You are currently viewing Keimah Thingtlang Nula  S -2

Keimah Thingtlang Nula S -2

Spread the love

KEIMAH, THINGTLANG NULA S2-14

Lianpuii bulah u Mama nen kan ţhu a, a chep si, kan dar a insi ral a, hmun dangah ka la ţhu ngam chiah bawk si lo, “Ka nau hi lo hruai ve rawh aw Nute, i zirna hmuna a zir duh loh leh hmun dang i kawhhmuh ang a” u Maman a tih te chuan ka che sek a, kan tawt lutuk a hmalam hawiin ka ţhu thei lo.

“Ţhutthleng tê berah berkher inhnawh mah ta che u” Nutein a lo ti ta chiah a, “Pal phun fuh loh in ang emai” a ti leh kher a, pal nen kher kher chuan tuman min la tehkhin ngai lo. “Nutei bulah sawn va ţhu rawh Remkalam” u Maman a lo ti a, a nui ngei bawk a, a ti lui chiang alawm.

Muangchangin Nutei bulah ka insawn phei a, “Ka chapal te hi i rap bal vek alawm, i thil siam tui loh loh nen” tih paha a chapal ti fai tura a kun chu ka phu zawk mai, a sam a sei emaw ka tia, a hnunglam a kaw vek! A maksak hmel sia, keichu ka kawm peih lo e, a thin a chhiat hmel ropui si. A chapal hmawr a tuai nawk nawk hnuah ţhut ţhat pahin, “Eng nge i zir duh a?” pangngai deuh hian a ti a, a mithmul pawh ka hmu chiang ve chauh a, a kheng nasa mai.

“I mithmul kha i pawt sual em ni?” a zawhna pawh chhang lo va ka tih chuan, “Chei….a â maw? Hetiang hi pawh sual a ni lo, style a nih hi” duhdah zetin a lo ti a, “Ti ve reng reng suh aw” Nunuin a lo ti ve thuai bawk a, “Sam ziah khên te, mithmul pawh khên te hi nalh a ti tlat a, ka bialpa chawn hmul pawh a lo ziah khên sak vek” a ti zui hlak hlak a, kei aia kum2 a an naupan chuan an la naupang lehzual viau ang a, an kum ngaihtuah chuan an chet phung chu a mak hran lo.

“Amah pawh a kheng alawm, i bialpa ve hi chu a he bui a, a inhmeh tawk chiah” a tih hnuah Nutei vêk chuan, “Engmaw zir i tum a?” a ti nawn leh a, “Sam tan leh sam pawh te, makeup leh kuttin chei te, chi hrang hrang a ni mai” ka tih chuan, “Keipawh ka kal ţha peih lawk lo a, nimin aţangin ka kal pangngai chiah a, kan zir rual dawn nia” a tih chuan ka lawm ngei mai.

“Ka thiam vak lo teh mai a nia aw” tim daia ka tih chuan, “Zir hma a thiam sa i hria mi? Zir sil tawh pawn ka la thiam loh hi. Khawi bump bump” thawveng zeta tih pahin a kut a hum a, ka hmazawnah a rawn dah a, “Engtin nge ka tih ve dawn?” ka lo tih chuan, “Kan tum dan kan nemnghet tawh a, kuttum kan intauh tir ang” a ti then a, “Fist bump a nih kha” Nunuin a tih veleh, “A koh duat dan bump bump kan ti mai zel” a ti a, a duh anga ka tih hnuah lungawi hmel deuhin a ke a phut hlarh hlarh a, ka mi tawn tharte avang hian u Lalhuma thlengin ka ngai vek tawh.

“Haw phawt ila, naktukah i han sawm chho dawn nia” u Maman a tih takah chuan ka tho vat a, Nutei lahin, “Mangţha aw Remkalam” a rawn ti leh kher a, a lo hre fuh kiau a nih dawn hi.

Pawn a kan chhuah veleh, “Ka kawm peih bawk lo” ka ti nghal a, “Bengchheng suh” lo ti vatin u Mama chu a chhuk nghal hmawk hmawk a, kan inchhunga kan luh hnuah, “Aizawl i kal khat a, nangmahin khawiahmah i kal thiam lo vang, a zirna hmun vel kan hre ve bawk si lo, Nutei khi i zui a ngai” a ti a, tum bura ţhut hnawk pah a, “A maksak emai” ka tih chuan, “In in ang chiah a nih chu” a la ti zui a, ka hnual lutuk a, chaw ka ei na a la rei loh vang ni lo vin chaw ei pawh ka chak lo zo vek.

“Fimkhur deuh la, Nutei khi chu a maksak bakah inlak maksak tum chi a nia, hmeichhe pangngai si a unauten an hlauh theih nan mipa anga awm a tum tlat a, a mithmul khi hmun thumah a inţhen a, ama lu chauhah hairstyle chi thum vel a awm” u Bawihan a lo ti ve thung a, “Incheina a duh changkang bawk a, pheikhawk te hi a ţha ber ber a duh a, Jordan mai a duh tawk lo, Lal Jordan kher a duh kan tih ang chi kha a ni” a tih zawm leh a, “In sawi hmangah khan pahnih chauh an ni dawn emaw ka tia, pathum an nih reng kha” ka tih chuan, “Phir te kan sawi belhbawm a nih kha. U Lianpuii khi chu a fel lutuk” a ti a, u Bawiha meuh pawhin a u chuan ka u ve a ngai tihna a ni mai.

“Keini chu ţhutthlengah kan mu ang a, pindan saw nangman i chang dawn nia. Mamawh i neih chuan Bawiha angin ka nu te hrilh nghal zel lo la, keimah min hrilh rawh” u Maman a tih chuan, “Hmh..pawisa i neih loh kha” ka ti hmak a, “Lehkhazir chungin hunawl ah ka inhlawh alawm. Ka bulah sawi zel rawh” a tih leh chuan ka hauin ka en a, lehkhazir bak engmah an ti ngai lo emaw ka tia, a inhlawh reng sia, hei vang hi aniang ka nu’n a ţan hlur reng ni.

“I kua eng nge a an?” ti a min zawh chuan, “Awii..ka kua a phits nasa lutuk a kaw tih tham pawh ka nei tawh lo” ka ti a, an lo nui hawk a, “I zia deuh chuan va mu rawh, thawh hma a ngai dawn” u Mama bawkin a tih leh takah chuan ka tho nalh a, “Ka pawisa saw ka chhiar thlap a nia, ka mut hlanin lo khawih miah suh u. La lo mah ula a rim a danglam leh danglam loh thlengin ka hre thei a nia aw” ka tih kha kha hnuah pindanah ka lut a, khum a zau si, a kil aţang hian zankhua paw’n a sir lamah tawlh ila ka tla lo vang, mangchhe deuh tana siam ni awm tak a ni.

