You are currently viewing KA NUPUI KHA
Oplus_131072

KA NUPUI KHA

Spread the love

BY : Vanlalpeki Fanai

Ka lungleng awmngaihna hre lo lutuk chu van deuh ruai ruaiin tukverh ah te ka dak chhuak a, a chang leh pindanah te chuan lutin, kan nupaa kan mutna thin khum lian leh chul rup tawh mai te chu chul kualin mittui chu a rawn hnam leh thin bawk a, ka lung hi a leng a ni. A leng ngawih ngawih.

Nia, kei hi misual leh dawhtheihna tlachham tak mihring niin, pasal fel leh innghahna tlak pawh ka ni thei ngai lova, ka nupui tan khan pasal thlamuanpuiawm tak ka ni ngai bawk hek lo. Misual awm tha duh lo ka ni e ka tih kha. Engtikai mahin ka nupui kiangah khan pasal fel leh nunnem, tih nuam takin ka khawsa ngai mang lova, kan inngaihzawn laia ka zia zawng zawng kha dahtha in ka mize diktak ka chhuah a ni. Ka nupui chauh ni lo, ka chhungte tan pawha fapa zahpuiawm tak chu kei ngei hi ka lo ni e.

Ka nupui Hmingtei nen khan kan thawh dunna dawr pakhat atanga intawngin kan lo inhmel duh chho a, kan inmil dunin kan inngai ve em em thin bawk. Nitin a inhmu thin leh dawr pakhat chhunga thawk dun reng si khan inthlakhlelhna erawh a nep phah chuang hauh lova, nitin mai hian kan in ngaizual tulh tulh emaw tih mai turin kan in ning thei mawlh lo a ni ber e. Hna ban rualin kan inzui haw a, dawrah chawl kualin thil te kan ei dun leh te te phawt zel a, chumi hnuah khaw awmdan a zir ang zelin hmun dangah kan leng kual hmasa leh phawt thin. Tlai tak takah hian kan inthlah haw ve thei chauh thin a, ani phei kha chu hmeichhia a nihna angin a chhungte hauh leh hrawk pawh a tawk ve fo. Mahse, pawi erawh a ti lova, ven thawn chu duh ve thin hle mah ila amah berin pawi  a tih loh luih tlat a min thlakhlelh zawk miau si kha chuan keipawhin ka hnar thei lo leh nge nge zel a, a ngai te bawkin kan awmdun leh ta mai thin a ni. Chutianga inthlahlela inzui ta reng na na na chu khuareiah a result rawn lang chhuak in, a ruah loh thu a sawi ta nge nge a, khang lai kha chuan a zun zam khan min la phuar hnehin, min la fan hneh ve bawk a, khaw dang hawi thei ka ni lo. A rai tih ka han hriat hnuah lek phei chuan ‘ihe’ lo in ka hawn ve ta chawt mai a nih kha. Kan hlim thin asin. Kan chhungte ve ve pawhin sawi buai nei lo in min sawirem zui mai a, naupang te mah ni ila ani nena chhungkaw puitling han din chhoh tur kha chu ka phurin , pa ka ni ve tawh tur chu ka hlimpui em em a ni. 

‘’ Ka nupui duhtak, kan pahnih hian naute hmeltha deuh tam tawk nei ang aw’’ tih pahin  a hmui no nalh chu ka zut sak heuh heuh reng a, ani chu alo nui ve sen sen reng thung.

‘’ A pa ang maia hmeltha hlir hi kan nei anga, an luck hlawm dawn lutuk’’ a rawn tih ve chuan lungchim takin ka lo kuah vang vang a, he nu hi ka hmangaih a ni. Ka duh a, ka thlahlel ngawih ngawih bawk. Sual setana’n ka thinlung leh taksa min neihsak hma zawng kha chuan ni e, ka thlahlel ve ber thin alawm.

Nupaa kan insiam hnu hian kei chu dawrah tho khan la thawk ve zelin, ka nupui erawh chu raipuar te alo nih tawh bakah, inchhungah chuan kan buai ve thin bawk si a tiin hna nei lo in kan dah rih a tih theih ang chu. Chutiang chuan kan fa pakhatna leh a hmasa ber a rawn pian thleng khan nupa inngeih leh hlim em em niin kan la khawsa dun ve zel a, keipawh ka hnaah te chuan tluangin buaina ka nei hran lo bawk nen, a hnuah phei chuan hotute mit tlung ve in managerah te hial min kaisan tir ta a. kei chauh ni lo, ka nupui pawh chuan min lawmpui thiamin a hlim ve takzet. 

Ka kaisan lawmna chu ka thawhpuite ho in rilru tih thawven pah nan tiin min lawmsak an tum ta tlat mai a, ka inthlahrun rual rualin ka lawm ru em em tho bawk si. Tihngaihna dang hre bik hek lo chu an duh dan chu ka pawmsak ta nge nge a, ka nupui erawh chuan tullo tiin a ruk tak kha chuan a lawm chiah lo tih pawh ka hre tho. Mahse, thiante duh dan hnial hi harsa ka ti ve thin em a, chumi tumah chuan kan nu lawm lohna pawh haiderin ka thiante duh dan zawk chu ka zawmsak ta mai a nih kha. Chutianga mitmei ven tur awm ta lo na na na chuan awm chin tawk hre lo in, ka thiante tih ang ang zu pawhnise ka han tem ve ta nual mai a, zanriah ei hunah meuh kha chuan rui chhe tawh tak ka ni ringawt. Chaw ka ei leh ei loh pawh ka hre mumal tawh lova, ka hriat leh zawng chu kan nupa khum chunga ka lo mut tawh hnu leh, kan nu in min tihharh hlau tak chunga ka mawza bun lai alo hlip mial mial chu a ni leh mai.

Tho chhunzawm peih lo in ka lo muhil leh ta a ni ngei ang. Ka thawh chhuah lai hian ka nupui chu alo mu ve tawh lo a, a tho tawh a nih ka ring mai. Tichuan, hmai pawh phih tawh la in room ka chhuahsan vat a, ka rin ang ngei ngei khan choka lamah kan nu chu alo ri rak rak tawh. Zawimuanga pan hnaiin dim zet hian a kawngah chuan ka va kuah ta de de a, alo phu zawk. Chutah, rum em em a min rawn melh chung hian amah ka kuahna kut pawh chu min phelhsak ta sawk sawk a, a tawlh hla nghal bawk. 

‘’ Rui chungin ilo haw ta vel a. min zah lo sawt ka ti hle mai’’ ti hmarh hmarhin chiang em em hian min la en reng bawk si nen, a nuam lo ve duh khawp mai. 

‘’ A, ka inthiamlo ve tho a nia aw. A nuamlo sawi tawh suh. Chubakah, nangmah ka zah loh vang che pawh a ni miah lova, k enjoy ve nimai a’’ ka tih chuan tlema awki vin zawk hian,

‘’ Aih, I chhungte chu sawi loh, kei hi min zah lo tel bawk alawm. Tu nge ka nih. I nupui ka nih hi hrereng rawh aw. Khang hun leh chen zah taka ka lo en tawh thinna che ah khan I zah let ve hi chu ka phu a ni. Ka phu takmeuh’’ ti hlawih hlawihin a thil tih lai chu min tihsan lehnghal mawlh mawlh a, ka ngawi zui ta reng. A rilru ka ti na a, thinrim takin ka siam bawk a, ka thiamloh vek tih ka hriat avangin ngawih chu ka chuh ta tlat. A nih loh a, a tawng chhung zawng ka lo hnial kalh ve zel chuan buaina lian zawk a thleng ngei dawn tih ka chiang a, chu chu ka duh lo a ni.

Ka nupui hi titau ve mai mai ngai lo leh a pawng ataka thinurna tilang tilang ve ngawt ngai lo mi a nih angin a thin a ur tawh chuan ka thiamlo ve hle tih a hriat a, tih thinrim belhchhah ka duh ngai lo. Tin, a thinrim reiloa a lungawi leh hma em m thin bawk.

‘’ In nu hi hrilh rawh. Inchhungah hian midang kan awm ve lai chuan hmel hlim te hi pu lui ve hram hram thin rawh se. Han bia ila a rultawk lek lek hian min chhang a, a pawi kan sawi ta emaw tih mai tur hian a awm ziah’’ chutiang chu ka u mipa, ka unau pianpui neihchhun ngawih ngawih Tluangpuia nupui min tawngkhum duh dan a ni a, ka nupui hi a mil lo in sawiselna tur a zawng fo reng a, a ngaithei lo tih pawh ka hria. Mahse, an thusawi te chu ngai pawimawh tha duh lo in ani chu naupai lai a nih vanga a mood inthlak danglam thut thut thin a nih thu te ka lo hrilh ve mai thin a, ka nupui bulah phei chuan khang an thil sawi zozai te pawh kha ka sawi chhawng leh duh tawh ngai lo bawk. Buaina a punlun phah mai mai. 

