You are currently viewing KEIMAH, THINGTLANG NULA S2-23

KEIMAH, THINGTLANG NULA S2-23

Spread the love

KEIMAH, THINGTLANG NULA S2-23

“Sangkhum” ka ti lauh a, kawngpui a la thlen hma deuh a rawn hawi letin, “Eng nge?” a ti hmuk a, sawi tur ka ngaihtuah lai mekin, “Eng nge? Eng nge?” a lo ti leh hmuk hmuk a, “Thingpui lo in rawh” ka tih chuan, “Ka peih lo, a dai thei si” a ti hluk a, “A so lai takin i in dawn nia” ka tih veleh a rawn let a, mi in min ngaihdan tur hi ngaipawimah vak lo mah ila ţhiante nena inhauh chu a nuam lo em a, inthlem lungawi nghal zung zung loh phei chuan rilru a hah em em reng mai a ni.

Kawngka biang nghenga ka ding chu min su chawrhin inchhungah a lut a, “A so phuan bawrh bawrh lai kher min pe ang che” awki nem vak lo a tih pahin ţhutthlengah a ţhu chawrh a, na nei ni awm takin a hmui pet fuat chungin a mit a chhing vang vang a, “I ţhu chawrh kher a nih kha, i mawng a khawihli leh tawh em ni a?” ka tih chuan a mawng a kân a, a ţhutna lai chu dap ruk rukin kuhva rah pum hnih a rawn la chhuak a, “Mai mai a” tih pahin pawnah a la paih chhuak daih zui a, Sangkhuma thinrim thei bik lutuk hi a chhan ka hre bik lo, a nu thinchhia a chhun aniang.

“Thingpui chu i chhuang em?” a tih chuan, “Chhuang e…a so ţep” ka lo ti vat a, thingpui kan lumna pawh ni lo dekchi tereuhte ah a in khawp lek ka lum sak a, a so bawrh bawrh lai kher pek a ngaih avangin mi pakhat ta tur chauh lum chi a ni lo.

A so veleh, “Sangkhum, rawn awm hnai rawh” ka ti nghal vat a, “Engvangin?” bul deuha a lo tih chuan, “A so lai kher i duh kha” ka tih chuan gas bulah a rawn ding hnai a, thingpui a so chiah chu, “No a thlit chhuah hman a ni lo, a so nasat lai tak hian dawt mai rawh, dekchi a lian chuang lo” ka ti a, ka thutak a, ţhahnem ka ngaih tehreng nen a mengrum zawkah a la ţang a, “Ka kawchhung a durh dawn a sin” a ti leh ang lawi a, “I ninawm ve chiang e, a so lai kher i duh chuan pa deuhin dawt hmiah ta che, i sawichhuah hmasak a nih kha” ti mah ila, “Ka uang a nih kha” a ti leh tlat tawh a, “Thlum deuhin siam ang che” tih leh a ţhutna lam pan a rual a, ning mah ila han thinrim chi a ni lo hrim hrim.

No a thingpui ka thlit chhuah hnuah chini fian nga vel ka pawlh a, chawh chhung pawh a rei, “Kha le, Sangbawih” fiamthu a ka tih chuan a nui deuh a, lehlam a hawi zawk a, a rawn hawi let leh chuan a nui leh tawh hauh lo.

A bulah pawh ţhu ngam lo vin a ep chiahah ka ţhu a, thingpui so lai duh si khan a nghah daih te te hnuah fimkhur tawkin a in a, “A va thlum em em ve, hrisel lo phei ila chu ka let tawp ang chu” a ti leh ang lawi a, “Rasgulla tui chu nep te, khawizu ai pawhin a thlum zawk ang” a tih leh chuan, “Tikhan damchhung a daih anga a ţha lawm. Thingpui hang pawh in la khami i lo in tawhna khan a ti thlum pha vek ang” ka ti a, a in apiangin zu in ang maiin a ner nâwng nâwng reng a, a phu tawk chiah a nih hi.

A in lui theih tawh loh hnuah, “I thingpui lum a thlum e…khawi, thingpui hang ka lo hmeh teh ang” a ti ta nge nge a, ka tih sak duh tawh bik ţhak lo. “I duh dan takin ka siam a in mai mai rawh” ka ti ve tlat a, thinrim hmel pu reng chungin a in zo ţhak a, “Thingpui ka in tawh zawng zawngah a la tui lo ber ang” a ti kher lehnghal a, “I thinchhiat man a nih kha” ka tih chuan, “Thuawih hek lo che, ţhiante tan a ţha ber ka duh a ni mai a ni. Maski kha be rawh ka rawn tih chhan chu a thih ve ka hlauh vang a nia, ngaizawng rawh ka ti hleinem che. Naupanlaia i chhiat ve reuh nen, ţhan ţhat vanga lerh tur tihna mi?” a ti lung lung a, “Zawitein ţawng mah la ka hre pha vek tho, au lung lung kher a ngai lo” ka tih chuan, “Mic ka hman nghal loh” a lo ti a, a lung a awi hlawl lo a ni.

“U Zirbawngan a bialnu hlui vang mai maiin min ţhen a, min khawngaih zawk ta che” ka tih chuan phawk deuhin min en a, ka sawi chhuak palh leh tawh. Thiam inchantir ka tum lutuk na lamah thil ni lo lo ka sawi ka sawi mai, Kalvari tih loh midang tumah hrilh ka tum lo a sin le.

“A bialnu hluiin a rawn hau che em ni?” a tih chuan, “Ka ti mai mai a nih kha, a bialnu hlui biak dawn chuan vai ţawng emaw sap ţawng thiam ngei ngei a ngai, engtin nge min rawn hauh theih ang a? Vai sap ţawng hmang ve phei chu ngaithla uluk viau mah ila hriatthiam a har tho alawm” ka ti zung zung a, “Ka awih lo e…in inţhen chhanah hian eng emaw thuruk lian deuh a awm ka ring” a tih leh chuan, “A awm hlawl lo, kan inţhen a kan inţhen a ni mai. A thu hrimah, Kalvari leh u Rinchuchu-a te inngaihzawn laia ka star kha a ni ve mai a, damchhunga ka kawppui tur tihna a ni kher hleinem. Star te hi nupui pasalah nei nghal zel ila hrehawm ti fe fe kan tam khawp ang” ka ti bawrh bawrh a, in star lai boruak leh inngaihzawn boruak a inang ngai lo.

