You are currently viewing KEIMAH, THINGTLANG NULA S2-20

KEIMAH, THINGTLANG NULA S2-20

Spread the love

KEIMAH, THINGTLANG NULA S2-20

Angel Pops

“Engati nge u Zirbawnga nen khan thutak deuha in phun sep sep reng a, Sangkhuma te ho lah an nui vak vak sia, tunlai chu i dik lo reng reng” min ngaihtuah hmel taka min thlek vang vang chung hian Puipuiin a ti sap sap a, thlalak a ngai ti ve si kha thla pawh kan la chuang lo.

“Nang hi, in inţhen hi i la na ve deuh em ni a?” min nghawk sawk paha a tih leh chuan, “Teuh lo mai, kan innei law law a nih loh te chuan inţhen inring sa rana bialpa neih tur. Stock ţeuh tur ka tih kha” ka tih mek laiin rawmawl in ka hmai a rawn dep hlek hlek a, “A lum si, thla kan la deuh reng dawn a i hmai hi mawm chi a ni lo” a ti ta daih a, min en leh vang vang hnuah, “Eng emaw dik lo a awm chiang mai” a ti ţha leh nain ka ngaihsak duh tawh lo. Ka sawi chak loh deuh min zawh hian ka ning tlat zel a, fiamthuin ka chhang kual vel mai mai ţhin.

Chaw kan ei pawhin u Zirbawnga te nen kan la awm ho tho a, ka ţhiante an awm ve avangin kan inkar thil chu kan sawi tawh lo. Zu rim an nam vek tawh lehnghal a, Nutei lahin, “Remkalam, kha sa ti ka pe ang che” tih pahin changkha a lek vu a, “Sa ti a nih loh kha, changkha a nih kha, a in an loh tehreng nen” ka tih pawhin, “Sa ti a nih hi” a ti deuh tlat a, “Ei mai mai rawh, changkha ka ei peih reng reng lo” ka tih lahin, “Min hmusit” a ti bawk si, u Zirbawngan a thleng va dawh hnaiin, “Nute, khawi keimah min pe mai rawh” a ti hlauh a, “U Zirbawnga hi tuman in tluk lo, a sek dan te hi a tawk chiah. Kan khuaa mi chu a sek lutuk a a ţhu thei reng reng hleinem, a lenna apiangah a mu zel, a kekawr aiin a vun a tight zawk” a ti nawi niaih a, za em em hian a nui zui a, “Enteh u, ka ţhian tak taka ka ngaih vang cheu in in bulah zu ka in a, in sawi darh thiang lo ang aw” tih pahin min kawk kual a, “Hmeichhia nih chuan zu in loh a ţha” u Ziran a lo tih chuan, “Hmeichhia pawh ni ila ka kawchhungah alawm a luh ve tho, mipa leh hmeichhe kawchhung a in ang vek, hmeichhe kawchhungah hian pangpar a inphun thluah bik hleinem” zawi nguai hian a ti a, “Zu ruih chu a nuam nain lu a na duh e. Ka lu hian zinga nat a peih lo lawk” Sangkhuman a ti bawk a, chaw lah chu rin aiin an ei thei phian lehnghal a, “Awn suh…awn suh” tih pahin Nutei chu sir lamah a awn riai riai a, “I in tlem tehreng nen i dose a va han hniam em em” tih pahin Fawnvelan a pawt nawk a, rei pawh a ţhu ngil hman lo, “Awn suh…awn suh” tih pahin sir lamah bawk a awn leh riai riai a, “A ţhu awn nghal zel a, a lai takah ţhuttir mai rawh u” Maski-an a lo tih ve chuan Sangkhuma leh Fawnvela ten an lai tat a, “Awn suh tih mawlh mawlh pawha han awn zel kher” fiah lo zetin Nutei chuan a ti leh a, “In puar veleh ka pindanah kalpui daih rawh u aw, miin mak an ti mai ang” Puipuiin a ti sar sar a, a pasal tur leh a ţhianpa ten engahmah an ngai lo hlauh a, an nuih an nuih thung.

“Sangkhum, in chaw ei khamah Puipuii pindanah i pu tiang han la lawk rawh u aw” rawn tih pahin ka pi Binladarin a hnar a len a, Sangkhuma te phei chu ri hrawih hrawih khawpin a hnim a, “Zu in in pek a ni maw?” a tih chuan Sangkhuman, “A va mak e…’ngah nge maw zu in lo ziah le” a lo ti vat na a ka pi tê chuan, “Nangpawh i nam huam kha” a lo ti a, “I nam ve tho alawm. Chawhmeh hi a hin loh nan zu rim an ti nam a, zu rim nam miah lo angin awm bik suh aw” Sangkhuma bawkin a lo ti leh a, “Daw per pur lo mai teh. Zu hi nupuiah nei la a ţha ang, thih chilh ngam tak tak mang si lo hian ka rui e i tia, diar duar che hian, tikhan i cher tial tial ang a, i thi lawk luau mai tur a sin” ka pi Binladarin a tih chuan, “Keimah chiah min hau a, midang te kha hau ve la, zu rim an nam ve tho kha. I thil tih tur i ziah chhuah pawhin Sangkhuma ka hau ang tih i ziak tel char char ang ka ring” pakhatin a lo ti nuah nuah a, “Eikham la i pu tiang chu han la vat mai rawh. Masiki, amaha a ngaihtuahawm tak leh han kalpui mai rawh aw” tih leh ka pu ţhutna lama phei a rual a, “I lo kal lo emaw ka ti char char a, ka thin a rim hman zia aw” Puipuiin a lo ti ve bawk a, “Ro kan rel ţha a, kan pawisa thawh khawmin i thil tur ka va lei a, ţhawn thut che kan tum nen duh aiin ka lo thleng hma a” Maski pawhin a lo ti ve a, “In lo kal chuan a tawk, in lakah engmah ka phut ve kher hleinem” Puipuiin ti ve bawk mah se an lei vek tawh a, a mimal anga ţha vak lo pek aiah tiin pawisa an thawh khawm a, rem an hre khawp alawm.

“Chaw ei ang pawn ka awm lo, chawhmeh a tam lutuk a chaw ka feel thei lo” Nutein a ti leh tawh a, Fawnvela leh Sangkhuma te nen an pathumin an nui kur kur reng a, ka pi Binladari pheina lam kha ka en dek dek a, kan ţhutna lam a lo la hawi ve ran mai. Ka nu hnenah min hek ngei ngei ang.

