You are currently viewing KEIMAH, THINGTLANG NULA S2-34

KEIMAH, THINGTLANG NULA S2-34

Spread the love

KEIMAH, THINGTLANG NULA S2-34

Ka pi Binladari dawr aţanga Sangkhuma lo let leh pawh, “Remkalam, bathlarah ţhu ang” tih lung lung pahin a rawn lut a, “Ehh…nu Nempachangi chu i va nutling ve vawiin chu..Isss” a ti a, ka nu chu ka piai ngai lo vin a piai zauh a, “Ka kawr thar hi a mawi em?” ka nu’n a lo tih chuan, “Mawi tehlul…a mawina a fawn hlarh hlarh a ni ringawt” a ti vel a, bathlar a ka chhuah veleh rawn chhuak vein, “Pheikhawk siam ka zir dawn” a ti hem mai a, dek pawh ka tih ve hmain ka banah a dawm a, min pawt ţhu zui nghal a.

“Awii…Sangkhuma hi chu, i bula ka awm tam chuan ka la inhliam leh nge nge ang” ti bai bai mah ila, “Pheikhawk chhe siam pangngai a ni lo a nia aw” a ti a, a phur hmel khawp mai. “Eng pheikhawk siam nge?” ka tih chuan, “Chapal siam te, a cut dan te a nia, pheikhawk chhe siam mai bakah pheikhawk thar hlak siamdan ka zir dawn” a tih hnuah a kut a beng thawk a, “A nuam nasa ang, vairamah kum khat vel ka awm maithei a, a thar hlak siam te, a cheimawite ka zir chuan ka siam char char ang a, zawrh turin kan sem chhuak zung zung mai dawn a ni” a tih chuan, “Chutiang a zir theih elo?” ka lo ti a, “Theih ang chu, tunlaiah lehkhazir sang lo tana zir theih a tam tawh. Ka puin, ‘i duh phawt chuan i zir dawn nia’ a ti, sipai ka ni thei si lo a, pheikhawk siam tal ka zir dawn. Pheikhawk thar hlak ka siam thiam chuan a design chu a lungngaihthlak loh” a ti a, a nui reng mai a ni.

“A va ţha ve…i puin a tuipui che chuan zir ngei ngei rawh. Min siamsak ve dawn em?” ka tih chuan, “Tehreng…super tengtere a ni ringawt, pheikhawk bun sen loh i nei ang..Isss” a ti lung lung a, “Chapal ang kha i hria em? An bun thlep thlep ang hi, a kaih leh a kaih lo siam dan te ka zir vek dawn, eizawnna fumfe tak ka nei ve ţep tawh. Ka siam peih phawt chuan an zuar peih dawn” a ti leh lauh lauh a, a ring tawh si, ka nu pawhin a hre phak tawh ang.

“Engtikah nge i zir dawn?” ka tih leh chuan, “Thlalehah ka ni, vairama awm khan min lo hruai maithei, ka puin midang a rawn leh phawt ang. Mahse, ka puin a tih chu tuman an hnial ngam dawn lo, nupuite ka la nei ve duh dawn a, mipa ve lem si hmeichhe chawmhlawm mai mai nih ka tum lo, keimah hian ka nupui fanaute nuamsa deuhin ka siam ang” a ti a, a phur lutuk chu a ding leh uai zel a, chutah ka bulah ţhu leh hnawkin ka lam a lo hawi a, ka dar tawn tawnah dawmin, “Kalvari pastor nupui a nia, Fawnvela ten sachek an siam a, nangin salon i hawng a, engmah tih tur ka nei ve lo kha hrehawm ka ti hman a, ka inhmu hniam bik hman a, eizawnna tur eng emaw ka duh ve ka tih lai takin ka pu leh ka ni an inbia a, tunah chuan ka khup zul zul tawh lo, ka parh leh hak tawh, ka hlim zia hi e ka kâah hian lo zen mah teh, ka seh nguar ang che” a ti lung lung a, ka nu insum thei lo pawh inchhung aţanga rawn tlanchhuakin a rawn zawtfiah a, Sangkhuman a lo hrilhfiah chuan, “Kal ngei ngei ang che. Reilote hrehawm tawrh a damchhunga nawmsak hi a hlu. Hrehawm tuar lo va nawmsak hmasak tum chu an inchhir zel a nia, i thiam chi a lo nih phei chuan i rin ai daihin i hlawk ang, kan zuar suau suau dawn nia” a ti a, a sawi phur pui thiam bawk si, “Chapal chungah khan thil tle sep sep te han dah la, han cheimawi vel phei la chu to deuhin i hralh thei ang. Kum1 vel hrehawm i tuar ang a, i rawn haw hnu reiloteah pawisa i la lut char char dawn a nih chu, keipawh nalh vâwt vâwt deuhin min siam sak ve ang chu” a ti chiam a, Sangkhuma pawh a ding leh hluai a, ka nu nen an inkuah lo chauh a ni ber.

“Remkalami ve hi min lawmpui nachang pawh a hre ve lo” Sangkhuman ka nu hnena a tih chuan, “Nangmah vanga ka ke a nat hi mawle” ka lo ti a, ka nu’n, “Ani pawh pasal a nei ţep tawh a nia aw, a neih hmain zir vat vat rawh ruai i ţheh ve hman lo ange” a ti fiamthu a, u Zirbawnga kawr lo hawnsak kha a ha ngei bawk a, mawi a inti khawp mai.

“Neih neih a ngai lo, pheikhawk siam ka zir hmasa dawn. Kalvari pawh fa a nei a, a kawm ţhat theih tawh loh, a buaithlak” a ti nghut nghut a, ka lo melh rum deuh leh, “Khatin mi melh suh” a ti hlur a, a hlim si, a thinrim chak bawk si, Sangkhuma meuhin a tih chak zawng tak a hre fuh chu keipawh ka lo hlim ve veng veng a, mahse a tih tak tak hma chu hah a dam pumhlum thei chuang lo.

“Ţhian pawh ni ula tunhma ang pût khan in inkawm chawt thei tawh hleinem, â â suh, kal hran hun te a awm ngai, ţhianţha chu an rilru a inpawh reng zel tho. Nakinah ka la hrilh ang che u, a hrehawm lai tur chiah hi ngaihtuah bik ţhin suh u” ka nu’n a ti zek a, “Pasal pawh nei ila keichu engmahin min dang ve dawn lo, ka kawm thei reng tho che u” ka lo ti ve bawk a, u Bawiha kalna tur pawisain rilru a kap bawk si, nei duh mah ila nei nghal rum rum thei pawh ka ni lo, bakah miin Maski an tia nga, min sawi duh dawn emai.

