You are currently viewing KEIMAH, THINGTLANG NULA S2-28(Repost)

KEIMAH, THINGTLANG NULA S2-28(Repost)

Spread the love

KEIMAH, THINGTLANG NULA S2-28

“Ka hah lutuk kha ka luak lo thei lo, ka lo tlan kher kher kha ka inchhir” a lu thak lo pui hiah paha Fawnvelan a tih chuan, “Mipa ve si han tlan luah kher” u Rinchutan a lo ti a, “Ve a..nang phei chu tlan pawh i tlan theih loh kha, i tlan chak ve lai ber pawn chak deuha kal ang vel i ni” Fawnvelan a ti ve zat a, “Pastor kan intlansiak ngai lo, sachek hawp vak vak lo vin exer la ula, nakumah tlan leh rawh u” u Rinchutan a tih chuan Fawnvelan a melh vung vung a, u Rinchuta kawh va paha, “Kalvari, a va han ţawngthei sawt em em ve” a tih chuan u Rinchuta nuih a za ber a, ţhahnem a ngaihpui ve si, han sawipui vak dan thiam si lo a ang ber.

“Maski-a eng nge a lo an? Thih te a lo tum leh em?” Sangkhuman a tih chuan kan nui tawp hmak a, “A tih leh chuan a thih tak tak tawh ka ring” a tih zawm zat a, “An ti nawn mawh lutuk an tih kha, a ti nawn tawh lo vang” a tih veleh Fawnvelan, “Ni e..ti tawh suh se, hremhmunah a mu kawm ngul ngul mai ang” a lo ti a, Maski chungchang an sawi dawn emaw tih laiin Sangkhuman, “Keichu min nuihzat deuh tu kha ka haw ber” a ti leh ta daih a, “Min hmusit” Fawnvelan a ti hmuk bawk a, “Tu nge chupa chu? Engtin nge a tih che u?” ka tih chuan, “Sipai turin lo la che u pawh nise mi kephah hnuai hiatah bak an hmang lo ang che u a ti kher a” Fawnvelan a tih chuan, “Hiah ngai khawpin sipai ke phah a thak ngai lo ti ta che” u Rinchutan a lo ti ve boh a, “Naaa…keichu ka rilru a hah, nupui ka nei ve ringawt a, hna ka nei si lo. Chaw chhum tu atan tal min la rawh u ka lo ti lo a ni” Fawnvelan a ti leh charh charh a, “Ka hrilh ziah che kha, keichu ka chhungte chawm turin nupui ka nei dawn lo reng reng. Hindi ka zir mai dawn em mawni le?” Sangkhuman a tih chuan, “Engatan?” ka lo ti a, “Aww…hindi zir pahin inrinni chiaha class kal ngai chiah khan BA ka zir ang a, hindi zirtirtu ka ni thei maithei a sin” a lo ti a, “I chal tawh e” ka tih leh chuan, “Chal leh chal loh a ni lo, peih chuan zir mai tur. Pu Chala pawh kg1 a nih lai aţangin zirtirtute takngial pawn Chala an tia sin” u Rinchutan a lo ti a, “Aizawl a in luah a zir ka duh tak tak. Fawnvel, nangchu sachek zuar mai rawh” Sangkhuman a tih chuan, “Ka hne nak laiin, a rim ringawt pawn luak a ti chhuak” a lo ti a, an lo insawithei nasa tawh si, miin an hriat chuan an chhaih nasa viau ang.

“Tu nge nangmah star deuh tu kha? Kha khan a lo duat che em?” min kheuh zeuh chunga Kalvari in a tih chuan, “Nunui mawle…a ninawm tak tak a ni. U Khumte min tih loh leh u Cte min tia, fa neih theih loh ka hlau a shikhar ka nghei te a ti vel, ve ringawt hian. Remkalami takngial pawn shikhar a ei lo a nia” a lo ti bui bui a, “Min sawi tel ve ziah suh” ka tih chuan, “Bawngsa ka kang ro a, ei ve ru a tia kan phur tehreng nen a al lutuk a ei theih loh” a tih hnuah, “Nunui chu a buaithlak, an inah min hruai chho a, bawngsa chhum han kha a tui min hawp tir a tum a, ka duh lo a haw ka tum kha a ruh lian lelh lawlhin min vawm a, a rapthlak reuh tak tak a ni” a ti a, a duh tawk mai dawn emaw tih laiin, “Zankhat phei kha chu a rui aniang, ka inawkhlum anga damchhungin ka hran khum ang che a tia, damchhungin ka nute bulah ka mu mai ang ka ti hmak. Ka duh chi a ni lo” a ti leh a, a duh lo ve hle aniang a hawi lo emai.

“Nutei bialpa chu a pui tehmai a nia aw, a thin ti rim ila chu min hmet sawm vek thei ang. Mahse, mak ka tih deuh chu a sek tehreng nen a ke a te rapthlak, a ţawng no bawk sia, a dul a kiar ve lo a, a nuih pawhin a hnute chiah a che” Fawnvelan a lo ti a, sawi tur an ngah si, an rual khan ka lo kal ve zuai lo a ni. “Dul kiar si lo, nuih zawnga hnute chauh che thei te chu a thil ei pawh a awmzawnah a tang zel tihna mi? A kawchhungin tih tur a va nei dawn lo ve” u Rinchutan a lo ti fiamthu ve ngei a, “Nutei pawhin ‘ka bialpa hi chu a sek lutuk a, min han kuah tak tak hi chu nachhawkna ei ngai khawpin ka rawl ziah’ a tih kha. Sawi mai aiin a takah a lian, mahse hnarkua a pe te ve reuh lutuk” Sangkhuman a tih chuan kan nui dar dar a, “A nia lawm, a hnarkua kha khuavang a ang. A awmna a sang a, a te bawk si, tui a lut duh ngawt ang” a la ti zui a, rilru hahna theihnghilh ţhakin keipawh ka nui ve ngei alawm.

Kan haw kawngah Fawnvelan, “Naktukah Kalvari te inah kan leng leh dawn nia, sawi tur ka la nei” a ti a, Sangkhuman, “Maski a dam ţha tawh tak tak em?” a lo ti thung a, “Thih a tum tawh rih lo aniang” ka tih chuan, “Keichu khawngaih viau mah ila ka duh pui thei hlawl lo che. U Zirbawnga emaw Sangkhuma hi nei la i nuam sa zawk ang” Fawnvelan a lo ti a, “Min sawi tel ve ziah suh” Sangkhuman a tih chuan, “Entirna a nih kha, tun aţangin ruihhlo a khawih a, ‘ka sim ang’ pawh ti loin a pha char char zawk a nia, sim tumna a neih loh chuan e engtikahmah a sim dawn lo, innei phei ula chu a vaw zawt zawt reng mai ang che. Ţhu lawk ang u” a ti a, min pawh beh tlat avangin kawng sirah kan han ţhu leh rih a, a pawimawh thei a ni.

