You are currently viewing magnetic 1

magnetic 1

Spread the love

A hmasa in he story hi ka serial duh leh ngainat em em, 2000 kum daih tawh a tihchhuah ‘Autumn in my heart’ tih serial plot hmang a ka ziah a ni a, mah erawh chu plot zawng zawng erawh a in ang vek dawn lo a, a tir lam chauh hi a in ang tih min lo hriat sak dawn nia.



Zing ni chhuak chuan ka hmai a lo chhun ser ser a ,ka harh rual chuan ka tho tlai leh tawh tih ka hre nghal, mahse ka khum nuam tak hi ka la thawhsan phal ngang chuang lo,in lukhup tha leh sauh sauh chung a mut that leh ka tum chu ka puan sin lai chu pawt hlim tu an awm leh ta ,chiau hlut chungin “nuuu!!” Ka ti tiau.

“Tho vat rawh, i u a insiam peih vek tawh school kal i ngai tih i theihnghilh leh tawh em ni” ,tih hlak hlak pah chuan ka puan  sin chu a thlep fel mawlh mawlh.


“Monday hi ka hua”, khum a thu chhuak bur chung in ka ti deuh hmuk.


“Awi tho vat mai teh ka vuak hma che hian”. ka nu bawk chuan a rawn ti leh hlak,ka nu hi chu a thinchhe ve hlak hlak a nia.


“Nu monday ka skip a nga naktuk atang ka kal mai ang aw”, pangchang tak a ka tih chuan ka dar ah a beng thlawrh, an na em em khawp leh nghal, ka teuh nghal hlar .



“Nge min ben monday hi ka ning alawm”, ka ti ve leh hlak. A ni reng a, monday hi chu ka ning weekend kan hmang te te a ,weekend a zo a ni sakei, monday school kal a lo ngai leh a hei vang hi lawm monday ka nin em em chhan ,school kal tan ni a nia,friday erawh weekend hma a school kal tawp ber ni a nih vang in nuam ka ti leh em em thung.



Mit nuai chat chat chungin bathroom lam ka pan a, ka hmai te phih in ha te ka nawt leh te te a, ka zai rut rut bawk, ha nawh pah a zai chu a rem teh tun lo viau lehnghal.



Inhnuai lam ah insiam peih sa thlap in ka chhuk thla a, sitting room a ka pa news paper lo chhiar bul ah chuan kal in ka tih ziah dan ang in a biang ka va fawp zeuh a , “kha i lo tho ve thei tawh maw mang chhawng sarih i nei tih a  hriat miah loh,” tiin min lo fiam nghal zat, ka pa hi chu a nghal ve a nia,choka lam pan phei hnak hnak pah in.



“Ngawi mai teh Ramlian” thatchhe aw zet chuan ka ti a, ka pa a nui hawk hawk mai, choka ka lut chu chair pawt tawlh hrawih in ka thu thla hnak a,ka  u apple eilai mek chu laksak in ka keih nghal hmarh hmarh bawk, ka  u chu a nui ri hak a .



“Kan naute chu monday mood off a nei leh tawh ni maw”, a lo tih chuan ka tum bar.



“U vawiin chu ka kalpeih lo e ,school kal lo in cicle in ride ila”, beisei nei deuh chung a melh pah chuan ka ti a ,a ni ve thung chuan a mit tizim sun chung a min en in ,” a theih loh ” ,a lo ti hmuk a nih chu, ka hnual nghal rawih thei  , a mah lah chu a la nui ang ruh ruh lehnghal .



” Ka van ning tak monday hi awm ve lo se “, ka ti leh hluai ka  u chu nui leh hawk in , “monday awm lo mahse weekend zawh a school kal chu a la ngai tho dawn alawm,” a tih chuan a sawidik ropui lehnghal,naaa!!! tinge mihring te hi inzir chawp tur a duan kan lo nih bik kher le, Pathian hian engkim thiamsa te hian min lo siam se tha mai tur.