Inchhunga ka nu luh hnuah Sangkhuma chu zawi zetin ka bulah a rawn ţhu a, Fawnvela rawn kal ve lah chu kan hmaa ţhutthleng hniamah ţhuin mei a zu khu hlat hlat a, “In awm loh vek te chuan a va zia awm lo ve” a ti deuh reng a, zu a thlah ta hmak bawk a a hmel hmuh pawh a nuam.

Ni lah chu a sain kawta kan buh pho chu kan veng pah a, “Mipa leh hmeichhia kan in ang lo e, Fawnvela chu nupui a nei chung pawn hei a ţhu ve kur thei a, Kalvari chu kan pan tawp a nih loh chuan kan rorel naah a tel ve thei tawh lo. Kan sawi ziah tho a mah se…naaaa Remkalam, pasal la nei ve rih lo mai rawh” ngenngawl zeta tih pahin a ţhu awn duai a, ka bana kuah pahin min rawn ngheng a, “A neih lohin a pitar hnuah pawh a la nula dawn a sin mawla” Fawnvelan a lo ti thung a, “Pheikhawk siam zir lo vin hun her let dan ka zir zawk mai ang, Kalvari pasal neih hma hunah khan let leh vek mai ang u” a ti thul, “Zir duh mah la chutiang i thluakin a pha lo, nanga sapţawng thumal ho te pawh lam dik thei loin hun her let dan ka zir dawn in tih le, i pheikhawk siam zir tur pawh kan ngaihtuah nak lai chein” Fawnvelan a lo ti hluk hluk a, “Nei rawh nei rawh i tia, ka nei dawn tih veleh i phal lo leh a” ka lo ti ve bawk a, “Nei rawh ka tia nei tak tak rawh ka ti ngai lo” a ti hmuk a, naupang ang mai, min kuah bet tlat lehnghal a, “Ka ngaihtuah che, mi inah i awm thiam lo ang” a tih loh leh, “I pasalin a duh che pawn a chhungten an ning hma lutuk ang che” a ti thul, “Remkalami chu a huaisen alawm, sipai rual pawh hrawn se tumah a hlau nang” Fawnvelan a tih chuan, “A huaisen vang tak chuan ka ngaihtuah, a pasal chhungten an ning vat mai ang” a la ti tho a, “An ngam chuan min han ning teh se” ka tih veleh, “Kha…ka sawi zawh chiah kha” a lo ti nghal a, “Remkalam, u Zirbawnga nutei, a pasal sun tawh kha an inah a awm ve a tia Fithangin, hrawn a har ve deuh maithei aw” Fawnvelan a tih chuan, “Tunah ka la nei dawn hleinem, a haw hman daih ang” ka ti a, ka rilru pawh ka la siam fel lo a, anni lahin an ngai thutak em em a, thlaleh lawka pasal nei tawh tur te pawh ka ang alawm le.

“Khawvel ninawm zia hi aw” Sangkhuman a tih chuan kan lo nuih hak hak a, “Khawvel aiin i ninawm zawk, i thu i duh si, i duh dan dan a min awm tir i tum a, Kalvari in pasal a neih dawn pawhin i thin a rim tawh” ka tih chuan a tho thut a, “Naupangte si pasal pasal ti reng mai” a ti a, a kal daih a, “Ti tau mai mai teh se” Fawnvelan a tih laiin a kal nghawng nghawng chu ka thlir zui a, khua a lum si, a thlan hluam ang a, amah bak a inhrem lo tih pawh a hre leh tawp nang.

“U Zirbawnga chu i pawm pumhlum thei tawh tihna mi?” Fawnvelan a tih chuan, “A tum a ruh em a, pawm loh theih a ni lo. Hmeichhe tan chuan min hmangaihtu tluka hlu an awm hleinem” ka ti ve ngei a, “Awii..ka thusawi kha a thinlung chhungril ţek ţek a sin” tiin keimah zawk ka lai leh a, “U Rinchuta te unau hi an rilru a chhe hran lo, u Zirbawnga pawh hi i neih chuan i ti fuh viau maithei a ni. Sangkhuma kha chu in inneih hmain a lungawi leh hman daih ang, ani ti tau mai mai kha engahmah ngai suh, i fa te a la paw pur pur mai ang” a ti a, kan han nui dun leh ţhin, “Sangkhuma hi chu a ti tau thut zel a, awm a ti nuam lo vek zel alawm” ka tih chuan, “Primary sikul a inawkhlum kha i la hria em?” a ti thut a, “Sawi rih suh, ka ke a na, thlahrang ka zawnpui hman rih lo che” ka tih chuan, “Pasal i neih hmain ka youtube channel hi min tih lenpui hmasa phawt rawh, i tel chuan boruak a ni huau huau zel a, mi i hip thei ber” tih pahin phone min rawn pe a, subscriber 20 vel lek a la awm a, a video hnuhnung ber, thla hmasa a miin en tu a la nei bawk si lo, “Fithangi nena kan eizawnna tur a nih kha” a la ti zui a, “Ţan i lak loh chuan rilţamin in thi dawn a nih hi” ka tih chuan, “Ni reng e, tihdan min ngaihtuahpui teh, i ke dam veleh primary sikul ah thla kan zawng ang, kan hmuh ngang loh leh thawm kan siam chawp mai dawn a nia, a kûk thiam ber Sangkhuma kan thlem lungawi ang a, in awm chuan a lungngaihthlak loh” tih pahin phone chu min chhuh sak a, “Boruak kan neih hat loh chuan tuman an ngaihven chuang lo ang” ka tih chuan, “Boruak neih hat kan tum ang chu” a ti a, “Thlahrang zawng reng lo vin i nitin hun hman dan ang te dah ve zawk la” ka tih chuan, “A ngai reng a, miin an ning hma awm emai” a ti then a, “Thil ei mai rawh” ka tih leh pawhin, “Sachek bak eitur a awm lo” a ti zel a, “Keichu pasal ka neih hunah keimah, thingtlang nu ka tia nga, youtube channel ka siam ve ang” ka tih chuan ngei hmel deuhin min en a, ka lo nui har har thung a, “I thawveng leh riau tawh, sachek kan siam reng peih dawn lo a, youtube channel hi tih len dan min ngaihtuahpui teh aw” a tih hnuah, “Sangkhuma takngial pawhin pheikhawk siam zir tumin rilru a siam fel tawh a, inkawmngeih viau mah ila ţhian zinga a rethei bik nih chu a nuam dawn miah lo a nia, pheikhawk siam ka zir ve peih si lo, ka tuina lam youtube hi ka ngaihven ţhat a ngai” a ti a, min haw san veleh a, tlema kan puitlin tak vang nge kan khua hi a reh sawt riauin ka hria.