Ka uten rizai leh lukham an rawn lak hnuah phone ka phawrh ve ta nge nge a, message leh missed call a tam tawh nasa mai. Ka ţhiante an thinrim hle tawh a, Sangkhuma phei chuan milem inham sen mai duhtawk lo vin Hulk intisek lai te, wrestler thinrim lai te min rawn thawn ruih tawh, a thin a rim fal awm hle mai. Group ah lah, ‘Aizawlah tui a han in dek dek a min be duh lo nghal ringawt’ a tih loh leh, ‘Aizawl thli in a hriatna a chhem bo aniang” te a tia, Sangkhuma beng turin ka haw zuai dawn em mawni le.

An vaiin a rualin ka video call a, Sangkhuma leh Fawnvela, Kalvari leh Puipuii te an rawn lang a, Nunhlimi chu a la ve thei lo, a mu leh tawh aniang. Midang an nuih ţha laiin Sangkhuma a tum hmuk a, a hmaiah hmuihmul leh khabe hmul lem an la ziah sak zui, a u fate an leng leh tawh aniang.

“Hi…everyguys” ka tih chuan, “I thleng tluang maw?” Kalvari in a lo ti nghal a, Sangkhuma thung chuan, “Ţhahnemngai deuhin ka hua che” a ti hmuk a, “Ka buai zia chu a, ka thleng chiah kha ba ţhingin ka chhuak leh nghal aw. Naktuk aţangin ka zirna turah ka kal nghal dawn” ka ti a, Fawnvela a ţhen reng a, engmah a sawi dawn lo emaw tih tawh hnuah, “Aizawl i van ngeih em em…i ngo nghal vek alawm. I rawn haw meuh chuan lehkhapuan emaw kan ti ngei ngei ang che” a ti a, ka nui uar uar chu, “Nui suh, ka fiamthu lo” a ti hmuk a, “I ngo tawh sia, i chhuah phei chuan i haw hnuah inbual uluk rawh aw, i ţial palh ang” a ti leh a, Kalvari bulah u Rinchuta a rawn dak ve de de a, “Ka tengtere tui vangin i buai phah a ni awm a, a zia lo hle mai, ka tihpalh sorry” tiin a nui vur vur a, “U Rinchuta ve hi naute an nei a a nui reng mai, a mutthilh lai chiahin a nui lo, a ha hni ro lutuk tur ven nan tel a tat ţhin” Sangkhuman a lo tih chuan kan nui dar dar a, “U Rinhlua hi chu a awm lo ang tih in hlau awm mange…ka pasal chuk chuk hi” Kalvari in a ti vel a, “Ka ten lutuk, hemite nupa hi an inchhun zo tawh a nih hi, ka pi Binladari takngial pawhin pumpui hnûn na damdawi ka ei tam phah a tih kha” Puipuiin a lo ti hlak hlak a, “Hetia han ti ti khawm takah chuan ka ngai cheu e…ka lo haw chak tawh, in bulah ka awm chak, kan khawchhung mitthla ah a awm, naktukah ka lo haw lehnghal anga youtube aţangin ka zir leh si mai ang” ka tih chuan u Rinchutan, “I kal ta sa sa i ti hram hram ang chu. Nangte chuan awmphaw bakah rilru phaw i chhawm a, i lung a leng rei lo ang” a lo ti a, “Chutiang a ho, sek deuh deuh pawh an tihrawlin an lunglenna a dal ngai lo” ka ti a, ka ţap pur tawh mai a ni.

“A tam berah thla khat vel bak a ngai lo ang. Zir la, helamah dawr i hawng dawn alawm” Kalvari in a tih chuan, “Puipuii khan min zirtir leh si se ka ti e” ka ti a, Puipuii lahin, “Ka zirtir mai ang che ka tih laiin ka ring lo che, khawpuia zir ka duh i ti tlat a nih kha. Lo haw mahla ka zirtir lo vang che” a ti bur a, “Sam a siam thiam hleinem. Puipuii pawh a lo chho dawn alawm” Kalvari in a tih takah chuan ka ţhu ngil auh a, “A ni maw? Engtikah? Aizawlah i awm ve dawn maw?” ka ti nghal chul a, “Pasal ka nei dawn ka tih kha, u Zira pawh kan sawm ve dawn nia” a ti a, a nei tak tak dawn reuh aniang a, Sangkhuman, “Mas–” a lo tih veleh Maski a tih hlauin ring tawkin ka nui a, phawk deuhin min en hlawm a, “Huiha…Sangkhum, Mas hmain ka lo haw ang” awmze nei zet hian ka ti a, u Rinchuta hriat laiin Maski-a hming a sawi chi loh reng reng.

“Pasal ka neih dawn chuan Sangkhuma te ho pawh an lo kal vek a ngai ang. Ka lo haw chho ang a, palai an lo kal ang” thutak deuha Puipuiin a tih leh chuan, “Ka pi Binladari te engtin nge an awm ang? Ka pu a hrisel lo bawk si, dawr nghah ngai bawk, inchhung chet ngai bawk, vawk chaw pek zawng zawng nen ka pi kut vek a ni dawn a” ka lo ti a, haw vat ka ngai tak tak a nih hi. “Ka hre tawh bik lo, ka pi chuan kan awm thei ang a tia” a ti ban charh a, Kalvari pawh a nui tawh lo reng reng.

“Keimahni hi min ring tlat lo a, Puipuii damloh lai pawh khan dawr ka lo nghah chhawk ang che ka ti ziah a, kan hlawk loh phah ang a ti tlat alawm. Mahse, tual phiah vel chu u Lalhuma leh pu Taipuia ten an tihsak thei vek” Sangkhuman a ti zung zung a, “Kan ngaihtuah ţha leh dawn a nia” u Rinchutan a ti ve bawk a, ka chauh an rin deuh avangin kan inbe rei lo, kan in mangţha hnuah u Ziran min lo call nghal a, a mangang leh tawh ngawt ang chu.

“Eng nge i an? Rinchutan a lo sawi a” vin hauh lo hian a rawn ti ve ngei a, u Rinchuta hi chu sawi awm leh awm loh a hre lo reng reng. “Ka dam tawh” ka tih veleh, “Engtin nge i awm dawn tak?” a rawn ti leh a, “Naktuk aţangin kan inchung nu ka zui dawn. In khuaa mi te an nih hi aw, i chanchin ka zawt dawn khawp” uar zeta ka tih chuan, “Kolasib khaw mi zawng zawngin min hre vek hleinem” a rawn ti dam thluam a, “Diakkawn a dawr in neih chuan an hria ang che. Sensiari hming ka sawi mai ang” ka tih tak tlatah chuan, “I zawt dawn nia, anmahni kha ka hre ve lo chiang sa” a ti nghal ringawt a, “A chhe lam hlirin an hre leh tho ang che” ka tih veleh, “Ka sual vanga min sawichhia an ni ngai lo, min fak peih lo mai mai alawm” a lo ti a, a duh lo ve khawp mai.

