You are currently viewing KEIMAH, THINGTLANG NULA S2-24

KEIMAH, THINGTLANG NULA S2-24

Spread the love

KEIMAH, THINGTLANG NULA S2-24

“A ţha, duh hmak rawh. Nang aia a bialnu hlui thlang zawk tu hi ka ring hlawl lo. Bakah maw, i star lai pawhin an inţhen thei tak tak lo ang ka tia, i awih lo zel a” tih pahin naute thawmhnaw bal min pe a, ka piah deuh a dawhkanah ka vawm phei hmak a, “In suk reng a ngai, khawlum laia diaper hren tir ka khawngaih bawk si, pindan tinah a thawmhnaw a awm a ni ringawt” a ti leh daih a, “Star lai te chuan an ţhatna bak kan hmu ngai hleinem, an ţhat lohna an sawi pawhin kan hmuh ţhat zual sauh phah a, kan inngaihzawn chiah khan boruak a inthlak vek alawm” ka tih hnuah, “Rilru hah ve nak laiin ka nu lahin, ‘Parlour hranpa a ngai lo, buhzem ti ruak ila parlour ah hmang rawh’ a ti sek a, ka customer te an thak haw zel dawn a sin, ‘nalh chu a nalh a, mahse ka thak’ an tih chuan min pan nawn lo khawp ang” ka ti bawrh bawrh laiin a ri thlawrh a, phawk deuhin Kalvari lam ka hawi a, “A kua a ţha lo a, khawlum vang aniang” tim dai hian a lo ti a, ka hmai zawnah a fapa rawn pawmin a mawng chuan ka hmai a si chiah chiah a, a hnawng chap mai.

“Awii my friend, a kua a phits a nih pawhin i sawi khan ka hrethiam tho a, ka hmai si cheta a mawng rawn dah kher a ngai hleinem” tih pahin a thawmhnaw bal ka dah sawn tawh kha ka ban a, ka hmai ka hruk thuak thuak laiin Kalvari lahin min ngaihsak lo zet hian, “U Chuchu” a ti daih a, a hre thei lawk lo lehnghal, vawi thum vel, “U Chuchu” ring zeta a tih takah chuan u Rinchuta pawh a rawn lang hlawl a, “Eng nge ni?” a ti thum dut a, chanchinbu a keng vu bawk.

“I hman chuan wipes min lo lak lawk rawh hei a mawng lam a che leh tawh” Kalvari in a tih chuan, “Mawng tereuhte a nei a, a chet hlek leh kan chhung buai a, a ţha e, fa neih man a awm khawp mai” a ti deuh kher a, wipes nena a rawn luh leh hnuah pawh, “Kan Dawnfuha hi lo dam vat teh se, a mawng tereuhte hi lo phits phits tawh suh se aw” tih pahin a fapa biangah a piai zauh a, “Awii, ka va sil law law teh ang” Kalvari in a ti thung a, a fapa pawma a chhuak chu u Rinchutan wipes nen bawk a zui a, an chhungkua an tlem nen an buai khawp mai.

Mahni chiaha awm takah chuan phone ka en a, u Zirbawnga a la reh hmak a, pawi ka ti lo, Maski erawh chuan, ‘Ka nu rubber dah khawl sa vur sen sarang ţawn nan ka la vek’ tiin rubber tam deuh min rawn thawn a, rubber vang mai maiin hlim deuhin ka nui vur vur mai. Rubber hman loh min pek chuan pawisa a lei kher a ngai dawn lo a, ka pi Binladari lahin amah chiah ka dawr lohin min haw zel bawk si, dispo ang kha zuar an awm tho nain ka vur sen pack dan a danglam chuan ka pi Binladari a ti tau a ni mai.

Ka chhuah ve meuh chuan naute pawh an lo thlak fel der tawh a, u Rinchutan a pawm laia, “Khawi ka pawm ve dawn” ka tih chuan, “A ngai lo, i thawm a na si, a kua a phits lai chuan a chi loh, i pawm ê ang” a ti tlat a, “I uikawm emai” ka tih pawhin, “Ek su tu ka nih hi” a lo ti ve leh hram a, a va han ţawngthei sawt em em ve mawle.

“Tunlai chu kan buai em alawm Remkalam, inchhung leh khawlai tih fai reng ngai, naute kaw phits, ar chaw pek leh ei rel ngai bawk, suk tur tam thei si. Pasal neih hi tih namai a ni lo reng reng, ka hrethiam chiah. Pasal ka nei chiah chu e ka dream angin ka awm lo” Kalvari in a lo ti bawrh bawrh a, “Kan inneih hma a ka dream ah nau ek ka su bik lo” u Rinchutan a lo ti ve nghal zat bawk a, “Duat viau mah la Dawnfuha a nawm loh deuh hian thinchhe tlat zel suh” gas bula ding reng chunga Kalvari in a tih chuan, “A pum te hi a na lo ang tih tu nge sawi thei? Naupang damlo hi chuan engmah an sawi thei lo a, ti hian amahin a tuar a” a ti a, an nupa chuan ka entawn zak zak reng a, an inmelh rum ve nasa mai.

“Hnute hne lai a nia, i thil ei fimkhur rawh ka ti ţhin reng alawm. Hmarcha hi a hapin i hap a, Dawnfuha pumpuiin a lo hap ngam ve hleinem” u Rinchutan a tih phei chuan Kalvari in, “Ka hap kher lo, i phalna thlapin ka liak hlep hlep chauh zel. Hetiang hi a nia maw my friend, nupa nih tawh chuan pawnlam a kan lan dan ang ngawt hi a ni ngai lo reng reng. Dawhfuha nawm loh apiangin i hnute tui min tia, hmarcha leh saum i heh vang a ti ziah bawk a, ka hne ve ţhin” a tih hnuah, “Awii…ka ning lutuk thingpui a so, hman hun nghak la so chauh ta che” vin zet hian a ti a, a auin a au a ni ber. U Rinchuta laka a thinrimna thingpuiin a tuar daih a nih hmel.

“Thingpui kha a zak viau ang, mi so ţha hle hle lai han hauh ringawt” tih pahin u Rinchuta chuan nui vur vur chungin min rawn en a, ani hi an nu a chhaih thinrim lui em maw ni le? “Saum a hmarchapui bawl, hmarcha te leh saum inpawlh a khanghu bawl, king chilli leh nghathu rawt power hmangin Dawnfuha kua a phits. I heh tun tun em a nih kha, chaw aiin hmarcha i ei nasa zawk a, bai thak deuh tui lah i tui vawt in hmiah hmiah zel a, diktak chuan nau i neih dawn te khan hmarcha a chhuah tel ţeuh ka hlau ru viau a sin” a ti a, a fapa pawm chungin a nui vur vur a, Kalvari hnung chhawn zawnga ţhu a nih avangin a nui hmel a rawn hmu pha si lo, a thin a rim ngang mai.