Aieng kawr ka vel zawh hnuah tuizem tuiin ka sil leh thlap a, ţhu sawn lo vin ka chan zui leh a, Maski-a a ngaihawm viau nain a hminga kal tawh tur a ni a, ţhahnem ka ngai zualin sawisel a hlawh ka hlau a, Remmawii aieng a nih lai ai khan ka uluk daih zawk.

Ka phone ri reng chu ka en a, u Zirbawnga leh bawk a lo ni. “Hna ka thawk” ka ti nghal a, “Hei Rinchutan ar talh a phal a, naktukah chaw lo ei rawh u” a rawn ti a, u Rinchut but buta ten thawm an nei lo ve tehmial bawk. “A phal awm lo e..a khawngaih zel alawm” ka tih chuan, “A vulh reng theih chuang loh a tih hi, a siam dan ngaia siam in hne pawn kan hem hmin dawn nia” a tih hnuah, “Rawn len reng a mawi lo a, chhuanlam zawn a ngai” a ti leh a, “Ka nu ka lo dil ang” ka tih takah chuan, “Remmawii tih takah Pathian hian a rem mawi che e Remsial” a rawn ti a, mahni chiaha ţhu siin ka nui pût pût a, “Nangpawh bawng viau mahla zir tham tak chu i ni u Zirbawng” zak chung chungin ka ti ve a, “Rapper pawh ni ila kan diau bik lo viau ang tiraw?” a ti mai mai tawh a, diktak chuan kan inbe ngun lutuk a, kan ţawng duh tehreng nen sawi tur a ram pawh kan hre tawh lo.

“Zanah ka lo leng ang” a tih hnuah a dah a, phone aţang mai mai chuan min thawk khum pha lo nain boruak a dai sawng sawngin ka hria. U Lalhuman, “Remkalam” a rawn tih rualin a uap phui leh nghal churh thung a, “Eng nge?” ka tih chuan nui vur vur chunga, “A nuam i ti” tih leh ka lam pana rawn kal a rual a, a siliper bun ka en rualin zu a rui leh tawh tih ka hre nghal vek. Tluk palh te a hlau ve ţhin a, chapal ţha deuh deuh a nei ve tak nain zu a in chuan tuna a siliper bun bak hi a bun ngai lo.

“Enteh maw, Nobawihi han zah loh zia chu, ka puih nasat tehreng nen kan inngaihzawn laia ka zu in man min ţhing, a hlawmin min pe rawh a la ti zui a, tuna a khawi pa hi a duh lutuk a, hepa hian a ei ral lek lek tawh a, a mangang a nih hi. Inngaihzawn laia a thil min pek min dil let lehah ka ngai” a rawn ti nghal mawlh mawlh a, ka bula a ţhu chiah phei chu zu rim a nam huam a, “Ka va han pe awm lo tak aw…min dil leh pawhin ka tha ka lo dil ve ang” tih pahin chemte min chhuhsak a, a kut ka siltir te te hnuah aieng chu min zai chhawk a, “I hlauh ber tur ka hrilh ang che aw, keimah anga zu in mi hi pasalah nei suh, keipawh ka in tam nghal lo, mahse kan intam emaw in tlem pawh ni ila sim a har, hlimna a chhawm lo. ‘A laiah Isua’ ti luah luah thei hi an ţha ber” a ti ve luam a, ruihhlo bawih a tang ho hi an ruih laiin an chapo thei viau na a mahni nun chhuang tak ka la hre lo reng reng.

Zanah rin loh deuhin kan khaw college naupang zirtirtu a lo lut hlawl a, tshirt leh kekawrtluan lianpui a ha a, amah a lian si lo, kawrfual ha te pawh a ang a, nidang zawnga rawn leng ngai mang si lo, ka ngei tak tak a ni. Ka nuten an lo chiauau vat a, ka bulah rawn ţhuin, “I ţha maw?” tih paha ka lam hawia a nui chu a aia nasa a lo ţhen khum ka chak ut ut mai.

Reilote hnuah u Zirbawnga a lo lut ve a, ka bulah bawk ţhuin a laiah ka ţhu a, ani pawh ka nuten an lo be chhe tawh bik lo a, college zirtirtu k’u Liana ai mahin min ţhut hnaih zawk. K’u Liana lah chu ka nute nen a inhre sa tih takah a ti ti a kalin, “Zanin chu khilaiah khian ka kal a, ka’n lut kawi ve reng reng teh ang ka tia, Remmawii pawh hmuh loh karin hei a lo tlang ve luau tawh alawm” a ti phar phar a, a nui kar kar reng a, ka nu’n, “Lo leng ziah rawh” a tih te chuan midang hriat ve loh turin ka beng zawnah u Zirbawngan, “Hmh” a rawn ti a, thliin min chhem ang maiin a thaw hak a, a zo der a ni mai, tuman hliam an tuar lo.

“Kumin chu kum dang aiin naupang an tam a, kan buai ve riau a, Remmawii a rim tham tawh tih pawh kan lo hre chang tawh hleinem” tiin rang deuhin a ţawng zawt zawt a, a tlirin a tlir zawt zawt a ni ber, a sawi duh a sawi zawh rualin chil ngah hmel deuhin a ţhelret ţhial lai chu a ţhial leh zawt zawt a, a lem palh ang tih mawlh a ni ka lo hlauh ni. Ka nu lahin, “Lo leng rawh ka ti lawm lawm reng a, ngaihsak duh hek lo che” a ti vel a, a lo nui kar kar a, an pahnih hian innei daih se a ţha ang. Lehkha chu a thiam, thil dangah a laktlak tehchiam loh bakah kei aiin a hniam zawk daih a, hmeichhia lahin keini aia hniam chu kan duh lo ve ngei zel a, pheikhawk sang bun zawk pawh nise ka sang zawk tho ang. Bakah, a hmelţha ka tih chi a ni lo, a upat tawh vang nge a chal a kawlh der tawh a, amah a cher bawk vangin a lawk lel a, lukhum khum se, naupang ang chuan inchei se kan piai kan piai maithei a ni. Hallelujah chorus kan rem te hian a ţang lutuk hi a zuang auh auh zel a, a ţhialret lah a ţawng tui lutuk chuan tum loh deuhin a thlauh leh ţhin, uang viau ţhin mah se keini aiin a fingin lehkha a thiam a, pawisa pawh a ngah zawk nain ka duh thei hlawl lo a ni. Maski thih hnuah pawh a lo leng ve fo a, ka dawrah te lo kal be ţhin bawk mah se amah hian lung a ti leng mawh ka ti, eng zûn mah a keng tel lo.