“U Rinchuta hriat laia sawi a nuam lo a, diktak chuan keichu ngaihzawng in neihin ka inrawlh vak ngai lo, Kalvari leh u Rinchuta inngaihzawn lai te, u Zirbawnga nen in inngaihzawn lai pawhin engvakmah ka sawi ngai lo, mahse Maski hi chu ka duhpui lo takzet che. U Zirbawnga a lo zin ţuma Maski kan lenpui daih te kha i la hria em? U Zirbawnga nen tluang deuhin inkawp ula ka tih vanga kha thil kha rawt ka nih kha, Sangkhuma nen hian Maski vanga a ţhen che kan hlau. U Zirbawnga nen in inţhen hnu, tournament lai pawn Maski nen in inkawp ai chuan tiin Sangkhuma i duh leh duh loh te ka zawt che a, duhpui che ila chuan engmah ka sawi lo vang, ţhiante ngaihzawng sawisel ngawt ka duh lo, a theih hram chuan ţhen teh Remsial” a ti duah a, Sangkhuma a ngawi reng thung.

“I taima a, i rilru a awm apiang i sawi phawng phawng a, Aizawl aţanga a lo let a i la duh zia i sawi te khan i uang emaw kan tia, naupanlai aţanga i lo ngaihzawn ruk tawh a nih vangin a rawn ngaizawng che hi i phur mai mai a nih hi, i hrethiam lo a, tunah hian u Zirbawnga i star lai ang chiah khan i awm. Naupanlai aţanga i lo ngaihzawn tawh chu ni lo se u Zirbawnga aiin i thlang miah lo ang. Nangmah ti chhe tu tur che a nih hi, hnathawk peih lo ţhakin a la siam ang che. Bakah, ruihhlo ti chu neih loh hram hram a ţha a nia” a ti leh a, “Tunlai tak chu a rui loin ka hria” ka tih chuan, “Rim nei lo ruih theih a tam. Intihhlum a tum nachhan kha chu a nu vang a nih ka ring. Mipa a khawi reng a, zu a rui reng bawk a, Maski te unau hi a ngaihsak em em lo. A nau hmeichhia te sawn an inchhungah ngei sawn a bialpa a riahpui ngam tawh a nia aw, chuti khawp chuan a nu saw a faten an zah lo. Miin an sawi sep sep a, a thlavang i hauh hlur zel vangin i hriatah an sawi duh lo mai mai a nih kha. ‘Fawnvel, Remkalami kha hrilh rawh, a thlavang hauh nghal zel lo se la chu a hnena sawi tur kan ngah a nia’ an ti ţhin. Lo nei ta la an chhungkaw buaina zawng zawng saw i chinfel sak theih i ring em?” a ti a, “Ka thei dawn lo” ka tih chuan, “A ni reng dawn a sin, i pasal a rui reng ang a, a chhungte lah i mit ti kham zawngin an awm reng ang a, hau ngam mah la i hau sim thei chuang lo ang” a ti a, Sangkhuma pawhin, “U Rinchuta pawhin an chhung zinga hmeichhe ţhenkhat saw chu dan pawna hnawhchhuah an chakawm a ti e an tih kha. Tak tak a ni em phei chu ka hre lo a, u Rinchuta berkher chuan a sawichhiat ka ring lo nain mi hian thil an hria a, hmel leh pawisa chu engmah a ni lo, Maski hi i nei a nih ngat chuan i hlim dawn lo. U Zirbawnga hian thiam lohna tam tak a nei ang a” a tih laiin, “Ngaihdam min dil” ka lo ti a, “Chu lehnghal, ngaidam hmak rawh. Mipa hi kan duh tak tak te bulah lo chuan kan inphahhniam duh bik lo a nia, nangchu i vannei a, a rawn pan ţang ţang zel che a, i hnar hnuah pawh ngaihdam a la dil che a nia, u Zirbawnga hian a duh tak tak che alawm Remkalam” Sangkhuma vekin a ti leh a, “Inchhir hian awmzia a nei vak tawh lo ţhin a, i ti sual a nih chuan a pawi dawn. I sawi ziah kha, ‘mi fate zawng zawng ka ti lawm seng lo’ i tih ziah kha, Maski hi duh viau mah la ţhen tum rawh, Kalvari hian pasal a nei fuh a, a nawm sak zia hi i hmu thei em? A hlim a, a hahdam a, Maski hi nei la chu e…hun a kal zel ang a, zu a la zawrhpui lo ang che tih pawh a sawi theih miah loh a nia. Bike te a siam a, pawisa a la lut ve reng tih hre mah ila ka ring thei lo, ruihhlo hi eng pawisa mahin a daih lo, hna a thawh peih loh hnua ruih zel a duh chuan ruihhlo a zuar hreh lo ang. Sawichhiat kan tumna ngawr ngawr a ni lo a nia, kan khawngaih ve tho a, a nun hian a zir hlawl si lo a” Fawnvelan a ti leh sup sup a, a vin lo a, a uang lo bawk a, rilru an ti hah leh zo vek.

“I duh em vangin i rilruin a rintlak na lai i zawng ang a, a felna lai i ngaihtuah chawp ang a, inhnem theih dan te i ngaihtuah ang a, mi thusawi ho te te hmanga rin luih i tum ang a, chutiang a i awm a nih chuan ţhen vang vang a hun tihna a ni mai” tiin ka awmdan diktak a rawn sawi chhuak leh a, a rukin a felna lai ka dap tak tak alawm, u Nobawihi thusawi hmanga inthlamuan ka tum a, ka ngaihtuah chian chuan ka rilru a hah ve ţhin tho.

