You are currently viewing KEIMAH, THINGTLANG NULA S2-30

KEIMAH, THINGTLANG NULA S2-30

Spread the love

KEIMAH, THINGTLANG NULA S2-30

“I dam a maw Remkalam?” u Zirbawnga nu zawkin a ti ve ngei a, nutling pakhat chu a awm ve a, a pa a ni leh tawp a, midang ka hmu tel lo, an lo kal ve dawn lo aniang. “Aw dam e, in chau em?” ka tih chuan, “Chau vak lo, lo kal rawh lut ang” a ti a, ka block na a rei tawh si a, u Zirbawnga hmuh leh chu ka phur tehchiam lo, nupui lo nei dawn ta pawh ni se ka tuar na em em rih lo a, a thihna a rei ve tawh viau nain ka rilruah Maski a la lian ber mai.

Inchhunga ka luh leh hnuah pawh an lo la buai char char a, rilru chhiat a chhuah phei chuan u Lalhuma leh pu Taipuia, engtik lai pawh a rui reng ţhin te pawh an la dam a, ngati nge Maski kha a thih bik le tih te pawh a awl a, mahse Pathian remruat chu mihringin kan dang thei lo.

“Eng nge i ngaihtuah vung vung a?” Kalvari in Dawnfuha pawm chunga a rawn tih chuan, “Thil kal tawh hnu mai mai mawle, diktak chuan khati tawpa Maski a thi kha ka lung a awi thei lo a, a thihna a rei tawh a, mi tam zawkin an ngaihven tawh lo nain hmalakna engmah a awm zui lo hian min la ti na reng. Nitin ka ngaihtuah a, awmzia a awm lo ropui sia, a nu hi ka ngei a nia, tun thlengin biak pawh ka la be peih lo” ka ti bawrh bawrh a, “Keipawn ka ngaihtuah ve ţhin, mahse a lo tho leh tawh dawn lo a, a dam zawng zelin la la, i zia mai ang” a tih chuan, “A dam zawka lak a har ve e, Nutei nen phei chuan kan inbiak apiangin kan la sawi a, tu pawi mah a sawi ngai lo a, khatianga luikawr bula hnutchhiah tawp duh tu kha chu a sual hle aniang. Fel famkim bik lo mah ila ka damchhung a ka ngaihdam theih ka ring lo. A kal hma a a thusawi a, ka kawr tur a lo lei thlap tawh te kha ngaihtuah chuan rilru nat thlak deuh a sin” ka la ti pang pang a, “Kan sawi reng mai dawn a nih hi maw” a tih chuan, “Nangni chu a ruang bulah pawh in ţap bawrh bawrh thei a, keichu ka ţap thei si lo, ipik bawk si kha a hrehawm a, tun thleng hian ka la ni. Maski nen a kan tih dun ţhin kha keimahin engmah ka la ti thei lo. Ka ţap lo kha tuar lo pawh ka ang maithei a mah se ka ţap thei lo kha ţap bawrh bawrh thei aiin a hrehawm zawk” ka ti a, ka sawi zawng te hian ka la hah, “Ţap thei lo chi hi an awm ve alawm mahse nia, i sawi ang khan ţap bawrh bawrh te aiin in tawrhna a nep chuang lo, a hrehawm zawk daih hial maithei a ni. Tunah te hian mi tam zawkin Maski leh a bialnu hlui thi ta kha an thawnthu pum hriat a chakawm an ti tak nain ţhenkhat chuan, ‘Remkalami awm lo se chu a thlan hi a fai han reng miah lo ang, pangpar lah thar deuh deuh a awm reng bik a’ an ti ve tho a nia aw. Mi hriat a sawi vak vak lo ho hian ka bulah an sawi ţhin” a tih hnuah, “An fak ve teh mai che a nia, ţap thei lo tih velah buai suh, i tawrhna hi ka hriatthiam pui che, mahse nangmah intihchhiat nan hmang lo a, Maski nen in lo siam dun ţhin pawh kha siam leh tho rawh, i tih chhunzawm duh loh chuan a lawm lo zawk ang” a ti a, a dik ve tho bawk a, “Vur leh alu leh papawr hi chu thuhran ni se, a nu hian a ngaihsak lo em a, aieng lo siam leh ta pawh ni ila a hmingin ka ti tawh ang a, ka hralhna ang chu a thlan chei nan ka hmang zel mai ang” ka tih chuan, “A ţha alawm, hmalam pan nan hmang la, hnungtawlh phah miah suh” a ti a, a ţawng lai te chuan a thutak tehreng nen a fapain a hnarah te a lo ţham a, a kâ chungahna kut a rawlh lut ţhin bawk a, kan thutak viau nain a ner a ner mai.

“A thih dan an chhui tir duh miah lo te kha tun thlengin ka lung a la awi thei lo a, ka dam theih pawh ka ring lo. Thlalak hlui te ka en vel mai mai zel a, tih theih a tlem si, taka, u Zirbawnga sawn nupui a nei dawn mi? Engmah i sawi ngai si lo a” ka tih chuan, “I bula a chanchin sawi thar reng ka duh hleinem, khawia nupui mah a nei lo ang” a ti a, inchhunga kan luh leh chuan u Zirbawnga hmuh tur a lo awm tawh lo a, a inbual ve vel a nih ka ring.

Dawnfuha lah u Rinchuta nutein lak a tum a, a duh ber mai bawk si lo a, a thinrim chuan, “Hei vang hi a nia hmun danga in awmpui reng ţhat lohna chu, a pi te ho pawh min hre tawh lo a nih hi” a ti nghal ringawt a, “Rinhlua hnathawh in a zir lo a, hmuh zeuh zeuh ringawt hi a ni mai” a nu’n a lo ti hlauh a, Dawnfuha pawh a kal kual char char a, ven sen pawh a ni lo, u Lalhuma kekawr ah a pawt leh ţhin a, “A va mak teh fo e aw, ka kekawr lastic a rul ka tih kha. Ka mawng hi naupang tih ţhaihna khawpin a hlui a nia aw, i sim hmak theih nan ka hmuh tir law law dawn che em mawni” a ti a, a lung a awi lo khawp mai.

