You are currently viewing magnetic 3

magnetic 3

Spread the love

Ka  u room kawngka chu muangchang in ka hawng a ,room chhung ah chuan dak de de in ka mit ka lenkual a, mahse  ka hmu miah lo ,room chhung ah chuan ka lut a chutih lai chuan ka  u chu bathroom atang a rawn chhuak chiah ,”englo u” ka lo ti nghal vat.

Min  melh zawk bak chu ka awm ve tih pawh hrelo ang mai in a thawmhnaw bawm a hai nghal mual mual a, “u thil sawidun ang”, a bul ah kalhnai in ka ti sap a,a thawmhnaw hai lai chu chawl det in ,min rawn melh leh zawk a, engmah sawilo in a thawmhnaw a hai zawm leh nghal mual mual .

Ka thaw hak a, ka u ban ah chuan vuan in, ” u ka pa chung ah i lungawi lo a nihpawn ka chung ah hi chuan i lungawi lohna tilang lo teh,hetia ka lak a i awm hian nuam ka tilo a nia,bak..bak ah nangmah lo chu tumah neih ka neih loh hi”, ka tawng tawp lam chu ka hnuk a ulh deuh avangin a ri chhuak chang chang chauh.

Ka u chu a thaw hak a, chutah a awm ah chuan  min kuahbet in ka hnung a chul hliau hliau a , ka mittui lo hnai tiam tiam chu  thunun zo lo in a rawn luang thla ngiai ngiai tawh ka tap chhuak hak bawk.

“U ka chhungkua in nih na a bo dawn lo a,chu vangin Sawmzeli  pawh hetah lo awm mai rawh se,in bul a awm ka duh tawh loh vang nilo in keipawn ka nu chu vawikhat tal hmuh ve  ka duh”,ka ti chhuak tiau a, ka insut zui leh hraih bawk,ka u chuan min kuahna chu thlah thawl in tlem in min nawr hla deuh a.

“A tha e, i thutluk na ang chu ka pawm ang ,nangmah vang chauh in ” a ti sup a ka mittui a tuaihul  pah bawk.

  “Ka nu leh pa rilru tur pawh dawn ve la,Sawmzeli lo awm ve vangin kei min hmangaihna a bo phah dawn hleinem”, ka ti leh sep a,ka  u pawh a bu ta nghat.

Sawmzeli chu engtia lo dawnsawn tur nge ka hrelo a ,eng ang mize pu nge a nih lah ka hre hek lo,mi tha tak a nih beisei phawt ang.

Kar thar law law ah Sawmzeli chu kan in ah a rawn insuanlut dawn a ,ka room pawh kan singsa nasa viau mai ,room chep lutuk ka ngainat loh avang in ka room hi a lian ber a, bathroom hi ka u nen room ah kan nei hrang bawk,Sawmzeli nen pawh awm ila kan la thawl dawn lutuk tho. Ka room ah chuan khum pakhat kan dah belh a Sawmzeli thawmhnaw dah na tur pawh kan siamtir nghal vek bawk ,kar thar kan chuankai meuh chuan kan inpeih thawkhat tawh hle. Sawmzeli room tur pawh muangchang in kan khawih bek bek a,bathroom a nei hrang ve dawn lo thung,inhnuai lam bathroom a hman mai a ngai
ang thla tam ka room chu min tawm ka ring lemlo bawk..

Vawiin ah Sawmzeli a rawn insuanlut dawn a ka nu leh ka pa an phur tawh hle,keipawh a ruk tak chuan ka nu diktak ka hmuh theih dawn avangin ka phur ru hle ..School ban veleh khawi ah mah pengkawi lo in inlam ah ka tlang nghal a, in ka thlen chuan pawn ah motor lian vak lo pakhat hi a lo ding a kan motor  a nilo tih ka hria ,a awmzia chu Sawmzeli  a lo thleng tawh tih na ,a nihchuan ka nu diktak pawh kan inchhung ah a awm mek tihna.

phur ru tak a inchhung ka luh chuan min hnungchhawn zawng hian hmeichhe pahnih hi an lo thu a,ka nu leh Sawmzeli tih ka hre mai.

“Bawihte i lo thleng tawh maw hei i nau leh aaa..i nu an nih hi”,ka nu chuan a lo ti thuai a ,chu veleh min hnungchhawn a thu hmeichhe pahnih chu an rawn hawi nghal vat, ka lai lek lek nghe nghe,ka nu diktak hmel chu a dam thlap a ,a mgilneih hmel ngawih ngawih,muangchang in an thutna lam chu ka pan a ka nu leh pa bul ah ka thu nghal.

“Bawihte hei hi i nu chu a nih hi chibai buk la”, a tih chuan ka nu lam chu hawi in, “chibai le,n..n..nu” ka ti sep a,hmangaihna mitmeng a min entu chu kuah vawng vawng chakna in ka khat,vawikhat hmuhna ah ka nu diktak hi hetiang em em hian ka thinlung ah a tlak nat ka ringlo kha nia ,mahse thisen chu a lo chak a nia nge,a mitmeng pawisawi lo tak sawn min hneh ngawih ngawih,chutia kan lo thutkhawm laih lai chu ka u pawh a rawn lut ve hlawl.

