You are currently viewing KEIMAH, THINGTLANG NULA S2-25

KEIMAH, THINGTLANG NULA S2-25

Spread the love

KEIMAH, THINGTLANG NULA S2-25

“Engtin nge kan tih dawn?” an pahnih a melh tawn zak zak chung hian ka ti a, ka ding hluai tawh a, ka lungphu a in fast forward leh char char tawh bawk. Nunoin thil ru a Kalvari a puh lai te ka hrechhuak a, ka hlauthawng em em mai a ni.

“Maski a tel ve chuan a bialnu i nih vang hrim hrimin an man ve ang che ka ring. Aizawl a mi a chah ţhin an tia, nang lah Aizawl aţanga i lo hawna a la rei si lo a, man tur chein an lo kal ţep tawh ang. Thu an zawt fiah che ang a, i chhan thiam loh phei chuan home ah emaw jail ah i awm ve dawn tihna a ni mai. Supply tu bera an ngaih phei che chuan jail a nih ka ring mah zawk” thutak zeta Sangkhuman a lo tih chuan ka sa nghal pup a, hlauhthawn sa nen hlauthawng tawh tak ka ni. Maski a lo leng ngun si, kan inzui ngun bawk si, Fawnvela ka en a, thutak deuhin min lo en ve ran a, police berkherin thu min zawh fiah phei chuan ka hlauh lutuk luatah engmah ka sawi hleithei lo ang.

“Engtin nge ka tih dawn? Police an inrawlh dawn tihna mi?” ka tih chuan, “Dawn e, no4 a nih hi an buaina, police ber an inrawlh lohin, ka hrilh ka hrilh che alawm” Sangkhuma bawkin a lo ti leh a, “An man sak a te hi home a an dah loh leh an chhuah a, a vawrh tu ber hi an man daih duh em em mai lehnghal” a tih zawm zat bawk a, “Awii….what a very heart attack, ka hlau emai, no4 chu hmuh pawh ka la hmu hleinem. Eng nge min zawh ang? Chhan dan tur tal min ziah sak ula en lo a sawi thei turin ka zir nghal char char mai ang” ka tih chuan, “Engtin nge kan hriat ang? Police kan nih loh hi” Fawnvelan a lo ti a, ka tha a khur ru nghal dar dar a, an sawi hmangah tel ve ka ang bawk si, police in min man ta ang se ka nu’n min vuak belhchhah ngei ang a, “Ka lu an nawr kawlh angem?” ka tih leh chuan, “Nawr kawlh maithei, kan khuaa no4 la lut tu angah an ngai dawn miau che a, hrehawm ti deuh a an siam che ka ring” Sangkhuman a lo ti leh a, “Awii…ka sam a sei ve tawh tehreng nen, ka rilru a hah e, ka hming lan loh dan a awm mai lo mi?” ka tih chuan, “Maski te in an dap vek ang a, a hmelhriat hnai chu an dawp vek bawk ang, in in pawh an rawn dap maithei. Pastor quarter ah kan leng ţhin bawk sia, keini chu sawi loh, u Rinchuta pawh thu an zawt fiah ang” Fawnvelan a ti a, khaw lum sa nen ka kutphah a thlan dup a, jail an sawi phei kha chu ka rap hluah hluah a ni tawp mai.

“U Rinchuta chu an ringhlel awm lo e, thu an zawh fiah chuan mipui an thinrim viau ang. A chhang thiam vak dawn bawk si lo” ka tih chuan, “Kha kha a nia pawi ber, u Rinchuta te chuan keimahni bulah ‘No4 in lo keng ţhin maw? Arin bul velah in dah ţha em? In la kawl chuan pe rawh u’ a ti daih dawn a, u Rinchuta vangin kan vaiin min man thei, Kalvari pawh naute nen lockup ah a riak ve lo ang tih a sawi theih loh” Fawnvelan a lo ti leh a, “Renga pawh chu a va ngeiawm ve a, a duh chuan rui mai mai se la, Maski mawhpuh kher a ngai hleinem. Kan vaia jail a kan tan phei chuan kan hmalam hun a chhe vek dawn a sin” ka tih chuan, “Chu chu alawm pawi, jail tang sa an sual thei si, nang phei chu lu kawlh mulin i lut ang a, i lu lei an ziak rang ruai reng mai ang. An tuai pulh pulh loh leh an beng lawlh lawlh che ang a, chawhmeh a chhe dawn ropui si” Sangkhuman a lo ti a, ka chil ka lem dawk a, rilruin ka ţawngţai nghal char char a, damdawi vel an man hi chuan an chhui kual nasa ţhin tih ka hre ve vek a, Maski ber an man chuan min rawn chhui thleng ve dawn chiang sa.

“Thih der mai ka duh. Aaa…lo kal ru, counter ah kal ang, tlai lam sumo chhuak tur a awm leh awm loh en ila, a awm chuan Aizawl ah chho leh mai ang u” ka tih chuan, “Maski hi thlah i tum ta em? An man tawh bawk si a, thlah hmak i tum em?” Sangkhuman a lo ti a, “Tum nang, an man a ni mai a, dawtin an puh mai mai pawh a ni thei. A mal em hi, a pa a awm lo a, a pi a awm lo bawk a, a nu lahin ngaihzawng a nei reng a, a naute lah an thak hiar a, pawisa nei mah se tumah ngaihsak tak tak tu a neih loh hi. Miin en hrang vek mah se ka en hrang ve dawn lo reng reng” ka ti bawrh bawrh a, “Aizawl ah chho ang u i ti sia” a lo tih chuan, “Aww…min man ve hmain Aizawl aţangin chanchin kan ngaihven mai dawn alawm” ka ti a, ka hlauh ve tawh tehreng nen dawhkan ka tihfai sawk sawk lai chuan an lo nui hawk hawk a, ka che pawh ka tawp chiang hle.

Rum zetin an pahnih chuan ka melh a, “Dawt in sawi em ni a?” lungawi lo deuha ka tih chuan, “Maski chu an man ngei a, mahse nangchu an man ve lo ang che, keini pawh min man dawn lo. I phatsan phah duh angem kan tia kan zawt mai mai che a nih kha. I duh loh danah Maski hi i lo duh viau a ni maw? Jail ah a hnuk lut thei che tih hrerengin phatsan i tum chuang lo a nia” tiin Sangkhuma chu in aţangin a chhuak a, “Chanchin kan lo hrilh leh ang che, tunah chuan an man ho chanchin kan han ngaihven leh phawt ang” a ti a, “Mak deuh chu maw Fawnvel, no4 rui chu an bu luk luk zel a, Maski chu engtinmah a awm ngai lo” ka ti leh hram a, “Bung luk luk chungin an chhing duar duar vek kher lo an tih ţhin kha” a ti a, Fawnvela pawh a chhuak ve nghal a, min ti hlauthawng hman alawm mawle.

