You are currently viewing KEIMAH, THINGTLANG NULA S2-35

KEIMAH, THINGTLANG NULA S2-35

Spread the love

KEIMAH, THINGTLANG NULA S2-35

“Huh..keichu ka ngaihdan ho lam chhe te in hre duh a nih chuan ka lawm lo tih te mai hi..huh huh” Sangkhuman min ngaihnep hmel fahrana a tih chuan tur zetin ka melh a, u Rinchutan Dawnfuha a buaipui a, u Zirbawnga leh u Lalhuma ten ar an hem laiin keini ţhianho chu chhuanlam siamin bathlarah kan ţhu chhuak dial a, “U Zirbawnga ka nei maithei” ka ti kha Sangkhuma hian a ngaithei lo fal lehpek khawp mai.

“A neitu tur ber ka lawm te chuan a tawk a ni mai alawm” ka ti fiamthu a, tum bur a min en laiin Fawnvelan, “Inhau suh u, Sangkhuma pawh pheikhawk siam zir tumin rilru a siam a, a ţha. Chutiang bawkin Remkalami pawhin pasal neih tumin rilru a siam a, a ţha tho” inla thupui fun fahran hian a ti a, “Kan pawisa neih hun nghak lo va tuna pasal i neih chuan engmah kan tihsak thei lo ang che” Sangkhuman lo ti vein Kalvari in, “Tunah tut tut an innei dawn tihna a ni chuang lo. Sangkhuma pawh thil ţha deuh zel min tih sak i tum ţhin a, engmah min tih sak lo mah la i awm ve phawt chuan Remkalami nen hian kan lawm tawk a ni mai” a lo ti thuai bawk a, Sangkhuma erawh chuan, “I rilru siam tut tut suh, a nghet lo si, i inchhir leh chuan a pawi dawn a nia” a la ti tho a, “Ka rilru a ngheh loh vang alawm ka phur lai hian neih ka duh. Ka ngaihtuah phawt ang a, ka ngam loh chuan ka nei dawn chuang lo a” tiin ka nui zui duai a, “Thawveng si, pasal i neih chuan tumah kan mu thei lo ang” a ti hmuk a, a tum vuau reng a, a sam a ro si, thinrim tak tak se chu a alh mai ang, han thlem ngaihna pawh ka hre tawh lo.

“Engtia rei nge i zir dawn?” Kalvari in a tih chuan, “Kum1 emaw kum2” a ti leh hmuk a, “A rei dawn ropui mai bawk sia, i zir chhung zawng i ni te bulah i awm vang vang ang a, i lo haw zen zen thei dawn si lo, nupui pasal kan neih ni chuan awm kim hram thei ila ţha ka ti, Remkalami pawh in inneih hun i thlan thiam viau a ngai ang, chhut nasat a ngai dawn a nia” Kalvari in a lo ti sep sep a, “Remkalami rilru ngheh loh zia chu maw..dawr ka hawng ang a pawisa ka khawl dawn a tia, dawr a hawng a pasal neih a tum” Sangkhuman a tih chuan, “Aww..ka hawn rei ve tawh em hi, sawi ang diak diakin a awm theih bik hleinem, ka nu leh ka pi Binladarin ‘nei rawh’ an ti reng bawk si, in sawi dan a inang lo vek a, rilru in ti phir. Dawr tak phei chu Maski boral hma aţangin ka hawng daih tawh, chhut ta che, a rei tawh zia hi” ka ti hlak hlak a, “Rei tawh e…i duh chuan nei rawh a pawi hleinem” Fawnvelan lo ti sam etin, “Mahse, youtube channel kha aw” a ti tel zauh a, u Lalhuman a rawn koh takah chuan Kalvari nen chiah kan ţhu a, nui chungin ka kut a rawn vuan a, “U Zirbawnga nen hian rin aiin in tluang lo, in zin kawng a thui, ka ngaihtuah chet chet hian ka hah ţhin” a ti a, ka pawm pui khawp mai.

“A hma khan ngaiah ka nei a, a awm reng turah ka ngai. A hnuah Kanchhi a rawn inrawlh a, mipa dangah rilru ka pe leh a, kum1 dawn kan inhmuh loh hnuah kan inhmu leh a, min lo la buaipui reng a, eng thutlukna nge maw ka siam dawn ni? Sangkhuma a lungawi loh phei chuan sawipui reng tur an awm si lo, tunlai phei chu ka nuam lo, ka chau nghulh reng a, mahse u Zirbawnga hrilh miah suh” ka ti sap sap a, “I hnar a thi leh em ni?” a tih chuan, “Ka mut laiin vawikhat chiah a thi, lukhamah a lo kai a, ka nu pawhin, ‘i thawkrim lutuk a’ a tia, tunhma pawn thil thak deuh ka ei te hian a rawn thi ringawt zel kha” ka lo ti a, “In entir hrim hrim la ka ti, i chau nghulh ngai si lo a, eng emaw tlakchham i nei aniang, i taksa bakah rilru a hah tel ve ţhin tawh bawk sia, i damloh chuan kan rilru a hah hlawm dawn teh mai a nia aw” ham bai bai chung hian a ti a, “Sangkhuma hmin ka tum ang a a dik vek a ni mai. Damloh tih mai mai te chu a dam leh thei chiang e. Enteh my friend, Sangkhuma liau luau hi engtia thlem nge ţha ang han ngaihtuah ve teh” ka tih chuan, “Hepa hi a hahthlak tak tak a ni, pasal ka neih dawnin a ti tau tawh bawk a, kan inhauh ve tho kha. Pasal kan neih hian kan thi turah a ngai tlat aniang, u Zirbawnga hi i chhuah leh hlauh ang tih ka hlau tawh teh mai a nia aw, nakina thlem lungawi leh theih Sangkhuma aiin ngaipawimawh la, zanah pawh in pahnih inkar bak ngaihtuah tel rih suh” a ti a, a nuihzatthlak lem lo nain kan nui har har reng a, “Awii…i hlim e..i nui huat huat reng mai” a tih chuan kun chung meuh hian, “What a very huat huat” ka ti duai a, a ai uar lehzual a kan nui te chu a nuam, ka chauh deuh pawhin ţhiante bulah chuan a nuam ka ti tho a, rilru nen lam a hahdam em em reng zel mai a ni.

