You are currently viewing Keimah thingtlang nula S2 – 15

Keimah thingtlang nula S2 – 15

Spread the love

KEIMAH, THINGTLANG NULA S2-15

“Sawlaiah sawn bike ka dah” scooter leh bike intlar ţhâtna lam kawh pah hian a ti a, ka phurna zawng zawng a reh vek, two wheeler a chuan berkher hi chu a ka châk ve hlawl lo a ni. Amah ka en hmasa leh te te a, nui vur vur chunga min lo en ve rual chuan, “Bike ah ka chuang peih lo” ka ti ta nge nge a.

“Ngati nge?” mak tih hmel deuha tih pahin min rawn kuah kher a, midang an awm ve bawk si, “Ka peih lo a ni mai” tawlh sawn paha ka tih chuan, “A hahthlak loh, khalh tur zawk ka nih hi” a tih pawhin, “Ka kar peih lo” ka ti tlat a, “In vengah eitur a awm tawh hleinem. I lo kal hma khan saw lai dawrah sawn ka zawt a, eitur kan nei tawh mang lo an ti” a ti a, inngaihtuah paha ka che sek chu min lo en reng a, a tawpah, “Aa..ka haw anga chaw ka ei zawk mai ang” ka ti ta ringawt a, kan khuaah pawh ka hlau a nia, Aizawl, motor tamna hmunah ngat phei chuan ka chuang ngam hlawl lo.

“Hmun nuam deuh kan zawng anga chaw kan ei dawn nia” a ti leh zel a, ka nu a awm lo a, ka la inthlak lo bawk a pawi ka ti hran lo, mahse bike ah ka chuang peih lo.

“Taxi in kal mai ang, saw a la din ţeuh saw” ka tih lahin, “A rei mai mai, i bulah ka awm rei thei nang” a ti bawk si, “Nih leh, i haw hma zawng heti hian ding mai ang, ka din pui ang che” ka ti a, lungawi loh hmel deuh hian min melh deuh run tawh a, “Eng nge?” ka tih chuan, “I hlau em ni a? Phurh che ka tum apiangin chhuanlam i siam ziah” a lo ti ve ta nge nge a, “Hlau e…kan chesual tawh a, ka tliak rem rum lo chauh alawm. Ka na lutuk a karkhat chhung ka che thei lo, ka mit ka khap a a ni mai. Ka duh tawh lo reng reng” ka ti lui vak a, a lu tuai pahin a hawi kual a, tihngaihna dang a hre ngang lo aniang, “In venga eitur awm ang ang ei mai ang” a ti ta ringawt a, keichu phurh chhuah chi ka ni ve lo, ke a kal an tih erawh chuan an peih chen chen ka kalpui peih thung.

Ka dar tawn tawnah dawmin a lo kal diam tawhna restaurant lamah bawk min nawr phei dat dat a, hmelhriat ka la nei lo bawk a kan khua angin tuman min be ve lo, “Kawn vel i rawn hriat chat danah mission vengthlangah hian i kal ngun a ni chiang mai” hawi let chung meuh a ka tih chuan, “Tunhmain ka ţhianpa a awm ţhin a” a lo ti ve mai a, u Zirbawnga a chhe lo ve si, a pa bawk si, miin min en te chuan a rukin ka intithei a, min be lo nain an rilru chuan ‘saw nu bialpa saw a chhe lo lutuk’ an ti ngei ngei ang, keimah min en chiang ang a, ‘an chhe lo ve ve, an inphu tawk, an inhmeh e’ an ti bawk ang a, miin hmelţha min ti ve ve zel a, ka chhanglet vak ngai lo nain ka vui hran lo.

Damdawi dawr piaha restaurant chu kawkin, “Hei hi nichina ka kalna chu” a ti a, dawr a kan luh hmain pawna lo ţhu nu pakhat hian, “Lo leng ru” a lo ti a, ka melh zawk hnuah a chhungah ka lut a, a lian hran lo na a a tui tho ang. A kil lam panin ka ţhut hmasak te te hnuah ka ep chiahah u Zira a ţhu ve a, thil ei dawna inhmatawn a ţhut chu ka hreh deuh a sin mawle.

“An la neih ho zawt la, i duh duh ei rawh” tih pahin a kutkawr bunlai a phelh a, “Kut silna tur a awm em ka zawt lawk dawn. Tikhan lo en rawh” menu ka en laia lo ti lehin a tho zui nghal a, kan ţhutna piah piah leh a mi te chuan burger an ei a, ka ei ve chak tehreng nen âu zau a ngai lutuk a ka ei lo zawk mai ang. Chow a awm tawh loh laiin rice a la awm a, momo nen ka chah a, thil dang chu ka zawh apiang a awm lo zel, kan kal tlai ve bawk a ni.

U Zira a rawn let leh rualin pawn lam aţangin hmeichhe aw in, “Remsial” a rawn ti lauh a, kawngka lam ka hawi thuai a, Nutei a lo nui var var mai. “Nuam awm ve” tih pahin a mithmul a ti che zawk zawk a, “Khawiah nge i kal a?” ka tih chuan, “Hei, a piah lawka dawrah sawn thil kan lei a, alu leh artui te. Tu nge i ţhianpa kha?” a la ti zui a, Sensiari a hriat chuan u Zira hi hmuh tawh awm tak a nia, hmaichhana an inhmuh hnuah pawh an inhre chuang miah lo a nih hi.

“U Zirbawng, rice leh momo ka chah a, i duh zawng lo en la, saw laia ding saw ko ve vak mai rawh Nutei ka be lawk dawn” tih leh thawh ka rual a, ka pan phei a, kawngka ka thlen ruala, “Khawiah maw i kal?” ka tih leh chuan, “Saw tah sawn” tih pahin a kawk a, ka dak chhuak a, tlema puk deuh hlekah hian dawr lian angreng tak a lo awm reng a, restaurant bang hrulah step tawite a awm a, kei anga nu lian phei chuan a rualin kan kân pawp thei ang.

“Tu nge saw pa saw?” a ti ve thung a, “U Zira a nih saw, i hmuh sawn i hre thei lo mi? Sensiari u a nih saw” ka tih chuan, “Ka hmu ngai lo aniang ka hre miah lo, mahse ka hriat hnu chu a ang ka ti, ka hmu tawh zawk aniang a” a ti deuh nuai a, “I va han mumal lo tak aw, i hmuh tawh hnu chu i hre nghal thei mai lo mi?” ka tih leh chuan, “Rilru chak deuh ni ila pa deuha kuttin chei dan ka zir i ring em ni a? Ka hmelhriat ni lem lo chu hmu tawh mah ila ka hre thei chuang lo. Sensiari u a nih chuan ka hmu tawh ang” a ti hlak hlak a, thinchhe si, kan luh dawna min lo be tu lah khan nui chungin min lo en reng a, u Zirbawnga ka en zawk a, ani pawhin kan lam ngawt a lo hawi reng tawh.

