo nei miahlo tih ka hriat leh ngat phei kha chuan ka mittui a tla hial asin” a tihchuan amah chu ka en ngawih ngawih ringawt.

“Zomuan keichu zawm khawm leh theih tawhlo tur a tihchhiat ka ni tawh, darthlalang ang maiin ka kehchhe vek tawh,i hmangaihna kha ka phu ve tawhlo hmeichhe tha tak nangmah phu ngawih ngawih tu che zawng zawk rawh” ka tihchuan a lu thing pah hian “Nangmah bak he khawvelah hian min phu tu an awmlo” a rawn ti a “I rin ang kha ka ni tawhlo asin ka nun hi a tawp tawh lutuk vawiina min rawn pawh dawr lai vel a mipa min tawk zawng a lo kal fa kha thla hmasa mai khan ka pai asin” ka tihchuan “I ngaihzawng tihna em ni?” alo ti nghut a “Ni thin e mahse ka vanduaina a kal tluang nge ka hrelo min lo kawp phar vel mai mai a,nau ka pai hnuah ka hre leh sia ka then phalloh laiin aman min then a” ka tih chuan ka dul en pah chuan “Nau i pai maw? Naute chu thla engzat nge ni tawh?” a rawn ti a “Thlakhat a tling awrh tih khan ka office haw lam scooty in ka accident a ka chhiat alawm” ka tih chuan “I ti tlalo tak tak maw?” a rawn ti a “I â mi?”ka lo ti tuar a ,alo nui sung ringawt.

“Keichuan buaina a awm in ka hrelo in kawp leh ang chuan nakin deuhah kan innei dawnnia” awlsam tak chuan a rawn ti a”Engkim i hriat tawh kha,ka phu tawhlo che hrim hrim in mipa hnaih ka duhlo” ka tihchuan “I thulo” a rawn i a,hepa nghal zia hi chu aw,thawk ka la hak ringawt, chumi tlaiah chuan tumloh deuhin zanriah Chopsticks Restaurant ah chuan kan kil dun a,ka thlakhlehna ala bo biklo a a hma ang tho khan a bulah awm a nuam ka la ti,BA a zirlai vel a a chanchin te,hmeichhia in an bem nasat thu te mahse amah ngaizawngtu ten nerd emaw an tih zel thu te min hrilh chuan ka nuih alo za viau.

Chu zan atang chuan kan inbe ta zauh zauh a,min rawn bia a ni zawk mah,inngaihzawnna lam hawi zawnga min biak a tum erawh chuan ka reply lo hmak zel,ni a liam a keipawn a hma ang chiah khan a lakah ka rilru ka pe leh tawh tih ka hria mahse ka tan a sang zia ka hria a minlo duh ve pawh nise inzawmna siampui erawh ka tum tawhlo.

Nikhat chhun chawlhlaiin Zomuana alo kal a kan office bul restaurant ah chuan min chawlhpui a,thil ei pah a kan lo titi mawlh mawlh lai chuan damdawiin a ka awm lai a nurse fel ka tih ve deuh kha a thiannu nen an rawn lut ve hlawl a,min hmuh chuan min la hria ni ngei tur ani min rawn be luam a,Zomuana pawh an hria anih hmel an be ve nual a mahse ka hma a thu pa erawh chuan tul a tih te bak a chhanglo thung,kan zawn chiah dawhkan ah chuan an thu a kan thil ei zo chhuah tum a kan din lai a an thilsawi erawh chuan ka berh a verh khawp mai ka chungchang ngei ani “Sawnu sawn nau a ti tla tak tak alawm,tunah lah nula pangai ang maiin a tei leh vel zâwt zâwt a,tunlai hmeichhia ho hi chu ka ten ania” ka hriattur deuh kher chuan a ti a,ka kut ka lo humruh vak ringawt Zomuana pawn an thusawi chu a hre ve ni ngei tur ani,an thutna lamah chuan a phei nghal vat a “Nau a ti tla tihchu i chiang amaw? I patient te chungchang i duh duh na a i sawi avang hian khin theih i ni tih i inhria em? nurse tha tak chu i nilo chiang khawp ang” a tihchuan a thiannu nen chuan an meng phawk dun hra ringawt.

Restaurant atang a kan chhuah hnu chuan Zomuana chuan “I hun liam tawh anihkha, i hunliam tawh vang khan nat tum tawh suh ang che” a rawn ti sup a ka lu ka lo bu nghauh a.

November thla ani a khua pawh a vawt tan tawh hle,Zomuana pa Pa Zonuna a damthat loh avangin Zomuana Khawzawl ah a chho a ka ngai viau,in ngaizawng silo in tihian kan la awm reng chu nia a chang hi chuan risk ka la leh mai dawn ami aw? ka ti thin mahse mihring hi chuan danglam hun kan nei thin a,Zomuana pawhhi lo danglam ta se tih ngaihtuah na chuan min ti buai ani.

Beisei ka nei a mahse enge ka beisei a? enge ka nghah reng erawh ka hrelo, duhthusam thei mihring mahse enge a duhthusam tur pawh hrelo, a duhthusam chu lo thlen dik ta se reilote hlimna thlentu nih hlau ber ang mai ka ni.