“Remmawite, thingpui va lum teh” tih pahin ka hnungah a beng thak a, ka beisei loh lutuk a a che chuan min la ti phu zawk zui a, “Aw ti rawh, tui deuh khan va lum sak rawh a lo leng khat si” ka nu’n a lo ti ve zat a, k’u Liana lah chu za deuhin a lo nui a, choka a ka phei rualin tui in chhuanlamin u Zirbawngan min rawn zui ve nghal a, ka bula rawn din paha, “Tu nge?” a tih chuan keimah zawk ka lo nur nang mai.

“College zirtirtu k’u Liana a nih saw, a lo leng ve leh zeuh zel, ka nu nen an inkawmngeih a” ka tih chuan, “A ngaizawng che a ni maw?” a ti hmuk a, “Ka hre nang, ka nu’n pasal ah nei rawh a tih ţhin kha a nia” ka tih leh chuan a ner sawk a, “Ka paw nawlh anga ka tlanpui chiam mai tur a sin” a ti a, amah aiin a te daih zawk chung pawhin a thik ngang mai.

“Thingpui lum chuan a lungawi, thingpui baka duh a nei lo” ti mah ila, “A ni pelh pulh ang, zawngţah bilh bawlawk a ang si. Pan ve vang vang pawn inleng dang i lo nei tel ziah” a ti nghut nghut a, a ţhutna lamah a phei leh daih a, k’u Liana te chu sawi lawk lo vin a duh hun hunah a lo leng a, chhuanlam siam theih a ni ve ngai lo.

“Nang ve hi…ka va’n hmu ngai lo che ve” k’u Liana’n a ti ta chiah reng a, u Zirbawnga lam a hawi ran tawn a, nui chunga, “High speed in ka rawn zin ţhin a” a tih fiamthu takah chuan ka thaw huai mai, mipa hi chu an insum thei khawp a, an thik em em te pawh ţhenkhat chuan an ti lang lo hmak thei zel.

“A nih chu mawle, khawi khuaah nge i awm?” k’u Lianan a tih chuan, “Kolasib” a tih hnuah u Rinchuta u a nih thu a hrilh a, “Aww…sawi tawh ang khan ka beng var lo lutuk a, hriat ngei ngei tur chi ka lo hre lo palh che a nih chu” tih pahin a ţhut hnaih a, an inkarah chuan ka ţhu leng tawh lo hrim hrim a, thingpui ka sem zawh hnuah a awl lai, k’u Liana bulah zawk ka ţhu a, a tih luih pawh a ni lo ang, hetiang rilru hi a pu ngai lo.

U Zirbawnga hnenah Kolasib a an chhungte hming te sawiin a awm reng ţhin thu te a hrilh a, an han ti ti tak tak chu k’u Liana chuan kei ai pawhin a kawmngeih zawkin ka hria, u Zirbawnga pawh a nui ve hawk hawk tawh a, an ti ti rei hnu phei chuan, “I ţhialret ţhial khan ha a ti ziau” tiin a fiam ngam tawh a, “Ka rawn zin hunah ka la rawn tlawh ang che. Kolasib college a thawkah pawh khan hmelhriat ka ngah alawm, canteen i nghak maw?” k’u Lianan a ti chu u Zirbawnga a hawihai khawp mai.

“Canteen kan nghak lo, ka ţhianten an nghak a” a tih chuan za deuhin k’u Liana a nui a, “Kan nghak a i ti emaw ka tia, ka rawn zin hun chu ka tlawh chiang ang che. Ka ţhiante ho te hi ka tlawh kual ţhin a, i hmelhriat ve vek ang. Inhre tur tak kan lo inhre lawk lo zawk a nih hi mawle” phur zet hian a ti a, “Min rawn tlawh rawh, Kolasib hi chu nuam an ti zel a nia, nuam i ti em?” u Zirbawngan a tih chuan ka pa a lo nui hawk hawk a, an ti ti chu han ngaihthlak uluk viau tham khawpa ropui a ni lo ve em a ni.

“Nuam e Kolasib te chu..E..ngawi rawh ka la rawn zin leh khawp ang” a kut vai chung meuh hian k’u Liana chuan a lo ti a, mipa puitling ve ve tih takah a haw dawn meuh chuan u Zirbawnga pawhin, “Naktuk zanah ar kan hem him dawn, rawn ei ve rawh aw” a ti tawh a, a thik tehreng nen arsa ei turin a sawm ve tawh vel a, “Ka lo tum ang, quarter lamah hian ka kal khat khawp a, ka’n haw phawt ang e, kan la inhmu leh dawn nia” tiin pakhat pawh lungawi deuhin a haw a, ţhutna a awl veleh phur lo deuh anga lang chung hian kan inţhut hnaih a, han nuih chiam chi a ni mang bawk si lo, kan khua a cheng ho reng reng hi chu kan nun a mawl mang a, han in hmelma vak kan awm lo bawk a, u Zirbawnga pawh hi kan khuaah han awm ve tak tak se la chu u Rinchuta ai mahin a buaithlak zawk maithei a ni.

“A fel reuh kha” a tih chuan, “Awii…what a funny thing, hmeichhe rilru aiin i thluak a inher danglam chak zawk a nih kha” ka lo ti hluai a, ka nu leh pa awm ve lo se chu sawi tur ka ngah mai, a ngaithla seng lo zawk ang. A haw dawnah, “Naktuk zan kha aw” a ti leh hram a, k’u Liana a tel ve dawn bawk si, ka peih lo zo vek. “Aw..kal phawt teh” tih pahin ka kut ka vai zauh a, ţum danga min melh ram ram ţhin ka nu’n min hmu lo der hmak a, pasal ka neih loh a hlau awm hle mai.

Kan khuaah u Zirbawnga a awm bawk a ka muttui aniang zingah ka nu’n min lo kaithoin, “I nu Sawmi sawn a sam a ti kir duh” a rawn ti a, hna ka nei dawn tih hriain ka inperh tho rang nasa, “Khawiah?” ka tih chuan, “Saw, a nghak che, tho la a ni mai” a ti a, a chhuah rualin khum aţangin ka chhuk a, nu Sawmi te ang sam tih kirna chu inah hmanrua ka kawl vek a, vial hmaa tlemte paih a ni leh mai a, a awlsam bawk si, zingkar aţanga pawisa hlawh chu tu fa in nge duh lo ang ni?