“Bawiha hetah hian lo thu teh”, ka pa chuan a lo ti vat a,ka u pawh ngawireng in kan bul ah chuan a lo thu ve mai bawk.

“Hei hi i nau Sawmzeli a nih hi, chuan hei a nu pi  Rinawmi”, ka pa in a tih chuan ka  u chuan ka nu chu a chibai nghal thuai a, Sawmzeli nen pawh an in chibai bawk.

“Princess ka chho dawn a, i lo chho ve nghal dawn em ,thil ka lo hawn che a nia i duh ngawt ang”, Sawmzeli nen an in chibai zawh veleh ka  u chuan a ti nghal a, a hmel a hlim hmel sarh bawk, ka u hlim hmel chuan min ti lawm veng veng mai .

“Ih.. pa englo engtin nge a ni hi ka koh dawn,” inthlahrun hmel ang reng tak in Sawmzeli chuan a ti sep a, “i u a nia,  i u loh ten le ,” ngainatawm tak in ka pa chuan a lo ti thuai a,Sawmzeli pawh veng hawk hmel a pu deuh ka  u lah chu Sawmzeli tawng veleh a tum hmuk si a ,Sawmzeli tan a nuam duhlo viau in ka ring .

“A nih chuan u homework ka ngah deuh a naktuk a submit ngei ngei tur a ni sia min tihpui hman a ngem,” Sawmzeli chuan a ti sep a.

“Hman lo” ka  u chuan a lo ti hmuk a nihchu,a tawng dan lah a nelawm loh mai sia Sawmzeli chu ka melh zawk a, rilru nat hmel deuh in ka  u chu a lo melh kar a, a hmui a pet fan fan bawk, ka khawngaih reuh ngei mai,nakin ah  ka  u hi ka hau ngei ngei ang ,a nau a nia  a be tha tur a ni tawp mai .

Chutah ka u chuan min en in a nui leh ang sang lawi a, ” ka lo han chho hmasa a nge lo chho vat rawh aw,” dam thlap chuan a ti a, Sawmzeli a biak dan leh min biak dan aw ri chu a dang hlak.

ka  u chhoh hnu chuan muangchang in keipawh ka thutna atang ka tho a ,kal mai a tum chu ka nu chuan,

“Tikhan i u lehkha han in zirpui tir rawh eitur  ka lo pe ang cheu,,”  a lo ti a,, ka bu nghat,Sawmzeli ka va en leh chu lo en lo ila ka ti zawk ngawt mai,a mitmeng chu min thikna hlir in a khat a ,min huatna ka hmu tel tlat bawk in ka hria, thil hi ka duhdan leh ka lo beisei dan ang ngawt chuan a thleng dawn lo a nih hmel .

…….

Kan in ah Sawmzeli pawh kar khat lai a awm ve tawh, a tir chuan a inthlahrung in kan lak ah a inkiltawih deuh na in ,tu man kan biak chhiat ngai loh vang leh kan ngaihtuah tlan em avang in a in kiltawih rei bik lo, ka  u nen erawh an la inbe tha thei meuh lo a ,Sawmzeli chuan a ngaina tih ka hria,ka  u zawk hian a betha lo a ni mah zawk, vawitam ka hau a mahse awmzia a awm lo ‘nau pakhat chiah ka nei’ tih chauh in min chhang mauh mai zel a a buaithlak lam hret thin.

Zankhat ka inbual zo bathroom atang ka chhuak chiah chu ka ding chawt, “E nge i tih kha” ,ka ti fiah fak ,ka thawmhnaw bawm atang Sawmzeli chuan ka thawmhnaw a lo la chhuak mawlh mawlh a nihchu.

” Ka thawmhnaw hi a leng tawh lo a i thawmhnaw bawm hi ka lo hawh lawk a nge ka room an la peih silo a, ” Sawmzeli chuan a lo ti a,chutia ka thawmhnaw a duh dan dan a a lo ti kual chu ka lawm tehchiam lo ,a thawmhnaw bawm hi a te zawk a ni a, hetah a lo awm atang hian thawmhnaw thar a ngah chak a chuvang chuan a thawmhnaw bawm ah a lenglo a ni maithei .

“Ka thawmhaw i khawih dawn a nih chuan min dil hmasa tur i nia sin,min dil in min hrilh hmasa nila phal loh tur thu a awm miah lo a, keichuan thawmhnaw pawh nang aiin ka nei tlem zawk a mahse i duh dan dan a ka thawmhnaw lo sawnkawi ngawt tur i nilo a nia.” Khum lam pan chung chuan ka ti hmak hmak a ,khum a ka thawmhnaw let rum ho chu ka la khawm nghal mawlh mawlh bawk.

Ni e, ka zep lo Sawmzeli hi ka ngaina hlawl lo, ni hnih kal ta atang khan kan boruak hi langsar tak nisi  lo hian a alh hlep hlep tawh ,min ngaithei lo tih ka hria a, ka lak a ka chhungte awmdan ah a lungawi lo a min thik a nih ber  chu.

“Opps.. a lehpek ah chuan ka dil tawh ang che,” a rawn tih leh chuan ka thawmhnaw  pawm lai chu ka dahthla hnawk a , ka melh nghal hrawk bawk.

