You are currently viewing KEIMAH, THINGTLANG NULA S2-29

KEIMAH, THINGTLANG NULA S2-29

Spread the love

KEIMAH, THINGTLANG NULA S2-29

‘Hei hi group a ka hmuh a nia, luikawr bulah a lo awm an ti mai a, tunah hian civil hospital a ruang dah naah an dah tawh. A bulah tumah an awm lo a, ka hmuh rual khan Maski a ni tih ka hre nghal a, ka tha a khur nghal vek, khalam khan an hre tawh em?’ ti a Puipuiin kan ţhianho group a a rawn sawi chu ka chhiar ve chauh a, a rawn sawina a rei tawh a, kan khaw mite pawhin an hre tawh ang. Maski thlalak a dah tel a, puan pan deuhin an khuh ve tak nain a awm hnuai lam chin chiah an khuh a, ti ril khur dar dar chungin chiang deuhin ka en a, a piancham a ZD Garments aţanga ka leisak tshirt kha a ha a, a var a nih vangin a bal ţial rual a, thisen a kai bawk a, a hmai pawh a duk nual mai. A tshirt bal lutuk leh a hliam te, a duk thluah mai te chuan rilru a ti hrehawm lehzual a, mahse ka hmu hmelchhe chuang lo.

‘A thi tak tak em ni a?’ ka va ti ngat a, ‘Helamin an hre tawh, Aizawla an chhungte pawhin an hre tawh a nih chu. A ruang an rawn phur thla dawn niin ka pa’n a sawi’ Sangkhuman a rawn tih chuan, ‘A thi tak tak tihna maw?’ ka ti leh a, Kalvari in, ‘An postmortem dawn lo em ni?’ a rawn ti ve bawk a, ‘A nu’n, ‘a ngai lo’ a ti a ni awm e. A mawl a nia he nu pawh hi, a ruang hmuh ringawt pawhin thah a ni tih a hriat reng a nia’ Sangkhuma bawkin a ti leh a, ‘Postmortem se, FIR te theh lut se a ţha tur a nia’ Nutein a tih chuan, ‘FIR chu an theh lut tho ang. Mahse an chhuichhuak thei leh kher lo maithei, kan zoram zimte, mipui pawh kan la tam vak lohna hmunah hian tualthattu kan chhuah zalen reng mai’ Sangkhuman a rawn ti a, ‘Awii…keichu ka tha khur a reh thei lo, min rawn tlawh a, a thil tih zel tur te, a awm zel dan tur te phur deuhin min rawn hrilh a, fiamthuin, ‘pawisa khawl a nupui neih vat ka duh’ te kha a tia, a nu leh a naute chanchin pawh min hrilh ve luam a, a ruang an hmuh khan a phone an hmu tel lo a, mahse Nutein Mama te puih nain a chhungte a be thei a, tih tur ţul ang ang an tih hnuah an in lamah, helama a pite inah thlahna hun an hmang hmasa dawn a, kan kal ve dawn, ka khur nasa lutuk a insiam pawh ka insiam hleithei lo’ Puipuiin a rawn ti leh a, ‘A mak emai, kan lo kal ang Remmawi’ Kalvari in a rawn ti ve leh a, Remkalam min tih loh chuan a thutak hle tihna a ni mai.

“Mi ka be kual a, postmortem han phal loh ringawt mai chu a zia lo lam deuh a ni. Thah a nih hmel a, ti hian kan sawi hlut ang a, a zuzi leh mai mai awm sia, ka va lainat em aw” ka pa’n a ti vang vang ri chu ka hria a, “Mama a hman loh pawhin Bawiha talin a ruang rawn zui rawh se, han be teh, rawn zui haw tu te kha a nei lo hlauh ang e, keini’n helamah kan lo hmuak ve thung dawn a nia” ka nu’n a tih te chuan ngaithla ve reng mah ila ka ngawi reng a, ka phone a ri leh a, u Zirbawnga phone number a lang kalh mai.

Ka lak veleh, “Chanchin ka lo hria a” a rawn ti a, ka ngawih reng takah chuan, “A zia lo hle mai, i ţha em?” a rawn ti leh a, “Ngawi reng suh Remsial, ka lo kal dawn em? Lo kal tur a min duh chuan hna kalsanin tunah ka lo chhuak nghal ang” a rawn tih leh chuan, “A ngai lo” ka ti a, “A ruang an rawn phur thla ang a, naktukah an vui nghal daih ang a, ka hmu rei tawh dawn lo emai i tel lo a hmuh ka duh” ka tih zawm leh a, u Zirbawnga nen a kan inkar a thil thleng tawh te a hre vek a, Sangkhuma ten a ruang an chhar hian a thihna a la rei lutuk loh hmel an tia an ti tho bawk a, a ruang bula u Zirbawnga nen a ţhut ka duh lo.

“Engpawh nise an in lamah ka va phei ang e” ka pa bawkin a ti leh a, ka nu’n, “Remmawi, chanchin i hre tawh em?” a ti zui zat a, chhan pawh ka chhan hma hmain pindanah a lo lut a, thimah ka mu ngam lo a, light ka off ngai lo. Ka khum bula ding chung meuhin, “Maski a thih kha i hre tawh em? I pa an lo bia a, a ruang an chhar. An rawn puang ţep tawh ang, khawvar hmain an rawn thlenpui hman maithei a ni, insiam rawh” a ti zung zung a, dawih chi tih takah ka hlau deuh reuh lehnghal a, “Parda hi pawt phui daih rawh” tih pahin tukverh lam ka kawk a, ka thauah min man a, ka khawngaih a, amah pawh ka duh, mahse mitthi hi ka hlau tlat a, ka rap bawk a, keimah tak pawh hian hrehawm ka ti.

“I va han dawih tak em, ţhenawmte ina phei ka tum a sin” a tih chuan, “Aih, ka ţhiante an lo kal dawn a, chumi hnuah chauh chuan phei rawh” ka lo ti a, Aizawl lam nen an inbe chiang tawh aniang Maskia thih thu an rawn puan te chuan ka la phu zawk zawk tho a, ka nu’n, “Tho la, thingpui va lum rawh. Thingpui sen hang in tal teh ang” a tih chuan, “Pindan aţang hian chhuak rual ang” ka ti a, ka duh vanga hlau ka ni bawk si lo, a va han hrehawm tak.

