You are currently viewing KEIMAH THINGTLANG NULA S2-36

KEIMAH THINGTLANG NULA S2-36

Spread the love

KEIMAH THINGTLANG NULA S2-36

“Insiam la ka lo sawm ang che” kan inzawn kan thlen ruala u Zirbawngan a ti chu Sangkhuman phawk deuhin min en a, Fawnvelan tim daiin min en ve thung a, a hmui petin a kein lei a thai a thai a, “Khawiah nge in kal leh dawn bik a?” ti hmukin Sangkhuma a tum zui bur a, “Park ah kan kal dawn, lo kal ve rawh u, min lo veng dawn nia” fiamthu a u Zirbawngan a tih chuan ka sik zauh a, “A na…em em che hian, inneih hma aţangin mi sik mi sik suh” a la ti zui a, Fawnvelan aw a thian kharh nain a hrethiam hauh lo.

“In lerh e a, in len hlat vaih chuan khawtlang ka pun ang a kan zawng dawn che u” a ti a, a kal nghal nul nul a, “C. Sangkhum” ka tih pawhin, “Ka rawn lehhawi nachhan tur ka hre lo” a ti ţeng hlur a, a chem vai thuak thuak chung hian an in lam a pan lui zel a, “Mi inrin loh laiin thinrim thut zel suh aw” ti a ka auh zui chuan, “Inring sain ka thinrim ngai bik lo” a ti leh hmuk a, ka en reng ringawt. “Sangkhuma a thinrim chuan a per vak vak zel a, leilung a uiawm emai per dim deuh turin ka va hrilh ange aw, mangţha u le, park a in kal chuan a thlang lama thingbuk hnuai kha chhun pachangah pawh a thim bik reng a nia” hawi kual zawk zawk chunga a tih hnuah Fawnvela pawhin Sangkhuma a umzui ve nghal a, u Zirbawnga lahin, “An va ho mai mai e aw” tiin a nui huk huk duh chauh a, “Sangkhuma hi a thinrim leh thut zel danah hian a V ve ţhin a ang ka ti” a la ti zui a, “Haw la insiam rawh” a tih leh hnuah bike la turin ka pi Binladari te in peng lam a pan leh a, ka bul hnaia mipa awm ho mize in ang lo lutuk hi han sawifiah ngaihna pawh ka hre lo, Sangkhuma ber bur hian hlimna a hnawt ţiau zel a, kan la inhau nge nge ang mawle.

“I pi Binladarin engzat nge a pek che?” inchhunga ka luh ruala ka nu’n phur deuha a lo tih chuan, “Kuhva thlum min khilai” tih paha pindan a ka lut chu min rawn zui lut nghal a, “Kuhva a ţheh che a a duhtawk der a maw? Aizawlah lah Lanfeli te an hlawk thur thur a, kan khuaah hi chuan i thiam thil hi hman ţangkaina a awm ve lo, ţhenkhatin an phal zat chiah an pe che a, ţhenkhatin chawhmeh ang zawngin an pe che a, ti ve tawh lo mai rawh” a ti ţan a, ba ţhin ka peih a, min pe kim lo ho chu ka ţhing char char zel nain rin aiin hna a vang, ka tihsak ve ho lahin an pu rei thei si, dawrah pawh kal ila ka awm mai mai tho zel.

“Ka pi Binladari chuan a man chawi lo mah se a pawi lo. Naktuk aţangin dawrah ka kal leh tawh ang, dawr luah man ka chawi tho a, zanah alu leh papawr leh vur tlem ka siam ang a” tih paha hrukpuan ka ban fel hnua a lam ka hawi chuan a lo nui a, “A ţha, nunhluiah cheng reng lo vin bulţan ţha leh tawh rawh. Vur pawh rilru na miah lo a siam tum rawh, khua a lum a, vur i siam khan mite tan malsawmna a ni mai” a ti zaih a, a nihna takah chuan a buai ru ve deuh aniang, pasal ka neih dawn phei chuan ţhahnemngai deuha ka sumdawn a ngai ang.

Ka inbual sar sar hnuah ka insiam a, kawrfual par chheng, che miah lo mah ila amahin a lam thei ang tih tur khawpa par mawi, Lady Dianas Inn a ka lei ka ha a, a rei tawh nen a la chhe eih lo, mi tam tak hmangaihna aiin a tlo zawk. Ka sam chu ţawn tawm tawpin ka hmaiah cream chhe te ka hnawih a, ka hmui erawh fawh ngam loh tur khawpa sen leh mawmin ka hnawih thung. Infawh hi ka thiam vak loh mai bakah khawlumah phei chuan ka peih lo a, mawm hlup, sen hlarin hnawih ila, hmui hnawih man to zia te, a reh a hlauhawm zia te sawi deuh reng ila thlamuang deuhin a ţhut hle hle theih zel mai. Ka ke a la dam chian loh vanga chapal bun nuam ber tur a ka ngaih ka bun hnua pindan aţanga ka chhuak chu ka nu’n mak min lo tih hmel khawp mai.

“Khati hler hlur khan khawiah nge i kal dawn? Ka vaw dawn che” a ti nghal ringawt a, “Ka chhuak lawk dawn, ka hmanhmawh” ka tih chuan, “Ka nu’n min vaw phawt dawn ti rawh” tih pahin ţhutthleng hnuai atangin polythene a hnuk chhuak a, vaihlo bawk a ni. “Vuak rual pawh ka nih tawh loh hi” ka tih rual chiaha, “Ar ek khawro ruh a ngai” a lo tih ve chuan ka lung a awi lo nasa, “Awii…i ti rapthlak e, ka inkap rimtui vek tawh, naktukah ka rut mai ang” tih leh chhuah ka rual a, “Lalremmawi” a ti vin ţhat a, “Nempachangi hi chu a, a makpa tur aiin ar ek khawro a dah pawimawh zawk a” tih hlak hlak pahin chak thei ang berin ka bai chhat chhat a, kawtlaia a vaihlo pho chu lei ka chhuah khum vak a, ka zia deuhin ka hria.

“I va mawi ve” kawngpui ka thlen rualin u Zirbawngan a lo ti nghal a, amah ka en chiah chu thlifim rawn thaw heuh heuh se ka ti ngei mai. U Zirbawnga lo hmelţhat zia hi, a fai si, a sam dum hlap mai tuai thuak chunga a mitmeng fiah leh thuk raiha min han en paha a hrawk bawk rawn lang che che te chuan kan inbul khawro zet mai chu a ti hring dup a, a palianin min rawn pan hnaih rual chuan fanghmirah ka inchan a, chini tlang lian, damchhunga bawm reng tham hmuhin ka hmu a, a inchhuih khut a, a duh aiin a kal chak a, inring hman lo va ka ke na lam a rawn rah chut takah chuan ka ţe ţhat a, kan inbul vel pawh ka hmu chul nghal rup a, ka hmui ka peh tlawk tlawk laia, “A na em?” ţi duk leh min ngaihtuah hmel zeta a tih chuan, “Na lo se ‘a na’ ka ti nang” ka ti vin hlar a, ka ke ka en chiah chu a lo paw phuk a, ka chapal rawng dumah chuan a pheikhawk hnuai thla a lang kulh mai.