“Chupawh nise Maski chu a ţha chuang hleinem” a la ti ţalh a, “A nih leh tu nge ţha i tih a? Mi fate angin ngaizawngtu ka neih ngah ve loh hi” ka tih chuan, “A ţha nghah nana bialpa neih mai mai ai chuan nei loin awm zawk rawh. Hmeichhia phei chu inhmingchhiatna a ho a nia aw” a lo ti a, “Hmingchhiat nachhan tur a awm vak chuang hleinem. Mi tana hmuh nuam loh khawpin kan awm chuang lo a” ka tih veleh, “In awm khawp kha le…khawlum lai laiin in lo inkuah châwi kha, a malchungah i la ţhu zui, a cher si, a ruk chuan rit a ti ngawt ang che” min ti hrep a, he mihring han nasat zia em em hi chu aw.

“In chhungah kan inkuah a tuman min hmu hleinem, kawngka kik lo in i lo lut zawk a nih kha. Nangmah chiahin min hmu, khawlaiah kan inkuah ngai lo hrim hrim” ka tih chuan, “In star lai leh inngaihzawn boruak a inang lo i ti ve a, Maski i ngaizawng leh tho sia” a lo la ti tho a, “Maski chu a fel e, engkimah min pui a, dawr luah tur ka duh thu ka sawi pawhin a nu ţhiannu te bazar veng a mi te kha min biak sak nghal. Aieng pawh ka buaipui a ngai tawh reng reng hleinem” ti a Maski-a thlavang ka hauh chuan, “I duh khawp a nih kha” a lo ti hmuk a, i thinrim peih si, ninawm” ka tih lahin, “Ţhianţha zilhin ka zilh che a nih hi” a ti daih a, a siliper lah chu a te em em mai lehnghal a, “Khatianga te siliper bun chung khan engtin nge chak deuh a i kal theih a?” ka ti ta daih a, a siliper ah a ke a leng lo hrim hrim, inhlawh tur anga in ngaiin a rem rem a bun tawp tih hriat reng.

“Ka siliper mai mai ai chuan ka thusawi kha vei zui zawk rawh. Thu i awih loh chuan i la chawh dawn teh mai a nia aw. Maski-a hi setanic Nicky-a ai pawha setanic zawk a nih hi. A pi thlanah chaw a ei te an tih kha, thil dang pawh ka hre ţeuh” a ti leh tawh a, “A pi thlana chaw a ei an tih vanga setanic han tih kher, in vawkin no a neih dawnin nang pawhin vawkin bulah thil i ei tuam tuam tho a, vawktenic kan ti bik che mi?” ka tih chuan, “A ţha a ţha, thusawi engmah pawm duh lo, thu awih lo si, thuduhnic i nih kha” a la ti zawk zui a, “Tournament a awm dawn kha i hria em?” ka tih pawhin, “Hria, Maski nen vur in zuar dawn nia” a ti hmak a, “Ring deuh deuhin au tir ve la, ‘vur, pakhat cheng5, pakhat lei a pakhat chhawm, mahse cheng10 a ngai’ ti ve luah luah rawh se. Hmelţha si, mawl si, ţhamawli i nih hi, Maski bulah nui leh hawr hawr la a nih chu” min ti leh nek a, “Inhlawh lo in i rawn ang a ni ringawt alawm. I kâ te a kham tawh em em lo mi? I an peih man cheng10 ka lo pe dawn che mi?” ka tih chuan, “Duh leh Masiki-a pe rawh, i don’t care, ka ngaihsak lo, i super power electric down hate you, current thi reng ai pawhin ka hua che” tih leh din a rual a, “Ţhiante thu awih lo hi an dam rei ngai lo. Uang tel zeuh ţhin mah ila thinlung leh tihtakzet, ţhahnemngai eltiangin Masiki hi ka duhpui lo che. U Zirbawnga pawh a bialnu vanga a ţhen tak tak che a nih chuan ka duh pui chuang lo che, nep zel zul emai, palian pui si bialnu hlui la buaipui te chu a, i lo luck hlawl lo a nih hi, nangmah duh tute an laktlak loh emai, sipaiah ka ţan san daih dawn che” a tih duah hnua kal mai a tum chu rawn hawi let lehin, “Ka kal ang a, min ko let tawh miah suh. Hawi pawh ka rawn hawi let lo vang” tih paha inherin a kal zui nghal a, ka tho ve thuai a, kawngka biang ngheng ar ar chunga, “Sangkhum” ka tih chuan, “Eng nge?” tih hmuk pahin a rawn inher leh tho sia, “Ka rawn hawi let lo ang i ti ve sia, what a funny thing” tiin ka nui hak hak a, “What a funny thinrimthlak thing” a ti a, a inher leh hmak a, a penţawng aniang tunlai chu zu a in nasa an ti tlat. U Lalhuma te ang hian zu vangin mi laktlak lo deuhah a chhuak daih ang tih a hlauhawm.

Ka nu lo haw lahin, “Remmawi, ka mithmul lem hi han la thla leh daih teh, ka khap thiam lo reng reng, min phuar ţung a, mit mim ang deuhin ka awm reng mai” a rawn ti a, “Kan vuah chiah a, lakthlak lehnghal chi a ni nang. Ti khan a tla ţhen mai dawn lawm, pawt thla reng reng suh aw, i mithmul pangngai i pawt thla tel vek mai ang” ka tih chuan, “I pi Binladari phei chuan ‘i mithmulah tel i hnawih em ni?’ a lo tia, i zir thiam ho leh i hmanraw neih ka sawi chu e, ‘zanah lo kal se la min tih sak ve rawh se, esi chhang ka lo pe ang’ a tih kha. Puipuii khan a tih ţhat sak duh ngai mang si lo a, a kuttin te a hnawih par ve chak a nih chu” a ti zung zung a, ka pi Binladari lah hi a tar a tar hian inchei a uar em em a, ka pu lah che hleithei lo vin inchhung ah a tawm chawt reng a, tunhnaiah phei chuan a dawrah an ţhenawm putar a leng reng zel an ti.

“An ţhenawm putar kha ka pi Binladari dawrah a leng reng zel em ni?” ka tih chuan, “Pu Sawia maw?” a lo ti thuai a, “Ni e” ka tih chuan, “Leng ang chu mawle. An inngaihzawn ring tawk te an awm a, mihring lo mawl theih zia hi aw, inngaizawng rual an ni tawh lo hrim hrim. Tunhma aţanga inkawm nasa an awm a, tunah pawh Pathian thu bak an sawi ngai lo, pu Sawia phei chuan ha tih tham pawh a nei tawh lo a nia, kuhva te hi a ei ve chak a, nileng pawn hmuam se a ngai ngai hian a chhak chhuak leh a, i pi ţhianpa, a khawhar hnem tu ber a nih hi” a ti bawrh bawrh a, “Zaninah kan zai dawn si a, ka kuttin hi min han hnawih sak teh, pheikhawk chu a pum ka bun leh daih dawn tho a” a la ti zui a, hna ţul dang ngah viau mah ila kan han in hnawih sak leh lawp lawp a, a dawh tu zawk si, “A va rei ve” a tih loh leh, “Duhtawk tawh rawh” a tia, vawiin zet chu mi thinchhia pahnih bulah ka awm chawt ang a nia, ka hah vek tawh.

