You are currently viewing Keimah, thingtlang nula S2 – 19

Keimah, thingtlang nula S2 – 19

Spread the love

KEIMAH, THINGTLANG NULA S2-19

“Eng nge thleng a? Ngati nge in buai chiam?” u Maman a tih chuan ka piah deuha ding Puipuii ka en daih a, u Zirbawnga pawhin ka naupang pawm lai chu min laksak sawk sawkin kan la ding ţhap a, Sangkhuma erawh Fawnvela bulah a ţhu hnawk a, Maski pawhin guitar kuah hlûn chungin min lo ngaichang ve ran mai.

“Sangkhuma hian zu a in tih kan hre miah lo a, ka pi Binladari ten mikhual pindan an chang lo a, ka nu’n, ‘Chhuatah mu mai rawh u’ a ti kha an hua a, Fawnvela nen hian an rawn haw tau a, thlem tumin kan lo kal a” Puipuiin a ti dek dek a, “Kan hua ang chu, tu nge nu leh pa, chhungkaw khaiding tu ber te chhuat a muttir ngai? Mikhual pindan an chang lo a nih pawhin an khum an lo kian sawk sawk zawk tur a nia, i nu rilru hi a changkha mah mah aw, a kha fuk mai” a lo ti nghal hluk hluk a, “Mikhual kan ngah lutuk a, hmun danga riahna tur nei lo an tam si a, a theih dan danin kan inhnawh a” Puipuiin a tih leh chuan, “A theih dan danin inhnawh mah ula ka pi Binladari te kher chu chhuatah mu rawh tih an ngai hleinem, an rawn thleng tlai emaw tlai lo emaw khum an chang tur a ni ringawt, Sangkhuma khan a sawi dik chiah” ka lo ti a, lungawi vak lo chunga ka melh laiin phawk zetin min lo melh ve thung a, “Ka lamah i ţang emaw ka tia, khatianga i tih chuan Sangkhuma a lungawi thei nang” pawi tih hmel tak hian a lo ti a, “Ka theihnghilh daih” tih bak sawi tur ka hre lo, ka pi leh pu te thlavang ka hauh na ve em a ni.

“Ka pi ten an rawn ti chep zual viau che u a nih chuan helamah lo riak phei mai se la, an duhna hmunah kan thlahin kan hruai leh zel thei tho ang a, in tana buaina mai mai an nih chuan a zia lo emai” u Maman a ti charh charh a, thutak deuh a, “Remkalami a lo riak dawn tho a, helamah khum a awl thei alawm. Ani kha chu chhuarah hnawh lut tawp mah ula tui deuhin a mu thei ang” a ti leh kher chu ka ngei deuh a, Maski leh u Zirbawnga an awm ve lehnghal, “Chhuarah berkher chuan ka muhil thei bik lo” ti mah ila, “Bangah khai tawp mah ula a muhil bawrh bawrh thei” a la ti tak deuh deuh a, Maski lah chu min nuih suk hnuah a kun a, guitar a tuai a tuai a, Puipuii berin engmah a sawi tawh si lo va, keini pawh kan ngawi ran hlawm mai.

“Eng nge in ngaihdan?” u Mama berin a ti leh a, “Boruak a chhiat an hlau ang a, an insawn duh lo vang” u Ziran a tih chuan ka ute pahnihin a dinna lam an hawi nghal a, Maski pawh a bang chuang lo, “Sawm buai duh lo mai rawh u, tar ho hi an luhlul ve zek zel a, Puipuii pa hi an fapa a ni bawk a, an insawn chhuah chuan neuh neuh a awm ngei dawn tih an hria ang a, an fapa te nupa inkar thlengin a buai thei tih te an ngaihtuah thleng pha nghal vek ang. Puipuii hian thli thlai reng se, midang aiin ngaihsak deuh hlek se tluang deuhin mo kan lawm tlang thei zawk ang” a ti leh duah a, kei ngei pawhin ka hauin ka en a, makpa chetin a che nghal ringawt em mawni, “Inţhen lai lai a makpa interview an ti mai tur che a sin” zawite hian ka ti a, a hre pha lo aniang a che eih lo.

“I ngaihsak thei ang maw Puipui?” u Maman a tih leh takah chuan, “Aw, ka ngaihven reng mai ang. Remkalami pawh a lo riak dawn a, kan awm alawm, lungngai suh u” Puipuiin a ti sawk sawk a, boruak a dai chhawm ve mai ang chu tih laiin Puipuii vêkin, “Sangkhuma hi alawm, a thin a rim a, a natna a lo ruih chilh kher a, ni lo se eng boruak mah a awm lo ni mai tur” a tih leh chuan, “I nu pem pum vangin a nih hi kan buai” Sangkhuman a lo ti tuar a, “Ka la ţawng per zui” tih leh pahin na zetin a hmui a tuai tâwk a, tumah kan nui ngam lo reng reng.

“I nu nelh nulh kha inla changkang viau lo se chu kan hlim tlang vek ang chu. Sangkhuma i tih khanglan chu le, in chhungkua khan ka nuai pherh vek mai ang che u” ti tun tun chunga thawh a tum chu a hnaih bera ţhu Maski-an rang zeta a banah lo vuanin a mitmei zauh a, kan thutak ve tehreng nen Nutein, “U Khumtea chu a thinrim viau nain a ţawngdan kha a uang a ang e” a lo tih chuan u Zirbawnga a nui hawk a, midang tumah kan nui chuang lo. A lam hawia rum zeta ka melh chuan nuih insum ni awm takin a hmui a pet a, u Mama pawhin, “In buaina hi a darh sarh lutuk a remkhawm ngaihna ka hre lo” a ti ve hial a, Fawnvela lahin Sangkhuma hnenah, “Nangmah vangin harhfim tawk chiahin ka rui” a ti ve sek bawk a, a hmuna rawn kal ve lo tan chuan chinfel a har ve bawk a ni.

“Lo ţhu phawt teh u, ka pu, nangpawh ţhu rawh, nau i pawm bawk si” u Maman a ti pek a, u Zirbawnga lah chu a tum hmuk tawh a, a hmel chu ka en ţhin, han pu hluai tur hmel a la pu bik lo a sin mawle.

Kan khuaa awm ngai lo tih takah u Mama chuan, “Inneihna hmang tur a lo kal ve tho em ni i nih? I fanu chu a hmelţha reuh hle mai” inti bengvar tak hian a lo ti leh a, ţhutthleng awl laia ţhut pahin u Zirbawngan, “Ka nau fanu a nih hi” a ti deuh hmuk a, a lawm lo ve viau a ni.

“A nih chu mawle” u Mama pawhin a ti ta ringawt a, u Zirbawnga bula ka ţhut rualin Puipuii leh Nutei te an rawn inhnawh ve a, Sangkhuma kan en zeuh zeuh hlawm a, a thinrim chu a mal ben thuk thuk pahin a rum nghut nghut reng mai.

