You are currently viewing Keimah thingtlang nula S2 – 16

Keimah thingtlang nula S2 – 16

Spread the love

KEIMAH, THINGTLANG NULA S2-16

“Tho ve tawh em em teh kan tlai anga sin” tih pahin Nutei mawngah ka beng thlawrh a, “A thak lai takah i beng, kha aia na khan han beng leh teh” a tih chuan, “Tho mai mai teh, hrilh tur che ka nei” ka ti a, Kalvari awmna a hla ropui si, mahni a buai reng hi ka ning.

“Awm lo ta ila engtin nge i awm ang le?” a ti nghal ringawt a, khuma ka ţhut fel rualin a zi mar uan uan a, ka inrin loh lai takin a hahchhiau thut a, ka phu nasa lutuk ka phar uai mai. “Awii…deuh thut a che, ka inring hman reng reng hleinem” uar zeta ka tih chuan, “Hahthlak” thawk halh pah hian a ti a, “Inring renga awm tur chu kan ni, mahse mi hahchhiau dawnah lehzel lo inrin ve a ngai lo, a hahchhiau tur ber te an inrin chuan a tawk” thawh pahin a ti leh duah a, a ham zui bai bai hnua, “Eng nge min hrilh dawn?” a tih takah chuan ţhu rem hmasa te tein, “U Zirbawnga nen kan inţhen” ka ti sep a, thurawn min pe dawn emaw ka tih laiin a khap fuk fuk a, “In va â ve” a ti daih a, kan in en tlawk tlawk a, kei takngial pawhin sawi tur ka hre tawh lo.

“Kan ţhiannu pakhat chu a bialpain a ţhen a a inawkhlum daih a sin. I lo inawkhlum ve ange aw, ka rap dawn tehmai che a nia” a tih chuan, “Teuh lo mai, kan thih hnuah midang an nei leh tho ang a, kan thlarau leh kan chhungte chiah kan hrem dawn a sin” ka lo ti a, mipa vang berkher a intihhlum chu ka duh lo reng reng, hran khum bak tih theih kan nei dawn chuang lo a, kan chan a chau dawn emai.

“I va han dak nalh thei reuh e…thlarau te hi a vakvai duh bik a an tia, kan ţhiannu thla pawh khan love story a chhiar nasa an ti, tih tur dang a vang viau aniang” a ti a, chutah min rawn hnaihin zawi tein, “Champ wine i in ngai em?” a ti sap a, “Urlawk zan leh kumhlui thlah zanah bak ka in ngai lo. Engati nge?” ka tih chuan, “Rilru na ho hian an in chak ţhin a, keichuan ka in chak reng” a tih veleh, “I ute” ka lo ti a, “An in vek, kan in ngun hran lo a, sualah kan ngai vak lo” a ti a, ka ngaihtuah vang vang hnua, “Mahse ka rilru a na chiah lo a” ka tih chuan a lo chek tlak a, “Na angah ngai mai rawh, nakinah a la na dawn tho alawm” a lo ti a, a champ wine in chak thlak emai a, chhuanlamah min hman a tum. “Keichu ka in ve ngam lo, u Bawiha a hlauhawm emai zak deuhin min siam leh ang” ti mah ila, “I lo riak daih dawn alawm” a ti tlat a, ka in awm chuang lo emai.

A inchul mam thuak thuak a, pindan aţanga a chhuah dawnah min hnem ve nan, “I lo ţap ange aw, bialnu te ţhen âwt âwt mi fel an awm ngai lo, a chhiatna chiah ngaihtuah rawh” a ti a, “Champ wine chu aw” ti lehin mit a siai zauh a, zai ruah ruah chungin pindan aţangin a chhuak a, “Thawhhlim hlawtah pawh ka aw pek a dik viau lo maw?” ka ute hnena a ti ri te chu ka hre reng a, ka ât zual lai kha ka hrechhuak ve ziah.

Tukţhuan eikhama ka insiam laiin Kalvari in min lo call a, ka lak rualin, “My friend, u Rinchut but buta ka ngei zia kha” ka ti nghal a, “A uang ve a nih kha, phone i dah lo tih a hre reng alawm. Naute a tlei lo lutuk a ka lo be hman chiah che” a rawn tih chuan, “Mi bialpa ţhen lai laia fiamthu lo thawh te chu a, za mah se ka nui lo vang” ka ti a, mascara ka inhnawih pah laia, “A ni ngawt mai, i rilru ti na lo la, bialpa ka neih vanga i star mai mai a nih tho kha aw” a tih laiin ka khap fuk a, ka mit hnawih pherh nghal vek chu thinrimin, “A va mak e aw…a hun lo leh lutuk mai, thil dang a buai zo vek dawn alawm” ka ti hlak hlak a, “Ka hnem ve che a nih kha my friend, tih thinrim che ka tum lo a nia” Kalvari in a rawn ti bawk a, “Ka mit hnawih a pherh vang alawm, ka hnawih laiin ka khap kher a, a buai vek a nih hi, ninawm lutuk mai” ka la ti hlak hlak a, “Beng hrep rawh” a tih chuan, “Hei bak ka nei lo” ka ti vat a, “My friend, ka rilru nat loh nan ka in hnem thinrim daih alawm” ka ti leh a, ka awmdan hi ka ning, keimah zawkin ţhen ila chu ka inhnem lungawi thei ang mawle. Nui chungin min ţhen kher lehnghal a, ka ngei lehzual phah vek.

“Kan khuaah awm la chu vur i hralh thei ngawt ang” a rawn ti daih a, “Ka lung a leng, u Lalhuma thlengin ka ngai vek tawh. U Zirbawnga ve hi min duh tak tak chuan haw rawh pawh ti ila ka haw lo ang a ti tlat ang. Min duh tak tak lo a nih hi” ka ti bawrh bawrh a, hnam mawl ho zingah hrenpereng kaihin au ruai ruai chungin lam chhawng chhawng se a lerh lo ber ang, ka rin dawn veleh midang ho hian sawi tur an hre ziah.

“In lerh dun emai fa pawh nei ula a pian rualin a inchei nghal hlarh hlarh ang, fapa in neih lahin a kal theih chhet chhet rualin nula a rim nghal ang a” a rawn tih chuan ka nui duai a, “Awii…my friend, what a funny thing, nu leh pa te lah khan lerh dan tur kan han hrilh belhchhah ang a” ka ti a, bialpa ţhen zo chiah e ti lo chuan ka hlim khawp mai.