“Enteh nu, dawr luah tur ka duh sia, Maski-an bazar venga a nu ţhiannu min biak sak a, ‘zanah lo kal leh ru’ an ti. An phal hlauh chuan a langsar lai takah dawr ka nei thei dawn tihna a nia, an dawrah sawn secondhand hlir an dah a, chupawh tih ral vat vat a bale thar hawn rih loh an duh a, a remchang a sin aw” ka tih chuan, “Dawr luah man pek ngai lo vin mi inah kal kual la i hlawk daih zawk ang. I pi Binladari pawhin kan kawtlai a zau a, ka dawr epah hian duh leh dawr tur rawn sa ula, lian vak lo chuan in khawrpum ve thei mai ang a tih kha” a lo ti a, “Ka duh lo e a, a duh hun hunah min hau ang a, ‘chu chu min tihsak rawh’ a ti peih dawn bawk ai, Maski-a nu ţhiannu te dawr ruak tur chu a ţha ber” ka ti tlat a, pan ngai ka pan chawp thei tho a, aieng ka zuar bawk ang a, tournament ah alu leh papawr, vur leh kuhva ka zuar ngei ngei dawn bawk a, dawr luah man chu ka pe thei awm emai.

“A luah man engzat nge an tih a?” a tih chuan, “Ka la hre bik lo, zanah kan kal leh dawn” ka ti mawl tawp a, thingtlangah chuan khawpui angin dawr luahman a to ve dawn lo a, ka huphurh hran lo, mi ka biak thiam phei chuan min pan duh tawk an awm ve reng dawn tho.

“Heti hian a ro nghal tihna em ni?” a kuttin kan tih zawh hnua a tih chuan, “Ro nghal e, nangmahin lo khawih ve tawh lo la a ni mai” ka ti a, a kuttin enin a nui hak hak a, “Nizan khan i pa nen darkar hnih lai kan nghak a, a ro thei lo kan tia, nang lahin awlsam tein i ti ro a, kan zun a chhuah pawn kan zung ngam reng reng hleinem, i pa phei chuan a chang leh a chhem a, awmzia a awm lo reng reng. Thil chi hrang hrang hi an hmu chhuak a, tunlaiah chuan mizia aiin hmel siamţhat a awl zawk an tih hi a lo dik tak tak a nih dawn hi. Plastic thlengin mihringah an bel tawh a, hnar ngul te an chep sang a, hnarkua lah an ti zim thei vek tawh a, kan hunlai khan hetiang hi awm ve se chu thlalakah kan chul rup bik lo vang” a ti duah a, choka lamah a phei zui a, a lung a awi viau emaw tih laiin, “Lalremmawi, dekchi ah hian thingpuife a va tam ve, silhmun leh gas bul vel lah fanghmirin an bawm nuai nuai a, i hmu lo em ni a? Che fel ve deuh ta che” a ti vin hlak hlak a, “Chhuat te ka nawt hmasa alawm mawle. I duh hun hunah min hau ringawt zel suh. A hman hman hian min hau hlawm a, ka ning ve tho a nia” ka ti a, thinrim viau mah ila ka ti fai zung zung tho a, hah pawh a sawi theih loh reng reng.

U Zirbawnga pawh nilengin a reh a, a phone number ka delete nain ka vawng tlat tho a, awmzia a awm lem lo. Biak hmasak ka tum lo hrim hrim a, min ţhen dan hrim hrim kha ka tlawmla ve deuh a, a inzah loh thlak ka ti. An nunhlui hmanga a bialnu hluiin a vau pawhin police a report a, a rilru tih nat sak ai chuan min ţhen a thlang zawk a nia, hmalam a pan thlenga nghah a inhuam bawk a, min duh tak tak nise hetiang vang mai mai hian min ţhen lo vang. A chang leh kan khuaah a lo kal zawk a, min hmu miah lo vin a haw leh a, phur chang changin nupuiah min sawm a, duh dan dan a min ti kual tu mipa ai chuan min zahthiam a, min ngaihsak tu hi hmeichhe tan chuan an hlu zawk. Maski hi chu engtin pawn awm ila thinrima min ţawngkhum awm ka la hre lo, u Zirbawnga nen a kan chanchin ka hrilh pawhin min lo fuih zawk a, a rilru put hmang a sawichhuah hma pawhin kan inţhen chian leh chian loh min zawt thlap a, kan inţhen chiang tih a hriat hnuah a sawi chauh kha a nia, thil ţul lo a sawi ve vak ngai bawk si lo, kan mize inang lo lutuk avang te hian ka duh a, u Zirbawnga nen kan tawp ta rau rau bawk a, ţhen chhan tur ţha tak a awm loh chuan Maski hi ka ţhen lo ang, mipa dang biak ka tum lo bawk.

Veng danga inkhawm tur a nih vangin ka nu a kal hma deuh a, ka pa nen chiaha kan awm laia Maski-a lo lut chuan, “E…pa Dite, i awm maw?” lai deuh hian a ti a, a haw khan a lu a su nghal aniang a sam a kir buk leh chhup tawh. “Awm e..zanin chu nu ho inkhawm zan a nia, lo ţhu rawh” ka pa’n a ti dam thluam a, Maski ţhut ruala, “Dawr tur i kawhhmuh a, zaninah in va zawt chiang dawn niin ka lo hria a” a tih leh chuan, “Aw, chhunah khan a neitu ber a lo awm lo a, zana kal a ngaih phah a nih hi” a lo ti a, “Va en chhin ula, khawpui angin mi an tam dawn si lo a, a luah man a to viau chuan Remmawii tan awmzia a awm dawn lo a” ka pa’n a tih chuan, “Ka nu ka biak tir a, a to vak lo ang. Secondhand an dah tel duh thung a” a ti a, pawi ka ti lo nasa mai. An bungrua a awm ve chuan a to vak dawn lo a, secondhand te mai mai, ngaihtuah chawp ngai lo vin ţhutna dup ka nei nghal dawn tihna a ni mai.

