You are currently viewing KEIMAH, THINGTLANG NULA S2-27

KEIMAH, THINGTLANG NULA S2-27

Spread the love

KEIMAH, THINGTLANG NULA S2-27

“Remkalam” tih ri leh kan kawngkhar ri a inpawlh nuk a, mihring hlauh em em nei lo mah ila thihna lam hi chu ka hlau ve aniang ka phu zawk zawk reng a, engtia rei nge ka ţhut tawh pawh ka hre lo reng reng. Mitthi dar ri ka hria ang tih ka hlau ber a, ka kutphah pawh a thlan dup mai.

“Lalremmawi, chu, Sangkhuma te zu rui em ni?” ka nu’n vin zeta a rawn tih pawhin ka phu leh tho a, “Va hawng rawh” a ti a, “Ka ngam lo” ka lo ti thung a, “Eng nge maw i hriat ni? Sangkhuma leh Fawnvela zu rui hi chu ka kham a nia” a ti hlak hlak a, a va hawng ta aniang ka ţhiante pahnih nen ka pindanah an lo lut a, “A thi ta em?” ka lo ti nghal a, “Ka hre bik nang, nangman a nih kha chanchin min rawn hrilh” Sangkhuman a tih chuan ka nu a hawi â nasa khawp mai.

“Engthil nge ni a?” a tih chuan Sangkhuman ka sawi ang chiahin a hrilh ve a, kan thawm a lo ngaithla ve reng aniang ka pa zawkin, “Tunah damdawiinah a awm em ni?” a rawn ti a, “Pimpom-in ‘damdawiinah an hruai’ a ti” ka tih chuan, “Khai aw..a va zia lo ve, kal ve a ngai a nih chu” a ti a, ka tha khur a reh thei lo a, keichu engmah ka ti thei lo.

Ka phone a rik leh pawhin ka ţhiante hnenah, “Chhang rawh u” ka ti a, Sangkhuman a chhan laiin ka bulah Fawnvela a rawn ţhu a, “Tuar hram hram rawh, khawvel hi a chhe tawh a, a thi hma apiang an vannei a ni mai. Vanah an chawl hahdam vang vang tawh dawn a, Maski pawh hrehawm a ti lo ang, a thih phal lo mah ila ani chu a hahdam tawh ang a” a tih dap dap laiin Sangkhuman, “A thi lo, Fawnvel” a ti hmuk a, keipawh ka hahdam huai mai.

“A va laklawh ve” Fawnvelan a tih chuan, “I mawl em ni?” ka lo ti a, “An chhan hman alawm. Tunah damdawiinah a la awm a, a ţha tawh an ti. Mahse tuman an be ţawng zo lo a ni awm e” Sangkhuman a tih chuan, “A aw a thi tho a nih chu” Fawnvelan a ti ţalh a, “An in lamah ka va phei ve lawk ang e, a naute an lo thlaphang ang” ka pa’n a tih laiin keini chu damdawiin a kal kan tum thung a, insiam hranpa lo vin kan chhuak tawp a, rilruin ka ţawngţai nasa a, engtia han tih tur nge pawh ka hre lo.

Thlahrang lawm tih takah Fawnvela chuan, “A thla tlem tal a chhuak hman tho angem le? Kan ghost hunting channel hi kan ţhianho chauhin kan la subscribe a, tuman an subscribe duh lo reng reng” a ti nang nang a, “Ţhiante thih lek lek laiin youtube ringawt lo buaipui suh” ka ti vin hlar a, “Video 50 dawn kan dah tawh a, subscriber hi 10 pawh an la tling hleinem” a tih chuan, “Hmun hrang tak takah kal ngam hek lo che” ka ti a, Kalvari in min lo call chiah bawk.

“My friend” ka tih rualin, “Maski chanchin i hre tawh em? Hei, pu Duhawman chanchin a rawn sawi a, kan tho vek, eng nge i an?” a rawn ti nghal mawlh mawlh a, “Chanchin ka hriatna a rei tawh, damdawiin kan pan mek” ka tih chuan, “A ţhat chu, u Rinhlua leh pu Duhawma pawh damdawiinah an kal dawn, a harh tawh an tia, ţawngkam fimkhur hle rawh u aw” a rawn ti a, “Sawi tur ka hre teuh lo mai” ka tih chuan, “A tan i awm tih hria se a tawk a ni mai. Hmuh apiangin a nui hmel kan hmu tel ziah sia, intihhlum a tum ringawt hi a mak tak tak a ni” a tih hnuah, “Mi hlim thei deuh ni a kan hriatte pawh hian an nunna an ti tawp leh thut zel a, chuvang chu a nia tumah fak hreh loh tur, fak mawlh mawlh tur ka tih ziah ni. Kan ţawngkam ho te pawh hian rilru a thlak hlawk thei a, Maski chu a pawi emai a, eng nge a ngaihtuah ang aw” a ti vang vang a, “Damdawiin kan thlen hunah ka lo bia ang che” tiin kan inbiakna ka ti tawp a, “A zakzum sia, intih hlum tum ve uk si a a thi leh lo hi a zak viau ang a” Fawnvelan a lo la ti a, “I mawl met mut e a, kan hun tawn nen a inrem lo deuh ngaihtuah ngaihtuah suh” Sangkhuman a lo ti hluk a, damdawiin kan thleng chu kawtah mi an lo awm nual a, kan khuaah chuan thu a darh chak a, Maski te chhungin mi hriat duh lo viau mah se an ţhenawm te ho te, u Nobawihi leh a team ho ten an sawi darh tihna a ni mai. U Nobawihi zu in ţhin ho hi an ţawngthei a, khua a var meuh chuan khawpumin an hre tawh ang.

Tumah be lem lo vin a chhungah kan lut a, damlo an tam lo va, lut lo turin tuman min ti lem lo bawk a Maski awmna lam kan pan a, ka tha khur hi a reh hleithei lo, khum mawng lamah a nu a ding a, a mit a bui lâk a, “Isss…Maski” Sangkhuman a tih pawhin Maski chu chunglam melhin che lo vin a mu char char a, a nu’n, “A bulah khan ţhu rawh u, mi kan ti phawklek a, a zia lo tak tak a ni. Ka va chhuak ang a, kan ţhat thu ka va sawi ang e, an ţin ve mai ang” a ti a, hria an tam hman lutuk a a mualphothlak tak tak a ni. Thu chiang an hriat hma chu an ţhenawmte pawh ngawih ve mai tur a nia, thu chiang hre mang lo va kan khaw group a rawn post tawk te pawh an awm ka ring.

Khum bula ţhutthleng an dawhah kan ţhu tlar ţhap a, Fawnvela lahin ka beng bulah, “Be rawh, be ta che” a ti deuh reng a, kei lahin sawi tur ka hre bawk si lo, “Ti ti pui dan ngaihtuah rawh” zawitea Sangkhuma hnena ka tih chuan Maski kutah a vuan thawr ringawt a, “A chi leh loh” tih pahin a thlah leh thuai a, kan che sual nawk nawk hlawm a, kan rilru a la chiai tlang a ni.