“Kalvari te nen hian naupanlai aţanga inkawm tawh kan nia, pasal i neih fuh loh chuan Kalvari hi i awt dawn tehmai a nia aw, ţhianţha mah ni ula thik chang i ngah ang. Maski hi i khawngaih a, keini pawn kan khawngaih a, mahse i tan a ţha lo. A tirah khan kan lo dang lo che a ni aw” Sangkhuma pawhin a ti vang vang a, “A la tlai chuang hleinem, u Zirbawnga bia la, ţha deuhin awm tawh ang ti la, Maski hi ţhen rawh” Fawnvelan a tih chuan, “Ka be hmasa duh lo e a” ka lo ti a, “Maski hi ţhen la, tih dan ngaihtuah rawh. Ka hmangaih vang che a nih hi aw, min lo huat phah ang e. U Zirbawnga bulah hian hlim tum rawh” a ti leh a, “Hei hindi zirtirtu la ni mai tur Sangkhuma pawh a awm a” fiamthu a a tih chuan, “Ka chhir irh awk mai tur che a nia” a lo ti vin hlur a, “Tak taka Remkalam, Kalvari aiin i fing dawn emaw ka tia, i â zawk daih. Doctor chiah ka nei dawn ti ţhin khan Maski i atchilh tlat a, a mihring mihrinna hi a sual hran lo na a ruihhlo a tih chhung chu ka ring lo ang. Sangkhuma nen a kan ruih viau pawhin ka rui lo kan ti tlat zel, khatiang kha a ni mai. U Zirbawnga hi rangkachak ang a nih laiin Maski chu perek tuiek ang vel a ni” Fawnvelan a tih chuan Sangkhuman, “Isss..perek tui ek sam lem vuah” a lo ti a, “Khatin ti kher suh u, a khawngaihthlak em hi” ka tih chuan, “Kha kha a nia kan sawi chu, a pawi lutuk. Ka rilru diktak i hre duh em?” Fawnvelan a tih chuan, “Hre duh e” ka lo ti a, “I khawngaihna kha hmangaihna a a inleh ka hlau. I luhlul a, mi thusawi engahmah i ngai lem lo a, i hmangaih vaih chuan ar ek a nih hi ti mah ila i nei tho ang. I inchhir dawn teh mai a nia aw, keichu Maski i neih chuan in inneih naa ka lo kal duh pawh ka ring lo. I kawp luih zel chuan u Zirbawngan a ten mai ang che, a ten hma chein ţhen vat vat rawh” a ti a, an sawi chhe hnehsawh si, rilru an ti buai leh vek tawh.

“U Zirbawngan damdawi a ti a ti kher alawm” ka tih chuan, “A ti aniang chu” Sangkhuman a lo ti a, “U Nobawihin a ti lo a ti” ka tih chuan, “Huihuih-i thusawi engahmah ngai suh, u Nobawihi chu dawt kung alawm. Maski a sawichhiat vaih chuan customer pakhat a chân dawn tih a hrechiang ve em. Ruihhlo duh tak tak ho hian tumah an hmangaih lo, anmahni chiah an inhmangaih” Fawnvelan a ti bawl bawl a, “Ka hrilh tawp ang che, Maski-a nu hian u Nobawihi mipa khawi hnu a khawi leh ţhin. A fa tlum ber, Maski-an a duat deuh te saw Maski-a patea fa a nih ring an tam a nia aw. Maski-a pa nen an inneih lai leh an inţhen hnuah pawh Maski-a pa nau nen an inkawp char char niin an sawi a nia, tunah pawh an la in thlah kher lo ang. I harhchhuah vat loh chuan mahni thlan tur i lai ngat ngat dawn tihna a ni mai” Sangkhuman a lo ti a, “A pi thlahrang vel mai mai kha hlau suh, Maski nen inţhen mah ula a rawn kal lo ang” a tih zawm zat a, “Ţhen thei la ka duh khawp mai. Ka sawi tam tawh lo ang a, i ţhen theih chuan ka lawm ngawt ang” Fawnvelan a tih hnuah a ri ţâwt a, “Ehe…helai hmun hi a hrang a ni maw?” a tih chuan Sangkhuman, “I kaw puar a nih kha. Ngati nge i kua hi a puar reng bik le? Ţhiante bula i awm lahin i ri pawp pawp bik ziah a, a ri deuh ţâwt ţâwt kha chu engahmah ka ngai lo Fawnvel, mahse a uih em a ni” a ti a, a tho nghal nulh bawk a, “Inbual ngun i ngai a nih kha, i vawikhat gas pek chhuah ringawt pawh nilenga uih ther therna tham lawih a nih kha” ka lo ti ve bawk a, “In phun peih, ka barh nghal loh che u” tih pahin a tho a, kan in lam panin kan inzui ţham ţham a, “Maski i ţhen hunah kan youtube channel kha buaipui tak tak ang u aw, hna kan hmuh hma chu tihtakzet a kan buaipui a ngai” Fawnvela bawkin a ti leh a, “Ka hman tawh lo, dawr mai bakah sumdawnna dang ka khawih a ngai” ka tih chuan, “Ghost hunting paha chawhchawrawi tiin channel hming kan thlak ang a, thla hrang kan zawn kar lakah mi sam i tan lai te kan dah daih dawn alawm, a dangdai dawn a sin” phur deuh hian a ti a, “Kan sawi kha hrereng bawk la” Sangkhuman a lo ti zauh a, “Aw ka hria” ka ti tak nain ka khawngaih tho, a nau nen a an infiam ka hmuh phei chuan ka khawngaih lehzual ziah.

In ka thlen chuan ka nu’n, “I va rei ve” a lo ti nghal a, “Fawnvela leh Sangkhuma ten sawi tur an ngah em alawm” ka lo ti a, “I u Bawiha ţhianpa Ruata a lo leng a, Maski-a ţhianpa ve tho kha, eng eng emaw a rawn sawi ţeuh mai” a tih chuan, “Eng nge?” ka lo ti a, “Maski-a pa chungchang mawle, ‘jail ah pawh ka fapa a tia, Maski-a hming a lam reng e an tia’ a rawn tia, a khawngaih thu vel a rawn sawi ve luam a” a ti a, ka nu takngial pawh a vin loh chuan a khawngaih ve deuh tihna a ni mai. “Ruata sawi dan chuan, ‘Aizawl ka kal ţum pawh khan ka fapa kha lo ngaihven rawh u aw, mipa a ni tak nain a rilru a no a, ka tih ţhin ang thil ţha lo te tiin a lo rui ve hlauh ang e, ka fapa kha lo thlahthlam reng reng suh u, ka fapa neihchhun a nih kha’ a ti mawlh mawlh reng e a tia, Bawiha nen kan kal a ti, i u Bawihan a sawi duh lo mai mai aniang” a tih hnuah, “A nu lah saw a nasa, tun hma a ka hriat ţhin kha a ang tawh lo reng reng. Pawisa an nei si, awmchintawk a hre lo a nih saw. Maski pawhin a patea nen a an awmdun lai a phawk ţhin a tih kha Ruata chuan, a rapthlak e, i u te hian mipa dang nen a kan mu dun lai min phawk ngat se chu min vaw hlum daih duh ang chu. A patea a la ti zui a nia, hei chu tunhma aţanga mi sawi sep sep kha a ni tawh a, tuman an man chat chuang lo a” a ti bawrh bawrh a, Fawnvela ten an sawi veleh a sawi ve leh kher a, rilru a ti nuam lo zual leh vek tawh.

