IMG-20240313-WA0037

KEIMAH, THINGTLANG NULA S2-1

Spread the love

KEIMAH THINGTLANG NULA S2-1

 

 

(Ka chawl rei a, ka khawr tlat a, mahse chapter a kal zel ang a, a inphaman chho zel turah ngai tawh mai ang. In lo nghak ţang ţang a, inti lawmawm lutuk e💛)

 

 

 

 

“Min hlauh loh chu thuhran, Lalremmawii chu a lian e…min chhipthlak mai ni lovin ka chhipah a duh duh a thlak thei” uar fahran a lo ti lung lung tu u Lalhuma lam chu ka pan a, a lo rui leh hle tawh a, a ti ti duh dan kal hmang aţangin tu zu ber nge a in ka hre thei tawh tih tur khawpin ani hi chu ka hrechiang ve a ni. 

 

 

 

“Khatin mi zingah ka len thu sawi ziah lo mai teh. Ka hmai hnawih siam hi min dawr leh rawh, kha, i hnar ţawk pawh a thep deuh huai tawh kha” tih pah a a hmai zawn a ka polythene khai lai ka dah hnaih chuan a lo nur nang a, a thusawi ngaithla tur a a lo tih din ho ni awm tak, kan veng rawlthar ho pawh nui tet tet chungin an kalsawn pheuh pheuh a, u Lalhuma chu a ngawi deuh hmak tawh. 

 

 

 

“Mawh…u Lalhum, ka la hralh mang lo a nia aw” ka tih chuan, “Khatiang i la hralh thei kha lawm hle rawh, hralh lo mahla phun thei i ni lo reng reng” vin angreng tak hian min ti let er(h) a, vawiin chu eng nge maw a hriat ni? 

 

 

 

“I ngeih em kha aw..nang chu ni ila ka kharchhawng ang” ka tih chuan a ke per dawt pahin ka lam a lo hawi a, a thin a rim deuh niin a lang. 

 

 

 

“Min en ta che..ka hnar a en (yellow) hlar hi” tih pahin a hnar a kawk a, “A ho ve chiang e..Suntea pawh a hnar a sen ling hlar a, Tuarpuii chhaiin lungawi deuhin a zai hlarh hlarh reng tho alawm” ka tih chuan a nur nasa ngang mai. 

 

 

 

“Bakah Suntea chu a lem a vuah mai mai a, nangte chu a lem vuah ngai lo vin kha chawtlang tiat lawih hnar i nei alawm” ka tih leh phei chuan, “Ka…ka…” tih bah nawk nawk pahin min kawk a, tun ţum chu min dawr dawn lo a ang riau; min dawr châk hmel a pu lo, haw san daih teh ang. 

 

 

 

“Hlawh i lak veleh min dawr ang che” ti a kal mai ka tum chu, “Miin, ‘i hnar hmul pakhat hi pawt zeuh ila chu i hnar hi a êng phet phet tawh ang’ an ti a nia aw” tiin min au zui a, ka polythene khai lai vai vir pahin, “An thik vang che a nih chu” ka ti liam mai nain a sawi takah chuan ka hawi let leh ngat a, a hnar eng (yellow) hlar chu electric bulb ang maiin a ên duh hmel tak tak. Za lo deuh a nuih pahin ka inher a, ka nu meizial sem a lo hawn hma a in ka thlen loh chuan min hau nasa leh viau ang. 

 

 

 

Inchhung ka luh hmain buh zem lo inhawng huau chuan ka mit a la hmasa zawk a, ka endik a, fel lo lai a awm lo hlauh, buh an vuak zawh kha chuan ka pa pawh a inla awl ve deuh a, hetianga phâng lo deuh a kan awm theih nachhan hi ka pa thawhrim rah liau liau a ni. 

 

 

 

Inchhung ka lut chu a lo reh huai a, ka nu a la haw lo tihna. Ka u te pahnih hi hunpui hmangin an lo haw ve ngei nain phone ringawt an bih a, awm lo ang vel an ni. Kan khua a an awm chhunah kohhran leh khawtlang a an ţangkai nen inchhungah hi chuan ţangkai lo ve tak an ni. Ka unaute ai hi chuan kan ţhenawmte pawh an ţangkai zawk. Kohhran leh khawtlang hian nei law law se a ţha ang. 

 

 

 

“Ka nu nen a thil kan zawrh daih te chuan chaw tal lo chhuang ve ta che u” dawhkan a polythene nghah chawrh paha ka tih chuan u Bawiha zawk a lo hawi a, “Zanin hi kumhlui thlah zan a nia, nikum a i awm anga i awm leh chuan zak deuhin ka siam dawn che a nia” a ti nghal pung pung a, kum hmasa lamah kumhlui thlah zan ka ti bo palh a, a zia lo tak tak a ni, mihring hi famkim kan awm lo miau alawm le. 

 

 

 

“Nei ţen ţawn a kumhlui ka thlah duh vang alawm thil ka zawrh ţauh ţauh ni” cooker hawn rak rak pah a ka tih chuan Mama zawk a lo nui hawk a, ani hi chuan engtinmah min ti lo vang, u Bawiha hi chu a fel leh lutuk a a buaithlak. Zu leh a kaihhnawih lah hi a haw em em a, dawidimin kan vawm hlum thei ang tih vel a ni. 

 

 

 

“Aizawl kal i duh chuan thil ţha lo lei nan a hmang lovin khawl rawh” a ti leh hmak a, “I thu lo sawhbeh” uar zet a ka tih chuan a meng rum khawp mai. 

 

 

 

“I chhuah paw’n dar10 hmain lo haw ang che, chhungkuain zanlai inkhawmah kan kal ang” a ti leh ţalh a, ka chhang buai peih tawh lo, a duh duh ti se la, keipawh ka duh danin ka awm ang. Tunlai a la inkhuahkhirh vak vak chu dawt sawi a awl, in aţanga chhuah ruk te kan thiam phah a, inchhung a awm a nawm nan nu leh pate hian min kawmngeih se, unauin inkawm thei bawk ila a ţha ber. Keichu ka u te nen hian kan inmil ve hlawl lo, ka nu lah a vin hlur reng a, ka kham a nia. An vai hian ka chhang kham hlûi mai. 

 

 

 

Chawhmeh ka tih lum laia ka nu rawn haw chuan, “Lalremmawi, Rinhlua u nen in inkawm leh tawh a ni maw? Quarter kawtah a din leh luau tawh kha” engmah hrechiang lovin a ti vin lehnghal hlak hlak ringawt a, u Zira pawh a lo kal dawn a nih chuan min hrilh ve awm tak a nia, ka duh ang hian min duh ve lo tlatin ka hria. 