An ni ka u te nupa hi kum 2 chuang innei ve tawhin, tun thleng hian fa erawh an la nei thei hauh lova, a tu zawk nge tha lo tih entir tur pwh hian vawi duailo chu doctor hnenah pawh an lo kal ve zak zak tawh bawk. Mahse, an that lohna chu hmuhsak an ni lo ve ve thung a, tihian, rilru kim lo tak chungin an la khawsa dun ve naw naw a ni ber.chutiang chu an dinhmun a nih laia keini in nau kan lo pai ta mai si chu kan monu, URinpuii hian ka nupui hi a thik phah thin tih ka hre reng a, tin, ka nu leh pa leh chhungkhat dangte pawhin naupang zawk nupui na na na chu an lo duatin an lo ngaihsak ve hlwm bawk si a, heng vel vang te hian URinpuii pawh hi a ruk tak chuan a lawm hleithei lo fo reng a ni. Chutihrual erawhin a lang a pau chuan min tawngkhum vak ngai lo thung a, midang hmai eng hi a zah ve te pawh a ni maithei e. kan unau inkara hetiang boruak inmung mek vang erawh hi chuan kan nupa hlimna kawng hi tihchhiat phah ka tum hauh lo thung a, puah darh hun alo awm ta a nih pawhin ka nupui hi chu venhim zel ka duh bawk ang. 

Hna ah ka tluang a, khami ni tih loh kha chu zu pawh ka tem leh tawh bawk hek lo. Tin, ka nupui naupai pawhin ziaawm lam pan chho ve in a hmel hmuh pawh a nuam ve sawt viau tawh a, tunah rih chuan URinpuii pawh khan buaina a nei rih lo a ni maithei e. Ala ngawi tlat. Mahse, hetiang hi kan awm dan mek a ni ka tih laiin tlai khat ka hna bang erawh chu thil danglam tak hian min lo hmuak leh ta tlat. 

Ka hna bang inchhung ka lut tep tih ah, inchhung atanga ka nupui tap tap hlawp paha rawn tlanchhuak nen chuan kan intawk ta chawt mai. Mumal takin a kalna tur kha a rawn en bawk silo nen kei chuan ka lo pawm deuh chawt hi a ni ber e. 

‘’ Eng nge thil awmzia?’’ tih pahin amah chu ka han sawi deuh nawk nawk a, ani lah chuan la tap deuh pur chung hian ka mitah tak pawh min en lo in,

‘’ Hetah hian ka awm duh tawh lo. Ka haw dawn’’ zawite leh insut faih faih chung hian alo ti ve bawk. Min ti hamhaih in ka hrethiam lo tulh tulh mai.

‘’ Lut phawt ang aw’’ tih pahin amah chu ka kuah bet tlat reng a, min hnial lemlo in ngawi reng hian min zui ve leh mai bawk. 

In chhunga kan luh rual rualin Urinpuii lo ang dur dur thawm chu ka han hre nghal zat bawk a, mak chu ka ti angreng hle. 

‘’ Eng nge thil awmzia hi. Helai hmunah hian eng buaina nge thleng han sawi the u’’ tih pahin ka u te nupa chu ka melh ta ran ran a, chutia ka hmel a han hmuh tak thutah chuan URinpuii ang tui lai pawh kha tawp chawtin, ka hau chung hian min rawn en ve ta reng. Mahse, ka u zawk chuan zaidam angreng tak hian

‘’ Ah, eng ni love, I u hi chu tihian a han ti leh hluai thin a, Hmingte, nangpawn hriatthiam tum hram rawh aw. I uRini chu mi ti hluai thin a ni tih in hriat vek kha. Engahmah ngai suh u’’ a lo tih laiin an nu zawk chuan vin zet hian

‘’ Chutin lo ti ringawt zel suh. Vawiinah pawh he nu vang hian thianho inhmuhkhawmna ah pawh ka kal ve theih loh phah tih hre rawh. Ka lung hi a awi lo the mai a nia’’ tih hlak hlak pahin a kawr ken lai niawm tak te chu a han vai pah lawp lawp bawk a, ka hrethiam thei chuang hauh lo. 

‘’ Eng nge awmzia. Eng thil chiah nge thleng. Ka nupui hian I eng pwi nge alo swi tak chu ni a’’ ka han tih chuan inthlahrung deuha ka bul maia ding ve ka nupui chu rum zeta rawn melh rawm rawm pahin,

‘’  Amah kha zawt ve tawh mai rawh. Laktlak loh lutuk em mai. Hetiang reng chu ka peih ve lo’’ ti leh hlawk hlawkin min kalsan ta daih. Chuveleh kan nu chu chiang zeta melh chung hian thil thleng te pawh chu ka han zawt nghal a, ani erawh alo la insut faih faih reng mai. 

‘’ Ih, chhunah khan thildang tiin ka buai deuh hlek a, chutihlai chuan Urini pawh hi eng em em ti lo in inchhung dungah a teikual ve deuh reng tho. Mahse, chawhnu dar 2 velah khan a thawmhnaw pakhat kha min rawn pek pahin lo nawhsak ve lawk tur chuan min rawn ti nghal a, hetih lai hian thawmhnaw dang pawh ka nawh mek avangin ka lo hnial lemlo bawk. Tichuan, a kawr ka nawh lai tak chuan ka nu call kha ka dawng ta thut si a, choka lama chhuah phei pahin phone pawh chu ka hmang nghe nghe. Mahse, ka nu nen kan inbiak zawh hnu a rooma ka va luh leh chuan ka thawmhnaw nawh lai kha kang khu rum rumin alo awm a, istiri pawh alo in on vek nghe nghe. Ka chhuahsan dawn khan plug ka off vek a, istiri nise ka dah hla hle bawk si mak hi ka ti ve em a ni. URini lah chuan ka tih luih vekah ngaiin min mawh chhiat char char a, tawngkam na tinrengin in hau bawk a, ka tuar zo lo lek lek a ni e’’ tih pahin a mittui tla te chu a hru pah leh mawlh mawlh thin a. mak chu ka ti ve ta phian.

‘’ Chokaa I awm lai chuan tuemaw tak chu room-ah an lut tihna a nimai. Fimkhur ang che’’ ti leh te te in sofa chunga thu mek ka unaupa chu ka han din hnaih leh zat phawt a,

‘’ Nangni pawh kum upa zawk in nih angin nau zawk te en dan tawk thiam ve ula, kan thiamlohna ah pawh tha te tea min zilh hau thin tu tur zawk in nih kha hrereng rawh u. Tin, ka duh aiin I nupui hian kan  nu hi alo bei na leh mah mah thin’’ ti charh charhin Hmingtei chu ka kai lawk a, roomah ka luhpui zui ta daih. 

‘’ Tap duh tawh suh, thiamlohna I neilo a nia aw. URini mizia chu kan hriat ve vek tawh kha. Theihnghilh tum daih rawh’’  ti sar sarin a mittui te chu ka han hruk hulsak a, ani erawh chu a rawn thaw zui deuh halh mai. 

‘’ Hetiang reng chuan nakin lawkah buaina lian zawk pawh kan la hmachhawn lo ang tih pawh a hriat tawh loh. Kei chu ka hne ngawih ngawih tawh a ni’’ ti ve in, a darah chuan ka lo chulsak hliau hliau reng a, a lu chu ka darah nghah tirin zawi sup hian

‘’Nau kan han nei a nga, naute hmel an hmuh chuan an danglam ve vek lo ang tih pawh a sawi theih hleinem. Tuar hram hram phawt ang aw’’ ka lo ti ve leh ringawt. Keipawh hian chutiang thil chu a rawn inherchhuak kher a ngem ka hre bik lo, beiseina nen ka nghak mai zawk a ni.

Nau hrin hun a lo thleng a. ka nupui nau vei na tuar chu damdawiinah kalpuiin engkimah ka nu leh pa ten min buaipui em em reng a, in hranga kan unaute ho pawhin min rawn ngaihven ve liam liam hlawm bawk. Chutihlaiin ka chenpui leh ka unau neihchhun te nupa erawh chuan chhete mahin min ngaihsakna an rawn tilang ve ta hauh lova, nau kan neih hnuah pawh naute hmel hmu tur takngial pawh khan damdawiinah an rawn inlan ve bawk hek lo. A ruk takin ka nupui rilru pawh chu a nuam lova, hrehawm a ti ve in a na hle tih pawh ka hria. Chumi let thawk chuan kei hi ka na a, ka zak bawk. Thiantha rawn kal te rneg rengin an ni nupa awmna chin chu min zawh chang pawhin an damsam loh thu ka lo hrilh a, ka tuam mawi zel ringaawt a nih kha. 

Naute leh a nu in that lohna dangte an neih lem loh avang chuan damdawiin pawh ni khat liam leh hnuah kan chhuahsan ve leh mai a, inchhung kan luh rualte chuan thinrimna hlir hian ka khat tawh nghe nghe bawk nen, ka ute nup mawlh chu chhuahchhalh nghal buan buan mai kha ka duh tawh hial a, mahse, ka nupui zawkin chetzia hmanga min lo dan beh ve reng avang khan ka insiamtha a, ka insum leh thei ta chauh zawk a ni ber. 

An ni nupa pawhin naute hmel te chu rawn en ve in, hlim hmel chu an han pu ve bawk a, an chhungrilah erawh an lawm lo in, thup an nei tih ka hmu tlang vek thung si. Chu chu a dik tih fiah nan nau kan neih atanga ni 2 pawh liam loah chhungkua chu thukhawmin , kan u te chuan thu maksak tak hi an rawn sawi chhuak ta reng a nih kha. Ka u chuan uluk taka ka nu leh pa te melh vang vang chung hian

‘’ In hriat angin kei hi fa u zawk ka ni bawk a, nakin lawka in hrang chang tur tho tho ka nih avangin hetia nghah khaw tlai reng mai hi a țul tawh pawhin ka hre lova, chubakah, tunah chuan hei ka nau pawhin fa hmel te hial a han hmu ve ta bawk nen, inchhungaj pawh kan la hnawk tham chho vat dawn a, chuvangin a tlai tak tak hmaa chhuah mai kha kan lo rilruk deuh a, hetiang chungchang kan sawi vang hian Hmingtei te pawhin nuam lo tih nan hman phah lo ula, in hrang chang tur tho tho kan ni ka tih tawh kha. Chuvangin, ka nu, pa, in ngaih dan te pawh han sawi ve ula ka ti a ni’’ a rawn ti ta nge nge nih chu.kei leh ka nupui chu ngawi reng hian kan lo inmelh ve deuh ralh. Kan nu chuan hrehawm a tiin amah vangah a ngai ang tih pawh ka ring. Mahse, kei chu ka lawm daih zawk. A sawi ang tak tak khan helai hmuna khawsa ve reng tur hi a ni chuang lova, mizo kan nih angin mizo dan ah chuan upa ber hian in hrang chu an chang thin miau a tin ni. 

