You are currently viewing KEIMAH, THINGTLANG NULA S2-26

KEIMAH, THINGTLANG NULA S2-26

Spread the love

KEIMAH, THINGTLANG NULA S2-26

“Ka rawn leng dawn” ti a zana Kalvari, naute pawma lo lut hlawl chu ka nu ten an lo chiauau vat a, duh loh hre rual a la ni lo bawk a ka nu’n naute a laksak a, ka vur siamna lamah Kalvari zawk a lo phei a, papawr kang zo chiah ka nih vangin inchhung a la uap churh a, lum tak a ni.

“Vawiinah i inhralh hnem em?” a rawn ti nghal var a, “Hralh hnem e…aieng tih loh chu a zo vek” ka tih hnuah a mal ka kheuh zeuh a, Nunhlimi leh u Zirbawnga chanchin ka hrilh ru sar sar a, a hre tawh tho nain, “Nunhlimi hi ka hmuh dan a dang vek” a ti leh tho a, “Ni reng e..u Zirbawnga lahin keiman ka bawl mai mai emaw a la ti zui a” ka lo ti a, “Maski a lo kal dawn em?” a tih chuan, “Kal lo ang, a chau ve deuh aniang. Vawiin chu a luck rapthlak, tleirawl hoin an star nasa a nia aw” ka lo ti a, “Nuam i ti awm” tih pahin nui chungin a min rawn nek zauh a, “Nuam ve tho e, mahse ka ning. Tlaiah khan u Zirbawngan min lo call a mah se ka la lo” ka tih chuan, “A ţha lutuk” a ti a, ani hi chuan min thlawp em em reng mai a ni.

“Keipawh ni ila ka be lo ang. Ngaihtuah la, Kanchhi, a bialnu hlui vang mai mai a inţhen a duh a, tunah a rawn beisei leh che a, a rilru a mumal lo emai. Lo nihpui leh ta la Kanchhi in thawm a rawn neih leh chuan a ţhen leh dawn tho che tihna a nia, duh tawh miah suh, nakinah i la duh leh dawn tho a nih pawhin hrem rih rawh” tiin ka beng zawnah a phun sap sap a, “Tunah rih chuan Maski ka duh zawk. U Zirbawnga hi ka hmuh khat vang aniang, ka star lai ang khan kan khuaah a awm reng tawh bawk si lo a, ka thin a ti rim kher bawk sia, ka ngaihtuah peih lo” ka tih chuan, “Lo zin chu a tumin ka hria” a ti ban charh a, “Duh leh lo zin rawh se, bialpa hlui vang mai mai ţhen ve ta ila tun a ka lawm loh aia nasa hian ka lawm lo ang” ka ti a, lungawi lo ve tak ka ni.

“Nunhlimi pawh engang pawn insawithiam se ring tawh lo ang u, Nuno-i pawh kha kan ring a, kan ti sual let der a nih kha. Awii..ka tawn ang chiah i tawng ve a nih hi, a hrehawm duh tiraw?” a tih chuan, “Hrehawm ve tho e mah se ka buai lutuk a hrehawm pawh ka hre hman vak lo, kan sawi hian ka thin a rim a a ni mai” ka ti a, “Kan khuaa a lo zin hma chu be rih miah suh” ti a min chah thlap hnuah, “Keipawh maw, a ruka hrehawm tih chang ka ngah mai” a ti a, chu chu mak ka ti ve deuh.

“Ngati nge hrehawm i tih ve ringawt a? U Rinchuta a fel em hi” ka tih chuan, “Ka pi te ka ngaihtuah sia, an in a kal reng a nuam bawk si lo a, u Rinhlua pawh hian a ngaihtuah ve tho nain a hnena sawi reng a nuam lo a, ka chhungte chauh ka ngaihtuah emaw a tih ka hlau ţhin a, an upa ve tawh si a, kan khuaa kan awm loh hun tur mawlh hi a ni ka huphurh chu” a ti sap sap a, “Bakah maw, a nu unaute lam hi an fel lo a, a nu hi an lo fuihpawrh ţhin a, ka sawi duh lo mai mai alawm, ‘mo ve si a hmel kan va hmu khat ve’ tih chang te an nei ţhin a, u Rinhlua hi an lo be deuh reng bawk a, ka hre ve phak vek tih hre chung pawhin, ‘nupuite thu thuin an awm ngai lo aw’ te an rawn ti ngam a, a hna avang hian a chhungte hnenah, an inpui lamah kan awm thei si lo a, kan dinhmun an hria a, min hmusit tih hriat deuha ţawngkam chheh chang te an nei a, u Zirbawnga pawh hi lo nei ve ta la, nangpawh an ţawngkhum ve tho ang che” zawitein a ti leh charh charh a, “I hlau em ni a?” ka tih chuan, “Hlau lo mah ila a nuam lo alawm. Amah hringtu nu ai mahin a nu unauten an rawn be ngun zawk a nia, a hriatah ka sawisel duh miah lo nain rilru a na ve duh. Hmanniah pawh Dawnfuha thil tur leh u Rinchuta thil tur a nutein a lo thawn a, keichu engmah min rawn thawn ve lo. U Rinhlua lah hian mi hi amah ang veka ţha turah a ngai a, ‘i thil tur an thun tel theihnghilh a ni maw?’ a tia, a zo der a ni mai. Tumah hi rilru sual leh phakar pu turah a ngai ngai lo” a ti malh malh a, a ngui deuh bar bawk si a, ka khawngaih reuh tak tak a ni.

“I dawih e..keichu ka thil tur tel loin ka pasal leh fapa ta tur chauh rawn thawn se chu inţhen huamin ka thawn let ang mawle. I hriat theih tura an rawn sawisel ngam che chu zak lo tak a ni, lo chhang ve fak ta che. Mi nasa ho hi chu anmahni ang chiah hian nasa ve ila min zuam lo a ni mai. I dawih thei de du lutuk a, an rawn ti lui salh salh tihna a nih chu, ka ngei reuh e, an chhe per pur hlawm si” ka ti hlak hlak a, keichu ni ve ila min zuam loh nan an tih ang chiahin ka ti ve ang mawle, ka dik naah chuan tumah ka hlau lo a, ka thin a rimin khua ka hmu lo bawk.

“Ih e my friend, hmangaihna mitdel aiin thinrim mitdel hi a hlauhawm zawk” ka tih te te hnuah, “Thinrim a khawhmu lo chi kan nih chuan pawi sak kan nei lo reng reng, a thiam zawk nih phei chuan thinrim loh hnuah pawh a inchhirawm chuang lo” ka ti a, kawlh ve hrâk se ka tih ţhin nen tumah a ngam lo reng reng.