“Lerh mah ila u Zirbawnga angin ngaihzawng ka nei ve kher lo a, Maski ka be ringawt a, a tak tak a thlen hlauin ţhian angin ka kawm leh daih a, bialpa dang min neih san a ti thei lo hrim hrim. Maski-an ka duh che a tih pawn a chi loh ka ti tlat aw” ka ti pang pang a, “A lerh tak tak chuan in inţhen laiin a bialnu sawi tur an awm leh mai ang. A beidawng duh lo a nih leh in inngaizawng leh anga a ni mai” a ti a, duhthlan tur a chaurau thei si, hawina lam apiangah mipa an awm a, duhzawng han nei ila min lo duh lo a, min duh tu te kan duh lo ve khanglang a, kha fuk khawpin ka senior nge nge dawn a nih hi. Thlasikah ka châr ţha thei viau ang.

Nutei ka sawm chho a, a inpeih thlap tawh ka rin nen a lo inbual zo ve chauh a, “Lo kal rawh” ti a min hui zauh takah chuan an pindanah ka lut ve a, a felfai thlap bik mai. “Lawk aw” a tih hnuah khum hnuaiah a bawk lut a, a hai rawk rawk a, “I inbual zawh chiah kha, phurthak i kai ange” ka lo tih chuan, “Bengchheng suh, i in ve lo tawp mai tur a nia” a lo ti hlak a, khum dap phah karah champ wine a zep emaw ka tih laiin nui vur vur chunga a rawn chhuak chuan pawisa khawr ţha zet mai hi min hmuh a, “Pawisa a nih hi” tih kher pahin a zut mar a, a bengfai pah thuak thuak a, 500 tlang pahnih hi a inthuahin a lo awm a, “A chuar ţha e…istiri a i nawh mar loh chuan kan hmang thei lo ang” ka tih chuan, “Thei awm e…pawisa a nih chuan hman theih lohna chhan tur a awm lo. Rilru na zawk i ni bawk a ka treat ang che” a ti a, in ve duh ang deuhin ka awm ang a, a rukin ka in lo thek mai dawn a ni. A nih loh chuan u Bawihan ka nu a hrilh ang a, ka thiam hmain min rawn hruai tak tak mai ang.

“Ka inthlak chhung bang lam kha hawi rawh” a tih chuan, “Min ti khawngaihthlak e” tih pahin ka hawi a, Sangkhuma lahin message ah, ‘Isss…u Zirbawngan a ţhen che a ni maw? I lungleng hi i lo u ruah ruah ange aw’ a rawn ti ve leh tawh a, group ah ka la sawi der si lo a, Kalvari in a hrilh a ni ngei ngei ang.

‘Min ţhen a ni mai alawm…ka u ruah ruah a tíkah’ ka tih hnuah, ‘Uar deuhin chhiar rawh’ ka ti leh a, ‘Maski a awm tho a, nangchuan i nei leh thei mai ang’ a rawn tih chuan, ‘Ka nei peih tawh bawk lo, bialpa neih hi ka ning, ka chhang kham’ ka ti a, u Zirbawnga a la reh vang vang a, pawi chei lo emai, rinhlelh a dawl hlawl lo.

“Ka hman e” Nutein a tih lauh hnua ka inher chu, “I pheikhawk kha kal pahin a chhuak thei lo mi? Buk ngat ila chu nang aipawn a rit ang chu” tiin ka nui duai a, a lawk lurh a, mi awm mai mai lai pawh min cho ur ur duh hmel lutuk ringawt.

“Chhuak thei nang aw…ka suih nghet alawm, kal ang” a tih rualin, “All go” ka lo ti lauh a, Nunuin, “Lo haw tlai suh u aw” ţha deuhin a ti ve tak nain Nutein, “I thu lo mawm hmak” a ti kher a, nui uar uar chunga a chhuak chu ka zui ve nghal a, ka ât zual lai pawh khan hetiang em em chu ka ni lo reng reng.

“Cheiii…a mak maw?” Nutein a tih tak hlutah chuan a enna lam ka en ve vat a, u Zirbawnga bike chungah a lo ţhu hmuk mai. “Ehe…kolasib i thleng tawh ang chu tih nak laiin” ka tih chuan a lo ner nawk a, Nutei lahin, “Dawrah ka kal dawn” tih leh kal a rual a, keimah chiaha ka din hnu chuan bike aţanga chhukin min rawn pan a, a thinrim hmel bawk si, lei chu a rap khu luih luihin ka hria.

“Eng nge a?” ka zawn a lo thlen ruala tim daia ka tih chuan, “Kha, i sam zai” tih pawr chhar pahin ka kawr awmah eng emaw a rawn hmet bet a, a kut a lak sawn rualin en nghal mah ila engmah a awm lo.

“Ka sam zai min pe tur ringawtin maw i lo kal? Engmah a awm loh hi” ka tih chuan, “Ni lo, rawn en tur chein” a ti a, “Awii..i awmdan hi what a very chingchivet a ni tawp, min ţhen a ni lo’m ni?” ka tih lahin, “Ka uang a nih kha” a ti leh tlat tawh a, “Khatiang fiamthuna chi a nih loh kha” ka tih chuan, “Ka nuih kha” a lo ti vat a, “Kan inţhen leh lo tihna maw?” ka tih ţhat leh chuan a lo bu nghat a, keimah zawk hian ka haw san daih mai dawn em mawni ka ti rum rum tawh.

“Engati nge a huho a min bawl dual dual a? U Rinchut but buta lahin min bawl bawk, saum min tat ula hmarcha nen min rawt law law rawh u” lungawi lo zet a ka tih laiin a lo nui daih a, “Nui reng suh, min tih dan hi ka duh bik lo reng reng, u Zirbawng AZZ” ka ti kher a, “Zikpuii kha ka bialnu a ni lo aw, Zikpuii nen kan inhriat hma aţangin AZZ ka duh tawh. Aaa…i bulah ka awm tam a ka naupangchhia zo vek, ka bialnu a ni lo” a ti bul bul reng a, “Mi sawi tur hian i awm ve ziah mai. In khuaa i awm khat tehreng nen mi zawng zawngin lerh an ti nghal che a nia, i bawn ve e” ka tih chuan, “Hmelţha apiang hi lerh turah an ngai a” a lo ti a, kan inţhen emaw tih hnuah kan nui dun leh hak hak tawh, “Keini pahnih hi chu khuanu pawhin kan hming bulah question mark a dah ang, kan chin a hriat loh emai” ka ti ta ringawt a, “In ban hunah bazar ah kan kal ang, saw i ţhiannu a lo kal” tih leh a bike lam pan a ruak a, dek pawh ka ti hman tawh lo hrim hrim.