“Khatiangin min ti kher suh, nau ek suk pawh chu i va la na awm ve. Pastor nih vanga fate ek suk loh tur tihna a ni hleinem. Zingkar aţangin ka buai a, zanah lah Dawnfuha nawm loh vangin ka harh zek a, ka mut ţhat lohna a rei tawh. Chhunah a mut theih chuang bawk si loh, tuktin khawlai phiah a ngai a, inleng lo chhawn a thingpui lum nen, inchhung tih fai reng a ngai bawk a, eirel a ngai bawk si, hunawl ka neih chuan nau ek ka suk tir ngai lo che. Nilenga mawng hun hman miah lo a chet chang te ka nei tih hre rawh aw” Kalvari in thinrim deuha a tih chuan u Rinchutan, “Aih” a lo ti a, a rukin a nui ruh ruh reng mai.

“Mipa hi in lo mak a nih hi. Kan inneih hlimah te kha chuan zingah pawh thawhhma a ngai lo i tia, ‘i hah lutuk ai chuan chawhmeh siam tlem mai rawh’ i tih loh leh, ‘i insu peih emai i suk sa tal ka lo zar ang’ i tia, kan innei rei a, min ngaihsak lo tial tial a, Dawnfuha nawm loh leh keimah min puh a, theih chu nise ka hnute tui hi nangmahah direct in ka rawn transfer ang” Kalvari in a tih leh chuan min rawn en pahin u Rinchutan a lei a chhuah zauh a, nui chhuak lo tura insum nasa deuh a ang bawk. Dawnfuha an va sil khan an inhau deuh emaw tih mai tur a ni. Kalvari pawh a chau a, a mu ţha lo a, chet reng a ngai a, a thin a chhiat phah a, u Rinchuta erawh a thinrim ve lo tih a hriat theih.

“Sahdah te i lo hmuam ru em ni?” u Rinchutan a tih phei chuan a no lak chu dawhkanah a nghat chawrh a, “Khawia sahdah mah ka hmuam lo, rimchhia ka tih nak laiin. Hmuam duh ni ila nu Nempachangi sahdah bur lian tawk a inhung luah reng a, Remkalami te ina ka kal apiangin cooker aia lian sahdah bur a inhung reng zel, ka duh loh vangin ka hmuam lo ber. Sahdah leh Dawnfuha kaw phits in inzawmna a nei lo bawk” a tih hlaih hlaih takah chuan ka khawngaih ta deuh a, “My friend, u Rinchuta kurtai ei ţhin kha a power a tawp tawh aniang, a bul aţangin kurtai ei ţha leh mai rawh se” ka lo tih chuan, “A chut a chut hian a sual ve pâng pâng a nia” a ti a, u Rinchuta a lo nui chhuak ta hawk a, “Hmarcha pawh a te te a thak an tih kha. Tereuhte si ran rual hnawt bo thei khawpa ringin i au nitin a, hetiang chuan beng dar ka mamawh hma viau ang” a ti a, “Tak taka ka uang a nih kha Riri, au ring tak tak mah la ka tihpalh sorry” a tih pawhin Kalvari a la tum bar tho a, “In awmdan hi a nawm hmel vel e. U Rinchut, i kurtai ei kha a thawk tak tak em? I ţawngkam thlum lutuk chhanah hian eng nge i puh ber?” ka ti hial a, “Engatan nge i tih?” a tih chuan, “Kurtai vanga zaidam leh ţawngkam thlum i nih chuan Sangkhuma hian ei ve se ka duh a, tunlai chu a chhe tun tun lutuk a, min hmuh rualin a thin a rim nghal zel a, kurtai ei ve se a zia mai ka ring” ka lo ti a, “Engtin nge a tih ţhin che?” a tih leh chuan, “A tam mai, ka kawm duh tawh loh a hlau a bialpa ka neihin a thin a rim zel alawm. Pasal pawh nei ila ka kawm reng dawn tho sia. Ka ţhiante ngaithei lo tu chu ka nei dawn lo tih te hriat ve mai tur a nia, a nihna takah chuan ka ţhian a nia, keimahah chuan a lalber reng” ka ti niah niah a, ka thutak ve tehreng nen, “A ngaizawng che a nih chu” a lo ti then a, “Awi..aw haw wow, beisei loh chhanna wow a nih chu a” ka ti a, Kalvari pawhin, “A ngaizawng awm lo e…Sangkhuma te chuan Remkalami aiin ngaihzawng a nei hmasa zawk. A thin a chhe ve hrim hrim a, kan ţhian ho kan darh a hlau bawk” a lo ti ve a, “A dik chiah. Sangkhuma hian min ngaizawng se chu kawr ţet hnuang te, kekawr tluan sei zawng inchen lo te a ha reng lo ang. Siliper lah tereuhte te tawt deuhin a bun reng a, a siliper tet zia hi ka sawi ţhiam lo, a kezungţang hian a siliper hi a ţham bet tlat a ang ber. Hna a thawh a a ke a balh phei chuan siliper a maimawm lian pui bet a ang, Sangkhuma hian min ngaizawng se chu a siliper a thlak ang” ka ti lang lang a, ka ţang khawp mai.

“In awrawl hian lu a luh bik. Ka pi Binladari leh nu Nempachangi ten beng dar an la mamawh lo hi a mak khawp mai” ban charhin u Rinchutan a lo ti daih a, “Awii awii awii bengdar an mamawh hlawl lo ang, keini aiin an au ring daih zawk. Ka pi Binladari phei chuan ka pianpui bengdar hi waterproof a nia, thawm bengchhengin a ti chhe thei lo bawk a’ a tih kha” ka tih chuan, “Ka pi Binladari te chuan sakei pawh a hlau hleinem, hmana sapui a che nasa a nia fimkhur rawh u an tih ţhin lai te khan, ‘lo kal teh se, ka lo bin let erh mai ang’ a tia, vawkin bulah a riak ngat a sin” chhuang takin Kalvari in a lo ti ve a, “A chin tam chi loh ang, sapui nen an in nanchin tak tak chuan hmanni a a ha lem vuah thar pawh kha a zuah lo ang, a ei zo vek ang. Hrilhfiah a ngai a nih chu” u Rinchutan a lo ti charh charh a, “I hrilhfiah poh leh a inla huai dawn. Hrilh lo la sapuiin a seh lo a ni mai” ka ti a, Kalvari lahin thingpui a chawk rei si, “Thingpui kha chini i chawk sawm nge chawh daih i tum?” ka tih veleh, “U Chuchua vang vek” a ti daih a, “Lo kal ru thingpui in ang u” a ti leh a, tuman kan hnial ngam tawh lo.