U Zirbawnga rawn in lan leh chu a lo fai vur tawh a, min biak hmain ka thil cheina lamah bawk ka lut leh daih a, mi nghal lutuk tih takah rawn lut ve thuaiin chhuata balloon tla chu a chhar a, “Kha, hei hi dah tel ta che” a tih chuan, “A leng tawh lo” ka ti hmak a, “Ka nupui nei tur chu i lawm vak lo a ni maw?” nui chung hian a ti leh a, Kalvari ţawngkam anga, “Khawia nupui mah i nei lo ang” ka tih chuan a nui hawk a, “Nupui nei rual ka nih tawh hi” a tih veleh, “Nei reng ta che” ka ti a, “Tak taka eng nge i an tawh?” a ti leh daih a, Maski thihna chungchang a nih ringin, “Ka zia tawh, mahse FIR an theh lut duh lo te khan ka rilru a la ti na, ka dam thei lo” ka tih chuan, “Kha kha chu an ti ang lo khawp mai” thutak deuh a tih pahin min rawn hnaih a, “Nang hi chu a hrechiang tu che apiangin an duh ang che” a tih chuan, “Engvangin?” ka lo ti a, “I lem lo a, i rilru a awm apiang i sawi chhuak a, â viau si hian i rintlak ru riau” a tih chuan, “Ka â tawh bik lo” ka ti hmak a, “I rilru a ţha ka tihna zawk a nia, ka awm lai reng hian min han unblock teh, block daih turin ka number ka pe hleinem che” a tih leh chuan, “Maski-a thih hnuah hi chuan tumah ka be vak peih lo” ka ti a, “Keiin ka be dawn che alawm” a lo ti ve leh zel a, “I rawn zin khat ngat ngat khawp mai” ka tih chuan, “Zin chhan tur nei hek lo, fiam ngam i ni dawn bawk si lo a” a ti a, a dik ve tho mai.

“Nupui nei dawn der si lo ‘ngah nge ka nei dawn i tih kher a?” ka tih chuan, “Bum i awlsam em alawm. Min hmuh loh rei vang ngawt khan hmeichhe dang ka melh tihna a ni lo, i inpeih leh hun ka nghak a, hun thawl ka pe che a nih kha” a ti a, min rawn hnaih a ka dara a rawn kuah rualin u Rinchuta a lo lut thut a, keini ai aiin a lai zawk aniang, ţawngkam thiam loh nen, “Keichu ni lo ila a buaithlak dawn a nih kha” a ti a, “Rawn tih tur em em ka nei chuang lo, midang bulah ‘in luh dawn chuan ehem ti hmasa rawh u’ ka lo ti dawn nia, barakhaih thut chi in ni lo a nih kha” a ti a, a chhuak lehnghal nal nal a, “Hei lah hi ngawi reng hian a rawn lang leh hlawl zel a” u Zirbawngan a lo ti hluk a, “Nangpawh min kuah kher a ngai hleinem” ka tih chuan, “Kut awlin ka awm thiam lo a” a ti daih a, ram lama tirh liam daih chi a nih hi.

“Tak takin maw Remsial, i chanchin ka ngaihven ru reng a, ka lo hre ve zel a, mitthi chu mitthi an ni tawh a, ngaiin au au mah la a lo kir tawh dawn lo, hmalam pan rawh, i duh chuan ka pui ang che, min block tawh lo la” a tih chuan, “Phone number te chu a thlak theih alawm” ka lo ti ve a, “Ka phone number hi thlak chi a ni tawh lo. Min block hnuah pawh i chanchin ka ngaihven reng tho, a tuar na em a an tia ka rawn inrawlh vat duh lo a” a tih chuan, “Bialnu dang i nei lo mi?” ka lo ti a, “Mi hi i ngai lerh mai sia aw…i ngaih ang em em a lerh ka ni lo. Lerh chu ni ila khaw tinah fa ka nei tawh ang u, motor pawh a la luh theih lohna hmun thlengin fa bal deuh deuh ka nei ţeuh tawh ang” a ti a, ka balloon tar lai tla thla chu chharin min tih pui a, “Mipa hian kum engzat in nih thleng nge fa in neih theih ve a” ka tih chuan, “Damchhungin a ni mai, thih hnuah em em chuan kan nei thei tawh bik lo a, hmeichhia pawh lo ni ta ila ka kum ngaihtuah chuan thi hul rual ka la ni bik lo” a ti a, ka lo nui duai a, “Maski-a lem ziah ho i hmu duh em?” ka tih chuan, “Duh e” a lo ti ve mai a, “Dawrah ka tar ţeuh a, nakinah i lo en dawn nia, a mawi hlawm teh mai a nia aw” ka tih chuan, “Khawvel a hrehawm em hi, a kal hma ho hi an vannei zawk, chutiang zawng chuan ngaihtuah daih rawh. Kan inhmuh leh takah chuan ka pui che ang a, i dam thuai mai ang” a tih laiin Sangkhuma a lo lut a, “Isss…fa neih tum mang si lo mi fate thil tur in buaipui a ni maw?” a rawn ti a, a sam a dum hlup a, a mithmul pawh lian deuhin a dum a, “Awii, Sangkhum, i mit hmul a vung em ni?” ka lo tih chuan, “Cheng10 man chi in ka nu’n ka sam min dum sak a, ka muthlu palh a, ka mithmulah a lo tat tel a nih hi, a fai thei rih lo” ngaihsam deuh hian a ti a, “Naktukah thlalak te kan duh ve dawn a sin” ka tih chuan, “Lukhum hma thlawk ka khum anga ka kuai kun mai ang. I buaina a ho emai” a tih a, a mithmul dum ţhat dan leh han len zia em em chu a vung emaw tih mai tur a ni.

“Black tape i bel emaw ka lo tia” u Zirbawnga pawhin a lo ti ve a, “Remkalamin ka sam min colour sak ve a, khawthim dawn hnaih a ni tla tur ka ang lutuk a ka dum leh daih a nih hi. Taka, u Zirbawng, intuak nan in dawrah ka lo thawk ve teh ang a” a ti hlut a, “Kolasib ah daih a nia” u Zirbawngan a tih chuan, “Pawi hleinem, pawisa ka khawl ang a, kan khuaah hian puanthan leh thawmhnaw vel ka zuar ve mai dawn alawm. Bulţanna tur tuak la ngai” a ti tho a, “Sipai lam kha” u Zirbawngan a tih chuan, “Ka peih tawh lo e a, a tlan mawlh kha a hautak emai, savawm pawn min um se khatiang chen chen ka tlan peih lo ang, ka in seh tir duh zawk ang” a ti a, a sim chiang hle a nih hmel.