Zan khat Zomuanan minlo call chuan Hlutea thih thu a rawn sawi a,khawngaihna nei miahlo mahila min thawng ve viau,a sual em a thih tha pawn a thilo mi kut tuarin a thi a,a thihchhan ah erawh accident tih an ziak leh tho ang, ka thu ni ngat selang chuan a thihchhan ah a thiltih rullet na tih ka ziak ngei ang.

Ka pa chuan minlo call in Khawzawl a chho tur chuan min rawn ti a,ka kallo chiang teh asin a fapa duat a fanu a thisen ngei ai pawh a a thlan kha ani miau a,a fapa thi chu a tuarna ve khawp ang chu, Hlutea thi chuan lawmna min thlen lo mahse ka thawk erawh a ti veng huai in ka hria.

Zomuana a lo let hnu chuan zantin deuh tho a rawn leng a, zawi zawi in mipa ka huatna leh rinna ka hlauh tak kha a thiat telh telh a tunah chuan amah a innghah pumhlum ka chak a amah a inpek luh ka chak tawh zawk,zankhat ka pa in min rawn phone chuan thu thinthawng tak mai a rawn sawi a ka nuhrawn parvuli a pumpui alo cancer chu niin, khawngaih ka tum ve na a ka thei thlawtlo, a fapa nen ka chunga an thil tih rah an hmu ka tilo theilo, ka pa in khawzawl a chho tur a min tih chuan ka hnial leh tho a nupui damloh avanga ka chhoh nachhan tur ka hrelo.

Zankhat Zomuana alo len chuan ka nuhrawn cancer thu leh ka pa in khawzawl a chho tur a min tih chungchang vel chu ka hrilh a, min thinrim pui ka rin nen “I chhoh nge a ngai anihchu” a rawn tih chuan ka thinterek a rawn ti chhuak nghal “Ka chunga an thil tih zo zai te kha i theihnghilh tawh tihna em ni?” ka ti a “Theihnghilh lo e, mahse mi thil tihsual ngaidam thei hi mi ropui anni asin,nangmah pawn thil te chu i ti sual ve tho ang chu” a tih chuan ka ding chhuak hluai a “Ka thil tihsual te chu ka hre lutuk min hrilh loh pawh hian,kei baka hrechiangtu an awmlo ang mahse ka lo tlûk tawh na leh ka lo tawrh tawhna zozai te kha tuar in tlu ve ta la beidawngin thochhuak tur i awm tawh kher lo ang, keichuan ka lo tluk tawhna te kha inhnuhhniam tir duhlo in thawh tumin ka bei a tunah hei ka ding chhuak reng bawk a mahse chumi avang ringawt chuan khang ka nun tichhe vek tu te kha ka ngaidam thei tihna ani chuanglo, mi ngaidam thei mi ropui i ti anihchuan keichu i mi ropui tih zing ah ka tel ngai dawnlo kumkhua anihchu” ka ti hlawk hlawk a, ka sawi hnem bawk a ka thaw hlawi hlawi thei.

Zomuana chuan “Ka tihpalh anihkha, i thuneihna chinah chuan ka inrawlhlo ang ka tihkha, puitling ini tawh a thil tam tak i paltlang tawh bawk a thil tha leh thalo te chu i thliar thiam tawh alawm” zaidam deuh hian a rawn ti a “keipawn khatiang thil kha ka tawng dawn tih hre lawk ngat ilang chuan kha nun kha ka thlang bik hauh lo ang, mahse ka vanduai a duh ka thlang thei silo, ngaihdam vawikhatmah ka la tum chhin lo a ngaihtuah pawh ka ngaihtuah duhlo” ka tih chuan thawk ala hawk a.

“Ni eng zarah khaweng kan hmu a tiraw mahse chu ni eng chuan nileng zankhua in a daih ngailo tih i hria anilawm ni?, tlai ani a a liam na turah a liam a a ênna chu thimin a rawn hliah khuh a mahse a tuk zingah a ngai ang tho in a rawn eng leh tho anilawm ni? Nangpawh chung ang chu ini eng thin mahla thim hun i nei a mahse i thim reng dawnlo thung, nangmah a beiseina nung awm kha ring tlat la i tan bei tang tang la i la hlawhtling ngei ang” a tihchuan a kut chu ka lo chelh vat a “Nangmah vang hian heng zawng zawng hi ka hneh theih ka inring thin, mahse hun erawh a duh rei khawp thung nakinah ka hneh thei anih chuan ring tak a au chung in Zomuansanga vangin ka nun hrehawmna te ka hneh ta tiin ka au chhuah pui ngei ang” ka tih chuan nuichunga min melhpah hian “Ka hmangaih che” a rawn ti sup a “Keipawn ka hmangaih che,i bialnu nih ka duh tawh” ka tih chuan a mengphar awk a.

“Nanghi i fiamthu lo tiraw?” a tihchuan ka lu ka lo bu nghauh a “Keimah chauha hun harsa paltlang turin ka chak tawk tawhlo, min paltlang pui tur leh min hneh pui turin ka bulah awm tlat turin ka mamawh cbe alawm” ka tih chuan nui pah hian “I kut ka vuan zel ang” a rawn tih sup pah hian kum10 lai ka lo fawh tawhloh a hmui fawh nuam em em mai chuan min rawn fawp ta a…

 A TAWP TA

Zuals Khiangte

I wrote my imagination✨

Leave a Reply