“I duh leh ka thawmhnaw bawm chu nei rawh i awt viau a nihchuan”, ka ti hmak a, ka thawmhnaw ka khawih zawm leh nghal.

“Ka nu leh pa hian nuamsa takin an enkawl rei tawh che a tun ah chuan ka hun a thleng ve tawh ,hospital ah khan min lo thleng lo se chuan nang hi rethei bakberh tak in i seilian ang”, min tih chuan ka thil tih lai ka chawl leh dat a,a tawng sehchilh dan ah chuan a thinrim tih a hriat theih keipawh ka thinrim ve tho .

“Mahse kei nilo in nang alawm rethei tak a seilian chu, ” a mit ah tak en chung in ka ti let ve sak,a mitmeng ling hlar a min en in, “nang..mi rethei fa kha i nu rethei tak hnen ah let leh rawh ,mi rethei fa chu mi rethei in ah a khawsa tur a ni ,” a rawn ti fak fak a, ka kut ka hum ruh tawh hle.

“Khatin nangmah enkawl seilian tu che hmusit tak in sawi suh,hetiang chen thleng tur hian tha tak in a enkawl che ,” ka ti fiah fak a . Sawmzeli chu a nui ro halh,

“Mi hnuaihnung nufa” a tih leh sak lai chuan, “tumaw mi hnuaihnung chu,” rawn ti chang fak tu lam chu kan hawi rual nghal thawt.

Ka u chu kawngka bul ah a lo ding a,a mitmeng ah chuan a lawm lo tih a hriat theih ,”ih,u englo a nia” ,Sawmzeli chuan a ti bah nak a.

“A tawk, eng mah sawi suh,i ka atang khan engthu mah a chhuak tawh tur a nilo,nangmah enkawl seilian tu che pawh zahna i nei miah lo hi zak ngawih ngawih rawh,” ka  u chuan a ti chang ta fak .

“Hmusit tak a Dawngtei i tawngkhum leh tih ka hria a nihchuan i chaklo khawp ang,he in a mikhual chu a ni nilo in nangmah i ni,i hming tawp a kan hnam hming  a awm ve  tak vang ringawt khan hemi chhungkua a mi ah hian i lo in ngai a nge ,he chhungkua a naupang ber chu Vanlaldawngzeli a ni, thu neitu pawh Vanlaldawngzeli tho, nangchuan he in ah hian thu neih na leh chanvo pakhat mah i neilo tih hria ang che,” ka  u chuan a ti leh fak fak a. Sawmzeli in petruh nasa lutuk chu a mittui a tling par tawh ,ka u chu keipawn duh aiin a tawngna hret ka ti ve tho.

” u a tawk” ka tih lai mek chuan, “Zoremsang tun a i thusawi zawh chiah han sawi nawn leh teh,Sawmzeli hi he in ah hian eng maw a nih a ,,naupang zaktheilo lutuk,” ka pa chuan a rawn ti khur khur a ,room pawn ah ka pa hi a lo awm reng tihna a ni maw,

” I nau kha ngaihdam dil nghal rawh” ka pa chuan a ti vin leh that a,ka u erawh a ding ngawi ngul thung.

Chutah Sawmzeli chu a rawn tap ri feih feih a, “pa he in ah hian ka leng velo a nih hi”, a rawn ti tiau,ka u chu a nui ro halh a, ka pa in Sawmzeli kuah tum a a pan lai
chuan,

“I fanu ka thutha hrilh rawh” ka  u bawk chuan  lo ti leh fak a.

“Zoremsang ngawi hmak rawh” ka pa in a lo ti ve thung,ka pa chuan Sawmzei chu a kuah a,ka  u erawh a thinrim em avangin room atang chuan a chhuak daih,a insum zawh loh a hlau te pawh a ni maithei.

“Bawihte  enge awmzia enge thleng” damthlup in ka pa chuan a ti a.

“Eng lo  nia pa,ka thawmhnaw hi a bawm ah a leng tawh lo a chuvang in Dawngi thawmhnaw bawm ah hian ka thawmhnaw ho hi ka lo dah a, ka lo hrilh theihnghilh daih bawk nen a lungawi lo a chuan,min ankhum ta a ,kan inhauh lai khan ka u kha a lo lut a tikhan min rawn ti ringawt a, engmah a hrechiang tawp silo a.” tap hlian hliam chung chuan a ti a,

A lu ah duat hmel tak in ka pa in a chul hliau hliau bawk ,”pa ka u hian a nau ang in min pawm thei miah lo a ni tiraw,” a ti leh tiau a, a tir atang engmah hrelo tan chuan khawngaihthlak tak tur a ni,mahse kei erawh in a lemchan thiam zia chu mak ka lo ti viau zawk.

“Nilo e chutiang a nilo,i u khan hun a la mamawh deuh a nih kha i hriat ang in engkim hi a tleng zung zung si a, ” ka pa chuan a ti dap dap a, chutah kei chu min rawn en in ,

“Thawmhnaw dahna mai mai chu eng ah nge maw i ui viau le,nangchuan thawmhnaw pawh i nei tlem zawk a nakin lawk ah i nau pawh a room ah a awm mai dawn a a zialo thin emai,” ti a ka pa in min dem na awka a chhahchhuah lai chuan ka awm zawn hi a na vawng vawng mai.