“Zanah lo riak la, khum lian tawkah keimahin ka mu alawm” ka ti a, Maski-a pi a thi bawk si a, mahnia riah ai chuan a nuam dawn hrim hrim. “U Lianpuii rawn dil rawh, hre lawk sa lo angin ka lo awm dawn a nia aw. I ţhianpa saw tu nge a hming kha(h)?” a ti leh a, “U Zirbawnga a nih saw, hmelţha i ti em?” ka tih chuan, “Aw..a zia ve reng. Kolasib tlangval an hmelchhe ngai lo hrim hrim, hmelchhia kan tih te pawhin chhia an inti lo. Ka kal dawn, i ei tui lutuk anga amah chawp sawn i dawlh ange aw” a ti a, “U Zirbawng, goodbye man” ti lehin nui uar uar chungin a kal a, a thil lei a dahkhawmna lamah pheiin phone a phawrh zui nghal a, vei a neih loh hmel si, a thawveng ve ngawt mai.

Kan dawhkan lamah let lehin ka ţhut rual chuan u Ziran, “Hmelhriat i nei sa nge i nei nghal?” a lo ti a, “Kan inchungnu a nih kha” ka tih chuan, “Mipa a ni lo maw?” phawk zet hian a lo ti a, “I â…a kal dawna a rawn koh che pawn mipa auin a au loh kha, mipa rawl a tel lo reng reng, i mak thei e” ka ti nang nang a, “A pa thêng a, mipa samsei emaw ka ti mai a sin” a tih chuan, “Awii…u Zirbawnga chu what a funny thing, sek ţul hian cute viau suh” ka ti a, meng kual zawk zawk chung hian, “Ka sek ţul kher lo, ţawng zawi ta che, miin min nuih” zawi te, sehchilh zet si hian a ti a, a thin lah a rim hma, cute tih te chu huat chi a ni lo hrim hrim.

Kan eitur chah an lo dah saw, “Hei hi i chah em ni a?” tih pahin bowl pakhat hi ka kawk a, “Hei nen hian a inang bawk sia” a dang kawh paha ka tih leh chuan, “Soup kha ka chahsak che. Rice leh momo chauh i lem thei dawn mi? A hul dawn sin” a lo ti a, “Rice in a chhawm tho alawm” ka tih chuan, “A tlem emai” a ti hmak a, rice in a chhawm soup chu ka hawp chhin a, kan khuaa mi a tluk lo, kan khua a mi chu a tui lutuk a lem pawh kan lem phal ngai mang lo kha a nia, Sangkhuma awm phei se chu a phun nasa viau ang.

“Keichu momo hi pan deuh, a chhunga iskut leh zikhlum chauh inthun ang kha a tui ka ti ber. Tunlai momo puar pung, chhah deuh tul hi ka ngaina ve vak lo” tih pahin ka momo chah chu ka ei a, “Hei chu a tui, en lo pawn rilru nuam deuhin a ei theih ang” ka ti a, momo phek thler a van tak hnua momo ka ei tui ber a ni hial ang.

“Zanah khawiah nge i riah dawn?” ka ti leh a, “I ţhianpa chu a la awm em?” ka ti bawk a, “Awm tawh lo, a nupui fanau te nen an khuaah an awm. Ţhian ka ngah a, mahse hotel a riah ka duh” a tih chuan, “Hotel ah te chuan mi hran hran an riak a, khumfa te a awm lo mi?” ka ti a, a lo ner nak a, “Chutiang khawpa ţawp a awm tawh nang. Naktukah bazar ah kal ila, i duh em?” a ti ve thung a, “Thil ka zir dawn alawm, bakah engati nge i lo kal thut a?” ka ti ţha leh a, a thil ei lai pawh hi a thla mai mai emaw tih a la awl tho.

“Nizan leh tukinah khan hrehawm i ti em a, nangchu karkhat hnu velah i tlangnel leh mai ang a, chumi chhung chu Aizawlah ka awm ve ang ka ti deuh a” a ti ve ngei a, “Khawiah nge i thawmhnaw?” ka tih chuan, “Hotel ah ka dah tawh” tiin tawitein a nui a, “Ehe! Hotel a riah ka duh i tih hma khan i lo invawm lut fel der tawh a ni maw?” ka ti hluai a, a buk nghat nghat laiin, “Dar engzatah nge i lo chhuah? Keimah vangin i lo kal tak tak em?” ka ti leh a, ka ţhiante tih loh hetiang taka ka tana inpe zo hi an la awm ngai lo reng reng.

“Chhunah ka lo chhuak, ka hna chu Vani kutah ka dah rih a, lo enpui tawp a ni rih a, a har lo. Ka nu leh Vani chiah ka hrilh” a la ti zui a, “I nu’n a phal em ni? Engtin nge a tih a?” ka lo ti leh zel a, “Aww…Aizawlah Remsiali hmu turin ka kal dawn ka tia, ka nu’n ‘han che pa hle rawh’ a ti” nin hmel deuha a tih chuan thil ei ţhulh ţhakin ka lo en a, “Engtia che pain?” ka tih chuan, “I tan chuan silaimu dawlh mai ni lo, bomb ken puah pawh ka huam mah se thi kher lo ila” a ti a, ka lo ner nâng nâng laiin, “Khatiang zawnga pa khan che rawh a ti” a ti leh a, nui chung hian a eitur a bih daih a, ka awih lo ve chiang e. “Hrehawm ka tih vangin maw i lo kal?” ka ti leh ngat a, “Ni e” tih pahin a lo dakchhuak a, “Nang meuhin hrehawm i tih chuan a hrehawm hle a nih ka ring a, reilote Aizawlah ka awm ve ang” a ti nawn leh a, ka thawnthu chhiarah chuan changtupa te mitmeng aţangin an rilru tur awm ang an hrethiam thei ţhin a, keichuan hnai deuhah en mah ila engmah ka hrethiam ve lo.

