You are currently viewing KEIMAH, THINGTLANG NULA S2-33

KEIMAH, THINGTLANG NULA S2-33

Spread the love

“Ka ke ka ulh te chuan min dim ve ta che, titau chunga min puak vang a nih kha min tluk pui, hei ai hian kawng hi chhuk phei se la chu kan lum hlum lo ang tih tu nge sawi thei?” thinrim deuh a ka tih chuan, “Keiman” a lo ti a, “Hei aia kawng chhukah ka paw paih teuh lo mai che” a ti leh kher a, “Kan uih hum hum chu, pu Sawia te bawlhhlawh phei chu a bawlhhlawh thei bik ropui si, awii ka in ten” tih pahin ka in hnim a, ka uih ţeng vek tawh.

“Ka taksa hi na lo lai a awm lo reng reng, ka ke phei chu na tawh tak a ni. I phone phawrh la ka pheikhawk zawng ve thung rawh, ka thlauh daih alawm” ka ti a, ka na lutuk chu ka ţhu leh hnawk a, Sangkhuma pawhin min hnial zui lo vin ka pheikhawk chu a zawng ve mai a, a fimkhur tawh khawp mai.

“Remkalam” thutak deuha tih pahin a che chu a tawp chawt a, phone êng chuan ka mut tawpna lai kha a chhun uluk bik a, “Eng nge? Ka ke nat zia hi, zawng vat la chhuk ang” tih pahin leiah ka ţhu rem a, “Nichina i lo awmna lai hi a lung nuai nuai mai. Chawhmeh lung nge ka hre lo, hei an vak nuai nuai mai ka rap lutuk” a tih rual chuan ka za chhuak nghal vek.

“I kawrchhungah khan an lut angem le helai velah hian i mu nuai sia” a tih leh chiah chu, “Ka duh thei lo” tih pahin nula pui si leiah ka mu leh tawp a, ka’n tal tak tak mai a nih kha, “An thi em rawn en teh, awii ka rap lutuk, rawn kal vat ta che” ka ti tuar tuar a, ka thil hlauh ber pawl a ni bawk a balh leh mawi lo ka sawi thei lo, na pawh ka hre lo, ka hlau a, ka za a ni tawp mai.

A phone chu a thim zawk a, a êng leh pup a, nui vak vak chunga, “Thla ka la” a tih takah chuan ka tal kual vel chu ka tawp chat a, ngati nge maw tih der theih a ka awm ziah ni, thinrim ngaihna pawh ka hre lo. Pangang leh a kaihhnawih hrim hrim ka hlau a, miin pu Sawia te bawlhhlawh a lung ziah an ti bawk a, Sangkhuma tawlh thluin min lum pui kher bawk si, min la tih der zui a, tun ţumah kher kher hi chuan â ka inti lo a, dem pawh ka indem lo. Hlauh nei zawng zawngah pangang hlau hi kan tal na ber ţhin miau a ni.

“Hmh…i duh leh nui rawh, keichu i fiamthu khan ka ţah a ti chhuak, ka thin a rim ţhaks, ka chau si” ka ti hlak hlak a, a inthiam lo deuh aniang a nui tawp hmak a, “Ka tihpalh, i phun peih em a ka fiam che a nih kha” tih pahin ka tho tur chu min lo pui a, “In pianthar theih nan theihtawp ka chhuah a, zanin pawh ka inkhawmpui hram hram che a, gospel camping aţangin i chhuak chiah a, a hmeichhia zawk leia tal nawk nawk khawpin min tihder nghal a, ka pilh hrup ang” ka ti a, ka lungawi loh zia hriain ka pheikhawk a zawn chhunzawm leh a, “Ka hmu zo lo, kan tlukna lai velah khan a ni maithei, nakinah ka pu hmeh ên nen ka zawng leh mai ang, chhuk phawt ang” a ti a, fimkhur deuhin min hruai thla a, min biak pawn ka chhang lo, ka be peih lo reng reng. Ka samin ka nghawng a zar ringawt te chuan ka tuai nghal vut zel a, a lung a ti kher a, ka uang pawh ti se ka hlau laklawh vek tawh.

“Engtin nge kan tluk theih le? Kan la tawlh thui em em zui a, pu Sawia hi naktukah ţha deuha hrilh a ngai a ni” a tih chuan, “Ka ke chu na lo se ka tawlh ve lo ang, lum pawh ka lum lo ang” ka ti a, nghet deuhin ka ipte hrui ka vuan a, ka pi Binladari dawr chhunga kan lut chiah chu, “In va uih ve” a lo ti heu mai. Ngawi renga kan ţhu chu min en vang vangin, “In va bal ve” a ti leh a, thil awmdan ka sawi chuan, “Hei vang hi alawm in ţhianhoah nangmah chiahin kawppui i la neih loh Sangkhum” a ti a, ngei hmel deuhin a en pah a, “I mawl dawn pawn a hun leh hmun hre rawh” tih pahin Sangkhuma inrin loh laiin a hmaiah a kuhva uih ken laiin a nawr nawk a, Sangkhuma chu lo phu zawkin a hnar a tuai vut a, engmah a sawi ngam lo thung. A rukin ka lo nui a, nawr leh mah se ka chhan lo ang.

“Hmeichhia zawk i tlukpui te chuan thupha chawi sawk sawk ta che. Pu Sawia bawlhhlawh paih tur lah hi kan in kalkawngah kher a kal a, khawvar ruala tihfai ngei ngei a ngai a nih chu, keini ang phei chu tlu ila kan insawh na viau ang. Sangkhuma mawl leh lutuk hi chu, hetiang chuan tu nge duh ang che?” a ti hlaih hlaih a, “An la awm ve mai ang” tiin a kun ngul a, “Inchhungah hriak chu va la rawh” tih leh kuhva chehnaa tin a rual a, Sangkhuma pawh tho nghal vatin dawr aţangin a tlan chhuak nghal a, “Nangpawh finfiah phawt lo vin leiah tal ngawt mah ta che” a tih chuan, “Ka hnung a za nghal vek alawm” ka ti a, pangang ka hlauh zia hriain min hauh zawm duh bik lo.

“Kha hriat chu” a tih hnuah, “Remkalami pheikhawk ka zawng dawn” ti lehin Sangkhuma chu a kal lehnghal a, “Fiamthu hun leh hmun pawh hre lo, a thluak hi a letling zawngin a vir a” ka pi Binladari chuan a la ti hlak hlak a, chutah ţhutthleng hniamah rawn ţhu thlain, “Khawimaw i ke chu” a ti leh a, a malchunga ka dah rualin pawnchhiain a hru fai thuak thuak a, chiang deuha enin a khawih vel a, “A na dawn a nia, nangpawh hi naupanlai aţang tawhin tluk khut khut i ching leh lutuk a” a ti a, hriak a hnawih a, a zut chiah chu a na ngei mai, min hauh hlauin ka au ngam bawk si lo, invuan bet tlat chungin ka hmui ka pet ţang ţang a, “Naktukah Kalvari zut tir rawh” a tih hnu chuan a khawih dim deuh a, a rei hnuah phei chuan chul dem dem pahin, “Pasal nei ve tawh ta che Remmawi” a ti a, “Pasal ka neih daihin engtin nge in awm ang?” fiamthu a ka tih chuan, “Kan awm thei mai ang. Enteh e, Kalvari putea hian sawi ngai lo vin thla tin i pu damdawi min lo thawn ziah a, pawisa a phut tawh ngai lo” hlim hmel tak hian a ti a, “Hmeichhia chu pasal nei tur in nia, kan khua angah phei chuan senior nih in hlawh hma si, keimahni vanga pasal neih in hreh chuan in khawtlai zel dawn a nia, min ngaihtuah lo la, khawi hmunah pawh awm ula tunlaiah chuan ral aţangin a in puih char char theih tawh” a ti dap dap a, “Ka cho sual palh ang tih ka hlau” ka tih chuan, “Hringnun aia cho sual awlsam a awm lo. Mihringte hian a ngai rengin kan awm dawn emaw tih chang kan nei ţhin a, chutiang chuan ngaihtuah lo tur. Mi chunga thleng ang hi kan chungah a la thleng ve thei tih hriattur a ni a, kan hmel a mawi reng lo a, hun ţha kan nei reng ngai lo. Hringnun hi i cho sual a nih vaih chuan inchhir reng rengin hun i hmang mai ang, cho lo la, hringnun inher danglam dan hi uluk deuhin zir chiang rawh” min ti a, “Kan kum a upa tawh a, vanduaina in tawk a nih loh chuan nangni aia hmaah kan kal ngei ngei dawn. Pasal nei tura duan in nih chuan rilru nuam takin nei mai rawh u. Keipawhin pasal ka nei a, tar kan nih thlengin i pu nen kan awmdun hi. Min ngaihtuah zel a nih chuan khua a tlai mai dawn a nia” ti lehin ka ke chu chhuatah dim deuhin a nghat a, “Pathian ruat dan a nia, kan ngaihtuahawm bik nang, Pathianin min enkawl mai dawn alawm” tih pahin a chhuak a, a kut a sil aniang kut huh hluamin a lo lut leh a, “Hringnun hi a ho a, i cho sual phei chuan ho deuhin i ral mai ang” a tih chuan kei takngial pawhin thui deuh ka ngaihtuah ve phah alawm le.

“Zira hi neih tum tlat rawh, ani angin a duh ve che hi i vannei a nia aw, in chanchin hria apiangin vannei an ti che a nia” a tih chuan, “Awii..tu tu nge i lo hrilh leh tawh a?” ka ti hluai a, “Ka hrilh awzawng lo, i nu nena kan ti ti laiin ţhenawmnu a awm ve a, tunah chuan kawmchhakte pawhin an hre tawh. Chumai bakah a lo zin hian a lo leng zuk zuk tih an hre fur alawm, ţhenawmte tukverh hi mit angah ngai rawh” a ti duah a, a ruka an sawi vanga min chhaih lo mai mai an nih dawn chu, lar hat se chu min chhaih sup sup tawh ang.

“Midang awm lai em em chuan ka nu nen pawh insum ve tur che u alawm” ka tih chuan, “Ti ti kal lai midang lo luh vanga chawlh daih a mawi hleinem” a ti a, keichu langsar deuha ngaihzawng nei chi ka ni lo, tupawn min ngam tlakin a nihna bak bakin min chhaih ziah a, zah der reng a ngai.

Haw a hun dawnah chiah Sangkhuma a lo lut a, ka pheikhawk chu polythene ah khaiin min kai tho a, inkai dat dat mah ila kan in thlen hma zawng kan inhau tho a, inchhung ka lut chiah chu ka nu’n a siliper in min vawm lo chauh a ni. “Tu inkhawm bang mah an uih hum hum ngai lo, mi ngaihah nula i ni tawh lehnghal, hetiang te chuan tuman mi pangngai hmuhin an hmu ve thei lo ang che” a ti hlak hlak a, ka ke a nat miau avangin inbualna tur tui min lumsak tho a, “Ţhu dun suh u, pakhat chauh pawh tih tawh nak laiin in ţhut dun phei chuan in rim a na lutuk” a ti leh khar khar a, a ke na lo zawk Sangkhuma a ţhu hrang a, ka pa nen reilote an ti ti hnuah min haw san a, “Sangkhuma lah hi inhmuh apiangin eizawnna mumal a duh thu a sawi ve mual mual zel a” ti a ka inbual dawn laia ka pa thusawi chu ka hre vuai vuai a, ka bulah pawh, “Ka upa tial tial a, eizawnna mumal ka nei lo hi hrehawm ka ti tial tial” a ti ve ngei tawh a, naupanlai aţangin puitlingin thu ţha min hrilh a, puitlin hnuah a dik zia kan hre chauh a, a tam zawk chu kan tlai duai zel ţhin reng a ni.

Ka mut hmain ka nu’n, “I ke kha tuam rawh” tih pahin ke tuamna min pe a, a vung tawh a, a na zek lehnghal. Ka tuam fel thlap hnuah mut hmunah phone ka khawih ve hman chauh a, ka inkhawm dawn vangin ri lo in ka dah ve ngei a, kan tlu sual zui leh bawi si, u Zirbawngan min lo biak a tum nasa ngei mai. Kalvari hnena, ‘Zingah lo kal rawh, ka ke ka ulh’ ti a message ka thawn te te hnuah u Zirbawnga chu ka call a, a tihdan aţang hian kan inngaizawng leh tawh aniang, mi zawng zawngin min duhpui a, ka rilru la pe tak tak thei lo mah ila pawi ka ti tawh lem lo.

“Phone i va har ve” a rawn ti nghal a, chanchin te ka hrilh hnuah, “Sangkhuma hi a” a ti deuh hmuk a, chutah dam deuh zawka, “A la na em?” a tih chuan, “Na e…ka nu ke tuamna hluiin ka tuam hlauh zawk a, a nat dan hi a kal raih raih mai a ni” ka tih chuan, “Thawhţan a lo kal ka tum a, ke tuamna thar ka lo keng ang” a rawn ti leh thut tawh a, thawhţan a ni leh vat dawn a, na neih lai berkher chuan ka hmu chak zawk zawk lo a sin mawle.