Sangkhuma pawhin ka pu tiang chu a lak sak ngei a, midang an haw rem hnuah pawh Puipuii leh keiman kan phut tlat avangin kan ţhiante chu an la awm ve rih a, choka ah kan ţhu khawm ţhap a, u Zirbawnga pawh a la haw bik lo. Ka pi Binladari te nupa chu inpui lam zawkah Puipuii nu unaute kiangah ngawi rengin an ţhu ve a, ka en ru zauh zauh a, ka veng ru ran a ni zawk mah.

Puipuii nu lo pheiin, “I unaute hoin thil dang an buaipui si a, thingpui han lum leh rawh u, i pi te pawh saw an duh chuan mu tawh rawh se, tih theih engmah an nei ve chuang lo. Inchhung cheina ţhenkhat hi lak thlak nghal a pawi lo a nia a hnawk mai mai” a ti zung zung a, “An hawna tur kha ka pa’n a ti fel sa thlap em? Ka pi sawn vawk leh ar kalsan rei a duh dawn miah lo a nia” Puipuiin a lo tih chuan, “Ka hre ve nang, mahni tawka buai tak tak vek kan nih hi. An khaw sumo kal dan chu i pa aiin an hre zawk daih ang chu. An lo chuan chhohna te kha an be lawk lo em ni? Thingpui chu lum rawh u, i pite saw mut tir bawk la” a lo ti zat zat mai.

“Thingpui in ve phawt rawh se. Chaw kan ei hma a, an ril a ţam ang” Puipuiin a tih chuan, “Thingpui in reng chu zun a tam duh an tih kha. Ka nu, thingpui in duh ve em ni? Vawihnih thum vel lai kan in tawh a, inchhung ti fai tu ho tan bik kan lum leh dawn a, in duh ve em?” a ti lang lang a, hlauh ang ngeiin Sangkhuma zu ruiin, “Midang pawh kha an duh leh duh loh zawt tho la” a lo ti pek a, Puipuii nu lah chu kan lam a rawn hawi vut a, engmah sawi lo va a kal daih chu lawmawm tak a ni.

“Zira, i haw daih tawh ang chu tih nak laiin, i va fel ve, i lo kal pawh kan ring hleinem” Puipuii pain a rawn ti ve thung a, “Puipuii meuhin pasal a nei dawn a, kan lo kal lo ngam nang. Nu ber khan min hre tawh lo a ni maw?” u Zirbawnga chuan a ti deuh kher a, Puipuii nu hi chuan ka pi leh pu te, Kalvari te hi a ngaihven ve teh chiam lo va, u Rinchuta erawh phone in vawihnih vel a biak tawh thu Kalvari in min hrilh ţhin. An pa kaltlangin phone number a nei thlap a, a duh naah chuan a zak lem lo.

“A hre lo che em ni? Kalvari leh Rinhlua te inneih na velah khan a inrawlh tam ve vak lo a, inhmelhriat ţha leh rawh u, ka va ko ang e” a ti a, u Zirbawngan, “A ngai hran lo” a ti na a nu ber ko turin a kal tho a, an hausak zia a hriat chuan a pak leh huam mai ang. Puipuii nu hi chu a mawi a Amen pe mai mai chi ang chauh kha a ni.

“Hei Rinhlua u a nih hi, i lo hre lo em ni?” Puipuii pain a rawn ti ţha leh a, nu ber hmel danglam zawk chu hmuh hmaih theih a ni lo. “Man ei tur hming kan sawi pawhin ka hrilh reng che a” Puipuii pa bawkin a tih leh chuan, “Ngaihtuah a tam lutuk a ka hre vek seng lo alawm” a tih veleh Puipuiin, “Thil ţha deuh min leisak lehnghal” a lo ti zauh a, “I va fel ve a, Kolasib a ka ţhiannu pawhin in chhungkua chu a hre ţha lutuk che u a sin. Sawi tawh ang khan ngaihtuah a tam lutuk a, ka lo chhinchhiah ve thlip thlep tawh si lo va, min lo ngaidam teh” a ti nem duai a, “Khawimaw in chibai ţha teh ang” tih pahin a nui har har a, ka sawi reng kha, a duh naah chuan zah a hre lo.

“Kan sawi ngun tehreng nen ka nu hi chu hriatthiam a ngai teh mai a nia” Puipuiin a lo tih te chuan uar deuhin a la nui a, “Ka pi te haw na tur chu engtin nge?” u Zirbawngan a ti hlauh chu ka lawm tak tak a ni. “I biak sak a ni lo’m ni? Ngaihtuah duh suh, hei, fapa an nei alawm” tiin an pa leh u Zirbawnga a en tawn deuh chhen a, “Ka la be mumal lo, inneih te han zo se ka be chiang chauh ang ka lo tia” Puipuii pain a tih chuan, “Hetiang hunah hi chuan thil zawng zawng vawikhatah a ngaihtuah vek sen loh a, kan chhung hnai tak te pawh kan hmaih fo a nia. In buai viau chuan ka rual pawn an haw thei aw, min hrilh mai dawn a nia” u Zirbawngan a lo ti a, Puipuii nu chu a hrilh deuh bik niin a lang. Ani pawh hian ka pi te hi a ngaina a, hrehawm deuha an awm a phal hauh lo ang.

“A tih zia hle mai, kan inhrilh ţha dawn a nia, mikhual kan ngah angreng si a, ka va phei ve lawk ang e. Leng reng rawh aw” tiin Puipuii nu leh pa chu inpui lamah an phei a, “Ka pi te chu i rual pawn haw se Kolasib a an tawp tho a ngai dawn a sin. Ka pa khan an haw na tur biaksak mai rawh se” inthlahrun hmel taka Puipuiin a tih chuan, “Tihdan a awm mai ang” a lo ti a, u Zirbawngan a ngaihven phawt chuan ka pi te hi ka ngaihtuah hauh lo, hetiang kawngah chuan u Rinchuta ai pawhin ka ring daih zawk.

Puipuii nen thingpui kan lum a, Nutei chu a bawk ngâwih tawh a, thingpui a inchak hmel loh khawp mai. Dawhkana no kan dah rualin Sangkhuman, “I nu thingpui turah khan chi al ţeuh rawh, a sual emai setana bialnu hlui ni awm tak a ni” a ti a, a rukin ka kheuh zeuh a, Puipuii hriata sawichhiat bawng bawng chu a ţha chuang lo, nu te chu kan hmangaih vek a, a rilru a na ve ang.

“In drawer lei chu a lian em? Min la hmuh tir phal mang si lo va” Puipuiin a ti ta daih a, a nu mawng len zia kan hre vek a, Sangkhuma lahin, “Lian lo…i nu mawng tiat lek” a lo ti kher a, a va han sual thiam ve tak. Ani pawh hi a kum a upa ang a, u Lalhuma leh pu Taipuia te angah a chhuak daih mai ang.