“Ruata hi chu ka nel ve lo” ka tih chuan, “A rawn lang hlawl a, zu rim a nam thur thur lehnghal” a ti a, Pathianin min hremna nge min hmangaih vang zawk pawh ka hre lo, zankhatah a rualin a chanchin, a in ang deuh chiah chiahin ka hria a, tunhma khan hre ve ţhin tho mah ila thutak hla takah kan la ngai lo, mahse Fawnvela leh Sangkhuma ten thutak deuha an sawi tawh chu dawt a nih ka ring lo.

Choka ah ka phei a, aieng ka hmuh ringawt pawhin ka lung a leng, a ruala a chanchin inang deuh deuh a an sawi ka hria hi Pathianin tal chhuak vat tura min duh vang a ni angem le tih te a awl a, rilru a insual ve nasa khawp mai. Vur lah chu fridge ah kan siam sa hlir a awm a, ţap zawih zawih a vur leh alu leh papawr ka ei duh hmel han ti dawn ila mi angin ka ţap ve mai mai ngai lo va, Maski hi mi angin vannei ve se ka ti, a vanduai lutuk a, kalsan ka hreh phah ţhin.

Kan buai tlang bawk a Kalvari te inah pawh kan la kal leh thei rih lo a, dawr chhung ka chei ţha a, rawng pawh Maski leh Fawnvela leh Sangkhuma te nen kan hnawih a, a var vek kan hnawih a, a lang fai sar tawh. Mi pakhat sam ka colour sak tih loh chu hna ka la hmu lo a, dawr zawn a lo kal te ka koh leh, “Nitin ka feh a, ka hman lo” an tih loh leh, “Pawisa a hek mai mai” an ti zel a, ka ţhiante bulah pawh, “Parlour ka nei ve a, vur ka hralh thei ber” ka ti a, mahse ka beidawng chuang lo, thil dang hmangin dawr luah man ka tuak thei a, nakinah an rawn intih hmuh leh vak mai ang, tumah hlawhtling sain kan piang hleinem le.

Thil kan ei laiin sam ka colour sak nu kha a lo lut a, “Remkalam, ka sam hi ka suk apiangin a en belh zel a, engtin nge ka tih dawn?” a rawn tih chuan, “A va eng tak ve, mai kan i ang” ka lo ti a, “Ka pa pawn, ‘zanah i eng thei ang, street light i nih kha’ a tia, min lo dum sak leh mai teh, hetiang ringawt chu a chi loh” a rawn ti a, “Nangma duh thlan a nia, khawlum lai chuan a chi loh ka ti mawlh mawlh alawm” ka lo ti a, “Aww..pawisa ka pe dawn che, min dum sak la pawisa ka chawi dawn tho. Ka chhip a eng lutuk hi khua a lum zualin ka hria, ka chhip hi a sa bik riau ten ka hria a, ka awm thiam lo” a ti a, a kun vak a, a lu chu hrukpuanin a tuam ta daih a, “Tuna dum i duh em?” ka tih chuan, “Duh e…sam eng thur hi ka inhmeh lo aniang min hmu apiangin ‘i zin kawng a va khu awm ve’ an ti ziah a, ka hang paw phak a, ti dum leh daih ang” a ti a, pawisa ka hmuh dawn chuan ka dum sak hreh chuang lo.

“Mi lu sukna ang hi nei ve la, an mu der der a, an lu an suk sak ţhin a, nang chu min nam kun vak a, thawchham dawn dawnin tui in min leih a” a tih chuan, “Khatiang nei tur chuan ka intuak leh fe phawt a ngai, tumah ka la leih hlum chuang hleinem” ka ti a, darthlalang hmaah a ţhu tum bur a, “I ti to si, pawisa kha ka ui” a tih chuan, “A to hlawl lo, khati khan Aizawlah han kal la han sawisel chhin teh, an lo kek ţe nasa viau ang che” ka ti a, ka momo ei lah chu a tui si, a tlem si, a to bawk si, ka kham lo tih a hria aniang Maski-an, “Ka ngaina lo a, nangman ei rawh” tih pahin a ei ai min pe a, “I duh lo tak tak maw?” ka tih chuan a lo bu nghat a, “Ei rawh” a ti a, ani chuan vur chauh a ei a, Fawnvela lahin, “Khawmaw pakhat ka lo ei ve leh” tih pahin a rawn la hram a, a hmawm nghal daih lehnghal, Maski takngial pawhin, “I kâ a zau emai, hmawm nghal thawih mah ta che” a lo ti a, Fawnvelan a hre lo der hmak thung a, min puih vang maiin alu leh papawr lah chu an eitur an insiam a, an suak tawn tawn a, ka ui bawk si, midang awm ve lo se chu ka insualpui duh maithei a ni.

Sam kan dum zawh veleh, “Pawisa ka pe che anga ka haw dawn. Ka lu hi chu keimahin ka su tawh dawn, i suk sak chu ka duh tawh lo” a ti a, pawisa min pek hnuah a chiah hun chhung min zawt a, a kal nghal daih a, pawisa chu a hranpain ka ak hrang a, ka nu ka pe chak tawh khawp mai.

Dawr chhunga rawng kan hnawih vangin kan haw hma a, in ka thlen veleh ka nu hnenah, “Sam ka dum sak a” tih pahin pawisa ka pe a, “Ka intuak dawn i ti a ni lo’m ni? ‘Ngah nge pawisa mi pek ziah?” a tih chuan, “Tikhan lo hmang ve phawt rawh, vur ka la hralh thei rih tho” ka ti a, a sawi buai hmain pindanah ka lut daih a, ka thawhchhuah ngei ka nu ka pe ve thei ta chu rilru a hlim veng veng mai.

Zanah Fawnvela te an lo leng a, Maski chu a lo leng ngai tawh lo. A lo kal ve pawhin rei awm lo vin a haw nghal daih zel a, u Lalhuma te chuan u Nobawihi inah a leng ţhin niin an sawi a, zu a in hnem phei chuan a riak ţhin a ni awm e, mi an ţawngthei a, ka lo hre ve leh zel bawk si a, hrehawm ka ti nain ka ţhiante bulah chuan hrehawm ti angin ka awm duh chuang lo. Hrehawm ka ti tih chu hria se chawh min ti viau ang.

Vur leh aieng leh papawr min pack pui a, a khat tawkin, “U Zirbawnga i be tawh em?” an ti deuh reng a, ka nu te ka pite in a kal tur a an chhuak chiah phei chu, “Tunlai chu Nunhlimi status a turu thei khawp mai” Fawnvelan a tih chuan, “Ka en ngai lo, tu status mah ka en hman lo” ka lo ti a, “A rawn in la sexy thei nasa, a taksa hmanga mipa hip a tum aniang” Fawnvelan a tih chuan Sangkhuman, “U Zirbawnga hip a tum aniang” a lo ti a, “U Zirbawnga chu a nem vak lo emai a block daih tawh ang, a duh loh zawngte hi chu an rilru tur a dâwnpui ve vak ngai lo, a duh danin thil a ti pawp zel” Fawnvelan a ti ve thung a, tunlai chu u Zirbawnga a ti reng a, pawisa an lo inpe ru ţhin em mawni tih hial tur a ni.