“Maski, mahni intihlum chu vanram an kai ngai lo an tih kha, Pathian duh loh zawng a nia, ti tawh reng reng suh” min melh zawk zawk chungin Fawnvelan a ti a, “An hnuk a chah hmain Pathian nen a an inrem leh rem loh tuman kan hriatpui lo a, khalam kha sawi tawh suh. Mihring chu kan thih hian kan thi a ni mai a, kan kalna tur chu Pathian rel tur a ni, keini lo sawi ve tur a awm lo” ka ti sar sar a, Maski-an ka ţawng a hriat ka hlau si, ka ţawng zawi lutuk thiam bawk si lo, midang tumah an lo lut lo a, pawn lamah an dang a nih ka ring. Mahse, u Rinchuta a rawn lut thung a, pu Duhawma hmel hmuh tur a awm lo chu a tihzia tak tak a ni.

“Eng nge i an?” tih pahin kan ţhut lohna lam zawk khum bulah tho a ding a, Maski darah zawi te tein a beng dat dat a, thil pawi a thlen hmain an chhan hman tak tak aniang Maski pawh tawi tein a nui thei. A lu a ti che ringawt a, engmah phei chu a sawi lo.

“Pathianin a hmangaih khawp mai che, i nun tih tawp i tum hnuah a la chhanchhuak hram che a nia, Pathian hian chhan nei lo vin engmah a ti ngai lo va, tuna a chhanchhuak che pawh hian chhan a nei ang, ti tawh reng reng suh, Pathianin hun ţha a la pe che hi lawmthu sawi zawk rawh” a ti a, natna dang em em a nei lo bawk a damdawiin a awm rei vak pawh a ngaih ka ring lo.

“Nakinah kan la inkawm dawn nia, duh leh kan inkhel ang a” u Rinchuta bawkin a ti leh a, kan ngawi ţhap a, pawna kan chhuah leh hnuah pawh Fawnvelan, “A thlarau a thi hman aniang a ţawng duh bawk si lo a, sawi tur a vang emai” a ti nuah nuah a, tumah an lo awm tawh lo va, khua a var tawh bawk a, an ţin vek tawh a nih hmel.

“A mawl e..eng nge a ngaihtuah ang le? A dam chian veleh ka hau hrep dawn” ka ti a, ka hlauhthawnna a reh thei lo a, khawvar hnuah pawh hian thawm chhe te a awm chuan ka phu zawk zawk tho zel. A nu leh mipa pakhat, zu heh tih hriat zet hi an rawn chhuak veleh a, “In fel hle mai” a tih chuan, “Engtin nge in hmuh a?” ka lo ti a. “Aaaa…Pathianin a thih a la phal lo aniang ka muhil ka harh kha inhnuaia ka thil dah lak tumin ka chhuk a, Maski lo inkhai ka hmuh khan a ke lamah ka pawm bet a, hei, Liana hi ka au vak vak a, hruiin a nghawng a veh nat ka hlau a, ka mangang kha ka chak lutuk ringawt. Inhnuaiah chhuk lo ila chu kan chhan hman kher lo ang” a ti malh malh a, inhnuaia a thil dah lah kan hre ve mang si lo va, zawt lem lo mah ila kan hre chak fur ang ka ring.

Damdawiin aţanga a chhuah hnuah Maski hmu turin an in lamah ka kal a, u Zirbawnga pawhin min lo be ziah tak nain ka rilru ka pe thei lo. Buhhawp leh eitur dang ka ken sak nual a, kan la inbe lo va, intihhlum a tum chhan pawh ka la hre lo.

An in ka thlen veleh a nauin, “Pindanah” tih pahin Maski awmna lai ber min kawh hmuh a, inhnuai chhukna lam chu ka melh zauh a, tala lianpuiin an lo kalh bur mai. Pindana ka luh chuan khum lu nghenga a lo ţhu ka hmu nghal a, min be duh tawh em ang chu.

“Eng nge i an?” ka tih chuan, “Ka ţha” a lo ti ringawt a, ka pheikhawk phelh sawk sawkin khumah ka lawn a, a kil lam zawkah khum bu ngheng thoin ka ţhu ve tharh a, ka inpuan tir dawn khawp mai.

“I va mawl ve” ka tih chuan tawi tein a lo nui a, “Ngati nge a?” ka ti leh a, “Engvang nge?” ka ti bawk a, a inpuan hun nghak tur zawk ni mah ila natna hranpa em em a nei lo va, ka hre chak bawk si, min chhan dan a zirin keipawh ka insiamrem thei mai ang chu.

“Sangkhuma leh Fawnvela te sipai a ţan ve an tum a, naktuk zingah Aizawl ah an chho dawn” ka tih chuan, “A va ţha ve” a lo ti a, “Ni e, a ţha khawp mai, ţawngtlem sa nak laiin i ţawng tlem lehzual a, kawm i harsa” ka tih chuan a nui leh ringawt a, an venga mi thil inti hre deuh te lahin a bialnu hlui Dindini thlana a kal fo thu an sawi a, ani pawh kha mahni intihlum tho a ni a, mi khan an hmusit ve thei em a, ţhian a nei bawk si lo a, khawvelah a awm peih tawh lo aniang.

Engmah a la sawi duh si lo va beidawngin ka haw leh a, zanah nu Mawisacheki te inah ka kal a, Fawnvela leh Sangkhuma pawh sipaia an lak loh hlauin sachek an lo hawp nasa mai. Fithangin, “Maski a ţha em?” a lo tih chuan, “Aw ţha e, mahse a rilru tibuai deuh tu a awm aniang ţawng tlem sa nen a ţawng tlem lehzual a” ka tih chuan, “A hrawkah hnawh tu a la awm a ni lo maw?” Sangkhuman a lo ti a, “Engmahin a hnawh lo ang, a la inpeih lo aniang, inngaihtuahna a mawl mang thei ropui si” Fithangin a ti hlak hlak a, “Sachek lah hi duh aiin in ei tam mah mah zel a, ka hlep tur zawng zawng in ei zo vek tawh. In tlin loh chuan ka hlap hrep dawn che u a nia” nu Mawisachekin a ti khar khar bawk a, “Hlawh kan neih veleh kan rul ang che. Ka tlin loh a tikah, ka tling lo a nih chuan e..kar khat chhung i pawnfen ka feng ang” Fawnvelan a ti lung lung a, u Lalhuma lahin, “In sachek hawp lai kha ka hawp ve chak vang ni miah lo vin ka chil a awm a awm mai. Ka chil a put a, ei chak ka nei bawk si lo” a lo ti a, Fawnvela te Aizawlah an kal tih hriain pu Taipuia nen an rawn thlah ve ngei a, an beng a var thei a nia, mitthi kan neih pawhin an kal ngei ngei a, tlaivarpui ngai chi an nih pawhin an tlaivar ziah, miin an bawl sup sup nain a bawl tu te hian an tluk lo, anni aiin an tlawmngai daih zawk.

