You are currently viewing KEIMAH, THINGTLANG NULA S2-31

KEIMAH, THINGTLANG NULA S2-31

Spread the love

KEIMAH, THINGTLANG NULA S2-31

“Hawi vual vual reng lo khan ţhu ta che” tih pahin ţhutna awl chu a beng thak a, “I van sumdawng nasa em em” ka tih chuan a nuih a za a, “En tur a tam lutuk a en chian hmasak ber tur pawh ka hre lo” ka ti a, bag intlar ţhap phei chu a nalh hlawm tak tak a ni.

“Mipa ve si hmeichhe thawmhnaw zingah i ţhu kuk reng tihna mi?” ka tih chuan, “A piah lamah khan mipa thawmhnaw a awm kha” a lo ti a, a duh lo ve khawp mai. A bula ţhut paha, “A va’n mawi em em” ka tih leh chuan, “I duh duh la rawh” a lo ti a, ka melh rum tehreng nen a nui daih a, “Ngati nge i nuih daih?” ka tih veleh, “Min thah tum mah la nangmah i nih chuan ka nui tho ang” a ti vel a, “Ka ten chiang che e” ti mah ila a nui tho a, kan inhmuh loh chhung khan eng thil emawni in a lo ti â emaw tih mai tur a ni.

Ka ţhutna lamah a rawn kun a, kei, hnung lamah ka âwn ve thung a, “Eng nge i tih dawn?” ka tih chuan, “Kan inhmu leh hi eng nge i ngaihdan?” a ti zawi sup a, “Film a kan hmuh ang a lem rik khalh tur chil ka duh” ka tih chuan, “Hmh” tih pahin a ţhu ţha sawk sawk a, ka thawveng huai mai.

“Kanchhi nen in la inbia em?” ka tih leh chuan, “Biak lohna a rei tawh” duhdah deuh hian a ti a, hmeichhe pahnih lo lutin thawmhnaw en pahin u Zirbawnga an fiam bawrh bawrh a, “A ep chiahah sawn ka va phei chhin” tih leh thawh ka rual a, an zawn ka thlen ruala pakhatin, “Tu nge le? A uk khurh mai” a tih chuan keimah min sawina tih hriain ka lawm lo ngang mai, posi ka la anga ka charge pawp mai dawn em mawni ka ti rum rum a, anni pahnih in la no satliah chu ka hlau lo nasa lutuk ringawt.

Dawr ep chiaha mipa thawmhnaw chu a hmuhnawm vak loh vangin u Zirbawnga awmna lamah ka let leh a, hmeichhe pahnih kha an lo awm tawh lo. “Khawiah nge?” ka tih chuan, “Kan lo en leh ang an ti” a lo ti mai a, “An pawisa neih loh vang a nih chu. Leina tur neih loh chuan kan lo en leh ang kan ti ziah alawm. A uk khurh min ti lehnghal a, kan khua aţangin sumo ah chuang ve se, thli lumin chhem ve bawk se an uk ve tho ang” ka ti hlak hlak a, “I inbual anga i tuai leh puak mai ang. Thli lum chhem chu a na alawm. I vun a la ţial em lo va, lungngai suh” thutak deuh hian a ti a, “Min hnem nge min runluih?” ka ti hial a, “Ka hnem che” a ti then a, “I ril a ţam em?” a tih zawm zat bawk.

“Ţam e” ka tih hnuah ka ei duh zawng min zawt a, ka sawi veleh a ma eitur nen a chah nghal zat a, keichuan dawr chhung bawk ka lo en leh tawh. A hmingin kan khuaah salon ka nei ve a, a chung rangva a la ni zui, ka customer te lah thlan tla hluamin an haw zel a, u Zirbawnga dawr chu a dai dap bik mai.

Ei tur a lo thlen veleh kut kan sil ve ve a, kan hruk hul leh thlap hnua a thil ei chu ka en reng a, ani lahin eitur ţhial chungin hrilhhai hmel deuhin min lo en let ve a, a lem te te hnua, “Eng nge?” a tih chuan, “Inti sek suh” ka lo ti a, a dul leh a awm a khawih a, a ban vel a thlek kual leh hnua, “Ka intih sek loh hi” a tih chuan, “Nikum aiin i sek, i banah ringawt pawh kan intauh na thei ang chu. I bula awm fimkhur a ngai sawt emai” ka ti chu a meng rulh rulh a, “Eng nge?” ka tih veleh, “Ka ţhang aniang” a ti a, a taksa chu a en leh ţhin a, Maski hming a la lam miah lo a, aieng a Maski hming chuang pawh chu a sawisel hran lo. Ngawi renga chow ka ei laia, “I hmelţha sia e” a lo tih chuan ka khuh ţhawt a, ka chow ei lai, ţhial pawh ka la ţhial sawm loh chu ka hak ta alawm, ka khuh bur bur reng laiin ka hnungah na lo te tein a lo beng a, thawk pawh ka thawk ţhat theih loh laiin, “I hnar, i hnar” a lo ti sek a, min buaipui fe hnuah ka thaw pangngai thei hram a, “Nichina i hnar a chow uai nelh nelh kha khawiah nge a awm?” ka hnunga min dawm reng chung hian a ti a, “Ka hmai ka tuai vak vak kha, ka thi dawn emaw ka tia lawm” ka tih chuan, “Zawng rawh, a ei chi tawh lo ang” a ti a, chow hak hian hnarah a lawr daih thei tih ka hre chiah. Kan hma dawhkan a hnawk nuai tawh a, ka zak ve deuh chuan, “Nangpawh a hnua zawn chawp ngai lo vin rawn pawt thla ve nghal mai ta che” ka ti a, “I hnar i hnar ka tih kha” a tih hnuah dawhkan a ti fai a, “I sek vang vek” ka la ti ţalh tho a, ka hnar a thip hlar a, u Zirbawnga chu en pawh ka en ngam tawh lo.

A hranpa hlakin hmana kan thil ei ţhin na, Tashi Delek a mi min chah sak leh a, ka ei fimkhur tawh nasa mai, “Thil kan ei dun hian i hak ziah” a tih pawhin, “Lo ţawng suh” ka ti hmak tawh a, fimkhur deuhin ka ei zo ve thei hram a, “Thli lum chuan a chhem dik lo ve deuh che a nih kha, i ni rep mai” min en vung vung chung hian a ti a, ka tho nalh a, “Ka inbual zawhah ka lo leng leh ang” tih leh phone phawrh ka rual a, Nutei ka call zui nghal a, khawlum urhsun ber lai pawn tuman i ni rep mai min la ti ngai lo. “Ka thlah dawn lo che mi?” a tih pawhin, “Dawn lo, ka puar tawh” ka ti hmuk a, kil khatah ka ding tlat a, “Eng ber nge i huat?” bangbo deuha a tih chuan, “I ni rep mai intih kher ka duh lo” ka ti a, nui vur vur chungin a hawi sawn a, Nutei pawh a rawn lang hlawl a, a hah bawk aniang a thaw hlawi hlawi mai.