A tlanchhuah ruala Nutein, “Engtin nge?” a tih chuan, “Champ wine i in leh thei lo, kan inţhen reng reng lo, min tihder alawm” ka lo ti a, a aw ve mai ka rin nen, “In inţhen loh lawmna a ni leh mai alawm, all go” ti a kal mai a tum chu a kawrah pawtin, “Ban hunah bazar ang a ti” ka ti leh a, “Keimahin ka la thei alawm, zanah kan ti dawn nia” a ti ve zel a, “I va han heh hmel tak aw Champ Nute” ka tih chuan a nui vak a, inlungrual deuhin kawn lam kan pan a, inţhen leh lo mah ila kan inţhen emaw ka tih lai ang reng khan ka awm tho.

“U Zirbawnga nen a kan inngaihzawn dan hi a kal pah e ka ti, mi te a ţhen der vel mai mai a, a thutak hlawl lo, ka sam zai min pe tur angin a awm a, bazar kalpuiah min sawm leh daih a, kan inkarah fiamthu chiah a awm” ka ti niah niah a, “In inkarah hriamhrei a awm lo a lawm hle zawk rawh aw. U Zira i ti reng a, i mutthilh lai pawh khan i nui emaw ka rawn ti zel, i hmui a ti fan chhe vek tawh a nih kha” min tih chuan, “Nih leh ka hmui a fan chhiat tak tak hmain u Bawnga ka ti tawh mai ang” ka ti a, inkai chunga lei si dawn dawn a kunin kan nui uar uar a, khawlaia ţhiante nen a han nuih luih vel hi hriselna atan a ţha, keipawh ka damloh khat em hi.

Zodin thleng bus ah chuang lehin Afaki beauty studio ah bawk kan kal leh a, a chhung a tê reuh si, Nutei pheikhawkin a awh khat vek. “In pahnih chiah in ni rih bawk a tu emaw zawk zawk kutah gel polish hi ka hnawih ang a, ka tih dan vel uluk deuhin in lo en dawn nia. Tu nge dawh zawk dawn?” u Afakin a tih chuan Nutein, “Remkalami hi a bialpa nen tlaiah an leng dawn a, hnawih sak zawk rawh” a ti a, “Lo ţhu rawh” a ti chiah chu ka phur a sin aw.

Ka kut khawih paha u Afakin tih dan tur a sawi mawlh mawlh hnuah, “In hrethiam em? Ka tihdan kha in en zel tiraw?” a tih chuan, “Sawi chu ka sawi chhawng thiam ang a, mahse ka ti ve thiam kher lo ang” ka lo ti a, Nutein, “Ka thiam vek, ti zel rawh” a lo ti thung.

U Afaki chhuah lawk hlanin, “I thiam maw?” ka ti ngat a, “Aaa…hetiang lam hi ka tuina a ni lo, zirtur dang ka ngaihtuah mai ang” a lo ti daih a, “Dawt i sawi a ni maw?” ka tih chuan, “Min ti buai suh zir tur dang ka ngaihtuah” a ti a, Nutei tel lo chuan ka zir peih bik lo reng reng.

“Lanfeli bulah kal ve thung ang” Solomon’s cave aţanga kan chhuah ruala a tih chuan, “Ka kuttin mawi zia hi” ka lo ti a, “Ti kha chuan u Zirbawngan fiamthu pawhin a ţhen ngam tawh lo ang che” a tih leh chuan a dara kuah thawkin ka sawi nawk nawk a, vaivakawn lam panin kan kal a, Lanfeli dawra kan lut chiah chu bihruk nghal mai ka duh, “Ka ţhiannu ka lo hruai ve a” Nutein a ti tak nain min hre sa vek a, a nui huih a, “In tih ţhat peih dawn loh chuan ka zirtir dawn lo che u a nia. Taimak a ngai ve a, kal pah mai mai chi a ni lo” chair lian puia ţhu tawm kuk chung hian a ti zung zung a, a te berin ro a rel zawt zawt mai.

“Ka lo kal remchang tho a mithmul lem min vuah sak leh rawh, thliin min chhem pawh a nghing ve thei lo chi kha” ka tih chuan, “Nidangah aw..sam tan tur ka nei remchang hlauh a, uluk deuhin in lo en dawn nia” a ti ve leh a, Nutei bawkin a en ţha leh peih lo a, keichu thiam ka tum bawk a ka en uluk khawp mai. Lehkha kan zir sang lo a, degree nei lo tan pawha thiam ve theih chi hi chu uluk deuh a zir a ngai.

Lanfeli dawr aţanga kan chhuah leh meuh chuan kan ngawi reng tawh a, an tihdan vel ka ngaihtuah let leh laiin Nutei chuan, “Thiam nei loin kan haw a, frozen tal kan lo lei lo a ni” a tih loh leh, “Lanfeli te ang mi chei thiam chuan ar hmul pawh an pawt nalh bik ngawt ang tiraw?” a ti deuh reng a, “Keichu ka thiam dawn khawp mai, kan khuaah dawr ka hawng ve dawn chiang alawm” ka ti kha kha a, nikhat ka zir dek dek a dawr hawn ka cho nghal zak mai a ni.

“U Zirbawnga nen chuan khawiah nge in innghah dawn?” a tih takah chuan hrechhuak zawkin phone ka phawrh a, “Min hrilh vat ta che, missed call a tam tawh lutuk” ka ti a, min melh ram ram mai. “Vaivakawnah kan awm ti rawh, kein kan chho zel ang a, a kawn lai takah khan kan lo nghak dawn nia” a ti tho a, “Mahse tu nen nge in haw ve ang? Ka bazar pui rih lo mai ang” ka tih chuan, “Keimahin ka haw thei, silcharah min zuk dah tawp mah la naktukah ka rawn lang leh hlawl ang, ngaihtuahawm loh tak ka ni” uar zetin a ti na a, “Kan chhuak hma a dar3 chiah a la ni tho. Haw phawt ila ka chhuak leh zawk mai ang” ka ti a, min hnial mah se ka thu ka sawhsawn duh bik lo, kawng laklawh a ţhiante kalsan ka duh lo reng reng.

U Zirbawnga hnena, ‘Kan inah min lo sawm rawh’ ka tih hnuah phone ka ak ţha a, champ wine a lak zuai hnuah hmanhmawh deuhin kan veng lam kan pan a, a bur ah lah chu a inkhawng ri rawl rawl reng a, in kan thlen meuh chuan pum na ţhumin kan nui tawh.

Kan inah u Mama chiah a awm bawk a, “Nutei nen hian kawnah kan kal leh lawk dawn nia aw” ka tih hnuah ka rilruin, ‘ka uang a’ ka ti a, a lo remti ve mai a, Nutei chu, “Ka lo haw hma chu lo biru char char rawh” ka ti bawk a, “Umm..min koh pawn aih ka ti ang” a tih chuan ngaihţha deuhin ka kalsan a, bazar miah miah ila a ni mai alawm.