“Nau ka neih hmaa Kolasib a kan zin te khan ka hriatphak turin, ‘pastor meuh chuan thingtlang nula ngawt lo deuh pawh i phu mawle’ an ti vel a, fiamthu angin an sawi a, ka ngaithla fiamthu thei hlawl lo” a tih phei chuan, “A tirah engkim min hrilh ţhin rawh. Chutia an tih lai tak te chuan min rawn phone ta che. Ka rawn len ngun nen engmah i sawi ngai bawk si lo” ka ti hlak hlak a, “U Rinchuta a awm ve ziah a, sawi a rem loh bakah ho te te a vui vai reng min tih ka hlau a, ka pi bulah vui phei ila chu min hau hrep ang” a tih chuan, “Hau che mah se a rukin a rilru a na tho ang, sawi reng reng suh, nakinah u Rinchuta bulah a thuphungin sawi rawh. An mo han ni ve chiah ila chu kan insual thei mai ang, keichu meinei deuh deuha min ţawngkhum chuan tupawh ni rawh se, ka dawh mai mai dawn lo reng reng” ka ti phar phar a, thinrim lutuk vangin thaw alh pup pup thei ila chu ka bula ţhu Kalvari hi a sawr chhe ut dum hnehsawh tawh viau ang.

“Kolasib a kan kal khan Vani nen kan awm a, u Rinhlua leh ka nu leh pate an chhuak a, u Zira a awm bawk a, ka nu u rawn zin laiin a nia, ‘thingtlang nula chuan hnathawh in chak tho a, kawmthlang hnim zual lai khu zuk thlo fai rawh, fur lai a ni si a, rul te a awm palh ang’ a ti duh mawle, kei lah ka raipuar bawk sia, mahse u Zirbawngan, ‘hlawhfa ruaiin kan tih tir ţhin. Rul i hlauh leh haw mai rawh. Ka duh dan ka sawi hi ka nu’n zawm duh se chu hnim a awm tawh lo ang’ a lo ti hlauh a, an inkhak zui a, ka nu u chuan keimah hlir min sawi chhia a, an mo dangte a fak vak vak a, u Zirbawngan, ‘ro i rawn relna tur a ni lo. I fate thatchhiat chhiat nen’ a ti hial alawm. Vani pawhin, ‘keipawh ka mo tirh chuan keimah chiah min sawisel a, an mo dangte an fak vak vak zel’ a ti bawk a, ka nu leh pate chu an sual hran lo, ka nu unaute hi an sual em a ni. Pawisa an duh sia, u Rinhlua bulah te hian an mamawh an sawi reng zel. Hman deuh a lo len a, sawi ka chakna a rei tawh lutuk, hun a awm lo thei lutuk a” a ti duah a, ka nuten min ngaihsak lo hlauh bawk a, “U Zirbawnga chu a van fel” ka lo ti a, “Ti leh daih, a lerh tih lohah chuan fel ve e. U Rinhlua chu Kolasib a reilote kan cham chhung pawh khan chhuahna tur neuh neuh a ngah a, zui zel dawnin a chhungte mitmei ka veng ve bawk sia, u Zirbawnga awm lo se chu hrehawm ka ti ngawt ang. Ka nu unaute hi an mak, pasal fanau nei si hi kan awm chhung khan an awm ve chawt reng mai a ni. Vanin, ‘an lo zin reng mai’ a tia, pawisa an duh sia e, a zawng zawngin hria phei la chu i ngei ngawt ang” a ti a, vur min siampui pah mawlh mawlh bawk a, kan ti ti muk laiin, “I emergency light chah a lo thleng” Sangkhuman a rawn ti lut a, amah hi ka chah tir a, a man bak min dil dawn lo emaw tih laiin, “Rawn deliver man 50 min pe tel rawh” a ti deuh tlat a, kan inpe leh ta nge nge a, Kalvari in, “Nula pumpain engatan nge emergency light i tih?” a tih chuan, “Hnathawh nan a la ţangkai dawn chauh” tih pahin a bawm ka hawng a, ka en kual vel a, ka lung a awi veng veng mai.

“A eng ţha pup pup hle mai, awii keichu dawr hawn ka chak tawh e. Ka pi Binladari lah mithmul lem ka vuahsak hman rih loh vangin a ti tau a” ka tih chuan Sangkhuman, “A kawm tak tak a ni, dawr min nghah tir hian pawisa bawm hi tala in a kalh daih zel a, pawisa kir dawn apianga koh a ngai a, mi a ring lo tak tak a ni. ‘Alu leh purun, kuhva rah leh panhnah thleng khan ka chhiar vek’ a ti kher zel lehnghal a, ‘Eng emaw tal ka ei dawn’ han ti ila, ‘a ţul lo, duli leh siki bak ka hlep lo’ a ti hmak zel a, ka pi Binladari chu ni lo se ka pui tawh miah lo ang. Taka, sipaiah ka ţang dawn. Ka nu Nempachang, ka pa Dite, sipaiah ka ţang dawn” a ti hlut a, ka nu leh pate pawhin an ngaihven nghal a, ka nu zawkin nau awih paha, “Engtikah?” a tih chuan, “Ka la hre lo, min la la lo a, sipai lak runpui an nei dawn a, Aizawla kal tur a nia, Fawnvela nen kan kal ve dawn” phur zet hian a ti a, “Awii…mawngkua thlengin an en ţhin an tih kha, keichu ka duh teuh lo mai. Ka pile vanga ka buai aţang khan mi hmaa inhlim tung tung hrehawm zia ka hria, Sangkhum, fimkhur rawh aw, i inrin loh laiin a rawn ri set ange” ka tih chuan, “A ho e…a rik set leh a nung ţha tihna a ni mai alawm. Mawng function tawh lo a ri set ngai lo” tih pahin phone a hmet mawlh mawlh a, a bengah chuktuahin, “Fawnvel, Remkalami te inah lo phei rawh, kan cher chhe ban-a a awm lo a, Kalvari leh naute an awm” a ti lung lung a, cher chhe bana a tih chu Maski a ni ngei ngei ang.