“Buaipui ngai tham chu nise Fawnvela a phe zak zak ang, a ţhut mai mai chuan a ho lam deuh tihna a ni mai. I rilru siam fel phawt la, kan utum khawi thlem lungawi dan tur ngaihtuah chauh rawh” a ti a, “Sangkhuma hi chuan min ngai em a, a ngaingam lehpek lo a nih kha. A chang chuan u ang ten min enin ka hria, kan inzui nasa ve a min ngai lo chi pawh a ni lo” ka tih chuan, “Aniang, Fawnvela nen nupui pasal kan nei hma a, in pahnih tlawnga thil tih dun chang in ngah a, in inngai ang, ‘marawhchu, mihring chu kan awm ngai rengin kan awm thei lo va, Pathianin min duan dan a nei a, mahni intheihnghilh ţhakin midang khawngaih vangin i lo inti khawtlai ange, u Zirbawnga hian nang lo pawh neih tur a hmu ţeuh tih hrereng la, a nghak rei tawk tawh che alawm” a ti malh malh a, ka ke na lo lam a rawn tlawh pah char char a, chutah min rawn hnaihin, “Enteh, ka rai dawnin ka hria, rai tur angin ka awm” a ti chiah chu ka nui tawp chiang ngang mai.

“Engati nge i rai reng a?” ka tih chuan, “Vawikhat chiah ka la rai kha” a lo ti a, “I mak ve e…ţhiante pasal neih tum lai lai a lo rai te chu, ţhianah ka hmang duh dawn che a sin, awii..nang hi, ka ngaihtuahna nuam zawng zawng i ti flop” vin zeta ka tih leh chuan, “Ve a che..rai lo mah ila Nutein a hauh tho ang, Remkalamin pasal a neih hun chu ţhianah ka ţang dawn a tih ziah kha, ka lo din khalh chuan a lungawi dawn lo nasa, min hnek bur duh ang” a lo ti ve hlak hlak a, “Midang vangin i lo inhnukdawk sa reng tawh a ni maw?” melh ram ram chung hian ka ti a, “Ka inhnukdawk lo, theih se chu ka ţang em em ang, a hun te lo thleng se a hriat mai ang chu. Min sawi phur pui ve te te a i nei leh si lo ange aw” a ti kha kha a, ka lo nui duai a, “Kolasib ah ka awm daih dawn a sin, min ngai dawn lo mi?” ka tih chuan, “Ngai dawn che mah ila nakinah kan la inţhen hrang dawn tho tho. Kolasib a kan lo haw changin min chhan ziah ang che” a ti ţan a, “Einch chha…khalam kha chu lungkham suh, an fel leh ka fel ang a, an sual leh ka sual a ni mai. Insual an tih pawn ka hnial lo ang, chutiang vel chu. Mo kan nih vanga min delhbeh bik reng nachhan tur a awm lo. Bakah, a nu leh pate chu an sual lo e…a nu unaute kha an ni mai a, ka hlau lo turu” ka tih chuan, “Ka mopui phakar deuh a awm” a lo ti zauh a, “Ka hlau lo lehzual, mahni pasal a chhungte khin ur ur chu a nuam chiah lo a, mopuite chu inthlahrung miah lo vin ka chhang let char char ngam zawk. I dawih leh lutuk a an zuam che a nih kha” ka ti a, nu leh pa tel lo a seilian tih takah a inthlahrung tlat zel a, u Rinchuta lahin midang hi amah ang vek turah a ngai a, Kolasib a an haw dawn chuan a rukin a hreh ngawih ngawih zel.

“Noodles rim chu i hria em? Ka ril a ti ţam lutuk, awii keichu ka rai chuan engtin nge ka tih ang le? Dawnfuha a harh ropui mai si a, ka khaw lo ang tih te ka hlau” a ti leh ţan tawh a, “Naktukah hrechiang rawh” ka tih veleh, “Ka hrechiang tawhin ka hria, keimah hi ka inhria, in entir hrim hrim chu a ngai dawn tho a, phir nei tawh ila ka ti, phir ka neih chuan rei deuh nau ka pai tawh rih lo ang a, ka duat viau ang, phir ka awhna a rei tawh lutuk” a ti siam siam a, “Dawnfuha ringawt pawh in buai phah a nia, phir phei chu nei ula damdawiinah in in luh chhawk zut ang ka ring” ka tih chuan za deuhin a lo nui a, ka hawi kual thuak hnuah, “Ehe…enteh, saw saw a mak ţhaks” tih pahin kan lam pana setanic Nicky lo phei chhut chhut chu ka kawk a, “Quarter a kal hi ka pa st-an a phal lo a ti ve sia” Kalvari in a tih chuan, “Tu nge st-a chu?” ka lo ti a, “Setana tihna” tih pahin ka kutah a beng thak a, “In awmdan aţang khan min rel” rawn ti hmukin inchhungah a lut a, kan luh ve meuh chuan u Rinchuta bulah a lo ţap hluam hluam mai.

“Eng nge awmzia?” ka tih veleh Sangkhuman, “Tunah la la hian min ţawngţai piangthar rawh, one go rawh a ti a nih kha” a lo ti a, kan en ţhap tih hrereng chungin, “Ka beidawng emai” a ti a, ţap reng chunga chhuatah muin a inzial ngâwih a, “I rui em ni a?” u Rinchutan a lo tih chuan, “Rui lo, ka beidawng, ka nun hi a beidawng a chaurau a nih hi, lighter chhe deuh ang lek ka ni ka alh ţha thei tawh lo” a ti leh ţuau a, “I pa st-a eng nge a an?” u Rinchutan a tih leh chuan, “Sawi ve sek suh, ka be peih tawh lo” a ti a, a chiang zân lo chung pawhin satana biak tlak loh zia a hrethiam ta a nih hi. Hnam dang zingah fak mawitu tam tak an awm nain satana hi chu han rin em em chi a ni lo, biak tlaka ropui a ni lo hrim hrim a, Pathian nung kan neih laia satana lo be deuh tlat ho hi chu an thih dawnah an inchhir thei viau ang. Setanic Nicky kan tih fiam ziah pawh thlanmual zawna kan kal apiangin inla satana fapa tawkin thli thaw ri mai maiah pawh a eih lauh lauh a, a hlauh a, a beidawn tak tak chuan ţawngţaipui ngenin a ţah hluam hluam mai hi.