 

 

 

“Pastor quarter kawtah a awm a, kei inchhungah rawng ka bawl a, kan inkawm loh hi. Kan inchhung aţangin pastor quarter ka hmu pha lo, hmu pha ila chu u Zira tak pawn min rap viau ang chu” tiin ka nu thusawi dan kal hmang chu ka hre lo der daih a, a inpet ruh nasa ngang mai. Ât hmel deuh hian han chhaih kual ila, a thin a rim em em zel mai a ni. 

 

 

 

“Zanin pawh chhuak lo mai rawh” a tih chuan ka ter ta at a, “Kum khatah vawikhat bak kumhlui kan thlah ngai lo. Ka chhuak awm chiang e…ka chhuah chak tawh nak laiin aw…ka chawhmeh siamah te hian kumhlui rim a nam” ka ti zat zat a, kumhlui thah zan kher hi chu nuam deuh a hman ka duh ţhin, ramhuai pawn min chelh zo teuh lo. 

 

 

 

“Huiham” ka nu’n a tih halh laiin u Bawihan Lalramhluni zai a lo play a, “Lalsangzuali zai tir zawk teh” ka tih chuan a ti ring zual sauh a, ka nu che vel chu ka lo en a, a puan bih lai phelh a thleh pah a thin vak laiin Lalramhluni ngei mai chuan, “Kan nula chuan khawlai ngawl a vei” a rawn ti ta chiah a, ka nu’n min en nghal chu, “Khalai chang bikah khan min melh kher zel suh aw” ka lo ti hlar a, zaithiam viau mah se ka nu hian a hmang ţangkai leh lutuk a, nalh ti ve tho mah ila ka ngaihthlak loh phah ziah. 

 

 

 

Min chhang lem lovin a puan a dah a, silhmun a ka cooker chiah chu a va hawng zui rak rak a, ring lutuk tak mai a, “Eheee” a tih chuan ka phu nasa kher mai.

 

 

 

 

“Lalremmawi, buhban fai a nih hi i chhum daih. I chhuak chak lutuk hian buhfai pangngai pawh i chhum thiam tawh nange?” vin zet a a tih laiin ka pa a lo lut a, “Eng nge ni chiam chiam zel? Pawn aţang pawn in thawm a hriat alawm” dam thluam a a tih chuan ka nu’n, “Lalremmawii hi alawm…buhban a lo chhum daih a, kan ţhial chuap chuap dawn tihna mi? Bawng sa kan hmeh dawn lehnghal a, buhban nen chuan ka ţhial kawp peih lo reng reng, kan bek a na ţhûm dawn a sin” a lo ti bawrh bawrh a, “In chhuah hlan khan kan buhfai dahna ka thlak kual e ka tia, ka hrilh hman ta lo che u a ni maw?” pawi tih hmel tak a ka pa’n a tih chuan, “Chu chu a nih chu ka chhum sual chhan, min hrilh loh vang a nih chu, hmanhmawh nen, buai nen, ka en chiang si se hman hleinem” ka ti nghal zung zung a, ka nu’n a hranpain min chhum tir leh a, a hmin hun nghah pahin ka inbual ta daih a, Sangkhuma leh Fawnvela ten min lo nghakhlel tawh viau ang. U Zira pawh rilruah a awm reng a, mahse min rawn biak hma chu biak hmasak ka tum bik lo thung. 

 

 

 

Ka inkhawm hmasak te te hnuah chhuak turin ka insiam a, u Bawiha bawkin, “Ka sawi kha hre reng rawh” a lo ti leh tawh a, a ngei tur tawk lek a ka hmui ka tih pawrh khum hnuah kawrlum inthawlh sawk sawkin ka chhuak zui nghal a, ni 31 zanah te chuan dar10 chu dar6 ang vel lekah ka ngai, ka haw awm lo emai. 

 

 

 

“Remkalam, in tur hi kan nei tlem sia, kan tuibur hmuam tawp a, pawisa i nei em?” Fawnvelan a lo tih chuan mit thip vek khawp a nasain ka melh a, a hmuam pûng tak tak a, engtin nge maw a theih zawk ni.

 

 

 

“Zu pangngai chu ka duh lo ka tih ka tih kha. In in a ar kan kan hmain grape juice tal in ve ang u ka ti a nih kha” vin hlar a ka tih chuan Sangkhuman, “Nia” a lo ti ve vat a, Fawnvela ding ngawi reng chu kan en ran a, grape juice zuar chu ani aia hre tur an awm lo. 

 

 

 

“Vengthlang lamah kal ang u, mahse kan inah a in chi loh ang aw” a ban vai chung meuh a a tih hnuah vengthlang lamah kan inzui thla a, ka ţhiante pahnih hi chu ka ring ve a, eng chi pawh rui ila, ka ruih poh leh an bulah hi chuan ka him tih ka hria, an hmelţha vul chuk lo nain an ni ang hi alawm mipa diktak ka tih ţhin chu.

 

 

 

“Puipuii kan sawm ve dawn lo mi?” ti a zawtin ka han ding leh rih a, kan ţhian zing a tel ţhang lo tih takah kan lo theihnghilh leh ţhin. 

 

 

 

“Sawm lo ang” Sangkhuman a tih then laiin Fawnvela zawkin sawm ve a rawt a, thui deuh kan kal tawh hnua hmanhmawh tawk a let leh chu hahthlak ve tak a ni. 

 

 

 

Puipuii te in kan thlen chuan insiam sa diamin a lo ţhu ran a, “Len chhuah a ţul lo, nangni pawh lo lut lo law law rawh u, inhralh theih zan ber a chhuah a ngai lo, dawr nghak rawh se” ka pi Darin a lo ti hmak hmak mai. Inchhungah kan lut teuh tawh a sin le. 

 

 

 

“Tu te hlimna aia pawisa i duh zawk hi ka hrethiam lo” ngui burin Puipuii chuan a lo ti halh a, “I tan chuan dawr nghah a him ber. Kalvari pawh pasal a neih hma chuan leng suh ka tihin a leng lui ngai lo. Pi leh pute thuawih chu hei pastor nupui a nih vâng tawh hi” ka pi Dari’n a ti veleh a, Kalvari khan thu a awih lo ve ţhin chiang emai, ka pi Dari hian a hau reng zel a, chuvang alawm Bin Laden hming chawi a pi BinLadari kan tih ni. 

