You are currently viewing KEIMAH, THINGTLANG NULA S2-21

KEIMAH, THINGTLANG NULA S2-21

Spread the love

KEIMAH, THINGTLANG NULA S2-21

“A tlai tawh haw ang u, kan inpeih tawh. Lo insiam peih diam tur che alawm” a ti hmuk hmuk a, Maski nen lah insi chêtin kan la ding a, min kuah tawh em lo mah se min kuah lai ang chiah khan kan la indin hnaih tho. U Zirbawnga lah hmanhmawh inti hle siin kan hmazawnah a la ding ve char char a, a kekawr ipte a zen ţut a, min melh ngar mai.

“Khawiah nge midang?” ka tih chuan, “Kawtlaiah an awm vek tawh” a ti leh hmuk a, “Kal ve ang” Maski hnena ka tih te chuan, “In ke in inţawm em ni? Nangmahin i kal thei lo mi?” a ti deuh kher a, Maski lahin, “Hruai tu tur ka nei a, ka kal hmasa ang” a ti leh tawh a, chhan pawh ka chhan let hmain a kal nghal daih lehnghal a, u Zirbawnga nen a kan awm chiah chu, “I tih dan hi ka duh lo reng reng” ka ti a, “Rawn lut rawh” tih hmuk pahin a inher a, Puipuii te pindan lamah a phei nghal a, a awmdan hian lu a ti hai chhalh thei alawm le.

Pindan a ka luh ve rualin ka ipte min lo pe a, Huna lahin, “Ka u, i haw dawn mi?” a lo ti lauh a, “I u Biaka nen kan innei tawh sia, i u hi chu a haw a ngai tawh” tiin Puipuii a nui har har a, u Zirbawnga runluih nan a hman ka tum ve ngei kha a nia, min u daih mai bawk si a, mi bula sawi chi pawh a ni lo, a zahthlak.

“Naktukah thlalak tur a nih kha aw, hmun nuam leh mawi tawk kan hual a nia” phur zeta Puipuiin a tih chuan ka peih tawh lo tih mai te ka chak a, tunah tak chuan ka rilru a hah ve a, ka rilru leh huau huau a inrem rih lo.

“A mawi zual lai berah Maskira nen thla in la dawn nia, mut paha en turin ceiling ah lian puiin i tar ang a” u Zirbawngan a lo tih chuan Puipuiin min kheuh zauh a, pindan aţanga a chhuah veleh, “In in duh tawn lutuk a awmdan in thiam lo a nih hi. Nakinah in la hrethiam ve mai ang. Biaka nen hian nangmahni ang chiah kan ni ţhin, kan hriatthiam rualin kan innei hmak a nih hi. In nih leh veleh in inţhen tawh lo nan nei hmak rawh” a ti sar sar a, “Bialpa ka nei peih tawh lo, rilru a hah duh emai ka sim chiang ţhaks” tih pahin pheikhawk ka bun a, “Neih loh tawp tur tihna a ni hleinem, pasal te i la nei duh dawn a sin” a tih pawhin, “Nei lo mah ila ka duh hunah chuan pasal tur ka hmu dawn tho. U Zirbawnga ai ţha ka nei lo ang tih tu nge sawi thei?” ka ti a, kan nui dun hak hak a, kan duh ve deuh ber te nen a kan inţhen te hian han nui lui vak vak ila, kan nui tak tak daih zel. Indawmkun tlawk tlawk reng chu a hahthlak, zâng a kul duh dawn bawk si, a hmuh lai phei chuan engahmah ngai lo angin ka awm ve tlat dawn.

Pindan aţanga Puipuii nen kan inzui chhuah chuan kawngka bula a lo ding reng chu ka hmu nghal chat a, “Ehe…kan ţawng i lo ngaithla em?” ka ti hlut a, a ngaihdan a nih loh hmel nasa mai. “Mipa dang bula i nui hawr hawr ri kha ka bengah a la cham” a lo tih chuan, “Keipawh hmana Kanchhi ka lo hmuh tawh kha ka mitthlaah a lang nawn leh” ka ti a, kan in ang chiah nain amah chiah hi a dem theih thung, hun ţha ka pe rei a, keichu dem ve nachhan tur ka awm lo.

“Eng nge kanchhi chu” Puipuiin a lo tih chuan, “Vai a nia, u Zirbawnga te in kawtah mix leh pani puri a zuar” ka lo ti a, a awih ve tho aniang, “A nih chu” a ti ban charh a, pawnah kan chhuak a, kan ţhiante chu motor chhungah an lo ţhu ţhap tawh.

Puipuii te nen kan inthlah hnuah inchhungah min luh san a, “Maskira nen a in inkarah hian eng chiah nge awm a?” thutak deuha a tih chuan, “Tlangval senior hriat ve chi a ni lo” ka lo ti a, a thin a rim hmel nasa mai. “Ka uan loh hi” a ti hmuk a, “Tlangval senior an uang reng peih ngai hleinem, an kum leh fiamthu a inrem tawh ngai lo, kohhran upa ho nen an thusawi duh zawng a in ang tawh zawk ţhin” ka ti zat zat a, ka bula a la awm reng tho vang aniang kan inţhen hi rin aiin ka tuar lo. Hrehawm ti ve tho mah ila thawk ipik khawpa hrehawm ang kha a ni lo.

“Ka zawhna i la chhang lo” min en ran chunga a tih chuan, “Kan inkarah thil ţha deuh a awm, sawi mai mai chi pawh a ni lo, Kanchhi nen a in inkara awm ang chiah kha a ni mai” ka tih laiin motor chhung aţangin Nutein, “Lo lut vat vat teh u khumah ka mu chak tawh. Phone ah sawi zawm mai rawh u” a rawn ti hlak hlak a, “Sangkhuma phei chu a hnar leh ţep tawh ang” a tih leh takah chuan u Zirbawngan, “Lut rawh, kan sawi ţha dawn nia” a lo ti ve nghal a, “Engmah sawi ţhat a ngai lo, i duh zawk kanchhi kha ngaihven la a tawk chiah” ka ti hmak a, mizoramah vai an tam si, kanchhi vang kherin kan inţhen bawk si a, vai ka hmuh apiangin ka rilru a na dawn a nih hi.