“Hnawm hnawk hi a rualin la bo nghal vek teh, u Rinchut, one go pawp rawh” a ti leh ţhin a, u Rinchuta chuan a hnaih a, Nicky-a chala a khawih hnuah a hnaih lehzual a, a enchiangin a ruih leh ruih loh hriat a tum ni awm tak a ni. “Thil reng reng, ruihhlo a nih loh chuan a one go pawp theih ngai loh” ti ban charhin a kai tho a, “Helamah hian lo kal teh” a ti a, mikhual pindana an inkaih luh hnu chuan kan in melh khal ralh ralh a, “Setanan ba a rawn ţhing aniang, keichu ka rap tlat, rui thle kual reng mah ila ka be ngam lo nasa, kei aia sual lehchhawng hi biak ka tum lo reng reng” u Lalhuman a lo tih chuan kan nui hak a, “Mahni kan pawimawh alawm, thlarau sualin min chenchilh dawn a nih chuan kan lo inhawn ve te a ngai a, Pathian kan rin tlat a, rinna lama kan chak miau chuan thlarau sualin min hneh thei lo. Setana a tih loh leh ka pa st a tia, a fak khu luai reng a, kha, a tawpah a inchhir em kha, amah maia setana biak tum ngar ngar ţhin pawh ti khawp khan a inchhir a nia, zirtirna dik lo theh darh ţhin ho phei hi chu Pathian hian a en liam mai mai lo ang ka ring, keimahni zawkin kan en liam a ngai a, Pathian chauh lo chu belh tlak a awm lo tih kan chian phawt chuan engmahin min ti nghing lo vang” Kalvari in a lo ti duah a, kan inkhawm thatchhiat ţhin nen u Rinchuta a nei hi a hlawkpui khawp mai.

“Tunah noodles kan chhum ang” u Lalhuman a tih lauh laiin u Zirbawngan hnunglam aţangin ka dar tawn tawnah a rawn dawm a, “Ţhu rawh, i ke a la vun bur kha” tih pahin na lo tein min nam a, ţhutthleng zawn kan thlen veleh min nam ţhu leh a, “Damdawi i hnawih leh duh em?” ti a min zawh paha a rawn kun hniam chuan lu ka lo thing a, tunlai bik hi u Zirbawnga zunzam hi a na ka ti, ka rilru a no thar nge ka hre lo va, nidang ang a ni lo reng reng.

Kan thil sawiin a zir bawk a kan ngawih ţhap laia Dawnfuha a ţah chuan ka phu deuh zawk a, “Engati nge hmarcha i lo ei? En lo hlek chhungin i hmuh hmuh i lo hmawm hman zel a, i taksa a sak ul tawh hi” Kalvari in a ti hlak hlak a, a thinchhiat dan em em hi a sawi ang khan a rai a ni ngei ngei ang.

“Ehiau…k’u Raltlani hmarcha zawrh lai a la ang em em zui, a thak ţha khawp ang. Ţah lohna chi a ni lo a nih kha” tiin u Lalhuma a nui huk huk a, “Ni ang chu mawle, tlaiah u Rinchutan a rawn lei a, ka nu te thawn turin ka tia ka la dah ţha hman lo a nih kha. Aaa…dah ţha mah ila a hmu tho ang, chhuar sira thil inzep thlengin a phawrh chhuak vek zel alawm” Dawnfuha buaipui sawk sawk chungin a lo ti leh hlak hlak a, “Kan lo len hian a bengchheng ţhin sia, u Rinchuta hian min ning thei viau ang. Ţhenawm khawvengten mak an tih phah ang cheu tih te a hlauhawm” inla puitling zeta Fawnvelan a lo tih ve rualin ka bulah u Zirbawnga a rawn ţhu a, “A ning lo hrim hrim, ţhenawm khawvengten mak an ti lo bawk a, pastor pawh kan chhangchhe ve thei tho alawm. In lo len khat tehreng nen in lo len ve chhunah chuan inthlahrung duh suh u” Kalvari in a lo ti sawk sawk a, u Zirbawnga lahin ka kut rawn vawn da da pahin, “I rilruah eng nge awm tawh?” a ti leh ţan tawh a, “I ngaihtuah mek em?” a tih chuan, “Kan buai nuai nuai kha, thluak sawm ka nei bik hleinem” ka lo ti a, “Naktukah park ah kal ang” a ti leh hram a, “A tuk lehah ka haw ang” a tih chuan a lam ka hawi vat a, “Engmaw?” ka tih veleh, “Cham rei ka tih khan tunhma a cham rei ka tih ang kha a ni thei tawh lo. Ka buai tawh a, chuvang chuan nangpawh ka nawr na che a nih kha” a ti a, han ti ti viau dawn mah ila Dawnfuha ţap ri nen a inpawlh a, a har lam hret chu a ni.

“Ka pi Binladari vawkin Sangkhuma leh Fawnvela te nen kan khawih ang a, tlaiah park ah kan kal ang” a ti ţha leh a, “Rawn zin zeuh zeuh chiah i hman tawh a ni maw?” ka tih chuan, “Ni mai e…a hla ve sek a, lehlanga rawn rim theih chu ni la ka rawn lehlang ziah ang” a ti a, nui vur vur chunga, “I rawn lehlan ziah chuan kawng na i nei vat ang, min lo hmeh teh i ti leh a” fiamthu a ka tih chuan, “Aaa…ka tirh che ka ring lo” a ti ban charh a, ka en reng tih hriain, “Ka naupang zawk zawk tawh lo a, ka tir phal lo ang che, ka duat ang che” a ti leh a, min en lo nain chiang kel kawlin ka en a, a mithmul er te mai mai chu ka hmu mawi thar leh a, a hrawk bawk galaxy pawh chil a lem rualin a che ralh a, u Zirbawnga hrawk bawk mawi lutuk hi chu lampui chiam tham a ni ve hrim hrim.

Eitur kan siam zawh rualin u Rinchut but buta te pawh an rawn inzui chhuak a, Nicky chuan a mit a la nuai nuah nuah a, “Nicky, rawn ei rawh, noodles plate khat hi rawn one go pawp teh” ti a u Lalhuman a lo chhaih chuan, “Zu anga one go pawp theih a nih loh kha” a ti tak nain a kun tlat a, “Rawn ei rawh” kan tih ve pawhin, “Ka zak, ka ţap vel sia” tih leh tlanchhuah a rual a, kan hawihai tlang khawp mai.

“Khaw lian lo teah ka awm a, mi chi hrang hrang an awm thung a, Pathianin rawngbawlna hrang hrang thawk turin min dah a nih ngei hi” a tih hnuah u Rinchuta vek chuan, “I va han ţap ring leh pek em em ve” tih pahin Dawnfuha a pawm a, “I lo sik leh pek a ni lo maw u Zirbawng?” a ti leh chiah chu u Zirbawnga a lo ner sawk a, “A vir vang a nih kha, i hmarcha lei a ei” a ti hmuk a, dawhkan kila a ţhut rualin a bulah min pawt ţhu ve a, “Umm..ei vek rawh se, ei nawn loh chi a hre ve mai ang. Veng viau mah ila ven sen a ni lo, a peih chen chen harh rawh se” a ti tawp tawh a, Nicky a chanchin chu sawi zawmin, “A awm ţhin dan a hriatreng theihna tur zawngin fiam lo ula, sawipui bawk suh u, miin hmalam a pan duh chuan inti bengvar taka hawikir lehna kawng lo kawhhmuh sek tur a ni ngai lo” a ti a, kan chhang lo nain a thusawi chu kan zawm vek ka ring.

