You are currently viewing KEIMAH, THINGTLANG NULA S2-17

KEIMAH, THINGTLANG NULA S2-17

Spread the love

KEIMAH, THINGTLANG NULA S2-17

Aizawl a karkhat lai ka awm hnuah Puipuii a rawn chho ve a, la inhmu lo mah ila phone ah kan inbe zing a, lo len a tum bawk. Ka zirlai pawh ka la zir ve zel a, thiam ka tum bawk a Nutei aiin ka thiam daih tawh zawk. Ka zir hun a tawp veleh hmanrua ka lei ang a, hna ka thawk thei nghal tihna a ni mai.

Pathianni a ni bawk a, chawhnu lama inchhung ka tih fai laiin Nutei a lo lut hlawl a, u Zira ka ţhen hnuah nitin chanchin min zawt a, phone a inbiak a peih miah lo thung, a phone hi a zawn zin ber a ni ve tlat.

“Nizan ka mumangah i lo thi a, ka rawn ngaihven che a nih hi” a ti deuh kher a, ţhutthleng nghenchhan a a ban kham duaiin hahdam hmel deuhin a ţhu a, “Eng nge ka thih chhan?” ka tih chuan, “Silai hmawr i hmuam a, i lo inkap hlum a” thutak zet hian a ti a, “U Zirbawnga vangin i ţap a ni chiang mai” a tih leh chuan, “A teuh lo lutuk, vawikhatmah ka mittui a la tla lo aw, meizial hmawr bak ka la hmuam lo. I mumanga ka lo thih chuan ka dam rei dawn tihna a nih chu” ka ti tan tan a, ka la ţap miah lo tak tak alawm.

“U Zikpuii nen chuan an lo inngaizawng ta em?” a tih chuan, “Ngaizawng awkawng lo, sumdawng mi chuan ţhian an ngah a, a ţhian mai mai a nih kha” ka tih hnuah ka rilruin ‘ka uang a’ ka ti a, ka hrilh ve awm lo emai.

“Chuti si engati nge i ţhen a?” a tih chuan, “Hmangaihna a expire tawh, ka star laia boruak alh hluai kha a awm tawh lo ka tih mawlh mawlh kha” ka ti leh a, ka bialpa hmasaber a ni a, fimkhur ve nak laiin a nunhlui ţha lo zawng zawng a lo thup vek a, nunhlui nei lo awm lo mah ila kan thutak tak tak hma khan engkim sawi se chu a zia deuh tur a nia, tunah engkim ka hre ve chauh a, ka tan chuan pawm luih a har ve rih miau a, ka biak duh loh chhan pawh a ni.

“Hei hi a nia bialpa neih ka peih loh nachhan chu, reilote kan hlim a, inţhen a ngai leh a, nangchu i hmangaihna hi a suak ve deuh hrim hrim tiraw?” thutak zet hian a lo ti leh a, “Eng nge ka hmangaihna a suak i tih chhan chu?” ka tih chuan, “Aww…bialnu dang a nei emaw i tih vang mai maiin i ţhen a, mi chu han inkawp lawp lawp mah se an ni leh zel a, ngaihdamna i pianpui vak lo a nih hi tiraw?” a ti a, chhan pawh ka chhang peih tawh lo.

Darthlalang ka nawh zawh hnuah ngawi rengin tv kan en a, “Khi film khi a sexy teh mai a nia aw” Nutein a tih lai takin changtunu leh changtupa te chu an in en ngawih ngawih a, inrin loh lai takin an infawp thut mai. Nutei nen kan in en hu a, “Ka tih reng kha” a tih chuan tv lam bawk hawi lehin, “Awii…an va han bei rei em em, an thaw te pawh a chham lo em maw ni, an biang te khuar kawk kawk mai, an inhip da vek thei mai ang” ka ti hluai a, an inbawh thal huang huang mai a ni. Hnim chungah berkher a ni bawk si, inbual ngei ngei an ngai ang.

“Keichu ka lo zak” Nutein a tih chuan, “Eng ber nge ti zak che? Inngaihzawn chuan infawh ngei ngei a ngai alawm” ka lo ti vat a, “Infawh hi engtik aţanga an chin nge ni ang le tiraw? Hmui hi chu ti hian amahin awm hle hle se, an fawp kher zel hi ka hrethiam lo, ka ţhiannu pakhat phei chuan, ‘Ka bialpa nen a kan infawh hian a duhthaw thei lutuk a, chengkawl hipin min hip ţhin, min hip thawih thawih zel’ a tia, a bialpa pianchamah chengkawl kg2 a pe” a ti chiah chu ka nuih a za ngei mai.

“Mipa in min fawh danah hian chengkawl heh deuh leh heh vak lo a hriat lutuk. Chengkawl hmeh ţhang deuh chuan mi hip an thiam teh mai a nia” a ti leh a, ka lo bu nghat nghat a, u Zirbawnga khan min fawp ve ngei tawh a, ani chu chengkawl a ei ngai lo aniang min hip ve lo.

“Inngaihzawnna lam boruak hi i hrethiam hle sia ngati nge bialpa i la neih ve loh?” ka tih chuan, “Vawikhat chu ka nei ve tawh, mahse tuman an hre lo, phone ah hlir kan inbia a, inhmu miah lo in kan ni a, kan inhmuh rualin ka ţhen nghal. Kan inţhen hnuah a thlalak ka ţhiannu’n min thawn a, ka la nei reng” tih pahin phone a phawrh a, “Khawimaw ka lo en” ka tih chuan, “Ka entir lo tawp zawk dawn che em mawni le” ti nang nang chungin a zawng kual a, “A dinna a va hla ve, a mit a hnawih dum em ni a?” ka tih chuan a zoom vak a, “A mithmul a nih hi. A mit leh a mithmul a inhnaih vang hian keipawn a mit a dum emaw ka ti tho alawm. A mithmul leh a chal inkarah hian mithmul dang a la leng” a ti a, a inchei dan a mawi viau nain a hmel a ţha vak lo khawp mai.