Kawnah u Zirbawnga ka lo nghak a, a lo thlen veleh taxi in bazar lamah kan kal leh nghal a, “A tlai tawh si, khawthim hnua ka haw vaih chuan ka u ten min hau ngei ngei ang” ka tih laia a phone ri chu a off hmak a, “Tu nge a?” ka tih leh chuan, “Vai” a ti ringawt a, ka awih lo nasa. “I pattern chu ka zawt kher lo che ang a ka maimitchhin hlanin hawng la a hming min lo hmuh teh” tih pahin ka chhing zawk a ka meng lehnghal a, “Vai ka tih chu” tih pahin ka mit zawnah a rawn lek zawk a, “Awii…a phe zawk ringawt alawm” ka tih chuan, “I ninawm. Ka sawi vek tawh kha” tih pahin a ak hmak a, a dik lo reng reng. Ka duh em vang hian ka ti huam zel a, min bum dawn a ang riau.

“Hmh…ka en peih lo, ka enpeih emaw i ti a nih kha” tih paha lehlam ka hawi hmak chuan, “Ka bungraw lakna tur te an nih hi Remsial” ti ve bawk mah se a lam ka hawi peih tawh lo. Sumdawng mi nih vanga phone dah ţhat kher tur tih thu a awm lo.

Bazar kan thlen veleh, “Kan thleng, haw leh nghal ang ka u ten min hau ang” ka ti ţan nghal a, “Phi sek zel suh” a lo tih chuan vin zetin, “Sek” ka ti lui ve ţhak a, min ţhen tlang law law se ţha tur a nia, ka tui tawh hlawl lo.

“Kan bazar anga zanah ka haw ang” a ti leh tawh a, “Karkhat ka cham dawn i tih kha” ka tih chuan, “Haw rawh min ti a nih kha” a ti a, ka tum bar laia min rawn kuahin, “Tak taka ka uang a nih kha. Kal ang” a ti leh daih a, min kuahna chu thlahin ka kutah a kai a, hauh hlau ru rana bazar kal chu engti zawng mahin a nuam thei lo.

“Aieng i zawrh tirna te kha an la inhawng angem?” a tih chuan, “Lady dianas inn maw?” ka lo ti vat a, “Ni e…khawiah nge?” a tih leh chuan, “Hetah hian” tih pahin u Bawiha min kalpuina, Lps market ka kawk a, “Min hruai rawh” a tih chuan thawmhnaw a lei duh emaw tiin ka hruai ve mai a, kan luh hma deuh a, “Ka lei ang che” a ti chiah chu ka tlan let leh rang khawp mai.

“An thawmhnaw zawrh a nalh hlawm em saw, i duh lo mi?” ka dinna lama rawn kal paha a tih chuan, “Duh mah ila i lei ka duh lo, nakinah keiman ka lei ve mai ang” ka ti tlat a, thil min lei chuan rilru siam a ti harsa leh vek ang.

“Phone vang kha a ni chiang” a tih veleh, “A ni hlawl lo, tuna lei ka la duh rih lo, nakinah ka pianchamah min lei mai rawh” ka ti a, a neituten min hmuh hmain a kawrah ka pawt ţawng ţawng a, a rukin step ah ka chhuk thlak pui leh a, “Thil ei ila haw ang” ka tih pawhin min hnial tawh lo.

Thil kan ei laiin, “Ka bialnu hlui a nih kha” a rawn ti thut a, tui ka in lai tak a ni lehnghal, ka la hak zui a, ka khuh bawrh bawrh mai. “Thil tui ril thlengin i haw vek a nih hi. Tui ber i hak chuan eng nge ka pek ang che, tih dan tur ka hre lo” tih mawlh mawlh pahin u Ziran min rawn pan hnai a, tui chu ka hnar aţang ten a chhuakin ka hria. Ka awm dawm chungin ka ţhu ţha a, ka sam ka hui rualin, “Kha, i hnap kha hru rawh” zawitea tih pahin tissue paper min rawn pe a, “Ka hnap a ni hlawl lo, tui kha ka hnar aţangin a rawn chhuak a nih hi” ka ti a, a tissue paper chu lak sak hlawkin ka inhru zui a, ka mit pawh a huh dap mai.

“I bialnu hluiin min ti hlum lo chauh a nih kha” ka tih leh chuan, “Thudik tak i hre duh em?” thutak zet hian a ti a, “Hre duh e…eng thudik nge?” ka ti a, hmanah khan nupui a nei dawn tih thawm a ri tawh a, mahse hnam dang a nih avang leh hmeichhia kha kristian a nih loh avangin an innei ta lo kha a nia, “Kan awmna hi a rem lo e” a tih chuan, “Khawiah nge kan kal chuan ang a?” ka ti a, “Hotel ah kal ang” a ti chiah chu, “Ehe” ka lo ti vat a, “Rilru pm a ni lo a nia aw, ka thuruk ka hrilh ang che, in khuaa ka lo awm reng chhan te” a tih takah chuan thil ei zawh veleh kan inzui chhuak a, engtak chu ni maw? Mi fate pawhin an ngaihdam theih bik loh tur thil a nih chuan keipawhin ka ngaidam bik hauh lo ang.

Hotel chhunga kan luh rualin, “Sawi rawh” ka ti nghal a, khuma ka ţhut veleh a ka bula a rawn ţhut chuan, “Rilru kha aw” ka lo ti vat a, “Aw ka hria, a awmzia chu maw, ka sawi tum chu nupui ka ru tawh” a tih chuan nui duai chungin a lam ka hawi a, “Min bawl, ka awih tawh dawn lo reng reng” ka ti tlat a, “Thudik i hre duh a, ka hrilh che” a ti hmak a, engti zawng pawhin han thlek ngial mah ila a nui duh bawk si lo, “U Rinchut but butan engmah a sawi lo” ka ti ta ringawt a.

“A sawi lo ang, i ţhiannu pasal ka nia, ka nau a ni thung a” a ti chu ka ding hluai a, “Kalvari pawn a hre lo mi?” amah la ringhlel deuh si a ka tih chuan, “Hre lo, tuman an sawi ngai lo” a ti leh tawp a, “Nih leh Fithangi?” ka tih leh chuan, “A hre lo lehzual ang” a ti a, ka mangang chuan, “Kohhranin an phuar miah lo che em ni a?” ka ti hluai a, a lu a lo thing a, an maksak hle mai.