“Kan sawi ţha leh dawn nia” u Zirbawngan a tih laiin Fawnvela pawh a lo lut ve hlawl a, “Fithangi a rai a nia aw, tun ţum chu a kawpuar vang a ni tawh lo, a rai tak tak tawh” tih pahin rai leh rai loh hriat theihna ang kha a rawn keng a, “Keini chhung chu thil ţul lo kan ei nasa sia, a khua a puar leh mai mai aniang a tiin kan inentir a, doctor pawhin a rai a ti. A chhiat leh hlauin kan fimkhur tawh dawn teh mai a nia aw, kut thawh a fiam zuk zuk chi pawh a ni tawh lo, chawi ei dawnah pawh a ţhutna turah lukham dah zel a ngai dawn. Dawnfuha aia hmelţha fa kan nei dawn alawm” a ti zung zung a, “Chuan” ka lo tih lai mekin, “Ehe Sangkhuma chu, i mithmul ah tattoo i chhut tir a ni maw? Tu nge i tih tir? A va han thiam lo em em ve mawle” uar deuh hian a ti leh a, “Sam dumna a nih hi, i bengchheng, a ninawm” Sangkhuman a lo ti hmuk a, “Nupui te hi nei ve tawh rawh, hei keipawh fa ka nei mai dawn a nia aw” a ti a, intithei deuh hian a nui huk huk a, “Inhau inhau mah ila hmeichhe na na na chu an rai leh mai zel chu a nih hi” Fawnvelan a tih chuan ka lo ner nang a, “E…chuan maw, Setanic Nicky-an Maski a thla ka hmu a, ka hlau lutuk ka thla hual rawh u, chuan ka piangthar ang a ti leh tawh a nia aw” Fawnvela bawkin a ti leh a, “Hepa ve ziah lah hi, a duh hun hunah Maski-a thla ka hmu a tia, hman zana chiang deuha hmu anga a insawi pawhin an en chiang a, u Chianga zu rui buai mai mai a nih kha” ka tih chuan, “A hmu awm lo e, a thihna a rei tawh a, a hrang peih tawh teuh lo” Sangkhuman a lo ti ve bawk a, u Rinchuta leh u Zirbawnga te nutei lo lut ve lah chuan kan thil chei chu a en vang vang a, “La thla leh vek rawh u” a ti hem mai.

“Lak thlak a ngaih loh hi” u Zirbawngan a tih chuan, “A mawi lo emai, cake zai nan te, thlalak nan te an hmang duh dawn a, kan chhungte zawng zawngin an hmu dawn. Thingtlangah hian thil cheina nalh lei tur a awm lo em ni a?” a ti leh a, “A nalh nalh kan lei a, kan thiam danin kan chei a nih hi” ka tih chuan, “Aizawl aţangin a nalh deuh lo keng rawh tih tur che u alawm. A nalhna ka hmu lo reng reng, a ţawp em em ringawt a, mi chu an fate kum khatna an lawmin a nalh thei ang berin a sin an tih ţhin, leina nei lo pawh kan ni lo” a ti hlak hlak a, ka va han chhang chak tak e aw.

“Tunah Aizawla mi chahna hun a awm tawh dawn si lo a, Zira, a leina hmunah min va hruai teh, keiman ka lo chei ang e, balloon a tam em em ringawt a, balloon kan fak sak a ni ringawt dawn a sin” a tih chuan u Zirbawngan, “Rinchuta sawm rawh” a lo ti daih a, “Thingtlang a awm tih vanga hlui rup leh hnawk deuh a chei kher loh tur a nia” a tih leh chuan, “A thar vek a nih hi kan lei. A hnawk em em pawh kan lo hre lo a” ka ti a, inla changkang, thingtlang mite hmusit lutuk ho hi chu engahmah ka ngai lo. Kei aia upa pawh nise ka hnial hreh lo reng reng.

“Awii..ka duh thu a va han sam lo tak em?” a ti leh ţhin a, kan ngawi reng a, ka dawhtheih loh chin a thlen chuan ka liak hrep mai ang. “Chhungkaw group ah pawh dah ila an rawn sawisel tho ang” a tih leh chuan, “Dah lo mai rawh. Hah deuhin an chei a, rawn sawisel sak suh. Chah che pawh ni ila i pawisa in i rawn lei leh chuang lo ang” a ti a, thinrim deuhin a nutei chuan min chhuahsan a, thaw a veng huai mai.

Kan ţhian thuma kan haw chu kawngsirah kan ţhu chawl a, “Nunhlimi kha a awm ve reng sia, a zak ru viau ang a” Fawnvelan a tih chuan, “Zak awm lo emai, zah nachang hria se u Zirbawnga a be nang” ka lo ti a, “Remkalam, Maski a boral tawh a, a rawn let leh thei tawh dawn miah lo a, u Zirbawnga hi duh ve mai rawh, ka hrilh duh lo mai mai che a, i chanchin min rawn zawt ţhin a, a duh tak tak chein ka hria. Maski laka inthiam lohna i neih dawn tho rualin nupa in la ni lo a, sawi tak ang khan a boral tawh bawk a, lo inkawp leh mah ula Maski pawn pawi a ti lo ang” Fawnvelan a ti leh ţan tawh a, “Helai hmunah hian Maski in rel a, a thih daih kha” ka tih chuan Sangkhuman, “Ni e, insawn ang u” a lo ti a, a thlangah kan insawn thla a, Fawnvela chuan ka kut vuan chung meuhin, “A ngaihtuah tak tak che a nia aw, ka hmuh tirhah kha chuan ka ring bik lo a, lerh deuh a nih ka ring a, ka hrechiang a, nangmaha a ngheh zia ka hre tial tial a, ka fiamthu lo a nia aw” a ti leh a, a ngenngawl khawp mai.

“Bialpa neih ka duh tawh rih lo” ka tih pawhin, “Khatin ti ringawt suh, upat deuh hnua pasal i neih chuan nau pawh i pai thei tawh nang” an ti ţan a, “Hun te min pe ve phawt rawh u ka ning, chutia innawr tut tut chi pawh a ni lo” ka ti a, “Fithangi pawh a rai tawh, in pahnih hian nei ve tawh rawh u, midang in duh ngang loh leh ţhian pawh ni ula innei mai rawh u” Fawnvelah a tih chuan a rualin Sangkhuma nen kan beng chawrh a, “Ţhiante sawi zawm phet tum suh, innu rai vang maia min rai tir ve ţalh i tum a nih kha” ka tih laiin Sangkhuman, “Innu rai vang hian â daih suh” a ti bawk a, kan lung a awi lo dun nasa, mi a sawi zawm reng a, Sangkhuma nen pawh kan zak zo vek tawh.