“Nu Nempachangi chu awm se i will hate ok a ti leh tawh ang u” tiin Fawnvela a nui kur kur a, “Ka pi Binladari pawhin kasauti hi casualty a ti zel a, a lar tak tak lai phei chuan a chhuah a hun veleh ‘lo kal khawm rawh u hei casualty’ a ti vak vak zel a, a au rin bakah ka pu a hrisel lo si, a damlo vak emaw tiin patling pui pui pawh an inah an tlan lut a, ani lahin uluk deuhin tv a lo en a’ ka nu’n a ti” Sangkhuman a tih chuan u Zirbawnga pawh a nui ve suk suk a, ka bula a thusawi kha mak ka la ti reng, a bialnu hlui vangin kan inţhen a ni ta ber a, a vau hnuah pawh thinrim lo vin a dawhthei zawkah a la ţang a, a hmangaih tak tak a nih ka ring. Bialnu hlui te vang mai mai a min ţhen hi diktak chuan ka tha a na ve a, runluih sak sak a nia ka chak ni.

Fawnvelan a lukhum a phelh ruala, “I lu kha naupanlaia ka marble hman thiam kha a ang lutuk” ka tih leh chuan an nui dar dar a, a lu a kawl si, a ţial ruai bawk si, a ang tak tak lutuk a ka sawi reng lo thei lo. Dawhkan a bawk ngawih Nutei lah chuan ţhut ţhat pahin a sam a hui thuak a, sam lem a nih avangin a tlak hlauin ka lo veng a, a lo ngaithei lo nasa, “Tawlh teh, hmeichhia ve tho ka nih hi, min hnaih hrut hrut suh” a ti kher a, a beng bula, “I sam lem hi a tla hma sia” ka tih pawhin hria angin a awm lo.

“Fawnvel, tho teh, Maski-a bulah khan ka ţhu dawn” tih leh thawh a rual a, a inthen a inthen lehnghal a, Fawnvela pawh tho vatin a ţhutna a kian a, Maski-a bula a ţhu chiah chu, “Vanram kai ang ka ni” a ti hluai a, kan inmelh ralh ralh hlawm a, an hmelah chuan an nuih a za ru vek tih a lang reng mai.

Puipuii nen a thingpui kan sem zawh meuh chuan Nutein Maski chu hnai deuhah a lo bih tawh a, “Mizo mipaah i hmelţha ka ti ber” a tih chuan, “Aw haw wow, fair&lovely a ngeih a nih kha” ka lo ti fiamthu a, “Ngeih mai mai rawh se, Maski chu a arngeng te pawh hian zûn an nei, hetiang em em hian arngeng hi mawi ka la ti ngai lo” tih pahin Maski-a khabe a arngeng chu a tawk zauh a, Maski-a lai chuan tumah min en ngam tawh lo.

“He nu hi a ruih loh hunah a zak viau ang” Sangkhuma meuh pawhin a ti ve hial a, u Zirbawnga lahin min en leh reng zel a, ka che pawh ka khawr phah vek, ka zam ve deuh chuan thingpui mai mai pawh ka in sual lek lek a ni.

“Thingpui inzawhah haw ang u aw. Ka thlah kawi dawn che u a nia, naktuk inneih a ni tawh a, Remsiali leh Puipuii te hi mu hma ve rawh se, an chau lutuk ang” u Zirbawngan a tih chuan Nutein, “Ka la haw peih lo” a ti pawr hlar a, “I riak ve dawn lo mi? Thawmhnaw pawh i ken thlap kha” ka lo tih chuan, “Riak dawn e…mahse ka haw peih lo” a la ti tho a, “In ninawm e” tih nang nang paha a sam lem a pawt thla chiah chu rang fahranin Maski a tho a, a ţhutna lah a tlu rawk rawk a, a tlanchhe vak lo chauh a ni. Keimah ang thoin Nutei sam lem a hlau ve a nih hmel. Min hrilh lawk lo va a pawtthla thut ţhin hi chu vawikhat hmuh naah phei chuan rapawm deuh a sin.

“Eng nge i hlauh a? Hmeichhe sam leh i hlau a ni maw?” nui ţhaw chunga Sangkhuman a tih chuan, “Sam lem tih ka hre lo” Maski-an a tih chuan, “Rawn ţhu mai mai rawh, a sam a inthuah tihna a ni mawi alawm. Hlauh tur a awm lo” Fawnvelan a tih pawhin, “Zanrei a lu chauh thlawk chhuak ţhin ang kha emaw ka ti tawh a” ti chung hian ţhutthleng a tung ţha a, tim daia Nutei bula ţhut leh pahin, “Fimkhur rawh, kut ka thlak lo chauh che a nih kha” a ti a, dawhkana sam lem puk luih mai chu la kangin, “Thlasik a khumah a ţhat hi” a ti leh a, amahin a phun bul bul reng mai.

Thingpui inzawh hnua Maski-an, “Ka haw nghal mai dawn sin, ka ţhiannun min lo lam dawn a” min en chunga a tih chuan Nutein, “I ţhiannu kha pi buh deng a ang si” a lo ti vin hlar a, chhang let lem lo va Maski-a ding chu a kuta lo vawn sakin, “Min haw san dawn maw?” a ti vel a, ka lo zak zawk. “A tlai tawh emai naktukah ka lo kal leh ang” ţha deuh a a tih pawhin, “A ngai lo, riak ve mai rawh” a ti deuh tlat a, nui ruh ruh chung hian Maski chuan a kut a la let a, Nutei hnunga beng thak thak chung hian, “Tui deuhin lo mu rawh, naktukah ka lo kal leh ang” vin hauh lo vin a ti a, “Ka kal aw” a tih leh hnuah a kal zui nghal a, tuman kan thlah lem hlei lo va, Maski a awm lo chiah chu Nutei pawh a tum bur mai.

Mut tum a ka pi Binladari te lo phei chuan, “Zira, i ruala kan haw ve kher a ngai lo a nia aw, kan ti buai lutuk ang che. Kan lo chhohna sumo driver kha ka be mai ang” an rawn ti a, “Inthlahrung suh u, ka nu te nen a inhmuhna remchang a ni mai alawm” u Zirbawngan a lo tih pawhin, “Vawk leh ar kan kalsan si a, haw vat kan ngai a, min ngaihtuah duh suh, sumo in min rawn lam thei reng a, ngaihtuahawm kan ni lo ang” a lo ti tlat a, midang a biak ţhat tehreng nen, “Lalremmawi, zu i in ve vaih chuan i nu ka vuak tir dawn che a nia” a ti vin hlar a, min hmuh hian a thinrim nghal ringawt zel a, u Zirbawnga nen kan inngaizawng tih pawh a hre reng, min ti zak ziah tho.