“Inchen phei ila chu i luin min rawn tauh dawn a nih kha, ka ning, ka nei peih leh lo che” ka ti vel a, “A dam leh theih kha, inţhenna tham a ni lo” a ti sam et a, en pawh a en zui lo. “Bike in kal ang aw” a ti leh daih a, helmet a la kang zui nghal a, “Ka chuang peih lo ka tih kha” ka tih chuan, “Ka zirtir ang che” tih leh bike a ţhut a rual a, “Rawn lawn rawh” a la ti zui! “Awi ha..u Zirbawnga chu i ti ang lo e” ti mah ila, “Ka lo vuan ang che, min vuan ve bawk la, hlauhna hi hneh zel tur” a tih laia nur nanga ka lo en te chuan thutak deuhin min lo en let ve a, nui hauh lo a, “Lawn rawh” tih paha a kut min pek chu ka lo vuan a, lawn ka tum ûk ûk tawh hnua, “Aaa…inţhen zawk mai ang” ka tih chuan a lungawi loh hmel nangiang mai. “I lawn loh chuan ka um dawn che” tiin min vau ţan a, “Lawn lawn lawn ti reng suh. Ka haw hmak a ni mai” ka tih lahin, “Ka luhkhung mai ang che. Min thehchhuah tumin inchhungin min chawi mah ula min chawi zo lo vang, naupanlaiin buk lung ka dawlh” a lo ti ve zel a, “Bike leh kan inkar hian eng nge inzawmna a neih?” ka tih chuan, “I hlauhna kha hneh la ka duh, lawn rawh, i tla lo ang” a tih bur avangin a ngawi zawkah ţangin a kut leh a dar ka vuan a, helmet a la khum lo tih hrechhuakin a rukin ka nui sak a, a kut chu thlahin a samah kher ka vuan zui a, na ti angin a awm duh lo viau nain thawm mak deuh deuh a chhuah reng a, ka ţham nat deuh phei chuan a kâ âng duh si lo vin sin deuhin thawm a chhuah a, ka ţhu fel chiah chu a lu a thing nawk a, “Huiham” tih riin a zui a, “I sual ve hle mai” tiin a nuichhuak ta hawk a, a thin a rim duh der lo.

Kan tlanchhuah veleh, “Ka duh thei lo” tih leh a kawra ţham ka rual a, lirthei ke hnih nei chi a ka chuang chiah hi chu ka pum hian ka za a, hlauh tak tein ka hlau ve a ni. “Ka tlanchak lo ang” a ti bawk a muangchangin a tlan a, na deuhin kan sawt ngei ngei ang ka tih rilruk na laiah pawh lungte rap pial ang lek chauh kan ni a, kan thleng har deuh e tih lohah chuan a khalh thiam khawp mai.

Park kan thleng chu amah vuan chungin rang deuhin ka chhuk a, “I lawn thiam a, i chhuk nghal thiam bawk a, i la khalh thiam vat ang” a lo tih chuan, “A lawn leh a chhuk mai mai te chu hak hek lo, ka hlau ka ti ka tia lawm” ka ti vin hlar a, ka ipte aţanga darthlalang phawrh a, “Ka hmai leh hmui hnawih te hi a lo reh hlauh ange” ka tih chuan nur nangin ka inhnawih ţha lai min en a, hetiang zawng zawng huam a min neih tum a ni bawk a a nin hmel viau nain a phun ngam hauh lo.

Ka hmui ka hnawih hlarh hlarh laia, “Ka hmu hmelţha vek tawh che” a tih chuan ka thil tih lai tawp hmakin a lam ka hawi a, ka bulah kuangkuahin a ding run na a ka zam chiam tawh lo. “Hmelchhia min ti ţhin a ni maw?” ka tih chuan, “I rilru ţhat vangin ka duh che a, i hmel pawh a ţha, i ţha vin tuk ringawt mai” tiin za lo deuhin a nui a, nui lui rei se chu a ţap ang tih tur vel a ni. “Nui lui suh, hmelţha min ti vak lo chunga min hmangaih vâwt reng hi ka lawm daih zawk” ka tih chuan a nui tawp hmak a, ka hmui ka hnawih zawm ve thung a, ka hnawih chhah bawk a ka hmui ka chip pawhin amahin a phun mawlh mawlh reng thoin ka hria, mi tam tak angin ka hmui hi mawng tiat lawih ni ve lo mah se hmui hnawih chu ka heh ve hle ţhin a ni.

Inkai rialin park lamah kan phei dun a, thingkung hnuaiah ţhu mah ila a êng ber laiah kan ţhu chat a, thli a thaw tawh bawk si, nuam tak a ni. “Park ah hian tih tur a vang e” a tih chuan, “Saw, in enna a awm saw” tih pahin pipe ang deuh reuh, lianpui mai hi ka kawk a, a tawi ang reng a, a hmawr ve ve, a kaw zawna kan mit kan dah chuan kan inhmu thei a, thil dang chu thingkung vel bak a awm lo, a chhe vek tawh, pipu phei chu a hrui mawih deuh bak a awm tawh lo.

“A ho e..kan awmdun hian kan inhmu chiang thei daih zawk” tih pahin min ţhut hnaih a, mipa zawk a rimtui chem chem mai. “Ka nu te an rawn zin zuai dawn, kei ka haw thung ang a” a tih chuan, “Engtikah?” ka lo ti vat a, “Naktuk tukleh velah aniang, Kalvari a rai no a, ka nu’n a khawngaih deuh a nih hmel. Ka pa’n a rawn thlah zawk ang a, a cham ve lo ang” ţha deuhin a ti tak na a, “I nu chu a awm deuh reng dawn mi?” ka ti tho a, a dar kan zeuh pahin, “Ka hre lo” a ti mawl tawp a, a sam a ti kir ve ţhin a, ka tih sak ve dawn khawp, u Zirbawnga hi chu ka hrilh kher lo ang.