“An hausa teh mai a nia aw, nuai10 ah an buai lo, sumdawng lian an nia, mahse ka duh chi a ni lo, a mit hian min hip lo” a tih laiin, “Kan zir zawhah kan khuaah lo zin ve la, park zau deuh a awm a, mahse tlak hlum a awlsam dawn a, rui duh ho chu a lai takah an ţhu ţhin, tumah an la tla hlum lo. Nuam i tih dan tur zia chu e…i inbin kual zak zak duh ang” ka lo ti daih a, “Ka lo zin dawn chiang, keichu khawi hmunah pawh zin dawn ila ka nuten an phal nghal vek zel. Korea ah ka kal dawn ka tih pawhin ‘insiam la naktukah kal nghal rawh an ti. Enteh” tih pahin min rawn hnaih a, “Eng nge a?” ka tih chuan, “Champ wine bur lian chi pahnih ka nei a sin. I u te an awm chuang lo a, hawh, kan pahnihin in zo vek ang” a ti sar sar a, “U Lianpuii te” ka tih chuan, “Ka pe ve tawh dawn lo nasa, an duh leh lei ve mai rawh se” a ti deuh bur tawh a, “Ka han la dawn nia” tih leh thawh a rual a, zu pangngai a nih loh chuan a pawi em em chuang hleinem, u Zirbawnga pawh champ wine hmangin ka nuai bo hmak thei maithei a sin.

Bag lianpui khaiin a lo lut leh a, “Champ wine mai bakah a hmeh tur chips leh acid ka lo keng tel, paih nghal mai theih turin no ka lo keng bawk” a ti zung zung a, kawngka a kalh te te hnuah ka bulah lo ţhuin a thli nghal sawk sawk a, “Ka duh ve lo a sin, hmeichhia ka ni sia, hetiang lam hi ka in tim deuh a” ka tih chuan, “Zu a ni lo, wine a nih hi, film star kan duh deuh deuh te pawh hian an in vek” a ti a, “Ka duh lo a sin mawle” tih pahin min pek chu ka la a, no khat ve ve chiah kan in a, engtinmah kan awm rih lo.

Tv bawk kan en leh a, changtunu leh changtupa bawk an lang leh tawh, an ţap pur a, mak deuh chu film a hnam dang mipa an ţah hian kan khawngaih a, pa kan ti em em tho a, mizo mipa, kan bialpa te ngei hmangaihna vanga an han ţah hi chuan kan ten daih zel. Mizo mipa te hi kan sawisel ţhin tak na a hnam dang mipa te ai chuan an chhel daih zawk ang, hmeichhia aia ţawngtam leh ţawng thei, mi pawi sawi hrat leh hram tlahawlh deuh deuh te, an nun aia mi nuna buai ching ho hian mizo mipa fel tak tak te a ti hmingchhe tel ve a, thlemte vangin mipa zawng zawngin an tuar tihna a ni ber.

“Enteh Remkalam, khi an in en leh reng tawh a nia” tih pahin tv a kawk a, “An in en chuan an infawp leh dawn tihna a ni mai. A mak a nia, changtute hi an in en ren rawn tawh chuan an hmui a insi hmak zel, fawh duh loh chuan bialpa te en loh mai tur” ka tih chuan uar zetin a lo nui a, “A dik chiah, tihdan hrang hrang a awm a, vai ho chu an in en vang vang hnuah an zai a, an lam chheng chheng a, sap ho lah an in en ren rawn hnuah an inhmuam thawih zel a, korean ho ve chu changtupa ten an fawh rualin changtunu te an meng kawk a, an kut an hum vak a, an mipa te hmui hi a tui loh hmel thei bik ka ti. Mizo ve thung chu infawh tum ang deuhin an awm a screen a thim daih zel, ngaihtuah an ti thui duh ka ti” a ti duah a, intur bawk thli leh a min rawn pek leh chuan, “Ka duh tawh lo a sin mawle” ti chungin ka lo la leh tho a, keichu ka ţhiante awmdan ang angin ka awm thei, an sual leh ka sual a, an fel leh ka fel a, hruai ţhat leh hruai sual ka awl em em mai a ni.

“A tui ka ti sia, ka in chak zel ka hlau e” ka tih chuan, “In rawh, bur hnih lai a nih hi. En rawh saw an infawp leh tawh, an hmui a huh reng sia, a pan ang tih ka lo hlau” a ti a, hetiang lam kawnga tawn hriat la nei vak lo kan ni bawk a mi infawp hmuh mai mai pawn kan zak chem chem mai a ni. Star chu ka nei nual zel a, bialpa neih tak hi ka lo harsat a nih hi.

“Khawiah nge i ute? An lo haw thut ange aw” ka tih chuan, “An inkhawm, an lo haw har ang, len kawi an tumin ka hria” ka lo ti a, ipte aţanga lays bawm lian zet mai phawrhin, “Chuti, lem nghek ila a ni mai alawm. An zawh che chuan sunhlu um tui ka in i ti dawn nia” a ti thlap a, kan han in tak tak mai chu ţhut pawh ka ţhu thei tawh lo, ka rilru a fim tho a, ka taksain a tlin tawh hlawl lo.

“U Zirbawnga ka be dawn, lerh si, ka rin dawn apiangin eng emaw a awm ziah. Ngaihzawng neih chuan a hmasaber aţanga fimkhur tur tiraw?” ka tih chuan, “Ni e le, mipa lerh hian lerh an sim thei lo. An luck phei chuan e, hmeichhia an zei tawh si, an hnar thei lo ţhin. Hmeichhe no puak, kut mawi deuhin an mal an han khawih chiah hi chu ‘huiham’ an tia, an mu leh nge nge zel” a ti a, “Keichu ka rinhlelh reng vanga buai kan ni lo, amah hre tu ten a chhe lam chiah, a lerh zia chiah an sawi ţhin a, chuti chung chuan hun ţha pek a, rin luih ka tum tho, mipa lem chan thiam zia an sawi ziah a, engang pawn ţhat chhuah se mi kâ aţanga a lerh zia hriat reng chuan ngaih a ţha thei lo. Mahse tunah chuan ka hrethiam thei rih lo, khawimaw han thli leh teh” ka ti a, ka duh ve deuh aniang ka ruih chiah hian hrehawm ka ti.

“Chutiang chu rin a har ve ang, mipa chuan lemchan an thiam tak tak alawm. A ruala bialnu pathum nei te pawh an insawi rinawm vek” a ti a, ka in leh chiah phei chu ka mu chak. “My friend, ka zawi nguai tawh, mahse ka rilru leh thluak hi a mu miah lo a nia, awii ka sa pup pup mai, ka luak a chhuak” ka ti chul a, “I u te lo haw hmain inbual ngei ngei ang che” a tih hnuah, “Cheii…an infawp leh tawh, mahse a tawp daih, goodbye kiss a nih kha” a ti a, tv pawh ka en peih tawh lo.