“U Zirbawng, chak deuhin tlan rawh aw, ka mut a chhuak tawh teh mai a nia” motor chhunga u Zirbawnga a lo luh ve rualin Nutein a lo ti nghal a, “Puipuii pasal nei chu nuam in ti hle mai” ti a u Zirbawngan a fiam chuan Fawnvelan, “Nuam tak a ni, ka nupui neihni ai pawn a nuam zawk. Mahse keichu a pasal hi rin loh dan deuhin ka hmu” a lo ti a, Sangkhuman, “Engtia hmuh nge i tum?” a tih chuan, “Puipuii a hmelţha si a, hmelţha deuh, fai veng chi a nih ka ring a, pa ţha duam ang hi a nih ka ring bawk a” a lo ti a, “A fel em kha” ka lo tih ve chuan, “A thin a chhe e, step a a chhuk te khan an ţhian pakhatin ‘chhuk vat vat rawh’ a tia, ‘i thu lo’ tih pahin a inher a a chho leh daih. A hmel kha ka en ka en a, Puipuii hian a duh mak ka ti. A mit lehlam phei kha chu a khap awm pawh ka hre lo, ţawngţai lai pawhin a mit lehlam chiah a chhing a, mit siai ang reng a ni” a ti a, midang an nuih vak vak laiin, “A accident tawh a, Puipuiin a sawi kha. Mahse, a mit hmel kha chu ka hre chiang chuang lo, a mithmul a ţo thei tawh lo tih chu ka hria” ka lo ti leh a, “A mit lehlam chiah a chhin theih chuan lo muhil ta pawh nise hmeichhiain an mahni a ngaizawng emaw an ti zel dawn a nih kha” Sangkhuman a lo ti fiamthu a, “Fiamthu thawh nan hmang suh u, kan hma hun kan hre lo emai” tiin u Zirbawngan a lo khap hlauh a, “Engtikah nge in inneih ve dawn?” Nutein a tih chuan ka ţhu ngil nghal auh mai.

“Remsialin pasal neih a duh lo” u Zirbawngan a tih veleh, “A dik chiah, pasal ai chuan aieng buara khat pawh ka duh zawk” ka lo ti ve ngat a, “Cheiii…u Zirbawnga chuan aieng pawh a tluk lo a ni maw?” nui chung hian a ti a, “Remkalamin aieng chiah a buaipui lai khan u Zirbawnga hian aieng bak thik tur a nei ngai lo. Tun thlengin chawhmeh eng a hne phah vek alawm” ti a Fawnvelan dawt a sawi te chuan Nutein, “Cheiii…bialpa dang nei phei se chu i that duh dawn ni maw?” a lo ti a, a lawmawm tawh lo sa nen, “Ka hlauh zawng tak i ni, bialnute atchilh bur ţhin ho hian thla an ti muang lo. In la in rek hlum ngei ang” a la ti tak deuh deuh a, “Chutiang mi ka ni lo” u Zirbawngan a tih pawhin, “Bialpa dang a neih palh pawhin Remkalami that loin nangmah inthat zawk rawh aw” a lo ti tho a, “Ngaihzawngte vangin tu nunna mah lak loh tur, mahni nunna phei chu hlut sauh zawk tur” u Zirbawngan a tih chuan, “Aw le…min lo ţhen pawh nise taksa tana ţha chauh ei a, thau tut tut tur tihna a nih ber chu” a ti thei tawh a, “Bialpa neih i tum hnai a ni maw?” u Zirbawngan a tih chuan, “Tu emaw te te hian min duh se chu ka duh chiang sa, keimahah a cham rei tawh lutuk a min ti hautak, ka thinlunga a cham reng man hi ţhin tawp mai ka duh, min pe ngat se chu ka hausak phah khawp ang” a ti a, Maski a sawina a ni tih kan hre vek a, “Keimah hi in angah min ngai a, ka thinlung hi pindan angah a ngai bawk a, a cham rei tawh viau nain ka hne thei lo” a tih chuan, “Einch chha…what a very biahthu, ka lo zak ţhaks” ka ti a, uar deuhin ka nui pah tho a, “Maski hmelţha ka tih zia hi ziak chhuak ngat ila chu a hmel ka sawifiahna ringawt pawh film a siam tham a ni ang chu” a tih hnuah, “Naaa…in khuaah hian chhungte ka nei chak e, Maski hmu tura lo zin reng ka duh” a ti leh a, “Kan inah lo thleng ţhin rawh, zankhat riah man 250 lek kan ti ang a” ka tih chuan, “I pawisa duh zia hi aw…hremhmunah lo tla palh ta pawh ni la mi hausa ho pawisa thlauh chharin i buai reng ang a, sa i ti ve hman lo ang” a lo ti a, “Pawisa te chu a hlu alawm. Bakah hremhmuna pawisa chu a neituten thianghlim deuh a an lak luh a ni dawn lo a, ka chhar hreh lo” ka tih leh chuan, “Hremhmun finance minister tur i nih kha” min ti a, “I sawi thiam e, ka duh ţhaks my friend, ka nihna chelh tur kha ka pawm, ka kuah nghal nawlh” ka ti a, uar zeta kan nuih takah chuan mipa ho pawh lo nui vein u Zirbawnga phei chuan, “A rapthlak ngei mai, damlo pawh in nuih hlum thei dawn a nih hi” a ti a, kan nui lui lo bawk a, ţhiante nen chuan thil ho teah pawh nuih vak vak a awl, sikul kan kal ve laia Kalvari nen min hrem chhan ber pawh a ni ţhin.

Kan inzawn kan thlen veleh hmanhmawh deuhin an chhuk sap sap a, chhuk ve mai ka tum chu u Zirbawngan ka kutah lo chelhin, “Hrehawm i ti lo tiraw?” a ti ţha leh a, “Ti nang…ti mah ila ka hrilh lo ang che. Lunglen hnemtuah chauh min hmang a, hrehawm ka ti peih lo” ka ti bawrh bawrh a, hrehawm ka tih dawn apiangin a chhiatna lai chauh ka ngaihtuah zel mai ang.

“Ka thlen hunah ka lo bia ang che” a tih rualin min thlah a, “Ka biak peih leh peih loh che i hre ngawt em ni?” ka ti a, min chhan hmain ka chhuak daih a, ka ţhiante hmuh tur an awm miah lo lehnghal a, “Ka kal dawn aw” a rawn tih pawhin ka chhang peih lo, min ngaihtuah der vel mai mai a nih hi. Min ngaihtuah tak tak nise kanchhi kha ka khawngaih a a ti dur dur reng lo vang.

Inchhung ka luh rualin u Bawihan, “E…hei a lo lut chiah” a ti a, phone min rawn pek pahin, “Kha, ka nu be rawh” a ti zui zat a, ka nu Nempachangi chu a va han mengrei em em ve mawle. Ka benga phone chuktuah paha, “Eng nge a?” ka tih chuan, “Nangmah ang chiah ţhian i nei a ni maw? I pi Binladari nen kan inbia a, a sawi vek a nia. I ţhiannu zu ruiin banga thlalak intar a cho ur ur em ni? Zu ţhat loh zia kan sawi chamchi a, Lalhuma te aţang hian inzir rawh u kan ti ziah bawk a, rui ve lo mahla engati nge a rui chi hlir i kawm?” a rawn ti bawrh bawrh a, Nutein thlalak a cho tih ka lo hre lo reng reng.