Ka nu thingpui ka lum sak laiin eitur khai ţun chungin ka ţhiante an lo lut a, “Ehe…khawia mi nge in lei a? Dawr inhawng a awm em ni?” ka nu’n a tih chuan Sangkhuman, “Maski a thi tih a hriat rualin ka pi Binladarin dawr a hawng nghal alawm, tunah pawh kuhva a phel mek, ‘i nu Nemtein vaihlo zial a neih chuan rawn dah rawh se’ a ti” a ti zung zung a, “Remmawii amahin a awm ngam lo a, hei thingpui te ka lo lum tir a” ka nu’n a tih rualin, “I ni ve tho maw?” min en hau chunga Sangkhuman a tih chuan ka lo bu nghat a, “Keipawh ka ni, kan inzui nasa ve sia, ţawng mawi lo ni lo se, Maski kha ka hnungah hian a bet tlatin ka hria a, tunah pawh chutiang chuan ka awm. Ka hriat hlimah phei kha chuan ka tukhum hi a za mer mer alawm” a lo ti duah a, “In va han ho mai mai tak” tih pahin ka nu chuan rambo polythene a ban a, a bawkna a phelh mawlh mawlh hnuah, “Vaihlo zial chu a awm nual hi” a ti a, thingpui ka pek chu a inzawh veleh a insiam a, a chhuak zui nghal a, ka ţhiante an awm tawh tho nain ka la ţim sung sung reng tho.

“Ka lo rel kher kher kha ka inchhir e” inthlahrun hmel deuh a min en chunga Fawnvelan a tih chuan, “Hre mah se engahmah a ngai lo ang” ka lo ti a, “Kalvari vang vek alawm” a ti ţha leh a, “Eng nge keimah vang a nihna?” Kalvari in a tih chuan, “Intih hlum tum ho hian an ti nawn tawh ngai lo i tia, a dam reng tawh dawn emaw ka tih vang chauhin ka rel” Fawnvelan a lo ti a, “Kan nunna hi Pathian ta a nia, kan ta a ni hleinem. Chuvang alawm thih hnuah chauh ni lo damlai pawh a in fak mawlh mawlh tur an tih ţhin. Maski pawh a damlaia sawisel tu ho bawkin a thih hnuah a ţhatna lai an zawng leh ang a, a damlai a a ţhatna an hriat sak duh miah loh kha an sawi vul leh chuk mai ang” Kalvari in a tih chuan Fawnvelan, “Sangkhuma pawn a rel ve tho” tih pahin a chal a dawm a, “E…keichu darthlalang ah pawh ka in en ngam lo, ka inpuang tawp mai ang. A damlaia ka rel dan zawng zawngte kha a thlarauin a hre tawh ang a ka tia, min rawn rek chawt ang tih te ka hlau” thutak deuh hian a ti a, “Ka khawngaih loh vang ni lo vin keichu zep loh chuan ka hlau” a ti leh a, “A damlaiin i rel a, a thih hnuah i hlau leh a, a lawm lo ve ngawt ang” Kalvari in a tih chuan a ţhu ngil auh a, a bulah Sangkhuma a ţhu ngui ve bur bawk a, “Tunah chuan a nu bak ka dem tawh lo” Fawnvelan a ti sup a, Sangkhuma pawhin, “Fa nei tlak lo in fa a nei ţeuh a nih hi” a lo ti ve bawk a, ka khuma Dawnfuha a muttir hnuah Kalvari nen waiwai kan bawl a, sawi tur a vang duh khawp mai.

“U Zirbawngan min lo bia a, ‘Remmawii lo ngaihven ţha rawh’ a rawn ti a” a tih chuan, “A ho emai” ka ti mawl tawp a, “I ţah a chhuak em?” a tih leh chuan lu ka thing a, “Kan chhungte an thih pawn ka ţah theih ngai loh kha, ka ţah a chhuak lo a, hrehawm chu ka ti” ka ti a, “Ka tawt vek ka lungphu te hi a dik thei lo, a phu zawt zawt a, ka awm lah hi hnawh tu awm ang maiin a awm a” ka ti leh a, “A hrehawm viau ang, keini pawn hrehawm kan tih chuan nang phei chu ka ngaihtuah thiam vek. Mak deuh chu maw, ka hlau ve miah lo” a ti a, waiwai hmarcha vangin ka lo hahchhiau ţhat a, “Inrin loh laiin thawm nei thut thut suh u” Fawnvelan a la rawn ti zui a, ka ţham nawk chak a nia, thlahrang a zawn leh hunah pawh tuman kan zui duh ka ring tawh lo.

“I vannei e..keichu mitthi hrim hrim hi ka hlau tlat a, tu pawh thi se ka thauah min man ţhin. Reh tawh se ka ti tak tak a nia aw, a reh thei mang si lo a” ka tih chuan, “A reh mai mai lo an tih kha, i duh vanga hlau i ni hleinem. Amah i duhsak zia te chu amah vêk khan a hria a, demna tur che a hre lo ang, a thih dawn thlengin a ngaihtuah ang che ka ring. Bakah, a insiamţhat tawh kha, thlamuang deuhin awm rawh” a ti a, purun sen a chan laiin keiin thingpui ka lo siam a, men rei chuan ril a ţam duh bawk si, Puipuii te kan ngaichang ru ran a, thingpui leh waiwai kan chhawp hnuah pawh tuman kan ban lo a, biak pawh kan inbe mang hlawm lo.

“Ei ang u” Kalvari in a tih hnuah kan ban ve chauh a, mipa vang mai mai a ei theih loh neih tum ngai miah lo khan tunah chuan ei a har ka ti, a sak ţalh mai a ni. “Mahse Maski chu an hrechhuak hma a a vannei ka ti. Hman deuha kan khuaa mi bo kha chu a puam vek tawh hnuah chauh an hmu a nia, a rimchhiat zia kha” Sangkhuman a tih rualin Kalvari a lo uak ţhat a, phawk deuha kan en laiin amah zawkin, “Ka rai lo” a kut vai chung meuh hian a ti a, “I lo nei zawt zawt ange aw, i hrisel loh phah ang” Fawnvelan a tih chuan, “Ka rai lo tak tak. Khami ţum khan a rim kha ka hre ve a, ka luak a ti chhuak thar leh, kha pawh kha a thih chhan an hre loin ka hria” Kalvari in a lo ti a, “Ruang an chharin a pawi e kan ti hluai a, a reh leh a, hetiang hi mizo te pawh hian ngaiah kan nei lek lek tawh a nih hi, tualthattu lah chhuichhuah loh, zalen deuha la leng halh halh an tam awm sia” Fawnvelan a tih chuan, “Khatiang zawng chuan sawi tawh lo ang” ka lo ti a, Puipuiin Kalvari a lo call chiah chu a bulah kan insawn phei vek a, kan biang pawh a insi lo chauh a ni.

