You are currently viewing magnetic 2

magnetic 2

Spread the love

Muang chang in ka  u ,thisen nen in chiahpiah nuai a a tluk hlawm reng na lam chu ka pan chhet chhet a,truck driver pawh chu ding in ka u bul ah chuan mangang tih hriat tak in a ding ve bawk,mipui pawh an rawn pungkhawm tan a kan awmna lai tak hi mi tam na a nilo lehzel nen, mi lo pung khawm pawh tam tak an ni lo.





Ka u bul ka thlen chuan a bul ah ka thu thla hnawk a, a chal atang thisen a chhuak tiam tiam a,  ban de de in ,chutah ring tak in ka tap chhuak nghal hawm hawm,ka u na tuar lai hmel hmuh chu hreawm tak a ni. A hmai chu thisen in a bual khat vek ti ila ka sawisual lo ang, a school kamis ban ah chuan thisen a rawn luangchhuak ngiai ngiai bawk.

“U,u,i tha em,u harh..harh teh mi..min hrethei tiraw” ,ti tiau in ka u chu ka sawi dat dat a ,ka hlauhthawn luat ah ka aw thleng in a khur vek bawk .



Zawi muang in ka  u chu a rawn meng diar diar a, ka lo thaw hawk thei ” u ” ka ti leh tiau, mahse a ni chuan a mit a chhing leh nghal a, “u harh teh ” ti a ka sawi ngial pawn a harh thei tawh lo, ring tak in ka tap a, kan kiang a tangkai na nei miah lo a enge thleng tih hriat chak vang ringawt a lo ding thup ho te chu ka haw hlur tawh ,chutah hawikual in “Ambulance call ta che u” ka ti tuarh, ka  u kuah chung chuan ka tap char char bawk .

Ambulance lah chu a lo thleng har hrep lehnghal, chutih lai chuan car pakhat hi a rawn tlan a ,min pel vel chiah ang tih ah chuan ding in tu emaw hi kan lampan in a rawn tlan hlawk hlawk a.

“Remsang, ehee! Dawngte enge thleng” rawn ti tu chu ka en vat, U Puia a lo ni ka  u te class a mi a thiantha ber, “u Pui, ka u hi truck in a su a ,chuan Ambulance an call a mahse..” ka sawi zo thei lo ka hrawk hi a inhnawh tup tup a, ka tah a chhuak em em ringawt, chutah u Puia  chuan ka u chu zo leh zo lo in a pawm a ,”lo kal rawh taxi tah sawn a awm “, a tih chuan ka zui ve vat ,taxi a kan luh veleh driver hnen ah hospital hnai ber pan tur in a hrilh nghal zat ,kei erawh ka la tap bang theilo, ka  u kut ah chuan nghet tak in ka chelh reng a, hospital kawng tluan chuan vawikhat mah ka thlah lo.






Hospital kan thlen chuan enmergency room ah nawr luh nghal a ni a,ka nu leh pa pawh reilote ah an rawn thleng thuai bawk ,u Puia khan a lo call a ni tih a hnu ah ka hre leh chauh .




Ka nu mangang tak a ka lam pan a lo tlanphei chu ka lo kuah thlawp a, ka tap nghal hlawp hlawp ,” ka naute a pawi emai,” tiin ka nu pawh  tap ve nghal in a insum thei bik lo.





“Nu,ka u kha truck khan a su ka,ka hmu chiang lutuk “, ka ti tiau a ka insut hlap hlap reng bawk ,ka nu chuan min kuah nghet sauh in ,”ka naute i hlauthawng dawn lutuk a ni tiraw,i u chu a tha leh em em ang lungngai lo la”, a tih chuan ka nu min kuah na tang in lahrang hlek in ka nu chu mittui kar atang ka hmu phe ruai.





“Ka  u hi a thi dawn lo tiraw nu,khawi ah mah min kalsan dawnlo tiraw” ka tih chuan ka nu in min kuah leh vat.



“Bawihte i u chu a thi dawn reng reng hleinem,a nau duat leh a nu leh pa hi min kalsan in khawi ah mah a kal dawn lo, engkim atha vek ang”, ti mahse a thusawi chu min hnem na mai chauh a ni tih ka hria,ka u thi tur ang a ka dah chuan ka thaw tha theilo, ka khawchhung zawng zawng hi puak darh vek tur ang mai a ni,ka u tello a nun hman chu ngaihtuah pawh ka la mgaihtuah chhin ngai hauh lo.