“Lo be ţha viau rawh, thla hnih khat hnu leka i nu ve tho tur a ni dawn a” fiamthu a a tih chuan, “Ka lo sumdawng dawn” ka ti ringawt a, “Nangpawh naktuka i haw dawn chuan zanah vur leh alu leh papawr min rawn siampui rawh” ka tih zawm nghal zat a, inti ţawngkam thiam deuhin, “Ka peih te chuan peih loh tak tak a awm hleinem” a ti vel a, chutah ka kawr rawn tawk zauhin, “A va’n par mawi em em” a ti leh a, pangpar lawm tih takah, “I malchungah ka lo mu chhin” a ti a, kei lahin, “I lu bak a ngai lo, bialnu te malchung mut nan a hman tawp chu a zia lo emai, pawm pawh ka pawm zo lo ang che” ka lo ti duah a, “Aw, ka lu ka lo dah chhin, pangpar zinga mu ang vel ka ni mai” tih pahin a insiamţha a, ka malchunga a lu a nghat chiah chu lai deuhin, “Ka malpui a puam ange” ka ti a, en pawh ka en ngam tawh loh laiin ka nâk zawnah na tawkin a rawn ţham a, “A na” ka tih veleh, “Thingkung a pangang bet tuar khi ka hmu chiah” a lo ti a, kei lah ka dak hram a, thingkung rawng deuh reuh tam tak hi a lo bet tak tak a, ka hmulthi zawng zawng a ding nghal vek thei alawm le. “An muhil ve aniang” a tih ruala ka awm a eng emaw a rawn tla chiah chu, “Ka duh thei lo” tih pahin u Zirbawnga beng pahnih a pawtin ka tung tho lawp a, ka din ruala ka kawr awm keu pahin ka’n tlan tak tak a nih kha; ka ke na kha engmah a na lo, hlauhnain ka khat a, ka hmulthi a din mai bakah ka mur chhuak vek a, ka awma rawn tla chu ka kawrchhung a a luh leh luh loh hre turin en pawh ka en ngam lo. “Ding rawh Remsial” ring zetin a ti tak na a, “Ka duh thei lo” ti tuar tuar chungin park ah chuan ka tlan kual ruai a, thingfak nen min lo changa min vaw ding tawp a nih loh chuan ka ding ngam tawh lo.

“Khalai kha hel kual leh la hetah hian ka lo chang ang che” a tih pawhin, “Ka duh thei lo” ka la ti zel a, ka tlanna tur pawh en lo va ka tlan mawp mawp laiin min lo pawm bet a, “Ka awmah hian pangang a lo tla, nichin khan i hmu lo mi?” ka ti mawlh mawlh reng a, “Eng ngati nge in in um chiam a?” pa pakhat hian a rawn ti bawk a, hlau chung chungin ka in en chiang a, engmah a awm bawk si lo, hlauh deuh neih hi chu a va han hrehawm tak em. Pangang tamna hmunah awm ila chu thi thei lo pawh ni ila ka thi tho ang, chutiang khawp chuan ka hlau a ni. Ka naupanlai aţang tawhin ka mumanga ka hmuh te hian ka ţap chhuak ngei ngei ţhin.

“Ka âwmah pangang a rawn tla emaw ka tia, pangang a nih tawh chuan engmah ka ngaihtuah thei lo, ka taksa ah pawh bet se tlanchhiat a ni mai” tih pahin ka ban leh ka chawn te ka dap kual thuak thuak a, “Pa Ram, ka hnunglam hi han en teh, pangang a awm em?” ka ti thul, ka zahna leh ka na te a bo vek tawh.

“Engmah a awm lo, i hlauh vang mai mai a nih kha, khati tehchiam a i tlan hnuah eng pangang mah an bet tawh lo ang” tih pahin pa Rama chuan ka hnung a chul thuak a, “I ram reh ai vak vak a, park ah in in um nasa bawk si, tawhsual i tawk emaw ka ti mai dawn a sin” a tih zawm leh a, ipte pui a la ak thlap a, a feh haw in min rawn hmu a nih hmel.

Pa Rama kal hnuah u Zirbawngan, “Ding tawp la puih i awl ber, min ti zah, ka um che emaw a ti a nih kha” a ti hluk hluk a, “Min um miau alawm, pangang i hmuhin min kawhhmuh ve kher tawh suh” ka ti a, kan ţhutna kan sawn hnuah pawh kan inbe lo char char a, ka be hmasa awm lo ti a rilru ka siam fel vek hnuah tawlh hmain ka ke a ban a, “A la vung sia, i va tlan chak thei zawk ve” a ti ban charh a, a benga pawtin ka tung tho lawp tih pawh ka hre leh chiah. “Hlauh chuan kan chak a, na pawh kan hre hleinem” ka tih chuan, “Ka rih tehreng nen min tung tho kha min pawm nawlh dawn emaw ka tia” a tih hnuah, “Ka beng i pawt thlawn lo chauh alawm” a ti leh a, a beng ka en chu a sen hlur mai.

“Khatiang zawng zawng dawl zo tur khan Pathianin a siam a, a thlawn mai mai lo tawp ang, beng a nih kha” ka ti duh lek chauh a, kan haw lamah ka ke a na ţha leh a, bike ah hlauin ka chuang a, ka ke nain min tur char char bawk a, u Zirbawnga nen kan lenchhuah ve hi chuan thil ţha ka hawn ngai lo reng reng.

Ka inthlak zawh veleh vur siamna tur lei turin ka kal a, ka pi Binladarin, “I rimtui emai Zir Thianghlima nen in leng a ni maw?” a lo ti vel a, “Chhum a chhah emai ruah a sur aniang” ti zui lehin arbawm a seng a, “Vur siam ka tum a sin” ka tih chuan, “Naupangin an ei duh tho ang siam rawh, tam deuh siam rawh, a siamna tur lei khawl ţeuh la” a ti a, ka neih ang angin ka lei a, alu leh papawr kan tur ka lei tel bawk a, ka nu thil min chah zawng zawng nen ka bawr haw khawp mai.

“Tunlai chu khaw awmdan hi sawi lawk theih a ni tawh lo, khua a ţha tluan dawn emaw tih laiin a sur leh thut zel a, Remmawi puanpho va seng rawh” inchhung ka luh rualin ka nu’n a lo ti leh nghal a, dawr hawn ka duh ve tawh bawk si, ruah a sur vaih chuan khuanu ka dem khawp ang.