Ei zawh dawn lamah pu Taipuia pawh a rawn lang ve hlawl a, “I bialnu hual i him nange?” kan lo tih chuan, “I rawn len leh chuan FIR ka theh lut dawn a ti mai a, a hlauhawm emai rim chi a ni tawh lo” a tih veleh u Zirbawngan, “Chei…in khua hi in dangdai e” a ti a, u Rinchut but buta nen an nuih a za fal khawp mai.

Sangkhuma leh Fawnvela te haw hmasain keichu u Zirbawngan min thlah a, muangchangin kan kal a, khawlum ber lai pawhin duh ber te kut lum vawn chu a hrehawm zawk zawk hauh lo, “Thil i va ei tlem sawt ve” min ngaihtuah hmel deuha a tih chuan, “Ka ei vak vak tawh dawn lo” ka ti mawl tawp a, “I damţha tiraw?” a ti leh ngat a, “Dam ţha e…thil ei vak vak chu mawng a rit, ka peih tawh lo” ka ti fiamthu a, “Ei ţeuh ţeuh rawh, thil ei tlem chu mangchhia neih a awl” a ti mauh mai a, “Ei leh in leh mumangin eng nge inzawmna a neih a?” ka tih leh, “Ei tlem lutuk chu mumanga thlahrang hmuhna” a ti leh ţan tawh a, thlanmual kan kal tlang dawn lai chuan ka kal hnaih sauh a, tum nei ranin min sawi ţhaih aniang a taksa ka sik rualin ka darah min lo kuah chawt mai.

“Ei leh in leh mumanga thlahrang hmuh tih vel i sawi khan awmzia a nei hle mai” ka tih chuan a nui hawk a, “Naktuk tlaiah park ah kan kal ang. Ke a i kal peih loh leh bike ka keng” a ti chiah chu, “Kha kha rawn chelek reng reng suh. Khalh peih mah la ka chuang peih lo, bike a chuan ai chuan ke na chung chunga kal chhet a kal pawh ka duh zawk” uar zet hian ka lo ti a, “Bike i hlau em em hi i mak ve ngawt mai” a tih chuan, “Hlauh zawng a inang hleinem, bike a ka chuan chuan thlawhna chung nei lo a chuangah ka in ngai, ka khawngkhawbai thleng ţhak mai ang, a pawi ka ti lo” ka ti a, sawi zui tawh lo vin, “I tih tlat te chuan a pawi hleinem” a ti ta zawk a, kan in thleng min thlah a, ka duh ang ngeiin min kheuh lo a, tunah chuan a rilru a pm tawh ngai lo.

Mut hmunah ka inngaihtuah ve ngial a, ka nu thusawi leh Kalvari thusawi zawng zawngte nen, ka pi Binladari lahin min fuih sauh sauh reng a, khua han var se Nutei ka be leh ang a, thutlukna ka siam thei mai ang. Tumah ka hrilh lo nain ka dawr neitute hi an buaithlak ve a, an faten duh hun hunah pawisa min dil a, an ruih apiangin min hnawtchhuak bawk a, dawrah ka awm rei peih loh phah fo mai. Lo chhanglet siah siah ngam zel lo phei ila chu min zuam viau ang. An ruih hlekin, “Chhuak rawh” an rawn tia, an chhungten an ngam si lo, keiin luah lo ila tuman an luah awm chai si lo a, diktak chuan salon ve lai si a chung rangva a ni daih te hi a zahthlak ve a, han intih lar chiam ngam chi pawh a ni rih lo. Ka customer te lahin lum an tiin an thlan hluam zel a, sam kan khawih phei chuan damdawi rim a na ţhin si, “Tukverh dahbelh rawh” an tih loh leh, “Kil tinah fan hung rawh” an tia, “A lum lutuk” an ti haw ziah a, a tam zawk phei chu rawn kal nawn peih loin, “Min pan theih loh chuan ti tawh lo mai ang” an ti ţhin a, ka han pan ta cheng a, a man a tlawm sa tehreng nen tlawm min dil a, lo nei, feh ţhin an nih hlawm miau avangin kut leh ke tin phei chu kan khua angah chuan ti duh an vang a, mithmul lem pawh han vuah sak mah ila an sim nghal zel a, in lama tawm deuh chawt an awm ve nual a, chung ho chuan min dawr nasa ve viau thung. Hah mai mai chu pawi ka tih loh laiin salon hawng ve si vur leh alu leh papawr ka hralh hnem ber zel a, bungraw man a to si, han hlawk thur thur ngaihna a awm lo. U Zirbawnga hi hman ţangkai ka tum lo, ka duh takzet a, mahse, nei ila, a dawrah khan dawr hawng ve ila, a rukin u Bawiha kalna tur pawh tuak ila a ţha ang te ka tia, khawiah pawh awm ila ka thawhchhuah a nih phawt chuan ka nu te hi chu pawisa thawn zeuh zeuh reng ka tum tho a ni. Nulat laia khaw danga dawr hawn an phal dawn lo nasa a, pawisa ka theh lut ve reng chung hian a tling khawm thur thur mawh khawp mai. Ka dawr hrehawm zia leh an ruih apianga min hnawhchhuah thu erawh ka zep ve tlat a, ngam leh ngam lo vin Fawnvela leh Sangkhuma ten an cho leh thar thar ang a, ka nu leh paten hrehawm an ti ang a, u Bawiha a inthlahrung dawn bawk nen, u Zirbawnga lahin min lo khawngaih leh em em emaw a nia nga, sawi lo law law ila a ţha zawk ang. Dawr mai bakah buaipui tur dang an tam emai, thingtlang nula mah ni ila pachan a ngai tak tak a ni, pa chan ka chang deuh reng mai a ni.

Zing ka thawh rualin sam tih kirna hmanrua ka pack nghal a, u Zirbawnga pawh vawkin thawm ţhat a tum ve ngei si a, a insiam zo diam tawh maithei a ni. “Vawiinah hna i nei em ni?” pindan aţanga ka chhuah ruala ka nu’n a tih chuan, “Ka pi Binladarin in sam ang kha a duh ve” ka ti a, ka pa nuih a za viau mai.