Kei ai in a darkar chauh in Sawmzeli hi naupang mahse ka nu leh pa chuan ‘i nau’ an ti tho ,engmah hrechiang lo in ka pa chuan min dem nghal ringawt tihna a nia, ka mittui lo far fep chu hru zauh in,

“Engmah i hrelo, ka thawmhnaw bawm hi ka uilo nei vek rawh se,” ti chhuak tiau in khum atang ka chhuk a, room chu ka chhuahsan hmak .

“Aww!! a mak thin ,Dawngzel, bawihte,”ti a ka pa in  min ko ri chu hrelo ang hmak in inhnuai lam ah ka penthla hmawk hmawk a,tun nihnih chhung khan ka pa hian engmah hrechiang lo a Sawmzeli vanga min hauh a ching a ,keimah chiah min dem thin chu chuan min tina takzet ka pa hi ka pa diktak ni ve se ka ti ngawih ngawih bawk.

inhnuai ka thlen thlak chuan ka u pawnlam a chhuak tur chiah chu ka va hmu hman, “u khawnge i kal dawn” ti in ka be nghal vat a.

” Ka chhuak lawk dawn,” tih pah in a bike chahbi ken lai chu a vai vir pap a.

“Ka lo kal ve dawn, ” ka ti nghal thuai,  min en vung vung hnu ah “nih, lo kal rawh kan let leh thuai dawn nia,” ti sup in a chhuak nghal a, keipawh in ngawi reng in ka zuichhuak ve nghal ,a bullet chu ti nung vut vut in  a hnung a chuang tur a min tih pah chuan a lu a thle bak a, keipawh a hnung ah chuan ka lawn nghal thuai  ,khawpui atang a hla ve tak phul hmun nuam deuh ah min hruai a,kan unau in phul hmun ah chuan thu in ka u chuan a kut khinghnih in a hnunglam a innem khalh  a, a hmazawn chu a en vung vung bawk ,a tawng loh avang chuan sawi mai tur pawh min ti hrelo,keipawh in kan hmalam chu ka thlir ve ta reng ringawt,chutah ka u chuan ,

“Unau thisen zawm kan ni lo hi i lawm em,” a rawn tih sup chuan ka u lam chu ka hawi nghal vat.

A ni erawh in a hmalam chu bing tak in a lo la en ngar a ,a ngaihtuah tam hmel viau bawk ,”e nge i sawi awm zia?,ka hrelo diktak chuan lawm tur nge lawm loh tur ka hrelo,ka u ni reng la tun a kan awmdan hian awm reng thei ila ka ti,,” ka tih sep chuan a nui ri suk a,mitmeng hriatthiam har zet a min rawn melh in,,

“I duh ang chuan awm reng thei ila ka ti,” a ti sup a,a mitmeng tak ngal leh a thusawi duh dan chuan eng emaw kawng zawng tak in ngaih that loh na lian tak min neihtir tlat,midang tan chuan chhanna pangai tak ang in lang mahse tette  atang a a mah hretu leh, englai deuh thaw a a kiang a awm reng thin tan chuan a thusawi zawng a a hmel tak ngal leh a awmdan danglam lutuk chu ngaihthat pui na chi ni in ka hre velo.

“U diklo a awm em ni,” ka ti ta ringawt, ka hlauthawng  ani,ka u pawh hian ka pa ang tho a a ni tel a min hlat ve ka hlau chutah a nui suk a ka sam chu rawn thuai thuak pah in,

“Diklo awm lo e ka nau i ni hi ka lawm,ka kiang ah awm reng ang che”, a tih tak ah chuan ngaih la tha zan lo mahse tlem chuan ka hlauhthawn ruk na a kiam deuh.

“U nang chuan min kalsan ve miah suh aw,ih,englo ka pa ang in ka thiamloh pawh nilo ah min hau lo la ,ka thiamloh na ah pawh nise min tan zel rawh aw,” ka ti niah niah a ka  u chu a nui chhuak huk .

“khai!! i thiamloh na ah pawh ka tan zel che chuan ka duatsual mai ang che tih pawh a hlauhawm dawn a nihchu,” nuihza insum tak a a tih chuan ka melh nghal ram ram.

“Min tan lo vaih teh i chaklo ang,” tih hlak pah in ka kuttum chu ka hmuh a.

“Ok ok,ka hria e ka tan ziah ang che,” tih pah in ka kut chu a la kiang a ,a nui zui hak hak, keipawh ka awmdan naupang chhia zet vang chuan ka nui ve hak a, “haw tawh ang a tlai tawh” tih leh thawh a rual nghal a ,a kut min rawn pek chuan ka lo ban vat ,zanlam boruak a ni tawh bawk nen chhum awm tan tawh in boruak ah chuan a paw chiai a,bike a khalh chak vangin thli leh chhum lei vak paw chiai te chu kan tawn tlang pawp pawp ni mai in ka hria, ka tah a chhuah em vang pawh ni lo thlithaw in ka mit a chhem vang zawk in ka mittui a rawn hnam leh tiam tiam thin ,boruak lah chu a vawt vur mai bawk si a ka khur beuh beuh tawh.

Ka  u chuan eng emaw hi a rawn sawi lung lung a, mahse kan tlanchak bawk nen a thusawi chu eng mah ka hrelo.