“Ka zun a chhuak” ka tih chuan, “Va zung rawh” a lo ti liam mai a, ka ding chiah chu hnunglama min pawt tu awm ang maiin ka ţhu leh hnawk a, “Awii…ka lu hi kg engzat nge a nih a? A va rit em em ve mawle. Ka din rual khan min lo pawt em ni a?” ka ti nawk nawk a, “Ka pawt awkawzawng lo che, i ruih vang a nih kha” a lo ti hmak a, ka tho leh ngat a, ka tum a ruh tehreng nen ka ţhu leh hnawk tho. “A va mak e aw…vawiin zet chu ţhutthleng hipna a va nasa mawle” ka ti hluai a, “U Zirbawnga vang vek, ţha te tein awm se chu ka rui dawn lo chiang sa, ka be dawn hepa hi, he mihring zep ngah pa hi, vanthengrengah ka thawn chho daih dawn, awiii…what a funny thing, ka’n ruih chiam chu le” ka ti leh nawk nawk a, kan ţhiandun chuan kan nui uar uar a, “Ruih hi chu ruih loh tawp ai chuan a nuam alawm tiraw? Ka chhah tep mai” Nutein a lo ti ve bawk a, “Khawimaw ka phone kha han ban teh, u Zirbawnga kha call nghal la, ka hmu phe vek tawh, ka kutzungţang te hi a pung chak lutuk” ka tih chuan ka phone min laksakin u Zirbawnga a call nghal a, “Remsial” a rawn tih ruala, “A tirah khan sawi ve mai ta che, khatiangin mi an ţhawng thut ngai hleinem, zep lo vin sawi la chu ka ngaidam thei maithei che, i zep tlat a, a tawpkhawkah min hrilh a, ka ngaidam thei lo che. Ka ngei dan che hi ka hua che” ka ti nawi niaih a, “I rui a ni maw?” a rawn tih chuan, “Kal rawh, tawngkawlawngah pem rawh. Damchhung leh tlem min thlem mah la ka ngaidam dawn chuang lo che, tal ho huat huat mah ila ka induh ve thiam aw” ka tih laiin Nutein phone min rawn lak sak a, a switch off nghal daih bawk.

“Mipa in i rui tih hre suh se, i zahawm lo vek ang. Va zung rawh” a ti ve ngei a, “Ka tho thei lo a nih hi” ka tih chuan, “Lo kal rawh, ka kalpui ang che” a ti a, kei aiin a te na a a ding ngil thei phian a, min kaihthawh rualin a darah ka kuah chawt a, min lo kuah ve vatin ka kut a vuan a, kan pai khut khut a, bang kan su chawrh chawrh a, Nutei ke leh ka ke pawh ka hre hrang tawh lo, ka inpal nawk nawk mai a ni.

“Ka u te lo haw hma a inbual a mut fel thlap ka duh a nia aw” ka tih chuan, “Ka hria, tikhan lo awm la ka va ti fel lawk ang” a ti a, min chhuah san daih a, bualin bang lah chu an che delh delh reng a, acid ka liak ve tak nain ka luak a chhuak tho.

“Lo in leih rawh Remkalam, hruk puan leh thawmhnaw hak tur ka rawn pe ang che” pawn lam aţanga Nutein a rawn tih chuan, “Ka zung phawt” ka ti a, ka awmdan hi ka sawifiah thiam lo, ka rui a nih ber hi. Ka zun zawh veleh, “Thawmhnaw leh hruk puan chu min rawn pe teh” ka ti a, bualin kawngkhar chu tlem pawt kauin a rawn rawlh lut a, ka ţhu hnawk a, ka ti lui pawh a ni lo, ka ding thei hlawl lo.

“Nute, my friend” ka tih chuan, “Ka rawn pek tawh che kha” a lo ti a, “Ka hria, i duh chuan haw rawh, bualinah hian ka riak mai ang, ka tho thei tawh lo” ka ti tak nain, “Ka lo nghak ang che” a ti tlat a, hrukpuan leh thawmhnaw chu thei leh thei lo in ka dah sang a, chhuatah bawk ţhu leh hnawkin ka nin chin a thlen veleh ka mu a, a rim reh nan a inbual ka duh bawk si, ka tihngaihna hre lo chu mu chungin ka inbual a, mut tawp mai loh chuan inbual ngaihna a awm lo. Ka mut lah a chhuak em em mai lehnghal. Tui vawtin ka inleih char char a, sahbawn te pawh ka inhnawih ve chuan ka hria, ka awmdan hi nuam ka ti tawh lo reng reng.

“I va zo har ve” pawn lam aţanga Nutein a rawn tih leh chuan, “Ka inthlak mek” ka ti mawl tawp a, tui vawt khan min ti harh deuh nain ka ding bu luk luk tho a, bucket hman loh berah suk tur pawh surf nen ka chiah thlap a, nawi viau mah ila thawmhnaw dah hnawk nuai chu ka duh chuang lo.

“Ka zo” ka tih rualin Nutei a lo lut a, ka awmdan a hmu chiah chu, “Ehe…i sam kha a va mak ve, lo kal rawh ka suk sak ang che” tih pahin min kai a, ţhutthleng hniam a min ţhuttir te te hnuah ka lu min suk sak a, “Ka ti tawh dawn lo reng reng, ka sim hmak, hmeichhe tan phei chuan a mawi lo si” ka ti mawlh mawlh reng a, ka ţawng apiangin ka ka chhungah sahbawn tui a lut lehnghal a, hrehawm ka ti hluah hluah tawh.

“Muhil la, i harh hunah i zia mai ang” tih pahin Nutei bawkin min muttir leh a, “Ka ute an lo haw chuan a damlo ti mai rawh” ka la ti ţawk ţawk a, “Aw, ka dah fel vek tawh, ka han inbual anga ka rawn mu ve ang” a tih chuan, “A kil ah sawn mu ang che” ka ti a, min chhang tawh lo va, a reh zui vang vang bawk.

Ka zunchhuakin min ti harh a, khua a thim vek tawh. A kil lamah Nutei a mu ngut a, sana ka en chu zinglam dar2 a lo ni der tawh. Ka lu a na ngut ngut a, ka tui a hal bawk si, ka zun a chhuak viau nain ka tho lawk peih lo a, ka chal dawmin ka chhing leh vang vang a, khuma ka mut hnu kha chuan engmah ka hre zui tawh lo. Nutei phone ah bawk dar zat ka en leh a, ka phone chu a awmna pawh ka hre tawh lo.

“Ka tho peih lo e…ka zun a chhuak si” tih pahin ka saisir a, chhuat ka rah ruala thawh mai ka tum chu khum aţangin ka la tla zui, “A va thawk rei em em ve mawle” tih pahin ka inbengkang a, ka zunchhuak lo se chu chhuatah ka ţhu reng ang. Zung tura ka lut chiah chu ka thawmhnaw chiah ka hmu nghal a, hmuh tawh dawn tho mah se ka ute thawh hmain ka su sawk sawk a, ka thil zirna hmunah pawh ka kal peih ka ring lo, ka mu nileng ţhak dawn.