“Cher chhe bana ti kher mah ta che” phone a biak zawha ka tih chuan, “A cher chhe ban alawm, ruhro samlem vuah a ang” a ti kher a, “C. Sangkhum, engmah i nih loh kha” ka tih chuan, “Ka hmingpumin mi ko suh” a lo ti a, “I hming hi a vanduaithlak e. C han belh zeuh ila hming pum a ni nghal zel a, diktak chuan i hming hi a laklawh a, kan duat ber lai che pawhin i hming pum hlirin kan ko che” ka ti a, kan inmelh ram ram laiin Kalvari in, “Sipai ah chuan intlar ve ta ula in tling thei angem?” a lo ti thung a, “Nu Mawisachekin, ‘nitin bawngsa chek hawp ula in tling ve thei mai ang’ a ti. Sachek hawp tur a Fawnvela te ina kal a ngai dawn. Vitamin leh iron te ei ka duh, tlin ve hlauh chuan thla tin hlawh kan la ve thei dawn tihna a ni mai a” phur deuh hian a ti a, “Ni chiah e…sipai hlawh chu a tam alawm. Hmun ralţi deuha awm ho phei hi chuan hlawh tam deuh deuh nei se ka ti a nia, engtikah nge Aizawl ah chuan in kal ang?” ka ti a, “Thlalehah kan kal dawn, sipai ka nih hunah hmangaihna laiphir ka hlan hnâp ang che..issss” a ti a, ka nu leh pate ho nen kan nui dar dar hlawm a, Sangkhuma leh Fawnvela ten thla bi hlawh an neih chuan an inla thiam vel awm mange.

“Sipai lumum satliah an ti cheu ange aw” Fawnvela rawn luh ruala Kalvari in fiamthua a lo tih chuan, “Sipai lumum satliah an tih ho vanga thlamuang deuha muhil siai siai thei an tam emai” Fawnvelan a ti a, ka pa’n a lo sawi phur pui thiam nasa mai bawk si a, “Sachek ei ţeuh ţeuh a ngai a ni” an ti a, an phur khawp mai.

“Chu, Lalhuma leh pu Taipuia te inkhel chu red card pawn field aţangin a chhuah tir zo nange?” ka pa’n a ti leh daih a, “Chhuah tir zo nang, referee bulah, ‘khatiang card siam chawp pawhthler mai mai theih kha kan hlau lo, ka va han chhuak awm hlei lo, inkhelh hun a zawh hma chu ka inkhel dawn’ an tia, an sawikhawm hnuah, ‘an thiam chuang lo, an inhuam a hnu, tlankual ve mai mai rawh se’ an ti tawp a nih kha” Sangkhuman a tih chuan kan nui ho leh dar dar a, zanin chu kan inchhung a emergency light khawp mai.

“Khawiah nge u Rinchuta?” Fawnvelan a tih chuan, “Pu Duhawma nen damlo an kan a, ka pi te inah zanriah kan ei hrim hrim a, hetah ka lo nghak a nih hi” a tih hnuah Kalvari chuan, “Tournament chu a pui awm rem rem hle mai” a ti zui zat a, “U Lalhuma leh Pu Taipuia ten ball an pet ve hman lo reng reng. Inkhelh a zawh rualin jersey an phelh a, an han tlan kual ngei a, pu Taipuian tleirawl ho bulah, ‘ka khel ţha viau lo maw?’ a tia, ‘i dul a nih chu’ an lo ti daih, a ip a ip mai” Fawnvelan a lo ti a, ţhianho a kan han awmkhawm hi chuan a hlimawm dar dar ţhin a ni.

“Dawnfuha han hmelţhat zia hi chu aw” tih pahin ka nu’n a awih hliau hliau laiin a biangah ka va piai a, a hming lo pian chhuah dan ka sawi chu an nuih a za khawp mai. “A hnar te hi siam a ngai lo reng reng, a sam a tam a, a dum ţha bawk si, a mak reuh tak tak a ni. A pianhlim khan a hmelchhe viau dawn emaw kan tia, a hmelţha tial tial a nih hi, in awmna hmun apiangah lawm a hlawh ang a” ka nu’n a tih chuan, “A la luck dawn bawk si” ka lo ti a, “Pa Dite, kan khua aţang hian lo chhuak ta ila khawpui kan chan ve theih i ring em?” Kalvari in a tih chuan, “In la chang kher lo maithei, in pa a pastor chauh a, pro pastor a nih laiin thingtlangah pawh lo awm se khawpui chan nghal chu a harsa ang. Pastor tam tak hi thingtlangah an awm kual nasa a, thingtlang aţanga vairama awm ta daih te an awm a, nangni zawng, in pem kual reng mai dawn a nih hi” ka pa’n a lo ti a, “Ka pi te hi ka ngaihtuah emai” Kalvari chuan a ti hnual leh raih tawh a, “Pasal ka neih hma kha chuan ngaihtuah nachang em em ka hre lo a, pasal ka nei a, fa ka nei chho a, ka pite hian fa ang chiahin min en a, ti hian fate hmangaihna nasat zia ka hre chho a, ka ngaihtuah tial tial mai a ni. Min hmangaih dan tur zia te ka hrethiam chho a, min ngaihtuah dawn tih ka hre bawk a, min hmu miah loin an boral ang tih te ka hlau” a ti sap sap a, a ţap ti tih der mai, “Awii..ka period dawn aniang ka rilru a no” a ti thul, nuih luih tum ngial mah se harsa a ti a nih hmel, u Rinchuta nu unauten an tihdan fa an neih hnu feah min hrilh ve chauh a, ka thin a rim hle bawk.

“Khaih, i pi te chu ngaihtuah mah ta che. I pa ka nih hi, i nu Nemtei te, Remmawii te, Sangkhuma leh Fawnvela te awm chhung chu ngaihtuah reng reng suh. An chet theih loh hnua i rawn buaipui pha lo a nih pawhin kan buaipui thei alawm, keiman mawhphurhna ka la vek ang. I sawi ang kha fa in neih hnuah fate kan hmangaih zia in hrethiam chauh a, an ţhanglian ang a, nu leh pa te zilh hauna ngaithei lo, thuawih duh miah lo fa neih hrehawm zia in hre chho leh ang a, hei vang hi a nia nu leh pate hi lehkhathiam lo mimawl te pawh nise tawnhriat an ngah tawh zawk a, keini ai pawhin an fing zawk tih hriat tur kan tih ţhin ni. Nu leh pate hmuhsit ching, kut pawh thlak hreh lo ho nun hi chhui chhui ula, malsawmna dawnga lian thur thur an awm lo vang, an awm pawhin pi leh pute hausakna chhawm thei, mi tlem te bak an ni lo vang” ka pa’n a lo ti dap dap a, “Khawi hmunah pawh awm ula i pi leh pute hi chu ngaihtuah reng reng suh. Kan khuaa Rinhlua awmna a la rei chuang lo a, in la pem mai dawn lo, khatiang kha ngaihtuah tawh suh” tiin a thlamuan zui a, “Ka pi Binladari chu a pa e, khuanu’n ‘ka pi, i thih a hun tawh a’ pawh ti se, ‘i thu lo’ a lo ti hmak mai ang” Sangkhuman a tih chuan kan nui dar dar a, “U Rinchuta pawh khuanu’n, ‘Chut-a i thih a hun tawh’ ti ta se, ‘i sawi peih e a’ a lo ti ang” Fawnvelan a lo ti veleh a, “Remkalami phei chuan, ‘aw haw wow what a very thihpeihlohnaness’ a lo ti ang a” Sangkhuman a ti leh a, kan nui dar dar reng a, “Kan hlim e ka ngaih a ţha lo, thil ţha lo deuh a thleng dawn niang” ka tih tak hlutah chuan, “A mak, sawi tawh suh” tih pahin Kalvari in ka banah a rawn beng hlak a, “Hlauthawng suh Riri, ka pi Binladari chuan a dawr saw a thihsan hreh dawn lutuk, a theih chhung chu a invuan tang ang. Pu Sawian a rim tluk tluk lehnghal a, a tleirawl ve ţan mek chauh alawm, a hlim theih har har zia i hre lo a nih kha” tih pahin Sangkhuman Kalvari chhip a tuai zauh a, “Remkalami hian kan thu a awih lo a, a la inchhir dawn khawp alawm. Maski hi duhpui miah suh” Kalvari ţhutna lama kun chung meuhin Fawnvelan a ti sur sur a, ka nu leh pa ten an hre phak lo hlauh a, hre pha se chu ka beng ang mawle.