“Eng maw i sawi” ring lenglawng chuan ka ti let ve a ,ka  u chuan tlem in bike chu a khalh muang deuh a, “ka jaket chhung ah hian zenlut la min rawn kuah rawh” ring lenglawng chuan a ti a ,keipawh in vawt ka tih tawh em avang chuan a lather jaket hak lai chhung ah ka kut pahnih chu zenlut in, a kawng ah chuan ka kut chu a suihzawm a.

“Min rawn ngheng rawh,” a ti leh lung lung a,keipawh thuawih takin a hnung ah chuan ka bei ta hle hle, reivak lo ah ka nghen na lai leh a kawng a ka kuahna lai chu a rawn lum ham ham a, a hma ai thawt chuan ka awm pawh a nuam tawh zawk,ka mit  chu ka chhing vang vang a, a hnung a ka bei hnu rei vaklo ah bike chu a khalhchak sauh a, tun a ka awmdan  hi ka hahdam pui in ka thla a muang hliah hliah  ni mai in ka hria.

“Princess,i harh em,” ti a tawng thawm ka hriat chuan ka mit ka meng diar diar, kan in kawt ah kan lo ding reng tawh chu ni in,ka  u kawng ah chuan ka la kuah reng a a hnung ah pawh ka la bei reng.

“I lo muhil hman em ni” min rawn thlek zauh pah a a tih chuan ,”a niang,kan thlen lai ka hre miah lo” ka lo ti sep, bike atang chuan ka chhuk a ka u bike hung tha lai pawh chu inchhung a luhsan mai lo chuan ka lo nghak a.

Inchhung kan luh veleh, “khawnge in kal” sofa a thu chung in ka pa chuan a lo ti nghal nghut.

“Kan hawi thawveng lawk” tiin ka  u chuan a ti tha ve mai a, kei erawh tawng chakna ka neih loh vangin ka ngawi kar thung,ka pa chu ka be chaklo a ni mah zawk,  “ka ngaihtuah lutuk cheu alawm engmah in sawi silo a ,a hran ve ve in inchhuak emaw kan ti a kan mang ang hman alawm”, ka nu zawk chuan a lo ti ve thuai.

“Tihpalh” ka lo ti sep ,ka nu chu a thaw hak a,

“Han in thlak ula chaw ei ka lo siam ang che u” ka nu bawk chuan a ti leh a, bu nghat in inchung lam ka pan nghal.

ka room kawngka bul ah chuan ka ding det a, room kawngkhar chu ka melh ngar , he room hi ka ngaina thin,mahse tun ah tak hi chuan luh chakna ka nei miah lo ,ka room ngainat  em em Sawmzeli nen kan inkhei tawn reng na room a a chang ta mai hi ka rilru a na deuh tlat bawk ,thaw hak in kawngkhar chu ka hawng a, ka rin ang ngei in Sawmzeli chu thatchhe zet in a khum ah a lo mu zawi leh nguai tawh, hmeichhia ve si inchhung ah hian tihtur a hre hlawl lo , ka nu puih a tum bawk silo hahthlak tak a ni ,a ni chu hmu reng mah ila ka be lo biak chak na ka nei hek lo.

Ka inthlak zawh veleh inhnuai lam ah chhuk in chaw ka ei a,ka  u erawh in a ei dawn lo a niang choka lam ah a rawn lang lo. Keipawh ka eina ka tihfel zawh veleh room ah lut leh nghal in ka lukham ka la a room atang chuan ka chhuak leh nghal daih ,ka  u room ah chuan lut in,

“U zanin chu i bul ah ka lo mu” ka tih chuan a hmel buai deuh nak chu ka hmu nghal ,”Sawmzeli nen room khat a mut ka peih rihlo” tih leh khum a ka lukham vawmkai chu ka rual nghal a, ka u pawh a lo in siamrem ve nghal mai ,a puan sin lai chu ka tawm a ka awm chin a puan chu pawtchho in ka awm zawn ah ka kut chu ka dah a, inchung celling chu ka en  reng,ka  u erawh  games  khel in a la thu ut thung.

“U naktuk chu ka nu min hmuhpui la,ka sawi awmzia chu min hring tunu ka tihna”, celling lam en reng chung chuan ka ti a, ka u chuan a game khelh lai chawl meuh in min en tih ka hria.

“Tinge i nu chu hmuh i duh teh thut a” hrethiam lo tih hriat tak a a rawn tih chuan ,,” ka duh thut pawh a ni hran lo,ka hmuh chak na chu a rei tawh ka nu leh pa hmai ka zah vang in ka sawi lo mai mai”  ka tih leh chuan,

“Princess nang hian kan chhungkua hi kalsan i tum chu a ni em lo maw” a rawn tih chuan ka  u chu ka en nghal vat, a ni chuan hriatthiam loh hmel tak in min lo en reng .

