You are currently viewing KEIMAH, THINGTLANG NULA S2-37

KEIMAH, THINGTLANG NULA S2-37

Spread the love

KEIMAH, THINGTLANG NULA S2-37

Tukţhuan eikham a u Zirbawnga message ka chhiar nuih vur vur laiin Sangkhuma a lo lut hlawl a, “I dawr an ţhiat dawn elo?” a tih chuan ka lo hawi â nasa teh ang chu.

“Tu nge sawi a?” ka lo ti he haw a, “Nu Raltlani chawhmeh rawn zuarin a sawi a, ka lo kal nghal a nih hi” tih pahin ka hmazawn ţhutthleng seiah a ţhu ngil ût a, u Zirbawngan, ‘Ka ngai che’ a rawn ti te chu ka ngai ho zo vek tawh. “Engmah min hrilh hleinem, dawr luahman ka pe dawn reng reng lo, min zah lo chhungkua emai” ka tih chuan, “Buaina in nei sa chiang mai” a lo ti a, “Nei ang chu, Kalvari a rai a, Fawnvela ten nau an chhiat reng a, ka nu te rilru a hah ka hlau bawk nen, ka zep mai mai a, an fate sawn ka dawr an rawk ziah” ka ti salh salh a, “Ekhai em em a na aw…min hrilh ta che, rilru hahna tur ka neih ve vak lo hi” a tih lai chuan rum zeta lo melhin, “Pang pang che hian, titau reng lo la chu ka hrilh chiang khawp ang che. Inchungah fanghmir bu a la awm zui a, ka customer te an seh nual tawh, an tui lah saw tuizem a mi si dar rim a nam” ka ti leh hlak hlak a, “Ka ti tau hlawl lo Remkalam” a tih chuan chhan pawh ka chhang peih lo, “Hmh” tih pahin ka hawisan hmak a, ka hawina lam berkherah chuan han melh tur vak a awm loh avangin a lam bawk ka sawi leh a, “Hmh” tih leh pahin a hmaa ka hawina lo lam zawkah ka hawi leh hmak a, “I ring i herh ange” a lo tih chuan, “I ring ka herh loh a hnu, ka ring a nia, ka duhna lam lamah ka herh ang” ka ti a, en pawh ka en peih tawh lo.

Kan ngawih vang vang hnua, “Min ngaizawng em ni a? Sawi vek teh, zep ţit ţet neih loh a ţha, ka peih miah lo a nia” ka tih chuan, “Tu nge sawi?” a lo ti ve khauh a, peih lo hle mah ila ka en leh ta nge nge a, “Sangkhuma hian a ngaizawng che aniang an ti zel, ka ngaih a ţha miah lo a nia, kan buai nak nak chhung khan tuin nge lo dawi khaw lo che?” ka ti zat zat a, a hmel a dur khap mai. “I pa hian min discount dawn mah se nang kher kher chu ka duh bawk lo che Lalremmawi” thinrim zeta a ti chiah chu ka thaw suai suai a, ka hlim nghal em em ringawt mai a ni.

“Awii…Sangkhum, what a very thawl huai huai, min ti mangang hman alawm le, min ngaizawng lo hi i fakawm e..ka fak thlawt che” ka tih chuan, “Khawvelah hian nangmah chiah hmeichhia awm mah la i bialpa nih ai chuan i ţhian nih ka thlang tho vang” thutak zet hian a ti a, “Awii….a pa siah siah a sin, khati siah siah tur kha, nangpawh khawvelah nangmah chiah mipa awm mahla ka vin vak vak reng tho ang che” ka ti a, kan nui dun ta hak hak a, “Ka ngaizawng emaw te a lo inti, a zam lo ve chiang e, ngaizawng che ila chu ka hrilh daih tawh ang che” a tih hnuah, “Ka duhzawng tak hmeichhia chuan midang kâ aţangin ka duh zia a hre hmasa tur a ni lo, keima kâ ngei aţangin a hre hmasa ber tur a ni” a ti leh a, “Chuti chu mi aia i ţawngtheih a ngai a nih chu, miin thil an hre chak si” ka lo ti a, dik tih hmel zetin a bu nghat nghat a, “Ka ngaizawng che emaw i lo ti vel a, mi pawn sawi se ‘ka awih lo’ ti ta che, i lo awih kha i thisen a sang hrim hrim” a ti ţha leh a, “Ka ngaihtuah chhuah a ni lo aw, mi zawng zawngin an sawi vangin ka awih ve chauh” ka tih chuan, “Mi zawng zawngin an sawi chuan min hria an lo va tam awm ve” a ti daih a, “Rinhlelh tur tawkin ti tau bur bur tawh lo la a ni mai” ka ti ta ringawt a, a nuih ka rin nen a hmel a thutak daih a, keipawh ka ngawi ve hmak mai.

“Ka ngaihtuah che, nei rih lo la ka duh ber. Tunlai phei chu tunhma zawng aiin i chhe zawk a, u Zirbawnga chhungte lo sual deuh pawh nise i sual let thei nang, tuna i awmdan, sam siam thiam te, dawr hawn ve te hi i duhthusam ber a nia, i tih hlawhtlin ruala pasal neih a ngai tlat em ni? U Zirbawnga i hmaizah vang hrim hrim a ni lo maw?” a ti duah a, min ngaihchan reng vangin, “Ni lo…ka dawr pawh an ţhiah daih dawn hi. Ka chak ber ka zir a, ka thiam reng bawk a, mahse kan khuaah chuan eizawnna tlak a ni chuang lo. Kolasib a pasal ka neih chuan dawr changtlung zawkin ka ti thei ang a, customer ka ngah zawk bawk ang. Kan khua ai daihin a hlawk dawn, luah man chawi a ngai dawn lo bawk” ka tih chuan, “Chu, u Zirbawnga hman ţangkai i tum tihna maw? Hei vang hi a nia ka remtih loh, kei aiin i puitling lo fe zawk. I hlawkna tur chauh a pasal i neih chuan a hmangaih poh che leh i inthiam lo ang aw, i hlim tluantling chuang lo ang” a ti nghal bawrh bawrh a, kan ţhianho hi chu kan phak tawkah kan inla fing tlang ve viau zel a ni.

“Ka hlawkna tur chauhin ka nei dawn bik lo. Duh ve miah lo ta ila chuan sap ramah dawr min hawnsak dawn pawh ni se ka nei awm lo emai. Tunhma i pha lo min la ti zui, ka pha lo zel maithei a, chumi hma chuan nupui a min nei duhtu awmchhun hi ka neih a ngai, keipawn ka duh alawm. Min nghak ţang ţang a, ka tana a hlut zia hi i tawn ve phawt loh chuan i hrethiam lo ang” ka ti deuh duah a, u Zirbawnga ka mitthla pah ngei a, ka thusawi hi hria se a lawm awm vur vur mange.