“Mi buai lai lai a dawt ringawt rawn sawi a ngai em ni?” tiin au zui mah ila an hre phak tawh kher lo ang. Phun nang nang reng chungin ka thil tih lai ka tih zawm a, Maski ka ngaihtuah ru angreng viau bawk.

Ka zawh veleh ka pi Binladari te dawr lamah ka kal a, kuhva rah a cheh laia ka thawm hria a a rawn hawichhuak chu, “Hmh” tih pahin ka din lohna lamah a inher hmak a, “Ka buai lutuk a i mithmul ka la khawih hman lo, ti tau kher lo la pi, hei aieng ka lo dah leh duh a” ka tih chuan, “I aieng kha chawhmeh kan nan bak a tlak loh. Rawn dah tawh suh, ka thil khai dang a hliah ţhin” a ti hlak hlak a, “I thil khai dang hliah lo thei ang berah ka lo khai ang” ka tih chuan, “A kil berah hian khai rawh, ka hmuh theih turah khai hlek suh, in naupanlai zawng zawngin mi neih ang in neih loh hlauin kan buai a, in han puitling ta cheng a, pi te duh pawh tihsak thei hlei lo” a ti a, a duhthaw khawp mai.

“Ka hman veleh ka tih sak ang che, ka rilru buai ve zia hi aw” ka tih chuan, “Ka awih lo chiang emai, engmahin i rilru an ti buai pha ve lo, i thawveng em em reng ringawt a, thusawi pawh i ngaithla ngai lo” a ti a, “Ka thawveng reng bik lo” ti mah ila, “Reng” a lo ti hmak a, a phal lai chuhin a kil berah aieng ka khai a, ka haw nghal nal nal a, kan in kawta Maski-a lo ţhu ka hmuh chuan ka pawh ngam lawk lo. Hmanah ka pu pakhat hian damlai thla a nei ţhin a, ka hlauh em vangin min thlamuan nan ka pa’n, “Hmun dangah a awm tih hre reng chunga i hmuh thut chuan kut i thlak dawn nia” a ti ţhin a, u Lalhuma pawhin, “Ka pi damlai thla pawh ka vaw reh tawh, a hmunah kal rawh tih tur a nia” a ti tawh a, an fiamthu nge an ti tak tak tih hre lo mah ila buhzem bula mau intung chu ka ban a, a rit vak lo nain a sen ţha a, bathlar a ka phei kher ngai lo vin ka hawlh phak ang. Sangkhuma te khan an man an ti si a, police in an hruai hmasak dawn phei chuan rawn let lehna hun a la awm lo hrim hrim. Thlahrang hi ka hlau a, damlai thla hi chu tlemin ka hlauh dan a nep deuh a, tlemin ka pan hnai deuh a, ani lahin ngawi rengin min lo en a, “Kal rawh, kal rawh, a hmunah kal rawh, shooo shooo shooo, hetah chuan a theih loh, kal la, a hmunah va kal rawh” tih pahin ka mau ken hmawr chuan ka hawlh zawt zawt a, ka hawlhna lai apiang na tih hmel deuha dawm zel chung hian, “Ngaithla phawt rawh” a ti a, damlai thla an ţawng theih leh theih loh hre lo mah ila, “Kal rawh, a hmunah va kal rawh, heta i awm rei lutuk chuan a taksa nei tu a thi ang, hmanhmawh deuhin kal rawh” la hawlh zawt zawt reng chunga ka tih chuan mau a lo man bet a, “Eng nge i hriat a?” mak tih hmel zet hian a ti a, mau chu a pawt pah bawk a, damlai thla an inhruipawh awm ka hre ngai lo va, Maski-a tak tak a nih ka ring ve ta nge nge a.

“Nangmah tak tak i ni em?” ka tih chuan, “Tu dang nge ka nih chuan ang? Ngaithla phawt la i duh leh min hawlh leh dawn nia” a tih takah chuan mau chu ka dah thla a, “Thla i ni lo tiraw?” ka tih leh chuan a lo nui hawk a, “Thi mah ila chhun khawlumah chuan ka hrang peih kher lo ang” a ti a, ka pan hnai vat a, “An man che mi?” ka tih chuan, “Inchhungah” zawitein a lo ti a, ka nu a awm lo bawk a inchhungah ka luhpui a, a kutin ka ban a rawn tawk zauh a, a kut a lum danah thla chu a nih loh hmel. Ho te teah mi nuihzatah ka insiam reng mai, lo au hmasa ila ţha tur.

“An man che mi?” ka ti leh a, fridge a tui vawt la chhuakin no nen ka pe a, a ban ka hawlhna vel kha a pilh ve nuan mai. “Man tihah lo kal lawk teh an tia, hall ah ka kal” a ti a, ka tui pek chu a in te te hnuah, “Lo ţhu hnai rawh” a ti leh a, tui hial a in takah chuan hlau tawh lo vin keipawn ka ţhut hnaih a, “Engtin nge i lo haw theih? Midang an haw tir tawh em?” ka tih chuan, “La haw tir lo, ka nu’n min rawn hruai” a ti a, a sawi zel dawn emaw tih laiin a ngawi leh tlat tawh a, “No4 i rui ţhin em ni?” ka tih chuan, “Aih, Renga te kha ka chahsak ţhin. Aizawl ah ţhian ka nei a, ka chah sak. Thil dang min thawn ang deuhin an rawn thawn ţhin a, hlawh ka nei lo a, ka ti ve lo bawk a, Renga te an fimkhur seng lo a nih hmel” a ti ve duah a, “Engtin nge i lo chhuah theih?” ka tih leh chuan, “Ka nu’n a sawi fel thei vek” a ti a, “Min rawn thawn ţhin te hming ka sawi ve thung a” a tih leh hnuah, “Mahse hming dik lo ka hrilh” a ti a, engmah a zep lem lo a nih hmel a, a hmel en hian no4 rui ţhin hmel a pu lo bawk.

“An man leh che ange aw” ka tih chuan, “Man tawh lo ang, ka chahsak tawh lo ang ka tih thlap kha” a ti a, tui bawk chu a in leh a, “Hria an tam em?” ka tih chuan, “Renga te an man chu an hre nual ang, keichu ka hre lo le” a ti a, hrehawm ti leh hlauthawng angin a awm lo a, a thusawi chu ka awih vek, inhnamhnawih thuk se chu a nu vang mai maiin an rawn chhuah lo tawp ang.