Thingpui inlai berkherin u Rinchutan, “Sangkhuma chuan a ngaizawng che aniang” a ti leh a, ka thingpui inlai ka hak ţhelh a ni. “A va mak teh ho e aw, min ngaizawng se chu a siliper a thlak ang ka tih kha. Ka hmuhah a inti nalh ngai lo” ka tih chuan, “A nihna ang angin a ngaizawng che a, a nihna ang angin lo pawm rawh” min ti a, a u nen ngei kan inkarah awm a awm tih a hre reng sia, kan buaina pawh a rawn ngaihven chuang lo, u Rinchuta hi chu a rilru a tluang a nia aw.

“Remkalami hi tunlai i luck hrim hrim, mahse luck deuh siin pasal sual deuh i neih ka hlau ber, pastor meuh pawh an famkim lo a nia” thutak deuha Kalvari in a tih chuan, “Mawi lo ţhin ve, a hmingin pastor te kan ni ve a” u Rinchutan a tih rualin Dawnfuha tal deuh chhen chu a ţap ta nge nge a, “Kha, i ţawngthei lutuk a a ning che a nih kha” Kalvari in a tih laiin u Rinchutan, “Hmaichhana thu khuh deuh a min rel vang a nih kha” a lo ti fiamthu ve thung a, Dawnfuha chu Kalvari in a la a, u Rinchuta pawhin a ţhutna sawnin Kalvari si chetin a ţhu a, Dawnfuha kutah a vuan bawk a, an nupa chu ka en ka en a, thingtlang nula hi thingtlang nu ka ni ţep tawh ka tih rilruk ţhin kha ka sut leh, an nupa hian pasal neih min ti chak lo, Kalvari in nuam lo a tih chu a nuam lo a ni mai.

“Dawr chu engtikah maw i luah luh dawn?” Dawnfawha kut khal neuh neuh chunga u Rinchutan a tih chuan, “Nia ka sawi thuak ringawt a, an lo ti fai ang a, tournament laia thil zawrh ka duh bawk sia, thla thar aţang law law in ka luah lut ang” ka ti a, thla hnih luah man tal pek lawk ka duh bawk si, zawrh nasat a ngai khawp ang.

“Aieng man pawh ka ba, dawr tinah ka dah leh ang a, ka in tuak leh ngat ngat dawn. Ka inkhawl tam tehreng nen ka hmang zo vek tawh” ka ti a, ka ngaihtuah chet chet hian ka rilru a hah.

“Lungngai suh, ka kuttin leh ke tin min chei sak ve la, a thlawnin a ngai lo, pawisa ka pe thlap ang che. A hranpain ka pui thei si lo che a, i taimak chuan i la hlawhtling em em ang” Kalvari in a ti a, u Rinchuta pawhin, “Ni e, Pathian malsawm tlaka thawk te hian Pathian malsawmna an dawng ţhin. Zirlaite pawh malsawm tlaka an zir chuan an result a ţha mai. Result chhuah dawna ţawngţai vakin awmzia a nei lo, mihringin theihtawp kan chhuah hnuah Pathian a rawn che ţhin. Pathian hian kan awm mai mai pawh min ven tlat laiin kan thawh ai thawk tur a ni lo va, kan thawk ang a, Pathianin min pui ang. Helai tak hi kan hre fuh lo ţhin a” a ti charh charh a, “A dik chiah, mahni in en miah lo a mi sawisel tawp te kan hrat a, kan sawisel hma hian ani aiin ka ţha bik em tih te inzawh hmasak tur a nia, kan sawisel pawhin an rilru ti na lo zawngin sawisel ila, social media a chak tawh a, mi kan sel bawih bawih a, kan sawisel a ten an lo hmu ve zel a, an awmdan kan duh loh chuan an insiamţhat theihna tura sawisel tur a nia, ţha ber awm ang zia zanga ţawngkam na tak tak a kan sawisel hian tumah an ţhat phah lo, kan duhsak tak tak a nih chuan insiamţhat duhna an neih theih nan kan sawisel ang a, kan zilh zawk turah ka ngai” ka lo ti ve a, ka rilru a a awmna a rei tawh a, ka sawi chhuak ngai lo mai mai zawk, ka thutak ve hian miin min nuih daih zel a, ni lo se chu sermon hluah pawh ka hreh reng reng lo. Ţantu a min ruat ve pawhin ka ţawngţai laia meng ru duh tawk an awm zel a, thla te an lo la ru a, kan khaw ho hian engahmah min ngai lo, tu pawhin thutak pai ve lo turah min ngai a, ka khua a sik ka tih pawhin i uang an ti zel a, ka ho ţhang lutuk a mi ka hauh pawhin a tam zawk chu an nui daih zel.

Ka haw lamah Puitea nen kan intawk nawlh a, a mit duk chur ka hmuh chuan, “Aw haw wow, tu nge i mit khuaikhem?” ka ti hluai a, “Ka hnek ang che” nui chung hian a lo ti a, “I mit kha a duk bial kulh a nia,i mitah full moon tattoo i chhut tir em ni?” uang zeta ka tih chuan, “Eng tattoo mah a ni lo Remkalam, ka nupui hi a kutthlak a lo na em a ni” a ti chuai raih a, “I nei ve ngawt a nih kha” ka tih chuan, “Rui phur thil tih a nih kha. Miin ‘i senior tawh’ an ti sup sup a, Dr. Balunga leh u Rinchutan an duh si lo a, Dr. Ruatdika lahin nupui a nei daih a, ruih phur laiin inneih puiah ka sawm a, ani mipa ngaizawngtu tlachham tawh si khan a lo aw hmak a, eee…Remkalam, tunlai ka rilru hah zia chu maw, ţhen ka duh a ka chhungten an phal si lo a, a tlan pawhin an ko leh zel a, nupui pasal neih dawn hian fimkhur a lo ngai a nih hi. Kan nu hi rui chung lo chuan ka hmu peih lo reng reng” a ti nuah nuah a, “Aniang, kha i puam ul tawh alawm. I ngo bawk si a, i tai hlur a, naupang lawm i ang vek tawh. Naupangin tui hmel an ti ngawt ang che” ka ti a, ka khawngaih tho bawk si, “Hmeichhia pasal nei fuh lo in khawngaih a, mipa, nupui nei fuh lo te hi min khawngaih ve ta che u. Hmeichhiain kut thawha mipa an fiamin in nuih a za a, mipa in hmeichhia kan fiam ve in in thin a rim leh daih a, in mak si” lungawi lo deuha a tih chuan, “Ka khawngaih reng che aw, ruih phur laia nula hmuh remchan apiang nupui atana sawm tawp chi a ni hleinem” ka tih hnuah, “In nu a rai tiraw?” ka ti leh a, “A kua a puar mai mai aniang” a ti then a, han sawipui vak tur pawh ka hre tawh lo.