“Sachek hi chuan tuina riau a nei ve a, chil a ti put duh alawm. Mahse, nu Mawisacheki zawrh lai a nia, kan hawp ve zel chuan a hek ang” pu Taipuian a lo ti a, “Sachek rim hi ei theih se” u Lalhuman a tih chuan nu Mawisacheki pawh a nui hak hak a, a khawngaih ngang aniang a suah sak ve a, an lawm vur vur khawp mai.

“A tirah tlan chak vak lo ula, midang an hah tawh hnuah tlan vak ang che u” nu Mawisachekin a tih chuan, “Hah mah se keini aia hma a an tlan chuan ka umpha thei kher nang” Sangkhuman a lo ti a, “In um phak ai chuan tlan thlen theih kha a pawimawh. San zawngah chuan kan tling dawn chiang sa, sipai, keini aia te ka hmu hnem emai. Keichu hmun ral ţi tawkah min dah se ka ti a nia, Fithangin min duat deuh ang” Fawnvelan a ti fiamthu a, “China sipai ho bulah pawh dah che se ka duat peih lo che. Lerh sa nak laiin sipaia ţan te i tum a, khaw tinah bialnu i nei ang chu” a lo ti a, sipaia ţang lo turin a duh zawk a nih hmel.

“Hlawh ka neih hunah chuan ka pi Binladari chhawk tu tur nula manchawiin ka rawih sak ang, issss” tiin Sangkhuma a nui vur vur a, “Dawr nghak turin tumah a ring lo, zanin tlaiah pawh inleng an tam deuh laia chhangbawm kalhna tur tala tê a zawn nasat kha” Fawnvelan a lo ti a, “A pawisa dah khawlna ber thingrem phei chu a kalhna tala a lian turu, kg1 vel lai aniang, tuman an chhut chhiat loh nan tala lian ber a lei a, a kalh hmak. A rit bawk a a hawn leh a kalh te hian a hah thei lutuk” Sangkhuman a lo tih chuan kan nui dar dar a, u Zirbawngan min lo call vangin pawnah ka chhuak a, min rawn nawr leh chung dawn aniang chu.

“Eng nge a?” ka tih rualin, “Khawiah nge i awm?” a rawn ti a, “Fawnvela te inah” ka tih chuan, “Kawngpuiah lo awm rawh, in in aţangin ka chhuak chiah” tih leh phone dah a rual a, tumah hrilh lem lo vin kawngpui ka pan a, u Zirbawnga ka lo nghak a, a hmanhmawh aniang a rawn thleng rang khawp mai.

“Kolasib ah tih tur a tam si, in khuaa awm rih ka duh bawk si” min hmuh rualin a ti nghal a, “Aw…haw la, i rawn lehlang zawk zawk anga a ni mai alawm” ka tih chuan, “Ka ti laklawh tawh a, ka thil tum ti hlawhtling lo a haw chu tlawmah ka la ve deuh” a ti a, “Eng nge i tum?” ka lo tih chuan, “Neih let leh che” a la ti tho a, Maski chanchin a hre ve vek si a, u Zirbawnga hi chu amah lo midang ngaihtuahna a nei lo reng reng.

“Haw mai rawh” ka tih chuan, “Tih tur hlirin min hmuak, mi angin ka hman ve em em lo a nia” a lo ti a, “Chuvang tak reng chuan haw rawh” ka ti leh a, “Ka tihpalh a nih kha” a tih chuan ka ngawi reng a, “Ka tihpalh tak tak” tih pahin min rawn din hnaih a, “A thleng nawn tawh lo ang, ka tiam ang che” a tih pawhin ka la chhang chuang lo.

“Hun thawl i neih hunah park ah kal ang aw” a tih chuan, “Ka bialpa ka ţhen dawn lo” ka ti a, a ngawi reng a, min chhang tawh dawn lo emaw ka tih hnuah, “I chiang em?” a ti sup a, “Chiang e, rilru ka siam fel tawh a, ka ţhen dawn lo” ka ti nawn leh a, “Mimawlnu” zawite hian a ti a, “Min mamawh lai tak a nia” ka tih chuan a lo nui hawk a, “Min pui char char ţhin tu a nia, min mamawh laia kalsan ka duh bik lo” ka tih chuan, “Amah zawkin kumkhuaa kal san che a tum a ni lo’m ni?” a ti a, “A hmangaih lo che, intihhlum a tum a, amah chiah a in hmangaih” a tih leh chuan, “Nangpawn min hmangaih chuang lo. Ka vanduai a, hmangaih tak tak tu ka la tawng lo, tu emaw theihnghilh nan a min hman in tum ve ve a, in in ang reng” ti a kal mai ka tum chu, “Naktuk tlaiah hun lo insiam rawh, park ah ka rawn hmu ang che” a ti hram a, chhang tawh lo mah ila a tawp nan a hmuh tho chu ka tum. Min hmangaih tak tak tu chu Pathianin min la pe ve mai ang, ka la naupang alawm.

Ka haw hnuah Kalvari nen kan inbia a, ka buaina, “Maski hi a hmelţhatna chu lo dah ţha ta ila, ka khawngaih a, ţhen harsa ka ti. Khawngaihna a tel zel tawh a, tum loh deuha kawp reng awl ang chi kha. U Zirbawnga pawhin min kalsan a, ka hlutna a hriat veleh a rawn let leh a, eizawn ka ngai bawk si, tunlai chu hringnun hi a aw haw wow hlawl lo, ţah vak chang chungin ka ţap hreh sia” ka ti a, ka nui hak hak a, “A ni ngawt ang. Maski-an a ti buai che a, u Zirbawnga a ni bawk a, Sangkhuma leh Fawnvela te, u Lalhuma leh pu Taipuia mai bakah ka pi te pawhin an pawt buai reng che a, dawr i luah lut dawn a, pawisa tuak ngat ngat i ngai bawk a, thla tin dawr luah man pek i ngai dawn a, i nu te dil lo va chawm tu zawk nih i tum tlat tawh bawk si, i rilru a hah thei ngawt ang, Nunhlimi a lo ni leh a, i la uang reng thei hi ka fak zawk che” a rawn ti malh malh a, “U Bawiha zawk hi Japan a kal a tum a, mizoramah chuan thawhhreh neih loh pawn ţhalaite tan pawisa thawhchhuah thur thur theihna tur a vang emai, kan ram a rethei si, sawrkar hna hmuh a har a, hna hniam ber thlengin thawk hreh lo mah ila chhungte chawmna tur thawhchhuah a har emai a tia, a kal man tur hi a to ropui sia, ka nu te pawh an rilru a hah ve deuhin ka hria. Ka thil tum hi ka puitlin theih chuan in nuamsa ngawt ang a ti nain tunah chuan amah hi kan la puih rih a ngai a, pawisa thawhchhuahna ka zawn char char loh chuan kan buai dawn lutuk” ka tih chuan, “Ni chiah e…chuvang chu a nia pawt buai tu che an awm reng hi a buaithlak ka tih nachhan. Rilru nuam deuhin engmah i thawk thei lo a” a rawn ti a, kan inbiak reng hnuah, “Naktuk zingkarah ka pa dah khawm sa thing phurh ka ngai dawn a, ka mu tawh mai dawn” ka ti a, kan in mangţha hnuah phone ka dah a, ka nu pawh a hnar leh nasa tawh, a hah si a, a hnar ri ka hriat te hian khawngaih chang ka nei ţhin.