“Thingpui bak ka in lo” ka tih chuan, “Thingpuiah khan dawidim i telh em?” a ti ngei a, pindan lamah a la inher hmak zui a, ka rualpui chu nise ka nasa khawp ang. U Zirbawnga lahin Nutei hnenah, “I sam lem hian lukhum a chhawm a nih hi” a lo ti ve chhen a, a phone a rik rualin sam lem zawk chu a dah hmak thung. Ip te aţanga phone a phawrh hnuah thlang lamah a chhuak a, tu tak chu bia ang maw ka tih rilruk laiin Puipuiin, “A lerh san che a ni maw?” a lo ti leh hmanhmawh a, “Lerh san phal chi ka nih loh hi. Lo lerh pawh nise engahmah ka ngai lo, invenna tur ka nei ţeuh” uar zet hian ka lo ti a, “Awihawm loh e, Maski bak invenna tur i nei lo, ani lah Nutein a ta neih hmiah tawh si a, i chan a chau sawt e….mahse nang hi chuan pawisa bak vei em em i nei ve lo a, u Zirbawnga lerh ber lai pawhin pawisa bak i ngaihtuah chuang lo vang” Fawnvelan a lo ti a, miin thawveng min ti vek ka tih reng kha, Kalvari takngial pawhin vei nei lo ah min ngai ţhin. Mahse, mihring kan nih ve si chuan vei nei lo tawpin a awm theih loh. Tupawh hian a ruka rilru ti buai tu kan nei vek a, kan lanchhuah tir lo mai mai zawk a nih hi.

An haw tur chu kawtlai thlengin kan zui chhuak a, Fawnvela leh Sangkhuma te pawh tlangnel deuhin u Zirbawnga motor chhungah an ţhu lut a, “Nutei ka va ngaihven lawk” tiin inti zei deuhin inchhungah Puipuii a tlan lut a, Fawnvela te pawhin min rawn ngaihven duh ţhak lo, a ţul chuan awmdan an thiam ve alawm, min hmu lo der hmak mai a ni.

“Min ti buai deuh dawn na a naktuk chu Bawihtei ka rawn hruai a ngai ang” tim daia min en chung hian a ti a, “Lo hruai rawh, kan buai nileng bik nang, kan awm chhawk ang che” ka tih chuan, “I danglam tawh” a lo ti daih a, “Eng nge ka danglamna? Kal mai mai teh, nichina i biak kha i be zankhua ţhak dawn nia” ka tih chuan a lo nui hawk a, “Vani a nih kha. Hmeichhe dang ka be hran lo, mahse tlaia ka thusawi kha chu ka ti tak tak. I sawi ang khan min vau bet tu zawk a nih avangin ka khing thei a, jail ah ka khung daih thei. Min vau tu kha amah a nih vang chauhin engmah ka ti lo. I hriatthiam ka ring, vawikhat ka ti na tawh a, a rilru dam hun ka nghah ve a ngai tawhin ka hria. Ka tih nat nawn leh chuan damchhungin ka inthiam thei tawh lo vang, min ngaidam dawn nia” a ti duah a, a thutak em em mai lehnghal.

“A hma zawnga ‘innei ang’ ti ţuah hum reng si i rilru a va inthlak hma ve, kha thlipui kha a rawn thawk thut tihna a ni maw? Duhtawkin sapţawng han thiam ila chu e…ka hau pilh phung tawh ang” ka tih chuan, “Thawk thut lo, ka inngaihtuah harh thut a nih hi. Ka la be reng si a, nangmah nen a kan inkar ka hrilhfiah hnuah chiah min vau thung a, ka hmeichhe hriatah a la zaidam ber ang. Ani angin min vau duh a nih chuan a na ve viau tihna a ni mai. Ka chet rum rum chuan thil a buai zo vek ang, insawifiah ka tum hian ka sawi buai sauh zawk zel a, i rem khawm thiam kha” a ti leh a, “Thiam e…in cheng dun ţhin a, inneih hial in tum nain i chhungten an phal lo va, an ram a a let leh hnuah pawh in la inbe zel a, tun hnaiah kan inkar i hrilh a, tun hma a in lo chet khaw loh dun tawhna hmangin a vau che a, chingfel thei tu ber police i hriattir chuan a tuar ngei ngei dawn tih hriain i hriattir duh lo va, keimah min ţhenin i bialnu hluiin hmalam a pan hun nghah i tum a, police i hriattir a, hremna i pek a, i tih nat zel chuan mawhphurhna hlen lo angah te, bul ţan tu ni si a a tawp thleng ngam lo angah te i in ngai a, i hmangaih hle mai” ka ti charh charh a, “Ka hmangaih ţhin zawk” a lo tih chuan, “Pha kual vel lo mai teh, ka ţawng rin vaih chuan Sangkhuma ten an hre pha dawn a nia, a tirah engmah sawi nachang i hre lo va, sawi vek la chu ka duh lo chiang viau ang che. Bakah vai hmeichhia hi nem deuh angin an lang a, an kawlh tehmai a nia aw, an rilru a lian a, an huaisen bawk, an vai chuan ka ti lo, tam tak chu ka sawi ang chiah hi an ni. Keimah tak hi chuan ka hlau lem lo va, ţawng thiam ve ngat ila chu dek pawh a rawn ti ngam tawh lo vang. Inţhen i duh rau rau chuan nangpawh naktuk bak rawn lawr sek suh ang che. I duh leh i hmangaih deuh nu te ramah khan kal la, masala chi tinreng ei tlut tlut la, tel hel inchulh hlup hlup reng rawh. Kan khuaa i lo kal pawhin min hel zel ang che. Thil dang vanga inţhen pawh tih tawh nak laia bialnu hlui te vang mai mai a inţhen chu ka tlawmla tlat, i mumal lo emai bialnu nei ve tlak pawh i ni lo, bialpa nei daih rawh” ka ti bawrh bawrh a, a motor piah lawkah ding mah ila ka ţawng ring lem lo va, Sangkhuma ten kan thusawi engmah an hre pha lo vang.