“Ka mutna bul tukverh aţang hian van ka hmu thei a, kan khua ka ngai” ka ti ve a, “Khua nih ka chak” a lo ti daih a, “Lo uang zel lo teh u Zirbawng, lunglen i hnawt ţiau” vin zeta ka tih chuan, “A nih leh sawi rawh” a ti ţha leh a, “Kan in tal ka hmu chak” ka ti ve leh a, “Aizawl aţang chuan i hmu pha awm si lo a, mitthla mai rawh” a ti a, a dik ve tho mai, ka nu leh pate an mu tawh angem le tih thlengin ka ngaihtuah a, ka pi Binladari in kalkawngah ka mitthla thei hial alawm.

“Remsial” thum deuha a tih leh chuan, “Eng nge?” ka ti vat a, “Theihtawp ka chhuah tih i hria em?” ti a min zawh chuan, “I sawi a ka hre chiah” ka ti fiamthu a, a duh lo ngang aniang a lo rum nghat a, “Ka fiam mai mai che emaw ka tia, ka thutak daih a, pawh kual mai mai rual ka ni tawh lo a nia” awki dam deuhin a ti leh sup sup a, “Fiam mai mai rual lek ka ni tawh bik lo” tih pahin ka bawkkhup a, ka lung a leng lutuk a, ka mutthilh theih pawh ka ring lo.

“Ka fiam hleinem che, theihtawpin ka thawk dawn a, keichuan hah deuha thil dang i zir ve kher kha ţul ka ti lo reng a, sumdawn nuam i ti tho a, dawr pawh kan buaipui mek a” a ti bul bul a, “Thiam thil neih ve ka duh alawm. Innei ang ti tawh miah suh” ka tih chuan, “Ka ti tawh lo vang, i sawi hmasak loh chuan ka sawi hmasa leh tawh lo vang” nghet churh hian a ti a, “Ka rilru a nghet a, bialnu ka thlak kual ve reng ngai lo, ka thusawi tawh ka hre reng zel a, ka thutiam ka ti hlawhtling ţhin bawk, chu chu i hrereng dawn nia” a ti nghat nghat a, “I va han hah hmel em em” ka lo ti daih a, “Ka thutak hmel ve deuh lo mi?” a ti he haw a, “Tak taka ka chungah ui a bawk a, a harh ka hlau a” a tih zawm leh a, ka chhan hma hmain, “I mut a chhuak tawh em?” tiin min rawn zawt ve khauh a, “Chhuak nang aw…u Lalhuma leh pu Taipuia thlengin ka ngai vek tawh” ka ti chiah chu a nui hawk hawk a, “Awh…awhh…awh” a ti zui mawlh mawlh a, hlauthawng deuh a, “Eng nge a?” ka tih chuan, “Ui a harh a, a chhuk daih. I khua a va har awm ve” a ti a, a ri rawk rawk a, lighter a talh ri khap a, mei a zu dawn aniang, Kalvari nen a meizial kan zuk ruk ţhin laite min ti hrechhuak alawm.

“Ka khua a har lutuk a ka na vek tawh” tih pahin ka mu zangthal leh a, “Ka awmna leh i awmna a inhnaih lutuk. Kolasib aţanga Aizawl chu mitkhar kar lekah a thlen theih” a rawn tih chuan, “Anih chuan ka khum bul tukverhah hian rawn dak teh hei ka mit ka khap” ka ti a, a lo thaw hak a, “Min runluih ziah suh Remsial, karleh lamah pawisa ka rawn thawn ang che” a ti leh ta daih a, “A ngai lo” ti mah ila, “Khawpuia awm chu rualawh a na duh a, i pawisa khawl kha i zir man atan dah la” a ti a, ka bawkkhup leh thawk a, ka mut ngaiin ka mu hle hle thei lo reng reng.

“A ngai lo tak tak, ba nei angah ka in ngai dawn a, ka duh lo” ka tih pawhin, “Ba ka rul cheah ngai mai rawh” a la ti zel a, “Awii…u Zirbawnga chu what a very luhlul ţhaks, ka duh lo ka tih chuan no a ni mai” ka ti hlut a, ka duhthaw lutuk a ka sweet hmuam lai a la thlawk daih zui, a tui dawn chiah a sin mawle. “Min hnial char char zawk a nih kha, what a very Remsiali” a rawn ti ve a, “Aaa…keichu phone a inhnial hi ka ning, a inmelh rum tel theih bawk si loh, thil dang sawi ang” ka tih hnuah, “Taka, u Zirbawng” ka ti leh hluai a, “Ka ngaithla” a lo tih chuan, “Min ngaizawng hmasa âwt âwt ti tawh suh, kha kha chu chhiar tel lo ila, nangman min ngaihzawn aţang khan ţan daih ang, khatih hunlai te kha chuan mipa hmel keu deuh chu ka star vek” ka ti bawrh bawrh a, nui zui awr awr chungin ka ţhu ta nge nge a, lunglenna reh ţhakin bia ila a ni mai alawm.

“Ka ngaizawng hmasa hleinem che, i sam a tawi mût a, i beng a parh hâk a, phawk deuhin i meng kul zel a, min hlau emaw ka ti. Mahse, i au vak vak zel hnu kha chuan keiman ka hlau che” a tih chuan ka kut ka beng thak a, “Awii…what a funny thing, lo hria ila ka tih ţhaih tur che a nia, ka hre lo hlauh a lawm hle rawh” fiamthu a ka tih leh chuan, “Ka uang a nih kha, hmelţha ka ti nghal che mahse ka duh hmasa lo che” a la ti tlat a, “Fiamthu i duh ka ti ţhin a” a tih chuan, “Aw, nangmah chiahin i hrethiam a nih chu. Fiamthu ka thawh ve pawn miin â min ti zel a, ka ip deuh leh inti fing min ti leh a, ka awmdan a ka lungawi nen mi hi an lungawi thei ngai lo” ka ti duah a, “An va â ve” a lo tih chuan, “Kei aiin an â zawk tiraw?” ka ti a, a lo aw rang nasa mai.

“Awii…a nuam ţhaks, innei ang i tih reng loh hian kawm i nuam” phur zet hian ka ti a, “Ngaihchan thiam che ka zir a nih hi” a tih chuan ka earphone hrui hum chungin ka ţhen vak a, reilote kan inbiak zawm a, ka chauh a hlauh avangin min mangţha a, beidawnsan ka tum hma lutuk aniang tih zawngin ka ngaihtuah leh daih tawh. Ka thluak a thawl viau nain a insiamrem nasat zia hi ka hmu thiam ve a ni.