“Nutei i hmu ngai em?” ka ti ta daih a, “Hmu e…vawiinah a lo kal. ‘Intih pa ka tum lutuk a ka rilru a pa dawn ţanin ka hria’ a tia, ‘Bialpa tur ka lo zawnpui ang che’ ka tih kha” a ti a, eng emaw hi a khawih ri ruk ruk reng a, “Eng nge i tih a?” ka tih chuan, “I thil tur ka pack” a ti then a, “Eng ka thil tur?” ka tih lahin, “Ka sawiin i hmu hunah i phu zawk thei nang” a ti bawk si, “Mi ke nat lai laia lo intih phut tum tlat te chu a” lungawi lo deuha ka tih chuan, “I kein i phu dawn hleinem. Taka Remsial, eng nge i duh ber?” a ti ţha leh a, “Awww…ka thil tur i pack mek tawh a ni lo’m ni?” ka lo ti a, “Pack mek e…hriat ve hrim hrim atan eng nge i duh ber?” a tih leh chuan, “Duh ber ka nei lo aniang sawi chat tur ka hre lo, min zawt ho si, kei lah ka na ţhum a, ka mu dawn” ka tih veleh, “Nang chu ni ila u Zirbawnga ka ti ang” a tih chuan, “I bawng tih i inhre tawh a ni maw?” ka ti a, a duh lo lutuk chu ka nuihpui vak vak a, kan inbiak zawh hnua tunhma a amah ka duh tak tak laia a thla ka lak ruk sak ho ka en a, ke na chung chungin ka bawkkhup thawk mai.

Kan pahnih pawhin thla kan lo la dun nasa a, ka sam tawi lai kha a ni nghe nghe a, ka tum hmuk a, u Zirbawnga pawh tawite chauhin a nui a, ka sam chu a lai taka inţhen phawkin a thei thei ka bengah a inzep a, ka meng kul bawk si, u Zirbawnga lah chu, “Ka peih lo e” a tih zawh hnua ka bula rawn ding ve mai mai a ang. Ka ti lian vak a, ka enna lam pawh en lo vin hmun dang a en daih a, keiin rem leh rem lo vin a jacket ipteah ka zen a, “Kan va inngeih loh hmel ve mawle” ka tih hnuah thlalak chu amah thawn vein, ‘Heng hunlai hian min la duh lo a ni maw?’ ka ti a, a rei ve tawhin khang hunlai khan nitin thil thar kan tawng bawk si a, hriat vek sen pawh a ni tawh lo.

‘Ka hrawk kha en rawh, a bak ka sawi peih lo’ a rawn tih hnuah, ‘Duh ru e’ a rawn ti leh a, ‘I hmelchhiat zia hi’ ti lehin nui lem tam deuh min lo thawn a, lawm lo hle mah ila a hrawk chu ka en chiang a, ‘Engmah ka hmu lo’ ka tih chuan, ‘Fawnvela te nen park ah eng emaw kan in ruih ni kha, ka hrawk bawk i khalh nasat kha’ a rawn ti chu ka ip ve chawi mai. ‘U Zir, i hrawk bawk hi van theng reng aiin a mawi zawk, hrawk bawk galaxy i tih kha’ a ti leh a, ka in ve a nih chuan engmah ka hre tawh lo tawp ang, ka ţhiante lahin ka zah hlauin min hrilh hauh lo ang a, sual kan tum ve ţhin lai kha a ni tih chu ka hre mai.

‘I hriat zawng zawng hi sawi ţhin suh’ ka ti leh hnuhnawh a, ‘A dang min lo thawn leh teh’ a tih chuan la nei ţeuh mah ila ka phal tawh lo a, ‘I sam tawi lai hian kan hlim zawk, i sam kha tan leh rawh’ a ti thul, ‘I sam a sei a i rilru a lian sawt’ a tih te chuan chhan enah pawh ka en tawh lo a, thlalak hlui en chuan lung a leng ve veng veng thei, kan tunhma nun, kan ţhianho nun ţhin dan zawng zawngte kha ka ngai a, u Rinchuta hret hrut hian Kalvari hi la nei thawt thawt lo se ţha tur, a chut ber a che rang ber a, kei lah nulat laiin ka duh ber a ka ngaihin min thih san daih a, a thihna a rei tawh nen rilru hi a dam thei chuang lo. U Zirbawnga nen a kan thlalak bawk ka en leh a, a hrawk bawk galaxy te chu ka en chiang bik a, lamkhuang mu chu dawlh se a hrawk bawk a phir dawn a nih hi ka tih rilruk laiin thlalak min lo thawn ve a, Aizawl a ka awmlai a mi a ni thung.

‘Mipa hmelţha dang hmu leh ta la i rilru a danglam leh angem?’ a rawn tih chuan, ‘Ka nei duh che ti ta ila engtin nge i tih ang?’ ka lo ti daih a, ‘Palai tura hual sa ka nei a, ka kaitho nghal a ni mai’ a rawn ti a, ‘Mipa hmelţha dang vang mai mai a danglam tur chu ni ila a danglamna a rei tawh ang. Sap leh khawchhak lam hmelţha ho ai pawn ka dah sang zawk che aw, mipa hmelţha satliah vanga danglam ka ni lo, nangpawh i dik vek bik loh kha’ ka tih chuan, ‘Umm..sawi tawh lo ang’ a rawn ti a, Aizawla kan thlalak chu ka sam tawi laia kan thlalak ai ngawt chuan a nalh deuh zawk a, nei ta ila kanchhi hi a ngaihtuah daih angem tih te rilruah a awm a, ka pi Binladarin nei turin min ti reng a, mipa hi nupui an neih hnu hian an danglam ve ţhin an ti bawk si, hmeichhe tana rilru hahna tur han tam bik zia hi aw.

Zingah nau paw chungin Kalvari a rawn lang hlawl a, “Ka zut thiam vak lo ka tih ziah kha” ti chungin Dawnfuha a dah thla a, thlenga vaihlo leh a lehkha chu chhuatah a darh nghal chuai mai. “Nang hi chu aw…i harh dan em em hi, khawlum lai phei chuan zin vang vang zel la a ţha ang” tih pahin ka nu’n a chhar nghal mawlh mawlh a, “A taksa te kha khawih rawh, Pathian zarah chaw ei tui loh te a nei ve ngai lo a, a sa a ţha lutuk, a sak tlat mai a ni” Kalvari in a tih chuan Dawnfuha chu enin, “Naupangtein i lo sek ange aw, ka ten che a ni mai” ka ti a, ka nu erawh chuan a taksa chu a chul thuak a, “Bawnghnute leh chhang ka pe ang che aw, i theih chhung i ei dawn nia” a ti sauh sauh a, Kalvari in ka ke na lai a khawih chiah chu a na lutuk a, kan in ngamtlak bawk si, a samah ka ţham nghal chawt a, “Sangkhuma pawh hi fimkhur ve ţhin tur alawm, nang lah a remna lai apiangah i tlu a, ka hne lutuk che u” a ti hlak hlak a, a nat apiangin a samah ka ţham a, thle bar chungin ka ke chu min khawih sak tho a, “Hetiang a nih te chuan zanah pawh i inkhawm thei tawh nang. U Zirbawnga lo kal a tum a, a tam thei ang ber inkhawm la ka ti a sin le” a ti hlak hlak a, tunhma aţang tawhin Kalvari hi chu kei aiin a thin a chhe zawk daih.

“Khatiang te a i tih, i pi Binladari te chuan Zir Thianghlima a tia sin, a la fel vak chuang lo em ni?” ka nu’n a tih chuan kan ţhiandunin kan in en hau a, “A dawheh emai” Kalvari in a ti sap a, “Engmaw i sawi?” ka nu’n a tih chuan, “Fel e…fel tehreng mai, Kolasib ho chuan Zir Thianghlima an ti vek alawm” a ti zung zung a, “I rilruin ka uang a ti rawh” zawi tein ka lo ti ve a, mi tam tak u Zirbawnga hrechiang inti an awm a, ka pi Binladari lo chuan Zir Thianghlima an ti ngai lo. Ka nu’n a duh loh a hlauh lutukna lamah a nihna bak bakin a sawi tih hriat reng, tar si hi a rilru a la chak a nia aw.

Kalvari in min kaiin bathlarah kan ţhu chhuak a, “Naktuk Pathianni a ni lehnghal a, Sangkhuma hi ka ngei ngawt mai” a ti leh ţhin a, kan hau ngam lo ve ve thung a, “Enteh my friend, ka pi Binladari leh u Zirbawnga hian eng inzawmna nge an neih ang le? Englai pawha puitu zawk pawh min fak ngai lo a nia, kan Kolasib tlangval lah Zir Thianghlima a ti der tawh bawk sia” ka tih chuan, “U Zirbawnga hian a lo vau a ni lo maw?” a ti leh tawh a, “Zir Thianghlima tih tur em chu ni lo mah se tar chak tawh lo vau khur khur chi a ni lo, a nihna bak bakin i hmu sual a, min duhpui ngai lo reng reng” ka tih chuan a nui vak a, u Zirbawngan thil pek min pek hunah chiah ka phu dawn emaw ka tih laiin, “Ka uang a nih kha, ka pasal a chut em a, u Zirbawnga hian u Rinchuta aiin ka pi a duat thiam zawk, a tlawh peih a, a be sawm peih a, tunah pawh, ‘ka lo kal ang a, Remsiali nen vawkin kan thawm ţhat sak ang che u’ a tia lawm” a ti chu ka phu zawk mai.

“Eng nga?” ka ti vak a, nur nang chunga min hlat pahin, “Ka pi sawi dan a nih chu” a tih chuan, “Ngati nge min sawi tel ve ringawt a? Duh ber te vawkin sak tir tum te chu a, ka ke ka ti na tih a hre reng si” ka tih zet hnua, “Ehe…nizana ka uih chung chunga ka pi Binladarin ka ke min lo hmeh sak kha u Zirbawnga nena vawkin sa tura min duh vang em mawni le?” ka tih chuan, “Aniang, Sangkhuma leh Fawnvela in sawm ve dawn nia” a ti awlsam then a, “Awii…what a very surprise thing, thingtlang nula mah ni ila bialpa nen em a vawkin sak chu vawikhatmah ka la ngaihtuah ngai lo, u Zirbawnga hmangaihna hi a hraw mah mah a ni, hmangaihna hriamhrei chhawm diktak a nih hi” ka ti hlak hlak a, “Mahse midang nei tawh suh, a hmangaih zia che ka hre tawh a, a cham chhung leka vawkin sak chu a pawi hleinem, keipawh u Rinchuta ar in tur ka sak ve tho kha, kei phei chu belah ka mawng a tang a, bel chawpin huan mawngah ka lum daih kha hrereng rawh. Hna in han zo ang a, u Zirbawnga chuan a duat thiam dawn lutuk che, a malis bel hlung mai ang che” a ti kher a, “U Rinchuta pawh ama tawkah a zei ve tho alawm” ka tih chuan, “Zei nang, min hnaih a, min en ve ren rawn a, thu thlum deuh a sawi beiseiin ka en let ve a, a ngawih vung vung hnuah, ‘luliannu’ min ti daih a nia, ka tawrh chhel zia hi ngaihtuah rawh, pasal ţha deuh ka neih phah hi. U Zirbawnga hi nei la chu e…kei aiin i nuam sa zawk dawn tih ka sawi ngam sak, Kolasib a kan haw changa chaw kan ei te hian u Rinchuta aiin u Zirbawngan min ngaihsak zawk ţhin, u Rinchuta chuan a ei tawp a, ka ban phak loh ho min suah rawh ka tihin min suah a, u Zirbawnga te chu e…chaw ei belh leh rawh a tih loh leh chawhmeh ho kha suak rawh a ti reng a, chawei hma lahin i ril a ţam em a tia, chaw ei khamah lah i puar em a tia, zingah te hian ka thawh hma ve chuan tho hma lo turin min ti ziah. Kan han sawisel ţhin tak naa Kolasib a kan haw chuan u Zirbawnga ka thlamuanpui ber zel” a ti bawrh bawrh a, a banah ka vuan a, amah ka en rual chuan min lo en ve a, “My friend, pasal neih ka chak tawh e” ka ti chu a thaw hawk mai.