“Nupuia neih che ka tumin i hnial zel a” a ti dek dek a, “Ka hnial lo ang che tih a hlauhawm zia hi hre ta che” ka lo ti a, “Innei ang i tih khan lo nei che ila chu e…khanu vang bawk khan chhuanlam fahrah te te siamin min ţhen ang a, ka nuthlawi daih dawn tihna a sin. Ka nulat laia kan inţhen hi a fuh lutuk ringawt. Nangpawh senior inti hle si ‘hmalam pan phawt rawh se’ i ti leh vel a, nupui i neih meuh chuan ha lem i hmuam tut tawh ang. I rilru mumal lo lutuk hi ral do tura kal tir daih tlak i ni. Engtin pawn awm ila min sawisel reng reng suh, min rawn sawisel vaih chuan i chanchin hi chanchinbuah ka chhuah tir dawn a nia” ka ti leh khar khar a, ngawi renga min en tlawk tlawk hnuah, “I hrethiam chiah lo a nih kha” a ti ban charh a, “Hrethiam e…min vau suh i tih hnuah pawh a vau zel che a, police hrilh aiin min ţhen i thlang a, a nat i hlauh em em danah khan i la hmangaih tihna a nih kha. Innei ula, in fate pawh vai ţawng hlirin ţap rawh se” ka tih chuan a nui ta hawk a. Vai ka hmuhsit vang a ni hran lo, a bialnu hlui tihbuai theih a a la awm hi ka ngei a, chinfel theih reng chinfel aia tawrh a thlang hi ka haw bur bawk. Diktak chuan ka thik ve ngei alawm.

“I duhthaw thei tan tan sia, inngaizawng tawh lo mah ila hma lam a pan hma chu inbiak rih a pawi lo ka tia, i tan a nuam dawn lo. Hman ang khan hmangaih tawh lo mah ila khawngaihna ka la nei tho a” a tih chuan, “In inneih hunah i nu vawk lian ber in talh dawn nia” ti a inher mai ka tum chu ka darah a lo dawm vat a, “Eng nge?” vin hlar a ka tih chuan, “Lo kal teh” tih pahin motor hnung lamah min pawt phei a, êngin a chhun phakna chin, midang hmuh theih si lohna laiah min dinpuiin, “A hnena ka thil sawi kha ka inchhir aw, i sawi ang em em kha a ni lo na a a message ka hmuh chuan chhan loh harsa ka ti a, ka khawngaih zel tih bak sawi theih ka nei lo. I ngaih anga lerh ka ni lo, ani nen hian kum tam tak chhung kan inkawp a, nupuia neih ka tum ţhin bawk. Ka chhungten min pawmpui se chu ka nei ngei bawk ang. Ti khan a rilru tih nat luih reng a, biak loh hmak a harsat tur zia i hre mai em?” a ti a, min biak tlut tlut chhan te, nupuia min sawm reng chhan thlengin ka hrethiam tawh. Hmeichhe dang hmang ţangkai a hmalam pan a tum a, a thlah thei bik tak tak chuang si lo, keimah min hman ţangkai a tum mai mai a nih hi.

“Hre mai e…hmeichhe dang hmang ţangkai lo vin luhkhung hmak mai ta che. Phaiah kal leh la, cheng dun leh ula a ni mai alawm” ka tih chuan, “Ka hmang ţangkai lo che” a lo ti vat a, “Ka duh takzet che, chu chu i hriat ka ring. Ka hma ka sial lutuk ni a ka hriat vangin engkim ka hrilh che a, ka ti tawp vek bawk. Keimah chiah ka hlim ang a, i hlim lo bik ang tih te ka hlau a, chuvang zawk chu” a tih zawm leh a, “I chhe liau luau, hmeichhe dang be reng chungin Maski i thik vel a” ka tih lai takin min lo pawt chat a, “Mipa dang kianga i awm chu hmuh hrehawm ka ti tho ang. Mahse, i hlim chuan a tawk a ni mai. Keichuan thil ka lo ti sual tawh a, laklawh deuhin ka awm reng dawn a nih hi” a ti chuai raih a, ka ngei lutuk a ka khawngaih peih lo reng reng.

“I duh duhin awm teh. Kanchhi-in min dah nil ţhaks” tih paha kal ka tum chu min lo dawm bet leh a, “A va mak teh fo e aw…i zalen i tih vek tawh kha, ‘ngah nge min la man beh ţung reng a?” ka tih chuan, “Naktukah hun thawl a awm loh takin thil pek tur che ka nei a” zawite hian a ti a, “Eng nge?” ka tih lahin, “Motor ah ka dah, min lo nghak rawh” a ti a, motor lama a let thla chu ka lo nghak ve mai a, ka sawisel reng nain a ngaihawm ve vung vung dawn khawp mai.

A lo chhoh leh chuan bawm lian vak lo, nalh deuh si hi min hmuh tir a, “Eng nge a?” ka lo ti hu mai. Inţhen chiah e ti lo chuan zungbun min pe dawn a nih hi ka tia, ka lungphu a in fast forward nghal char char a, inţhen a sawi vel kha a uang mai mai emaw ka tih laiin bawm a hawng chu zungbun awzawng a lo awm lo. “Ţhi hi ka leisak che a, a locket hi a sial teh mai a nia aw” tih pahin a indap ruk ruk a, “Eng nge i la paipawn a?” ka tih chuan, “Phone ka ak emaw ka tia motor chhungah khan ka dah aniang, i phone kha han ti eng la ţhi locket hi rawn chhun teh” a tih chuan ka phone flashlight ka on a, “A sial a nia aw” tih leh pahin ţhi chu a la kang a, “A locket chu en ang aw” a tih phei chuan en chian kan tum dun lutuk chu kan lu a insi chât a, naupanlaia Kalvari nen kan inhauh apianga ka nu’n min inchal tauh tir ţhin lai kha ka hrechhuak zawk mai.