“Ka lo tlan char char a nia aw” tih pahin tui bottle a ban a, a in ţeuh hnuah, “Khawiah nge i bungrua?” a ti leh zat a, “U Zirbawnga motor ah a awm vek” ka tih chuan, “Chuti si rawn inthlah tir mai ta che” a ti vin hlar a, “I ni rep mai ka tia a hua a nih kha” u Zirbawngan a lo ti ve zat a, “Khawlum lai pawhin chat damdawi i mamawh a ni maw?” tiin Nutei a nui duai a, “I ni rep mai tih vanga han thinrim” a ti leh a, mahniin zin thei tawh mah ila mi khua a ka awm chuan ka pi Binladari thlengin ka ngai vek zel.

“Min nghak rawh u ka thlah ang che u” u Zirbawngan a tih chuan Nutein a lo pawm thlap a, keichu ka la ti tau tho. “I bialpa kha i ţhen kher a” zahzel a ka tih chuan, “Khatiang, sek si, ţahbelh si ka duh tawh lo. Ţap ţuau a, ‘sek mah ila ka chhungten min la naute chei alawm’ a tih phei kha chuan ka van ten tak” ner nang nang chung hian a ti a, “Sek deuha intih nau tet kha a ţhing” a ti leh a, a duh lo hmin hmak tawh a nih hmel.

Dawr te a khar fel hnuah u Zirbawnga ho in kan chhuak a, “Kan inah in lo kal hmasa duh em?” a tih chuan, “Aih” ka ti vat a, ui an nei lehnghal a, hmanah uiin min seh tawh a, min seh nawn leh chuan ka bauh tawh ang tih te a hlauhawm.

“Keichu ka lo kal chak” Nutein a tih chuan, “A ngai lo ui an nei, ui hian min um ziah lehnghal” ka lo ti a, “I tlanchhia aniang chu” a ti then a, “Hlauh zawngte chu kan tlanchhiatsan ve bawk ang chu” ka tih chuan, “I tlanchhiat vang a nih chu uiin an um zel che” a ti a, ka melh ram ram laiin a zai daih a, “Nute, khawilai takah nge in awm?” u Zirbawngan a lo ti hlauh a, “Hmar veng” a ti a, zai zawm leh mai a tum chu, “Hmar veng khawi laiah?” a lo ti leh a, an inhrilhfiah ngial hnuah Nutei te in pawh kan thleng ve ta nge nge a, an inkawt a zawl nuam khawp mai.

“In veng a hlat nen ka lo biak che khan i lo van thleng rang em em” ka ipte lak pah a ka tih chuan, “Ka leng alawm” a ti a, zai rât rât chungin motor aţangin a chhuak a, ka chhuah ve dawn a u Zirbawngan, “Zanah ka lo leng ang” a lo tih zauh chuan, “Min rim duh duh, kei chu ka ni rep mai” ka ti a, ka chhuak nghal daih a, han inhmuh leh takah chuan la duh ve tho mah ila hman ang khan ka star thei tawh lo reng reng, a hrawk bawk pawh a hmuhnawm dan a dang deuh tawh.

Inchhunga Nutein min hruai luh rualin Nunui ka hmu nghal a, “Khawiah nge u Khumtea?” a lo ti nghal var a, “Sangkhuma a lo kal ve reng reng lo” ka tih chuan, “A va han dawheh em em, zingkar aţang tawhin Remkalami nen kan lo kal a ti char char a, ka lo inchei ve tehreng nen” a ti nang nang a, a rim pawh a tui khawp châk châk khawp mai.

“Tu nge Sangkhuma chu?” nu pakhatin a lo tih veleh Nutein, “Ka nu a nih hi” a ti a, ka chibai leh rih a, “Tu nge Sangkhuma chu?” a ti leh a, a aw a vinin a ţawng rang a, ka nu ang chiah a ni. “Ka ţhianpa a nia Sangkhuma chu” ka tih chuan, “Tu nge a hming pum?” a ti deuh hmuk a, “C. Sangkhuma” ka tih veleh, “Hmingpum a va nei chau rau ve” a ti leh hmuk a, nu thau lam a ni a, a meng rum ul a, a mitmeng leh a hnarkua a in tiat vel awm e, amah hrim hrim chu a kaw huau mai a ni.

“Nute, engati nge zingkar aţanga i chhuah bo daih a? Tih tur a tam tehreng nen inah awm ve ta che” a nu’n a tih chuan, “Remkalami ka hmuak alawm” ngaihpawimawh loh hmel zet hian a ti a, “Zingkar aţanga hmuah a ngai em ni? Mikhual an lo thleng ţan der dawn a sin” a tih hnua, “Hlap zal raih che a nia ka duh ni” a ti leh a, a nu kawh paha Nutein, “Nang a hlap kha e” uar zeta a tih chuan a nu’n, “Eng nge?” amah aia pawr zawk hian a lo ti a, “Ka dawh peih lo” a ti a, uar zeta nuih pahin ka ipte pakhat a la a, pindanah min hruai lut a, “Ka nu kha chu engahmah ngai suh. Ka pa nen an inneihna thutiam an chham lai pawn a vin. A thin a chhe nain a rilru a ţha a nia aw, mahse a lu ruh a ring a, naupangin an hlau bawk a, mi pawn ‘Thang laipuii’ an ti vek. Laipui nen a tehkhin ngai khawpa mi bon a nih saw” a ti zung zung a, “I inbual duh chuan pindana bualin hi hmang rawh, Nunui nen a kan inţawm a nih hi” ti lehin bualin min kawh hmuh a, ka inbual sawk sawk a, bualin aţanga ka chhuah chuan khumah a lo bawk ran a, “U Zirbawnga kha duh daih la” tiin khuma ka ţhut ve rualin a tho a, min hnaih deuhah a ţhu leh tawh a, “Engvangin maw?” ka tih chuan, “A en dan che khan min khawih” a ti ve ngial a, “Mahse..Maski ka la ngai reuh e” ka tih chuan, “A nih leh Maski chu zanreiah ko la, nangmah ngaipawimawh a thlan aţanga a lo thawh vaih chuan i ngaih a reh hmak mai ang” a ti pang pang a, hmai hrukna a vuak pah a, “Awi…ka ning thaks, i ţhianpa ve tho a nia, hran tir kher tum suh” ka tih chuan, “Mitthi ngaihin awmzia a nei lo, mahni inhremna a nih kha. Keipawn ka ngai a, mahse hmuh tur a awm tawh loh hi. Amah vangin han leng tar vaih teh, a thin a rim anga vanramah pawh a be duh lo ang che” a ti leh phar phar a, ka kut a rawn vuan a, thutak deuh a, “Maski khan i tana ţha ber chiah a duh ţhin, hmalam i pan theih loh chuan a lawm miah lo ang aw” a tih takah chuan, “Ka tum reng alawm mawle” ka ti a, ke a hmalam pana kal mai chu a awlsam a, rilru hian hmalam a pan mawh bik ţhin a nih hi.