“Hei, a chhungte inah chuan kan awm” a rawn ti a, video call a ni bawk a Nutei leh a bialpa pawh an lo lang ve a, “Pawnah kan chhuak lawk a ka lo bia cheu a nih hi, ka tan chuan rawn kal ve a rem lo a, Nutei leh a ţhianpa hian an rawn zui ve ang aw, u Bawiha te pawh inchhungah an awm. An lo chhuk thei ţep tawh” Puipuii bawkin a rawn ti leh a, Nutei nen chuan an mit a sen râm a, a bui luk bawk a, “Ka mumang ni se ka ti a nia aw” Nutein a tih laiin amah kuah tu a bialpa zawk chuan a mittui a lo hru mawlh mawlh a, no angreng deuh hian, “Nutei te ina ka len laiin a lo kal ve a, a fel si” a ti a, a mittui bawk chu a hru leh a, “Ngawi reng ula, kan han lut ange aw, midang pawn thla an la tho a, ka hmuh tir ang che u” Puipuiin a tih hnuah anmahni an bo zui nghal a, inchhung a luh rualin ţap ri hriat tur a awm a, patling aw rawl chhuah meuh a ţap pawh a awm. Maski ruang pawh a rawn ti lang ngei a, a bal tawh lo nain a hmai vel a duk kha a la awm tho a, Kalvari a insut hraih a, a ţah nghal mai laiin keichuan ka en tawp a, ka ipik viau nain ka ţah a chhuak lo a, ka mittui pawh a tla thei lo. U Bawiha te pawh a lo ti lang a, Maski ruang kilin a ţhu ngui lup a, Fawnvela lahin, “Thudik ka sawi tak nain ka inchhir emai” tih leh ţah a rual a, video call a ni bawk a a hnuaiah tereuhtein kan ţhian ho chu kan lang a, chuta ţang chuan Sangkhuma ka en a, ani pawh keimah ang chiahin a lo meng rulh rulh mai.

Puipuii te nen a kan inbiak tawh loh hnuah pawh Kalvari leh Fawnvela chuan an mittui an la hru reng a, “A hmel ka hmuh khan ka lung a awi lo, ka ţap lo thei lo, ka lainat lutuk” Kalvari in a tih laiin Fawnvelan, “Dawm hlumtu pawh nei lo a a thi hian min ti hrehawm ber mai” a lo ti ve a, kan bathlar a rik bur rualin phawk deuhin kan in en a, “Fimkhur ta che, zanah siliper chhuat nal bun ziah suh ka tih kha” u Lalhuman vin zeta a tih takah chuan kan thaw huai a, Maski te in lama phei a, che zung zung tur kan nih laiin ka phei chak rih hlawl lo.

U Lalhuma leh pu Taipuia te lo lut lah chuan gamcha an awrh a, an biang leh hnar te, an mit te a sen ve hlar a, Maski te inah an ţap tawh aniang. “Remmawi, i va hil helh hawlh ve” u Lalhuman a tih chuan ka ngawi reng a, “Ţap thei lo chi hi an awm ve a, indem chi a ni lo” Kalvari in a tih pawhin, “Hetiang ţah theih lohna chi a ni lo reng reng” a ti tlat a, “A nu saw ka haw tak tak a ni, ţawngthei si, ‘a ruang chu hetah kan dah tur a ni’ a tih loh leh, ‘hetah, a pi bulah kan phum ang. Media lamin tuman min rawn ngaihven lo se la, awmze nei lo a mualphona mai mai’ a ti vel a, a chang leh a ţap a, tihpalh ang deuha ben keh phawk ka chak a nia” u Lalhuma bawkin a ti leh khar khar a, “FIR te an theh lut dawn lo em ni?” Sangkhuman a tih chuan, “Theh lut awm lo e, saw nu sawn lipse a hlau a nih saw. Maski-a pate chhung lam lah hi an nep ropui si, keichu ni ila e, ‘engmah sawi theih i nei lo’ ka tia nga, ka duh angin thil ka ti ang. Ka postmortem tir ang a, an chhui chhuah hma chu police ka nawr ang mawle. Postmortem pawh a phal lo, ‘a thih dan a râwn tawh tehreng nen postmortem lehzel ka remti lo’ a ti vel, lehlamah han hnial viau dawn se a fapa a ni miau a, a duhthlanna an zahsak lo thei si lo a, ben kawkalh nuai ka chak a nia” u Lalhuman a ti bawrh bawrh a, “I ţang ulh a nih kha, ‘a remchang apiangin min rawn kawm an tum ang a, hnuchhuina lamah kan la chak lo si, a alh hluai ang a, a mit leh vat ang a, miin min sawi sup sup ang a, a pa jail tan thu leh kan chhungkaw chanchin, a chhia zawng zawng an kher chhuah hnuah engmah chhuichhuah awm mang si lo vin a zuzi leh mai mai ang a, rilru na leh thinrim tur chu keimahni chiah kan ni tho. Min rawn kawm tum pawh awm se tumah ka be dawn lo, vc emaw yma hruaitute an biak pawhin kan chhungkaw chanchin sawi tam lo turin ka hrilh ang. Inphawrh mualpho vek hnua tualthattu hriat leh theih si loh ang hi a tam emai, ka rilru a na viau a, mahse ka fapa hi a thih hnu lehzela miin a chanchin an sawi a, a hman hman in a an chhui ka duh lo’ a ti a nih kha. A duh loh vang chein a thusawi i her kual daih a” pu Taipuian a lo ti a, “Zakzum leh ze zawi chi a ni bawk si a, a thlarau pawh a zahawm alawm a tia, eng nge huat tur awm?” a tih leh chuan u Lalhuman, “Maski a mualpho rualin amah saw a mualpho tel ve zel dawn, a zu in te, a mipa kawp ho te zawng zawng nen a sawi thei pawl an awm dawn a, amah a inveng lawk a nih saw, mi â a ni hleinem. Lo ngai reng rawh, mipui an lungawi lo viau ang. Amah pawh saw an dem daih thei, a duh lo che i ti teivet lehnghal a, ani ai chuan Nobawihi ka duh fe zawk” a ti a, an inhnial bap bap reng a, “Keipawh fapa ka nei tawh a, ka hmangaih em em bawk a, ţawngthuchheloah, Maski ang chiah hian lo tualthi ve ta se chu a thattu an chhuichhuah hma ka chhui tir ang. Ka fapa thattu ka hriat theihna tur a nih chuan mualphona mai mai chu engahmah ka ngai lo ang, nu thinlungah chuan hetiang hian a awm nghal a, Maski-a nu chu a ti mak hle mai. Keipawhin ka dem nghal der alawm, anni phei chuan sum an nei a, an tan thil tih a awlsam dawn tehreng nen, Maski hi a vanduai e..ka khawngaih emai a” Kalvari in a lo ti charh charh a, “Chu reng chu a nia, keipawn fapa ka nei a” u Lalhuman a tih chuan, “Eng nga?” kan ti vak hlawm a, “I nei a maw?” pu Taipuian a lo ti ve bawk a, “Aw…tlangval lai fa ang kha” a tih chuan, “I la tlangval reng a ni lo’m ni?” pu Taipuian a lo ti leh a, “Ka sawi ngai lo alawm mawle, a nu bulah a awm a, ka hmuh lohna a rei lutuk tawh. Hetianga Maski a tualthih takah chuan ka ngaihtuah chhuak a, inbe ngai miah lo mah ila ka fapa chunga thleng ni se ka ngawih bo pui lo khawp ang” a ti a, a thutak tehreng nen pu Taipuian, “Chutianga fa hung luah tawh si engmah han sawi loh, hei leh chen kan inkawm tawh a, a mihring ang zawngin i lo hung luah tawh tih ka hre reng reng hleinem” a ti a, a lungawi loh hmel khawp mai.