“Ka nu’n min lo phone reng tawh a, ka va be lawk ang” tih pahin Puipuii a tho a, pawn a a chhuah veleh u Bawihan, “A nu chu a sual viau em ni? Eng ang mi nge a?” a ti ţha veleh a, “Nu thau tawi turh mawle, lung bial hlai pui pui uluk lo deuha remkhawm a ang. A nasa ropui si, rul chuk pawh engahmah a ngai lo vang, ramhuai ho pawn an tlawn ang chu, awle pawh a pum hmawm hmak thei ang. A pa lah kha nep si, an nu tih ang angin a awm a, mipa pawh a ni lo, a hmingin a aw a thum ve a a ni mai” Sangkhuman a lo ti zung zung a, “Eng pawh nise Puipuii vang talin insum hram hram rawh u, nangni aiin hrehawm a ti daih zawk ang. Naktukah man an inhlan tawh dawn a, awm tluan law law rawh u” u Maman a tih takah chuan Sangkhuma pawh a ngawi reng tawh a, Puipuii rawn lutin, “Ka sawi fel vek tawh, kan rawn haw har deuh ang ka ti” a tih chuan ka thaw huai mai, Sangkhuma thinrim a reh hma a kal daih ka duh bik lo a ni.

“Remkalam, naktukah hun a awm loh takin ka sam min dum sak lawk rawh, a ţuak pheuh pheuh hi a mawi lo emai” Fawnvelan a tih chuan, “Sam pawh i nei hleinem, lu hlang a nih kha” ka lo ti a, “Ti vat mai rawh” a tih tak tlatah chuan sam dumna tur phur lo deuhin ka siam a, tunlai mi naupang te te sam ţuak an tam zia kan sawi vel mai mai tawh a, Puipuii nu a lang leh tawh lo.

Fawnvela sam ka dum sak laiin, “Naktuk chu Fithangi a awm ve dawn lo a i ţang hle mai” u Bawihan a lo ti zauh a, “Ka chhe lo hle tur a ni ringawt. Mi pahnih tal bem thluk ka tum ang” a ti ham ham a, “Kalvari in pasal a nei tawh a, Puipuiin a nei leh dawn a, Remkalami pawhin nei ve vat se a ţha ang” fiamthu a u Maman a tih chuan u Zirbawngan, “Nia” a lo ti vat a, a zakthei lo sawt tak tak a ni. A pangngai ve theih tehreng nen kan hruai da vek tawh.

Mikhual ang maia u Zirbawnga leh u Mama inbe reng chu ka ning deuh a, “U Rinchuta u a nih hi” tiin ka lo inrawlh ve hram a, “A nih chu mawle…i hmel ka la hmu lo nain i hming chu ka hre ţhin” u Mama pawhin a ti ve ta nge nge a, “Keichuan thlalakah ka hmu tawh che” u Bawihan a lo ti ve thung a, kan inkar a thil awm vel hi ka nu’n engmah a sawi ngai lo bawk a ka u te hian rin ngaihna an hre kher lo vang.

Sam kan dum zawh meuh chuan Sangkhuma pawh a hnar thlurh thlurh tawh a, “Buh an her emaw ka tia, Sangkhuma hnar ri lek a ni maw?” Fawnvela chuan a ti uang vel a, ţhutthleng nghenchhan lam hawiin a mu kawm ngul a, amah zu a lo inzawh vek avang khan a thin a la rim aniang a mawnga ben thlawp thlawp pahin Fawnvelan, “Min han chahthlak san hmak chu le, i mawng khawihli lai kha ni se ka ti hle mai, harh hawk khawpin ka’n sawr sak tur che a nia” a ti deuh kher a, rui khawpa in ve lo na na na chu a rim chiah a nam a, a hawi a hawi ringawt mai a ni.

“Thingpui va lum rawh” an ti leh tawh a, ka ute hi chu an ţhut ve hlek chuan thingpui an lam nghal zel a, an din reng hian ka hahdam zawk. Gas a thingpui bel ka chhuan kai ruala u Zirbawnga lo kal chu, “Let leh nghal rawh” ti mah ila, “Guitar pawm hlun tu saw u Lalhuma te sawi lu kir deuh kha tiraw?” a ti tho a, “I hriat reng kha a, Maski-a a nih saw” ka tih chuan, “Lu kir kha ni reng e, Maskir-a” a ti ngei a, “Upat lama thikthu la pe chhe lutuk ho hi chu an rapawm, ka u pawn ka pu a tih che kha” ka lo ti a, a naupang hruai lah chu a kai reng a, a mut a chhuak tawh ang tih nachang pawh a hre lo.

“I sawm chhuah ve tho a ni em?” a tih chuan ka melh vak phawt a, engmah a sawi tak lohah chuan, “Ka inrin loh lai takin a lo kal. A pi a boral a, rilru tih thawven nan Sangkhuma te a rawn zui aniang, Puipuiin a sawm ve bawk ang a” ka ti ta nge nge a, “I hre lawk lo maw?” min rinhlelh hmel deuh a a tih chuan, “Hre lawk lo, lo hria pawh ni ila eng nge pawi? Ka ţhian a nia, bakah ka bialpa i ni rih lo a” ka ti kher a, “Ni rih lo mah ila ka la ni leh dawn tho. A en dan che kha ka hrethiam” a tih chuan, “Engtin nge min en?” ka lo ti thuai a, “Ka en ang chiahin a en che. Ka duh ang chiahin a duh che tihna a ni mai. In hmel a in ang deuh reuh lehnghal a” a ti bul bul a, “A awihawm loh ve chiang e. Patling pui mi hmel mai mai a han buai” ka ti hluai a, min din hnaih paha, “Nupa hi an hmel a inang deuh ţhin an ti. Hmel in ang deuh hlek hi an innei duh tihna. An sawi hi i hre ve ngai em?” a tih chuan, “An ti ve mai mai a nih chu, hnam hrang hlak, inanna pakhatmah nei lo nupa ni si an tam emai” ka tih veleh, “I zir zawh hunah ka rawn hruai che ang a, in khuaah ka thlah thleng thlap ang che” a ti daih a, “I thusawi a inzawm lo thei emai bakah ngati nge i rawn phei ve kher? Va ţhu mai mai rawh” ka lo ti thung a, Maski nen inngaizawng lo mah ila aman min ngaizawng miau a, choka a u Zirbawnga nen kan awm reng chuan nuam lo a ti palh ang. Mi fate rilru nat ka hlau ve em em zel a, ka lerh vang ni lo vin ka rilru ţhat vangah ka puh hmiah.

“Ţhu dawn e…i thingpui siam kha a thlum bik te a lo awm ange” awmze nei zet a a tih chuan, “I thingpui turah chi ka al nghal loh” ka ti a, a kiai suk a, darthlalang chu ni ila ka keh chuai ang, kan inngaihzawn lai ai khan ka hmu hmelţha leh tawh zawk a, inţhen mah ila kan inhaw hlawl lo, kan hrisel phah zawkin ka hria.