“U Khumtea ka ngei zia hi aw, ka zuk bia a, dawt min hrilh ka ti dek dek a, min ring lo a tia min block daih. A kalpui anga a sawi ber i lo thlen tawh miau chuan rin a har ve a, min duh loh zia a chiang mai, ka duh tawh bik lo reng reng, a kephah hlai hlai nen” Nunuin a rawn ti lut bawrh bawrh a, “Mi chuan tleirawl luck lai te an nei a, keichu ka luck lo tluan dawn a nih hi. Ka ngai dawn ni a ka hriat chuan a kephah ka mitthla zel ang, a siliper ah pawh a leng lo, ka siliper ah ka ke a leng lo a, ka kezungte sil ngun bik a ngai a tih kha tak tak aniang, a kezungte a da bik, chengkawl bial a ang si” a ti leh hlak hlak a, “A nin khawpin be suh ka ti mawlh mawlh alawm” Nutein a tih chuan, “A nin khawp ka hre hleinem” a ti a, a chhuak lehnghal daih a, “Tikhan karleh velah star thar a nei mai ang” ngaihsam zet a tih pahin ka hruk puan ken lai chu min lak sak a, tukverh a tlak dal inkham pheiah chuan a zar pharh a, “U Zirbawnga chu duh leh ngei ngei ang che. Maski a lo let tawh dawn lo tih hrereng rawh” a ti nawn leh a, a thutak ve khawp mai.

“Nute, hei i nutei te an lo thleng lo buaipui zung zung ta che. I len loh leh pindanah i tawm a, rawn pui vat rawh” a nu’n a ti lung lung a, “Chu, Thang laipuii a puak leh dur dur tawh, kal ang” tih pahin min hui zauh a, pindan aţanga kan chhuah chuan inpuiah pitar thlalak lianpui a lo in tar tawh a, Maski pi ka hre chhuak zawk mai.

“Ehe..Nutei chu ţhian i va nei hmelţha ve” tlangval pakhat hian min hmuh rualin a lo ti nghal var a, cher sang lam a ni a, a ding mai mai pawh a su uih uih a, a harh viau ang, a mut hleihtheih pawh ka ring lo.

“Aizawla ka awm hnu kha chuan ţhian hmelţha leh thiam thil nei bak ka kawm duh tawh hleinem” tiin Nutei chu a nui duai a, chutah keichu min rawn enin, “Hmana u Zira bialnu kan zawh hrep pa kha a nih hi” a ti a, ka hre ve chiah, thau lam turah ka ngai a, a lo cher khawp mai, film vela ruhro lema ţang chi ni awm tak a ni.

“I ţhiannu hi zanah ka rawn rim ang, tunah chuan exer lak a ngai” tih leh tlanchhuah a rual a, “Tihian exer a la ve a, boxing ah ka tel dawn a ti ziah a, vawikhat a tel ve a, round khat naah a ti tau. A hnua tel leh a tum pawhin ‘nang chu a en tuah lo ţang tawh rawh’ an tih kha, a la beidawng duh chuang lo, an hnek apiagin a thin a rim a a ngaihna a awm lo” a ti a, a nutei te bungrua chu min hruaina lamah ka khai phei pui a, awngphah kan thlak laia, “I pi saw i ngai em?” ka tih chuan, “A thih hnuah chiah ka ngai. A damlai kha chuan a tianga min hawlh loh leh min beng a, ka unaute chu a kutphah ti kumin na lo tein a beng a, keichu a kutphah ti arh vekin min beng ziah, a ri pawh a ring bik ţhin. Ka pum ţha lo te hi ka piin ka hnungzang a min ben nasat vangah ka puh deuh a, mahse, a dam laia ka ning ţhin kha ka inchhir” a ti bawrh bawrh a, “Ka ţhianpa kha Tawia ti rawh aw, a sang viau nain an koh duatna a ni miau sia” a ti leh a, mikhual an lo thleng teuh dawn emaw ka tih nen Nutei nutei te bak midang an lo thlen belh lo.

Pindana ka luh leh hnuah Sangkhuman min lo call a, “Fithangin nau a chhiat leh tawh, hei hospital ah kan awm. Amah kan hmuh apiangin a ner, a na aniang” a rawn ti lung lung a, “Ehe…engati nge a?” ka tih chuan, “Kailawnah a lum hlum lo chauh alawm. Fawnvela phei chuan a binin a in bin thla a tia, Aizawlah an kalpui maithei. An in bula ka awm lai a nia, a taka thisen ka hmu chiah chu ka lu a hai vek. A na reuh teh mai a nia aw” a rawn ti leh a, “A rai lian ve tawh sia” ka tih chuan, “Tuizem tiat pawn rai se nau a chhiat theih tho. Kolasib ah a nih loh chuan Aizawl ah an kalpui ang” a ti a, a dah leh daih a, Nutei hnena chanchin ka hrilh ve hnu a darkar khat vel a liam leh chuan min rawn be leh a, “Kolasib ah an rawn kal pui dawn, amah hian motor chuan a zuam lo viau nain a nu ten an rawn ti lui tlat a, kan bulah awm rih rawh se an ti. Mahse, zanin tut tutah chuan a ni lo ang” a rawn ti leh a, “Amah a ţha tawh em?” ka tih leh chuan, “A ţha aniang a thi lo” a ti a, ka thla a muang huai mai.