Puanpho ka seng laiin rin loh deuhin Sangkhuma a lo kal a, “Isss…inchei deuha puanpho seng a ngai a ni maw? Keichu ka nupui hian puanpho a seng dawn lo reng reng, tlangban tawlh thei ka siam ang a, inchhung aţangin a pawt zal zal reng mai dawn a ni” a rawn ti vel a, phone ah ring deuhin mukbang a en a, “An ei tui hmel thei e, thingpui lum rawh ka ril a ţam” a tih zawm zat a, ka puanpho seng sa ka pawm tir a, inchhungah kan inzui lut a, ţhu chung meuhin uluk deuhin a en zui a, “Tunlai chu ka thil ei a tui lo va, thil ei hma a mukbang en hmasak zel a ngai” a tih chuan, “Mukbang pawh hi a, en reng mah ila sa kan hmeh loh chuan ka ei tui tak tak ngai chuang lo, ka chil a put a a ni mai” ka lo ti a, “Ril tih ţam nan mukbang en a ţha ber, an ei zawng zawng kan hmu pha ve lo tih hre sa ran a en tur, aiiiiii ka ei ve chak lutuk” a ti hlut a, a thil en a mi ten chakai leh kaikuang vel an en laiin thingpui sen hang leh kurtai ka chhawp sak a, chow kan ţhing ka suah tel sak bawk a, “Chow min pek tel dawn chuan thingpui hi thlum ta che” a tih rualin a luah ka beng pawp a, “Ka ning, i ninawm dan em em hi what a very vir, ka pek ang ang che kha ei rawh” ka tih hlak hlak hnuah choka lamah ka phei daih a, duh hun hunah min tihtauhsan a, duh hun hunah eitur a rawn zawng leh a, min chhiahhlawh chei riau zel. Ka ben hnuah erawh a hmui a chip hmak a, dek pawh a ti ngam tawh lo.

Hlauh ang ngei ngeiin zanriah ei laiin ruah a sur ţan a, “Emergency light in min daih loh takin bati dahchhuak ru aw, current hi a thim leh dawn a nia” ka pa’n a ti nghal a, kan khua chu ruah a sur ve deuh chuan current a awm lo zel a, khawnvar thlengin in tin deuhthawin kan la kawl fur mai.

Chaw ei khamah hmun ti faiin thleng ka sil leh a, ka awl veleh phone ka hmang a, Nutei ka biak lai laiin Nunui a lo inrawlh a, “I u Khumtea nen hian inkawp nghet rawh u, pheikhawk siam a zir dawn a, a la hausa dawn teh mai a nia” ka tih chuan, “Ka peih tawh lo. U Khumtea hi u a, mi’n theihtawp chhuahin kan ngaizawng a, a uang zel, ‘indona leh hmangaihnaah hi chuan ka thutak peih lo’ a tia lawm, tikhan min chânah in ngai rawh se” a rawn ti duah a, ka nuih a za angreng.

Kan inbiak zawh hnuah pindan aţanga chhuakin dawhkana vur siamna tur inchhawp ruih chu ka en a, “A va han hun lo tak e aw..nidang zawnga sur mang si lo vur siam dawn veleha han sur” ka ti nang nang a, tihngaihna vak a awm bawk si lo, ‘u Zirbawnga pawh a lo leng thei lo ang’ tih lai takin kan kawngkhar a ri bur bur a, hmanhmawh deuha kawngka lam pan pheiin ka hawn veleh, “Ruah a sur, ruah a sur” tih mawlh mawlh pahin min nam lut rawk rawk a, a nihliap nen rawn inzep lutin bualin lam a pan ding nghal a, a niliap rawn khum luh kha a dah fel aniang a ri leh rawk rawk a, ka nu leh pa meuh pawh an hawi hu hu mai.

Bualin aţanga a rawn chhuak chu a chetdan kha a inthlahrung ve deuh aniang ka nu leh pa lam hawia dingin, “Ruah a sur nasa” a ti tawi tak a, nui hauh lo va ka nu’n, “Kan hre ve reng” a tih chuan ngawi rengin a ding a, kawl a phe zawr a, current a thim rualin rang lutukin chaw ei dawhkan bula stool inhungah a ţhu a, a thawm ka ngaichang reng a, a ţhu fuh chiah lo nge a ri sut sut reng mai.

“Êng kha han chhi rawh” ka pa’n a tih rualin u Zirbawnga phone a êng nghal a, a ţhut ţhat leh rih hnuah min rawn enin, “Chhi ta che” a ti vei hmuk a, a zak ve deuh a ni ngei ngei ang. Ka kalna lam apiang a lo ên zel a, êng ka chhit fel hnua a bul hnaia ka ţhut chuan, “I va rei ve” a lo ti leh a, “Hmek hmuk che hian, engmah zahthlak a awm loh kha, ka nu hi chuan nuih a hreh ber a, fiamthu a thawh pawhin a nui ngai lo, ţhu hle hle rawh” ka tih rualin a ri rawp a, u Zirbawnga ngei mai chu chhuatah a let tual mai.

“Awii…u Zirbawnga tual tual hi ka thi ţhaks, stool ah emaw i ţhut ka tia plastic chair ah a ni maw i lo ţhut a?” tih hluai pahin ka kaitho a, “En chiang la hrilh ta che” ka nu’n a tih chuan, “Current a thim nghal daih a ka enchiang si se hman hleinem, hei chu a chhia dah chhuah tur kan tih kha a nih hi, i van tlu har zawk em em” nui hak hak chunga ka tih chuan, “Ka peih tawh lo tih a haw ka chak ber” a lo ti hmuk a, current awm phei se chu a zak zual viau ang mawle. “Ka bialnu i nih hnu hian ka che chhe zel, chair chhia te chu a khaikhup zawng talin dah ta che” a ti sup sup reng a, thlem lungawi theih hmel pawh a pu tawh lo. “A rawng a uk kher a stool emaw ka ti a nih kha, tunlai chu ka mit a fiah lo leh ţhin, stool ah khan ţhu ţha leh mai rawh, i che chhia kha chu kan lo hre lo der ang” ka tih luam hnuah ka ţhu nghal tharh a, duhthlan tur dang nei hek lo, ka bulah rawn ţhu vein, “Naktuk chu ka haw lui dawn tho a nia” a ti a, vur siamna tur bun chhuah mawlh mawlh paha, “I va hmanhmawh ve” ka tih chuan, “Tih tur ka ngah, nupui neih ka tum a” a ti vel a, eizawnna lamah ka tluang vak rih lo bawk nen, u Zirbawnga neih mai hi pawi tihna em em ka nei tawh lo, Kolasib ah chuan pangngai deuhin dawr ka hawng ve thei tawh em ang chu.

Ruah a sur bur bur reng vangin a haw tur pawh ka thlah hran lo va, “Ka nu a lo kal chuan i lo va hmu ve dawn nia, fel a ti khawp mai che” ti a min chah leh thlap hnuah min haw san a, a nu nen a kan inkar a ţhat loh a hlau aniang a sawi reng mai, a nutei te erawh ka la ngaithei lo reng a, dik lo deuha thil an tih chuan tawrh tlawk tlawk ka tum ve hauh lo bawk. Pasal neih dawn hian ngaihtuah tur a tam lutuk a a buaithlak a ni.