“No4 chu engtin nge a awm a?” ka tih chuan, “4 lianpui a ni mai” a lo ti a, “Awii…min tih mangan tehreng nen uang lo mai teh. I ti ve lo tak tak maw?” ka ti nawn leh a, “Min kawl rei ve loh hi” a ti a, thingpui ka lum sak laiin ka nu a lo haw a, “Maski, in buaina kha eng nge ni a?” a rawn ti nghal a, hria an lo tam ngei a nih dawn hi. “Chah sak turin min tia, Aizawl a mi ka chah sak” tih zawngin a chhang a, “Chah sak tawh reng reng suh, i nu paw’n, ‘Malsawmkima mawl lutuk hi chu a’ a tih che kha. I tih sak leh chuan i hmingchhe viau tawh ang” a ti zung zung a, “Thingpui kha min siam kep rawh” tih pahin chaw ei dawhkanah a ipte a nghat chawrh a, “Kan khuaah pawh ruihhlo chi hrang hrang a rawn lut ve tawh a nih hi. A buaithlak emai, damdawi ngat phei chu tunlai ţhalaite ah hian a hluar a, tih chhin loh tawp a him ber. Inlak pa na chi pawh a ni lo, ruihhlo ti lo hi an nu a, an dawih bik tihna a ni lo reng reng” a ti a, Maski chu a be bawrh bawrh reng a, pakhat lahin tawi te tein a lo chhang a, Sangkhuma leh Fawnvela te min sawi ţhaih dan kha chu ka zep tlat dawn, ka lo awih zel a, a zahthlak thei emai.

Maski-a haw hnuah ka nu’n Nunhlimi nen a kan buaina hre map lo vin, “Nunhlimi nuin dawl rep a duh a, va pe lawk rawh, kan ngah a, ka nu’n ‘lei a ngai lo a ti’ i ti dawn nia” a ti a, “Ka peih lo” ka tih lahin, “Tirh hnial ve ziah suh..pe rawh ka tih chuan ngawi rengin kal mai rawh, tih tur dang i neih loh kha” a ti a, polythene ah kan dawl rep neih sa a khung sawk sawk a, Nunhlimi nen kan inhmuh chuan kan inhau dawn chiang sa a sin le. Min rawn biak loh vang vang chhan pawh hi ka hre mai. A tshirt tura ka hawn sak keng telin ka chhuak a, inhauh inpeih ranin an in lam ka pan a, kan inhauh hmain tshirt hi ka pe phawt ang. Ka diknaah chuan tumah ka hlau lo, ka dik loh naah ka huai vak ngam lo nain ka dik na kher kherah chuan insual ang pawh ti se ka bin nghal a ni mai. Thinrim chuan mihring chu kan chak a, insual laiin hah lo mah ila insual zawh hnuah ka hah thei a nia aw.

Nunhlimi te in ka thleng a, an lo inkhar ţhap a, ka kik karh karh hnuah Nunhlimi ngei maiin, “Lo lut rawh” a ti a, kawngkhar ka pawt hawng a, inchhung ka luh chuan tukverh bul ţhutthleng sei a mu chungin phone a lo khawih a, “Dawl rep ka lo dah dawn” ka tih chuan, “Dawhkanah khan dah tawp rawh, i va i duh ve, i lo haw na a rei tawh nen” a lo ti luam a, a tshirt tur chu a mutna lama thehphei pahin, “Kha, ka lo hawn che a nih kha. Biak pawh min rawn be ngai lo va, ka lo hawn duh che kha lawm hle rawh” ka tih chuan, “I van fel tak aw my friend, thil min lo hawn ka ring lo hrim hrim. Ka nu a awm ngai lo a, in nghah ka ngai a, khawiah mah ka chhuak ngai lo” a ti zung zung a, a mutna aţanga a thawh rual chuan, “Kolasib a i chhungte chu i zawng hmu tawh em?” ka ti kher a, “Hmu nang” a tih hnuah mak tih hmel deuhin, “Taka” a ti hluai a, “U Zirbawnga hnenah min lo ngaihvenpui teh anmahni biak pawh ngaihna ka hre lo a, kan chhungte hi an tam lem lo va, a awmchhun chu pawh zel ka duh a, an biak pawh theihna ka lo hre tawh lo a ka tia ka zawt a nia aw” a ti mawlh mawlh a, “A zawnpui che em?” ka tih chuan, “Aw…a nu te pawh a lo zawt a, mahse Kolasib hi a lian ve tho a, an lo hre lo a, tunlaiah chuan inzawn hmuh mai mai a harsa tawh a” awki dam deuh hian a ti a, ka kek hrep chak a nia aw.

“Fahrah ka nia, rinchhan leh innghahna tur ka nei lo lutuk a i lo ti vel em ni?” ka tih laia a mitmeng danglam zawk chu ka hmu reng nain mitmeng ah hian engmah ka hrethiam ve tak tak ngai lo.

“Ka uang a nih kha, Remsial te a rawn ti vel a, ka nuihzat zia chu. ‘Min rawn bawl tum suh’ a rawn tia, nui chungin ka biak zawm char char alawm. Nangmah anga min lo ngai kha a hit ţhaks. Ni lo se chu ka uang ka ti nghal ang” a tih chuan, “Keichu ţhiante phatsan ching hi ka haw teh mai a nia, inkawm loh hnua ţhian hluite thuruk sawi chhuah zawt zawt ching ho te phei chuan hnap pawh an tluk lo. Khawi ka en chhin, min phatsan vaih chuan i chak lo ang aw. Keichu ţawngkaa intauh intauh ai chuan thudik finfiah a rik nghal ţhak ka duh a nia” ka ti a, “Awii…ka delete vek tawh. Ka screenshot anga ka thawn ang che ka ti tak nain ngaih loh lama i lo ngaih ka hlau a, ka delete daih alawm. Hrilh che ka tum tho a, amah ngaizawng ang zawngin ka be miah lo a nia, lo delete lo ila ţha tur aw. In inkar a ţha zel em?” a ti duah a, a biak dan ka hre vek tawh chungin a la zep ţang ţang a, ka ngei deuh hlek chuan, “U Zirbawngan min ţhen thei lo” ka ti ve hmak a, min ţhen thei ropui si a, ka rilruin ka uang a ka ti leh tho.