“Zira te unau hi chuan an hria, mahse hetiang lamah hian an ţawng tam lo a, an sawi lo mai mai aniang. Hung luah mah ila kan inbe ngai lo a, fapa nei lo ang vel ka ni tho. A nu pawhin pasal a nei daih tawh, a pi leh pu te bulah a awm” a ti a, an ţhu ve reng a, Nutei te nen kan inbe zeuh zeuh reng a, Maski rawn zuiin an thlen chin min rawn hrilh zel a, “A hminga nula nih ve si chuan va lan miah loh chu a inthlahrunawm e” ka tih chuan, “A ho lutuk, an hrethiam vek ang che” Kalvari in a lo ti a, “Khua a var ang a, chawhma lam chiah a awm ang a, u Rinchutan a vui nghal ang a, kan hmu rei thei dawn lo hle mai” Sangkhuman a lo ti ve bawk a, awm mai mai mah ila keichu ka hah ţun a, ka sawi thiam lo, ka awmdan a mak lutuk.

“A nu hi na takin ka dem, chu chu a ni mai” u Lalhuman a lo ti leh a, “Ka lung a awi thei lo” a tih pawhin keini chu kan ngawi reng a, tumah kan lung a awi lo ang, a fapa a hmangaih miah lo em mawni tih mai tur a nia, a pa chhungte lam pawh ka dem tho, ka dem kual vel vek mai a ni. Kei ni ila a thattu an hriat hma zawng ka chhuitir awm si a, mihring kan inang lo lutuk hi a buaithlak a nih hi.

Nutein, “Kan rawn thleng dawn hnai an ti” a rawn tih chuan Kalvari in Dawnfuha a paw sawk sawk a, keipawh ka insiam a, ka pi Binladari te in lamah kan phei a, dawr a hawng rei peih bawk a a lo buai khawp mai. “Pi, Dawnfuha hi lo awmpui la, Maski te inah kan va phei ve ange” a tih chuan a lo lak sak sawk sawk a, ka pu pawh a lo ţhu ve peih a, Dawnfuha pawh a lo ngaihven ve vat a, “Masiki-a chu engtia thi nge a? Dawra lo kal ho ka zawh lahin an sawi ţha duh hlawm mang si lo, hetah hian hmanni a a meizial theihnghilh pawh a la awm a, a lo kal hunah ka pe mai ang ka ti kha a nia, a lo kal ta si lo a” ka pi Binladarin a lo ti ve a, “A tualthi, a ruang an chhar a, miin an that aniang. Aizawla a awmna ber ten a rui ngai lo an tia, Nutei te pawhin an sawi tho” Sangkhuman a lo ti a, “A va zia lo ve aw, damchhunga tang ve tlak a nih chu. Tunlaiah mi thah hreh lo an tam tawh a, nangni pawh fimkhur hle rawh u” a ti a, dawr aţanga kan kal chiah chu Kalvari nen kan inkai tlat a, hreh viau mah ila thlah liam ve ngei ka duh si a, ka ţap thei bawk si lo, ka hah ru ţeuh reng ringawt mai a ni.

Maski te in kan thlen chuan rin aiin mi an lo tam a, kawtah ka pa a awm a, “A chhungah ţhutna a awm, va ţhu lut rawh u” a lo ti nghal a, patling ţhenkhat pawh muk deuhin an lo ti ti hlawm a, Maski nu hian sawisep kai duh loin inven tum viau mah se miin an sawi dawn tho tho. U Rinchuta pawh inchhungah a lo awm a, a nu in buaipui zui a phal tlat lo hi a ni mak ka tih ber mai chu, a fapa hi a lainat miah lo em mawni tih mai tur a ni.

Ruang a rawn thlen chuan ka bul vela mi te chu an ţap deuh vek a, a nu phei chu a auin a au a, dawm bet lo se chu a tlu hial maithei a ni. Nutei leh a bialpa lo lut chu ka lo hui vat a, “Ka lung a awi lo” Nutei pawhin a ti nghal a, ţawng rih lo tur a ka tih hnuah ka bulah ka ţhuttir a, Kalvari leh Fawnvela leh Nutei bialpa pawh Maski an hmuh rualin an ţap leh tawh a, keichu ka ţap thei lo reng reng, a mak tak tak a ni. Ka thaw a hah dawn emaw tih tur khawp a hrehawmin ka awm a, ka mittui far khat pawh a la tla lo thung.

“Ka lung a awi thei lo” Nutei chuan a ti leh ţhin a, “An va han nep tak e aw, ka ding hluai anga ka lungawi loh zia ka sawi dawn em mawni? Thuneihna chu nei ve ila hetiang mai mai hian ka kal tir lo tawp ang” a ti hlak hlak a, a bialpain a lo khap ve thung a, Maski-a ke lam pangah kan ţhu a, a chhungte an awm nual avangin ka va hnaih hreh deuh a, “Ka tawt up up a, ka lu a hai muai muai mai” Nutei hnena ka tih chuan, “Ţap la i zia mai ang” a lo ti a, “Ka ţap thei lo a nih hi” ka ti a, Maski nen a kan inzui ve zia hre ho chuan mak min ti maithei, mahse ţap bawrh bawrh ho ai hian ka chhungril a tawt daih zawk ang.