Fawnvelan message in, ‘Pa Raman, ‘Remmawii te park ah chak deuhin an in um’ a ti, pasal neih dawn a ruaiah pawi i lo khawih ange aw’ a rawn ti a, ‘Pangang ka hlauh vang bawk mawle, pawi khawih vanga tlanchhia ka ni awkawzawng lo’ ka ti ve thuai a, ‘Sangkhuma hian biak ţet ţet a nei a, nakinah i zawt dawn nia’ tiin min rawn mangţha zui nghal a, ka thil zawrh tur siamin rei deuh ka meng a, vur erawh a khal hman dawn lo a nih hmel.

Zingah lah dar8 velah ka harh ve chauh a, tukverh ka hawng chu a lo eng uar a, khua a thiangin zan lama ruah sur lo ang hlauh a ni na a chawhnu lamah chuan a sur leh tho maithei a ni. Ka nute pawhin chaw an ei mek a, ka menrei vangin min kaitho hma duh lo a lo ni. U Zirbawnga pawhin message hnutchhiahin, ‘Ka haw a, ka rawn bia ang che. Ka chhungte thil sawipui tur ka ngah emai ka hmanhmawh’ a ti a, a fiamthu te hi kan fiamthu nen a in ang vek tawh, kan zia a kai tawh a nih hi, kan inhriat tirhin a inhmuam up em em a, tunah chuan a ho vek tawh.

Tukţhuan ka ei kham veleh ka intifai a, ka insiam zui nghal a, kekawr thawl hek hawk ka ha chiah chu kekawr ka ha lo emaw ka ti hial a ni. Alu leh papawr khaiin ka kal bai chhat chhat a, hlauh ka neih laia na hre miah lo a ka tlanchhe thei kha a mak ka la ti. Kalkawngah hmuh tur an awm mang lo va, a reh leh tlawk tlawk dawn a ni mai. Dawr chhunga ka lut lah a uap nghal khup a, tukverh ka hawn vek hnuah pawh boruak thianghlim hip angin ka awm lo. Thlang lam aţanga pi Dengin, “I inhawng leh tawh dawn em ni?” a rawn tih chuan, “Aw, ka hawng lo rei tawh emai” ka ti ve mai a, an in lam pana chhuk zet tawh kha a rawn chho leh a, rei mawi tawk hnuah dawrah lo lutin a ţhut hahdam te te hnuah, “Enteh e…i dawr neitute hi an lut ru ţhin a nia aw, ka muhil thei lo tei chhuakin ka hmu fo mai, bungrua ho hi pu haw ziah rawh” a ti ta mai a, “A ni maw? Ka kalh vek sia” ka tih chuan, “Chahbi an nei ve aniang chu ka ti mai, tukverh hi an hawng ngai lo va, kawngka inhawng erawh ka hmu fo. Min hmuh pawhin engahmah an ngai lem hlei lo va” a ti leh a, hemite unau rapthlak lutuk hi chu a, bakah pi Dengi hi chu mi â an ti vek a, tuman engah vak an ngai lo, kan inkawm thei phian thung. Keichu pitar putar ti a kan en liam mai mai ţhin hi ţha ka ti lo va, an khua a har dawn tih hriain buai chung chung pawhin ka kawm hram hram zel.

“Ka endik vek ang a, kim lo a awm chuan pawisa ka dil dawn. Min pek theih loh chuan dawr luah man ka pe bik lo ang” ka ti hmak a, nei lo chung chungin ka lei ve a, a thlawnin ka luan ral tir dawn lo reng reng. “An la ţeuh tawh ang, in veng a hla em a ka lo kal peih lo a, phone ka hmet ve thiam lo bawk a” pi Dengin a lo ti a, “Zanah chhuak tawh suh aw..i sawi tih an hriat phei chuan an sawisa hrep ang che” ka tih chuan a bu nghat nghat a, “Kha, papawr hi ei rawh, i duh leh alu tuiah chiah la” ka tih hnuah alu kan tui ka suahchhuah sak a, ka vin lo nain ka thin a rim zek zek mai, an dawr hlui ka luah vang maiin anni aia dinhmun hniam zawkah min dah tlat a, ‘mi luah hawh tur in ka nei a, keimah vangin an thlamuang a, an tan malsawmna ka ni mai’ tih a ţhat han chhuah der vel a awm lo, ‘ka in an luah a, ka thu thuin an awm tur a ni, ka vil tlat ang a, ka nek chep tlat dawn, kei aiin an hnuhnung zawk zel ang’ tih ang vel a ni. An chak dawn lo khawp mai, hnawhchhuah huamin ka’n bei let ange, an in luah tu zawk mah ni ila dik lo taka thil tih hi ka ngaithei lo.

Pi Dengi haw hnuah ka’n enkual thuak thuak a, a lian tham chu an la bik hauh lo nain sam colour na tih angreng chu ka chhiar a a kim lo nual a, tumah an luh ka rin loh vangin tala pakhat tlawngin ka kalh ţhin kha a nia, chupawh kan khua a kan hman lar ber chi in. Ka fimkhur loh vang a nih rualin ka haw tho tho.

Alu leh papawr ka hralh hmasak te te hnuah ka dawr neitute kawngkal ka lo chang a, kal lo mah se keimah hi an inah ka kal tho ang. Thim dawn ruaiah an tlangval ruih hmel deuha lo haw ka hmu fuh a, “U Pek” ka lo ti lauh a, a kal chhut chhut chu ding datin min rawn en a, “E” a ti hmuk a, kal leh mai a tum chu, “Lo lut teh” ka ti tlat a, lo luh a tum loh hmel em vangin dawr aţang chuan keimah zawk chhuakin a duh lo chung ka pawt lut lui a, ţhutthleng awlah ţhuin a meng nur nasa mai.