Ka insuk zawh hnuah bualin chhungah ka zar phawt a, inchhungah lutin thawm dim deuhin nachhawkna ka zawng a, ka lu nat dan chu pui tak a ni. “Ka va sim chiang tak” ka ti rilru mawlh mawlh a, han awm leh chiah se chu ka sim ka ring chuang lo. A awm loh phawt chuan sim thei tak ka ni.

Nachhawkna ka ei hnuah Nutei bulah bawk ka mu leh a, phone pawh ka ngaihven peih rih lo, u Zirbawnga ka biak te kha ka ngaihtuahchhuak a, ka zak chem chem mai. Sangkhuma ka lo be zawk lo a ni. Nutei lah a rum ţuah ţuah reng a, a ţawngvai emaw tiin ka ngaithla chiang a, engmah sawi lo vin a rum char char ringawt a, a mumangah an chhaih thinrim aniang.

Mutthilh ka tum leh laiin Nutei zawk a tho hluai a, “Ka taksa chak loh zia hi” a ti nghal ringawt a, “Keipawh ka lu a na, khum aţang ten ka tla mawle. Enga ti nge i rum char char a? I hnar ve dan em ni?” ka tih chuan, “Ka taksa a chak lo a ka maimizial a nih kha, ka rum ri i hriat chuan min kaitho mai ta che. Ka thi lek lek a nih kha” a ti bak hlar a, “I thih em loh kha, ka lu na tehmai a nia aw, vawiin chu ka mu nileng dawn” ka tih chuan, “Kan mu nileng dawn nia, i uten an hria a nia aw” a la ti zui.

“A ni maw? Engtin nge an tih? Ka chatthla daih alawm, khuma ka mu kha ka muhil nghal” ka tih chuan, “I harh zeuh zeuh kha” a lo ti a, “Ka tho â aniang, engtin nge ka u ten an tih?” ka tih leh chuan, “Hauh a ngai a nih hi an ti. Hmeichhia lehnghal te an tia, keipawh min hau tho. U Maman thil ţha lo in tih dun zel dawn chuan inkawm tawh suh u a ti” a ti a, “Pawi lo, inhauh chhung a rei chuang lo, an thinrim a reh leh vat mai ang” ka tih hnuah, “Nimin ang reng reng a ruih chhiat kha ka la nei lo, zan lam phei chu ka ti bo daih alawm, engmah ka hre lo” ka ti leh a, “I rui chhe ve angreng khawp mai, mahse i ute lo chuan tuman an hre lo, i phone ka thukru daih a” intithei zeta a tih chuan, “U Zirbawnga kha?” ka lo ti a, “Ani chuan a hria, a ho e…i bialpa a ni tawh chuang hleinem, i thinrimna, i ruih loh laia i sawi ngam loh kha i sawi ve a ni mai a, engahmah ngai duh suh, in tura siam a nia kan in a ni mai” a ti nain, “Keichu ka duh tawh lo, ka in tawh dawn lo reng reng” ka lo ti a, “In rawh ka ti hleinem che, keichu ka sim peih lo, ka sim phal lo” a ti a, kan lo muhil leh aniang choka lam thawm ri ruk ruk rengin min ti harh a, ka tho hreh ngang mai, ka damlo der mai dawn em mawni ka ti hman a, mahse ka thil in kha an puh daih dawn a, ngawi renga tawrh tawp chi a ni rih.

Pindan aţanga ka chhuak chiah chu u Maman, “Niminah eng nge in lo in a?” a ti nghal a, “Zunhlu um tui leh a tak bottle hnih vel” ka tih hnuah ka rilruin, ‘ka uang a’ ka ti zawm zat a, “Zunhlu um tui an rui ngai em ni?” a tih chuan, “A rim kha ka rui aniang” ka ti a, a awih loh hmel nasa mai.

“A rim ringawt a ruih theih loh. Sunhlu tui ni lo thil dang in in em?” a tih leh chuan, “Tui pangngai leh thingpui a ni mai” ka ti a, ka hre lo der ve tlat a, “Ruih chi in in em ka tia lawm” a ti a, a awki pawh a san ve deuh tawh. “Sunhlu um tui chiah kan in” ka ti tlat a, rilruin ‘ka uang a’ ka ti deuh reng mai.

“Tun chinah chuan engmah in tawh suh, hmeichhia i nih kha. I zirlai hi zir zo la, kan khuaah haw vat rawh, Aizawl boruak i ngeih lo” a ti a, “Haw ka chak tawh nak laiin” tih pahin bualin ka pan a, ka harh thei lo mangang chu ka inbual leh ringawt a, keimahah chuan awmzia a awm vak chuang lo, ka ni muai tho.

Nutei haw hnua phone ka on chiah chu message leh missed call a lo thleng zut zut mai, an rawn mangang hlawm angreng a, Sangkhuma phei chuan, ‘Mahni nunna lak hian awmzia a nei lo, mipa an tam em hi’ a rawn ti hial a, u Zirbawngan min ţhen emaw an ti vek a, ka biak theih si loh a an hlauthawng tlang a nih hmel.

U Zirbawnga pawhin min rawn biak a tum nasa a, a chang leh message ah ngaihdam min rawn dil thul, ka fel famkim bik loh vang tak hian ka la ngaidam thei lo. Nunhlui pawh lo ni se a awm ţhin dan ka ngaihtuah khan ka rap tlat. Ka tih loh tawp tur thil a ti a, ka hriatthiam chi a ni ve bawk si lo, hei vang hi aniang ngaihdam harsa ka tih em em ni. A message ka en vek nain ka chhang lo a, a thuruk kha sawi chhuah ka tum lo a, a him tlat dawn tih chu ka hrilh ve a, ka ţhianten aman min ţhen zawk angin an hria tih te pawh ka hrilh a, thil dang min sawipui a tum chuan ka ngawi daih zel. Bialpa neih chuan star neih laia rik huat huat ang kha a theih ve loh, induh a ngaihna chin a awm a, an mitmei ven ve a ngai bawk a, keichu hetiang lamah hian tawn hriat ka la nei lo a, ka awm awm a awm ve tawp, duh duh star kual mai mai chi, tumah haw tak tak ngai lem lo chi ka nih vang hian miin min bum ka hlau a, ka nu pawhin fimkhur turin min chah nasa ţhin reng a ni.