Sangkhuma leh Fawnvela te an kal hma dawn avangin dar5 vela thoin ka nu nen thing kan phur a, “Ruah sur zeuh khan a ti hnawng a, mahse pho rei a ngai lo ang. Gas an sem khat si, ren theihtawp a hman a ngai” a ti a, vawihnih kan kal hnuah ei ka rel ka rel a, ka inbual leh te te hnuah chaw ei ka siam a, ka lu a na lûk mai.

“Dawr chu engtin nge?” ka pa’n a tih chuan, “An chei ţha a, ka luah lut thei ţep. A chhung saw an phalna thlapin rawng var vek ka hnawih ang, a lang thianghlim ber dawn a” phur deuh hian ka ti a, “I hah lutuk ang e” a ti leh tho a, “Vur leh aieng leh alu leh papawr kawl tel reng rih ka duh” ka ti a, u Bawiha lah inti fing si, inthlahrun nachang hre lo, pawisa thawhchhuah harsat zia hre miah lo a nu leh pa dil phawng phawng chi a nia, u Mama pawn kan changkang har viau ang a tih ve kha.

Sangkhuma te thlah tuma ka phei chu ka pi Binladari pawh a lo awm ve a, “Remmawi, buh i her tir dawn chuan min ken sak ve rawh aw, niminah tam lo te ka pho a, kan buhfai a tui lo lutuk a leilet buh pawlh zel a ngai. Hmanni a ration an sem kha a chhe tak tak a ni” a lo ti a, “Vawiinah ka pho ang a naktukah ka her tir ang ka lo tia” ka tih chuan, “I tih hun hun kha a pawi lo” a ti a, min mamawh chuan a ti tau duh ngai lo reng reng. “I ti tau a, min be duh lo emaw ka tia” ka tih chuan, “Ti tau rual ka nih tawh loh hi” a ti daih a, ka aieng dah kha a hmang leh tawh a ni chiang mai a khabe a eng nasa lutuk tlat, a phih fai leh pek lo a nih hi.

Sangkhuma leh Fawnvela te chu chhang cheng 10 man chi ve ve pein, “Kha, hei hi pai rawh u, kalkawngah in ril a ţam ang” a ti a, an en vang vang a, a te angreng si, Sangkhuman, “Ka pi, hetiang tiat lek chuan ril a ti ţam mai mai zawk ang” a tih pawhin, “Ţam hnem tur a nih kha, keng mai mai rawh u” a ti tlat a, kan zin dawn hian cheng10 man bak min pai phal ngai lo.

Kalvari pawh nau paw chungin a rawn kal ve a, “Kan lo ţawngţaipui ang che u, in tling ngei ngei ang. In tlin chuan u Rinhlua ar lian ber kan talh dawn nia” a ti a, “A dik chiah, ka pi Binladari vawk kan talh bawk ang a” ka tih chuan, “Mai mai a che” a lo ti vin deuh hlak a, “Hun ţha a inhawng hi a lawmawm emai, hlawh in hmuhna tur a nih phawt chuan ram danga awm pawh pawi ti miah suh u” Kalvari in a ti leh a, “Mama ka be tawh a, kan inah in thleng dawn nia. Nutei min lo biak ula, Sangkhuma pawh Nunuin a lo duat ngawt ang” ka ti a, kan nui dar dar a, englai mah a lawm ngai lo Sangkhuma nu, nu Lawmtei pawhin, “Ka fapain hna zawn nachang a hria hi ka lawm lutuk” a ti a, lei a thil tla a chhar a, a din leh ruala a mawnga a pawnfen inzep chu nui hak hak chungin a rukin ka pawh chhuah sak a, “Nangni ho zin tur hi chu in inthlah rei thei lutuk a a hunah kan chhuak thei ngai lo” driver pawhin lo ti fiamthu vein Fawnvelan, “Lo lungngai suh u, hlawh kan neih hunah kan chawm vek ang che u. Remkalami dawr luah man pawh kan pek sak thei ang” a ti lung lung a, min pawt hnai a, midang hriat ve loh tur hian, “Maski-a hnenah khan khawvel hi a ngaiin a kal reng lo i lo ti dawn nia, khatiang a tih chhan kha rin dan ka nei a, nakinah ka la hrilh ang che. Mahse, amah lo zawt hmasa rawh, i bulah chuan a inhawng em em ang” thutak deuha a tih laiin u Lalhuman, “In tlan lai khan hawi kual lo ula, hmalam enin tlan char char ula in thleng hma a ni mai. Theihtawp in chhuah chung pawha an lak loh cheu chuan kan khuain kawng kan zawh ang” tiin a lo fuih ve a, “Han lem sak ula maw…huihhuih” lo ti vein pu Taipuia pawh a nui ve huk huk reng a, “In lo over candidate ange aw, over candidate hi a ţha lo a nia” ka pi Binladarin a tih chuan, “Eng eng emaw hi i hre ve a, inrintawk mah mah hi a pawi thei, over confidence an tia lawm” Sangkhuman a lo ti a, nui ngam si lo vin Kalvari nen kan inkheuh zeuh zeuh a, an kal chiah chu a ruak huai mai.

“Engtia awm nge i tum tak?” midang an kal hnua Kalvari in a tih chuan, “Maski-a ka tlawh lawk ang a, tlaiah u Zirbawnga ka hmu ang. Ka hmuh loh chuan a beidawng dawn chuang lo” ka ti a, “Nia, hmu mai rawh. Nizanah vai ţawngin phone a hmang a, ka hre thiam si lo a, a sumdawnna lam nge kanchhi ka hre lo. U Rinchuta ka zawh lahin ‘ka hre bik lo, vai ţawngin ka la ţawng ve ngai lo’ a ti bawk sia, tun ţum a lo kal chu a inthlahrung ve deuhin ka hria, zanah te hian a meng rei thei lutuk” a ti a, “U Zirbawnga chuan nupui tur a haihchham miah lo ang, Maski hi ţhen ka tum lo, ka khawngaih bakah ka ngaihtuah” ka tih chuan, “A ţha alawm, mahse khawvelah hian khawngaih sen loh khawp a tam mi beidawng an awm a, nakina i nat na tur mai maiin i lo khawngaih ange, inngaihtuah uluk viau rawh aw” tiin min chah thlap a, a pi te in lamah a chhuk zui nghal a.