“Nei mah la a pawi lo” a tih chuan, “A hma khan khatiang zawng khan min sawi phurpui tawh ta che, i sawichhe char char a, bialnu a nei i ti reng a, ka rilru hi vanlaizawlah i thlawh kual tir rei lutuk alawm” ka lo ti a, “Ka ngaihtuah vang che a nih kha. Tak takin Remkalam, Maski hi engtikahmah i nghak chhuak dawn lo, dawi hmanga a thlarau i ko chhuak a i nei a nih ngawt loh chuan khawvela i awm chhung chuan i nei thei dawn lo. Chutiang chuan han ti chiah la chu khua aţangin an hnawtchhuak vang vang bawk ang che. Sawi lo mahla i ngai tih ka hre reng a, mahse i upa ve zel a, a damlaiin ti khawp khan i ngaihtuah a, tunah chuan nangmah inngaihtuah ve tawh rawh. Ka nulat lai lahin min ngaihtuah em em a, mahni inngaihtuah a hun tawh. Keimahni ho vanga hun ţha i hloh a, mahnia i tei rek rek reng chuan hrehawm kan ti dawn teh mai a nia, nangmah inngaihtuah phawt la, u Zirbawngan a hmangaih zia che kan nupa pawhin kan hre tawh a, nei la, i duhzawng tih i duh pawhin a dang dawn lo che a, han nei fel phawt la, chumi hnuah chuan min la ngaihtuah leh hlawm dawn nia” a ti malh malh a, “Tunlai chu Sangkhuma hi a nun a hlim lo riau a” ka tih chuan, “Aw, nangmah in ngaihtuah phawt la, Sangkhuma chu kan la ngaihven leh zawk dawn nia, hna pawh nei ila hmeichhia chu kan pasalte hian min ti zahawm lehzual a, pasal neih ngei ngei a ngai ti bur lo mah ila nang chu hmangaihtu i nei a, i chan nawn leh ka hlau” a ti a, a dik ve tho mai. “Aaa…lo kal phawt se la a awmdan a zirin kan sawi leh dawn nia” ka tih chuan a bu nghat nghat a, “Midang hi chu min en kan vek rih rawh” a ti leh hram a, palai te lo kal ve rawih mai se chu ka ute pahnihin min nuihzat viau ang.

Ka ke vangin inah ka tawm char char a, thawhţan zingah u Zirbawngan min lo biain, “In khua ka rawn thleng har lo ang, ka rawn tlawh nghal ang che, ka ngai tawh che” a rawn ti a, boruak ţha lo a awm tawh lo ang chu tih nak laiin tukţhuan eikham hnu lawka feh tura ka pa chhuak chu darkar chanve hnu velah a rawn let leh a, “Theihnghilh i nei em ni?” ka nu’n a tih chuan, “Nei nang, setanic Nicky a bo a, zawn tur an ti a nih chu, nizan pawh a haw lo a, a ţhiante inah a riak a nih an ring a, a ţhiante ina a kal tak lohah chuan a nu leh pa ngaih a ţha ta lo a, a mi pangngai zân si lo a, khawtlang puihna an ngen a nih hmel, an rawn au vat ang” a ti a, insiam ve mai tuma pindan lama ka bai phei auh auh chu ka nu’n, “I pa a kal dawn tho chuan kal ve lo mai rawh, i tlaw si, i intih nat belh ang” a ti a, ţhalai zawng zawng deuhthaw an thawkchhuak leh dawn a, hna ţul an ţhulh phah ngei bawk ang a, “Ka inthlahrung e” ka tih chuan, “Nangmah kha buaipui ngaia i awm chuan a inthlahrunawm lehzual dawn, i pa leh Sangkhuma ten lo sawi mai rawh se” a ti deuh tlat a, bet lo deuhin ka ţhu leh a, setanic Nicky chu ka ngaihtuah ru hle bawk. Ruihhlo a sim duh si lo, a thluak hi a buai tial tial emaw tih mai tur a nia, mahse a dawih em a, lo tlanbo ta pawh nise a kal hlat ngam ka ring lo.

Sangkhuma leh Fawnvela te pawhin min rawn sawm tak nain ka zui ve lo a, chanchin ngaichanga ka nu nen kan ţhut dun ran laiin u Lalhuma leh pu Taipuia te an lo lut hlawl a, gospel camping aţangin an chhuak chiah a, an rui leh chhâr tawh.

“Mi bo in zawng ve dawn lo em ni?” ka nu’n a tih chuan u Lalhuma chhuatah a tiang a paih a, “In bo ve palh ang nangni chu haw rawh u min ti. Mi bo an awm a, zawn ve kan tum apiangin min haw tir bik ziah” u Lalhuman a tih laiin pu Taipuian, “Zawng ve suh u an ti chuang hleinem, in tinah lut ula, a lo awm reng em en kual rawh u, a lo awm hlauh chuan min hrilh vat dawn a nia an ti a nih kha, ramhnuaia zawn ai chuan khawchhunga zawn chu a nuam daih zawk ang chu” a lo ti ve thung a, “A nih leh lo kal rawh, thlanmualah zawng ang” u Lalhuman a tih chuan, “Ani hi thingkung velah a lo inkhai ţut ange” pu Taipuian a lo ti a, u Lalhuman a melh rulh a, a ke pen pawh a tawp chawt a, “Chutiang a ti ngam lo, zawng mai mai rawh u” ka nu’n a tih takah chuan muangchangin an chhuak a, keitak pawh hian ka rap riau mai a ni.

Nilengin chanchin kan hre lo va, tlaiah eirel paha ka nu vaihlo zial sa ka ţawn a, inţhut hnaih viau mah ila kan inbe khat khawp mai. Khua a thim dawn ruai tihah ka ning deuh chuan ka sawi ţhaih a, “Chutiang hlau rual kan ni lo, ani phei chu a rawn leng khat si, eng emaw awm se chu i pa a lo haw daih tawh ang” a ti pang pang nain tih ţhaih nan a ka en ngai ka en reng takah chuan, “Engati nge i en ngai i en reng a? Ţawn mai mai rawh a hmangmawhthlak” a ti a, ka en ngai ka la en reng tho a. A hlauh theih nan tukverh lam en reng chungin ka nui vur vur phawt a, a rei hnuah a riin ka nui a, ka mit pawh ka khap duh lo.

“Lalremmawi, eng nge i hriat a?” a tih leh pawhin a thusawi chu hre lo ang maiin ka awm a, setanic Nicky-a chanchin a hlauhawm zawngin ka sawipui nasa bawk si, tunah a bo lehnghal a, “Ti thuai thuai rawh” a tih leh lai te chuan ka nui lui kur kur a, ka melh ngai reng ka la melh bawk a, “Awii..ka ning lutuk tawh” tih paha ka sam a rawn ţham chiah chu, “In awm em?” tih riin a zui a, kawngka zawnah kan ţhu bawk si, u Zirbawnga rawn lut tawh chu, “Exer in lak zawhah ka lo kal leh mai ang” tih leh chhuah a rual a, “Min thlah rawh” ka tih veleh ka nu pawhin rang deuhin min thlah a, a hamhaih ve a nih hmel.

“In awm em a tih te chuan min thlah nghal mai awm se” ka sam tuai mawlh mawlh paha ka tih chuan, “A rawn luh hnuah alawm luh min dil. Athuhrimah, nangpawh khatiang thil ţul lo tih tih a ngai hleinem, vawikhat ka khak che khan duhtawk ta che” vin deuhin a lo ti hlak hlak a, nula uai tawh ka nuin min kek lai kher min rawn hmu fuh a, ka zak lutuk chu ka lum pup pup mai a ni.

Darkar chanve hnu velah message in, ‘I nu’n a vaw zo tawh che em?’ a rawn ti a, a va han ţhing tak, zak viau mah ila, ‘Min vaw lo, ka tih ţhaih a, a hlauin ka samah a ţham a nih kha’ ka ti a, ka insawithiam zung zung a, ka pa’n ka nu rawn bia a setanic Nicky an hmuh tawh thu a rawn hrilh hnuah u Zirbawnga pawhin, ‘A tlai laklawh tawh emai, zanah ka lo kal ang’ a rawn ti a, ka pa pawh rawn haw thuaiin u Lalhuma leh pu Taipuia ten khawchhunga an hmuh thu a rawn sawi a, nilengin an lo zawng dun ve ngat ngat a nih hmel. “Nimin tlaiah a pa nen an inhau a, a rilru na a tawm bo a ni awm e. An hmuh chuan, ‘ka haw dawn chiah’ a lo ti ve a, a nu leh pate hian an ngaihtuah si, kan zilh a, kan rawn haw san a nih kha” a ti charh charh a, a thi em lo chu ka rilru a nuam huai mai, a nu leh pate erawh an inthlahrung leh khawp ang.

Zana u Zirbawnga lo kal chu a bawr khawp mai, hna ka la thawh peih loh avangin ţhutthleng seiah ka ţhu thluang duai a, inthlahrun hmel deuhin ka ke lamah a rawn ţhu ve a, zanin chu ka nu zawkin, “I va bawr ve, i pi Binladarin chawhmeh a lo pe che em ni?” a ti ve mial a, “Ka lo kensak zawk che u a” a tih hnuah lai deuhin, “Heh” a ti a, min rawn en rualin ka hawi sawn a, zanin kher kher chu boruak a alh aniang en pawh ka lo en ţha ngam lo, amah lah chu a fai sar lehnghal a, hmuh a nuamin ka en loh pawhin hmelţha ka ti.

“Keimahni maw?” ka nu’n a tih chuan, “Umm” tih ringawtin a chhang a, a ruka ka tlawh zauh rualin a che zawk a, “Aw..a ngai hleinem, chawhmeh chu helamah a tam a sin, eng nge min lo hawn a?” ka nu’n a lo ti leh luam a, a be ţha tawh lutuk hi an bulah awm reng mah ila ka awih lo, ka chhuahchhal rum rum ţep a ni.

“Chawhmeh a ni lo” tih pahin a thil khai lai pakhat zawk chu ka nu a pe a, ka lo thlir ve reng a, ka nu’n a phawrh chhuak chiah chu kan phu deuh zawk a, kan nufain kan au duai lo chauh a ni. “Kawr min lo hawn tihna maw Zir Thianghlim?” ka nu’n ring leng lawnga a tih chuan ka hre lo der a, a aw ah lah a phur tih a hriat si, “Awii…kekawr a la chhawm zui” a awki ngai chiahin a ti leh a, phone ka bih daih a, ka zak lutuk chu ka ke hnuai a za mer mer mai.

“Mawza chhah deuh pahnih hi i pu Ditea feh mawza tur em ni?” phur deuh hian a ti leh a, pakhat lahin, “Aw ni e” a ti lawi rût a, i pu te a ti tawh vel a, ka pa’n, “Rem i va hre ve, lawm viau mah ila a thlawna lak chu a zahthlak ang a” a lo ti ve bawk a, “Aaa…zak duh suh” u Zirbawngan a tih chuan ka hnar ka hmet phui a, ka nu leh pate chuan an hnar der ve ţang ţang a, “Thil pek chu lak tur, thilpek an lak loh chuan a pe tu tan a lawmawm loh” u Zirbawngan a tih chuan ka chik ka hak lek lek a ni. Tumah ka en duh tawh lo, an vai chuan ka zahpui vek.

“I va ti lawmawm ve, a man zatve tal kan pe ang che kan tih lahin i duh mang si lo, thilthlawnpek han dawn tawp mai chu a zahthlak rum rum alawm le, kan mamawh i hre ropui si” ka nu’n a ti lang lang a, ka pa nen hian kan rilru a in ang a, thilthlawnpek hi kan duh vak lo a, ka nu erawh u Bawiha nen an inang chiah a, a ruk chuan nuam a ti viau ang. Ka pa zawk chu a inthlahrun ka ring. Keipawh miin thil min pek chuan ba neiah ka inngai tlat zel a, ka pa ka chhun ve na lai tak a ni.

“Ka’n ha chhin ange” a tih hnuah ka nu chu pindanah a lut a, ka pa erawh chuan phone a bia a, ka nu rawn chhuakin, “A lian deuh nain khawlum lai chuan hak a nuam zawk ang, kekawrah hian ipte a awm tel bawk a, keini ang zuk leh hmuam ti mi tan a remchang lutuk” a tih chuan ka pa pawhin mawi a tih thu lo sawiin u Zira hnenah setanic Nicky chungchang a sawi thuak thuak a, “Buaina a siam reng mai an ti a, kan han leng chho ve ang e” tiin lawmthu a hrilh nawn leh hnuah a chhuak a, “He mihring mak zia hi chu, chawmhlawm, buaipui ngai zawk a ni chung hian a nu te hi a cho ur ur reng mai a ni. Aizawlah home ah awm rawh se an tih lahin an ngaihtuah bawk si, fa sual nei hi an va han khawngaihthlak tak” a tih hlak hlak hnuah nem deuh zawkin, “Ka inthlak anga thingpui ka’n lum ange” a ti a, nu mawl mang ve tak tih takah a rilru la hmin lo se chu thilpek pawh hi a la duh kher lo maithei a, ka nu a hmin hneh em em danah hian ka pi Binladari zei zia ka hrechiang tial tial mai.

Pindana ka nu luh rualin u Zirbawngan ka ke na lai a rawn khawih a, “In xray tir em?” tih pahin a ipte aţangin a tuamna tur a phawrh a, ka malchungah a rawn dah a, “Chutiangin kan ti ve ngai lo, Kalvari leh ka pi Binladarin an zut a, a dam mai ang” ka tih hnuah, “Remsiali nen vawkin kan thawm ţha ang i ti a ni maw?” ka ti leh a, en pawh min en lo hian a nui ringawt a, “Huiham” ka tih rualin, “In khua hi a nuam, ka ngaina, lo zin tawh chuan cham reng ka chak ţhin” a lo ti zung zung a, chutah ka lam lo hawiin tawitein a nui a, “I va hmelţha ve” a tih chuan, “Hmh” tih pahin ka lai lutuk chu ka hawi sawn a, “I thil tur zingah hian i ke a hnawih tur a awm tel ang” a ti a, a ipte khai lai chu ka malchungah a rawn dah a, keipawhin nuam ka ti ve tial tial mai. A inpe zo sawt lutuk leh min duhna a lanchhuahtir ngam hi mak ka ti zawk a, kan boruak a hahthlakin a buai niai nuai tehreng nen, mipa tam tak chu nise hetiang hian an ti thei lo ang.