Maski pawh ka chhang let chuang lo va, engkim ka hrilh meuh chuan ani pawhin ţhian ang chiahin min bia a, star te hi kan nihpui chak em em a, kan nih hnuah a ho huih duh tih u Zirbawnga aţanga ka hriat tawh vangin Maski pawh hi a bialnu nih chakna ka nei tawh lo, kan ni chiah ang a, a ho leh vek tho ang. Star deuh te nihpui chu reilote chhung chiah a nuam a, kan star ngai miah loh te nihpui aiin a ninawm hma bik, chuvang chuan bialpa neih ka tum tawh rih lo, ka peih tawh rih lo a ni tawp mai.

U Zirbawngan min rawn call ngat ngat takah chuan ka la ve hram a, “Eng nge?” ka tih rualin, “Ngati nge i ruih a?” a rawn ti a, “Ka rui hlawl lo” ti mah ila, “I ţawng danah khan ka hria, Aizawlah i awm thiam lo a nih kha in khuaah haw leh daih rawh” a rawn ti a, “Kan khuaah pawh a ruih theih, u Lalhuma te pawh an rui ziah alawm” ka tih chuan, “I nu leh pa bulah i awm ang a a zia deuh ang chu, ngaih i ti ţha lo” a ti a, a duh chuan a fel ve ţhin sia, a nun a lo thlahdah lutuk ber kha a pawi a, ka rin loh lehzual phah vek.

“Pathianni a nih vangin kan in ve mai mai a nih kha” ka tih chuan, “Pathianni a nih vang tak khan rui lo vin serh ta che” a rawn ti ve ngei a, “Lo buai lo buai suh, ka la ngei che a nia” ka tih leh chuan, “Min ngei mahla i ţhatna tur chauh ka duh tho. Tikhan min hrechiang tak tak tawh a, min ngaidam nghal rawh ka ti lo, mahse min ngaihdam i tum dawn nia. Hrehawm chu i tih ve reng kha” a tih laiin phone ka dah daih a, boruak leh ka danglamna a hrethiam awlsam thei bik ropui si, Kalvari sawi ang khan Aizawla ka awm chhung hian mipa ţha deuh, pasal tlak tawng ila ka ti.

Ka thil zirna hmuna kal tur ang deuha chhuakin Nutei ka sawm a, kan zirna hmuna kal lo in Puipuii te inah kan kal daih a, min hmu chu a lo lawm ngei mai. Nutei nen ama pindan bikah min luh pui a, kan ţhut fel rualin, “Palai an lo kal chiah chu e…ka zak ve lutuk a, ka nu leh pate lah khan an haw hnuah pawh ‘pasal neih i duh tak tak maw?’ an ti deuh reng a, ka aw ve thlap a, mahse ka pi Binladari ka ngai lutuk a” a ti zung zung a, “Pitar hi ka ngai ngai miah lo a, ka nu nu nen phei chuan kan in nel lo rapthlak. Mahse, ka pi Binbin-i chu Aizawl ka thlen rualin ka ngai nghal. Bazar a kal apiangin dawr bungkaw lak pahin ka hak tur secondhand a thing a, a tar tawh bawk si, rilru ka lo siam fel thawt thawt kha ka inchhir e Remkalam, ka la naupang tho sia, tunlai angah phei chuan pasal nei tur em chuan ka la naupang lutuk zawk maithei. Aizawl ka thlen chiah hian hrehawm ka tia, ka pi Binbin-i bulah ka awm leh chak” a ti sap sap a, “Pasal neih ka duh i ti reng zel a nih kha. Ka pi Binladari te engtin nge an awm ang ka tih pawn an awm thei mai ang in ti zel a, hrehawm i ti leh tho si” ka tih chuan, “An khuaa awm thei mo fel deuh nei se ka ti a nia aw. Fa an lo nei tlem lutuk hi a pawi ber mai, ka nu lahin a awmpui duh dawn der lo a, nu te chu kan hmangaih vangin an chhiatna lai leh an fel lohna lai te kan hmuh kân ţhin a, tuna ka rawn chhoh chiah hian ka nu rilru put hmang ka hria, hmangaih ang deuha awm siin a hmangaih tak tak lo tih chu hre lawk ila rilru ka siam thawt thawt lo ang mawle, diktak chuan ka nu te hian an enkawl zui reng ka ring a, ka unaute pawhin an khawngaih ang a, engmah an ti chuang lo bawk a an awmpui thei mai ang ka ti ţhin a, a lo ni lo nasa mai. Kalvari te lah khaw dang daihah an pem thuai ang a, awmpui han laksak dawn ila an tar tawh a, misual deuh tawn fuh a hlauhawm si, khawvel a chhe tawh a, an rawk ang a, an that duh mai ang tih te ka hlau a, ka unaute lah ka nu lam ţang vek, ka pa lah nupui ngam lo, ka pite hi chu a ngaihtuah ve reng tih ka hria a, ka nu a hlauh vangin a ti lang ngam lo zawk. Nangmah hi awm hlauh lo la chu ka rilru a hah zual viau ang” a ti charh charh a, “Engati nge min hrilh vek a?” ka lo ti a, ţhian ka hruai bawk si, chhungkaw chungchang a sawi kher bawk sia, amah nen hian a inhmeh hlawl lo.