“Ngati nge Maski chu?” Kalvari in a tih chuan, “Zu a in ruih loh chuan ganja a zu rui ţhin” Fawnvelan a ti chu keimah pawhin mak ka ti. “Pimpom-in amahin a siam chawp thiam vek a ti” a la ti zui a, “Bike chhe siam pah ten a zu ţhin an ti” a ti leh zel a, “Tak tak maw?” Kalvari nen kan ti rual ţhat a, “Tak tak ni e…kan hrilh duh lo mai mai che a nih kha. U Nobawihi hian zu zawrh pahin ganja a zuar tel bawk. Kaanga hren bo daih chi ipte kha a rukin a ak reng a, chutah chuan ganja a ak ţhin. U Chianga nen an inpe ru lai ka hmu tawh. Mahse Maski hian damdawi tak chu a khawih lo” Fawnvelan a tih leh chuan ka nu’n, “Eng nge in sawi sur sur a?” a lo ti a, “Nakinah kan sawi zawm leh dawn nia” a tih hnuah, “Nupa hlimna thuruk ka hrilh” a ti daih a, ka nu te hriatah a sawi duh bik lo nain ka awm a ti nuam chiah lo, ruih nei a ang chu ka ti ţhin tak nain sual deuh turah ka dah phal lo.

“Hmel hi bumna pakhat a nih hi, pasal neih dawnah fimkhur tur aw” awmze nei zetin Fawnvela bawkin a ti leh a, Kalvari in min melh ralh a, ka hmel aţangin engmah ka hre bik lo tih a hrethiam aniang, “A zia lo hle mai” a ti a, thil dang a sawi zawm hran lo.

U Rinchuta pawh a lo thleng a, Fawnvela ten sipai chungchang phur deuha an lo hrilh ve chuan, “In tling ve thei meuh ang maw?” a lo tih sak daih a, Sangkhuma pawhin, “Naaa…u Rinchuta hi chu thu lawmawm a pai lo reng reng” a ti ve a, “Tunlaiah chuan eng hna pawh a harsa vek tawh. Thawkrim deuh aiin thawkrim vak lo te hian hna an hmu leh nawlh zel a, kan zoram kalphung hi kan thlak vat loh chuan rilru beidawng ngawih ngawih an la tam ang. Ruihhlo a hluar si, accident, OD leh mahni nunna la pawh an tam ve tawh em hi” a ti ve khauh a, “Depression nei te tana inpuan zahthlak khawpin kan ngainep a, kan nuihzat a, nunna hlut zia hi hriatfiah a ngai. Kan hun tlemte, minute tlemte lek pawh hi depression nei te tan chuan a pawimawh lutuk. Anxiety leh depression chungchang hi kan inzirtir mawlh mawlh a ngai” a ti ve leh duah a, ţawng muang viau mah se a thusawi chu kan lo pawm tlang viau thung.


Tournament zawh hma deuhin Nutein min rawn biain, “ZD Garments ah chuan ka awm a, ka lo video call che ang a, Maski-a tshirt tur chu rawn thlang mai rawh aw” a rawn ti lang lang a, Fawnvela thusawi kha ka la zawt chiang lo va, kei leh kei lo angin ka la ngawih bopui ve char char a, “Aw, rawn ti vat rawh” tih leh phone dah ka rual a, a piancham hi hlim deuhin hmang phawt teh se. Ka ţhiante pawh a sawm a, an lo remti vek nain an pawh lutuk thei loin ka hria a, Kalvari leh Nunhlimi chiahin an pha a, Puipuii pawhin, “Awm ve ila a nawm dawn nen” a rawn ti hial a, a pasal neih dawn khan Maski nen an inkawm ve chauh nain midang zawng aiin Maski hi a pawh zawk daih. Min duhpui thu pawh a rawn sawi ţhin a, Fawnvela sawi kha a hre ve em phei chu ka hre lo, ka zawt lo hrim hrim.

Nutei min lo video call chu lo chhang vatin, “Khawimaw?” ka ti nghal a, “Hei, ZD Garments ah chuan ka awm a, mipa thawmhnaw hlir, ka ti lang kual anga lo thlang mai rawh. Lukhum pawh a awm a, mahse a lu a buk emai a khum tawk a awm lo ang” a ti zung zung a, thawmhnaw min hmuh tir kual laia kil khata ban ti kak ţai chunga lo ding chu, “Kha kha milem em ni?” ka lo ti a, “A hak lai kha min lo en chian tir teh” ka tih chuan, “Hei milem chu a nia, milem hian kamis par a ha” tih paha a rawn tih lan chuan, “Milem dum zawk, ban kâk ţai kha” ka lo ti a, “Hei hi maw?” tih pahin min rawn hmuh leh a, a din dan ngai rengin a lo la ding a, hmalam chiah a melh bawk. “Aw kha milem dum zawk haklai kha ka lo en chhin” ka tih chuan, “Cheiii…ka bialpa a nih hi, i mak ve maw, mi bialpa te milem dum emaw han tih” a rawn ti a, midangin an hre pha ve vek si a, a nuam lo khawp mai. A bialpa pawh milem emaw ka tih lai khan a mit tal lo khap ve tur a nia.