Thingpui ka sem laiin Nunui cake siam kha an lo sawi chhuak leh a, “U Zirbawnga hian a la ei ve lo, tlem a la awmin ka hria, a hlui deuh tawh nain ei ve rawh se” ka tih chuan Maski-a thik tur hian, “Kan Remsiali hi chuan ka rilţam a hlau thei a nia” awmze nei zetin a ti vel a, Maski a nui mai mai thung a, a tui loh lutuk vanga ei tir tum ka ni reng sia, Maski runluih a duh hrim hrim chuan tui tih hmel deuhin a ei lui leh mai ang.

Midangin engmah an hmeh loh laiin u Zirbawnga chu cake ka pe bik a, “A va hil bel bul ve” a ti nghal ringawt a, ka ute nen an inkawm nel nghal vang aniang inthlahrunna a neih awm pawh ka hre lo. U Bawiha lahin, “Kan eichhin vek tawh, ei ve chhin rawh” phur zetin a lo ti bawk si a, “Keimahin ka ei vek seng lo ang, ei ve rawh u” a ti dam thlup a, nui chung a “Remsialin min duhsak emai hil deuh mah se ei ang” tih paha cake a ei chiah chu a nui hmel a bo hmak a, ka ute lah an nui ruh ruh reng a, an sual tak tak a ni.

Cake hmuam chunga u Zirbawngan, “Seh rep a awm” phawk zet a a tih chuan u Mama insum zo tawh lo a nui chhuak hawk hawk a, “Inchung nula in Sangkhuma tana a siam sak ve ngei a nih kha. Chhe thei lo se chu kum khat vel kan ring thei ang” a ti a, u Zirbawnga pawhin a hrethiam tawh aniang, “Hetiang a sak hian a va siam thiam zawk ve” a ti ve hial a, “Thu dang daih, naute kha engtia koh tur nge?” Maski-an a lo ti ve mial a, “Bawihtei tih bakin kan ko ngai lo” u Zirbawngan a tih chuan, “Bawihte” a ti nghal a, Bawihtein a lo ngaihsak nghal mai lo nain a thlem a thlem hnuah chuan an inpawm thei mai a, tunhma ang tho khan ran leh naupang a la lawm reng a nih dawn hi.

“Ka lu ka’n su ange” tih lauh pahin Fawnvela a ding hluai a, Puipuii lahin, “U Zirbawng, motor i keng tho a, taxi koh ngai lo in min thlah rawh aw” a ti deuh reng a, vawi nga vel lai a hrilh nawn tawh. “Awii..u Khumtea hnar ri chu a mak e, kawng chhe deuha motor insawh dawt dawt a ang, a hnar a hnawh phui a ni lo maw han ngaihven teh u, ka ngaih a ţha lo” Nutein a lo ti ve thung a, inpawh hlawm viau mah ila kan ti ti a inrual hlawl lo ţhin.

“Keipawh nichin aţang tawh khan a hnarkua ah bottle ruak a tam hmel ka tia, min haw em a ka sawi duh lo mai mai a nih kha” tiin Puipuiin a lo tui hnih vat a, “Inchhungah mu lo se chu a thlawk sang tawh ngawt ang” u Bawihan a tih chuan kan nui dar dar a, muhil lo se chu tuman kan sawisa ngam awm tawp si lo va, Sangkhuma hi chu a mutthilh lai chiahin a zaidam.

“Remkalam” Fawnvelan a rawn ti tuar a, amah aia a aw ri kan hriat hmasak danah a lungawi lo a ni chiang mai. Kan ţhutkhawmna lama a rawn phei chiah chu a lu a dum hlup a, a sam ţo na chin chu rual em em hian a inthai phei a, ka thai kawi ve ngai lo, Maski pawhin ka chalsam rual zia a sawi tawh kha. “Ka lu hi i duh duh i ziahna tur a ni lo” thinrim zeta tih pahin darthlalangah a in en leh a, “I su fai lo a nih kha” ka lo tih chuan, “Vawi3 vel ka su nawn tih hre rawh aw, ka lu lei dum lo vin ka sam dum ta che” pawr zet hian a ti a, zahzelah midang ka en kual a, sam khawih vel ka zir lai mek a nih avangin an lo nui ţha hlawm a ni tih ka hmuh chuan ka zak ve deuh.

“Sam dum tur i nei lo, lu hlang a nih hi ka tih ka tih kha” ka ti ta ringawt a, “Sam awm lo se dum rawh ka ti nang, pindanah uluk tawkin ka tukhum te hi ka en vek tawh, ka bek sam te hi a pung nasa lutuk, pali vel lai a inrin hi” tih pahin a bek min hmuh tir a, a inrin thluah tak tak a, a lu um a bial ţha bawk si, êng thei se chu krismas tree a thil mum an khai uai tle sep sep thei chi hi a ang ngawt ang.

“Naktuk man hlan a ni tawh a, engtin nge ka tih ang a? Lu hlang chei dum chawp a ang, a rual lo ropui si, ka tukhum phei hi chu map a ni ringawt. Naa…ball bal deuh ka ang” a ti bui bui a, “A nalh lohna a awm lo Fawnvel, i vun rawng nen a in zul a, a mawi daih zawk. I ngo hlung lo a, hmeichhiain pa an tih theih em che hi” ti a u Zirbawngan a thiam ang tawka ka thlavang a lo hauh lahin, “Sam dumna leh ka vun tehkhin suh” a ti bak hlur a, “Remkalami i ţan a nih kha. Sangkhuman ka zu min inzawh sak a, Remkalami lahin ka lu a ziak rang chuai a, khawvela cake sak ber tur ni awm tak ka ei bawk a, hah chiah ka hlep. Hetiang mai mai a intih tur a ni lo. Ka bek sam lem te hian ka khabe a thleng lo chauh a nih hi” a ti khur khur a, ka u te leh Maski pawh an kun ngul tawh a, ngaihven lo ang deuhin an awm na a an nui tih ka hre thei tho.