“A lo be ţhin che em?” a ti leh a, “U Zirbawnga leh Nunhlimi te nen kan inbe ngai lo hrim hrim” ka tih chuan, “U Zirbawnga hi i ngai ve ţhin em?” a ti a, an inbe ţhin chiang mai. “In in be ţhin a ni maw?” ka tih chuan, “Be ngai lo” a ti tak nain ka awih lo.

“Kawngpuiah khian Lalhuma te ho an inti buai nasa mai” ka nu te lo hawin an tih chuan inthurual ang hrimin kan tlan chhuak dial a, an lo awm khawm laih a, Maski ka zawng nghal a, a tel ve lo hlauh a, “Mi acid liak lai ‘i pawr a ni maw?’ in rawn ti kha ka lawm lo” u Chiangan a ti a, a rui sual leh tawh aniang a huat a ho emai. “I lawm dawn lo chiang e..Chianga” u Lalhuman a tih chuan, “I ngam chuan lo kal la, han ti chiah ila” u Chiangan a tih veleh u Lalhuman, “Hei, Taipuia ten min man beh tlat hi” tih pahin pu Taipuia te dinna laiah a tawlh hnung dat a, “Keimah ka rawn phei dawn mi?” pawr deuha u Chiangan a tih chuan, “Ka inherh te hi han dam se, a bul aţangin ti ţha leh zawk ang. Ka dam veleh i acid liak lai ka lo cho ţha leh che ang a” u Lalhuman a ti a, u Chianga hi a chhaih thinrim ziah a, tlanchhe zawk a ni leh zel tho si.

“Inherh mah la eng nge pawi? Khawi lam hawiin nge i inherh? Min cho a ni lo’m ni? Lo kal rawh, i inherh lohna lamah ka lo herh let ang che” u Chiangan a tih chuan, “Ka uang a, insual ka peih reng reng lo, acid ka liah ve chak vang mai mai a nih kha” a lo ti leh daih a, chak tawkin pu Taipuia nen an kal sawn a, dang tu awm lo se chu u Chiangan a umzui ngei ngei ang.

“U Lalhuma hi chu aw” tih paha inchhunga kan luh chuan ka nu’n, “Kan khua hi chu a la changkang lo teh e. An rui dek dek a insual an inpeih nghal at zel a, Lalhuma lah dawih viau siin mi chhaih thinrim a ching a, mi khuaah huan zu rui insual buai ching an awm ve pawh ka ring lo” a lo ti a, “U Chianga a ngam si lo a ka uang a ti daih” nui hawk hawk chung hian Fawnvelan a lo ti a, ka nu te hriat phak loh turin, “Setanic Nicky pawh a in la bawn leh tawh a, Maski-a intihhlum tum kha a ngaisang rapthlak. I ti leh hlauh a nih chuan setana kha min lo biak dawn nia aw boss te a ti vel” a ti a, Sangkhuma nen an nui kur kur reng a, kan khua hi chu mi â bawm a ni ringawt.

“A pain, ‘in la setanic viau suh, i khamawm emai, kan chhun mu mai mai lai pawh kan chalah kros letling te i lo ziak a, setana hian a repin dah ţha daih che se la a ţha ang, i hnawksak emai’ a tih kha” Sangkhuman a ti ve bawk a, “A chhungten an inkhawm tir ve pawhin ţawngţai laiin a meng ru ziah a, setana tana theihtawp chhuahah a in ngai. Ţawngţai laia meng ru ţhin ho hian setana an lo ti lawm ve maithei a ni” Fawnvelan a ti a, kan pack zawh meuh chuan ka nu pawh a hnar leh nasa tawh.

Dawr a ka awm laiin bike chhe tawkin Maski a lo kal a, “Thirchhia rawn hralh i tum a ni maw?” ka tih chuan, “Ka siam tur a nih hi” a ti a, a rawn luh veleh fan hmaah a ţhu nghal a, “Ngati nge zanah i lo len ngai loh a? Biak theihin i awm ngai bawk si lo a” ka lo tih chuan, “Nakinah ka lo leng ang” tih chiahin min chhang a, “U Nobawihi inah i kal ţhin em?” ka tih chuan min rawn enin a bu nghat a, a mitmeng a dul raih a, a chauh hmel khawp mai.

“Rui lo in i awm thei tawh lo mi?” ka tih chuan, “Ka thei a ka peih lo” tiin tlang deuhin min hrilh a, “Dawt sawi lo ang” ka tih veleh, “Dawt ka hrilh ngai lo che” a lo ti vat a, “I zu in man zawng zawng kha khawl la chu a tam tawh viau ang” ka tih chuan, “A tam ang” a lo ti a, “Rui lo a i awm theih chuan sim ve mai la” ka tih leh chuan, “Ka peih rih lo” a ti a, “Inţhen phah dawn mah ila maw?” ka tih chuan a ngawi reng a, ding deuhin hmalam a en a, “I ril a ţam em?” ka tih chuan a lu a thing a, “I ruih zel dawn chuan inţhen ka duh a, i ruih tawh dawn loh chuan ka duh chuang lo” ka ti a, khawchhung miten min dem sup sup nain a dinhmun hriatchian chuan ka tan pawh ţhen a harsa ve, a nu leh pa inneih lai, bialnu nghet a neih lai aţang tawh khan hlim deuha a awm awm ka la hre lo an ti ţhin.

“Kan inţhen dawn tihna a nih chu” tih paha a tho chu ka lo en hau a, a kut min pek veleh ka lo vuan a, amah zawkin ka kut chu nghet deuhin a hum a, ka ţhutna bul chêtah a rawn ding a, a kut awl lama ka dara a kuah rualin a kawngah ka lo kuah ve a, kan awmdan chu inţhen tur pawh kan ang chuang lo.

“Mi thusawi apiang awih suh, a dik loh zia hre tu pawh ka ngawih mai mai hi” a ti a, “Miin an sawi dan che i hria mi?” ka tih chuan, “Hria e, an duh duh sawi rawh se, a pawi lo” a ti a, a lo kal apiang hian a ban te, a taksa lang lai ang te hi uluk deuhin ka lo en ţhin a, damdawi a inchiuna hnuhma ka hmu ngai lo.