“Ka rilru a hah em alawm” a tih hnuah a thaw hak a, “Hriat lohnain mihring hi min lo ti â thei khawp a nih hi. Palai an lo kal hnuah a thuphungin ka sawi a, a nep ber ka pa chiah ka lamah a ţang a, mahse ka thusawi hi sawi chhawng kher suh, ka nu hi mak ka ti nain ka hmangaih loh phah lo a, thinrim vanga sawi mai mai pawh ka ni thei a, dem chu ka dem a, thuneihna nei ve ila chu ka unaute ka tir ang a, an rilru put hmang hi hria ila chu pasal neih vat ka tum lo vang” a ti leh te te phawt a, “In khuaa ka rawn awm hlim kha chuan a ţhing ka tia, a ro mai bakah a lum si, ţhian neih pawh tum lo va rawn awm ka nia, rin aiin nuam ka ti phian a, nun mawl mang deuh hi ka lo ngaina zawk aniang ka ngaina thuai cheu a, engkim ka hriat tawh hnuah phei hi chu pasal nei lo va thingtlang nula nih reng ka duh zawk ang. Aizawl nula nih ai chuan thingtlang nula nih ka chak tawh zawk. Ka pi Binladari te avang hian pitar putar kan tih ţhin, buaipui an ngaih avanga tam takin hnawk sak an tih ţhin ho hlutna ka hre tawh a, ka inchhir lutuk hi sawi ngaihna pawh ka hre lo, pasal ka neih ngei ngei a ngai bawk si” a ti leh a, “Ni reng e..inchhir hian awmzia a nei lo, Kalvari nen hian pasal in duh hma leh lutuk a, keichu ka fin hunah chiah pasal ka nei dawn, mifel aia hmel leh pianphung ngaipawimawh rual lek ka la nia, ka neih thawt thawt chuan tih sual palh ka hlau” ka tih chuan a lo bu nghat nghat a, “Khua a i let veleh ka pi te chu i lo buaipui thei ang tiraw? U Lalhuma pawh ka chah thlap a, mahse a dam lo a” a tih chuan, “A ni maw? Eng nge na a? An va sawi lo ve” ka tih chuan, “Thi ten a luak an tia, Aizawlah pawh hian an lo kal pui thut maithei. A zu in luat a tuar lo aniang. Ka lo chhoh hma lawk khan a nia, a dam leh tawh pawh a ni maithei, ka piin engmah a sawi lo a, nang chu khawchhung group ah i awm a, i hriat daih tawh an ring vek aniang” a lo ti a, “Group ka en ngai lo reng reng, ka ţhiante lahin engmah an sawi si lo a, eng na nge? Cancer an ti em?” ka tih chuan, “Engtin nge an tih ka hre lo nain a kawchhung a chhe tawh lutuk an tia, pu Taipuia pawhin zu a in vak vak duh tawh hleinem. U Lalhuma pawhin zu in lo va awm thut harsa a tia, a buai nasa an tih kha” a ti leh a, ka khawngaih reuh tak tak a ni.

“Pasal chu nei pawp rawh, helamah hna nghet a neih loh phei chuan in nupa in kan khuaah in rawn pem daih mai dawn alawm. Mahse kan thiam thil a in ang dawn a, ka sumdawnna rawn ti chhe kher lo la” ka tih chuan, “Rawn pem daih ka duh. Pasal neih ka sawi ka sawi a, ka neih dawn tak tak hnu hian ka peih lo daih. Nunhlimi pasal ang te kha a lo nih ve ka hlau” a ti a, hei vang hi a nia pasal ka neih duh rih loh nachhan chu ni.

“U Zirbawnga nen in in be ţha leh tawh em?” a ti ta daih a, “Kan inbia a mah se kan inţhen tho, bialpa neih ka thiam vak lo , ho te te nin tlat chang te ka nei a, ka rilru hi what a very chingchivet a ni tawp mai” ka tih chuan, “A hmasaber a nih vang a nih hi. Mi vannei chauhin an first love hi pasalah an nei ţhin. Kalvari hi a vannei a, keini chu kan ni ve dawn lo aniang, tuna ka pasal pawh hi ka first love a ni lo. Bialpa ka neih tirhah te chuan keipawh ka awm thiam lo alawm. Hun thawl in pe la, a rawn thlem char char che pawhin i inngaihtuah chian hmasak fe hnuah chiah nihpui leh chauh rawh. Ka ngaihdan diktak i hre duh em?” a tih chuan Nutein, “Keipawn star ka nei a, i ngaihdan dik tak chu ka hre duh” a lo ti a, “I star chu hmeichhia nge mipa?” Puipuiin a lo tih chuan, “Mipa ka star, tikhan min ti vel suh aw” a ti a, Puipuii lahin, “Remkalami te chungchangah alawm ka tih” a lo ti a, “Sawi vat mai teh” ka ti ve thung a, u Zirbawnga chuangchang a nih miau avangin ka ngaihven khawp mai.

Min en vang vang hnuah, “I la inpeih lo a nih kha, bialpa nei lo va awm nuam i tih zawk chuan i la inpeih lo tihna a ni mai. Bialpa neih hian chhawm a ngah ve sia, inpeih thlap tawh la chuan i ning mai mai lo vang” a ti a, a dik hmel viau mai.

“A dik chiah ang, amah nen a kan inhmuh chang chauhin nuam ka tia, a hnu lamah nuam ka ti bak lo. Mahse, hun ţha ka siam sak zel tho a, chuti chung chuan ka star lai kha ka ngai daih zawk zel” ka ti a, u Zirbawnga chanchin sawi lai laiin, “Taka, ka pasal neih niah min din pui rawh aw, remchangah kan chhuak ang a, kawrfual hawh tur kan zawng dawn a nia” a lo ti daih a, “Puanchei bih ila a mawi zawk angem?” ka tih chuan, “Aih, ka duh lo. Ka lian lutuk lo a, ka bih zo lo ang. Bakah vawikhat chiah pasal ka nei dawn a, kawrfual hak ve ka duh. Mi pawn an hak ziah hi, mizo kan nih loh phah chuang hleinem” a ti deuh tlat a, “Ni mai rawh se, Aizawl ah ţhian i ngah lo mi?” ka lo tih leh chuan, “Ţhian ka ngah a, ţhianţha ka nei lo. Pakhat phei chu kan intihthiam loh deuh chuan ka thuruk te hi a lo sawi darh vak zel a, ţha deuh deuhin min bia a, hnunglamah min rel leh a, khatiang chi kha ţhian atan ka duh lo” a tih laiin Puipuii nu ngei mai chu pindanah a rawn lut ve a, a hmel ringawt pawh ka hlau.

Nu lian leh thau ve tak a ni a, a pheikhawk hi an khawngaihthlak e tih tur khawpin a rih hmel a, pheikhawk a bun tlo vak lo maithei a rah a nat hmel emai. A nghawng a tawiin a darah a lu a innghat tawp a, a hmai a hlai ropui si, a hmai bik hi paratha ni ta se puar lawihna tham tur a ni. An kawta thawmhnaw inpho kha a lian hlawm ka ti reng a, Puipuii nu thawmhnaw vek aniang, a pawnfen inpho phei kha chuan blanket pan chi emaw tih tur a ni. Thinrim deuhin min ţhut chiah se chu ICU ah leichhuah tutin kan mu bâm maithei a ni.

“Nu, hei Remkalami hi ţhianah ka lo sawm a” Puipuiin a tih chuan, “Inbuatsaih zung zung rawh u, nak zanah palai an lo kal leh ang a, a hun leh ni te sawi fel a ngai tawh. A dawn hnaiha buai chung chung ai chuan thil ţul ni a in hriat kha ngaihtuah la, lo buaipui lawk sa rawh u” a ti zung zung a, Nutei nen chuan min be lem hlei lo va, Puipuii pindan a enkual thuak thuak hnuah a chhuak a, thla a muang huai mai.