Kan haw zawk hnuah Maski te inah bawk kan phei leh a, ruang kil a ţhu ka nu’n min hui zauh takah chuan ka nu awmna lamah kan phei a, Dawnfuha a tlei loh avangin Kalvari a lo lut ve rih lo thung a, a vuinaa awm ve ngei erawh a tum tlat a ni. Ka nu bula ka ţhut chuab Maski pawh ka hnaih ve deuh a, “Rilru a va han ti na tak em aw” ka nu bula ţhu chuan ţap chungin a ti leh ţhin a, mahse ka awih lo, an rilru na tak tak se chu a thihdan te hriatchhuah an tum nasat viau ka ring.

Mitthi hlau viau e ti lo chuan u Rinchutan a vui lai te chuan ka en reng a, a hmel chu a ţhat dan ngai rengin a la ţha a, a bulah ka awm tih a hre tawh lo a, a nui tawh lo bawk a, a mut dan ngai rengin a mu tawp a, lungawi loin insehruh ţeuh reng mah ila a chhungte duhdan kan zah sak lo thei si lo a, man chhuak kher lo mah se amah thattu te hi an inhre kar ang a, an nun a nuam bik lo ang. A lu an tuam tlat bawk a, eng emaw chu a awm chiang a ni. Damchhungin a thih dan leh a chhan te, a thattu te kan hre chak reng mai dawn chu a nia, lung a awi mawh khawp mai. A pa chhungte lam pawh an lungawi lo an ti reng ringawt a, lungawi loh chuan hmalak mai tur a nia, Maski an ti khawngaihthlak emai.

U Rinchutan a vui zo chiah chu an ţap leh luai luai a, a hmaiah an rawn khawih sap sap a, damchhungin ka hmu tawh dawn si lo a tiin a biangah leh a chalah ka dek ve a, a vawt si, min hip vang vang mai, cement bang vawt deuhin min hip ang mai hi niin ka hria. “Chhin har chi vak a ni tawh lo ang” ka nu’n a tih rualin kan hruaitute ho an rawn lut a, a kuang an chhin dawn thleng chuan mangţha pawh ka ti lo a, lungawi lo deuhin kan awm vek hlawm a, a rukin kan na em em a, chuzawng chu a ni mai. Mahse, a hmel tal kan la hmu thei a, tualthi dang tam tak chu an hmu tlai a, an kuang pawh an hawng ngam tawh ţhin lo a nia, kan la vannei zawk alawm. A chhungte thutlukna siam erawh tumahin kan ţawmpui thei lo a ni. Ţhenkhat lahin, “An postmortem tho ang a, mi hriat an duh lo aniang” te an tia, keipawhin postmortem lo lai tak kha mak ka tia, ti ti a ti tam khawp mai. Rilru kai peng tu, chhuichhuah loh a awm reng tawh tur si a nih ber hi.

Thlanmual thlengin ka zui a, kan haw chu ka ruak huai a, hlim deuh a kan inhmuh leh ka rin nen hetiang teh tawp hian a tawp ta mai si a, tunlaiah misual an tam tawh si a, ţhian pawh thlan fimkhur a ngai khawp mai. Ruihhlo ti tam tak, an ruih loh laia fel em em te pawh hian an ruih lai chuan pawisak an nei lo, mi sawizui hlauin police an pun duh lo a, a sawizui tu te chuan reilote ah an theihnghilh dawn, amah hmangaih tak tak tu te bawk hi kumkhua a na tawh tur kan ni.

Maski thih aţanga kar khat a liam hnuah pawh a chhungte hnen aţangin engmah kan hre lo a, youtube ah chuan hmuh tur a awm a, sawi zui tur a awm lo thung a, Nutei bialpa lah a in ngaihtuah vung vung a, a mittui a tla leh ţhin a, u Bawiha pawh pindanah a inkhung chawt a, a lungawi lohna vawikhat a sawi a, a sawi zui lo thung. Fawnvela leh Sangkhuma te lah Maski an rel ţhin vangin an inthiam thei lo a, u Rinchuta bulah an kal tlut tlut a, ani lahin a lo hnem thiam teh chiam si lo, keimah hian ka ngai a, zanah vawikhat chu ka ţap ve tawh a, chubak ka la ţap leh miah lo thung a, setanic Nicky-an “Maski-a thla ka hmu” a ti phei chu ka thin a rim lutuk a, kan insual ţhelh a ni.

Nutei te an haw dawn vangin thlanah kan kal a, “Mi pawi i sawi loh tehreng nen hian aw, i ţawng tlem si, mi fiamthu thawhah i lo nui ve mai mai zel a, ko chhuak tu che an awm a nih hmel a, kal lo tawp la ţha tur” tih pahin Nutein a hming inziahna lai paw deuh chu a tuai fai thuak thuak a, “A thlan hi lo tlawh ngun viau ru aw, mahni a awm chet chet hi a ni nain helai hmun hi chu a fal emai” a ti leh a, an ngaihtuah a, an thin pawh a rim a, tih vak theih kan nei bawk si lo. Keipawhin ngai viau mah ila tunah chuan biak theih a ni tawh lo a, a thlarau kalna tur lam erawh Pathian rorel turah ka dah a, vawikhatmah ka la ngaihtuah chhin ngai lo.

Nutei te haw hnuah pawh ngai ka awh hleithei lo a, mahni a ka awm laia phone a rik te hian ka phu zawk zawk zel a, phone hi a ri pawhin ka dah ngam tawh lo. Dawr ka hawng leh tawh nain hnaah rilru ka pe thei lo a, vur leh alu leh papawr chu sawi loh, Maski-a ka hriat chhuah zel vangin aieng takngial pawh ka siam ngai tawh lo a, ţhenkhat lahin, “Remkalamin vur a siam a, a ţap zawih zawih zel” tiin fiamthu thawh nan min hmang a, u Zirbawnga ka block a, dawrah nilenga awmin Maski ka ngai em em reng mai a ni.

Ka nu ţhiannu sam ka tan laiin Maski nau chiah leh an naupangber an rawn lang hlawl a, “Khawiah nge in kal a?” ka lo ti thuai a, “Thil kan zawt duh che a” tih pahin ţhutthlengah an ţhu a, an naupangber phei chuan a ngai si a, en pawh ka en ţha ngam lo, Maski nen a an infiam lai vel te kha mitthlaah a awm zel a, tunlai chu mitthla te hi ka ning, block daih dan awm se ka ti.