“Hawh Maski, aieng buaipui hmain kal hmasa ang, vur siamna tur leh alu leh papawr pawh lei ka ngai. Kan khaw group ah tournament a awm dawn tih an post kha i hmu em?” phur zeta ka tih chuan, “Group ah ka awm ve lo a, inkhel tur chuan min lo sawm” zah hmeh deuh hian a lo ti a, “Tel ve ngei ngei rawh, inkhelh i thiam em kha. Thil zawrh pahin ţhialret semtuah ka lo ţang pah nghal ang” ka ti a, ka pa pawhin, “Ni e…tunhma aţang tawh khan infiamna lam hi i ti thei zek a, khel ngei ngei rawh, a hlu ve a nia” a lo ti bawk a, “Kan in fit tawh lo a” a ti tak nain a la inkhel thei viau chuan ka ring. Ti ţha duh phei se chu ram pawnah a kal ve daih tawh ang, inkhelh aiin bike siam te a duh zawk a, vai ramah te han inkhel se a hlawh hnem dawn nen, a hlawh tur awm ang zat a rukin ka chhut a, pawisa duh tih takah ka lo ui vawng vawng mai. Aizawl a awm lai te khan inkhelh char char tur a nia, a chawlhsan nghal daih a, a mawl tak tak a ni. Mahse keichu football te hi ka hrethiam ve vak lo a, hmuhnawm pawh ka ti lo, referee hi an hah thei viau ang tih chu ka hria a, card eng leh sen hi ka hrethiam nain card an hmuh tir chhan ka hre lo thung. Maski hi chu infiamna lam hi a ti thei deuh vek mai, a chhuanawm ve na lai tak a ni. Ti tak tak peih phei se la chu a fakawm tel ang a, a peih lohna lai tak hi ka ngei tlat. Ka ngaihtuah ka ngaihtuah a, footballer bialnu nih ka chak thut, Zir khu luih-a hi chu ngaihtuah loh hram hram ka duh tawh.

“Inkhel ngei ngei ang che” ka tih chuan a lo nui mai a, “U Lalhuma leh pu Taipuia te pawh nimin zing aţang khan exer an la a, an tlan fua fua mai an ti” nuihza aw zeta a tih chuan ka pa nen kan nui vak a, kan inah an rawn lang lo ka ti reng a ni.

“Inkhelh ve an tum tihna mi?” ka tih chuan, “Nobawihi team ho chu tel an tum vek. Pa Peka te phei chuan Nobawihi team te hriat loh a a ruka inkhelh theih a chakawm a tih nuah nuah reng kha. A phur berah an ţang si a, an ring lo ber bawk sia” a ti ve duah a, Nobawihi team, u Nobawihi zu in ţhin ho han daihzai zia hi chu aw, kan vengah an tam si, miin min nuihzat leh phah ngei ngei ang.

“Chuvang a nih chu Lalhuma pawhin ball boot a chah ni. An inkhel en a chakawm mange aw, pu Taipuia lahin a kalna apiangah a sawi dawn bawk si a, han tel tir loh ngawt kha a buatsaihtute tan pawh a nuam lo ang” ka pa’n a tih chuan Maski a lo nui hawk hawk a, “Fawnvela leh Sangkhuma hi tel an phal ta miah lo em ni a?” ti a ka pa’n min zawh chuan, “Phal lo aniang, anmahni pawh hian an ngaihsak lo. Tournament hi engahmah an ngai tawh lo hrim hrim” ka lo ti a, an phakar thei lutuk a, an thin a chhiain pakhatin buaina a neih chuan an ţang dun nghal zel a, phakar case in tel ve an phal tawh lo.

Dawr enfiah turin kan in aţangin Maski nen kan chhuak a, “Scooter in kal ang” a ti deuh tlat a, “Ka peih ziah lo” ti mah ila, “Ke a kal chi a ni lo, zana bazar a zu in ching hoin an lo chhaih che ang a, an man daih mai tur che a sin” tiin min sawi ţhaih a, kan khuaa hian hmelhriat ka ngah a, bazar a zu in ching pawh ka hre vek tho ang.

“Ka hlau lo emai” ti mah ila, “Inzirna zel a ni mai, nula pumpa scooter a chuan ngam loh te chu a, muang deuhin kan tlan dawn nia” a tih takah chuan amah vuan ţung chungin ka lawn a, “Ka kawrah chiah vuan rawh, ka nak kha khawih tawh suh” a lo ti nghal a, “Muang deuhin tlan ang che” ka ti a, kan tlan chhuak tawh nain a muang leh lutuk a kan tlan leh tlan loh hriat a har khawp mai. “In pakhat pelh chhung a va rei ve” ka tih chuan, “Muangchangin i tih kha” a lo ti a, kawng kal hmanhmawh deuh phei chuan min leh pel zel a, ţhenkhatin hnunglam aţangin, “I lo haw tawh elo Remkalam?” an ti a, ka chhan hma hmain min kal pel leh a, chutiang khawp chuan a khalh muang a, kawng a ţha bawk si, scooter a chuang chung hian milem pawh nalh deuha ka ziah theih ka ring.

“Tlemin tlan chak deuh rawh, kan thleng har lutuk dawn” ka tih chuan, “Engtianga chakin?” a lo ti a, “Chak deuhin, chak vak si lo vin” ka ti a, “Hriatthiam a har e” nuihza aw zeta a tih chuan, “Kawng kal tal hi lehpel ang. I tlan chak loh dan hi i tlanchak lo thiam ka ti e, what a very talented, ka mipa hriat tawhah i la tlan muang thiam ber” tiin ka fak a, a tlan chak deuh rual chuan a kawrah ka vuan nghet ve sauh a, “A tawk chiah tawh em?” a tih chuan, “Tawk teu teu khawp mai” ka lo ti a, a tlan chak hi chuan ka mawng a za vek zel a, hlauh lutuk vangin lu a hai vek zel bawk.

A nu ţhiannu te inkawtah a ding dat a, min luhpuiin a sawi fiah zung zung a, “I nu’n min lo biak a ka sawi ang kha a ni mai. Secondhand a la awm nual a” a lo tih chuan, “A pawi lo” ka ti ve nghal a, “Luah chu kan phal reng, i thiam thil te pawh chu kan la chhawr ve duh ang, min la tih sak ve dawn nia. Thla thar law law a rawn luah i duh leh i luah dawnah kan ti fai ang a” a ti dap dap a, a fel hmelin thla thar a lut nghal turin kan sawi fel der a, nuam chem chem tak a ni.

Haw lamah phei chuan thlamuang deuhin ka zai ham ham tawh a, luah man a to dawn bawk si lo, tournament chhung zawng thil ka zuar thei dawn bawk a, tun ţum chu ka duh dan takin thil a thleng ve tlat. Ka pi Binladari te in pengah scooter chu dahin kein kan chhuk thla a, ka tawlhthluk palh hlauin min veng uluk leh pek khawp mai.