Puipuii te inneih hun a thlen hma chu nitin thil zirin kan chhuak a, u Afaki lahin a thiamin min hrilhfiah thiam bawk si, Lanfeli pawh kan milar ho ten an pan nasa a, mi chei vel pawh ka thiam tawh fu a, kan khuaah ka haw thei ţep tawh ang. Ka zir dawn khan ka sit ve ve a, Afako beauty studio a ti ve ngei nain a dawr kha a te reuh a, kan che hlek anga tum loh deuhin kan in beng leh chawrh ţhin dawn a nih hi ti ţhin mah ila a thiamin miin an fak a, Lanfeli pawh frozen an zawrh tel miau avangin deep freezer bula mi chei han zir te chu a ti mah ila an lo fak lutuk tho a, ka lo sit ru viau ţhin kha ka inchhir zawk. Landan hian mi a bum ţhin a, belhchian phawt loh chuan mahni ngaihdan dan a thutlukna lo siam tawp chi a ni lo.

Puipuiin ţhianah min hman dawn miau avangin ka chawl leh rih a, ka thiam deuh vek tawh a, chawlh pawh a inthlahrunawm vak tawh lo. Kan ţhiandun a inzui chhuakin puanţhuina hmunah kan inteh tir a, bazarah kan kawr rem tur puan kan zawng leh a, Puipuii a khirh bawk si, ka ning lutuk tawh chu ka ti tau a, thil min eipui hlauh lo phei se la chu ka haw san nal nal ang.

Kawrfual kan en chiah chu a vaiin ka ha chak vek. Pasal ka neih ve dawnah chuan ka nu’n kawrfual hak a phal lo maithei a, mahse kan kal naa mo kawr ho chu nalh tak a ni, a ha tu tur Puipuii size a vang thung a, keipawh min hak chhin tir vein darthlalang hmaah kan ding dun a, inhmeh ka inti si, miin min nuih dawn lo se chu nitin ka ha peih ang. Kawrfual bakah thil dang a hawh tel nual a, bazar ah bawk kan let leh a, a pa’n pawisa a pe hnem aniang a hmang huau huau mai.

“Thingtlangah khan inchei vak a ngai si lo a, thawmhnaw ka nei mang lo, Lady dianas inn ah kal zuai ang” a tih chuan, “Kan kal dawn nia, ka aieng chhiar pah a ni mai” ka lo ti thuai a, Lps market a kan lut chiah chu ka dai nghal sawng sawng mai, u Zira ka hre chhuak thut lehnghal a, min kalpui ni a kan awmdan zawng zawng te kha ka la sawithei vek ang. Sulhnu chhui leh nunhlui ngaih chu tih hla kha ka sa chho rût rût lo chauh a ni, ka’n ngaih ve ngei chu le.

Kan thlen veleh, “Lo en rawh u” an ti a, min lo be nghal sawk sawk a, keichu a chhung ka luh hmain aieng ka chhiar hmasa te te a, Lady Dianas Inn te chu thawmhnaw an hralh thei lutuk, old stock an tih pawh an lak thar tho an ti ţhin a, ka aieng siam ve rawh a ngai ngaiin a lo la intlar ţhâm mai. Remmawii aieng tih inziak ka bel telna pakhatah phei chuan bawlhhlawhin R lai bik a hliah a, Emmawii aieng a inti daih a, ka lawm hlawl lo.

A neitunu ka hmelhriat tawh bawk a, “Ka aieng saw in hmusit, hralh in tum lo reng reng” ka ti lut a, min nuih tlawn ni awm takin a lo nui hawr hawr a, “Miin an hmuh nghal theih turah kan dah saw, hmanhmawh lo la, kan la hralh ve mai ang” a ti nem hlawi a, Aizawl ah chuan thil ţha a tam a, kei a aieng siam ve mai mai chu hralh har tak a ni. Kan khuaa tar ho lahin acid emaw te an tia, nghapih bur ka khawl ang a mawi deuhin ka pack ve tawh ang, ka sumdawnna ve a nia, ka hlawhtlinpui hma chu ka chawlhsan dawn lo reng reng.

Puipuii lahin thawmhnaw a ha chhin char char a, a jeans hak te chuan a pian a ti lang nalh zel a, pasal zawn nan hmang dawn ta ila kurtai ai chuan hna a thawk chak zawk maithei a ni. U Rinchut but buta kurtai ei nasa pawh a ţawngkam thlengin a thlum vek tawh a, Kalvari kurtai zuar kha chuan a ti fuh tak tak a ni.

Haw lamah Puipuii te inah ka kawi a, kan kawrfual hawh chu kan enchiang leh a, “Remkalam, miss mizoram ah te tel ve la” Puipuiin a tih chuan ka nui duai a, “Awii..what a funny thing, ka kal bu luk luk ang a, hnuai lam bak ka en ngam dawn bawk si lo, miin thil bo ka zawng emaw an ti palh ang” uar zet hian ka ti a, “Nih leh u Zirbawnga nen eng nge in chanchin?” a tih chuan, “Kan la inbe tho, keimah hian ka duh tawh rih lo a, in inneih niah a lo kal ve ang, ngei deuh reuh mah ila ka sawm tho a” ka ti a, “Keipawn ka sawm alawm” a lo ti ve chiah a, mak ti zet a, “Engtin?” ka tih chuan, “Kalvari hnenah a phone number ka dil a, a tir chuan a duh lo a, ka sawm char char hnuah a remti ve chauh. I thinrim ka hlau a ka hrilh duh lo che a nih kha” a tih laiin, “In inneih ni chu ka che chhe thiang lo a nih chu” ka ti a, “Sangkhuman ‘Maski kan sawm ve a, hman a inti lo a’ a ti” a tih chuan, “A pi thihna a la rei si lo a, a la tuar aniang” ka ti a, ka mumanga a lo hran dan vel ka sawi leh a, “I mumanga i hmuh chuan a lo kal tak tak tihna a nih chu” a lo ti a, min sawi ţhaih a tum ve nasa mai.

“Thlahrang hi an vak thui hranpa hleinem, an thihna emaw an phumna hmunah an tam hlur a, Aizawla lo kal nachang a hre teuh lo” ka tih chuan, “Setanic Nicky-a pawh kha kan awm laiin a inti huai em em a, Maski-a pi thla a hrang an ti chiah chu a nu leh pate pindanah a mu ve an ti. Setanic ve si thim aiin eng a ngaina zawk” a ti a, kan nui duai duai reng a, a rilru a hrehawm ve tho si a, ka pi Binladari te chungchang chu ka sawipui duh tawh rih lo.