 

 

 

“A zahtheih loh vang alawm pastor nupui a nih. U Rinhlua te chu mahni a hma la thiam lo, mi zei lo tawp a nia, hetiangah chuan hmeichhia alawm pawimawh. Kurtai hmangin a thlem vel a nih kha, min khaikhin reng suh, a ninawm” tih pahin Puipuii chu a ding pah nghal uai(h) a, “Tunlai mi te han rapthlak zia tak hi chu a…kal la, zu rim rawn nam haw reng reng suh, i rawn nam haw chuan pawnah i riak ang” thutak fe a pi Binladarin a tih chuan, “Zu ka in dawn leu(h), a rim i hre lo ang. Zu rim i hriat chuan ka thaw a ni lo tihna a ni mai” thawveng zet a tih pahin a lo chhuak a, min hau ve dawn lo emaw ka tih nen pi Binladari bawk chuan, “Lalremmawi, nangpawh haw hma ang che. I nun a ho viau reng a nih chuan pasal i hmu lo ang” a ti ţalh a, ka chhan chuan kan rei zel dawn tih hria in Puipuiin ka kawr banah a pawt a, enghelh nei lo fein kan inzui ţham ţham a, vengthlang a grape juice zuar ţhin te in kan thlen chuan a chhunga kan luh hmain Fawnvelan a êng laia din a rawt a, lo hrethiam nghalin kan ipte kan zen nghal sap sap a, rui chunga kumhlui thlah ve ngei kan duh sia, a ţha lo tih hre reng chungin kan neih ang ang kan thawh khawm leh ta a nih hi. 

 

 

 

“A awm tawh lo” kan luh rualin nu berin a lo ti nghal a, Fawnvelan a dil luih ţang ţang hnuah, “Kan pa’n Aizawl aţangin champwine a lo hawn a, ka hralh phal lo a sin” nur nangin a ti na a Fawnvela bialnu hlui a nih miau avangin bottle hnih min pe a, an inthup thiam viau aniang tunah an zuar tih ka hre ve chiah. 

 

 

 

“In inmelh danah khan eng emaw a la awm chiang mai” ti a Sangkhuman Fawnvela a chhaih chuan, “Ka neih che chuan sachek zawrh bak hmabak kan nei lo, kan hma hun a thim emai a ti vel a, a pasal nen zu an zuar ru tho sia, sachek zuar se a ti fuh zawk fe ang. Ka ngaihtuah reng vang chein fa ka nei nghal a chuti khati tih a hrat si, kha, fa a nei thawt thawt a a hnute pawh a fual pur tawh kha, a ke rek a thleng lo chauh tawh alawm” a ti hluk hluk a, Fawnvela pawh hian a la duh chiang mai. Hei hi alawm ka sawi ţhin chu, Pathian hian kan ta tur tak hi min pe nghal chat ţhin se, mihring te hi kan inti na tawn lo mai tur a nia. 

 

 

 

“Khawiah nge kan in ang?” ka dar a kuah sawk pah a Sangkhuman a tih chuan, “Park ah a ni mai alawm” ka lo ti then a, “A vawt dawn e..kan rui thei nang. Kalvari be mai ang u” Puipuiin a lo tih ve chuan kan mipa pahnih ten zaizirin an rawn khap vat a, “Pastor quarter ah an awm a, min hnar dawn lo mah se an inchhung hrim hrim kan zah sak tur alawm” Sangkhuman a ti khauh fak a, peih lo hle mah ila park chu kan pan ta nge nge a, mi an lo tam nangiang mai.

 

 

 

Mi awm lohna lamah kan ţhu kual ţhap a, Fawnvelan no a phawrh laiin ka nu vaihlo zial ka lak ruk chu ka phawrh ve a, “Kumhlui thlah zanah chuan cigarette tal zu ve ang u” tih pahin Fawnvela vek chuan cigarette a rawn phawrh a, kan phur tlang ngang mai. Kan thil lei kan in a, mei kan han zu chiah chu Sangkhuma bawkin ngaithei lovin a tawlh sawn a, “Sangkhuma mei zu ve lo hi ka hne a nia” kan ti sap sap a, kan sawi zui lem hlei lo va, ruih chi in ve vak ngai lo tih takah kan lei sa kan inzawh chuan kan rui viau mai, ka luhai dan lah chu a nuam lai a pel vek tawh tih hriat reng, ka ruih tial tial phei chuan ka chhungten min sual rawn duh ang.

 

 

 

“U Zira hi a lo zin reng sia, min lo be lo reng reng” ka ti ţan a, Krismas kha chu kan khuaah a hmang lo tih ka chiang a, ka nu berin a hmuh te chuan min lo biak ve tawh mai tur a nia. 

 

 

 

“A fiam kual mai mai che ka tih tawh kha. Duh tak tak che se la chu a lo kal ve ang” Sangkhuman a tih chuan ka bu nghat nghat a, ka lu a hai si, thla lah chu a êng zualin ka hria a, ka buk nghat nghat lai te khan thla ka hmu tel zel a, ka mit hmulah an ţawn bet ta mai emaw tih tur a ni. 

 

 

 

“Min veng reng rawh u, ka in belh leh ang a, zanin hi ka ti bo daih ang tih ka hlau a nia” ţhu zawi hnuang chunga ka tih chuan, “Duh mah la in belh tur a awm tawh lo. A bottle hi i ei duh a nih ngawt loh chuan engmah kan nei tawh lo e a, in heh thei bik si” Fawnvelan a lo ti hluk hluk a, in lo chung pawn Sangkhuma nen an in chang hian an bulah ka kal ve ţhin a, a in tam zawk pawn midang hi amah aia in tam bikah a puh ve ziah. 

 

 

 

“Fithangin min lo call hmain haw ang u, ka nu nen ar an lo puah fel leh vek tawh ang” tih leh din a rual a, Fawnvela hi chu a inti thu thei hrim hrim. 

 

 

 

A chhungte an zau bawk a Fawnvela te in chu a lo ri dup dup a, patling pui pui an lo lam nasa ngang mai. Fithangin tum burin ar a lo rawh a, nu Mawitei chuan kumhlui thlah zanah pawh sachek a lo la buaipui a, Puipuii nen in si rialin kan ţhu a, ţawng pawh kan ţawng peih tawh lo. U Lalhuma chu a lam nasa pawlah a ţang a, kei takngial pawn tha ka neih tawh loh laiin an la nung ţha vet vet hlawm khawp mai. Choka lama kan phei rualin u Lalhuma pawh a lo phei ve a, nu Mawisachek-in dawhkan a no a dahah chuan tui pangngai a awm emaw a ti aniang u Lalhuma chuan a in pawp a, hmui zum pûtin a meng kâwk kâwk a, a mawng a ti er a, pum dawm chung meuh a a thil hmuam a lem chiah chu a ang hlawi hlawi a, a hmai sen ţul ţhin pawh a sen nasa zualin ka hria. 