“En chiang la” a tih chuan a ţhi locket ken lai chu ka en chiang lehzual a, ‘Remsiali’ tih a chuang kalh mai. “Inthlah nan ka pe ang che. Naktukah chuan Bawihtei ka lo hruai dawn a, hun thawl a awm lo ang” tih pahin ţhi chu a la chhuak a, a bawm min ken tir thung a, “Thil pek hnuhnung ber a ni lo a nia” ti a ka hnunga a din chuan, “Hei bak hi a ngai tawh lo” ka lo ti a, “Ngai e…mamawh i neih chuan min hrilh zel tho dawn a nia. Nangmah nghawng tel thei thil a thlen vang hian min ngaidam rawh. Mahse, ngaihdam dil ve bawk che mah ila ngaihdam ka phut chuang lo” ti sup sup chung hian ţhi chu min awrh tir a, lawmthu sawi ngaihna ka hre lo chuan, “Aa…a ho lutuk, hrehawm ti duh suh” ka lo ti mawl tawp a, “I sawi kha a dik. Nunhlui chu nunhlui a nia ti ţhin mah ila a siamţhat theih miau loh a, min vaw let tu a ni ţhin. Nangmah thlengin i tuar ve a, ka thiam loh vek a nih hi” hnunglam aţanga min kuah paha a tih chuan amah hnem ve nan, “A ho lutuk ka tih kha, rin aiin ka tuar lo, engtinmah ka awm hleinem” ka lo ti a, “I tuar lo maw?” tiin min zawt let daih a, “Tuar lo, tun a ka awmdan ai chuan ka ke tin lut pawh a na zawk” nui lui hak hak chunga ka tih chuan, “Keimah ang hian hrehawm i tih ve ka ring a” a ti a, a awmdan hi ka hrethiam tawh lo reng reng. Hrehawm ka tih hlau ni awm takin a awm a, a hrehawm lo la tih veleh hrehawm ti turin min duh leh a, “Han hnem vak ngaihna che ka hre tawh lo, i khawlhkham emai, nunhlui chu nunhlui a nia, min vaw let tu a nih rualin kan nunhlui zawng zawng nen a min pawm tu an awm zel tho alawm” ka tih chuan, “Min pawm thei si lo a” ka dara a khabe nghah pahin a lo ti sup a, sup sup mai a. “I la be reng a, nunhlui a ni hleinem. Kawp leh i tum pawh a ni chuang si lo a, nun laklawhah alawm i tan tlat ni. Hun ţha ka pe ve reng che a, i dam ve ţek ţek chhung chu bialpa dang neih pawh ka tum lo. Nangmah a nih hi inhnukdawk zawk chu ni. Mi chu an bialnute lung an tih awi lohin an thlem a, nang ve chu lungawi loh lai takin min ţhen a, i mak phut phut ka ti” ka ti nang nang a, “I bialnu hlui be tur hrim hrim a vai ţawng ka zir nghal loh, i duh zawk i panah ka ngai a, rawn lawr reng reng suh ka tih kha aw” ka ti leh kha kha a, “Nih leh tuna ka buaina hi a la reh ngei ngei dawn a, a reh chian hunah engtin nge i tih ang?” a tih chuan, “Aw…a reh ka ti mai ang chu. Fa ka lo neih tawh phei chuan nau i rawn en ve ang a, i nu hi Kanchhi-in a luahlan te i tia nga” ngeiawm zet hian ka lo ti a, kan inţhen dan hi a lawmawm loh ve e…ka la hnem duh te hi ka fel zawk ka ti. A khawngaih chuan a la hmangaih reng tihna a ni mai, ni lo se police ah a kal pui hmak ang, pawisa ah an buai ve bawk si lo va, a bialnu hlui a nat a hlau lutuk a nih ber hi.

“Ţhi hi chu awrh reng rawh” tih pahin a inla hrang a, “Min hriat reng nan a ni mai” a tih zawm leh a, “A nalh viau nain ran ka ang” ka tih chuan, “Engati maw?” a lo ti a, “Ka hming ka awrh kher a, ui leh zawhtein an hming an awrh ziah hi” ka tih chuan, “I sawi takah chuan kan uite pawh a hming kan awrh tir” a lo ti ve zel a, “Chu, in uite ang lekah min ngai a ni maw?” fiamthu deuh hian ka ti a, a lu a thing rang nasa mai.

“Remsiali tih hi a sial em a, nangmah i sial bawk a, ui leh zawhte ngaihtuah lo vin hlut viau zawk rawh” a ti a, la inţhen lo ila chu ka phur viau maithei a, tunah chuan ka phur em em lo, kan mi ngaihhlut deuh te thlan a pangpar dah ang lekah ka ngai.

“Kal ang, i mu har lutuk palh ang” a tih takah chuan motor lamah bawk kan chhuk thla leh a, “Sangkhuma leh Fawnvela te an muhil tawh” tih paha a nuih te chuan ka nui ve peih lo. Inpe zo ve turh turh ţhin hle si kha thawklehkhatah a rilru a danglam thut a, chupawh Didi vang a la ni zui a, ka la hmuh miah loh leh ka hmuh miah loh tur vangin u Zirbawnga ka chan ringawt a nih hi. A rilru diktak ka hriat theih nan ka runluih ve dawn khawp mai. A luhlul tluan thei a nih chuan pasal ka neihsan daih ang.

Ka en liam zawh hnua inchhunga ka luh chuan Puipuiin, “I va han rei em em” a lo ti nghal a, “Aww…thla êng hnuaia mipa leh hmeichhia uluk deuh a kan din tawh chuan a tih zung zung theih loh tih hre ve ta che” ka ti chu a ner nang a, “Nutei ka muttir thei hram alawm. Fawnvela te khan a in hnem lo an ti tak nain kai ţha barh barh tak a ni, a meizial zuk lai a kutţanga a cheh beh reng pawh a zawng char char alawm. Ka u, rui thei deuh pawhin a nuih ve khanglang a nia aw, va inbual la mu ang” a ti zung zung a, inthlakna vel ka lak hnuah bualinah ka lut a, ka star tak tak lai kha chu nise hrehawm ka ti viau ang a, tunah chuan rin ai takin ka zia rih, chaw ei hma a i zalen tawh min tih laia hnuk ulh ţeuh ang te kha a awm tawh lo. Inneih puiah min sawm reng a, a hmanhmawh bawk si, kei ka la inpeih si lo, hetiang thil hi a thlen ka ring lawk sa deuh hrim hrim.

Ka inbual zawh meuh chuan Puipuii pawh a lo mu fel at tawh a, Nutei phei chu mu tui tawh tak a ni. Mut ve ka tum laiin ka pi Binladarin, “Remmawi” chher deuh hian a lo ti a, ka phu nasa lutuk chu ka zuang zawk thei hial a ni.

“Awii…min ti phu zawk alawm. Tukverhah ka zuang chhuak lo chauh a nih kha” lungawi lo deuh a ka tih chuan, “Tukverh kha hawng teh. I ţhiannu rimin min uap a, kan pûl lo chauh tawh a nih hi. A thaw kha a oxygen lo reng reng” a lo ti a, tukverh ka hawng chiah chu keipawhin nuam ka ti sawt mai. “Zira kha a haw ta em ni?” ka pi Binladarin a lo tih chuan, “Haw e…haw vang vang rawh se” uar zet hian ka ti a, “In inhau em ni a?” a lo ti leh a, “Muhil mai mai teh nangmah ang rual hriat ve chi a ni lo” ka tih chuan, “Dawhtheihna leh inrintawnna tel lo chuan inlaichinna a nghet thei lo a nia. Zira hi chhuah reng reng suh, pasal i nei har lutuk dawn” a lo ti a, ka chhang lem lo nain dik chu ka ti ve tho.

Mut hmunah phone ka khawih a, Puipuii leh Nutei an muhil tawh a, keichu ka mut a chhuak ve ţhak lo. Maski-a message a lo la awm zui a, ‘I ţha em?’ tih zawng a ni a, min thawnna pawh a rei tawh, keiman ka lo en har zawk anih hi.