“A ţhat hloh chu, lo ţha zel rawh u. Kalvari a chhangchhe tawh sia, in inneih hunah ţhianah min hmang dawn nia” a ti a, a nui zui har har a, “I chhungte i zawn chhuah duh chuan Kolasib veng tin chanchinbu a chhuah tir dan ngaihtuah mai rawh, ngaihsak tu ka nei lo chuti khati tih vel a ngai lo, khatiang thu khan u Zirbawnga zak pawh a dêk za pha ve lo. Ngaihsaktu ka nei lo ti eng ang mah la a ngaihsak chuang lo vang che. A duh zawng a ngaihven hlur a, hmeichhe dang a pak hluam reng ngai lo. Ngaihsak tu i neih leh neih loh kha a ngai pawimawh dawn lo nasa a nia, chu ai chuan an uite pawh a ngaipawimawh zawk ang, i duh leh inpuih tir dan dang ngaihtuah la, insawi khawngaihthlak kher suh, u Zirbawnga hi i la hrechiang lo a nih hi, ‘ka rilru a hah ka thi mek’ pawh ti la a hmeichhe ngaihsak zawng i nih loh chuan ‘Rip’ tih leh pangpar lem a rawn thawn che ang a, a duhtawk der a ni mai. A unau dangte ang hian mi mitmei a veng ve vak lo a, a ţha der ve luam ngai lo bawk” ka ti zat zat a, ka sawi zo chu ka hah vek thei hial alawm le.

“Ka uang mai mai ka tih kha, chu, amah pawn Remsial a rawn tih chu, nangman i bawl mai mai emaw a rawn tih takah khan ka fiam zui a, chu zawng chu a ni mai. Ţhiante bialpa lo ngaizawng ve duh khawpa hniam ka ni lo. Nangpawh Maski nen in ni in ka hria, eng nge in awmzia hi” a tih chuan, “Ni e…kan ni lo ka ti hleinem. U Zirbawngan min ţhen thei lo ka ti mai alawm” ka tih hnuah ka rilruin ka uang a ka ti leh a, “Keichu ţhiante phatsan ching hi ka haw ber a, a ruk a ral a thil i lo tih a ka hriat leh vaih chuan a pawi ngawt ang aw, ţhian pawh ni ila a tawp rat thlengin ka nawr let dawn che nia” tih leh chhuah ka rual a, ka va han ang nasa em em, ka thinrim hian khua ka hmu tawh ngai lo reng reng. Awm hmun a ţap chunga tawrh char char ka tum lo a ni tawp mai a ni, dawihzep lutuk chuan tunlai khawvelah a dam khawchhuah thei lo. Dan bawhchhe lo tawka kawlh a, rik ve ţhak zel tur.

In ka thlen leh hnuah ka nu’n, “Kha, i thil tur an rawn dah. Lo chan nachang i hre si lo a driver a rawn kal tawp a nih kha” a lo ti a, “Khawi aţanga min lo thawn nge?” ka ti he haw a, “Ka hre bik lo” a ti then a, Nutei hnenah ZD Garments a Maski a thawmhnaw lo lei turin ka chah ngei a, mahse a lo thlen a la hun lo. Pindanah ka luhpui a, ka hawng chiah chu ka hnathawh naa pawimawh ber pawl glue leh thil dang dang a lo ni a, ka nu rawn lut ve pawhin, “Hmanraw lei belhna ka la nei rih lo i ti si a, i lo chah belh tho em ni?” a rawn ti a, “Teuh nang aw, ka nei lo tak tak” ka ti a, min rawn thawn tu hming inziak lo vin ka hming pum leh ka phone number chiah a inziak a, ka nu phei chuan, “I chah a nih si loh chuan khawih rih suh, i hming ang pu hetiang thil chah tu hi an awm ang a, i phone number an dah palh aniang. Inphiar rukna te pawh a ni thei, i pa ho a kan sawi tlan hma chu la dah rih lo tawp rawh. I chah emaw ka tia driver pawh engmah ka zawt lo a, zawh chian a ngai a nih kha. Khawih che reng reng suh, Kalvari ang khan an thil zawrh lai ru ah te an puh ve reu reu che ange, lock up ah i ţap leh ruah ruah mai ang” a ti bawrh bawrh a, “Han khawih chhin chu a chakawm” zawite hian a ti leh a, “Khawih lo ang, nakinah driver te inah hemi keng hian ka kal ang a, ka zawt chiang mai ang. Mi thil tur a nih phei chuan i sawi ang khan ka tal awk mai tur a sin” ka ti a, pindan aţanga ka nu chhuah hnuah pawh ka la en vang vang a, gel polish te a tel a, hawng lo mah ila a pawn lam ringawt pawh a hmuhnawm a, ka awt tak tak a ni. Thla lak hram tumin ka phone ka la chhuak a, u Zirbawnga phone number aţanga message lo thleng chu ka en hmasa leh te te a, hmangaihna lem a rawn thawn hnuk hnuah mipa in hmeichhia hnek tuma a tin uai uai lai video min rawn thawn a, a hnuai leh ah, ‘ka ngai che Remsial’ tih zawng a lo awm a, hetiang te chu bialpa ka neih hma khan sawi mai tur a nia, a sawi har emai, a rilru a mumal lo ropui si, ka ring thei tawh hlawl lo.

Kei leh Kanchhi hi tu nge thlan tur zawk hre lo vin a thle kual vel mai mai a nih hi, hetiang mipa chu ka duh bik teuh lo mai. Bialpa ka nei tawh a, a duh leh min lo ngai vel mai mai teh se, ka engmah a hek phah hleinem. Mi hi kan ngaihzawng an nih hnu hian kan star lai angin tuman kan bawh huam reng peih tawh ngai lo. Bakah bawh huam ila chu engahmah min ngai lo ang a, min zah lo viau ang, Remkalami a â an ti ziah a, keichuan dan ka siam thlap a, â min ti tute ho angin pasal neih hmain ka dul a puar ve pum ngai lo.

Ka pa lo haw hmain u Lalhuma leh pu Taipuia te exer la haw an lo lut a, thaw hluam hluam chungin an rawn vak lut a ni ber. “Tui” an tih loh leh, “Vur” an tia, chhuatah ţhutthleng nghengin an ţhu hnawk a, an hah hmel lutuk chu lungphuchawlin an thi daih ang tih te a hlauhawm zawk.