“Eng nge Lalremmawi, min koh ve ringawt a?” fiah mang hlei lo va a tih chuan, “Ka dawr thil i hralhna kha min rul vek rawh” ka ti hmak a, pawisa induhthaw ve lai laiin ka haw riau a ni. “Khanglang che hian” bak hlura a tih chuan, “Khanglang zawk che hian” ka lo ti a, “I dawr thil engmah ka ru lo ve, i dawr thil tereuh te te tel lo hian hei leh chen ka nung tawh” min kawk sawk sawk chunga a tih chuan, “Tereuh te te hi i tawnzau aia man to a tam, min rul la a nih chu” ka ti ve kha kha a, “Khatin mi ti khanglang suh” a tih veleh, “Khatia tih i duh loh leh min rul rawh, min pek hma chu ka ţhing dawn che” ka ti ve tlat a, inkuangkuah thlap chungin ka en ran a, “Ve tak che hian, mi ai tlawmin kan luah tir che a, hei aia ţha i hmuh dawn loh nen hian i la pawr ve em em a, chhuak hmak rawh” a ti chiah chu ka ţhu mai mai thei tawh lo, ka ding uai a, ka inrin hmain ka pan hnai bawk a, “Ka salon ve hi e…a chung rangva chauh a la nih hi. Miin inchunga cctv an dah laiin keichu fanghmir bu a awm hnur a, awlsam deuha tui an herh haw laiin keichu pawn a mi khailuh a ngai a, miin chhuat mawi deuh an neih laiin keichu thingphel chhuatah carpet ka phah a, a la ţet zel zui. Miin AC an tih laiin kei ve chu fan tereuhte te leh hmaizah hlai hlup ka inchhawp thluah a, khua a lum tak tak phei chuan mi sam hi ka chhem ro hman reng reng hleinem, sam tlem deuh phei chu inchung leh bang lumin a ur a, kan thin pherh pherh chhungin pheng deuhin a ro hman zel alawm, pawn tuizem min rin tir tawp bawk a, mi sam ka suk dawn apiangin tuilumah tuivawt pawlh a ngai ţhin, i duh hun hun a min hnawtchhuak ngam tur i ni lo tih hre tawp ang che” ka ti hmarh hmarh a, a pawr ve tehreng nen a hmazawn a ding chung meuh a ka an chiam takah chuan a tim dui tawh mai.

“Chhuak nghal rawh ka tih awmzia chu tunah chhuak la, naktukah lo kal leh rawh tihna” a ti a, ka hlauh loh zia hriain a pawr ngam tawh lo. Ka thin a rim em a, a ţul chuan insual mai pawh ka hreh tawh reng reng lo. “Ka hmanrua in hralh man min rul rawh u, i unaute pawh lo hrilh rawh. Dawr hi ka khar anga i nu leh pa ka hmu dawn, min rulh loh vaih chuan dawr luahman ka pe dawn lo che u, police ah ka report bawk ang che u” ka ti salh salh a, “Ka unaute Aizawlah home ah an dah kha i hre lo mi?” a la ti zui! “Khawiah pawh dah se min rul ringawt rawh, i unaute an awm loh phei chuan nangmah bak ru tu tur i awm lo” tih leh inher ka rual a, “A kim lo ţeuh” tih paha a lama ka hawi let leh chu a ban pahnih a lo phar duai a, a kut ţang a ti kawm vek bawk a, “Ka hawisawn lai khan min lo insiamchhiat khum vel a ni maw?” ka tih chuan, “Ka sil riau a” a ti a, a ban chu phar kual velin insawizawi ni awm tak hian a awm a, ka en loh lai khan min insiamchhiatkhum tih ka hre ran tho.

“Ka inkhar ang a, in inah kan kal rual ang, a bo ho ka ziahchhuahna lehkhaphek pawh ka ak thlap” ka tih chuan, “I hman zawh pawh a ni thei a” a lo ti a, “Ka hman ho chu lehkhabuah ka ziak thlap zel, pawisa leh a kaihhnawihah engmah ka ti sual ngai lo” tih pahin ka pawt tho a, a nu leh pa ka khawngaih viau tho nain dik lo chu dik lo a ni mai, mi sualna thup puia ka pawisa ka chan hian kan hlawk lo ve ve. “Pawisa menin meng suh” a tih chuan, “Ka chhing peih hleinem” ka ti a, ka chhuahpui zui nghal a, dawr ka kalh lai te chuan ka en zeuh ţhin a, tlanchhiat em chu a tum lo a nih hmel.

An in lam pana kan kal laiin, “Ka ru lo a nia aw” a ti leh ţhin a, a chang leh a pai chhut a, min nek leh dawrh zel a, “I va han ninawm reuh e aw” ka tih pawhin, “Ka rui tih hrerengin ka bulah i kal a nih kha” a ti a, a ţawngthei rapthlak mai bawk sia, “Kal mai mai rawh” ka tih leh, “Ka kal hi” a ti bak hlur a, thil ru ţhin pawh a ang lo.

Inchhung a kan luh chuan ka kal chhan ka sawi a, a nu’n a thlavang a lo hauh daih a, a pa erawh a ngawi reng thung a, “A unaute home ah kan dah a, chumi hma a bo chu aniang” a ti deuh tlat a, “Dawr luahmanah kan in cut mai dawn nia” tih leh chhuah ka rual a, an nu berin min au zui tak nain ka ding duh bik ţhak lo, remti lo mah se ka cut awm tho emai, tupawn lo hralh ru se a fate vek tho alawm an nih. An thlavang a hauh zel vang a nih chiah kha tumah an fel theih loh, ba min ţhin let vaih chuan min hnial peih chhung ka hnial ve ang.

Ka nu hnenah ka sawi duh kher lo a, Kalvari te pawh ka hrilh chuang lo. “Lo leng rawh u, chow ka kang” a tih miau avangin ruah sur cherh cherh hnuaiah kan kal a, zan chhuah ka peih tawh bik lo emaw ka tih nen ka chhuah chuan nuam ka ti zel tho.

“Sangkhum, i bialnu chu sawi teh” Fawnvelan a ti leh ţhin a, “I ninawm, Nunui bakin min be lo, pasal ka nei dawn te a tih kha, nei teh se, nei suau suau rawh u” a ti hlul hluk a, “I hmuhphak a hmeichhe awm ho hian pasal an nei zel a, pasal hmu zo lo ho hnenah hlawh neiin zin kual tawp rawh, pheikhawk siam aia a hlawk ka ring” Fawnvelan a tih ruala a nihliap thlawk chu thim thamah, “Mipa leh mipa in piai chiam tur a ni ngai lo Sangkhum, thinchhe leh lutuk, vanramah pawh kai la sawisel tur leh kutthlak tur i zawng tho ang” tih pahin a um a, “Min umpui ta che u” a ti tak nain kan che eih lo, Sangkhuma awmdan hi ka hrethiam lo reng reng, ka kham lek lek tawh. Fawnvela nen pawh an inbe tawh lo a, rilru hah leh taksa chau nen, kei takngial pawh ka ţawng peih lo.