Peihlo deuh chungin ka cicle ka la chhuak a, monday tuk hi chuan ka ner nawng nawng reng mai a ni.


“Le tlan hmasa la i hnung ah ka lo tlan ang”,ka  u in a rawn tih chuan cicle ah chuan lawn in ka tlan hmasa a ,ka  u chu ka hnung ah a lo tlan bawk,nau zawk ka nih ang in ka u hian min duat em em a ,a lak ah pangchan chintawk ka hrelo fo thin ,a ni pawh u zawk a nih ang in a chanvo a hlen tha em em a, ka tan chuan khawvel a u tha ber a ni piangnawn leh dawn pawh ni ila Zoremsanga lo hi u dang neih ka duh lo ang,a ni pawn ‘khawvel a nau tha ber i ni’ min ti ve fo tho.



School kan thlen chuan ka thiantha ber Seni chuan class pawn ah min lo nghak leh ran tawh, “Seni” tiin nui sang chung chuan ka au lauh lauh a,mahse Seni chu a hlauhthawn hmel tlat in ka hria a bul ka thlen veleh, “chhipruaka homework min pek ka ti miah lo a nia,engtin nge ka tih ang” a lo ti nghal chung,ka meng deuh kawk, mai mai chuan keipawn ka tibik reng reng lo, “keipawn ka tibik lo,tinge tun ah i sawi chauh a ” ka lo ti let vak, ka dar ah Seni chuan min beng tawlh a.




“Engtin nge i tilo tih ka hriat bik ang, weekend ah kan in hmu reng reng  hleinem phone ah takngial pawh kan inbe lo” a lo ti let ve hlar,kan teacher te ah chhipruaka hi a hlauhawm ber midang subject chu nise hetiang em em in ka hlau lo ang,mahse   hei chu midang nilo chhipruaka a ni tlat ,a lu hi a kawlh ropui si a sam pakhat mah zuk awmlo a mawle ,a mah a ngo vak bawk silo nen  a sang in a palian bawk si a, a landan atang ringawt pawh a hlauhawm sa nen a la sualthiam thei em em zui kan class chuan kan hlau vek.



Class chhung ah Seni nen chuan inzui lut in ka bag ka dah tha sawk sawk a,ka note book ka phawrh  nghal  bawk .


“Lo kal rawh ka  u tih tir mai ang, darkar chanve lai a la awm” ,ka tih chuan Seni chuan,


“U Remsanga te chu higher an ni tawh a second floor lam ah daih alawm an awm, higher ho floor ah highschool naupang kal an phal vak lo asin” a lo tih chuan ka melh nghal hraw.


” A nih chuan tihdan tur i thiam chuang a mi,heng i classmate phakar zik zek lutuk ho zing ah hian tuman an note copy tir che an phal teuh lo ,a phal ber tur kei lah in ka ti bawk silo” ka lo ti khar khar,hlauthawng tak in a kuttin a sik neuh neuh a.


” Anih midang lo kal tam hma in u Remsanga chu tih tir vat ang” ,a rawn tih ve tak ah chuan hmanhmawh bakleng in ka  u te class lam chu kan pan a,darkar chanve chiah kan nei tawh bawk nen hah pawh sawi lo in step ah te chuan kan tlan chho zawt zawt ,step lah chu a thui hrep lehnghal ,ka  u te class zawn kan thlen chuan thaw hlawp hlawp chungin kan ding dat a ,chutah class ah chuan kan lut ve thawr chutia highschool naupang pahnih  class a kan lut hlawl chu mak tih hmel deuh in min lo en heu hlawm a,kei erawh ka  u zawng in ka hawikual vut vut thung ,tlar hnung ber ah a thian pakhat nen an lo thu a min hmu miah lo,chulam chu pan in a dawhkan ah chuan ka note book ka dah thawr a Seni’n  kan textbook a rawn dah ve leh nghal zat.