“Engmah ka hre ve lo, Sangkhuma leh Fawnvela te hi alawm” ka tih chuan, “Anni pahnih pawh kha rawn haw se ka hau hrep ang. Zu an in chhung chu mipa mah nise hma an sawn thei lo vang. Hmeichhe tan phei chuan a mawi lo lehzual a, vawikhat mualpho zeuh pawhin damchhung a nghawng tawh a nia” a ti a, a duh ang a rawn sawi char char hnuah min vau vak a, mangţha ka tih hma hmain a dah daih a, a sawi dik ve tho, u Lalhuma te pawh lehkha thiam an ti nain zu in a ti â a, lehkhathiam ve lo te pawhin an bawl sup sup tawh mai a ni. Ruihhlo hian zûn a nei a, tih chhin loh tawp a ţha ber.

Pindan a ka luh meuh chuan khum bul chhuata mutna phahin ka ţhiante pahnih an lo mu fel der tawh a, keichu ka thlan a tla nasa a, min chei nasa bawk si, ka inbual fai te te hnuah ka mu ve chauh a, phone khawih lo va mutthilh nghal tum kha ka muhil thei lo reng reng. Ka mit ka chhing reng nain khap fuk fuk ang hian ka awm tho a, ka nin tawpah phone ka khawih leh ta nge nge a, u Zirbawnga leh Maski-a te message a lo awm ran mai.

‘Ka thleng chiah, i chauh chuan tui deuhin i mu dawn nia’ u Zirbawngan a rawn tih laiin Maski-a ve thung chuan, ‘I thleng tawh em?’ a rawn ti a, ‘Ka mu chiah’ ti a Maski ka chhanlet laiin u Zirbawnga chu ka chhang ve peih lo. Nep emai, vai film pawh ka en tawh lo vang.

‘Vawiinah thla ka lo lak ruk sak che’ a rawn tih leh hnuah biakin chhung leh in lama hun kan hman laia ka thla a lo lak ho min rawn thawn a, han en vang vang tlak a awm vak lo. ‘Ka va chhe thil thel hlawm ve’ ka tih chuan, ‘I hmelţhat em hi’ a rawn ti a, bialpa neih ka duh tawh bawk si lo, Maski hi hmelţha ka la ti tho bawk si a, insum deuh, ţang ru tho si a biak a ngai. A hma anga ka biak leh chuan kan inngaizawng thei mai dawn a, rilru hah leh inţhen boruak vel ang hi ka peih tawh lo.

‘Engtikah nge i haw dawn? Sangkhuma te nen in inthurual dawn em?’ ka ti ta daih a, “Lirthei ka keng lo a, sumo in kan haw rual leh ang’ a rawn ti a, ka chhanlet hnu lawkah Sangkhuma a che ţuah ţuah a, a rum reng vanga khuma bawk ar ar chunga hnai tea ka zuk bih laiin a rawn meng thut a, “Eng nge?” tih vak pahin a kut pahnihin thosi benin min beng chawrh mai, ka chhing sawk a, ka biang a thip nghal vang vang bawk.

“A na lutuk Sangkhum, khati taka na a inben tur a ni hleinem” ring angreng taka ka tih chuan a ţhu nghal vat a, khum lamah an lu an dah si a, sawi a nei emaw ti a ka zuk bih kha min lo hlau a nih hmel. “Ka mumangah i thla a lo hrang alawm mawle…a na viau em? Engtin nge i awm?” pawi tih hmel deuha a tih chuan, “Ka awmdan chu i hmuh vek hi. Ka sahuatah beng fuh phei la chu i mumang lo ah pawh ka hrang ang chu. Enteh Sangkhum, lo hrang ta ila min hlau angem?” tih pahin ka ţhu ve sawk sawk a, min benna pawh a la na vung vung mai.

“Ka hlauh ve bawk loh chein” a tih chuan, “Nih leh lo thi ta ila min ngai angem?” ka lo ti leh a, “Nitin i thi alawm” zawitea a tih chuan, “Eng maw?” ka ti vak a, “Aw..ka ţap ang, a ninawm zan lai laiah thi ta ila han tih, i thih chuan ka hnek ang che. Tikhan dam ve hle hle rawh khawvel i ti famkim ve alawm” a ti hluk hluk a, “Min ngai dawn tihna a ni maw? Nangchu lo thi pawh ni la i thlan lung pawh a thin a chhe ngawt ang ka ring” ka tih chuan za lo zetin a lo nui hul hak a, “U Zirbawnga nen in inţhen tak tak em?” a lo ti daih a, lukham hnuaia phone rawlh luh paha, “Ţhen e, a tawp chiang ţhaks” ka tih chuan, “I rilru a na em?” a ti ve mial a, tukverh lamah tawlh thlain, “A lum emai” tih pahin a hawng a, “Ka rilru a na vak lo, nat a tum ve deuh nain ţul a ti leh lo aniang” ka ti chu mak tih hmel deuhin min lo en a, ka rilru na lo chu a awih lo aniang, “I duh vak lo em ni a?” a ti kher a, “Duh lo ila ka ngaizawng nang. Mahse maw, duh tho mah ila ka star lai ang boruak kha a awm thei lo, a dul ruih tawh a, a nuam tawh lo. Ti hian thla khat vel han liam se, ngai ka awh leh mai ang” ka ti sar sar a, ka ute an lo harh ru ve reng ang a, an lo ngaihthlak palh ka hlauh vanga ţawng zawi ka ni.

“In va ho mai mai tak. Inneih a duh tawh si a, i lung tih len nan a ţhen der mai mai che aniang” a tih chuan, “Eng nge awmzia?” ka lo ti thuai a, “Aww..i khua a har a hrehawm i tih chuan i awm danah a hre mai dawn a, a rawn lang leh ang a, hrehawm i tih tawh loh nan inneih nghal i lo duh thut thei a, chutiang zawng chuan a ngaihtuah aniang, a enchhin duh che a nih ka ring” a ti duah a, awm ang viau mah se amah, u Zirbawnga khan min hrilh chiang em a, a sawi kha ka ring ber mai.