Ka nu leh pa te pawhin ui rilru viau mahse  a nupui nungchang an hriat vek tawh avangin an hnial lui duh ta bik lova, tichuan, chu thu a sawi tuk maiah chuan thu leh pawh awm lo in an ni nupa pawhin min chhuahsan ve ta nge nge a ni. 

An nupaa an awm hran hnu hi chuan thawm riva pawh rawn nei lo in an reh zui deuh tlawk tlawk a, naute hmel rawn en chu sawi loh, kan nu leh pa kum upa tawh takte rawn ngaihsakna pawh chu chhete mahin an nei hek lo bawk. Mak hi chu ka ti ve thin a ni. Fapa upa zawk a nih angin a nupuiin keini hi min ngaihtuahna nei lo pawhnise ani tal hi chuan thawm a rawn neih ve te pawh ka lo ring rilru ve thin kha a nia. Chu zawng, suangtuahna ramah bak kan hmuh phak loh tur leh vana rah ang mai a ni e. Heti em ema URinpuiin a rilru alo tih khawlohsak thei hi a mak ka ti zawk. Mak ka ti tulh tulh.

Tibuai tu dang nei ta lo chu kan nupa pawh kan hlimin nau nise alo leikang ve țan tawh bawk a, tunah chuan chhungkua tihlim a khawhar hnemtu ber a ni ve ta bawk. Kan hlimpui lutuk. A pi leh pu te hian an tleipuiin, duh loh nei mang bawk silo a, a nu tan tak pawh hahdamna hun a awm ve theiin, thildang tih nan a hun te chu a hman theih phah ta hlauh zawk a, a tihzia lehzel tak tak a ni e. 

Ka thawhna dawr lamah pawh a ni telin kan buai chho ve tial tial a, chung hunah chuan thawk tu indaih loh a nat thin em avangin leh, kan huang kan zauh ve zel bawk nen chuan thawk tu lakbelh pawh kan rel leh ta nge nge a. Rawn thawk duh thlalai tamtak te chuan lehkha pawimawh te kengin interview tenau an rawn hmachhawn bawk a, chung zawng zawng lo buaipui chu ka kut vek a nih angin a chauh thlak ve duh thin khawp mai. Chung thalai rual hna zawnga rawn kal te zingah chuan pahnih chauh lak belh tum kha kan nih angin hmeichhe tleirawl la naupan hmel em em , hmeltha ving veng tak leh mawng zang bawk si chu hmeichhe lamah chuan kan lak belh a, mipa ah pawh sa tha ve pangngai tak pakhat chu kan la ve bawk.

Hna a kan lak luh ni atang hian rawn thawk dun ve nghalin, rinai takin an tlangnel hma a, an hna tur ber paw chu an tih mi hmel phian bawk. A bikin a hmeichhia zawk chuan kei chu min ngaina nghal em em thei mai a, thil ho mai maiah pawh min ko peihin zawhna hi min zawt reng a tih theih awm e. amah kha a ngainatawm a, a hmel hmuh a nuamin nui hmel te hi a pu reng mai bawk si nen, keipawn karlovah ka ngaina ve ta thuai reng a ni.

‘’ Boss, nupui te hi I nei tawh em?’’ ti seuh seuhin, ka hnathawhna bulah a rawn tawlh hret hret reng a, ka lo nuih ve suk. Chutah, lu buk khum nghat nghat pah hian

‘’ Um, nei ve tawh e. fa pawh pakhat chu kan nei tawh’’ lo tiin, ani pawh chu alo nui ve sen sen reng. 

‘’ Ka chhungte bulah hian ka sawi ve thin che a, I fel zia te pawh hi ka hrilh nasa thei lutuk’’ a rawn tih leh chuan nui var var chung hian amah chu ka lo en a, a mitmeng fiah angreng zet khan ani pawh chuan min lo en kal reng bawk. 

‘’ Ngah nge I chhungte chu dawt hlir ilo hrilh a’’ ka han tih chuan a rawn nui chhuak ve ta hak mai a.

‘’ Dawt a ni hleinem. I fel tak tak alawm. Chuan, I nupui leh in fapa pawh chu la hmuh ve tur a ni. Nang ang tho hian an felin an hmel pawh a tha ang ka ring’’ a rawn tih chuan tlemin ka lo meng nur ve deuh hlek a, hmeltha tih lai tak kha ka rin aiin a rawn sawi huai deuh tlat ka ti a ni.

Ka hna bang inchhung ka luh rual rualin ka fapa ka neihchhun em em kum 1 lai lo tling ve ta chuan min ngai hle a ni tih hriat tak hian min rawn pan nghal nal nal mai a, a nu pawh nui var var chung hian choka lam atang chuan a rawn chhuak ve nghal zat bawk.

‘’ Vawiin chu URinpuii te nupa in Bawihtea hi thawmhnaw thar an rawn pe ve a. An leng deuh reng bawk’’ ka nupuiin a rawn tih chuan zawi sup leh hmel hlim pawh pu chuang lo in,

‘’ An va tilawm awm ve’’ ka lo ti ringawt a. Bawihtea chu thawhsanin room lamah inthlak turin ka luhsan nghal daih bawk. Eng pawh rawn tiin, an hmel te pawh rawn inlan ve mahse, min tilawm zo tawh tak tak chuang lo. A nihna takah chuan unau pahnih zinga a upa zawk a nih ang hian upa zawk nih a awm dan tur pakhatmahin a awm ngai lova, a tlangval lai kha chu engpawh lo nise, hetia nupui a han neih tak chinah hian a zia a danglam nasa in a nupui thuhnuaiah a kun nghet tlat tawh a, keini a thisen zawm a chhungte hi chu min thlauhthlak pawh hreh lo khawpin a nung ta tlat mai a ni. Heng zawng zawng ka ngaihtuah hi chuan hmeichhe thu dawn taka thil ngaihtuah loh theih loh chin hi a awm ve ta thin a, a lakah pawh hian rilru tha put reng hi a harsat chin a awm ve thin a ni. 

Ngaihtuhna mumal pawh nei mang lova ka inthlak mawlh mawlh lai chuan message ka dawng tih inhria in rang fe hian ka phone chu ka han ban nghal vut bawk a. um, hnathawk tura kan lak thar kha hmeichhe tleirawl Ruatsangi ngei mai kha a lo ni leh e.

‘’ Boss, I haw thleng ve tawh em?’’ tih hi min lo thawn in, ka nau te ho hian boss tiin min ko ve mai thin a ni. Ka thlen tawh thu a reply ve vatin phone ka dah a, inbual turin bathroom ka pan nghal bawk.

Bathroom ka chhuahsan hnua phone ka han en leh chuan Ruatsangi min chhanna bawk kha hmuh tur lo awm leh tawhin ka thaw zui hak. A thil sawi duhzawng a pawimawh lo thei bawk si nen, ka ning ve lek lek a ni. Chubakah, hnathawhna lama kan inhmuh nilen tawh hi chuan in lam lehzela min umzui hi ka duh vak thin lo. Ka hah te hi an tizual ni mai hian ka hria.

Chutiang chuan ka reply peih chhung chu min rawn chhan ve peih zel avangin hun awl hnawh khah nan ka lo be sawm kual vel ta mai mai bawk a, sawitur hre em em bik lo mahse ka chhan let ngei ngei theihna tura min biak vel chu a thiam riau lehnghal a, tum loh deuh in ka nupui muthilh hnu zanlai dar 12 thleng rawk mai chuan whatsaap atang kan inbe ta a nih kha.

A tuk hnathawhnaah pawh ka hmel a hmuh ruala min lo be leh hmasa ber tu chu amah tho kha niin, ka nuih suk ringawt. 

Kudam lam en fiah tura ka lo in ruahman laiin ani chu kan nau pakhatin a rawn koh tak hlauh vangin min kalsan ve thei ta hram a, ka thaw zui huai thei. Mahse, kudam chhunga ka va luh ve nak chuan amah Ruatsangi tho kha lo awm lehin a kawr hak lai thawl tha tak dar lehlam zawk chu lo hlimthla vekin a taksa pawh chhete chu a hmuh tel theih bawk a, ka ding zui chawt thei.

‘’ Eng thil nge itih a’’ tiril khur dar dar chunga ka han tih chhuah tak supah chuan amah chu phu ve zukin a rawn hawi phei a, ka hmel a rawn hmuh takah chuan insiamtha nghal sawk sawkin a kawr pawh chu a ha tha ve leh mai bawk a

‘’ Ah, engmah engmah ih ka dar lehlam zawk hi a rawn na leh zuk zuk thin a’’ ti niah niahin a hma lawka parcel ho chu mumallo deuh hian ava khawih ta bawrh bawrh ringawt mai. Kei thung chu tih danglamin ka awm ka ti mai. Amah hnaih chakna chuan ka khat ta tlat mai a ni. Hei tak hi mipate kan danglam bikna a tihtheih awm e. 