“Ka put ve chiah hian mawi ka ti lo, ka lu a lian si, ka thla ringawt en phei chuan nihliap tlang kir khum ka ang” ka nu’n a lo ti leh tawh a, “Mi tih apiang i awt ve zel a, i lungawi leh ngai mang si lo, mithmul lem ka vuah leh i lo ti huh ngam lo va, tarmit dum i vuah emaw tih mai turin i mit bawr vel a dum kual rulh a” ka ti hlak hlak a, mithmul lem min vuah tir ve ringawt te kha a buai bakah a balh phah a sin, thukah tui kan lum ziah a, meikhu karah a ţhu a, hmai a phihin a ti huh ngam lo leh a, a ûn lutuk hnuah lapaw huhin ka hruk sak ţhin.

Tukţhuan eikham rualin ka pa pawh thatho hmel deuhin ipte pui akin a chhuak leh nghal a, ka nu lahin vaihlo buaipuiin keiin muangchangin inchhung ka ti fai a, che rang duh mah ila ka ke hi chet pui sawk sawk chi a la ni lo. Ka si reng mai chu ka nu’n, “Engati nge?” a ti thuai a, “Ka lei hmawr a durh, i bai lah thak si tui si a nia, ka si ka si mai lohin” ka lo tih chuan, “Nizan i len hlanin i pa nen kan sawi dun leh a, i u Maman min rawn be bawk a, eng thutlukna pawh siam la kan pawm pui vek ang che. Pasal nei turin kan nawr lui lo che a, i neih duh a nih chuan kan dang lo ang che” a ti leh daih a, “Neih pawh a pawi lo a, neih loh pawh a pawi lo” ka tih chuan, “Heiham” a ti hluai a, “Zir Thianghlima beidawng mai lo hi a fakawm letling a nih hi a, vawihnih ka zawh naah che ka beidawng der mai. Mi i an loh ka hlau si a, min ti hah” a ti hlak hlak a, “Aww…i zai ngai chungin rem ka tih thu ka sawi ve a nih hi” ka ti ta nge nge a, “Fiah lo deuhin ka rawn pah che angah ngai rawh” ka tih leh chuan, “Zira nen sawi dun leh ula, i pi Binladarin a fak hluah tawh misual an awm ngai lo, ka ring thar riau mai a ni” a ti a, a lo fel viau tak tak phei chuan ka pi tê hi lawmman pek tlak a ni.

Midangin min rawn zai hmain muangchangin ka pi Binladari te in lamah ka phei a, Maski-a naute ka la tawk zui, nui sang chungin, “Khawiah nge in kal dawn?” ka ti ve tak nain min chhang lo vin min kal pel a, an naupangber thlengin min melh rum em em vek a, mi kâ aţangin thu dik zik tluak lo an hria emaw tih mai tur a ni. Aieng kha chu an nu ber ka dil vek tawh a, buaina thamah ka ngai lo a, ka ţhiante emaw u Zirbawnga vang a nih loh chuan a mak tiu teu ngawt ang.

Fimkhur tawkin ka chhuk thla a, ka kal aiin ka chawlh a tam zawk ang. Kawng dawm chung meuhin ka ding leh vang vang zel a, ka ke na lai mai bakah ka ruh te hi a na ţhûm mai a ni. Dawr chhung ka luh ruala ka pi Binladari lo ang zuau chu, “Ka be hman rih lo che” ka ti a, “Mi kan âng vek tawh a” tiin a phun ve tak nain an in lamah ka phei a, kailawnah chhoin bathlarah ka ţhu a, Nutei ka phone zui nghal a, a rawn phur leh khawp ang.

“Ka harh a ka la tho peih lo” a rawn tih ruala, “Pasal ka nei dawn” ka tih chuan, “Engmaw?” a ti vak a, “Tu nge?” a ti zui nghal a, “U Zirbawnga hi ka nei mai dawn em mawni ka tia” ka tih chuan, “Chei…sawi lo mah la in la inneih ka ring hrim hrim” a rawn ti a, rin aiin mak a ti lo.

“Rin aiin i dawngsawng thiam, i chiau hlut ka ring a nia” ka tih chuan, “Inţhen thei hek lo che u mawle, i ngaih ang em emin ka mawl lo, ka hmu thiam ve vek, in innei har zawk ngawt alawm, ţhianah ka ţang duh a nia aw” a rawn ti zung zung a, “A nuam e…nuam ka lo ti. A in nghah kual chhung vel kha nangni aiin rei ka lo ti daih zawk a” a rawn ti leh zel a, “A nei tu tur zawk ang maiin i phur a” ka tih chuan, “Phur e….ka chhungte ka dil anga ka lo zin dawn. U Zirbawnga kha ka khawngaih ve alawm, hmanni ah pawh, ‘Remsiali ka nghahna lamah ka sam a ţuak takngial dawn’ a tih kha” a tih chuan ka lo nui hak a, u Zirbawnga pawh hi a ti ve mah mah ţhin a ni.

“Lo zin rawh…Sangkhuma pawh pheikhawk siam zir a tum a, Kalvari a rai bawk a, sawi tur a tam mai” ka ti chu a khek tuar a, en aiin a khek sin daih. “In khua hi chu cham hlen nan ka van it tak, vawiinah ka nu ka dil anga ka lo zin khawp ang. U Khumtea chu tu rilru mah tih nat sak tawh suh se” a rawn ti a, rei vak lo kan inbiak leh hnuah kan inbiakna chu kan ti tawp rih a, ka atpui a nih vang nge ka hre lo, Nutei ka biak hi chuan ka zang huai zel. Ka fing sawt zelin ka hria.

“Remmawi…i va rei ve” ka pi Binladarin a ti deuh reng tawh a, a sam a chhe si, khawih phur loh sa nak laiin a hlauhawm ber leh a phunchiar ber a ni a, uluk deuha tih hnuah vawi10 vel en nawn a ngai ang. “Ka lo kal, i hmanhmawh thet thawt si, kan tih hma leh i sawisel hma ang a, ka ning, ka peih lo” ti hlak hlak chungin dawrah bawk ka lut leh a, bah tur bik liau liau a ama lei a lo bat fel thlap tawh.

“Kan lo thleng” Fawnvelan a tih lauh rualin kawngka biang vuan chungin dawr chhung aţangin ka dak chhuak vat a, u Zirbawnga ka hmu chu ka nuih a za ngei mai. U Rinchuta hnathawh thuamhnaw a ha a, danglamna an awm lo. Kamis rawng uk lam hain kekawr tluan hring a ha a, puan pheikhawk pum bunin iptepui a ak a, lukhum parh a khum bawk a, a thawmhnaw hak chuan u Rinchuta aiin a phuar zawk tih mai lohah chuan an danglamna sawi tur a vang hle.