‘Ka ţha’ ti a ka chhan let hnuah u Zira nena kan inbiakna vel ka en let a, a dp a lo bo daih tawh a, a nau fanu thlalak dah reng ţhin si kha ka hmu thei tawh lo reng reng. Min block a nih ringin a chhan ka zawt duh bik lo a, rinawm tum lai taka hetianga min ti hi ka lawm lo thar leh tawh, miin engang pawn min ngai se pawi ka ti lo, ka runluih dawn khawp.

‘Ka ţha lo leh si’ tiin Maski bawk message ka thawn leh a, amah bak min ngaizawng a, min be reng tu an awm rih si lo va, Nutei pawh ka hrilhfiah mai ang. Maski hnenah inngaizawng der ang tih ka duh. U Zirbawnga nen hian ngaihzawng dang nei ve ve ila, kan rilru put hmang diktak kan hre chhuak ve mai ang.

‘I awmdanah khan a hriat theih’ a rawn ti a, a la muhil bik lo a nih hmel. ‘In in hau em ni?’ a rawn tih leh chuan, ‘Hau ang chu mawle..ka single chiang ţhaks, khuanu’n mahni a then vel mai mai a inhmeh ber min ti’ ka ti a, nui lem min rawn thawn ţeuh hnuah, ‘Engtin nge i awm?’ a rawn ti a, ‘Kan inţhen chhan hi ngaihtuah chian vak loh chuan rilru a na a, ngaihtuah chian chuan thin a rim duh. Min rawn hnem duh kher suh, min hnem thinrim zual mai mai ang’ ka ti a, hetiang em em hian ngaihzawng hluiten thil an ti thei tih ka lo hre ngai lo reng reng. Kalvari in Nunoi a thik lai a ka lo ngaihven ţha lutuk lo te kha ka inchhir, hrehawm a lo ti ţhin ngawt ang. Kan thil tawn hi a danglam hlak nain ka hrethiam ruai tawh.

Zingah Nutein zan lama a awmdan min zawt nghal a, Puipuii nen a a awmdan kan han sawi chu, “Chei…ka zak e…mahse a zahthlak vak loh tiraw?” a ti a, Puipuii nen kan in en hau a, mahni aia zakthei lo tawn fuh chuan mak tih loh theih a ni lo, star te rim zak zak ngam mah ni ila Nutei awm ang khan awm ve ila chu ka zak viau ang, ani hi chuan engah vak a ngai lo a ang.

“I sam lem te i pawtthla a, engmah i hre lo maw?” ka ti ţha leh ngat a, “Hre riai ruai tho e, Maski chu biakna hun remchang a awm tak leh ka ruih vang a nih kha ka ti tawh mai ang, a har lo emai” a la ti tak deuh deuh a, a tih tihin ti vel mai mai teh se.

Lanfeli bawkin min rawn chei lehin ka duh dan takin min han hnawih kual leh vel a, ka beh ang tih ka hlau ber a, inmil vak lo mah ila kan hmai a beh loh avangin ka fak ve mawlh mawlh reng mai. Biakin hawng ngat a innei an ni bawk a ţhu hrang fal nalh mah ila mi an tam tih ka hnungzat zat dan aţangin ka hre thei a, inneih inkhawm pawh a rei vak lo. Puipuii meuh pawhin pasal a nei ta chu a nia, Kalvari in a nei tawh bawk a, an pahnihin rilruah an awm reng nain pasal neih ve ka chak phah hauh lo thung.

U Zirbawnga leh Maski te pawh ka hmu ve ve a, an chhe lo kûl raih mai a ni. An pahnih a han en vang vang hian thlan tur zawk ka hre lawk lo kha a mak hran lo, an ţhatna sawi zung zung tur kan hriat laiin an chhiatna lai sawi tur chuan ngaihtuah chawp fe a ngai ţhin.

Puipuii pawh a pasal ni ta te inah a lawi lut a, in lama hun kan hman zawh leh meuh chuan ka chau viau tawh. Zan ka mu tlem bawk nen, mutchhuakin min zem chiai chiai reng a, a hmingin ka meng ve ţawk ţawk a ni ber.

Chaw te kan ei leh hnuah Puipuii te pindan turah kan lut khawm a, kan ţhian ho mai bakah u Zira leh Maski te an awm ve a, midang chu a pasal ţhiante leh unaute an ni mai. Nutei pawh Maski bulah, amah si chetin a awm reng a, engahmah ka ngai hran lo. Maski hi u Zirbawnga runluih nan mai mai hman ka tum lo. Sangkhuma leh Fawnvela te pawh an rui leh chhur tawh a, lakna tur an hre zel te hi mak ka ti zawk. Chu aia mak zawk chu Sangkhuma hi a ni, hetiang em em hian zu a in nasa ngai lo. Tunlai bik hi zu a awm phawt chuan a in thei zel a, a danglam nasa khawp mai.

U Zirbawngan Bawihtei a pawm hlu hlu laiin mipa pakhat, sang deuh, sa ţha lam hi a rawn lut a, a suit rawng sen duk hak chu a inhmehin a fai veng a, tarmit a vuah bawk a, a fel hmel viau nain mipa tan bik cho sual a awl khawp ang. A ţhut rualin ka tho nalh a, a bulah ţhutna awl a awm tho a, u Zirbawnga runluih nan a hman ka tum a ni. Ţhian neih nan pawh a ţha hrim hrim.

Midang ngaihsak miah lo anga awm chungin a bulah ka ţhu tharh a, nui chung hian a lam ka hawi a, min lo biak ka rin tehreng nen min en vung vung ringawt a, u Rinchuta ang deuha biak hmasak zel ngai chi aniang ti rilruin, “Biaka chhungte em ni i nih?” ka ti a, “Aw..ni e” a lo ti mai a, a chhiat vak loh nen a aw a mawi lo ve angreng khawp mai.

“Tu nge i hming?” ka tih chuan, “Keimah maw?” a lo ti a, midang an awm ve mang si lo, “Aw..nangmah kha” ka tih veleh, “Huna, i hrethiam em? Sana kan en a hun ang hi, Huna” a lo ti duah a, a aw leh ţawng dan bak han sawiselna tur em em ka hre lo. U Zirbawnga pawhin min en reng ka ring a, bialnu hlui vang mai mai a min ţhen duh tu chuan runluih a phu hliah hliah.