“I hna zawng zawng i kalsan vek awm sia, naktukah haw leh rawh, i chhungte i hrilh zel bawk si, min ngei zo zai tawh ang. Ka ute pawhin an bialnute an ngaihsak lutuk chuan pa lo ka tia, ka thin a rim ziah” ka ti bawrh bawrh a, “Inngaihzawn lai chu hmeichhe thuneih ve hunlai an tih kha. An duat deuh pawhin lo thinrim tawh suh” a tih chuan, “Inneih hnuah min duat dawn lo a ni maw? Min rap bet ang a, ehe…inngaihzawn laiin thu ka nei ang a, inneih hnua min rah beh chuan siliper chhuat pawh ka tluk dawn lo a ni maw?” ka ti a, ka melh ram ram laiin, “Ka duat zual sauh zawk ang che” a lo ti a, “Miin, ‘Zira nupui vanneih zia hi, a pasal a hmelţha si, ţhutthleng dupah hlir a ţhu bawk si, chaw rum a ei ngai bawk si lo, sa lah ei ruala lem tawp theihin ţhial sawm sa hlir a pe a, savun kan lah rawt dip sa hlir a ei a, a mutna lah a nuam, chhum a mu ang reng a ni’ an la ti mai ang” a tih chuan ka tih tur hre lo vin thil dang kan ei hnua kan thingpui chah, an lo dah hlim hlawt chu ka in pawp a, a lo la sa ţha lutuk chu lem pawh lem lo vin ka ang a, thaw hlawp hlawp chunga, “Haw…haw…haw…” ka tih laiin u Zirbawngan, “Kha, tui hi in rawh” a rawn ti ve a, a daih deuh hnuah ka lem khalh a, a tui min pek chu in lehin ka ngawi zui hle hle a, thawm chhuah vak lo vin ka eu vak vak ringawt a, ni lo se chu miin ka thih sual emaw an ti maithei a ni, sa hi ka ngam hlawl lo.

“I in pawp a nih kha..a la sa em?” hnai deuha min rawn bih chunga a tih chuan, a hmaiah ka nam pawp a, “Thil lem ti harsa khawpin engmah sawi tawh suh” ti hlakin tui bawk ka in leh a, ka puar luah tawh mai a ni. “Ka uang a nih kha” a tih chuan, “I fiamthuin min that lo chauh a nih kha” ka lo ti a, “Ka duat ang che i tia, ka hrawkah ka thaw a tang daih alawm. Khatiang kha ka ngaithla peih tawh lo” ka tih chuan phawk deuhin min lo en a, “Hmangaih biahthu thlum min la hlan hlum nge nge dawn a nih hi” ka ti a, u Zirbawnga bula awm chu dam rei a har dawn riau mai.

“Ka duat loh chein i thin a rim a, ka duat che lahin min ankhum leh hrep a, i bialpa anga min en chuan i thin a rim reng dawn, i bialpa ni tho mah ila nu leh pa emaw pi leh pu angin min en mai rawh” a ti ta thlawt a, inthiam lohna pawh ka nei chuang lo, ka mizia nen a inrem lo deuh sawi a ching lutuk a, ka phu zuk zuk zel alawm.

“Chuan, naktukah kan bazar dawn em?” ţhutthleng nghenchhan ngheng a inkuangkuah chung hian a ti leh a, “Thil zir ka ngai ka tih kha” ka tih chuan, “I zir zawhah mawle…ka nghak thei che. Kan inhmuh hma duh leh ţhiante ka lo tlawh kual ang a” a ti a, thil min leisak leh ţeuh hlauin, “Ka u te ka lo dil ang a, ka duhzawng leina tur pawisa ka pai ve bawk ang” ka ti a, ngunthluk deuha min en chung hian a nui a, “I tih dan dan le” a ti ve ngei a, ka leisak ang che a ti lo chu ka thaw huai mai.

“Thil kan ei zo tawh sia ţhut reng a nuam lo e” hawi kual zak zak chung hian ka ti a, tuvak mah an awm tawh lo nain eitur rawn lam chu an awm a, “Min pack sak rawh” an ti deuh zel a, pawnah an nghak daih zel bawk a, keimahni deuh chiah kan ni tawh.

“Awmna tur dang a vang e…kawngsira kan din leh taxi kan chang emaw an ti ang a, ka thlah mai ang che” a tih chuan, “A va mak tak…bike ah ka chuang duh lo ka tih ka tih kha. Lirthei ke pahnih nei hrim hrim hi ka allergy ah ngai tawp rawh” ka lo ti leh a, “A va mak ve tho tak, kein ka thlah dawn che. In in ka lo hmu ve hrim hrim ang” a ti a, hawisawn tawh mah ila u Zira lam bawk ka hawi leh vut a, “I lo lut dawn maw?” ka ti hlut a, u Mama chuan min hau lo ang a, mahse u Bawihan ka nu a hrilh ngei ngei ang a, min hau tur hrim hrim pawhin a lo zin vang vang duh dawn chiang lutuk.

“I phal leh phal loh a ni mai. Phal lo mah la pawn aţang pawhin a hmuh theih tho alawm” a tih tak tlatah chuan, “All go…kal ang” tih pahin ka tho a, u Zira ka hui pah nghal a, pawna ka chhuah nghal laiin u Zira thung chuan pawisa a pe kawi a, ka puar lutuk eitur tui hmel deuh deuh pawhin ka ril a ti ţam thei tawh lo.

A rawn chhuah ve chuan kan chawlhna ep chiaha secondhand dawr ni awm tak chu kawkin, “Secondhand i thing duh em?” a ti a, min tih khawtlai dan ngawt a ngaihtuah a, min ngai viau a nih ka ring.

“Veng chhung a mi a nia, thinna hun a la tam emai haw phawt ang” tih leh a bana vawn ka rual a, ti hian ka vuan mai mai ang a, mi tlem veleh ka kuah daih ang. “Ka ţhianpa awm lai nen a danglamna a tam lutuk lo a nih hi” a tih laia motor a lo tlan chuan a kut pakhatin min dawm vat a, min tlanpelh veleh a, “Kawngpui hnaih loh lamah hian kal zawk rawh” a tih avangin a bana ka vawnna chu ka thlah a, ka kalna lam ka sawn rualin ka vuan lehnghal thung. Aizawl a insi riala han kal takah chuan kan khua nen a nawm dan a inang reng.

“U Zirbawnga hi i danglam tawh e” a lam hawi paha ka tih chuan ani pawh ka lam a lo hawi ve chiah a, “Engtin?” hre lo ni awm taka a tih chuan, “I mizia hi ka belhchian hma che a ka ngaih ang a ni lo. Ţawngtlem deuh, chapo deuh i ang a, mahse sawi tur a awm chhung chu i ţawng peih a, kan inang chiah, thla khat vel awm dun ila chu kan ţawng nasat lutuk avangin ORS in char char a ngai ang” ka ti a, kan inhauh peih tehreng nen tun ţum chu kan nui dun ve nasa mai.

“Nangpawh rin aiin i puitling” a tih ve chuan, “Kum a tam rualin rilru pawh a puitling ve zel alawm. Kum30 tlin tawh hnuah, ‘ama te te duh, apa barbie lei lawh’ la ti ila chu pangpar huanah min dah daih ang chu. Min rap deuh deuh an tam viau ang” uar zet hian ka ti a, ka thusawi chu a pawm aniang, “Ni e” tiin a bu nghat nghat mai.