Zana u Zirbawnga a lo kal chuan pawnah kan ţhu a, Fithangi te nen a inţhenawm an ni bawk a ani pawhin chanchin a lo hre tawh. “An tluang lo ve ngawt mai” a ti a, “Nangpawh i kum a upat hma a i rai loh chuan i buai i buai mai ang” a tih leh chuan, “Chutiang te chu Pathian thu thu, duh hun hun a rai theih pawh va ni suh” ka ti hmak a, “Engtin nge kan awm zel dawn. Thu ka peh hel kual peih tawh lo a nia aw ka upa tawh. Nangmah vangin kanchhi ka thlah a, ka upa tawh” tih paha min rawn hnaih chuan ka thinphu a rang ve deuh a, in fast forward nasa lutuk chu a ni lo.

“Awii…ka thaw seng dawn lo, che thut thut suh” tih pahin ka nam kiang a, “Tum nei sa rana rawn kun ka ni lo, ka ţhutna laiah hian perek emawni a awm” a tih takah chuan kan tho a, plastic chair ah kan insawn a, “Keimah vangin hmeichhe dang i thlah vek maw?” ka ti nawn leh a, “Thlah vek e, an sam zai takngial pawh ka kai ngai lo, chutiang khawp chuan ka fihlim” a tih hnuah, “Tlang deuhin ka hrilh ang che Remsial, kei aia hmangaihtu i nei lo vang. I sumo chuan na i ni rep mai ka tih kha chu ka uang a nih kha. Eitur i hak apianga i hnar aţanga thil chhuak ka hmuh pawhin ka rilru a danglam lo, bialpa dang i neih pawhin ka nghak tho che” a ti leh a, “Ei tur hak lai kha sawi kher a ngai lo” ka tih chuan, “Thu ka peh hel kual peih tawh lo ka tih kha” a ti a, “Pasal ka la nei hman hleinem” ka tih leh chuan, “Ka hmeichhe hriatah i la luhlul ber” min ti a, “Ka nu te ka chawm ve dawn chauh alawm mawle” ka tih chuan min chhang tawh lo vin zawi tea zai pahin ka darah a kuah a, amah ka va en a, van a lo thlir daih a, “Thuruk ka hrilh ang che aw” thutak deuha a tih chuan, “Sawi la” ka lo ti a, “Kanchhi chu a thihna a rei tawh alawm” a ti chiah chu ka phu zawk mai, vai film phei chu ni se ka eng pup pup hial ang chu.

“Eng nga?” phawk deuha ka tih chuan, “Chhungten inneih an phal loh hnu lawk khan a damlo vak a, a thi daih” a lo ti a, “I be ziah sia, a vau bawk che a” ka tih leh chuan, “A thla alawm ka kawm. Thawnthuah pawh thla hmu thei an awm a, thlarau vak vai ho an hnenah an inpuan ţhin kha, khatiang chiah kha ka ni. Ka bulah hian thlarau vak vai an awm reng zel” a tih ruala ka ding uai chu min pawt ţhu leh hnawk a, “A thlarau ka bulah a awm reng a, min vau ţhin, chuvang alawm police hnena ka report loh” a ti leh a, amah thleng chuan ka rap vek tawh a, ka dawih sa tehreng nen min ti dawih lehzual.

“Awii…i thusawi kha a what a very hluai chi loh reng reng u Zirbawng, mi â awmkhawm naah awm phawt rih mai rawh, damdawi nen a an enkawl che chuan i ţha chhuak leh vat mai ang” ka ti a, hnaih pawh ka hnaih ngam tawh lo. Ka bula dawt sawi tawh lo turin a intiam tawh a, a thutak bawk si. Tuna a thusawi pawh hi ka awih vek.

“Thla hian min ti buai reng a, mahse kanchhi thla chu a chawl hahdam tawh” a tih chuan, “Midang thlain an la ti buai che em?” ka lo ti a, “Thlarau pahnih khat tal chu ka bulah an awm reng zel, ngaiah ka nei tawh, ka sem ve dug che angem?” a la ti tak deuh deuh a, “Awii…i may die, min han sem ve na teh, ka thi hmak a ni mai. Ka thi chiang viau ang, nikhaw hre lo a ka awm hmain ka thi ang, ka hlau che, haw tawh rawh. I tawn ang chiah hi midang pawn an tawng ve a, ka chhiar a, ka ngaithla tawh bawk. I bul hnaihah pawh ka awm duh tawh lo” ka tih mawlh mawlh lai chuan a nui chhuak ta hawk a, “Ka tihder che a nih kha rilru ţha nu, tu thusawi pawh i ring vek zel a, hetiang chuan khawvelah hian i damkhawchhuak zo lo ang” ka lu a tuai pah hian a ti a, “Khatiang fiamthuna chi a nia mi? Ka dawih zia i hre vek alawm” thinrim deuha ka tih chuan, “Ka tihpalh” a ti ve tak nain ka ngaidam chak hlawl lo.

“Kanchhi chu a thi tak tak em?” ka tih chuan, “Thi lo, a la dam. A nu leh pa ten pasal an neih tir dawn” a la ti zui a, “Awii…tu nge mahni bialnu hluite sawi hlum hmak ngai? A thla i la hran tir zui a nia, keimah hi min sawi hlum ve tawh em?” ka awm zawna inkawh va paha ka tih chuan, “Aih…nang chu ka hlau che, ka sawi hlum ngam lo che” nui chung hian a ti a, “Ka haw dawn” tih pahin ka tukhumah a dawm a, a lama min kuai hnaiin ka chalah a fawp zauh a, “Min fawh hian ngati nge a rik chuk zel a, thawm chhuah kher zel suh” zahzelah ka ti a, min fawp deuh thut bawk si, en pawh ka en ngam tawh lo.

A kal hma a inchhunga ka luh dawn chuan, “Kha, i chhipah kanchhi thla a ţhu” a ti hram a, awih tawh lo mah ila ka chhip chu ka tuai tho a, inchhunga ka luh ruala Nutein, “Eng nge in sawi? Se se thu di in inhlan em? Hmalam pan rawh ka tih kha aw” phur deuha a lo tih chuan, “Min sawi ţhaih” ka ti hmuk a, pindanah ka lut daih a, “Eng nge a sawi?” rawn luh ve paha a tih chuan ka lo hrilh vek a, “I zei lo e..a thusawi kha hlau la, amah kha kuah vel la a duh tihna a nih chu, a la duh chiang che alawm” a la ti ţalh a, “Ka kuah awm lo, hmanrua phei chu keng ila ka chhu thal tawp duh ang chu. Ka hlauh a ka hlauh zia chu a” tih pahin ka awm ka dawm vang vang a, ka thinphu pawh a la dik thei lo, kohhran upa rual zet tawhin min han sawi ţhaih chiam chu le.