‘’ Khawi lai tak hi nge na a?’’ tih pahin amah hnaih tak chuan a hnung lawkah ka va ding ta chat. Chuveleh ani chu rawn lehhawiin phawk zet mai hian min rawn melh ve ta reng bawk a. Reivaklo chhung kha chu min rawn melh ve ta reng bawk. Chutah, nichina alo alo tih lan tawh ngei mai a dar lehlam zawk bawk kha han kawh leh zauh pahin,

‘’ Helai hi nia. Vwiin chu a rawn na zawk zawk reng mai’’ a rawn tih chuan, chutiang khatiang chuan lo ti rawh tih pawh ngai miah lo in a kawr bawk kha a taksa lang tam thei tur ang ber chuan a han hlip nawn leh ta sauh sauh bawk a. kei chuan

‘’ Ka lo hmehsak ang che’’ tih pahin dimte hian a dar bawr vel chu ka hmehsak nghal neuh neuh bawk a, nuam tih hmel em em hian alo chhing ve diar diar mai nia. Chu chu ka hmuhin awmngaihna ak pawh ka hre leh tawh lova, ka insumtheihna neihchhun te hi ka hloh thei mai dawn in ka hre ta tlat. Ava han hrehawm tak. Ka chakna sosan lutuk vanga ka thawk rik suk suk lai chuan kan awmna lam pana rawn kal thawm hria in ka chesawn vat a, Ruatsangi pawh chu rang takin alo insiamtha ve nghal zung zung. Midangin min rawn chim buai takah chuan inthen hrang nghal vatin ka kalsan ve mai a, rinhlelh theih tura kan awm lai chu min rawn hmu hman ta lo hlauh a nih kha.

Hemi hnu atang hian Ruatsangi ka melh dan leh a laka ka rilru put dan chu felhlel in a dik thei ta chiah lo mai a, ka duh ta mai emni tih chu hre lo mah ila, ka vei hle tih erawh k hria. Nilengin ka rilruah a awm zui tlat a, a taksa nalh leh a vun nung sarh te kha ka mitthlaah hmu zuiin ka lo ngaihtuah chhunzawm leh ngut ngut thin. Chung chu duh loa inthinharh nawk nawk chang te pawh kha ka  nei ta awm e.

Inah ka haw a, ka nupuiin tha tak taka min lo dawnsawn lai te pawh khan ka rilru lehlamah erawh chuan Ruatsangi ringawt a awm ve thung a, he thinlung ngaihtuahna tenawm lutuk hi engtin nge ka tih reh theih ang ka hrelo . Ka duh dan lah a ni bik bawk hek lo. Chutih tawh nak alaiin a tih thin dan ang bawk khan Ruatsangi chuan min rawn text leh ta a, a message ka hmuh rual te khan kei mi bawlhhlawh hi hlim vangin ka nui chhuak ta vur vur mai a nih chu mawle!

Sawitur pawimawh pawh awm chuang hauh lo in zanrei tak tak thleng chuan kan inbe ta fo mai a, a chang phei chuan ka phone en nasa lutuk kha ka nupui min biakna te pawh hre lo khawpin ka lo ngawi leh veng veng thin mai a, ka nupui hi mi dawntawi leh thinram tak chu ni thin sela chuan nupa kan inhau buai fo pawhin ka ring e.

‘’ Boss, zanin tlai chu ka nu leh pa ten chaw ei ah rawn sawm la an ti che a. min hnial lo hram rawh aw’’ tih paha min hnaih surh surh chung hian mawi zetin min han nuih pah sen sen reng bawk a. kan inkarah hian eng thil lian tham mah chu la thleng chuang lo mahse nitin zantina inbe ta chu a ruka inngainat tawnna engemaw tak alo awm lo thei tawh lova, chuvang chuan min nel thar leh ta deuh nimaiah ka ngai bawk. Tichuan, a mi sawmna angin chumi tlai pawh chuan an inah zanriah chu ka va ei ve ta ngei mai a, a nu leh pa te pawh kha an felin an hmel hmuh alo nuam angreng phian mai a, ka vawikhat hmuhna chauh mahnise ka ngaina nghal em em thei tlat. Chumi zan chuan rei pawh leng zui lo in ka haw ve leh mai a, Ruatsangi nen pawh chuan inbe chhunzawm tawh hran lo in chumi zan chu kan tlingtla ve ta țhak a nih ber kha. 

Mahse, hemi tuk atang hian a hma ai mah khan Ruatsangi nen chuan kan inhnaih ta tial tial mai a, hlat ka tum nasat poh leh ani chu a rawn hnai thin nimai hian ka hria a, thawk dun leh nitin lo inhmu thin ta na na na chu hun kan ngah dunin amah duh a atchilh nan chuan hun tam ka mamawh lo kher bawk nen, a tawpah phei chuan hun tha rawn inherchhuakin kan chesual dun ta nge nge bawk a nih kha. Hemi zan hian ka nupui hnenah dawt hrilhin, hna ban rual rual chuan ka thianpa, mahni chauha khawsa hnenah Ruatsangi chu ka hruai kawia, ka thiana pawh chuan ka thiltih chu min duhpui viau lo mahse mipa leh mipa hi chuan thil tamtakah inhriatthiam tawnna kan lo nei thin ve bawk a, chu zanah pawh chuan a,  thianglimna parmawi chu ka thliahsak ta nge nge a ni e kan ti thei ang. Mipa bula a awm dan ngaihtuah a alo la thianghlim tlat mai chu mak ka tiin, ka lawm a, ka awih thei lo hial bawk. Mak lehzual deuhin heta țang hian amah ka duha ka thlakhlelhna chu a zual ta tlat lehnghal a, tun dinhmunah chuan ka nupui ka thlakhlelh ai mahin Ruatsangi hmel hmuh a a kianga awm chakna chauh chu ka ngah ta zawk tlat. Heng hi ka duhthlan leh duh dan ni bik chiah lo mahse ka duh dan hlirin ka khawsa tho bawk si a, dem tur dang an awm thei hek lovang. He ka taksa leh thinlung uire hmang chauh lo hi chu dem tur dang ka hre lo. Ka va han tenawm tehreng em.

‘’ Thiana, tunlai chu I rawn haw tlai thei angreng sia, dawrah chuan in buai zual deuh nge, Bawihtea hi tlai atang khan a khua a rawn sik ve ringawt mai a. Naktuk chu kan pahnihin damdawiinah kan han kalpui tawp mai dawn emni ka ti. A hetih tur vang pawh hi a ni maithei, nimin tlai atang tawh khan a tlei tha duh lo reng reng bawk a’’  mut hmuna ka nupuiin a rawn tih chuan ka fapa chu a damsan lo tih ka hre ve chiah.

‘’ Damdawi I eitir em’’ ka han tih chuan  a lu chu lo bu ve nghatin, min thlakhlelh hmel em em hian min lo en pah vang vang bawk. A mitah pawh chuan ka melh tha ngam chiah lo tawh lo thung. Inthiam loh rukna hi ka nei lian tawh em a, hlauhthawnna hlirin ka khat bawk a ni. 

‘’ Um, engpawhinise, keini hi hna han thulh ve mai mai thiang kan ni lova, naktukah chuan I nau kha lo call phawt mai la, han inkalpuitir mai ta che’’ ti ve in, a ruk tak chuan ka inthiamlo ve rneg. Mahse, ni khat chauh pawh Ruatsangi hmel hmu lo leh a rim hre pha lova awm kha ka thei tawh lo zawk a mahna. Ka tenawm asin. 

A tukah chuan ka hrilh tawh ang ngeiin kan nu pawhin a cousin Mate-I chu ava sawm ta a. ka tello in damdawiinah pawh chuan an inkalpui ta nge nge a nih kha. Kei erawh chuan hna lamah rilru dang pawh pu buai tawh lo in ka kalsan ve nal nal thung.

Dawr ka thlen lai hian Ruatsangi pawh kha alo thleng fel ve leh daih tawh a, ka hmel a rawn hmuh rual rualin nidang ang tho khan hmel hlim chu min rawn hmuh leh thei nghal. 

‘’ Boss, ilo va thleng har em em’’ tih paha min rawn nek deuh talh talh lai te chuan kei chu ka lo thaw leh deuh hak thin a, nia, he nu hi ka mamawh a, ka engkim hi a zunzam hian min phuar a zo tawhin an ngai em em reng bawk a, a tello chuan hun reilote chauh pawh hi ka tlei hleithei tawh lo chu a ni ber e. hetih lai hian ka rilruah chuan ka nupui leh ka fapa damlo mek te khan chhete mahin hmun hi an chang tawh lo a ni ber e.

Chutihrualin, ka ngaihtuahna fim neihchhun chhete hi chuan Ruatsangi nena kan inkar hi midang hriat ve erawh a hlau em em thung a, thup bo char char pawh a duh zawk thung tlat si. A nih chuan heng thil te hi hmangaihna ni lo in in it tawnna lek an ni tih a chiang hle awm asin.

Chawhma chhung chu hnaah buaiin thil danglam thleng pawh a awm hran lem lova, mahse, chawhnu rawn herah erawh chuan kan nu hnen atanga call dawngin kan fapa khawsik chu a zia hleihtheih loh thu leh, zual lam a pan zel thu te pawh a rawn sawi ta mai a, thinphu dup dupin ka lo ngaithla ve kar a nih kha.