Chutia mangang leh thlabar tak a kan awm lai chuan, nurse pakhat hi enmergency room atang chuan a rawn tlanchhuak a ,kan lo hawi hra hlawm nghal mai ,eng vang in nge oporation neih lai in nurse hi a rawn tlanchhuah, nilo nilo,ka u chung ah thil thalo a thleng tur a nilo.





Enmergency room kawngka chu ka chum dat dat a, ka mittui chu dan sen pawh a nilo,u Puia chuan min rawn manbet in ka nu leh pa bul ah min dinpui a.





“Damlo hian thisen a hlauh hnem lutuk a ,chu vangin thisen kan pek thuai loh chuan a nun na hi kan chan thei a ni,damlo blood group ang chiah hi thisen kan mamawh a ,unit hnih vel oporation neih chhung atan chuan a tawk rih mai ang, a dang chu tluangtak a in zai a nihchuan ward a kan dah hnu ah kan pekbelh thei ang”, a tih chuan ka bing chuk chuk nimai in ka hria .





“Thisen pe thei chu in awm em,damlo hian a mamawh tawh takzet a nia”, nurse bawk in a rawn tih leh chuan nurse chu panhnai in, “keiman ka pe ang,a nau ka nia ka  u tan chuan ka thisen pawh hi a tul phawt chuan la zo vek mai rawh”, ka tih chuan ka nu in ka ban ah min lo vuan vat a,nurse chu bu nghat in thisen lak na tur hmanrua chu a buaipui nghal vat vat bawk.







Ka biang a mittui luang thla ngiai ngiai chu pawn lam atang min ko ri avang in ka tuai hul nghal vat a,chutah ka room kawngka chu rawn ri rak in ka u chu a rawn lut a.





“Chaw ei a hun, lo chhuk la”, tih pah in min rawn pan a, ka lo bu nghat ringawt, ka u chuan min en deuh vung vung in ,

“Tunlai hi i hlim lo riau in ka hria,harsatna i nei em ni  ,i neih chuan sawi hreh lo in min hrilh rawh ka thei a nih phawt chuan ka chinfel sak ang che”,tiin min ngaihtuahna mitmeng a khat in min en a,ka bul a rawn  thut thlak a rual bawk .






Reilote ka u chu ka melh zawk a, mahse ka en rei ngamlo min ngaihtuahna mitmeng chuan ka hnuk no a ko chhuak a nga ,insum thei lo a ka tah chhuah mai ka hlau a ni .



Ka ngawi reng a hnuailam ka bih ngar bawk ,ni e ka u hi ka u a nilo,keihi ka nu leh pa fa dik tak ka ni ve lo tihna a nih chu ,hethu ka hriat tirh khan thih nghal daih mai ka duh, tun a ka chhungte ka chenpui te hi ka thisen zawm an nilo tih hian ka thinlung a den nat dan chu tuman min hriatthiampui kher lo ang .




Ni e khami ni ka u accident ni a thisen pek ka tum tum khan kan thisen a lo inmil hauh lo ,kei chang nilo in ka nu leh pa thleng khan mak kan ti tlang in kan hrilhhai tlang hle. Ka u chu ka pa zawk in thisen a pe ta a, kei erawh ka mang vek a, ka ngaihtuahna chu a nghilh dup ni mai in ka hria,khami ni khan chawpchilh deuh in DNA test kan ti nghal rum rum a, result erawh ka nunpum sawinghing lawih thei khawp a thu dengkhawng a ni ta si a,ka na a, engtin nge a nih theih tih ka ngaihtuah thiam lo ,ka chhungte hi ka chhungte nireng tur in ka duh a, chhungte dang ka duh lo,u dang ka duh lo a, nu leh pa dang ka duh hek lo,mahse eng ang pawn duhlo mah ila chu chu a thleng mek si, kei hian chhungkaw dang  ka nei si a.




Ka pianna hospital ka pa in a be pawp nghal a ,an ni chuan ka pian ni a piang vetho nen khan tihpalh thil thu in min lo thleng a nihchu ,ka pa thinrim lutuk chuan hospital chu khin ngei a tum thu a sawi bawk, khami ni atang khan a hma a Vanlaldawngzeli mi hlim thei tak kha a bo a , ka lungngai a ,hreawm ka ti in ka nui hmel phen ah natna thuk tak a inphum ru a ,mahni a ka awm tawh chuan koh loh mittui bawk in ka hmai  tliang han chu a rawn luan huh leh thin.