Kanchhi lah chu ka vei lutuk aniang ka la hmu zui, vai nu hmelţha leh no surh mai hi saree kaih hnalh chungin a zai a, a lam ri chheng chheng a, hmuhnawm ti tawk a ka en laiin ka lam a lo hawi thut a, a hmelţhat tehreng nen a mit a sen ram a, “Mujhe tumse nafrat hai” thinrim tih hriat zeta seh chilh bap bap chung hian a ti a, kei lahin ka lo hrethiam si lo, “Eng maw i sawi?” ka ti he haw a, thinrim zetin a lam zawm a, “Mujhe tumse nafrat hai” a ti leh a, a lungawi lo viau aniang lam pahin a ban te chu rul tlengin a tleng kual tir a, a hmel chhe tial tial a, a sam te chu a pawt ţil hlawk hlawk a, “Mujhe tumse nafrat hai” pawr deuha a tih leh chuan, “Awii..hai tih lai bak kha ka hrethiam lo” ţap pur hian ka ti a, a ban chu ka lamah a rawn tleng phei zal zal a, chawngkawr ang maiin a ding ur ur a, a kuta min chuk a tum chiah chu ka harh zawk a, ka ţhu chhuak nghal a, Nutei chu a lo la muhil ve lo aniang, “Ngati nge i rum ţuah ţuah reng a?” phone keng ran chung hian a lo ti a, tui bottle ka ban a, ka in ţeuh a, ka hahdam deuh hnua ka mumang ka hrilh chuan, “I mumangah khan awm ve ila chu ka chhan ang che. I rum reng a, i sumo chuang chau emaw ka tia, mang ţha lo i nei tih chu hria ila ka kaitho tur che a nia” a ti a, ka mutchhuak a reh vek tawh a, u Zirbawnga ka chhuahchhal bawk a, mahse a mu tawh aniang message a en thei lo. Zingah thupha a rawn chawi a, vai phei chu Kristian lo an tam zawk si a, ka hlau riau mai a ni.

Nutei te pui tura kal hma ka ni bawk a kan buai char char a, Sangkhuman, “Fithangi chu an lo phur chho a nia aw, lo ngaihven rawh” a rawn ti a, thil dang sawina hun pawh a awm lo. Nutei te in lama hun kan hman zawh hnuah u Zirbawnga hoin damdawiin lam kan pan a, a nau chhiat chu thuhran, a lum na ve deuh a nih hmel. Fawnvela pawh a hlim ve tawh tehreng nen, an vanduai lutuk a an khawngaithlak tak tak a ni.

Damdawiin kawtah Fawnvela a lo ţhu ngui bur a, an be ţha vak lo aniang, “Lut duh suh u, a nu leh pa an awm. Naktukah ka haw vang vang ang” a ti nghut nghut a, u Zirbawngan, “Lungngai suh, in dam ang a, fa ţha deuh in la nei mai ang” a tih chuan, “Hmh..ka peih tawh lo e a, pakhat chaug dam ţhatin awmzia a nei lo emai” a ti leh hmak a, han hnem vak ngaihna pawh a awm lo.

“Sum an chhuah dawn tihna mi?” ka ti dek dek a, “An duh leh sum chauh ni loin ran te pawh chhuah se la, mi an tham lo emai, engamah hmain min dem ringawt a, chhuah theih zawng zawng chhuah vek rawh se” a kut vai pahin a ti hmarh hmarh mai.

“Eng nge an sawi a?” Nutein a tih chuan, “A unauten sachek a ei nasa a a taksa a chak loh phah aniang te an tia, mi an hmusit emai, inhrechiang lo a nupui neih ngawt hi a ţha lo a nih hi. Kan inhrechiang tial tial a, mi an hmusit tial tial a, Fithawngi ze zaw lah saw, i zu heh vang a ti sek ringawt a, ka zu heh vanga a tluk daih nachhan tur a awm lo” a ti a, a lung a awi lo khawp mai. “A nu ziap zuap lah saw, ka nu te mitmei pawh a veng lo, a duh duhin ro a rawn rel a, nupa kar buai ţhin hi mipa leh mipa chhungte vang chauh a ni ngai lo. Hmeichhe chhungte inrawlh peih lutuk pawh hian a ti buai thei, in enkawl ţha lo chuti khati a ti sek a, ka lim hrep nghal loh” a ti a, a lu kawlh mul chu tuaiin, “Hmeichhe dang hmu lo ka ni bik hleinem” a ti ţan tawh a, “Inţhen lam chu ngaihtuah miah suh” ti mah ila, “Naktukah ka haw san dawn, a mum mumin mum rawh se” a ti bur tawh a, hahthlak map map tak a ni.

Riahna tur dang awm hek lo, min thlah hnuah u Zirbawnga te in a riak turin an inphur haw a, “Rilru a nuam dawn chauh a boruak in nei reng mai” mu tur a kan insiam laia Nutein a tih chuan, “Ni chiah e…chaw ei a tui dawn chiah a rilru hahna tur a awm zel. Mut pawh ka chak lo, mumangah ramhuai ka hmu leh ang a” ka ti hlak hlak a, “U Zirbawnga pawh hi a buai ve zel a, ka khawngaih phah vek” ka tih leh chuan, “Kolasib a i awm lai hian sawi fel rawh u, ka duh pui che a nia aw, i duh loh kual vel chuan ka kawm tawh lo ang che” a ti kha kha a, “Chutianga fel nghal maithei pawh a ni lo, kanchhi lahin ka mumangah vai ţawng hlirin min bia a, Fawnvela lahin inţhen a inpeih at reng a, ka buai ve zel si, ka ning, what a very kham a ni ringawt. Naktuk phei chu u Zirbawnga dawr a aieng khai chhuah ngei ngei a ngai tawh” ka ti bawrh bawrh a, “I rilruah aieng hlir a awm a, i rilru pawh a na hman lo ang” a tih chuan, “Na e…Maski thih hnua ka vawikhat siam lehna chauh a nih hi. Ka ţah loh vangin ka na lo tihna a ni lo aw” ka ti a, u Zirbawnga nen reilote kan inbiak leh hnuah ka mu phak a, puitlinna in a ken tel hringnun in lum leh dan vel hi ka ngainat zawng a ni lo reng reng.