“Aizawlah ka awm leh tawh dawn, hahdam tumin ka lo haw a, a hahdamthlak chuang si lo a” zawi te hian a ti a, “A la ţha ve mai dawn alawm. Engkim ţha nghal vek turin i duh a, khatiang kha a theih loh” ka tih chuan, “Ka lo haw leh vat ang. Thil ţha deuh ka lo hawn ang che. Bike part vel lam khawm ka ngai hrim hrim a, ka in entir ang a, ka lo haw leh chuan ka rui hmel i hmu tawh lo ang” a ti ve duah a, “Min tih der a ni maw?” ka tih chuan a lo nui hawk a, “Ka sim peih lo ka tih kha ka tih der che. Sim ka tum ang, nangmah vang chauh pawn ka tum ang a, ka cham rei lo ang, hmu lo chein ka awm rei thei si lo a, ka lo haw leh vat ang” a ti a, dawr aţanga a chhuah dawnah pawh, “Biak theihin awm reng tawh la, i kal dawnah lo leng ngei ngei ang che” ka ti a, nui chung hian, “Lutuk tlat” a ti a, a kal hnu lawkah Kalvari leh ka pi Binladari te an lo kal a, Kalvari in, “Mithmul chu min vuah sak ve la” a ti chu ka nui hak a, “Super very I sure, ţhu mu rawh le” ka ti a, ka pi Binladarin Dawnfuha a pua a, “Keipawh ka duh ve a nia” a ti chu Kalvari nen kan nui hak hak mai.

Kalvari mit bul vela plaster ka bel chuan ka pi Binladarin, “I jection hmasa dawn em ni?” a lo ti a, “Dawn lo..tikhan lo en tawp rawh” ka tih chuan, “I ti dik ang maw? I zirna te hi han be leh lawk teh” a lo ti zel a, “Ka ti dik alawm mawle. Afaki beauty studio ah ka zir a, Lanfelin min hrilh reng bawk a, en lo pawn ka vuah thei ang chu. Min zirtir tute hi ka chhuang ve em” ka tih chuan, “Hmul pawhna khan a mitmu i hawlh palh hlauh ange aw” a lo ti leh a, “I va mak tak, hmul pawhna a nih loh hi, i mit lo chhing tawp mai teh” ka ti a, Kalvari mita mithmul lem ka vuah ţan chiah chu, “Awi aw..Lalremmawi, khatin a mitmu hawlh pawp pawp mah ta che. Mithmul ti na na na ‘ngah nge a mitmu a i vuah daih a, keichu ka duh ve lo reng reng, ka mit i hawlh der zo ang” ka pi Binladarin a lo ti leh chul a, “Kalvari, i mithmul pangngai kha pu mai mai rawh” a tih chuan, “Lo ngawi mai mai teh, ka nu pawh ka vuah sak a a mit a la var em hi” ka ti a, kei aia hniamah a kun leh du du zel a, hlauthawng bawk, enchian chak bawk, a ninawm tak tak a ni.

Kalvari min hmul kan vuah zawh chuan a en hau a, “Min hmu thei em?” a ti ban charh a, “Hmu thei e, i duh leh tih tir ve rawh, pawisa ka pek kep ang che” a tih chuan, “Kha, Dawnfuha hi la rawh. Lalremmawi, han ti sual vaih teh aw, court ah ka khing nasa dawn che a nia” tiin min vau lawk a, ka vuah sak ngei bawk a, ka vuah zawh hnuah glue in a mit a ti thip aniang a mit nuai a tum chu a kutah ka lo man bet a, “I nuai chhe vek dawn a sin” ka tih chuan, “Ka meng thei lo reng reng, lo rin loh tawp tur che a nia” a ti ţan a, “Chhing vang vang la nakin deuhah i meng thei mai ang” ka tih pawhin, “I vuah chhung zawng ka mit ka chhin tawh kha” a ti vin hlar a, “I thiam chian ka ring lo reng a ni” a tih chuan, “Mi pawh an mit a thip ţhin, i phun peih si, engmah ka tih sak tawh lo ang che” ka ti a, “I tih sak ka duh tawh lo reng reng” a ti pang pang a, a mit a thip loh hnuah nalh a inti leh hle tho sia.

Kalvari in a rukin pawisa min pe a, ka pi Binladari chu darthlalangah a in en char char a, “Kan nulat lai khan hetiang hi ti ve thei ila chu nangni ho ai hian kan mawi zawk ang mawle. Tar a hnu lamah kan meng er ve thei chauh a, i pu in min lo hai ang a” a ti a, a nui kar kar reng a, “Pu Sawian a rim ngun lehzual dawn che a nih kha” ka tih chuan, “Pu Sawia hi chu a ţawng muang cherh churh lutuk a, hmanrawh rawh tih reng a ngai. Midang han kawm ve phei la chu zawhna i zawh chhungin an kalsan daih ang che te ka tia, a kal chak tehreng nen a ţawng muang tlat a, a mak tak tak a ni” a ti a, darthlalangah a in en leh vang vang a, “Tunlaiah chuan nungchang aiin hmel siamţhat a awlsam zawk tawh dawn a nih hi” a tih loh leh, “A mawi ngang mai” a ti a, “Dawrah darthlalang tar a ngai dawn a nih hi” a ti thul, a mit hmul a tlak ţhen hnuah min hau leh ang a, ka peih lo lawk sa.

“Nakinah ka ke min hnawih sak dawn nia aw” Kalvari in a tih hnuah an haw a, ka dawr chhak deuh, a fal laiah sikul a awm a, vur leh alu leh papawr pawh ka hralh zo leh vek a, aieng pawh ka hralh nain ka hralh tam hran lo. Ka nu ţhiannuin mithmul lem min rawn vuah tir bawk a, an intih hmuh leh sup sup mai ang ka tih reng kha. Kan khuaah chuan mi zawng zawngin lo an nei tawh bik lo a, nutling, inchhunga tawm tawp te pawh an awm nual a, hei vang tak hian an rawn hriat chian hunah chuan hna ka ngah ang ka ti ţhin reng a ni. Sumdawn a awlsam a, pawisa nei deuh deuh an tam mai.

In a ka haw veleh ka nu hnenah pawisa ka pe leh a, “Dah ţha rawh” a tih pawhin, “Kawl rih rawh” ka ti tlat a, “Dawr luah man pek tur i nei lo mai tur a sin” a tih chuan, “Thla hnih luah man ka pe lawk sa thlap” ka ti a, bialpa ka nei a, buaina neuh neuh a awm reng chung pawh hian ka hna ka tih buai tir duh chuang lo. Bialpa te nena buaina kan neih vanga hna kan ţhulh zel chuan a rethei zawk tur kan ni tho tho. Hetiang kawngah kher kher hi chuan fin ve kar tur.