“A chhiat leh vaih chuan a tih chi loh viau ang, chuvang chuan a nun ti hlim tur a chanchin in lo neih ve a ngai alawm” a tih chuan, “In dim se nangmah khan duat la a ni mai” ka ti a, Sangkhuman, “Dik chiah” a lo ti ve vat bawk a, “Sawi leh ţhin ila Maski kha a chhungten thudik hriat an tum miah lo hi a mak e. A nu lah hi a bawraw telh telh emaw tih mai tur a nia, tuna a mipa khawi phei saw chu u Lalhuma te ai pawhin a chhe zawk. A nun dik lo lutuk miin an hriat a hlau a nih saw” Fawnvelan a tih chuan, “Ni chiah e..fate thih chhan leh khami zana a mi kawp te hre duh miah lo a hlim deuha a la awm thei te hi a mak a nia. Maski hi hrang se, a thih chhan vel te rawn sawi se ka ti a nia, mahse kan ţhianho a kan awmkhawm lai ni se la” ka ti tan tan a, “Damchhungin kan hre dawn lo a nih hi. A thihna a rei tawh nen kan bula la awm ve te a ang ţhin ka ti” ka tih leh rualin Sangkhuma a hawi kual vut a, “Hei lah hi dawih si, thlahrang ai chuan tuna i mithmul kha a hlauhawm zawk” Fawnvelan a lo ti vat a, rei pawh ţhu lo vin kan kal leh a, keiin aieng ka en kawi a, Maski dam lai kha chuan min phurh sak mai zel a, tunah chuan Sangkhuma leh Fawnvela ten an zawn ţawih ţawih a, an phun nasa em em mai lehnghal.

“A lehpekah chuan u Lalhuma leh pu Taipuia zawn tir ve tawh ang che” an tih loh leh, “U Zirbawnga tih tir rawh” an ti a, kal pawh an kal ngil thei lo va, an insan hleih deuh avangin an inhau reng a, kan bathlar a an dah chiah chu kawr dawm chung meuhin an thaw hlawi hlawi mai.

“A thlawn tawp a haw aiin fan tal saw va ai rawh u” ka ti a, “Vur i siam tawh bawk si lo, in in hi a ruak, ei tur a awm lo” an ti a, inchhungah lutin fan hnuaiah an mu duai a, “U Zirbawnga nutei kha a hlauhawm e…a thau sia, burma vawk chiah chiah. Thu a neih hmel em em mai lehnghal a” Fawnvelan a tih chuan, “Ka chhang ţep a ni, thingtlang mi tih vangin min hmuh ţhin phet a tum a nih kha. Amah khan chei se a chei nalh hlawl lo vang. Sawisel chiah thiam ang chi a nih kha” ka ti a, bathlarah chhuakin aieng chu tlem ka la chhuak a, inchhungah ka luhpui leh a, “Keichu aieng ka hmuh ringawt pawn ka rilru a na” ka tih chuan, “Chawhmeh eng pawh i ei tho alawm, a thim zawng hlirin ngaihtuah suh, hmalam i pan vat loh chuan Maski a lungngai reng dawn a nia” tih zawngin an pahnih chuan min thlem a, “Huiham…Fithangi a rai” Fawnvelan a ti leh ţhin a, “Tak a Sangkhum, hman deuha i mawng a khawihli pui awmna lai kha a ser em? A duk deuh lo maw?” a tih leh chuan, “Ka hre nang, i mawng i en i en ngai bik em ni? A duk leh duk lohah buai suh. Nangmah zawk hi i mawng a hang a, thosi seh i la haw zui a, hang lo se chu i mawng zawk kha a nia duk tur chu” Sangkhuman a ti khur khur a, “Lungleng deuha aieng buaipui lai laiin mawng mawng lo ti reng suh u, ka nu’n buhban a chhum a, in duh leh kurtai nen khan ei mai rawh u, chhawhchhi den sa pawh kan nei” ka tih chuan an tho vat a, bel an hawng nghal a, “U Zirbawnga pawh a khawngaihthlak” an tih chuan ka chhang lo a, anni pawhin an sawi zawm bik lo.

“Aieng kha dawrah i dah leh tawh dawn maw?” buhban ei paha Fawnvelan a tih chuan, “Aw, mahse Remmawii aieng ti lo in Maski aieng ka ti tawh dawn. Ka phone number ka dah tho ang a, Aizawl ah pawh ka thawn leh ang. Ka khawl char char ang a, kum tawpa Maski thlan cheina tur a ni mai” ka lo ti a, “Pasal lo nei ta thut la” a tih leh chuan, “Pasal pawh nei ila Maski thlan chu ka ngaihven reng tho ang, a nu a laktlak loh emai” ka ti a, aieng chu ka vel a, zana kan pahnih a kan buaipui dun ţhin lai te kha ka hrechhuak a, rei tak hnuah u Zirbawnga a lo lang leh hlawl nain Maski hi ka la paih bo thei mawlh lo. A thih chhan te, a thattu te hrechhuak ila chu ka dam deuh mahna.

Zanah pawh ka pa bulah, “Kalvari te inah ka kal leh dawn a, aieng kha lo khawih suh u, a hmaa min siam ang khan a hming bel tur kha lo siam tir leh la, mahse Maski aieng ti tawh rawh aw” ka tih chuan ka nu’n, “Miin an nuih ang che” a lo ti a, “Maski hriatrengna turin alawm ka tih dawn. Aieng man chu a hman ţhen chi miah loh. Ka duh dan chuan min tih sak rawh aw pa” ka tih chuan, “Aw le…dam chuan naktukah ka lo siam tir dawn nia” a ti a, lungawi deuhin ka chhuak a, setanic Nicky nen kan la intawk zui a, biak pawh ka be peih lo.

“Remkalam, i bialpa hlui kha a nghal khawp mai aw” a tih pawhin, “Thla hual ngai khawpa hlauh neiin mi an chhuahchhal zuah zuah ngai lo, i setanic dan a pawn lang emai, i biak ber i hlau daih alawm. Keini’n Pathian kan bia a, kan thlamuanpui tehreng nen” ka ti a, ka kalsan hmak a, hlau tak tak se a sam thlengin a tla kawlh vek ang chu.

Kalvari te pawh an lo ri nuai nuai a, u Zirbawngan Dawnfuha a pawm a, a duh loh zawng an pekin a ţap zel a, “Ka fapa chu ni la aw…hetiang em em hi i ni lo ang mawle. Rinchuta hian fa enkawl a thiam lo emai” a ti a, min rawn hnaih zualin, “Tiraw Remsial?” a ti leh hram a, “Tuman fate an hau reng phal hleinem” ka tih chuan, “Nangmah hi ka hau phal lo che a, fate chu ka hre lo le” a ti vel ngei a, “I inla zei thei lutuk hi lo thi ta pawh ni la kuang chhungah i in pose tho ang” ka ti a, ka kal pel daih a, u Rinchuta mai bakah a nu te an lo kal tel ve si a, inleng an awm nual a, thingpui kan lum reng a, no kan sil reng bawk a, Dawnfuha a muhil hma hlauh a, ni lo se chu kan buai khawp ang.