Zingkarah u Zirbawnga bawkin min lo call harh leh a, mang lamah ramhuai ka hmu tawh em lo nain, “Ka phal lo chung Fawnvela a haw lui” a rawn ti a, keipawh tum aia hmaa kan khaw lama haw a ngaih hmel. “Pawisa a nei em ni a?” ka tih chuan, “A nei aniang, ka thlah duh lo a, kein diakkawn a pan tho” a ti a, Nutei zi mar vel lah chuan ka hmaiah min hnek sawkin kei ka lo chhing sawk a, rilru buai lai phei chuan a na ngei mai. “Awii, i mutthilh lai lehzel chuan kut thawhin che lo teh” tih pahin ka nam sawk a, a harh chuang lo reng reng. “Engmaw i sawi?” u Zirbawngan a rawn tih chuan, “Nutei muhil hian min hnek sawk alawm, dah teh, Fawnvela chu kan be teh ang” ka ti a, keimah zawkin ka dah a, Fawnvela biak ka tum ngial nain phone a la duh tlat lo. Message ah, ‘Min dan tum suh, sumo ah ka chuang tawh’ a rawn ti a, Sangkhuma ka be ta ringawt a.

“Ka pa feh ka zui dawn, eng nge a?” nem vak lo hian a rawn ti a, Fawnvela chanchin ka sawi chuan, “An va han zakthei lo e…ţhen hmak rawh se” a ti daih a, “Fa pahnih an nei ţep tawh a, inţhen chi an ni hleinem, Fithangi pawn hrehawm a ti ve ang chu” ka tih chuan, “An nei ţep ringawt a, an nei chuang hleinem, ka nupui leh a chhungten a huhoin min han hmusit ve se chu e…an chak lo viau ang, an inchhungah chem ka vai fua fua ang chu” a tih laiin nu Lawmtein, “C. Sangkhum, khatin i chem vai fua fua mah ta che, i pa’n nizanah a tat hriam lehnghal a, kan bung rum mai tur a sin” a ti tan tan a, “I hria maw? Tunah pawh chem ka vai fua fua a nia, Fawnvela chu ka bia anga ka’n fuih pawrh ange, Fithangi hmelţhat loh tehreng nen an induh a, an chapo ve khanglang a, zaninah nula ka rimpui ang” tih leh phone dah a rual a, kan ţhian ho hi kan thlavang kan inhauhsak ţham zel nain tun ţum an chet dan chu a dik ka ti lo. In ngaizawng leh nupa hi a dan a dang a, nupa nih tawh chuan ho mai mai a inţhen chi a ni lo.

Tukţhuan eikhamah Kalvari ka be ve thung a, hmeichhia, pasalte pawimawhna hria tih takah, “Fithangi bia la, amah hmuh kher pawh a ngai lo, a rilru hmin tum rawh. Hmeichhia ve tho ka nia, Fithangi pawh ka khawngaih lutuk ringawt, a chhungte a hlauh rualin Fawnvela a hmangaih ve dawn tho bawk si a, nau a chhiat kher bawk nen, a rilru a mumal rih lo viau ang. A awmna hmun pawh zawt lo vin be tawp la, i biak dan a zirin nakinah aman a rawn be mai ang che. I buai loh chuan chanchin ngaichangin ti khan cham deuh rih mai rawh, Pathian hmaa intiam tawh te chuan inţhen chi a ni tawh hleinem, Pathian hmaa dawt sawi an ni dawn a sin” a rawn ti duah a, “Fawnvelan tu hmaah mah dawt a sawi hreh hleinem. Fithangi chhungten an tih dan kha a duh loh ber chu a ni” ka tih chuan, “An ti ang lo em alawm. Eng mi pawh nise an makpa a nia, an fapa ve tho a nia, khatianga tham lo deuh a an tih tur a ni lo, mahse Fithangi pawh ti hian nau vawihnih a chhiat tawh a, mak ka ti hial zawk, a chhungte phei chuan an ngaihtuah dawn lutuk” a rawn ti leh a, “I demin i dem lo kual vek mai a ni maw?” ka tih chuan, “Chutiang deuh chu, inţhen lo se ka duh ber a a ni mai. U Zirbawnga nen pawh nakinah Fithangi te inah leng ula” a rawn ti a, “U Zirbawnga hi u Rinchut but but-a angah ngai ziah suh. Fithangi te in a a len chuan a ţhu luah ang a, a ţawng hmuk hmuk ang a, a duh loh zawng an sawi leh na deuhin a khak let ang a, palai a u Zirbawnga kan hman chuan innei leh loin an inţhen hlen a ni mai” ka ti bawrh bawrh a, Fithangi be turin min ti leh a, nu Thang laipuii lahin, “Nute” a ti puak leh ţhuai ţhuai tawh a, a fel viau nain a thin a chhe lutuk a, an in a thlen a inthlahrunawm phah vek.

Chhunah lah u Zirbawngan min rawn hruai chhuak lui tlat a, a dawrah awmin chhuarah aieng ka rem a, biak hmasak ngai lo vin Fithangin min lo be nawlh mai. “Eng nge i an a?” ka ti nghal a, “Ka na ţhûm mai, ka la dam thei hi a mak zawk” a rawn tih chuan, “Hmeichhia chu kan tawrh a chhel alawm” ka lo ti a, “Keichu Fawnvela ka dem ber” a rawn ti ţan a, “Nau ka pai leh pawh khan, ‘a hmain kan chhiat tawh a, zu i in vanga Pathian min hremna aniang, tun ţum chu zu in tawh suh’ ka ti mawlh mawlh reng chung pawhin a in lui tlat a, mipa hi an pawimawh a, a fel duh si lo a, Pathianin min hrem a nih hi” a rawn ti a, “Inţhen in tum em ni?” ka tih chuan, “Ka nu leh ka unaute ţawngkam ho te a hua a, a ti tau a nih hi. A ţhat lohna lai a hre duh mang si lo a, a buaithlak emai. ‘Ka insiam ţha ang’ tih ve mai awm hi a thinrim zawkah a ţang zel a, innei chi pawh kan ni ve lo a nih hi. Pathianin nu leh pa ni tlakah min ngai lo aniang” a ti a, a ţap pur mai.

“Ţhenkhat lahin rui thle bawk bawk chung pawhin him pialin nau an nei tho a, ka hrethiam tawh bik lo” ka tih chuan, “Kan in ang chiah. Ngaihtuah chian chuan a fair lo a, ţhenkhatin an ti tla a, ţhenkhat fa awt ngawih ngawihin kan nei hlei thei lo a, Fawnvela hnena, ‘i insiamţhat theih nana Pathian remruat a nih hi’ ka tih leh, ‘nau chhiat khawp a tlu zawk chu nangmah i nih kha’ min tia, kan inhau nghal zel a, ka ţhen rih dawn, ka peih tawh lo reng reng” chauh hmel deuhin a rawn ti a, han sawi ve vak tur pawh ka hre tawh lo.