Mut mai mai pahin message ka en leh a, min call ve miah lo nain Maski-a message a lo awm nual mai. U Zira hnena, ‘kan in tal ka hmu chak’ ka tih kha hria niawm takin pawn aţangin kan in thla a lo la a, ‘Dawr ah ka kal a, in in ka kal pel a’ a rawn ti a, a hnuaiah, ‘I ngaihawm ve reuh a’ a rawn ti leh a, ‘Ka call hreh deuh che sia, ka call che i duh chuan i rawn sawi dawn nia’ a ti bawk a, be chak ve tho mah ila ka chhang lo. Message ka hmu tih a hria aniang, ‘Tui deuhin mu rawh’ a rawn ti leh a, ka chhang ta chuang lo a, Aizawla ka awm bo hi remchangah hmangin thlah ka tum dawn em mawni ka tih rilruk vang a ni. U Zira hi hun ţha pek leh ka duh deuh a, ka rilru a buai ve nasa mai, nuih liam mai mai chi pawh a ni tawh lo. Maski nen kan inkawm nel hmain u Zira nen kan lo ni hman khanglang bawk si a, Maski nen hian kan la ni lo va, thlah dawn chuan thlahna hun remchang tak a ni. Khawngaih viau mah ila u Zira a insiamţhat zel phei chuan rilru a nuam thei lo, Sangkhuma a buai ve zel a ngai a, a tawrh nasat phah bawk si a, a what a funny thing tawh tlat lo a ni. Mi fate pawh a rualin mi pathum pali ten an ngaizawng a, bialpa pakhat chiah an nei thei tho alawm.

Maski ka be duh lo thut hi ka inthiam lo ngang aniang ka mumangah a piin min lo la hran khum zui a, a sam var vek tawh kha a thur bum a, “Maski i be duh lo vel maw?” a ti ţeng chhuai a, thaw hulh hulh chunga rum zeta min melh laiin hlau hlawpin ka tlanchhia a, tar zur tawh si a tlanchak em em mai lehnghal, ha na vek khawpa insehchilh chunga ka tlan pawhin min umpha zel a, ka beidawn tawpah a lam hawiin ka ding a, a kawngfual var hak pawt chhing chung hian min zuan khum zak zak a, pitar thlahrang fit tak a ni. A ţumna lama ka inher leh hnuah a au vak a, “Maski i be duh lo vel maw?” a ti ţeng leh chhuai a, chumai chu duh tawk lo vin au ţial ruai ruai chung hian a ban a phar a, vanah a lawn dawn emaw tih laiin a inti sek a, rum nghut nghut chung hian rum zetin min melh leh a, a inthing nawk nawk a, zau deuhin a ang vak a, a kuta a khabe a vawn chuan a khabe a thlawn dawn emaw ka tih nen a ha lem a la chhuak a, a upa takzet tawh aniang a ha lem pawh a bal ţhen tawh a, rum leh nghut paha a ha lem a min vawm chiah chu ka phu zawk a, ka harh chiang teh a sin aw.

Khua a la var bawk si lo, tukverhah chuan Maski-a pi a lo dah thut hlauin parda ka pawt phui a, phone ti êngin whatsapp ah ka lut a, Maski-a status ka la hmu zui a, ‘ka mumangah i pi thlahrang a lo inti sek a’ tih chi lah a ni der si lo, a thi dawn tawh em mawni ka ti rum rum hial a ni.

Dawih nak laiin ka mumangah thlahrang ka hmu kher a, tar zawkin min zuankhum zak zak lehnghal a, a ang sawi bawi bawi bawk si, ka muhil thei ngang lo chu pindan aţanga chhuakin light ka on a, u Mama ka kaitho ta nge nge a, “I mu thei nange?” a mutna aţanga thawh paha a tih chuan a ke lamah ka ţhu a, “Ka mumangah Maski-a pi thlahrang a lo inti sek a” zawi te hian ka ti a, a thinrim ka rin tehreng nen a nuih a za khawp mai.

“Thlahrang an inti zek ngai em ni?” a tih chuan, “Ka hre nang ka la hmu bik hleinem, a kawrfual vak hak kha a hum tawm te te a, min zuan khum zak zak mai a ni” ka tih leh chuan, “Lo kal rawh” tih pahin a tho a, lukham leh rizai a lak leh hnua pindan lama a kal chu ka zui a, “Pher ka phah anga chhuatah hian ka mu mai ang, khua a var ţep tawh, mu leh rawh” a ti a, u te bula na na na chuan thla a muang deuh bawk a, ka mu ve leh mai a, mahse ka muhil thei chuang lo.

Ka inlet tawn sek a, ka pang a kham ţhum tawh tihah, “Umm..tho mai ang” tih pahin u Mama a rawn ţhu chhuak leh a, “Thingpui va lum rawh” a ti a, ka tho rang khawp mai. Mut leh ai chuan thingpui lum char char ka duh zawk. Kan thawmah u Bawiha rawn harhin kan thawhhma chhan min zawt a, u Maman a lo hrilh ve chiah chu, “A zuan lai tak khan tho vuakna in lo vaw ta che” a ti a, a mu leh daih a, a ngainep ve khawp mai.

Zan lama u Maman chawhmeh a siam lawk vek avangin tih tur a awm si lo va, pindanah bawk ka lut leh a, khua a var tawh tho a, kan khuaah chuan awm ila Sangkhuma te inah kalin ka kaitho ang mawle, a nih loh leh ka pi Binladari dawr ka hawn pui ang a, vawk chaw ka pek pui bawk ang a, ka nu pawhin min tir leh daih tawh ang. Hetia ţhu mai mai lo hian kan ţhenawmpa hnang hlai en tur te a awm leh tawh ang a, Aizawl chu a reh rei bik emai a nuam lo.

Ka tih tur hre lo chuan u Zira ka call ta ringawt a, rin loh deuhin a la ve mial a, “Aaa…u Zir, tho teh tih tur ka hre lo” ka ti nghal thawr a, u Lalhuma te hmel hmuh tur awm bawk si lo, a ninawm emai.