Quarter kan thlen chuan Kalvari in, “Fawnvel, i va huh nasa bik ve, ţhu rawh u hrukpuan ka lo la ang, chow ka kang ţeuh a, ka ei leh peih si lo a” a lo ti sawk sawk a, Fawnvela inhruk hulna tur a rawn pek hnuah, “Ka nu a lo kal hunah chaw lo ei ula, Remkalami a rawn ti reng mai, a ngai nghal che a nia aw” nui har har chunga a tih leh chuan, “Awii my friend, keichu min ngai deuh tu bulah ka awm thiam lo, ka lai daih zel” ka ti a, u Zirbawnga nu pawh hi lo kal lo mah se pawi ka ti lo, ka rilruin a mo tur ka ni tih ka hre ran ang a, awmdan ka thiam lo hi ka che chhe lehpek ang.

“Ka awm ve reng dawn a engtinmah i awm lo ang” Kalvari in a tih laiin pindan aţangin u Rinchuta a lo chhuak a, “Min han hnim leh teh” a rawn ti deuh tawp a, Kalvari in, “Ka peih tawh lo, ka huat ngawih ngawih rim chu nam loh mai tur alawm” a tih chuan amah leh amah a inhnim thut thut a, “Dawnfuha i pai laiin eng rim mah i huat loh kha” a ti a, a inhnim leh ţhin a, “Rimtui i tih vanga ka lei kha a nia”a ti leh a, a bangbo hmel viau mai.

“Dawnfuha ka pai lai nen a inang thei hleinem, ka inngaihbel nge tun ţum chu huat ka nei hma riauin ka hria” Kalvari in lo ti vein an nupa chuan an in en a, “Huat neih mai mai te zawng, a tih tur hriat loh thlak emai” pangngai deuha u Rinchutan a tih chuan Kalvari hmel a dur khap a, miin an huat tura a rin loh vang hian a sawi phawng phawng zel a, mize inang hauh si lo hi u Rinchuta nen hian in anna lai kan ngah khawp mai.

“My friend, huat loh hram hram tum la, mi rim mai mai huat chu i ti khawngaihthlak e” tiin ka lo inrawlh a, “Rim ngei deuh ka nei alawm, a mak lutuk, ka duh vanga ngaithei lo ka ni bik lo mah se ka haw tlat a nih chu, hetiang em em hian huat ka nei hma ang tih rin ngaihna ka hre lo, nau nei tawh ila aw…ka ning tlat” a ti ţan a, nau a pai chuan a phun reng zel a, ka zinsan leh khawp ang.

“Aaa…nau neih tawh mai ka duh” Kalvari in a tih leh chuan, “I duhthusam mai mai a nih chu, rai ruala neih nghal theih loh chu pai mai mai rih rawh” u Rinchutan a lo tih sak a, a ţawngkam thiam loh luatah an nu rai no a be thinrim fo dawn a nih hmel.

Fawnvelan Kalvari a lo be daih a, a chow kan lah chu a var pup a, purun sen ut zet mai hi a awm pheuh pheuh a, “I la kang lo em ni?” kan tih leh, “Ka kang tawh, telah ka thlak a, a tawk a ni mai, tui ka tihdan ber a ni rih” nui sang hian a lo ti a, “Engmah kan telh tawh dawn lo em ni?” kan tih pawhin, “In duh leh hmarcha in hmeh dawn a nia” a ti awlsam et a, tel a thlak tawp si a mawm eih bawk si lo, dawra kan ei bak chu chow hi kan ei ngai meuh lo va, Kalvari chow kan phei chuan ril a ti ţam hlawl lo a ni. “Chow chhumah tel tlem i leih mai mai aniang, nang hi, paih mai mai aiah in ei duh loh min eitir a ni lo maw?” Fawnvelan a ti hlut a, “Ni nang…ka ngai ve cheu lawm, chhan awm lo vin in lo kal duh tawh mang si lo va, Sangkhum, karlehah maw i kal dawn?” a ti leh rih a, “Maithei, ka la chiang lo a, ka kal ţep tawh thung a” Sangkhuman a tih chuan, “Min va hrilh ve lo ve, thla tharah emaw ka tia” ka lo ti ve a, “I bialpa bak ngaihsak hek lo che” ti hmukin chow a suak hmawk hmawk a, u Rinchuta bulah a ţhu thurh a, Kalvari in min kheuh zeuh lo se chu ka vin hrep ang mawle.

“Dawnfuha va awmpui lawk ang” a tih takah chuan pindan lamah kan inzui phei a, “Awii my friend, tunlai Sangkhuma awmdan hi ka ngei tlat amaw, pheikhawk siam a zir dawn dek dek a a induh nghal ringawt mawle” tih paha khuma ka ţhut chuan chair pawt hnaiin ka hmazawnah a rawn ţhu a, “Keipawn a hmain ka ngei a nizanah a chhan ka zawt alawm. ‘Tunlai chu a chauh hmel thei si, hrisel loh lai taka pasal neih a tum a, ka kal bo tur hi hria angin a awm lo, ka ngaihtuah deuh bawk a’ a ti che a” tih pahin a rawn kun hnai a, zawitea, “Enteh my friend, a ngaizawng chein ka hria” a tih chuan ka inrin hmain a luah ka beng pawp a, “I kut thawh nghal zel suh” a ti bak hlar mai.

“Sangkhuma nen hian min sawizawm tum zel suh u, ka zak zo vek ang, kan inkawmngeih em hi” ka ti hlak hlak a, a ngaizawng che an tih hian ka thin a ur nghal hlur zel. “Ka pasal neih dawn a a thinrim dan leh tuna a thinrim dan hi a inang hleinem” a tih pawhin, “Ka damlo emaw a tih vang a ni mai alawm” a hma ai maha vin hian ka ti leh a, “Chu chauh chu a ni lo ang, tunhma aţang tawhin bialnu nghet a nei thei lo, a ning zung zung a, i bulah a tap chawt bawk a, Fawnvela leh keichu min be hmasa khat, ka pasal neih hma pawhin nangmah a zui ngun zawk che. A inţanna a rei viau tawh maithei a ni, duh ve rawh ka ti kher lo, a ngaizawng che a ang ka ti mai alawm” a lu tuai nauh nauh chung hian a ti duah a, “A ang tih mai mai min ngaizawng tihna a ni lo, min han ngaizawng teh se, ka kawm tawh lo chiang viau ang” ka ti tan tan a, ka ngaihtuah zawng ringawt pawhin ka ten, Sangkhuma berkher hi chu ţhian ang bakin ka hmu ţha thei lo.