 

 

 

“A sa rapthlak lutuk Mawi sachek, ka in hma khan min hrilh ta che” vin zet a a tih chuan, “No pawh a sat vek kha, a sa dawn tih hre ta che” ngaihsam zet hian a lo ti a, thei kan siam a, thei thur kan ei ţeuh hnu chuan ka ngaihbel nge ka hre lo, ka harh sawt mai. Phone ka phawrh chhuah rualin u Bawihan min lo call nghal a, dar12 a lo ri ţep tawh. Hlauhawm viau mah se chhang lovin u Zira message ka en daih a, ‘Park ah ka hmu che’ tih zawng a ni. 

 

 

 

‘Min hmu ve bawk ang chu i mit a del hleinem’ tiin ka thawn let a, duh aiin ka chhu sual nasa, rui mah ila ka rui tih a hriat ka hlau ve tlat. 

 

 

 

‘I va pawr ve Remsial’ a rawn ti a, he pa hian fiamthu thawh nan mai mai min hmang chiang alawm. Park ah te eng nge maw a tih ve ni, u Rinhlua nen hian an in ang lo ve ngawt mai. Chubakah min hmu chak a min ngaipawimawh tak tak chu ni se a lo kal ang a, park ah pawh a ruk a min en lo vin ka bulah a awm ang. Min thlahlel ve hlawl lo tihna a ni mai. An khua a a haw pawhin a phur chang bakin min rawn be ngai lo, a ruk tak chuan rilru a ti hah ve reng.

 

 

 

‘Ka be peih tawh lo che’ ti a ka thawn chuan, ‘Chuvang chuan alawm call kher lo che a message ka lo thawn che’ a rawn ti a, u Zira te ang mi lerh lutuk hi chuan hmeichhia an chhaih buai hneh ngawt ang, han ten dawn ila lerh viau mah se mipa hmelţha hi chu ten an har bawk si. Ka rilru a ti khaw lo zo vek tawh, what a very chingchivet tih bakin ka sawi thiam lo.

 

 

 

 

“Remmawi, lo haw rawh” ti a u Bawiha lo lut thut chu ka lo en ha a, mi chuan min hmu se meng phawk min ti viau maithei a ni. 

 

 

 

“La awm ve rih rawh se, arsa pawh kan la ei lo a” nu Mawi sachekin a lo tih pawhin, “Duh leh inkhawm banah lo kal leh zawk rawh se” a ti a, min hruai haw lui a, u Bawiha in la puitling tawh lutuk hi chu ka hne ve ngawt mai. In be miah lovin in kan thleng a, inkhawm tumin ka chhungte an inpeih thlap tawh nain ţhutthleng ah ka bawk hnawk a, ka nu leh pate hlau ve bawk mah ila ka ţhu peih tawh hlawl lo. Ka in tam lutuk lo khan ka hre sia, ka in ngai vak loh vang aniang ka kai ve deuh. 

 

 

 

“Pa, khawiah nge ka pu wheelchair kha a awm?” u Bawihan a tih chuan ka lo rum vak a, rilru a te zo tawh a, ka haw hlur mai a ni. 

 

 

 

“Store room ah ka dah kha, engatan nge i tih?” bang bo zet a ka pa’n a lo tih chuan, “Khanu kha biakin thleng ka nawr dawn, zak deuhin siam ila a rui ngam tawh lo ang” ka u chuan a lo ti a, u Bawiha danglam sawt lutuk hi chu ka nu paw’n mak a tih thu a sawi fo ţhin. 

 

 

 

Ka hma zawn a ri rawk rawk a, “Hey, tho teh” tih pahin ka u chuan ka kawrlum a ţhâm a, min pawt tho lawp a, dim lo zetin wheelchair ah min ţhut tir a, engmah hre lo khawp a rui ka ni bawk si lo, unau zinga tlum ber ka nihna laiah ka u in min dim lo lutuk chu ka hnuk a ulh ţeuh tawh. 

 

 

 

“Keimah pawn ka kal ve thei reng” ti a thawh ka tum chu ka darah dawmin min nam ţhu a, ka nu meuh pawn, “Amahin kal tir mai rawh” a lo ti ve a, ka tho chu ka pai khut a, ka ruih vang a ni pawhin ka hre tawh lo, ka hmanhmawh lutuk vang zawk a ni. U Bawiha bawk chuan min nam ţhu leh a, rin loh lutukin wheelchair chuan pawn lamah min nawr chhuak a, a zahthlak viau tak tak ang. 

 

 

 

“I chet chuan ka phuar bet dawn che a nia aw, hmeichhia lehnghal rui chungin patling ho zingah i awm a, zakthei lo lutuk” thinrim tih hriat zet hian a ti a, ka che ngam tawh ţhak lo. Mama lah hmuh tur a awm bawk si lo, u Bawiha nen hi chuan kan kum a inthlau lo lutuk a kan buai reng mai. Fiam vak vak mah ila a haw ngai lo kha a nia, ka rui a hmu chiah chu nidang angin ka chhang let ngam lo hrim hrim. Wheel chair ah min ţhut tir ngat a nia, min tih zah a tum thu a sawi khan a ti mai mai hauh lo tih a hriat. Pangngai viau mah ila ka tih thinrim belh mai mai hlauin ka ţhu hle hle tawp tawh. 

 

 

 

“I ti lutuk ange Bawiha” ka pa’n a lo tih pawhin, “Ti hian a sim hmak mai ang” a ti bur tawh a, wheelchair chuan min nawr a, zu rui hrem dan ka hriat tawh zawng zawngah ka u in min hrem dan hi dangdai ka la ti ber. Mi sawi mai mai chu nise ka awih lo viau ang, mahse ka tawng mek sia, awih loh theih pawh a ni lo. Ka u chuan min nawr zel a, runluih nan han tal vak dawn mah ila mi mit kan la lehzual dawn lutuk a, ka tan chuan awm mai mai a ţha ber. Inkhawm ve tur ho lahin, “I tlu sual em ni?” an tih loh leh, “I damlo em ni?” an ti zel a, “Bawiha hi chu i fel ngawt mai” ti tein ka u an la fak daih zui a, la rui chiai chung pawn ka zak a nia, karkhat vel ka bai der dawn hrim hrim. Tumah hian ka rui tih hre lo se a dik thlap a ni mai. 

 

 

 

Biakin chu hahdam deuhin ka thleng a, u Bawiha erawh a hah hmel hluam hluam khawp mai. Hetiang kher a min hrem hi ka ngaihdan a ni hlawl lo, engtin nge a ngaihtuah chhuah theih zawk ni? Biakin kawt kan thlen rual a min kalsan nghal daih danah a thil tih chuan a ti zak ve tho tih a hriat. Ka nu ka lo nghak a, ka nu bana kuah chungin biakin chhungah ka bai lut auh auh a, rui lo pawn ka bai der thiam lo a nia, rui chunga ka bai der vel chu ka hmuhnawm tham ngawt ang, ka lian ropui si. U Bawiha ve thung chuan en pawh min en zui tawh lo. A sawi ang tak tak khan chhungte hriat lai a ruih chu ka sim chiang khawp ang. 