“Awii…i may die…u Zirbawnga nul nul chu ka thi ţhaks” ka lo ti duai a, ka nui zui uar uar a, a zak ve deuh aniang dawrah rawn lutin min nek salh a, “Ka pi, pu Rinchuta aiin ka zei lo zawk a nia aw” a la ti tak deuh deuh a, ka pi Binladari pawhin a lo en hau mai.

“Rinchuta aia zei lo si vawkin ka lo thawm ţha ang tih loh tawp tur alawm, hman tlak miah loh, kan dah ruah tawp khu Rinchuta thawm ţhat tumin a tih chhiat a nia” ka piin a tih chuan kan ţhianhoin a rukin kan nui pât pât hlawm a, “Sangkhuma te an awm a, a tih theih mai ang. A ţul tur i sawi pawh zingah khan kan dah tawh a, a ruak pawh khu hman leh theih a siam kan tum dawn nia” a ti tak nain a inrin tawk loh hmelin hetianga u Zirbawnga zam hmel hi ka la hmu ngai lo, ka pi Binladari lah a hlauhawm si, a duh anga an tih loh vaih chuan a zah ram ramna tur khawpa nasain a ţawngkhum dawn chiang alawm.

“Chem ka pai a” tih paha a iptepui ah lai aţanga chem a phawrh chiah chu a vuan nghet lo aniang, ka pi Binladari lama a tlak rualin, “Ekha…ekha” tih pahin a lo in saseng sawk sawk a, chhuar nghenga ding chung meuh a u Zirbawnga melhin, “Aaa…ti lo mai rawh u, kan vawk vulh lai te khu i khawng hlum ang tih te a hlauhawm. Mi puih i tum nasa ţhin a a lawmawm, Zir Thianghlima hi chu i fel ngawt mai” a ti a, a thaw leh vak ţhin a, keini angin a vin vak vak duh lo na a a hlauthawng ve a ni.

“Chhuk phawt ang u” Sangkhuman a tih rualin u Zirbawngan a chempui thlauh a chhar a, a ah ţhat leh te te hnuah ka chhipah tuai zauhin, “Ka rei lo ang” a ti a, tawi te a min nuihin, “Ka tlaw em em bik lo ka pi” tih pahin a chhuak a, kan thlir zui vang vang a, amah chiah chuan nise ka ngaihtuah anga, ka ţhiante an awm ve miau a, ka ngaihtuah hran lo.

“Ka sam ti kir vat vat la ka zuk veng dawn, dawr lo nghak ang che” tih pahin ka pi Binladari pawh a ţhutna ngaiah a ţhu leh a, “Vawk an inhliam phung ang tih te a nia ka hlauh” a sam ka kilh beh laia a tih hnuah, “I ti sual hlauh ange aw, nangpawh hi Zira ang chiah, chetsual khut khut i hrat a, ka veng pah dawn che” a ti leh a, “Ka mutthluk pawhin min kaitho zel rawh” a ti chu hnunglam aţangin ka insiamchhiat khum vak a, ka chhang ngam hauh lo thung.

“Engati nge i cheh hmawk hmawk a” a lo tih leh chuan, “A hmawr chhia ka paih a nih hi, ka paih loh chuan nangmah bawkin i sawisel leh dawn a sin. Lo hlauthawng suh, nangni ang rual sam tih kir chu ka hnehsawh lutuk” ka ti hlak hlak a, “Saw lam saw hawi rawh” ka tih lohna lam apiang a hawi a, tar tawh viau lo se chu ka duhna lamah ka kuai her sawk sawk reng duh ang.

“Zir Thianghlima min puih nasat zia chu e, malsawmna chaw leh chawhmeh an tih te hian zu han hrechhuak tlat zel a, a mak ve reuh a sin” a ti a, a tep zui chap chap a, “I nu pawh a phur tawh khawp mai, a vannei dawn emai kan tia, Rinhlua aia a upatna a tam lo a, mifel tih takah a duat thiam khawp ang che. Lalhuma takngial pawhin, ‘an chhungkaw fel zia chu’ a tia, a sawi a sawi ve alawm” phur deuha a tih hnuah a hnunga ka ding chu ka malah rawn banin min kheuh zauh a, “An chhungkua hi an â phuang hlawm mai a tia, i awmna tur chi tak a ni” tlang takin a ti leh a, a duh duh a sawi bawk si a, uluk deuha a sam khawih sak zui zel a chakawm tawh lo a sin aw.

“Min hmuh dan hi i thlak vat loh chuan ka duhsak tawh lo ang che, mi zawng zawng aia mawl bik turah hian min ngai a, i sawi peih si” ka ti hlak hlak a, a ngawi daih a, a sam ka tih zawh veleh a, “Kan chiah rih dawn nia” ka tih rualin dawr aţangin a chhuak a, kawmthlangah a chhuk nghal nal nal a, a phun nasa lo ka ti reng a, vawk a ngaihtuah em a nih kha.

Ka kut ka sil te te hnuah dawr nghah pahin kuhva ka thel sak a, ka awm a nuam lo a, nidang angin ka ti zung zung peih lo thung. Panhnah phei chu midang a roll tir daih a, kan ei hlauin kan hmuh turin a dahchhuak ngai lo hrim hrim. Kan awm ve laia kuhva hring a zawh palh chang te hian panhnah roll sa chu inchhunga mi a la ţhin a, pakhat pawh ei ila a ui em em mai a ni, a awm anga kan awm ve a, a tana ui kan nei ni a a hriatin a rilru a na leh em em a, a rilru hi a naupang ţha leh niin ka hria. Naupanlaiin min duat em a, min awm tu ber a ni a, min bual vaiin kan thawmhnaw te a su a, kha kha hre ve ranin engtiang pawhin han che ngeiawm ţhin mah se kan ţhian ho chuan kan hmangaih em em tho, pi mai bakah nu tluk hiala kan ngaih vek a ni.

A rawn let leh chuan, “Ka lu rim hian lu a ti na, nisa hnuaiah a din theih loh, han sût tawh teh” a ti mauh mai a, “Duh hun huna phelh a lak thlak theih a ni lo, a kir ţhat loh chuan nangmah bawk i phun leh dawn a sin, daihlim hnuaiah hian awm mai rawh” tih pahin ţhutna ka kian a, “Hetiang a sam i hren beh rual hian sût leh nghal mai theih ţhin se la ţha tur, min pawt mar ţung a, a rim a chhe si” a ti a, a tep leh chap chap a, a ţhiannu tar tawh bik zia ka sawi chuan, “Kan inkawm nasa viau nain kei aiin a u daih zawk” a ti ve ţang ţang a, “Enteh e…rin aiin an che buai lo, Rinchuta aiin ka zei lo a tia, Fawnvela te kaihhruaina hnuaiah chuan a zei zawk. Hlauthawng deuhin ka chhuk a, engthawl deuhin ka rawn chho” a ti a, thingpui lum turin min tir zui nghal a, inchhunga ka pu lo awm chu ka be ve luam a, ka pi angin a ţawngtam ve lo a, a ngainatawm loh phah chuang lo, a dam dup a, Kalvari nen a kan insual min ţhelh nasa ţhin.