“Aih ,teuh lo mai,kalsan cheu ka tum hleinem,ka nu ka hmuh duh chhan chu ka nu a nih ang a hriatchian ka duh vang a nia,a mit a min thlakhlelh na ka hmuh khan kuah vawng vawng ka chak ,tuisik ai ngawt chuan thisen chu a lo chak tak tak a niang,” ti in ka nui sap a ,ka  u chu a thawchhuak nghal ham ham mai, hahdam ta sawt hmel a pu bawk ,chutah a hma aia thu tak zawk chuan,

“Kan chhungkaw lak atang a in lakhran lam kha chu ngaihtuah hauh suh ang che,ka pa chu thuhran ah dah ila ka nu ber hi i tello chuan a awm thei dawn hauh lo a nia ,hre reng ang che keipawh i tello chuan ka awm thei dawn  lo a nia,” a tih chuan ka lo bu nghat nghat,ni e ka nu chu ka tello in  a awm thei hauh lo ang, ka pa chu tun ah hi chuan ka chiang ngam tawh lo, ka nu erawh in min endan a la ngai reng a, a ni tel in min hmangaih zual zel in ka hre bawk,chuvang chuan ka nu tan chuan ka theih chin chin ah fa sawisel bo nih ka tum tlat bawk.

School kal tur a ka insiam peih vek hnu ah inhnuai lam ah ka chhuk ve chauh, “vawiin atang Sawmzeli hi in school ah a rawn lut ve tawh dawn a , in class a in an dawn a vang in i lo ngaihven deuh dawn nia,hmelhriat a la nei dawn bawk silo” ka pa chuan a ti chuar chuar a, kei erawh ka chaw ei a tuilo nghal vek ,Sawmzeli nen a school khat a luh ho maw,class in ang ah kan la awm dawn lehnghal ,ka va han peihlo kher em,chu loh ah vawiin chu ka  u nen school kal lo a ka nu hmuh kan tum lehnghal,Sawmzeli kan school ah a lo kal ve dawn a nihchuan kan school kalloh a hre ngei a nga min hek nan a hmang leh ngei ang,naa… kan school a rawn zawm dawn a nih pawn tinge vawiin ah kher, naktuk ah te rawn zawm zawk mai tur a nia.

“Ka sawi chu i hria maw,” ka pa in a tih leh chuan ka pa ka melh nghal vat, tawng nachang hrelo in ka lo hawi  veng veng a nihhmel,chaw ei thulh meuh in ka pa chuan min lo melh reng tawh.

“Aw ka hria” ka ti nghat a  ” i hriat chuan ilo ngaihven dawn nia” tiin ka pa chuan chaw chu a ei zawm leh a, kei erawh ka mood a inthlak leh vek tawh,ka sual pawh min ti maithei mahse Sawmzeli lak a sual nihchu ka pawi ti miah lo.

Ka bag hrui a pahnih a vuan chungin ka  u bike la chhuak lai chu kawt ah ka lo nghak a,a cycle a chhiat atang khan bike a keng ziah tawh a,a  remchang bawk a kan in phur ta ziah.

“School ah bike ken an phal em ni” ka bul a rawn din pah in Sawmzeli chuan a ti a, “phal e” a mah pawh en lo chuan ka lo ti liampuat.

“Kal ila min kalpui loh chuan  chinchang ka hre bawk silo” thawven hmel tak chuan a la ti ham ham zui , a rual kher chuan ka va han kal awm lo tak, “a u nen kan kal dawn nangmah in lo va kal rawh” ka lo ti ve hmak ,Sawmzeli chu a chek hlak a, “bike chuan nuam i va ti awm ve ” a rawn tih leh chuan ka melh nghal nghek ,chimawm lutuk in a nui sak a,

“Kan in ah hian awm lo la chu bike i chuang khat ve ngawt ang ” a tih leh kher bawk, ka va han ngei mai mai tak,mahse ka insum rih,a mi tihdan apiang ka khinlet zel chuan ka pa hian min hlamchhiah telh telh dawn tih ka hria  ,chutia Sawmzeli nen kawt a kan dinlai chuan ka  u pawh a bullet rum hlut hlut chuan kan hma ah a rawn ding a, a hnung a lawnkai mai ka tum lai chuan ,

“Bawihte, awi in kal hman ka hlau lutuk i tiffin tur ka lo siam a chaw kha i ei tlem si a nakin ah i riltam hun ah tiffin hi i ei dawn nia ,” ti in ka nu chuan ka tiffin tur min siamsak chu min pe a ,Sawmzeli lam ka va en chuan min lo melh run teh asin. A mitmeng a thik na nasa lutuk chu ka hmuh hmaih lo bawk ,ka nui sak a ,chimawm chu ka chhuah ve thiam tho alawm.

“Nu  Sawmzeli ta tur i siam ve lo em ni a ni, pawn chaw kha a eitlem riau in ka hria” ngaihtuah ni awm tak chuan ka ti a, ka ngaihtuah tak tak miah lo.

“Awi ,ni dawn tak Sawmtei a awm ve tih ka lo theihnghilh a, bawihte i tiffin tur chu ka va siamsak ve nghal ang che aw min lo nghak lawk la”, inthiam lo tak in ka nu chuan a ti nghal chul, Sawmzeli chu a nui tawi tak mai ,chawh reuh lutuk.

“Ngailo mai nu school canteen ah ka in eipuar thei a lawm” tiin a nui lui sap a , “nih nu kan kal mai aw Sawmzel kan hnung ah zel lo tlan mah rawh aw” nelawm tak a ti leh in bike ah chuan ka lawnkai a,

“Ni e Sawmte cycle khan i u te hnung ah zel hian tlan mai rawh va fimkhur ula” ka nu chuan a lo ti nghal thuai a,phur lo tak in Sawmzeli chuan cycle chu a la chhuak a, ka  u chu a lo nui hak thung.