“An dawr thar tur a buaipui lai a nia, chutiang em emin thil a ngaihtuah kual hman lo vang. A pawi ka ti lo, mipa an tam emai” ti mah ila, “Mipa zawng zawng i duh zawng an ni vek kher dawn hleinem” a ti a, “Kan inngaihzawn hnu khan ka ngai ho tlat a, tunah pawh ka na em em lo. Nang, mikhual an tam si a, i duh zawng i lo hmu em?” ka tih chuan, “Ka ruih char char kha, ka in tawh lo ang” a ti a, tui a in hnuah a chal a dawm vang vang a, “In tawh suh, ruihhlo ti nasa hi an laktlak ngai lo. Inneih boruak nuam lai zawng zawng i rui bo vek alawm” ka ti ve ngei a, “I rilru a na lo tak tak maw? I englai mah a nat loh chuan ka mu leh dawn a nia, ka lu a na” a tih chuan, “A na lo ka tih tawh kha” ka lo ti a, “I thinlung kha cement in i plaster tir vek em ni a va tlo ve?” a tih chuan ka nui duai a, “Ka mu leh daih dawn i ti ti pui tlak loh si inkawm tawh lo ang” tih pahin Fawnvela lamah a tawlh hnai hrut hrut a, “Ka hausak hunah min tlawn leh tho ang” ka tih chuan a mu fel der tawh.

“Hma lam hun i ngaihtuah ve ngai em Remkalam?” men pawh meng tawh lo chung hian a la ti hram a, “Ka ngaihtuah vang alawm pawisa hmuhna tur ka ngaihtuah char char zel ni” ka tih chuan, “Keipawh, mahse hma lam hun tur ka ngaihtuah hian thaw a pik duh ka ti. Lehkha lo zir ţha peih tal ila ţha tur, eng hna emaw kan dil ve thei ang a, lehkha kan zir sang si lo va, ka hma hun a eng lo reng reng” a ti sup sup a, “Chuvang tak reng chuan rui reng lo vin i tih theih tawk dap ve rawh. Tih tur a khek theih laiin hun a pawh din ve theih si loh a, i tih nghal loh chuan i tlai duai mai ang” ka tih chuan, “Bialpa i neih hnu hian i fing sawt, mi zilh nachang i hre ve tawh” a ti a, ka mut a chhuah hma zawng kan ti ti a, “Bialnu i nei chak em?” ka tih chuan, “Chak lo, ka ning vat zel a, an khawngaihthlak mai mai” a ti ve mial a, “Mu ang” kan tih meuh chuan zing lam dar3 a ri der tawh.

Zingah hma takah thoin ei ka rel sawk sawk a, Puipuii te pindanah khan ka kawrfual hak tur te a awm vek a, ka tan a buaithlak loh nan anmahni zawkin min rawn sawm phei an tum a, a hmunah kan hmai an chei chawp mai dawn a nih hmel a, ka tan an in a va kal kher a ngai tawh lo nain hmanhmawh a ngai tho.

Kawngka a rik karh karh reng avangin ka thil tih lai kalsanin ka va hawng a, Nunui a lo nui var var mai. “In tho vek tawh em?” tih pahin zawn nei ni awm takin inchhung a rawn thlek dak dak a, “Keimah chiah ka la tho” ka tih chuan, “Ngawi rawh, hmeichhia leh hmeichhia chu a chi loh” nui hak hak chung hian a ti a, eng hmuhin nge min hmuh le?

“Eng nge awmzia? Keimah chiah ka la tho ka ti mai alawm” ka tih pawhin, “Nutei nen a in awmdan hi a ţha lo, nangpawh bialpa i nei emaw ka tia” a lo ti zel a, Nutein eng emaw dik lo deuh a hrilh pek aniang, ka lung a awi lo khawp mai.

“Awii…bialpa lo eng nge nei se min tih a? Lo lut vat rawh ka hmanhmawh teh mai a nia aw” ka tih rualin min nam sawn a, inchhung a rawn lut chiah chu a hawi kual nghal vut vut mai.

“Sangkhuma a la mu” ka tih chuan, “Ka chanchin a sawi ngai em?” zawitein ka beng bulah a rawn ti a, “Sawi ngai nang, Sangkhuma chu a ţawng ve mai mai ngai lo va, a ţawng chhunah a vin. A ţawng tlem lutuk a, debate naa a tel ve pawhin a ngawi reng zel” ka tih hnuah ka rilruin ‘ka uang a’ ka ti a, tak tak emaw a ti aniang, “Debate naa a ngawi tlat chu a pa thlawt” a ti a, chemte awl chu chuh chatin alu min vel pui a, “Tumah hrilh kher lo la maw, u Khumtea hlir hi ka rilruah a awm ţhin a, amah hi ka sawithiam dan chuan negro leh sap thlahpawlh a ang ka ti” hnai deuha min en chunga a tih leh chuan, “Thlasikah a chat paw phuk zel a nia aw” ka lo ti a, “Awii…khalam kha chu ka ngaipawimawh lo, chat mai mai a ho e, badam tel tlem tein a that vek” tiin a nui kar kar a, “A phone number i neih kha, be mai la” ka tih chuan, “Biak dan tur ka hre lo lutukin message ka thawn sual a, mahse min chhang lo. Ka duh ang chiah hian a induh a, biak a har phah ţhin” a ti sar sar a, “Nupui designer i duh em lo ti chhin rawh aw, a duh hlauh chuan ka zir nasa viau ang” phur zet hian a ti leh a, bialpa neih vel hi ka sim chiang aniang, Nunuin Sangkhuma a duh zia a sawi pawhin ka engahmah a thawk lo. Dawr hawn hun tur bak ka ngaihtuah leh tawh lo reng reng.

“Remkalam” tih paha pindan aţanga Sangkhuma lo chhuak chu Nunuin, “U Khumte, zanin tlaiah bai tui deuh ka lo suah ang che u” a lo ti a, “A ngai tawh lo, i cake siam pawh kha ei dawnah tuboh a chhut sawm hmasak zel a ngai” Sangkhuman a tih chuan, “Kha chu tih sual palh a nih kha, ka bai chu tui i ti ngawt ang” a tih laiin ka tho tharh a, ka ute an rawn thawh ve nghal vangin thingpui ka lum leh te te a, chumi hnuah alu ka kang a, Puipuii pawhin min rawn be der tawh.

‘Kan haw dawn, kan chhuak ţep. Chanchin ka rawn hrilh che’ tiin u Zirbawnga pawhin message min lo thawn a, “Maski hi vawiinah lo kal ve rawh ka tia, ka hman lo a ti tlat a, Sangkhuma nen chiah kan ni leh tlawng dawn a nih hi” a ti nuah nuah a, alu kan vil pahin phone ka en deuh reng a, Maski nen pawh zana kan inbiak bak kha kan la inbe leh lo.