“A hak lai kha a va nalh ve” ka ti leh hram a, “Heta kan lei tho hi a nia, mahse Maski chuan a ha tawk ve lo ang. Ka bialpa hi a sek i ti em?” tih pahin a rawn ti lang leh a, “A sek fuat fuat khawp mai, a ti hrawl a va ţhang thei bik ve” fiamthu a ka tih chuan, “Ka bialpa hi chu a sek lutuk a han koh duat te hi a har a sin. Bawiha han ti ve dawn mah ila a sek em a, ka inthlahrung daih zel” tiin a rawn nui uar uar a, “Awii…duat phal rual loh khawpa sek bialpa neih te chu a ţha alawm. Amah tawp kha bodyguard 100 rual pawn an hlau ang chu. Duat hliau hliau chi loh, duat deuh ţhuai ţhuai chi bialpa i nei a nih kha. What a very beautiful thing” ka tih chuan a lawm nasa mai.

“Awii…in ninawm” a bialpa chuan a rawn ti duai a, a hmui hup chung hian a nui a, a aw a thum lo va, a ţawng dan a pa em em lo bawk. A uan leh uan loh fiah nan a, “Nutei ţhiannu kha ka nia” ka tih chuan, “Ka hria alawm, nizan pawn a sawi char char, Remkawmawl-i a tia” no angreng deuha a tih veleh Nutein, “Remkalami ka ti a nih kha” a lo ti vin hlar a, “Ka tihpalh duai duai, i ţha maw Remkalam” tih pahin a kut a rawn vai a, ka khap fuk fuk a, “Nutei hi ka lo thlanpui ang” no deuha tih pahin biangsum lang kalhin a nui a, a sek viau nain a aw leh a hmel chu a cute hle mai, Nutei lah inla pa chi a nia, anni pahnih hi eng eng emaw an lo inthleng kual em mawni tih mai tur a ni.

Maski-a tshirt ka thlan hnuah ZD Garments neitu chu a man zat kan zawt a, a mawi tehreng nen rin aiin a lo tlawm a, “Naktukah ka lo thawn ang che” Nutein a ti a, a bialpa pawhin a kut a rawn vai leh a, kan inbiakna kan ti tawp zui nghal a.

Zingah Nutein min rawn be leh a, “Ka lo thawn aw, nangmah vang liau liauin ka tho hma” a rawn tih chuan, “I fel hle mai nang nge nge tlangval tih takah” ka lo ti fiamthu a, “Bialpa ka neih tawh hi aw” a rawn tih chuan, “Sek ţung, no tel bawk si bialpa i nei a, nu leh pa nih a fawm thei dawn a nih kha, a thlamuanthlak hle mai” ka ti a, “Ni e…a chak viau nain tumah a ti na ngai lo. Ka vannei tak tak a ni, keimah anga intih danglam a, a nihna lo anga lan a tum ve bawk si lo a” a ti a, a lungawi chuan a ţha a ni mai.

“Pawisa bang ka lo thawn let che aw” a ti leh a, “A ngai lo, thil ei nan lo ei rawh” ti mah ila, “Min rawn thawnna a rei tawh a, i mamawh ve ang, dawr hawn i tum kha” a ti deuh tlat a, “In khuaa ka lo zin veleh Nunhlimi kha ka rawn beng dawn” a ti a, phone a dah zui nghal a.

Buai chung chungin tlaiah sumo ka chang a, naktuk mai hi Maski-a piancham a nih avangin a lo thlen rualin ka haw pui a, pindana luhpuiin ka en dik a, a takah phei chuan a nalh ngang mai. Chutih rualin Fawnvela te thusawi kha ka ngaihtuah tel leh ţhin a, kha khan awm a ti nuam lo vek. Ka nu’n, “Ruihhloin eng thil ţha mah a keng tel lo, chhungkua ti kehchhe tu, nu leh fa ţhen hrang tu a nih hi” a ti ţhin a, ruihhlo a lo ti nasa tak tak a nih chuan ka inngaihtuah chian viau a ngai ang. Pawisa thawhchhuah ngai bawk, thu lawmawm hriat tur awm lo bawk hi ka kham ţhin.

Zanah Kalvari in min lo bia in, “Bualin aţangin ka lo bia che, u Zirbawnga Kolasib aţangin bike in a lo chhuk a, a rawn thleng paw phuk mai. Tlaiah khan a lo thleng” a rawn ti a, “Ehe…eng nge awmzia?” ka tih chuan, “Rawn ţhawn thut che a duh aniang, ka ţawngthei tih a hria a, keipawh engmah min hrilh lawk lo. U Rinhlua pawhin, ‘Teh thut zel che hian, min ti phu zawk alawm’ a lo tih ve hial kha. Tunah chuan Dawnfuha a pawm a, a rukib ka rawn hrilh vang vang che a nih hi, lo inring rawh, i che sual palh hlauh ange aw, tun ţum chu a hmel a tumruh teh mai a nia. Ka hmuh turin a rawn thlen rualin ţhutthlengah a phone a dah a, a khawih zui tawh lo. En mah ila pawi a ti tawh lo aniang” a ti zung zung a, “Naktuk hi Maski-a piancham a ni sia” ka tih chuan, “Ni reng e…Maski pawh kha fimkhur rawh. Ka hlauhthawnpui riau che a nia” a tih hnuah, “Mipa fel vak lo hlir i tawng a, i luck dan hi i luck lo ka ti. Awii…u Rinchuta hi phel theih se aw tiraw, a laiah kan phel anga kan insem mai tur a nia aw” ti vang vang khawpin a rilru a lo hah a, a pasal meuh phel phawk a min sem ve a duh chuan min duh pui lo ve ve tihna a ni mai.

“A ruka rawn kal a thiam ve ngawt mai” ka tih chuan, “Dar6 chauh a la nia, nakin deuhah a rawn ţhawng ve thut maithei che a ni. Lo inveng deuh rawh, ‘i chamrei dawn em?’ kan tih pawhin, ‘ka hre lo’ a ti tawh a nia aw. Dawr tur kha an zo tawh a, pawisaah an buai ve bawk si lo, i ngaihdam hma chamchilh che a tum aniang” a ti a, “A cham hlum ţhak dawn a nih chu. Diktak chuan ka ngaidam chak hlawl lo. Kan rilru a mumal lo dun emai innei mah ila kan inţhen vat ang. Keimah tak pawn ka duh zawk ka chiang fak thei lo a nia, ka hnaih a awm tam zawk zawk lamah ka thle zel a, ka mumal lo lutuk. Miin thingtlang nuthlawi min ti leh sup sup dawn a sin” ka ti ve thung a, “I rilru diktak i la hre lo a nih kha. Nakinah i la hre chhawm ve mai ang. U Zirbawnga leh Kanchhi an inbiak thu i hriat a i awmdan te ngaihtuah let la” a rawn tih chuan, “Hrehawm chu ka tia, ka ngei daih a, ka rilru a na phawt a, ka inngaihtuah chian hnuah ka ngei daih” ka lo ti a, “A nih leh Maski ve?” a rawn tih leh chuan, “Fawnvela sawi kha chu ka hre vek tho a, mahse ka khawngaih, ka ngei chuang lo nain ka tan a ţha lo tih chu ka hre ve aw” ka ti a, tihdan tur ka la ngaihtuah mek chauh a, thutlukna ka siam nghal chuan ka tih sual palh ka hlau ve a ni.