Keipawh ka haw veleh buhzemah lutin buh ka pho a, ni a sa ţha emai tlaiah ka her tir hman maithei. Buh thlei sa a tlem deuh avangin buh ka thlei a, thing ro ţha tawh ho ka seng leh te te hnuah Maski te veng dawra an vur zawrh tur kengin in aţangin ka chhuak a, ka hman meuh chuan a tlai ruai tawh zel.

Dawr a vur ka dah chuan, “Nimin a kan hralhna man i la dawn em?” an lo ti a, “Aih, eitur ka lo la zawk ang” ka ti a, Maski-a ei duh tur ka thlan laiin inti fel deuh mai Hruaia hian, “Remkalam, Maski chu eng nge a an a? Tunlai chu an inah i kal zingin ka hria” kuhva thel malh malh chung hian a lo ti a, “A ţha tawh” ka tih chuan, Nunzirin, “A mawl e..a hmelţhat tehreng nen intihhlum te han tum” a lo ti ve a, Hruaian, “Nep vang mawle, duh hun hunah a inkhawm a, duh hun hunah Nobawihi inah zu a in a, a nun a chawhpawlh a, Pathian a hre lo em a nih hi. Inkhawm lo law law se a hmingţha zawk ang” a lo ti bawl bawl a, “Ve lutuk che hian, biakin hi i ta em ni? A duh leh a inkhawm ang chu, Pathianin a pawm theih hi mihring ve mai hian lo sawisel teivet suh u” ka tih chuan, “An chapo ve em a ni, hausa lo phei se chu miin engahmah an ngai lo ang” a ti leh hram a, “Mipa ve si i ţawng thei emai, hruaitu te i ni ve lehnghal a, nangmah kha a nih kha chapo chu. Mi sawisel turin engmah i ni lo, i chanchin chhe lai ka sawi ve mai tur a sin. Mi hmuh lai chiahin thil ţha i ti” polythene a eitur khung mawlh mawlh pah hian ka ti a, ka chhuak nghal daih bawk a, kan ţhenawm nula nen nupa ang chiahin an awm ţhin a, miin kan hre lo emaw a tia, kan hre vek tho sia, tumah sawi chhe thei a ni lo. Bakah, ka tana mi pawimawhte miin an sawi chhiat chuan ka ţeu hlar zel a, tumah ka hlau em em lo bawk. Dawih lutuk chuan khawvelah hian a dam khawchhuah theih loh.

Maski te inkawtah bike a lo inhung a, “A siam leh peih tawh a ni maw?” ka ti a, ka lawm ru khawp mai. Inchhunga ka luh pawhin an te ber nen khan an lo infiam a, a nau ball vawm chuan ka hnarah tak a rawn fuh lehnghal, ka dak awrh a, a na lutuk khan ka thin a ti rim a, “A na em?” Maski-an a rawn tih chuan, “Na lo” ka ti thung a, diktak chuan tihpalh ang deuhin ka vawm ve vak dawn em mawni ka ti hial zawk a ni.

Ka thil lei lah chu dawhkana ka dah rualin a duh a lo thlang nghal char char a, “Eh..eh..eh..i u ei tur dah ve rawh” nem deuhin ti mah ila a ruk chuan ka ip chawi chawi mai. Ka huphurh vang pawh a ni lo, nei lo chung chunga Maski tana ka lei ve a nia, an hausak nen a vir reuh tak tak a ni. “A nih leh api hei chiah hi aw” tih pahin chocolate a lek kang va a, “Ngati nge naupang ho hian min pi ziah le?” lungawi lo deuh hian ka ti a, “Aw, ei la min pi tawh suh” ka tih pawhin, “Aw le api” a la ti tho a, a pi thi ta nen a an inawm nasat vang aniang tiin ka inhnem tak na na ka chhir awk chak tak tak a ni.

“I lo lei ziah a, ka rul ang che aw” inthlahrung deuha Maski-an a tih chuan, “A ngai lo, i tana ka lei alawm” ka ti tak nain pawisa ka nei lo si a, a nauin chocolate a lak tak daih kha chu a man min pe mah se pawi ka ti lo.

“Nakinah tam deuh ka lei ve ang che” a tih chuan, “Ehe..nakinah i ti tawh, thih i tum tawh lo tihna tiraw?” phur deuha ka tih chuan a lo nui hawk a, an ţhenawm nula in a nau chu a rawn ko a, “Mu hahdam vang vang rawh, ka lo chhawk ang che. Ei chak i nei em? Ka lo siam sak dawn che mi?” a ti sawk sawk a, ka thil lei chu kawkin, “Hetiang ei vak vak chu a ţha lo” a la ti zui a, “I zak lo e a” ka tih chuan, “Awi..i lei em ni? Ka tihpalh lutuk ama lo lei emaw ka tia, ka sawichhe chuang miah lo a nia” a ti chul a, “Suzi ka kal dawn a, nakinah ka rawn pe ve ang che u” tih pahin a nau chu a kai chhuak a, ka suzi siam ve lah kha a hawpin kan hawp a, kei aia a siam thiam chuan ka ei ţeuh ang.

Maski nen chiaha ţhutthleng sei a kan ţhu chu ka sawi tur hre loin, “Ehem” ka ti hmasa te te a, ka aw ka thian lui kharh kharh a, “I va khuh nasa ve. I damlo em ni?” a lo la ti daih zui a, in lak zei ka tum hian natna ka nei emaw an ti zel a, ka lawm zo zai tawh lo.

“Maski, ngati nge khatiang kha i tih a?” tih pahin ka ţhut hnaih a, “Nun hi a ho alawm” tih pahin tukverh bulah a insawn a, a bulah bawk ka va ţhu leh a, pawn lam thlir vang vang chung hian, “Ka pi leh pute an awm lo a, inchhunga rorel tu tur an awm tawh lo a” a ti leh a, “Han sawi zel teh” ka tih chuan, “Sawi tur vak a awm lo” a ti leh daih a, “Ngati nge i rilru a hah?” ka ti deuh thawr na a a rilru hah leh hah loh pawh ka hre chuang lo.

“Nakinah ka la hrilh ang che” a ti a, “Ti nawn tawh suh aw” ka tih chuan, “Aw le” a ti a, a ngawi zui vang vang a, a ngaihtuahna hre thei ila chu sawi tur pawh ka hre deuh tur a nia. “Fawnvelan khawvel hi a ngai rengin a kal lo a nia lo ti rawh a ti” ka tih chuan, “A va lawmawm ve” a ti a, thiam lo deuha mizo film chang kan ang.