 

 

 

Inkhawm banah ka pa’n wheelchair a hawn a, ka dil fe hnuah ka nu’n Fawnvela te in a kal min phal sak leh hram a, thawm bengchheng a awm tawh lo a, tumah an awm tawh lo emaw ti a inchhung ka lut chu an lo thum hak mai. 

 

 

 

“Lalremmawi, min hmu nange?” Ţp-an a lo ti nghal var a, “A u in wheelchair in biakin thleng a nawr a ti che a nia aw” Puipuiin nui kar kar chungin a lo ti ve bawk a, “An hnungah ka kal reng” nuihza aw zet a Ţp-an a tih leh chuan u Lalhuma takngial pawhin min nuih a, ka nuih a za ve hauh lo thung.

 

 

 

 

“Tripura, i ţawng thei emai aw, kum a thar tawh hi, ţawng theih lutuk kha sim teh, i inkhawm ve lehnghal” ka ti hlak hlak a, biakin ah ka hmu hauh lo nain kan hnunga a kal chuan a inkhawm ve a, Fawnvela te inah a tlang tih a hriat reng. 

 

 

 

“Kan khuaah Remmawii a lar leh ber dawn a nih chu” u Lalhuman a lo ti zawi ve nguai a, a kut a kuangkuah a, hawi pawh a lo hawi chhuak peih tawh lo. Dâk chhuak miah lovin a mitmu lianpuiin min melh run mai. 

 

 

 

“Kan Remkalami hi chu a pui ve em” tih pahin Sangkhuman min rawn kuah a, “Ka lo dah sak che” a tih leh ruala ar bawp a rawn lek chhuah chu ka lo ban vat a, an rawh ut deuh hlek nain a tui tho ang. “A hang na a an tih ţhin hi ka hrethiam chiah” tih leh ei ka rual a, a khâk fak ka rin nen a al daih. 

 

 

 

“Chi an sale a ni maw? A al ţha lutuk” ka ti kher a, chi man tlawm lo se chu nu Mawisachekin a dah ţha vek ang a, kan nei lo a ti leh daih mai ang. Mi hi ka hrechiang mah mah a a buaithlak. 

 

 

 

“Ngah nge maw ka lukhum chu i ngaihtheih loh viau le?” vin hlur a tih pahin Fawnvela chuan a lukhum a phelh a, a lu a nawr kawlh a, a zah vang ni lovin thlasik lai a nih vang chauhin lukhum a khum reng zel. 

 

 

 

“Fawnvela lu han mum ţhat bik zia hi chu aw, a bialin a bial vek alawm. I lu um hi a nalh leh nalh loh pawh ka hre tawh lo e a” uar fahranin Fithangin a lo ti a, Fawnvela lu chu a tuai pulh pulh a, a chang leh a beng leh thek zel a, Fawnvela pawh a hmui hup chung meuhin a nui ve kur kur mai. 

 

 

 

“Prison break a changtupa a ngaihsan vangin a lu a lo nawr kawlh ve ringawt. Ching tawh reng reng suh, khapa nen kha chuan in thluak a in len hleih lu lai emai, poison break i nih kha” u Lalhuman a lo ti bah ve nawk nawk a, an infiam an infiam hnuah keimahah bawk an pa kai leh a, u Zira a reh leh hmak tawh bawk a, ruih a reh tawh nen, kumhlui kan thlah ve nain kan thlah dan a nuam lo lutuk a, ka thil ei bak engmah a tui tawh lo. 

 

 

 

“Ka sachek siamah hian tu nge thei thur telh che u? Hei a tui hi a thur vek, naktukah duh an awm nual dawn a sin” nu Mawisachekin a tih chuan inchhunga la awm ho chu kan inmelh ralh ralh a, “A hing a ni lo maw ka u Mawi” ban charh a u Lalhuman a tih rualin, “Nichin lawk a ka siam hi engtin nge a hin theih ang? Darkar hnih khat vel bak a la rial reng reng hleinem” nu Mawisachekin a lo ti vin hlar a, “Chu, nikum a i siam a nih chu, hing lo chi a ni lo reng reng” tiin u Lalhuman a lo hnial leh a, nu Mawisacheki chu a kawng dawm meuhin a thaw halh a, a nui ve ta nge nge a, thinchhe viau mah se mi hriatthiamna ngah leh rilru zau tak a nih vang alawm an in ah kan kal ziah ţhin ni. 

 

 

 

“Heng ho hi ka hne lutuk, inchhunga zu in ka phal si lo a, pawn a chhuah pahin ka sachek hi an khawih leh tawh anih dawn hi. Duh leh a hranin thei thur ei mai se la, ka sachek siam sa thleng a an ti thur hi ka haw tak tak a ni” a ti zui nuah nuah a, han hnem vak ngaihna a awm lo, a khawngaihthlak zawk. 

 

 

 

Kalvari in min rawn call chuan rang deuhin ka la a, a rawn ţawng hmain, “Fawnvela te inah kan awm, speaker ah ka dah” ka ti nghal a, thil pawi a sawi palh loh nan a ti ka ni. Mi ka rel sual tawh a, ka duh tawh lo reng reng. 

 

 

 

“Kumthar chibai lo tih ka tum a, in awmkhawm lai a ni hlauh chu a va tihzia ve” a rawn ti a, a rai ve dek dek a a inla puitling nghal em em ringawt. 

 

 

 

“In hmang nuam em?” ka ti mawl satliah a, u Zira vangin ka ţhiannu pawh ka be peih lo zo vek tawh; ani tak pawh hian chanchin min hrilh ve tur a nia, a hunah an ngawi a, a hun lo ah an sawi zel tho bawk sia. 

 

 

 

“Ar chu kan kang ve a, mahse kan tlem a, a tui zo lo. In lo kal dawn emaw ka tia” a rawn tih chuan ka khawngaih ve reng. Kan zinga tal ţhang a nia, u Rinhlua te unau bula a hmang chu hrehawm a ti ru ve viau ang. 