“I muhil lo mi?” a rawn ti a, “Ka mumang a hrang a, mutthilh hleihtheih a ni lo” ka tih chuan, “I va chau duh awm ve” mutchhuah hmel deuh hian a rawn ti a, a mutthilh daih ka hlau a, tih tur dang a awm bawk si lo chu, “Ka tan i tho hma peih lo maw? Ţhut pawh i ţhu peih lo a ni maw?” ka ti kual vel a, “Ka harh reng alawm, i mumang chu engtin nge a hrân a?” a tih chuan, “Ka mumangah thlahrangin exer a la a ni ber mai” ka ti a, “Ka hlau tawh lo, tih tur awm lo hi ka ning zawk” ka tih leh chuan, “Kei ka buai nen, ka tho anga dawr tur ka han enfiah ang e, zingkar aţangin tih tur a awm, kan in hi a ninawm hman lo” a rawn ti a, innei ang a ti dawt tawh lo nain ka hrethiam ve vek.

Chaw ei dawn thlengin ka bia a, chaw ei laiin ka nu’n Maski-a pi thih thu min rawn hrilh a, u Bawihan, “Zaninah a tak takin a rawn tlawh tawh dawn che a nih chu” a ti bawk si, ka hlau thar riau mai a ni. Maski lah a khawngaihthlak a, biak loh ka tum nen tuarpuina thu tal thawn ve loh chu a mawi lo a, nakinah sawi tur ka ngaihtuah ang.

“Phir te khi an zia a inang lo a, Lalrindiki, Nutei zawk khi mi ngaihsam, vei nei lo, inlak mak sak tum, thiam nei lo, rilru hah chuang lo ang kha a nia, Nunui erawh a fel khawp mai. Lalrinfeli a nia, Nunui tih a duh zawk. A zirlaiah rilru a pe a, in lamah pawh a zir chhunzawm reng zel, i zir tur ang hi zir zawk se ţha tur a nia. Lianpuii khi chu school ah a thawk a, sawiselna tur a awm lo, a bu ang thlap a ni mai” u Maman a ti dap dap a, “Nizana kan kal kha chuan Nunui khan Nutei kha a kek vel a ang ka ti” ka tih chuan, “A kek lo zawk ngawt alawm” an lo ti rual ţhawt a, a beidawnthlak ve hmel hle mai.

“Fimkhur la, i zia chhuah lo mah la a pawi lo. Reilote chiah i awm dawn a, ho lo hram hram rawh. Rilru pe deuhin i zir ang a, kan unauin ka nu te kan la enkawl let ve dawn nia” u Maman a tih leh chuan ka lo bu nghat nghat a, kawm dan tawk thiam a ngai dawn a ni.

Nalh inti deuhin ka chhuak a, inchungah chhoin kawngkhar ka kik karh karh a, “Lo lut rawh” pakhatin a tih lauh hnuah ring lehzualin, “Lalrindik” a ti vak a, awii keichu ka peih lo e.

U Lianpuii kawngkhar a rawn hawng a, min hmuh veleh nui sangin, “Lo lut rawh, Nutei a insiam mek” a ti a, kawngkaah chuan ka pen lut ta nge nge a. “U, enrawh hei Nutei hian ka mutthilh hlanin ka samah ţhialret a lo dah a, a bet vek, a tla thei lo reng reng. Tunah ka hre chiah” Nunuin ţap lek lekin a lo ti a, a sam a ţhialret bet chu khuih thlak a tum a, a tla thei bawk si lo, Nutei lah engmah hre lo ang maiin a kal kual sek a. Tshirt leh kekawr lianpui a ha a, a tshirt ah phei chuan kan pahnihin kan biru thei ang. Pheikhawk lawk zet bunin a sam awmchhun chu a ţawn a, mipa ang maiin a kal bawk si, puak thei thil a pai duh hmel lutuk. Hmanlai rapper a ang a, hetianga a inchei tlat mai hi kei takngial pawhin mak ka ti a nia, midang phei chuan an nuih ka ring. Duhzawng a inang lo a, hnampui zawk te pawh maksak deuh deuhin an inchei tho alawm ka ti tawh mai, inthlak turin ka hrilh ngam lo, ka samah ţhialret a bel ve palh ang.

“I phur tawh em? I inpeih tawh tak tak maw? I zir duh tak tak ang maw?” bag ah paha a tih chuan, “All go” ka lo ti a, “Ka hman ţep” a ti daih a, ka ţawngkam a man lo si, kan inkawm rei theih pawh ka ring lo.

In aţanga kan chhuah veleh, “Kawn thleng kein kal ila, kawn aţangin taxi kan inkawn dawn nia, two wheeler pawh a awm” a ti thar thar a, “Two wheeler chu ka duh lo, ka hlau” ka lo tih chuan nur nangin min melh a, “Hlauh nei ho hi ka ten a sin” a ti a, a kal nghal hmawk hmawk chu a hnungah ka zui hnak hnak a, “Ka zirna hmun a in ang lo a nia aw” tih paha a din dat rualin keipawh ka ding ve nghal a, “Engati nge a in ang loah i zir? Hmun khatah an zir vek zel a ni lo’m ni?” ka tih chuan, “Hmun khata zir chu nilengin a chhuah theih loh. Hmun hnih velah zir ila lenkualna tur a tam” a ti mauh mai a, beidawng deuha ka lo en laia, “Sam tan leh colour vel chu vaivakawnah ka zir” a tih chuan ka hlauthawng nghal a, “Tu bulah?” ka ti vat a, “Lanfeli bulah ka zir, a thiam rass, khua a lum nen thlan pawh a tla ve thei lo” nui vur vur chung hian a ti a, ka hlauh ang ngei ngeiin Lanfeli a ti ta chiah e.

“Naa…kan chhungte a nia, a bulah ka zir peih lo. Ka nute bulah pawh ka sawi fel vek tawh, ka zir leh si chuan kuttin hnawih leh mithmul lem vuah pawh a bulah zir vek rawh an ti dawn a sin” ka ti chul a, Aizawl awm ve mana hmelhriat ngai bawk hmuh chu ka peih reng reng lo.

“Chutianga an tih loh dan chu ka hria alawm, ka hrilh zel ang che. Vaivakawna Lanfeli bula kan kal hmain kuttin hnawih min zirtirtu tur i be fel daih dawn nia” ka bana rawn kuah chung hian a ti a, “Ehe…a va ţha ve, kal vat ang, kan tlai ang” phur zet hian ka ti a, inlungrual deuhin kawn lam kan pan a, ti hian ka kawm nel ang a, u Zira chanchin ka zawt daih ang.