“Maski hi a danglam tawh e tiraw? A bialnu hlui thi ta khan a ti chhe vek” a rawn tih chuan, “A chhungte zawkin alawm ti chhia, a nu leh paten nu leh pa nihna an hlen zo lo miau a, keini aiin a u awrh chauh a, khawngaihthlak ve deuh a sin” ka lo ti a, “A ni ve tho mai. Mahse, i hriat tur chu maw, thawnthu leh film velah chuan changtupa te hi an insiamţha zel a, a takah chuan khatiang kha beisei suh, an sim thei lo chu ka ti lo, mahse, sim harsa an ti vek. Sim hmak an awm laiin sim thei lo pawh an awm tih hria la, midang thil lo tawn tawhah in nghat lo vin Maski zawk kha zir chiang rawh. Mi pasal, nupui an neih hnua sim ta te nen tehkhin reng reng suh, mi kawppui te ai chuan i bula awm reng i bialpa kha i hriatchian zawk a ngai” a rawn ti duah a, “Aw, a piancham hi zo phawt se la, naktuk mai hi a ni tawh a, ka la inngaihtuah nawn ang” ka tih chuan, “Ruihhlo ti te hi kan pui tur a nia, kan thlauhthla tur a ni lo a, kan hmangaih tur a nih rualin damchhung kawppui tur chu thlan uluk viau tur” a tih hnuah kan inbiakna kan ti tawp a, tlaiah khan sumo ka chang reng sia, u Zirbawnga ka hmu lo reng reng.

Maski pawhin min lo bia a, “Ka chau deuh a, zanin chu ka lo kal lo mai ang, bike chhia khawih tur ka nei bawk a” a rawn tih chuan, “A pawi lo” ka ti ve mai a, “I buai viau em?” a rawn tih laiin hmeichhe awin, “Malsawmkim” a ti vin tuar a, a nu a ni maithei a ni.

“Kha thil kha rawn la rawh, hal ral ngawt nachhan tur i nei lo” hmeichhe aw vin zetin a tih leh rualin chhan pawh min chhang lo vin phone a dah a, a nun hi a lo buai ru viau tak tak aniang a, mipa hi chu an ţawng tam lo va, an harsatna te hmeichhia angin an sawi ve chhen ngai bawk si lo, hlim deuh anga a awm chung hian buai rukna a neih ka ring.

Kalvari sawi ang tak takin alu ka vel laiin u Zirbawnga a lo lang hlawl a, ka nu’n a lo be vat a, min rawn pan nghal mai lo vin ka pa bulah a ţhu a, “I lo va kal khat tawh ve, Rinhlua in rawn awmpui chawt ţhin si a, in reh ta vang vang a” ka pa’n a tih chuan, “Ka buai ve tawh em a, nupui a nei tawh tho bawk a kan tia kan rawn zin khat ta deuh a” pangngai deuh hian a ti a, “I nau hmeichhia kha engtin nge a awm tak?” a tih leh chuan, “Pasal a nei a, mizoramah an awm lo. Remmawiin a sawi lo a ni maw?” tih pahin min rawn melh a, ka sawi reng a, “Ka kal ve thei lo a a pawi e” te pawh ka ti, ka pa hian engmah a hre rei thei lo.

“Sawi chu a sawi kha, a lang ve thei lo a thil pawh a thawn alawm. I theihnghilh zung zung zel a, thu hrilh tlak i ni ţhin lo” ka nu’n a tih chuan, “Dikchiah” ka lo ti vat a, “A nih chuan in buai ve dawn a nih chu” ka pa’n a ti ban charh a, “Buai ve angreng, ka unaute an chhangchhe tawh hlawm a” awmze nei zetin u Zirbawnga chuan a ti leh kher a, “Nupui neih vat i ngai a nih chu” tiin ka pa lah chu a nui huah huah a, “Kan lungawi tlan hunah ka la nei ve ang chu” a tih te chuan ka nu leh pa ten ngaih kawih nachang an hre lo reng reng.

“Eng nge i tih Remsial?” tih pahin min rawn pan a, ka bula a rawn ţhut ruala, “Masala rim i nam” ka lo tih chuan a nuih a za viau mai. “Dawr i luah lut tawh em?” a tih pawhin, “Thla tharah” ka ti hmuk a, “A nih hmuk hmuk chu” a ti kher bawk a, “Kanchhi bialpa hlui ka duh lo” ka tih chuan a nui hawk a, “Pasal i nei tawh em?” a ti vel a, “Nei mai mai lo” ka tih chuan, “Ka la rawn leng ve thei tihna a nih chu. Khawi, ka lo tihpui ang che” tih pahin ka chemte ken lai min laksak a, “Bialpa ka nei tawh alawm” ka tih pawhin, “Pasal i la nei lo, kha kha a pawimawh” a ti a, chemte dang ka la leh a, “I duh hun hun a i ngaihzawn a i duh hun hun a i ţhen tur ka ni lo aw” ka tih chuan, “Nakinah ka hrilhfiah ang che” a ti a, “Remmawi, thingpui han lum rawh. Kha, Zira pawh khan a in duh ang” ka pa’n a tih veleh ka tho nalh a, ka chhuan hnuah thinrim deuhin ka ţhu leh hnawk a, min rawn hnaih apiangin hnung lamah ka awn a, chair ke a kul ve zel tih ka hre si lo chu chair chawpin chhuatah ka let thla tawp a, ka nu a ţe ţhat a, “Huiham” ka tih rualin u Zirbawnga hmel ka hmu nghal a, a dawtah ka pa ka hmu leh a, “Fimkhur ţhin ta che” vin zetin ka nu’n a lo ti bawk a, “A na em?” min kaihthawh paha u Zirbawngan a tih chuan ngeiawm deuhin, “Ka lu hi tlem chuan a thak ve, a na lem lo” ka ti a, ka nu’n, “Ţhu hle hle tawh rawh” tih pahin ka hnungah a la beng zui a, inngaihtuah chian chuan bialpa hlui te hmuh laia han tluk tual chu ka zak ve khawp mai.

Thingpui pawh ka nu’n a siam ta ringawt a, alu la vel tho mah ila ka ţhu fimkhur tawh a, ka kut bak tih chet ka tum tawh lo. U Zirbawnga lahin, “A na lo tak tak maw?” a ti deuh reng a, “Na lo ka tih kha” ka tih chuan, “Min hmuh hian zam viau zel suh” a lo ti vel a, a la nui ruh ruh zui a, “Theihai hnai tah nawk nawk che ka chak ngawt mai” thinrim deuh a ka tih ve te chuan, “Min la duh reng kha, ka hria” a ti vel a, ka melhin a intithei zawk a, melh pawh ka melh peih tawh lo.