“Powder vela khuh kan tum mai dawn nia, su leh mah la i vuna kai kha chu a reh mai mai lo ang” Puipuiin tim daia a tih pawhin, “Powder hnawih chi ka nia mi? Ka ţial ruai dawn a sin” a lo la ti vin hlur a, “I nalh ţhaks my friend, nang chuan inhmeh loh i nei ve lo, a dum hlup khan i ha a ti langsar alawm. Kawr var tawk ha la chuan zanah i êng thei ang. What a very zan a êng thei Fawnvela” ti ve ngial mah ila, “Ka ţhiannu chu ni lo la bang den nan ka hmang ang che” nui miah lo hian a ti a, “A na lutuk ang, darthlalang a i in en khan inhmu lo der mai rawh, chhe lo deuhah in ngai lui tlat la” ka tih chuan, “Tih ngaihna a awm tawh mang si lo, darthlalang a in en apianga in hai luih a ngai dawn a nih hi” a ti chuai raih a, a lu bik chu ka en vang vang a, “I lu kha naupanlaia ka marble hman thiam kha a ang lutuk” ka tih rualin hruk puanin min vawm chawrh a, Nutei pawhin ding meuhin Fawnvela sam chu a en a, “Chei…a sam a la ţuak. A sam dum lo vin a lu lei chiah i dum a nih hi, bel mawng a ang vek alawm” a ti hluai a, Maski pawhin, “Tihpalh a nih kha” a lo ti ve a, “Tunah dar9 vel chiah a la ni tho a” ka tih veleh Nutein, “Thawmhnaw ka han la anga Puipuii te inah ka riak ve leh dawn, naktuka keimaha lo kal ka peih bik lo” a ti a, dan hman a ni lo, a khawhin a inkhawh chhuak nghal a ni ringawt.

“Eng nge dar9 vel chiah chu?” lungawi lo deuha Fawnvelan a tih chuan, “I lu ah sam lem ka ziak sia, i lungawi nan sooji ka siam sak ang che” tih pahin a hmel ka en reng a, a thinrim hmel pawh a bo ve deuh chuan ka hria. “In rei lutuk ang, Zira ruala let leh in tum sia, nau a hruai bawk si” tiin u Mama a lo inthlahrung der a, a bula ka awm theihna tur a nih phawt chuan u Zirbawnga hi chuan a nu pawh hruai se min nghak tho ang. “A pawi lo, Fawnvela a lungawi lo emai, ka lo nghak ang” a ti chiah reng a, amaha a chanve thawk hi pasal tlak a nia, a chanve dang leh hi ţhen vang vang a, bihruksak daih chi a ni thung a, mahse a thuruk min hrilh hnu kha chuan mi sawi dan mai mai avanga buai ka tum tawh lo, bialpa neih ka peih rih lo a ni tawp mai. Theih phei se chu a bul aţanga star ţhat leh a nia ka chak ni.

“Sooji chu siam ta si che” vin zeta Fawnvelan a tih chuan ka tho nghal sawk sawk a, thirbel a kan sooji neihchhun ka chawh rawk rawk lai te chuan u Zirbawnga emaw Maski pawhin min rawn ti buai lo. Nutei message thawnin, ‘Maski hian hmeichhia a duh ka tih kha aw, thawmhnaw maksak deuh deuh keng miah suh’ ka ti a, Kalvari hnena, ‘U Zirbawnga leh Maski te an lo leng rual mawle, ka thi teuh ţhaks’ tih ka thawn leh ruala Maski-a message lo thleng chu mak ka ti angreng khawp mai. Phone ka khawih tho avangin ka en sak a, ‘Ka pawm thlap’ tih zawng hi a lo ni a, hrilhfiah ngai lo vin ka hrethiam ve ngei, u Zirbawnga min duhpui tihna a ni mai. In la zei tawk a, ‘Ka hmun ruak luah khat tur ţha deuh a awm’ ka tih chuan, ‘I hmun ruak chu nangmah bakin i luah khat thei lo’ a rawn ti a, ka uang tih a hre lo aniang a message a nui miah lo. A thutak lutuk chuan min ti zak leh hnuhnawh a, phone ak ţha hmakin tui ka chhuang a, chini tam deuh ka telh leh a, rei deuh ka chawh hnuah ka tui chhuan so chu ka chhung lut bûrh a, thingpui ka lo chhuang leh hman tingtang bawk si, Maski ka hmu zak ve deuh a sin mawle.

Nutei bawk be lehin a lo chhuk hun tur ka zawt a, ‘Ka sam lem ka khuih, ka rei dawn’ a tih miau vangin Puipuii ka ko vak a, beisei loh deuhin ka hmuh hreh ber Maski a lo kal daih zui a, zahzelah sooji ah chuan tui ka leih leh ţeuh a, thingpui so ţan chiah chu ka off nghal bawk a, ‘ka hmun ruak’ ka lo ti vel kher kher kha ka inchhir ngawih ngawih. Ka star te ka hmu hreh ngai lo va, ka zak ngai miah lo kha a nia, ka zak lo mah mah zawk, doctor thlengin ka rim ngam ţhin kha a nia, Maski hi chu ka zah tlat a, a chhan ka hre bik lo, dawi a thiam em mawni te ka ti rum rum hial a ni. Super natural mai a ni lo, Maski bula ka awm chuan super natulai a ni tawp zel.

“Phone a hmang a” tih paha ka bula a rawn din rual chuan a nui chhuak hawk a, amah pawh en ngam lo vin, “Eng nge i nuih?” ka ti thei hram a, “I sooji kan hi a va kawi hneh ve” a tih hnuah tui ka leih tam lutuk tih ka hre chiah, super natulai diktak a ni.

“Thingpui ka siam leh phawt mai ang” ka tih chuan, “Ka haw dawn a, min siam kep suh” a ti a, a hmelţhat nen ka en ngam lo tlat a, ka hnuh kawi nasat vanga ka inthiam loh vang te pawh aniang, tunlai chu ka thinlung hian harh tharna a chang aniang mipa pahnih ka buaipui tlat hi keimah pawh ka indem, thinlung lam a harh miau chuan insum a har bawk si, “Awii…i may die, ka thluak a mu hlum” ka ti hluai a, ngam leh ngam lo vin ka melh ţawk ţawk a, ani lahin phawk zetin min lo en reng a, “In entir rawh” a lo tih chuan, “Eng vangin?” ka ti leh he haw tho a, “I thluak a mut hlum chuan doctor pan rawh” a ti a, u Rinchut but buta ang maiin a fiamthuah amah chiah a nui a, “Thluak thi, thinlung harh vang si hi a buaithlak” ka tih leh pawhin a hriatthiam hmel chuang loh.

“Ka kal dawn aw, muttui” tih pahin zawitein ka hnung a beng thak a, a kal nghal daih lehnghal a, awmdan tur ber pawh ka hre tawh lo, ka khawngaih zel a, mahni ka indem phah ziah. Lo piang lo tawp ila han ti hluai dawn mah ila khawvel hi nuam ka ti ve tho si a, aieng ka zawrh aţang chiah khan ka dik lo ţanin ka hria, ţha ka inti thar a, mihring chu mahni ţha kan intih lutuk hian a dik thei lo, midangin min hruai sual ngai lo va, keimahni hi keimahni vêk hian a hruai sual ţhin.

Thingpui ka va sem meuh chuan Bawihtei a lo muhil bam tawh a, sooji la turin ka let leh a, thirbela fian ka dah ţeuh hnuah inthlahrung deuhin ka chawi phei a, “Thleng darah te pawh han suah chhuah ve eih awm che a nia” u Maman a tih rualin ka thirbel chawi chu ka nghat a, a hmu chiah chu a ngawi hmak a sin le. “Thleng dar mai ni lo, bucket ah ka dah ţep zawk a ni” ka ti a, ka sooji kan chu an en ngawih ngawih hlawm a, an ngui bar mai.