An hahdam deuh hnuah pu Taipuian, “Eee….kan exer lakna lamah ka rawl vek, ka taksa na lo lai a awm lo, tournament a ka inkhelh ve theih pawh ka ring lo” a ti nuah nuah a, “Tournament a inkhelh tumin a ni lo’m ni exer in lak?” ka nu’n a tih chuan, “Ni e, tournament hmaa kan rawl a reh hman loh chuan kan khel thei lo ang” u Lalhuman a lo ti ve bawk a, inkhelh ve ngei tumin exer an la a, an rawl leh si a, a va han buaithlak ţhin tak.

“Inkhel ve lo ula a ni mai alawm. Ka vur in ti hek, in thih hlauin ka lo pe vat zel cheu a, pawisa min pe ngai mang si lo” ka tih chuan, “Pawisa kan neih chuan kan pe ziah che, kan inkhel bawk ang” ngeiawm fahranin u Lalhuman a lo ti a, an jersey te chu min han enchian tir a, pakhatah Ronaldo tih a inziak a, pakhatah Messi tih a inziak kalh bawk a, Ronaldo leh Messi hian u Lalhuma leh pu Taipuia te inkhel hi rawn en ve se chu an ţap zawih zawih maithei a ni.

“Ronaldo ka nih hi” pawr deuha u Lalhuman a tih chuan pu Taipuian, “Nghawng lian, i nghawng leh i lu a intiat” a lo ti a, u Lalhuman, “I bawp kha naupang khap khat lek bak a ni lo, chhuata thil tla pawh kun lo in i chhar thei” lo ti vein an hmui hupin hnai deuhah an inmelh a, an nui kur kur a, an rui reng a, an ţawngthei tih lohah chuan sawiselna tur an awm lo. Anni pahnih bulah hian eng thuruk mah a sawi chi loh, “Ka sawi chhuah miah lo ang” an tih pawn an ruih lai leh thinrim laiin an sawichhuak tho zel a, hei vang hi a nia u Chianga leh Lalpâ-a te pawn an kawm duh loh. An pahnih pawh hian an inkawm thei chuang lo a, kawm tur dang an neih loh vangin an inkawm mai mai chauh a nih hi. An inrel tawn reng zel tho.

Ka pa rawn haw veleh driver te in lamah ka phei a, “Hei hi ka ta tur a ni lo ang” ka va tih chuan, “I ta tur a nih kha. Kolasib ah hmeichhe pakhatin min lo chang a, min thawn alawm. Thawn man pawh min pe tawh” a ti a, hrilhhai deuhin ka haw a, ka ngaihtuah neuh neuh a, u Zirbawnga bak rilruah a awm thei lo.

In thlen hma deuhah dingin Nutei ka bia a, “My friend, ka bialpa nen kan leng a ka haw chiah. Tunlaiah mipa sek deuh an luck sia ka intihtheih zia chu e..a awmah ka intauh a ka lu ruh hi a khi phawkin ka hria, chutiang khawp chuan a pa” a rawn ti lang lang a, “U Zirbawnga nen in inbia em? Hei hmanrua ka la lei theih loh ho kha a rawn thleng ţeuh a” ka tih chuan, “Ka sawi lo ang ka ti a sin le. Min zawhna a rei tawh, kan zir lai, Puipuii te inneih lai vel khan mamawh tur ang min zawt a, a rukin a lo ngaihtuah aniang, hria angin awm miah suh aw” a rawn ti a, “Chuvang a ni maw ka neih sa pawh a lo thleng tel nual ka ti reng a, ka lei thlap tawh ang te kha a lo thawn tel a” ka ti a, mi hausa hi chuan engpawh awlsam te tein an nei thei a, min thawn lo mah se pawi ka ti miah lo a sin le.

“I lo han chhuahchhal vel ange aw, sawi suh min ti vek a, ka sawi tih a hriat chuan rinawm lo deuh ka ang dawn teh mai a nia aw” a rawn ti leh a, “I hming sawi lo vin ka zawt ang” ka ti tho a, “Aw, Maski-a kawr tur pawh ka lo en vat ang” a ti a, kan inbiak zawh hnuah u Zirbawnga ka be leh nghal a, “Engati nge thil min lo thawn? Driver in Kolasib ah min lo phar a tia, nangmah lo hmelhriat ka nei lo” ka ti nghal thawr a, “Return an phal tawh lo” a rawn tih chuan, “I lei hmain min zawt ta che, ka sumdawng a, ka inkhawl ang a ka mamawh chu ka lei ve mai ang. Hetianga i tih hian nuam ka ti ngai lo tih te pawh i hre vek” lungawi lo deuh hian ka ti a, ba neiah ka in ngai zel a, ka awm a nuam thei ngai lo. Keichu mahni thawhchhuah ngei a thil lei duh chi ka nia, mi tan a phur rit nih ka hlau ber.

“Hman veleh in khuaah ka rawn zin ang. Thil fel lo ka chingfel ţep tawh” a rawn ti leh tawh a, “Chingfel mah la eng nge ni vak chuang a? Inngaihzawn ka duh tawh miah lo a nia, min duh tak tak ni la i bialnu hlui vang mai maiin hetiang hian i awm lo vang. Ka rilru a tawp vek tawh a, lo zin mahla awmzia a awm lo, bialpa ka nei tawh” ka tih ve hmak hnuah kan inbiakna ka ti tawp a, a lungawi nan a thil min rawn thawn hi ka hman sak ang a, mah se rin luih tum mah ila ka ring thei tawh lo, rin luih ka tum chuan mahni ka inti hrehawm mai mai, kan kalsan tak boruak ang kha ka duh tawh lo reng reng.

Ka nu te hnenah pawh, “Ka ţhiannu min lo thawn alawm” tiin dawt ka sawi daih a, rilruin ka uang a ti mah ila ka inthiam thei chuang lo. “I ţhian pakhat ringawtin engtin nge khatianga tam a rawn thawn phal che a?” ka nu pawhin a lo ti ve a, “Ka hre bik nang” ka ti ringawt a, “I vannei hle mai” ka pa’n a tih te chuan a nuam lo duh. Hei hi nia u Zirbawnga buaithlakna pakhat chu, ka duh loh zawng a ni tih hrereng chungin a ti lui tho zel a, a thu a duh lutuk ringawt. Maski chuan ka duh dan takin min siam pui a, min zawrh pui a, pawisa min tuak pui a, ka duh loh zawng hi vawikhat ka hrilh tawh a, a ti lui lo hrim hrim.