“I nu khan inhnuaia ka thil dah la turin ka chhuk a tia, inhnuaiah eng nge a dah ţhin a?” ka tih chuan awlsam deuhin, “Zu” a lo ti a, “Nih leh eng nge i pa chanchin?” ka ti leh zel a, “Jail ah a la awm, a la tang rei ang” a ti a, chanchin ţha sawi tur a nei hlawl lo a nih hi.

“Mahni nunna lak hi Pathian duh loh zawng tak a nia” ka tih chuan, “Duhsak bik nei chung hian kan vai chunga ro rel a tum a tiraw?” Pathian deusawh hmel deuha nui chung hian a ti a, “A duhsak che a a chhanchhuah che hi” ka tih lahin, “Min la sawisa duh zawk a nih hi” a ti bur mai si a, inkhawn harh theih chu nise vawi hnih vawi thum vel ka khawng lawlh lawlh hreh lo.

“Dawr ka luah lut ţep tawh a, a chhung lamah rawng hnawih ka duh a” ka tih chuan, “Ka lo pui ang che” a ti a, “Bike siam tur i ngah lo mi?” ka tih leh chuan, “Siamna hun a tam a” a lo ti a, ka tho nalh a, ţhutthleng awl a ka ţhu leh chiah chu, “Hey” a lo ti a, awmzia a awm lo, chhuatah ka let fel der tawh. Ngawi rengin ka tho sawk sawk a, chhuat ţhu nuai chung leh amah en ren rawn chunga, “Ka tla daih” ka tih chuan, “I tla daih” a lo ti ve a, “Ka naute thang kam a nih kha” a la ti zui a, a chang leh ball in min vawm a, a chang leh an thang kamah ka awk a, ka tihngaihna hre lo chuan, “In in hi a na” ka ti a, a hriatthiam loh hmel khawp mai.

“Kaihthawh i ngai em?” a tih pawhin, “In in hi a na, i naute hian min dim lo sawk sawk emai hetiang chuan ka la inherh nge nge ang” thawh ţuah ţuah pahin ka lo la ti tho a, ka din rual chuan tho ve vatin min rawn chelh a, “A na viau em?” min ngaihtuah hmel deuha a tih leh chuan, “Na ve tho e…na lo se a mak zawk ngawt ang chu” ka ti a, ka zep buai peih tawh lo.

“Thing kan phur a, ka kutah hling a lut a a na reuh tak tak a ni” kan ţhut leh hnua ka tih chuan, “Khei vat a ngai a nih chu, a pun palh ang” tih pahin a tho a, khawl la bawm nen a rawn let leh a, “Khawi, ka lo kheisak ang che” tih paha a kut a rawn dawn chuan ka kut ka lo pe vat a, hling luhna lai chu ka kawh hmuh a, “A te nain a na tham dawn a nih hi” a ti ve a, uluk deuha ka kut a hling lut a khei laite chuan ka lo en reng a, a mak lutuk, ka khawngaih tial tial mai.

“A na em?” a ti deuh reng a, “Na lo” ka tih apiangin a khei leh ţhin a, ka nat a hlau chu a chawl sek a, “Ka nat i hlauh ang hian chatuana i nat hlau ve la chu khatiang kha i ti lo tur a nia” ka tih chuan min rawn enin, “Engmaw?” a ti a, “Engmah” ka tih veleh a khei zawm leh a, nakinah kan lo inţhen palh a nih pawhin Maski hi chu a thlavang ka hauh zel dawn, sawi lo mah se hrehawm a tuar nasa aniang, ni lo se khatiang thil kha a ti lo ang.

“U Rinchuta a lo kal em?” ka tih chuan, “Vawihnih a lo kal tawh” a ti a, intihhlum a tum ţum khan damdawiin a kan kal pawh khan ka tshirt leisak kha a ha a, u Rinchuta thusawi pawm se, ti tawh lo hmak se ka duh ber. Khatianga hmuh leh kha ka duh tawh lo reng reng.

An ţhenawm nulain suzi min rawn pek chu a tui ngang mai, Maski hnenah, “Ei ţeuh rawh aw” a ti a, min en duh lo hmak a, ei ţeuh rawh min ti ve lo mah se ka ei ţeuh tho ang. Thingpui ka lum hnuah kan ei a, kan ei zawh velah no sengin ka sil leh a, rei ţhu tawh lo vin ka haw deuh nghal mai a, phone a min be turin ka chah mawlh mawlh bawk.

In ka thlen veleh ni tlak hmain ka buh pho ka seng a, ar in an lo thai darh leh nuai tawh a, leng lo mah ila ven sen an ni ngai lo. Ka nu feh a lo haw veleh buh her tir tumin emin ka phur chhuak a, ka pi Binladari te inah kalin dawrah a lo awm a, “Khawi, buh her tir tur chu sathla ipah khung la ka lo phur tel ang” ka tih chuan, “I va fel ţhin tak em aw..kha, kuhva uih ka pho ţeuh mai ei rawh, i duh leh ţhâm haw la” a ti a, “Min duhsak lai ber pawh a ka tana kuhva uih chauh i phal hi hriatthiam i har ve thlawt” ka tih hnuah ka aieng khai ka chhiar a, a lo hralh ve nual tawh.

“Pawisa keng nghal rawh” ka kal dawna a tih chuan, “Ka nei” ka ti a, ka kal nghal daih a, ka nu’n, “Pek kep law law rawh” a tih vang a ni. Buh ka her tir zawh veleh inah haw tlangin ka ţhap nghal a, ka zawh meuh chuan khua a thim ruai tawh a, u Zirbawnga hmu turin ka kal lo tih ka hrechhuak chiah a, eirel paha ti ka ni bawk a ka che zung zung thei bik lo a ni, hun hian min daih ţhin lo. Phone ka en a, missed call a lo tam em em bawk a, ka dah leh rih a, ka pi Binladari pawh ţhap fai sa veka ka pek thlap hnuah haw lehin chaw ei ka siam a, chaw kan eikham hnuah ka hman ve chiah a, vur leh papawr pack a la ngai tho.

Sangkhuma leh Fawnvela ten an thlen tluan thu an rawn sawi a, missed call a tam viau nain Maski chiah ka call let a, rei pawh ka be chuang lo. Vur leh papawr ka pack laiin u Zirbawngan min rawn be sek a, “Naktuk chhunah” ka ti leh ta nge nge a.

Zing thawh phat aţangin ka buai leh a, ka nu pawh dil lem lo vin chhunah park lam panin ka kal a, ka nghak zawk dawn emaw ka tih nen a dai laiah, a bike bulah a lo ţhu reng tawh a, a hlim hmel vur vur emai film chu nise nui har har chunga ka tlanchhia min um ka ring. Vai film phei chu nise lungrun deuhin kan zai daih tawh ang, pangpar kara kan inbihruk siak te ka ring, mahse film a ni miau lo a, a bula ka ţhut rualin, “Mimawl nu” min lo ti nghal a, nui har har chunga in um te, zai paha pangpar kara inbihruksiak te chu kan hlat khawp mai.