Ka pi Binladari dawra kan lut chiah chu, “Awii ah” tih pahin a kutin min lo zap zauh a, “I lo haw hlimah te khan min lo tlawh ta che, i ngaihawm vung vung nen hian” a ti vel a, beisei nei ţawngkam a nih hi, mamawh a neih loh chuan min biak ţhat peih loh mai bakah min ngai hlawl lo.

“Enteh maw, tunlai chu powder diak hmehchhuah chi an zawrh hi ka hmang a, pu Sawia pawhin i hmai a eng min ti min ti mai. Ka lang ngo ve deuh em ni?” a lo ti a, “Aieng i inhnawih nasa a, i hmai a eng ţhang em alawm. Aieng i hnawih loh hnuah zawi zawiin i hmai eng a reh a, pu Sawian a hmu ngo che a nih chu” ka tih chuan a kuhva thel lai chawl meuhin hmui pet fuatin min en a, “Ka uang a” thlek deuh bar paha ka tih chuan za lo deuh hian a nui a, “Puipuii awm lai khan maw, ‘ka kuttin hi i kuttin i chei ang khan min chei sak ve rawh’ ka ti ţhin a, ‘nakinah’ a ti zel a, a pasal neih thlengin min tihsak ta lo a” a tih chuan, “I duh ve lo emaw ka tia” ka lo ti a, “Duh loh chang te chu nei e, duh thut chang a awm bawk a, nakinah min chei sak ve la” a ti a, “Kan chei dawn nia” ka tih takah chuan, “Thingpui in duh em? Wadi chhang pawh kan ngah leh tawh a sin” a ti a, a kuttin ka chei sak dawn chung pawhin a dawr thil min ei tir phal chuang lo.

“I chhang zawrh hi ka hmeh duh a nia pi” ka tih chuan, “20 man a nih kha, min dawr ve rawh” a lo ti daih a, “I kawm zia hi aw..i zawrh lai engmah min pe phal lo” ka tih chuan, “Hlep a tlem, pakhatah siki bak kan hlep lo” a ti a, ka va han awih lo chiang tak. “Duli pawh ti la ka awih lo ang, siki phei chu ka awih lo lehzual” ti mah ila, “Waiwai phei chu a bawmpui lianah khan cheng1 chiah kan hlep. A bawmpui a mi ei ţhen lo a kan hralh zawh vek chuan cheng1 kan khawl ve thei” a ti a, “I va han dawheh tak” ka tih chuan Maski a lo nui hawk a, “Meizial hi ka lo dawr ang che ka pi, silkcut kha aw. Remmawi, i thingpui hmeh tur chu la tel la” a ti a, ka pi pawhin meizial chu lo pe vatin, “Wadi chhang a awm ka ti ka tia lawm Remthawveng” a la ti tho a, “I ninawm ve chiang e..damchhunga wadi chhang min ei tir i tum em ni?” ka tih chuan, “I thih phah chuang nang” a lo ti then a, “Engmah a ngai lo, chhang leina tur chu ka nei” Maski hnena ka tih hnuah chhang chu ka la a, pawisa kan pe ve ve a, ka pi hnena Maski-an, “Chhang hi ka pawisa ah hian cut nghal mai rawh” a tih laiin, “A ngai lo, hei 20 nawi ka nei thlap” ka ti ve thung a, ka pi lah chuan min en tawn zak zakin, “Aw…i chhang ken lai hi Masiki-an lei se la, i lei tur va la leh la a ni mai alawm, a la tam em saw” a ti a, a phakar khawp mai, sumdawng mi tak a nih dawn ni. “Ka pi sawi ang chuan ti mai rawh” Maski-an a tih takah chuan a dang ka la ta ringawt a, ‘ka pi a boral chiah khan tar mai mai kan tih ţhin te hlut zia ka hria a, an han awm lo chu inchhung a ruak huai mai a ni’ a ti tawh a, kan pi leh pu te hi an thih hnuah chiah an hlutna kan hrethiam ve ang tih a hlauhawm.

“Thingpui lum buai lo mai rawh, alu hi ka thlang ang a, papawr kan tur ka duh bawk a” ka tih chuan, “A phek em ni?” a lo ti a, “A phek leh phek lo ka duh ve ve, vur pack na kha in zuar tawh lo mi? Vur sen ka siam leh dawn” ka tih chuan, “Kuhva pack na sarang hi hmang la, rubber in ţawn phui leh la a ni mai alawm” a ti a, “Dispo ang kha ka duh ve e, hmawlh dah tel theihna ang kha” ka tih chuan, “Chutiang a buaithlak, hmawlh pawh dah la vur bak an ei dawn lo. Aizawl ah reilote i awm a thil ni lo lo i sawi mai. Kan zawrh ang ang kha lei rawh” min ti zek a, “Aw le ka pi” tih mai loh chu sawi tur vak a awm tawh lo.

Alu ka thlan laiin Sangkhuma a lo la lut zui a, Maski nen a kan awmdun lai berkher hi a hmu thei si, “Rem herh hawrh-in alu a thlang bungbu turh turh a ni maw?” a rawn ti kher a, “Ka vawm chawrh mai tur che a nia, i duh dan dan hian min ţawng khum ve ziah suh” ka tih chuan, “Engtik lai aţangin nge fiamthu i huat ţan a? Bialpa i neih hnuah mi?” a tih chuan alu lian ber hum chungin a dinna lam ka hawi a, “Fawnvela leh Kalvari ten nupui pasal an nei tawh a, keiin bialpa ka nei a, i neih ve loh vangin min thik a nih kha” thinrim deuha ka tih chuan ngawi hle hle chungin min en reng a, min ti fek fek ţhin hi ka kham tawh em a ni. A hman hmanin min fiam ţhin mah se ngaihtheih loh chin ka nei ve tho alawm.

“In ho mai mai emai, nakin lawkah in nui dun leh hawr hawr ang a, ho teah inhau fo lo teh u, naupang pawh in nih tawh loh kha” ka pi Binladarin a lo ti hlauh a, ni lo se chu alu hian ka vawm chawrh ang ka ti a nia.

“Tunlai Sangkhuma khawsa zia hi ka ning tlat alawm. Mi awm mai mai lai in tawng in tawng reng mai. A siliper tiat lek rilru a nei a” ka ti leh hram a, ka kham hlur tawh.

“Inhau suh u” Maski-an a lo tih chuan, “Kan infiam ve dan a nih hi” ka ti a, Sangkhuma chuan engmah a sawi tawh lo, a adiiiidas kekawr kha a ha lehnghal a, naupang siliper tiat lek tawt deuhin a bun bawk.