“Inru ve si kohhranin an phuar lo che chu a mak e” ka ti a, “Inru han tihah kolasib a kan inah ka ru lo, phaiah khan kan cheng dun ţhin. Ka chhungte pawh ka bum rei a, nupui a neih ka tum khan anmahni nawr nan ka sawi chauh. Nupa ang chiahin kan awm” a tih chuan, “Khawiah nge naute?” ka lo ti vat a, “A la awm lo” tih pahin a lu a tuai puat a, ka nu in a ring lo em em mai hi a mak hran lo, Pathian pawi a khawih nasa emai.

“I neih tak loh nen khan maw in chen dun a?” darthlalang lian hmaa din pah hian ka ti a, khuma a ţhu chu ka hmu thei vek tho. “Ni e, neih ka duh khan ka chhungte nawr nan thudik ka hrilh” a ti nawn leh a, “In innei chuang si lo a” ka tih chuan, “Phal hek lo” a lo ti a, a tihdan hi hmun ruak hnawhkhattuah mai mai min hmang a ang riau.

“A nih leh Zikpuii kha?” ka tih chuan, “Nupui ka neih an phal loh hnuah in khuaah ka rawn awm reng a, in khua aţanga ka haw hnuah reilote kan inngaizawng, kar hnih vel aniang” a lo ti a, a inpuan fai ta vek a, a ţhiannu mai mai a lo ni lo tawp mai.

“Ngati nge min hrilh kher a?” darthlalang aţanga amah en ran chunga ka tih chuan, “Mi kâ aţangin thil i hre reng a, a ninawm, ka thusawi hi awih la, thil dang a awm lo” a ti hmuk hmuk a, “I thusawi kha i bialnu dang te chuan hria se an ţap ang” ka tih laiin, “Thudik chauh ka sawi” a lo ti ve thung a, “Min ngaihdam theih leh theih loh a ni mai” a tih chuan, “Hmh” tih pahin a lamah ka inher a, amah kawh pah hian, “Kohhran phuar ba i nih kha” ka ti a, a nui duh ţhak lo.

“Ka sawi kha chu nunhlui vek a ni tawh a” tim daia min en chung hian a ti ban charh a, “I nunhlui pakhat kha kum khat pawh a la liam lo, pi Lalsangzualin a la zai hnan lo” ka tih chuan, “Kumin a mi a ni lo” a lo ti thuai a, “A la nemnghet lo” ka ti leh hram a, a thu min hrilh ho kha engtia dawnsawn tur nge pawh ka hre lo, u Rinchuta chu an bum thei lutuk ang a, a nu leh pate an demawm lek lek mai dawn alawm le.

“Tikhan min la ringhlel tho em?” a ţhutna aţanga thawh pah hian a ti leh daih a, “Ka ringhlel lo che, ka ringhlel tawh hlawl lo che, mahse ka hmu mak vek che” ka ti deuh thawr a, “Kha chu ka ring sa hrim hrim” a lo ti ve bawk a, kan inngaihzawn dan hi a ngaih a sam a, nih loh aiah kan ni vel mai mai a ni ber.

“Thuruk nei reng chunga nun chu a ninawm emai, ka thusawi tawh kha lak let leh theih pawh nise ka la let lo ang” a tih chuan, “Rei deuh in cheng dun sia, i la duh em?” ka lo ti a, tukverh lam panin a din rualin a hawng zau a, min hui zauh rualin keipawh ka phei ve vat a, kawngpuia motor tlan bak hmuh tur a awm chuang lo.

“Ka la theihnghilh lo, neih theih loh na na na duh rengin awmzia a nei lo bawk a, nangmah chiah ka duh ber tawh che” a tih chuan, “A hmain tu tu nge i duh ţhin a? Awii..u Zirbawnga chu rin aiin i lo lerh, ka ringhlel ziah che hi ka inthiam lo leh lo, ka inngaihtuah chet chet anga ka ţhen daih mai tur che a sin” ka ti bawrh bawrh a, “Thudik i hriat a inţhen i sawi ka hlauh vang a nia nupui atana ka sawm ţhin che. Tunah chuan i hre tawh a, i duh hun hunah min nei rawh, inţhen a ţul lo” a ti leh bur tawh a, “Engvangin? I thusawi te kha ngaihtuah letna hun pawh ka la nei hleinem” ka tih chuan, “Min rin theih nan thudik ka hrilh che a, ka nunhlui vanga inţhen i duh chuan i thu thu a ni mai” a tih hnuah, “Kan inţhen chuan ka rawn let lo vang, keichu ka paih tawh ka chhar leh ngai lo” a ti a, hei ni nia buaithlak ber zel chu, a tirah khan engkim sawi se chu ka kal thuipui miah lo ang. Nunhlui nei lo kan awm loh rualin innei lo va hmeichhia nen a lo chengdun hrep tawh chu a tuiawm loh emai, dan angin kal se, pathlawi ti law law se a fair zawk ang.

“Nih leh nichina lo call tu che kha tu nge? Phone i dah ţhat daih kha” ka ti a, min chhan dan a zirin thutlukna ka siam ang. “Nupuia neih ka tum zawk kha” a tih chuan min deng ve dawt a, “Ehe…in inbe tawh ngai lo emaw ka tia” ka ti hluai a, “Awii…bomb i pai a ni ringawt, i thuruk hian bomb a chhawm a nih hi, keimah ka nih vang maia ka ngaihdam zel che i ring a nih chuan ti sual hle ang aw” ka ti leh kha kha a, ka mizia chu heti mai hi a nia, ka â buang a, tumah ka haw tak tak ngai lo, mahse a ruka inbum reng chu ka duh bik lo nasa.

“Ţhian ang bakin kan inbe lo, chanchin min rawn zawt ţhin. Tikhan engkim ka sawi vek tawh, ka thawl huai” a tih chuan, “Aw, i thawl lai tak khan inţhen ang” ka lo ti a, cheng dun reng tawh, inneih tum uk uk tawh, inţhen hnu pawha la inbia an nih chuan nakinah eng emaw a la awm ang, a rukin an la in ngai tawn tihna a ni mai.

“Ţhian angin a ni tak tak, i duh leh amah hi bia la” a lo ti a, ka ngaihtuah chian zuai hnuah, “Ka duh lo, vai leh mizo chu mahni ţawng ve ve hman chuan inbiak a har” ka ti deuh kher a, vaiţawngah chuan ‘he’ tih bak ka thiam miau lo a ni. “Sap ţawng a hmang nasa, be zuai rawh” a tih leh pawhin, “Ngawi rawh” ka ti tlat a, sapţawnga mi hnial pawh a har tho, ţawng tui laiin i grammar kha a lo ti palh ang.