Zana Maski lo kal chuan an veng dawr a aieng man a lak a rawn keng a, “An hralh chin min pe a, lo dah belh rawh se an ti” phur deuh hian a ti a, “A ni maw?” ka tih chuan nui chung hian a lo bu nghat a, “Ni e…a siam khat tawh a, a siam leh hi a ţha an ti. An naute Aizawlah lehkha zirin an awm sia, vur sen pawh a phal chuan kan lo zuar ve ang an ti” a ti chiah chu, “Awii…ka hmangaih ţhawt che” ka ti duai a, ka nu leh pate lam ka hawi rualin ka nui tawp hmak a, ka pa phei chuan phawk deuhin min en vung vung a, ka nu a tum bur bawk. “Ţhian hmangaihna ţhawt ţhawt, what a very ţhawt ţhawt” ti a nui lui hak hak chunga Maskia bana ka vawn rualin ka bulah a ţhu a, aieng pack sa chu a awm, vur sen ka lo siam mek a, “Sarang ah thun la ka lo ţawn ang” ka ti a, ka nu te chuan zan dang zawng aiin min ngaihsak zawkin ka hria.

“A nuam e tiraw?” ka ti sar sar a, tawi te a lo nuiin Maski chuan, “I nu te hian engmah an hre lo tiraw?” a lo ti ve thung a, “Kan inkawm mai maiah an ngai ang” ka tih laiin ka nu chuan a malchunga vaihlo a dahna thleng chu chhuatah a nghat a, a ţhutna aţanga ding chhuakin a zi mar al al a, “Awii…ka ruh hi what a very ri nuam ţhawt ţhawt” a ti ve kher a, Maski-an min ţhut hlat deuh a, “Engmah a hrethiam lo ang” ti mah ila, “An hriatthiam chuan an hau palh ang che, keichu tuman min hau dawn lo a” a ti chuai raih a, a nun hi a khawhar hmel ka ti, a inthlahrung lutuk te hi ka khawngaih a, “Hey” tih pahin a banah ka kawk a, min rawn en ruala, “I lo intihlum daih ange aw” ka tih chuan a nui hawk a, a nui hi alawm mawi ka tih ţhin chu. “Eng ang pawn duh sawmsarih che mah ila ka hlau tel dawn tho che a nia, ka nu leh pa inkarah ka mu kuk reng duh ang” ka ti leh a, “Chutiangin ka ti bik lo ang” a ti ringawt a, ka lungawi ve hman nen, “Ka tum ang” a tih chuan, “Eng nga?” ka ti vak a, “Au vak vak zel suh i pa a lo hawi zel” zawi te, sehchilh zet si hian a lo ti a, a bialnu hlui kha mahni intihlum a nia, vawiinah thu zawhfiah zingah a tel ve bawk nen, khatiang kha a tih ve ka hlau. Maski hi Pathianin ka missionary na tur a min pek em mawni ka ti hial tawh a ni.

“I piancham hi tournament lai kher a ni dawn a” ka tih chuan dekchi saranga kan thei tui sen siam chawp thun pahin, “Tournament tawp niah a nia, a remchang chiah chiah” a lo ti a, “I inkhel dawn ta em?” ka tih leh chuan, “Khel ang, hall a thu min zawh hnuah pawh ţhenkhat chuan inkhel leh tak tak tawh turin min ti” phur hmel deuh hian a ti a, “In tla chawp hlawm e…inkhel tur si te chu practice char char tawh tur a nia, u Lalhuma leh pu Taipuia te an taimak tehreng nen” ka tih chuan, “Anni pahnih hi tel ve lo turin an duh a, mahse tuman an hrilh ngam lo, an thinrim an kal kual ang a, khaw pum hriat turin an au leh dawn a an ti” a ti a, “An inhmeh thei si, exer an la nasa lutuk a an rawl vek alawm, inkhelh theih loh an hlauh khawp kha” ka tih chuan a nui ringawt a, engmah phei chu a sawi tawh lo.

A haw tur pawh ka thlah uluk leh pek khawp mai, u Zirbawnga ka ngaihtuah lo tial tial a, a thil min lo thawn pawh kha Maski hnenah tak chuan engmah ka sawi lo. An veng dawra dah tur vur sen khal ţha ho a khai ţeuh a, “Hall ah min ko tih i hriat khan engtin nge i awm?” a tih chuan, “Ka hlau, Sangkhuma leh Fawnvela ten police in an man ve dawn che an tih phei chuan ka thlan vek alawm. Police inrawlh theihna damdawi chu chah sak tawh reng reng suh” ka ti a, “Damdawi ti angah min lo ngai em?” a tih leh chuan, “Ngai nang, ka hmuh hma chu ka awih lo ang ka ti. Ka zawt chiang tawh che a, ka sawi peih tawh lo. Inkhel la, a hun hmaa thih tum lo bawk la a ni mai” a tih chuan kawngpui lam a thlek zauh a, chutah ka biang tawn tawnah dawmin ka hmuiah a fawp zauh a, inchhunga ka nute hriat loh tur tawk leka zawia min chuk deuh thlarh hi a thiam riau a, keipawn mak ka ti tawh bik lo.

Kan in mangţha hnua inchhunga ka luh chuan ka nu’n, “Maski te chhungkua hi tunlai chu miin an sawi neuh neuh reng a nia aw. A pa chanchin kan hnena a sawi kha an hre ve lo hlauh zawk a, a nu hian a ngaihzawngpa hi a khawi chawt an tih kha. A pi leh pu te an boral a, anni chhung pawh hian hniam lam an pan zel dawn a nih hi. I lo ngaizawng hlauh ange aw, tukina a nu vanga an chhuah hma bik te kha lungawi lo an tam a nia” a lo ti nghal a, “I ninawm, mipa an lo len apiangin i sawisel zel a, hetiang te chuan pasal pawh ka nei ve thei nang” ka tih chuan, “Doctor nupui nih tum ngar ngar si hi mi mak deuh deuh inleng i nei a, Dr. Balunga te pawh i ngaihzawn nasat theih nen a ngaihzawn ve veleh che i duh leh lo a” a lo ti a, “Hmh…khatiang quarter a hmeichhe hrang hrang hruai luh ching kha ‘ngahmah ka ti lo” ka ti ve tlat a, “College zirtirtu ka tih pawhin a ngaizawng che a” a ti dek dek a, “Awiii…kha kha sawi ve sek suh, ka duh chi a ni miah lo a nia, hmeichhe tam zawkin an duh lo ang. Ka duh loh apiang min duh pui a, indopui ka la chawk chhuak nge nge ang aw” ka ti kha kha a, u Zirbawnga a sawisel laiin Maski a fak a, tunah lah miin an ti tih vang mai maiin Maski a sawisel leh a, ka pasal tura a duh pa hi ka hmeichhiatpuite hian hmu ve se chu tuman min dem lo ang. A hnathawh a ţha a ni mai a, dawheh si, a hmai bawlna hnu duk te pawh “khuavang a nih hi” a ti zel a, a biang a puar pum a, ruihhlo a ti ngai lo nain amah hi zu heh puam vek tawh ang a ni, a meng ker a, a hmui a chhah lian ţhain a kareh a zau a, duh ngat se chu ka lu pawh hi vawikhatah a hmuam thawih thei hial ang chu. Ka ngaihtuah chian poh leh ka duh lo a ni tawp mai. A te reuh si, a khat ţhain a puar ang peng a, a kim ve biai bawk si, buara bag a duh duh thun khawm a ang ber.