“Nu Sawm” ka tih veleh, “Remmawi, va zung thuai thuai la ka sam hi min han tih kir sak zung zung teh, a sei leh deuh tawh a, kalna tur ka nei, hmanhmawh rawh” a lo ti zung zung a, “Hmanhmawh viau mah ila ka kal chak thei lo a nia aw” tih pahin bualin lamah ka bai phei chhat chhat a, “Kalvari in Sangkhuma nen an lum a ti mai a, in na viau em ni? Sangkhuma lah khan mi bo a zawng leh ang lawp lawp bawk sia” a tih chuan, “Na em em lo e” tiin bualin chhung aţangin ka chhang a, “I pi Binladarin vawk chaw a rawn la a, pasal a nei dawn a ti che a” a ti leh a, ka pi Binladari lah hi miin thingpui hak leh kurtai thlum deuh an lo hlui chuan a thil hriat zawng zawng a sawi vek zel.

“Aaa…neih te pawh a la nei ve ang chu, tunah chuan a la ngaihsak thei rih lo” ka nu’n a lo ti hlauh a, “Nei rawh se, pasal nei rual a ni tawh. A neih loh reng chuan fa neih a harsat lutuk ang. Valdiki pawhin doctor hnenah, ‘ka upa tawh sia, ka vawikhat raina a ni bawk sia’ a ti e an tih kha. Fimkhur a ngai, Remmawii chu upat lama naupai chi a ni ve lo, a hun hmain a thlauh ang, a ti bo ang” a ti mauh mai a, hei hi a nia miin min hmuh dan chu, nau pai lai pawh ti bo thei hmuhin min hmu a, ka nu sawi ziah ang khan kan khuaah hi chuan ka tan pasal tur an vang pharh mai a ni.

“Awii…ka nu Sawmi chu i ti mak ţhaks, mahni naupai lai em em chu ka ti bo bik nang” bualin aţanga chhuah paha ka tih chuan, “I ti bo leh thei mai ang, ka sam chu min han tih sak teh, a hmawr hi paih la vial kir leh mai rawh, ti zung zung rawh aw” a ti leh zat zat tawh a, “Aw, bathlarah lo va chhuak rawh” tih leh pindana luh ka rual a, ka hmai te ka hruk hul hnuah hmanrua ka la a, tlema han thiam ve deuh takah chuan tuman a thlawnin an beisei tawh lo a, hei ringawt pawh hi ţahpui zawih zawih tham khawpa lawmawm a ni.

“Uluk deuhin hmanhmawh rawh aw, ka mawi lo palh ang e” bathlara ka chhuah rualin a lo ti a, ka nu thingpui min rawn pek chu lain kan bulah ka dah a, ka nu pawh a ding veleh ta reng a, “Sam a tlem chuan ti kir daih ila a lo mawi ber dawn a nih hi tiraw Sawmi?” a tih chuan, “Mawi e…nangpawh ţawn rek reng lo vin ti kir ve rawh, keini ang rualah chuan lu lei si châtin kir fel at se la a mawi ber” a ti a, a hmawr tlem ka paih a, ka vial sak leh hnuah kan chiah rih a, inchhunga ka lut chu, “Remmawi, i nu Sawmi sam ang sawn mi tihsak ve rawh aw” tih pahin ka nu’n min zui lut a, “Lo va chhuak rawh, ti ve nghal law law mai ang” ka ti chu a phur ngang mai. Min hau nasa thei viau mah se ka nu a ni miau a, ka zara mawi ve chu a phu alawm.

Kan hman miau loh avangin ka pa’n ei a rel a, kan mipa te hi chu an fel ve khawp, ka nu nena kan hman loh chuan kan tih ai an ti hreh lo vek a, kan chhungkua hi chu inngeih lo viau siin kan ţang rual ve tlat. Ka nu sam ka tan sak lai pawhin nu Sawmi a lo ţawng reng a, “I inhmu ţha suah mai ang” ka nu hnena a tih loh leh, “Remmawi, pasal nei vat rawh. Nulat hi a nuam nain a tawk chin a awm ve a nia” a ti thul, damdawi rim zawng zawng nen, en reng a ngai a, hnarah damdawi rim a lut a, bengah nu Sawmi ţawng ri a lut bawk a, ka lu a hai muai muai zel.

Ka nu lahin nu Sawmi sam chu mawi a tih tehreng nen a sam a hmu mawi ve thei tlat lo a, tuk ţhuan eikhamah pawh vaihlo zial aiin darthlalang a ngaihven zawk a, darthlalang hmaah a ţhu tum vuau reng mai.

“I nu Sawmi sam a mawi tehreng nen ka inhmeh lo nge ni dawn le…rawng pe la chu parpawr ka ang viau ang a” a ti niah niah a, “Hmanlai rocker ka ang em?” a ti thul, “A mawi em kha, nu Mawisacheki te saw en ta che, midang daih a tih tir a, a hmaifangin a zir bawk si lo, love sign chei kir bep a an em saw, i phun peih si” ka tih chuan, “Lukhum khum ka ang em?” a lo ti leh a, “Ang lo, lukhum i khum loh kha, lukhumah lu lei a awm ngai em ni?” ka ti a, kan inmelh leh ran tawh a, a tawpah phei chuan beidawng deuhin, “Ka sam hi a kir ţha duh bik aniang” a ti ta ringawt a, kan khaw nu hoin an intih hmuh a, nakin lawkah ka pi Binladarin a duh ve leh mai ang.

Chhuna aieng ka buaipui laiin ka bulah a rawn ţhu a, a sam a sawisel dawn emaw ka tih nen, “Remmawi, Zir Thianghlima nen hian in inkawp nghet ve tak tak em ni?” thutak deuh hian a ti a, nu te bula ngaihzawng sawi tur em chuan ka la inringtawk lo a sin mawle.

“Ka hre lo” ka ti lai rût a, “In inbia a, thil a hawn che a, a rawn leng reng chung pawhin in inkawp ngheh leh ngheh loh i hre lo amaw?” a tih chuan, “I awm a ka zam vek” ka lo ti a, “Ka awm lohin, zawhna ka zawt che a nih hi” a ti vin hlar tawh a, “Khatiang min han zawh thut reng reng che” ka tih chuan, “A khuhhawn dan vak a awm em ni? In inkawp ngheh leh ngheh loh sawi mai ta che” a ti kha kha a, “Ka zak” ka ti chiah chu darthlalangin min tin zuau a, insum hman lo hlau se chu ka ri leh bur tawh ang mawle.

“I va han laktlak loh tak e aw…sawi rawh, ka hau dawn hleinem che. Nizanah i pa nen kan sawi dun a, a birh tluk tluk tho che a, in lo induh ve takzet a nih chuan kan dang bet reng dawn hleinem che” a ti ta mai, zak chung chungin ka nu chu ka en a, “Awii…ka thaw seng lo” ka tih chuan, “Va paih ţhen rawh” a ti then a, min en let ve ran a, “Sawi tur pawh ka hre lo” ka ti leh te te phawt a, “Ka la inngaihtuah chiang lo” ka tih chuan, “In inkawp nghet reng reng em? Nge naupang chhe inngaihzawnin in la inngaizawng reng?” a lo ti a, “Aaa…a hmingin inneih chu kan sawi ve zuk zuk reng a, han sawi chian mai hi a har ka ti rih a” ka ti a, “In in hmangaih a nih te chuan innei tawh mah ula a pawi em ni?” a tih chuan, “Awii…min ti zak” tih pahin a kut ka la a, ngaihtuah chiang em em lo vin a kut ţang ka lo ulh vak palh a, ţe ţhat chungin darthlalangin min chhu bur mai.