“Nih leh engtia awm nge i duh?” a tih chuan rilru fim pawh hmang lo vin, “Inţhen ka duh” ka ti a, inngaihtuah fim mah ila ka ngaihdan a ngai reng tho ang. Inneih tum uk uk tawh kha ţhian an ni rei lo tawp ang. Min hrilh hma hlauh a a tihzia hle mai.

“Ka thlah ang che” engmah sawi zui lo va a tih chuan kawngka lam ka pan nghal a, a thlenna pindan aţang chuan chhuakin kawngpui kan thlen thlak veleh taxi kan chang a, “Ka ngaihdan chuan inzawmna thuk deuh i neih pui tawh chu ţhian anga kawm tum mah la i kawm rei thei lo ang, in in biak reng chuan a ngaiah bawk in let leh mai ang. Ka thusawi hi chhinchhiah tlat rawh” ka tih pawhin min chhang tawh lo.

Taxi a kan ţhut luh hnuah, “Ka biak loh veleh ka lo hrilh ang che” a ti leh ang lawi a, ka paih tawh hnu ka chhar ngai lo ti ve si a mumal lo reuh emai. “Chutiang a ngai kher lo” ka tih chuan, “Fair deuhin i duh kha, hnawk i tih ho ka lo thian fai ang. Chumi chhung chu i duh leh min ţhen dawn nia” zawi te hian a ti sup sup a, traffic a jam ruala driver rawn hawn phei zawk chu, “Ka pu, i duh leh ring deuhin lo zai mai rawh” ka ti a, u Zira hnenah pawh, “Ka paih tawh hnu ka chhar tawh ngai lo i tih kha” ka ti ta nge nge a. “Ka paih hleinem che, nangman min paih a nih hi” a ti daih a, ka kut kuangkuahin ka tum hmuk a, tuna a la biak reng chuan nunhlui pawh a ni lo, bakah tunah a nunhlui ka hre ve chauh a, ka pawm thei rih lo tihna a ni mai.

In a ka haw lahin ka u ten, “Khawiah nge i kal chen chen a?” an lo ti leh tawh a, “Vanram ka thleng ţep” pindan lama phei pahin ka ti liam puat a, tunah chuan ka nu pawhin min hau se ka hlau bik teuh lo mai, ka thin a rim ve em a ni.

Ka mut zal vang vang laiin Nutein min lo call leh nghal a, ka lak ruala, “Ka la biru dawn em?” a rawn tih chuan ka inbengkang uai mai. “Ehe…khawiah nge i awm?” phawk deuh hian ka ti a, an inchhunga a awm ve mai ka rin nen, “Ţhenawmte in piah step ah, thosi a tam tehmai a nia aw, ka malaria chuan a pawi viau ang, pawisa ka chawi tir vek dawn che a nia” a rawn ti kha kha a, “In ah ka awm tawh” ka tih chuan, “Sawi vat ta che” a ti tuar a, ngaihdam dil hman pawh a ni lo, a dah rang turu lutuk.

Zanriah ei laiin u Maman, “Naktuk aţang chuan lo haw tlai tawh suh. Kan khua ang a ni lo a, khawlaia i awm rei lutuk chuan kan ngaihtuah che. Tun ţum chu ka nu te kan hrilh lo ang a, a lehpek a awm chuan engmah kan zep tawh lo ang” a ti a, ka phone lah chu a nghawr dar dar reng a, ka u te pahnihin min en chiang bawk si, a melh a melh ngam chi pawh a ni rih lo.

“Zanah Nutei te inah ka leng dawn a nia” ka tih chuan, “I leng dawn nia, anni in chu a hnai a, khawlaiah chhuak lo ula” u Mama bawkin a ti leh a, “Ka nu’n, ‘setanic Nicky-a pawh a damlo’ a tih kha, i len hlat chuan a thlain a rawn um haw che anga a ni mai” u Bawihan a lo ti ve thung a, ka hlau lo nasa, a dawih zia ka hre tawh a, a hlim thla mai mai pawh a hlau ang.

Zanriah eikham veleh hmun ka ti fel zung zung a, thleng ka sil leh hnuah u Mama thingpui ka lum sak a, Nutei te ina ka chho chu, “I va rei ve” a lo ti nghal a, inleng an lo nei nual lehnghal.

“Pindanah lo kal teh” tih pahin min pawt lut a, tlaia kan thil lak kha khum hnuai aţanga la chhuakin, “U Lianpuiin min hek loh nan a pahnih hian dah chhuak ila, pakhat kan in tir ve anga, pakhat hi chu kan pahnihin aw” a ti zung zung a, “Ka in peih chiah lo” ka tih chuan, “Eng nge chanchin?” a lo ti thuai a, “Kan inţhen leh tawh, ka dul ve ruih mai. Engkim hi ka ning rih, awm mai mai thlengin ka ning. Hun hi kal zung zung se ka ti, min lo forward teh” ka ti bawrh bawrh a, “Engati nge?” a tih chuan, “A sawi chi loh” ka ti ve tlat a, anmahni ngei mah ila mi thuruk sawi chhuahsak chu ka duh bik ţhak lo. U Rinchut but buta bula an zep leh zep loh ka hre bawk si lo a, Kalvari takngial pawh ka hrilh dawn lo. Tikhan u Ziran min ţhen angin ngai vek rawh se. Ka ţhianten an hriat a Fithangi beng a thlen vaih chuan u Zirbawnga a mualpho a ni mai. Phaia a awmlai a a nundan kha a mizo lo mai ni lo vin a Kristian hlawl lo alawm.

“A sawi chi loh leh chhuak ang, sawi tur a awm lo tihna a ni mai” phur zet hian a ti a, u Lianpuii hnena, “Hei hi vawiinah ka ţhianten min lo pe a” a tih chuan ka rilruin, ‘ka uang a’ ka lo tih sak a, Nutei dawt sawi fiamthuah ka chantir tihna a ni mai.

“In ang u” u Lianpuiin a ti hmasaber a, a fel hmel tehreng nen, a fihlim ka ring a nia. A ţhiannu pakhatin a lo duh ve vat bawk a, “In insem ang u” an tih liam liam laiin an zinga pakhat chuan, “Nute, kawnah eitur han lei lawk rawh u, zanah an zuar tui thei emai, in intur hi chu ka lo ven sak ang che u” a rawn ti a, “Kan peih bik lo” Nutein a lo ti tak nain a ngenin min ngen miau si a, “Kal sak mai ang” ka ti ta ringawt a, scooter a ka chuan ngam loh avangin kein kan kal a, “In leng an tam dawn tih hriat a a bur lian lo lak tur a nia tiraw? Kan in tur bik kha min dil pawn ka pe ve miah lo ang” Nutein a ti deuh reng a, in ve tum lo mah ila, “A him ang maw?” ka tih chuan, “Him e le…u Mafelin a ven dawn kha” a ti then a, an lo in sak vaih chuan amah bawk hi a nia thinrim tur, a hnek buan buan duh maithei a ni.