Puipuii ten min rawn sawmin kan ţhian hoin kan zui a, thil eiin kan chawl zuai tih lohah chuan nileng ţhakin thla kan la a, Maski-a lo kal ve loh vang aniang Nutei pawh a tum bur reng mai. Tlaiah Puipuii pasalte inah chaw kan ei a, Huna pawh kha lo awm vein, “Ka u” min ti a, min zui kual reng a, chauh nen a inrem vak lo. Ka pi Binladari te pawh an haw tih kan hre tawh a, naktuk lamah Sangkhuma te haw an tum bawk a, u Zirbawnga ai mahin ka ţhian te ho hi ka ngai leh zawk ang ka ring.

Zana kan haw chuan kan inah Maski a lo awm reng a, guitar a lo kuah leh ran tawh a, u Bawiha nen bawk an ni. U Mama erawh a len thu an lo sawi a, “Ka inbual hmasaber dawn” Fawnvelan a tih te chuan kan ngaihsak vak lo. Maski a awm dawn tih hre lo vin Nutei a haw tlang a, “Sangkhum, Nunuin bai a lo suah che a” u Bawihan a tih laiin Maski-an, “Remmawi, dawrah kal ang” a lo ti ve thung a, ka u berin, “Thingpui hmeh tur rawn lei rawh u” a tih takah chuan Maski nen kan inzui chhuak a, tunlai chu ka boruak tawnin a zir lo a, sawi tur ka hre lo, ka hul riau zel.

“Naktukah kan haw dawn a, min thlah hman ang tiraw?” amah zawkin a ti a, “Hman ang, thlah loh chuan Sangkhuma a phun leh nasa dawn emai. Ani hi chu a thawk theih ţek ţek chhung chu phunna tur a zawng reng ang. Naupanlai pawh khan Sangkhuma kam sir chiah a pan ţhin” ka ti bawrh bawrh a, “Engtikah nge i lo haw ve ang?” a ti leh a, “Ka thiam deuh vek tawh a, in haw chuan ka khua a har leh dawn a, ţha deuhin ka zir ang a, ka thiam kim veleh ka lo haw ang” ka tih chuan, “Thiam vat vat la lo haw vat rawh” a ti a, a reh leh vang vang a, ngawih reng aiah tiin, “Tu nge lo hruai ţhin tu che hi?” ka ti ve thung a, Nutein a hmu fuh kher a, ka hrechiang chak vek.

“Ka pa u fanu a nia, ka u tihna a nih chu” a tih chuan, “A rui ngai em?” ka lo ti a, “Teuh nang, nula senior a nia, sa a sat ţhin” a lo ti hem mai. “Sa a sat a?” ka ti leh ngat a, “Sat e..a hneh sawh lutuk” a ti a, dawrah thil kan lei leh te te phawt a, haw lam chu kan kal lam ai khan kan kal muang zawk.

“I lo haw dawnah min hrilh lawk rawh aw, ka lo hmuak ang che” a ti a, a ding thut a, “Lo keng lawk teh” tih pahin a thil khai lai min pe a, “Inchhunga zuk a nuam si lo” a ti a, a kekawr ipte aţanga meizial phawrhin a ţan zui nghal a, ka thil khai lai min laksak leh hnuah in lam panin kan kal leh a, “Zir zo vat vat rawh” tih chiah a sawi a, kan inbe zawm tawh lo.

Inchhunga kan luh rualin Nutei leh Nunui te kan hmu hmasaber a, u Bawiha a lo awm lo va, Sangkhuma a lo indawm kun lap bawk. “In va thutak hlawm ve, hunserh in hmang dawn mi?” fiamthua ka tih chuan, “U Khumtea hi bai ka suah ve ţawk ţawk a hmun dangah chaw a ei daih a” Nunuin a lo ti a, “I cake siam ka ei hnu kha chuan i thil siam engmah ka ei ngam tawh lo ka tih kha” Sangkhuman a lo ti ve bawk a, “Naktukah an haw dawn tih Nutei hian a sawi a, kan lo leng mai mai” Nunuin a ti leh daih a, thingpuite kan lum a, a ruka Nunui bai ka hawp chhin chu a thak lutuk a ka thal tawp lo chauh a ni, a al em em mai lehnghal a, Sangkhuma chuan hawp se a thin a rim ngei ngei ang. An hmarcha a hrechiang vak lo a nih loh chuan thak an ngam hle tihna a ni mai.

“Maski, engtikah nge i lo zin leh dawn?” thingpui in laiin Nutein a ti ve thung a, “Ka lo zin tawh rih lo ang” Maski-an a tih chuan, “Ka hmuh chhuah tak chu” a ti hluai a, kan en ţhap hnuah, “Mipa ţawng tlem leh sawi tur hre lo hi an lo ngaihawm lo chuang lo a nih hi” a ti leh a, a zak ve deuh aniang amah bawkin, “Cheii…ka thil sawi kha naupanlaia kan zirlai bu a mi a nih kha aw” a tih chuan kan nui dar dar a, kan hrethiam vek tho si a, inthup a tum ve ţat zel.

“Tuna i zirlai pawh i hre rei thei lo a nia, naupanlai a kan zirlai phei chu engmah i hre tawh lo ang” Nunuin a lo ti ve thung a, Sangkhuma bulah a ţhu fel ât a, nuam a tih hmel khawp mai. Nutei nen a kan inkarah Maski a ţhu ve bawk a, nuam a tih ve hmel chiah lo nain a nui ve suk suk reng tho.

Kan inlengte haw hnua Sangkhuma te ka insiampui laiin u Zirbawngan min lo bia a, ka ţhat leh ţhat loh te min rawn zawtin rei kan inbe lo. Bungraw la a a zin dawn thu te min rawn hrilh a, vai ramah a kal dawn a, nuam a ti hawr hawr khawp mai. Engahmah ngaih loh ka tum hram hram nain ka ngaihtuah chian chuan ka thik ve deuh ţhin, a hriat ka hlau viau thung. Keichu tumah hian ka chak lohna lai hre lo se ka duh, khawvel nuam ti bik deuh leh nasa ve thawkhatah min ngai se buaina a tlem a ni mai.

“Maski-a rawn hruai ţhin tu Nutein a thik deuh kha a unaunu, sa sat ţhin a lo nia” tiin Fawnvela a nui vur vur a, keimah aţanga hria a ni nghe nghe. “Eng emaw sawi a nei em Remkalam?” Sangthuman a tih chuan lu ka thing a, “Sawi vak tur a awm lo e…a sawi duh ber lah i zir zawh hunah a ti tlat a, sawi lo in a awm thei rapthlak mai sia, ka zir zo chak tawh teh mai a nia aw” ka ti kha kha a, “U Zirbawnga kha ngaichang la, in inţhen ve tak tak a nih chuan Maski hi duh daih rawh. An duh ve ve reng kher lo maithei bawk che a” Sangkhuma vêkin a tih leh chuan, “Pasal tur an tam ti reng chung hian ka hmu zo lo daih mai ang a, mipui tamna ah pawh awm ila thlaler a awm ang tho ka ni ang, hmuh zawh loh chu ka duh bik ţhaks lo” ka ti lang lang a, “Tuman an neih duh loh tak che leh keiman ka nei mai ang che” Sangkhuman a tih chuan kan nui vak vak hlawm a, kan ti ti nasa viau nain thawh hma a ngai a, zan dang aiin kan mu hma.