“I nei ve uk ang a, i duhdan lo zawngin thil a kal ang a, ‘ka peih tawh lo’ tiin i lo haw ange aw, nuthlawi fa nei tawh phei chu mipain an duh pawhin an chhungte hian an iai ru tlat zel a nia, thinlung taka pawm harsa an ti ţhin. I rilru a nghet lo si, inneihna hi phur thut a tih chi a ni lo a nia, i ngaih anga a nawm leh si loh a i lo haw vaih chuan nangman i tuar ber dawn. Nunhlimi dinhmun kha ngaihtuah rawh, inhumhim nan a amah hmusit tu te a beih let ve pawhin miin, ‘nuthlawi a nia, a nasa lutuk’ an tih zel kha. Nau i pawm phei chuan tun ang reng hian i zalen dawn hauh lo a nia aw” a ti ve ngial a, “In hriat loh hian ka ngaihtuah ve ţhin. Bakah, vanduai vangin tupawh an nuthlawi thei, mahni kan inven ve avanga nuthlawi an nasa ti zel ho hi chu an rilru a dik lo tihna a ni mai. Nasa tak tak chu an awm ngei, an ni vek kher lo. Nuthlawi tih hming an putna hian a ti zalen tawh lo va, tam tak hi chu duh vanga thlawi an ni lo chiang emai. U Zirbawnga hi a thi te a nih loh chuan ka ţhen lo vang, ţhen leh mai mai turin pasal ka nei dawn hleinem, hmeichhe dang pawh lo hruai haw se ka awm ve tlat ang a, ka inti thu zawk bawk ang” ka tih chuan a nui ta tawp a, “Ngaihzawng a neih palh a nih pawhin inti thu zawk ang che” a lo ti zauh a, “Ka pasalin ngaihzawng a neih vaih chuan a bialnu kha fa duat takin ka duat dawn, duat deuhin inthiam lo ngawih ngawihin ka siam ang mawle” ka ti a, Sangkhuma nen kan han inbe ţha leh ta chu nuam tak a ni, pasal neih phal lo a a tih tauh bur bur chhan ka hre ta bawk a, min ngaihzawn vang ni lo vin min ngaihtuah vang zawk a lo ni. U Zirbawnga ka tihnat a hlau tel bawk.

“Ka kal hun tur a chiang tawh a” a tih chuan, “Engtikah?” ka lo ti vat a, “Thlaleh lehpekah, i neih dawn chuan ka kal hmain i nei hman tihna” a tih chuan, “Ka pasal neih ni a awm ve i duh vangin i sawn hla lui a ni lo maw?” ka ti a, min chhang tawh lo. “Thingpui va lum rawh” a ti daih a, “Dawr chu engtin nge i tih dawn?” a ti zui zat bawk a, “Pawisa pe lo vin ka chhuak ang. Thla khat luahman chiah ka pe lo tihna a ni mai. An fate thil hralh ruk kha thla khat luah man aiin a tam zawk” ka ti a, inthiam lohna pawh ka nei lo, ţan khanglang lo vin an fate sualna pawm ve mai se, thupha te lo chawi zawk se la chu ka pe tho maithei a ni.

“Kan kal dawn nia, thuam chhawm vel hi engtin nge? Pawisa khawl sa i nei em? Palai a rawn tirh chuan ‘kum khat min nghak rawh u’ a tih chi dawn miah lo a nia aw” a tih chuan, “Alu leh papawr hralhna te, vur hralhna te bak ka nei lo va, ka sumdawng hleithei bawk si lo, pawisa khawl mang ka nei lo tun ţum chu, u Bawihan a mamawh bawk si” ka ti a, min en vang vang hnuah, “Vairamah ka awm dawn sia ka tia, ka thingzai hralhna ka khawl ve a, a tam vak lo nain a ţul tak tak tlem te chu a lei theih maithei” ban charha a tih chuan, “A ngai lo” ka lo ti thuai a, “Ngai, ka tih theih chhun a ni tawh. Ka ngaizawng che emaw i tih leh chuan engmah ka ti lo thung ang. Ţhianţha ka nia, mi i ngai chhe emai” tiin min puh let daih a, “Mi sawi ka tih chu” ka tih pawhin a awih duh tawh lo, “I rilru dik lo a nih kha” a ti tlat a, thupha ka chawi hnuah a lungawi ve hram a ni ber e. “Kalvari pawhin ţha deuh a tih sak thei ang che, pawisa a nei ve tawh alawm” a ti leh ţan a, palai hmel ka hmuh hma aţangin ruahmanna a siam nghal zung zung mai a ni.

Tlaiah dawr neitute in lamah kan phei a, kan khua hi chu kan la inpawh bawk a in a kan awm phawt chuan tu te pawh hian kawngka kan hawng huau reng zel a, tumah kan inkhar phui tlat ngai lo. Ka dawr neitute erawh tun ţum chu an inkhar phui tlat a, Sangkhuman kawngkhar a kik a, “Lo lut rawh” ti a an lo chhawn rualin a pawt hawng a, “Kan lo leng dawn” tih leh luh a rual a, ka zui lut nghal bawk.

“Dawr hi in ţhiat dawn mi?” ka ti nghal thawr a, “Aw, ţhiah a sak ţhat kan tum a, kan hrilh ang che kan ti tak nain kan lo mangnghilh aniang, tun tut tut a ţhiah kan tum rih lo va, tun thla chu i la awm thei ang” nu berin a lo tih chuan, “Naktukah ka rawn in la chhuak mai ang. Luahman chu pek a ngai lo turah ka ngai” ka ti a, an lungawi loh hmel viau na a an fate thil tih an hre ran a, pawisa induhthaw lai a ni bawk nen, ka inthiam lo dawn bik lo reng reng.

“I luah miau si a, i pek chu a ngai ngei ang” a ti a, min en kal bawk a, “A nih leh thla chanve luah man ka pe che u ang a, in faten ka bungrua an hralh ruk zawng zawng ka ziah chhuah kha a man zat ka chhut ang a, min rul ve thung mai dawn a nia” ka ti chu a meng rang nasa teh a sin. Meng alh but but mah se ka hlau chhete eih lo.