“Naktukah eng nge i tih dawn?” a tih chuan, “Chhunah thil ka zuar anga tlaiah Maski te inah chaw ka ei dawn” ka ti a, a lo thaw hawk a, a thin a rim leh ringawt tawh aniang chu. In rin loh lai takin, “Ka tihpalh” a la ti zui a, a ţawng a zawih tehreng nen ka phu zawk tho alawm le.

“Tihpalh tlai tawh hi chu dawn sawn dan a vang e, i rilru i thlak hma thei si, ngaihdam che min ti chak lo zo vek” ka ti a, ka nu leh pate mitmei pawh veng zo lo vin alu ka kan lai te chuan ka bulah a lo ding ve tlat a, “Pangngai deuha ti ti ka duh. Engtikah nge hun i neih ang? Maski-a hi a pianchamah ka rawn ti buai lo vang a, ka rawn inlan lo ang. In inkara tlakzeh ka tum lo va, thudik hrilh che ka duh, insawifiah ka duh” a ti mawlh mawlh a, a ţuah ve thawkhat tihna a ni mai.

“Tikhan sawi mai la” ka lo tih chuan, “Ka ti thinrim che a, rilru nuamin ka awm bik lo. Ka dik lohna kha ka pawm thlap” a ti a, “Ni reng e, ka bialpa hlui vangin ţhen ve ta che ila engtin nge i awm ang?” ka lo tih chuan, “Kha tak kha ka rilru a a awm reng vang a nia ka inthiam theih loh” a lo ti a, a inthlahrung dek a, “Nang aia duh ka neih loh zia ka hrechhuak bawk a” a tih leh chuan, “I inhrechhuak har emai, bialpa ka neih tawh hi. Ngaiah min nei a nih kha” ka nu leh pate hriat phak ve loh tur khawpa zawia ka tih chuan, “A dik, ngaiah ka nei che a, kan inţhen chiah khan hmeichhe dang ka mamawh loh zia ka hria” a ti a, a rukin ka nui a, a hmuh laiin ka tum hmuk thung a, a inchhir hrim hrim chuan a ţha a ni mai.

A haw hmain, “I hman hunah kan pahnih chiahin kan sawi dun dawn nia, ka lo nghak ang che. Lukir-a piancham chu han lawm phawt teh u” a ti a, “Khati khan ti ve ziah suh” ka tih chuan, “Cher si, ka ulh tliah rum nghal loh” a lo ti a, ka thinrim hmel a hmuh rualin a lo nui a, “Awii…engahmah kan inngai lo dun e” ka ti hluai ringawt a, sawi zawm tur pawh ka hre tawh lo.

“I kiu kha i tlukna lamah a pilh ve deuh a nih kha” tih pahin dawhkan kila kan ţhut leh hnuah ka ban a rawn vuan a, “A thi ser ser mai” a tih leh chuan, “A pawi lo” ka ti mawl tawp a, a haw dawnah, “Hmeichhe dang tumah ka pan ngai lo” nghet charh, awmze nei deuhin a ti a, ka thlah lo a, amah pawhin a phut lo.

Ka nu lahin, “A rawn birh tlut tlut mai che sia” a lo ti ve sek a, “Ka mu dawn” ka ti daih thung a, Maski pawhin min lo la be leh bik lo va, Nunhlimi message chu chhiar lem lo vin ka paih tawp a, chau viau mah ila dar12 ka nghak ţang ţang a, a chang leh phone ah game ka khel a, 12 a rik veleh Maski chu a piancham lawmpuina ka thawn a, status ah ka dah bawk.

‘I hmasaber’ a rawn tih laiin, ‘I va reh ve’ ka lo ti thung a, ‘Nia, sawi tur nei si, midang be peih lo ang hian i awm ve ngai em?’ a rawn ti a, ‘Awm ngai lo, ka sawi nghal zung zung zel a, sawi tur hi ka khawl khawm thiam lo, ka ngah ngai lo” ka tih chuan, ‘I vannei hle mai. Chuan, ka lawm e aw’ a rawn ti a, ‘Aw le’ ti ve bawk mah ila min rawn chhang let tawh chuang lo va, eng thu mah ziak lo vin a inkhelh zawha kan pahnih a kan thlalak kha status ah a rawn hmang ve a, ‘Kan va chhe lo’ ti leh mah ila min chhang chuang lo.

Chawhma chhung zawng ka tlanchhiatsan a, u Zirbawnga lahin ka hman hun min rawn zawt sek a, ‘Ka lo hrilh ang che, ka ngaithla ringawt dawn a nia’ ka ti sa vek a, ka rilru a mumal lo a, rilru ka siam fel thei chiah lo nain Maski hi ka duh tawh zawkin ka hria, mahse, ka tana ţha lo tur a nih chuan ka thlah ngei a ngai bawk ang. Mi hi bialpa an neih hian keimah ang hian an buai ve angem ka hre lo a, keichu an pahniha an rawn lan hian ka hah vek zel, englai pawh a hnathawk ang reng ka ni.

Tlaiah Maski te inah kan kal khawm a, amah lo chu tumah an lo awm lo va, Fawnvela leh Sangkhuma nen tlawng kan nih avangin Pimpom-i kan ko phei ve a, u Lalhuma leh pu Taipuia bakah u Nobawihi an rawn lang ve hlawl bawk a, zu rim an nam leh huam tawh.

“Ka nau duat piancham a ni tih kan hria a” tih pahin u Nobawihi chu a nui har har a, Maski chu thil an rawn pe ve ngei a, keiin tshirt ka pe bawk a, Fawnvela leh Sangkhuma ten, “Engmah kan lo keng ve si lo, rawng kan bawl mai ang” an ti a, an inchhung a lian a, a nawm tehreng nen a ruak huai mai. Banga a pi thlalak intar chu ka hmuh apiangin ka mumang kha ka hrechhuak zel lehnghal a, en pawh ka en ţha ngam lo.

U Lalhuma lah intithei deuhin u Nobawihi malchungah a mu a, “Ka lukham hi a dup ul ul a nia” a ti deuh chhen a, u Nobawihin, “Huihhuih” a lo tih chuan pu Taipuian, “In chhe dun huihhuih emai” a ti hmuk a, bialnu tur duh ve ngawih ngawih, hmu zo bawk si lo pu Taipuia tan chuan lungawi deuh a en an har khawp ang.