Ka haw tur chu ka duh lo chung u Zirbawngan, “Ka thlah ang che” a ti deuh tlat a, rei deuh chhung chu ngawi rengin kan kal a, min be tawh dawn lo emaw ka tih hnuah, “I ţha tak tak maw?” a ti leh tawh a, “Ţha e” ka tih chuan, “Nupui ka nei dawn lo, ka uang a nih kha” a ti leh a, a inpuang hma ropui si.

Kan in thlen dawn ţepah min pawt dingin, “Bul i ţan ţha leh tawh em?” a ti a, “Ka tum mek chauh” ka tih chuan, “Kan khuaah lo zin rawh, hmun ngai reng a awm a ţha lo, hawi zau la, inti thawveng la i harh mai ang” a ti a, “In khuaah chuan kal a ngai hrim hrim. Nutein min lo bia a, ‘ka pi lung kan phun dawn a lo kal ve rawh a tia, Aizawl ah a awm tawh bik lo a” ka tih chuan, “Engtikah?” a lo ti vat a, “Kar thar chawhnu lamah a niin ka hria, in in hmu ngai lo mi?” ka ti a, lu thin pahin, “Dawr chiah ka ngaihtuah” a tih hnuah, “Ka hmuh lai hian min lo unblock teh, in block reng chu a nuam lo emai” a ti leh a, a lungawi nan a hmuh lai ngeiin ka unblock a, “Kan khuaa i lo kal dawnah min hrilh ang che” a ti a, aieng buaipui ka ngaih vangin chhang lem lo vin in lam ka pan a, ka buaipui nghal zung zung a, “Hming leh phone number ka pack tel duh i tia, i char leh tho sia” ka nu’n a lo tih chuan, “A sirah hian hming leh phone number dahna tur a awl duai alawm” ka ti a, ka tih chhunzawm mawlh mawlh a, Nutei nen pawh kan inbia a, zir hun chhung bakah a nu ten pawisa an pek belh a, an pawh sei hnuah pawh engmah thiam lo vin a beidawng an khuaah a haw tawp a, Lanfeli leh u Afaki te an thiam si a, ani engmah thiam tak tak thei lo a nih avangin a tih mualpho hlauin a zirtirtu Lanfeli leh u Afaki te hming a sawi duh lo ngei a, a pa’n, “Two wheeler taxi khalh mai rawh” a ti a, a hnial loh thu min rawn hrilh bawk a, thiam a nei tlem ve em a ni.

“Ka bialpa nen kan inţhen a” a rawn tih chuan, “Engati nge? In nih rei tawh nen” ka lo ti a, “A ţahbelh emai ka peih tawh lo e a” a tih chuan, “A sek tehreng nen engati nge a ţah ziah a? Sek ţul a ho te te a ţah ziah chu a buaithlak e” ka ti a, “Ni reng e…a rilru a no lutuk a, a ril phir zawng zawng thlengin a sen no vek a ni bik ang ka ring. Kolasib a ka haw dawn te khan kan bathlarah a ţap ringawt a, ka ten reuh tak tak a ni” a ti zat zat a, “Pawi lo, mipa i ang tho alawm” ka ti ta ringawt a, “Ang e…bialpa leh bialnu ka ni thei ve ve” a ti a, rei deuh kan inbiak hnuah kan duh tawk ve thei hram a, ka block lo chiah chu u Zirbawnga pawhin whatsapp ah, ‘Muttui’ a rawn ti leh zuk zuk tawh a, ka block chhung zawngin min rawn ti buai lo a, a fel ve khawp mai.

Dawnfuha piancham a ni bawk a hma tawkah pastor quarter ah kan kal a, a mit hmul vangin Sangkhuma pawhin lukhum hma thlawk a khum a, rui tawkin Puitea kan la tawk zui, “Nupuite rai no lai laiin zu rui mah ta che” Fawnvelan a ti nghal chat a, Fithangin nau a pai chiah chu a inti puitling khawp mai. U Valdiki pawh a rai no an tia, amah tak phei chu kan hmu ngai lo.

“U Valdiki rai no in min ten tlat alawm, ‘ngei sa nak lai chein’ a tia, ka rualin chaw pawh a ei duh lo” a ti a, a pasal ngei pawn a u a nia, u Valdiki hi chu mi zawng zawng u a ni ringawt. “I va han vanduai bik tak” ka ti a, kan kalsan zui nghal a, quarter kan thleng chu Nunhlimi pawh a lo awm leh vang tawh. Kalvari hian a be chhe ngai lo a, u Rinchutan biak chhiat a phal lo a nih ka ring. Keichuan ka be ţha der peih tawh lo, a phakar emai.

Ka chhuak leh daih a, quarter piah a nu Sawmi te in kawtah u Lalhuma te ho pawh an lo ţhu ţhap tawh a, u Zirbawnga pawh a awm ve. Phei ve ka tum loh nen u Lalhuman min ko tlat a, “A lo kal hma ho kha thingpui pek zeuh zeuh reng an ngai dawn a, thingpui sem turin inpe tawh rawh. A khat tawkin inchhung lam va en reng la” a tih chuan u Zirbawngan min lo nuih a, “Inchhungah tih tur a tam, thingpui in sa vekin an lo kal ang chu” ti mah ila, “I u Rinchutan sem char char ru a ti” a lo ti a, tleirawl pawh an awm nual a, tih ve mai tur a nia.

An thingpui lum sa chu inchhunga ţhu ho bulah ka sem kual a, Kalvari in, “A buaithlak e, kawr mawi te kan leisak ve a, a tawnzau hak hi hlih a phal lo reng reng” tih hlak hlak pahin Dawnfawha kal chhet chhet chu a lo zui kual a, Nunhlimin choka lam chhuat a lo phiat hliau hliau bawk a, ka va phei ve chuan, “I ngaih ang kha a ni lo tak tak a nia aw” a lo la ti a, thingpui in ka nghah chhungin a phiat zo a, a ruh leh thlap hnuah ka bulah a rawn ding a, “Maski nen in ni emaw ka tih vang a nia” a ti a, “Maski sawi ziah suh u, sawi loh pawn rilru a na a nia, in sawi peih hlawm si” ka tih chuan, “Ngaihzawn tumna rilru ka pu miah lo a nia aw” a lo ti vat a, “Ngaihzawn tuma rilru pu si lo in ngaihzawn tumna mit leh kutzungpui i nei a nih chu” ka ti leh a, ngaizawng lo se whatsapp ah a be tluk tluk reng lo ang.