Zingah ka harh hmasaber a, Fawnvela leh Sangkhuma kaitho nghalin thingpui ka lum a, Maski-a biak ka tumna lamah u Zirbawnga message zawk ka hmu daih a, ‘I mu tawh em?’ tih tlawng a nia, zanrei a a lo thawn a ni nghe nghe. Zing a ni tawh tho bawk a tiin ka chhang let lem lo a, keichu ka insum thei, kei aia hmeichhe dang thlang zawk phei chu be lo thei tak ka ni. Ka induh vang a ni lo va, mipain duh duh a taksa leh rilru an hruai kawi theih nih ka duh loh vang zawk a ni.

U Maman taxi min biak sak hnuah kawngpui lamah kan chhuak chho a, mipa an ni bawk a an bawr ve em em hran lo. “Ka lo haw har dawn tawh lo a, mahse Kalvari leh Nunhlimi hnenah chuan a la thiam lo lutuk a, kum tawpah bak a lo haw lo ang ti daih rawh u aw. Duh leh in rilruin ka uang a in ti mai dawn nia, ka rawn ţhawng thut ang” taxi lo thlen hma aţangin ka ti nghal zung zung a, “A ţul kher lo e, i lo haw chuan ka pi Binladari te in chhak lawkah sumo a ding a, ka pi berin a hriat chuan an hre vek ang” Sangkhuman a lo ti ve thung a, Fawnvela pawhin, “Hre dawn chiang, ka pi Binladari chu a duh naah chuan a ţawngthei e…copy sangkhat-i alawm a nih” lo ti vein Sangkhuma thusawi chu a pawmpui khawp mai.

“Kha kha chu ka lo haw dawnah tih dan kan ngaihtuah mai dawn alawm. Hei taxi a lo thleng, ţhu lut phawt ang u” tih pahin Sangkhuma hnungah ka nam a, an ipte vel kan dah luh hnuah ţhu lut vein counter kan pan a, Aizawl a ni bawk a zingkarah mihring hmuh tur an tam hran lo.

“Maski chu counter ah a awm tawh” Fawnvelan a ti deuh hlawl a, “Nangni pahnih hi tunlai in inkawmngeih tharin ka hria. Thil zep in nei dun a ni chiang mai, Maski-a min hrilh tum hi i hriatpui ve tiraw?” ka ti pang pang a, “I hre ve em?” ka tih leh chuan, “Hre ve lo, kan haw rual dawn a kan inbia a ni mai. Thil a hrilh che chuan min hrilh ve zawk rawh” a lo ti a, Sangkhuman nur nanga a en ve hnuah phei chuan ka ringhlel zual sauh, inthurualin zep an nei chiang a ni.

Counter kawtah sumo a lo ding reng tawh a, sumo bulah Maski pawh lo awmin a hmel aiin a sam ka hmu hmasa zawk a, a zawn kan thlen veleh, “I ril a ţam em?” a lo ti nghal a, “Ţam lo, inah thingpui kan in tawh” ti mah ila counter piah lawk a mi chu min inpui leh tho a, chhangban kan thar phei chu tui tak a ni, kan khua min ti ngai ram ram mai.

“Remkalami a lo haw ve thei ţep tawh bawk a, chaw kan eikhawm thei ţep tawh tihna” zangkhai vaha tih pahin Fawnvela chuan Maski a nghawk zauh a, an in en dan te chuan mei a nei, an mitmeng chuan kawh tum a nei chiang alawm, a rukin an inngaizawng te a nih ngawt loh chuan thil dang zep an nei tihna a ni mai.

“Nangni pahnih lah hi in in en ngawih ngawih reng mai. Chhuanlam eng eng emaw siamin in khurbing daih ange aw. Khatiangin mipa leh mipa hnai deuhah an in en reng ngai lo, a tenawm e in melh kual dan leh nuih dan vel kha” Sangkhuman a ti bui bui a, kan ţhian nghet zinga miin ţhiante aia hmelhriat thar te an ngaihsak zawk ni a a hriat chuan a lawm ngai lo reng a ni.

“Taka, Nutei kha i duh em? A duh hmel ropui mai che sia” nui vur vur chunga Fawnvelan a tih chuan, “Naupang a nih kha” a lo ti a, Sangkhuma lahin, “Nunui kha min be duh hi message a rawn thawn sual der ziah. South korea ah ruah a sur ve em a rawn tih loh leh, ţhianpa, Sangkhuma i hria em te a rawn tia, a ti lui tih ka hre ve vek sia. Tunlai chu ka hmelchhiat lai tak a tih hnua awii message ka thawn sual reng mai ka tihpalh lutuk aw a rawn tih phei chuan ka nui tawp. A chhe cute e” a ti kher a, “Hmm…a cute ti ve mai la, chhia han tih tel kher” ka tih pawhin, “A chhe reuh, a chhe cute, ving veng a” tiin a nui vur vur a, “Ehe…kumin chu kan ţhianhoin kawppui kan nei kim vek hman dawn tihna a va nih hmel ve” Fawnvelan a tih tak hlutah chuan, “Aw haw wow, nei sup sup rawh u” ka lo ti a, “Hmeichhe pakhatin min ngaizawng ve dek dek a nei turin min beisei nghal ringawt, Fithangi leh nangmah aţang hian thil tam tak kan zir chhuak alawm Fawnvel” Sangkhuman a tih chuan, “A ni maw? Eng kan han nih loh nen a va lawmawm ve, eng nge in zir chhuah a? I va sawi har ve” phur zeta Fawnvelan a tih chuan, “Eng in nih lohna tak kha kan zir chhuak. Naupang te, eizawnna ngial nghet neih hma, dinhmun siam rem hmaa nupui pasal neih a pawi theihna lai kan zir chhuak thlap, kei phei chu ka pass ţha lutuk. Rilru puitlin hmain in innei a, a tlan reng hi” Sangkhuman a lo ti daih a, a beisei ang ni lo a ngaithla chu Fawnvela a tum nasa mai, Sangkhuma phei chuan a be ţawng zo tawh lo hrim hrim.