Ka nu pawh rawn chhuak leh tawhin thingpui a lum a, “I nu te an dam maw? In khua a lum ve em?” a ti luam a, a phone ri reng chu u Zirbawngan banin keimah min rawn pe a, ka pi Binladari a lo ni. “Ka pi Binladarin a lo phone che a nih hi” ka tih chuan, “Lo be rawh” a ti ve mai a, “Hello” ka ti chu, “I nu a awm lo em ni?” a rawn ti nghal a, “Awm e..thingpui a lum a” ka tih chuan, “Lo phei rawh se, thil hmuh tir tur ka nei” a ti a, a dah nghal daih a, u Zirbawnga ka melh a, phone a lo en daih a, ka pi Binladari pawh a hawnsak ve a ni ngei ngei ang. Ka nu hnena ka sawi chuan, “Thingpui in zawhah minute15 vel lek ka va phei zuai ang” phur tak hian a ti a, a sawipui vel chak tawh a ni ngei ang, ka pa chu awm se a kal ngam dawn loh nen, hmeichhia hi chuan upat lamah pawh thil thar hi kan lo lawm a ni.

Thingpui in zawha ka nu chhuah rual chuan, “I lo hawnsak vek tihna mi?” ka ti nghal a, “I nu leh ka pi a ni mai, Kalvari nen. I pa kha hawn loh ka tum zet nain pathum chiah in awm sia, ka huphurh ve zia aw” a ti a, “I inseng hnem lo mi?” ka tih chuan, “A to lo a, khawlum a hak tura an ţhui chawp a nia” a ti leh mai a, “I nu khan min la haw deuh emaw ka tih vanga lo hawn ka nia” a ti tak nain ka rilru hah a hlauh vang a nih te ka ring, u Bawiha kal nana pawisa a ngaih hnem zia Nutei bula ka sawi kha Nutein a lo hrilh chhawng a, kan khawsak hi a harsa ngai hauh lo nain tun ţum chu ka nu te ka tuakpui ve ţang ţang a, hria angin a awm duh hauh lo thung. Kum thum vel kan intuak chuan kan intuak ngah ve thei mai ang, u Bawiha pawh hmanhmawh lo turin ka hrilh vek tawh a, sawrkar hnathawh loh a, pawisa khawl sa a tam loh chuan thil tih zung zung theih a ni lo, keipawh Aizawl a thil ka zir dawnin ka intuak rei emai.

“Ka nute chu a ngai tawh lo” ka tih chuan, “Kan inneih hnuah bak ka pe tawh lo ang” a ti fiamthu a, “Tak taka, ka pi chu ka hawn ziah a, sawi tawh ang khan pathum chiah in awm a, nangmah chiah hawn bik reng nuam ka ti lo a, an awm ve reng zel sia” a tih hnuah, “Hetah hian i ke damdawi a awm” tih pahin ka malchunga ipte chu a rawn kawk leh a, en ka tum laiin amah zawkin a rawn hai a, damdawi chu la chhuakin, “Ka lo tuam sak ang che” a ti a, ka ke chu la kangin a malchungah a dah a, “A la vung a ni maw?” ka ke tuamna phelh paha a tih chuan, “A vung rei leh ngawt ang, a na chu a zia tawh” ka ti a, damdawi a hnawih laiin keiin ipte chhung a mi chu ka lo en a, a sawi ang tak tak khan a vaiin a tuam phui vek.

Ka ke a a damdawi hnawih chuan min hip vang vangin a nuam phian a, a kut a dam bawk si, Kalvari leh ka pi khawih ai pawhin nuam ka ti zawk. “A la na em?” damdawi chul rual chunga a tih chuan, “Na e…ka la rap ţha ngam reng reng lo” ka ti a, “A zia lo hle mai” a ti ringawt a, a thil min lo hawn intuamna chu hawngin ka enchhin a, kawr ni awm tak ka khai kan rual chuan bawm pakhat, rit ve deuh mai hi ka malchungah a rawn tla a, u Zirbawnga a lo nui hawk nain min en duh lo reng reng.

Khawlum laia hak nuam deuh tur kawrfual a lo ni a, ka nu khan a kawr kha a thawl viau a, kei chuan ka ha tawk em ang chu. Bawm chu hawng lehin ka sana awh deuh ţhin, ka intuak anga ka la lei ve ang ka tih ţhin ang kha ka hmuh chuan ka phu deuh zawk tak tak a, i phu zawk ang a ti kha a dik khawp mai.

“Awii…what a very surprise thing” ka ti hluai a, ka kut ngeia sana ka khawih tawh hnuah pawh ka la awih lo, hmeichhia hi chu kan awh zawng pe na deuh deuh chi kan tam si a, keipawhin u Zirbawnga min pek ang sana hi chu ka awh rukna a rei tawh, rangkachak rawng niin a hmai a dum thung a, a man pawh a toin ka lei ngam ngai lo kha a nia, sana chu min chhuhsakin, “Pakhat a la awm kha” a tih chuan ka en leh a, chapal a ni dawn tih hre mah ila phui tawkin a tuam tho a, a bel thuah ţup a, hawng tur pawn beih fe a ngai reng a ni.

Chapal kaih ka hmuh rualin, “Engtin nge ka bun tawk i hriat?” ka ti nghal a, ka bun chhin lo va, ka tawk ka ring vak lo bawk a, “I pheikhawk size ka hria” a ti a, ka ke na chu min tuam sak zui mawlh mawlh a, “Awii…naktukah lawmthu sawi nan i lu ka meh sak ang che” ka tih chuan a nuih a za viau mai.

“Ka duh lo e a” tih pahin ka kut a rawn la a, sana chu min siamrem sakin min bun tir zui nghal a, “I va inhmeh ve” a ti a, ka chhip a tuai zauh hnuah ka kutah bawk a vuan leh a, “Bur i chah ţeuh bawk sia, rilru i ti nuam lo” ka tih chuan, “Nuam rawh se, ka duat che lawm” a lo ti a, ka vir muai muaiin ka hria, thli chu thaw se ka thlawk chhuak daih thei ang.

Kawrfual leh chapal chu ka khung ţha sawk sawk a, ipte chu min laksakin a bula a dah hnuah ka kutah bawk a vuan leh a, min en ran chunga, “Ka duat che i ti em?” a tih te chuan ka zak. “I lo hawn hnem lutuk a a nuam lo. Nuam lo ka ti tak tak a nia aw, pawisa pawh nei la nuam ka ti chuang lo” ka ti a, a lo nui hawk a, “Sangkhuma tih der ang aw” a ti daih a, a sawi duh loh zawng hi chu a sawi pui luih theih loh reng reng.

Ka kut ka lak sawn hnuah a tih tur hre lo chuan ka ke na lai bawk a khawih leh a, a nute lo haw hma a ti aniang chu ka ke dawm reng chung chuan rawn kun hnaiin ka hmuiah a fawp a, nidang angin a ti keuh tawh lo lehnghal a, ţhutthleng pakhata ţhu kan ni bawk a min hnaih zual zel a, ka ke na lai a nam nat deuh ruala sin zeta, “Ummmmmmmm” ka tih chuan a inla hrang vat a, a kî a sâng si, phawk zeta min en chunga, “Eng nge cooker si ri ang deuh kha?” a tih chuan, “Ka ke” ka lo ti a, a hrethiam mai lo zui a, ka ke a en rualin min thlah ve chauh a, a hamhaih buai vel chu a hmel zawng zawngin naupang ang mai a ni.

“Min rawn hnaih pahin ka ke i nem vak alawm” ka tih leh chuan, “A rem lo em a” a tih hnuah, “Ka tihpalh sorry” a ti leh hnuhnawh a, “Inneih chungchang sawi hmasak i tum tawh si lo a, ka sawi hmasa mai ang. Tun ang reng i nih a, i nih zel dawn chuan neih che ka tum anghk. Rilru siamfel ka tum vat ang” thutak deuha ka tih chuan min rawn en vut a, “Tak tak?” ri mang lo hian a ti a, ka thusawi chu a awih lo aniang, “Ni e…keichu thil ka peh hel kual ve vak ngai hleinem” ka tih lai te chuan ngunthluk fahranin min lo en a, “Puitlingin min hrilh bawk a, ka tana ţha tur an sawi reng a” ka tih leh chuan min rawn hnaih leh ruak a, ka ke a na tih hrechhuakin, “A na em?” tih pahin a tawlh let leh sawk sawk a, “Dim i ngaih lai tak, kan ţhut dun ţhat theih loh lai takin thu lawmawm min hrilh a” a ti chu ka nui duai a, “Awii…zanin chu boruak ka hak leh ţep zel u Zir, ka thi ţhaks” ka ti fiamthu a, kan awmdan hi screenshot theih se ka ti. Maski a thih hnua tihtakzeta ka hlim lehna hmasaber ka ti ngam sak.

“Min neih i tum ve chiah a i thih nghal ţhaks in?” a tih chuan ka nui uar uar a, zanin chu a thil min leisak te, ka nute thil tur a leisak vang te pawhin ka hau lo, hman aţanga a tih chak tawh a ti thei chiah a, rilru hlim deuhin awm ve rawh se. “Nuam i ti emai” ka tih chuan, “A lawm nan khawmaw i dul ka lo ham” a ti a, a mitmeng a nung sar reng mai.

Ka nu rawn let leh hnuah a haw a, kan inbe zui char char thung a, ‘Dawrah mi ka chhawr tho a, tun ţum chu ka cham rei dawn, ka hawsan phal rih lo che’ a rawn ti vel a, Kalvari pawhin, ‘My friend, u Zirbawngan thil ţha deuh min lo hawn’ a rawn ti bawk a, Kalvari tel lo a keimah chiahin thil thar ka neih chuan u Zirbawngan nuam a ti teuh lo, unau ang maiah min ngai a, chubakah a uikawm hran lo. Amah en tawp hi chuan a nelawm viau lo a, a rilru a ţhain mi ţanpui a peih viau thung.

Zingah Sangkhuma lo kalin ka thil thar chu ka lo hmuh a, “Fawnvela nen engmah kan dawng ve lo, a pawi lo, mipa chu a ngai ve lo” a ti a, lungawi lo hmel pawh a pu lo.

“Niminah in vak kual nasa sia, zanah i hlau em? I dawih ropui si” fiamthu a ka tih chuan, “Ve che…ka dawih tawh lo, thlahrang film ka en te hian ka hnuk a ulh daih zel” a ti a, kan han nui dun leh ţhin, u Zirbawngan min lo phone in Sangkhuma awm thu ka sawi chuan, “Nakinah kan tih der dawn nia, eng nge i an?” a rawn ti a, “A ngai reng” ka tih chuan, “Ka nei chak tawh che” a ti nghal ringawt a, “Min han hne leh si vaih teh aw, min hnawhchhuah pawh tum la ka chhuak dawn miah lo a nia. Min neih i chak awt awt bawk a damchhungin ka uap dawn che” ka tih chuan, “Chutiang mai mai turin nupui atan ka sawm lo che” a ti a, u Rinchutan, “U Zirbawng, Dawnfuha i sik ru em ni a? A mawngtama vual tut saw rannung sehna nge i hnathawh?” a rawn tih takah chuan ka dah daih a, a bula Dawnfuha a ninhlei ngam loh nan a sik ru leh tawh a ni ngei ngei ang.

“Eng nge i thusawi kha a awmzia?” Sangkhuman a lo ti ve bawk a, “Pasal ka nei thut maithei” ka tih chuan, “Ve lutuk a, ka ngen tlat dawn che” duhdah zet hian a ti a, “Ka pu nen thil kan sawi dun a, ka pi Binladari dawrah ka kal lawk ang a ka rawn hrilh leh ang che” tih leh thawh a rual a, a kal dawnah pawh, “Hey, pasal neih a ngai lo aw” min kawk va chung hian thupe aw zetin a la ti a, mipa mah nise amah chiah a nih chuan a thla a muang ngai lo reng reng.

U Zirbawnga lah chu chhunah a rawn leng hreh ve deuh a, lo len a chak bawk si, ‘Chhunah chuan Kolasib a awm ang tho ka ni’ te a rawn tia, ‘I ke pawh na se hetah chaw lo ei rawh u’ a ti bawk a, nuih liam vel mai mai chungin aieng ka la chhuak a, bur leh bur a bel mawi tur kha ka la bawk a, Maski hming ka hmuh chuan ka inthiam lo deuh a, mahse ka bulah a awm tawh lo a, hmalam ka pan loh chuan Kalvari sawi ang khan keiman ka tuar mai ang. Ka nu vaihlo zial lai chu ka en a, u Zirbawnga neih a phal tawh bawk si, ka hlim leh thut tawh lehnghal a, ka nu awm hle hle lai chu ka piai vak chak ut ut a, u Zirbawnga nena kan inkar buaithlak tak te kha ka bo ve hret hret a, ka dam deuh tawh tak tak niin ka inhria.