“Rui lo vin ka hmu peih lo a, che thei lo khawpin ka rui zantin a, rilru hah a zia deuh nan ka rui a, kan nu kut ka tuar ziah thung a, ruih viau chuan ka khawih na ve thei lo, a sam a keh a ni mai” a tih chuan, “Ih maw Puite, i rilru a la puitling lo va, i duh vak loh nupuiah i nei bawk a, a siamţhat theih hleinem. Pathian hmaah in intiam thlap tawh a, in inţhen leh si chuan Pathian hma a dawt sawi in ni dawn sin. Nupui pasal neih dawn reng rengin inngaihtuah chian hmasak phawt tur. Pawnlam ah chuan kan ze ţha lai chiah kan lan chhuahtir ţhin tih te hre ve ta che. Puitling lo deuhin nupui i nei a, i ruih reng phah a, innu nen in insual a, i hneh leh mang si lo” ka ti bawrh bawrh a, “E…zu ka in nasa em alawm. Ka taksa chak loh phei chuan drip ka khai tawp, chaw ka ei thei lo” a ti a, a chal a dawm vang vang a, “Ruihhlo hian eng natna mah a chhawk thei lo. Zu leh damdawi te, ganza ten kan natna ti dam thei se damna damdawi an siamchhuak nang. Ruihhlo tih hian ruih lai chiahin a nuam a, ruih loh hnuah kan na zual sauh a, a ngawl vei a na bawk si, ruihhlo in hmangaih ang hian ruihhlo hian a hmangaih ve lo che u, nun ti tawi tu, thlan khur thlenga hnuh luh tum tu che a nih hi. I beidawn laiin ruihhlo bel reng reng suh, ruihhlo hian hmalam i panna tur a dal tlat dawn a nia. Nat laia belh tlak leh rintlak ber Pathian belh nachang kan hre lo ţhin hi alawm mihringin chhiat lam kan pan zel nachhan” ka ti duah a, a cher si, a puam bawk si, hmana Puitea ka hriat kha a ang tawh lo.

“U Valdiki hi damchhunga i nupui ni tawh tur a nia, inngeih lo, hrehawm ti reng reng a awm ai chuan sawi dun ula, insiamţhat tum ve ve rawh u. A nih loh chuan i chhiatpui nasa dawn lutuk, rui deuhin i thi thek mai tur a sin” ka ti leh a, ka dara dawm chung hian a chal a dawm leh a, a lu a thin ne ne hnuah, “Han hmangaih thei ila aw…aaaa…ka ruih lai khan nupuiah ka lo sawm zawk lo che a ni” a tih chuan, “Mai mai a che…i ruih ber lai pawn min sawm la ka nei lo ang che” ka lo ti a, “Chuvang takreng chuan alawm ka lo sawm zawk lo che a ni ka tih. Nang chuan i duh dawn lo a, min lo hnar dawn a, Valdiki chu an chhungkua in min be ţha nghal huam a, ka chhungte ka lo hrilh hman bawk si, a nu phei chuan lawmthu te min hrilh a, a thi a hul hmaa pasal a neih loh an hlau ni berin ka hria” a ti a, zu rim a la nam em em zui a, “Kalvari ka ngai e” a ti thul, “Kalvari khan kei aiin pastor Lal u Rinchuta thlang lo se chu zu ka rui reng lo vang” a ti ţuau a, “I ţap vel ange aw, a lum si, ka peih miah lo a nia. Ruihhlo ti ho hian in ruihhlo tih chhanah midang puh daih zel suh u. Mi vanduai tak tak ruihhlo ti lo an tam, tuman zu an tulh lui lo che” ka ti khar khar a, “I thin a chhe si, engmah i sawipui theih loh” a tih chuan, “Kan sawi ţeuh tawh kha” ka lo ti vat a, “Naupan deuh laia i nu’n makpa atana min duh theih zia kha ka hrechhuak” a ti leh a, “I vanduaina hmang ţangkaia min bem tum suh. Ka ning, keimaha nangmah khawngaihna awm hi i ti bo ange, kal teh ka haw dawn” tih pahin na vak loin ka nam a, “Bialpa pawh i neih loh kha” a tih chuan, “Ka nei rapthlak, min be tu an tam si, ka indaih lo. Chini fanghmirin an bawm luih luih ţhin angah ka inchan tawp tawh tih hre rawh” ka ti tan tan a, a la nui zui.

“Eng nge nuihzatthlak?” tum bura ka tih chuan, “I cute mai pawh a ni lo, i square” a ti a, “Hmh” tih pahin sam leng siau khawpa nain hmalam ka hawi vut a, “Zu i in leh chuan ka kawm tawh lo ang che” tih leh kal ka rual a, “Dr. Balungan nupui a nei dawn” ti a min auh zui takah chuan hawi let lehin, “Ka care lo chawngkawr tawih tawih lutuk” ka ti vak a, “Pasal atan i duh em kha” a tih chuan, “Dr. Balunga neih ai chuan mi lu phut hiat a inhlawh pawh ka duh zawk” ka ti a, kan nuih dun hak hak hnuah ţha deuhin kan inthlah a, kan in ngamtlak a, kan in vin vak vak pawhin ‘ka hmangaih che’ tih naah kan ngai zel tho.

Ni hnih vel a liam leh chuan kan in kawtah ‘vur kan zuar’ tih kan tar vang tawh a, ka inhralh thei nasa mai. Cheng5 man tih kan tar tel reng chungin cheng1 man rawn ti tlat te an awm ţhin a, u Lalhuma leh pu Taipuia pawisa nei lo, lum ti ve bawk si phei chuan pakhat chiah leiin an inbun a, pawisa ka induhthaw lai a nih avangin khawngaih vang mai maiin tumah ka belh phal lo. Ka nu leh pate bakin a thlawnin an ei thei lo a ni tawp mai a ni. Mahse, rin loh deuhin ka pi Binladari a lo lut hlawl a, aieng lo buaipui mawlh mawlh chunga, “Ka nu a awm lo” ka tih chuan, “A awm ka ti hleinem mawle aw” a ti a, “Vur i ei duh em? Nang chu a thlawnin ka pe ang che” ka tih leh chuan, “Ngawi rawh, vur chu ka ha nen an inngeih lo emai ei lo teh ang” a ti a, ţhutthleng dûpah a ţhu a, keipawh aieng pack a ka buai vangin ka ngawi reng a, darkar chanve dawn ngawi renga a ţhut takah chuan, “Ka pi, eng nge i duh a? Ka pu in a ma che em ni?” inthlahrung deuhin ka ti a, “Inţhen rual kan ni tawh hleinem” a ti bawk si, “Ka nu i nghak em ni?” ka tih chuan a ţhutna aţangin a tho a, choka lamah rawn pheiin min si chetin a ding a, ka dara kheuh zeuh pah hian, “Enteh, i nu mithmul kha a mawi ka ti. Kei hi chu nulat lai aţanga inchei lawm reng reng ka nia, naupanlai, mizo in hmaihnawih an la hmelhriat hma te khan meihawl ka rawt dip a, ka mit chei nan ka hmang ţhin” a ti a, a beisei ka hre nghal vek.