“Sooji i siam emaw tia” Fawnvelan a ti sup a, “Sooji a nih hi” ka tih chuan, “A va tui ve, sooji soup bak a nih phak loh hi” a ti ţalh a, “Hetiang hi ka vawikhat hmuhna” u Zirbawnga pawhin a lo ti ve boh a, “In ril a ţam chuan chhang a awm tho a sin, in ei duh em? Remmawi, va la la” u Maman a ti sawk sawk a, choka a phei ngai tawh lo vin Fawnvelan, “Hawp mai ang u, kan puar tho ang” a ti lauh a, thirbel chu kil bial laihin ka sooji kan, soup a chhuak ta daih chu kan hawp liam liam a, “Hmarcha kan thak law law dawn mi?” Fawnvelan fiamthu a a tih chuan a thinrim tawh lo tih hriain ka thaw huai mai.

“Sooji hi no khat engzat man nge?” a ti leh a, “I sooji kan hi hawp a ngai bawk si, thingpuia hmeh a har emai, nang hi chuan awm tawp bak thiam i nei lo a nih hi” Fawnvelan a ti leh kher a, lai kual nasa viau lo ila chu tui deuhin ka chhuah thei ang mawle.

Thingpuite kan inzawh leh te te hnuah u Zirbawnga hoin kan inzui chhuak a, kawngkhar hawng zau lem lo va a chhuah tawp avangin Bawihtei lu a la tauh tir bur zui a, pakhat lah a ţap uar si, tihtak zet a an inthlem hnuah a bang ve thei hram a, Nutei leh Puipuii ten min chhohsan daih a, Bawihtei rawn ngaihventu ka u te inchhunga an luh leh hnuah u Zirbawnga chuan, “Bawihtei a intauh a keiman na ka ti zawk” a ti ngei a, thei thur ei ang maia nasa a ka lo ner laiin, “A ni tak tak, ka hmangaih em a, miin thil ho mai mai a an ngaih pawh amah aiin ka lo feel ţhin” thutak zet hian a ti leh a, “I feel lutuk ang a a sual daih ange aw, an naupanlai chiahin kan buaipui thei a, an puitlin hnuah thunun an har tawh ţhin a nia” ka tih chuan, “I landan mai bakah i rilru hi ka duh chi” a lo ti a, ka nuih te a za, “Awii…what a funny thing, thlum viau suh, ka ţhen hlen daih mai tur che a nia aw” ka ti kha kha a, “Maskira a awm a i huaisen sawt. Message a ‘u Zir’ i rawn tih reng lai kha a ngaihawm zawk” a lo ti ve a, “Hmh…vawikhat u Zirbawng ka rawn tih khan lo pun tir zel mai ta che” ka tih chuan, “Ka bialnu hlui kha ka la bia” a ti daih a, henu a sawi lan hian nuam lo ka ti ziah. “I bia ang chu, bialpa hlui tlangnel alawm i nih. Bialnu hlui te lakah pawh i rinawm tlat a, hei vang hi a nia ka rin em em che ni” ngeiawm thei ang ber tur hian ka ti a, “Thudik chiah ka sawi tawh dawn ka tih kha. Biak loh thut chu a khawngaihthlak ve a, ka hrilhfiah ve tho” thutak deuh a a tih chuan, “I la biak chhung chu i la duh tihna a ni mai. Ngaihzawng dang neih san lo vin kawp lui char char mai ta che” ka ti a, kan inkawtah awm lo ila chu ka hau nasa viau ang mawle.

“Duh ila chu tirh ngai lo vin ka pan vang vang ang, nangmah ka pan zel ang che hian” a tih chuan, “Min sawi tel ve sek lo mai teh. Nangmah zawkin i thlah thei lo a nih ber hi” ka tih veleh, “Min vau alawm” zawi te, chang zet si hian a ti a, “Engtin nge a vau che?” ka tih chuan, “A tam mai” a ti ringawt a, “Sawi la” ti mah ila step ah a chho daih a, “Ka be lo ţep tawh” tih bak a sawi tawh lo.

Kawngpui kan thlen chhoh hnuah ka pawt bet lui a, “Bawihtei i ti harh dawn” a tih laiin, “Eng tin nge a vau che?” ka ti thung a, “A tam mai ka tih tawh kha. Kan awm ţhin dan i hre vek tawh” a tih chuan, “Khami hmang khan a vau che maw? Video te a awm em ni?” ka ti a, hawi sawn lo vin ka en lui ngat ngat a, inthiam lo hmel a pu ve deuhin ka hria. “Thil dang pawh a la tam. Mahni intih nat leh thil dang tam deuh. I ngaithla duh kher lo ang” zawi tea a tih chuan, “Awii…ka ten che e” ka tih vang vang hnuah ka kal daih a, ka hawi kual nghal vut vut a, Nutei leh Puipuii ka hmuh veleh an lam panin ka kal a, “Maski kha hmeichhiain scooter in a rawn hruai. A rawn chho kha ka hmu fuh a, dawr kal tur angin ka chhuak ve nghal a, hmeichhiain a lo nghak. A hmel ka hmu chiang lo nain a ţawng ka hre thuak a, a ruih hmel ka ti, a pianphung pawh kha pi buh deng a nih duh hmel” Nutein a lo ti zat zat a, “Aizawl hi a hrisel lo a nih hi, thu ţha lam hriat tur a awm lo, thawh lawk a haw vang vang a nia ka duh” ka tih laiin u Zirbawnga a lo thleng a, “Bawihtei hi pawm la a hmaah hian ţhu rawh” a tih chuan chhang lo vin Bawihtei ka laksak a, kawngkhar min hawn sak rualin ka ţhu lut nghal a, puak thei thil pai ang reng a ni, rin loh deuhin thu mak deuh deuh a sawi thut thut zel a, inring reng a awm a ngai.

“Police ah report mai rawh” ka tih chuan Puipuiin, “Awii…eng nge in sawi a?” hnunglam aţangin hlauhthawn hmel deuhin a rawn ti a, an awm ve tih ka lo ngaihtuah leh tawh lo reng reng. “Ka ţawngvai aniang” ka ti daih a, kan ngaihzawngte vau beh an ngaih chinah chuan an tan engmah kan ni tawh lo tihna a ni mai. U Zirbawnga hian a duh vak tawh loin hre mah ila a la khawngaih miau a, ngaihtuah zui vak ngaihna pawh ka hre chuang lo, keimah ang tawnhriat la nei lo tan phei chuan rilru a buai map mai. A thuruk hi ka ţhiante hnenah hrilh ila chu thurawn min pe thei ang a, mahse ka hrilh rualin u Zirbawnga a mualpho thung ang a, tuman an hmu mi pangngai tawh lo ang. Ngawi reng a hlat tial tial a ţhat ber ka ring.