‘’ Dawr kha kalsan la, damdawiinah rawn chho nghal rawh’’ min tih avang chuan phone kan dah a, ka inruahman nghal zung zung. Ka nau te ho bulah pawh ka thil tihtur chu sawi nghalin an ni pawhin min lo hrethiam tlang hle a, mahse, dawr ka chhuahsan dawn tep tih ah Ruatsangi chuan min lo pawt dingin, khawngaihthla la zet hian min han en ta kiau mai a, ka hrethiam lo angreng hle.

‘’ Ka lo kal ve dawn!’’ rawn ti ringawtin, kei chu ka lo ner deuh sawk.

‘’ Eng nge I rawn tih ve ang. A țullo’’ ka tih chuan min han hmer leh deuh salh phawt a. 

‘’ Mawh, in nu leh I fapa pawh chu ka hmu ve duh alawm’’ tih pahin nghet zet hian min vuan a, a kut chu ka lo phihsak deuh sawk mai. Mahse, chuti chung pawh chuan min zui chhuak a, ka hnungah a rawn kal lui ve zel tho. Inbe lo chuan kan kal dun mawp mawp reng a, ani pawh chuan min rawn be nawn bik tawh chuang miahlo in ka hnungah min la zui ve zel a, huaisen ka ti mai mai reuh mange. 

Damdawiin kan thlen hnuah pawh min zui lut zelin, ngawi reng hian ka nupui leh ka fapa awmna lamah kan kal nghal a. kan va thlen chuan an ni chu cabin pakhatah lo awm der tawhin, kan nu in ka hmel a rawn hmuh rual chuan min rawn pan nghal vat a, a lan dan atang ringawt pawh khan a mangan zia chu a hmuh theih awm e.

‘’ Min admit a, a zunkawng vang a nih an ring. A zunkawngah hian hnai alo awm a, thildang pawh an sawi tel nual mai’’  ti ser serin natna khuma mu mek ka fapa chu ka va melh deuh zawk a, chau tih hriat taka hmel pawr fap mai pu chung chuan tui takin alo muhil sek sek thung. Chutihlaiin kan nu bawk chuan ka hnung lawka ding Ruatsangi chu va melh pah zeuh chung hian

‘’  hei tu nge ni’’ ti hul hakin keipawh ka harh chhuak leh chiah. Ruatsangi lam hawia inher zuk pah chuan

‘’ A, dawr lama kan nula kawl awmchhun a nih hi. Tangkaina ka neih tak mialin a tia min rawn zui ve a nih hi’’ lo ti ve maiin an ni pahnih chu an inchibai zui mai a, kan nu pawh chuan vanneihthlak tak hian a hmel hlim chu a lanchhuhah tir ve tak kha.

Ka fapa bula thut thlak pahin a kut tereuh te dai diak mai te chu ka han hum lum sak vang vang phawt a, ka bul lawkah chuan Ruatsangi pawh kha ngawi rnegin a rawn thu ve bawk a. ka fapa hmel te chu lainat hmel em em hian a en leh vang vang thin bawk. He nu hi a rilru chu a chhelo ang tih ka hria, mahse ti nge mi pasal ka ni tih a hrereng chung pawha min la duh tlat mai hi le ka ti ka hrethiam theilo a ni e. kei hi min lo hmangaih tawh tihna emni ang. Chutiang chu thleng lo hram se ka duh rualin keipawh hian thlah hlen chu harsa ka ti dawn tih ka inhriaa, awm dan tur ber pawh hi ka hrethiam tawh lo e a. 

Damdawiinah chuan rei pawh awm lo in kei leh Ruatsangi chu dawr lamah bawk kan let leh ta a. ka fapa pawh a natna khan la thlah chuang hauh lo mahse doctor te khan nachhawkna chak chi hmanga an jection tawh avangin tlem chuan a ziaawm hret a nimai a, a muhil deuh reng bawk si nen han tihtur em em kha  a awm rih lo em a tin ni. Tin, damdawiin kan awm chhung zawng khan ka nupui leh Ruatsangi te kha thian inngaina tak ang maiin an inkawm thei nghal mai a, sawitur an hre dun in ka nupui tak pawh khan min rinhlelhna awm miah lo in alo be bawrh bawrh thei a nih kha.

Ka fapa damdawiin awm chhung zawng chuan chhun lamah reilote tal ka han awmpui ve thin a, chung hunah chuan Ruatsangi khan min rawn zui ve zelin a țulna apiangah tangkai taka awm chu alo tum ve bawk. Zan lamah erawh mipa riahpui an remtih loh miau avangin kan nu cousin Mate-I tho khan tlawmngaih chhuahin kan nu chu a riahpui leh mai a, a pui nasa bawk nen a chungah hian kan lawm takmeuh meuh a ni.

Zan khat erawh chu ka nupui fanaute hmel hmuh tur awm lo bawk nen, ka khawhar lungleng chuan Ruatsangi chu lenchhuahpuiah ka va sawm ta ringawt a, mahse, mahni chauha a awm thu leh a chhungte anzinbo thu alo sawi tak avang chuan a remchang phian e tiin an inah chuan ka va lenchilh ta ngawt. An in ka luh rual rual chuan uiin a neitute alo lawm ang deuh hian min lo bawh leh hiam hiam tawh a. keipawhin ka thlakhlelh ve tawh em avang chuan ka fawp nghal ngawih ngawih bawk. Hemi zan hian rin loh taka beer stock sa a lo neih nual avangin, a chhungte an zinbo daih bawk avangin zalen leh tu mitmei mah veng lo chuan kan inchen dun leh ta a nih kha. Kan beer in rui nen pawisak chu kan nei lo lehzual a, nuam kan tiin tudangmah hi kan ngai lo reng reng.

Tichuan, lu na bur chung hian ka tho chhuak a. khua alo var iarh tawh tih pawh ka hre chiah. Ka bula tui taka muhil mek Ruatsangi chu tih harh hlau siin ka inha tha mawlh mawlh mai a, chumi hnuah ka phone chu check lehin, ka nupui min lo call na pawh ka hmu ta bawk. Chek hlak chung leh pawiti zet hian ka tho zui sawk sawk a, Ruatsangi pawh kaitho ta lo chuan damdawiin lam pan turin ka dawk chhuak vang vang. 

Damdawiin ka thleng a, rin loh tak hian ka chhungte ho hmel chu hmuh tur an lo awm kim vek mai. Chutah, ka hmel a rawn hmuh rualin kan nu chuan mittui tla phung chung hian min rawn en vat a, kei chu inkiltawih leh inthiamlo zetin cabin kawngkhar bulah chuan ka lo ding ngawi ve reng ringawt.

‘’ Laktlak loh pa, khaw nge nizanah I riah bo. Sawi rawh. Kei hi min ngaihtuahna chhete mah inei lo a nih pahwin I fapa tal saw chu ngaihsak ve ta che. Nizan khan a thaw chiah an en hman a, doctor te pawh an beidawng hman hial asin. Mahse, nachhawkna hmanga an jection leh avang chauh khan tlemin a ziaawm leh ta chauh a nih saw. Ka rilru hi a hah lutuk’’ tap zawih zawih chunga a tih chuan rilru na leh thinlung rum vawng vawng chungin amah chu ka lo kuah ve vat a, chutah, chiang fea min rawn en chho chung hian

‘’i rim chu! Nizanah rilru hah mangang em em a kan awm laiin nang hi ilo rui vel a maw!? Ka ten lutuk che. Tu nen nge hun inhman dun sawi rawh. Zu rim chauh I nam lo’’ midang hriat ve hlau taka a rawn tih leh sar sar lai chuan keiin zam ru tak chungin amah chu ka lo melh ve ran ran thung . Sawitur hi ka hre thlawt lo. Zan hmasaa ka thiltih ah khan thiamna chhetemah ka nei lo tih ka hria a, ka inthiamlo vel mek bawk. Mahse, chu chuan awmzia nei tawh lo in hun hian a her liampui vek tawh a, insawifiah tumin awmzia lah a nei tawh chuang bawk hek lo. A hrehawm duh angreng khawp mai. 

‘’ Ka tihpalh’’ ti supin, ani chuan rang zet hian min rawn chhang let ve nghal a. 

‘’ Tihpalh tih khan I fapa nunna chu a pawhsei phah dawn emni? Thlamuanpuiawm pa ni tur hian bei ve la, tun hmaa kan thurualpui thin leh kan innghahna pa ber kha rawn ni leh rawh khawngaihin’’ midang hriat ve hlau tak chung bawkin a mittui nen chuan a rawn tichhuak leh ta a. ka inthia, lo ta tulh tulh.

‘’ khawngaihin min hriatthiam tum rawh. Nizan kha chu ka khua a har ve em a, ka lo tisual palh a ni. Ka rui hle tih loh kha chu thildang a awm miah lo tih hi min hriatsak rawh aw’’ dawt hlang hlak chu ka sawi leh ta ringawt mai. Chumi chin chu eng thumah sawi tawh lo in kan kal hrang a, keipawh ka fapa muhil bem mai bulah chuan va thu ve in, tihtheih hi ka va han nei tlem tak em. A kut tereuhte vuan chunga a muhil lai hmel thlir vawng vawng mai loh chu tihtheih dang hi ka nei lo a ni. Pa laktlak loh tak chu ka ni ve chiang alawm. Hetihlaia kan nu mitmeng hi hai theih a ni mawlh lova, ka chhungte dang ho an awm ve avang zawk chuan ala insum hram hram ni berin ka hre chauh. Nia, zan hmasa khan zu ka ruih vang ringawta biak theih loh ngawr ngawr ka nih kha a ring dawn hauh lo tlat a tin ni. Ka thu mai mai te chu mitmeng dul ruih chung hian min rawn melh leh ralh ralh thin a, kei chuan melh pawh ka lo melh tha ngam ve lo thung. Chutia ka fapa kut vuana ka lo thut ngawih vang vang lai chuan ka phone chu rawn riin, min tiphu deuh zawk lehnghal a, kan nu pawh khan chiang em em hian min lo la en ve reng bawk. Chutah, phone ka han en nak chuan Ruatsangi alo la ni zui bawk nen, ka off nghal daih chuan ka nupui khan min la melh reng tih ka hre ve bawk si a, a rinhlelh chu hlau in pawnah ka chhuahpui ta vat zawka, call pawh chu ka la ve ta nge nge a ni e.