“In mak ka ti e…Puipuii awm laia ti duh mang si lo ka zir zawh veleh in ngen sup sup a” ka tih chuan, “Min tih rawh ka ti ka tia, a peih hleinem mawle. Kalvari in ‘khawpuiah an uar lutuk, nang aia tar tawh te pawhin an mithmul an siam tir sup sup zel a, thlalak ah ka hmu ziah’ a ti” a ti a, a inenkawl peih em avang hian a kum ngaihtuahin a la tar chhe lutuk lo a, miin a kum an hriatin mak an ti zel. Mahse, “I tar tawh nen i peih rei ka ti e” ka ti tho a, “Eng nge min pek ang?” ka ti leh a, “Wadi chhang ka ngah ka tih kha, a hrisel ber. Esi chhang i duh pawhin a awm a” a ti a, uikawm si, mi thil duh si, “Zanah ka tih sak ang che” ka tia, a haw nghal nal nal mai alawm. Kan veng bikin thil kan intihhmuh tawh hi chuan kum lam a pawimawh tawh lo, hei vang hi a nia dawr hawn vat vat ka duh ni.

Zanah Maski a lo kal a, bel lianpuia vur sen tur ka lo chawh hliau hliau laiin dawhkanah sarang a rawn dah a, u Zirbawngan min lo la be lo a, Sangkhuma nen chuan inhau reng mah ila kan inkawm tho. “Karleh tournament a ni tawh” a rawn ti a, “Khawi ka lo chawh chhawk ang che” tih zawm zatin ka dinna lamah a rawn phei a, “Ni tawh e…kan siam khawl ţeuh loh chuan kan buai ngei ngei dawn. Kan fridge mai bakah Kalvari te, ka pi Binladari te ho fridge a dah vek a ngai. Sangkhuma leh Fawnvela te fridge ah chuan a dah chi loh, an ei ru palh ang” ka ti nghal bawrh bawrh a, “Kan fridge ah pawh a dah theih” a tih chuan, “I chhungte” ka lo ti vat a, “Inhnuaia mi zawk kha kan hmang ngai lo, keiman tui ka dah vawt a a ni mai” a ti a, ka lawm viau nain an inhnuaia mahni a kal a ngaih ka hlau, a thim si a, a pi thlahrang ka hlau a ni ber. Maski-a pi anga pitar thlahrang in fit ka hre ngai lo, Maski-a pi tih hre lawk lo phei ila chu pasalţha emaw ka ti hial ang chu.

“Alu leh papawr siam a ngai bawk a, kuhva ka zuar tel dawn em mawni le” ka tih chuan ka nu’n, “A ţul lo Lalremmawi, pawisa i duh luatah i hriselnain a tuar mai tur a sin. Pawisa men hian meng suh” min ti hrep a, “Maski, nangpawh zawrh tur a sawi apiang lo ngaihtuahsak nghal zel suh” a tih zawm zat a, Maski nen kan inmelh ru zauh a, a bul hnaihah kalin, “Hrethiam rawh, a nulat laiin Hallelujah chorus an rem a, a thaw ţha hman lo aniang nikhaw hrelo in a awm phah a” ka ti sar sar a, a beng rawn dawh hnaih paha, “Engtin maw?” a tih chuan, “Hallelujah chorus an rem a, a ţan lutukna lamah a thaw ţha hman lo a, nikhaw hre loin a awm” ka ti nawn leh a, lo nui hawkin, “Sarangah a thun theih tawh ang” a ti daih a, a ţul chin chiah sawi a tum ţhin a, Maski bula awm chuan ngawih reng a awl lutuk.

“Ka thun anga lo ţawn rawh aw, i thiam zawk” a tih laiin Sangkhuma a rawn lut a, thutak deuha, “Lo kal teh Remkalam” tih leh pawna chhuah lehnghal a rual a, ka ngaih ţha lo chu ka chhuak ve vat a, “Eng nge a?” ka tih chuan, “Hmanniah Nunhlimi fapa an rawn lak hmaa Nunhlimin u Zirbawnga phone number min dil ka tih kha i la hria em?” a ti a, “Aw hria e, Vday ah a nih kha, kolasib a an chhungte biak pawhna tur a duh a lo zawh sak rawh i tia, chutia tih kawi duah ai chuan u Zirbawnga phone number pe la aman zawt rawh se, u Rinchuta phone number te pawh pe la ka ti a nih kha” ka lo ti a, a nihna ang angin ka lo la sawi thei thlap a, khami ni khan keiman phone ka ngaihsak tehchiam lo a, u Zirbawnga leh Maski te chiah ka bia a, Nunhlimi khan keipawh min rawn dil a, Sangkhuma a dil hnuah chiah message ka hmu a,Sangkhuman min lo call hnuah a ni nghe nghe. Zawh kual sak aiah u Zirbawnga leh u Rinchuta te phone number pe la, aman zawt mai rawh se ka lo tih avangin ka hrechiang khawp mai. Sangkhuma nen an inpe tawh a ka tia, Nunhlimi message kha ka chhang let lo tih ka la hre bawk. En let tur pawh a la awm vek ang.

“Tunlai i hrisel ţhat lai a ni em?” a ti leh daih a, “Awii..pawimawh deuh i sawi dawn emaw ka tia ka hrisel leh hrisel loh min zawt daih a, ka hrisel lai tak a nih hi” lungawi lo deuha ka tih chuan, “A ţha, ka thu hrilh tur hian a ţhawng dawn che a, hrisel loh laia ngaihthlak chi a ni lo” a ti leh te te a, “Sawi vat mai teh, ka thawk ţek ţek chhung chu eng thu pawh ka ngaithla thei” ka ti a, chutah a phone phawrhin whatsapp ah a lut a, u Zirbawnga tih a lo awm kuau a, “Nupui a nei dawn em ni?” ka tih chuan, “Dawn nang, hei en la, Nunhlimi thlalak min lo thawn a, ‘hei hi in khaw mi tiraw? Ka hmu tawh thanin ka hria, mi hmel ka chhinchhiah thei vak lo a, ka hriatsual palh takin tih thuah ka lo zawt che’ a rawn tia, ‘Nunhlimi a nih hi’ ka lo ti a” tih pahin a chhanlet dan chu min entir pahin a kawk a, “Ti hian a rawn ti leh a, ‘Mi hi vawihnih vawithum ka hmuh tawh te pawh ka ngaihven zawng an nih loh chuan an hmel ka hre lo leh ţhin a, kan khuaa a nu te biakpawh theih dan ngaihtuahpui turin min rawn ti a, an hming kha ka nute hnena ka zawh pawhin an hre si lo va, a ngaihna ka hriat loh thu ka hrilh hnuah ka fahrah lutuk a, lo be ve ţhin che ila a pawi em, ka fa ka chan a, tumah ka nei lo a rawn ti chamchi a, chhun khawlum laia ţap lai lem min rawn thawn te a ching a, ka rawn zawtfiah mai mai che aw’ a ti” tih leh pahin u Zirbawnga message chu min entir a, keipawhin a chhiar pahin ka lo chhiar ve zel a, “Thlalak i lo thawn hi kan ţhiannu a nih hi. Kan khuaah i lo kal khat tawh a, i rawn awm reng lai khan khaw dangah i awm a, i hre lo mai mai aniang ka va tia, a pawimawh ber chu maw?” tih pahin min din hnaih a, “In ţhiannu phone hmang hian Remsialin min rawn bawl em ni? a ti” a ti chiah chu, “Awii ha” ka ti vak a, “Min va han ring chhe em em ve mawle. A thlalak lo thawn kha tunah pawh Nunhlimin dp ah a la hmang reng alawm. Kan ţhiannuin a biak vang maia ka bawl emaw han tih. Nunhlimi pawh hi a va ti mak ve a, ka zawt siah siah dawn khawp mai” ka ti bawrh bawrh a, ka bawl emaw a tih vangin keimah min zawt lo vin Sangkhuma a zawt daih a, Nunhlimin a biakna kha keimah emaw a ti tihna a ni mai.