Pawisa te ka pe fel a, kan kal dawnah, “Tumah ka thik lo che u” a ti hmuk a, “A ţhat chu, nakinah lo leng rawh, vur siam ang” ka ti a, a lungawi tawh emaw ka tih nen, “Vur lawm rual ka ni tawh lo” a ti daih a, Maski-a tan tak pawh a nuam duh lo viau ang.

“Sangkhuma nen hian in va inngeih lo sawt ve” haw lamah Maski-an a ti ta chiah reng a, “Kan ţhian ho kan kal hran vek a hlau a nih kha. Inkawm khawm reng a duh a, Kalvari leh u Rinchuchu-a inngaihzawn lai pawh khan a phun reng zel tho, mahse a kâ a nia, a duh duh sawi rawh se, a thinrim rei leh chuang lo ang” ka ti a, kan ţhianho hi chu inhau ve bawk ţhin mah ila kan thin a rim rei tak tak ngai lo.

In kan thlen veleh ka thil lei ho chu dawhkanah ka dah rui a, “Aieng buaipui hmasa ang” ka ti nghal bawk a, kan leng rei bawk a ka nu pawh a lo haw der tawh. “Zai paha ban ka phar khan ka kuttin mawi lam zawk hi ka phar zel” tiin a nui hak hak a, a lungawi khawp mai.

“I thawk rim si, Aizawl aţangin i lo haw a, pawisa hmuhna tur i ngaihtuah nghal char char a, i hah lutuk chuan nakinah i la bawk rawp mai ang” ka pa’n a lo ti ve thung a, keichu pawisa neih loh hrehawm ka tia, neih loh ai chuan ti a a rem rem thawk mai zel chi ka ni. Ka ţhiante pawhin pawisa puk tur an duh chuan keimah hlir min dil a, hei ringawt te hi a hlu a, kum20 ka pel tawh a, nu leh pa dil reng ka duh tawh bik lo. Lehkha zir sang lo ho hian a zir sangte tluk lohna tam tak kan nei nain kan phak ang tawk hna kan thawh chuan kan zahawm tho. Mahse keichu ka ho a, tuman min zah tak tak chuang lo.

Aieng kawr kan vel te te hnuah kan sil fai leh a, u Lalhuma pawh bialnu a nei tawh a, ka haw hnuah kan inah a lo la kal lo reng reng. Ka nu’n, “Pu Taipuian Lalhuma bialnu nei a thik a, inkawm reng siin an inhau reng mai” a tih chuan Sangkhuma ka hrechhuak zawk a, bialnu nei se, lungawi deuhin awm leh tawh se ka duh ber.

Aieng kan siam zawh hnuah vur sen tlem te kan siam leh a, khua a lum tawh a, tournament hma pawn ka hralh thei dawn tho tho. “Pa, vur kan zuar e tih inziak lian puiin siam tir a, kan in bangah ka bel dawn” ka tih chuan a lo remti thlap a, “Zawrh chhuah ngai lo va hralh theih chuan a ţha alawm” a ti a, ka nu erawh chuan a kut tin leh a mithmul lem bak a ngaihtuah lo.

Maski-a haw hnuah kan chetna hnu ka ti fai sawk sawk a, ka mu chiah tihah Fithangin min lo la phone zui a, “I tlan leh tawh em ni min lo va be tlai ve?” ka tih chuan, “Fawnvela leh Sangkhuma te thusawi ka hre ru a, ka hrilh chak che a” a rawn ti a, hei vang hi a nia u Zirbawnga nen a kan inţhen dan vel pawh midang ka hrilh duh loh, Fithangin a hriat ve chuan a pawi vek zel.

“Eng nge a?” ka tih chuan, “Maski an rel” a rawn ti a, ka chhan hma hmain, “Rel chiah pawh a ni lo” a ti leh a, “Engtin nge an sawi a?” ka tih leh chuan, “Ih maw…Maski hi a fel si lo a, Remkalami a mawl sia an ti” a tih hnuah, “Fawnvelan Sangkhuma hnenah, ‘hrilh duh tawh suh, amahin intawng harh rawh se, fel deuh anga a hriat chhung chu nangmah kha a ngei ang che’ a ti” a ti leh a, “Chuan engtin zel?” ka ti leh a, “A dang chu ka hre mumal lo, ka nu’n sachek min vil tir daih a” a rawn ti a, eng hi nge maw an lo hriat bik ni, a ruka ka ţhianten ka chanchin an sawi ka vawikhat hriatna.

“Min hrilh kher a, thu ţha lo lam chu ka hre chak vak lo a sin” ka tih chuan, “Aaa..Maski kha a lo fel lo maithei a, fimkhur thil thuah ka rawn hrilh che a nih hi. En liam tawp lo vin chik reng la, a fel leh fel loh a hriat mai ang” a rawn ti ve ngei a, u Zirbawngan min rawn la be chuang lo a, Maski nen mut a chhuah hma zawng kan inbe thung.

Zing hma tawkah u Lalhuma leh pu Taipuia te exer la haw an lo lut a, “Kan inkhel dawn a” tih pahin inchhungah an zuang kual thauh thauh a, “Zu in a eichhe hneh lutuk cheu a in in fit lo zo vek tawh a nih kha” ka nu’n a tih chuan, “Lalhuma hian ball boot a chah ve a, a bun thiam lo. A tawlh thluk phah zel a, ball boot a hnuai mam te a zawng vel” pu Taipuian a ti a, a nuihzat ve khawp mai.

“Red card leh yellow card te in hrethiam em?” ka nu’n a tih leh chuan, “Keichu red card emaw yellow card pawh min pe se field aţangin ka chhuak dawn lo reng reng. Nuam ka tih chhung chu ka tel lui tlat dawn” u Lalhuman a ti mauh mai a, “I bialnu ka hria a nia aw” ka tih chuan, “Huihui” a lo ti a, pu Taipuia nen hmui hup chung meuh hian an nui kur kur a, “Taia hian ka zar a zo a, kan khaw zu sial ber Nobawihi zu a thlawn hlirin a in” u Lalhuman intithei zet hian a ti a, ka pa’n, “Doctor in in tawh suh a ti a ni lo’m ni?” a tih pawhin, “In tur a siam na na na in loh a har em a ni ka pa Dite” tiin u Lalhuma chu a nui vur vur reng a, “Vur sen min dawr rawh u, nizanah tlem ka siam a, a khal tawh ang” ka tih chuan, “Vur senin chakna a pai lo emai, kan thlan te hi chhuak rawh se, inkhel tur kan nih hi” intivei deuh hian pu Taipuian a lo ti a, an landan leh ţawngkamah chuan kan venga inkhel thiam ber leh mi invawng uluk lutuk an nih duh hmel.