“Princess, engmah min hrilh ngai tawh bawk silo damdawiin ka awm atang min be tlem em em bawk si, ka accident kha i thiamloh a ni reng reng lo a nia,mahni inti hreawm reng suh ,” ka u chuan a ti a, princess tih hi ka u min koh thin dan a ni a,kan tetlai a kan infiam chang apiang in princess lem a ka chan ziah thin vang a ni,tun thleng in princess ti in min la ko ta reng a nih hi .




Ka dak chhuak a, min ngaihtuah zet a min en tu chu ka kuah thlawp ,ka insut zui nghal hlap hlap bawk. ni e ka u hian engmah a hre ve lo miau a, hetia ka nun nguai ta thut pawh hi a accident kha keimah vang ah ngai a, ka inthiam loh hle vang ah a ngai a ,mahse chu chu thil nihdan a ni silo,a nau diktak ka nilo tih hrilh tur hian ka huaisen tawk lo a, ka u hi ka chan mai ang tih leh min hlat phah daih ang tih ka hlau em a ni,chuvang a nia ka nu leh pa bul ah pawh ka u hi engmah hrilh rih lo tur a ka tih,engtin nge ka u hian hethu hi a lo dawnsawn dawn ka hre miau silo a.




“A tha a tha vek ,hei ka dam tawh a lawm ,nangpawh in tilungngai reng suh i hlim loh chuan i u hi ka hlim thei biklo tih i hriat kha ” , ti sup in min nawr hla hret a,a kutzungpui a ka mittui tuaihul pah in, “ka princess hi tun ah chuan han nui teh se ,a nui hmel ka hmuh na chin pawh a rei ta”, tiin a mah chu a nui suk a ,keipawh harsa ti tak in ka u ngaihthat nan chuan ka nui lui ve seih a.





“That’s my girl” ti sup in ka biang leh lam leh lam a dawm in ka chal ah chuan a fawp zeuh a.





Vawiin chu ka chauh deuh avangin school pawh ka kal peih ta lo ,ka chhungte pawn min hrethiam khawp mai,ka u chu a mah in school a kal a ,a rual a kal chu chak hle mah ila mizing a hlim der a nuih der  vel kha ka peih lo a tin ni.




Chhunlai a ni a, ka room atang chhuak inhnuai chhuk ka tum chu ka pa aw ka hriat chuan mak ka ti deuh,office a kal emaw ka ti a chhunlai ah in ah enge a tih ,chhuk tum a ke ka pen lai tak a ka pa thusawi vang chuan ka penlai ka tawp leh chawt ,an fanu diktak chu an hmu tawh maw,






“Ka fanu chu a la dam maw! Lalpa ka va lawm em”, lungchhe aw tak, hlim bawk si in ka nu chuan a ti chul a,ni e an thisen zawm an fanu dik tak an hmuh chuan hlim tur an ni, ka dem hauh lo,mahse an hlim na hian engtiang chiah a rilru na in nge min siam an hre silo.






Inhnuai ah pawh chhuk ta lo chuan ka room lam ah ka lut leh ta daih a, khum ah mu in ka ngaihtuahna ka kawm ta vel mai mai ,ka mu chu ka lo muhil a ni ngei ang ka harh leh meuh chuan tlai lam a lo ni der tawh, ka u pawh a lo thleng tep tawh ang.





Inhnuai lam ah ka chhuk a ,choka ah lut in tui vawt kek kawk mai chu ka in khawlh khawlh a, ka taksa chhung lum huam chu a ti vawt thla huai huai thei,fridge ka khar leh chiah tih chuan choka ah ka nu a lo lut ve chiah.






“I lo chhukthla peih tawh a ni maw,vawiin chu ipa pawh chhun ah khan a lo haw a,kan fanu chu hospital record atang an chhui chhuak a ni awm e ,a lawmawm ngawt mai,” a ti nghal siam siam a,ka lo nui tawi tak ringawt .





Ka nu hlim na chu tawmpui tur ka nih laiin ka thei der lo, ka taksa chhung hi min vilh ngawt ngawt ni mai in ka hria ,ka ngawih reng tak ah chuan ka awmdan tur ka nu chuan a hrethiam a ni ngei ang ,ka bul ah chuan lo kalhnai in ka kut lehlam chu a kut nel thep chuan a chelh a ,a kut lehlam a chul hliau hliau pah in ,





“Rilru nawm loh phah nan hmang lo la, i thisen kan ni emaw nilo emaw,keini  hi i chhungte kan ni a, kan fanu i ni reng bawk ang,kan tan chuan kan fanu i nih na hi a danglam ngai dawn lo a ,nangpawh in kan lak a i rilru put hmang hi thlak danglam lo la a hma ang reng khan awm la ka duh ,kan naute neihchhun kan hmangaih em em kha i ni reng ang,” a tih chuan ka mittui a lo luang leh ngiai ngiai tawh .