CONT…

KEIMAH, THINGTLANG NULA S2-33

“Ka ke ka ulh te chuan min dim ve ta che, titau chunga min puak vang a nih kha min tluk pui, hei ai hian kawng hi chhuk phei se la chu kan lum hlum lo ang tih tu nge sawi thei?” thinrim deuh a ka tih chuan, “Keiman” a lo ti a, “Hei aia kawng chhukah ka paw paih teuh lo mai che” a ti leh kher a, “Kan uih hum hum chu, pu Sawia te bawlhhlawh phei chu a bawlhhlawh thei bik ropui si, awii ka in ten” tih pahin ka in hnim a, ka uih ţeng vek tawh.

“Ka taksa hi na lo lai a awm lo reng reng, ka ke phei chu na tawh tak a ni. I phone phawrh la ka pheikhawk zawng ve thung rawh, ka thlauh daih alawm” ka ti a, ka na lutuk chu ka ţhu leh hnawk a, Sangkhuma pawhin min hnial zui lo vin ka pheikhawk chu a zawng ve mai a, a fimkhur tawh khawp mai.

“Remkalam” thutak deuha tih pahin a che chu a tawp chawt a, phone êng chuan ka mut tawpna lai kha a chhun uluk bik a, “Eng nge? Ka ke nat zia hi, zawng vat la chhuk ang” tih pahin leiah ka ţhu rem a, “Nichina i lo awmna lai hi a lung nuai nuai mai. Chawhmeh lung nge ka hre lo, hei an vak nuai nuai mai ka rap lutuk” a tih rual chuan ka za chhuak nghal vek.

“I kawrchhungah khan an lut angem le helai velah hian i mu nuai sia” a tih leh chiah chu, “Ka duh thei lo” tih pahin nula pui si leiah ka mu leh tawp a, ka’n tal tak tak mai a nih kha, “An thi em rawn en teh, awii ka rap lutuk, rawn kal vat ta che” ka ti tuar tuar a, ka thil hlauh ber pawl a ni bawk a balh leh mawi lo ka sawi thei lo, na pawh ka hre lo, ka hlau a, ka za a ni tawp mai.

A phone chu a thim zawk a, a êng leh pup a, nui vak vak chunga, “Thla ka la” a tih takah chuan ka tal kual vel chu ka tawp chat a, ngati nge maw tih der theih a ka awm ziah ni, thinrim ngaihna pawh ka hre lo. Pangang leh a kaihhnawih hrim hrim ka hlau a, miin pu Sawia te bawlhhlawh a lung ziah an ti bawk a, Sangkhuma tawlh thluin min lum pui kher bawk si, min la tih der zui a, tun ţumah kher kher hi chuan â ka inti lo a, dem pawh ka indem lo. Hlauh nei zawng zawngah pangang hlau hi kan tal na ber ţhin miau a ni.

“Hmh…i duh leh nui rawh, keichu i fiamthu khan ka ţah a ti chhuak, ka thin a rim ţhaks, ka chau si” ka ti hlak hlak a, a inthiam lo deuh aniang a nui tawp hmak a, “Ka tihpalh, i phun peih em a ka fiam che a nih kha” tih pahin ka tho tur chu min lo pui a, “In pianthar theih nan theihtawp ka chhuah a, zanin pawh ka inkhawmpui hram hram che a, gospel camping aţangin i chhuak chiah a, a hmeichhia zawk leia tal nawk nawk khawpin min tihder nghal a, ka pilh hrup ang” ka ti a, ka lungawi loh zia hriain ka pheikhawk a zawn chhunzawm leh a, “Ka hmu zo lo, kan tlukna lai velah khan a ni maithei, nakinah ka pu hmeh ên nen ka zawng leh mai ang, chhuk phawt ang” a ti a, fimkhur deuhin min hruai thla a, min biak pawn ka chhang lo, ka be peih lo reng reng. Ka samin ka nghawng a zar ringawt te chuan ka tuai nghal vut zel a, a lung a ti kher a, ka uang pawh ti se ka hlau laklawh vek tawh.

“Engtin nge kan tluk theih le? Kan la tawlh thui em em zui a, pu Sawia hi naktukah ţha deuha hrilh a ngai a ni” a tih chuan, “Ka ke chu na lo se ka tawlh ve lo ang, lum pawh ka lum lo ang” ka ti a, nghet deuhin ka ipte hrui ka vuan a, ka pi Binladari dawr chhunga kan lut chiah chu, “In va uih ve” a lo ti heu mai. Ngawi renga kan ţhu chu min en vang vangin, “In va bal ve” a ti leh a, thil awmdan ka sawi chuan, “Hei vang hi alawm in ţhianhoah nangmah chiahin kawppui i la neih loh Sangkhum” a ti a, ngei hmel deuhin a en pah a, “I mawl dawn pawn a hun leh hmun hre rawh” tih pahin Sangkhuma inrin loh laiin a hmaiah a kuhva uih ken laiin a nawr nawk a, Sangkhuma chu lo phu zawkin a hnar a tuai vut a, engmah a sawi ngam lo thung. A rukin ka lo nui a, nawr leh mah se ka chhan lo ang.

“Hmeichhia zawk i tlukpui te chuan thupha chawi sawk sawk ta che. Pu Sawia bawlhhlawh paih tur lah hi kan in kalkawngah kher a kal a, khawvar ruala tihfai ngei ngei a ngai a nih chu, keini ang phei chu tlu ila kan insawh na viau ang. Sangkhuma mawl leh lutuk hi chu, hetiang chuan tu nge duh ang che?” a ti hlaih hlaih a, “An la awm ve mai ang” tiin a kun ngul a, “Inchhungah hriak chu va la rawh” tih leh kuhva chehnaa tin a rual a, Sangkhuma pawh tho nghal vatin dawr aţangin a tlan chhuak nghal a, “Nangpawh finfiah phawt lo vin leiah tal ngawt mah ta che” a tih chuan, “Ka hnung a za nghal vek alawm” ka ti a, pangang ka hlauh zia hriain min hauh zawm duh bik lo.

“Kha hriat chu” a tih hnuah, “Remkalami pheikhawk ka zawng dawn” ti lehin Sangkhuma chu a kal lehnghal a, “Fiamthu hun leh hmun pawh hre lo, a thluak hi a letling zawngin a vir a” ka pi Binladari chuan a la ti hlak hlak a, chutah ţhutthleng hniamah rawn ţhu thlain, “Khawimaw i ke chu” a ti leh a, a malchunga ka dah rualin pawnchhiain a hru fai thuak thuak a, chiang deuha enin a khawih vel a, “A na dawn a nia, nangpawh hi naupanlai aţang tawhin tluk khut khut i ching leh lutuk a” a ti a, hriak a hnawih a, a zut chiah chu a na ngei mai, min hauh hlauin ka au ngam bawk si lo, invuan bet tlat chungin ka hmui ka pet ţang ţang a, “Naktukah Kalvari zut tir rawh” a tih hnu chuan a khawih dim deuh a, a rei hnuah phei chuan chul dem dem pahin, “Pasal nei ve tawh ta che Remmawi” a ti a, “Pasal ka neih daihin engtin nge in awm ang?” fiamthu a ka tih chuan, “Kan awm thei mai ang. Enteh e, Kalvari putea hian sawi ngai lo vin thla tin i pu damdawi min lo thawn ziah a, pawisa a phut tawh ngai lo” hlim hmel tak hian a ti a, “Hmeichhia chu pasal nei tur in nia, kan khua angah phei chuan senior nih in hlawh hma si, keimahni vanga pasal neih in hreh chuan in khawtlai zel dawn a nia, min ngaihtuah lo la, khawi hmunah pawh awm ula tunlaiah chuan ral aţangin a in puih char char theih tawh” a ti dap dap a, “Ka cho sual palh ang tih ka hlau” ka tih chuan, “Hringnun aia cho sual awlsam a awm lo. Mihringte hian a ngai rengin kan awm dawn emaw tih chang kan nei ţhin a, chutiang chuan ngaihtuah lo tur. Mi chunga thleng ang hi kan chungah a la thleng ve thei tih hriattur a ni a, kan hmel a mawi reng lo a, hun ţha kan nei reng ngai lo. Hringnun hi i cho sual a nih vaih chuan inchhir reng rengin hun i hmang mai ang, cho lo la, hringnun inher danglam dan hi uluk deuhin zir chiang rawh” min ti a, “Kan kum a upa tawh a, vanduaina in tawk a nih loh chuan nangni aia hmaah kan kal ngei ngei dawn. Pasal nei tura duan in nih chuan rilru nuam takin nei mai rawh u. Keipawhin pasal ka nei a, tar kan nih thlengin i pu nen kan awmdun hi. Min ngaihtuah zel a nih chuan khua a tlai mai dawn a nia” ti lehin ka ke chu chhuatah dim deuhin a nghat a, “Pathian ruat dan a nia, kan ngaihtuahawm bik nang, Pathianin min enkawl mai dawn alawm” tih pahin a chhuak a, a kut a sil aniang kut huh hluamin a lo lut leh a, “Hringnun hi a ho a, i cho sual phei chuan ho deuhin i ral mai ang” a tih chuan kei takngial pawhin thui deuh ka ngaihtuah ve phah alawm le.

“Zira hi neih tum tlat rawh, ani angin a duh ve che hi i vannei a nia aw, in chanchin hria apiangin vannei an ti che a nia” a tih chuan, “Awii..tu tu nge i lo hrilh leh tawh a?” ka ti hluai a, “Ka hrilh awzawng lo, i nu nena kan ti ti laiin ţhenawmnu a awm ve a, tunah chuan kawmchhakte pawhin an hre tawh. Chumai bakah a lo zin hian a lo leng zuk zuk tih an hre fur alawm, ţhenawmte tukverh hi mit angah ngai rawh” a ti duah a, a ruka an sawi vanga min chhaih lo mai mai an nih dawn chu, lar hat se chu min chhaih sup sup tawh ang.

“Midang awm lai em em chuan ka nu nen pawh insum ve tur che u alawm” ka tih chuan, “Ti ti kal lai midang lo luh vanga chawlh daih a mawi hleinem” a ti a, keichu langsar deuha ngaihzawng nei chi ka ni lo, tupawn min ngam tlakin a nihna bak bakin min chhaih ziah a, zah der reng a ngai.

Haw a hun dawnah chiah Sangkhuma a lo lut a, ka pheikhawk chu polythene ah khaiin min kai tho a, inkai dat dat mah ila kan in thlen hma zawng kan inhau tho a, inchhung ka lut chiah chu ka nu’n a siliper in min vawm lo chauh a ni. “Tu inkhawm bang mah an uih hum hum ngai lo, mi ngaihah nula i ni tawh lehnghal, hetiang te chuan tuman mi pangngai hmuhin an hmu ve thei lo ang che” a ti hlak hlak a, ka ke a nat miau avangin inbualna tur tui min lumsak tho a, “Ţhu dun suh u, pakhat chauh pawh tih tawh nak laiin in ţhut dun phei chuan in rim a na lutuk” a ti leh khar khar a, a ke na lo zawk Sangkhuma a ţhu hrang a, ka pa nen reilote an ti ti hnuah min haw san a, “Sangkhuma lah hi inhmuh apiangin eizawnna mumal a duh thu a sawi ve mual mual zel a” ti a ka inbual dawn laia ka pa thusawi chu ka hre vuai vuai a, ka bulah pawh, “Ka upa tial tial a, eizawnna mumal ka nei lo hi hrehawm ka ti tial tial” a ti ve ngei tawh a, naupanlai aţangin puitlingin thu ţha min hrilh a, puitlin hnuah a dik zia kan hre chauh a, a tam zawk chu kan tlai duai zel ţhin reng a ni.

Ka mut hmain ka nu’n, “I ke kha tuam rawh” tih pahin ke tuamna min pe a, a vung tawh a, a na zek lehnghal. Ka tuam fel thlap hnuah mut hmunah phone ka khawih ve hman chauh a, ka inkhawm dawn vangin ri lo in ka dah ve ngei a, kan tlu sual zui leh bawi si, u Zirbawngan min lo biak a tum nasa ngei mai. Kalvari hnena, ‘Zingah lo kal rawh, ka ke ka ulh’ ti a message ka thawn te te hnuah u Zirbawnga chu ka call a, a tihdan aţang hian kan inngaizawng leh tawh aniang, mi zawng zawngin min duhpui a, ka rilru la pe tak tak thei lo mah ila pawi ka ti tawh lem lo.

“Phone i va har ve” a rawn ti nghal a, chanchin te ka hrilh hnuah, “Sangkhuma hi a” a ti deuh hmuk a, chutah dam deuh zawka, “A la na em?” a tih chuan, “Na e…ka nu ke tuamna hluiin ka tuam hlauh zawk a, a nat dan hi a kal raih raih mai a ni” ka tih chuan, “Thawhţan a lo kal ka tum a, ke tuamna thar ka lo keng ang” a rawn ti leh thut tawh a, thawhţan a ni leh vat dawn a, na neih lai berkher chuan ka hmu chak zawk zawk lo a sin mawle.