“Ka va hmu cher che ve” a lo tih chuan, “Tunlai chu thil ka ei thei lo a, ka ke ka bilh vang aniang” ka ti a, choka ah ka che rak rak a, Kalvari pasal neih hma chuan an inah hian ka tal tam a, khawhar hre miah lo angah min ngai ţhin tak na a ka kal hi chuan a rukin ka lung a leng ve veng veng zel.

Dawhkana an maian dah chu ka hik pah a, dawhkan bula an thingrem dah chu ka melh zeuh zeuh a, ka pi Binladari tinreng bawm a ni a, a chunga kan ţhut chiah a phal a, pawisa a dah loh pawhin tala lian tawkin a kalh bur zel. “Zira te an ril a ţam tawh ang a” ka puin a tih chuan, “Thingpui ka lum mek” ka lo ti a, ka piin dawr a mi chhang min pe ve thlap bawk a, tun ţum chu a zawrh lai kan ei ve dawn a nih hmel, u Zirbawnga chu awm lo se wadi chhang bawk kan ei leh ang chu.

Thingpui ka siam zawh veleh Kalvari pindan hluiah lutin, “Lo chho tawh rawh u thingpui ka siam” ka ti lang lang a, u Zirbawnga rawn hawi chho nghat vutin min hmuh chuan mawi deuhin a nui a, a nui hi chu ka ngei ber lai pawn mawi ka ti ve hrim hrim. “A thlum bik te a awm em?” awmze nei deuha a tih chuan, “Ka thlum vek” ka lo ti a, mi awm lai hian a kaihhnawih nei zawngin min be ţhin a, Sangkhuma hrethiam ve lo a tum bur phah ziah.

“In van bei nasa em em, keichu ka lo chhuk lo mai ang, ka puin kalkawngah thingpui a paih ziah a, ka lum ang” ka tih chuan, “Rawn chhuk a ngai lo, i ke a nat belh ang” u Zirbawngan a lo ti vat a, “Bike ka lo keng” a tih hnuah, “Kan hnathawhna hi ka mê lo” a ti leh a, a hah deuh aniang, “Aaa…ka dak peih tawh lo, ka rawn chho ang” a ti ta nge nge a, pindan aţangin ka chhuak vat a, an rawn chhoh hmain ka pi Binladarina rawn lut hlawl a, chhun thingpui in dawn chuan ka puin amah chauha a in loh nan dawr hi reilote a khar ve mai zel a, u Zirbawnga te lo lut chu a lo be ţha hlawm khawp mai.

“Chhawhchhi a awm reng si a, buhban kan chhum lo a, ka lo mangnghilh pek a ni” a ti a, ka pu no tur chu lain chhang nen a ţhut hmunah a pe thlap a, a mipa zawk a hrisel lo a, ka nu hnenah hrehawm a tih zia te, inthlahrun chang a ngah zia te a lo sawi ve nasa ţhin.

“Mau rim ka nam em Remsial?” tih paha u Zirbawngan min rawn hnaih chuan a kawng hmaah ka lo hnim a, “Vawk rim i nam” ka ti chu a duh lo khawp mai, a kawr hma a beng thuk thuk a, “Ţhenkhat hnathawk hi mau rim an nam a, a rimtui” a ti mauh mai a, “A hrehawm em? A harsa em?” ka tih chuan, “Hrehawm nang, Sangkhuma leh Fawnvela ten min awl hneh lutuk” tiin a fak zui luam a, bathlarah kan ţhu chhuak a, thli rawn thaw leh zeuh ţhin chu a nuam phian a, pawimawh hmel deuhin, “Ngaithla teh” a ti hmasa te te a, a lam hawi chung meuhin a sawi tur ka ngaichang a, “Hmeichhe hrang hrangin an thingpui lum ţheuh chhawp thluah se, mit tuamin min in tir ta se i thingpui lum hi ka hre hrang chat thei ang” a tih chuan ka ner nang nang a, a hlim vur vur bawk si, “I naupangchhia e a” ka tih lahin, “Naupangin an hre hrang thei nang, tak taka Remsial, i sawi hawng ta rau rau inneih lam sawi leh ang” a ti leh tawh a, “Aw…ka nei dawn che” ka ti chiah chu min en reng a, a chhang hmuam lai ţhial nachang pawh a hre lo, “Eng ngati viau vuau nge?” ka tih hnuah ţhial sawk sawkin a lem dawk a, “Han sawi nawn leh teh” zawite hian a ti sup a, “Ka nei ang che ka ti” ka tih veleh, “Aw haw wow, min tih der em?” tih pahin ka banrekah a rawn hmer a, “Tih der nang, intihderna chi a nih loh hi” ka tih chuan, “Chei..Remsiali ka nei dawn ka thi ţhaks” ti lehin a ding hluai a, thingpui no pawh a keng tawh lo, a lukhum phelhin a a bekah a dawm a, a biang a tuai thla a, “Dawt min hrilh chuan a letling zawngin ka pu ang che” a ti thul, a chang leh a ţhu a, reilote hnuah a ding leh a, chhang chauh ei si kha thil thak ei ni awm takin a si a, “Ka nei dawn che tih thu kha i allergy a ni lo maw? Ka sawi zawh rualin allergy hnathawh langchhuak angin i la awm char char” ka ti hlut a, “Ka thaw seng lo ka la ti lo mah mah” a ti a, chhun pachangah, mi bathlara kan awm lai laiin a lawm lutuk insum zo lo chuan min kuah thawkin nghet deuhin min pawm bet zui a, “Min thlah vat rawh ka chau a nia” ti mah ila, “I thusawi kha sût leh hauh suh ang che. I sût leh a nih chuan ka thinrimna ka ti lang ve tak tak tawh ang, hrehawm i ti khawp ang” a ti nghal khur khur a, hlau lem lo mah ila, “I thinrimna i lanchhuahtir chhung a rei lo thei emai” lo tiin mi an awm leh awm loh ka hriat theih nan ka meng kual pah rulh rulh a, u Zirbawnga liau luau hi chuan engahmah a ngai leh lo tawp ang.