 

 

 

“Nichin aţangin ka sawi tawh, in ngaihsak lo reng reng” Kalvari nen a kan inbiak laia Puipuiin a lo tih vin tak hlarah chuan, “Puipuii a la awm ve elo?” a rawn ti chiah reng a, Puipuii chu ka bulah a rawn phei sawk sawk a, “Park ah kan kal a, ka pheikhawk hnuai a tla bo daih alawm. Min zawnpui leh ru ka tia tuman an ngaihsak lo a nih hi” a ti hlak hlak a, “Pheikhawk hnuai bo khawp khawp a han hman nasat mai chu le, a tirah zawng nghal ula ţha tur” a rawn ti boh a, “Fawnvela te in kan thlen hnuah ka hre chiah alawm. A kau sa hrim hrim a” tiin Puipuii chuan a pheikhawk a khai kang a, a en vang vang a, a ke hnuai a spot dawn a nih hi. 

 

 

 

“Kumthar chibai u le” u Rinhlua ngei maiin a rawn ti ve khauh a, “A nuam bawk maw?” uangthuang zet a kan lo tih chuan, “Pawnah mei kan chhem a, a khûk nasat chuan nupa a meilum ai pawh a nuam chuang lo” a ti ve ngei a, u Rinhlua in la zei sawt lutuk hi chu reh hlum daih ka chak ţhin. 

 

 

 

“Ai mai mai teh” u Lalhuman a ti vin hluk a, keini mai bakah u Rinhlua pawh a nuih a za viau mai. A nihna dah ţha a a insiamrem thiam zel hi a fakawm ve na lai a ni.

 

 

 

Khawvar hma deuhin kan haw a, tui pangngai chiah ka in tak hnuah chuan piai lem lovin ka chhungte chuan min hau liam liam a, wheelchair pawh kan khuaah na na na chuan a lar khawp mai. Ni a kal ve bek bek zel a, krismas chu damrei nghah thil a ni leh tawh. U Zira nen lah kan inbe fuh hleithei lo a, kan khuaa a lo zin pawh min hmu miah lovin a haw leh ta a nih kha, Zir Bawng-a chu. 

 

 

 

Kan nunphung a ngai leh tawh a, Aizawl a ka kal theih nan keipawhin pawisa ka tuak theihna tur thil ka ngaihtuah leh ţan a, awm mai mai a pawisa neih loh ai chuan a ţul ţul thawh a pawisa hman tur neih reng ka duh zawk.  

 

 

 

Ka u te Aizawl a an kal tur kan thlah hnuah ka nu leh pate nen chauh tukţhuan kan ei a, inchhung a reh viau rualin tlemte pawhin ka khua a har eih lo. Ka nu leh pate muk deuh a an ti ti laiin ka kham san a, nghah pah a phone ka en chu Kalvari message a lo awm vang mai. ‘U Zira hi duh tawh suh aw, u Rinhlua u a nia, ka tan sawi a mawi lo viau nain Kolasib ah bialnu nghet a nei an ti leh tawh a nia, min rawn chhang let lo la, remchangah kan sawi dawn nia’ tih zawng a rawn thawn a, a message chu a tawi tehreng nen thinlung a dek zar mai, hetiang message hriam hrei chhawm hi chu ka ngaina vak lo a sin mawle. Ţha deuh a min be reng chunga bialnu a lo nei leh hman te chu a rapthlak e…lerh bak tih tur a nei ve lo a nih dawn hi. Kalvari hnen aţanga ka hriat a nih vangin ka awih nghal hmak bawk a, a pasal leh a chhungte a hmangaih lo tihna ni lovin anni ai chuan min duhsak zawk daih maithei a ni. Ka pa hnathawk turin a chhuak a, a la hma viau nain thlang lama buhher khawl ri bak thawm dang a awm lo. Kan khua angah chuan nilenga inchhunga awm mai mai ţhin an vang a, keimah hi a langsar zual ka ni mai ti ila keipawh eng eng emaw zuarin ka chhuak reng zel tho mah se ka thu hriat khan min ti nguai a, ka engtih tha mah a tho lo. 

 

 

 

Ka ţhu tum hmán reng a, ka ngaihtuahna bak chu tumah ka kawm peih rih lo. U Zira hi naupangah chang thut se, ben lawlh lawlh reng a nia ka chak ni. Miin thawveng min tih hian ka haw lo, ka lan duh dan dik tak a ni. Mahse, ka chhungril hi hmu tlang hlawm se chu thawveng min tih ka ring lo, ka â buang tih chu ka pawm a, thawveng min tih chhan hi chu ka hmaikawr vuah vang zawk a nih ka ring. Tupawn hmaikawr chi hrang hrang kan vuah a, keimah chiah ka ni bik lo. U Zira nen kan inhre kher kher te hi ka thin a rim, anni ang mipa hi chuan hmangaihna an pianpui ve lo. Aw hmangaihna khawvel en tu tih a nih laiin ni leh thla leh arsi te chiahin khawvel an en a, hmangaihna van tawh zia hrereng chungin hmangaihna mai bakah hmangaih tu kan zawng a, mi tam zawk hmangaihna hi chu uţawk ang a ni, a sawt dawrh dawrh reng mai. 

 

 

 

Mahni lo mah a rilru nat ve nak laiin ka nu lah inchhungah a ang dur dur reng a, inchhung chet champion a nihna chu hum tumin, “Lalremmawi, meng duar duar reng lovin min pui ve ta che. Ka kut lehlamin ka insu a, lehlamain ei ka rel a, tukverh bulah darthlalang te nen i ţhu reng ringawt mai” a ti leh tawh. Nu te hian thil an ti thei bik e…dawithiam an ni ringawt. Ei rel a la hun der si lo a, a ti mah mah deuh chu a ni. 

 

 

 

“Mithmul lem ka vuah a, ka meng panngai thei lo a nih hi” pawr deuhin ti mah ila englai mah a min hlau ve ngai lo tu ka nu chuan, “I men dawn loh ai chuan pawt thla rawh…pawt thla pawp pawp rawh, nge keiman ka pawhthlak sak dawn che” tih leh ka lama rawn phei a rual a, misual nu ang vel a ni. Ka inrin hmain ka nghawng hnung lamah a dawm a, “Khawi keiman ka’n pawt thla ang e, mithmul lem vuah vanga men loh ringawt mai” tih pahin a rawn ban a, a kut chu lo vuan betin ka tha tawpin ka ţang ve a, “Ka meng thei, min en rawh hei ka meng thei, mithmul lem vuah mah ila ka meng kuau thei” tih mawlh mawlh pahin zau deuh deuhin ka meng a, min thlah ve hram alawm. Ka intihnalh chuan hmangaihtu ka hmu ţha ve deuh ang chu tih nak laiin ka nu hian a remti hlawl lo. Rilru a la peng a, ka nu bulah chuan rilru na leh khawharna te hi thinrimnain a thlakthleng nghal vek zel.