Driver in kal a rawt takah chuan an lut sap sap a, tukverh bula ţhu Maski chuan min rawn enin, “Lo haw vat rawh aw” a ti leh tawh a, “Ka thiam veleh ka lo haw ang. Ka rawn hrilh ang che” ka tih chuan lungawi hmel deuhin a nui a, Sangkhuma pawh rawn dak ţawk ţawkin, “Mipa lu meh dan lo zir tel ang che. I aieng ka kawl ho kha ka hralhna man ka pe dawn lo che a nia aw” a ti a, miin mak min tih hlauin ka nui liam vel mai mai a, a ruk chuan ui tak ka ni. Ka an chiam chuan kan khaw mi ho hian min chhaih leh sup sup dawn a, ka haw veleh ka ţhing tho ang.

“Chuan i awngphah hnuaiah khan i thil tur ka dah a nia aw” a ti leh a, sumo a rik tawh hnu a, “Eng nge i dah?” hmanhmawh deuha ka tih chuan, “Thil” a ti ringawt a, zawt nawn char char mah ila awmzia a awm lo. Engmah inzawt chhuak lo vin kan invai liam ta nge nge a, an kal chiah chu ka ruak huai mai.

In ka thlen veleh ka ute min biakna pawh ngaihsak lo vin pindanah ka lut tlang nghal a, awngphah hnuai ka en sawk sawk a, a zep nasat tehreng nen nihawichi bak a awm lo. Ka ei chak thu ka sawi ngei nain thil a tih hluai tawh kha chuan tlang lian ţha nelh nawlh ka lo beisei a nia, anmahni ngaihtuah veng veng chungin nihawichi ka chip ta daih a, sumo ah pawh an chip ve mual mual ang chu.

Tukţhuan eikhamah insiamin Nutei ka sawm chho a, mi chei leh sam tan chiah kan zir avangin Lanfeli hnena kal a ngai tawh lo hlauh a, bakah kan in chhungkhat vang hian duh hun hunah kan duh duh, kuttin chei thlengin kan zir thei a, a thlamuanthlak ve deuh. “Maski a haw sia, Aizawl hi ka hmu black and white vek” Nutein a tih nang nang laiin bus ah ka kai lut a, “Mit hmul lem ka vuah sak dawn che kha, khatin awm suh” ti mah ila, “Drip khai mai ka duh” te a tia, Maski-a zuna uai chu a lo na khawp a nih dawn hi. Nula pachang pui pawn drip a khai hluai dawn a nih hmel.

Zodin thleng kal lehin solomon’s cave a Afaki beauty studio ah bawk kan lut leh a, “Vawiin chu Nutei mit ka tih sak thei tawh ang, mithmul lem hi ka vuah sak dawn” ka ti a, kan phur tlang khawp mai.

“Ka lo muhil der der ang” a ti a, u Afaki pawh zawt tawh lem lo vin ka ti zung zung a, customer an awm vang leh min rin tawk vangin min rawn enpui tawh lo bawk. Min enpui ţumin hmeichhe pakhat nalh deuhin ka tihsak a, ka inringtawk tawh viau a ni.

Keiin buai lo va ka vuah sak mawlh mawlh laiin mutthilh tum zawk Nutei a buai a, “A thip lutuk ka mitmuah i vuah aniang Remkalam, ka mit ko ah vuah ta che” a ti vak vak a, “I mit ko ah hlir alawm ka vuah, lo meng lo la” ka tih chuan, “Meng lo mah ila ka mit chhungah i rawn rawlh lut tho alawm, a thip lutuk” a ti chul a, a meng hauh lo na a a mittui a tla zung zung tho a, u Afaki lo kal vatin ka tih dik loh lai min hrilh pahin Nutei a buaipui nghal a, a men theih hnuah pawh, “Ka dawh peih tawh lo e a” a ti bur tawh a, “Dawh hram hram rawh Nute, ka lo enpui tawh dawn a nia” u Afakin a tih pawhin, “Tlem a tlemah ka mit a del lo chauh a nih kha. Ka duh tawh lo, mithmul in ang loin ka pu mai ang. Thiam inti hle si han thiam loh” tih pahin min melh vak kher a, “Ka thiam a ka ti sual palh a nih kha” ka tih chuan, “Nih leh i tih sual vaih chuan kan zir dun tawh lo vang” a ti a, u Afakin customer a khawih zawh te te hnuah min enpui a, Nutein min vau reng bawk a, enpuina hnuaiah chuan ţha deuhin ka vuah sak tluan thei a, ka duh ber ka thiam ta deuh vek mai chu ka inchhuangin ka hlim ru takzet a ni.

Aizawl a thla hnih pumhlun zan ka awm hnuah meuh chuan kan khaw lamah ka haw ve thei ta reng mai. Ka ţhiante hrilh duh lo vin Maski chiah ka hrilh a, kei ai mahin a phur emaw tih tur a ni. U Zirbawnga nen tak chuan kan inbe khatin chanchin kan inhrilh zeuh zeuh a, inngaizawng angin kan inbe tawh rih lo, hun kan mamawh ve ve ah ka ngai mai a, ka pawm thiam khawp mai.

“Hman rua vel hi i inlei nual tiraw?” pindan a ka awm laiin u Maman a rawn ti a, “Aw lei e…ka lei loh chin pawh a chah theih vek alawm. Tunlaiah chuan zuar an tam tawh a, ka neih chin hmang hian pawisa ka khawl ang a, ka inlei belh zel mai ang” ka tih chuan, “A leina man tur tlem ka pe ang che aw” a ti ve mial a, “Ka duh ve” u Bawihan a rawn tih chuan ka lo melh na khawp mai.

“Ka sumdawnna tur a nih hi, lo inrawlh ve sek suh, i zia i thlak nasa sawt lutuk, i ninawm” ka tih chuan, “Min zah lo pang pang viau suh” a ti a, kan inhnial chho zel a, kan inhnaih tial tial a, ka hmanraw man tur lehzel a lo it ve chu ka thin a rimin kan insual chu a ni der mai. Kan inngeih loh zia ngaihtuah chuan kan insual har zawk a, tun ţum chu ka dawhthei tawh hlawl lo. A kawr a ka pawt chu, “Min thlah rawh” a tih lai takin a ka chhungah ka zen a, min lo seh eng ang mah se, “Ka kawm luak dawn tho che” ka ti tlat a, u Maman min lo ţhelh lo se chu kan nasa khawp ang.