Dar2 vela cake zai an tum chuan u Zirbawnga te pawh an lo lut a, “Cake zai hmain kan zai phawt ang” an chhungkaw ţhutna bul a ding chunga ka tih chuan an cake dahna dawhkan an hnaih deuh aniang zai hma hmain cake chu Dawnfuhan a ţham vak a, cake chunga an bati dah pawh a tla hlum hmak mai. A pherh nuai a, u Rinchuta tihngaihna hre loin, “A ham pherh nasat hmain zai vat vat mai rawh u” a ti a, ring deuha, “Happy birthday” ka tih chuan Dawnfuha a phu zuk a, a la ţap zui, “Zai thut mah ta che” Sangkhuman a rawn ti a, Dawnfawha a ţap ring si, a ding uai a, “Aw, in zai zo ah ngai mai ang. Cake hi a hnuai lam hi a ei tlak a, mahse a tlem deuh tawh a, a duh apiangin rawn pir mai teh u. Ei tham a awm tawh lo, chaw tal in ei ţeuh dawn a nia aw” a ti a, a inthlahrun hmel khawp mai. Mi an chhuah pheuh pheuh hnuah pawh, “Cake kha naupanglawm emaw a ti pek a nih kha” a la ti a, mi an ţhahnem ve reuh si a, Kalvari phei chuan, “Ka zak e” a ti deuh reng mai.

Dawnfuha a sil fai leh te te hnuah kan chaw ei hma peih lo chu inchhungah kan ţhu a, “Tu hi nge maw i chhun ni? Kut leh ke awl hian i awm thei lo reng reng” ti a Kalvari a phun hlak hlak chuan Fawnvelan, “Ka pi Binladari a chhun a nih kha, pitar ve si thingkungah te a la lawn a, a tlak nghe nghe kha” a lo ti a, “U Rinhlua dam ţhat loh lai phei kha chuan hei hi a harh sia, ‘mu mai mai rawh’ a ti leh ţhin a, a mu duh bawk si lo, u Rinhlua takngial pawn a fapa harh lutuk hi buaithlak tih chang a nei, ‘harh lutuk rehna nachhawkna te hi awm se tiraw?’ te a tih mai mai kha” a ti a, Dawnfuha pawh a ţap a bang ta bawk a a harh leh pek khawp mai, hetiang em em a naupang harh hi ka la hmu ngai lo.

“Kalvari, kawmthlang lam ka en a, ar in ngah tehreng nen Rinhlua khan kan lei a ti tho sia, eng nge awmzia ni a? In ar in talh lo em ni? Talh tham vek an nih khu” u Rinchuta nu in a rawn tih chuan, “U Rinhluan, ‘ka man dawnin ka mitah tak min en ţhin a, ka khawngaih, midang talh sa lei mai ang’ a ti a nih kha” a ti a, “Aww..ar chuan engti fakauin nge a lo melh bik a?” a ti a, a nu meuh pawhin u Rinchuta hi chu mak a ti ţhin a ni.

A pawimawh ber kan ţhian hoin thla kan la a, kan thlalak kan en nawn chu Sangkhuma hmel a lang ve lo, a lukhum chiah a lang zel a, Fawnvela nen tun ţum chu zu an in miah lo lehnghal a, a tih zia tak tak a ni. “Thlalak ah i kun zel a, i tel ve duh tho sia” ka tih chuan, “Ka mithmul ang hi nei la i kun ve awm tho emai” a ti hmuk a, chaw ei tuma kan thawh sap sap laiin u Zirbawnga a lo lut a, Fawnvela hnena a phone a pek hnuah ţhutthlengah min nam ţhu leh a, engmah sawi lo mah se a duh ang chu a hriat theih tho. Thla kan lak dun ve hnuah ka thawhsan leh a, min kal pen san mai ang chu tih laiin min zui zel a, chaw pawh kan rualin a ei ve a, Dawnfuha a pi ten an pawm daih bawk a chaw ei laiin tumah kan in hliam lo. U Rinchuta berin sehrep a seh ri rawp a, kan en ţhap tih a hriat veleh, “Khatiang kha a lawm ka ngei chu” a ti a, a tho leh rih a, a rawn ţhut leh chuan, “Fimkhur deuha ei a ngai a nih hi” a ti a, ka ke lah chu tu emaw hian a rawn tlawh zeuh zeuh reng a, chaw ei a ka kun apiangin a rawn tlawh a, ka ep chiah a u Zirbawnga bula ţhu Fawnvela chu a nih ringin ka melh vak a, u Zirbawnga nen a in epin kan ţhu si a, min chhaih fiam nan min rawn tlawh emaw ti a, “Min tlawh reng suh Fawnvel, i rawn ti thut zel a, chaw ka helh phah mai tur a sin” lungawi lo deuha ka tih chuan, “Ka tlawh awzawng lo che” a lo ti vat a, u Zirbawnga a tho nghal daih bawk. A thleng chawia pawna a chhuah hnu chuan chaw bar tur a ka kun leh pawhin tuman min tlawh tawh lo a, u Zirbawnga kha a ni tih ka chiang tawh lutuk tlat.

Zanah keimahni bawkin kan ti fai leh a, Sangkhuma leh Fawnvela ten dekchi lian pui pui pawn lamah an sil a, kei leh Nunhlimin inchhung kan ti fai thung a, mikhual han ti ila lehlanga rawn kal, zingkar a rawn kal a zan a haw leh an tam a, tih tur a tam ngang mai. Thlalakna hmun tur a kan siam kan tihfai lai chuan, “Kan inbiak dan Sangkhuma hnena u Zirbawngan a sawi hnu khan kan la inbe leh miah lo tak tak a nia aw, bialpa ka nei a, u Zirbawnga pawh ngaihdam ka dil tawh” a ti sap sap a, “I sawi reng mai” ka tih chuan, “Midang hriat ve loh laia ngaihdam dil che ka duh alawm” a ti a, banga kan thil bel ka lak thlak laiin ka bulah a lo kal a, “Ka tihpalh tak tak a nia aw, zanreiah kan inbia a, a mak lutuk ka chhungril ka phawrh chak tlat a” a tih chuan, “I chhungril i phawrhin i thi anga sin, i kâ chhung kawm vaka i pumpui chhungril lak chhuah i tum em ni?” ka ti a, mak tih hmel deuha min en laia ka nuih takah chuan za vak lo vin a lo nui ve a, “U Zirbawnga lakah pawh i inthlahrun phah a, nangmah leh nangmah i inhrem mai mai. Ngaihdam min dil na na na ngaidam duh lo ta che ila ka fel famkim bik bawk si lo, ka ngaidam mai ang che” fiamthu ti tak deuh hian ka ti a, lawmthu min hrilh mawlh mawlh a, ngaihdamna hi a ropui a, Nunhlimi pawh vawikhat a ti sual ve a ni mai a, inngaidam tawn ila a ţha a ni mai.