‘’ Ilo chhuak bo daih a. min kaih thawh ve tur che nia’’ mut chhuak aw chambang chunga a rawn tih chuan keiin ka aw ka lo thian ve kharh thung.

‘’ Ti nge min lo call a. hei ka fapa a zual deuh an tia damdawiinah ka awm daih alawm. Ka rawn biak loh che chuan min rawn be thin suh. Ka dah dawn’’ zawi angreng taka ka tih sur sur laiin ani chuan pawi tih hmel deuh hian

‘’ Ehe! Ka lo kal ve ang aw. Chuan, I sana I theihnghilh pawh hi ka rawn keng nghal ang’’ a ti leh ta zung zung mai. 

‘’ A țullo. Rawn kal a ngai lo. Nakinah kha chu ka rawn la ve mai ang. Rawn kal reng reng suh’’ lo ti let thuaiin, ani pawh chuan min hnial lui duh t bik lem lova, ka thaw zui hawk. Tichuan, phone chu dahin cabin lama let leh tuma ka inher lai tak hian ka hnung maiah kan nu kha ngawi rengin alo ding tih ka han hmu ta thut mai a! Ka mit sulh theiin ka inhria. Rum zeta min lo melh vang vang chung hian ka lam pan chuan a rawn kal hnaia, chutah,

‘’ Khawnge I sana?’’ chang fakin a rawn ti zui zat. Ka bing mup mup thei tawh hial mai.

‘’ A,, nizan khan ka zu inpui ka thianpa te inah ka theihnghilh a, kha tunah min rawn hrilh zawh chiah kha’’

‘’ I thianpa a nih tak tak chuan hetah rawn kalin a rawn pe em em ang che. Dawt min hrilh hi tum miah suh. Hei leh chen hi ka pasal ilo nih tawh angin ka hrechiang che a, ka lakah hian thup leh zep then I neih pawhin ka hre leh vek zel. Tunah hian ngaihzawng I nei tiraw?’’ a rawn tih thut takah chuan ka ding khawng nghal vek thei.

‘’ Chutiang thil chu sawi hun pwh niin ka hre chiah lo, lut leh phawt ang’’ ka han tih chuan ala ding khawng tlat reng thung a, a chesawn duh der lo.

‘’ Tah hian lo awm rawh. I rawn luh ve hi a țul tawh lo ang. Bialnu I nei a, tu nge tih chu hre chiah lo mah ila inei tih ka hria, chuvang chuan nang leh kei hi kan inkawp reng a țul tawhin ka hre lo. Tikhan a tawp. Hetah pawh hian rawn kal nawn tawh suh ang che. Sawitur a awm tawh lo. A tawk’’ ti nawk nawkin cabin lamah min letsan a, chet ngaihna tak pawh ka hre ta lo hle. Chutiang zelin sawitur nise ka hre tawh bawk hek lo. Ngawi reng hian ka nupui kal liam tur chu ka thlir zui ta vang vang ringawt mai a ni. 

Cabin chhungah khan ka nu leh pa te an la awm ve bawk avangin thil tihbuai chiam chu ka duh ta lova, dawrah pawh kal kawi tawh lo hian in lamah ka haw tlang ta ringawt. In chhung ka luh ruala boruak lo dai huk te leh ka nupui fanaute hmel hmuh tur lo awm ta lo ringawt mai te chuan min ti chau in mal ngawih ngawiha inhriatna min neih tir zo a, kun tlawk tlawk chungin sofa chungah chuan ka han thu zui deuh hnawk bawk a, ka nupui nena inthen hlen tur anga ka han suangtuah kual phei chuan ka tihtheih ring lo in ka thaw zui halh halh thei. Ani hi ka hmangaih a, ani lo hi chu hmangaih dang reng reng ka nei leh thei pawhin ka inring lo. A nih chuan engtin nge kei hian ka thlah hlen phal tehlul ang le. Mahse, tlai alo ni a, ka nu leh pa te damdawiin kal lo haw chuan thu lawmawm loh bawk chu min rawn hawnsak leh ta. Min thutchilh sauh sauh pah hian ka nu zawk chuan zaidam takin

‘’ Mama, in nu chu ngaihzawng ilo neihsan reng emni? Tap chungin engkim a rawn sawi vek a, inthen rih phawt a duh a nih hmel kha!’’ a rawn tih chuan ka nu chu melh pawh ka melh tha ngam tawh lo. Ka thaw ipik lutuk insumthei lo chuan tah chhuah hawk pah hian,

‘’ Ka tihpalh a ni. Thlemna ka do zawh ngang loh avang khan min ngaidam lul the u. ka thiam loh liau liau a ni e’’ tiin ka hmai chu ka hup a, vawikhatna atan kei mipa inti ve tawk tak mai hi ka nu leh pa te mit hmuh ah ka tap chhuak ta hawk hawk mai a nih chu. Mahse, ka nu bawk chuan zaidam takin

‘’ A enpawhnise, Bawihtea te sw han dam chiang se la, Hmingtei pawh rilru hahdam leh fim kakin in ngaihtuah tha leh se a tha ang. Nangpawhin theihnghilh miah lo in ngaihdam dil bawk la, inthen hlen kha chu a duh bik ka ring lo. Lungngai lutuk suh aw. Tin, khatiang thil bawlhhlawh kha chu thlen nawn tir tawh lo hram ang che’’ a rawn ti leh sauh sauh mai a. kei chuan chhan ngaihna tak pawh ka lo hre tawh lo.

Chumi zan atang chuan Ruatsangi call chu ka la duh tawh lova, min textna lah ka chhang tha duh tawh bawk hek lo. A tawpah phei chuan ka nin tak em avangin a number chu ka block ta hial zawk a. A lawm lo ve khawp ang le. Chumi hnuah ka nupui chu call in ngaihdam te ka han dil luam a, mahse, ani chuan min be rei duh lo in chawlh hahdam lailawk phawt a duh thu alo sawi mai a, ka call nawn leh pawhin a reject zui hmiah hmiah. Chutiang reng reng chuan chhun ni leh zan te pawh chu hmang chho ve zelin, dawrah pawh tha tho lem lo tak chung chuan ka la kal lui ve char char thin a, hetah hian Ruatsangi khan banna rawn thehlut in kan inhmu leh ta ngai miah lo bawk a ni.

Ka fapa pawh damdawiinah ni nga zet a awm belh leh hnuin tha taka an chhuah thu chu ka nu leh pa te zarah ka lo hre ve ta hlauh mai a. amah hmuh tum chuan ka nupui Hmingtei te in lam chu rang takin ka pan nghal bawk. Mahse, an in ka va thleng a, ka fapa chu khumah lo mu in a hmel chu min hmuh tir phal mahse a nu chuan ka thil kensak ang ang te erawh chu ka pek min phalsak lo in min hawn let tir leh vek ta mai. Thinrim mai mai ngai lo kha tunah chuan na takin ka hliam tawh a, a thinlung hi ti tuiral zo leh tur chuan nasa taka ka beih ve tawh ngei a ngai dawn a nih hmel e. ka tuhrah chu ka seng chho zel a nih ber hi maw. Ka fapa hnena thilpek han pek ringawt pawh min phalsak loh chu sawi loh, ka haw dawnah khan pawn thlenga min rawn umin Hmingtei bawk chuan

‘’ Naktukah bungrua kha kan rawn la ang. Engmah kha lo khawih dnglam lo la, sawi buai nei lo in lo awm hle hle bawk ang che’’ min rawn ti leh ta hmak mai a nih chu! Rilru na em emin ka haw a, bungraw lak chungchang pawh chu ka nu leh pa te hrilh ve in zanriah pawh ei lo chuan ka chhuak zui lehnghal nulh.

Ka thianpa mahni chauha awm, a hma pawha Ruatsangi tawmpuinan a ka lo hman tawh ngei mai kha va pan lehin, vanneihthlak tak hian zu in tur alo la kawl zui bawk a, ka in zawhpui nghal vek bakah, ka la chah belh ta sauh sauh lehnghal. Ruih chhum hmawk mai leh eng thildang mah ngaihtuah lo a awm kha ka duhthusam ber an ni tak na in, no 4 zet ka in hnu pawh chuan ka rui hleithei ta der lo mai a, ka thluakah lah hian Ruatsangi ringawt a rawn lang ve chhen bawk si nen, phun nuah nuah chung khan ka lo block tawh a numbe ngei mai chu ka unblock leh phah ta nge nge a ni e. Rang taka call nghalin, ka thiana in luaha rawn kal tur chuan ka ti nghal bawk a,rin rilruk ang ngeiin ani pawh chu reiloteah a rawn lang ve ta zat bawk. Chutia kan han inhmu leh ta chu awm chintawk hre lo in kan nunhluiah bawk khan kan kir dun leh ta reng a, thildang reng reng chu ka ngaihtuahnaah ka duh tha duh tawh bawk hek lo. Hahdam ka mamawh a ni e. min kalsan duh a min hnuchhawn duh tu na na na chuan min then se, min mamawh loh miau chuan ka mamawh luih bij nachhan tur hi ka hre lo ve thlawt.