Sam ka tan zawh hnua, “Eng nge a?” ka tih leh chuan, “A u khan hmanrua vel a lei vek hman a, lo haw a tum tawh laiin a thi a, a thawmhnaw vel kan en kual a, hmeichhe kawr hi kan hmu a, a thar hlak a ni bawk a, tuman kan ha tawk lo” a nau chiah chuan a ti a, a bialpa pawh inchhunga khawi ngam tawh a ni a, ngaihdan chu a nei thiam khawp ang.

“I ta tur a nih kan ring a” zawitea tih pahin an thil khai lai chu min pe a, bag ah chuan a hnena ka sawi fo ţhin Lady dianas inn tih a chuang kalh a, keipawhin ka ta tur a nih ka ring hmiah. Min rawn hawn a duh si ang a, a kal ve vang vang aniang.

“Ka nu hnenah engmah ka sawi lo a nia, kan unau chiahin kan hria” a tih leh laiin kawrfual par, khawluma hak nuam tur chi hi ka phawrh chhuak a, “Kan tan chuan a fual mah mah a, u Remkalami ta tur aniang kan tia” a tih hnuah an te ber chuan, “Ha ve rawh api” a lo ti a, hei lah hian min pi ziah a, api min tih tawh chuan darthlalang a in en a awl lutuk ringawt.

“A bungrua vel kan en duh lawk lo a, a pindanah kan dah tawp a, kan ti danglam phal lo bawk a, mahse vawiinah kan ti fai a, kan haw nghal mai ang, insuk tur a tam lutuk a” a nau chiah chuan ti lehin an naupangber chu a kai a, an chhuak a, an in lam pana an kal hnak hnak te chu ka lainat a, a nu a fel lo si, a ngaihtuah tu ber Maski lah hetiang hi a ni leh si a, anni pawh hi miin lo pawngsual pawh ni se a nu hi chuan a ngawih bo pui leh hmak duh ka ring.

Kawr chu ka en ka en a, ka hak phal pawh ka ring lo. Khua a lum viau nain tukverhah ka dak a, Maski ka ngai em em reng a, a ţawngkam te, a nui hmel te, scooter a kan inphurh ţhin lai te kha ka ngai vek tawh. Hman lo chung chung pawhin min pui reng ţhin kha a nia, a tel lo a han awm tlawng mai chu ka rin aiin a hrehawm. A damlai khan hlut nachang ka lo hre lo mai mai zawk a ni.

Ni leh thla a vei zel a, kan khaw mite chuan, “Maski-a leh a bialnu Dindini te thawnthu hi miin thiam deuhin ziak se, a ngaihnawm viau ang. An thih dan lah mi ţhawng thut chi ve ve a ni a, an thawnthu tawp dan a hlimawm loh nain a karah khan hlimawm leh zir tur a tam viau maithei a ni” an ti ţhin a, keichu min sawi tel ve ngai lo, mi tam takin an theihnghilh tawh bawk a, “Maski leh Dindini te thawnthu hi a buin awm se, chhiar tham fe a nih ka ring” an ti ţhin a, Maski-a hringnunah hian ka tel ve lo emaw tih mai tur a ni ţhin. An sawi apiang hian tel ve lo ang hmaka min ngai chu haw ţhin mah ila keipawhin an thawnthu chu ka chhiar chak lo bik lo, engpawh nise an ni chu an liam tawh a, theihnghilh ngai dawn lo mah ila kan kal rual thei tawh dawn lo a ni. Keipawh mahni a kal ka zir a ngai a, a aw hre thei lo vin amah hmu thei lo mah ila ka bula awm ang rengah ka ngai tlat tho ang.


“Remkalam” ka mithmul uluk tawka ka lo thai hliau hliau laia Sangkhuman a rawn tih chuan ka phu zawk a, ka mithmul thaina ber pawh a per nawlh a, darthlalangin ka chal ka vaw ţhelh lehnghal.

“I mawl em ni C. Sangkhum? Mi inrin loh laiin au vak zel suh ka tih kha” ka ti vak vak a, darthlalangah ka inen a, ka mithmul chauh thai tum si khan ka chal thlengin ka thai rang vek tawh. “Remkalam ka ti a ni mai a, tih phut che ka tum hleinem” a tih chuan, “Mi inrin loh laia i au chuan barakhaih i tihna a ni mai” ka lo ti a, “I inrin leh rin loh ka hre hleinem mawle” a la ti ve ţang ţang a, “Naktuk hi Dawnfuha piancham a nia, eng nge kan tih sak ang? Kum khatnaah chuan ţha deuh hlek tih sak ve ila” tih pahin darthlalang lian hmaah a rawn ţhu a, “Ka chhip hi min lo tih ţial sak teh a” a la ti zui a, “A teuhin a hnai lo nasa, i chhip tih ţial ai chuan mi zakhmul pawh pawh ka duh zawk. Pawisa ka pe ang che i ti ziah a, a ţha ţha kan hmang a, min pe tak tak ngai lo. Ka pawisa i ba hnem turu tawh lutuk” uar zeta ka tih chuan, “Dawnfuha piancham a hnai a ka inkhawl ve alawm. Thla tharah ka pe ang che” a ti leh tawh a, “Ba ţhin apiangin thla tharah i tia, min pe tak tak ngai chuang lo, engmah ka tih sak tawh dawn lo che” ti mah ila, “Tun chiah” a ti leh tlat tawh a, “Ti ţial kher lo in colour ka hnawih tawp ang” ka ti a, kan intih sak leh ta nge nge a, tunlai chu a pa ten an chhawr nasa a, a thu ve thulh mai.