Skulpuikawn kan thlen veleh bus lo ding saah kan lut nghal a, “Zodin thleng kan kal ang” Nutein a tih leh takah chuan pawisa ka phawrh a, “Enteh maw Remkalam, vaivakawna Lanfeli bulah chuan sam tan chu zir ve rawh aw, makeup pawh a thiam nasa, frozen a zawrh tel ţeuh vangin deep freezer in min hual khup a, a lum ve thei lo. Kan chet hah deuh leh deep freezer kan hawng a, a dai sawng sawng mai a ni. Deep freezer pawh kan ti phal hleinem, AC lian chi kan ti” a ti bawrh bawrh a, min thlem thiam si, mithmul vuah chawp a thiam viau nain Lanfeli berkher chu ka hmu peih lo a sin le. A nui vur vur reng nain thusawi a hre tak tak ngai lo, ngaithla ang deuhin a awm a, engmah a hre rei ngai lo. Ka hmuh peih loh chu thuhran, min zirtir tur em chuan ka ring zo lo.

“Tho rawh zodin kan thleng tawh” min nam paha a tih takah chuan ka tho nalh a, thil zir hi tih mai mai a lo ni dawn lo, bus ah reilote ka chuang a, lum ka tih vang aniang ka ni nghulh mai. “Solomon’s cave ah hian ka zir” tih leh min kaih a rual a, amah leh kan thil zir tum hi a inrem hlawl lo. Luh chiaha step ah min chhoh pui a, Afaki beauty studio ah min luhpui a, a chhung a te reuh hi, engmah hian ka beisei a pha lo, ka tui lo zo vek tawh.

“U Afak, hei ka ţhiannu hian a lo zir ve duh a” Nutein a ti nghal a, Puipuii ta ang chi gel polish inrem tlar ţhat ka lo en lai chuan, “Eng ber nge i zir duh?” a rawn ti a, a fel hmel viau nain ani pawh ka ring lo ziah lo, mahse, “Kuttin hnawih leh mithmul lem vuah vel ang kha” ka lo ti a, midang kan tihsak nghal dawn emaw ka tih laiin, “Aw, lo ţhu rawh u. Engtika ţan nge i duh?” a ti daih a, “Awii…dawhtheih a ngai e…naktuk a ţan nghal pawh pawi ka ti lo” ka ti a, zir vat a haw vat ka duh a, an hmanhmawh lo hlawm si, ka rilru a hmanhmawh emai ka thiam chak viau ang.

“Zir man engzat nge i tih?” ka tih chuan, “Ka ti tlawm lutuk” tiin a zat min hrilh a, “A ţhat hloh chu, thiam vat vat ka duh a, min zirtir vat rawh” ka tih chuan a lo nui hak hak a, “Keichu a tihdan phung chu ka hre tawh, scooter lei ka duh vang chauhin ka zir dawn. Ka hnaah a pawimawh ka tia nga, ka pa ka lei tir mai dawn a ni” Nutein a lo ti a, “I khalh thiam em ni a?” ka tih chuan, “Chei…min ngai tlaw ve, che lo vin en ringawt mah ila ka tum ram ka thleng thei” a lo ti a, “Engtin?” cho zeta ka tih chuan, “Ka scooter ka en ringawt hnuah motor dang ka hmang ang a, che lo in ka ţhu ang” a ti a, u Afaki a tih nu chu a lo nui hak hak nain keichu ka thin a rim tlat, Maski-a pi a thi kher bawk si, ka lo be duh lo ting tang bawk nen, rilruah a awm reng mai.

“Kan zir hlimah midang kan tihsak nghal dawn em?” mi kuttin a hnawih sak laiin ka lo ti a, a tat zeuh zeuh emaw ka tia, a rual vek tho. “Dawn lo, inti khaw lo anga sin” a ti daih a, Kalvari in dawh ngam se chu zir lo vin ka tihsak ngam khawp mai.

Kan haw lamah Nutein, “I tum bur reng a, Lanfeli chu naktukah kan hmu mai dawn nia” a ti hlauh a, “Ngati nge i tum bur reng a?” a tih leh chuan, “Ka ţhianpa pi a thi” ka lo ti hmuk a, tawrhpuina thawn dan tur pawh ka la ngaihtuah lo, ka zirna tur kan ti fel a, thawk khat chu a veng tho.

“I bialpa maw? A pi thihna lo tuar ve thei khawpa bialpa nghet ang kha mi?” a ti pek a, kei aiin a hniam zawk a, min melh kar bawk si, a mitmu a lianin sual hlauh se chu a mitmu a kawm sak chakawm deuh tur ang chi kha a ni. “Ka bialpa chu a ni chiah lo” zawitea ka tih chuan, “A va zia lo ve…keichu mitthi ka hlau a” a ti ve ngei a, “I rilru leh i pian leh inchei duhdan hi a inhmeh lo e” ka ti ta thlawt a, “Chu reng, hlauh ka ngah a, chumi thup nan chuan ka inchei pa mai mai a nih hi. I sawi chhuah chuan i bialpa pi thi hi ka sawi ve ang” a ti a, ka khawngaih zawk e a, mak ka lo tih rukna te kha ka sut leh vek, kan inkawm rei thei lo ang ka tih te kha ka thaichhe leh vek, min kawmpeih chhung chu ka kawm peih ang.

“Tuma hriat i duh loh chuan min hrilh loh mai awm che” ka ti a, a dara ka kuah laiin, “I rawn sawichhuak fuh em a nih kha, i sawi ţha, i dak nalh tawp” a ti a, dak thei min ti ţhin a, dak nalh min ti tu awm chhun a ni hial ang.

“Kolasib ah hmelhriat i ngah em?” ka ti ţan a, ngawih rih duh mah ila ka hre chak tlat a, tlemte tal ka zawt dawn. “Hriat ka ngah a, anmahniin min hre ve lo. Keichu lên ka hrat alawm, ţhian phei chu ngah tak ka ni” a ti lang lang a, “Khawi vengah nge in awm a?” ka tih chuan, “Diakkawnah” a ti a, u Zira te nen chuan a inang lo deuhin ka hria.

“Awii…ka sawi chak e” ka ti hluai a, ke a kal kan ni bawk a rem leh rem lo hian min rawn melh kha kha a, “Hmelhriat i nei ni maw? A ţha lo lam a ni chiang” a ti nghal ringawt a, “Enteh, Diakkawn a dawr nei ţhin Sensiari i hria em?” ka ti hmasa a, a ngaihtuah vang vang hnuah, “Ngo deuh, hmelţha deuh a ni em?” a ti ve thung a, “Yeasi kul râi…a hmelţha ţhaks” ka tih chuan a ngawi leh daih a, inbe lo va kan kal reng hnuah, “E…” tih vak pahin ka âwmah a rawn beng chawrh a, ka su deuh zuk a, inrin loh laia kut inthlak hi chu a na duh bik riau a ni.

“Ka hre chiang lutuk hi hrehawm ka ti zawk. Tunah chuan dawr a nei tawh lo a, ka hmu tawh ngai lo. Dawr a neih ve lai kha chuan ka hmu zeuh zeuh a, mi pawhin hmelţha an ti thei tehmai nia, i ţhiannu mi?” a ti pang pang a, ka mi sawi a hria chu a intithei angreng khawp mai.