 

 

 

 

“I hmai hnawih siam te saw i zuar dawn a ni lo’m ni? Bathlar a aieng awm ruih te saw va rut rawh” a ti leh a, aieng hi ka la sawi chiang lutuk lo a, u Zira hlir ngaihtuah mah ila hmeichhia ka ni ve tho si a, hmangaihtu zawn pahin aieng hmangin hmaihnawih ka siam a, ngo phuk theihna a ni. Hmeichhe dang hmangaihtu zawng ve tho ho hian an hmuh zawh loh ka hlau a, keimah leh an tan liau liau a ka siam a ni. Aieng hmanga ka hmai hnawih siam hmang tawh te chu an ngo loh leh an eng(yellow) ngei ngei zel. 

 

 

 

 

“Ka siam sa chu Aizawl ah ka thawn chho deuh vek tawh” ka tih veleh, “Tu hnenah?” tiin min han melh rum ţha leh vel a, ka u te ka thawn loh vangin a awih chiah lo a nih hmel. “Lady Dianas Inn ah ka hmai hnawih siam an zuar dawn. Ka hausa thur thur dawn a nia aw, kan hralh apiangin pawisa kan lo thawn ang che an ti” ti mah ila, “I hausa kumkhua lovang, i u te hi ti buai sek suh ka ti ngun tawh, an dawr hming lah kha hmanhmawh pawn rang deuhin a lam theih reng reng loh mai” a ti a, a thinrim leh ringawt tawh a, hei vang hi a nia tupawn Nempachangi an tih ni. Kan hmelhriat ţha leh kan pawh deuh te hi chu kei aia an upat chuan i u te a ti mai zel a, mi pawh hian mak an ti deuh ţhin niin ka hria, mahse hei hi chu ka nu tih dan ve reng a ni.

 

 

 

“Ka hmai ka phih ang a, hmai hnawih tlem la awm saw ka zuar dawn. A zawh rât hunah ka siam belh ang” tih leh bangrela a tarmit dah chu ban ka rual a, “Hmaiphih dawn apianga tarmit i vuah hi eng nge awmzia? Keini te chuan hmai kan phih dawnin kan phelh zel zawk a sin” a lo ti leh hmanhmawh tawh. Mithmul lem ka vuah miau a, a chhiat loh nan hmaiphih dawn a tarmit vuah a ngai tlat zel. Ka sawi chhuah chuan min hau leh dawn tih hriain chhang lem lovin ka nu chu ka kalpel a, fimkhur tawk a hmai ka phih zawh chuan ka dam sawng sawngin ka hria. 

 

 

 

In aţanga ka chhuak chho, kawngpui ka thleng chiah chu, “Khawvel a tawp dawn” ti a au reng ţhin pa ka tawk a, tunah pawh a la au. Min kal pel nghal mai dawn emaw ka tih laiin, “Zaninah i mu hlum thut thei, khawvel a tawp dawn” a ti a, hre ber awm ang zia zang hian an han au ve a, ka hmaihnawih siam hi ka zawrh ve zawk dawn em mawni. Hmangaihtu tawng lova mut hlum chu ka hlauh zawng tak a ni. Pathian thu a la sawi zui a, Pathian thu berkher chu insawiţhaihna chi a ni lo. Min thlamuan tu tur zawk a ni. Pathian thu hmanga mi sawiţhaih vak ţhin ho hi chuan Pathian an tih lawm ka ring lo reng reng. 

 

 

 

 

Tuman min biak din tawh loh nan chak deuhin ka kal a, kan veng ka pelh hnuah kopangah ka ding a, ka hmai zawn a thli a rawn thawt rual chuan ka mithmul lem vuah lai chu an thle dual niin ka hria, hetiang te chuan fan hnuaiah pawh ka awm ngam nang, ka mithmul a leng chum chum mai ang. Aizawl a ka kal zawk ţumin kan unaunu Lanfeli ka tih tir a, a thiam bawk aniang mawi deuhin ka meng er tan reng a, ka mit a veng hneh khawp mai, nisa hnuaiah pawh kal ila mit a vai thei lo, nihliap khum reng ang ka ni. Sangkhuma bawkin ka mithmul lem vuah chu a ngaithei lo leh a, “I mit kha rang deuhin vawi nga vel khap la chu i thlawk bo daih thei dawn a nih kha” a ti reng zel.

 

 

 

“Remmawi, intih hlum i tum em ni?” ring leng lawng a tih pah a Puitean min rawn pawh sawn dawrh chuan ka lo melh vak a, ka meng rum tih hre lovin, “Min melh dan chu min arsi chiang” a ti daih a, Lanfelin min vuah sak hi a mawi lutuk a ka meng rum thei lo, ka meng no reng mai a ni, pasal zawn nan a ţha viau ang. 

 

 

 

“Intihhlum dawn a thil zuar i hre ngai em ni? Min dawr ve teh” thupe aw deuh a ka tih chuan, “Taxi i ang min ti leh ang” a ti a, inhralh duh viau lo ila chu ka nui chhuak ngei ngei ang. Puitea hi mipa ah chuan a ngo pawl aniang, a hmaiah aieng pherh nuai a ka tat chiah chu taxi a ang lutuk ringawt. 

 

 

 

“I hmai bawl a reh daih kha” leitir ngei tum a ka tih chuan, “Ka hmai a bawl ngai lo” a ti fel then a, min dawr a tum loh hmel em avang chuan ka inher hmak a, kan khuaah hi chuan ka zuar nasa ve tawh bawk em a ni. Thlasik lai phei chuan, “Ka chât emai” an tia, inhralh a har lutuk ringawt. 

 

 

 

 

Ka ţhiannu ka hmuh chak em avangin quarter lamah ka kal a, ka thlen rualin bathlar a Kalvari lo ding reng chuan hmanhmawh deuhin min rawn pan a, a rai lian tawh si, kawrfual lian hnuk a hak ve phei chuan a dul hi hawlh pawp ila, sang deuhah a thlawk vang vang thei ang tih tur a ni. 

 

 

 

 

“Remmawi, aieng hmanga i hmai hnawih siam kha zantin ka inhnawih a, phih fai a har si, ka eng vek tawh, kan pain ka mít a liam emaw a ti a nia” a rawn ti nang nang a, i ngo ta lo a nih pawhin i eng ang ka ti lawk sa reng sia. 

 

 

 

 

“Hmm…a hmelchhiatthlak e..i ngo loh pawn i eng ang ka tih kha” ka tih chuan a hmui liah zauh pahin min en ha a, a hmai chu a eng vek tak tak a, a lo hmang ngun viau a nih dawn hi. Bang bo deuh a min en hi chuan venhim tlat ka duh ţhin. 