Ka hreawm tihna chu ka nu awka chhuak nelawm tak chuan a la kiang a,ka phutrit tak min laksak ang hial in ka ngai ,ka nu chu kuah thlawp in, “nu ka,ka hmangaih che in vaiin ka hmangaih cheu “, ka tichhuak tiau ,ka hnung ah ka nu chuan a beng thek thek a ,nu angchhuang ah nge nge chuan thlamuanna a lo awm biak hliah hliah a nih hi,kan inkuah na atang ka inla hrang chiah tih chuan choka kawngka bul a phawk tak a lo ding ka hmuh chuan ka che dawt thei.




Ka u chuan ka nu nen chuan min lo en ngar a nih chu ,”u..u i lo thlenna a rei tawh em?” ,ka ti chhuak thei hram, ka nu nen kan thusawi kha a lo hre hman em lo ang chu.


Ka nu pawh chuan ka u lam chu hawi ve vat in, a ni pawh a hamhaih deuh in ka hria, “in thusawi kha enge awm zia”, ka nu nen a min melh dun ralh in ka u chuan a ti chang fak a ,a aw chu ring tak nilo mahse  a fiah em em thung.


“Eng,engmah a nilo u ” ka ti bah nak.

“kan thisen i ni velo tih chu enge awm zia ..nang hi,” tihpah in ka u chuan min rawn hnaih nghal ruak a,ka taksa chu hlauhthawn na vangin a khur nghal dat dat thei, ka u hian engkim ka nu nen kan tawng kha a lo hre vek tih na,ka u hi ka chan mai ang tih ka hlauhna chuan ka tah a tichhuak tun thei , “u” ka ti chhuak tiau a, ka biang ah mittui a lo lum thla pap bawk.




“Bawiha ,in bengdai phawt teh,tha zai in i sawi teh ang u”, ka nu chuan a lo ti ve bawk a, mahse ka u  erawh chuan ka nu thusawi chu hria awm pawn a langlo ,kei chu min melh ngur a,a hmel atang a thu hriat zawh tak kha a lem nise a tih zia a hmuh theih.



“Sawi rawh nang hi ka nau i ni em”, ka mit ah tak en chung a a rawn tih nghut chuan ka insum thei tawh lo, tap chhuak hak in ka lu chu ka thing mat mat a, hnuailam ka bih ngar bawk. Harsa ti lutuk a thaw chhuak hawk ka hriat rual in ka taksa chu ka u awm ah a bei nghal thlawp ,nghet  lutuk a min kuah in a ka atang a thaw chhuak ham ham a.





“Vawikhat mah ka nau  i nilo tih kha sawi tawh suh,ka nau i ni a thisen zawm kan ni emaw,nilo emaw ka nau i ni reng dawn”, nghet charh a a tih tak ah chuan tap hlawp hlawp in ka u chu ka kuah let a,  ka chhip ah a hmui a nawr vang vang in, “ka nau i nilo tih kha sawi tawh ngai suh ang che ,min tiam rawh ka nau i ni reng ang tih hi” a tih chuan ka bu nghat nghat a
,kan sir ah ka nu pawh in a mittui a lo hru ve zeuh zeuh reng bawk.




Ni e keini hi unau inhmangaih tak leh in ngaih tak kan ni a, ka u bul ah hian glue ang mai in ka bet chawt reng thin a ni si  a,ka u lo dawnsawn dan chu ka rin phak bak a nih avangin ka phurrit zawng zawng chu a bo vek ni mai in ka hria. Ka lawm a,ka hlim bawk,.Chutih lai chuan ka pa office bang pawh rawn thleng in kan awm dan a rawn hmuh chuan ka u in engkim a hre tawh tih a hrethiam nghal a ni mahna,






  “Sitting room lam ah thukhawm lawk ang u”, a rawn tih chuan ngawi reng in kan nufa thum chuan ka pa chu kan zui dial a.