“Dawnfuha chu eng nge lei sak i tum?” a tih leh chuan, “Kawr leh kekawr leh motor lem ka lei daih tawh” ka lo ti liam satliah a, “Min hrilh ve ta che, pawisa ka khawl char char a, eng nge ka leisak ang aw. Cycle te, ke pathum nei chi kha ka lei mai dawn mi? A to angem le?” a ti zung zung a, “Ka hre bik lo, tlaiah va en la, a tlawm deuh leh a to deuh te a awm ang a, i pawisa neih dan a zirin i lei mai dawn alawm” ka tih chuan, “Kalvari pawh a bazar nasa, kum khatna a ni bawk a pui deuha lawm an tum aniang, ar leh vawk te nen. Savun bawl an siam tel loh ka hlau e, rawng i bawl pui dawn em?” a ti a, a chhip sam a colour hnawih mawlh mawlh pah a, “Ka hre nang, ka hman leh hman loh a ni mai alawm. Savun bawl in duh te chuan u Rinchuta hrilh ula, kan inah duhthusam zanin kan siam ang a, kan keng mai dawn alawm” ka tih chuan a lo remti ve mai a, “Dawnfuha hi tunah hian tu zawk nge chhun i tih?” a ti leh a, “A ho thei si, tunah chuan u Rinchuta a ang tawh zawk, a vun rawng hian a nu lam a pawl thung a, Kalvari ang thoin a ngo lo a, hmelah chuan u Rinchuta chiah chiah, a mize harh zek zawk lutuk hi chu ka hrethiam lo. Kalvari pawhin chaw a hrai hnuah dah fel lo in a mut pui a, Kalvari mutthilh tui laiin fian hmawrin a hnar kua a lo hawlh sak kha, harh hma lo ila chu a thi hial maithei a ni a ti. A kal thei chhet chhet chauh a, pawi a khawih hnem tawh ber an tih kha” ka tih chuan a nui hawk hawk a, “Kan khua hi chhuahsan lo se aw, Dawnfuha phei chu a lawmawm si” a ti a, colour ka hnawih zawh hnuah banga milem intar ho chu ka en a, Mask-a ziah vek a nia, a thih hnuah thil tam tak a thleng leh tawh nain Aizawl a kal dawn a kan inhmuh ţum te kha nimin lawk a thil thleng ang mai niin ka hria. Dawnfuha pawh kum khat a tling ve tawh dawn a, la dam se chu a neih ang angin thil ţha deuh a tihsak ngei ngei ang mawle. Hun a liam a, hunin ka khawharna a liampui ve mang lo va, a tello a nun ka zir a ka thiam tawh viau nain nitinin ka la ngai em em reng mai. A thih dan ka ngaihtuah lo thei lo a, rilru a dam hma chu kam tu nei ranin ka awm reng tawh ang.

U Lalhuma pawhin u Nobawihi a luh khung a, zu a in tlut tlut reng a, a cher chhiain tunhma kha a pha tawh lo. Min rawn tlawh ve reng tho a, a chhungten rawn hruai an tumin a duh bawk si lo, a nun a ho lehzual a, a ruk chuan ka khawngaih ţhin. Pu Taipuia lahin kan khuaa zirtirtu a rawn awm thar a ngaizawng a, a rim tluk tluk a, a hmeichhiain a duh si lo, a motor lah kha a khalh thiam miah lo chungin a ţawng tial tial tho a, u Lalhuman khalh a zirtir ţhin a, a motor hmalam te chu a sawi bawi mai. U Lalhuma leh u Nobawihi hlim deuha an awm laia a nula rimin a duh lo bik chu a la na a, kan in a a rawn kal apiangin a ang a, tunlai tak chu u Lalhuma nen an inkawm thei lo, an inhau reng mai a ni.

Sangkhuma lu ka suk sak zo chiah chu darthlalang hmaah ţhuin a inthlek vang vang a, “I tihdan berkher chu, tlai ni tla tur a ang e” a ti a, nur nang chung hian a lu a tuai thuak thuak a, “A ro chian poh leh tlai ni tla tur a ang” a ti leh ţhin a, “A ang tih mai mai a ho, ni tla tur a nih chuan loh kha” ka tih chuan, “Ka vun rawng nen a inrem lo e, a balh hmel e Remkalam” a ti leh a, “A balh chuan loh kha, kan su zo chiah zawk a nih kha” ka tih chuan, “Suk zawh chiah pawn a balh hmel a nia han ngaihtuah teh, a chhip chiah a eng hlur a, kawrlum phiar a ang, aaa…ka duh lo dum leh mai rawh” a ti chul tawh a, “I duh dan takin a nih kha kan tih, pawisa i la chawi lo zui, ka dum awm lo emai” ka tih chuan, “Zanah ka nu ka dum tir mai ang” a ti a, “Thlai ţiak te pawh ka ang alawm, hetiang hian min hre ngai loin min hmu se chu pai deuhin min bia ang” a ti a, a kawr a balh loh nan a ka awrh tir chu a paih thla hnawk a, a lungawi lo khawp mai.

“I hre viau ang” ti a a chhuak chu, “I ba hi ka chhhut anga ka rawn ţhing dawn che a nia aw” tiin ka au zui a, “Ka pe nguar ang che” a tih chuan, “Emalgency light i nei em sianpa” ka ti a, a kuttum min rawn hmuh chuan ka nui hak hak a, a sam rawng chu a mawi, a inhmeh lo em a ni.

Kalvari nen a kan inbiak chuan, “Awii…kan buai lutuk, Puipuii lah a rawn vui reng bawk sia, tih tur a tam si. Kolasib aţangin ka nu leh pa te an lo kal dawn bawk a, hei, Nunhlimi a lo kal a” a ti zung zung a, Nunhlimi hi ka la ngei tlat a, biak ţhat luih a har ka ti.

“Puih i ngaih chuan rawn sawi mai rawh aw” ka tih chuan, “Puih chu ka ngai reng, ka rawn sawi hreh zawk a, i buai ve thei sia. Pu Duhawma te nupain min rawn pui a, naktuk mai a ni tawh bawk si, ka rilru a hah lutuk, inchhung hi min rawn chei pui la, thlalak na tur hmun te siam ve ila” a rawn ti a, “Aw, mi an vang tho a, ka rawn kal ang” ka ti a, dawr ka khar a, Kalvari te in lama ka kal lai chuan, “Aieng siam leh tawh rawh, tunlai chu ka mamawh a nia” nu pakhatin a lo ti a, kekawr lian hnuang chungah puan a bih a, puan pheikhawk bunin kamis lian hnuk a ha a, em a phur bawk a, “Ni sa laka inven nan ka duh” a tih leh chuan, “Aw…ka lo tum ang” ka ti a, ka siam leh pawhin Maski hriat reng nan Maski hmingin ka ti daih ang.

Kalvari te in ka thlen chuan an lo buai luih luih tak tak a, naupang kum1 mi lek chuan balloon an hlau ţhin emaw tih laiin Dawnfuha chuan nui har har chungin a lo ţhut puak pawp pawp mai, a puak lo pawh a awm tho a, lian pui pui chu a puak duh bik a, hlau hmel a pu lo reng reng.