 

 

 

“Ngona rau rauah ka hmai hnawih siam hi chu hman ngun chi a ni hleinem, a tak ţha a, karkhat a vawikhat hnawih a tawk” ka ti a, u Rinchut but but-a pawh hi aieng a inhnawih ţhin tih a hre awm reng sia, i mít a liam a mi han tih kher te chu a. 

 

 

 

 

“Khawtlang i lo bum ange aw..police ah te an report palh che ang e, i zuar nasa ropui si, khawtlang i bum chuan huat rawn i hlawh dawn a nia” a ti a, henu dawihzep lutuk hi chu aw…a la ngai reng mai. 

 

 

 

“Tumah lei turin ka nawr lui lo, a ho sawhbeh” ka tih chuan thawven hmel deuhin ka lang ang ka ring, mi hmuhah chuan ka thawveng reng bawk a, vei em em neih lohna khawvel a nih hi. Rilru hah chang pawn vei neih vak vak ka duh lo, ka tum lo bur. 

 

 

 

 

“A ho sawhbeh tih chu engtihna nge?” a la ti hram a, “A ho sawhbeh a ni tawp mai” ka ti tlat a, “U Zira chu maw…Sensiari min hrilh a nia, ‘Remmawii nen an in ngaizawng emaw ka tia, kan khuaah ngaihzawng a lo nei leh daih a’ a ti a” a tih chuan, “Zirbawnga ve hi a, a duh duh ngaizawng rawh se” ka ti hmak a, vitamin ţha tak tak ei tur a awm chhung chu mipa vanga chaw ei theih loh ka tum lo. 

 

 

 

“Hrehawm i ti em? A hrawk bawk ringawt pawh i star ţhin sia” ka ban a dawm chung meuh hian a ti a, hrehawm ti ve deuh tho mah ila, “Ti awzawng lo, ka kehnuai pawh a ti za pha lo” uar fahran hian ka ti a, min en ran a, “Tak tak maw?” a ti leh hram chu ka thin a rim lek lek a ni. 

 

 

 

“Tak tak ni e…mipa lerh ka duh lo hrim hrim” ka tih hnuah, “Keichu ka chhe lo aniang, mi hian bialpa nei turah min ngai zel” ka tih chuan a nui ta hak hak a, “U Rinhlua hi chu a fel a nia aw…hetiang mipa hi zawng ve rawh, Pathian ţih mi hi an ţha ber” a ti vel a, “Pathian ţih mi kan duh a, Pathian ţih der mi kan tawng leh nawlh zel a” ka ti a, dik a ti bawk aniang a lo bu nghat nghat mai.

 

 

 

Kan ti ti vak hnu a quarter lama a let leh chu ka thlir zui a, ani chuan tawpna hlimawm a nei tawh, nau a keng tawh a, a duhthusam mipa a nei bawk. Tunah chuan ngaihtuah lutuk avanga a ruk a ven tlat a ngai tawh dawn lo a nih hi. Kan naupanlai kha chuan a fahrah ve em a, mi khan an chhaih nasa ţhin a, inkawibahna a tel ve te an phal lo a, khavang khan a hmaah ka ding tlat ţhin. Tun thlengin ka la ngaihtuah a, pasal sual deuh phei chu nei se a duh lo chung ka hnuk haw duh ang. Mahse, tunah chuan amah ang bawkin ka hahdam huai mai. 

 

 

 

U Zira pawh an khuaah a let leh tawh ka tih tawh kha, “Lo zin teh a” a tih khan, “Ka peih lo sawhbeh” ka ti deuh tlat a, min sawm nawn leh tawh lo. Inngaizawng angin kan awm chiah lo na a kan thikthu a chhe ve ve a, nupui chu nei se an inneih naah nalh deuhin ka kal ang. U Zira ka ti reng mai, ka ning. 

 

 

 

 

Fawnvela te nupa pawhin ngai an awh leh tawh a, inhau reng ţhin kha tunah chuan an in mil leh vek tawh. Nupa an nih tawh miau avangin an inkar a ţhat loh lai khan Fawnvela kan hau a, Fithangi kan fuih a, tunah chuan innei thar hlim ang mai an ni tawh. Sangkhuma nen kawppui kan la nei lova, kan hawi hil dun viau nain hrehawm kan ti chuang lo, kan leng hah hah zel mai a ni. Keimah hian hmangaih tu ka zawng ru ţan a, pasal neih pawh ka duh ve, min be tu te zingah u Zira tih loh chu ka duh zawng an awm lo thung; ani lah hi zanlam a kaw hreuh chi, rilru pm deuhah ka la ngai tlat a, a duh loh em avangin kan inbe hleithei lo. A chhan dang pawh ka sawi ţeuh tawh kha. Kha, ka ngaihtuah leh tawh, theihnghilh ka tum poh leh ka ngaihtuah nasa a, min duh ve tak tak se chu min lerhsan hauh lo ang. 

 

 

 

 

Han zawn chiah hian hmangaihtu an vang a, ka duh ber lah hian min hmangaih ka ring tlat lova, min be tu te zingah ka lungdumtu awm lo mah se ka mithmul lem hmang hian hmangaihtu ka zawng zel dawn tho, ka beidawng dawn lo rengs han ti vel ila engmah ni lova pasal neih ka tum lo, ka thiam tur chi leh ka phak tawk ka zir ang a, thiam thil ka neih a, pangngai deuh a pawisa ka lakluh ve theih hunah chauh pasal ka nei ang. Mo rau rauah pawh thawhchhuah nei leh nei lo chu chhungten an en dan a in ang lo, a inthlau tlat zel. Mi an fel tawh rualin inthliarna hi chu a awm lo thei lo ţhin, pawisa nei zawk na na na chu duhsak pawh an awl ang, an demawm hran loh. Thawhchhuah fumfe tak ka neih hunah chuan pasal ka la nei ve ang a, ka hmangaih aiin min hmangaihtu dah lal hram ka tum ang. 

 

 

 

 

Hmangaihtu diktak ka hmuh hunah chuan ka chelh ţang ţang ang a, theih tawp ka chhuah ang a, hmangaih hluah hluah tlak ka nih zia ka la hmuh tir ang…keimah, thingtlang nula hi.

 

 

 

 

CONT…

Angel Pops
Author: Angel Pops

This Post Has One Comment

  1. Hazel Ralte

    Remkalami ang hian hringnun hi a harsa lai pawh pal pawp pawp ngam zel ka duh… Thawveng deuh pawh hian rilru a hah ve thei tho a.
    Hnathawh/Thiam thil nei chunga mi in a mo leh engmah thawh nei lo a mo tawp hi an innawmsak hleih em mai, keipawh thiam thil ka zawng dawn🤭

Leave a Reply