“U Zir, keimah vangin Aizawl i lo kal sia, ka u te ka dil ang a, an phal chuan nakinah i lo leng dawn nia” ka ti ve ngei a, “Lo dil rawh, in phal loh chuan min ru dawn ti la” tiin a nui zui a, “I phakar ve chiang e, inneih ka sawi hmasa tawh lo vang i tih kha” ka tih chuan, “Inneih ka la sawi reng reng lo, ru ka ti a nih kha, neih leh ru te chu a danglam daih hi. I rilru hi a hranpa liau liauin bualfai teh” min ti a, ka inngaihtuah vang vang hnuah, “Thil hi ka hrethiam ve zel a nia aw, inngaihzawnna lamah phei chuan ka fing ker a, min bum thei lo vang” ka tih chuan, “Tak taka ngaihdam ka dil duh che” a lo ti a, “Eng thilah?” ka ti vat a, thil dang daih a sawi dawn emaw tih laiin, “Kan nih ţan tirh lai khan bialnu ka la nei a” a ti sup a, ka ding chawt mai.

Tim daia min en laiin rum zetin ka melh a, ka intisek anga ka phin darh vek mai dawn em mawni ka ti hial a ni. “Min lo bum vel maw?” ka ti vak a, “Au ring lutuk suh” zawi tea a lo tih chuan, “Duh leh lirnghing te pawh ka au chhuak ang a, ka au rin leh rin loh chu ka thu thu” ka ti leh tuar a, “Inngaihzawnna lamah i fing ker lo tawp a nih kha, nangmah bak bialnu ka nei lo” nuihzat hmel zeta a tih chuan, “Inţhen ang ka ning, i fiamthu hi ţek a nih hi” tih leh kal ka rual a, “Min rin loh zia kha i hria em? Bialnu ka nei ka tia i awih nghal a nia. A what a very lo aw Lalremmawi” tih pahin ka hnungah min zui zel a, hawi let lo mah ila min en tawp lo tih ka hre thei tlat.

“Ka chanchin chhe lam chiah hre ţhin la min ring awm bik lo e…i la dawheh em em zui” din dat pahin ka ti a, chak deuhin ka kal peih tawh lo, chauh leh puar nen a inrem lo emai. “Dawt ka hrilh ngai lo che” a ti a, ka zawn a rawn thleng chawpchilh nghal a, “Zira lerh lai tak tak chuan kolasib ah pangpar an kawl hman lo, an hralh zo nghal zel an tih kha” ka tih chuan vanvadak chung meuh hian a nui a, sava in rawn chuk fawk se ţha tur a nia.

“Kolasib ah pangpar an hralh theih viau chuan ka zuar ve dawn” a ti daih a, “Ţha deuha ti ti laia bialnu dang ka nei han tih vel, hlimna hi vaw hlum zel suh” ka ti a, rum deuha ka melh laiin tarmit dum min rawn vuah tir a, “Tikhan i meng rum lo” a la ti zui a, a kawrah a inthiat char char si a, engtik laiin nge a lo lak thlak hman ni, ka inring hman lo reng reng.

“Thil ho mai maia buai rual ka ni tawh lo, bialnu nei ţeuh duh mah ila ka kum nen a inrem tawh lo, tar lerh min ti mai tur a sin” tih pahin min kuah thawk a, “In la upa viau suh, i la upa lutuk lo emai” ka tih chuan, “Dawrah khan helmet ka theihnghilh daih” a lo ti a, a haihawt bawk si, ka tihngaihna hre lo chuan, “Theihnghilh i nei reng mai, i ha pui a la kim em?” ka lo ti hial a, “A pawimawh ber ka theihnghilh ngai chuang lo che” a tih chuan, “Einch chha….a flow a dik zaih mai” ka ti a, ka nui leh har har tawh a, mipa dang bulah ka hlim leh tawh ropui si a, Maski-a pi a thi tak tak tawh bawk nen, ka mumangah min hran khum leh vaih chuan zun ka cheh thei hial ang, mut hmain diaper ka hreng lawk nghe nghe dawn em mawni.

“Helai hi kan in a nia, a chung berah hian a neitute an awm a, a hnuai chiahah khuan Nutei te kha an awm a, a hnuai berah khuan keimahni kan awm” tiin ka hrilhfiah a, “Thosi a tam em?” a lo ti daih a, “Awii…ka hrilh uluk tehreng che nen thosi a tam em tih daih te chu a” ka tih chuan, “Ka ngaihtuah vang che tih hre ta che, kan ţhiannu pawh a damloh phah a, a hrisel leh tawh nain a landan a ţha chhuak zo tawh lo a nia” a ti a, ka chhang peih tawh lo, fiamthu nge thutak ka hre hrang ngai bawk si lo, “Ka u te ka lo dil ang” ka ti daih a, “Ka kal dawn, helmet kha lam kawi leh a ngai a, ka rawn bia ang che” a ti a, a kal liam thlengin ka thlir ve ngei a, u Zira chauh ka kawp dawn a nih chuan Nutei a pawimawh dawn a nih hi, ani hi chu hriatchian hmasak phawt a ngai, nakina rilru na a ţah bui bui a peihawm loh emai.

Inchhunga ka luh chuan ka ute pahnihin ţawng lo vin min lo en reng a, min hau hrep se a zahthlak loh deuh tur a nia, an ngawi reng si a, tihngaihna ka hre lo lutukin an pahnih a melh tawn zak zak chungin, “Hmm…min en laih in tum” ka ti ringawt a, “I chhuah dawnah i kalna tur sawi zel rawh, Aizawl i kal ngai si lo va, i bo emaw kan tia, ka nu te pawh kan hrilh tawh” u Maman a lo ti a, din ngil auh pah hian, “Min rawn be ta che u, ka nu in hrilh phei chuan a buai phili leh vek ang” ka tih chuan, “Phone i la thei lo” a lo ti hmuk a, “Ka nu’n ka bo emaw a tih chuan engtin nge a tih?” ka tih chuan, “Zawng ula, in hmuh hunah vaw tur hrim hrimin ka rawn zin vang vang dawn a ti” u Bawiha zawkin a lo ti a, “Awii…ka pawisa in lo khawih em?” ka ti ve thung a, u Bawiha ber hi ka ring zo lo, a inla piangthar viau nain mamawh leh awh a ngah a, naute pawisa pawh a mamawh chuan chhungkaw pawisaah a ngai vek zel.

“I bo emaw tiin kan mangang a, pawisa sawi hun a nih loh hi” u Maman a lo tih chuan, “Min hmuh tawh hi, ka nu chu ka be mai ang. Kawnah ka kal daih alawm, thil ka ei a” ka ti a, u Zira chu sawi chhuah chi a ni rih lo. Pindana ka lut chu u Maman min zui lutin, “Ching tawh suh aw..nula i ni tawh a, thil ţula chhuah a ngaih chuan min dil rawh, ka phal vek, chin tawk hria la mah se min ti mangang zawngin awm tawh suh. Ka nu chu be rawh” a ti a, min chhuahsan lehnghal a, nakinah min hau leh mai ang.