Ka  u chuan min rawn en in chutia an class a min hmu ta chu mak a ti deuh a niang reilote a ngawih hnu in ,”hetah enge i tih,Seni nangpawh’ a ti hu a , “u,chhipruaka homework min pek kan ti lo a min lo tihsak teh,” ka ti nghal thuai,Seni nen  chuan  min entawn deuh zak zak in, ” a mak thin ,homework  chu in a tih tur a lawm school ah nilo in,homework na na na school a tih tum tlat” ,ti in a phun nuah nuah a ,ka note book a keu du du tho ,a nau duat hi teacher ten min hrem a phal dawnlo tih hi ka chiang ve e mai.




“Phun phun lo laa…Weekend te chuan
‘min bazar pui rawh’ i tia ka bazar pui daih che kha” ,,ka lo ti let nang nang thung. A ner sawk a, “nangmah ni in ti ula in thlen veleh khan in zo daih tawh ang”, a la ti hram a nih chu.



“Kan thiam hleinem mawlee!! thiam ila kan rawn zawt nang che”, tap tep chung in ka lo ti tiau hlar .



” Awle awle,ka ti dawn lo thu ru” tiin a hma zawn a midang thutna ruak chu min kawh hmuh zeuh a, Seni nen chuan thu tharh in ka u in kan homework min tihsak lai chu kan nghak ran,  chutih lai chuan ka  u te class a mi ho chuan min fiam leh zuk zuk thin, an fel hmel hlawm tawp mahse hmeichhe pakhat eiloh deuh ka nei kan in ah pawh a lo kal ve zeuh zeuh ,chunu chuan ka  u hi a ngaizawng a ,ka  u ve thung chuan eng ah mah a tilo ngaihzawng a buaipui lo hrim hrim .




“Dawngte i homework i tilo lehpek a ni maw, i u hi i pan ziah mai a”, nui sang chung in a rawn ti no hlawi a ,ka va han ten mai mai tak .

“Nia a nih,a nilo pan tur chuang ka nei silo a”, ka lo ti ve hmak,ka  u bul ah chuan a rawn thu a, ka  u bul a thu a thianpa kha engtik lai in nge a thawh ka hre miah lo .


“Remsang tlai ah min thlah la” no fahran chuan a ti a ,Seni nen inmelh ralh in a rilo in kan lo uak der vak.


“Kha ka zo kal tawh ru minute 10 in la nei ” ,ka  u in a rawn tih chuan kan lehkhabu ve ve chu ni nen chuan kan la vat a , “mawh Remsang min thlah la ka tih chu”,Muanpuii chuan a lo ti leh hlawi a, Seni nen in melh ralh in kan nui hak a.



“Enge nangni khan inla tih”, ka  u in a rawn tih chuan, ” kan kal”  ka lo ti vat, Seni ban ah pawt in class atang chuan kan chhuak a , kan chhuah hma chiah a ka  u in, “ka hman lo ka nau a mah in a haw a ngai dawn sia”, ti a Muanpuii a chhan na chu ka hre hman ,ka rilru chuan, ‘chawh e’ ka lo ti hman leh pek,diktak chuan ka u a nih na ang in Zoremsanga hi ka hmangaih a,ka thikthu pawh a chhia, midang in u en a an en ve pawh ka duhlo,Seni erawh ka thiantha ber a nia ka hrethiam,chuan ka  u hian bialnu nei tur in ka duhlo, bialnu a neih chuan a nau hi min hlamchhiah mai ka hlau a ni, ka  u ah chauh pawh nilo Seni leh ka nu leh pa lak ah pawh ka thikthu a chhia in ka la naupang chhia viau, ka hnaih a awm engkim hi ka ta chauh nise tih hi ka duhdan a ni, a tu nen mah engmah intawm ka duh ngailo.



Step a kan chhukthla tur chiah chu ka hming a min ko ri avang chuan ding leh rih in kan hawilet a, kan lampan in ka  u chu a lo tlan a  ,kan bul a lo thlen chuan, “tlai ah in pahnih khan min lo nghak ula thil ka lei ang cheu”, a tih chuan Sawnu nen in en in kan nui var var a.