Kan veng kawnah eitur zuar an lo la awm a, sooji tui thlum puarin puar mah ila, “Ei chak i nei em?” a ti tho a, amah pawh en lo vin a hnung a ka ţhiante ţhutna lam chu ka hawi daih a, “In ril a ţam em?” ka tih chuan hmel ngui bar chung hian an lu an lo thing a, “Engmah duh kan nei lo a nih chu” amah en paha ka tih veleh tawitein a nui a, a tlan chhuak lehnghal a, Puipuii te in kan thlen thlengin keimah bik nen chuan kan inbe tawh lo.

Kan chhuk dawnah, “Bawihtei hi” ka ti leh chauh a, “A hnungah muttir mai ang” a lo ti a, “A tla daih anga sin” ka tih chuan, “Ka tlan muang mai ang” a ti deuh tlat a, a hnung lama Bawihtei kan muttir veleh a harh loh nan a ti nge ka hre lo, a lu a chul sak a, “Vanin a ngaihtuah tawh ang. A vawt a ti angem le?” a ti sup sup a, min bia pawh a ang lo.

“Ka mu nghal dawn tho a, puan lum i ken loh chuan ka kawrlum hian khuh mai rawh” tih pahin ka kawrlum phiar hak chu ka phelh a, “Naktukah ka lo keng ang” a tih chuan ka chhang leh tawh chuang lo. “Tlem te i hriat pawn khati kha i nia, a vai chuan i hre duh lo ang ka tih kha. Hriat tum phet lo mai rawh, mi nunhlui vanga hrehawm tih reng i peih em ni?” tih pahin Bawihtei mutna lam chu a nam khar a, “Hrehawm tih ai mah chuan i tenawm ka ti” ka lo ti ve thung a, “Lut phawt rawh, kan sawi leh dawn nia” a tih zawh ruala luh tak tak ka tum chu a ngaingam leh lo nge ka banrekah a lo hmer leh vat a, “Eng nge?” vin zeta ka tih chuan, “Siamţhat tumin ka bei mek, hei hi min hriatsak ve rawh. Engkim a hmun ngaia dah let leh tumin ka bei mek a, ka tih mai mai loh zia i hriatthiam tawh ka ring. Kan buaina hi nunhlui a nia, min ring zo lo va mipa dang i lo ngaih melh a nih chuan ka ngainep khawp ang che” a ti nghat nghat a, “Nunhlui hi nunhlui a nia tih liam puat theih loh chin a awm ve alawm. Hei vang hi a nia fimkhur a ngaih ţhin, nunhlui mai mai kan tih hmang hian mi tam zawkin min teh hmasa ţhin. Hunin a liampui ţhin nain mi nunhlui baka sawi nuam a awm hleinem, zahawmna hi neih let leh a har teh mai a nia” ka ti duah a, “Lut rawh, i thutak hian i hlauhawm” tih paha min vawnna a thlah rualin ka lut a, vawikhat pawh ka hawi let lo reng reng.

Puipuii leh Nutei te ngaihţha lo lahin chanchin min lo zawt sek a, mikhual ho pawh tumah an lo la mu lo. “Engmah a ni lo, tunlai chu kan inţhen lai a ni hrim hrim a, kan uang ve mai mai a nih kha” ti mah ila, “Tumah thinrimin an uang ngai lo” Nutein a ti deuh tlat a, chhang tawh lem lo vin dawhkan kila ka pi Binladari leh ka pu te lo ţhutna bulah ka ţhu ve daih a, “In la muhil thei na nge?” ka tih chuan, “Thei tui leh chhang ei lawk ang u an ti a nih kha” ka pi Binladarin a lo ti a, mikhual nula an tam bawk a an che zung zung a, dawhkanah thei tui leh chhang an chhawp ruih a, an ban suau suau a, naupang ho an lo kal nawn sek hnuah pawh ka pi Binladari te chuan an la ban ve miah lo a, “Ei ve rawh u” ti mah ila, “In duhtawk ei phawt rawh u” ka puin a ti a, an chhang rawn chhawp lah chu a rim a tuiin a thar lam tih a hriat a, ka pu pawhin a en leh vung vung ţhin a, an awmdan hi ka hrethiam. Mi inthlahrung chi nih a, retheih bawk chuan ei leh in a inthlahrun a awl lehzual a, mi zinga kan awm ve pawhin thil ei dawn hian kan kimki tlat bik zel.

“Kha, ei rawh u, in mut a chhuak tawh ang” tih pahin thei tui nen ka pe a, Puipuii nu lo lutin, “A la tam em? Naupang ho eitur a la awm angem?” a rawn tih chuan, “Chau hnawk khawpin an ei tawh zawk ang chu. Ka hriat chinah naupang phei chuan an rawn la nawn vek tawh a, rawn tir rawh suh, kan dawr kan khar tawh dawn, kan mu hma duh” fiamthu titak hian ka lo ti a, “Helai dekchi lianah hian thei tui chu a la awm ang” ka pi Binladarin a tih laiin Puipuii nu chuan, “A pawi lo mai, naktuka in hak tur te en fel rawh u, in buai chuk ange” ka hnenah a ti ve thung a, ka pi leh pute lah chuan chhang chu tereuh te tein an tuai thla a, an ei lep lep a, chaw ei hunah pawh vil reng an ngai tawh dawn a nih hi, mo an nei sual si, an ei puar ngam lo ang tih a hlauhawm.

Pindana ka pi te an luh rualin Kalvari in min rawn call hlauh a, “Eng nge chanchin?” phone ka lak rualin a rawn ti nghal a, “Kan la inţhen, Maski hnenah engkim ka sawi tawh a, ka thawveng huai mai. Bialpa neih loh hi ka inhmeh daih zawk” tih pahin ka nui lui duai a, “Mi ţha hmuh hma chu neih loh a pawi lo. U Rinhlua a lum a, inleng kan la nei” a rawn tih chuan ka phu ve zawk a, “A ni maw? Khawiah nge a lum a? A chhungte in hrilh tawh em?” ka ti zung zung a, “Aman hrilh a ngai lo a tia lawm. Ruah sur kha a tam lem lo nain kalkawng a ti nal pha tho a, a archaw pe tur chawhtawlh nen a lum a nih pek hi. A ar chaw ken zawng zawng pawh a baw vek a, a nal lutuk a kan la phiat fai ngam lo” a rawn tih chuan, “A eng lai nge a sawh? A na viau em?” ka lo ti a, “Khawilai nge i sawh ka tia, ka sawithiam lo a ti. Buaipui vak ngaihna pawh ka hre lo, rizai a sin hlun a, tuilum ip a kuah bawk a, a na lai chu aman a dep ve mai turah ka ngai. Ar chaw pawh Puitea leh Ţpa ten an pek sak tawp a, a na lai a sawithiam miau loh chuan doctor pan mah ila awmzia a awm chuang lo vang” a rawn ti bawrh bawrh a, u Rinchut but buta tak hi chu a.