“Ka zak thei e a mak ka ti, ka zak chem chem zel, chhungril hnathawh hi a mak” ka ti mawlh mawlh a, “Kalvari pawhin a nei tawh a, pasal nei rual i ni tawh alawm. I duh a nih chuan sawi mai la, ka hau dawn hleinem che, i ute pawhin an hau lo ang che. Naupang pawh i ni tawh lo a, kan dan beh reng che chuan Zir Thianghlima hian a bum che ang a, a ru daih ang che tih te kan hlau zawk a” a ti ve malh malh a, a vin lo nain u Zirbawnga chu a la ring pumhlum chuang lo tih a hriat mai, a fanu neihchhun ka nih vang aniang, ka nu hi a fimkhur tak tak a ni.

“Min ru awm lo e…ka zui a ngai dawn a, ka zui dawn der si lo, kan khua aţanga Kolasib thleng min pu peih dawn lo rapthlak bawk si a” ka tih chuan, “Neih duhna i nei em?” a ti leh tawh a, “Ka inngaihtuah ang ka ti, pasal ka nei dawn a nih chuan u Zirbawnga hi ka nei ang ka lo tia” ka ti ve ta nge nge a, “Nichinah khan sawi ta che, i peh hel kual duah a nih kha. I duh chuan kan dang lo ang che, i duh ang ngeiin thiam i nei tawh a, dawr i hawng tawh bawk a, Maski hmingin aieng a awm tawh a, Sangkhuman pheikhawk siam a zir dawn bawk a, i vei zawng chu i duh angin a awm vek tawh a ni lo’m ni? Ka nawr lui lo che a nia aw, ka fanu i nia, a ţha ber ka duh pui che a nih hi. Zira hi ka chik ka chik a, a hmangaih tak tak che niin ka hria, pawisa a neih leh neih lohah ka teh lo a, i nu ka nih angin i nawmsakna tur ka duh ber. I pa hriat lai pawn ka sawipui duh miah loh che hi, inhawng deuhin ti ti ila, nangmaha thutlukna siam tawp ai chuan a ţha zawk ang” a ti duah a, ka nu hi i lerh e han tih chi a ni tawh bawk si lo, “Kalvari pawhin i sawi ang chiah khan a sawi” ka ti ta ringawt a, “Sawi ang chu, i tana ţha ber tur kan duhpui vek che alawm. I pi Binladari pawn a sawi ang, pasal neih dawn rau rau chuan mi puitling neih tur a nia, taksa puitling lam ai mahin rilru puitling an ţha. Sangkhuma pheikhawk siam zir hma hian i nei duh em?” a la ti tak deuh deuh a, “Aaa…a hun tak chu ka sawi thei lo, ka ngaihtuah chiang ve phawt ang a, ka ţhiante pawh ka rawn leh duh a, u Zirbawnga pawh ka sawi pui leh phawt duh” ka ti a, “I tih dan dan le, amaherawhchu, thutlukna i siam hmain min sawipui leh la, a ţha leh ţha lo engpawh min hrilh vek rawh, zep ţhen i neih a, i tih sual chuan nangmah chiahin i tuar dawn a nia” a ti a, a kalsawn chiah chu ka thaw huai mai. Ka bula a ţhut ve khur lai kha chuan thaw tho mah ila ka thawk tur ang ka thaw chhuak kim thei lo.

Zanah u Zirbawngan min lo sawm thlap a, zanriah ei tura min sawm lui tlat lo kha a lawmawm rualin khawlum laia ar hem chu ka chak fahran lo. “I kal thei angem?” tih paha ka ban a rawn vawn chuan ka ding sawn vat a, nu leh pa hmuh laia inkaih thuak thuak chu ka duh lo reng reng, engtinmah min ti dawn lo mah se an zahawm ve a, an mit kan ti kham palh ang tih te a hlauhawm.

“Ka kal thei tawh lutuk” tih pahin ka tih tur hre lo chuan ka pa ipte pui khai lai ka ban a, ka nu’n, “Remmawi” a tih rualin u Ziran, “Kha kha engatan nge?” a lo ti bawk a, ka pa ipte pui chu thlah leh vatin ka en kual a, mak tih hmel zetin min lo en ran hlawm a, chhun aţang khan ka la lai char char a, a reh thei bawk si lo, ka ning tak tak a ni.

“Kal ang” tih leh in aţanga chhuah ka rual a, u Zirbawngan a hrilh vek tawh bawk a ka hrilh ve tawh kher lo. Bathlara a rawn chhuah ve chuan, “Ka pi Binladari dawrah kal hmasa ila, i kal thei angem? Ka kai dawn che em?” ti a min zawh pahin ka ke a en a, “Ka kal thei tawh ka tih kha, ka kal chak thei rih lo mai mai zawk a nih hi” ka ti a, kan in kan pelh hnuah ka thaw pik a zia chauh a, kan in leh a chhehvelah kha chuan sipai venna hnuaia awm ang vel ka ni.

Ka pi Binladari te in lam pana kan chhuk dawn chuan keimah zawkin ka vuan a, “Kal rawh le” tih paha min vuan letin keimah zawk min kal hmasak tir a, “Ka lo veng ang che” awki dam deuha a tih chuan Maski ka hrechhuak a, thil ho te teah pawh ka hrechhuak reng mai a ni. “Hmanhmawh suh i inti na leh palh ang” u Zirbawngan a tih chuan, “Ka nu’n min zawt a” ka ti ta nge nge a, a zam ve aniang min vuan nghet sauh tih ka hre thei a, “Eng nge a zawh che?” a tih chuan, “I nei duh em a ti?” ka ti chu a thaw hawk a, a zam viau tak tak a nih hmel. Ding meuh a, “Engtin nge i awm a?” ka tih chuan, “I sawi chian hma kha chuan ka ip char char” lo tiin a nui hawk a, “I va han ho mai mai tak, a hmeichhia zawk pawh ka zam lo a” ka tih chuan, “I zam reng nang, rorel tu tur zawk alawm in nih. In thu rel ka nghak a nih hi” a ti a, ka sawi zui pui duh tawh lo, mut hmunah uluk tawkin ka ngaihtuah ang a, thil thleng thei zawng zawng ka ngaihtuah tel vek bawk ang a, ka rilru a hmin zan thei a nih chuan ka nei em em ang.