“Chuan aia upa te chung ah mawilo tak a awm loh tur nichin khan ka hmu reng cheu a nia chin tam tawh loh tur aw”,a tih chuan lei ka chhuah tet , kan uak der vel kha a sawi tih ka hria,min lo hmu ru reng a ni maw “awle u” tiin ka nui sang a,ka  u pawh a nui suk a, “lee …Chhuk tawh ru le ka nau fel i nihkha tumah in tihbuai pui loh tur aw” ,tiin ka sam a tuai thur deuh a ka lo teu leh hlar tawh,nui hak hak in, “kal ru” min tih leh hnu chuan keini pawh kan class lam pan in step ah chuan kan pen
thla leh zawt zawt a.

Tlai ah ka  u chuan ice cream min lei a, kan unau in  kan haw rual bawk ,in ka thlen veleh ka room ah ka tlanlut nghal thuai a ,ka pheikhawk tlawhphelh nghal vat vat in khum ah pharh duai in ka mu nghal thlawp bawk,school boring lutuk ka nin tawh  dan kha chu pui tak a ni.

Chutia ka mut pharh duai lai chuan ka room kawngka rawn ri rak in ,’ a lo awm leh phengphung tawh e,in tlawhphelh phengphung zel suh” ,ka nu in a rawn ti nghal barh barh,ka chhang lemlo ka diklo zawk miau a.

Ka mu zal mai mai kha ka lo muhil a ni ngei ang ka harh meuh chuan alo tlai duai tawh ,uniform nen ka mu tih ka hre hnuhnawh leh bawk,hmanhmawh lem lo in ka inthlak a ,ka inphih harh leh hmasak te te hnu ah inhnuai lam ah ka chhuak chauh,inhnuai ka chhuk chuan ka  u leh ka pa in TV an lo en a,ka  u bul zawk ah chuan thu in sofa ah ka ke ka hlangkang a ,a sir zawng deuh in ka  u chu ka ngheng ar ar bawk,ka  u pawh insiam rem ve sut sut in ka tan nghen rem tur deuh chuan a awm zui a.


“Nanglah hi i u kha ngheng chial reng suh a lum si thaw in tipik” ,rawn ti hluk tu chu ka pa a ni ,kei erawh in hmui ka lo tipawrh zeuh a, ka pa thusawi chu ka ngaipawimawh lem lo.


“Khua lum mahse a u bul a awm chu a nuam tho,nang ang in min hau ve kuk kuk ngailo a”, ka lo ti let zat zat,ka  u nui ri suk chu ka hria ,mahse a hmel erawh ka en lem lo , ka pa chu a chek tlak tlak a ,” khawvel ah u i nei ber” min tih leh hluk chuan nui chhuak hak hak in ka pa lam hawi chuan ka insiamrem nghal sawt sawt .



“Aww!! u nei velo an tam a kei in ka nei a, ngah nge ka rinchhan loh ang hetia ka awm loh ten u neih man a awm nang tiraw u” ,tiin ka  u chu ka melh zauh a ,nui chung in ka chal ah min lo nem dak awrh a nihchu,ka mengrum nghal al al mai ,ka pa lo nui hawk hawk chu melh hrawk in.

“In tang rual,ka  u hi engtin nge i lo thlem hman a,’ ka ti nghal hlar.

” A leh ringawt a che”, ka pa in a ti chuan ka  u chu ka melh leh vut a, “mengrum ve il el reuh lutuk,tho la ka nu va pui rawh” ,min tih chuan tum bur in sofa atang ka tho chhuak a.

“Zoremsang,nangpawh pa, in pahnih khan inla hria ang”, tih pah in choka lam ah ka phei tau nghawng nghawng .

“Kal tha mai mai teh” , ka  u chuan nui chung in a rawn ti a ,a hmuh loh ah hmel ka lo siamchhe vak ringawt.