“I mawl fe zawk, i duh zawk i hrechhuak tlai ropui si” ka tih chuan, “Mahni ka infiah a nih kha. Mipa hian nupui neih tih vel hi kan suangtuah ve ţhin a, hmeichhe dang melh ngai lo khawpa ka lungawina, ka hmangaih leh ka ngheh chatna tur hriat ka tum?” a lo ti a, “Min vau i ti a ni lo’m ni?” ka tih chuan, “Ka ti vel tawh ka tih thlap kha” a lo ti leh a, “Maski hi min runluih duh vangah ka ngai a, mahse a nih loh hmel” a tih chuan, “Nunhlimin a biak che pawn ka bawl che emaw i tia, min ngai mak ka ti. Buai lai lai a min bawl in tih te chu” ka ti a, a nuih a za viau mai.

“Kha kha a ti ang lo tak tak a ni” a tih chuan, “Dawt min la hrilh dawn em?” ka ti a, min rawn en pahin, “Dawn nang” a ti vat a, “A lo la bia che em?” ka tih chuan, “Khalam kha chu mipa tan sawi a nuam chiah lo” a ti a, a bia ah ka ngai hmak. Be lo se chu min be lo a ti ang.

“Engtia rei nge cham i tum?” ka tih chuan, “I bialpa a dam si lo a ka haw vat ang” a ti deuh kher a, “Min ngaidam dawn nia” a tih leh chuan en pawh min en tawh lo vin a kun daih a, mak ka ti zawk. “Engvangin?” ka tih pawhin min en chuang lo chung hian, “A tir aţangin thudik tak ka hrilh lo che a, awlsam deuh a chinfel theih ka rin vangin ka peh hel zel a, beisei tur nei miah lo in ka siam che a” a ti sup sup a, “Kha vang khan min ngaidam dawn nia” a ti leh a, “Ngaidam e…keipawh ka thiam lo ve tho a, ka ngaidam hmak che” ka tih chuan min en ve ta nge nge a, “Mahse bialpa ka nei tawh a, ngaidam che mah ila kan inkawp thei tawh chuang lo a” ka tih chuan hawi sawnin hmalam a thlir vang vang a, “Ka tih dik loh ka pawm thlap tih i hriat chuan a tawk mai” a ti a, min en lem lo mah se ka bu nghat nghat a, “Ka ngaihdam tawh che chu, rilru nuam deuhin awm tawh rawh” ka ti ngial nain rilru nuama a awm pawh ka ring lo, a phone a phawrh pawhin ka lo en reng a, pattern pawh a dah tawh lo. Vaiin message an rawn thawn a en zuai hnuah, “A nih leh Maski hi i duh tak tak nge i hlauhthawn vangin i ţhen ngam lo?” a ti a, “Ka awmdan chu maw” ka tih chuan, “Sawi la” tih pahin min en reng a, “Hmelţha ka tia, ka khawngaih a, a message ka chhan lohin hrehawm ka tia, a chungah eng emaw hlek a thlenin hrehawm ka ti bawk a, miin an sawisel te hian ka ngaithei lo, a thlavang ka hauh vat zel” ka tih lai chuan min lo pawt chatin, “I ngai ţhin em?” a lo ti a, “Ngai ţhin e, ka tan a inpek zawh em vang hian ka ngaina bawk a, fel lohna lai a nei tih hrereng chung hian thlah duhna ka nei chuang lo va” ka tih chuan, “I duh takzet a nih chu” a lo ti a, “Keichu ka insiamţhat pawhin ho te teah min hau a, ka tihsual ho deuh deuh i hmu nghal chat zel a, min sawiselna tur i zawn reng laiin Maski chu a sualna zawng zawng nen i pawm a, nei mawlh ang che. Duhsakna ka hlan che u” tih leh thawh a rual a, park ah chuan kan pahnih te lekin kan kal kual a, sir deuha a kal chu, “Khatah khan kal suh rah sual a har a nia aw, an sam fai hma chu kal loh tur, i tla daih mai ang” ti mah ila a kal lui a, a tla daih reng bawk a, ka thusawi zawm duh mang si lo, “Remsial” a ti leh ruai tho si.

Ka kal hnaih a, a lo invuan tang a, “Khalai a inhrui zuanna ang deuh awm kha rawn theh thla teh” a ti a, a awih vak lo laiah a ni hlauh a, vanduai fe loh chuan a tlak hlum theih loh ang. Mahse, park ah hian tlak hlim theihna hmun chu a tam mai. “Rawn la vat teh” a tih leh chuan, “Hmh…ka pui peih lo che, i tlaw emai a” tih pahin ka kalsawn der a, “Remsial” a rawn ti leh vak a, hnim a tam a, a tlakna lai tak hi a sang lo vin a invawnna kha thlah pawh nise leiah a ţum thla thak thei a, mahse ka hrilh duh lo.

“Ka kal aw” ka tih chuan, “Ka sawi anga i tih loh chuan ka luh khung dawn che a nia” a rawn ti a, a tlakna a hniam si, a hlau ve em em a, a rukin ka nui ka nui mai.

“I tlak hlum daih te chuan min luh khung thei chuang nang” ka tih chuan, “Ka thlarauin a luh khung tho ang che” a ti a, nui vur vur chungin hrui chu ka pe a, hniam te aţangin a rawn uai chho ve ţawih ţawih a, nuih a za duh kher mai.

“Sam fai se chu i tlakna lai kha i hlau lo ngawt ang” a rawn chhoh hnua a tih chuan a en nawn leh ngat a, “Min bum a ni maw?” a ti a, a lungawi loh hmel nasa mai. “Inbumna thianghlim a nih kha” ka tih chuang lungawi loh hmel deuha a tlakna lai kawh pahin, “Ka au ţial ruai ruai kha” a ti a, ka nuih duai hnua, “Au ţial e” ka tih chuan, “A sang emaw ka tia lawm mimawl nu” a ti a, “Au ţial pa” ka tih chuan a thaw hawk a, a nui ve ta nge nge a.

“Haw ang, min duh tawh lo nu” a tih chuan, “Bike ah ka chuang duh lo” ka lo ti vat a, “Nih leh kal rawh, bike in ka rawn um ang che” a ti a, kal ka tum veleh min kuah leh tho si, “Awii…khaw lum tehreng nen aw” ka tih chuan, “Ka ngaihtuah che” a ti a, ka chhipah a khave a nghat aniang a rit nulh mai.