Dawr a kan luh rualin ka pi Binladarin, “Remmawi, naktuk Zir Thianghlima te vawkin sak hlanin ka sam min tih kir sak ve rawh aw” a lo ti nghal a, ka sawi reng kha, a fate rual lek lek in a an tih ang hi a awt ve zel tawh mai a ni.

“Kan ti dawn a nia” ka tih chuan, “I uluk lo leh bik ang e, i tihsual palh loh nan ka mutthluk pawhin min kaitho zel ang che aw” a ti a, u Zirbawngan dawr thil vel a lo en kual thung a, “Eng nge i lei dawn?” ka tih chuan, “Min chah nual hlawm mai” a ti a, an awm vek tawh a nih ka ring.

“K’u Liana a lo kal dawn em?” ka ti chu min rawn enin, “Ka hre lo, a lo la kal lo” a ti a, amah en khan thik chi a ni lo tih a hria aniang thik angin a awm tawh lo. Ka pi Binladari lahin, “Min dawr ţeuh rawh u, vawiinah bungrua an rawn sem a, a thar lam ţha hlawm a nia, a chhum hmin chi te kha lei rawh u” tiin min lo fuih sauh sauh a, “Lalhuma te an lo kal ve takin kuhva pawh hi la ve hrim hrim rawh Zira” tih pahin a la awm chhun chu bur chungah a dah a, a siam thar pack hnih a phawrh leh a, sumdawn a thiam tehreng nen kan naupanlai aţanga a lo sumdawng lo kha a pawi ngawt mai.

Noodles chhum tur leh eng emaw neuh neuh a lei ţeuh hnuah dawr aţangin kan chhuak a, min kaih a tum zet na a a kawrah vuanin a hnungah ka kal ve thung a, fimkhur turin min ti deuh reng a, ka chapal thar ka bun tih a hre ran bawk, ni lo se ka ke a en apiangin a nui lo ang. Ka tuam tawh lem lo a, vung tawh lo phei se chu a mawi lehzual viau ang.

Quarter kan thlen chuan u Lalhuma a lo awm ran tawh tak tak a, k’u Liana a awm lo a, Fawnvela a awm laiin Sangkhuma a awm lo thung a, “Khawiah nge Sangkhuma?” ka ti nghal a, “A lo la kal lo, u Rinhlua pawh a inkhawm daih, Dawnfuha a nuar a, kan inkhawm ve hman ta lo a, ka inthlahrung tak tak a ni” Kalvari in a lo ti duah a, “A nuar lai i hmu tawh em?” a tih zawm leh zat a, “Hmu nang, engtin nge a nawrh bik a?” ka tih chuan, “Chhuatah a mu tawp a, a tal nawk nawk mai a ni. U Rinchutan, ‘Vuak rual a nih tawh hnua nawrh a la chin chuan ka vaw dawn’ a ti, tunah chuan a la nau em a, vuak chi a la ni lo a, lo kal rawh lo ţhu hahchawl vat rawh, in thil lei chu a van tui hmel em em” a lo ti leh seuh seuh a, “In fapa hi chu a harh e…duhtawka a tlan theih hunah phei chuan hlawh nei a um tur in rawih tawp a ngai ang. A biang lah hi a uai pur a, a vuak rik theih ang ka ring” chhing duar duar chungin u Lalhuman a lo ti a, “Remsial, pawnah, a thim laiah sawn ar va puah ang” u Zirbawngan a tih chuan, “Kan hmu thei dawn mi?” ka ti he haw a, “U Rinchutan a eng laia tih a phal lo, biru deuhah ti rawh u a ti. In hem dawn pawn inchhung gas ah emaw, kawmthlangah hem rawh u a tih kha. Inkhawm zan te a ni sia, inkhawm laia quarter a lo rik luih luih a remti chiah lo a” Kalvari in a lo ti zung zung a, “Hei, hmehên hi keng ula, hmet êng zeuh zeuh mai rawh u” tih paha Fawnvela hmehên min pek chu ka la a, u Zirbawnga nen bawk kan inzui chhuak leh a, a thil tih hi ţul ka ti bik vak chuang lo, amah hian a chak em a, a rawn zin ve chhunah tiin ka lo remti ve mai mai a nih hi. Ka bula awm theih dan tur zawng reng rengin a khawsa a, min ngai ve bawk si, ka hnial zel chuan hrehawm a ti palh ang, a khawngaihthlak.

A hnung lamah kalin chawhtawlh lo inchhawp sa chu ka chhuih lek lek a, u Zirbawngan min veng lo se chu ka tlu leh daih tawh maithei a ni. “Kan kal hlan khan Fawnvela ten an lo talh a” tih pahin chawhtawlh bula ketli lianpui chu a khai kang a, tui lum pawh a lo awm sa diam tawh.

Ar kan puah ţan chiah tihah, “Ka duat che i ti em?” a ti leh tawh a, “Ar kan puah vang hian maw?” ka lo tih chuan, “Ni nang…ka lo zin vang vang a, i bulah ka awm char char bawk a” a ti a, kan bula hmehên kan dah ve ran chuan a hmel a chhun phak lo a, ka kut a rawn khawih rualin, “Min kheuh miah suh, mipa thim lawm, rilru pm deuh hi ka ngaina lo ka tih kha aw” ka lo ti kha kha a, “Rilru pm min ti min tia, i rilru kha a pm zawk. Ka che hlek a min kheuh suh i ti zel a” a ti bul bul a, “Thim thama rem hre deuh mipa ka duh hleinem” ka tih chuan, “Chutiang mi ka ni lo, min ngai dik lo laklawh a nih kha. Ka nuna hmeichhe awmchhun i nia, i mualpho theihna tur thil ka ti lo ang, ka hmangaih che a, ka chawimawi zawk ang che” a ti duah a, ţawngkam a thiam bawk si, “Kan inngaihzawn hnu hian lehkhabu chhiar ka hrat a, engahmah ka ngaih ngai loh hmangaihna vanduai te hian min vel ţep zel” a tih chuan ka lo nui vak a, “U Zirbawnga hi chu aw…what a very zei hrut hrut, nangchu ka lo pawm chat che a, i hmangaihna kha a vannei bik ţhaks” ka ti lang lang a, “Nangmah i very very zawk a nih kha. Keimahni mai bakah kan hmangaihna a inpawm chat tihna maw?” a tih chuan, “Yessi kul rai, tho tamna hmunah keimah nge tho vuakna i thlan zawk ang?” phur zet hian ka ti a, “Nang te chu ka thlang zawk chat lo ngai che mi?” a tih chuan ka nui hak a, “I chhanna ka duh ţhaks, ka pum hmawm hmak, awii…ka thaw seng lo, I may die” ka ti a, kan nui dun deuh reng a, kan infiam pah char char bawk si, rilru phi deuh chiai a min hnaih a tum tawh lo bawk a, hetianga rik pui bawrh bawrh thei hi alawm ţha chu.