Phone ka en chiah chu ka nu leh pate missed call a lo tam ngang mai, ka nu phei chu a phit khu leh rum rum tawh ang chu. Ka pa zawk ka call daih a, ti fuh ka intih hman tehreng nen ka nu ngei maiin, “Lalremmawi, khawiah nge i awm? Aizawlah zankhat lek i la riak a, zawn ngaiin i awm nghal a ni maw? Aizawl boruak i va zo awm lo ve…thil sual i tih vaih chuan police ka man tir dawn che a nia” a rawn ti tuar tuar a, ka bulah awm lo mah se ka ţhutna aţangin ka tho ûk a, police ka hlauh vang hian a sawi ve ziah.

“Ţawng ta che, khawiah nge i kal? Naktukah ka rawn hruai dawn khawp che. Kan khaw boruak hi i ngeih ber a nih hi” a tih takah chuan, “Kawnah thil ka ei alawm” ka ti a, “Tu nen?” a ti vin leh ţhak a, naktuka min rawn hruai chuan engtin emaw min ti ngei ngei dawn a, chumi pumpelh nan chuan, “Keimahin mi pahnih ei tham lawih ka ei” ka ti daih a, dawt sawi a nawm loh em avangin ka rilruin, ‘ka uang a’ ka ti tel char char bawk.

“Ka awih lo reng reng, hmelhriat awm loh naah nangmahin thil i ei lo tawp ang” a tih chuan, “Ka ei reng, ka ei ţeuh. Ka haw hnu lawkah ka chhuak lehnghal a, kawnah thil ka ei” ka tih pang pang hnuah ka rilruin ‘ka uang a’ ka ti leh a, “Dawt i sawi lo maw?” a tih leh chuan, “Aw, dawt ka sawi lo. Keimahin mi pahnih ei tham lawih ka ei a, ka ei zawh hnuah muangchangin ka haw, kal pui ka nei lo hrim hrim” uar zeta ka tih hnuah ka rilru bawkin ‘ka uang a’ ka ti leh a, fiamthu a nih chuan rilru nuam lo deuh chungin dawt sawiah ka inngai lo lui a, fiamthu lo a dawt sawi phei chu rilru a nuam thei ngai lo.

“Khatianga i awm leh vaih chuan ka rawn hruai nghal dawn che a nia, thiam nei lo mah la a pawi lo, i nun i hloh ai chuan kan chawm reng mai ang che” tih leh phone dah a rual a, rin aiin min hau nasa lo, ka leng bo ngun a, ngaiah an nei tawh aniang.

Ka u te chaw ei lai pawhin pindanah ka tawm tlat a, tih tur ka hre lo chuan message ka en mai mai a, hlauh sa nak laiin Sangkhuma ngei maiin a pi ruang chunga Maski-a ţhu kun ngul lai thlalak min rawn thawn a, mitthi hmel a lang chiang bawk si, ka thinrim lutuk chuan, ‘Mimawlpa, thlalak min thawn kher lo hian a awmdan min hrilh mai ta che. Ka hmu vek tawh a, mitthi thlalak hi ka mitthlaah a cham reng dawn a sin. Nangmah chiahin i hlau peih lo a min rawn thawn ve ah ka ngai a nia aw. Ka ngei lutuk che a, ka message hi a au vak vak tih hre rawh’ tiin ka thawn a, ‘Isss…min ngai a nih kha, lunglen chuan thin a chhe duh’ a rawn ti daih a, ‘Ka kawm tawh dawn lo che’ ka tih chuan, ‘Karlehah Puipuii a lo haw chho tawh dawn. Maski-a pawh a khawngaihthlak teh mai a nia aw’ a rawn ti leh tawh a, ‘U Zira ka ngaizawng nghet daih maithei. A insiamţha nasa sia, ka enthla chhin dawn’ ka ti a, ka rilru hi a nghet vak lo aniang an pahnih hian ka duh ve ve a, mahse mi rilru tihnat ka duh loh avangin ka bialpa la ni lo zawk Maski hi ţhian angin ka kawm daih mai ang.

Ka ute chaw eina ka tihfel hnuah inbual tumin bualinah hrukpuan nen ka lut a, ka ţhut rem te te hnuah phone bawk phawrhin Kalvari ka call a, a lak ruala, “My friend” ka tih chuan, “U Rinhlua hi over i ti ngawt ang. Mi naute in a zunkhum a, kan naute chungah a inthiam lo” tiin a rawn nui har har a, “Fa pakhat in nei dek dek a u Rinchuta hian over a chhawm nghal. Kan khuaa in awm chhung chu nei tawh rih suh u, ka hmu peih tawh lo che u” ka ti a, “I zirna vel a tluang em?” a rawn tih takah chuan u Zira lo kal thu vel ka sawi hnuah, “Awii…my friend, a inpe zo ţhaks. A ţawngkam a thlum bawk si, fanghmirin min bawm ka hlau a hei ka inbual dawn” tiin ka nui uar uar a, “Bialnu dang a neih i ring tawh lo tihna mi?” a ti a, a nuih leh theih tawh loh, hei vang hi a nia u Zira ka nin ţhin nachhan chu, a hming an sawi hian bialnu an ti tel kher zel.