“An hralh ngei em tih i chiang em ni?” a tih chuan, “I fate lo ka dawr a lut an awm si lo va, a inpuan vek tawh kha. Nangmah ngei pawhin ‘a unauten an hralh’ i tia, dawr luahman in phut tlat leh ka bungrua an hralh man min rul ve thei tihna a ni mai. An thil hralh zawng zawng kha thla khat luah man aiin a tam daih zawk a, thlahnih luah man ai pawhin a tam maithei. Thla chanve luah man pek cheu a, bungraw bo zat kha ba anga kaltir pawi ka ti chuang lo, in tih dan dan a ni mai” ka lo ti ve tlat a, ba ringawt a ngaihtuah aniang Sangkhuma lahin, “Ba aiah ha an tih kha” a lo ti a, a ti ho zo leh vek tawh.

“Dawr luahman pek in beisei chuan zaninah kan lo pe nghal thei cheu a” ka tih chuan Sangkhuman, “Nia, ka rawn kal pui leh thlap ang, hriatpuituah ka ţang dawn a nia” a lo ti a, a ngaingam ngang lo aniang nu ber chuan, “Naktukah rawn in la chhuak rawh, pek a ngai lo vang” thinrim hmel zet hian a ti a, min ankhum lo bawk a inhnial buai lo vin an in kan chhuahsan thei a, thingpui kan dawng lo chiang teh a sin.

Haw lamah, “Naktukah u Zirbawnga nu a lo kal dawn a, Kalvari-in chaw eiah min sawm leh ngei ngei ang. Keichu inneih hma hian min hmu reng lo se ka ti, kan inkawm tlangnel ang a, nakinah ka ko hreh vek ang tih ka hlau” ka ti malh malh a, kan va kalna kha chu kan vei zui lem lo.

“Palai rawn tirh an tum phei chuan a awm rei kher nang. I sawi anga i awm loh vaih chuan ka thil pek che ka lak sak leh vek ang che” a ti leh ţan tawh a, ka pai deuh khut chu min lo dawm vatin, “Inchhuih khut khut zel suh. Inneih niah pheikhawk sang i bun dawn a nia aw, kan kal chhet rawn hawh la, kal zir char char rawh” a ti hluk hluk a, “Ka lu a hai thut anih kha, englai pawhin ka inchhuih reng bik lo” amah aia vin zawk mah hian ka lo ti a, “In inneih hmain in entir ngei ngei ang che” a tih chuan, “Kan inneih fel hunah law law a ni mai alawm. Kan khua aiin Kolasib ah hmanrua an nei ţha zawk” ngaihsam deuh hian ka ti a, in entir tih vel hi ka peih ve vak lo, ka pile an zai hnu phei kha chuan damdawiin hi ka hlau zual riau tawh mai a ni.

Sawi ang tak takin u Zirbawnga nu a lo kal aniang Kalvari in, “My friend, zanin tlai chu chaw lo ei rawh u aw, ka chhum kep vek tawh cheu a nia” a rawn ti lang lang a, “Niminah Sangkhuma hnenah ka lo sawi zo lawk diam tawh. Dawr aţangin ka inthiar chhuak fel chiah a, ka inbual lawk ang, a lum emai” ka tih chuan, “Aw inbual rawh, dawr kha a hlawk vak lo ka ti reng a ni. Khawih tur an awm chuan pan kual la i hlawk rih zawk ang. Tih tur a tam emai ka dah rih lawk dawn” tih leh dah a rual a, ka nu nen ka bungrua kan rem fel zung zung a, ka inbual leh thlap hnuah ka insiam a, ka sawi tawh ang khan ka hmu chak tehchiam lo, a nutei kha a lo kal leh phei chuan mi a hmusit si, kan inhnial leh ngei ngei ang.

Ka insiam zawh veleh in aţangin ka chhuak a, khua a la thim lo a ka hlau chuang lo bawk a tiin Sangkhuma te ka hrilh duh lo na a kawngpuiah Fawnvela nen min lo nghak ran tawh a, “I nu tur a lo kal a ni maw?” tiin Fawnvelan min lo fiam vel a, “Zaninah thlahrang kan zawng dawn nia” ka ti chu a pbur khawp mai. Ka mangphan leh vaih chuan amah bawk hi ka hau hrep anga a ni mai.

Pastor quarter kan thlen chuan an lo ri nak nak tawh a, rin loh deuhin u Lalhuma a lo awm ve lehnghal. “Pasal i nei dawn maw, Remmawi? Zira nu leh pa te hi i lo cho ur ur ange aw, i nasa lo viau ang” a lo ti lung lung a, khawi aţangin nge maw a lo hriat ve ni.

U Zirbawnga nu leh pa ka hmuh lah chuan ka nu leh pa angah ngai nghalin ka lai tlat a, ka kal te chu kekawr tawt deuh ha ang hian ka awm, Kalvari in, “Kan pindan luh dawnah khan Dawnfuha thawmhnaw hak tur ka bang, lo ban lawk mai teh” a tih te chuan min lo en reng si a, tum lawk hauh lohin bualin lamah ka kal daih a, “I zung hmasa phawt dawn em ni?” Kalvari in a tih hnuah ka harhchhuak ve chauh a ni. “Aih, bualin aţangin ka kual dawn” ka ti a, ka kalna ngaiah chiah ka let leh nain ţhutthleng chu ka kal hual a, inbual zo chiah mah ni ila ka thlan a tla bat bat mai. “A va han ţul lo thei tak e aw” nui chunga Kalvari in a lo tih chuan fiamthu thawh angin ka awm daih a, za lo deuh a nui lui uar uar chungjn thawmhnaw inbang chu ka ban a, “Nui lui suh i ţap ang. Keipawh zahzelah ka ţah nuih tawh” u Rinchutan ban charh a a lo tih chuan ka nui tawp chiang kher mai. Amah lah chu a nui suk a, gas lamah a inher nghal vut a, min fiam ve ngei a nih kha. Mi chu an fiamthuah kan nui a, u Rinchuta ve hi chu a fiamthuah kan zak chem chem ţhin.

“Ka ţhutna lah hi a huh dup a, in chhangchhe tawh lutuk a in ţhutthleng pawh a him tawh lo a nih hi” u Rinchuta pain a tih chuan, “Nichin lawkah ka vaw fai a, a huh awm ka hre lo reng reng” Kalvari in a lo ti a, “A huh dup alawm” tih pahin a tho a, a ţhutna en tuma a inher chuan a mawng lam kan lo hmu thei thung a, artui a ţhut keh a nih hmel.

“Ka ţhut hi tui a ni hauh lo, artui a va nih hmel ve” dam deuha a tih chuan u Rinchutan, “Khai aw, ka artui i ţhut keh vek a nih kha. Zo artui in duh ringin in lo thlen hma khan arin ah ka zuk chhuk a, helai chhuata kho ah hian ka dahin ka hre sia” a lo ti ve a, “I fapa harh zia i hre reng alawm” a nuin a lo ti hmak a, anpa hnenah, “Nangpawh, i ţhut hlimin a ri rawp lo em ni? Ţhut luih ngat ngat kher a ngai hleinem. Rinhluan kho a a dah a thiar phei pek aniang chu, in inchhun pafa leh lutuk” a ti hlak hlak a, a upat ve tawh nen a la vin peih zawk ka ti.