“Chimawm thiam si” a ti sup bawk .

“I hriat kha,Vanlaldawngzeli ka nih hi” hawi vah chungin kei in ka lo ti thung .

Sawmzeli chu kan hnung ah zel a tlan a ,kawngkual lai kan thlen veleh chak deuh a tlan in Sawmzeli chu kan tlansan daih,nileng in ka nu bul ah kan awm a,  ka nu in min lo thlakhlelh zia ka hrechiang lehzual nu leh fa nge nge chu kan inpawh nghal thuai bawk,tlai school ban hun vel ah kham lo tak chung in kan inthlah a, hmu tur a ka kal leh vat tur thu ka tiam bawk.

In kan thlen chuan Sawmzeli chuan a cycle a lo dahtha mek a, “vawiin ah school in kallo” a lo ti nghal chat,a sawi ngai lo in keini pawn kan hria.

“tah chuan buaina i nei e.m ni” ka lo tilet ve ngat ,a nui hak a ,

“ka pa te ka hrilh khawp ang” a tih chuan ,

“Hrilhpui te i ngai em?” Ka lo ti leh,min melh rum tha leh tawh khawp mak chutih lai chuan ka  u bike dahfel pawh kan bul ah lo phei tawh in pawn ah kan pathum chuan kan ding a .

“Unau diktak in nilo tih inhriat tak ah chuan nula leh tlangval inngaizawng ang mai in in fawr kual ta chu a nia,nang ni hi inlo in ngaizawng reng a nilo maw”, ti a kan pahnih a min melh ralh chuan ka inhum ruh nghek,tawng tum a ka ka an dawn lai tak chuan Sawmzeli biang chu a ri sawk a ,

“I ka bawlhhlawh atang khan engthu mah phuhchhuak tawh suh” a kutzungchal hmuh meuh in ka  u chuan a ti chang fak a, Sawmzeli chuan a biang ka u in a ben na lai chu dawm in muttui tling piau in ka  u chu a en a.

“I nau ka nih hi engtin nge kut minthlak theih” tih leh inchhung lam a tlanluh chu a rual nghal.

“U,kutthlak kher kha a tullo a sin” ka ti nghal vat, “a ho emai lut ang” ti nghut in inchhung lam chu a pan nghal daih,thaw hak in keipawn ka  u chu ka zui ve nghal a,inchhung kan luh rual a ka pa mitmeng dur khup kawngka bul a kan tawh chuan kan ding chawt.

“Zoremsang i nau i beng em ni?” thinrim tih hriat lutuk in ka pa chuan a ti a, a hnung ah Sawmzeli a ding bawk.

“Beng lo” ka  u chuan a lo ti ve thung .

“Dawt sawi suh Sawmzeli hmai a i beng lai kha tukverh atang sawn ka hmu che” ka pa chuan a ti leh khur khur hetiang em em a ka pa thinrim hmel ka a hmuh loh avang in ka lo hlauthawng ru hle .

“Aw,Sawmzeli chu ka beng ka nau erawh ka beng lo,keichuan nau pakhat chiah ka nei Vanlaldawngzeli chiah nau ka nei” chiang kel kawl a ka pa en chung in ka  u chuan a ti a  , ka u biang chu a ri nghal sawk mai,ka ka chu ka lo hup nghal vat a, “pa a!!”  Ka nu in a lo ti chul bawk .

“Hre rawh Sawmzeli chiah nau i nei, a ni lo chu nau i nei lo tih hria ang che, ” thinrim aw khur dat dat a ka pa in a tih chuan ka thin hnun ah hian chemte hriam tak in min chhun nimai in ka hria, awihlo leh rilru na lutuk in ka pa chu  ka melh ngawt ngawt, Sawmzeli chauh hi ka  u tan nau maw lo ti tawh, chu chu ka pa chuan a sawi ngei si, ka mittui lo baw zawih chu hru tawk in inchung lam ah ka tlan chho nghal hlawk hlawk.

“bawihte,Dawngte a pawi emai,pa a engtin nge khatiang thu kha i sawi theih zawk i ti mak lutuk” ka nu chuan a ti chul a ,kei erawh inchung pan na step ah mittui luang chungin ka tlanchho zawt zawt .

Ka  u thinrim lutuk in hrosa ri leh ka pa thinrim ang thawm chu ka hre pha vek,room ka luh veleh ka kalh nghal hmak a,  ka thaw a pik ngawih ngawih, “bawihte,Dawngte kawngkhar hi lo  hawng teh,i pa thusawi kha chu eng ah mah ngai suh aw,i u lak a a thinrim in a sawi chhuak palh a nihkha ,bawihte kawngkhar hi lo hawng teh” tiin ka nu chuan pawnlam atang min au a,, kawngkhar a chum dawt dawt bawk,ka nu chuan ‘a thinrim vang’ ti a ka pa thusawi sawifiah a tum na chu ka awih hauhlo,eng ang pawn thinrim se an chhungkaw mi ah min la ngai a nihchuan kha thu kha a sawichhuak hauh lo ang,min hrilhfiah tum eng ang mahse ka thinlung chu a nat dan tur ang in a na vek tawh,kawngkhar ngheng chuan chhuat ah ka thu tung a, ka u leh ka pa inhau thawm leh ka nu min ko thawm te chuan ka thawk a ti pik hluah hluah ,ka beng chu ka hup tlat a ka  mittui chu a luang zung zung bawk, eng ang pawn ka beng hup mah ila thawm chu ka la hre vek tho si,Sawmzeli kan in a a lo awm ve atang hian kan chhungkaw hlim loh zia tumah hrilh chawp kan ngailo.