Kan duh ang kan lei hnuah ka pawisain momo kan ei kawi a, “Kan haw hunah u Lianpuiin a lo zawh chian che chuan ‘Nutei ţhiannu sam sei deuhin min pe’ ti rawh aw” tiin min hrilh lawk sa thlap a, “Fiamthuin ka lo ti ang” ka ti a, thil ei paha phone ka en chu Maski-a message a lo awm ve ngei a, ‘I va reh ve, i zir tluang em?’ tih zawng a ni a, ka chhang chak lutuk chu ka kutzungpui hi a phu euh euh niin ka hria, mahse ngaihtuah chian hmasak ka duh vangin ka chhang rih lo.

“Kan venga hmelţha ka tih ber ka hmu” Nutein a tih chuan, “Khawi?” ka lo ti vat a, “Sawlaia kawr dum ha ding saw, a bana tattoo ngah deuh saw” a tih veleh min hlat vak lo a ding pa ban chu ka en vat a, “A nih saw..hmelţha ka ti lo, ţhahnem a ngaih hmel ka ti” ka ti a, a ding mai mai pawh ţhahnemngai deuh a ang tak tak a, Aizawl ka awm hnuah pawh u Zira leh Maski aia hmelţha tih ka hla nei lo.

“A mizia hria la chu i duh ve tho ang. A hmel pawh ka hmu ţha vek tawh, kan vengah a hmel ţha ber, mahse min bem se, han ni chiah ila chu tuna ka duh ang hian ka duh tawh miah lo ang” a tih chuan ka beng a verh riau a, “Kan star deuh te nen a kan nih hian kan duh lo sawt duh a mi?” ka lo ti thuai a, “Duh lo sawt duh e..a ho riau zel, star lai anga boruak sang deuh ang kha a awm thei tawh lo. Kan star deuh te hi kan duh reng duh a nih chuan nih pui loh tur” a ti zat zat a, a dik thei viau ang. U Zira nena kan ni chiah hi ka star lai ang kha a ni thei lo, a danglam tlat tawh a, star lai nen chuan inthlau tak a ni, thih ţhaks a har tawh riau alawm. A boruak a zo tawh.

“A pa ber hian thudik deuh deuh i sawi a, my friend, i dak nalh ţhaks” ka tih chuan nui vur vur chung hian, “Aa…ţawngkam hi ka thiam ve tawk alawm, thiam dang ka nei hleinem, engmah a nih loh kha” a lo ti a, nui har har chung hian kan inkai a, champ wine a awm bawk si, in lam pana kan kal te chu a phur khawp mai.

“Kan lo haw” a ti lut lauh a, dawhkana champ wine bur ruak pahnih inhung chu keipawhin ka hmu nghal a, Nutei ngaihdan a ni lo nasa, kawngkhar bulah kawi deuha dingin kawngka biang a dawm sauh sauh a, “In va rapthlak ve…in kal peih loh naah in eitur leiin kan kal a, in ta pawh ni lo kan neih sa in lo in zo vek lehnghal. In va vir ve a, in inthlahrung miah nange?” a ti kha kha mai. U Lianpuiin, “Ka in mang lo, i ute ho hian an in tui lutuk a, kan lei sak leh mai ang an ti a nih kha” a lo tih chuan, “Tunah min leisak rawh u, in tui mah ula mahni ta lo a nih chuan insum ve mai ta che u, ka kawm luak vek mai tur che u a nia” a ti leh pang pang a, “I nasa emai, in lo mah la a pawi lo, i la naupang” u Lianpuiin a lo tih leh chuan, “I vir a nih chu, zing aţangin ka in hun tur ka ngaihtuah tawh. Nei leh mah ila ka pe tawh lo ang che u. Inthlahrung lo hlawm emai, lo kal rawh Remkalam” tih leh min rawn pan a rual a, ka bana kaiin pindan lamah min phei pui a, a la ang nasa lo mah mah zawk ka ti. Ka ute chu nise ka ang zankhua ţhak duh ang.

Pindan a kan luh rualin, “Zakthei lo hlawm lutuk, u Mafeli pawh ka ring ve em em a, a tui tih vang maiin in duh ni ila bur hnih pawh khan ka in zo thei ang chu” tih pahin a bengbeh a phelh sawk sawk a, “Ka ngei hlawm a nia, ti sawn mi hmuhah fel ber ang zia zangin an awm leh ang a, mi tam laiin in duh em ti ila chu ‘a rim pawh ka la hre ngai lo’ an ti leh vel emaw a nia nga, lemchan hrat an nih saw” tih paha a zungbun phelh chu a bawmah a vawm lut leh bur a, “Ka ngei” tih vak paha a sam a pawtthla chiah chu, “Ka duh thei lo, u Lianpui, ka duh thei lo” tiin ka rak teng tung mai.

Nutei zawkin, “Eng nge a?” a lo tih chuan, “Ka meng ngam tawh lo, i sam kha, hmanni a ka hmuh te kha khawiah nge…awii ka duh thei lo” ka ke per dat dat chung hian ka ti a, sam kher han pawhthlak chu ka en lui thei hlawl lo.

“Eng nge a?” ti a u Lianpuii ţawng ri ka hriat hnuah pawh ka la meng ngam chuang lo a, “Ka sam lem hi Remkalamin a hlau alawm. Chhuak teh champ wine rim i nam” Nutein a lo tih chuan, “Thil ţul lo lo i ti peih em a nih kha” a ti a, sam lem a vuah tih ka hre bawk si lo, thlamuan loh ruk nak laia a sam a pawt thla luih kher kher kha chu a rapawm ve e, hmanrua hum phei ila chu kan in vaw na viau maithei a ni.

Ka men ruala, “Min en ta che” a lo tih chuan ka en chiang a, a sam chu a la awm ve tho a, u Bawiha sawi ang tak tak khan a awmdan a inang lo vek a, hnunglam phei chu a ruak huai lehnghal a, ka lo chik lem loh avangin sam lem a vuah tih ka hre lo mai mai zawk a ni.

“Ka hlau hman che alawm le, i sam lem i pawh thlak dawn chuan mi te pawh hrilh ve tur che alawm” ka ti a, ka lawm lo khawp mai. U Lianpuii te a ngei bawk a lo riah tumin min zui thla a, ka u te pahnih chu an lo mu leh der tawh.