“Remmawi, u te zah i zir a ngai, Bawiha, nangpawh naute dawm thiam i zir a ngai, in inhnial thinrim a nih pawhin kut inthlak tawh suh u. Ka khawl sa hi chu Remmawiin hmanraw lei nan hmang se la, tution fee ka dawn veleh i duh zawng ka leisak ve ang che” a ti dap dap a, “Khawi, ka chalsam lem kha min pe rawh, ka vuah ngheh tehreng nen i pawtthla daih alawm” ka la ti vin tuar a, a changa chalsam neih duh a, a changa duh lo tan chal sam lem bik a awm a, chu chu lei vein ka duh hunah ka vuah chawp zel a, tuman an la pawtthla ngai lo.

“Kha, milem i nih kha” tih pahin min vawm nan a hmang a, “I lem fe zawk, kohhran a inhmang, pawn lama vantirhkoh, inchhunga sakawlh. Kţp a in group tana i tih zat ve pawh hi chhungkaw tan i ti lo vang” ka ti siah siah a, u Maman a dang bet tawh tho bawk a, “Aizawlah nuamsa deuhin i awm a, i inla changkang em em a, ka nu leh paten rim leh hah deuha an thawhchhuah sa pawisa i rawn dil reng a, nangmah ang hi ţhalai tam tak an awm, zah nachang hre ve rawh u” ka tih hnuah darthlalang hmaah dingin ka chal sam lem chu ka vuah sawk sawk a, “In awm em inhnuai te u” ti a Nutein thawm a rawn neih hnuah u Bawiha chu pindan aţangin a chhuak nghal daih a, “Naktuk i haw dawn sia zanin chu ka lo riak dawn” a ti a, tunah chuan sawm chawp a ngai tawh lo.

Zanah kan riak dun a, khawvar thleng ti ti in sumo a chhuak hma dawn bawk a kan muhil duh lo law law a, zanrei lamah khan u Bawiha pawh u Maman a zilh ri ka hria a, ka u mah nise a nun leh mize inthlak nasat lutuk avang hian ka kham hlur mai a ni.

Zingah kan thawmah a harh reng chung pawhin a tho ve duh lo va, u Mama leh Nutei ten min thlah a, sumo a ka luh hnuah pawh u Maman, “Pawisa khan hmanraw chahna i hria ang maw? An lo bum che a nge aw” a ti thlap a, “Bum awm lo e..min bum chuan ka nasa viau ang, min bum ngam a tîkah” pawr zeta ka tih laiin Nutein, “Kan thlah tu bul ho ka chhui chiang ang a, in khuaah chhungte kan neih chuan ka rawn zin vat dawn a nia” a lo ti a, ka awmnaah hian ţhian ka nei nghal zel a, kan tlan chhuah chiah chu Nutei ka ngai nghal veng veng mai. Ka zir nasa bawk a thiam.zel turah ka in ngai, ka inzirna lamah Lanfeli sam ka tan chhiatsak vek a, u Afaki kut ka ti thi phung a, Nutei mitah glue ka thun bawk a, bei lui ngat ngat lo ila chu ka thiam kher lo vang.

Khawpui chhung kan pelh hnuah phone ka en ve chauh a, u Zirbawngan, ‘I haw ta em?’ a rawn tih chuan, ‘Khawpui chhung kan pel tawh” ka ti a, ‘Tluang deuhin aw’ a ti tho na a ka chhang let lo mai. Maski-a hnenah zawk chanchin ka hrilh char a, ka pi Binladarin min hmuh loh nan an in chhuk thlakna zawn thlen hmaa sumo a din a ngai a, bungrua ka ngah si, pakhat talin min puih loh chuan vawikhatah ka keng zo vek thei lo vang.

Kan khua kan lut chiah chu tukverh ah dakchhuakin kan khaw boruak ka hip vang vang a, “Kan khaw boruak hi chu a oxygen bik tlat” ka ti a, ka phur nghal hawrh mai.

Kawngsir a Maski lo ding ka hmuh rualin driver hnenah, “Hetah hian ding rawh” ka ti a, sumo din rualin Maski pawn min lo pan hnai a, tukverh a dak chhuak hau chungin, “Awii..my friend, what a very comeback. Kan khaw han rimtui bik zia hi” ka ti chul a, “Khawiahmah kal tawh suh aw” lo ti vein driver nen ka bungrua an hlang thla a, zanah Kalvari ka va ţhawng thut anga midang ka hrilh chauh ang. An thil tur pawh ka hawnsak ţheuh a, kan khuaah kan sapatal leh hiar hiar thei tawh dawn anih hi.

Ka bungraw tam zawk min ken sak a, mi kawngkal kan tawk nual a, mi hrilh darh nachang hre lo tur vek an ni thung. Kan inzawn kan thlen ruala, “Ding lawk ang” ka tih chuan a ding ve mai a, “Eng nge min hrilh tur chu?” ka ti leh nghal chat a, ka nghak rei tawh em a ni. “Zanah ti miah suh, zanah chuan Kalvari te in a kal ngei ngei ka duh” ka tih zawm leh a, “In inţhen tak tak em?” a tih chuan a thuphungin min zawt mai mai emaw tiin, “Ţhen ţhaks, a chiang hle bawk” ka ti fiamthu a, “Kha kha ka hre duh a” a lo ti sup a, “Awii…kan inţhen leh ţhen loh min zawh tumin thla hnih vel lai min nghak maw?” ka tih chuan, “Ni lo e…thla hnih hmalam daih tawh aţang khan. Aizawl a i awm lai khan min ngaihtuah ve ngai em?” a ti ţan a, “I pi a thih khan ka ngaihtuah lutuk che” ka ti a, zawhna peh hel hram ka tum nen, “Khatiang lo deuh khan” a lo ti leh a, “Ngaihtuah ve zeuh zeuh e” ka tih chuan, “Engti zawngin?” a ti a, zawhna a ngah khawp mai.

“A chang chuan i ngaihawm ve ţhin a” ka tih chuan, “Chumi i ngaihtuahna chu a la ngai reng em?” a ti a, beisei nei ni awm taka min en chung hian, “Kan rilru put hmang hi in ang chiah chiah se chu engmah ven thawn a ngai lo tur” ngenngawl zet hian a ti a, “Haw phawt ang” ka ti a, ka haw tur a lo nghakhlel ve em em a, bialpa ka nei peih lo tih nghal tawp chu ka duh bik ţhak lo.

“Kan rilru put hmang a la inang lo ang tih a sawi theih loh” nui chunga ka tih chuan min lo nuih let ve a, “Mahse, a der chiahin ni rawh se” ka ti leh a, bialpa ka neih peih loh thu pawh hrilh vek ka tum tho a, a der mai mai a ka bialpa a nih duh chuan ţhian ka neih belh dawn tihna a ni mai. Hmangaihna leh indonaah chuan engkim a thiang vek an tih ţhin tak kha mawle.

CONT….

Angel Pops
Author: Angel Pops

Leave a Reply