“In inbiak hunah ka be duh rih lo tih lo hrilh rawh. Ka thin a rim lutuk a pasal dang zawn nghal hmak te ka duh rum rum mai. Midang neih hnan hmak a nia ka chak ni” a tih chuan, “A inţhen chi tawh nang” ka lo ti a, “Ka damlo chau em em pawh min haw san hmak duh hi. Kan inneih hmaa a mizia kha a bo vek tawh, kan han inhrechiang chiah chu inneih hma nen a in ang lo nasa mai. A ruih lahin mut harsa khawpin a hnar a, pindan chhunga zu rim a nam huam pawhin, ‘far khat pawh ka in lo’ a ti zel a, ka rethei emai ka tuar peih tawh lo” a ti a, a rawn an hrep hnuah a dah ve chauh a, “Hemite nupa inhau peih leh buai peih hi ka kham” dawhkana phone dah paha ka tih chuan, “An inhmangaih lutuk a nih kha” u Zirbawngan a lo ti ve ngei a, Fithangi pawh ka hrethiam tho. Thingtlang mi nih chuan hman lutuk bik te hi a nuam lo a, hna kan thawk reng a, nau a chhiat tawh vangin tun ţum pawh khan duat ve viau mah se a che lo thei bik si lo a, sachek an buaipui reng a ngai bawk a, an vanduai ve hrim hrim a nih hi.

“Aieng kha i rem zawh chuan thil ei chhuak ang” tih paha u Zira ding hluai chu ka lo en a, “Ka duh tawh lo e a, a hranpa ve vein ei ang. I duh leh ei chhuak la, keiman dawrah ka ei ang, i ţawng peih sia, ka hak zel” ti mah ila min pawt lui tlat a, hnathawk an nei nual bawk a dawr khar a ngai hran lo. Ka duh lo chung Tashi delek ah min hruai a, kan thleng chu nuam ka ti leh tho sia, u Rinchuta leh Kalvari in ngaihzawn lai te ka hrechhuak rum rum mai.

“Tashi delek a chawl hi an innei zel aniang a” ka tih chuan, “Engtinmaw i tih?” a lo ti a, “Engmah, kanchhi thlahrang a nih chu a” ka ti chu a nui hawk a, “Kan thil sawi apiang mumangah i hmu nghal zel a” a lo ti a, “Chu reng, i ţawngkam fimkhur rawh ka ti ka tia lawm” ka tih chuan, “Ka chanchin sawi char char ila mumangah min hmu angem?” a tih veleh, “Ka peih leh peih loh a ni mai” ka lo ti a, “Nangchu, mumangah pawh min hau ang” tih pahin ţhutthleng hnung a ngheng a, a kut a kuangkuah hlun a, eitur an lo dah chiah chu ril a ţam nghal raih raih mai. Nghah rei a ngai si lo, a sa ţha tho bawk si, ngawi renga kan ei laiin Kalvari bawkin min lo call leh a, chanchin min rawn zawt a, Fithangi nen a kan inbiak dan ka sawi chuan u Rinchuta zawkin, “I harh leh lutuk hi entir i ngai a ni” a ti ri ka hria a, mak ka ti lo, an fapa hi a harh em a ni.

“Fawnvela chu rawn thleng rawh se, ka lo hau ang” a tih laiin u Rinchuta bawkin, “Khatin mi kawm mi kawm suh, thil pawimawh ka buaipui. Riri, Dawnfuha hi va mutpui teh, ka zo hman lo ang e” a ti dam leh thlup a, “I duh hun hun ah mu rawh u min ti leh tawp zel a, khua a lum si, kan mu reng peih bik hlenem” a ti hlak hlak a, “A harh uchuak emai, hetiang chuan dam pawh kan dam rei lo vang. Damdawi ţha an tih ho kha pe tawh rih suh, min kawm ngawng ngawng reng mai” a tih hnuah u Rinchuta vekin, “Ai ah aaaa….Riri, ka biangah te a seh hi, rawn la teh, kohhran thil ka buaipui” a ti a, Kalvari in, “A va buaithlak ţhin tak” a tih laiin, “Kan fapa harh lutuk hi chu lawm chawp pawh a ngai lo” u Rinchutan a lo ti a, an inhau deuh dawn ni a ka hriat vangin ka dah daih a, “Rinchuta te biak chuan a mimal angin a biak theih loh. An ţawng vek zel a, a mimal a i biak duh chuan mahnia an awm hun chang rawh” u Zirbawngan a lo ti a, “Dawnfuha hi a harh em alawm” ka tih chuan, “Niang chu, a rukin na deuhin sik la, a harh lo mai ang” a ti chu ka lo en hau a, “I sik ţhin a ni maw?” ka tih chuan, “Sik e..naupang dang ang a nih loh hi. A rukin na deuhin vawikhat sik ila a ţhu hle hle zel” a ti a, Dawnfuha piancham kan lawm ţuma u Zirbawnga bula a ninhlei ve miah loh chhan kha ka hre mai.

“Mahni unau fa te han sih tawp mai chu leh” ka tih chuan, “Ka sih chuan sih a ngai a ni mai” a ti a, a harh zia hrechiang viau mah ila keichuan engtinmah ka la ti ve lo. “Rinchuta takngial pawhin a sawisel chu a turu thawkhatah ngai rawh. Kum3 kum4 vel a nih hun a huphurhawm an tih sup sup hi. Zah hre rual ni tawh se kan duh ber” a lo ti leh a, a mutthilh lai a nih loh chuan Dawnfuha hi a awm hle hle ngai lo tak tak a, u Rinchuta hi a phun ziah nain Dawnfuha a ninhlei loh chuan a ngaihţha lo ber a ni ziah tho.

Dawrah bawk kan let leh a, aieng ka remchhuah loh ho ka chhiar lai chuan, “Sahar a pack tawp loin plastic chhin neiah dah la, hralh a kal zawk ang. Heti teh tawp chuan ei theih a ang emai, thei thur cheng 10 man a ang” a ti kher a, “Plastic chhin nei chu khawia mi nge ka hman ang?” ka tih chuan, “Lei tur a awm a, a chah theih bawk a” a lo ti a, “Pawisa ka neih hunah” ka tih chuan, “Ngaithla teh” tih pahin ka ţhutna chu a lamah a kuai her a, min pawt hnai zui bawk a, “Maski hriatreng nan leh a thlan vel cheimawi nan a i tih a ni nain ka lo pui ang che. Mitthi tawh thik rual ka ni tawh lo a, nupui nei rual ka ni tawh thung a” a tih chuan, “Min lei i tum a ni maw?” ka lo ti a, “Thil sawi zawh hma hma hian ngaihdan i lo siam a, ka mizia chu i hre thawkhat tawhah ka ngai a, engahmah ka ngaih loh thil ka um zui ngai lo, hun ka pe ngai lo va, ka hun ka lak hek tir ngai lo va, ka nghak ngai lo bawk” a tih chuan, “Lalngailova i nih chu” ka lo ti a, a nuih a za ve viau mai.