“Nih leh Maski nge u Zira min duh pui zawk?” ka ti ta nge nge a, zei zawk daih mah ila ţhiante thurawn hi a pawimawh ve tlat. “Mo dun theih a chakawm a, keimah chiah inngaihtuah ila chu u Zira ka duhpui zawk ang che. Mahse, Maski hian ruihhlo ti lo se chu Maski ka duhpui zawk che a, ruihtheih thil a ti kher hi a pawi ber mai. U Zira hi chu ka duhpui lutuk ngai lo che, a lerh zia hlir kan hriat ţhin vang a nia, thinlung hian a pawm thei lo” a rawn ti a, kei lahin hun ţha pek ka lo tum laklawh tawh bawk si, “I van sawi har” ka tih chuan, “I rilru a nat ka hlau ţhin alawm. Aizawlah khan mi ţha deuh tawng la ka ti, an pahnih hian ka duh pui lo ve ve che. Aizawla i hmuh loh leh kan khuaah college zirtirtu a awm a” a rawn ti a, “Hmh…ka duh bawk lo. Kei aiin a te zawk a, a khup leh a ngalrek pawh khap khat vel lek aniang chu, a ham nasa thei si, a hahchhiau lah hian rang tawkin hahchhiau chhe chhe chhe a ti kher zel a, a din pawhin ţhu a ang” ka ti bawrh bawrh a, a nui vak vak a, a nui hnang mai ang a tih tawh hnua, “Hmel a ni lo a nia aw. U Zira kha nei la, in inneih hnuah lerh ta se engtin nge i tih ang” a tih chuan, “Ngaihzawng min neihsan chiah se la chu ka nasa viau ang, zing ţawngţai inkhawmnaah te kalin ţawngţai thupuiah ka thawh ang a, thil min leisak apiangin i bialnu lei ve rawh ka ti zel ang a, amah aiin a bialnu ka be ţha zawk ang. A chhuah dawn apiangin a bialnu thil tur ka thawn ang a, fel ang deuha lang siin inthiam lo ngawih ngawihin ka siam mai ang chu” ka ti a, “Nih leh inneih hmain midang nei ta se” a tih leh chuan, “Ka ţhen hmak ang, a tawk e lumam, kal nal nal rawh ka ti mai ang” ka ti ve thung a, “A phone pattern te kha i zawt tawh em? A kikawi kual nasa lutuk a amah leh khawl chiahin an hawng thei a nia” a rawn ti leh a, “Zawt ang chu, ‘naupang leh uiin an thai hawn loh nan ka ti’ a tia lawm” ka ti a, Kalvari nen kan inbiak tam chuan u Zira ka ring lo vek zel.

“Kan inbe ţhin tih a hria ka tih kha aw, engkim kan sawi dun vek zel tih a hria a, ka bulah pawh a fimkhur nasat phah a nia. A lo zin ţum te khan a phone a zakzeh loh chuan ka ban phak loh hlirah a dah ţhin. Mahse, bialnu dang a neih pawhin a duh ber tho ang che, ni lo se nupuiah a sawm reng lo ang che” a ti leh ang lawi a, “Pasal ka neih chiah hian mi fel leh fel lo inthlau tur zia ka hrethiam tawh a nia aw, i neih fuh loh chuan i chul rup mai ang” a tih zawm leh a, “Nakinah kan sawi leh dawn nia ka inbual phawt dawn, thil i sawi har thei si, rilru i ti buai zo vek zel. Sangkhuma ka zawt ve dawn” ka tih chuan, “Ka duhpui tho che a mah se rinhlelhawm deuhin a awm leh ţhin alawm. Ka thla a muan theih loh vang a nih hi, nangmah i pawimawh ber” a rawn ti a, kan inbiak zawh hnuah message in Sangkhuma hnenah, ‘U Zira nge Maski min duhpui zawk?’ ka ti veleh a, min rawn chhanna ka nghah laiin u Zira message ka dawng a, ‘Ka call thei lo che. Kalvari nen min rel a ni maw?’ a rawn ti a, Kalvari sawi kha a dik tak tak, chanchin kan inhrilhah a ngai zel tawh, kan inhrilh reng bawk a, Sangkhuma thung chuan, ‘Ka duhpui ve ve che a, mahse Maski ka khawngaih’ a rawn ti a, ka ţhiante ho hian min ti buai vek. Fawnvela ka zawh leh chuan, ‘I duh zawk zawk ka duhpui che’ a rawn ti a, ka inbual meuh chuan a tlai duai tawh, inchunga kal ka ngai bawk si a, muanchan chi pawh a ni tawh lo.

Ka inthlak zawh hnuah ka u te hnenah, “Nutei te inah ka leng dawn” ka ti thlap a, Maski hian thawm a la rawn nei miah lo va, u Zirbawnga ka buaipui dawn chuan ka be lo law law mai ang, tunlai chu phur hawrhnain min kiansan rih a nih ber hi. Bialpa ka neih loh lai hun kha a nuam daih zawk.

Kawngka ka kik rualin min lo chhawn nghal a, kawngkhar ka pawt hawng a, inchhung a lo hnawk nuai mai. Nunuin nui sang a, “Hna ka thawk a” a lo tih laiin Nutein, “Eng nge i duh a?” a lo ti a, “Lo riak la, kan khua ka la ngai a, mahni a riah ka peih lo e” u Lianpuii melh ru zak zak chungin ka ti kual vel a, “Ka peih lo haw rawh” a lo ti daih a, a ti lui tih hre mah ila ka thin a rim tho. Mahse, “Keimah chuan ka hlau deuh a, min riahpui rawh” ka la ti tho a, “Hlauh nei ho hi ka ten, hlau deuhin nangmahin mu ât la a nih chu” tiin ngeiawm deuhin a nui vel a, u Lianpuii leh Nunui an inmelh zak zak lai ka hmuh chuan, “Ka u te an mutui thei lutuk a keimahin ka khur char char zel” ka ti a, Nutei lahin, “I khurh nasat viau chuan siliper seh rawh aw” a lo ti ve zel a, “Zuk riahpui rawh a hlau a nih hi. Khatiangin ţhiante an ti vak vak ngai lo” u Lianpuiin a ti ta chiah reng a, “Ka peih lo a sin mawle” tiin Nutei a tho ţuah ţuah a, “Thlahrang hi an vawt vek zel an tia, a lo kal chuan khum mawngah ka muttir ang, ka ke a sa nasa ţhin a, thil vawt tlawh tur ka duh reng tho” a unaute hriat tur kher hian a ti a, Nunui leh u Lianpuii ka mangţha hnua pawna kan chhuak chiah chu an hriat phak hlau deuhin kan nui kar kar mai.

“Tikhan dil ngai loin an phal nghal mai alawm. Chhuk ang, zuk mu hmak ang” a ti a, a phur khawp mai. Ka ute pawhin ţha deuhin an lo bia a, riahpui ka nei chiah chu engmah ka hlau tawh lo, thlahrang film pawh ka en ngam ang.

“U Zirbawnga kha i hre miah lo maw?” ka ti ţan a, ngaihtuah ţha peih se chu a hriat ka ring tlat, ngaihţhat loh sa nak laiin, “Hre lo, u Zikpuii bialpa hlui kha a ang ka tia, mahse a ni lo ang” a la ti zui a, “Han ngaihtuah teh” ka tih chuan vin zet hian, “Ka ngaihtuah alawm mawle” a ti a, min nek pah kher lehnghal a, “U Zikpuii nen pawh inhre ţha lutuk kan ni lo, mi kâ aţangin a mizia ka hria a a ni mai. Kan venga mi a ni lo bawk a” a tih leh hnuah, “U Zirbawnga thlalak min thawn la, ka ţhianpa kan zawt dawn nia” a ti a, ka thawn vat a, a rukin a chanchin ka ngaihven tih chu hria se a lawm lo leh khawp ang mawle.