“Va inbual ve rawh, i harh hawk mai ang, keipawh ka zang huai mai” tiin Kalvari bula Dawnfuha ding chu a pan hnai a, “I harh leh lutuk emai, hetiang chuan nangmah lawm tu i hnawt ţiau zel mai dawn a sin. Kan thil lo hawn che saw va khal rawh, ngai viau che mah ila kan pawm hleithei bawk si lo che a” a tih hnuah, “Ka sawng kaw lai laia hi a, Kolasib ah ka hawn daih dawn che em maw ni? Ka rualin Kolasib ah haw ve rawh aw sawng kaw lai lai pa” a ti a, naupang a lawm pawhin a vin tho, ka nu nen ţang dun se an hlauhawm khawp ang.

“Eng nge kan hmeh dawn a?” a tih leh chuan u Rinchutan, “U Lalhuman ar a talh kha” a lo ti a, “Lalhum, a bawp kha kim tawh rawh se aw, ar i sawngbawl apiangin kim lo a awm ziah. Sehhmeh tur i lo la hrang leh ang e” ti lung lung chungin pawnah a chhuak a, an khaw mi a ni bawk a u Lalhuma hi chu an ngamtlak chhungkua khawp mai.

“Ka nu Ruati min rin loh dan em em hi chu, ar ke ţang thlengin zu han chhiar thlap a! Ar ka talh sak tawh ngai lo vang” ti bui bui chungin u Lalhuma a lo lut ve thung a, u Rinchuta hian mi rin loh a pe na ka ti reng a, chhun tur a lo nei ţha em a nih hi.

Kei leh kei lo angin ţawng mang lo vin u Zirbawnga nu leh pate chu ka zir chiang ţha leh vel a, a pa chu pa zaidam, ţawngtam lo, rilru tluang tak mai a nih duh hmel a, a nu erawh vin hluk hluk chi, an cheh deuh, mi rilru tur dawn lek lo va ri phawng phawng chi, rilru ţha deuh tho si a nih ka ring. An in a mo a hrehawm lem loh ang, a vin ang chiah hian vin ve mah ila engahmah a ngaih ka ring lo. A hnarkua a lianin a common lo a, a hnar leh a kuak dan ang hi ka hmu zen zen lo, a fate pawhin an chhun lo vek a, an lawm zawk maithei. A thau em em mai bawk a, tlema a la naupan deuh lai phei chuan tun ai hian a thau ang. A landan ngawr ngawr chu Sangkhuma nu nen in anna lai an ngah mai.

“Sawi tur a vang e ei tawh mai ka duh, u Rinchuta nu te awm lai chuan leng tawh lo ang u” tiin ka beng bulah Sangkhuma a rawn phun sur sur a, “Ei lo a haw a nia ka chak, kan bengchheng ţhang si, kan ngawi reng a ka awm thiam lo, ka khua a sik dawn” ka lo ti ve bawk a, Fawnvela hnena, “Min uap hneh emai tih tur a vang, chaw ei loin haw mai ang u” Sangkhuman a tih chuan, “An chawhmeh a tui dawn si, tuar hram hram ang u” a lo ti a, arsa an la kang lo chung pawhin an siam lai mek rim chuan ril a ti ţam rawih rawih thei tak tak a, vaipaden te pawh u Lalhuma siam vek a nia, a duh chuan a ţangkai khawp mai.

Kan inbe ve zeuh zeuh tho nain kan inbe tam lem lo va, an lo zin hian kan inbe tam vak ngai lo a, engahmah ka ngai lem lo. Zanriah tui hnai deuh kan ei bawk a puar tak ka ni. “Kan lo kal chhan ber Dawnfuha ka lak chhawk thei mang si lo che a, insawiselna em em i nei lo bawk a, cham lo vin i pa rualin ka haw leh mai ang, Zireka a ninawm emai” tiin nu ber chu a nui huah huah a, mi hrang kan awm lo bawk a a ti aniang chu, “A tar chhiat hma hian nupui nei ve rawh se” a ti leh hram a, ka zak ve deuh aniang ka ţhu ngawi hle hle mai. Kan inhrawn tak tak hunah chuan min vin phar nasa ang chu aw. Amahah hian ka pi Binladari leh ka nu belhbawm ka hmu ka ti mai, thil pawimawh deuh pawh ti ila min koh chuan ei loh ngam chi a ni lo vang. Mo a ngah tawh viau na a min duat tel ve peih se ka ti, kan inngeih loh vaih chuan kan chenpuite thinthiin an mu thei lo ang.

Rei pawh cham lo vin an haw leh ta ngei a, ka nu’n, “Kalvari pawh ‘lo kal buai suh u’ tih nachang te hriat ve tur alawm. Dawnfuha an la thei chuang si lo, raino te mai mai lo la na deuh pawh nise nu leh pa chah hluaina tham a ni lo. Tunlai mi hi chu in no leh lutuk a, kan hunlai ang te kha ni se tumah in dam khawchhuak zo lo vang. Raino chungin thing kan phur a, leiletah kan kal reng a, engkim kan ti vek” a ti bawrh bawrh a, ka pi Binladari pawhin, “Keini phei chu kan hunlai te chuan rai no chungin thing kan kit a, kan pu a, kan ek leh a, nau vei chungin thing te kan phur mai mai a, kan mu vial ngawih ngawih ngai lo reng reng” a lo ti ve a, a va han awihawm loh chiang tak, ‘kan hunlai’ an tih tawh chuan a nihna ai baka nasain an sawi ngei ngei a, ngaihthlak liam mai mai chi chauh a ni.