“A kawng te a herh lo maw?” ka tih chuan, “Herh lo aniang pangngai deuh chuan a kal. Keimahah hian na chu a awm a, ka sawithiam chiah lo a ti tlat bawk si a, a na lai ber ka zawn sak thiam bik lo. Ţpa pawhin, ‘mi thang kamah te a la in awk ang ti nia’ a tih ve hial kha. Zei a zir vat loh chuan thing lerah a la inkhai vu vu mai ang. A zei hawi lo lutuk hi a buaithlak, ar in pawh thawm ţhat a ngai a, amahin a ti thei reng reng hleinem. Heti chung hian ar a la duh belh zui a, nau hi lian deuh tawh se la chu ka lo kal ve tur a nia, ka chak ve lutuk ringawt” a rawn ti duah a, “Ka pi te eng nge an an? Nuam an ti em? An lo duat maw?” a rawn ti leh zung zung a, “Aw…chhang leh theitui an in a, mu turin an kal deuh chiah. Khumah an mu ang a, keini, Puipuii te nen chhuatah kan mu ang a” ka tih chuan, “A va lawmawm ve, tar hi chu an inthlahrung ţhin sia, hrehawm an tih ka hlau a, mahse i awm a ka ngaihtuah lo” a rawn ti ve ngial a, keimaha a innghat hi a ti sual lo, ka pi Binladari te an tih duhdah vaih chuan insual pawh huamin an hmaah ka ding zel dawn.

“My friend, keichu ka awmdan hi ka hrethiam lo. Tunlai kan boruak hi a ni deuh nghulh a, han par deuh chuai chuai theihna ang kha a awm lo” ka tih chuan, “Nang hi, zep ţhen i nei a ni chiang mai” a rawn ti chat a, phone ah pawh a hriat chuan ka hmel phei chu hmu se a hre dawn chiang lutuk.

“Inneih zawh lamah sawi mai ang, boruak a chhe zel a, kan hlim loh chuan Puipuii a khawngaihthlak” ka ti a, rei pawh inbe tawh lo vin kan in mangţha a, tunlai chu ka chuai rawih rawih a ni ber a, ka inhmeh hlawl lo.

Kan mut tlai tehreng nen hma tawkah Puipuiin min kai tho a, a helhhawlh aniang khawvar hmain a inbual fai hman vek tawh. “Min chei tur ber Lanfeli a lo la kal lo” inthlahrun hmel deuha a tih chuan, “Kal lo reng ang chu, khua pawh a la var loh hi. I hmanhmawh thet thawt emai, i phi sek bawk si, khawvar hma zawng inbual tlut tlut mai rawh ka mu leh dawn” ti mah ila, “Mu bik suh, ka zam lutuk a ka muhil thei lo reng reng” a ti tlat a, “Eng nge kan tih ang a?” ka tih chuan, “Va inbual ve mai rawh” a ti a, “Zinga inbual aiah ka tia mut dawnah ka inbual kha, ka lu suk bak a ngai tawh hleinem” ka tih chuan, “Ka thaw a pik, mi inah ka awm ţep tawh sia, ka rilru a hah. Ka awm thiam dawn bawk si lo” a ti niah niah a, “Ka pi Binladari te a dawn sawn dan avang khan i nu i dem tiraw?” pangngai deuha ka tih chuan a lo bu nghat a, “I zirlai tlem te chu i thiam der alawm. I nu awmdan ţha lo i tih ang khan awm ve lo la, thil dang pawh a zir chawp vek theih” ka ti a, ka kuta vuan tlat chungin a mu ve leh mai a, mo ţhianah ka ţang reng a, ka senior daih ang tih te a hlauhawm, mipa lamin ţan an lak a ngai.

Mi han chei vel na na na chu Lanfelin a hneh sawh bawk a Puipuii nen a min chei turin a rawn kal a, an ri luih luih a, pindanah lah an rawn in luh chhawk sek a, “Kan kawr hak tur mil hian min chei rawh” ka tih lahin Lanfelin, “Nang aiin a inrem dan ka hria, lo dawh hle hle rawh” a ti daih a, hnial ţang ţang mah ila min chei zawh meuh chuan ka inhai lek lek a ni.

“Awhaw wow…what a very wonderful chini, ka thlum tui hmel tawp, ka ni deuh pem mai” ka ti hlut a, kan kawr rawngin a zir bawk a hmuh kan va han nuam tak aw. Nutei meuh pawhin, “Thingtlang nula i ang tawh lo” min ti a, “Engtin pawn min ti la keimah tawp hi ka hlim” ka ti a, ka nui har har reng mai. Rilru nat ve deuh hlek laia inchei nalh hlarh te hi a lo ţha a nih dawn hi.

U Zira a rawn kal ta ngei a, kan la ţan lo bawk a min hmuh veleh min hui zauh a, pawna ka chhuah rualin, “Kha i kawrlum” tih pahin a ip khai lai min pe a, “I rawn hruai tawh nange?” ka tih chuan, “Vawiin chu Vani a awl ve a, an nufain an in awm thei” a ti mawl tawp a, sawi tur a ngah hmel viau nain engvakmah a sawi chhuak lo.

Sangkhuma leh Fawnvela te pawh tum burin an rawn thleng a, Sangkhuman, “Ka lu a na, ka tui a hal bawk si, khawimaw acid kha” a tih laiin Fawnvelan, “Remkalami vangin inchhungah pawh lukhum khum reng a ngai dawn” a ti thung a, an hmaah tim daiin ka ding a, min hauh hrep ka rin nen, “I va mawi ve” an ti a, an nui vur vur mai.

“Puipuii nu kha ka pi te a en hran viau chuan a chak lo ang aw” Sangkhuman a la ti chhar chhar a, “Ka hnaihah awm rawh u” tiin u Zirbawnga a lo inrawlh vat a, “Zu in ruih leh phei chuan mi nuihzat in nih hmain ka dang thei ang che u” tlang takin a ti nghal a, “Tlem chu kan keng a, mahse tlai lamah, tunah chuan a chi loh” Fawnvelan a ti sur sur a, a sana bun lai a en zauh hnuah u Zirbawngan, “Lut rawh, an ţan dawn” tih pahin na lo tein min nam a, ka kal zet tawh hnua ka hawi let leh chuan hmuiphun a, “I mawi” tih pahin nui chungin a kutzungpui a lo ti pir vah a, ka nui veleh mai bawk a, kan awm dan hi inkhual lem mai mai kan ang.