A tuka bungrua zawng zawng an rawn lak lai pawh chuan inah lo awm ve duh lo in ka thianpa inah ngar ngar khan ka la khawsa lui ve tlat a, hna nise kal chakna ka nei bwk silo nen, zu bur tam tak hi inchhawpin ka in ngat ngat ringawt mai a ni. Diktaka sawi chuan ka hmangaih em em ka nupui leh ka fapa te hmel hmuh tur awm tawh lo chuan mahni ina haw leh chakna reng reng min neih tir thei tawh lova, kan in chhung chu chhete mahin thlakhlelhna chhan tur ka nei lo bawk. Ka thianpa ngei ngei pawh chuan ka zu in nasa lutuk chu min hau eng ang mahse, eng thilmah sawi ve ka tum lo. Ka chhan let dan rorum berah pawh ka nat ve tawk thu leh, ka nun chhungril ruah zia thu chu a nimai a, chumi hnawhkhah nan chuan zu hi ka hmang ve chauh a ni e, tiin ka chhang let ve thin. 

Ka thianpa inah chuan chawlhkar khat chhung zet tawm lehin, hetih chhung zawng hian Ruatsangi pawh kha ka duh hun hunah ka ko lut ve thin bawk a, engemaw chang chuan amah zawk hi a hman hun hunah a rawn kal ve tawp mai thin bawk. 

Tuk khat ka zing tho chu tuk dang ang lo tak hian ka phone a rawn ri ve leh tlat mai. Ka han en nak chuan ka nu hnen atang a lo ni a, haw tura min rawn koh lehna mai mai tur niiin ka hre bawk nen ka la duh lo lui ngat. Zan hmasa lawkah pawh khan min rwn call a, ka la duh tawh lo bawk a nih kha. Thildang chu tihsan in phone chu ka kalsan a, mahse, reilote hnuah hnathawk tura chhuak tawh ka thianpa hnen atang zawk call bawk chu ka dawng ve leh ta.

‘’ Eng thil nge maw in hriat hlawm sup sup le aw’’ tih nuah nuah pahin call chu ka la ve ta hram a. chutah, ka thianpa chuan hlauhthawn hmel em em a thawk hlawp hlawp pahin,

‘’ Thiana, I fapa a boral an rawn ti tlat mai! Haw phei vat la hriatchian va tum the. Tunah khan inu in min rawn be zo chiah a, damdawiinah a boral a rawn ti!’’ ka phone ken lai chu ka thlauh lo chauh. Ka fapa, ka fapa neihchhun leh ka innghahna tura ka lo ruat lawk ve in min boralsan ang maw,,,

‘’ Thiana, ka thusawi kha I hre thei em’’ lehlam atanga ka thianpa bawkin a rawn tih lauh lauh pawh chu chhang tawh lo in inchhung ka tlan chhuahsan a, mittui parawl kuang chung hian taxi chu lo phar lehin, in lam pan chuan ka chuang haw ve thei ta hram e.

In chhung ka tlan luh lai hian ka nu leh pa te pawh kha buai em em in an lo phi ve sek tawh mai a, tihtur ber pawh hre lo chuan chhuatlaiah thingthi zui hnawkin patlinga pumpa chu insumkarna awm lo lekin ka han tap ta ruah ruah mai a nih ka. Ava han na vawng vawng tak em. Mu leh mal pawh nei lo hian ka nu leh pa te chuan in chhung atang chuan hruai chhuak a, ka nupui Hmingtei te in lam pan in min kalpui ta nghal bawk.

Hmingtei te in kan va thlen lai hian mihring pawh chu an lo zi ve nuai nuai tawh mai a, kei, tih ata awm ta chu ka ruih nise alo la reh fel chiah bawk si lo nen, ka fapa ruang zawng reng reng chuan in chhungah khan ka han phar buai tak tak mai a,min buaipui laih laih tih pawh kha ka la hre thei. Chumi hnua thil thlen dan chiang taka ka hriat awmchhun chu ka fapa ruang kila ka lo thut tawh hnu kha niin, a ruang hnaih takah hian min lo thut tir a, ka fapa ka duh leh ka duat em em nunna nei tawh loa mu dang bel mai hmel chu en in, ka mittui hi a rawn luang leh zawih zawih ringawt thin. Ka keh chhe chiang em asin. Ka thutna piah maiah chuan ka nupui,nupui hlui ti pawha ka koh phalloh Hmingtei chu a chhungte kiangah ngui bar chunga lo thu ve in, kei leh a fapa hmel mawlh mai chu a khat tawk hian a rawn en chhawk leh zeuh zeuh thin tih ka hrereng a, kei chuan ka melh tha ngam ve mang lo thung.

Ka fapa vuina hun chu hmang zo in, dam chhunga kan hmuh leh tawh lohna turin ani chu thlanah zalh a ni a, kan thlah liam alo ngai ta. Theihpatawp tawpa a nu in a hming lama a koh lawm lawm lai te chu ngawi renga lo thlir ve in, inthiamlohna hlir hian ka khat mup mup tawh a. A fapa chu zui ve mai tum niawm taka thlan chhunga zuan luh a tum lai te pawh chuan kei chu che lo chang lo hian ka dinna ngaiah ka lo la ding ve reng thung. An che vel engkim chu ka lo thlir a, ka ipika, ka fapa ka ngai bawk a, rilru mumal put dan tur ber pwh hi ka hrethiam thei tawh lo chu a ni e. Thil thleng engkim te hian min țhawngin min ti chau lutuk a ka mang vek thei.

Thlanmual lama hun kan hman zawh hnu in Hmingtei te inah bawk kan kir leh hlawm a. Ani chu ngui em em hian kil khatah amah chauhin a lo thu ngawi vang vang reng a, hreh hle mah ila va biak chu ka tihtur nia hria in muangchang hian a awmna lam pan chuan ka kal phei ve hnuk hnuk. Min rawn hmuh rual rual chuan a mit chu la sawn zui nghalin hnuailam a melh ta ngar ngar thung. Luhlul chhuahin a bul lawkah chuan ka han thu thla ve hram a, min la be chuang hauh lo. 

‘’ Eng lo, engkim hi ka thiam loh vek a ni. Tihpalh takzet’’ ti supin, amah chu ka va melh pah zeuh zeuh reng a, ani thung chuan thil thui tak ngaihtuah tih hriat em em hian a mit pawh chu a lasawn chuang eih lo.

‘’ Min ngaidam thei ang tiraw?’’ ka sawi zawh pawh nghak lo hian ani chu a rawn tanwg chhuak ve ta sap mai.

‘’ A hnuk chah dawn tepah khan I hming lamin a tap a, a mitmeng hmangin a zawng bawk che a, khatihlai khan nang hi khawiah nge ilo awm. I fapa in a mamawh lai che khan khawiah nge ilo awm. Min chhang rawh. Ih maw, hei hi hria ang che. Mamawh I nih laia I kalbo avang khan ka rilru hi a dam thei tawh ngai dawn lova, ngaihdam che chu sawi loh, I hnena rawn kir leh tur pawh hian chakna reng reng ka nei ve tawh lo. Ka thei lo. Ka thei tawh lovang’’ tih pah chuan a hmai chu hupin a tap zui leh ta tlawk tlawk mai. Tihngaihna ka hre lova, a taksa chu khawihin duat taka kuah leh chu chak mah ila ka ngam thlawt bawk si lo. Tuilairapin ka awm mek a nih ber hi.

‘’ A pawi zozai em mai. Nangin min ngaihdam theih loh pawhin chung Pathian tal khi chuan min la ngaidam thei ang chu tiraw? ‘’ lo ti ve in, ka mittui parawl kuang tawh te chu ka hru pah leh nuap nuap thin. 

‘’ I fapa natna te, a nunna chan hial khawpa a natpui khang natna huathla la zozai te kha a lo thlen chhan chu nangmah hi an ni. I nun dan in a zir loh em avangin Pathian hremna chu kan fapa chungah a rawn tla ta a, chuti chung chuan Pathian ngaihdamna I beisei ve a maw? Ka hrelo, alo ngaidam duh maithei che asin. I fapa rilru thianghlim em em khan Pathian hnenah I sualna te hi ngaidam tura alo ngensak che chuan Pathian ngaihdamna chu I tan pawh beisei tur a awm em em ang’’ chang faka a rawn tih leh chuan chhan ngaihna hre lo in ka ngawi zui ta reng a. Ni e, ka zak ngawih ngawih a ni. Ka fapa khan ka suahsual tukkhum pawn avangin khang zozai natna te kha a tuar ral raih a a thih phah bawk. Pa ber ka nihna hi ka lo inhre lo rei lua a ni e. A hmuh laia mittui tih tlak chu duh tawh lo hle mah ila tun dinhmunah hian eng dangmah rilruah an rawn lut thei tawh lo thung. Ka nun hi keimah vang bawk hian a hrehawm tawh lutuk a, tal chhuah ve ka duh tawh takzet a ni.