Ka pi Binladari dawrah ka nu nen kan ţhu ta reng a, “Zirthianghlima nu te hi an fel viauin an hria, an farnu, tunhma a helama rawn awm ve ţhin pawh kha biak a nuam khawp mai, a nui sang reng zel bawk si a, a hmel hmuh a nuam ţhin” ka nu’n a tih chuan, “Makpa atana Zirthianga i pawm hnuah chauh an ţhatna i hmu a, Kalvari leh Rinchuta an inneih hnu hian an fel zia ka hre lehzual a, an fel emai Remmawii pasal nei tur hi ngaihtuah reng reng suh, Zirthianghlima chhungte an ngaihtuahawm zawk” ka pi Binladarin a ti kher a, “Remmawii zawk hi a inluling mai pawh ni lo vin a in rulpuiludin uau uau ang tih a nia ka hlauh ni” a tih chhunzawm leh a, “A ţhat nasat chu, palai an lo kal chuan ka lo remti hmak ang, hmeichhe tan chuan nawmsakna theihna tur a ţha ber, kan hriatchian loh deuh te a nei dawn lo a a lawmawm lamah ngai ang” ka nu’n a tih laiin u Lalhuma a lo lut a, “Zira ten palai rawh an ti a” kuhva nawi ban paha a tih chuan, “Awii awii awiii…sawi reng reng suh, i lo ruih chilh pek ange, a ninawm dawn emai” tiin ka nu a nui har har a, u Zirbawnga chanchin an han sawi meuh chuan ka pi Binladari nen an hlim dun har har khawp mai.

In kan thlen ruala u Zirbawngan min lo call chuan pindanah ka lut tlang a, ka lak rualin, “Kalvari ten mikhual an nei a nia, an rawn zin vang vang, lo duat ang che u” a rawn ti ringawt a, ka hrethiam ve vek. “Pawngpaw phur hluai suh, an remtih hma a thil sawi lawk vak ka duh lo a nia” ka tih chuan, “Kan sawi lawk anga thil a awm dawn lo ni a kan hriat chuan awm tir dan kan ngaihtuah dawn nia” a ti sam et a, “Ka nupui i nih dawn hnaihah pawh hian ka ngai che” a tih chuan ka ner sak a, “Ral aţang hian i duh duh i sawi a, lo leng phawt rawh se, thil ka ngaihtuah lawk vak vak hian ka ngaihtuah loh dan hlirin a thleng ziah, ka ngaihtuah lawk vak vak duh tawh lo” ka ti tak nain kan inbiak zawh rualin ka ngaihtuah nghal ringawt a, a hlimawm lam zawng hlirin ka ngaihtuah a, mo kawr thlengin ka mitthlaah a awm vek tawh. Kalvari ţet ţut lah hi tun ţum a raino a la na angreng si a, mo ţhian a ţan a zuam hlawl lo va, a phur zawk Nutei lahin hreh tak tein kawrfual hak a hreh a, an khuaah kan innei dawn a, huai deuh anga a lan theih nan a lo inchei pa ţhang bawk si, miin an chhaih a hlau a ni ber.

Ka be nghal bawk a, “Palai hmel ka hmu ţep tawh a nia aw” ka tih chuan, “Naktukah ka lo zin ang” a ti nghal a, “Puih i ngaihna apiangah ka pui ang che, thing eh khawl te a ngai angem? Ka ek thiam ve chuang lo nain thiam zawng eng emaw tal ka nei ang” a ti leh zung zung a, “Ka lo kal ve duh a nia” Nunuin a rawn ti bawk a, tunlai chu an awmdun râwt ni maiin ka hria.

“Khawmaw ka lo be lawk” a tih hnuah Nunui vêkin, “Remkalam, lawi kawr ka lo ţhui sak ang che u aw, pawisa engmah a ngai lo, ka tih ve theih tawk a ni mai” a rawn ti lang lang a, pawisa pek luih pawh tum ila a duh lo vang, mangan lai tak a ni lehnghal a, Pathian hi chu a ţha a ni. “I thawmhnaw ţhui ka ha lo vang” Nutein a tih chuan, “A nih leh keimah zawk mo ţhianah ka ţang anga a ni mai alawm” Nunuin a lo ti sam et a, “I ţang awm lo e…Remkalami kawr i ţhuisak ang chiahin hmun dangah ka ţhui tir mai ang, August xix ah pawh a theih reng, an thawmhnaw ţhui hian min pawt ve ţung ngai lo” uar zet hian a ti a, an inhnial zui bap bap laiin ka dah daih a, an pahnih chuan lo kal rual lo se ka ti khawp mai, an lo zin dun a nih pawhin dah hran an ngai ang.

An intiam angin Nutei te unau an lo kal nghal thei lo na a palai chu an lo kal ngei a, ka nuten an lo remti nghal thlap lo nain lungawi deuhin an haw a, palai hmel hial han hmuh takah chuan ka ni deuh hui mai. Ka nu te lahin an sawi zui bawrh bawrh a, ka pi Binladari a rawn phei bawk a, “Zirthianghlima” a ti deuh reng a, a fak nasa ropui mai bawk si, “Fa 10 pawh nei se Zirthianghlima chuan rualawt miah loin a siam thei ang. Ani aia ţha an awm lo reng reng, Remmawii lah fa duat takin a duat a, a hawiher aţangin na a neih leh neih loh te, a duhzawng te a hriatsak thlap thei a nia. ‘Remmawii hian engpawh min dil rawh se, ka phal chuan ka pe ang’ a ti bur a, in neih tir loh chuan â kan ti hlawm khawp ang che u” a ti bawrh bawrh a, ka pa a nuih tawp laiin ka nu’n phur zetin ka lo sawi pui a, “Kan kawmthlangah tuikhur ang deuh reuh kan nei a tih kha. Sap ho in bul a mi ang hi a nih chuan Remmawii hian a duh hun hunah tui a cheng thei dawn a ni mai” ka pi Binladarin a tih leh chuan, “An vawkin silfaina ber a nih kha, chen chu sawi suh, a luh pawh ka lut leng nang” ka lo ti hlar a, u Zirbawnga hian ka hawiher aţanga na ka neih leh neih loh a hriat awm ka hre lo reng reng, a sawi uar thei leh lutuk a, a sawi ang a nih loh chuan miin keimah bak min chhaih leh dawn chuang lo.

“An khawsa thei emaw thei lo emai, mi fel tak a nih a, kan fanu a hmangaih chuan a tawk a ni mai. Kristian chhungkua kan din hian chhungkua a tlo bik ţhin, hmangaihna a nghet bik a, Pathian an hriat loh chuan khawsa thei viau mah se an hlim chuang lo vang” ka pa’n a lo ti charh charh a, ka mutsan daih a, u Zirbawnga nen reilote kan inbiak hnuah phone dahin ka inngaihtuah vang vang a, Sangkhuma sawi ang khan ka nei ve ùk si ang a, ka peih leh lo ang tih a hlauhawm. Inneihna hi tih chhin theih se ka ti ngawt mai.

Sangkhuma leh Fawnvela te pawhin chanchin an lo ngaihven reng a, palai te an lo kal leh chuan kan khaw mi an ni lo bawk nen, ka nuten an lo remti ta nge nge a, ka ţhiante pawh an phur khawp mai. Inneih ni leh thla tur te an ruat hnuah kan khua aţangin an haw a, Nutei te unau an lo zin ve chiah thung, Kolasib a bazar tho ka ngai dawn a sin mawle.