Kan vai a sofa a kan thut tak thap hnu chuan ka pa chuan aw a han thian hmasa deuh kharh a

” awle  bawiha pawn engkim i hriat tawh ka ring a ,hriat fiah loh i la neih chuan nakin ah inzawhna hun a la awm tur ah ngai ila ,tun ah chuan i nau diktak chanchin ka hriat ang te leh ka thu tlukna sawi phawt ka duh a ni.” A tih chuan, ‘nau diktak’ tih chuan engtin emaw in min deng dawt in ka hria,mahse ka awmdan ah erawh  ka tilang lem lo thung.




Chutah ka pa bawk chuan, “tun ah hian kan fanu Sawmzeli  chu, Aizawl ah a awm mek a ,an khawsak a harsa ve hle ni in a lang,chuvang chuan kan fanu a nihna ang in hetah ,a thisen zawm diktak te bul ah  hian rawn cheng ve se ka duh a ni,tun a a mah enkawl tu pawh hi mi tha tak a ni a, a ni  pawh kan theih ang ang a kan chhawm dawl a ngai ang,ka thu tluk na ah chuan tuman harsatna kan neih ka ringlo”, tiin ka pa chuan a thu tluk na chu a sawi a.




A tawngka chhuak atang chuan an fanu diktak chu kan inchhung a lakluh ngei a tum zia a hriat theih.




Pawi tihna ka nei hran lo bawk,keipawn diktak chuan ka nu diktak chu hmuh ve ka chak a,mahse ka nu leh pa ka hrilh ngam silo, “a room tur kan siam chhungin Dawngtei room ah hian awm ve mai se..”, ti a ka pa in a sawilai chuan,




“A theih loh” ka  u chuan a lo ti chhuak mauh mai,a ni chu kan vai chuan kan en ang he haw hlawm a,


“Zoremsang tun ah khan eng maw i sawi kha “, ka pa chuan a tichang ta fak mai ,a aw ri ah chuan ka u thusawi zawh chiah vang khan a lawm zawk zawk lo tih a hriattheih.





“A theih loh hetah hian rawn awm suh se ” ka  u bawk chuan a rawn ti leh a, ka pa mitmeng chu a nelawm zawk zawk tawh loh kher mai ,keimah chu ka lo tang tung a ,ka lo in hum ruh ve nghek ringawt.



“Ngawi rawh,i nau a ni a ,kan thisen a ni bawk ,he in ah hian thu neitu ka nih ang in i nau chu ka la lut khawp ang, i rem tihna ka mamawh lo ,piang nawn leh pawh nila a nilo nau i nei tawh dawn chuanglo,” thinrim tak in ka pa chuan a ti chhuak that a, ka pa thusawi thu mal khat chuan min vit sawk nimai in ka hria .




Ni e, ka u hian Sawmzeli chiah  nau a nei miau a ,mahse ka pa thusawi dan chuan min tina takzet ,ka pa pawh chuan a thusawi chu a hrechhuak zawk a ni mahna inthiamlo hmel tak in min rawn melh zawk a ,ka lo nui lui seih ringawt mahse ka thinlung erawh a va dam silo em .




Ka pa thusawi vang chuan ka u chu a nui suk a, muangchang a a thutna atang  tho in,




“Ni e nau pakhat chiah ka nei chu chu Vanlaldawngzeli a ni,a nilo nau ka nei lo a ,nau dang ka duh lo bawk ,ti hian chhungkua kan kim a, chhungkaw member dang ka mamawh lo e,” nghet charh a a tih chuan ka ilo ip chawih thei .




A ruk tak chuan ka  u ngaihdan vang hian ka lawm a, mahse ka nu leh pa lak ah ka inthlahrun phah in nuamlo ka tih phah bawk ,”Zoremsang nang hi” seh chilh deuh nak in ka pa chuan a ti a, ka nu in a lo chelh vat .




“Nau pakhat chiah ka nei tih hre reng rawh u Vanlaldawngzeli lo chu tumah ka pawm lo,” ti nghat in a room lam ah a chho nghal daih a ,kan boruak chu a rit takzet ,chutah ka nu leh pa lam hawi in.



“Lo lungngai su, ka u chu keiman ka lo hrilhfiah ang” ti sep in inchung lam ah ka chho ve nghal a, “pa a kan naute awmlai hi chuan i tawngkam fimkhur, rawh a rilru nat dan tur kan hriat kha”, ka nu in a tih ri chu  ka hre reng ,in petruh fan fan chungin ka  u room lam chu ka pan a .

Conti….

Leave a Reply