“Eng nge i tih ţhin Huna?” amah awm hnaih sauh paha ka tih chuan, “School ka kal” a lo ti a, hna a la nei zui, u Zirbawngan min nuihzat thei lo ang ti rilru chunga, “Zirtirtu maw i nih?” phur zeta ka tih chuan, “Aih, pawl sawm ka zir” a lo ti a, a uang emaw tiin chiang deuhin ka en a, khap fuk fuk chung hian min lo en let ve a, “Fiamthu lo vin pawl sawm chauh maw i la nih a?” ka tih leh chuan, “Aw..pawl sawm” a ti a, kei aia a upat daih ka ring a sin le.

“I len tehreng nen i van la naupang awm ve” ka tih chuan, “Kum 25 ka ni” a ti a, kei aiin a naupang lo chiang lutuk. “I uang em?” ka ti nawn leh ngat a, “Uang lo, pawl sawm kum 25” fel fai deuh hian a lo ti leh êt a, nungchang ţhat hmel deuhin a malchungah a kut pahnih a dah a, a suit hak lah a mawi si, a hmelchhe bawk si lo, “Engtin nge kum 25 ah pawl 10 chauh i nih theih a?” beidawng ru taka ka tih chuan, “Ka fail zel” a tih hnuah, “Mahse maw” tih pahin ka lamah a rawn kun hnai a, “Aw, sawi rawh” ka lo ti a, ka fiamthu a tih ka rin nen, “Aizawl a school a awm chhung chu school ka kal dawn” a ti mauh mai a, “I fail chhoh zel chuan kum30 i tlin hnuah pawh pawl sawm i la zir dawn tihna mi?” ka tih chuan, “Aw, ka zir char char dawn” a ti a, a tum a ruh viau nain a chiang chiah lo chu a ni. U Zirbawnga runluih ka tum ve nen, an ţhut ţhapna lam ka hawi meuh chuan Puipuii hoin an lo nui ţha hlawm a, ka ţhiante ka lo en har mah mah a ni.

“I sa a ţha angreng bawk sia, engati nge i fail zel a? I lian si, i kum mila zir chhoh tur che alawm” ka tih chuan, “Pass peih teuh lo” tiin a nui vur vur a, ha hmai pawh a nei lo, a ruak huai mai, a ţawng zawngin a ha a lang lo ka ti reng a ni.

“Ka kal phawt mai ang aw” ka ti ta ringawt a, “Aw kal rawh” fel fai deuh hian a lo ti a, mi pangngai a pha zan lo tih a hriat reng a, a fel emai tu pawi mah a sawi ngai lo vang.

Ka ţhiante bula ka ţhu leh chiah chu Puipuiin, “Biaka te upa ber fapa a nih saw. A nu leh pate officer ve ve an nia, an hausa lutuk. Amah saw tlem a ţham phai deuh a nia, hausa lo se, enkawlna ţha dawng lo se chu saw tiang sawn a fai vur lo vang. A chhungten an duat rawn a, hmuh a nuam em em reng zel, a fel bawk. I lo kawm tlangnel a a nachang te pawh i hria, Biaka te in hi an in tih lohah chuan a awm tamna ber a nia” a lo ti zung zung a, u Zirbawnga runluih nan a hman ka tum tih an hre lo hlauh a a tih zia, hria se chu an kumkhaw sawi a tling leh dawn a, ka duh lo reng reng.

“Rin aiin nachang i hria, i lo fel ber a nih hi” u Zirbawngan a tih laiin Maski-an, “A felfai hmel fu sia, engtin nge mi ang vak lo a ni tih i hriat chat theih a?” a lo ti thung a, “Remkalami hi chu tupawh a kawm thei a, keimah nen pawh kan inkawmngeih nghal” min chhuan hmel deuhin Nutein a lo ti ve bawk a, Huna lah chu min rawn enin a nui vur vur reng a, a ngainatawm reuh khawp mai. U Zirbawnga lah hi rilru na angin a awm duh bik miah lo va, kan inţhenna hian kan taksa leh rilru a englai ber nge a den pawh ka hre lo e a. Mi an ţah zawih zawih zel laiin keini chu kan hawi kan hawi ringawt mai a ni.

Pawn a mahni chauha ding a thlanglam ka thlir vang vang laiin ka hnungah tu emaw hian a rawn tawk zauh a, ka hawi let nghal vut a, Maski a lo nui vur vur mai. “I khua a har a ni maw?” ti a min fiam pahin ka bulah a rawn ding ve nghal a, “Khawhar ngaihna pawh ka hre lo, Biaka ţhiante ho zu rui saw min kuah thuak thuak reng a, khawlum nen a inrem lo emai” ka lo ti a, u Zirbawnga te an haw hma a, Bawihtei mutthilh hma a dah phawt a kan ţhian ho min thlah tur a lo kal leh a tum a ni.

“Engtikah nge i zir zawh ang?” a ti ta daih a, a nui tawh lo va, ral lehlam chu thlirin a inngaihtuah bing hmel viau a, “Ka hre lo, ngati nge?” ka tih chuan en pawh min en lo hian, “I zir zawh hunah thil ka hrilh ang che ka tih kha” a ti a, “Nang lah hi thil thil ti reng mai, tunah min hrilh law law rawh, ka hre chak vek zel alawm” ti mah ila, “Ţha deuhin zir phawt rawh” a la ti tlat a, “Min hrilh ropui i tum hmel e, ka zir zawh lawm nan in hmun min pe dawn mi?” ka ti chu a lo nui hawk a, “In hmun aiin a ţha zawk” a la ti zui a, hma lam en tlat chunga a nui reng chu, “A mak vur vur e, i thil min hrilh tur hian nangmah a ti hlim zawk che a nih kha” tih paha a dar a ka nawk salh rual chuan min lo kuah a, “I zir zawh hunah i hre mai ang. Chuan i aieng man pawh ka dil diam tawh, mahse haw dawnah chauh ka pe ang che” a tih chuan, “Awii…thankyou khiu” ka lo ti duai a, “Agarbati nen ramah te kan riak ang a” a ti leh a, kan nuih dun hak hak laia u Zirbawnga ngei maiin, “Remsial” a rawn tih chuan mak tih hmel deuh anga awmin ka hawi let a, Maski nen kan lo la inkuah reng bawk a, kan awmdan chuan a ti lawm lo tih hre mah ila pawi ka ti chhete eih lo, “I lo va let leh hma ve” ka lo ti vel a, “Khatiangin hmeichhia an nui hawr hawr ngai lo” khauh zeta a tih chuan Maski-a zawk a lo nui hawk a, mipa dang thik zel si hi a bialnu hlui tih nat belh a hlauh vang mai maiin min ţhen tho bawk sia, helai tak hi alawm ka hriatthiam loh chu ni.

CONT…

Angel Pops
Author: Angel Pops

This Post Has One Comment

Leave a Reply