Kan inah an innghat bawk a zanah Fawnvela leh Sangkhuma te an lo leng phei a, an ţhut fel rualin, “Thil ka lo hawn che u” tiin Nunui a tho tharh a, pindan aţangin ipte a rawn khai chhuak a, “Remkalami chu engmah ka hawn lo, kawr ka ţhuisak dawn” a tih te te hnuah thil holam te te a rawn hawn chu ka nu leh pa te, Fawnvela a pek hnuah, “Hei hi Sangkhuma ta tur” tih pahin kutphah chen vel lek tur ipte a phawrh a, a chhunga awm a phawrh chiah chu kan ri hak mai a ni.

“Hei u Khumte, tarmit dum ka lo hawn che a” phur zet hian a ti a, Sangkhuma tarmit tura a lo hawn chu a glass a dum ţhain a mitmu tiat vel lek tur hi a ni a, a dang chu a lian viau thung. “Khatiang tarmit dum ka vuah lo vang, ka mitmu pawh a khuh pha nang, ka men zau deuh apiangin a eng uar zel dawn a sin ” Sangkhuman a tih chuan tuman kan dem ka ring lo. A han vuah chhin a, a mitmu leh a tarmit chu a intiat lek tak tak a, “I mitmu chiah a bo” Fawnvelan a tih laiin Sangkhuma chu a lo meng zau a, a tarmit a khawih che lo nain a mitmu chu kan hmu thei, “Ka vuah lo mai ang, ka mit a ti chhe vat ang” tih pahin a la thla a, Nunui nur nang chu enin, “Min leisak dawn te chuan ka mit tiat lek lei mah ta che, lungawi lo zawkah i ţang leh tho a” a ti a, tarmit chu a’n en ţhin, “Han zawm belh theih se ţha tur, kha, thlung la ka awrh mai ang” tih pahin Nunui a pe let a, ţum dang angin a vin vak vak tawh bik lo.

“Keipawh ni ila ka vui a, i vuah khan zan i mut ţhat loh hmel daih a, inhawn ve rau rauah khatiang te chu ka duh teuh lo, awrh mahla miin ‘i ţhi locket a va lian ve’ an tia nga, chuzawng chu” Nutein a lo ti zat zat a, Nunui erawh a tum bar reng mai.

Kalvari in leng turin min sawm reng na a u Rinchuta ka hmu duh rih lo va, ţawngkam mak deuh, awm ti nuam lo thei a lo hmang leh ang a, kolasib a ka kal zawh hnuah chiah an inah ka leng ang. Nutei te an la cham ve rih a, Kolasib a bazar vel kan sawi chuan, “Aizawl ang em emin a la pui ve lo va, Aizawlah law law bazar ang” a ti tak nain ka nu’n, “Kolasib ah a tawk lek, lei tur vak a nei chuang lo, puan leh thildang vel chu keimahni’n kan ngaihtuah mai ang” a ti a, “Naaa…Aizawlah bazar se a hlawk zawk dawn a sin le. Lady Dianas Inn ah lah khan kan kalna tur leh kan thil tih tur mil zel a hak leh bun tur a awm reng a, an thil neih ho hi a ţhat ngaihtuahin a tlawm si, in hlawk zawk dawn a sin le” a ti nang nang reng a, Maski takngial pawhin a thih hma khan Lady Dianas Inn a mi ngei hi kawrfual min lei ve ngat a, ka ngainat lehzual phah, Maski leh ka aieng vang ringawt pawhin ka hriatreng tawh ka ring. An dawr a ka lei ho reng reng lei sual ka la nei lo, Lady Dianas Inn a an thil zawrh ho hi chu all go a ni ringawt, chak viau mah ila ka nu vangin ka kal leh thei pek dawn lo a nih hi.

U Zirbawnga hnenah Kolasib a ka bazar tur thu ka hrilh a, “Kan dawra mi hi i duh duh la rawh ti dawn ila i duh lo leh tlat emaw a nia nga” a rawn tih chuan, “Duh lo dawn e…pawisa ka nei alawm. Ka rawn hrilh lawk mai mai che a nih hi” ka ti a, “Hruai i ngaih chuan i duh hunah sawi la, ka lo kal ang” a rawn ti leh a, “Ka duh awzawng lo, Nutei te unau nen sumo in kan lo kal dawn. Tunah tut tut pawh a ni chuang lo” ka tih chuan, “Ka lo hmuak dawn che nia. Thil i ei thei em?” a rawn ti a, ka ei theih thu ka sawi chuan, “A ţhat chu, lo ei ţeuh ţeuh ang che. Nizan ka mu lo a vawiin chu ka mut a chhuak khawp mai” a rawn tih leh chuan, “Engati nge?” ka lo ti vat a, “Mikhual kan nei a, inchhung kan siamrem vangin ka pindanah an muttir pek mawle. A hnar nasa a, a tirah phei chuan a faifukin min ko emaw ka ti zawk a, hmun leh hmunah ka ei lauh lauh mai mawle” tiin a nui hawk hawk a, “Chuan…i phur tawh em?” a ti leh daih a, “Phur e…ka rin aiin ka phur daih. Zan inkhawm dar ri te hi inneih dar ri emaw ka ti palh ziah” ka ti chu a nuih a za viau mai.

“Ka mumangah ka hmu che a, zinga ka harh khan ka ngai khawp mai che. In enkawl ţha la, dam chuan ni a ral zung zung a nia awm mai mai suh. I ţhut pawn buai reng rawh” a rawn ti ve ngei a, “Kan innei tur hi i chhungte an phur em? An phur loh chuan ka tan a zahthlak dawn a nia” ka tih chuan, ka bula mu Nutein, “Chei…zawhna a bei maksak thei maw” uar zetin a lo ti a, u Zirbawnga ve thung chuan, “Phur e…ka nu phei chuan i ha a nat palh te a hlau a, i sa ei tur a her sawm nasa, a repin a dah dawn” a rawn ti a, “I dawheh lutuk hi ka nei ngam dawn che em mawni. I nupui ka nih hnua dawt min hrilh reng emaw, ngaihzawng i neih a ka rilru i tihnat chuan khum hnuaiah bak ka mu dawn lo a nia, theihnghilh miah suh ang che” ka ti kha kha a, “Khum hnuaia i mut ka phal lo nasa, ngaihzawng neihsan tur mai mai chein nupuiah ka nei dawn lo che” a tih hnuah, “Ka nupui i nih hnuah pawh tun ang reng hian ka hmangaih ang che. Nupui ţhen tumna ka nei lo va, i nawmsak theih nan theihtawp ka chhuah ang. Mipa mah ni ila chhungkua a roreltu, hnial ngam loh nih ka tum lo. Ka dik lo ve thei a, thil zawng zawng ka hre bik lo. Chuvang chuan nangmah nen ro kan rel dun ang. Tlan tauhna chhan tur ka siamsak lo che ang a, min ţhen ka remti lo vang, i uire a nih erawh chuan khawi hmunah pawh kal la ka umzui lo vang che” a ti charh charh a, a thutak khawp mai. Rei deuh kan inbiak hnuah kan duh tawk ve thei hram a, kan awmdan hi a nuam tawk chiah ka tia, inneih hnuah boruak a danglam vek ang tih erawh a hlauhawm viau a ni.