Rei tawk fe kawngkhar bul a ka thut hnu ah zawimuang in ka khum lam ka pan a ,ka nu au thawm pawh hriat tur a awm tawh lo ,inhnuai lam ah erawh an la ri bur bur thung ,kan chhungkaw hlim na he ti teh thut a a chhe ta mai hi hriatthiam har ka ti in kan chhungkaw nundan thar chu pawmthiam harsa ka ti takzet.

Khum ah chuan zawimuang in ka mu thla a ka mittui pawh a la luang ngiai ngiai reng,rizai nghet tak in ka chelh a ka awmzawn na lutuk vang chuan ka thaw a chham mai dawn in ka hria,ka pa thusawi chu ka beng ah a ri nawn tluk tluk a ,engtin nge khatiang thu kha awlsam tak a a sawi mai theih zawk,ka thawk rawn sak talh talh vang chuan tah pawh ka tap hleithei lo. Ka awm zawn chu ka chum dat dat a minute thum dawn hnu ah ka thawk sak lutuk pawh a rawn zia ve ta chauh.

Ka lo tap muhil a ni ngei ang ka harh leh meuh chuan khua a lo thim vek tawh,ka phone ka ban vat a zan dar 8 a lo ri daih tawh ,muangchang a tho in ka uniform ka thlak a ,Sawmzeli thil ka hmuh ringawt pawn ka thinrim lutuk chu ka tah a chhuak tun thei,ka inthlak zawh veleh ka mu leh nghal hmak .

Zan khua in room kawngka ka kalh a, khawnge Sawmzeli a riah tih lam ka ngaihven peih lo, zankhat chauh pawh a tello a ka room a hun hman chu ka thlahlel a ni.

School kal tur a ka insiam mawlh mawlh lai in Sawmzeli chu a rawn lut a.

“Zankhua in room i kalh a sofa ah ka mut phah” tiin a rawn phun lut nghal hlak hlak ,ka ngaihven peih lo a duh chen chen phun rawh se, “final exam a hnaih tawh tehreng nen engmah pawh a zir theilo nangmah vang vek”a tih leh hlak hlak chuan ka nui chhuak hak,ka nuih zat vang a ni hauh lo tih erawh kan pahnih chuan kan hre ve ve .

“Keimah vang a lehkha i lo zirthei lo chu pawi khawp mai,keichuan nangmah vang mai mai  a ka zirlai zir theih loh ka tum ve lo tlat” ka lo ti hmak ,min melh rum leh tawh ngang mai .

A tawng leh hma in room atang ka chhuahsan hmak a,inhnuai ka chhuk chuan sofa ah ka pa a lo thu a.  min hmuh veleh min lo ko nghal,ngawireng in a bul ah chuan ka va ding a.

“Nizan a ka thusawi te kha ka tum vang reng a sawi ka nilo tih i hria tiraw,ka sawitum a ni miah lo a nia”, inthiamlo tak a a tih chuan hnuailam en ran in ka ngawi reng ,a tum vang reng a sawichhuak nilo mah se a rilru put hmang a langchiang tawh viau ah keichuan ka ngai hmiah tawh,mahse ka chhanglet duh chuang lo boruak a chhiat leh zual ka hlau a ni .

“Bawihte,i pa hi min ngaidam tiraw” a tih chuan a zawhna pawh chhang lo in,

“Ka kal a nge” tiin ka pa chu ka kalsan daih, min thlir zui vung vung na in min ko let lo ,min kohlet tum pawh nise ka let kher lo ang , pawn ah ka  u chuan min lo nghak reng tawh,min hmuh veleh min lo nuih lui suk a keipawn tawite in ka lo nuih let ve ,a bul ka  thlen chuan,

“Nizan khan ka tibuai duh ta lo che a nihkha,hunthawl i mamawh ka ring a” a lo ti nghal sup,tawng ka a chhang lo in ka bu nghat ringawt ,chutih lai chuan Sawmzeli pawh a rawn chhuak ve chiah.

“U vawiin chu lunch break ah kan class ah i lo kal lawk thei a ngem ,ka thian ten chhelo an ti lutuk che a ” zan lam a thil thleng hre tawh lo ang mai chuan a rawn ti a ,ka lo ner nak .

“Ka hman lo,bak ah i thian te an nia ka thian te nilo in” ka  u chuan a lo ti hmak.

“Mahse u an star che a lawm” Sawmzeli chuan a la ti hram ,bike a lawnkai pah in ka  u chuan ,

“Ka buaina a nih loh chu” a lo ti leh hmak,nui rah rah chung in bike ah chuan ka lawn a kan tlanchhuak nghal daih.

conti……

Leave a Reply