Kan mut hnuah pawh Nutein, “An va han zakthei lo tak” a ti leh ţhin a, phone ka khawih san daih a, ka ţhianten min ngaihtuah deuh aniang chanchin min rawn zawt sap sap a, ‘Ka ţha, engtinmah ka awm lo, Sangkhuma mawng khawihli ai pawn a na lo zawk’ group a ka tih chuan Sangkhuman, ‘In inţhen chhan a ho ropui si, u Zirbawnga nen hi chuan ţhen tura duan in ni aniang” a rawn ti a, Maski-a pawh ka chhang ngei a, mahse bialpa ka nei peih tawh rih lo, thawvenna tur a dal tlat, hrawkah thaw a tang duh emai, ‘Kan ţhian zingah rawn tel ve tak tak teh’ ka ti daih a, a ruk chiahin ka duh a, beiseina ka siamsak ngai lo bawk a tikhan min duhna a reh ve tial tial mai ang.

‘In phal chuan ka lo tel ang. Nangni aiin ka u na a kawm tur an tam lo emai’ a rawn ti hlauh a, ‘I dam maw?’ a rawn ti leh a, kan inbe zui reng a, ‘Tlaiah ka pi thlanah ka kal a’ a rawn ti chiah chu ka mumanga ka hmuh laia a hmel kha ka mitthla a, ka rap riau mai a ni. Ţhianho group ah lah Fawnvelan, ‘Nicky an Maski-a pi thlahrang a hmu’ a rawn ti ve sek bawk a, ka mumanga ka hmuh leh na chuan a pawi khawp ang.

U Zira a reh vang vang thung a, a haw ta nge haw ta lo pawh ka hre lo. Khatiang thuruk lian tham te chu a hma khan sawi se la, ka pawm thei a nih leh buaina awm loin kan inkawp ang a, ka pawm thei lo a nih leh kan ni lo mai ang a, min hrilh tlai he hu emai. Nutei sawi ang khan ka star laia phur riauna ang kha ka nei tawh rih lo.

‘Nicky-a damloh chhan hi Maski-a pi thlahrang a hmuh vang an ti a nia aw” Fawnvelan a rawn ti leh a, ngaihsak zawngte hi a va han inang lo tak. ‘Kan awm zel dan tur ngaihtuaha kan buai em em laiin thlahrang thlahrang rawn ti reng suh’ ka tih chuan, ‘Ngaihtuah buai lo mah la i thih hma chu i awm zel dawn tho tho’ a rawn ti a, Sangkhuman, “Einch chha…a flow a dik lutuk’ a rawn ti veleh a, ‘Ka pasal tur hi tunhma khan a tho â nasa ţhin an tia, an entir tawp a, Nicky pawh hi entir ve mai rawh se, khawia thlahrang mah a hmu lo ang, a dawih tehreng nen” Puipuiin a ti ve bawk a, group a thil sawi chu kan zawhna ber an chhang ngai bawk si lo, a buaithlak thei emai.

‘Ka zir vat vat anga ka lo haw dawn a nia, Aizawl hi ka ning tawh lutuk’ ka ti ţha leh a, ‘Lo haw vat rawh’ an rawn ti sap sap a, a hranpain Maski ka be reng a, u Zira thuruk ka hrechhuak har a, ka lawm lo a, chuvang chuan Maski-a hnenah engkim ka hrilh a, min hrethiam khawp mai. Thudik chiah ka sawi avangin rilruin ‘ka uang a’ tih a ngai tawh lo. A reh vang vang dawn emaw ka tih laiin u Zirbawnga pawhin, ‘Muttui’ a rawn ti a, ka nem nghal zel tawh dawn bik lo reng reng.

Zingah Kalvari in min rawn video call a, “I khua a har kan hlau a” tih pahin a fapa a rawn ti lang a, “Min hmu thei em?” tih pahin ka kut ka vai char char a, min la hmu thei lo aniang a taksa chawpin a bu luih a, a awn riai riai chu Kalvari in a dawm vat a, “A la sen lutuk a, dim a la ngai, kan pawm ţha lawk ang” a ti leh rih a, “Remkalam, ka fapa hi a hmelţha tawh i ti em?” u Rinchutan a rawn ti a, a lo awm ve reng a nih dawn hi.

“A hmelţhatna khan chuaini reng a nei lo vang” a tih chuan intithei zetin a nui ruh ruh phawt a, chumi hnuah, “U Zira bialnu hlui nu” tiin min fiam ve ngei a, “Ka fapa hian a kut a ei thiam ţep tawh a nia aw” a rawn ti leh a, an naute hi chu a atchilh hneh ve a ni.

“I khua a har chuan buaina tur dap daih la, kan khua angin i duh hun hunah thil i zuar thei awm si lo a a buaithlak e…lo haw vat vat mai rawh, reilote chhung chu tuar hram hram la” Kalvari in a rawn tih chuan, “Phone a engmah tak tak a sawi theih loh hi ka hne, what a very kham, tunlai chu hringnun hi a awhaw wow lo emai a” ka ti hlak hlak a, “I lo haw hunah kan sawi mai dawn nia, khaw danga kan pem hmain pasal nei ngei ngei ang che” a rawn tih chuan, “Mi bialpa ţhen lai laia pasal neih rawh intih te chu a, ţhian chu ni lo ila min hmusit emaw ka ti ngei ngei ang mawle” ka ti a, a nui tawi tak tawh a, u Rinchuta lahin, “Khawi, ka fapa duat hi ka lo la ange, min chhun anga a hmel a la ţha dawn a nia, kurtai a ei ve thur thur anga tiraw?” a ti ve ngei a, ka lo nuih uar uar laiin Kalvari a tum bur a, “Kurtai a hmuh tawh chuan i nulat lai ka hrechhuak ziah a tia lawm. A chang leh washing powder thlukin pasal zawnna kurtai te a tia, a sa a, i la hrechiang lo mai mai a nih kha, a mut tam chuan fiamthu a duh lutuk” a ti bawrh bawrh a, “My friend, nangchu a nuam dawn bik e, pasal fel deuh i nei a, fapa i nei tawh bawk a, i kim vek tawh, pasal fel deuh ka duh ve” ka tih chuan, “I la nei ve mai ang” a lo ti sap a, u Zira ang ni lo pasal fel deuh ka la neih ka beisei, kan nih leh hlauh chuan u Zira ang pawh a ni maithei, mahse tun dinhmunah ngau ngau chuan ka ti lui thei thlawt rih lo a ni.

CONT…

Angel Pops
Author: Angel Pops

14
1

Leave a Reply