“A fapa kha a thi em ni?” Sangkhuma lahin a ti heu a, “Thih loh kha, anpa ten an la a nih kha. Hetiang a nih chuan an inţhen chhan a sawi pawh kha ka awih tawh lo reng reng, kan inkawm nasat tehreng nen a mak e” ka tih chuan, “Hei vang hian alawm mi ring vat lo tura ka hrilh ţhin che. Naupan laia inkawm tih mai mai, mihring chu kan danglam ţhin. Ţhian mai mai tam deuh neih ai chuan ţhianţha tlem neih a ţha zawk. En ta che, ka ţhianţha i tih ve chhenin a ruka a phatsan che hi” a ti a, ka awmdan thlengin a danglam ve vek thei. U Zirbawnga lahin keiman ka bawl emaw a lo tia, Nunhlimi pawh dawheh per pur lutuk mai, “Sangkhum, message hi i siam chawp em?” ka tih chuan, “Ka hnek ang che” tih pahin min tin uai a, “Hetiang ka siamchawp thiam i ring em ni? Phuah pawh ka phuah chawp thiam lo. I inven theih nan a rang a rangin ka rawn kal a nih hi” a ti pung pung a, “Ka chaw ei a tui dawn ţan chauh tihah buaina a awm zel a, ka ning, min lo rek hlum teh” ka tih chuan, “I damlai pawhin i nasa a, i thla phei chu a nasa lehzual dawn, nang berkher hi chu a theih chhung chu thi suh, thaw char char rawh” a ti daih a, thawk hak pahin ka awm zawi hnawk a, “Nunhlimi chu aw” ka ti vang vang a, bialpa te phatsan nih aiin ţhiante phatsan nih hi a lo hrehawm zawk daih a nih hi, ka na vawng vawng mai, u Zirbawnga nen kan inţhen pawhin hetiang hian ka awm lo.

Ka ţhut hnawk rualin ka hmaah a rawn ţhingţhi a, ka chau nghal vekin ka hria. Naupan tet aţanga inkawm kan nia, khaw danga pasal a neih vang chauhin kan hrang. Min lo biak loh vangin ka be lo a ni mai a, a rawn let hnuah kan inkawm leh tho a, an inchhunga Valpuiin buaina a siam pawhin ka ţham chhuah sak a, ka haw hnuah kan la inhmu miah lo va, u Zirbawnga a biak ţhin vangin a inthlahrung aniang, ka haw tih chu a hriat daih tawh ka ring. A tshirt tur ka hawnsak pawh ka la dah ţha a, sumdawnna lama ka buai vangin ka la pe hman lo mai mai zawk a ni.

“Hetiang hian i awm dawn tih ka hriat vang a nia u Zirbawnga phone number min dil ţum pawha ka rawn thlap che ni. Ţhianten min phatsan chuan rilru a na duh a sin, tikhan i hrethiam tawh em?” vin hauh lo va a tih chuan, “Bialpa ka nei a ni mai a, ka ţhiante ka phatsan chuang hleinem che u” ţap ţuau hian ka ti a, “Message kha ka delete ţhen zawk a nih kha. Nunhlimin a biak dan ţhenkhat a rawn sawi phei chu hria la i rilru a na zual viau ang. U Zirbawnga ţawng theih vang a ni lo va, nangman i bawl emaw a tih vanga rawn sawi a nia” a ti dap dap a, “Lalnunhlimi chu a chak lo ang chu aw” ka ti a, Kalvari ang chiahin ka ring a, ka duhsak tehreng nen min phatsan hi ka rilru a na, lehlama awrdum lehlama awrsen kan tih ţhin ang mai a ni.

Ka mittui in tih tlak dawn chuan ka mitmu a inkawm a ngai ang ti pang pang ţhin kha ka mittui a tla ve ngei a, ka zak zawk. Thil dang hmangin min phatsan chu nise thuhran, u Zirbawnga berkher a lo be bawk si a, mi fate pawh nise an rilru a na ve awm emai.

Maski-a lo chhuak lah chuan, “Ngati nge ngati nge?” tih sawk sawk pahin ka biang tawn tawnah a rawn dawm a, ka bulah a ding ve ran a, Sangkhuman, “Nunhlimi vang mawle” a tih chuan, “A damlo em ni?” a ti hu a, group khatah kan awm ho vek a, kan infiam bawrh bawrh zel a, Maksi pawh hian min phatsan a ring teuh lo mai. Sangkhuma lahin zep lem lo vin, “U Zirbawnga a lo be nasa a” a ti mai a, “Khai aw..a va zia lo ve” a ti a, sawi zui vak tur a hre bik chuang lo.

“Eng nge bathlarah in tih reng? Vur va siam ta che u” tih paha ka nu a lo chhuah chuan ka hmaa ţhingţhi mek Sangkhuma a ding nghal zawt a, Maski pawhin a kut la letin min din hnaih a, ka mittui ka tuai fai lai chu ka nu’n min hmu fuhin, “I ţap elo? Sangkhum, in lo inhau leh tawh em ni a? Rum deuhin i rawn ko chhuak a, eng nge thil awmzia ni a?” a ti nghal chul a, ţhenawmten an hria ang tih te a hlauhawm.

“Kan inhau lo” Sangkhuman a tih chuan, “Ka awih lo reng reng. Thil ho mai maiah Lalremmawii a ţap ve mai mai ngai lo. Ani meuh a ţah tawh chuan thil liantham deuh a thleng tihna a ni mai. Sawi rawh, i hau em ni? Engtin nge i tih? Chhan awm lo vin tumah a tibuai ngai lo va, ţah tir zawih zawihtu chu ka khing zel dawn a nia” ka nu’n a ti pang pang a, ka pa’n, “Lo lut rawh u” a rawn tih takah chuan ka tho a, keimah ka lut hmasaber a, Aizawl a ka kal hma pawhin a fapa thil tur kan thawn a, thil tam deuh ka leisak nghe nghe a, ka thil tih sak kha ka inchhir lo, a ruka u Zirbawnga berkher a lo bia leh, tumah nei lo ang mai a a insawite khan min ti na ber. Ka mi rin deuhin min tihnat a hreh lo tih ka hriatna hian min ti na a ni ber.