“I la hre lo a nih kha, ka thin a rim chuan Lalrinhlua pawhin min chhang ngam lo. Tun thlengin tlawm zawkah ţangin ka dawm zel thei che a, thinrim ka duh lo a nia” tih leh min thlah a rual a, “Fiam kual leh bum mai mai rual ka ni lo bawk a, ka ring che a, naktukah ka haw ang a, Kolasib ka thlen hunah ka rawn sawi nawn pui leh ang che” thutak zet hian a ti leh a, ka tihder ngai mang si lo, ka nei ang che ka ti kha a awih hleithei der lo a ni.

Kan ţhut ţhat leh ruala, “Ka awmdan hi thil pakhat hrilhfiah dan ka hria” tih paha ka lama a rawn kun hnaih chuan, “Han sawi teh” ka lo ti a, “Exam a ţha deuha pass angin ka awm” a tih veleh a, “Ka pass ţha ngai lo a ka hriatthiampui lo che” ka ti chu a nui hmel a bo hmak a, mak tih hmel zeta min en vang vang hnuah a nui chhuak leh hawk a, “I hlim ve hi chu i hlauhawm ngawt mai. Hlim apianga damdawi ei ngai te i lo ni ange aw” ka ti fiamthu a, min rawn ţhut hnaihin kan insi chêt a, “Keimah i nih loh chuan i hrethiam lo ang. Keimahah inchan la, ka en ang chein in en la i hrethiam chauh ang. I awih lo maithei, ro hlu deuh angin ka en ţhin che a, ka ro hlu a bo a, ka zawng a, ka hmu leh a, a bo leh ka hlauh lai takin ka rohlu chu a bo tawh loh theih dan ka hmu chhuak a, ka tan chuan ro hlu ang i ni” a ti sup sup a, ngaihthlak a nuam viau mai.

U Zirbawnga te vawkin lama an chhuk leh hnuah chauh ka pi Binladari sam ka phelh sak a, inchhungah a tlan lut a, keiin dawr ka nghak leh a, ka ţhianţha ber Kalvari hnena chanchin hrilh tumin ka phone a, “My friend, u Zirbawnga hnenah ka nei ang che ka tia, ka thi ţhak a ti. Kan la thi dun ţhaks ang ka tih ţhin kha i la hria em?” ka tih chuan, “A ni maw? Ka van lawm tak aw…nizanah inhawng deuhin kan ti ti a, a haw hunah kan thusawi ka la hrilh ang che. Damdawiinah ka kal a, ka rai chiangkuang khawp mai. Dr. Balunga nen kan inhmu a, damdawiin a ka kal chhan te min zawt a, ka rai thu ka hrilh laiin a nui vel, keichu pawi ka ti tawh lo, nei pawp pawp ila, chhangchhiat chhung a rei lo zawk an tih kha” tiin a nui har har a, “Phir ka neih phei chuan ka duhthusam a kim a ni mai. U Zirbawnga nen a in insawi fel thei pawh a lawmawm. Tlaiah arin ka ti fai duh awm sia a tia, a lukhum khum lai kha u Rinhluan a zawng a, awii..keichu sawi tur ka ngah thei e nakinah hmaichhanah sawi ang. Tun atan chuan ka rai tih kha lo hre phawt mai rawh aw, a pakhatna a ni chuang lo a, duh leh ka pi pawh i lo hrilh ve dawn nia” zangkhai zetin a rawn ti zung zung a, “U Rinchut but but an engtin nge a tih? Dawnfuha kum1 a tlinna a la rei lutuk bawk si lo a” ka tih chuan, “Aaa…engtinvak a ti lo, ka rai ka tia, a pawi loh chu a tia, nakinah ka ei duh zawng a lam khawm leh mai ang, ani ve hi chu thu thlum deuh deuh sawi duah turin ka beisei lo, ka rai tih hria se a tawk mai” a ti a, kan inbiak zawh veleh sam tih kirna vel chu khungţhain dawng chhung ka phiat fai a, bangah Kalvari nen a kan thlalak te, kan ţhianho a kan thlalak te a la intar thluah a, thlalak ka en laia Sangkhuma bik ka hmuh chuan ka rilru a hah, thlem nasat a ngai leh dawn si, kan inthlemna lamah kan inhau leh vak ang tih te a nia ka hlauh ni.

Ka pi Binladari rawn letin, “I puin mawi min ti khawp mai. Rawng tat lo mah la ka inhmu thar vur a, tun ţum chu ka hau lo ang che, nakin zel han ngaichang ila, a rei hnua a chhiat chuan a thinrimthlak leh dawn a ni” a ti a, ka thaw huai mai. “Kalvari in nau a pai a, ka pi lo hrilh rawh a ti” ka tih chuan, “Em em a, Dawnfuha a harh si, nau pawh nei leh se Dawnfuha an ven uluk loh chuan dam pawh a dam rei nang, hmuh loh karin a lo kawm hlum thei mai ang, hrilh nasat an ngai a nih chu. Kalvari lah hi a fimkhur lo ţhin si a” ti hlak hlak chung hian a invaw fai thuak thuak a, a ţhut hahdam hnuah pawh a sam chu a khawih deuh reng a, ti fuh lo ila chu u Zirbawnga hmuh lai laiin tiang nen min um leh vak awm si a, a lung a awi hlauh chu ka tan chuan thawk huai huaina tham a ni.

“I nu te nulat laia an sam tih dan a nia, hetiang aia sei hret hian an tia, nalh an inti thei em rm a” a ti a, ka hla hriat ngai loh sa chung hian darthlalangah a in en a, “Pu Sawian, ‘ka hmu êng che’ min ti a, eng hmai hnawih mah ka hmang rih si lo a, keipawh ka inhmu êng vâwk mai” a ti leh a, a che vel chu lo en vel mai maiin tlaia u Zirbawnga te an rawn chhoh rualin ka ţhutna aţangin ka tho nghal a, kuhva ka thel ţeuh tawh a, ka kawng a na em em thung a, chumi khami chu a na an rawn ti ve te chu ka na lakah chuan a nep viau ang.

Sangkhuma leh Fawnvela ten hma hruaiin u Zirbawnga nen inkai rialin an hnungah kan kal a, ka ke a na miau a, in kaih ngei ngei a ngai. “I lo zin leh hunah kan lo ah kan feh dawn nia u Zirbawng, thlai rah awm hunlai i rawn nan phei chuan kan nei ve nual a, thar lam deuh deuh i hawn thei ang. Kan feh reng peih loh leh a rukin sava kan veh ang a” Fawnvelan a ti luam a, chanchin engmah an la hre ve si lo, u Zirbawnga nen chuan in enin awmze nei deuhin kan nui a, Fawnvela chuan a hrethiam mai ang a, Sangkhuma hi a ni buaithlak leh ber tur chu.

CONT…

Leave a Reply