“Ngati nge min ngaihtuah?” ka tih chuan, “I hlim loh ka hlau” a ti a, min kuahna chu thlahin a lamah min kuai her a, “I hlim loh ka hlau” a ti nawn leh a, “Min ngaihtuah suh” ka tih chuan, “U Lalhuma te nen kan inkawm a, a chanchin min hrilh vek a, ka ngaihtuah che. Kolasib ah haw mah ila rilru nuamin ka awm lo ang. Damdawi leh ganja tih angreng a inhnamhnawih ţhin chu kawp lo ngam rawh. Min duh leh turin ka ti lo che a, kawp lo turin ka ngen che” a ti a, a thutak bawk si a, a tlakna lamah a kawr a bal vek bawk si, thutak viau lo se chu a sama hnah ro kai zawng zawng nen hian fiamthu thawh nan ka lo hmang daih ang.

“Damdawi a khawih hleinem” ka tih chuan, “Rui ţhin ho chu rui ţhin dang ho bawkin an chanchin an hria. U Lalhuma te hi kan bawl kan bawl na a thil a chik peih a nia. I hlim loh ka hlau a, thlem i awlsam si, a hnuh luh ve che ka hlau bawk” a ti a, “Damdawi leh ganja ka duh ve lo, zu pawh ka duh lo” ti mah ila, “Duh sa a piang an awm lo a, hma hun i hre lo bawk. Kawppuite hian min hruai sual thei tih hre bawk la” a la ti tho a, “Sawi chhiat ka tum vang a ni lo, ka ngaihtuah che” a ti leh a, “Khawvel buaithlak zia hi chu aw” ka tih chuan, “Ni chiah e” a lo ti a, “An chhungkaw chanchin a sawi chuan awih sak la, ruihhlo lam a nih chuan engmah awih suh” a ti leh a, “Damdawi a khawih tihna mi?” ka tih chuan, “Ni e…damdawi a khawih” a ti fak a, ka hik deuh chhawkin ka hria.

“Engtin nge i hriat?” ka tih chuan, “A tihpuite hnen aţangin” a lo ti leh a, “An buaina pawh ka lo hre ve a, damdawi khawih si lo vin khawi a mi mah chah tur a hre lo ang, a duh lo bawk ang. Fimkhur rawh aw” a ti a, bike a lawn a tum chu a kawrah lo ţhamin, “Dawt i sawi lo tiraw?” ka ti a, “Dawt ka hrilh tawh ngai lo che” tih zawngin min chhang a, “Damdawi a khawih lo an ti sia” zawitea ka tih chuan, “Fimkhur rawh, chubak hrilh tur che ka hre lo” a ti a, ka awih chiah lo nain a thutak mai bawk si a, ngaihţha lo deuhin min siam leh ringawt tawh.

Kan inkar a tawp fel a, kan la inbe leh angem pawh ka hre chuang lo a, a haw thu lah Kalvari hnen aţangin ka hria a, phone ah a hranpain chanchin min rawn hrilh tawh lo. Nunhlimi lahin min perh zawngin status a nei reng a, a zakthei lo a nia aw, ka la ţhâm nge nge ang.

An reh vang vang hnuah Sangkhuma leh Fawnvela te an lo haw hlawl a, tuman kan be thei lo a, u Mama lahin, “An ţha e” tih zawng a rawn sawi ţhin a, an lo haw lahin biak hman loh khawpa rangin an in lam an pan a, zana pastor quarter a kal puiah ka sawm a, an remti tak nain ka thlen hnu daihah an lo thleng ve chauh a, inkhawm zan a nih loh vangin u Rinchuta pawh inah a awm. Maski nen kan la inkawp reng a, ka sawm ve nain a pha thung a, aieng leh vur min siampui lohna pawh a rei ta, inchhungah a tawm chawt a, bike siam tur a neihin a siam a, keimah lo chu han biak vak a nei lo, kan inkar a ţha rih bawk.

Fawnvela leh Sangkhuma te lo lut chuan, “Sipai ah ka ţang peih leh lo e a” an rawn ti a, “Awii..kan ţawngţaipui nasat tehreng cheu nen eng nge thleng a?” Kalvari in a tih chuan, “Kan rawl” Fawnvelan a ti hmuk a, “A hahthlak emai ka tlan peih tawh lo” Sangkhuman a ti bawk a, “In tling lo tihna mi?” ka tih chuan, “In la bialpa nei viau suh” an ti daih a, damdawi vel kha u Zirbawngan a sawi chiang viau nain u Nobawihi ka zawt a, “Khawih se chu ka hrilh nghal ang che. Ka bialpa damdawi vangin ka chan tawh a, ka tawn ang i tawn ve ka duh lo. Ganja chu a zu a, zu pawh a in a, damdawi berkher chu a khawih lo tih tu hming chhal pawn ka sawi ngam” a lo ti a, Maski nen an inpawh ve a, zu a zuar nain u Nobawihi hian dawt a sawi vak ngai lo a, a thusawi kha ka ring. U Zirbawnga pawhin a hre sual ve thei a, ka dem chuang lo.

“Exer la lo vin sachek kan hawp tlut tlut a, ka tlan luak zawih zawih alawm. Ka hah a ka hah zia chu a” Fawnvelan a ti bui bui a, “Min tlan tir lo in min la tawp se, kan tlin hnuah tlan min zirtir mai se la ţha tur a nia” Sangkhuman a tih chuan, “In tling lo tak tak maw?” ka lo ti leh a, “Tling ila kan reh reng nang, kan tling lo a kan zak ve a nih kha” a ti vin hlur a, “Tlan ringawt chu a har viau dawn mi?” u Rinchutan a lo ti ve boh a, “Aizawl ah chho la han tlan ve chhin rawh, nang phei chuan ‘in tlan peih mai mai e a’ i tia nga i haw daih ang. Ka tlan tawhna zawng zawngah ka la hah ber ang, sipai ţan chu kan tum tawh lo” Sangkhuman a tih chuan Fawnvelan, “Meihawl ka rawh mai ang” a lo ti a, “Ka lo tlan kher kher a ni, hah chiah ka hlep. Fawnvela phei chu dulkiar an ti hlawm rapthlak” Sangkhuman a tih veleh, “A kiar lohin, ka nu’n nitin zantin sachek min hawp tir alawm. Kan tlan laia ka pum nat zia chu a” Fawnvelan a lo ti a, a chang leh Maski chanchin min zawt thul, ka hmuh phakah an la awm dawn tihna a nia, keipawh hna ka la nei vak bik lo a, mi ka sawi hmuh pawhin min hnar an tam zawk a, kan puitling ve zel ang a, vanduai rih hlawm mah ila vanneih hun kan la nei ve mai ang. Beidawng zung zung ţhin te tan chuan khawvelah hian damkhawchhuah ngaihna a awm lo.

CONT…

This Post Has One Comment

  1. Rinrin

    Uzira nen ingaihzawn tir leh tawh la piber
    🥺😭

Leave a Reply