“Aizawl aţangin tawnzau ka lo hawn che u” ka ti a, thil ka hawn sak an hlau aniang, “Aw haw wow” an ti rual ţhawt a, pindanah lutin an tawnzau chu ka la chhuak a, “Inbual leh insuk peih zawk lalhuma hian a var hi nei sela, kei chuan a bal lang lo a dum hi ka duh” pu Taipuian a ti nghal zung zung a, “Taia hnung a bal lutuk a a khua a ti sik, a inbual a a dam daih” u Lalhuman a tih chuan pu Taipuia meuh pawh a ti tau bur bur tawh bik lo, ka tawnzau hawnsak chu an ha chhin vel a, nalh an inti em em mai a ni.

“Ka pi Binladari in lo pui ţha em?” ka tih chuan, “Pu Sawia nen an inngaizawng. Chhunah pawh, zanah pawh an awm dun tawh chuan an nui kur kur zel, ka pi Binladari phei chuan, ‘Sawibawih’ a ti kher zel” uar zetin u Lalhuman a lo ti a, a phuah belh nasa tih hre mah ila, “Ka pi Binladari meuh pawn bialpa a nei a nia, pu Taipui, ţang viau rawh” ka ti zauh a, “Ka inkhel anga a dik vek a ni mai. Footballer chu hmeichhiain an ngaisang emai, hmelţha vak lo pawh an luck vek” a ti a, “Eng hmingin nge in khelh dawn? Veng hmingin em ni?” ka pa’n a lo tih chuan, “Under 50 ah kan khel dawn” pu Taipuian a tih laiin u Lalhuman, “Pavalai angin a ni mai, mahse keini chuan pa lai kan paih a, valai group a nih mai chu” a ti a, an nui ham ham a, an inkhel hmuh a chakawm tawh khawp mai. “Referee in a duh duha min awm tir tum suh se. Inkhel peih kan inkhel a ni mai a, kan duh dan danin kan khel ang. A intih thu viau chuan hnek a ni mai” inpa zet hian u Lalhuma bawkin a ti leh a, “Midang bula ka awm chuan bomb ang velin ka hlauhawm a, Nobawihi bula ka awm chuan lapawchini ang vel ka ni. Einch chha, u Lalhumbawih a tih tawh chuan ka baw zawih zel” a tih leh chuan kan nui uar uar hlawm a, u Chiangan hnek a tum ţuma a hlauh zia ka hre tawh a, tumah a sual ngam tak tak awm lo emai.

U Lalhuma te hnu rei vak loah tukţhuan kan ei a, kan ei kham hnuah feh turin ka pa a chhuak nghal a, ka nu’n bathlar ah vaihlo buaipuiin keiin aieng ka buaipui ve thung a, “Aizawlah ka thawn leh tho ang” ka ti sauh sauh a, ţhahnemngai tawkin ka siam zui a, salon ka neih ve hunah phei chuan hmai sawisel apiang hnenah ka aieng siam hmang turin ka tia nga, ka hausa thur thur mai dawn a ni. Eizawn theihna tur thiam thil ka nei a, pasal ka nei peih lo nghal ringawt a, nula senior te dinhmun ka hriatthiampui nghal der tawh.

Aieng ka siam zawh hnuah Kalvari te veng lam dawra dah tumin ka chhuak a, Nunhlimi pawh ka la tlawh lo, ani lah a reh vang vang mai si a, a hmel a ţhat tehreng nen a inkiltawih tlat hi ka hrethiam lo. Nunhlimi hi chu hmelţha lar a lar ve ţhin kha a nia, pasal a neih te khan kan khaw tlangval ho an ngui bur mai. A hmelţhatna a hmang thiam lo lutuk a a nuthlawi der a nih hi.

Kalvari te inah ka lut hmasa a, “My friend” ti lauh chunga lut ka ni si, u Rinchuta lah nau paw chungin chhuat rah chim hlau ni awm takin a lo kal kual a, kan awmdan a lai kual vel vek mai a ni. “Khawiah nge Kalvari?” ka tih hma zawng min pe lo va, Kalvari awmna ka zawh veleh, “Pindanah a awm” a ti chauh a, a va han ţawngtlem ber mai tak. Maski pawh hi u Rinchuta lakah chuan zia tak a ni.

“Ka va ko ang” ti leh tawpin pindanah a lut a, Kalvari lo chhuak chuan, “Eng nge i khai?” a ti nghal a, “Aieng ka zuar leh tawh dawn a, min dawr ve la” ka ti a, u Rinchuta zawkin, “I aieng siam leh kan aieng hman hi eng nge a danglamna? Pack khat 15 man hi tui nen a chawhpawlhin inhnawih se a inang reng lo mi?” a lo ti kher a, “I uikawm a nih chu” ka tih chuan, “Uikawm lo, ka hrechiang chak” a ti deuh tlat a, “In ang lo tak a ni. Ka aieng zawrh hi aieng chauh a ni hleinem. Mi hriat ve loh chi ka pawlh a, miin an hriat chuan an siam ve ang a, ka sumdawnna a chhia a ni mai. Ka aieng siamah hian vitamin A-Z a awm. Vitamin ngeih lo an awm lo tih i hriat ka ring, hmaiin a mamawh zawng zawng a kim vek a, ngo nghal na a ni lo nain a thawk muang deuh hi a ţha. Vitamin A-Z hian hmai tana ţha serum te amahin a lo siam chhuak ve a, tinreng all in one face pack a nih hi. Hmai hnawih chi tinreng ţha tak tak a awm kim vek” ka ti mawlh mawlh a, uluk deuha a ngaihthlak hnuah, “Engati nge aieng i tih si?” a ti a, Kalvari ka melh zauh a, u Rinchuta hi chu khawlum lai hian a hneawm zualin ka hria.

“Aieng na na na aieng ka tih lohin, bawnghnute a nih loh hi. A ţhat zia sawi nan vitamin A-Z, tinreng all in one face pack ka ti a nih kha. Hmai phih tawpin chhuak pawh ni la nisat lai takin i hmai vun kua aţangin aieng hi a rawn insawr chhuak ang a, sunscreen aiin hmai vun a veng ţha zawk” uar zetin ka ti a, ka ti lui mai mai tawh thung.

“Aieng aţangin chutianga ţha chu siam theih se mi thiam ten nang aiin an siam hmasa zawk ang” a la ti tlat a, u Rinchuta hian min ring hlawl lo, ka lu a hai ka thi dawn pawh ti ila ‘luak rawh’ a tia nga, a duhtawk der ang ka ring. U Rinchuta ang em em hian tuman min la ring lo ngai lo.