“Hei hi u Zikpuii bialpa hlui kha a ni em ka tia, ka thawn tawh, nghak lawk ang” a tih chuan, “Engtin nge a bialpa hlui tih i hriat a?” ka tih chuan, “A hmain vawikhat kan hmu dun a, chu pawh u Zirbawnga kha a ni ngei em tih ka hre lo. Amah kha ka hmuh hnu a ang ka ti ringawt a, a lo nih tak leh i vannei a ni mai. Ţhianten u Zikpuii leh a bialpa an tia, ka ngaihsak ve vak lo. A hming takngial pawh ka hre hleinem, a hnuah u Zikpuii bialpa ţhen lungleng chu ţhenawmte tan a tawrhhlelhawm lutuk an ti leh a, chuvang alawm a bialpa hlui a ang ka tih” tiin min hrilh fiah a, “A lan chian deuhna lo thawn teh a ti, khawimaw a dang min thawn leh teh” a tih leh takah chuan ka thawn leh a, midang a lo neih ruk reng leh ka ţhen ang a, ka star leh daih anga a ni mai.

“Chei….’an la ni reng a ni lo’m ni?’ a rawn ti. Engtin nge i tih dawn?” nui chung hian a ti a, “A thlalak dang hi han thawn leh teh” ka ti a, u Zira thlalak pathum vel ka thawn tir leh a, a ţhianpa lahin, ‘U Zikpuii bialpa hi min tihpui i tum em ni?’ a rawn ti a, nui lem a rawn dah tuar a, “U Zikpuii bialpa ţhen lungleng an ti sia, an inţhen emaw ka tia ti rawh” ka tih chuan a ti veleh mai a, “U Zikpuii hi engtin nge i hriat?” ka tih chuan, “Scooter an zuar a, an chhungkua chu an lar ve alawm. U Zirbawnga bulah pawh kolasib Tvs kha ti la, a hriat loh chuan a mak ang. Keimah hian ka hre vak lo ber zawk a, ralkhat hriat ang hi” a ti a, a thianpa lahin, ‘An fiam mai mai a nih kha, u Zikpuii zia chu khawpum hriat alawm’ a rawn ti then a, an ngaipawimawh lo dun nasa mai.

“A mak e” ka ti hluai a, min rawn en vatin, “Chei…i rilru a na a ni maw? Keichu ni ila ka hnek khawp ang” a tih chuan, “Na nang, u Zirbawnga leh i hmelhriat nu an lo inngaizawng hi a mak ka ti. Nang lahin i lo hre nghal mai bawk sia” ka ti a, kan intawh khawm dan hi a mak ve riau alawm. “Ka hriat nghal loh kha, a ang ka ti ringawt a ka ţhianpa kan zawt a nih kha” a tih leh chuan, “I sawi thawi vang alawm” ka ti ve tlat a, “Mi hriat deuh a ngaihzawn vang a nih kha, inthup lem loh chuan thu a thang chak alawm. Keini ang khawlai mi, mi dawr kawta ţhut ching phei chuan kan hre thei nasa, in khuaah pawh a ni ve tho ang” a ti a, u Zirbawnga chu a chak dawn lo khawp mai.

“U Zikpuii nen hian an inngaizawng nasa viau em?” ka ti a, min be reng a, nupuiah te min sawm a, Kalvari sawi ang khan a lunglen hnem tuah a hmang mai mai aniang. “Ka hrechiang bik lo ka tih mawlh mawlh kha, ka hmuh dun cheu pawh khan sawi lo la chu ka en thuak ang a, ka hre tawp nang, mu teh i ninawm” a lo ti a, “Naktukah ka ţhiante ka hrilh ve dawn khawp” ka tih chuan, “Amah zawt chiang phawt rawh, kan lo hai ve thei tho. ‘A ang’ ka ti ringawt tak tak a nia aw” a la ti ţang ţang a, keiin kawp thei rengin ka kawp duh lo a, min lo kawp chuan a chak lo ngawt ang, Maski ka biak anga a be ringawt a nih chuan kan inang chiah a ni mai.

Zing thawh veleh Kalvari ka call nghal a, Nutei lahin min khan bet ţung a, chet pawh ka che thei lo. “My friend” ka tih chuan, “Remkalam, dar 4 chiah a la nih hi” a rawn ti a, “Zing a ni tawh tho alawm. Enteh, u Zirbawngan bialnu a nei an ti, ka inngaihtuah nasa lutuk a ka harh hma phah. Ham ri bui bui lo khan tihdan tur min hrilh teh” ka ti a, “Amah i hrilh tawh em?” a rawn ti a, mak ti âwm pawhin a awm lo.

“La hrilh nang…ka hrilh hmasa ang che u ka tia, kan hriatchhuah fel khan a tlai tawh sia, ka harh veleh ka lo hrilh che” ka ti a, “I rilru a na em?” a rawn ti veleh a, hrehawm ti anga awm ka hreh sia, “Ka za zawk a a zo der” ka tih chuan a nui hak hak mai.

“Amah bia la, a insawifiah dan a zirin tihdan ka hrilh ang che” a tih chuan, “Aaa…my friend, keichu insawifiah ringawt ka ring peih lo. U Zikpuii an tih hi biak emaw hmaichhana ka hmuh phawt loh chuan kan ni lo ti mah se ka awih chuang lo ang” ka ti a, hrehawm chu ka ti ve deuh nain ka inhnem char char a, ka thin a rim daih.

“A lo ankhum hrep mai tur che a sin” a rawn ti a, ka hlauh loh zawng tak a ni. “Min han ankhum teh se, ka ankhum let ve hrep mai ang. U Zira phei chu Africa a thawn vang vang a nia ka duh, lerh lutuk mai” ka ti khar khar a, lehlama insawifiah char char chunga lehlama insawi rinawm char char ang chi kha a nih duh hmel.

“Thawn mah la a lo let leh tho ang. Ţhen chhin la a hriat mai ang” a tih chuan, “Min neih let tuma a beih leh beih loh i hre duh a ni maw?” ka ti a, “Hre duh e…u Rinchuta pawh a buai em kha” a ti a, ka ngaihtuah a, a ţha viau maithei a ni.

“In awmdan a zirin midang chu hrilh chauh rawh, i ţhian thar hnen aţangin chanchin i hria a, Pathian remruat pawh a ni maithei a sin” a rawn ti leh a, “Aw, u Zira chu ka bia ang” ka ti a, kan inbiak zawh hnuah ka mu leh a, ka inlak hran rualin ka ke pakhat hi Nutein a rawn khan chawrh a, thinrim sa nen ka ke lehlamin a aia nain ka khan ve chawrh a, u Zirbawnga biak hun mawlh ka nghakhlel tawh, ka ring a, ka ring lo tho bawk sia, hah mang si lo va ka’n hui ve pap pap chule.