Man hlanna hun kan hman chhung zawngin mi lut leh chhuak uluk deuhin ka lo en zel a, Maski ka hmu ve lo. Puipuiin a sawm ve thu min hrilh a, kan ţhian zinga a tel tawh miau avangin nuam lo a tih loh nan leh kan enhrang bika a ngaih loh nan man pawh a ei tir ve thlap a, mahse hmuh tur a awm lo. Man ei tu dang an kim viau laiin Maski chu Sangkhuman a ai a awh a ni ringawt a, chanchin engmah a rawn sawi bawk si lo, Nutein hmeichhe rui a zui a tih aţang khan ka ngaih a ţha lo tlat tawh. Hetiang a u Zirbawnga leh Maski ten rilru an tih hah reng chuan ka tar chak viau ang.

Man hlanna hun kan hman zawh meuh chuan u Zirbawnga pawhin min hnaih leh hrut hrut tawh a, Puipuii chu miin thla an lak pui deuh reng a, a pasal tur leh a ţhianpa pawh an fel hmel khawp mai. A ţhianpa hi an sawi danin sumdawng lian an nih hmel a, a palianin a hmel pawh a chhe hran lo, ka duh chi a ni lo thung.

Mipa ţhenkhatin thla min lakpui an chak thu an sawi ve ngei a, Puipuiin phur taka min koin thla kan la ho a, kan zo chiah chu u Zirbawngan, “Tuna ka dinhmunah chuan tumah thik chi ka ni rih si lo a, thla i lakpuite kha ka thik chak” a ti a, “Mahse, pian nawn leh a engmah tihsual tawh loh ka chak zawk” a tih leh rual chuan rang deuhin a lam ka hawi a, “Engtin pawn awm la ka sawisel lo vang” a tih leh chuan, “Eng nge awmzia?” ka ti ha a, a dar lo kan uk pah hian a nui suk a, “Ka thiam loh a nia, thutlukna engpawh siam la ka pawm vek ang ka tihna. Nizanah ka ngaihtuah nasa a, ka hma ka sial tih ka inhrechhuak, i rilru a thianghlim a, i tui lo chunga ka chelh luih che chuan nuam ka ti chuang lo vang” a ti sup sup a, min kalpel tu ţhenkhatin min nek leh nawk zel nain engahmah ka ngai lo.

“Chei…kha kha a hmelţha u Khumte, ka luangral zawih zawih mai, ka ral tak tak hmain min lo rut” kan piah lawkah Nutein a ti lang lang a, “Vawiin chu fashion show kan en a ni ringawt. Inneih niah phei chuan hei ai hian an nalh dawn a nia aw, lungkham leh venthawn nei lo va han chhai vel ka va chak e aw..nupui ka lo nei thawt thawt a ni” Fawnvelan a ti lung lung bawk a, “Tuman an duh lo vang che bek sam ngah pa. I bek sam a sei ropui si, inti nalh viau mahla e..i lukhum kha i khabe hnuaiah i suih beh tlat duh hmel tho tho. Lukhum hrui nei khum i ang” Sangkhuman lo ti vein an nui an nui a, keichu ka rilru a buai, u Zirbawngan min ţhawng leh thut tawh.

“A chhe lo hawr hawr lutuk…huihui” Nutein a tih leh chuan u Zirbawnga pawhin, “Vawiin chu an hlim khawp mai” a lo ti ve a, “Nangpawh i hlim theih dan berin i awm dawn nia, ka chelh lui tlat tawh lo ang che” a ti ţha leh a, “I piangthar a ni maw?” ti a fiamthu a lak ka tum pawhin, “Piangthar a ni deuh ber mai ang chu, ka ngaihtuah dan ka thlak a, nangmah ka ngaihtuah tel tawh che tihna. I thiam loh a awm lo, keima thiam loh vek zawk, ka nun ka thlahdah ţhin a” a ti a, “Police ah ka report dawn che tih zawngin i vau let ngam lo em ni?” ka tih chuan, “A chhe ber thleng ta se ka thiam loh a ni leh dawn tho a, ka tang laklawh a nih hi. Keimahah i hun khawhral duh lo mai rawh” a ti ta nge nge a, “I ngaihtuah hle mai” zawi tea ka tih chuan, “Nupuia neih hial ka tum tawh tih i hriat kha. Ka la duh e ka tihna ni lo vin ka tel lo in hlim phawt se la, hlimna tur ka zawng ve chauh tawh ang. Ka bul ţan a nia, keimah ngeiin a tawp ka khar loh chuan buai ka cho tihna a ni mai. Tikhan i zalen tawhah in ngai rawh, ka tihsual tawh ka siamţhat leh hma chu engmah ka sawi lawk thei tawh rih lo” a ti a, ti tawp hian ka zalen chu a ni mai a, thawveng hawk tur ka nih nen ka thawven phah pawh ka hre lo. Ka bulah a awm reng tho a, a thusawi eng berin nge min khawih ka hre lo, a tawp chiang tawh tih ka hriat vang nge ka zalen tawh vang zawk tih ka hre thiam lo, ka hmuh phak chin zawng chu a phe ruai a, intih hlim nan Fawnvela bek sam ka en a, ka hmu phe vek tho.

“Puipuii a lo thinrim em? Engtikah nge kan ţhawn thut dawn? Ka kal lo angah a ngai em?” ti a Maski-a ţawng ri ka hriat rualin Sangkhuma te bulah mask vuahin a rawn ţhu ve nghal a, a sam vangin a hai theih chuang loh.

“Au lung lung lo la a hmu lo che a ni mai. I ti fel vek tawh mi? Pawisa i hlep ru lo maw?” Sangkhuman a tih chuan, “Teuh nang, 500 a bang a naute kawr ka lei” a lo ti a, “A ţha lutuk good good, i 50 tur ka ak aw, i mamawh vak loh leh ka hmang thei tho a, keichu mamawh hi ka ngah ve amaw Maski, Kiki” ti a Sangkhuma a nuih huk huk laiin Maski chuan kan dinna lam a rawn hawi a, min hmuh ruala a awm ve tih ka hriat theih nana a kut a vai chuan ka lo nuih a, ka mit ka khap zui fak fak a, ka hmuh fiah vek theih tawh hnuah pawh la nui reng mah ila Maski zawk chu a nui ve tawh lo.

“Chaw ei hmain thla lak ho leh a ngai” tih pahin Puipuiin min kai hrang ta daih a, tunlai chu ka hringnun a sen daih a, hlim ka tum tehreng nen ka men par reng maithei a ni. Mi tin deuhthawin an tawn ţhin ang hi ka tawng ve ţan dawn a nih hmel khawp mai.

CONT…

This Post Has 3 Comments

  1. StephenVom

    Избранные трендовые события часового мира – актуальные модели известных часовых брендов.
    Абсолютно все коллекции часов от недорогих до экстра люксовых.
    https://bitwatch.ru/

  2. StephenVom

    Абсолютно все свежие новости часового искусства – последние коллекции культовых часовых домов.
    Все модели часов от доступных до очень люксовых.
    https://bitwatch.ru/

  3. Robertnon

    Абсолютно все актуальные события мира часов – новые новинки легендарных часовых марок.
    Все коллекции хронографов от доступных до экстра роскошных.
    https://watchco.ru/

Leave a Reply