“Nutei i hmu ngai em?” ka ti ta daih a, “Hmu e…vawiinah a lo kal. ‘Intih pa ka tum lutuk a ka rilru a pa dawn ţanin ka hria’ a tia, ‘Bialpa tur ka lo zawnpui ang che’ ka tih kha” a ti a, eng emaw hi a khawih ri ruk ruk reng a, “Eng nge i tih a?” ka tih chuan, “I thil tur ka pack” a ti then a, “Eng ka thil tur?” ka tih lahin, “Ka sawiin i hmu hunah i phu zawk thei nang” a ti bawk si, “Mi ke nat lai laia lo intih phut tum tlat te chu a” lungawi lo deuha ka tih chuan, “I kein i phu dawn hleinem. Taka Remsial, eng nge i duh ber?” a ti ţha leh a, “Awww…ka thil tur i pack mek tawh a ni lo’m ni?” ka lo ti a, “Pack mek e…hriat ve hrim hrim atan eng nge i duh ber?” a tih leh chuan, “Duh ber ka nei lo aniang sawi chat tur ka hre lo, min zawt ho si, kei lah ka na ţhum a, ka mu dawn” ka tih veleh, “Nang chu ni ila u Zirbawnga ka ti ang” a tih chuan, “I bawng tih i inhre tawh a ni maw?” ka ti a, a duh lo lutuk chu ka nuihpui vak vak a, kan inbiak zawh hnua tunhma a amah ka duh tak tak laia a thla ka lak ruk sak ho ka en a, ke na chung chungin ka bawkkhup thawk mai.

Kan pahnih pawhin thla kan lo la dun nasa a, ka sam tawi lai kha a ni nghe nghe a, ka tum hmuk a, u Zirbawnga pawh tawite chauhin a nui a, ka sam chu a lai taka inţhen phawkin a thei thei ka bengah a inzep a, ka meng kul bawk si, u Zirbawnga lah chu, “Ka peih lo e” a tih zawh hnua ka bula rawn ding ve mai mai a ang. Ka ti lian vak a, ka enna lam pawh en lo vin hmun dang a en daih a, keiin rem leh rem lo vin a jacket ipteah ka zen a, “Kan va inngeih loh hmel ve mawle” ka tih hnuah thlalak chu amah thawn vein, ‘Heng hunlai hian min la duh lo a ni maw?’ ka ti a, a rei ve tawhin khang hunlai khan nitin thil thar kan tawng bawk si a, hriat vek sen pawh a ni tawh lo.

‘Ka hrawk kha en rawh, a bak ka sawi peih lo’ a rawn tih hnuah, ‘Duh ru e’ a rawn ti leh a, ‘I hmelchhiat zia hi’ ti lehin nui lem tam deuh min lo thawn a, lawm lo hle mah ila a hrawk chu ka en chiang a, ‘Engmah ka hmu lo’ ka tih chuan, ‘Fawnvela te nen park ah eng emaw kan in ruih ni kha, ka hrawk bawk i khalh nasat kha’ a rawn ti chu ka ip ve chawi mai. ‘U Zir, i hrawk bawk hi van theng reng aiin a mawi zawk, hrawk bawk galaxy i tih kha’ a ti leh a, ka in ve a nih chuan engmah ka hre tawh lo tawp ang, ka ţhiante lahin ka zah hlauin min hrilh hauh lo ang a, sual kan tum ve ţhin lai kha a ni tih chu ka hre mai.

‘I hriat zawng zawng hi sawi ţhin suh’ ka ti leh hnuhnawh a, ‘A dang min lo thawn leh teh’ a tih chuan la nei ţeuh mah ila ka phal tawh lo a, ‘I sam tawi lai hian kan hlim zawk, i sam kha tan leh rawh’ a ti thul, ‘I sam a sei a i rilru a lian sawt’ a tih te chuan chhan enah pawh ka en tawh lo a, thlalak hlui en chuan lung a leng ve veng veng thei, kan tunhma nun, kan ţhianho nun ţhin dan zawng zawngte kha ka ngai a, u Rinchuta hret hrut hian Kalvari hi la nei thawt thawt lo se ţha tur, a chut ber a che rang ber a, kei lah nulat laiin ka duh ber a ka ngaihin min thih san daih a, a thihna a rei tawh nen rilru hi a dam thei chuang lo. U Zirbawnga nen a kan thlalak bawk ka en leh a, a hrawk bawk galaxy te chu ka en chiang bik a, lamkhuang mu chu dawlh se a hrawk bawk a phir dawn a nih hi ka tih rilruk laiin thlalak min lo thawn ve a, Aizawl a ka awmlai a mi a ni thung.

‘Mipa hmelţha dang hmu leh ta la i rilru a danglam leh angem?’ a rawn tih chuan, ‘Ka nei duh che ti ta ila engtin nge i tih ang?’ ka lo ti daih a, ‘Palai tura hual sa ka nei a, ka kaitho nghal a ni mai’ a rawn ti a, ‘Mipa hmelţha dang vang mai mai a danglam tur chu ni ila a danglamna a rei tawh ang. Sap leh khawchhak lam hmelţha ho ai pawn ka dah sang zawk che aw, mipa hmelţha satliah vanga danglam ka ni lo, nangpawh i dik vek bik loh kha’ ka tih chuan, ‘Umm..sawi tawh lo ang’ a rawn ti a, Aizawla kan thlalak chu ka sam tawi laia kan thlalak ai ngawt chuan a nalh deuh zawk a, nei ta ila kanchhi hi a ngaihtuah daih angem tih te rilruah a awm a, ka pi Binladarin nei turin min ti reng a, mipa hi nupui an neih hnu hian an danglam ve ţhin an ti bawk si, hmeichhe tana rilru hahna tur han tam bik zia hi aw.

Zingah nau paw chungin Kalvari a rawn lang hlawl a, “Ka zut thiam vak lo ka tih ziah kha” ti chungin Dawnfuha a dah thla a, thlenga vaihlo leh a lehkha chu chhuatah a darh nghal chuai mai. “Nang hi chu aw…i harh dan em em hi, khawlum lai phei chuan zin vang vang zel la a ţha ang” tih pahin ka nu’n a chhar nghal mawlh mawlh a, “A taksa te kha khawih rawh, Pathian zarah chaw ei tui loh te a nei ve ngai lo a, a sa a ţha lutuk, a sak tlat mai a ni” Kalvari in a tih chuan Dawnfuha chu enin, “Naupangtein i lo sek ange aw, ka ten che a ni mai” ka ti a, ka nu erawh chuan a taksa chu a chul thuak a, “Bawnghnute leh chhang ka pe ang che aw, i theih chhung i ei dawn nia” a ti sauh sauh a, Kalvari in ka ke na lai a khawih chiah chu a na lutuk a, kan in ngamtlak bawk si, a samah ka ţham nghal chawt a, “Sangkhuma pawh hi fimkhur ve ţhin tur alawm, nang lah a remna lai apiangah i tlu a, ka hne lutuk che u” a ti hlak hlak a, a nat apiangin a samah ka ţham a, thle bar chungin ka ke chu min khawih sak tho a, “Hetiang a nih te chuan zanah pawh i inkhawm thei tawh nang. U Zirbawnga lo kal a tum a, a tam thei ang ber inkhawm la ka ti a sin le” a ti hlak hlak a, tunhma aţang tawhin Kalvari hi chu kei aiin a thin a chhe zawk daih.

“Khatiang te a i tih, i pi Binladari te chuan Zir Thianghlima a tia sin, a la fel vak chuang lo em ni?” ka nu’n a tih chuan kan ţhiandunin kan in en hau a, “A dawheh emai” Kalvari in a ti sap a, “Engmaw i sawi?” ka nu’n a tih chuan, “Fel e…fel tehreng mai, Kolasib ho chuan Zir Thianghlima an ti vek alawm” a ti zung zung a, “I rilruin ka uang a ti rawh” zawi tein ka lo ti ve a, mi tam tak u Zirbawnga hrechiang inti an awm a, ka pi Binladari lo chuan Zir Thianghlima an ti ngai lo. Ka nu’n a duh loh a hlauh lutukna lamah a nihna bak bakin a sawi tih hriat reng, tar si hi a rilru a la chak a nia aw.

Kalvari in min kaiin bathlarah kan ţhu chhuak a, “Naktuk Pathianni a ni lehnghal a, Sangkhuma hi ka ngei ngawt mai” a ti leh ţhin a, kan hau ngam lo ve ve thung a, “Enteh my friend, ka pi Binladari leh u Zirbawnga hian eng inzawmna nge an neih ang le? Englai pawha puitu zawk pawh min fak ngai lo a nia, kan Kolasib tlangval lah Zir Thianghlima a ti der tawh bawk sia” ka tih chuan, “U Zirbawnga hian a lo vau a ni lo maw?” a ti leh tawh a, “Zir Thianghlima tih tur em chu ni lo mah se tar chak tawh lo vau khur khur chi a ni lo, a nihna bak bakin i hmu sual a, min duhpui ngai lo reng reng” ka tih chuan a nui vak a, u Zirbawngan thil pek min pek hunah chiah ka phu dawn emaw ka tih laiin, “Ka uang a nih kha, ka pasal a chut em a, u Zirbawnga hian u Rinchuta aiin ka pi a duat thiam zawk, a tlawh peih a, a be sawm peih a, tunah pawh, ‘ka lo kal ang a, Remsiali nen vawkin kan thawm ţhat sak ang che u’ a tia lawm” a ti chu ka phu zawk mai.

“Eng nga?” ka ti vak a, nur nang chunga min hlat pahin, “Ka pi sawi dan a nih chu” a tih chuan, “Ngati nge min sawi tel ve ringawt a? Duh ber te vawkin sak tir tum te chu a, ka ke ka ti na tih a hre reng si” ka tih zet hnua, “Ehe…nizana ka uih chung chunga ka pi Binladarin ka ke min lo hmeh sak kha u Zirbawnga nena vawkin sa tura min duh vang em mawni le?” ka tih chuan, “Aniang, Sangkhuma leh Fawnvela in sawm ve dawn nia” a ti awlsam then a, “Awii…what a very surprise thing, thingtlang nula mah ni ila bialpa nen em a vawkin sak chu vawikhatmah ka la ngaihtuah ngai lo, u Zirbawnga hmangaihna hi a hraw mah mah a ni, hmangaihna hriamhrei chhawm diktak a nih hi” ka ti hlak hlak a, “Mahse midang nei tawh suh, a hmangaih zia che ka hre tawh a, a cham chhung leka vawkin sak chu a pawi hleinem, keipawh u Rinchuta ar in tur ka sak ve tho kha, kei phei chu belah ka mawng a tang a, bel chawpin huan mawngah ka lum daih kha hrereng rawh. Hna in han zo ang a, u Zirbawnga chuan a duat thiam dawn lutuk che, a malis bel hlung mai ang che” a ti kher a, “U Rinchuta pawh ama tawkah a zei ve tho alawm” ka tih chuan, “Zei nang, min hnaih a, min en ve ren rawn a, thu thlum deuh a sawi beiseiin ka en let ve a, a ngawih vung vung hnuah, ‘luliannu’ min ti daih a nia, ka tawrh chhel zia hi ngaihtuah rawh, pasal ţha deuh ka neih phah hi. U Zirbawnga hi nei la chu e…kei aiin i nuam sa zawk dawn tih ka sawi ngam sak, Kolasib a kan haw changa chaw kan ei te hian u Rinchuta aiin u Zirbawngan min ngaihsak zawk ţhin, u Rinchuta chuan a ei tawp a, ka ban phak loh ho min suah rawh ka tihin min suah a, u Zirbawnga te chu e…chaw ei belh leh rawh a tih loh leh chawhmeh ho kha suak rawh a ti reng a, chawei hma lahin i ril a ţam em a tia, chaw ei khamah lah i puar em a tia, zingah te hian ka thawh hma ve chuan tho hma lo turin min ti ziah. Kan han sawisel ţhin tak naa Kolasib a kan haw chuan u Zirbawnga ka thlamuanpui ber zel” a ti bawrh bawrh a, a banah ka vuan a, amah ka en rual chuan min lo en ve a, “My friend, pasal neih ka chak tawh e” ka ti chu a thaw hawk mai.

“Nei mah la a pawi lo” a tih chuan, “A hma khan khatiang zawng khan min sawi phurpui tawh ta che, i sawichhe char char a, bialnu a nei i ti reng a, ka rilru hi vanlaizawlah i thlawh kual tir rei lutuk alawm” ka lo ti a, “Ka ngaihtuah vang che a nih kha. Tak takin Remkalam, Maski hi engtikahmah i nghak chhuak dawn lo, dawi hmanga a thlarau i ko chhuak a i nei a nih ngawt loh chuan khawvela i awm chhung chuan i nei thei dawn lo. Chutiang chuan han ti chiah la chu khua aţangin an hnawtchhuak vang vang bawk ang che. Sawi lo mahla i ngai tih ka hre reng a, mahse i upa ve zel a, a damlaiin ti khawp khan i ngaihtuah a, tunah chuan nangmah inngaihtuah ve tawh rawh. Ka nulat lai lahin min ngaihtuah em em a, mahni inngaihtuah a hun tawh. Keimahni ho vanga hun ţha i hloh a, mahnia i tei rek rek reng chuan hrehawm kan ti dawn teh mai a nia, nangmah inngaihtuah phawt la, u Zirbawngan a hmangaih zia che kan nupa pawhin kan hre tawh a, nei la, i duhzawng tih i duh pawhin a dang dawn lo che a, han nei fel phawt la, chumi hnuah chuan min la ngaihtuah leh hlawm dawn nia” a ti malh malh a, “Tunlai chu Sangkhuma hi a nun a hlim lo riau a” ka tih chuan, “Aw, nangmah in ngaihtuah phawt la, Sangkhuma chu kan la ngaihven leh zawk dawn nia, hna pawh nei ila hmeichhia chu kan pasalte hian min ti zahawm lehzual a, pasal neih ngei ngei a ngai ti bur lo mah ila nang chu hmangaihtu i nei a, i chan nawn leh ka hlau” a ti a, a dik ve tho mai. “Aaa…lo kal phawt se la a awmdan a zirin kan sawi leh dawn nia” ka tih chuan a bu nghat nghat a, “Midang hi chu min en kan vek rih rawh” a ti leh hram a, palai te lo kal ve rawih mai se chu ka ute pahnihin min nuihzat viau ang.