“Nobawihi hi chuan hah a ti dam sawng sawng zel, khawlum laia min ti dai tu, khawvawh laia min ti lum tu a nih hi” u Lalhuman a tih chuan, “Khawvawh lai te chuan in la in huat em kha, zu man in ţhingin in insual lo chauh a nih kha” pu Taipuian a lo ti a, pawnah ka chhuak daih a, Fawnvela leh Sangkhuma te ar puahna bula ka ţhut ve rual chuan, “Midang a sawm em va zawt teh. Kan che mawlh mawlh sia, a nuam lo. An gas te saw kan gas nen a in ang lo a” Fawnvelan a lo ti bul bul a, “Keini pawh nangman nuam i tih loh kan hlauh vang chauh a lo kal kan nia, tunlai sachek kan ei nasa si, ar thang rim hian ka luak a ti chhuak” a ti leh a, “Khawiah nge a unaute an awm? A nu pawh” Sangkhuman a lo ti ve bawk a, “Pawisa an ngah tehreng nen anni chhung hi chaw an ei rual pawh ka ring lo” Fawnvelan a tih chuan, “Ngawi mai mai teh u, a lo hre pha ange aw, u Lalhuma leh u Nobawihi te induat ka hmu peih lo a ka lo chhuak a nih hi” ka tih pawhin, “Va zawt rawh” an ti tlat a, peih lo deuhin inchhungah ka lut a, u Lalhuma te awm lohna lama Maski a ţhu chu kal hnaihin a bulah ka ţhu ve a, “I ţhian dangte i sawm ve em?” ka tih chuan guitar kuah chung hian a lu a lo thing a, “Min rawn lawmpui tu te saw an zahawm vak lo i ti mi?” tih pahin u Lalhuma lam chu a hawi zauh a, “Ti chuang lo e…anni saw chu kan inleng hlun an nih saw. Khawiah nge i chhungte? Ngati nge tumah i sawm loh?” ka ti a, Pimpomi pawh u Lalhuma te awmna lamah a ţhu ngawi hle hle a, kan vai chuan sawisak zawh hlim kan ang vek.

“Nuam in tih loh ka hlau a ka sawm lo mai. Ka naute bazar ah an kal, an lo haw ţep ang. Ka nu pawh a rei lo ang” a ti a, boruak tih zangkhai nan guitar a perh rualin ka lo zai a, u Lalhuman, “Chu, police motor ri em ni? A va mak ruah ruah ve” a rawn ti vel a, Maski pawhin, “Guitar ri hi ngaichang la zai chauh ţhin rawh. I zai kha rem chawp tuma buai char char a ngai a, i hmanhmawh thut zel bawk sia, a hahthlak” a ti ve ngei a, “Guitar ri ka zairem thiam lo, zai rem tur chuan zir hmasak ka ngai” ka tih chuan min en tawp a, guitar pawh a ri tawh lo.

“Keichu a hang a zai tawp chi ka nia, mahse guitar ri khan min tibuai chuang lo, i duh chuan lo perh tho rawh, min vengthawng lo la” ti mah ila, “Zai i tui chuan guitar ri tal hi hriatthiam tum la” a lo ti a, “Ka buai, ka hman lo” ka tih chuan a nui ve ta nge nge a, a nau te pawh lo hawin rawng kan bawl sap sap a, a nu pawhin min be ve luam a, Maski nen an inbe lo thung a. An naupang ber hi a pa a hran a, tu fa nge tih tuman kan hre lo. A la naupang ve a, kum7 vel chauh a la ni a, a nu nen an rawn haw a inthlak zo chu chhuata Maski-a ţhu hle hle lai chu a hnunga a bawh a, a kuah zui a, Maski pawhin a samah lo chul sakin, “A nuam em?” a ti a, a duat hmel khawp mai.

“Hawh, milem kha chei leh tawh ang” a nauin a tih chuan, “Zanah kan chei dawn nia. Tunah chuan ka ţhiante an la awm sia” zaidam deuh hian a ti a, an inchhawn chhaih vel chu ka lo thlir a, ka khawngaih tlat hi hrehawm ka ti, engmah ka sawi ngam loh phah vek. Khawngaih lo ila chu ka chhuahchhal anga, a lo thinrim leh ka ţhen hmak mai tur a nia, khawngaihnain ka tih tur min ţhulh tir daih a, a ho zo vek.

Ka haw hnuah u Zirbawngan min rawn be leh a, hei lah hi a duh tawh chu a ti tlut tlut zel. “Min ngai a nih kha” a rawn ti tawp a, a duh duh hian min puh a, a hlimpui ve em em zel a, Kalvari thlavang a lo hauh ţhin erawh a fel khawp mai.

Zanreiah ka phone riin min ti harh a, “Sangkhuma sipai ţan tum inpuahchah vel a ni leh pek ang” tih hlak hlak paha phone ka en chu Pimpomi zawk a lo ni a, “Eng nge a? Dar3 a rik dawn tawh hi” ka tih chuan, “Awii…dar zatah buai suh ka thin a phu nasa lutuk, Maski-a intihhlum a tum a mah se an chhan hman an ti, tunah damdawiinah an hruai” a rawn ti a, ka mu hle hle lai chu ka inperh tho nghal a, “Min tih der” ka tih chuan, “A teuh lo nasa, ka tihder che a tikah a mak viau ang. A nu pawh a ţap vak vak alawm. Kan veng ho chu kan tho ţeuh tawh, in veng a rawn thleng ve ţep ang. Ka tha a khur zawih zawih mai” a ti a, keipawh ka tha a lo khur ve ringawt a, a hlim hlawl lo tih ka hre reng a ni. Aizawl aţanga ka let leh hnu hian a ni lehzual.

“U Nobawihi pawh a awm, kan ri hlut kha a in an dap dawn emaw a tia zu te a lo thukru vek a, i duh leh zawt rawh” a rawn ti leh a, Maski te leh u Nobawihi te hi an inhlat vak lo a, sawi tur a hre emai a ni tak tak aniang. Sangkhuma ka bia a, thil awmdan ka sawi chuan, “Min rawn sawi ţhaih tum suh, an sa ka ei vang khan eng thla mah a rawn kal lo vang, mu mai mai rawh” a rawn ti a, Pimpomi min rawn hrilh ang ang tha khur dar dar reng chunga ka hrilh ve chuan, “A va â ve” a ti a, “Engtia awm nge i duh? Khawiah nge kan hruai dawn che? Fawnvela i kaitho tawh em?” a rawn ti zui mawlh mawlh a, chhan pawh ka chhang hleithei lo, puitlinnain a ken tel thil hi a rapthlak hlawm emai keichu naupan ţhat leh daih ka duh. Mihring nun hi zir tham lawih a loh nih ngei hi.

CONT…

Leave a Reply