Ni a ding reng ngai lo va, Puipuii te inneih ni pawh a hnai ve zel a, kan inbuatsaih mup mup tawh. Sangkhuma leh Fawnvela te kan inah an rawn thleng a, Kalvari leh Nunhlimi te an lo kal thei lo a, Nutein min pui char char thung. Nutei phirpui Nunui lahin Sangkhuma a star a, rawngbawltu ber tih takah Sangkhuma hmuh chhuanlamin tuktin chawhmeh min rawn suah ţhin.

Ka thawh rualin kawngka kik karh karh thawm ka hria a, ka va hawn chuan Nunui a lo ding reng tawh a, “Alu kan ka lo suah dawn che u, u Khumtea khan ka ei chak a tia” a rawn tih chuan, “Tu nge Khumtea?” ka lo ti he haw a, “U Sangkhuma mawle, ka hmingpum a min ko lo vin u Khumte min ti rawh a tia” phur zet hian a ti a, “A la mu a, ka kaitho duh angem” ka tih chuan, “Aih, nakinah cake ka siamsak ang che a ti lo ti rawh aw” a tih hnuah zawi tein, “U Khumtea bula ka awm chuan ka ke hnuai a za a, ka lu a hai muai muai zel. Alu hi a duhtawk a ei hnuah chiah ei ve chauh rawh u aw” a ti a, zah hmel deuha inherin step ah a tlan chho nghal chawn chawn a, a khawilai nge maw a duh ni? Sangkhuma berkher hi chu a tirah an duh ve pawhin an duh rei ngai lo.

Chaw ei laia Nunui chanchin ka sawi chuan ka u te zawk nuih a za a, “A fel reuh a sin” u Maman a tih chuan Sangkhuman, “Ka duh zawng a ni lo” a ti ve ngei a, “A phirpuinu ka hmu hmasa a, Nutei thlengin ka hmu mak vek” a ti daih a, “Duh mai mai teh, luck ber ang zia zanga duhthlan vel a ngai lo. Duh tu neih loh vanga phun phun si i neih veleh i induh leh vel a, i piang letling a nih kha” Fawnvelan a ti hluk hluk a, “Ve a che..innu a rai emaw i tih hnua a rai leh si loh hian min puh ziah suh aw, ka chungah ţuan ziah suh” Sangkhuman a ti veleh bawk a, “Hmeichhe naupai awmdan i sawi zawt zawt a, pakhatmah a dik lo. Aaa…nau a chhiat khan eng emaw fel lo a awm aniang” Fawnvelan a lo ti ve leh , ka u te an nui hawk hawk reng nain ka lo khawngaih daih a, ka ţawngţaipui ziah.

Zana u Ziran min lo call chuan inhauhna chhan tur kan nei tawh lem lo bawk a tiin ka la ve mai a, “Inneih niah nge a hma chiahah ka lo kal ang?” a rawn ti ve mial a, a thil tih turah hian midang a rawn khat a sin aw.

“Inneihniah chuan i buai lutuk ang, a ni nuai nuai tawh dawn a, tumah kan biak theih tak tak dawn loh a” ka tih chuan, “A hma niin ka lo kal ang, duh i neih chuan ka lo hawn ang che” a ti a, “A ngai lo, duh ka neih pawh ka hre lo, mahse ţhian ang chauhin awm rih ang aw” ka ti a, a thu min hrilh kha ka la ngaihtuah nawn leh lo, ka ngaihtuah peih lo a ni ber.

“I tih dan dan le, i duh dan thlapin kan awm dawn nia” a tih hnuah, “I nalh dawn emai camera nen ka lo kal ang” a ti vel a, “Bike thoin mi i lo kal ang” ka tih chuan, “Ni lo e..Vani te nufa Aizawl kal an ngai a, ka rualin an lo kal ve ang. Vani zawk hian in entir a duh a, inneih naah naute ka rawn hruai a ngai maithei” a rawn ti a, “Engati nge nangmah kher? Aizawlah an chhungte an awm nange?” ka tih chuan, “Duat rawn tih takah a khirh a, kan chhungkua leh Vani te chhung bakin an la hrang thei vak lo” a tih chuan ka lo nui hak a, “Lo hruai rawh, mahse mi an tam dawn a, i fimkhur viau a ngai ang, motor a tam dawn teh mai a nia aw” ka ti zung zung a, “I hman chang changin min venpui ang chu. Hunawl a awm veleh kan pathumin kan leng kual anga” a tih chuan ka lo aw ve mai a, nidang angin kan inbe rei hran lo a, ngei ve deuh mah ila keimahah hian khawngaihna a awm tlat a, ka sawithiam lo a, ka hrethiam lo bawk a, ka awm zel dan tur chu Pathian kutah ka dah tawp mai a ni.

Sangkhuma leh Fawnvela te chhuak lah an rawn haw harin an bo emaw ka ti rum rum tawh a, Nutei nen tv kan en a, changtute uluk deuha an in en veleh kan hmet sawn nghal zel a, “In fawh kher hian a tih hmuhnawm phah lo e” Nutein a la ti nang nang reng a, keiin, “Sangkhuma te hi” ka ti sek thung a, “An lo haw ve mai ang, tlangval alawm an nih. Tuman an ru bo lo ang” ngaihsam zet hian a ti a, Aizawl an kal khat em vangin keichuan ka ngaihtuah a, an chhuk tum lohna thlengin bus in a phur tlang aniang te ka tia, ka hawi ka hawi tawh mai a ni.

“U Zirbawnga a lo kal ve dawn sia i laih phah ange aw, i laih vaih chuan i che chhia a ni mai. Ka hmu chak tawh che a nia, ka ţhutna lam rawn hawi phei ngei ngei ang che, ka chhiatkhum chak che a nia” a tih lai takin kawngkhar a ri rawk a, Sangkhuma leh Fawnvela te nui vur vur chunga an rawn luh hnuah Maski a rawn lut ve a, ka makti lutuk chu ka ding zawt mai.

“Awii ha…eng nge awmzia?” ka tih laiin Sangkhuman, “I thi ţhaks em?” a lo ti a, “Thi ţhaks hman ka nih rih loh hi. Maski chu i lo kal ve dawn lo emaw ka tia” ka ti hlut a, mak ka ti ngei mai. U Zira a lo kal dawn bawk si, thudik tak hre ve ve tawh mah se ka tan a nuam duh lo khawp ang.

CONT…

Angel Pops
Author: Angel Pops

This Post Has One Comment

Leave a Reply