Ka fapa boral hnu atang chuan tha taka nun chhoh ve tawh tumin ka nun dan ka uluk ve ta sawt a, tin, Ruatsangi pawh kha a hma ang tho khan a number block chu sawi loh ka delete zui ta vang vang a nih kha. Mipa hrisel tha pangngai ka nih angin he nu hi biak tam loh ka duh a, a hmel pawh hi hmuh tur rawn awm fo lo se ka duh bawk. Ka insumtheihna derdep tak te hi ka hloh leh mai ka hlau em em a ni. Ka hnaah tha takin ka kal a, mi pangngai nun phung ang zawng zawng chu zawk kim leh vek ka tumruh hle. Chutihrualin Hmingtei erawh chuan min la be tha duh chuang hauhlo a, a duh lo chung chung chu keipawhin va biak buai sek kha ka tum duh ta bik chuang lo. Ka nun hi uluk ila, keimah hi inhrechiangin mahni inhmangaih nachang hre ve tawh bawk ila, midangte pawhin min lo hmangaih ve thei mai dawn a lo ni. Mahse, chutianga hmalam pan tuma ka lo beih chhoh ve bek vek lai chuan thawklehkhatah thlemna thlipui kha lo thawk lehin, ka nunhluia min hruai kir leh tum hian nasa takin min rawn bei leh ta tlat. Chu pawh chu eng dang ni lo in, zan khat ka hna bang ka inbual zo chiah tih chuan ka phone rawn riin, ka han en chuan mak tak mai hian ka nupui duh em em Hmingtei kha alo ni ve the mial a. phur zet hian ka la zui ta vat. Chutah, ani chuan thinrim ha chang țhial bap bap chung leh ngaihnobei lo zet hian

‘’ I fapa boralna pawh khan ala siamtha thei thlawt lo che a nimaw!? A mak ka ti. Zawimuangin ka nun ka siamtha chho mek e, that ka zir tawh dawn iti emaw ka tia, khatiang na na na chu keipawhin lo ngaichang che in leh, ka hmangaih em che avangin I tan ka ti a, ka lo nghak ve reng bawk che. Mahse, vawiin chhuna ka thu hriat hian eng ang takin nge min nghawng nat hi I hria em. Tun atang chuan nang mi laktlak loh hi rin nawn leh che pawh ka duh tawh lo. Tawk rawh se’’ a rawn ti leh ta hmarh hmarh mai le! Eng nge thleng mek hi ka hrethiam thei lo. Chutah, a chhan ka han zawh chuan tihian min rawn chhang ta a.

‘’ Tukthuan eikhamah khan number hriat loh atang call dawngin, amah chu tu nge  nih tih pawh a rawn insawi nghal vek a, inhmuh a duh thu min rawn hrilh nghe nghe. Chu chu midang vak ni lo in I hmei anga ilo en tawh thin leh I thawhpui ni bawk Ruatsangi ngei kha niin, a duh ang thlap chuan ka va inhmuhpui ta bawk a. ka lo rin dan chuan ka chunga in thiltih tawh ah khan ngaihdam min dil dawn emaw ka lo ti ve a, mahse, ka hmel a hmuh rual rual khan insawitheihna chu țan nghalin, nangmah nena in la inkawp reng thu te pawh a rawn sawichhuak ta zat zat mai a, a duh hun huna a tih phar theih ila nih zia thu te, ka tan chuan nang hi chu beisei awm inih tawh loh thu te pawh min hrilh nghe nghe. Nitin inhmu in zantin in mu dun thin bwk a, chuan, I fa hial pawh paiin tunah hian I fa chu a pumah khan thla 1 lai alo dam ve tawh a nih awm chu!’’ chumi chin chu sawi hleithei tawh lo in a tap zui ta hawm hawm mai a, ka nupui duhtak hi a keh chhia a ni. Kei a pasal laktlak loh leh bawlhhlawh lutk vang hian ka hmangaih ka nupui hi a keh chhe mek asin.

Ngaihdam dil mawlh mawlh chungin Ruatsangi nena kan inkawp tawh loh zia thu te, ka nun siamthat tuma ama tan chauh ka bei chhoh mek thu leh, hun reilote chauh ka mamawh tawh zia te chu lo hrilh ve nghal thuai thuaiin, min ring lob hle tih chu ka hria. Thudang sawi tawh lo hian phone pawh a dah zui hmak. Keipawhin tun atan chuan call nawn leh kha awmzia awm dawn a ka hriat loh avangin call nawn tawh lo chuan Ruatsangi te in lamah kal ka tum ta zawk a. Thudik inphum ru kara a dawt sawi tam zia hi a chhungte hriat lai ngeia phawrh mualphosak vek a, ka nupui hnenah ngei pawh ngaihdam chu dil leh tura va tih kha ka duh a ni.

Taxi chhunga ka thut chhung zawng te chuan hetianga ka tih kher hi a tha ber a ngem tih ka ngaihtuah kuala, ka rilru chu a buaiin a hah takzet. Chutianga mahni leh mahni ka lo inkhap buai em em lai chuan ka phone chu rawn riin, ka nu alo ni a. Lak loh mai chu ka han tum zet na a, thil pawimawh te alo ih palh takin tiin a call chu ka la leh ta hram. Chutah, ka nu chuan aw khur hlak hlak chung hian,

‘’ Mama, ka fapa, tun lawk khan I pa nen call kan dawng zo chiah a, eng lo, Hmingtei a inawkhlum an rawn ti tlat mai! A rang lama iva tlan phei ve nghal a ngai dawn a nih kha’’ a rawn ti ta a nih chu. Ka mit zui sulh sulh thei a, ka hamhaih vek. Khawvel te hi reh ta duk niin ka hre zova, tu nge ka nih tih pawh hi ka intheihnghilh lo chauh a ni ber e.

Tichuan, Ruatsangi te in lam pawh chu pan leh ta lo in, Hmingtei te veng lamah kan inher kual leh ta zawk a. ka a chhulh nimai hian ka inhria. Ka vai deuh ruai tawh. An in kan thleng, motor atanga ka chhuk pah te chuan k taksa khur nasa lutuk chu control hleithei lo in ka khup nise a sai dur dur reng a, ka chuanna motir takngial pawh chu ka kal hlatsan theih tak thlawt loh avangin Hmingtei cousin mipa, chulai hmuna lo awm ve te ho chuan min rawn buaipuiin in chhungah chuan min hruai lut ta ringawt mai a ni.

Um, phat rual loh leh hai der theih rual lohin ka nupui, ka hmangaih leh ka neihchhun ngawih ngawih Hmingtei ngei mai chuan mahni nunna pawh hlut zo tawh lo in a nunna hlu tak chu alo ti tawp ta nge nge a nih chu! Ka tliak vek a, chem hriam tak hmanga vih leh sah sawk swk ai pawh hian ka na daih zawk awm asin. 

Ka nupui ruang ka hmuh rual chuan tum lawk pawh awm lo in a taksa dai diak tawh khum chunga an zalh chu kuah zui thlawpin, ka tap hawk hawk bawk. A hming lamin awrawl tawp tawp chuan han au ve bawk mah ila min chhang tu tur reng a awm tawh si lo. Engtin nge ka hmangaih hi an lakbo theih zawk le tih ngaihtuahin ka thlir ngawih ngawih reng a, min kalsan mai tur atan chuan ka phal thei thlawt lo a ni. Ka thlahlel in ka la kham lo takzet asin. A rei hnuah phei chuan tah pawh tap hleithei tawh lo in ka melh ngai ka melh a, ka a thei takngial dawn hian ka hria. A na em a ni.

 A tuk thlan thut ni ah pawh kei chu la awm ve zelin, kal hlatsan hi ka phal thlawt tawh lo. A sulhnu engkim mai khan ka lung hi min len a, ka hmu ning thei lo bawk. A rim hriat phaka awm ve reng mai chu ka duh avangin an in chhung pawh chu ka chhuahsan hreh tawh takzet. A chunga ka thil lo tihtawh zozai leh suahsual chhuahna te khan tunah keimah zawk hi min vaw letin ka tan chuan vanpui hi a chim takmeuh meuh a, inchhirin ban a chen ta a ni ber e. 

Hunserh zawh hnuah thingpuite ina ka lo thut khawmuan leh lai chuan tuemaw hian ka hnunglam atang min rawn kheuh leh zeuh zeuh thina, ka han hawi let chuan Hmingtei nu ka pizawn kha a lo ni reng mai. A kuta a lehkha them ken va va chu min rawn pek pahin

‘’ Hei hi I hmuh tur chi niin ka hriaa, Mami khan a intihhlum hma khan a ziak a nih ka ring. A ruang bulah alo awm a’’  a rawn tih chuan rang zetin lehkha them chu ka lo en nghal a. chutah, a kutziak ngei a ni tih hai theih rualloh a hawrawp nalh hian 

‘’ Tunah chuan dam chhan tur pakhatmah hi ka nei ta lo ve. Engtiklai pawha dawt sawi thin pasal kha ka neih leh ai chuan ka fapa kianga lungmuang taka lo han chawlh tawh mai ka duh zawk. Hlim reng ang che u. Mangtha!’’ tih te mai hi a lo inziak a nih chu!

Awle, tunah chuan keipawhin he khawvelah hian ka ta tia sawitur nupui fanau ka nei ve ta lo mai chu a nia. Hmingte, hlim takin han kal ta la, kan fapa mawlh kha min lo biak mawlh mawlh ang che aw. Kham lo tak chungin tun atan chuan ka thlah rih phawt mai che u hi a țul si a. Ngaihtuah ka ngai lo ka tha e. Hmalam panin ka lo inti chak zel tawh a nga , tu hnenah mah dawt thu pawh ka lo sawi tawh bawk hek lovang. Mangtha ngawih ngawih mai ule’’ tiin vana arsi pe tuarh mai te chu ka thlir chho ta vang vang a. mittui karah chuan harsa ti takin ka nui lui ve ta sak e.

*************************************************************************************

Leave a Reply