Zanriah eilai in  ka  u nen fel tak a  awm tur in ka nu leh pa chuan min zilh malh malh a,tawngthei in harhvang viau mah ila ka nu leh pa in thu tha min hrilh lai kher hi chuan ka  ngawi ve ran zel,an thusawi chu ka theih ang chin ah zawm ve hram hram ka tum thin bawk.

Zanriah eizawh ah kan eina vel ka nu nen kan tifel a, ka  u erawh a room lam ah a awm leh tawh a niang,hmun ka tihfel zawh veleh ka u room lam ah ka tlan nghal lut nghal in ,a ni chu khum ah a lo mu duai a ,a bul ah chuan a ban kham thei tur in ka mu thla ve nghal tharh,ka mut rual chuan min rawn en zawk in ,”thit thet reuh che hian “, a ti nui nui mai,nui var var in ka u chu ka en a, “u kan unau hi tuman min then hrang lo ang tiraw,eng vang mah in kan unau inkar hi a chhe lo ang tiraw” ,ka tih chuan mit tizim sun chung in a ni chuan min en a ,keilah ka thu tak ve bawk nen ka biang ah rawn piai zauh in,

” E nge maw i ngaihtuah leh thin le, tu nge kan unau min then hrang thei awm ang,nang te chu ka nau neihchhun ka duat em em i nia,tuman kan unau in hmangaih na hi an tichhe dawn hleinem, i u ka nia ka venghim tlat dawn che a lawm,thil tullo pui pui ngaihtuah lo khan i zirlai ngaihsak zawk rawh “,  dam thlup a a tih chuan ka lo bu nghat a, nui var  var in ka  u awm zawn ah ka ban dah in ka hnaih nghal sawt sawt bawk,a ni  pawn a ban ka kham lam chuan ka dar ah a lo beng ve thek thek a.

Ka u nen eng eng emaw sawi a kan ti ti luam hnu ah, keipawh ka room ah riak lo in ka  u room ah ka mu leh ngawt tawh, a tukzing ah chuan hma tawk ah ka tho ve ngei, a chhan pawh ka room ah nilo in ka  u room ah ka mu miau a, a ni chu hma tawk ah tho in keipawh min kaitho hma ziah.

‘Nangmah a i mut in zingkar hmel i hmu hman lo ,ka bul a i mut chang tal chuan zingkar hmel hmu ve rawh,zing boruak tha i hip khat emai
“, a tih tlat vang a ni pakhat. A sawidik ve reng bawk zingkar ni chhuak lai te hi ka hmu khat a nia aw.

School kal tur in ka nu ho chuan kan in vai chhuak leh lawp lawp a, “u min lo um la” ,tiin ka cycle ka khalh chhuak a ,ka  u pawh nui var var chungin a bu nghat a .

“Nang aia ka thlen hmasak chuan tlai ah nangmah in rawng i bawl ang ” ka hnunglam atang a rawn ti lauh lauh a , nui hak hak chungin ka tlanchak sauh,,ka  u chuan cycle in ka hnung ah min lo um ve zel a ,ka tlan hmasa bawk a min umpha mai bik lo, rei vak lo ah ka  u chuan a speed rawn san thut in min rawn tlanpel a ,hnunglam rawn hawi in hnehtu ka ni inti fahran
chuan a nui sang bawk,kei in ka lo melh rum vak thung .

Chutia ka lam hawi a rawn nuih sang lai chuan kawngkawi atang truck a rawn lang thut a ,”u hmalam en rawh” ti a ka au tuarh rual chuan a ri bur a, ka u chu a per nawlh nimai in ka hria, keipawh kawngsir ah  ka let tawp a ,truck chuan min su velo mah se,ka mithmuh a ka u truck in a sut khan ka vai nghal ruai a, ka cycle khalhlai ah ka rilru pek theihtawhloh avangin keipawh kawngsir lam ah ka tlu ve thuai.





conti…..

Leave a Reply