Ka ke vangin inah ka tawm char char a, thawhţan zingah u Zirbawngan min lo biain, “In khua ka rawn thleng har lo ang, ka rawn tlawh nghal ang che, ka ngai tawh che” a rawn ti a, boruak ţha lo a awm tawh lo ang chu tih nak laiin tukţhuan eikham hnu lawka feh tura ka pa chhuak chu darkar chanve hnu velah a rawn let leh a, “Theihnghilh i nei em ni?” ka nu’n a tih chuan, “Nei nang, setanic Nicky a bo a, zawn tur an ti a nih chu, nizan pawh a haw lo a, a ţhiante inah a riak a nih an ring a, a ţhiante ina a kal tak lohah chuan a nu leh pa ngaih a ţha ta lo a, a mi pangngai zân si lo a, khawtlang puihna an ngen a nih hmel, an rawn au vat ang” a ti a, insiam ve mai tuma pindan lama ka bai phei auh auh chu ka nu’n, “I pa a kal dawn tho chuan kal ve lo mai rawh, i tlaw si, i intih nat belh ang” a ti a, ţhalai zawng zawng deuhthaw an thawkchhuak leh dawn a, hna ţul an ţhulh phah ngei bawk ang a, “Ka inthlahrung e” ka tih chuan, “Nangmah kha buaipui ngaia i awm chuan a inthlahrunawm lehzual dawn, i pa leh Sangkhuma ten lo sawi mai rawh se” a ti deuh tlat a, bet lo deuhin ka ţhu leh a, setanic Nicky chu ka ngaihtuah ru hle bawk. Ruihhlo a sim duh si lo, a thluak hi a buai tial tial emaw tih mai tur a nia, mahse a dawih em a, lo tlanbo ta pawh nise a kal hlat ngam ka ring lo.

Sangkhuma leh Fawnvela te pawhin min rawn sawm tak nain ka zui ve lo a, chanchin ngaichanga ka nu nen kan ţhut dun ran laiin u Lalhuma leh pu Taipuia te an lo lut hlawl a, gospel camping aţangin an chhuak chiah a, an rui leh chhâr tawh.

“Mi bo in zawng ve dawn lo em ni?” ka nu’n a tih chuan u Lalhuma chhuatah a tiang a paih a, “In bo ve palh ang nangni chu haw rawh u min ti. Mi bo an awm a, zawn ve kan tum apiangin min haw tir bik ziah” u Lalhuman a tih laiin pu Taipuian, “Zawng ve suh u an ti chuang hleinem, in tinah lut ula, a lo awm reng em en kual rawh u, a lo awm hlauh chuan min hrilh vat dawn a nia an ti a nih kha, ramhnuaia zawn ai chuan khawchhunga zawn chu a nuam daih zawk ang chu” a lo ti ve thung a, “A nih leh lo kal rawh, thlanmualah zawng ang” u Lalhuman a tih chuan, “Ani hi thingkung velah a lo inkhai ţut ange” pu Taipuian a lo ti a, u Lalhuman a melh rulh a, a ke pen pawh a tawp chawt a, “Chutiang a ti ngam lo, zawng mai mai rawh u” ka nu’n a tih takah chuan muangchangin an chhuak a, keitak pawh hian ka rap riau mai a ni.

Nilengin chanchin kan hre lo va, tlaiah eirel paha ka nu vaihlo zial sa ka ţawn a, inţhut hnaih viau mah ila kan inbe khat khawp mai. Khua a thim dawn ruai tihah ka ning deuh chuan ka sawi ţhaih a, “Chutiang hlau rual kan ni lo, ani phei chu a rawn leng khat si, eng emaw awm se chu i pa a lo haw daih tawh ang” a ti pang pang nain tih ţhaih nan a ka en ngai ka en reng takah chuan, “Engati nge i en ngai i en reng a? Ţawn mai mai rawh a hmangmawhthlak” a ti a, ka en ngai ka la en reng tho a. A hlauh theih nan tukverh lam en reng chungin ka nui vur vur phawt a, a rei hnuah a riin ka nui a, ka mit pawh ka khap duh lo.

“Lalremmawi, eng nge i hriat a?” a tih leh pawhin a thusawi chu hre lo ang maiin ka awm a, setanic Nicky-a chanchin a hlauhawm zawngin ka sawipui nasa bawk si, tunah a bo lehnghal a, “Ti thuai thuai rawh” a tih leh lai te chuan ka nui lui kur kur a, ka melh ngai reng ka la melh bawk a, “Awii..ka ning lutuk tawh” tih paha ka sam a rawn ţham chiah chu, “In awm em?” tih riin a zui a, kawngka zawnah kan ţhu bawk si, u Zirbawnga rawn lut tawh chu, “Exer in lak zawhah ka lo kal leh mai ang” tih leh chhuah a rual a, “Min thlah rawh” ka tih veleh ka nu pawhin rang deuhin min thlah a, a hamhaih ve a nih hmel.

“In awm em a tih te chuan min thlah nghal mai awm se” ka sam tuai mawlh mawlh paha ka tih chuan, “A rawn luh hnuah alawm luh min dil. Athuhrimah, nangpawh khatiang thil ţul lo tih tih a ngai hleinem, vawikhat ka khak che khan duhtawk ta che” vin deuhin a lo ti hlak hlak a, nula uai tawh ka nuin min kek lai kher min rawn hmu fuh a, ka zak lutuk chu ka lum pup pup mai a ni.

Darkar chanve hnu velah message in, ‘I nu’n a vaw zo tawh che em?’ a rawn ti a, a va han ţhing tak, zak viau mah ila, ‘Min vaw lo, ka tih ţhaih a, a hlauin ka samah a ţham a nih kha’ ka ti a, ka insawithiam zung zung a, ka pa’n ka nu rawn bia a setanic Nicky an hmuh tawh thu a rawn hrilh hnuah u Zirbawnga pawhin, ‘A tlai laklawh tawh emai, zanah ka lo kal ang’ a rawn ti a, ka pa pawh rawn haw thuaiin u Lalhuma leh pu Taipuia ten khawchhunga an hmuh thu a rawn sawi a, nilengin an lo zawng dun ve ngat ngat a nih hmel. “Nimin tlaiah a pa nen an inhau a, a rilru na a tawm bo a ni awm e. An hmuh chuan, ‘ka haw dawn chiah’ a lo ti ve a, a nu leh pate hian an ngaihtuah si, kan zilh a, kan rawn haw san a nih kha” a ti charh charh a, a thi em lo chu ka rilru a nuam huai mai, a nu leh pate erawh an inthlahrung leh khawp ang.

Zana u Zirbawnga lo kal chu a bawr khawp mai, hna ka la thawh peih loh avangin ţhutthleng seiah ka ţhu thluang duai a, inthlahrun hmel deuhin ka ke lamah a rawn ţhu ve a, zanin chu ka nu zawkin, “I va bawr ve, i pi Binladarin chawhmeh a lo pe che em ni?” a ti ve mial a, “Ka lo kensak zawk che u a” a tih hnuah lai deuhin, “Heh” a ti a, min rawn en rualin ka hawi sawn a, zanin kher kher chu boruak a alh aniang en pawh ka lo en ţha ngam lo, amah lah chu a fai sar lehnghal a, hmuh a nuamin ka en loh pawhin hmelţha ka ti.

“Keimahni maw?” ka nu’n a tih chuan, “Umm” tih ringawtin a chhang a, a ruka ka tlawh zauh rualin a che zawk a, “Aw..a ngai hleinem, chawhmeh chu helamah a tam a sin, eng nge min lo hawn a?” ka nu’n a lo ti leh luam a, a be ţha tawh lutuk hi an bulah awm reng mah ila ka awih lo, ka chhuahchhal rum rum ţep a ni.

“Chawhmeh a ni lo” tih pahin a thil khai lai pakhat zawk chu ka nu a pe a, ka lo thlir ve reng a, ka nu’n a phawrh chhuak chiah chu kan phu deuh zawk a, kan nufain kan au duai lo chauh a ni. “Kawr min lo hawn tihna maw Zir Thianghlim?” ka nu’n ring leng lawnga a tih chuan ka hre lo der a, a aw ah lah a phur tih a hriat si, “Awii…kekawr a la chhawm zui” a awki ngai chiahin a ti leh a, phone ka bih daih a, ka zak lutuk chu ka ke hnuai a za mer mer mai.

“Mawza chhah deuh pahnih hi i pu Ditea feh mawza tur em ni?” phur deuh hian a ti leh a, pakhat lahin, “Aw ni e” a ti lawi rût a, i pu te a ti tawh vel a, ka pa’n, “Rem i va hre ve, lawm viau mah ila a thlawna lak chu a zahthlak ang a” a lo ti ve bawk a, “Aaa…zak duh suh” u Zirbawngan a tih chuan ka hnar ka hmet phui a, ka nu leh pate chuan an hnar der ve ţang ţang a, “Thil pek chu lak tur, thilpek an lak loh chuan a pe tu tan a lawmawm loh” u Zirbawngan a tih chuan ka chik ka hak lek lek a ni. Tumah ka en duh tawh lo, an vai chuan ka zahpui vek.

“I va ti lawmawm ve, a man zatve tal kan pe ang che kan tih lahin i duh mang si lo, thilthlawnpek han dawn tawp mai chu a zahthlak rum rum alawm le, kan mamawh i hre ropui si” ka nu’n a ti lang lang a, ka pa nen hian kan rilru a in ang a, thilthlawnpek hi kan duh vak lo a, ka nu erawh u Bawiha nen an inang chiah a, a ruk chuan nuam a ti viau ang. Ka pa zawk chu a inthlahrun ka ring. Keipawh miin thil min pek chuan ba neiah ka inngai tlat zel a, ka pa ka chhun ve na lai tak a ni.

“Ka’n ha chhin ange” a tih hnuah ka nu chu pindanah a lut a, ka pa erawh chuan phone a bia a, ka nu rawn chhuakin, “A lian deuh nain khawlum lai chuan hak a nuam zawk ang, kekawrah hian ipte a awm tel bawk a, keini ang zuk leh hmuam ti mi tan a remchang lutuk” a tih chuan ka pa pawhin mawi a tih thu lo sawiin u Zira hnenah setanic Nicky chungchang a sawi thuak thuak a, “Buaina a siam reng mai an ti a, kan han leng chho ve ang e” tiin lawmthu a hrilh nawn leh hnuah a chhuak a, “He mihring mak zia hi chu, chawmhlawm, buaipui ngai zawk a ni chung hian a nu te hi a cho ur ur reng mai a ni. Aizawlah home ah awm rawh se an tih lahin an ngaihtuah bawk si, fa sual nei hi an va han khawngaihthlak tak” a tih hlak hlak hnuah nem deuh zawkin, “Ka inthlak anga thingpui ka’n lum ange” a ti a, nu mawl mang ve tak tih takah a rilru la hmin lo se chu thilpek pawh hi a la duh kher lo maithei a, ka nu a hmin hneh em em danah hian ka pi Binladari zei zia ka hrechiang tial tial mai.

Pindana ka nu luh rualin u Zirbawngan ka ke na lai a rawn khawih a, “In xray tir em?” tih pahin a ipte aţangin a tuamna tur a phawrh a, ka malchungah a rawn dah a, “Chutiangin kan ti ve ngai lo, Kalvari leh ka pi Binladarin an zut a, a dam mai ang” ka tih hnuah, “Remsiali nen vawkin kan thawm ţha ang i ti a ni maw?” ka ti leh a, en pawh min en lo hian a nui ringawt a, “Huiham” ka tih rualin, “In khua hi a nuam, ka ngaina, lo zin tawh chuan cham reng ka chak ţhin” a lo ti zung zung a, chutah ka lam lo hawiin tawitein a nui a, “I va hmelţha ve” a tih chuan, “Hmh” tih pahin ka lai lutuk chu ka hawi sawn a, “I thil tur zingah hian i ke a hnawih tur a awm tel ang” a ti a, a ipte khai lai chu ka malchungah a rawn dah a, keipawhin nuam ka ti ve tial tial mai. A inpe zo sawt lutuk leh min duhna a lanchhuahtir ngam hi mak ka ti zawk a, kan boruak a hahthlakin a buai niai nuai tehreng nen, mipa tam tak chu nise hetiang hian an ti thei lo ang.