“Thu i awih loh leh nakinah i la inchhir dawn a ni mai. Pasal nei fuh lo ho hi an inchhir ngei ngei a nia aw, damlai hremhmun a ni ringawt an tih ţhin hi. Pasal i nei fuh loh chuan i la indawm kun tlawk tlawk dawn a nia” ka nu’n a tih leh chuan, “Ka inlengte hi ka pasal tur emaw i lo ti nghal zel a nih kha. Dawr pawh ka la siam em lo va, min rawn rim vang maiin ka pasal tur an ni tihna a ni lo” ka ti a, min melh ram ram lai chuan, “I lerh” ka ti hmak a, ka pa pawh a nui ve vur vur mai.

“Kan fanu neih chhun i nia, pasal i neih sual kan hlau tih hrereng rawh” ka nu’n a tih chuan, “Tuna i thusawi kha khawvelin hre rawh se” phar dârh chunga uangthuang deuha ka tih chuan ka nu pawh a lo nui ve mai a, “I va han chhe tak” a ti lai chuan a bianga piai zauh pahin, “Huihhuih” ka ti a, ka tlanchhe lehnghal a, nui put put chungin ka pa a en leh ţhin a, ka ute an awm loh pawhin keimah ka awm chhung chu an khua a har ngai lo reng reng.

Tournament a nih chuan field bulah thil zuarin kan ţhu ţhap a, keimah anga vur sen zuar ve an awm a, alu leh papawr an zawrh bakah ice cream te an zuar a, keimah tak chuan alu leh papawr leh vur sen leh aieng chiah ka zuar a, kuhva ka zuar tel lo kha ka inchhir. U Lalhuma leh pu Taipuia pawh an vei thauh thauh reng a, a chang leh inti zei tawkin kun ngul chungin an ke an per char char a, an tlan dawn emaw tih laiin an ding ngil leh ţhin a, reilote hnuah tlan tur ang maia kun chungin rang deuhin an ke an per at at a, an ding ngil leh a, a hrechiang lo tu tan chuan inkhelh thiam tak emaw tih mai tur an ni.

“Awii…u Lalhuma te ve saw, nichin lawkah pawh zu an in, an phakar leh viau ang, an bul hnaiah tlan miah suh u” kan hnunga ding tlangval ho chuan an ti lung lung a, mi an lo kal apiangin, “Alu leh papawr hi min lo dawr ru, a tui teh mai a nia, in thu loh nan aieng a awm a, ka vur sen hian thlasik a chhawm bawk a nia” ka ti lauh lauh a, ka bula momo vel zuar nuin, “Awii…i van au ngam zawk, keichu ka au zak ţhin a” a lo tih chuan, “I zah leh i momo zawrh lai kha i hawn hing hum hum anga a ni mai alawm. Thil zuara ţhu ta rau rau kan au ngam lohin, inhralh loh alawm maw kan hlauh le. Miin an hmu vek tawh che, au pawp pawp rawh” ka ti a, Maski a lo kal ve chuan hmeichhe ho chu an bengchheng riauin ka hria.

Ka bul velah mi an tam a, sumdawng chuan mi tamna lai kan chuh a ngai reng bawk a, alu leh papawr naupangin a rawn lei lai takin, “Remkalam, ball kha” mipa pakhatin a rawn ti vak a, ka hawi chhuak a, Maski leh naupang bak ka hmaah an ding chuang si lo, “Ka man hman” tih pahin Maski chuan nui chungin ball min lo hmuh zauh a, “Fimkhur ru aw u Humte” a ti a, u Lalhuma te lamah ball vawm phei leh a, ka hnunglam a bengchheng a, hmeichhia an tamin Maski chu an star dawn chiang tih ka hre sa vek. Ka sawithiam dan ber chuan mi nawlpuiin hmelţha kan tih chi ang hi, hmelţha ti ngawih ngawih tu kan awm a, ţha ti ngawih ngawih lo pawhin hmelchhia an ti chuang lo vang, khatiang chi kha a ni.

“I inhralh thei em?” tih pahin ka hmaah a rawn ţhu a, kan inkarah dawhkan te a awm a, chutah chuan ka thil zawrh ho ka dah a, “Inhralh ve reng. Hralh zawh vek ka tum bawk. Alu leh papawr phei chu ka hralh zo tur a ni ringawt, aieng pawh ka hralh” ka ti zung zung a, hnung lam aţangin hmeichhiain, “Maski” a rawn ti lauh a, an kohna lam a hawi rual chuan an lo au dual a, an nui zui har har a, tleirawl ţhenkhat han zahtheih loh zia hi chu aw.

Maski ka enreng laia, “Eng nge?” hriatthiam loh hmel deuha a tih chuan, “Naktukah chuan aieng chhah tawkin inhnawih tawh ang che” ka ti a, a lo kiai suk a, “Aw haw wow, thikthu a va chhe ţan ve” a ti ve ngei a, an rawn koh tak avangin a sana a phelh sawk sawk a, “Kha, hei hi lo bun rawh” tih pahin min pe a, thawh pahin ka bekah dam deuhin a dawm a, a chalin ka chal a rawn tauh zauh a, hnunglam hawi chung meuh a amah rawn ko tu tleirawlte kha han nuihsawh ka chak khawp mai.

Thawl deuhin a sana ka bun a, an inkhelh rualin Sangkhuma leh Fawnvela te ka bulah an rawn ţhu a, ka inhralh zawh loh hlauin an ni pawh an au ve lauh lauh reng a, “U Lalhuma leh pu Taipuia an phakar leh dawn” an tih rualin field chhungah chuan an ding khawm laih a, referee in card sen a phawrh a, an buai hmel khawp mai.