“Hla ka phuah dawn te a tia, ram leh hnam hmangaihna hla a ti tak na a nangmah ngaihtuah chung lo chuan a phuah ka ring lo” tiin a nui a, “Awii…a phuah chipchiar leh awm emai, naupang hla pawh a phuah a tuman an ngaihthlaksak peih loh kha. Sangkhuma hi chu ka hmangaih a, ţhian ang bakin a ni lo thung a, min ngaihzawn tak tak chuan pasal ka neih vat vat a ngai a nih chu” ka ti ta nge nge a, “Ni e, a ngaizawng tak tak che a nih chuan nei vat rawh, i duh ve si lo va, a khawngaihthlak rei mai mai, beisei tur a neih loh chuan a kalsan ve mai ang” a ti a, naupanlai aţanga inkawm ngar ngar kan ni bawk a ţhian pelin vawikhatmah ka la en ngai lo, en nachang pawh ka hre lo a, min ngaihzawng ang tih rin ngaihna phei chu ka hre lo lehzual a ni.

Pindan aţanga kan chhuah chuan chhuat dungah u Rinchuta a lo vei kual thauh thauh a, Fawnvela hnena, “Eng ngati nge a?” zawi te a ka tih chuan, “Engmah a sawi lo, ţhutthleng hnuaite a bih leh ţhin a” a lo ti mai a, Kalvari in, “Eng nge a? Exer i la em ni?” ring leng lawng a a tih takah chuan, “Ka lehkha chhiarna tarmit ka hmu zo lo mawle, mit men a ti nuam a, ka vuah duh deuh a” ţha deuh hian a lo ti a, “I chhipah i khim vu kha” Kalvari in a tih chuan a chhip a dap nghal a, “Ţeh ţawh zel che hian, mahni lu a bet reng han zawn chiam mai chu le(h)” a ti leh nang nang a, “A nih hi” tih paha a lak thlak hnuah, “Ka uang a” a ti a, za lo deuh a nui chung hian tarmit chu a vuah a, “Ka chaw ei a tui loh deuh chuan ka haihawt zel” tiin za lo zetin a nui hul hak a, ţhutthlengah inthlahrun hmel deuhin a ţhu a, u Rinchuta zia hi chu a ţha ngawt mai. “Hmanzanah nachhawkna emaw a tia hmeichhe damdawi a lo ei ringawt lehnghal a, u Rinhlua hi chu Dawnfuha aia ven ngun a ngai zawk” Kalvari in nui chunga a tih chuan, “Hmeichhe lam damdawi leh nachhawkna dah fin tawh suh, ka ei palh lehnghal, thlamuangin ka mu reng reng hleinem” u Rinchutan a tih chuan kan nui dar dar a, “Engtin nge i awm?” Fawnvelan a lo ti lauh a, “Ka rilru a hah, chuzawng chu” a ti a, lehkhabu a bih tak nain a nui suk suk reng a, a nuam viau na a vawiin lama ka thil tawn, sawi chhuah chi bawk si loh zawng zawng nen, ka chauh deuh vangin haw ka rawt a, an lo remti ve mai bawk.

Haw kawngah kan inbe tam vak lo hlawm a, Fawnvelan Sangkhuma nen min be deuh reng a, a rul tawk chiahin kan chhang zel a, “Kan chow ei a tui lo emai naktukah sachek rawn ei rawh u aw” a tih hnua, “Tlaiah Kalvari te kan suah ve dawn nia” a tih leh chuan, “Zanah thlahrang kan zawng ang a” ka lo ti a, “I thaw dik thei e, you are breathing correct, emergency light lo pai ang che” tih pahin a kut a beng thuk a, a nihliap thlawk ta daih chu a umzui leh nghal a, “A hma aiin i cher a, thil i ei tlem thei si, in entir la vitamin ţha ei rawh” Sangkhuman a ti ve mial a, “Engtikah maw i kal dawn?” ka lo ti ve thung a, “Nakinah ka hrilh ang che” a ti daih a, “Dam ţha lo chungin pasal nei lo la a ni mai. Ka awm leh awm loh a pawimawh lo, mahse damţha ang che” a ti leh a, Fawnvela a lo kal takah chuan ngawi rengin a kal zawm veleh mai bawk a, Sangkhuma awm loh laia pasal neih chu a phurawm lem loh. An in zawn kan thlen chuan Fawnvela hnenah, “Ka lu a na, Remkalami hi nangmahin va thlah zuai mai rawh” a ti a, chhan pawh kan chhan hmain an in lamah a chhuk thla nghal daih a, Fawnvela nen kan in en hau mai.

Kan in lam pan pahin Fawnvela nen kan ti ti a, “Tunhma kha chuan pakhatin buaina a neihin kan ţang ho vek a, ţhianhoin kan chingfel ţhin kha a nia, tunah chuan kan ţhianho inkarah buaina a awm ta reng mai” ka ti niah niah a, sawi tur a hre vak lo nge, “Tui i in duh em?” tih pahin bottle tereuhte a rawn lek chhuak a, “Frooti burah tui ka thun a” tiin a nui hak hak a, “Nuam pawh ka ti tawh lo e a” ka tih chuan, “Thlahrang kan zawng anga a dik vek mai ang, hlauh neih chuan rilru a na hman lo, kan ţhianho inkar boruak a ţhat hma chu zantin thlahrang ka zawnpui ang che” a ti a, rem leh rem lo vin ka darah a kuah a, “Pasal i neih hunah phei chuan a kuah muhil ziah che ang a, rilru hahna go away a ni mai, eisss sa” tih paha min kuahna thlahin ka nakah a kheuh zeuh a, eu deuh zawk mah ila ka nui uar uar mai.

“Nupui i neih hnu hian i zei sawt e, hmangaihna lampangah hi chuan khuanu tih lohah ka ring ber tawh che, i sawi lawk ang hi a lo thleng ve ziah” ka tih hnuah, “Thlahrang hmelma, hmangaihna zawlnei i ni ringawt” ka ti a, kan nuih reng vang aniang kan in kan thleng thuai a, kan in mangţha hnuah inchhungah lutin ka ke te ka sil a, ka mu nghal daih a, ka muhil nghal lo thung.

U Zirbawnga message a lo awm tuar a, ‘Whatsapp a ka hming dah dan en teh’ a tih lai bik chu hmu fuhin a phone number ka delete hmasa te te a, u Zirbawnga meuhin, ‘whatsapp a ka hming dah dan en teh’ a ti bawk a a hming dah dan chu ka en a, a lo thlak chu niin, ‘Zira’ ti a dah mai ţhin khan, ‘Pu Zira’ a lo inti der tawh a, a zam lo ham ham lutuk hian min ti zam, inţhenna tham lawih a ni, ‘Nula zel tur Remkalami’ ti a ka hming thlak vein, ‘Ka hming kha en ve rawh’ ka ti a, nui var var chungin ka mutsan daih a, min rawn chhanglet nasa khawp ang le.

CONT…

Leave a Reply