Ka nu pawh rawn chhuak leh tawhin thingpui a lum a, “I nu te an dam maw? In khua a lum ve em?” a ti luam a, a phone ri reng chu u Zirbawngan banin keimah min rawn pe a, ka pi Binladari a lo ni. “Ka pi Binladarin a lo phone che a nih hi” ka tih chuan, “Lo be rawh” a ti ve mai a, “Hello” ka ti chu, “I nu a awm lo em ni?” a rawn ti nghal a, “Awm e..thingpui a lum a” ka tih chuan, “Lo phei rawh se, thil hmuh tir tur ka nei” a ti a, a dah nghal daih a, u Zirbawnga ka melh a, phone a lo en daih a, ka pi Binladari pawh a hawnsak ve a ni ngei ngei ang. Ka nu hnena ka sawi chuan, “Thingpui in zawhah minute15 vel lek ka va phei zuai ang” phur tak hian a ti a, a sawipui vel chak tawh a ni ngei ang, ka pa chu awm se a kal ngam dawn loh nen, hmeichhia hi chuan upat lamah pawh thil thar hi kan lo lawm a ni.

Thingpui in zawha ka nu chhuah rual chuan, “I lo hawnsak vek tihna mi?” ka ti nghal a, “I nu leh ka pi a ni mai, Kalvari nen. I pa kha hawn loh ka tum zet nain pathum chiah in awm sia, ka huphurh ve zia aw” a ti a, “I inseng hnem lo mi?” ka tih chuan, “A to lo a, khawlum a hak tura an ţhui chawp a nia” a ti leh mai a, “I nu khan min la haw deuh emaw ka tih vanga lo hawn ka nia” a ti tak nain ka rilru hah a hlauh vang a nih te ka ring, u Bawiha kal nana pawisa a ngaih hnem zia Nutei bula ka sawi kha Nutein a lo hrilh chhawng a, kan khawsak hi a harsa ngai hauh lo nain tun ţum chu ka nu te ka tuakpui ve ţang ţang a, hria angin a awm duh hauh lo thung. Kum thum vel kan intuak chuan kan intuak ngah ve thei mai ang, u Bawiha pawh hmanhmawh lo turin ka hrilh vek tawh a, sawrkar hnathawh loh a, pawisa khawl sa a tam loh chuan thil tih zung zung theih a ni lo, keipawh Aizawl a thil ka zir dawnin ka intuak rei emai.

“Ka nute chu a ngai tawh lo” ka tih chuan, “Kan inneih hnuah bak ka pe tawh lo ang” a ti fiamthu a, “Tak taka, ka pi chu ka hawn ziah a, sawi tawh ang khan pathum chiah in awm a, nangmah chiah hawn bik reng nuam ka ti lo a, an awm ve reng zel sia” a tih hnuah, “Hetah hian i ke damdawi a awm” tih pahin ka malchunga ipte chu a rawn kawk leh a, en ka tum laiin amah zawkin a rawn hai a, damdawi chu la chhuakin, “Ka lo tuam sak ang che” a ti a, ka ke chu la kangin a malchungah a dah a, “A la vung a ni maw?” ka ke tuamna phelh paha a tih chuan, “A vung rei leh ngawt ang, a na chu a zia tawh” ka ti a, damdawi a hnawih laiin keiin ipte chhung a mi chu ka lo en a, a sawi ang tak tak khan a vaiin a tuam phui vek.

Ka ke a a damdawi hnawih chuan min hip vang vangin a nuam phian a, a kut a dam bawk si, Kalvari leh ka pi khawih ai pawhin nuam ka ti zawk. “A la na em?” damdawi chul rual chunga a tih chuan, “Na e…ka la rap ţha ngam reng reng lo” ka ti a, “A zia lo hle mai” a ti ringawt a, a thil min lo hawn intuamna chu hawngin ka enchhin a, kawr ni awm tak ka khai kan rual chuan bawm pakhat, rit ve deuh mai hi ka malchungah a rawn tla a, u Zirbawnga a lo nui hawk nain min en duh lo reng reng.

Khawlum laia hak nuam deuh tur kawrfual a lo ni a, ka nu khan a kawr kha a thawl viau a, kei chuan ka ha tawk em ang chu. Bawm chu hawng lehin ka sana awh deuh ţhin, ka intuak anga ka la lei ve ang ka tih ţhin ang kha ka hmuh chuan ka phu deuh zawk tak tak a, i phu zawk ang a ti kha a dik khawp mai.

“Awii…what a very surprise thing” ka ti hluai a, ka kut ngeia sana ka khawih tawh hnuah pawh ka la awih lo, hmeichhia hi chu kan awh zawng pe na deuh deuh chi kan tam si a, keipawhin u Zirbawnga min pek ang sana hi chu ka awh rukna a rei tawh, rangkachak rawng niin a hmai a dum thung a, a man pawh a toin ka lei ngam ngai lo kha a nia, sana chu min chhuhsakin, “Pakhat a la awm kha” a tih chuan ka en leh a, chapal a ni dawn tih hre mah ila phui tawkin a tuam tho a, a bel thuah ţup a, hawng tur pawn beih fe a ngai reng a ni.

Chapal kaih ka hmuh rualin, “Engtin nge ka bun tawk i hriat?” ka ti nghal a, ka bun chhin lo va, ka tawk ka ring vak lo bawk a, “I pheikhawk size ka hria” a ti a, ka ke na chu min tuam sak zui mawlh mawlh a, “Awii…naktukah lawmthu sawi nan i lu ka meh sak ang che” ka tih chuan a nuih a za viau mai.

“Ka duh lo e a” tih pahin ka kut a rawn la a, sana chu min siamrem sakin min bun tir zui nghal a, “I va inhmeh ve” a ti a, ka chhip a tuai zauh hnuah ka kutah bawk a vuan leh a, “Bur i chah ţeuh bawk sia, rilru i ti nuam lo” ka tih chuan, “Nuam rawh se, ka duat che lawm” a lo ti a, ka vir muai muaiin ka hria, thli chu thaw se ka thlawk chhuak daih thei ang.

Kawrfual leh chapal chu ka khung ţha sawk sawk a, ipte chu min laksakin a bula a dah hnuah ka kutah bawk a vuan leh a, min en ran chunga, “Ka duat che i ti em?” a tih te chuan ka zak. “I lo hawn hnem lutuk a a nuam lo. Nuam lo ka ti tak tak a nia aw, pawisa pawh nei la nuam ka ti chuang lo” ka ti a, a lo nui hawk a, “Sangkhuma tih der ang aw” a ti daih a, a sawi duh loh zawng hi chu a sawi pui luih theih loh reng reng.

Ka kut ka lak sawn hnuah a tih tur hre lo chuan ka ke na lai bawk a khawih leh a, a nute lo haw hma a ti aniang chu ka ke dawm reng chung chuan rawn kun hnaiin ka hmuiah a fawp a, nidang angin a ti keuh tawh lo lehnghal a, ţhutthleng pakhata ţhu kan ni bawk a min hnaih zual zel a, ka ke na lai a nam nat deuh ruala sin zeta, “Ummmmmmmm” ka tih chuan a inla hrang vat a, a kî a sâng si, phawk zeta min en chunga, “Eng nge cooker si ri ang deuh kha?” a tih chuan, “Ka ke” ka lo ti a, a hrethiam mai lo zui a, ka ke a en rualin min thlah ve chauh a, a hamhaih buai vel chu a hmel zawng zawngin naupang ang mai a ni.

“Min rawn hnaih pahin ka ke i nem vak alawm” ka tih leh chuan, “A rem lo em a” a tih hnuah, “Ka tihpalh sorry” a ti leh hnuhnawh a, “Inneih chungchang sawi hmasak i tum tawh si lo a, ka sawi hmasa mai ang. Tun ang reng i nih a, i nih zel dawn chuan neih che ka tum anghk. Rilru siamfel ka tum vat ang” thutak deuha ka tih chuan min rawn en vut a, “Tak tak?” ri mang lo hian a ti a, ka thusawi chu a awih lo aniang, “Ni e…keichu thil ka peh hel kual ve vak ngai hleinem” ka tih lai te chuan ngunthluk fahranin min lo en a, “Puitlingin min hrilh bawk a, ka tana ţha tur an sawi reng a” ka tih leh chuan min rawn hnaih leh ruak a, ka ke a na tih hrechhuakin, “A na em?” tih pahin a tawlh let leh sawk sawk a, “Dim i ngaih lai tak, kan ţhut dun ţhat theih loh lai takin thu lawmawm min hrilh a” a ti chu ka nui duai a, “Awii…zanin chu boruak ka hak leh ţep zel u Zir, ka thi ţhaks” ka ti fiamthu a, kan awmdan hi screenshot theih se ka ti. Maski a thih hnua tihtakzeta ka hlim lehna hmasaber ka ti ngam sak.

“Min neih i tum ve chiah a i thih nghal ţhaks in?” a tih chuan ka nui uar uar a, zanin chu a thil min leisak te, ka nute thil tur a leisak vang te pawhin ka hau lo, hman aţanga a tih chak tawh a ti thei chiah a, rilru hlim deuhin awm ve rawh se. “Nuam i ti emai” ka tih chuan, “A lawm nan khawmaw i dul ka lo ham” a ti a, a mitmeng a nung sar reng mai.

Ka nu rawn let leh hnuah a haw a, kan inbe zui char char thung a, ‘Dawrah mi ka chhawr tho a, tun ţum chu ka cham rei dawn, ka hawsan phal rih lo che’ a rawn ti vel a, Kalvari pawhin, ‘My friend, u Zirbawngan thil ţha deuh min lo hawn’ a rawn ti bawk a, Kalvari tel lo a keimah chiahin thil thar ka neih chuan u Zirbawngan nuam a ti teuh lo, unau ang maiah min ngai a, chubakah a uikawm hran lo. Amah en tawp hi chuan a nelawm viau lo a, a rilru a ţhain mi ţanpui a peih viau thung.

Zingah Sangkhuma lo kalin ka thil thar chu ka lo hmuh a, “Fawnvela nen engmah kan dawng ve lo, a pawi lo, mipa chu a ngai ve lo” a ti a, lungawi lo hmel pawh a pu lo.

“Niminah in vak kual nasa sia, zanah i hlau em? I dawih ropui si” fiamthu a ka tih chuan, “Ve che…ka dawih tawh lo, thlahrang film ka en te hian ka hnuk a ulh daih zel” a ti a, kan han nui dun leh ţhin, u Zirbawngan min lo phone in Sangkhuma awm thu ka sawi chuan, “Nakinah kan tih der dawn nia, eng nge i an?” a rawn ti a, “A ngai reng” ka tih chuan, “Ka nei chak tawh che” a ti nghal ringawt a, “Min han hne leh si vaih teh aw, min hnawhchhuah pawh tum la ka chhuak dawn miah lo a nia. Min neih i chak awt awt bawk a damchhungin ka uap dawn che” ka tih chuan, “Chutiang mai mai turin nupui atan ka sawm lo che” a ti a, u Rinchutan, “U Zirbawng, Dawnfuha i sik ru em ni a? A mawngtama vual tut saw rannung sehna nge i hnathawh?” a rawn tih takah chuan ka dah daih a, a bula Dawnfuha a ninhlei ngam loh nan a sik ru leh tawh a ni ngei ngei ang.

“Eng nge i thusawi kha a awmzia?” Sangkhuman a lo ti ve bawk a, “Pasal ka nei thut maithei” ka tih chuan, “Ve lutuk a, ka ngen tlat dawn che” duhdah zet hian a ti a, “Ka pu nen thil kan sawi dun a, ka pi Binladari dawrah ka kal lawk ang a ka rawn hrilh leh ang che” tih leh thawh a rual a, a kal dawnah pawh, “Hey, pasal neih a ngai lo aw” min kawk va chung hian thupe aw zetin a la ti a, mipa mah nise amah chiah a nih chuan a thla a muang ngai lo reng reng.

U Zirbawnga lah chu chhunah a rawn leng hreh ve deuh a, lo len a chak bawk si, ‘Chhunah chuan Kolasib a awm ang tho ka ni’ te a rawn tia, ‘I ke pawh na se hetah chaw lo ei rawh u’ a ti bawk a, nuih liam vel mai mai chungin aieng ka la chhuak a, bur leh bur a bel mawi tur kha ka la bawk a, Maski hming ka hmuh chuan ka inthiam lo deuh a, mahse ka bulah a awm tawh lo a, hmalam ka pan loh chuan Kalvari sawi ang khan keiman ka tuar mai ang. Ka nu vaihlo zial lai chu ka en a, u Zirbawnga neih a phal tawh bawk si, ka hlim leh thut tawh lehnghal a, ka nu awm hle hle lai chu ka piai vak chak ut ut a, u Zirbawnga nena kan inkar buaithlak tak te kha ka bo ve hret hret a, ka dam deuh tawh tak tak niin ka inhria.

CONT…

This Post Has 2 Comments

  1. Anonymous

    Ngaihnawm lutuk

  2. Anonymous

    Ngaihnawm e

Leave a Reply