Kan haw tur chu u Zirbawngan min thlah a, ka ţhiante lah an in la zeiin kan hmaah chak deuhin an kal a, u Zirbawnga lah chuan min kai tlat a, ka kut lak leh ka tum leh a hmer nghet sauh emaw tih mai tur a nia, hetianga kan awm hian ka inthiam lo. “Vawn tur dang i nei lo mi?” ka ti ta ringawt a, “Vawn nuam ber ka vuan a nih hi” a tih chuan, “Awii…ka thi ţhaks, hetiang em em a han inlak zei, kal ve vat vat ang ka pa’n ka thil duh a lo tih fel thlap chuan aieng pack leh ka ngai dawn” ka ti a, kal chak tum mah ila a kal chak ve duh tlat lo a, “Eng nge i siam tir?” a tih chuan, “Maski hmingin ka ti tawh dawn a, a pack na tur ţha deuh ka ngaihtuah ve zel ang a, Maski hming hlirin ka ti ang” phur deuh hian ka lo ti a, min pawm pui ka rin loh nen, “A ţha alawm, miin a hming an hre reng tawh dawn a” a ti ve mial a, “Tihpui i ngai em?” a tih chuan, “Ngai lo, Maski hminga ka dah tur chu engahmah i ngai lo tihna mi?” ka ti he haw a, “Mitthi thawh thik tur khawpa puitling lo ka ni hleinem. A thihna a rei tawh a, a hming daih loh nana i ti thei a nih chuan a ţha ka tih pui che, i awm a nuam huai mai ang” a ti a, ka lawm tak tak a ni.

“Engtikah maw Kolasib ah i lo kal dawn?” a ti ţha leh a, “Karthar ah ka lo kal ang, Nutei te inah ka thleng dawn a” ka tih chuan, “Naktukah ka haw dawn a, i lo kal dawnah lo sawi la, ka lo hmuak ang che” a ti a, kan inzawn kan thlen hnuah pawh min thlah mai lo vin, “I ngaihawm ve ţhin” a ti leh tawh a, “Nupui i neih dawn kha a” fiamthu a ka tih chuan, “I inpeih hun ka nghak dawn che. Hmana ka sawi kha i la hria em? Mipa hi kan duh deuhte lakah lo chuan kan inphahhniam mai mai ngai lo. Taksa itna vanga chauh a ni lo a, min en la, i bula ka awm dan hi ka mizia a ni lo, hetiang hian hmeichhia ka um duan duan ngai lo va, zahthlak khawpin ka inphahhniam ngai lo, hmeichhe dang bulah hetiang hian vawikhatmah ka la awm ngai lo” a ti sup sup a, “Ka lo kal dawnah ka hrilh dawn che nia” ka tih rualin min vawnna a thlah a, keipawhin in lam ka pan nghal a, ka pa’n a lo siam tir hlauh bawk a aieng ka buaipui leh zung zung a, ka mut dawn meuh chuan dar12 a pel der tawh.

Phone ka en hmasa a, u Zirbawngan kan pahnih a kan thlalak kha min lo thawn a, ka mit ka chhin loh leh ka meng duau duar a, ani chu a lang ţha. ‘I chhing mit i chhing zel’ a rawn tih chuan ka chhang lo a, ka awm zawnah ka phone chu dahin ka inngaihtuah vang vang a, Maski thih hnu kha chuan han hlim viau lai ka neih awm pawh ka hre tawh lo

Zingkarah Maski te inah aieng pack nen ka kal a, a nu leh mipa pakhat, ka la hmuh ngai miah loh hian thingpui an lo in a, a naute pawh an lo awm. Ţhenkhatin alu an kang a, ţhenkhatin an sikul uniform an keng kual a, a nu’n pangngai deuh a, “Eng nge ni ta?” a lo tih chuan, “Hei, aieng ka siam leh tawh a, Maski hminga tih ka tum a, i remti em? Tunah chuan sarang ah ka pack rih a, mahse nakinah chuan bur ah te ka la dah ve ang a, a siam dan ţha zawk ka ngaihtuah pah zel a” ka ti a, a chhungte ka rawn thlap loh chuan an lo remti lo thei a, jail ah ka tang daih ang tih te a hlauhawm.

“A pawi lo, kan lawm daih zawk” tih paha a enna lam chu ka en ve a, ţhutkhawmna pindanah Maski leh a pi thlalak lianpui an tar a, Maski pawh mawi deuhin a nui a, a nuih hian a ngainatawm ve hrim hrim. “Ka siam tir a” tiin a nu chu tawi tein a nui a, “Mawi i ti em?” a tih leh chuan, “Aw, mawi lutuk” ka lo ti a, Maski a la naupan hmelin a pi pawh a la thau a, “A pi nena an thlalak mawi ber ka tih ka la chhuak a” a tih chuan chhang tawh lo mah ila thlalak chu ka en char char a, sawtiang rual lek a nih lai sawn a tualthi dawn tih a hre lawk sa awm bik si lo a ka ti rilru a, an remti na a rit burin ka haw a, a nu hian zir se chu chhungkaw kimin an la awm ve ţhap ni mai tur a nia, a pawi tak tak a ni.