“Tih sual ka nei a, ka pawm thlap. Bul min ţanpui leh duh angem tih lai hi ka buaina zawk a ni. Maski theihnghilh turin ka ti dawn lo che a, eng thilah mah nawr lui lo chein ka thlawp zawk ang che. Eng angin nge min la ngaih ve tih hriat ka duh” ngenngawl tak hian a ti a, “Thil nihna leh kal phung hi ka hrethiam ve riai ruai tawh. Pawisa hi hlimna ber a nih loh dan te, thawmhnaw leh ka mamawh min leisak thur thur thei ai chuan hlim deuha ka nuih pui reng theih ka duh zawk” ka tih chuan, “Ka bulah hlim deuhin i nui thei lo tihna mi?” a tih chuan, “Theih chang te chu awm e…nangmah ngawr ngawr ka sawichhan hleinem, pawisa ka duh chhan chu ka chhungte enkawl let ve nan te a nia, mahse pawisa hi hlimna ber a ni lo ka tihna a nih chu” ka ti a, kan inmelh ralh a, a ngaihtuah ka hre vek, rin ang ngei ngeiin, “Pawisa chu kan duh ve ve” a ti ban charh a, “Ni reng e” ka tih veleh, “I thu zawk dawn nia, pawisa ah na na na chuan thu zawk rawh” a ti a, kan han nui dun leh rih ţhin, Nutei te in thleng min thlah leh thlap a, phone ah min be zui reng bawk.

Sangkhuma lahin min rawn phone ve sek a, “Fawnvelan Fithangi ka ko dawn lo, duh leh anmahni’n min rawn ko rawh se a ti” te a rawn tia, Kalvari a ri chung bawk a, u Zirbawnga biakna hun pawh ka nei tam thei lo. Nutei pawhin, “An mak e…u Zirbawnga nen ni leh ru ka tih vangin ka cham tir nge a, ‘ngah nge an rawn rik sek a? U Zirbawnga nge i ţhiante i duh?” a tih chuan awlsam deuhin, “Ka ţhian te” ka ti a, ka ţhiante aiin mipa ka la thlang zawk ngai lo reng reng.

“Mipa thlan hun te pawh a awm ve alawm” a ti tak nain, “Ka ţhiante an pawimawh zawk” ka ti tlat a, “An tan pasal neih loh i huam em?” a tih leh pawhin, “Huam e” ka ti zel a, inhau vak vak ţhin mah ila ka ţhiante aia hlu an awm lo.

Kan khua a ka haw hmain Nutein August xix ah min hruai a, “U Saimawi” a ti lauh a, Kalvari nen kan kal lai ka ngaihtuah a, kolasib ah ka kal nawn tawh kher lo thei a, min hruaina apiangah ka kal ve mawp mawp tawp mai a ni. “Kawr ka lo lam dawn” tih pahin tlangnel deuhin a en kual a, a dawr neitu chuan min hre tawh lo aniang Nutei nen inbiain a nui uar uar reng ringawt a, u Zirbawnga lahin min rawn phone sek a, “I haw ţep tawh sia, Nutei nen khan Dingdi florals ah lo kal rawh u” a ti a, a sawi ngai a sawi nawn chhen a, August xix aţanga kan chhuah hnuah, “My friend, dingdi florals ah” ka ti a, a lum bawk si, sawi pawh ka sawi zo peih lo.

Auto rickshaw in dingdi florals lam kan pan a kan thlen chuan pangpar bawr lianpui kengin u Zirbawnga a lo ding a, khawlum laia min duat chiam mai hi chu nuam ka ti hran lo. “Chei…kan insem tur a ni em?” Nutein a tih chuan, “I bialpa sek deuh kha lei tir ve rawh” tih pahin pangpar chu min pe a, dawr neitu lah a lo au duai duai a, ka piancham vel ni awm tak a ni. “Kawl reng ang che” a ti a, a tuk maia haw tur ka nih vangin Nutei te in lam pan leh vatin ka insiam zung zung a, zanah u Zirbawnga a lo kal bawk a, “Hnathawk kan nei tho a, ka rawn zin vat ang” tih paha ka kut a vawn chuan, “In khua aiin kan khua a nuam fe” ka ti a, pangpar vel kha ka ngaihtuah a, ka lai leh ţut tawh.

“A nawm zawk vangin ka lo zin ang” a ti a, ngawi rengin, chet pawh che lo vin kan ding reng ringawt a, u Rinchuta kha chu kolasib ah a zei sawt a, u Zirbawnga chu a ni lo reng reng. “Huiham, ka thlan” ka tih chuan, “In khuaah khan kan zakthei lo zawkin ka hria” a lo ti ve a, kan inhmuh loh rei vang pawh a ni maithei.

Ka haw dawn pawhin min thlah thlap a, sumo a ka chuang te chu, “Helmet khum rawh, i mutthlukna lamah i intauh na ang” a ti a, thei den min leisak ţeuh bawk a, “Sumo lehzel a helmet inkhum tir tum te chu a” ka ti a, Nutei lahin, “Chei…an in ngaihtuah dun vel maw” a lo ti a, hlim deuhin kan invai liam a, min duat emai kan khuaa a lo kal hunah keipawn ka lo duat ve tawh ang, min rawn rim pawhin lapaw chini ah hlir ka lo ţhuttir ang, a insawi ang tak tak a min duh takzet a nih chuan hun ţha pek leh pawh pawi ka ti lo, mahse ka rilru hi a mumal lo a, tunhma a boruak alh chuai ang kha zawn nghal char char ka ngai a nih hi, a la ţha ve zel mai ang, pen khatin hma kan sawn der tawh alawm.

CONT…

This Post Has 3 Comments

  1. Ms Dawngkimi Sailo

    Khamawmloh thin hle mai

  2. Anonymous

    Awm khat bawk a,chap 31 chu ngaihnawm khawp mai

  3. Lalawmpuii Hrahsel

    A va han ngaihnawm Chiang ve aw..

Leave a Reply