Nitin dawr ka hawng ve ta ziah a, hna ka nei ve zel bawk a, min pan nawn leh duh nan uluk deuhin ka lo tihsak ţhin a, Valpuii pawhin min ngei theih tehreng nen tunah chuan bawrai te min rawn pe ţhin a, min dawr ziah bawk. Maski pawh biak theihin a awm reng tawh a, u Nobawihi inah pawh a kal khat deuh tawhin ka hria. Fawnvela leh Sangkhuma ten engmah an sawi tawh lo nain u Zirbawnga tih leh zeuh an ching a, Fawnvela phei chuan, “Ka ngai” a ti vel a, sawi lo mah se an rilru put hmang tur chu ka hrethiam tho.

U Nobawihi pawhin, “Ka kuttin min lo chei sak teh” a rawn ti a, u Lalhuma nen an rawn kal a, a che peih lutuk a a tih hleihtheih loh, amah zawkin a dawh peih tawh lo chuan kan tihfai zawh hnuah, “Naktukah chei mai ang” a ti a, pawisa pawh min pe lo va kal a tum chu, “Rei tawk ka tihfai sak che a, pawisa min pe rawh” ka ti a, tlanchhia pawh nise pawisa min pek hma chu ka um ang mawle. “Naktuka kan chei hunah ka pe ang che” a tih pawhin, “A zat ve tal min pe rawh” ka ti a, “Pawisa ka ak lo” a tih chuan, “Min rawn risk tum suh aw, min pek loh chuan FIR ka thehlut dawn a nia, i zu dahţhatna pawh ka hrilh vek ang” ka ti a, u Lalhuman, “In tur kan nei nang” a tih ve chuan, “Lo ngawi mai mai rawh, hna ka thawk a, ka thawh man ka hmu tur a ni ringawt. 50 man lek pawh nise min pek loh chuan FIR ka thehlut dawn khawp. I zu pawh an man vek ang” ka ti pang pang a, “I nasat zia hi, inhre ngai lo pawh kan ni lo a, ka hmanhmawh tawh a, naktukah kan chei hunah ka pe ang che ka ti mai alawm” u Nobawihin a tih chuan u Lalhuman, “Nia” a lo ti ve a, “Pawisa inpek chhung a rei lo, inţhenawm pawh ni ila ka tihfai man kha min pe tur a ni ringawt” ka ti a, “Ba a ţhing peih lutuk an tih te kha a lo dik dawn a nih hi” tih pahin thinrim deuhin min pe a, “An ba miau a, ka ţhin lohin” ka ti a, anni rawn risk mai mai tur ka ni lo reng reng. A che peih si, a nuih apiangin a hmui hup nan a kut a la sawn a, thlan hluam chunga ka buaipui hnuah bat a tum a nia, tu fa mah hi an lawm bik lo ang.

Zanriah ei laia ka nu hnena ka sawi chuan, “Zu in a ei â vek tawh a nih hi. Pawisa la hmasa lo chuan engmah tih sak tawh reng reng suh” a ti a, ka pa erawh chuan, “I lo nawr na mah mah ange, mi huatthu sawi te a hlauhawm a nia” a ti thung a, “Min pe tur ang deuha awm si a min pe lo kha ka hua, insual inpeih at chungin ka dil” ka ti a, “I va â mai mai ţhin tak aw” tiin ka pa a nui huk huk a, “Lanfeli leh u Afaki te chu an fel a, an chhu zui kher lo maithei a, keichu ka ni ve dawn lo, min zirtirtu an nia, zah viau mah ila kan khuaah tumah hmelhriat an rawn nei lo a, a bain tumah ka tih sak dawn lo reng reng. Keipawhin a bain ka zir hleinem” ka ti a, ka nuin min thlawp nain ka pa chuan ţawngkam duh tui deuh turin min ti leh tho a, mipa chu mipa an nihna a lang leh nge nge zel.

Zanah Maski a lo lang hlawl a, ka nu takngial pawhin, “I lo va leng duh lo em em ve, i reh vang vang a, min tlawh ve duh tawh lo a nih hi kan lo ti mai a sin” a lo ti hlut a, u Bawiha te nena an inkawm mai bakah an khawngaih ve a, an be chhe ngai lo. Ka pasal tur atan chuan an duh hauh lo thung.

“Tunlai chu ka chhuak mang lo” tih pahin Maski chu ka bulah a rawn ţhu a, “Pi Sumdawngi hi a” tiin min fiam ve zauh a, “Khatianga min tih aiah vur tur hi sarang ah lo thun la ka lo ţawn ang, aieng pawh pack a ngai, in veng dawra mi tur hi naktuka a hranpa a kal ngai lo vin khai haw la, pe kawi mai rawh aw” ka ti zung zung a, “Aw le” tih pahin sarang a ban nghal a, “Naktukah Aizawl kal dawn a” a tih chuan, “I cham rei dawn lo tiraw?” ka ti a, “Ka hre lo le, Nutei ka lo biak ang che” a ti a, a thil tih lai a tih zawm mawlh mawlh a, ka nu ten an be ve zeuh zeuh bawk a, hna min thawh pui zawh hnua haw tuma a ding chu an veng dawr a mi tur vur ka pe a, bathlar thlengin ka zui chhuak a.

“I cham rei dawn lo tiraw?” ka tih leh chuan, “Ka hre lo le” tih bawkin min chhang leh a, bathlar ah kan ţhu dun leh rih a, vur chu lo tui mah se a pawi lo, an hralh hmain a khal leh vek hman dawn tho.

“Aizawlah i han cham hlen daih ange aw” ka tih chuan, “Cham hlen lo ang, ka lo haw leh vat ang. Hmu lo chein ka awm rei thei lo a, ruihhlo ti i duh bawk si lo a, ka lo haw leh chuan ka rui hmel i hmu tawh lo ang” a ti a, “Tak tak maw?” ka tih veleh, “Tak tak ni e, tum chuan theih loh a awm lo. Mamawh lamin Aizawlah ka kal ang a, ka lo haw leh chuan nun bul ţan ţhat ka tum ang, Pathian dem lo va belh ve ka tum tawh bawk ang a” a ti sup sup a, “A ţha alawm, engmah min lo hawn duh suh. I hmanraw mamawh ho han lam khawm la, nunthar lo hawn bawk la a tawk a ni mai” ka tih chuan tawi tein a nui a, “Ka la sawi ngai lo a, ka hrilh tawh ang che. Pathian dem ţhin viau mah ila nangmah berin i ring tlat sia, Pathian chauh rin ve a pasal tlak nih ka tum bawk ang” a ti a, a mitmeng pawh a nung ve deuh a, “I nu leh i naute zah tlakin i awm bawk ang a” ka tih chuan a bu nghat a, “Mahni nunna lak a ţha lo bawk a” ka ti leh a, “Ka hria a, ka tihpalh bawk. Kan inpuih tawn theih chhung chu kan dam dun ang chu. I dawr kawtah bike chhia ka siam ve ţhin ang a” a ti a, min kuah a, min fawh zauh hnuah a kal a, ka la en reng tih a hria aniang kawngpui a thlen dawnah lo hawi letin a ban a vai a, Aizawl kal mai tur a nih vangin kan in bye bye nasa khawp mai.