Chhunah ka pi Binladari dawra dah tur ka khai phei a, “Aieng bawk em ni?” a lo ti a, “Ni e..mahse Maski hming ka dah a” ka tih chuan, “Masiki a hming a nih chuan duh leh a lang laiah khan khai rawh, rem i va hre ve” a tih hnuah, “Saw chhang saw sazu in a lo seh pawp a, a seh loh lam saw i ei duh em?” tih pahin chhuar a chhang a dah hran bik chu a kawk a, “I ti ang lo e a, a nel vek tawh ang chu, fanghmir ten an bawm hmain paih daih ta che” ka ti a, chhang chu banin bawlhhlawh bawmah ka paih a, “Enteh ka puan pheikhawk leh ka puanfen hi, Zira min lo hawn a nih hi” a ti a, a pheikhawk min hmuh hnuah a ding a, a pawnfen chu a pawt parh kual vel a, “A va fel ve” ka tih chuan, “I pu pawh kawr leh kekawr a rawn hawn sak alawm, a fel reuh tak tak a ni. Niminah pawh i pu chuan a hak kha, a nu te pawhin min rawn tlawh a, chaw ei turin kan sawm tak nain Kolasib a haw vat vat an ngai si a, an hman ta lo a nih kha” a ti siam siam a, “Zira hi nei daih rawh, i nu in phal lo eng ang mah se a fel emai, a hmu sual laklawh mai mai a nih hi. Mitthi chu mitthi an nia, an lo let tawh dawn lo. Zira hi nei la i vannei a ni mai, Kalvari nen in inhnaih reng thei bawk ang a, ka kum a tam tawh a, thil ţha leh ţha lo ka hre vek tawh. I nulat reng chuan i upa tial tial ang a, i to lo tial tial dawn a nia” a ti dap dap a, “Ka la nei ang chu” ka tih chuan, “I neih loh chuan i inchhir khawp ang. Lalhuma takngial pawn ‘Remmawii at zia hi’ a tih kha. Hmeichhia chu pasal kan neih hian kan mawi a nia” a ti a, ka haw dawn thlengin Zira a ti reng a, min duh pui ngang a ni.

Kolasib a kal pawh ka nu ten an phal thlap a, ka ţhiante phei chuan min chhaih sap sapin, “I lo haw tawh lo ang e aw” an ti vel a, ka bialpa a ni tawh lo nain Kolasib chu ka kal ang a, hman deuha Nutein a bialnu ni a a sawi te kha kan lipse ve chhin ange ka ti rilru a, suitcase ah thawmhnaw ka thlep a, ipte ah pheikhawk ka dah thung a, ka nu’n, “In ken hnem i va tum ve” a tih chuan, “Nutei nen kan hak tawk a in ang lo. Hmeichhia chu kan insiamin kan inthlak kual vak zel a, khang zawng zawng kha chhut a ngai” ka ti tlat a, keichu ka zin dawn chuan bawr thei tak ka ni. Thil thleng thei zawng zawng ngaihtuah vek chungin ka insiam ţhin.

U Zirbawnga hnena, “Naktukah ka lo kal dawn” ka tih chuan naupang ang maia lawm hmel leh phur hian, “Yes” a ti a, a inthiam lo leh si aniang a aw a thian kharh a, “Dar engzatah?” a rawn ti a, “Zingkar sumo ah aniang, dar6 vela kan lo chhuah ka ring” ka tih chuan, “Ka lo hmuak ang che. Kan dawr enkual pahin ka bulah Nutei i lo nghak dawn nia” a ti a, “Aieng ka lo keng duh angem?” ka tih chuan, “Duh leh lo keng la, kan lo zuar ve ang” a tih vangin mu mai lo vin thirzaiah aieng tam tham tak ka thil a, miin an duh viau phei chuan a pack na tur bur pangngai ka lei thei thuai ang, engtin pawn awm ila Maski hming hi thai reh ka tum lo hrim hrim.

Zingah hma tawkah thoin ka insiam a, ka sam a sei tawh bawk si, u Zirbawnga sawi ang khan hmeichhia ka ang ve tak tak tawh. In aţanga ka chhuah hma hma aţangin min lo call a, “Sumo ah i chuang tawh em?” a rawn tih chuan, “Dar5 chauh a la nih hi, thingpui pawh ka la in lo” ka ti a, “I lo thlen hunah hmun nuam deuhah thil ka eipui ang che” a ti a, kan inbiak zawh hnua pindan aţanga ka chhuah chuan, “Zira khan secondhand bale tlawm deuha zuar ka hria a tih kha lo zawt chiang rawh” ka nu’n a ti ve mial a, “Engtikah nge in in hmuh a?” ka tih chuan, “Dawnfuha pianchamah khan” a ti ve mai a, “I haw viau emaw ka tia” ka tih chuan, “Huat theih pawh a nih hret hrut loh hi. Hunawl a neih apiangin min bia a, thla la tura in tawm bo hlah lah khan ka chaw ei min vil chawt a, ka thawh ngai lo vin sa leh a chek te min suah belh sak zung zung a, ka eikhamah a rawn lut ve chauh a nih kha” a ti a, “I van sawi har” ka lo ti ringawt a, ka inphahhniam a tih khan a lo inphahhniam tak tak a nih dawn hi. Ka nu a tih dan te chu u Zirbawnga ang chapo ve ar tan chuan a har dawn lutuk tlat.

Kolasib ka thlen chuan sumo counter ah a lo awm reng tawh a, Nutei te inah thleng dawn mah ila a motor ah ka bungrua a hlang lut vek a, “Kan dawr chu saw a lang thei” tih pahin building lianpui chu a kawk a, “Chuti si motor a lo kal a ngai hleinem” ka tih chuan, “Bungrua i keng hnem thei em a” a ti a, mi hi a hrechiang bawk si, u Zirbawnga hi chu bum a harsa reng a ni.

Motor in tawi te kan tlan phei a, garage a a indah fel hnuah ka bungrua la chhuak lo vin, kut ruakin an dawrah kan chho a, a pui ngei mai. Pawn aţanga en ringawt pawhin a mawi a, an building ah chuan lianpuiin, “Tintin” tih a intar a, building chhungah an mahni dawr bik chu kaw thum vel a awm a, midang an luah tir ve bawk a, an buaipui chhung a rei a, a nawm ka ring reng a ni.

“A van pui em em” ka tih lai chuan ama awmna hmun berah min kai lut a, dawr bungrua chu hmuhnawm tham a ni. “Khawi aieng chu” a tih chuan, ‘Suitcase ah ka la dah daih” ka ti a, ka hawi kual reng a, “Kan lo zuar suau suau ang” a tih pawhin ka chhang tawh lo. Mihring khawsak hi a lo inchen lo thei ka tia, kan ţhianhoin pawisa thawhchhuah tumin theihtawp chhuahin kan bei a, Sangkhuma leh Fawnvela pawh ramah an riak zeuh zeuh ţhin a, u Zirbawnga te chu an khawsa thei a, dawr siam an duh pawhin ti hian an puitlin thei mai a, ka lawmpui takzet chung hian mi tam takin hringnun hi a fair lo an lo tih ţhin hi a dik zia ka hre ve tial tial mai.

CONT…

6
0

This Post Has 2 Comments

  1. Anonymous

    A va ngaih nawm em Remsiali leh uzira chu in duh tak in in neih tir ve tawh teh rawn chhunzawm leh thuai ang che u

  2. Anonymous

    Yesss ka chhiar leh thei ta,,khamawm loh viau thin ani 😇😇😇

Leave a Reply