Dar7 velah ka harh leh chauh a, ka uten min kaitho bawk si lo, Nutei phei chu a la mutui ngang mai. A zangthal diai a, ban phar kak ţai chungin a ang phuau a, hnek pawp mah ila a harh lo ang.

Ka uten thawm an neih tawh avangin, “Ka zun a chhuak lutuk” tih paha inhup chawi chawi chungin bualinah ka tlan lut a, kan mi lerha ka’n bia ang e. Ka call ta ngei a, ka nghah vang vang hnuah, “A la hma lo mi?” thophang aw zet hian a rawn ti a, “Tho teh…tu nge Zikpuii?” ka ti nghal thawr a, “Kan khua a mi” tih zawngin min la chhang zui a, “Miin i bialnu angin an sawi a nia aw” tiin ka chhuahchhal a, a ngawi vang vang mai.

“I muhil leh daih mi?” ka tih chuan, “Tu nge sawi?” a rawn ti a, “Nutei ţhianpain” ka tih veleh, “A hresual a nih chu, ka ţhiannu alawm. Sumdawng ve tho a nia, kan inzui nasa” a ti a, “I bialnu angin an sawi a, a hriatchian hmel ropui lehnghal. Mi hian lerh deuh angin an sawi ve ziah che” ka tih leh chuan, “I awih zel a” a lo ti a, “Zikpuii a nia, nang Zira a nia, hei vang hi mi AZZ an zai khan i lam a?” ka ti chiah chu a nui hawk a, “Hmeichhia hi chu a” a ti a, a nuih a za viau mai.

“I ţhiannu a ni tak tak maw?” ka ti nawn leh a, “Ni ka tih chu…min ring lo lutuk a ka ning tawh” a rawn ti a, hrethiam lo zeta, “Engmaw i nin?” ka tih chuan, “I tih dan vel hi, min ringhlel reng a, ka ning ve deuh tawh. Ka awmdan aţang hian ka rintlak zia hre tawh tur chu i ni” a ti a, a dik ve tho mai. Ka ringhlel reng hi a chhan ka hre bik lo, ka duh lutuk vang nge ka duh loh vang tih te hi ka hrechak a nia, ka inhrethiam bet but mang si lo va, bialpa neih chu rilru a hah duh emai keipawh hian ka ning deuh tawh.

“Ka duh vanga ringhlel che pawh ka ni hleinem, mi sawi vang alawm” ka tih chuan, “Chu chu alawm ka nin. Min be rih lo la, hun inpe mai rawh” a rawn ti a, “Inţhen ang i tihna maw?” ka tih leh chuan, “A ni mai…a ninawm em a, ţha deuha kan ti ti dun theih hunah kan sawi dun leh dawn nia” a ti leh ang lawi a, “Term neia inngaizawng kan va ang awm ve” ka ti ve zel a, “Midang thusawi apiang rin zel ţhat loh zia hre ve hrim hrim rawh. Theihtawp i chhuah laiin lerh ti reng che i la i ning ve tho ang. Tukţhuan eikhamah ka haw ang” a ti a, eng emaw min deng dawt tu chu a awm ve a, ka sawithiam chiah lo, hrehawm chu ka ti ve deuh. Mahse, “I haw dawn nia” ka ti a, “Tak tak maw?” a rawn tih chuan, “Aw, thil inthlak thleng thut hi a mak a, ka insiamrem thut thiam lo. Kan nih hnuah ka star lai che kha ka ngai daih a, a mak ve e” ka ti a, bialpa neih hma, duh duh star a, duh loh hnua a ruka ban leh mai hunlai kha a ngaihawm leh tawh zawk.

“Aw le…mangţha le” tih leh phone dah a rual a, min ţhen ringawt nia! Ka tawt ve deuh nain na veng veng ang kha a awm chiah lo a, tleirawl at lai star mai mai ang kha em mawni tih mai te pawh a awl, sawifiah dawnin tleirawl thinlung hi sawifiah a har ţhin bawk si, ka lo nihpui kher kher a ni.

Nutei a che ţuah ţuah a, a mit nuai chat chat paha, “Eng nge chanchin?” a tih chuan ka lo hrilh vek a, “I rinhlelh reng chuan chân i hlau tihna aniang” a ti a, a inlet thawk a, a muhil leh nghal daih a, “Awii ka theihnghilh” tih pahin pindan aţangin ka tlan chhuak leh a, ka va buai tak e aw. Ka tlan kual nasa lutuk a ka kezungte phei chu ka pheikhawk kaihna pawn lamah a chhuak daih tawh. Min ţhen chhan lah kha a ho si, nuih loh ve tal tur a nia, a nuih hnuah min ţhen kher a, a awihawm loh zo vek.

Kalvari bawk call lehin a lak veleh, “My friend, u Zirbawngan min han ţhen daih chu le” ka ti a, “Hello ka tih hun nghak ta che, keimah, Rinhlua zawk” a rawn la ti zui a, a va han hun lo tak, luck hi a luck lo a ni ber e.

“Khawiah nge Kalvari?” ka tih laiin, “Pindanah naute nen an awm. U Zirbawnga nen chuan inţhen hlen in tum em?” a rawn ti a, a ngai ho mai sia maw, hello a tih hun ka lo nghak hle hle lo a ni.

“Inţhen hlen kan tum leh tum loh kan sawi hleinem” ka tih chuan, “In inzawm leh mai ang. In hmanhmawh âwt âwt ka ti reng a ni” a rawn ti ve leh a, u Zirbawnga ang mai. “Kalvari chu nakinah min lo biak tir rawh aw” ka ti a, “Aw le” a ti ve thlap a, phone dah nachang a hre lehpek lo aniang thawm ka la hre vek a, “Tunah khan pe law law mai rawh” ka tih chuan min chhang tawh lo thung.

Ka nghah vang vang hnuah, “Riri, Remkalami leh u Zira te an lo inţhen daih a nih chu. Aieng kha la inhnawih duh rih lo mai rawh, an la inţhen ve bek bek chauh a, mo ţhianah i la ţang har dawn emai” tiin a nui hawk hawk a, “I be duh em?” a tih leh takah chuan rang tawkin ka dah a, keimah zawkin ka dah nghal turah a ngai aniang chu, u Rinchut but buta tak hi chu aw…u Zirbawnga nen a kan inţhen hi thosi seh ang lekah a ngai niin a lang.

CONT..

Angel Pops
Author: Angel Pops

This Post Has One Comment

  1. Hazel Ralte

    Thil tam tak, nunhlui te thlengin min han dâwn kir tir a.. Hemi episode chu a tir lam ka nui a, a tawp lamah ka lung a chhe daih mai. A chhunga thil inphum ru hi hrethiamtu tan a hlut zia mai hi.. A ngaihnawm leh pek e.

Leave a Reply