“Ka ţhiannu a ni chiah lo nain amah kha ka hria, a u hi kan khuaah pastor in a awm a, ka ţhiannu pasal a ni bawk a” intithei deuha ka tih ve chuan, “A unaute chu ka hre vak lo” a ti daih a, “Amah kha kan dawr ţhin a, bakah a hmelţhat vang khan a lar ve a, a chhungte ka hre ve vak lo, a u mipa thi ta kha chu ka hria, dawr a nei ve tho a, ka u bike chhia pawh kan siam tir tawh. Engtin nge kan khuaa mi i hriat daih theih a?” a la ti tho a, “An u hi kan pastor ka tih mawlh mawlh kha, engtin nge an unaute i hriat ve loh theih zawk a?” ka ti a, u Zira chanchin ka zawh châk tehreng nen ka thin a rim lek lek zawk alawm le.

“Khawi vengah nge an awm a?” amah zawkin a ti leh a, “New Diakkawn ah” ka tih chuan, “Veng a in an loh chuan inhriat a har alawm. Kolasib chu a zau e…kawngka hawn ruala veng dang hmuh nghal theih a ni ve lo” uar zeta a tih hnuah, “Khaw te chanchin an sawi kha i hre ve tawh em?” a tih zawm zat a, “Hre ve nang, khaw te deuh deuh chu a la tam ang chu” ka tih chuan, “In sawm lek khua an nia, in tin khan veng hming an nei vek, an khua a te lutuk a insi lek lek khawpa inţhenawm hnai te pawh an veng hming a in ang lo” a ti a, a nui zui uar uar a, ka thil zawh ve hi a vei hlawl lo.

“Keichu ţha deuhin ka zir anga ka haw vat vat dawn a nia aw, len kual mai mai ka hman ve lo a nia” ka ti ta daih a, motor in min tlan pel sek bawk si, kawngpui a awl hman lo reng reng a, hetiangah ka awm peih lo, a bengchhen bakah rilru nuam deuh a kawng kal a har emai.

“I awm rei anga len kual i chak tial tial mai ang” a tih chuan, “Awii..kan khuaah lo chuan duhthusam a thlamuangin ka leng thei lo, tunah te hian kan khuaah chuan awm ila sam phe vawk vawk khawpa nasain ka nui leh tawh ang chu, ka lung a len nak laiin aw” ka tih laiin ka phone a ri a, Sangkhuma a lo ni. Chanchin min rawn hrilh dawn tih ka hriat vangin ka la vat a, “Sangkhum, khawiah nge i awm?” ka ti nghal a, a awmna hmunah thawm a tam ngang mai.

“Ka’n kal hrang lawk ang” a ti a, a ngawih vang vang hnuah, “Mitthi kan vui zo a, ka lo bia che a nih hi. Maski-a pi damlo hi a lo va han cher em em, thi lo se a mak ngawt zawk ang” a rawn ti lung lung a, “Thlan i lai em? Khawiah nge Fawnvela?” ka tih chuan, “Lai ang chu mawle, Fawnvela chu Maski-a pi thlan bulah a la awm. Remkalam, engtin nge i tih dawn? Maski a khawngaihthlak teh mai a nia aw” a rawn ti ve ngei a, “Engtin nge a awm a?” ka lo tih chuan, “Thlarau nei pawh a ang lo, a ţap lo nain a ţap chak ngawt ang” uar zet hian a ti a, chutah zawite a, “Biak pawh a hre thei lo, a en ngai a en reng a, milim ang chiah a ni mai” a rawn tih leh phei chuan ka rilru a nuam lo lehzual, kan la ni chuang lo bawk a ţhian angin ka kawm daih mai ang.

“Ka thil zirna turah kan kal a, Sangkhum, ka rin ang a ni lo reng reng, a nawm ka rin tehreng nen a nuam vak lo” ka ti a, a hmun awmdan te ka sawi chuan, “Officer nih pawh a nuam a, lehkhazir a nuam chuang hleinem” a lo ti then a, “Maski chu be rawh, a va pawi tak em te ti ve rawh, a nih loh chuan a ţha chhuak zo tawh lo maithei a ni” a rawn ti leh tawh a, a sawi uar thei bawk si, “Awii…a awmdan a van mak awm em em” ka ti a, ka chhung hnaite an la thih loh vangin a awmdan tur chu ka hrethiam ve chiah lo.

“Thlarau nei a ang lo ka tih chu. Amahin awm char char se chu e…a thih loh pawn a â ang” a ti mauh mai a, “Maski ka ngaihven deuh leh i phun a, ka ngaihven loh leh ngaihven turin min tia, i letling lutuk hi chu a buaithlak, i hnunglam hlir ka kawm tawh ang” ka tih chuan, “Thihna a inrawlh a nih hi, nangpawh i pi thi se ngaihven lo che ila i duh dawn mi? I pi thih laiin ka thil zir chiah ngaihtuah ila engtin nge i tih ang? Min ţum hrep duh ang chu, aaa…min thah ve nghal ka ring zawk” uar zetin a rawn ti a, “Biak dan tur ka hre lo, thu lungchhiatthlak lam ka ziak thiam hleinem” ka lo ti a, “I pi boral chu a zia lo hle mai ti la, in inbe thei mai ang. I lerh tehreng nen zei lo viau suh. Ka kal dawn, nakinah ka rawn be leh ang che. Maski chu mitthi ang chiah a nia, a thih tak tak hmain be rawh, a thih chuan a hran khum dawn chiang che a nia” a ti a, a dah zui nghal a, Kalvari message pawh lo awmin, ‘Maski a khawngaihthlak reuh lutuk’ a rawn ti ve a, u Zira insiamţhatna hun ka pek veleh Maski min rawn sawi hmuh leh hlawm sia, heng ho zek zuk pawh hi rilru an ti buai zual.

“Eng nge a? Tu nge die?” Nutein a lo tih chuan, “Ka hrilh vek tawh che kha, theihnghilh nghal daih zel lo la” ka tih laiin, “Ţhian ka ngah a, i hriat duh chu ka ţhiante kan zawt dawn mi?” a lo ti ve thung a, “Aa…nidang atan khek ang, tunah chuan ka rilru a buai chingchivet rih” ka ti a, kan kalna nu sawi hmangah zir chhung a rei vak dawn lo bawk a, ka haw leh vat dawn chiang khawp mai.