“Ka dawr ve ang che” Kalvari in a ti hlauh zawk a, ni lo se chu ka ngei viau ang. A naute puak lah chu kan thawm a ring deuh nge a ţap a, “Ţah loh tur..bang rawh le, i la mu rei lo si, bang bang” a tih hnuah kun deuh paha a kut beng thakin, “Hau” a ti hluai a, “I hnunglamah i paw daih a, eng ang pawn lawm la a hmu thei nang che” ka lo ti nain an naute ţap chu a bang ve mai a, “A mak lutuk, a pa aw a hre bik aniang ka ti tawp zel. Hnunglama a puak pawn a mu lai lawm ang mai hian a lawm a, a bang ve tho zel” tiin Kalvari in min hrilhfiah a, “Chupawh nise fate mu duh lo ‘hau’ a ti kher kha ka hrethiam lo. U Rinchuta hi chu what a very dangdai a ni tawp mai, a hnung a a puak chuan lawm kher lo vin awi se a mu leh mai tur a nia” ka ti nang nang a, “Diaper i hren tir lo mi?” ding ngil auh chung hian a rawn ti a, chet pawh a che tawh lo.

“Aw, khua a lum sia ka khawngaih deuh a, a zunkhum che mi?” Kalvari in a tih chuan, “Khum hum hum e” tih leh inher a rual a, a kekawr hak rawngin a zir si lo va, naute zun luanthlakna chu chiang deuhin a lang thei a, tihngaihna vak awm hek lo, Kalvari nen chuan in enin kan nui tet tet a, naute a laksak a, a thlak fel hnuah pawh intifai turin bualinah a lut a, “Hriat chak ka ngah mai” Kalvari in a ti sap a, “Eng ber?” ka tih chuan, “Zep ţhen i nei, i awmdanah ka hre vek. U Zirbawnga hun ţha pek tum si a Maski i ngaizawng leh daih te hi a nangmah lo tlat. Bakah in inţhen dan i sawi kha a lem emai ka awih lo, chhan dang a awm chiang ngawt ang. Midang hriat i duh loh pawn keimah chiah min hrilh la, sawi dun ila” a ti sar sar a, “U Rinchuta kha” ka tih chuan, “Lo kal rawh, thlang lam pindanah khuan zuk ţhu lut daih ang, a dai nuam lutuk” a ti a, kan luh hnuah pawh a kal thlap a, sawi chhuah chak lo viau mah ila Kalvari hi chuan u Rinchuta hnen aţangin eng eng emaw a hre thei dawn a, ka hrilh hma loh chu min zawt sek dawn bawk. Ka hrilh ta vek a, u Zirbawnga leh a bialnu kha in khatah nupa ang chiahin an cheng dun ţhin tih kha chu ka zep tlat thung. Kha kha chu a zahthlak em a, tu hnenah mah sawi chi a ni lo.

“A bialnu hlui pawh chu a va ngaihsak ve. Bialnu hlui chu a hlui a ni mai a, a vau leh vau let ve se a ni mai alawm. Police ah ka report dawn che ti vel se la, mahse vai hmeichhia hi chu an kawlhsen khawp a, a luhlul tak tak phei chu a ngaihna an awm lo, film a misualnu rau rauah pawh vai misualnu hi an sual thiam thei bik. Ka va ngei reuh tak aw” a ti ve vang vang mai.

“Keichu maw my friend, ka duh tawh lo a ti nain a la duh thoah ka ngai. Thil ti sual zawk a hum a, a tuar tu zawkah a ţang daih a nia, engahmah ngai tawh lo se hetiang hian a ti awm lo emai. Tunlai hringnun hring hleithei lo hi ka hne ţhaks, Sangkhuma lah hi a thinrim reng a, hun remchang apiangah kan inhau” ka ti bawrh bawrh a, “Tunlai zu a in nasa hi hau ngei ngei rawh, keipawn ka hau ziah a nia. Fawnvela takngial pawhin Aizawl i awm hlan khan a zilh alawm. Concert te kha a awm a, rui tawkin a kal a, kekawr chiah a ha haw, a lukhum, pheikhawk, mawza leh kawr a ti bo vek, a ţawng sawt tehmai a nia aw, miin ţhing an tih hmaa sim tir vat a ngai” a ti a, tun ţum chu hmeichhia an tel lo, mipa hlirin hmeichhia min ti buai a nih ber hi.

“Tih ngaihna vak ka hre bik lo..sim tum lo na na na chu sim tir a har awm e. U Lalhuma te aţang pawh hian zu ţhat loh zia hriat ve tur a nia” ka tih chuan, “Ni ngawt mai. Nih leh Maski hi i duh ve tho nge u Zirbawnga runluih nan i hmang?” a tih chuan, “A tirah kha chuan runluih nan a hman ka tum a, mahse a sual thlak ka tia, ka hmang ţangkai leh lo. Keichu midang tana pawi tur ka tih hian ka inthiam lo nghal zel a, tumah ka ti na thei tak tak lo. Sangkhuma nen kan inhauh pawhin hrehawm ka ti leh ziah. U Zirbawnga pawh runluih tumna ka nei tawh lo, a phone number ka paih tawh a, mahse ka block lo” ka ti a, “A lo bia che em? Maski hi i duh tak tak tihna mi?” a tih leh chuan, “Be tawh lo, ka block miau lo a, min call thei a, message pawh min thawn thei, mahse a reh hmak. Inţhen hlen law law ţha a ti ve tho aniang, diktak chuan kan inmil lo em alawm, ka star lai kha a nuam daih zawk” ka ti a, a lo buk nghat hnuah, “Maski chu?” a ti leh a, ka ngaihtuah vang vang hnuah, “Min pui reng zel a, hmelţha ka tih bakah ka khawngaih tlat a, amak lutuk, kan inngaihzawn loh nan u Zirbawnga nena kan chanchin pawh ka hrilh vek, mahse ka khawngaih tho. A dinhmun hi ka ngaihtuah chet chet hian a hrehawm dawn lutukin ka hria a, pawisa lo nei pawh ni se a pa a be pha lo a, a nu lah hnaah a buai bawk si, a inthlahrung thei lutuk te hi ka khawngaih zual phah a” ka tih chuan, “I duh tak tak em?” a ti nawn leh a, “Duh e…ka duh alawm” ka ti ta nge nge a, ka inpuang vek a, a zawhna ka chhang zel nain khawngaihna aţanga duhna nge duhna aţanga khawngaihna tih hi keimah ber pawh hian ka hre lo a, ka chhang thei lo a nih ber hi.

CONT…

This Post Has One Comment

Leave a Reply