“In buaina chu sawi rawh u” inchhunga kan luh ruala ka nu’n a tih leh chuan kei leh Maski leh Sangkhuma te chu kan ding tlar ţhap a, “Nang chu keimah min ringhlel daih a” Sangkhuman a tih chuan, “Ko chhuak hek che, in awm bo vang vang hnuah Maski a lo chhuak ve chauh a nih kha. Ka rawn chhuah ve lahin Remmawiin a mittui a lo hru mawlh mawlh a, nang bak rinhlelh tur an awm hleinem” ka nu’n a tih hnuah, “I siliper tet tet nen” a ti tel leh kher a, “Naupang an in vawmchhuah a, ka siliper pangngai ho an lo ulh chhe vek alawm. Kan buainaah ka siliper tel ve kher suh” Sangkhuman a lo tih chuan, “Nih leh eng nge in buaina chu?” ka nu’n a ti ţha leh a, “Remmawiin sawi a phal leh phal loh a ni mai” Sangkhuman a tih leh chuan Nunhlimi a ankhum hrep hlauin, “Aizawl a ka ţhiannu leh a bialpa an inţhen a” ka ti a, ka rilruin ka uang a ka ti nghal hmak bawk.

“I ţhiante inţhen vang mai maiin i ţap lo vang, ka awih lo reng reng” ka nu’n a tih chuan, “A rawn ţap a, Sangkhuma phone ah min rawn bia a, Kalvari pawh a ţah chuan ka ţap ve ziah alawm” ka tih hnuah ka rilruin ka uang a ka ti leh a, ka nu’n min en vang vang hnuah, “Vur va siam rawh u” a ti a, ka pa erawh chuan engmah a sawi ve lo.

Vur kan siam lai pawhin Maski-an min en zeuh zeuh reng tih ka hre ru reng a, kan ngawih reng hnuah Sangkhuman, “Ka peih tawh lo e a” tih leh din a rual a, ka nu’n, “Tihpui rawh, an meng rei lutuk dawn” a tih pawhin, “Ka peih lo, nang lah hi i duh hun hunah min hau a, min mamawhin min be ţha leh duam a, ngawi renga hnathawh ka peih hleinem” a ti bur a, “Min bia la kan chhang mai dawn che alawm” ka lo tih ve chuan, “Biak ngam pawh i nih per pur loh kha” a ti vin hlur a, “Thingpui lum pawh tum lo, ngawi renga hnathawh char char ringawt a ninawm emai” a ti leh a, lungawi lo deuh a a chhuak chiah chu ka pa’n, “Sangkhuma leh Remmawii hi an inhmeh ber mai” tiin a nui huah huah a, Maski-a mitmei ven nachang a hre lo reng reng.

Maski-a haw tur chu bathlar thlenga zui chhuakin kan ding leh rih a, “Eng zawkin nge ti na che?” a tih chuan, “Duhthlan tur pawh i sawi hleinem” ka lo ti a, “U Zirbawngan a lo be ve kha nge Nunhlimin i bialpa a lo bia kha?” a tih tak fakah chuan, “Aw…kan inţhen tawh miau a” ka ti a, tawitea nuih pahin ka koki ah a rawn tawk zauh a, “I tana mi pawimawh pahnih an nih vangin i na a nih kha. I pawm duh lo maithei a, u Zirbawnga hi i paih bo thei lo niin ka hria” a ti a, ka nu te an la men ve vangin zawitein a ţawng bawk.

“Nunhlui a ni tawh” ti hmak mah ila, “Nunhlui chu nunhlui a ni mai a, kan nunhlui a tel ve ţhenkhat hi damchhunga paih bo theih loh an awm ve a, Dindini, ka bialnu hlui thi ta kha ka la theihnghilh bik lo, a tel lo nundan ka zir thung a, mihring chu damchhunga inzir tur kan nia, i la duh a, in inkawp a rem tawh lo a nih chuan a tel lo a nun zir rawh, a nih loh chuan hrehawm i ti reng mai ang” a ti a, kan thusawi thlak thleng nan a, “Nih leh Nunhlimi engtin nge ka tih ve ang?” ka tih chuan, “Kek hrep rawh” a lo ti a, kan nui dun leh thei tawh a, “Awii…ka theihnghilh” amah ben pawp paha ka tih chuan, “Min ben khan i hriatchhuah phah mi?” a lo ti fiamthu a, “Ka pi Binladari bulah zaninah mithmul lem ka vuah sak ang che ka tia, ka theihnghilh daih, a thin a rim viau ang” ka tih chuan, “A lawm a ho e” a lo ti a, mak tih hmel deuha, “Pitar vun chuar tawhah a bet ve thei mi?” a la ti zui a, “Afaki beauty studio ngat a zir ka nih hi, hmanrua min ngaihtuahpui vek a, a hman ang chiah ka hmang. Vun chi hrang hrang, chât khi phukah pawh a bet thei vek” ka ti tan tan a, “I sam pawh kha Lanfelin duhtawkin han suasam phei se chu i chhe lo lehzual viau ang” tih pahin a samah ka tuai a, lu kir buk tih takah a dup ul mai.

“Ehh…Remmawiin min fak ve” a tih zawh rualin, “Einch chha” tih pahin a ban puam laiah ka kawk zauh a, “Chha chha” uang thuang zeta tih pahin ka tih ang chiahin min kawk ve zauh a, “Midang i lo biak ve chuan ka phin darh vek dawn che a nia aw” ka tih chuan a nui hawk hawk a, “Karleh hi ka piancham a nia, chaw lo ei rawh aw” phur deuh hian a ti a, naupang hlim deuh a ang ber. “Ka ţhiante i sawm ve dawn chuan ka lo ei ang” ka tih chuan, “In vaiin lo kal ru. Kalvari fapa pawn a theih tawk rawn ei rawh se” a ti fiamthu a, “Muttui le goodnight” ka tih hnuah inchhungah ka lut a, kan chetna hnawk vel ka tih fai hnua ka mut rualin Nutein min rawn call a, Maski vangin ka inthiam chiah lo. Nunhlimi ka haw em em a, keipawhin ka ţhiannu star ka ngaizawng tho sia, thinrimin ka lo va tawng nghal vak ang tih ka hlau zawk. Hei hi a nia mahni in en hmasak phawt hnua midang sawisel chauh tur ka tih nachhan.