Mut hmunah pawh kan la inbe zui zel a, ‘Lo kal ve mai rawh, chhuanlam siam la’ te a rawn ti a, a chang leh, ‘Puipuiin min lo tlawh ngei ngei rawh a ti a, Nutei ka sawm ve ang a, an pahnihin ka lo biak ang che’ a ti bawk a, min biak dan a naupangchhia si, mihring hi kan hlim chuan kan naupanchhiatna lai a langchhuak ţhin an tia, Maski pawhin a rilru a siam fel tawh a, a hlim takzet a nih ka ring, chu chuan keipawh min ti hlim ve thei hial a ni. ‘Mu tawh rawh Aizawl kal tur i nih kha’ ka tih hnuah a mu ve chauh a, status ah kan pahnih a kan thlalak bawk kha dah lehin keiin ka lo en nui var var a, nuam ve tak chu a ni.

Mamawh in lam khawm tur a nih vangin sumo a kal a tum a, ka pi Binladari te in pengah sumo ka nghah pui a, kawngkal an awm chung pawhin kan inkai tlat a, keimah ka nih chuan tuman min ngai thutak dawn chuang lo.

“I thlen veleh min lo hrilh la, Nutei leh Puipuii pawh min lo biak la, lo haw leh vat bawk la” ka ti a, a nun siam a tum mek a, rui reng se chu ka ţhen ngei ang a, tunah chuan ngaihchan rih ka duh a ni.

“Hrilh lawk lo chein ka lo haw thut ang a, thil ţha deuh ka lo hawn che ang a, ka rawn ţhawng thut ang che” a lo ti ve a, “Nunthar lo hawn la a ţha ber, dangdai viau mah se chu bak ka chah dawn lo che” ka ti tlat a, a nui te chu a lem mai mai a ang tawh lo a, keini ţhianho hi chu kan zin dawnin kan inthlah ţhap ţhap zel a, Maski te chu an ni ve chuang lo, mipa an ni bawk a ti hian amahin sumo a chang tawp a, a lo haw leh tawp ang a, chu zawng chu a ni mai.

Sumo a rawn thlen veleh mi hmuh loh turin ka kut a vawn lai chu a fawp zauh a, bungrua a neih tam loh vangin an kal thuai a, a lan theih chhung ka ban ka vai a, ani pawhin a rawn vai ve lâwp lâwp mai, ka ţawngţaipui bawk a, star dang ka neih ţhin lai te khan duh viau mah ila ka ţawngţaipui awm ka hre ngai lo, Maski hi chu a fahrah ve em a, midang anga han kal pah mai mai a theih ve loh, a rui ţhin tih lohah chuan amah hian mi pawi a sawi bawk si lo a, a zia a zawiin a ngawi reng zel a, a inthlahrung dâk zel bawk a, kan in a a lo len te hian a thingpui in na no te hi sil nghal a tum ţhin a, ka dang hram hram zawk zel a, tirh pawh a hnial ngai lo, u Nobawihin a in ep ko panga hnim ţo pawh fai pui tura a tih pawhin a pui lawp lawp zel a, a nunkawng bumboh zia ka hria a, a ţhatna tam tak, miin an hriat loh ka hre bawk a, insiamţhat a tum mek lai hian a sualna chhete vanga ţhen ringawt chu ka duh bik lo a ni. U Zirbawnga aiin ka ring daih zawk a, u Zirbawnga hi chu min fiam kawi kual nasa lutuk a rin harsa ka ti tawh. Fiamthu ten min ţhen mai mai a, a chang leh kanchhi a chhuanlam a, a changin nupuiah min sawm a, a rilru put hmang diktak ka hriatthiam hma chu ka rin leh theih ka ring tawh lo.

Maski zawk nen kan inbe nasa a, Aizawl ni hnih a cham hnuah Nutei leh Puipuii te nen a an thlalak te min lo thawn a, a chang leh kan pahnih a kan thlalak a status a, ‘ka ngai tawh che’ a ti deuh reng bawk a, keipawn ka ngaih thu ka hrilh ve a, dawt a ni lo bawk.

Ka nu a nawm loh vangin dawr ka hawng lo a, zingkar aţangin vaihlo zial semin ka buai a, aieng ka zuar pah bawk si, u Nobawihi pawhin min dawr leh tho a, khawlum ka tuar sual aniang nuam lo deuhin ka haw a, ka luak te a chhuak a, zanriah eikham veleh ka nu’n, “Mu rawh, ka lo ti fel mai ang” a ti tak nain ka phal lo a, hmun ka ti fai a, thleng te ka sil hnuah ka mu a, ka lo muhil nghal aniang ka phone ri ah ka harh a, men pawh meng ţha peih lo chung hian phone chu ka en a, fiah lo ruaiin Sangkhuma hming ka hmu a, dar11 vel bak a la ri lo.

“Ka damlo” ka ti nghal thawr a, “Ţhian ho group te kha en ve ta che. Kan nghak char char che a, kan thusawi kha chhiar rawh, tuman an call duh si lo che a keiman ka rawn call che a nih hi” a rawn ti hluk hluk a, “Naktukah ka en mai ang, min call duh loh nachhan tur eng nge awm a?” ka tih laiin ka pa phone a ri ve nghal a, a ring ropui si, ka nu phun ri ka hre nghal bawk a, “Maski-a ruang an chhar, kan hriatna a la rei lo. Group ah kan sawi a, an rawn hrilh hreh vek che a” a ti chiah chu ka hit chhawk a, ka hnungzang leh ka tukhum a lum nghal pup pup a, “Engtin maw i tih?” ti a ka zawh nawn leh pawhin, “Maski a tual thi” a rawn ti leh tho a, min tihder a nih ring mah ila ka tha a khur dar dar tho a, phone ka dah a, ka nu te thawm pawh ka hria, ka mut ngaiin ka mu reng a, an rawn call leh pawhin ka la tawh lo a, group ka en lo bawk a, ka ti ril a khur a, hlauhnain min tuam nghal lup lup a, ka rilru a ka ţawngţai mawlh mawlh hnuah phone ka en ngam ve leh chauh a, ka ţhianten dawt min hrilh loh zia ka hre chawpchilh nghal bawk.

CONT..

Leave a Reply