Zingah u Lalhuma lo kalin sahbawn rim a nam ve teh tlat a, “Tukin chu phurthak ka kai a, ka inbual ngun tawh teh mai a nia” a rawn ti a, a ţhut te te hnuah darthlalang a ka lo in en chu min hmu fuh aniang, “Lalremmawi, ka motor hlui hi i chhawm duh em?” a ti hem mai a, “Duh lo” vin zeta ka tih hnuah ka ngaihtuah chiang a, “Taka u Lalhum, thirchhiaah ka hralh ang a ka duhzawng ka lei ang a” ka tih chuan hmui pet fuat chunga min en vang vang hnuah, “I hralh vaih chuan ka lung a awi dawn lo a nia” a ti a, biak leh pawn min chhang tawh lo. “Min hmuhsit dan hian mei a nei” a ti a, a haw em em ringawt mai a ni. Zu a in nasa em a, a rilru thleng hian a buai zo vek tawh.

Ni a din reng loh avangin kan inneih ni tur pawh a hnai ve zel a, khaw dang daih a nih vangin ka nu te kalsan ka hreh thar leh vel a, palai lo kal lai khan ka uang a a tih chi tawh der bawk si lo, ka ute pahnih pawh an lo haw der tawh. Khaw miten an hre vek tawh bawk nen inleng kan nei reng a, keimah hi ka leng ve thei lo. Nutei te unau an awm hlauh a, Kalvari pawhin min rawn pui ve ţhin.

Kolasib kal dawn hnaiah Kalvari te inah ka leng ve hman hram a, ka luh rualin u Rinchutan, “Hei Remmawii a lo kal” tih pahin phone min rawn pe a, a tih chet zauh rualin, “Khawimaw” ti a u Zirbawnga ţawng ri ka hria a, phone chu lo la ve maiin ka bengah ka chuktuah a, “Hello” ka tih veleh, “A thim vek” a rawn ti leh a, a ring bawk si, video call a ni tih ka hre ve chiah, u Rinchuta lahin engmah sawi lo vin min en reng ringawt a, min lo hrilh nachang pawh a hre lo, hei vang hi a nia a chut kan tih ţhin ni.

U Zirbawngan min hmuh rual chuan a nui suk a, naupangin a luah plastic in a rawn khawng nghal chawrh a, a tlanchhe lehnghal a, “Mikhual kan nei a” a tih hnuah a nui hul hak a, phone chu a hmaah a tung aniang a langchiang thei emai. “Tu fa nge a?” ka tih chuan, “Mikhual te” tih zawnga min chhan rualin mipa pakhat a rawn dak ve zuk a, a hmelţha phian lehnghal. “Kha pawh mikhual tho, engtikah nge lo kal in tum?” a tih chuan, “Naktukah ka tih tawh kha, a chiang vek tawh” ka lo ti a, “Ka ţhianpa bakah a nau an rawn kal a, Aizawl a ka ţhianpa” lungawi hmel deuha a tih chuan, “I nute ho Aizawl awm lai mi maw?” ka ti he haw a, “Àih, ka nu te awm laiin hmun dangah a awm ve tho, sawi nachang ka hre lo va, an in tlawhpawh lo” a ti a, a dik ang, Vani khan u Zirbawnga hi chu thawm a nei lo thei lutuk a ti, hmundangah a awm char char a, a chhungte nen an inbiak pawhin thil pawimawh an sawi a, chuzawng chu a ni mai a ti ţhin a, Sensiari te kan khuaa an rawn awm ve lai pawh khan a chanchin an sawi zen zen ngai lo.

“Aw dah phawt teh, ka hman khat si, ka leng lawk dawn” tih pahin u Rinchuta phone ka pe a, “Be zo phawt rawh” tiin a la la duh lo zui, u Zirbawnga zawkin, “Leng rawh, zanah kan inbe dawn nia, keipawh ka buai riau” a ti a, kan in bye bye a, a tawpna kan siam thlap hnuah a thim khap chungin phone chu ka pe let a, Kalvari in, “Zui ve thei che ila ţha tur, Dawnfuha a sual reuh si, a nuhah aniang te ka ti, hei vang hi a nia ţhianah ka ţang lo mai ang ka tih, engmah ka tihpui hman dawn lo che a, i lungawi lo reng mai ang” a lo ti bawrh bawrh a, a ni lah tak a, mamawh lama min han zinpui thei chi pawh a ni lo. “Inneih niah eng nge i hak ang?” a tih leh chuan, “Ka paten puanbih tura min tih tlat ka rin nen, ‘i ropui ni ber tur a nia, i duh duh ha rawh’ an ti, kawrfual ka ha dawn, miin min hawh khalh loh nan Kolasib a mi ka hawh lawk sa ang a, Nutei te inah ka dah mai ang” ka ti zat zat a, “Vitamin thawk chak deuh lei rawh, i vun ti eng vat thei leh chaw ei ti tui nghal thei” a tih chuan, “I ninawm, ka cher chhiat chuan loh hi” ka ti hlak a, “I khal tawh lo alawm” a ti hram a, Dawnfuha buaipuiin zuiin keipawhin ka chhang buai peih tawh lo. Nutei nen kan ţhu ran a, “I helhhawlh a i mu ţha lo a ni maw?” min en vang vang hnua u Rinchutan a tih chuan, “Teuh lo mai” ka lo ti hlar a, ka mu ţha tih a mu ber pawn ka hriatchian laiin, “Ka awih lo” a ti deuh tlat a, min rinna a nei lo ve em a, ka hnial peih lo, ka thin a rim leh palh ang.

“Sangkhuman a zui dawn cheu em?” Kalvari in a rawn ti leh a, “Dawn nang, Fawnvela nen Aizawl kan kal dawn an ti” ka tih chuan, “Dressing table kha an siam zo tawh tiraw?” a ti leh a, “An siam loh kha, Aizawl aţangin ka nu ţhianten siam sa an lo thawn a pawisa kan thawn ka tih kha” ka lo ti a, Nutei te hi haw lo vin an cham char char a, a chhungte an rawn inthlahrung viau nain ka nu’n, “Puitu tur kan duh alawm, an hautak lo si, an duh chen chen cham rawh se” a ti a, an leilet buh leh chawhmeh hawn tur pawh a siamfel sak thlap tawh.