“Ka nupui i nih hun chu i vir lo viau ang, sa chi tinreng i hne vek ang, kan vawk chaw pawh a ei tlak” a tih chuan, “A ni maw?” ka lo ti a, “Kan vawk tan chuan” a ti leh daih a, “Einch chha…bialnu te bula vawk hmanga fiamthu thawh thiam ka vawikhat hriatna” ka tih chuan, “Vawk essay pawh ka ziak nghal thiam” a lo ti fiamthu a, ka awm ang ang hian a awm ve a, ka ngaihthlak duh zawng a sawi a, han induh bik viau thei pawh ka ni tawh chiah lo, ka phatsan chiang ropui mai sia, ka kawp deuh reuh ţhin bawk nen, awm sual kher lo mah ila eng emaw riau hian ka in ngai thlawi a, ka khawngaih phah vek. U Zirbawnga kum ang rual, bialnute lawm nan a vawk essay chham chhuak zuah zuah ka hre ngai lo, a phuahchawp chiam lehnghal.

“In va han bei rei, kan ar ei tur kha in puah uih ange, inchhai vel paha puah chi a ni lo” u Lalhuman a rawn ti a, “Lalrinhlua inkhawm pawh a rawn bang tawh, a kekawr zipper a zip phui theihnghilh a nih ţet ţut saw, nangni unau hi chu van thengreng ah thlawk fua fua ula in him ber ang” tih leh hlak hlak pahin ar leh chawhtawlh vel chu a rawn chhun kual a, “Ehe…in pawt pilh vek alawm, in va han tuai nasa awm em em, nangni pawh in in tuai thi phung zel lo maw? Ar hian in in hmangaihna a tuar nasa ber a nih hi” a ti hlut a, a uar thei si, a bengdai thei tu ber pu Taipuia a awm loh chuan kan zavaiin kan tuar vek zel.

U Lalhuma ho a kan inzui phei ţham ţham laiin current a thim a, “A va han buaithlak lehzel, Zira, zana ar puah hisap ranin transformer ah eng emaw i kam a ni lo maw?” phawk zeta a tih chuan, “U Lalhum, phun phun lo khan kal mai teh, ka thang huam a nia” ka lo ti a, “Ka awm tak vangin i thang thut lo ang, i nui hawr hawr a, chawhtawlh si lek lekin i kun alawm” a tih chuan, “Nichin kha chuan ka rim ka chhuah a, hmangaihna rimtui” u Zirbawngan a lo ti a, “Awii…what a very low oxygen, u Zirbawng, ţawng ţawng suh ka pûl dawn” ka ti hluai a, u Lalhuma venna khirh tak hnuaiah tluang takin inchhung kan lut a, Sangkhuman, “Pheikhawk siam hi chu ka tui ve hrim hrim. Ih maw u Rinchut, ka tih tur chi tak aniang, ka mumangah te pheikhawk ka lo siam. Mi ka hmuh reng rengin an pheikhawk bak ka en ngai lo” a ti lung lung a, “Sipai a ţan in tum pawhin in hlawh zat tur thlengin in chhut a, tlan thleng rawh u an tih chin pawh in tlan thleng thei hleinem” u Rinchut but butan a lo ti ban charh a, “Pheikhawk siam hi chu ka tui chilh emai, thil hoteah ka beidawn ka ring lo” Sangkhuman a tih pawhin, “Sipai a ţan in tum ţum paw’n beidawng loin sachek in ei a, a hmunah in beidawng tho” a lo ti leh a, “Mi hnial i va han hrat sawt em em ve le” Sangkhuman a ti bui bui a, a ngawi zui hmak bawk.

Thla êng em em lo lawm turin u Zirbawnga nen bathlarah kan ţhu chhuak leh a, current a thim bawk a tiin ka kut a vawn chuan ka khak duh lem lo a, “A tawp nan zaninah ka ngaihtuah ang a, ka inpeih thlap a nih chuan palai lo tir vat ang che” nui chunga ka ti chu ka kut a hum vak a, “Tharum nen chuan ka peih lo a nia” ka tih veleh min vawnna chu a thlah dul a, ka ngawih rauh rauh laiin, “Huiham” a ti leh ţhin a, “Engati nge i hui pup pup reng a?” ka tih chuan, “Min nei maithei a, ka phur ve a nih hi. Min phun la chu ka par chuai ang, ka thutak zia i hria em? Par chuai thei tur khawpin min ti hlim” tih leh min kuah a rual a, kan awmna hmun hria ni awm takin min thlah leh vat thung a, “Vin deuhin thu hriat nuam i sawi ziah a, i dangdai ve a ni” tih pahin ka chalah a pen leh keuh a, “I hlim laia i awmdan hi a dangdai fe, tharum nen i che zel a, i hlim poh leh ka intisek nasa ting zel mai aniang chu” ka ti fiamthu a, naupang ang maiin alawm a awm le, a awm mai mai dawn emaw tih tawh hnuah pawh min ulh leh thut zel. Fa phei chu nei ila ka tliak rum maithei a ni.

Ka nu hnena sawi leh mawlh ka huphurh a, kan khua angah chuan keimah ang rual, nula tam zawkin pasal an nei tawh a, fa an nei fur tawh zawk. An sawi tawh ang khan hun ţha ka bawh pelh ka hlau ve tho bawk chu, ‘nu’ tih zet tawh hnua, ‘ka zak’ tih chi a ni der bawk si lo, ka kut ţang a ri keuh a, “A va mak, min ulh leh tawh, ka vel leh si dawn che em mawni le” ka ti hluai a, nuih hawk pahin min kuah thuak a, a inlak hran leh rualin current a awm a, kawngkhar a inhawng zui nghal bawk.

“In lu chunga inziak kha chhiar nawn reng rawh u” u Rinchutan a rawn ti fiamthu ve ngei a, kan chungah pastor quarter tih a inziak kuau a, inthawk khum bak a thiang lo, inchhunga kan lut chu ka ţhianten awmze nei deuhin min lo melh a, mit ka siai ruk zauh rualin Kalvari a nui var var a, tun ţum u Zirbawnga rawn zin chu a dan a dangin boruak a danglam nasa a, ka ke na pawh ka hre chang tawh lo a ni ber e.

CONT…

Leave a Reply