In kan thlen chuan Nutein, “Ka thuruk kha i sawi chhuah chuan a rukin i sam ka ziat kheng ve dawn nia aw” tiin min vau a, “Awii…min ring lo ţhaks, tlangau ka nih loh hi” ti mah ila, “Tlangau aiin i au ring daih zawk” a ti a, an inchhungah a lut nghal daih a, keipawh kan inchhunga ka luh rualin phone bawk ka phawrh leh a, thil ei hmasa lo va khum a bawkin Maski hnenah, ‘I pi thi chu a pawi e’ tih ka thawn a, a hmuh hun hunah min chhang mai ang.

U Zira pawhin min lo call ve hlawl a, nilengin a reh ka ti reng a ni. Ka lak rualin, “Remsial, khawiah nge i awm?” a rawn ti lauh a, motor thawm a tam bawk si, an dawr turah bawk a awm leh tawh aniang chu.

“Inah lo khawiah nge ka awm ang a?” ka tih chuan, “I zir zo tawh mi?” a rawn ti a, “I ngai awlsam ve chiang e…vawikhat en a thiam chi a ni hleinem, naktukah ka kal leh dawn” ka lo ti hlut a, “Khawi vengah nge in awm kha?” a tih leh chuan kan awmna ka lo hrilh a, “Ka hre dik chiah a nih chu” a ti mawl tawp a, “A hmain ka hrilh tawh che a, i hriat lohin” ka lo ti hmak a, phone ka en leh ţhin a, Maski-an ka awm a la ti nuam lo deuh reuh a, mahse a pi ka that miau lo a, tlem chuan a zia deuh.

“Thil ka lo thawn che a, in veng kawnah khan lam rawh, tunah a lo thleng tawh. Kawn in hlat em?” a rawn tih chuan ka tho hluai a, darthlalang ah ka in en pah a, mak ka tih hian ka meng rulh zel tak tak a nih hi.

“Eng nge min lo thawn a?” ka tih chuan, “Thil ţha deuh ka lo thawn che. In venga mi hnenah ka lo thawn, kal vat rawh an nghak reng hman lo ang che” a tih tak et etah chuan ka tho a, zingah khan kein kan kal a, keimah pawhin ka kal thiam tawh ang.

Pindan aţanga ka chhuak chu u Bawihan, “Khawiah nge i kal dawn? Chaw chhum tawh rawh” a lo ti a, u Mama a ang ve lo a, ka ning tlat zel. “Thil thawn ka lam dawn, ka chau, min tir sek suh” ka tih hrep hnuah ka chhuak a, “I duh leh chhum hmasa la” u Ziran a lo tih chuan, “Nangpawh lo ţawng lo teh, thil min lo thawn dawn chuan min hrilh hmasak tur che alawm” ka ti ve leh a, “In veng kawn i thlen hunah min hrilh dawn nia” tiin a la dah daih zui a, Nutei sawm ka tum zet na a ina a awm chuan a inla pa leh tawh dawn a, min bauh hrep hlauin ka sawm duh ta lo mai.

Keimahin hmanhmawh deuhin ka chho a, penna tur em em a awm lo bawk a hawi hu hu a ngai tawh lo. Kan awmna hi u Zirbawnga hnenah ka hrilh chiang tawh a, ani chu Aizawl a kal ţhang aniang hmelhriat pawh a lo neih leh thlap tawh hi.

Phone en chungin ka kal a, ka ţhian dangten min lo la be leh lo nain Sangkhuman, ‘Mitthi ka hlau sia, zanah ka rawn be tlaivar ang che. Min mut san vaih chuan setanic Nicky-a mitthi thlarau ka rawn tirh tir dawn a nia’ a rawn ti a, a huphurhawm thei si. Ka ţhiante tan hi chuan ka va hlu tak e aw.

Maski lahin, ‘Nia’ tih zawngin min rawn chhang a, a titau ve deuh em mawni tih dawnin mahni pite thih laia a tih tauh bik ka ring si lo va, a rilru a na ve ngang a nih hmel. Ka chhang let lem lo va, zanah ka bia ang a mah se ţhian ang chauh a biak ka tum tawh ang, a nih loh chuan ka inbat tang zel ang a, pasal pahnih ka nei thei dawn bawk si lo, kan induh tawn tak tak hmaa tih tawp a ngai a nih hi.

Kawn ka thlen dawnah u Zirbawnga bawk ka call leh a, “Taxi ka hmu ţan tawh a nia, khawiah nge a lo awm dawn?” ka ti nghal a, “Taxi stand piahah a lo awm mai ang, ATM bulah a ti” a tih chuan kal pahin ka hawi vak vak a, kal ngai lohna a ni bawk a dawr kawta lo ţhu pakhat chuan, “Khawiah nge ATM hi?” ka ti a, ka ât hmel leh tawh ngawt ang. Ding chung meuha min kawhhmuh hnuah, “U Zir” ka ti leh a, mahse a lo dah leh daih tawh. A hmel ka hre bawk si lo, U Zirbawnga min tih buai zia hi chu aw.

ATM lamah hawi vual vual chungin ka phei a, u Zirbawnga ka call lai taka amah ka hmuh chuan a hrang leh tawh emaw ka ti hial a ni. Phone hum ran chungin a kut a lo vai a, “Awii..u Zirbawng nangmah tak tak nge i thla?” pan hnai pah a ka tih chuan a lo nui hawk a, “Keimah tak tak, i duh leh min rawn sik rawh” zangkhai zet hian a ti a, “A rapthlak e…engati nge i lo kal ve ringawt a?” ka tih leh chuan, “I lung a leng sia” zahzela a tukhum tuai pah hian a lo ti a, “I mak e..awii keichu ka thi ţhaks” ka ti duai a, midang awm lo se chu ka kuah vel thlawp ang mawle.

“Thil ei ila” a tih laiin, “Khawiah nge i riah dawn?” ka lo ti ve thung a, “In inah a ni mai alawm” nui chunga a tih chuan ka lo nui duai a, “I inla zei vel sia, awii ka thi nawn ţhaks ţhaks” ka ti leh chul a, “Bialnu te lunglen vang maia rawn lan nghal chu le(h), i inpe zo sawt e” ka ti a, ka lawm bawk si, ka tlu tawp lo chauh a ni. “Thil ei chu?” a lo ti leh a, “Eina tur nangman i hre zawk daih ang” ka ti a, a rawn kal thut dan hi thil ei pahin min hrilh turah ngai ang, tuna ka awmdan hi a nuam ka ti ţhaks.

CONT…

Angel Pops
Author: Angel Pops

11
1

This Post Has One Comment

  1. Hazel Ralte

    Ava ngaihnawm chiang tak! U Zira is bae thaks thaks…. Maski erawh ka khawngaih,amah hmangaihtu leh a care em emte an liam zel mai si.. Remkalam-i vang hian duh loh dan deuhin a awm te ka hlau…

Leave a Reply