“Aw haw wow…Dawnfuha hi chu made my iron rod ni awm tak a ni. Hetiang rualin nui vak vak chunga balloon an ţhut puah pawp pawp awm pawh ka la hre lo” ka tih laiin u Lalhuma a lo lut a, naktuka an sa siam tur lo buaipui mek tu pu Taipuian, “Ral an lo kal e…german ral lian ngei mai kha” a lo ti deuh kher a, “Bialnu takngial pawh hmu zo lo ho chu mi fate pianchamah pawh an fatu zak zak reng mai a ni maw” u Lalhuman a lo ti ve thung a, “Nobawihi nen fa nei ţeuh rawh u, pakhat pawh ka rawn chhuh sak lo ang che u” pu Taipuian a tih chuan, “A thi a hul daih tawh, engati em em nge ka tia, ka thi hul hma chhan lehzel i hriat a ngai lo a tia lawm. Kan hul har khawp mai” a ti a, nui huk huk chungin pu Taipuia chu a pui a, “Lalrinhlu, a kum khatna a ni bawk a sa hi ren lo ang u aw” a ti leh lauh a, “In tih dan dan a ni mai” u Rinchutan a tih chuan an hawi vah a, an intithei khawp mai.

Kalvari nen chauh a thlalak na tur hmun kan siam laiin u Rinchuta a lo kal a, Kalvari kuah paha, “Ka nu te an lo thleng ţep ang, ka nutei te an lo tel ve maithei a” a tih chuan, “A ţha lawm” a lo ti mai a, a phur loh hmel viau thung.

“Puih in ngai em? A sang lai khi i ban thei em?” a ti leh a, “Remkalami nen kan ti mai ang” a tih chuan, “I nuam lo mi? I va ngui ber bur ve” tih pahin Kalvari chalah a dawm a, “Ka hah tawh vang a nih hi, mawng ka la hung lo reng reng, Dawnfuha lahin balloon lian apiang a ti keh a, ka biang te hi a ţeh vek tawh” a ti hlak hlak a, u Rinchuta lahin, “A keh tur hisapin ka lei ţeuh a” a ti then a, “A hamna tur khawl a awm si lo a, a ham tu tan a ninawm alawm” Kalvari in a tih chuan, “Ka naute ho an lo thleng ţep ang, nangchu i mut a chhuah loh chuan ham ve duh mah ta che” a ti vel a, ka naute a tih chu Ţpa te bawk an nih ka ring.

“Dul a kiar bawk si, inchei nalh te hi a har a nia” Kalvari in a tih chuan, “I lu a lian tho a, i dul kiar a lang lo” u Rinchutan thutak deuhin a lo ti a, “Midang ka va ngaihven ang aw, lo hah lutuk suh aw lulian nu” a ti a, a chhuak nghal nulh lehnghal a, “Awii…my friend, ka mood a fuh loh chang chuan ka tlan chak thei a nia aw, lulian nu min tih te hian pawisawi ah a in ngai si lo, Dawnfuha lah ar chaw pek naah a lo hruai a, awii a uih lutuk, ka bualfai lai pawn ka uak tuar tuar a, ngawi rengin rai leh rai loh enna a lo la lei zui, ka pasal zei hawi lo leh lutuk hi chu sum chhuah daih te a chakawm, he thil lah hi a bet thei lo ka ning lutuk” a ti vin hlak hlak a, “A mutui lutuk kha a hmai ka chei a, nu Raltlani te nupa intibuaiin an rawn ko thut si a, hmai rang ruaiin hmanhmawh deuhin a phei a, an lo nuih tawp a, an thubuai rem pawh a ngai lo an tih kha. Pastor a ni tak nain ţhenkhat hi chuan an la thutak hlawl lo” a ti a, ka chei pui mawlh mawlh a, kan zawh meuh chuan ring a kham ţhum mai.

“Kalvari, i fapa hi rawn la teh, ka kekawr lastic a rul a, mi pawt mi pawt mai, ka mawng a hmuh vaih chuan a ţap a ni mai” u Lalhuman a rawn ti lung lung a, “Ka rawn kal” tih pahin Kalvari a tlanchhuak a, Nunhlimi a rawn lut ve thung a, “Puih in ngai em?” a tih chuan, “Kan zo tawh” ka ti hmak a, ka biak chak loh nen, “Theihnghilh tawh ang” a la ti zui a, “Ka theihnghilh peih lo e a, nang chu ni lo la engahmah ka ngai lo ang, nangmah i ni kher kha ka hua, inkawm leh mah ila ka ring thei tawh lo ang che” ka ti a, Dawnfuha thlalak kan tar loh ho ka khawm mawlh mawlh a, balloon bang ka ţawn khawm leh laiin, “Api te an lo thleng e” Kalvari in a ti lang lang a, u Rinchuta nutei te hmuh ve tuma ka kal chhuak ve chuan rin loh deuhin u Zirbawnga ka hmu a, min hmu thut chu a ni pawh a ding ve chawt a, kan inhmu khat a, inhmuh loh vang vang hnua inhmuh thut chu sawi tur a vang tak tak a ni.

“I dam em?” tih pahin amah zawkin a a kut min rawn pek chu, “Dam e” tih pahin ka lo vuan a, kan inchibai lawp lawp laia, “I lo zin ngai si lo a, i buai viauah ka ngai a, i sumdawnna i tluang em?” ka tih chuan, “Tluang a ni mai, i tluang zawk em?” a ti a, ka lo bu nghat a, “I la danglam lo reng reng, i sam a sei deuh tawh tih mai loh chu” min en vang vang chung hian a ti a, “A sei deuh ni lo in a sei tak tak tawh alawm. Hmeichhia ka ang ve tawh em?” fiamthu a ka tih chuan, “Ka tan chuan hmeichhia i ni reng alawm” a tih uk tawh hnuah sawi sual a inti aniang, “Ka mitah chuan i samtawi lai pawh khan hmeichhia i ang reng, hmeichhia angin ka hmu reng ţhin che” a ti a, a nu ten an kohna pawh ngaipawimawh lo vin, “I dam em Remsial?” a ti nawn leh a, “Ka dam ka tih kha, min hmuh reng hi” ka tih chuan, “I dam vek tawh em?” a ti a, “Dam chho zel e” ka tih chuan tawitein a nui a, “Engvangin nge min block kher a êt âwt nu?” a ti leh daih a, “Aa…han in block vel kha a dangdai ve a” ka tih chuan, “Nupui ka nei dawn sin, mizo nula” a ti a, ka phu ve zawk mai. “Engtikah? Kolasib a mi maw?” ka ti hluai a, chhan pawh min chhang lo vin a nu te ipte khaiin a lut daih a, ka block vang khan min thungrul ve nasa hle mai.

CONT…

3
1

Leave a Reply