Kalvari te in aţanga kan haw hnuah inleng lo la awm ho thingpui kan lum sak leh a, zana ka mu chu Rinhlua sawi vang kha aniang ka muhil thei tlat lo va, ka inleh hlek leh Nutein, “Che reng suh” a lo ti hlak zel a, ka ute pahnih pawh an phur ve viau chuan ka hria.

Leilung a lan rualin ka tho nalh a, hmai hmih hmain mei ka nun a, tukverh ka hawng nghal vek bawk a, thingpui tur ketli lianpuia ka chhuan hnuah ka inbual san a, ka ban duk chu man kan inhlan hma a a reh hman loh vaih chuan a pawi viau ang, ka nu’n, “I thisen a bal a nih kha” a tia, ka ngaithei lo hian ka hmet ka hmet zel.

An tih ziah danin ka inbual zawh rualin u Lalhuma leh pu Taipuia te an rawn lut a, ka uten an kawmngeih bawk si, chaw an rawn ei zeuh zeuh a, thing an pho a, zanah ruah a sur palh tak hlauhin tih thuah an seng leh a, buh phoin an her tir ţhin bawk a, an ţangkai ve hle. Tukin pawh maian min hihpui sawk sawkin, “Eng nge kan tihsak ve ang che?” an ti deuh reng a, “Engmah a ngai lo” ka tih pawhin, “Nang meuhin pasal i neih dawn chuan kan tih ve a ngai” pu Taipuia zawkin a ti a, han inhnial bap bap ţhin mah ila anni pahnih pawh hian a tawpah chuan min hmangaihna bawk an lantir tho. Pathian mai bakah ka hnaih a awm mihringte hi an ţha em em vek a, malsawmna ka dawng a ni.

Tukţhuan eikhama kan insiam zawh rualin Kalvari te ho an lo thleng a, kan ipte ken tur chu Sangkhuman akin Nutei te ipte Fawnvelan a ak ve thung a, u Lalhuma ten an leilet buh hawn tur vel an zawn a, chawhmeh chu ka nu’n a khai a, pem tur te pawh kan ang alawm le. Sumo a lo awm reng tawh a, ka pi Binladari pawh a awm. “In va rei em em ve, sumo in nghahtir ziah mah ta che u. Nilenga motor chuang tur pawhin in inhnawih tai hlar zel mai, kha, kalkawnga in thingpui inna tur ka pe ang che u” tih hlak hlak pahin ka kutah pawisa a rawn hmeh bel chawt chawt a, ka duh lo ka ti hman tawh lo. “Lut rawh u, inthlah chiam a ngai lo, zanhnih thum bak in riak dawn lo” a ti leh a, thingpui inna tur te min pe sia hnial buai lo vin kan lut ve mai a, tukverh aţanga ka dahchhuah ruala ka ţhiante lo ding ţhap ka hmuh chuan pasal neih ka chak lo lehzual, ka kalsan hreh tlat a, nakinah Kolasib aţanga an haw dawn hunah phei chuan maimitchhing chunga thlah liam an ngai ang. Sumo a rik rualin an kut an vai a, Dawnfuha meuh pawhin ring zeta ţap bui bui chungin min bye bye ve lauh lauh mai.

Zanah ka mu mumal lo bawk a kalkawngah ka muthlu deuh reng a, thil kan ei zawk tih lohah chuan kan ding mang lo, tih tam deuh, zunram thiar pahin mei zu lawk ang ti sek ang te kha kan chuanpui lo a, a zu ve lo, motor rui te, hmanhmawh deuhte tan hian a ninawm duh dawnin ka hria. Kolasib kan thlen chuan sumo dinna ţhinah u Zirbawngan min lo nghak leh vang tawh a, “Nangchu lo awm mai mai rawh” a tih hnuah, “Nute, min pui rawh u” a ti a, motor ah bungrua an thiar lut a, “Inthiarna a nasa hle mai” tiin Nutei a phun nasa mai.

“Pu Zira tur chu” tiin mi pakhat hian a rawn fiam zauh a, “Lo kal ve ang che aw kelsa thlengin a awm dawn a nia” a ti a, bungrua a remfel vel te chu a phur surh surh khawp mai. “Thil in ei duh em?” a tih chuan Nutein, “Kan inbual phawt ang a, thil ei turin kan lo kal leh ang, i duh leh min nghak la, arek rim ka nam, Remkalami te khaw sumo chu a bawr thei emai” a lo ti nang nang a, a chang chuan mihring aiin bungrua an phur hnem zawk ţhin a, keini chuan ngaiah kan nei tawh.

U Zirbawnga pawhin Nutei te in lam min pan pui nghalin, “I chau em?” a ti deuh reng a, “Chau lo, ka ţhiante pawh zawt ve rawh” ka lo ti a, min zawt ngun em a ni. “Tlangval senior vei nei tawh vek vek hi chuan an vei na aniang, dam thluam ang hian in awm a, nupui hmuh loh hlauin a rukin in buai chung zel ang ka ring” Nutein a lo tih chuan a nui ve hawk a, “Senior un ka la nih loh hi, rilru a la puitling tak tak lo” a ti a, kan thlen veleh, “Inbual fai vel ula ka rawn hruai leh ang che u, in buai laiin dawr ka lo khar fel tir ang a, thil kan ei dawn nia” tih pahin ka kut a rawn hmer zauh a, kan innei ţep tawh bawk si, ka lai chu pawn lam ka hawi a, “Eng nge i ei chak?” a tih leh chuan, “Ka inbual zawh hunah min zawt rawh, inbual pahin ka lo ngaihtuah ang” ka ti lawi rât a, ka chhuah ruala chhuak vein kan bungrua a la chhuak a, Nutei chhungten an lo thiar sap sap a, a kal nghal mai ka rin nen inchhung thlengin min thlah thlap a, Nutei chhungte pawhin lo be sawk sawkin thingpui in tura an tih chuan a ţhu veleh mai bawk a, a awmdan ka en hian ka tihsual ka ring lo, a inthlak danglam a nih pawhin keimah hian pasal ka nei a nih rau rau chuan pakhat bak neih ka tum lo, ka ngheh mai bakah ka sak ţalh ţalh viau ang.

CONT…(EPISODE AWM LEH TUR HI A TAWPNA A NI TAWH ANG AW💛)

Leave a Reply