“Awii my friend” ka tih chuan, “Enteh my very friend, ka inti pa tawh dawn lo bialpa ka nei” phur hmel zet hian a rawn ti a, “Thil ka hrilh hmasa ang che aw” ka tih chuan, “Sawi la” a lo ti ve mai a, “Maski nen kan ni daih a sin, pawi i ti em? U Zirbawnga nen kan inţhen a, engkima min puitu a nih bakah ka khawngaih a” ka tih chuan, “Ti lo nasa, bialpa ka nei ka tih chu mawle. In in a a lo len ţuma a en dan che kha ka hrethiam vek alawm” a rawn ti a, “Ka hrilh che a ka thawl huai mai” ka tih hnuah Nunhlimi thil tih kha ka sawi chhuak a, “Ka rilru a na a, mahse ankhum hrep bak tih theih a vang sia” ka ti a, “Vang nang aw…a va zakthei lo em em, ţhiante bialpa a ruka lo ngaizawng duh che chu zuah suh. I hlauh loh zia leh thinrim zia hriattir nan naktukah an kawtah thing va ek rawh” a ti a, kan nui har har mai.

“Ka bialpa chu maw, gym hrik ang hi a nia, a sek peng pawng teh mai a nia aw. Salman Khan leh Rambo leh Arnold te hi an pathumin ţawng kawp pawh ni ila ka bialpa ban sek an tiat chuang lo ang. Sek tak a ni, thinrim a ţhu puak pawp thei ang chi kha. Mahse, hei ka sek mah mah tawh a ka mal a in nawt ţhin a tia, a lo len dawn pawn a malah tel a chulh mawm hmasa phawt zel” tiin a nui awr awr a, “In khuaah awm ve ila chu e…Nunhlimi i tih chu ka zuah lo ang. I cho lo mi? Insualpui ta che” a tih leh chuan, “Mipa vanga insual te chu ka duh bik ţhaks lo. I zir tluang zel em?” ka ti a, “Tluan chu ka tluang a ka thiam thei lo, ka chhungten u Afaki leh Lanfeli te pawisa an pek belh a, a thiam hma chu tlawmngaiin lo zirtir tlauh tlauh mai rawh u an ti” a tih chuan, “A remchang tawp. Karleh hi Maski-a piancham a nia, tshirt ţha ve deuh hlek pek ka duh a, ZD Garments ah khan lo en sak la min lo thawn teh, pawisa ka lo thawn ang che. U Faki dawr aţangin a hla chuang lo a, mipa thawmhnaw chu an nei ţha ber” ka ti duah a, “Ka lo en sak ang. Vawiinah pawh ka bialpa nen kan kal, sek deuh hak chi pawh a tam mai” a rawn tih chuan, “Theihnghilh miah suh” ka ti a, “U Zirbawnga hi” a tih chuan, “Kan la inbe leh lo reng reng, a ngawih chhung chu ka ngawi thei, ka tuar a chhel alawm. Min ngaihtuah duh suh” ka ti ve luam a, “Han inbiak takah chuan i ngaihawm e. Ka hman veleh ka lo zin ang, ka bialpa ka lo hruai dawn nia” a ti chu ka phur khawp mai.

Zingah u Zirbawngan min rawn be hlawl a, message in a ni thung. ‘I ţha zel em?” tih zawng a rawn thawn a, ‘Hmelţha a chhiat theih mi’ ti a ka chhanlet chuan nui lem a rawn dah tuar a, ‘Vawiin eng nge i tih dawn?’ a rawn tih chuan, “Aieng leh vur ka zuar dawn” ka ti leh mai a, ‘I bialpa thar nen khan mi?” a rawn ti kher a, ‘Ni e…min ngaihsak alawm’ ngeiawm deuh turin ka ti let ve a, min rawn chhang tawh lo.

Thirzai a aieng pack ka thil nghauh nghauh laiin Sangkhuma a rawn lut a, “Buai lai lai a inhauh ka peih lo a nia, phone i chhang lo i tih takin phone ka khawih hman lo” ka lo ti nghal zung zung a, Fawnvela a rawn lang zui nghal bawk.

“Maski-a an man a nia aw” Sangkhuman a tih chuan Fawnvelan, “Nia” a lo ti ve vat a, “Ka hnathawk ţha hle hle lai min rawn bawl suh u” ka ti a, an lam pawh ka hawi hman lo. “Kan hmu alawm mawle. Ka pa ten damdawi ti ţhin Renga kha an man a, Maski a sawi tel ve alawm” Sangkhuman a tih takah chuan ka hlauthawng ve ta deuh a, “Engati nge Renga chuan a kawh ve ringawt a?” tih pahin an lam ka hawi a, “Kan ti ho ţhin a ti. Maski hian Aizawl a mi a ţhianpa tlem te tein a inthawn tir ţhin an tia, tuman an check ngai lo a, tlem te te phei chuan inthawn a awl viau ang” Fawnvelan a tih laiin, “Ka pate hian thil an hria a, kawp suh ka ti ka tia lawm” Sangkhuman a lo ti ve thung a, “Mahse Maski te chu sum an nei a, a fihlim pawlah a ţang ang. Kut an thlak ve ngam pawh ka ring lo” Fawnvelan a ti a, a piancham a thleng ţep tawh bawk si, “Jail ah an tan tir dawn em?” hlauthawng deuh a ka tih chuan, “Maski chu a tan ka ring lo, midang chu ka hre lo, tang lo mah se home a an dah ka ring, Maski-a tel lo in” an ti a, ka chaw ei a tui dawn apiangin boruak chhiain min nangching ziah. “Keiman ka man hma chu ka awih lo, Maski hi damdawi lehzela inhnamhnawih duh chi a nih ka ring lo” ka tih chuan an ngawi reng a, tunlai chu hringnun hi a aw haw wow lo a ni ber e.

CONT…

This Post Has 8 Comments

  1. Donaldcom

    Fashion, luxe, hedonism
    The best fashion application for hypebeasts and stylish people.
    Style news, events. Last collections, collaborations, limited editions.
    https://lepodium.in/

  2. Jefferydor

    Полностью важные события индустрии.
    Абсолютно все новости мировых подуимов.
    Модные дома, бренды, высокая мода.
    Самое приятное место для модных хайпбистов.
    https://luxury.superpodium.com/

  3. VictorOvamy

    Очень свежие события мира fashion.
    Важные мероприятия всемирных подуимов.
    Модные дома, бренды, гедонизм.
    Лучшее место для стильныех хайпбистов.
    https://sneakersgo.ru/

  4. FrancisTet

    Очень актуальные события мира fashion.
    Актуальные события известнейших подуимов.
    Модные дома, торговые марки, haute couture.
    Интересное место для стильныех хайпбистов.
    https://sneakerside.ru/

  5. Richardbup

    Наиболее актуальные события подиума.
    Важные эвенты самых влиятельных подуимов.
    Модные дома, торговые марки, гедонизм.
    Приятное место для модных людей.
    https://sneakero.ru/

  6. PhillipKat

    Самые стильные новинки индустрии.
    Важные новости всемирных подуимов.
    Модные дома, бренды, гедонизм.
    Самое лучшее место для трендовых людей.
    https://fashionvipclub.ru/

Leave a Reply