“Ka va ngaithla chiang chhin” tih pahin Sangkhuma a tlan phei a, Fawnvela nen kan en reng thung a, “Remkalam, Sangkhuma hian ngaizawng ta che se la i duh angem?” a tih chuan, “I sawi peih zawk e a” ka lo ti hmak a, “Aw..min chhang hrim hrim la, i duh angem?” a tih sek takah chuan, “Duh lo, mipa zawng zawng ka duh bik hleinem. Tunah tak chuan Maski chiah ka duh, bialpa nei lo mah ila Sangkhuma kher chu ka duh lo ang, ka mipa duhzawng a ni lo hrim hrim” uar zet hian ka ti a, “I ti khawngaihthlak e” a tih chuan, “Engvangin?” ka lo ti vat a, “Ka duh chi a ni lo ti kher lo la” a lo tih leh chuan, “Ka duh chi a ni lo miau alawm. Mi fapa zawng zawng duh vek tura piang ka ni bik hleinem…helamah hmai thu tur venna leh ngona aieng a awm aw” ka ti a, vur sen phei chu ka hralh zo tawh a, tam deuh hlek siam a ngai a nih hi.

“I ipte ah pawisa a va tam tawh ve” Fawnvela bawkin a lo ti leh a, “Zu man tur ka pe tawh dawn reng reng lo che u a nia, zuin a ei â ve palh ang che u” ka ti nghal a, Sangkhuma lo let leh chuan, “U Lalhuma leh pu Taipuia te an phakar tluan ţhak a, referee in red card a pe a, ‘i thu lo, kan chhuak dawn chuang lo’ an tih loh leh, ‘chhuah ai chuan field ah hian kan mu mai ang, exer kan la ve ţauh ţauh a, hma deuhah kan chhuak duh bik lo’ an ti” a rawn tih chuan, “Awii…what a funny thing, an tlan vak vak ringawt a, tih tur an hre lo si” ka lo ti a, “An inrawn khawm a, hun an la hek reng sia, thupha te an chawisakin ka hria. Lalhuma leh Taipuia te red card hmu an chhuak duh tlat lo a an tia, an thiam chuang lo hrethiam mai ang u an ti ringawt a nih kha” a tih leh phei chuan, “Ka thi ţhaks, u Lalhuma leh pu Taipuia hi awm lo se chu kan khua a reh viau ang” ti a ka nuih vak laiin Fawnvelan, “Nang pawh i tel, awm lo la chu kan khua a reh viau ang” a lo ti ve a, ka nui tawp hmak a, naupangin alu leh papawr a rawn lei leh a, kan hnunga tleirawl ho lahin, “Maski” an ti sek a, bialpa hmelţha deuh neih chu thlaphang reng reng a damchhung hun hman a awl dawn khawp mai.

Ka inhralh zawh vek hnua ka inseng fel laiin Maski pawh a lo phei ve a, “Min lo nghak lawk rawh ka lo kenpui ang che” a ti a, a ţhiante awmna lamah a phei leh rih a, “In inngaizawng tak tak dawn a ni maw?” Sangkhuman a lo tih chuan, “A hmelţha sia, ngaihzawn loh atan chuan a uiawm a lawm” ka lo ti a, “Issss…ka sawi kha a la ngai reng a nia aw” a tih chuan, “No4 ti ve se chu a inkhel peih teuh lo, sawi chhiat tum reng suh. Bialnu nei teh, i neih loh chuan i phunchiar, i ninawm” ka ti hlak hlak a, “Ka duhsak vang chauh che a phunchiar ka nih hi. Maski ai chuan u Zirbawnga ka duh pui fe zawk che. A bialnu hlui thih danah te khan inrawlh ve na a neih ring an awm a nia aw” a tih chuan, “Chutiang mi zinga sawi chi pawh a nih loh chu. Mipa ve si hi mi chanchin sawi reng suh, momo hi a la hralh zo lo, in duh chuan la rawh u, ka lei sak ang che u” ka ti daih a, Sangkhuma mize inthlak reng hi ka ning tlat zel.

U Lalhuma, pu Taipuia leh Nobawihi te pawh kan bula rawn kalin u Nobawihin, “Vur a la awm em?” a ti a, a zawh tawh thu ka sawi rualin Maski pawh a lo thleng veleh chiah a, ice cream min rawn pek laiin u Lalhuman, “Referee ve mai mai kha, a duh duh huna card a phawrh khum tur kan ni lo, inkhel turin kan lut a, khati mai maia inchhuah tir tum kha ka duh lo reng reng” a ti hluk hluk a, u Nobawihi lahin, “A dik chiah alawm, card sen leh eng a ak a, a inla thu ve em em a, mahse an chhuah tir chuan loh che kha, engahmah ngai suh my baby” a lo ti ve a, “Ka chau teh mai a nia aw my Nobawih” u Lalhuman a tih chuan u Nobawihin, “Huihhuih” a ti a, a nui ar ar a, zu rim an nam vek bawk si, pu Taipuia a tum bur mai.

Sangkhuma leh Fawnvela te haw hnuah kan haw ve chauh a, kan bathlara dekchi leh vur bawm vel kan dah rual chuan Maski hnenah, “I chau em?” ka ti ve ngei a, “Chau ve tho” a lo tih chuan, “In la inkhel leh dawn a, indim viau rawh, zanah pawh min rawn pui lo mai rawh, Sangkhuma leh Fawnvela te ka sawm mai ang. Nizan a kan siam sa pawh a la tam mai” ka ti sawk sawk a, “Ka haw phawt ang a, a remchan tak leh ka lo leng ang” a ti a, kan inthlah fel hnuah dekchi vel chu sil turin inchhungah ka keng lut a, alu ka la chhuak leh nghal a, “Ka sil anga eirel pahin a kawr ka vel pah daih ang” ka tih lai mekin phone a ri a, Nunhlimi hming ka hmu chu ka phone ka dah khaikhup thawk a, milem ka be buai vel peih lo. A rik zawm char char a, a tawp hnuah pawh a ri leh nghal zel a, “Ka ning e” tih paha Nunhlimi nen a inhauh inring rana phone ka en chuan u Zirbawnga phone number zawk a lo lang a, ka hmet tawp hmak a, ani pawh ka be peih chuang lo. Kan inţhen chhan ka ngaihtuah hian ka lung a awi thei hlawl lo a, a in tham loh thlak ka tia, ka duh lo chung thil min thawn lui bawk a, ka duhdan hi min ngaihpawimawh sak ngai lo va, min zah sak ngai lo bawk. Sawi ve mah ila a duh ang thoin thil a ti a, a thu a duh emai. A rawn call nawn leh pawhin ka hmet tawp zel a, tunah rih chuan a hnena let leh tumna ka nei tawh lo.

CONT..

Leave a Reply